੬. ਅਚ੍ਛਰਾਸਙ੍ਘਾਤਵਗ੍ਗ

ਪੁਚ੍ਛਾ – ਅਚ੍ਛਰਾਸਙ੍ਘਾਤਵਗ੍ਗੇ ਆਵੁਸੋ ਪਠਮ ਦੁਤਿਯਸੁਤ੍ਤਾਨਿ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਅਚ੍ਛਰਾਸਙ੍ਘਾਤਵਗ੍ਗੇ ਭਨ੍ਤੇ ਭਗਵਤਾ ‘‘ਪਭਸ੍ਸਰਮਿਦਂ ਭਿਕ੍ਖਵੇ ਚਿਤ੍ਤਂ, ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਂ, ਤਂ ਅਸ੍ਸੁਤਵਾ ਪੁਥੁਜ੍ਜਨੋ ਯਥਾਭੂਤਂ ਨਪ੍ਪਜਾਨਾਤਿ, ਤਸ੍ਮਾ ‘ਅਸ੍ਸੁਤਵਤੋ ਪੁਥੁਜ੍ਜਨਸ੍ਸ ਚਿਤ੍ਤਭਾਵਨਾ ਨਤ੍ਥੀ’ਤਿ ਵਦਾਮਿ. ਪਭਸ੍ਸਰਮਿਦਂ ਭਿਕ੍ਖਵੇ ਚਿਤ੍ਤਂ, ਤਞ੍ਚ ਖੋ ਆਗਨ੍ਤੁਕੇਹਿ ਉਪਕ੍ਕਿਲੇਸੇਹਿ ਵਿਪ੍ਪਮੁਤ੍ਤਂ, ਤਂ ਸੁਭਵਾ ਅਰਿਯਸਾਵਕੋ ਯਥਾਭੂਤਂ ਪਜਾਨਾਤਿ. ਤਸ੍ਮਾ ‘ਸੁਤਪਤੋ ਅਰਿਯਸਾਵਕਸ੍ਸ ਚਿਤ੍ਤਭਾਵਨਾ ਅਤ੍ਥੀ’ਤਿ ਵਦਾਮੀ’’ਤਿ. ਏਵਂ ਖੋ ਭਗਵਤਾ ਭਾਸਿਤਾਨਿ.

ਤਤਿਯਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਤਤਿਯਸੁਤ੍ਤਾਦੀਨਿ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਤਤਿਯਸੁਤ੍ਤਾਦੀਨਿ ਪਞ੍ਚਸੁਤ੍ਤਾਨਿ ‘‘ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਚੇ ਭਿਕ੍ਖਵੇ ਭਿਕ੍ਖੁ ਮੇਤ੍ਤਾਚਿਤ੍ਤਂ ਆਸੇਵਤਿ, ਭਾਵੇਤਿ, ਮਨਸਿਕਰੋਤਿ. ਅਯਂ ਵੁਚ੍ਚਤਿ ਭਿਕ੍ਖਵੇ ਭਿਕ੍ਖੁ ਅਰਿਤ੍ਤਜ੍ਝਾਨੋ ਵਿਹਰਤਿ ਸਤ੍ਥੁਸਾਸਨਕਰੋ ਓਵਾਦਪਤਿਕਰੋ ਅਮੋਘਂ ਰਟ੍ਠਪਿਣ੍ਡਂ ਭੁਞ੍ਜਤਿ, ਕੋ ਪਨ ਵਾਦੋ ਯੇ ਨਂ ਬਹੁਲੀਕਰੋਨ੍ਤਿ. ਯੇਕੇਚਿ ਭਿਕ੍ਖਵੇ ਧਮ੍ਮਾ ਅਕੁਸਲਾ ਅਕੁਸਲਭਾਗਿਯਾ ਅਕੁਸਲਪਕ੍ਖਿਕਾ, ਸਬ੍ਬੇਤੇ ਮਨੋਪੁਬ੍ਬਙ੍ਗਮਾ, ਮਨੋ ਤੇਸਂ ਧਮ੍ਮਾਨਂ ਪਠਮਂ ਉਪ੍ਪਜ੍ਜਤਿ, ਅਨ੍ਵਦੇਵ ਅਕੁਸਲਾਧਮ੍ਮਾ, ਯੇਕੇਚਿ ਭਿਕ੍ਖਵੇ ਧਮ੍ਮਾ ਕੁਸਲਾ ਕੁਸਲਭਾਗਿਯਾ ਕੁਸਲਪਕ੍ਖਿਕਾ, ਸਬ੍ਬੇਤੇ ਮਨੋਪੁਬ੍ਬਙ੍ਗਮਾ, ਮਨੋ ਤੇਸਂ ਧਮ੍ਮਾਨਂ ਪਠਮਂ ਉਪ੍ਪਜ੍ਜਤਿ, ਅਨ੍ਵਦੇਵ ਕੁਸਲਾ ਧਮ੍ਮਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਭਾਸਿਤਾਨਿ.

ਅਟ੍ਠਮਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਅਟ੍ਠਮ ਨਵਮ ਦਸਮਸੁਤ੍ਤਾਨਿ ਚ ਵੀਰਿਯਾਰਮ੍ਭਾਦਿਵਗ੍ਗੇ ਦਸਸੁਤ੍ਤਾਨਿ ਚ ਕਲ੍ਯਾਣਮਿਤ੍ਤਾਦਿਵਗ੍ਗੇ ਪਠਮਸੁਤ੍ਤਞ੍ਚ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਅਟ੍ਠਮ ਨਵਮ ਦਸਮਸੁਤ੍ਤਾਨਿ ਚ ਵੀਰਿਯਾਰਮ੍ਭਾਦਿਵਗ੍ਗੇ ਦਸਸੁਤ੍ਤਾਨਿ ਚ ਕਲ੍ਯਾਣਮਿਤ੍ਤਾਦਿਵਗ੍ਗੇ ਪਠਮਸੁਤ੍ਤਞ੍ਚ ‘‘ਨਾਹਂ ਭਿਕ੍ਖਵੇ ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ, ਯੇਨ ਅਨੁਪ੍ਪਨ੍ਨਾ ਵਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਵਾ ਕੁਸਲਾ ਧਮ੍ਮਾ ਪਰਿਹਾਯਨ੍ਤਿ, ਯਥਯਿਦਂ ਭਿਕ੍ਖਵੇ ਪਮਾਦੋ, ਪਮਤ੍ਤਸ੍ਸ ਭਿਕ੍ਖਵੇ ਅਨੁਪ੍ਪਨ੍ਨਾ ਚੇਵ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਚ ਕੁਸਲਾ ਧਮ੍ਮਾ ਪਰਿਹਾਯਨ੍ਤੀ’’ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਾਨਿ.

