੯. ਉਪਨਿਸ੍ਸਯਪਚ੍ਚਯੋ
ਤਿਵਿਧੋ ਉਪਨਿਸ੍ਸਯਪਚ੍ਚਯੋ, ਆਰਮ੍ਮਣੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯੋ ਪਕਤੂਪਨਿਸ੍ਸਯੋ. ਤਤ੍ਥ ਆਰਮ੍ਮਣੂਪ ਨਿਸ੍ਸਯੋ ਆਰਮ੍ਮਣਾਧਿਪਤਿਪਚ੍ਚਯਸਦਿਸੋ, ਅਨਨ੍ਤਰੂਪਨਿਸ੍ਸਯੋ ਅਨਨ੍ਤਰਪਚ੍ਚਯਸਦਿਸੋ.
ਕਤਮੋ ਪਕਤੂਪਨਿਸ੍ਸਯੋ. ਸਬ੍ਬੇਪਿ ਅਤੀਤਾਨਾਗਤ ਪਚ੍ਚੁਪ੍ਪਨ੍ਨਾ ਅਜ੍ਝਤ੍ਤਬਹਿਦ੍ਧਾਭੂਤਾ ਚਿਤ੍ਤਚੇਤਸਿਕਰੂਪਧਮ੍ਮਾ ਚ ਨਿਬ੍ਬਾਨਞ੍ਚ ਪਞ੍ਞਤ੍ਤਿ ਚ ਸਬ੍ਬੇਸਂ ਪਚ੍ਚੁਪ੍ਪਨ੍ਨਾਨਂ ਚਿਤ੍ਤਚੇਤਸਿਕਾਨਂ ਧਮ੍ਮਾਨਂ ਯਥਾਰਹਂ ਪਕਤੂਪਨਿਸ੍ਸਯੋ.
ਤਤ੍ਥ ਅਤੀਤੋ ਪਰਿਨਿਬ੍ਬੁਤੋ ਅਮ੍ਹਾਕਂ ਬੁਦ੍ਧੋ ਚ ਧਮ੍ਮੋ ਚ ਅਰਿਯਸਾਵਕਸਙ੍ਘੋ ਚ ਸਮ੍ਮੁਤਿਸਙ੍ਘਪਰਮ੍ਪਰਾ ਚ ਅਮ੍ਹਾਕਂ ਪਚ੍ਛਿਮ ਜਨਾਨਂ ਕੁਸਲੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਤਥਾ ਲੋਕੇ ਅਤੀਤਾ ਕਾਲਙ੍ਕਤਾ ਮਾਤਾਪਿਤਰੋ ਚ ਆਚਰਿਯਾ ਚ ਪਣ੍ਡਿਤਸਮਣਬ੍ਰਾਹ੍ਮਣਾ ਚ ਪਾਕਟਾ ਨਾਨਾਤਿਤ੍ਥਾਚਰਿਯਾ ਚ ਮਹਿਦ੍ਧਿਕਾ ਮਹਾਨੁਭਾਵਾ ਪੋਰਾਣਕਰਾਜਾਨੋ ਚ ਪਚ੍ਛਿਮਕਾਨਂ ਜਨਾਨਂ ਕੁਸਲੁਪ੍ਪਤ੍ਤਿਯਾ ਵਾ ਅਕੁਸਲੁਪ੍ਪਤ੍ਤਿਯਾ ਵਾ ਸੁਖਦੁਕ੍ਖੁਪ੍ਪਤ੍ਤਿਯਾ ਵਾ ਪਕਤੂਪਨਿਸ੍ਸਯੋ. ਤਥਾ ਹਿ ਤੇ ਪਚ੍ਛਿਮਕਾਨਂ ਜਨਾਨਂ ਅਤ੍ਥਾਯ ਨਾਨਾਸਦ੍ਧਮ੍ਮਪਞ੍ਞਤ੍ਤਿਯੋ ਵਾ ਨਾਨਾਅਸਦ੍ਧਮ੍ਮਪਞ੍ਞਤ੍ਤਿਯੋ ਵਾ ਨਾਨਾਲੋਕੂਪਕਰਣਾਨਿ ਵਾ ਪੁਰੇ ਪਟ੍ਠਪੇਸੁਂ. ਪਚ੍ਛਿਮਜਨਾ ਚ ਤੇਹਿ ਪਟ੍ਠਪਿਤੇਸੁ ਦਾਨਸੀਲਾਦਿਧਮ੍ਮੇਸੁ ਵਾ ਲੋਕਚਾਰਿਤ੍ਤ ਕੁਲਗੋਤ੍ਤਚਾਰਿਤ੍ਤ ਧਮ੍ਮੇਸੁ ਵਾ ਨਾਨਾਦਿਟ੍ਠਿਵਾਦੇਸੁ ਵਾ ਨਾਨਾਕਮ੍ਮਾਯਤਨਸਿਪ੍ਪਾਯਤਨ ਵਿਜ੍ਜਾਠਾਨੇਸੁ ਵਾ ਯਥਾਪਟ੍ਠਪਿਤੇਸੁ ਗਾਮਨਿਗਮਨਗਰਖੇਤ੍ਤਵਤ੍ਥੁ ਤਲ਼ਾਕਪੋਕ੍ਖਰਣਿਆਵਾਟਾਦੀਸੁ ਵਾ ਗੇਹਰਥਸਕਟਨਾਵਾ ਸਮ੍ਪੋਤਸਮ੍ਬਨ੍ਧਾਦੀਸੁ ਵਾ ਜਾਤਰੂਪਰਜਤਮਣਿਮੁਤ੍ਤਾਦੀਸੁ ਵਾ ਦਾਯਜ੍ਜਂ ਪਟਿਪਜ੍ਜਨ੍ਤਾ ਲੋਕੇ ਵਡ੍ਢਨ੍ਤਿ.
