ਅਭਿਧਮ੍ਮਪਿਟਕ

ਸਂਗਾਯਨਸ੍ਸ ਪੁਚ੍ਛਾ ਵਿਸ੍ਸਜ੍ਜਨਾ

ਪੁਚ੍ਛਾ – ਪਠਮਮਹਾਸਂਗੀਤਿਕਾਲੇ ਆਵੁਸੋ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਪੋਰਾਣਸਂਗੀਤਿਕਾਰਾ ਪਠਮਂ ਵਿਨਯਪਿਟਕਂ ਸਂਗਾਯਿਤ੍ਵਾ ਸੁਤ੍ਤਨ੍ਤਪਿਟਕੇ ਚ ਦੀਘਮਜ੍ਝਿਮਸਂਯੁਤ੍ਤਅਙ੍ਗੁਤ੍ਤਰਸਂਖਾਤੇ ਚਤ੍ਤਾਰੋ ਮਹਾਨਿਕਾਯੇ ਸਂਗਾਯਿਤ੍ਵਾ ਤਦਨਨ੍ਤਰਂ ਕਿਂ ਨਾਮ ਪਾਵਚਨਂ ਸਂਗਾਯਿਂਸੁ.

ਵਿਸ੍ਸਜ੍ਜਨਾ – ਪਠਮਮਹਾਸਂਗੀਤਿਕਾਲੇ ਭਨ੍ਤੇ ਧਮ੍ਮਸਂਗਾਹਕਾ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਪੋਰਾਣਸਂਗੀਤਿਕਾਰਾ ਪਠਮਂ ਵਿਨਯਪਿਟਕਂ ਸਂਗਾਯਿਤ੍ਵਾ ਸੁਤ੍ਤਨ੍ਤਪਿਟਕੇ ਚ ਦੀਘਮਜ੍ਝਿਮਸਂਯੁਤ੍ਤਅਙ੍ਗੁਤ੍ਤਰਸਂਖਾਤੇ ਚਤ੍ਤਾਰੋ ਨਿਕਾਯੇ ਸਂਗਾਯਿਤ੍ਵਾ ਤਦਨਨ੍ਤਰਂ ਅਭਿਧਮ੍ਮਪਿਟਕਂ ਨਾਮ ਪਾਵਚਨਂ ਸਂਗਾਯਿਂਸੁ.

ਪੁਚ੍ਛਾ – ਇਮਿਸ੍ਸਮ੍ਪਿ ਆਵੁਸੋ ਛਟ੍ਠਸਂਗੀਤਿਯਂ ਸਕਲਞ੍ਚੇਵ ਵਿਨਯਪਿਟਕਂ ਸਂਗੀਤਂ, ਤੇ ਚ ਚਤ੍ਤਾਰੋ ਮਹਾਨਿਕਾਯਾ. ਕਾਲੋ ਦਾਨਿ ਆਵੁਸੋ ਸਮ੍ਪਤ੍ਤੋ ਅਭਿਧਮ੍ਮਪਿਟਕਂ ਸਂਗਾਯਿਤੁਂ, ਤਸ੍ਮਾਹਂ ਤਂ ਤਤ੍ਥ ਪੁਚ੍ਛਿਤਬ੍ਬਾਨਿ ਪੁਚ੍ਛਿਸ੍ਸਾਮਿ. ਅਭਿਧਮ੍ਮੋ ਨਾਮੇਸ ਆਵੁਸੋ ਕੇਨਟ੍ਠੇਨ ਅਭਿਧਮ੍ਮੋਤਿ ਵੁਚ੍ਚਤਿ.

ਵਿਸ੍ਸਜ੍ਜਨਾ – ਧਮ੍ਮਾਤਿਰੇਕ ਧਮ੍ਮਵਿਸੇਸਟ੍ਠੇਨ ਭਨ੍ਤੇ ਅਭਿਧਮ੍ਮੋਤਿ ਵੁਚ੍ਚਤਿ.

ਪੁਚ੍ਛਾ – ਸੋ ਪਨੇਸ ਆਵੁਸੋ ਅਭਿਧਮ੍ਮੋ ਕੇਨ ਕਤ੍ਥ ਕਦਾ ਚ ਅਧਿਗਤੋ.

ਵਿਸ੍ਸਜ੍ਜਨਾ – ਸੋ ਖੋ ਭਨ੍ਤੇ ਅਭਿਧਮ੍ਮੋ ਸਬ੍ਬਞ੍ਞੁਬੁਦ੍ਧੇਨ ਮਹਾਬੋਧਿਮਣ੍ਡਮੂਲੇ ਵੇਸਾਖਪੁਣ੍ਣਮਿਯਂ ਯਥਾਭੂਤਂ ਅਧਿਗਤੋ.

ਪੁਚ੍ਛਾ – ਕਤ੍ਥ ਪਨੇਸ ਆਵੁਸੋ ਅਭਿਧਮ੍ਮੋ ਭਗਵਤਾ ਕਦਾ ਚ ਵਿਚਿਤੋ.

ਵਿਸ੍ਸਜ੍ਜਨਾ – ਸੋ ਖੋ ਭਨ੍ਤੇ ਅਭਿਧਮ੍ਮੋ ਭਗਵਤਾ ਮਹਾਬੋਧਿਮਣ੍ਡੇ ਰਤਨਘਰਸਤ੍ਤਾਹੇ ਵਿਚਿਤੋ.

ਪੁਚ੍ਛਾ – ਕਤ੍ਥ ਪਨੇਸ ਆਵੁਸੋ ਅਭਿਧਮ੍ਮੋ ਭਗਵਤਾ ਕਦਾ ਕਸ੍ਸਤ੍ਥਾਯ ਚ ਦੇਸਿਤੋ.

ਵਿਸ੍ਸਜ੍ਜਨਾ – ਸੋ ਖੋ ਭਨ੍ਤੇ ਅਭਿਧਮ੍ਮੋ ਭਗਵਤਾ ਦੇਵੇਸੁ ਤਾਵਤਿਂਸੇਸੁ ਪਾਰਿਚ੍ਛਤ੍ਤਕਮੂਲਮ੍ਹਿ ਪਣ੍ਡੁਕਮ੍ਬਲਸਿਲਾਯਂ ਅਭਿਸਮ੍ਬੋਧਿਤੋ ਸਤ੍ਤਮੇ ਵਸ੍ਸੇ ਮਾਤਰਂ ਪਮੁਖਂ ਕਤ੍ਵਾ ਦਸਹਿ ਚਕ੍ਕਵਾਲ਼ਸਹਸ੍ਸੇਹਿ ਆਗਮ੍ਮ ਸਨ੍ਨਿਸਿਨ੍ਨਾਨਂ ਦੇਵਤਾਨਂ ਚਤੁਰੋਘਨਿਤ੍ਥਰਣਤ੍ਥਾਯ ਅਨ੍ਤੋ ਵਸ੍ਸਂ ਦੇਸਿਤੋ.

ਪੁਚ੍ਛਾ – ਕੇਨੇਸ ਆਵੁਸੋ ਅਭਿਧਮ੍ਮੋ ਪਠਮਂ ਮਨੁਸ੍ਸਲੋਕੇ ਪਤਿਗ੍ਗਹਿਤੋ, ਕਸ੍ਸ ਚ ਪੁਨ ਤੇਨ ਦੇਸਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਤਾ ਭਨ੍ਤੇ ਸਾਰਿਪੁਤ੍ਤਤ੍ਥੇਰੇਨ ਧਮ੍ਮਸੇਨਾਪਤਿਨਾ ਏਸ ਅਭਿਧਮ੍ਮੋ ਪਠਮਂ ਮਨੁਸ੍ਸਲੋਕੇ ਪਤਿਗ੍ਗਹਿਤੋ, ਤੇਨੇਵ ਭਨ੍ਤੇ ਆਯਸ੍ਮਤਾ ਸਾਰਿਪੁਤ੍ਤਤ੍ਥੇਰੇਨ ਅਤ੍ਤਨੋ ਸਦ੍ਧਿਵਿਹਾਰਿਕਾਨਂ ਪਞ੍ਚਨ੍ਨਂ ਭਿਕ੍ਖੁਸਤਾਨਂ ਦੇਸਿਤੋ.

ਪੁਚ੍ਛਾ – ਕੇ ਆਵੁਸੋ ਸਿਕ੍ਖਨ੍ਤਿ.

ਵਿਸ੍ਸਜ੍ਜਨਾ – ਸੇਖਾ ਚ ਭਨ੍ਤੇ ਪੁਥੁਜ੍ਜਨਾ ਕਲ੍ਯਾਣਕਾ ਚ ਸਿਕ੍ਖਨ੍ਤਿ.

ਪੁਚ੍ਛਾ – ਕੇ ਆਵੁਸੋ ਸਿਕ੍ਖਿਤਸਿਕ੍ਖਾ.

ਵਿਸ੍ਸਜ੍ਜਨਾ – ਅਰਹਨ੍ਤੋ ਭਨ੍ਤੇ ਸਿਕ੍ਖਿਤਸਿਕ੍ਖਾ.

ਪੁਚ੍ਛਾ – ਕੇ ਆਵੁਸੋ ਧਾਰੇਨ੍ਤਿ.

ਵਿਸ੍ਸਜ੍ਜਨਾ – ਯੇਸਂ ਭਨ੍ਤੇ ਵਤ੍ਤਤਿ, ਤੇ ਧਾਰੇਨ੍ਤਿ.

ਪੁਚ੍ਛਾ – ਕਸ੍ਸ ਆਵੁਸੋ ਵਚਨਂ.

ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.

ਪੁਚ੍ਛਾ – ਕੇਨਾਵੁਸੋ ਆਭਤਂ.

ਵਿਸ੍ਸਜ੍ਜਨਾ – ਪਰਂਪਰਾਯ ਭਨ੍ਤੇ ਆਭਤਂ.