ਦੁਤਿਯਸੁਤ੍ਤ

ਪੁਚ੍ਛਾ – ਕਲ੍ਯਾਣਮਿਤ੍ਤਾਦਿਵਗ੍ਗੇ ਆਵੁਸੋ ਦੁਤਿਯ ਤਤਿਯਸੁਤ੍ਤਾਨਿ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਕਲ੍ਯਾਣਮਿਤ੍ਤਾਦਿਵਗ੍ਗੇ ਭਨ੍ਤੇ ਦੁਤਿਯ ਤਤਿਯਸੁਤ੍ਤਾਨਿ ‘‘ਨਾਹਂ ਭਿਕ੍ਖਵੇ ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ, ਯੇਨ ਅਨੁਪ੍ਪਨ੍ਨਾ ਵਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਉਪ੍ਪਨ੍ਨਾ ਵਾ ਕੁਸਲਾ ਧਮ੍ਮਾ ਪਰਿਹਾਯਨ੍ਤਿ, ਯਥਯਿਦਂ ਭਿਕ੍ਖਵੇ ਅਨੁਯੋਗੋ ਅਕੁਸਲਾਨਂ ਧਮ੍ਮਾਨਂ ਅਨਨੁਯੋਗੋ ਕੁਸਲਾਨਂ ਧਮ੍ਮਾਨ’’ਨ੍ਤਿ ਏਵਮਾਦਿਨਾ ਭਗਵਤਾ ਭਾਸਿਤਾਨਿ.

ਛਟ੍ਠਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਛਟ੍ਠਸੁਤ੍ਤਾਦੀਨਿ ਚ ਪਮਾਦਾਦਿਵਗ੍ਗੇ ਪਠਮਸੁਤ੍ਤਞ੍ਚ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਛਟ੍ਠਸੁਤ੍ਤਾਦੀਨਿ ਚ ਪਮਾਦਾਦਿਵਗ੍ਗੇ ਪਠਮਸੁਤ੍ਤਞ੍ਚ ‘‘ਅਪ੍ਪਮਤ੍ਤਿਕਾ ਏਸਾ ਭਿਕ੍ਖਵੇ ਪਰਿਹਾਨਿ ਯਦਿਦਂ ਞਾਤਿਪਰਿਹਾਨਿ. ਏਤਂ ਪਤਿਕਿਟ੍ਠਂ ਭਿਕ੍ਖਵੇ ਪਰਿਹਾਨੀਨਂ ਯਦਿਦਂ ਪਞ੍ਞਾਪਰਿਹਾਨੀਤਿ. ਅਪ੍ਪਮਤ੍ਤਿਕਾ ਏਸਾ ਭਿਕ੍ਖਵੇ ਵੁਦ੍ਧਿ ਯਦਿਦਂ ਞਾਤਿਵੁਦ੍ਧਿ. ਏਤਦਗ੍ਗਂ ਭਿਕ੍ਖਵੇ ਵੁਦ੍ਧੀਨਂ ਯਦਿਦਂ ਪਞ੍ਞਾਵੁਦ੍ਧਿ. ਤਸ੍ਮਾਤਿਹ ਭਿਕ੍ਖਵੇ ਏਵਂ ਸਿਕ੍ਖਿਤਬ੍ਬਂ ‘ਪਞ੍ਞਾਵੁਦ੍ਧਿਯਾ ਵਦ੍ਧਿਸ੍ਸਾਮਾ’ਤਿ. ਏਵਞ੍ਹਿ ਵੋ ਭਿਕ੍ਖਵੇ ਸਿਕ੍ਖਿਤਬ੍ਬ’’ਨ੍ਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਾਨਿ.

ਪਮਾਦਾਦਿਵਗ੍ਗ

ਪੁਚ੍ਛਾ – ਤੇਨਾਵੁਸੋ…ਪੇ… ਸਮ੍ਮਾਸਮ੍ਬੁਦ੍ਧੇਨ ਪਮਾਦਾਦਿਵਗ੍ਗੇ ਦੁਤਿਯਸੁਤ੍ਤਾਦੀਨਿ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਨਾਹਂ ਭਿਕ੍ਖਵੇ ਅਞ੍ਞਂ ਏਕਧਮ੍ਮਮ੍ਪਿ ਸਮਨੁਪਸ੍ਸਾਮਿ, ਯੋ ਏਵਂ ਮਹਤੋ ਅਨਤ੍ਥਾਯ ਸਂਵਤ੍ਤਤਿ, ਯਥਯਿਦਂ ਭਿਕ੍ਖਵੇ ਪਮਾਦੋ. ਪਮਾਦੋ ਭਿਕ੍ਖਵੇ ਮਹਤੋ ਅਨਤ੍ਥਾਯ ਸਂਵਤ੍ਤਤਿ. ਨਾਹਂ ਭਿਕ੍ਖਵੇ ਅਞ੍ਞਂ ਏਕਧਮ੍ਮਮ੍ਪਿ, ਯੋ ਏਵਂ ਮਹਤੋ ਅਤ੍ਥਾਯ ਸਂਵਤ੍ਤਤਿ, ਯਥਯਿਦਂ ਭਿਕ੍ਖਵੇ ਅਪ੍ਪਮਾਦੋ, ਅਪ੍ਪਮਾਦੋ ਭਿਕ੍ਖਵੇ ਮਹਤੋ ਅਨਤ੍ਥਾਯ ਸਂਵਤ੍ਤਤੀਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਾਨਿ.