ਅਨਾਗਤੋਪਿ ਮੇਤ੍ਤੇਯ੍ਯੋ ਨਾਮ ਬੁਦ੍ਧੋ ਚ ਤਸ੍ਸ ਧਮ੍ਮੋ ਚ ਤਸ੍ਸ ਸਙ੍ਘੋ ਚ ਏਤਰਹਿ ਬਹੁਜ੍ਜਨਾਨਂ ਪਾਰਮਿਪੁਞ੍ਞਪ੍ਪਵਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਤਥਾ ਇਮਸ੍ਮਿਂ ਭਵੇ ਚ ਪਚ੍ਛਿਮੇ ਕਾਲੇ ਪਟਿਲਭਿਸ੍ਸਮਾਨਾ ਇਸ੍ਸਰਿਯਟ੍ਠਾਨਧਨਧਞ੍ਞਸਮ੍ਪਤ੍ਤਿਯੋ ਪੁਰਿਮੇ ਕਾਲੇ ਠਿਤਾਨਂ ਮਹਾਜਨਾਨਂ ਨਾਨਾਭਿਸਙ੍ਖਾਰੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯ ਪਚ੍ਚਯੋ. ਅਨਾਗਤਭਵੇ ਚ ਅਨੁਭਵਿਸ੍ਸਮਾਨਾ ਭਵਸਮ੍ਪਤ੍ਤਿ ਭੋਗ ਸਮ੍ਪਤ੍ਤਿਯੋ ਮਗ੍ਗਫਲਨਿਬ੍ਬਾਨਸਮ੍ਪਤ੍ਤਿਯੋ ਚ ਏਤਰਹਿ ਪਚ੍ਚੁਪ੍ਪਨ੍ਨਭਵੇ ਠਿਤਾਨਂ ਦਾਨਸੀਲਾਦਿਪੁਞ੍ਞਕਿਰਿਯੁਪ੍ਪਤ੍ਤਿਯਾ ਪਕਤੂਪਨਿਸ੍ਸਯਪਚ੍ਚਯੋ. ਯਥਾ ਹਿ ਲੋਕੇ ਹੇਮਨ੍ਤੇ ਕਾਲੇ ਧਞ੍ਞਪ੍ਫਲਾਨਿ ਲਭਿਸ੍ਸਾਮਾਤਿ ਵਸ੍ਸਿਕੇ ਕਾਲੇ ਕਸ੍ਸਨਵਪ੍ਪਨਕਮ੍ਮਾਨਿ ਆਰਭਨ੍ਤਿ, ਕਮ੍ਮੇ ਸਿਦ੍ਧੇ ਤਂ ਤਂ ਧਨਂ ਲਭਿਸ੍ਸਾਮਾਤਿ ਪੁਬ੍ਬਭਾਗੇ ਤਂ ਤਂ ਵੀਰਿਯਕਮ੍ਮਂ ਵਾ ਤਂ ਤਂ ਪਞ੍ਞਾਕਮ੍ਮਂ ਵਾ ਆਰਭਨ੍ਤਿ. ਤਤ੍ਥ ਧਞ੍ਞਪ੍ਫਲਪ੍ਪਟਿਲਾਭੋ ਚ ਤਂ ਤਂ ਧਨਪ੍ਪਟਿ ਲਾਭੋਚ ਤਂ ਤਂ ਕਮ੍ਮਾਰਮ੍ਭਸ੍ਸ ਅਨਾਗਤਪਕਤੂਪਨਿਸ੍ਸਯਪਚ੍ਚਯੋ ਤਂ ਤਂ ਕਮ੍ਮਾਰਮ੍ਭੋ ਚ ਧਞ੍ਞਪ੍ਫਲਪ੍ਪਟਿਲਾਭਸ੍ਸ ਚ ਤਂ ਤਂ ਧਨਪ੍ਪਟਿ ਲਾਭਸ੍ਸ ਚ ਅਤੀਤਪਕਤੂਪਨਿਸ੍ਸਯਪਚ੍ਚਯੋ. ਏਵਮੇਵ ਪਚ੍ਛਿਮੇ ਅਨਾਗਤੇ ਕਾਲੇ ਨਾਨਾਕਮ੍ਮਪ੍ਫਲਾਨਿ ਸਮ੍ਪਸ੍ਸਨ੍ਤਾ ਪਤ੍ਥਯਨ੍ਤਾ ਮਹਾਜਨਾ ਪੁਰਿਮੇ ਪਚ੍ਚੁਪ੍ਪਨ੍ਨੇ ਕਾਲੇ ਨਾਨਾਪੁਞ੍ਞਕਮ੍ਮਾਨਿ ਆਰਭਨ੍ਤਿ. ਤਤ੍ਥ ਪੁਞ੍ਞਪ੍ਫਲਾਨਿ ਪੁਞ੍ਞਕਮ੍ਮਾਨਂ ਅਨਾਗਤਪਕਤੂਪਨਿਸ੍ਸਯਪਚ੍ਚਯੋ. ਪੁਞ੍ਞਕਮ੍ਮਾਨਿ ਪੁਞ੍ਞਪ੍ਫਲਾਨਂ ਅਤੀਤਪਕਤੂਪਨਿਸ੍ਸਯਪਚ੍ਚਯੋ. ਤਸ੍ਮਾ ਅਨਾਗਤਪਕਤੂਪਨਿਸ੍ਸਯੋਪਿ ਅਤੀਤਪਕਤੂਪਨਿਸ੍ਸਯੋ ਵਿਯ ਅਤਿਮਹਨ੍ਤੋ ਪਚ੍ਚਯੋ ਹੋਤਿ.