ਧਮ੍ਮਸਙ੍ਗਣੀ

ਪੁਚ੍ਛਾ – ਸੋ ਪਨੇਸ ਆਵੁਸੋ ਅਭਿਧਮ੍ਮੋ ਧਮ੍ਮਸਙ੍ਗਣਿਵਿਭਙ੍ਗਾਦਿਪਕਰਣਪਰਿਚ੍ਛੇਦਵਸੇਨ ਸਤ੍ਤਵਿਧੋ. ਤੇਸੁ ਪਠਮਂ ਭਗਵਤਾ ਕਤਰਂ ਪਕਰਣਂ ਦੇਸਿਤਂ.

ਵਿਸ੍ਸਜ੍ਜਨਾ – ਪਠਮਂ ਭਨ੍ਤੇ ਧਮ੍ਮਸਙ੍ਗਣਿਪਕਰਣਂ ਭਗਵਤਾ ਦੇਸਿਤਂ.

ਪੁਚ੍ਛਾ – ਧਮ੍ਮਸਙ੍ਗਣਿਯਂ ਆਵੁਸੋ ਅਤ੍ਥਿ ਮਾਤਿਕਾ, ਅਤ੍ਥਿ ਪਦਭਾਜਨੀਯਂ. ਤੇਸੁ ਮਾਤਿਕਂ ਨਿਕ੍ਖਿਪਨ੍ਤੇਨ ਭਗਵਤਾ ਕਤਂ ਨਿਕ੍ਖਿਤ੍ਤਾ.

ਵਿਸ੍ਸਜ੍ਜਨਾ – ਮਾਤਿਕਂ ਭਨ੍ਤੇ ਨਿਕ੍ਖਿਪਨ੍ਤੇਨ ਭਗਵਤਾ ‘‘ਕੁਸਲਾ ਧਮ੍ਮਾ ਅਕੁਸਲਾ ਧਮ੍ਮਾ ਅਬ੍ਯਾਕਤਾ ਧਮ੍ਮਾ. ਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਧਮ੍ਮਾ ਦੁਕ੍ਖਾਯ ਵੇਦਨਾਯ ਸਮ੍ਪਯੁਤ੍ਤਾ ਧਮ੍ਮਾ ਅਦੁਕ੍ਖਮਸੁਖਾਯ ਵੇਦਨਾਯ ਸਮ੍ਪਯੁਤ੍ਤਾ ਧਮ੍ਮਾ. ਵਿਪਾਕਾ ਧਮ੍ਮਾ ਵਿਪਾਕਧਮ੍ਮਧਮ੍ਮਾ ਨੇਵਵਿਪਾਕਨਵਿਪਾਕਧਮ੍ਮਧਮ੍ਮਾ’’ਤਿ ਏਵਮਾਦਿਨਾ ਦ੍ਵਾਵੀਸਤਿਯਾ ਤਿਕਾਨਂ ਵਸੇਨ. ‘‘ਹੇਤੂ ਧਮ੍ਮਾ ਨ ਹੇਤੂ ਧਮ੍ਮਾ. ਸਹੇਤੁਕਾ ਧਮ੍ਮਾ ਅਹੇਤੁਕਾ ਧਮ੍ਮਾ.

ਹੇਤੁਸਮ੍ਪਯੁਤ੍ਤਾ ਧਮ੍ਮਾ ਹੇਤੁਵਿਪ੍ਪਯੁਤ੍ਤਾ ਧਮ੍ਮਾ. ਹੇਤੂ ਚੇਵ ਧਮ੍ਮਾ ਸਹੇਤੁਕਾ ਚ ਸਹੇਤੁਕਾ ਚੇਵ ਧਮ੍ਮਾ ਨ ਚ ਹੇਤੂ. ਹੇਤੂ ਚੇਵ ਧਮ੍ਮਾ ਹੇਤੁਸਮ੍ਪਯੁਤ੍ਤਾ ਚ ਹੇਤੁਸਮ੍ਪਯੁਤ੍ਤਾ ਚੇਵ ਧਮ੍ਮਾ ਨ ਚ ਹੇਤੂ. ਨ ਹੇਤੂ ਖੋ ਪਨ ਧਮ੍ਮਾ ਸਹੇਤੁਕਾਪਿ ਅਹੇਤੁਕਾਪੀ’’ਤਿ ਏਵਮਾਦਿਨਾ ਦੁਕਸਤਾਨਞ੍ਚ ਵਸੇਨ ਮਾਤਿਕਾ ਨਿਕ੍ਖਿਤ੍ਤਾ.

ਕਾਮਾਵਚਰਕੁਸਲ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਧਮ੍ਮਸਙ੍ਗਣਿਯਂ ਪਦਭਾਜਨੀਯੇ ਚਿਤ੍ਤੁਪ੍ਪਾਦਕਣ੍ਡੇ ਕੁਸਲਾ ਧਮ੍ਮਾਤਿਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ਕਥਂ ਕਾਮਾਵਚਰਕੁਸਲਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਧਮ੍ਮਸਙ੍ਗਣਿਪਕਰਣੇ ਚਿਤ੍ਤੁਪ੍ਪਾਦਕਣ੍ਡੇ ਕੁਸਲਾ ਧਮ੍ਮਾਤਿ ਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ‘‘ਕਤਮੇ ਧਮ੍ਮਾ ਕੁਸਲਾ. ਯਸ੍ਮਿਂ ਸਮਯੇ ਕਾਮਾਵਚਰਂ ਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤਿ ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਰੂਪਾਰਮ੍ਮਣਂ ਵਾ ਸਦ੍ਦਾਰਮ੍ਮਣਂ ਵਾ ਗਨ੍ਧਾਰਮ੍ਮਣਂ ਵਾ ਰਸਾਰਮ੍ਮਣਂ ਵਾ ਫੋਟ੍ਠਬ੍ਬਾਰਮ੍ਮਣਂ ਵਾ ਧਮ੍ਮਾਰਮ੍ਮਣਂ ਵਾ ਯਂ ਯਂ ਵਾ ਪਨਾਰਬ੍ਭ. ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ ਵੇਦਨਾ ਹੋਤਿ ਸਞ੍ਞਾ ਹੋਤਿ ਚੇਤਨਾ ਹੋਤਿ ਚਿਤ੍ਤਂ ਹੋਤਿ ਵਿਤਕ੍ਕੋ ਹੋਤਿ ਵਿਚਾਰੋ ਹੋਤਿ ਪੀਤਿ ਹੋਤਿ ਸੁਖਂ ਹੋਤਿ ਚਿਤ੍ਤਸ੍ਸੇਕਗ੍ਗਤਾ ਹੋਤੀ’’ਤਿ ਏਵਮਾਦਿਨਾ ਕਾਮਾਵਚਰਕੁਸਲਂ ਤੀਹਿ ਮਹਾਵਾਰੇਹਿ ਵਿਭਜਿਤ੍ਵਾ ਦੇਸਿਤਂ.

ਰੂਪਾਵਚਰਕੁਸਲ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਧਮ੍ਮਸਙ੍ਗਣੀਪਾਲ਼ਿਯਂ ਚਿਤ੍ਤੁਪ੍ਪਾਦਕਣ੍ਡੇ ਕੁਸਲਾ ਧਮ੍ਮਾਤਿ ਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ਕਥਂ ਰੂਪਾਵਚਰਕੁਸਲਞ੍ਚ ਅਰੂਪਾਵਚਰਕੁਸਲਞ੍ਚ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਰੂਪਾਵਚਰਕੁਸਲਞ੍ਚ ਅਰੂਪਾਵਚਰਕੁਸਲਞ੍ਚ ਭਨ੍ਤੇ ‘‘ਕਤਮੇ ਧਮ੍ਮਾ ਕੁਸਲਾ. ਯਸ੍ਮਿਂ ਸਮਯੇ ਰੂਪੂਪਪਤ੍ਤਿਯਾ ਮਗ੍ਗਂ ਭਾਵੇਤਿ ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਸਵਿਤਕ੍ਕਂ ਸਵਿਤਕ੍ਕਂ ਵਿਵੇਕਜਂ ਪੀਤਿਸੁਖਂ ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਪਥਵੀਕਸਿਣ’’ਨ੍ਤਿ ਏਵਮਾਦਿਨਾ ਭਗਵਤਾ ਵਿਤ੍ਥਾਰਤੋ ਦੇਸਿਤਂ.

ਲੋਕੁਤ੍ਤਰਾਕੁਸਲ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਧਮ੍ਮਸਙ੍ਗਣੀਪਾਲ਼ਿਯਂ ਚਿਤ੍ਤੁਪ੍ਪਾਦਕਣ੍ਡੇ ਕੁਸਲਾ ਧਮ੍ਮਾਤਿ ਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ਕਥਂ ਲੋਕੁਤ੍ਤਰਕੁਸਲਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਧਮ੍ਮਸਙ੍ਗਣਿਯਂ ਚਿਤ੍ਤੁਪ੍ਪਾਦਕਣ੍ਡੇ ਕੁਸਲਾ ਧਮ੍ਮਾਤਿ ਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ‘‘ਕਤਮੇ ਧਮ੍ਮਾ ਕੁਸਲਾ. ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕਂ ਅਪਚਯਗਾਮਿਂ ਦਿਟ੍ਠਿਗਤਾਨਂ ਪਹਾਨਾਯ ਪਠਮਾਯ ਭੂਮਿਯਾ ਪਤ੍ਤਿਯਾ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ ਦੁਕ੍ਖਪਟਿਪਦਂ ਦਨ੍ਧਾਭਿਞ੍ਞ’’ਨ੍ਤਿ ਏਵਮਾਦਿਨਾ ਭਗਵਤਾ ਲੋਕੁਤ੍ਤਰਕੁਸਲਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਅਕੁਸਲ

ਪੁਚ੍ਛਾ – ਤਤ੍ਥੇਵ ਆਵੁਸੋ ਅਕੁਸਲਾ ਧਮ੍ਮਾਤਿ ਮਾਤਿਕਾਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ਕਥਂ ਅਕੁਸਲਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਅਕੁਸਲਾ ਧਮ੍ਮਾਤਿ ਮਾਤਿਕਾਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ‘‘ਕਤਮੇ ਧਮ੍ਮਾ ਅਕੁਸਲਾ. ਯਸ੍ਮਿਂ ਸਮਯੇ ਅਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤਿ ਸੋਮਨਸ੍ਸਸਹਗਤਂ ਦਿਟ੍ਠਿਗਤਸਮ੍ਪਯੁਤ੍ਤਂ ਰੂਪਾਰਮ੍ਮਣਂ ਵਾ ਸਦ੍ਧਾਰਮ੍ਮਣਂ ਵਾ ਗਨ੍ਧਾਰਮ੍ਮਣਂ ਵਾ ਰਸਾਰਮ੍ਮਣਂ ਵਾ ਫੋਟ੍ਠਬ੍ਬਾਰਮ੍ਮਣਂ ਵਾ ਧਮ੍ਮਾਰਮ੍ਮਣਂ ਵਾ ਯਂ ਯਂ ਵਾ ਪਨਾਰਬ੍ਭ. ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ ਵੇਦਨਾ ਹੋਤਿ ਸਞ੍ਞਾ ਹੋਤਿ ਚੇਤਨਾ ਹੋਤਿ ਚਿਤ੍ਤਂ ਹੋਤੀ’’ਤਿ ਏਵਮਾਦਿਨਾ ਅਕੁਸਲਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਅਬ੍ਯਾਕਤ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਧਮ੍ਮਸਙ੍ਗਣੀਪਾਲ਼ਿਯਂ ਚਿਤ੍ਤੁਪ੍ਪਾਦਕਣ੍ਡਰੂਪਕਣ੍ਡੇਸੁ ਅਬ੍ਯਾਕਤਾ ਧਮ੍ਮਾਤਿ ਮਾਤਿਕਾਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ਕਥਂ ਅਬ੍ਯਾਕਤਾ ਧਮ੍ਮਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਧਮ੍ਮਸਙ੍ਗਣਿਯਂ ਅਬ੍ਯਾਕਤਾ ਧਮ੍ਮਾਤਿ ਪਦਸ੍ਸ ਅਤ੍ਥਂ ਵਿਭਜਨ੍ਤੇਨ ਭਗਵਤਾ ‘‘ਕਤਮੇ ਧਮ੍ਮਾ ਅਬ੍ਯਾਕਤਾ. ਯਸ੍ਮਿਂ ਸਮਯੇ ਕਾਮਾਵਚਰਸ੍ਸ ਕੁਸਲਸ੍ਸ ਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਵਿਪਾਕਂ ਚਕ੍ਖੁਵਿਞ੍ਞਾਣਂ ਉਪ੍ਪਨ੍ਨਂ ਹੋਤਿ ਉਪੇਕ੍ਖਾਸਹਗਤਂ ਰੂਪਾਰਮ੍ਮਣਂ. ਤਸ੍ਮਿਂ ਸਮਯੇ ਫਸ੍ਸੋ ਹੋਤਿ ਵੇਦਨਾ ਹੋਤਿ ਸਞ੍ਞਾ ਹੋਤਿ ਚੇਤਨਾ ਹੋਤਿ ਚਿਤ੍ਤਂ ਹੋਤੀ’’ਤਿ ਏਵਮਾਦਿਨਾ ਚ ਚਿਤ੍ਤੁਪ੍ਪਾਦਕਣ੍ਡੇ, ਰੂਪਕਣ੍ਡੇ ਚ ‘‘ਕਤਮੇ ਧਮ੍ਮਾ ਅਬ੍ਯਾਕਤਾ. ਕੁਸਲਾਕੁਸਲਾਨਂ ਧਮ੍ਮਾਨਂ ਵਿਪਾਕਾ ਕਾਮਾਵਚਰਾ ਰੂਪਾਵਚਰਾ ਅਰੂਪਾਵਚਰਾ ਅਪਰਿਯਾਪਨ੍ਨਾ ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਸਙ੍ਖਾਰਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ. ਯੇ ਚ ਧਮ੍ਮਾ ਕਿਰਿਯਾ ਨੇਵ ਕੁਸਲਾ ਨਾਕੁਸਲਾ ਨ ਚ ਕਮ੍ਮਵਿਪਾਕਾ. ਸਬ੍ਬਞ੍ਚ ਰੂਪਂ ਅਸਙ੍ਖਤਾ ਚ ਧਾਤੁ. ਇਮੇ ਧਮ੍ਮਾ ਅਬ੍ਯਾਕਤਾ’’ਤਿ ਏਵਮਾਦਿਨਾ ਚ ਅਬ੍ਯਾਕਤਾ ਧਮ੍ਮਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਭਙ੍ਗ

ਪੁਚ੍ਛਾ – ਸਤ੍ਤਸੁ ਆਵੁਸੋ ਅਭਿਧਮ੍ਮਪ੍ਪਕਰਣੇਸੁ ਵਿਭਙ੍ਗਪ੍ਪਕਰਣੇ ਭਗਵਤਾ ਕਤਿ ਵਿਭਙ੍ਗਾ ਦੇਸਿਤਾ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਸਤ੍ਤਸੁ ਪਕਰਣੇਸੁ ਦੁਤਿਯੇ ਵਿਭਙ੍ਗਪ੍ਪਕਰਣੇ ਖਨ੍ਧਵਿਭਙ੍ਗੋ ਆਯਤਨਵਿਭਙ੍ਗੋ ਧਾਤੁਵਿਭਙ੍ਗੋ ਸਚ੍ਚਵਿਭਙ੍ਗੋ ਇਨ੍ਦ੍ਰਿਯਵਿਭਙ੍ਗੋ ਪਟਿਚ੍ਚਸਮੁਪ੍ਪਾਦਵਿਭਙ੍ਗੋ ਸਤਿਪਟ੍ਠਾਨਵਿਭਙ੍ਗੋ ਸਮ੍ਮਪ੍ਪਧਾਨਵਿਭਙ੍ਗੋ ਇਦ੍ਧਿਪਾਦਵਿਭਙ੍ਗੋ ਬੋਜ੍ਝਙ੍ਗਵਿਭਙ੍ਗੋ ਮਗ੍ਗਙ੍ਗਵਿਭਙ੍ਗੋ ਝਾਨਵਿਭਙ੍ਗੋ ਅਪ੍ਪਮਞ੍ਞਾਵਿਭਙ੍ਗੋ ਸਿਕ੍ਖਾਪਦਵਿਭਙ੍ਗੋ ਪਟਿਸਮ੍ਭਿਦਾਵਿਭਙ੍ਗੋ ਞਾਣਵਿਭਙ੍ਗੋ ਖੁਦ੍ਦਕਵਤ੍ਥੁਵਿਭਙ੍ਗੋ ਧਮ੍ਮਹਦਯਵਿਭਙ੍ਗੋਤਿ ਭਗਵਤਾ ਅਟ੍ਠਾਰਸ ਵਿਭਙ੍ਗਾ ਦੇਸਿਤਾ.

ਖਨ੍ਧਵਿਭਙ੍ਗ

ਪੁਚ੍ਛਾ – ਤੇਸੁ ਆਵੁਸੋ ਅਟ੍ਠਾਰਸਸੁ ਵਿਭਙ੍ਗੇਸੁ ਪਠਮੇ ਖਨ੍ਧਵਿਭਙ੍ਗੇ ਭਗਵਤਾ ਕਥਂ ਖਨ੍ਧਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਤੇਸੁ ਭਨ੍ਤੇ ਅਟ੍ਠਾਰਸਸੁ ਵਿਭਙ੍ਗੇਸੁ ਪਠਮੇ ਖਨ੍ਧਵਿਭਙ੍ਗੇ ‘‘ਪਞ੍ਚਕ੍ਖਨ੍ਧਾ ਰੂਪਕ੍ਖਨ੍ਧੋ ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਸਙ੍ਖਾਰਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ. ਤਤ੍ਥ ਕਤਮੋ ਰੂਪਕ੍ਖਨ੍ਧੋ, ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕਂ ਵਾ ਸੁਖੁਮਂ ਵਾ ਹੀਨਂ ਵਾ ਪਣੀਤਂ ਵਾ ਯਂ ਦੂਰੇ ਸਨ੍ਤਿਕੇ ਵਾ, ਤਦੇਕਜ੍ਝਂ ਅਭਿਸਞ੍ਞੂਹਿਤ੍ਵਾ ਅਭਿਸਙ੍ਖਿਪਿਤ੍ਵਾ ਅਯਂ ਵੁਚ੍ਚਤਿ ਰੂਪਕ੍ਖਨ੍ਧੋ’’ਤਿ ਏਵਮਾਦਿਨਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਭਗਵਤਾ ਖਨ੍ਧਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਆਯਤਨਵਿਭਙ੍ਗ

ਪੁਚ੍ਛਾ – ਦੁਤਿਯੇ ਪਨ ਆਵੁਸੋ ਆਯਤਨਵਿਭਙ੍ਗੇ ਭਗਵਤਾ ਕਥਂ ਆਯਤਨਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਵਿਸ੍ਸਜ੍ਜਨਾ – ਦੁਤਿਯੇ ਭਨ੍ਤੇ ਆਯਤਨਵਿਭਙ੍ਗੇ ‘‘ਦ੍ਵਾਦਸਾਯਤਨਾਨਿ ਚਕ੍ਖਾਯਤਨਂ ਰੂਪਾਯਤਨਂ ਸੋਤਾਯਤਨਂ ਸਦ੍ਦਾਯਤਨਂ ਘਾਨਾਯਤਨਂ ਗਨ੍ਧਾਯਤਨਂ ਜਿਵ੍ਹਾਯਤਨਂ ਰਸਾਯਤਨਂ ਕਾਯਾਯਤਨਂ ਫੋਟ੍ਠਬ੍ਬਾਯਤਨਂ ਮਨਾਯਤਨਂ ਧਮ੍ਮਾਯਤਨਂ. ਚਕ੍ਖੁਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ ਵਿਪਰਿਣਾਮਧਮ੍ਮਂ, ਰੂਪਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ ਵਿਪਰਿਣਾਮਧਮ੍ਮਾ’’ਤਿ ਏਵਮਾਦਿਨਾ ਭਗਵਤਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹੇਵ ਆਯਤਨਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਧਾਤੁਵਿਭਙ੍ਗ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਵਿਭਙ੍ਗਪ੍ਪਕਰਣੇ ਤਤਿਯੇ ਧਾਤੁਵਿਭਙ੍ਗੇ ਭਗਵਤਾ ਕਥਂ ਧਾਤੁਯੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਤਤਿਯੇ ਭਨ੍ਤੇ ਧਾਤੁਵਿਭਙ੍ਗੇ ‘‘ਛ ਧਾਤੁਯੋ ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੁ ਆਕਾਸਧਾਤੁ ਵਿਞ੍ਞਾਣਧਾਤੂ’’ਤਿ ਭਨ੍ਤੇ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਭਗਵਤਾ ਧਾਤੁਯੋ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਸਚ੍ਚਵਿਭਙ੍ਗ