ਦੁਤਿਯ ਪਮਾਦਾਦਿਵਗ੍ਗ

ਪੁਚ੍ਛਾ – ਦੁਤਿਯੇ ਪਨਾਵੁਸੋ ਪਮਾਦਾਦਿਵਗ੍ਗੇ ਪਠਮਸੁਤ੍ਤਾਦੀਨਿ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਦੁਤਿਯੇ ਭਨ੍ਤੇ ਪਮਾਦਾਦਿਵਗ੍ਗੇ ਅਜ੍ਝਤ੍ਤਿਕਂ ਭਿਕ੍ਖਵੇ ਅਙ੍ਗਨ੍ਤਿ ਕਰਿਤ੍ਵਾ ਨਾਞ੍ਞਂ ਏਕਙ੍ਗਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਮਹਤੋ ਅਨਤ੍ਥਾਯ ਸਂਵਤ੍ਤਤਿ, ਯਥਯਿਦਂ ਭਿਕ੍ਖਵੇ ਪਮਾਦੋ. ਪਮਾਦੋ ਭਿਕ੍ਖਵੇ ਮਹਤੋ ਅਨਤ੍ਥਾਯ ਸਂਵਤ੍ਤਤਿ. ਅਜ੍ਝਤ੍ਤਿਕਂ ਭਿਕ੍ਖਵੇ ਅਙ੍ਗਨ੍ਤਿ ਕਰਿਤ੍ਵਾ ਨਾਞ੍ਞਂ ਏਕਙ੍ਗਮ੍ਪਿ ਸਮਨੁਪਸ੍ਸਾਮਿ, ਯਂ ਏਵਂ ਮਹਤੋ ਅਤ੍ਥਾਯ ਸਂਵਤ੍ਤਤਿ, ਯਥਯਿਦਂ ਭਿਕ੍ਖਵੇ ਅਪ੍ਪਮਾਦੋ. ਅਪ੍ਪਮਾਦੋ ਭਿਕ੍ਖਵੇ ਮਹਤੋ ਅਤ੍ਥਾਯ ਸਂਵਤ੍ਤਤੀਤਿ ਏਵਮਾਦਿਨਾ ਭਨ੍ਤੇ ਭਗਵਤਾ ਭਾਸਿਤਾਨਿ.

ਦਸਸੁਤ੍ਤ

ਪੁਚ੍ਛਾ – ਤਤ੍ਥੇਵ ਆਵੁਸੋ ਤੇਤ੍ਤਿਂਸਮਾਦੀਨਿਚ ਦਸਸੁਤ੍ਤਾਨਿ ਅਧਮ੍ਮਵਗ੍ਗੇ ਚ ਦਸਸੁਤ੍ਤਾਨਿ ਭਗਵਤਾ ਕਥਂ ਭਾਸਿਤਾਨਿ.

ਵਿਸ੍ਸਜ੍ਜਨਾ – ਤਤ੍ਥੇਵ ਭਨ੍ਤੇ ਤੇਤ੍ਤਿਂਸਮਾਦੀਨਿ ਦਸਸੁਤ੍ਤਾਨਿ ਚ ਅਧਮ੍ਮਵਗ੍ਗੇ ਦਸਸੁਤ੍ਤਾਨਿ ਚ ਯੇ ਤੇ ਭਿਕ੍ਖਵੇ ਭਿਕ੍ਖੂ ਅਧਮ੍ਮਂ ‘‘ਧਮ੍ਮੋ’’ਤਿ ਦੀਪੇਨ੍ਤਿ, ਤੇ ਭਿਕ੍ਖਵੇ ਭਿਕ੍ਖੂ ਬਹੁਜਨਅਹਿਤਾਯ ਪਟਿਪਨ੍ਨਾ ਬਹੁਜਨਅਸੁਖਾਯ ਬਹੁਨੋ ਜਨਸ੍ਸ ਅਨਤ੍ਥਾਯ ਅਹਿਤਾਯ ਦੁਕ੍ਖਾਯ ਦੇਵਮਨੁਸ੍ਸਾਨਂ. ਬਹੁਞ੍ਚ ਤੇ ਭਿਕ੍ਖਵੇ ਭਿਕ੍ਖੂ ਅਪੁਞ੍ਞਂ ਪਸਵਨ੍ਤਿ, ਤੇ ਚਿਮਂ ਸਦ੍ਧਮ੍ਮਂ ਅਨ੍ਤਰਧਾਪੇਨ੍ਤੀਤਿ ਏਵਮਾਦਿਨਾ ਚ, ਯੇ ਤੇ ਭਿਕ੍ਖਵੇ ਭਿਕ੍ਖੂ ਅਧਮ੍ਮਂ ‘‘ਅਧਮ੍ਮੋ’’ਤਿ ਦੀਪੇਨ੍ਤਿ, ਤੇ ਭਿਕ੍ਖਵੇ ਭਿਕ੍ਖੂ ਬਹੁਜਨਹਿਤਾਯ ਪਟਿਪਨ੍ਨਾ ਬਹੁਜਨਸੁਖਾਯ ਬਹੁਜਨੋ ਜਨਸ੍ਸ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ. ਬਹੁਞ੍ਚ ਤੇ ਭਿਕ੍ਖਵੇ ਭਿਕ੍ਖੂ ਪੁਞ੍ਞਂ ਪਸਵਨ੍ਤਿ, ਤੇ ਚਿਮਂ ਸਦ੍ਧਮ੍ਮਂ ਠਪੇਨ੍ਤੀਤਿ ਏਵਮਾਦਿਨਾ ਚ ਭਨ੍ਤੇ ਭਗਵਤਾ ਭਾਸਿਤਾਨਿ.

ਏਕਪੁਗ੍ਗਲਵਗ੍ਗ

ਪੁਚ੍ਛਾ – ਏਕਪੁਗ੍ਗਲਵਗ੍ਗੇ ਆਵੁਸੋ ਭਗਵਤਾ ਕੀਦਿਸੀ ਧਮ੍ਮਦੇਸਨਾਯੋ ਦੇਸਿਤਾ.