ਪੁਚ੍ਛਾ – ਚਤੁਤ੍ਥੇ ਪਨ ਆਵੁਸੋ ਸਚ੍ਚਵਿਭਙ੍ਗੇ ਭਗਵਤਾ ਕਥਂ ਸਚ੍ਚਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਵਿਸ੍ਸਜ੍ਜਨਾ – ਚਤੁਤ੍ਥੇ ਭਨ੍ਤੇ ਸਚ੍ਚਵਿਭਙ੍ਗੇ ‘‘ਚਤ੍ਤਾਰਿ ਅਰਿਯਸਚ੍ਚਾਨਿ ਦੁਕ੍ਖਂ ਅਰਿਯਸਚ੍ਚਂ, ਦੁਕ੍ਖਸਮੁਦਯਂ ਅਰਿਯਸਚ੍ਚਂ, ਦੁਕ੍ਖਨਿਰੋਧਂ ਅਰਿਯਸਚ੍ਚਂ, ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ ਅਰਿਯਸਚ੍ਚਂ. ਤਤ੍ਥ ਕਤਮਂ ਦੁਕ੍ਖਂ ਅਰਿਯਸਚ੍ਚਂ, ਜਾਤਿਪਿ ਦੁਕ੍ਖਾ, ਜਰਾਪਿ ਦੁਕ੍ਖਾ, ਮਰਣਮ੍ਪਿ ਦੁਕ੍ਖਂ, ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾਪਿ ਦੁਕ੍ਖਾ, ਅਪ੍ਪਿਯੇਹਿ ਸਮ੍ਪਯੋਗੋ ਦੁਕ੍ਖੋ, ਪਿਯੇਹਿ ਵਿਪ੍ਪਯੋਗੋ ਦੁਕ੍ਖੋ, ਯਮ੍ਪਿਚ੍ਛਂ ਨ ਲਭਤਿ, ਤਮ੍ਪਿ ਦੁਕ੍ਖਂ, ਸਂਖਿਤ੍ਤੇਨ ਪਞ੍ਚੁਪਾਦਾਨਕ੍ਖਨ੍ਧਾ ਦੁਕ੍ਖਾ’’ਤਿ ਏਵਮਾਦਿਨਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਭਗਵਤਾ ਸਚ੍ਚਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਇਨ੍ਦ੍ਰਿਯਵਿਭਙ੍ਗ

ਪੁਚ੍ਛਾ – ਪਞ੍ਚਮੇ ਪਨ ਆਵੁਸੋ ਇਨ੍ਦ੍ਰਿਯਵਿਭਙ੍ਗੇ ਭਗਵਤਾ ਕਥਂ ਇਨ੍ਦ੍ਰਿਯਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਵਿਸ੍ਸਜ੍ਜਨਾ – ਪਞ੍ਚਮੇ ਪਨ ਭਨ੍ਤੇ ਇਨ੍ਦ੍ਰਿਯਵਿਭਙ੍ਗੇ ‘‘ਬਾਵੀਸਤਿਨ੍ਦ੍ਰਿਯਾਨਿ ਚਕ੍ਖੁਨ੍ਦ੍ਰਿਯਂ ਸੋਤਿਨ੍ਦ੍ਰਿਯਂ ਘਾਨਿਨ੍ਦ੍ਰਿਯਂ ਜਿਵ੍ਹਿਨ੍ਦ੍ਰਿਯਂ ਕਾਯਿਨ੍ਦ੍ਰਿਯਂ ਮਨਿਨ੍ਦ੍ਰਿਯਂ…ਪੇ… ਅਞ੍ਞਾਤਾਵਿਨ੍ਦ੍ਰਿਯ’’ਨ੍ਤਿ ਏਵਮਾਦਿਨਾ ਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਦ੍ਵੀਹਿ ਮਹਾਨਯੇਹਿ ਭਗਵਤਾ ਇਨ੍ਦ੍ਰਿਯਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਪਟਿਚ੍ਚਸਮੁਪ੍ਪਾਦ ਵਿਭਙ੍ਗ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਵਿਭਙ੍ਗਪ੍ਪਕਰਣੇ ਛਟ੍ਠੇ ਪਟਿਚ੍ਚਸਮੁਪ੍ਪਾਦਵਿਭਙ੍ਗੇ ਭਗਵਤਾ ਕਥਂ ਪਟਿਚ੍ਚਸਮੁਪ੍ਪਾਦੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਵਿਸ੍ਸਜ੍ਜਨਾ – ਛਟ੍ਠੇ ਭਨ੍ਤੇ ਪਟਿਚ੍ਚਸਮੁਪ੍ਪਾਦਵਿਭਙ੍ਗੇ ‘‘ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ…ਪੇ… ਸਮੁਦਯੋ ਹੋਤੀ’’ਤਿ ਏਵਮਾਦਿਨਾ ਭਗਵਤਾ ਪਟਿਚ੍ਚਸਮੁਪ੍ਪਾਦੋ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਸਙ੍ਖਾਤੇਹਿ ਦ੍ਵੀਹਿ ਮਹਾਨਯੇਹਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤੋ.

ਸਤਿਪਟ੍ਠਾਨਵਿਭਙ੍ਗ

ਪੁਚ੍ਛਾ – ਸਤ੍ਤਮੇ ਪਨ ਆਵੁਸੋ ਸਤਿਪਟ੍ਠਾਨਵਿਭਙ੍ਗੇ ਭਗਵਤਾ ਕਥਂ ਸਤਿਪਟ੍ਠਾਨਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਸਤ੍ਤਮੇ ਭਨ੍ਤੇ ਸਤਿਪਟ੍ਠਾਨਵਿਭਙ੍ਗੇ ‘‘ਚਤ੍ਤਾਰੋ ਸਤਿਪਟ੍ਠਾਨਾ ਇਧ ਭਿਕ੍ਖੁ ਅਜ੍ਝਤ੍ਤਂ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ, ਬਹਿਦ੍ਧਾ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ, ਅਜ੍ਝਤ੍ਤਬਹਿਦ੍ਧਾ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ ਆਤਾਪੀ ਸਮ੍ਪਜਾਨੋ ਸਤਿਮਾ ਵਿਨੇਯ੍ਯ ਲੋਕੇ ਅਭਿਜ੍ਝਾਦੋਮਨਸ੍ਸ’’ਨ੍ਤਿ ਏਵਮਾਦਿਨਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਭਗਵਤਾ ਸਤਿਪਟ੍ਠਾਨਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਸਮ੍ਮਪ੍ਪਧਾਨਵਿਭਙ੍ਗ

ਪੁਚ੍ਛਾ – ਅਟ੍ਠਮੇ ਪਨ ਆਵੁਸੋ ਸਮ੍ਮਪ੍ਪਧਾਨਵਿਭਙ੍ਗੇ ਭਗਵਤਾ ਕਥਂ ਸਮ੍ਮਪ੍ਪਧਾਨਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਅਟ੍ਠਮੇ ਭਨ੍ਤੇ ਸਮ੍ਮਪ੍ਪਧਾਨਵਿਭਙ੍ਗੇ ‘‘ਚਤ੍ਤਾਰੋ ਸਮ੍ਮਪ੍ਪਧਾਨਾ ਇਧ ਭਿਕ੍ਖੁ ਅਨੁਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਅਨੁਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ, ਉਪ੍ਪਨ੍ਨਾਨਂ ਪਾਪਕਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ, ਅਨੁਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਉਪ੍ਪਾਦਾਯ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤਿ, ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ ਅਸਮ੍ਮੋਸਾਯ ਭਿਯ੍ਯੋਭਾਵਾਯ ਵੇਪੁਲ੍ਲਾਯ ਭਾਵਨਾਯ ਪਾਰਿਪੂਰਿਯਾ ਛਨ੍ਦਂ ਜਨੇਤਿ ਵਾਯਮਤਿ ਵੀਰਿਯਂ ਆਰਭਤਿ ਚਿਤ੍ਤਂ ਪਗ੍ਗਣ੍ਹਾਤਿ ਪਦਹਤੀ’’ਤਿ ਏਵਮਾਦਿਨਾ ਭਗਵਤਾ ਸਮ੍ਮਪ੍ਪਧਾਨਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਇਦ੍ਧਿਪਾਦਵਿਭਙ੍ਗ