ਵਿਸ੍ਸਜ੍ਜਨਾ – ਏਕਪੁਗ੍ਗਲਵਗ੍ਗੇ ਭਨ੍ਤੇ ਭਗਵਤਾ ਏਕਪੁਗ੍ਗਲੋ ਭਿਕ੍ਖਵੇ ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ. ਕਤਮੋ ਏਕਪੁਗ੍ਗਲੋ, ਤਥਾਗਤੋ ਅਰਹਂ ਸਮ੍ਮਾਸਮ੍ਬੁਦ੍ਧੋ, ਅਯਂ ਖੋ ਭਿਕ੍ਖਵੇ ਏਕਪੁਗ੍ਗਲੋ ਲੋਕੇ ਉਪ੍ਪਜ੍ਜਮਾਨੋ ਉਪ੍ਪਜ੍ਜਤਿ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਨ੍ਤਿ ਏਵਮਾਦਿਕਾ ਭਗਵਤਾ ਧਮ੍ਮਦੇਸਨਾਯੋ ਦੇਸਿਤਾ.

ਏਤਦਗ੍ਗਵਗ੍ਗ

ਅਞ੍ਞਾਸਿਕੋਣ੍ਡਞ੍ਞ ਵਤ੍ਥੁ

ਪੁਚ੍ਛਾ – ਏਤਦਵਗ੍ਗੇ ਆਵੁਸੋ ਆਗਤੇਸੁ ਏਕਚਤ੍ਤਾਲੀਸਾਯ ਥੇਰੇਸੁ ਆਯਸ੍ਮਾ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰੋ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਏਤਦਗ੍ਗਵਗ੍ਗੇ ਭਨ੍ਤੇ ਆਗਤੇਸੁ ਏਕਚਤ੍ਤਾਲੀਸਾਯ ਮਹਾਥੇਰੇਸੁ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਰਤ੍ਤਞ੍ਞੂਨਂ ਯਦਿਦਂ ਅਞ੍ਞਾਸਿਕੋਣ੍ਡਞ੍ਞੋ’’ਤਿ, ਏਵਂ ਖੋ ਭਨ੍ਤੇ ਆਯਸ੍ਮਾ ਅਞ੍ਞਾਸਿਕੋਣ੍ਡਞ੍ਞਤ੍ਥੇਰੋ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਅਗ੍ਗਸਾਵਕਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤੇਸੁ ਏਕਚਤ੍ਤਾਲੀਸਾਯ ਮਹਾਥੇਰੇਸੁ ਆਯਸ੍ਮਾ ਚ ਸਾਰਿਪੁਤ੍ਤਤ੍ਥੇਰੋ ਧਮ੍ਮਸੇਨਾਪਤਿ ਪਠਮੋ ਅਗ੍ਗਸਾਵਕੋ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨਤ੍ਥੇਰੋ ਦੁਤਿਯੋ ਅਗ੍ਗਸਾਵਕੋ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਸਾਰਿਪੁਤ੍ਤਤ੍ਥੇਰੋ ਧਮ੍ਮਸੇਨਾਪਤਿ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਮਹਾਪਞ੍ਞਾਨਂ ਯਦਿਦਂ ਸਾਰਿਪੁਤ੍ਤੋ’’ਤਿ. ਆਯਸ੍ਮਾ ਪਨ ਮਹਾਮੋਗ੍ਗਲ੍ਲਾਨਤ੍ਥੇਰੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’’ਤਿ. ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਇਦਂ ਤੇ ਆਸਨਂ ਵੀਰ, ਪਞ੍ਞਤ੍ਤਂ ਤਵਨੁਚ੍ਛਵਿਂ;

ਮਮ ਚਿਤ੍ਤਂ ਪਸਾਦੇਨ੍ਤੋ, ਨਿਸੀਦ ਪੁਪ੍ਫਮਾਸਨੇ.

ਯੇ ਵਤ ਲੋਕੇ ਅਰਹਨ੍ਤੋ ਵਾ ਅਰਹਤ੍ਤਮਗ੍ਗਂ ਵਾ ਸਮਾਪਨ੍ਨਾ, ਅਯਂ ਤੇਸਂ ਭਿਕ੍ਖੁ ਅਞ੍ਞਤਰੋ.

ਯਂਨੂਨਾਹਂ ਇਮਂ ਭਿਕ੍ਖੁਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛੇਯ੍ਯਂ.

ਯੇ ਧਮ੍ਮਾ ਹੇਤੁਪ੍ਪਭਵਾ,

ਤੇਸਂ ਹੇਤੁਂ ਤਥਾਗਤੋ;

ਆਹ ਤੇਸਞ੍ਚ ਯੋ ਨਿਰੋਧੋ,

ਏਵਂਵਾਦੀ ਮਹਾਸਮਣੋ –

ਲਭੇਯ੍ਯਾਮ ਮਯਂ ਭਨ੍ਤੇ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ, ਲਭੇਯ੍ਯਾਮ ਉਪਸਮ੍ਪਦਂ.

ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਮਹਾਪਞ੍ਞਾਨਂ ਯਦਿਦਂ ਸਾਰਿਪੁਤ੍ਤੋ.

ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ.