ਪੁਚ੍ਛਾ – ਨਵਮੇ ਪਨ ਆਵੁਸੋ ਇਦ੍ਧਿਪਾਦਵਿਭਙ੍ਗੇ ਭਗਵਤਾ ਕਥਂ ਇਦ੍ਧਿਪਾਦਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਨਵਮੇ ਭਨ੍ਤੇ ਇਦ੍ਧਿਪਾਦਵਿਭਙ੍ਗੇ ‘‘ਚਤ੍ਤਾਰੋ ਇਦ੍ਧਿਪਾਦਾ ਇਧ ਭਿਕ੍ਖੁ ਛਨ੍ਦਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤਿ…ਪੇ… ਵੀਮਂਸਾਸਮਾਧਿਪਧਾਨਸਙ੍ਖਾਰਸਮਨ੍ਨਾਗਤਂ ਇਦ੍ਧਿਪਾਦਂ ਭਾਵੇਤੀ’’ਤਿ ਏਵਮਾਦਿਨਾ ਤੀਹਿ ਮਹਾਨਯੇਹਿ ਭਗਵਤਾ ਇਦ੍ਧਿਪਾਦਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਬੋਜ੍ਝਙ੍ਗਵਿਭਙ੍ਗ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਵਿਭਙ੍ਗਪ੍ਪਕਰਣੇ ਦਸਮੇ ਬੋਜ੍ਝਙ੍ਗਵਿਭਙ੍ਗੇ ਭਗਵਤਾ ਕਥਂ ਬੋਜ੍ਝਙ੍ਗਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਦਸਮੇ ਭਨ੍ਤੇ ਬੋਜ੍ਝਙ੍ਗਵਿਭਙ੍ਗੇ ‘‘ਸਤ੍ਤ ਬੋਜ੍ਝਙ੍ਗਾ ਸਤਿਸਮ੍ਬੋਜ੍ਝਙ੍ਗੋ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਵੀਰਿਯਸਮ੍ਬੋਜ੍ਝਙ੍ਗੋ ਪੀਤਿਸਮ੍ਬੋਜ੍ਝਙ੍ਗੋ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗੋ ਸਮਾਧਿਸਮ੍ਬੋਜ੍ਝਙ੍ਗੋ ਉਪੇਕ੍ਖਾਸਮ੍ਬੋਜ੍ਝਙ੍ਗੋ. ਤਤ੍ਥ ਕਤਮੋ ਸਤਿਸਮ੍ਬੋਜ੍ਝਙ੍ਗੋ, ਇਧ ਭਿਕ੍ਖੁ ਸਤਿਮਾ ਹੋਤਿ ਪਰਮੇਨ ਸਤਿਨੇਪਕ੍ਕੇਨ ਸਮਨ੍ਨਾਗਤੋ ਚਿਰਕਤਮ੍ਪਿ ਚਿਰਭਾਸਿਤਮ੍ਪਿ ਸਰਿਤਾ ਹੋਤਿ ਅਨੁਸ੍ਸਰਿਤਾ, ਅਯਂ ਵੁਚ੍ਚਤਿ ਸਤਿਸਮ੍ਬੋਜ੍ਝਙ੍ਗੋ’’ਤਿ ਏਵਮਾਦਿਨਾ ਭਗਵਤਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਨਯੇਹਿ ਬੋਜ੍ਝਙ੍ਗਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਮਗ੍ਗਙ੍ਗਵਿਭਙ੍ਗ

ਪੁਚ੍ਛਾ – ਏਕਾਦਸਮੇ ਪਨ ਆਵੁਸੋ ਮਗ੍ਗਙ੍ਗਵਿਭਙ੍ਗੇ ਭਗਵਤਾ ਕਥਂ ਮਗ੍ਗਙ੍ਗਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਏਕਾਦਸਮੇ ਭਨ੍ਤੇ ਮਗ੍ਗਙ੍ਗਵਿਭਙ੍ਗੇ ‘‘ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ. ਸੇਯ੍ਯਥਿਦਂ, ਸਮ੍ਮਾਦਿਟ੍ਠਿ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਸਮ੍ਮਾਵਾਯਾਮੋ ਸਮ੍ਮਾਸਤਿ ਸਮ੍ਮਾਸਮਾਧੀ’’ਤਿ ਏਵਮਾਦਿਨਾ ਭਗਵਤਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਮਗ੍ਗਙ੍ਗਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਝਾਨਵਿਭਙ੍ਗ

ਪੁਚ੍ਛਾ – ਦ੍ਵਾਦਸਮੋ ਪਨ ਆਵੁਸੋ ਝਾਨਵਿਭਙ੍ਗੋ ਭਗਵਤਾ ਕਥਂ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਵਿਸ੍ਸਜ੍ਜਨਾ – ਦ੍ਵਾਦਸਮੋ ਭਨ੍ਤੇ ਝਾਨਵਿਭਙ੍ਗੋ ‘‘ਇਧ ਭਿਕ੍ਖੁ ਪਾਤਿਮੋਕ੍ਖਸਂਵਰਸਂਵੁਤੋ ਵਿਹਰਤਿ ਆਚਾਰਗੋਚਰਸਮ੍ਪਨ੍ਨੋ ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੁ ਇਨ੍ਦ੍ਰਿਯੇਸੁ ਗੁਤ੍ਤਦ੍ਵਾਰੋ ਭੋਜਨੇ ਮਤ੍ਤਞ੍ਞੂ ਪੁਬ੍ਬਰਤ੍ਤਾਪਰਰਤ੍ਤਂ ਜਾਗਰਿਯਾਨੁਯੋਗਮਨੁਯੁਤ੍ਤੋ’’ਤਿ ਏਵਮਾਦਿਨਾ ਭਗਵਤਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤੋ.

ਅਪ੍ਪਮਞ੍ਞਾਵਿਭਙ੍ਗ

ਪੁਚ੍ਛਾ – ਤੇਰਸਮੇ ਪਨ ਆਵੁਸੋ ਅਪ੍ਪਮਞ੍ਞਾਵਿਭਙ੍ਗੇ ਭਗਵਤਾ ਕਥਂ ਅਪ੍ਪਮਞ੍ਞਾਯੋ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਤੇਰਸਮੇ ਭਨ੍ਤੇ ਅਪ੍ਪਮਞ੍ਞਾਵਿਭਙ੍ਗੇ ‘‘ਚਤਸ੍ਸੋ ਅਪ੍ਪਮਞ੍ਞਾਯੋ ਇਧ ਭਿਕ੍ਖੁ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ. ਤਥਾ ਤਤਿਯਂ. ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ ਫਰਿਤ੍ਵਾ ਵਿਹਰਤੀ’’ਤਿ ਏਵਮਾਦਿਨਾ ਭਗਵਤਾ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਅਪ੍ਪਮਞ੍ਞਾਯੋ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਸਿਕ੍ਖਾਪਦਵਿਭਙ੍ਗ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਵਿਭਙ੍ਗਪ੍ਪਕਰਣੇ ਚੁਦ੍ਦਸਮੇ ਸਿਕ੍ਖਾਪਦਵਿਭਙ੍ਗੇ ਭਗਵਤਾ ਕਥਂ ਸਿਕ੍ਖਾਪਦਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਵਿਸ੍ਸਜ੍ਜਨਾ – ਚੁਦ੍ਦਸਮੇ ਭਨ੍ਤੇ ਸਿਕ੍ਖਾਪਦਵਿਭਙ੍ਗੇ ‘‘ਪਞ੍ਚ ਸਿਕ੍ਖਾਪਦਾਨਿ ਪਾਣਾਤਿਪਾਤਾ ਵੇਰਮਣੀ ਸਿਕ੍ਖਾਪਦਂ, ਅਦਿਨ੍ਨਾਦਾਨਾ ਵੇਰਮਣੀ ਸਿਕ੍ਖਾਪਦਂ, ਕਾਮੇਸੁਮਿਚ੍ਛਾਚਾਰਾ ਵੇਰਮਣੀ ਸਿਕ੍ਖਾਪਦਂ, ਮੁਸਾਵਾਦਾ ਵੇਰਮਣੀ ਸਿਕ੍ਖਾਪਦਂ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣੀ ਸਿਕ੍ਖਾਪਦਂ. ਤਤ੍ਥ ਕਤਮਂ ਪਾਣਾਤਿਪਾਤਾ ਵੇਰਮਣੀ ਸਿਕ੍ਖਾਪਦਂ, ਯਸ੍ਮਿਂ ਸਮਯੇ ਕਾਮਾਵਚਰਂ ਕੁਸਲਂ ਚਿਤ੍ਤਂ ਉਪ੍ਪਨ੍ਨਂ ਹੋਤਿ ਸੋਮਨਸ੍ਸਸਹਗਤਂ ਞਾਣਸਮ੍ਪਯੁਤ੍ਤਂ ਪਾਣਾਤਿਪਾਤਾ ਵਿਰਮਨ੍ਤਸ੍ਸਾ’’ਤਿ ਏਵਮਾਦਿਨਾ ਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਦ੍ਵੀਹਿ ਮਹਾਨਯੇਹਿ ਭਗਵਤਾ ਸਿਕ੍ਖਾਪਦਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਪਟਿਸਮ੍ਭਿਦਾਵਿਭਙ੍ਗ

ਪੁਚ੍ਛਾ – ਪਨ੍ਨਰਸਮੇ ਪਨ ਆਵੁਸੋ ਪਟਿਸਮ੍ਭਿਦਾਵਿਭਙ੍ਗੇ ਭਗਵਤਾ ਕਥਂ ਪਟਿਸਮ੍ਭਿਦਾਯੋ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਵਿਸ੍ਸਜ੍ਜਨਾ – ਪਨ੍ਨਰਸਮੇ ਭਨ੍ਤੇ ਪਟਿਸਮ੍ਭਿਦਾਵਿਭਙ੍ਗੇ ‘‘ਚਤਸ੍ਸੋ ਪਟਿਸਮ੍ਭਿਦਾ ਅਤ੍ਥਪਟਿਸਮ੍ਭਿਦਾ ਧਮ੍ਮਪਟਿਸਮ੍ਭਿਦਾ ਨਿਰੁਤ੍ਤਿਪਟਿਸਮ੍ਭਿਦਾ ਪਟਿਭਾਨਪਟਿਸਮ੍ਭਿਦਾ. ਅਤ੍ਥੇ ਞਾਣਂ ਅਤ੍ਥਪਟਿਸਮ੍ਭਿਦਾ, ਧਮ੍ਮੇ ਞਾਣਂ ਧਮ੍ਮਪਟਿਸਮ੍ਭਿਦਾ, ਤਤ੍ਰ ਧਮ੍ਮਨਿਰੁਤ੍ਤਾਭਿਲਾਪੇ ਞਾਣਂ ਨਿਰੁਤ੍ਤਿਪਟਿਸਮ੍ਭਿਦਾ, ਞਾਣੇਸੁ ਞਾਣਂ ਪਟਿਭਾਨਪਟਿਸਮ੍ਭਿਦਾ’’ਤਿ ਏਵਮਾਦਿਨਾ ਭਗਵਤਾ ਚਤਸ੍ਸੋ ਪਟਿਸਮ੍ਭਿਦਾਯੋ ਸੁਤ੍ਤਨ੍ਤਭਾਜਨੀਯਅਭਿਧਮ੍ਮਭਾਜਨੀਯਪਞ੍ਹਾਪੁਚ੍ਛਕਸਙ੍ਖਾਤੇਹਿ ਤੀਹਿ ਮਹਾਨਯੇਹਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾ.