ਮਹਾਕਸ੍ਸਪਵਤ੍ਥੁ

ਪੁਚ੍ਛਾ – ਆਯਸ੍ਮਾ ਪਨ ਆਵੁਸੋ ਮਹਾਕਸ੍ਸਪਤ੍ਥੇਰੋ ਪਠਮਮਹਾਸਂਗੀਤਿਕਾਲੇ ਪਾਮੋਕ੍ਖਸਙ੍ਘਨਾਯਕਭੂਤੋ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਮਹਾਕਸ੍ਸਪਤ੍ਥੇਰੋ ਪਠਮਮਹਾਸਂਗੀਤਿਕਾਲੇ ਸਙ੍ਘਪਾਮੋਕ੍ਖਭੂਤੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਧੁਤਵਾਦਾਨਂ ਯਦਿਦਂ ਮਹਾਕਸ੍ਸਪੋ’’ਤਿ. ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਅਨੁਰੁਦ੍ਧਤ੍ਥੇਰਵਤ੍ਥੁ

ਪੁਚ੍ਛਾ – ਤੇਨਾਵੁਸੋ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤੇਸੁ ਏਕਚਤ੍ਤਾਲੀਸਾਯ ਮਹਾਥੇਰੇਸੁ ਆਯਸ੍ਮਾ ਅਨੁਰੁਦ੍ਧਤ੍ਥੇਰੋ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਅਨੁਰੁਦ੍ਧਤ੍ਥੇਰੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਦਿਬ੍ਬਚਕ੍ਖੁਕਾਨਂ ਯਦਿਦਂ ਅਨੁਰੁਦ੍ਧੋ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਸੀਵਲਿਵਤ੍ਥੁ

ਪੁਚ੍ਛਾ – ਆਯਸ੍ਮਾ ਪਨ ਆਵੁਸੋ ਸੀਵਲਿਤ੍ਥੇਰੋ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਸੀਵਲਿਤ੍ਥੇਰੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਲਾਭੀਨਂ ਯਦਿਦਂ ਸੀਵਲੀ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਸਮ੍ਮਾਸਮ੍ਬੁਦ੍ਧੋ ਵਤ ਸੋ ਭਗਵਾ, ਯੋ ਇਮਸ੍ਸ ਏਵਰੂਪਸ੍ਸ ਦੁਕ੍ਖਸ੍ਸ ਪਹਾਨਾਯ ਧਮ੍ਮਂ ਦੇਸੇਤਿ.

ਸੁਪ੍ਪਟਿਪਨ੍ਨੋ ਵਤ ਤਸ੍ਸ ਭਗਵਤੋ ਸਾਵਕਸਙ੍ਘੋ, ਯੋ ਇਮਸ੍ਸ ਏਵਰੂਪਸ੍ਸ ਦੁਕ੍ਖਸ੍ਸ ਪਹਾਨਾਯ ਪਟਿਪਨ੍ਨੋ.

ਸੁਸੁਖਂ ਵਤ ਨਿਬ੍ਬਾਨਂ, ਯਤ੍ਥਿਦਂ ਏਵਰੂਪਂ ਦੁਕ੍ਖਂ ਨ ਸਂਵਿਜ੍ਜਤਿ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਲਾਭੀਨਂ ਯਦਿਦਂ ਸੀਵਲਿ’’ ਹੁ –

ਆਨਨ੍ਦਾਥੇਰਵਤ੍ਥੁ

ਪੁਚ੍ਛਾ – ਆਯਸ੍ਮਾ ਪਨ ਆਵੁਸੋ ਆਨਨ੍ਦਤ੍ਥੇਰੋ ਧਮ੍ਮਭਣ੍ਡਾਗਾਰਿਕੋ ਪਠਮਮਹਾਸਂਗੀਤਿਕਾਲੇ ਧਮ੍ਮਵਿਸ੍ਸਜ੍ਜਕਥੇਰਭੂਤੋ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਆਨਨ੍ਦਤ੍ਥੇਰੋ ਧਮ੍ਮਭਣ੍ਡਾਗਾਰਿਕੋ ਪਠਮਮਹਾਸਂਗੀਤਿਕਾਲੇ ਧਮ੍ਮਵਿਸ੍ਸਜ੍ਜਕਭੂਤੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਬਹੁਸ੍ਸੁਤਾਨਂ ਯਦਿਦਂ ਆਨਨ੍ਦੋ. ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਸਤਿਮਨ੍ਤਾਨਂ ਯਦਿਦਂ ਆਨਨ੍ਦੋ. ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਗਤਿਮਨ੍ਤਾਨਂ ਯਦਿਦਂ ਆਨਨ੍ਦੋ. ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਧਿਤਿਮਨ੍ਤਾਨਂ ਯਦਿਦਂ ਆਨਨ੍ਦੋ. ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਉਪਟ੍ਠਾਕਾਨਂ ਯਦਿਦਂ ਆਨਨ੍ਦੋ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਪਞ੍ਚਸੁ ਏਤਦਗ੍ਗਟ੍ਠਾਨੇਸੁ ਠਪਿਤੋ.

ਸਤਸਹਸ੍ਸੇਨ ਮੇ ਕੀਤਂ,

ਸਤਸਹਸ੍ਸੇਨ ਮਾਪਿਤਂ;

ਸੋਭਨਂ ਨਾਮ ਉਯ੍ਯਾਨਂ;

ਪਟਿਗ੍ਗਣ੍ਹ ਮਹਾਮੁਨਿ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਬਹੁਸ੍ਸੁਤਾਨਂ. ਸਤਿਮਨ੍ਤਾਨਂ. ਗਤਿਮਨ੍ਤਾਨਂ. ਧਿਤਿਮਨ੍ਤਾਨਂ. ਉਪਟ੍ਠਾਕਾਨਂ ਯਦਿਦਂ ਆਨਨ੍ਦੋ’’ –

ਉਪਾਲਿਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤੇਸੁ ਏਕਚਤ੍ਤਾਲੀਸਾਯ ਮਹਾਥੇਰੇਸੁ ਆਯਸ੍ਮਾ ਉਪਾਲਿਤ੍ਥੇਰੋ ਪਠਮਮਹਾਸਂਗੀਤਿਕਾਲੇ ਵਿਨਯਵਿਸ੍ਸਜ੍ਜਕਭੂਤੋ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਆਯਸ੍ਮਾ ਭਨ੍ਤੇ ਉਪਾਲਿਤ੍ਥੇਰੋ ਪਠਮਮਹਾਸਂਗੀਤਿਕਾਲੇ ਵਿਨਯਵਿਸ੍ਸਜ੍ਜਕਭੂਤੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਭਿਕ੍ਖੂਨਂ ਵਿਨਯਧਰਾਨਂ ਯਦਿਦਂ ਉਪਾਲੀ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਨਯੋ ਵਾਸਯੋ ਮਯ੍ਹਂ,

ਵਿਨਯੋ ਠਾਨਚਙ੍ਕਮਂ;

ਕਪ੍ਪੇਮਿ ਵਿਨਯੇ ਵਾਸਂ,

ਵਿਨਯੋ ਮਮ ਗੋਚਰੋ.

ਮਹਾਪਜਾਪਤਿਗੋਤਮੀਥੇਰੀਵਤ੍ਥੁ

ਪੁਚ੍ਛਾ – ਏਤਦਗ੍ਗਵਗ੍ਗੇ ਆਵੁਸੋ ਆਗਤਾਸੁ ਤੇਰਸਸੁ ਥੇਰੀਸੁ ਮਹਾਪਜਾਪਤਿ ਗੋਤਮੀਥੇਰੀ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਏਤਦਗ੍ਗਵਗ੍ਗੇ ਭਨ੍ਤੇ ਆਗਤਾਸੁ ਤੇਰਸਸੁ ਥੇਰੀਸੁ ਮਹਾਪਜਾਪਤਿਗੋਤਮੀਥੇਰੀ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਰਤ੍ਤਞ੍ਞੂਨਂ ਯਦਿਦਂ ਮਹਾਪਜਾਪਤਿ ਗੋਤਮੀ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਰਤ੍ਤਞ੍ਞੂਨਂ ਯਦਿਦਂ ਮਹਾਪਜਾਪਤਿਗੋਤਮੀ’’ –

ਪੁਚ੍ਛਾ – ਖੇਮਾਥੇਰੀ ਪਨ ਆਵੁਸੋ ਅਗ੍ਗਸਾਵਿਕਾ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਖੇਮਾਥੇਰੀ ਭਨ੍ਤੇ ਪਠਮਾ ਅਗ੍ਗਸਾਵਿਕਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਮਹਾਪਞ੍ਞਾਨਂ ਯਦਿਦਂ ਖੇਮਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਯੇ ਰਾਗਰਤ੍ਤਾਨੁਪਤਨ੍ਤਿ ਸੋਤਂ,

ਸਯਂਕਤਂ ਮਕ੍ਕਟੋਵ ਜਾਲਂ,

ਏਤਮ੍ਪਿ ਛੇਤ੍ਵਾਨ ਵਜਨ੍ਤਿ ਧੀਰਾ;

ਅਨਪੇਕ੍ਖਿਨੋ ਸਬ੍ਬਦੁਕ੍ਖਂ ਪਹਾਯ’’ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਮਹਾਪਞ੍ਞਾਨਂ ਯਦਿਦਂ ਖੇਮਾ’’ –

ਪੁਚ੍ਛਾ – ਉਪ੍ਪਲਵਣ੍ਣਾ ਪਨ ਆਵੁਸੋ ਥੇਰੀ ਦੁਤਿਯਅਗ੍ਗਸਾਵਿਕਾ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਉਪ੍ਪਲਵਣ੍ਣਾ ਭਨ੍ਤੇ ਥੇਰੀ ਦੁਤਿਯਅਗ੍ਗਸਾਵਿਕਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਇਦ੍ਧਿਮਨ੍ਤੀਨਂ ਯਦਿਦਂ ਉਪ੍ਪਲਵਣ੍ਣਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਇਦ੍ਧਿਮਨ੍ਤੀਨਂ ਯਦਿਦਂ ਉਪ੍ਪਲਵਣ੍ਣਾ’’ –

ਪਟਾਚਾਰਾਥੇਰੀਭਿਕ੍ਖੁਨੀਮਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤਾਸੁ ਤੇਰਸਸੁ ਥੇਰੀਸੁ ਪਟਾਚਾਰਾਨਾਮ ਥੇਰੀ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਏਤਦਗ੍ਗਵਗ੍ਗੇ ਭਨ੍ਤੇ ਆਗਤਾਸੁ ਤੇਰਸਸੁ ਥੇਰਿਕਾਸੁ ਪਟਾਚਾਰਾ ਥੇਰੀ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਵਿਨਯਧਰਾਨਂ ਯਦਿਦਂ ਪਟਾਚਾਰਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਉਭੋ ਪੁਤ੍ਤਾ ਕਾਲਙ੍ਕਤਾ,

ਪਨ੍ਥੇ ਮਯ੍ਹਂ ਪਤੀ ਮਤੋ;

ਮਾਤਾਪਿਤਾ ਚ ਭਾਤਾ ਚ,

ਏਕਚਿਤਕਸ੍ਮਿਂ ਡਯ੍ਹਰੇ’’ –

‘‘ਚਤੂਸੁ ਸਮੁਦ੍ਦੇਸੁ ਜਲਂ ਪਰਿਤ੍ਤਕਂ,

ਤਤੋ ਬਹੁਂ ਅਸ੍ਸੁਜਲਂ ਅਨਪ੍ਪਕਂ;

ਦੁਕ੍ਖੇਨ ਫੁਟ੍ਠਸ੍ਸ ਨਰਸ੍ਸ ਸੋਚਨਾ,

ਕਿਂ ਕਾਰਣਾ ਅਮ੍ਮ ਤੁਵਂ ਪਮਜ੍ਜਸਿ’’ –

‘‘ਨ ਸਨ੍ਤਿ ਪੁਤ੍ਤਾ ਤਾਣਾਯ,

ਨ ਪਿਤਾ ਨਾਪਿ ਬਨ੍ਧਵਾ;

ਅਨ੍ਤਕੇਨਾਧਿਪਨ੍ਨਸ੍ਸ,

ਨਤ੍ਥਿ ਞਾਤੀਸੁ ਤਾਣਤਾ;

ਏਤਮਤ੍ਥਵਸਂ ਞਤ੍ਵਾ, ਪਣ੍ਡਿਤੋ ਸੀਲਸਂਵੁਤੋ;