ਞਾਣਵਿਭਙ੍ਗ

ਪੁਚ੍ਛਾ – ਸੋਲ਼ਸਮੇ ਪਨ ਆਵੁਸੋ ਞਾਣਵਿਭਙ੍ਗੇ ਭਗਵਤਾ ਕਥਂ ਞਾਣਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਵਿਸ੍ਸਜ੍ਜਨਾ – ਸੋਲ਼ਸਮੇ ਭਨ੍ਤੇ ਞਾਣਵਿਭਙ੍ਗੇ ‘‘ਏਕਵਿਧੇਨ ਞਾਣਵਤ੍ਥੁ ਪਞ੍ਚਵਿਞ੍ਞਾਣਾ ਨ ਹੇਤੂ, ਅਹੇਤੁਕਾ, ਹੇਤੁਵਿਪ੍ਪਯੁਤ੍ਤਾ, ਸਪ੍ਪਚ੍ਚਯਾ, ਸਙ੍ਖਤਾ, ਅਰੂਪਾ, ਲੋਕਿਯਾ, ਸਾਸਵਾ’’ਤਿ ਏਵਮਾਦਿਨਾ ਏਕਕਤੋ ਪਟ੍ਠਾਯ ਯਾਵ ਦਸਕਾ ਭਗਵਤਾ ਞਾਣਾਨਿ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਾਨਿ.

ਖੁਦ੍ਦਕਵਤ੍ਥੁਵਿਭਙ੍ਗ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਵਿਭਙ੍ਗਪ੍ਪਕਰਣੇ ਸਤ੍ਤਰਸਮੋ ਖੁਦ੍ਦਕਵਤ੍ਥੁਵਿਭਙ੍ਗੋ ਭਗਵਤਾ ਕਥਂ ਦੇਸਿਤੋ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਦੁਤਿਯੇ ਵਿਭਙ੍ਗਪ੍ਪਕਰਣੇ ਸਤ੍ਤਰਸਮੋ ਖੁਦ੍ਦਕਵਤ੍ਥੁਵਿਭਙ੍ਗੋ ‘‘ਜਾਤਿਮਦੋ, ਗੋਤ੍ਤਮਦੋ, ਆਰੋਗ੍ਯਮਦੋ, ਯੋਬ੍ਬਨਮਦੋ, ਜੀਵਿਤਮਦੋ’’ਤਿ ਏਵਮਾਦਿਨਾ ਏਕਕਤੋ ਪਟ੍ਠਾਯ ਯਾਵ ਅਟ੍ਠਸਤਤਣ੍ਹਾਵਿਚਰਿਤਂ ਭਗਵਤਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤੋ.

ਧਮ੍ਮਹਦਯਵਿਭਙ੍ਗ

ਪੁਚ੍ਛਾ – ਤਤ੍ਥ ਆਵੁਸੋ ਅਟ੍ਠਾਰਸਮੋ ਧਮ੍ਮਹਦਯਵਿਭਙ੍ਗੋ ਭਗਵਤਾ ਕਥਂ ਵਿਭਜਿਤ੍ਵਾ ਦੇਸਿਤੋ.

ਵਿਸ੍ਸਜ੍ਜਨਾ – ਅਟ੍ਠਾਰਸਮੋ ਭਨ੍ਤੇ ਧਮ੍ਮਹਦਯਵਿਭਙ੍ਗੋ ‘‘ਕਤਿ ਖਨ੍ਧਾ, ਕਤਿ ਆਯਤਨਾਨਿ, ਕਤਿ ਧਾਤੁਯੋ, ਕਤਿ ਸਚ੍ਚਾਨਿ, ਕਤਿ ਇਨ੍ਦ੍ਰਿਯਾਨਿ, ਕਤਿ ਹੇਤੂ, ਕਤਿ ਆਹਾਰਾ, ਕਤਿ ਫਸ੍ਸਾ, ਕਤਿ ਵੇਦਨਾ, ਕਤਿ ਸਞ੍ਞਾ, ਕਤਿ ਚੇਤਨਾ, ਕਤਿ ਚਿਤ੍ਤਾਨਿ. ਪਞ੍ਚਕ੍ਖਨ੍ਧਾ, ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਧਾਤੁਯੋ, ਚਤ੍ਤਾਰਿ ਸਚ੍ਚਾਨਿ, ਬਾਵੀਸਤਿਨ੍ਦ੍ਰਿਯਾਨਿ, ਨਵ ਹੇਤੂ, ਚਤ੍ਤਾਰੋ ਆਹਾਰਾ, ਸਤ੍ਤ ਫਸ੍ਸਾ, ਸਤ੍ਤ ਵੇਦਨਾ, ਸਤ੍ਤ ਸਞ੍ਞਾ, ਸਤ੍ਤ ਚੇਤਨਾ, ਸਤ੍ਤ ਚਿਤ੍ਤਾਨੀ’’ਤਿ ਏਵਮਾਦਿਨਾ ਸਬ੍ਬਸਙ੍ਗਾਹਕਾਦੀਹਿ ਦਸਹਿ ਵਾਰੇਹਿ ਭਗਵਤਾ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਭਗਵਤਾ ਉਪ੍ਪਾਦਕਕਮ੍ਮਆਯੁਪ੍ਪਮਾਣਵਾਰੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਵਿਸ੍ਸਜ੍ਜਨਾ – ਦਾਨਂ ਦਤ੍ਵਾ ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਕਤ੍ਥ ਉਪਪਜ੍ਜਨ੍ਤਿ. ਦਾਨਂ ਦਤ੍ਵਾ, ਸੀਲਂ ਸਮਾਦਿਯਿਤ੍ਵਾ ਉਪੋਸਥਕਮ੍ਮਂ ਕਤ੍ਵਾ ਅਪ੍ਪੇਕਚ੍ਚੇ ਖਤ੍ਤਿਯਮਹਾਸਾਲਾਨਂ ਸਹਬ੍ਯਤਂ ਉਪਪਜ੍ਜਨ੍ਤਿ, ਅਪ੍ਪੇਕਚ੍ਚੇ ਬ੍ਰਾਹ੍ਮਣਮਹਾਸਾਲਾਨਂ, ਅਪ੍ਪੇਕਚ੍ਚੇ ਗਹਪਤਿਮਹਾਸਾਲਾਨਂ, ਅਪ੍ਪੇਕਚ੍ਚੇ ਚਾਤੁਮਹਾਰਾਜਿਕਾਨਂ ਦੇਵਾਨਂ, ਅਪ੍ਪੇਕਚ੍ਚੇ ਤਾਵਤਿਂਸਾਨਂ ਦੇਵਾਨਂ, ਅਪ੍ਪੇਕਚ੍ਚੇ ਯਾਮਾਨਂ ਦੇਵਾਨਂ, ਅਪ੍ਪੇਕਚ੍ਚੇ ਤੁਸਿਤਾਨਂ ਦੇਵਾਨਂ ਸਹਬ੍ਯਤਂ ਉਪਪਜ੍ਜਨ੍ਤੀਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਭਗਵਤਾ ਉਪ੍ਪਾਦਕਕਮ੍ਮਆਯੁਪ੍ਪਮਾਣਵਾਰੋ ਵਿਤ੍ਥਾਰੇਨ ਵਿਭਜਿਤ੍ਵਾ ਦੇਸਿਤੋ.

ਉਕ੍ਖਿਤ੍ਤਾ ਪੁਞ੍ਞਤੇਜੇਨ, ਕਾਮਰੂਪਗਤਿਂ ਗਤਾ;