ਨਿਬ੍ਬਾਨਗਮਨਂ ਮਗ੍ਗਂ, ਖਿਪ੍ਪਮੇਵ ਵਿਸੋਧਯੇ’’ –

‘‘ਯੋ ਚ ਵਸ੍ਸਸਤਂ ਜੀਵੇ,

ਅਪਸ੍ਸਂ ਉਦਯਬ੍ਬਯਂ;

ਏਕਾਹਂ ਜੀਵਿਤਂ ਸੇਯ੍ਯੋ,

ਪਸ੍ਸਤੋ ਉਦਯਬ੍ਬਯਂ’’ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਵਿਨਯਧਰਾਨਂ ਯਦਿਦਂ ਪਟਾਚਾਰਾ’’ –

ਧਮ੍ਮਦਿਨ੍ਨਾਥੇਰੀਭਿਕ੍ਖੁਨੀਮਵਤ੍ਥੁ

ਪੁਚ੍ਛਾ – ਧਮ੍ਮਦਿਨ੍ਨਾ ਪਨ ਆਵੁਸੋ ਥੇਰੀ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਧਮ੍ਮਦਿਨ੍ਨਾ ਭਨ੍ਤੇ ਥੇਰੀ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਧਮ੍ਮਕਥਿਕਾਨਂ ਯਦਿਦਂ ਧਮ੍ਮਦਿਨ੍ਨਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਯਸ੍ਸ ਪੁਰੇ ਚ ਪਚ੍ਛਾ ਚ,

ਮਜ੍ਝੇਚ ਨਤ੍ਥਿ ਕਿਞ੍ਚਨਂ;

ਅਕਿਞ੍ਚਨਂ ਅਨਾਦਾਨਂ,

ਤਮਹਂ ਬ੍ਰੂਮਿ ਬ੍ਰਾਹ੍ਮਣਂ’’ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਧਮ੍ਮਕਥਿਕਾਨਂ ਯਦਿਦਂ ਧਮ੍ਮਦਿਨ੍ਨਾ’’ –

ਯਸੋਧਰਾਥੇਰੀਭਿਕ੍ਖੁਨੀਮਵਤ੍ਥੁ

ਪੁਚ੍ਛਾ – ਭਦ੍ਦਕਚ੍ਚਾਨਾਨਾਮ ਆਵੁਸੋ ਯਸੋਧਰਾਥੇਰੀ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਭਦ੍ਦਕਚ੍ਚਾਨਾ ਭਨ੍ਤੇ ਯਸੋਧਰਾਥੇਰੀ ਭਗਵਤਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਮਹਾਭਿਞ੍ਞਪਤ੍ਤਾਨਂ ਯਦਿਦਂ ਭਦ੍ਦਕਚ੍ਚਾਨਾ’’ਤਿ. ਏਵਂ ਖੋ ਭਨ੍ਤੇ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਭਿਕ੍ਖੁਨੀਨਂ ਮਹਾਭਿਞ੍ਞਪਤ੍ਤਾਨਂ ਯਦਿਦਂ ਭਦ੍ਦਕਚ੍ਚਾਨਾ’’ –

ਤਪੁਸ੍ਸਭਲ੍ਲਿਕਵਤ੍ਥੁ

ਪੁਚ੍ਛਾ – ਅਙ੍ਗੁਤ੍ਤਰਨਿਕਾਯੇ ਆਵੁਸੋ ਏਤਦਗ੍ਗਵਗ੍ਗੇ ਆਗਤੇਸੁ ਏਕਾਦਸਸੁ ਉਪਾਸਕੇਸੁ ਤਪੁਸ੍ਸਭਲ੍ਲਿਕਾਨਾਮ ਵਾਣਿਜਾ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਤਪੁਸ੍ਸਭਲ੍ਲਿਕਾ ਭਨ੍ਤੇ ਵਾਣਿਜਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਪਠਮਂ ਸਰਣਂ ਗਚ੍ਛਨ੍ਤਾਨਂ ਯਦਿਦਂ ਤਪੁਸ੍ਸਭਲ੍ਲਿਕਾ ਵਾਣਿਜਾ’’ਤਿ, ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤੇ ਭਨ੍ਤੇ ਮਯਂ ਭਗਵਨ੍ਤਂ ਸਰਣਂ ਗਚ੍ਛਾਮ ਧਮ੍ਮਞ੍ਚ, ਉਪਾਸਕੇ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤੇ ਸਰਣਂ ਗਤੇ’’ ਹੁ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਪਠਮਂ ਸਰਣਂ ਗਚ੍ਛਨ੍ਤਾਨਂ ਯਦਿਦਂ ਤਪੁਸ੍ਸਭਲ੍ਲਿਕਾ ਵਾਣਿਜਾ’’ –

ਅਨਾਥਪਿਣ੍ਡਕਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ ਅਰਹਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤੇਸੁ ਏਕਾਦਸਸੁ ਉਪਾਸਕੇਸੁ ਸੁਦਤ੍ਤੋ ਗਹਪਤਿ ਅਨਾਥਪਿਣ੍ਡਿਕੋ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਏਤਦਗ੍ਗਵਗ੍ਗੇ ਭਨ੍ਤੇ ਆਗਤੇਸੁ ਏਕਾਦਸਸੁ ਉਪਾਸਕੇਸੁ ਸੁਦਤ੍ਤੋ ਗਹਪਤਿ ਅਨਾਥਪਿਣ੍ਡਿਕੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਦਾਯਕਾਨਂ ਯਦਿਦਂ ਸੁਦਤ੍ਤੋ ਗਹਪਤਿ ਅਨਾਥਪਿਣ੍ਡਿਕੋ’’ਤਿ. ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਦਾਯਕਾਨਂ ਯਦਿਦਂ ਸੁਦਤ੍ਤੋ ਗਹਪਤਿ ਅਨਾਥਪਿਣ੍ਡਿਕੋ–

ਸੂਰਮ੍ਬਟ੍ਠਉਪਾਸਕਾਵਤ੍ਥੁ

ਪੁਚ੍ਛਾ – ਸੂਰਮ੍ਬਟ੍ਠੋ ਨਾਮ ਆਵੁਸੋ ਉਪਾਸਕੋ ਭਗਵਤਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤੋ.

ਵਿਸ੍ਸਜ੍ਜਨਾ – ਸੂਰਮ੍ਬਟ੍ਠੋ ਉਪਾਸਕੋ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਅਵੇਚ੍ਚਪ੍ਪਸਨ੍ਨਾਨਂ ਯਦਿਦਂ ਸੂਰਮ੍ਬਟ੍ਠੋ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤੋ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਕਾਨਂ ਅਵੇਚ੍ਚਪ੍ਪਸਨ੍ਨਾਨਂ ਯਦਿਦਂ ਸੂਰਮ੍ਬਟ੍ਠੋ’’ ਹੁ –

ਸੁਜਾਤਾ ਉਪਾਸਿਕਾਵਤ੍ਥੁ

ਪੁਚ੍ਛਾ – ਏਤਦਗ੍ਗਵਗ੍ਗੇ ਆਵੁਸੋ ਆਗਤਾਸੁ ਦਸਸੁ ਉਪਾਸਿਕਾਸੁ ਸੁਜਾਤਾਨਾਮ ਉਪਾਸਿਕਾ ਸੇਨਿਯਧੀਤਾ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਸੁਜਾਤਾ ਭਨ੍ਤੇ ਸੇਨਿਯਧੀਤਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਉਪਾਸਿਕਾਨਂ ਪਠਮਂ ਸਰਣਂ ਗਚ੍ਛਨ੍ਤੀਨਂ ਯਦਿਦਂ ਸੁਜਾਤਾ ਸੇਨਿਯਧੀਤਾ’’ਤਿ, ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਾ ਮਯਂ ਭਨ੍ਤੇ ਭਗਵਨ੍ਤਂ ਸਰਣਂ ਗਚ੍ਛਾਮ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚ, ਉਪਾਸਿਕਾਯੋ ਨੋ ਭਗਵਾ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਾ ਸਰਣਂ ਗਤਾ’’ ਹੁ –

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਉਪਾਸਿਕਾਨਂ ਪਠਮਂ ਸਰਣਂ ਗਚ੍ਛਨ੍ਤੀਨਂ ਯਦਿਦਂ ਸੁਜਾਤਾ ਸੇਨਿਯਧੀਤਾ’’ –

ਵਿਸਾਖਾ ਉਪਾਸਿਕਾਵਤ੍ਥੁ

ਪੁਚ੍ਛਾ – ਵਿਸਾਖਾ ਪਨ ਆਵੁਸੋ ਉਪਾਸਿਕਾ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਵਿਸਾਖਾ ਭਨ੍ਤੇ ਉਪਾਸਿਕਾ ਮਿਗਾਰਮਾਤਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਉਪਾਸਿਕਾਨਂ ਦਾਯਿਕਾਨਂ ਯਦਿਦਂ ਵਿਸਾਖਾ ਮਿਗਾਰਮਾਤਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਉਪਾਸਿਕਾਨਂ ਦਾਯਿਕਾਨਂ ਯਦਿਦਂ ਵਿਸਾਖਾ ਮਿਗਾਰਮਾਤਾ’’ ਹੁ –

ਖੁਜ੍ਜੁਤ੍ਤਰਾ ਉਪਾਸਿਕਾਵਤ੍ਥੁ

ਪੁਚ੍ਛਾ – ਤੇਨਾਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਅਙ੍ਗੁਤ੍ਤਰਨਿਕਾਯੇ ਏਕਕਨਿਪਾਤੇ ਏਤਦਗ੍ਗਵਗ੍ਗੇ ਆਗਤਾਸੁ ਦਸਸੁ ਉਪਾਸਿਕਾਸੁ ਖੁਜ੍ਜੁਤ੍ਤਰਾਨਾਮ ਉਪਾਸਿਕਾ ਕਥਂ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਏਤਦਗ੍ਗਵਗ੍ਗੇ ਭਨ੍ਤੇ ਆਗਤਾਸੁ ਦਸਸੁ ਉਪਾਸਿਕਾਸੁ ਖੁਜ੍ਜੁਤ੍ਤਰਾ ਉਪਾਸਿਕਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਉਪਾਸਿਕਾਨਂ ਬਹੁਸ੍ਸੁਤਾਨਂ ਯਦਿਦਂ ਖੁਜ੍ਜੁਤ੍ਤਰਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਕਾਨਂ ਉਪਾਸਿਕਾਨਂ ਬਹੁਸ੍ਸੁਤਾਨਂ ਯਦਿਦਂ ਖੁਜ੍ਜੁਤ੍ਤਰਾ’’ ਹੁ –

ਕਾਲ਼ੀਉਪਾਸਿਕਾਵਤ੍ਥੁ

ਪੁਚ੍ਛਾ – ਕਾਲ਼ੀਨਾਮ ਆਵੁਸੋ ਉਪਾਸਿਕਾ ਕੁਰਰਘਰਿਕਾ ਕਥਂ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.

ਵਿਸ੍ਸਜ੍ਜਨਾ – ਕਾਲ਼ੀ ਭਨ੍ਤੇ ਉਪਾਸਿਕਾ ਕੁਰਰਘਰਿਕਾ ‘‘ਏਤਦਗ੍ਗਂ ਭਿਕ੍ਖਵੇ ਮਮ ਸਾਵਿਕਾਨਂ ਅਨੁਸ੍ਸਵਪ੍ਪਸਨ੍ਨਾਨਂ ਯਦਿਦਂ ਕਾਲ਼ੀ ਉਪਾਸਿਕਾ ਕੁਰਰਘਰਿਕਾ’’ਤਿ ਏਵਂ ਖੋ ਭਨ੍ਤੇ ਭਗਵਤਾ ਏਤਦਗ੍ਗਟ੍ਠਾਨੇ ਠਪਿਤਾ.