ਭਵਗ੍ਗਤਮ੍ਪਿ ਸਮ੍ਪਤ੍ਤਾ, ਪੁਨਾਗਚ੍ਛਨ੍ਤਿ ਦੁਗ੍ਗਤਿਂ –

ਧਾਤੁਕਥਾ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਅਟ੍ਠਾਰਸਹਿ ਬੁਦ੍ਧਧਮ੍ਮੇਹਿ ਸਮਨ੍ਨਾਗਤੇਨ ਅਭਿਧਮ੍ਮੇ ਅਟ੍ਠਾਰਸਹਿ ਵਿਭਙ੍ਗੇਹਿ ਪਟਿਮਣ੍ਡਿਤਂ ਦੁਤਿਯਂ ਵਿਭਙ੍ਗਪ੍ਪਕਰਣਂ ਦੇਸੇਤ੍ਵਾ ਤਦਨਨ੍ਤਰਂ ਧਾਤੁਕਥਂ ਨਾਮ ਤਤਿਯਂ ਪਕਰਣਂ ਕਥਂ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਤਤਿਯਂ ਭਨ੍ਤੇ ਧਾਤੁਕਥਂ ਨਾਮ ਅਭਿਧਮ੍ਮਪਿਟਕਂ ‘‘ਸਙ੍ਗਹੋ ਅਸਙ੍ਗਹੋ, ਸਙ੍ਗਹਿਤੇਨ ਅਸਙ੍ਗਹਿਤਂ, ਅਸਙ੍ਗਹਿਤੇਨ ਸਙ੍ਗਹਿਤਂ, ਸਙ੍ਗਹਿਤੇਨ ਸਙ੍ਗਹਿਤਂ, ਅਸਙ੍ਗਹਿਤੇਨ ਅਸਙ੍ਗਹਿਤਂ. ਸਮ੍ਪਯੋਗੋ ਵਿਪ੍ਪਯੋਗੋ, ਸਮ੍ਪਯੁਤ੍ਤੇਨ ਵਿਪ੍ਪਯੁਤ੍ਤਂ, ਵਿਪ੍ਪਯੁਤ੍ਤੇਨ ਸਮ੍ਪਯੁਤ੍ਤਂ, ਸਮ੍ਪਯੁਤ੍ਤੇਨ ਸਮ੍ਪਯੁਤ੍ਤਂ, ਵਿਪ੍ਪਯੁਤ੍ਤੇਨ ਵਿਪ੍ਪਯੁਤ੍ਤਂ. ਸਙ੍ਗਹਿਤੇਨ ਸਮ੍ਪਯੁਤ੍ਤਂ ਵਿਪ੍ਪਯੁਤ੍ਤਂ, ਸਮ੍ਪਯੁਤ੍ਤੇਨ ਸਙ੍ਗਹਿਤਂ ਅਸਙ੍ਗਹਿਤਂ, ਅਸਙ੍ਗਹਿਤੇਨ ਸਮ੍ਪਯੁਤ੍ਤਂ ਵਿਪ੍ਪਯੁਤ੍ਤਂ, ਵਿਪ੍ਪਯੁਤ੍ਤੇਨ ਸਙ੍ਗਹਿਤਂ ਅਸਙ੍ਗਹਿਤ’’ਨ੍ਤਿ ਏਵਮਾਦਿਨਾ ਪਞ੍ਚ ਮਾਤਿਕਾਯੋ ਪਠਮਂ ਨਿਕ੍ਖਿਪਿਤ੍ਵਾ ਸਙ੍ਗਹਾਸਙ੍ਗਹਾਦੀਹਿ ਚੁਦ੍ਦਸਹਿ ਨਯੇਹਿ ਭਗਵਤਾ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਪੁਗ੍ਗਲਪਞ੍ਞਤ੍ਤਿ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਸਬ੍ਬਧਾਤੁਕੁਸਲੇਨ ਅਭਿਧਮ੍ਮਪਿਟਕੇ ਤਤਿਯਂ ਧਾਤੁਕਥਾਪਕਰਣਂ ਦੇਸੇਤ੍ਵਾ ਤਦਨਨ੍ਤਰਂ ਚਤੁਤ੍ਥਂ ਪੁਗ੍ਗਲਪਞ੍ਞਤ੍ਤਿਪ੍ਪਕਰਣਂ ਕਥਂ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਚਤੁਤ੍ਥਂ ਪੁਗ੍ਗਲਪਞ੍ਞਤ੍ਤਿਪ੍ਪਕਰਣਂ ‘‘ਛ ਪਞ੍ਞਤ੍ਤਿਯੋ ਖਨ੍ਧਪਞ੍ਞਤ੍ਤਿ ਆਯਤਨਪਞ੍ਞਤ੍ਤਿ ਧਾਤੁਪਞ੍ਞਤ੍ਤਿ ਸਚ੍ਚਪਞ੍ਞਤ੍ਤਿ ਇਨ੍ਦ੍ਰਿਯਪਞ੍ਞਤ੍ਤਿ ਪੁਗ੍ਗਲਪਞ੍ਞਤ੍ਤਿ. ਕਿਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤਿ, ਯਾਵਤਾ ਪਞ੍ਚਕ੍ਖਨ੍ਧਾ, ਰੂਪਕ੍ਖਨ੍ਧੋ ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਸਙ੍ਖਾਰਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ. ਏਤ੍ਤਾਵਤਾ ਖਨ੍ਧਾਨਂ ਖਨ੍ਧਪਞ੍ਞਤ੍ਤੀ’’ਤਿ ਏਵਮਾਦਿਨਾ ਖਨ੍ਧਾਯਤਨਧਾਤੁਸਚ੍ਚਇਨ੍ਦ੍ਰਿਯਪਞ੍ਞਤ੍ਤਿਯੋ ਸਂਖਿਤ੍ਤੇਨ ਉਦ੍ਦਿਸਿਤ੍ਵਾ ਪੁਗ੍ਗਲਪਞ੍ਞਤ੍ਤਿਂ ਚ ਏਕਕਦੁਕਤਿਕਚਤੁਕ੍ਕਪਞ੍ਚਕਛਕ੍ਕਸਤ੍ਤਕਅਟ੍ਠਕਨਵਕਦਸਕਵਸੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਭਗਵਤਾ ਦੇਸਿਤਾ.

ਕਥਾਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਸਬ੍ਬਪਰਮਤ੍ਥਪਞ੍ਞਤ੍ਤਿਧਮ੍ਮਕੁਸਲੇਨ ਅਭਿਧਮ੍ਮਪਿਟਕੇ ਚਤੁਤ੍ਥਂ ਪੁਗ੍ਗਲਪਞ੍ਞਤ੍ਤਿਪ੍ਪਕਰਣਂ ਦੇਸੇਤ੍ਵਾ ਤਦਨਨ੍ਤਰਂ ਪਞ੍ਚਮਂ ਕਥਾਵਤ੍ਥੁਪ੍ਪਕਰਣਂ ਕਥਂ ਦੇਸਿਤਂ.

ਵਿਸ੍ਸਜ੍ਜਨਾ – ਸਬ੍ਬਪਰਮਤ੍ਥਪਞ੍ਞਤ੍ਤਿਧਮ੍ਮਕੁਸਲੇਨ ਭਨ੍ਤੇ ਭਗਵਤਾ ਲੋਕੇ ਅਗ੍ਗਪੁਗ੍ਗਲੇਨ ਅਭਿਧਮ੍ਮਪਿਟਕੇ ਚਤੁਤ੍ਥਂ ਪੁਗ੍ਗਲਪਞ੍ਞਤ੍ਤਿਪ੍ਪਕਰਣਂ ਦੇਸੇਤ੍ਵਾ ਤਦਨਨ੍ਤਰਂ ਕਥਾਵਤ੍ਥੁਦੇਸਨਾਯ ਵਾਰੇ ਸਮ੍ਪਤ੍ਤੇ ‘‘ਅਨਾਗਤੇ ਮਮ ਸਾਵਕੋ ਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੋ ਨਾਮ ਉਪ੍ਪਨ੍ਨਂ ਸਾਸਨਮਲਂ ਸੋਧੇਤ੍ਵਾ ਤਤਿਯਸਙ੍ਗੀਤਿਂ ਕਰੋਨ੍ਤੋ ਭਿਕ੍ਖੁਸਙ੍ਘਸ੍ਸ ਮਜ੍ਝੇ ਨਿਸਿਨ੍ਨੋ ਸਕਵਾਦੇ ਪਞ੍ਚ ਸੁਤ੍ਤਸਤਾਨਿ ਪਰਵਾਦੇ ਪਞ੍ਚਾਤਿ ਸੁਤ੍ਤਸਹਸ੍ਸਂ ਸਮੋਧਾਨੇਤ੍ਵਾ, ਇਮਂ ਪਕਰਣਂ ਭਾਜੇਸ੍ਸਤੀ’’ਤਿ ਤਸ੍ਸੋਕਾਸਂ ਕਰੋਨ੍ਤੇਨ ਪੁਗ੍ਗਲਵਾਰੇ ਅਟ੍ਠਮੁਖਾ ਵਾਦਯੁਤ੍ਤਿਂ ਆਦਿਂ ਕਤ੍ਵਾ ਸਬ੍ਬਕਥਾਮਗ੍ਗੇਸੁ ਅਸਮ੍ਪੁਣ੍ਣਭਾਣਵਾਰਤ੍ਥਾਯ ਤਨ੍ਤਿਯਾ ਮਾਤਿਕਾ ਨਿਕ੍ਖੇਪਮਤ੍ਤੇਨ ਪਞ੍ਚਮਂ ਕਥਾਵਤ੍ਥੁਪ੍ਪਕਰਣਂ ਸਂਖੇਪਤੋ ਦੇਸਿਤਂ.

ਪੁਚ੍ਛਾ – ਅਧੁਨਾ ਪਾਕਟਂ ਪਨਾਵੁਸੋ ਵਿਤ੍ਥਾਰਂ ਕਥਾਵਤ੍ਥੁਪ੍ਪਕਰਣਂ ਕਦਾ ਕੇਨ ਕਤ੍ਥ ਕਥਞ੍ਚ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਵਿਸ੍ਸਜ੍ਜਨਾ – ਤਂ ਖੋ ਭਨ੍ਤੇ ਭਗਵਤੋ ਨਯਮੁਖਂ ਨਿਸ੍ਸਾਯ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਤਤਿਯਸਂਗੀਤਿਕਾਲੇ ਪਾਟਲਿਪੁਤ੍ਤੇ ਅਸੋਕਾਰਾਮੇ ਸਟ੍ਠਿਭਿਕ੍ਖੁਸਤਸਹਸ੍ਸਾਨਂ ਸਮਾਗਮੇ ਭਗਵਤਾ ਦਿਨ੍ਨਨਯਵਸੇਨ ਤਥਾਗਤੇਨ ਠਪਿਤਮਾਤਿਕਂ ਵਿਭਜਨ੍ਤੇਨ ਸਕਵਾਦੇ ਪਞ੍ਚਸੁਤ੍ਤਸਤਾਨਿ ਪਰਵਾਦੇ ਪਞ੍ਚਾਤਿ ਸੁਤ੍ਤਸਹਸ੍ਸਂ ਆਹਰਿਤ੍ਵਾ ਇਦਂ ਪਰਵਾਦਮਥਨਂ ਅਧੁਨਾ ਪਾਕਟਂ ਕਥਾਵਤ੍ਥੁਪ੍ਪਕਰਣਂ ਵਿਤ੍ਥਾਰਤੋ ਵਿਭਜਿਤ੍ਵਾ ਦੇਸਿਤਂ.

ਪੁਚ੍ਛਾ – ਕਤਿ ਆਵੁਸੋ ਤਤ੍ਥ ਕਥਾਯੋ ਤੇਨ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਤਤ੍ਥ ਭਨ੍ਤੇ ਵਾਚਨਾਮਗ੍ਗਤੋ ਦ੍ਵੇ ਚ ਸਤਾਨਿ ਸਤ੍ਤਵੀਸਤਿ ਚ ਕਥਾਯੋ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਪੁਗ੍ਗਲਕਥਾ

ਪੁਚ੍ਛਾ – ਕਥਞ੍ਚਾਵੁਸੋ ਤਤ੍ਥ ਪਠਮਾ ਪੁਗ੍ਗਲਕਥਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ, ਆਮਨ੍ਤਾ. ਯੋ ਸਚ੍ਚਿਕਟ੍ਠੋ ਪਰਮਤ੍ਥੋ, ਤਤੋ ਸੋ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾਤਿ, ਨ ਹੇਵਂ ਵਤ੍ਤਬ੍ਬੇ. ਆਜਾਨਾਹਿ ਨਿਗ੍ਗਹਂ ਹਞ੍ਚਿ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨ, ਤੇਨ ਵਤ ਰੇ ਵਤ੍ਤਬ੍ਬੇ ‘‘ਯੋ ਸਚ੍ਚਿਕਟ੍ਠੋ ਪਰਮਤ੍ਥੋ, ਤਤੋ ਸੋ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ. ਯਂ ਤਤ੍ਥ ਵਦੇਸਿ ‘‘ਵਤ੍ਤਬ੍ਬੇ ਖੋ ‘ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨ’, ਨੋ ਚ ਵਤ੍ਤਬ੍ਬੇ ‘ਯੋ ਸਚ੍ਚਿਕਟ੍ਠੋ ਪਰਮਤ੍ਥੋ, ਤਤੋ ਸੋ ਪੁਗ੍ਗਲੋ ਉਪਲਬ੍ਭਤਿ ਸਚ੍ਚਿਕਟ੍ਠਪਰਮਤ੍ਥੇਨਾ’’ਤਿ, ਮਿਚ੍ਛਾਤਿ ਏਵਮਾਦਿਨਾ ਭਨ੍ਤੇ ਤਤ੍ਥ ਪਠਮਾ ਪੁਗ੍ਗਲਕਥਾ ਪਞ੍ਚ ਭਾਣਵਾਰਮਤ੍ਤਾਯ ਤਨ੍ਤਿਯਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਅਞ੍ਞਾਣਕਥਾ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਕਥਾਵਤ੍ਥੁਪ੍ਪਕਰਣੇ ਦੁਤਿਯਵਗ੍ਗੇ ਦੁਤਿਯਾ ਅਞ੍ਞਾਣਕਥਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਂ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਪਞ੍ਚਮੇ ਕਥਾਵਤ੍ਥੁਪ੍ਪਕਰਣੇ ਦੁਤਿਯਵਗ੍ਗੇ ਦੁਤਿਯਾ ਅਞ੍ਞਾਣਕਥਾ ‘‘ਅਤ੍ਥਿ ਅਰਹਤੋ ਅਞ੍ਞਾਣਨ੍ਤਿ, ਆਮਨ੍ਤਾ. ਅਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਨ੍ਤਿ, ਨ ਹੇਵਂ ਵਤ੍ਤਬ੍ਬੇ. ਨਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨਿਵਰਣਨ੍ਤਿ, ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ ‘‘ਅਤ੍ਥਿ ਅਰਹਤੋ ਅਞ੍ਞਾਣ’’ਨ੍ਤਿ ਏਵਮਾਦਿਨਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਭਾਸਿਤਾ.

ਅਸਞ੍ਞਕਥਾ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਪਞ੍ਚਮੇ ਕਥਾਵਤ੍ਥੁਪ੍ਪਕਰਣੇ ਤਤਿਯਵਗ੍ਗੇ ਏਕਾਦਸਮਾ ਅਸਞ੍ਞਕਥਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਂ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਪਞ੍ਚਮੇ ਕਥਾਵਤ੍ਥੁਪ੍ਪਕਰਣੇ ਤਤਿਯਵਗ੍ਗੇ ਏਕਾਦਸਮਾ ਅਸਞ੍ਞਕਥਾ ‘‘ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥੀਤਿ, ਆਮਨ੍ਤਾ. ਸਞ੍ਞਾਭਵੋ ਸਞ੍ਞਾਗਤਿ ਸਞ੍ਞਾਸਤ੍ਤਾਵਾਸੋ ਸਞ੍ਞਾਸਂਸਾਰੋ ਸਞ੍ਞਾਯੋਨਿ ਸਞ੍ਞਤ੍ਤਭਾਵਪਟਿਲਾਭੋਤਿ, ਨ ਹੇਵਂ ਵਤ੍ਤਬ੍ਬੇ’’ਤਿ ਏਵਮਾਦਿਨਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ.

ਸਞ੍ਞਾਭਵੋ ਸਞ੍ਞਾਗਤਿ ਸਞ੍ਞਾਸਤ੍ਤਾਵਾਸੋ ਸਞ੍ਞਾਸਂਸਾਰੋ ਸਞ੍ਞਾਯੋਨਿ ਸਞ੍ਞਤ੍ਤਭਾਵਪਟਿਲਾਭੋ.

ਨ ਹੇਵਂ ਵਤ੍ਤਬ੍ਬੇ.

ਨਨੁ ਅਸਞ੍ਞਭਵੋ ਅਸਞ੍ਞਗਤਿ ਅਸਞ੍ਞਸਤ੍ਤਾਵਾਸੋ ਅਸਞ੍ਞਸਂਸਾਰੋ ਅਸਞ੍ਞਯੋਨਿ ਅਸਞ੍ਞਤ੍ਤਭਾਵਪਟਿਲਾਭੋ.

ਹਞ੍ਚਿ ਅਸਞ੍ਞਭਵੋ ਅਸਞ੍ਞਗਤਿ ਅਸਞ੍ਞਸਤ੍ਤਾਵਾਸੋ ਅਸਞ੍ਞਸਂਸਾਰੋ ਅਸਞ੍ਞਯੋਨਿ ਅਸਞ੍ਞਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ.

ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ.

ਪਞ੍ਚਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋ.

ਨਨੁ ਏਕਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋ.

ਹਞ੍ਚਿ ਏਕਵੋਕਾਰਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਅਤ੍ਤਭਾਵਪਟਿਲਾਭੋ, ਨੋ ਚ ਵਤ ਰੇ ਵਤ੍ਤਬ੍ਬੇ ਅਸਞ੍ਞਸਤ੍ਤੇਸੁ ਸਞ੍ਞਾ ਅਤ੍ਥਿ.

ਛਟ੍ਠਵਗ੍ਗ

ਪਥਵੀਧਾਤੁਸਨਿਦਸ੍ਸਨਾਤਿਆਦਿਕਥਾ

ਪੁਚ੍ਛਾ – ਛਟ੍ਠਵਗ੍ਗੇ ਪਨ ਆਵੁਸੋ ਅਟ੍ਠਮਾ ਪਥਵੀਧਾਤੁ ਸਨਿਦਸ੍ਸਨਾਤਿਆਦਿਕਥਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਂ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਛਟ੍ਠਵਗ੍ਗੇ ਭਨ੍ਤੇ ਅਟ੍ਠਮਾ ਪਥਵੀਧਾਤੁ ਸਨਿਦਸ੍ਸਨਾਤਿਆਦਿਕਥਾ ‘‘ਪਥਵੀਧਾਤੁ ਸਨਿਦਸ੍ਸਨਾਤਿ ਆਮਨ੍ਤਾ. ਰੂਪਂ ਰੂਪਾਯਤਨਂ ਰੂਪਧਾਤੁ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਚਕ੍ਖੁਵਿਞ੍ਞੇਯ੍ਯਂ ਚਕ੍ਖੁਸ੍ਮਿਂ ਪਟਿਹਞ੍ਞਤਿ ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ, ਨ ਹੇਵਂ ਵਤ੍ਤਬ੍ਬੇ’’ਤਿ ਏਵਮਾਦਿਨਾ ਆਯਸ੍ਮਤਾ ਮਹਾਮੋਗ੍ਗਲਿ ਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਪਥਵੀਧਾਤੁ ਸਨਿਦਸ੍ਸਨਾ.

ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ.

ਤੇਨ ਹਿ ਨ ਵਤ੍ਤਬ੍ਬਂ ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਂ.

ਅਨ੍ਤਰਾਭਵਕਥਾ

ਪੁਚ੍ਛਾ – ਅਭਿਧਮ੍ਮਪਿਟਕੇ ਆਵੁਸੋ ਪਞ੍ਚਮੇ ਕਥਾਵਤ੍ਥੁਪ੍ਪਕਰਣੇ ਅਟ੍ਠਮਵਗ੍ਗੇ ਦੁਤਿਯਾ ਅਨ੍ਤਰਾਭਵਕਥਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਕਥਂ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਵਿਸ੍ਸਜ੍ਜਨਾ – ਅਭਿਧਮ੍ਮਪਿਟਕੇ ਭਨ੍ਤੇ ਪਞ੍ਚਮੇ ਕਥਾਵਤ੍ਥੁਪ੍ਪਕਰਣੇ ਅਟ੍ਠਮਵਗ੍ਗੇ ਦੁਤਿਯਾ ਅਨ੍ਤਰਾਭਵਕਥਾ ‘‘ਅਤ੍ਥਿ ਅਨ੍ਤਰਾਭਵੋਤਿ, ਆਮਨ੍ਤਾ. ਕਾਮਭਵੋਤਿ, ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਅਨ੍ਤਰਾਭਵੋਤਿ, ਆਮਨ੍ਤਾ. ਰੂਪਭਵੋਤਿ, ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਅਨ੍ਤਰਾਭਵੋਤਿ, ਆਮਨ੍ਤਾ. ਅਰੂਪਭਵੋਤਿ, ਨ ਹੇਵਂ ਵਤ੍ਤਬ੍ਬੇ’’ਤਿ ਏਵਮਾਦਿਨਾ ਆਯਸ੍ਮਤਾ ਮਹਾਮੋਗ੍ਗਲਿਪੁਤ੍ਤਤਿਸ੍ਸਤ੍ਥੇਰੇਨ ਵਿਤ੍ਥਾਰਤੋ ਵਿਭਜਿਤ੍ਵਾ ਕਥਿਤਾ.

ਅਤ੍ਥਿ ਅਨ੍ਤਰਾਭਵੋ.

ਨ ਹੇਵਂ ਵਤ੍ਤਬ੍ਬੇ.

ਅਤ੍ਥਿ ਅਨ੍ਤਰਾਭਵੋ.