ਪਚ੍ਚੁਪ੍ਪਨ੍ਨਾ ਬੁਦ੍ਧਾਯੋ ਪਚ੍ਚਯਾ ਪਚ੍ਚੁਪ੍ਪਨ੍ਨਾਨਂ ਮਨੁਸ੍ਸਦੇਵਬ੍ਰਹ੍ਮਾਨਂ ਪਚ੍ਚੁਪ੍ਪਨ੍ਨਾ ਮਾਤਾਪਿਤਰੋ ਪਚ੍ਚੁਪ੍ਪਨ੍ਨਾਨਂ ਪੁਤ੍ਤਧੀਤਾਦੀਨਂ ਪਚ੍ਚੁਪ੍ਪਨ੍ਨਪਕਤੂਪ ਨਿਸ੍ਸਯੋ ਨਾਮ. ਸੋ ਸੁਪਾਕਟੋਯੇਵ.
ਅਜ੍ਝਤ੍ਤਭੂਤਾ ਪਕਤੂਪਨਿਸ੍ਸਯਧਮ੍ਮਾ ਨਾਮ ਬੁਦ੍ਧਾਦੀਸੁ ਸਵਿਞ੍ਞਾਣਕਸਨ੍ਤਾਨੇਸੁ ਉਪ੍ਪਨ੍ਨਾ ਪਚ੍ਚਯਧਮ੍ਮਾ. ਬਹਿਦ੍ਧਾਭੂਤਾ ਪਕਤੂਪਨਿਸ੍ਸਯਧਮ੍ਮਾ ਨਾਮ ਸਤ੍ਤਾਨਂ ਪਤਿਟ੍ਠਾਨਭੂਤਾ ਪਥਵਿਪਬ੍ਬਤਨਦੀ ਸਮੁਦ੍ਦਾਦਯੋ ਤੇਸਂ ਤੇਸਂ ਸਤ੍ਤਾਨਂ ਬਹੂਪਕਾਰਾ ਅਰਞ੍ਞਵਨਰੁਕ੍ਖ ਤਿਣਪੁਬ੍ਬਣ੍ਣਾਪਰਣ੍ਣਾਦਯੋ ਚਨ੍ਦਸੂਰਿਯਗਹਨਕ੍ਖਤ੍ਤਾਦਯੋ ਵਸ੍ਸੋਦਕਅਗ੍ਗਿਵਾਤਸੀਤਉਣ੍ਹਾਦਯੋ ਚ ਸਬ੍ਬੇਪਿ ਤੇ ਸਤ੍ਤਾਨਂ ਕੁਸਲੁਪ੍ਪਤ੍ਤਿਯਾ ਵਾ ਅਕੁਸਲੁਪ੍ਪਤ੍ਤਿਯਾ ਵਾ ਸੁਖੁਪ੍ਪਤ੍ਤਿਯਾ ਵਾ ਦੁਕ੍ਖੁਪ੍ਪਤ੍ਤਿਯਾ ਵਾ ਬਲਵਪਚ੍ਚਯਾ ਹੋਨ੍ਤਿ.
ਇਮੇ ਜਨਾ ਦਿਟ੍ਠੇਵ ਧਮ੍ਮੇ ਪਰਿਨਿਬ੍ਬਾਯਿਸ੍ਸਾਮਾਤਿ ਬੋਧਿਪਕ੍ਖਿਯ ਧਮ੍ਮੇ ਵਾ ਭਾਵੇਨ੍ਤਿ, ਅਨਾਗਤੇ ਬੁਦ੍ਧਕਾਲੇ ਪਰਿਨਿਬ੍ਬਾਯਿਸ੍ਸਾਮਾਤਿ ਪਾਰਮੀਧਮ੍ਮੇ ਵਾ ਪਰਿਪੂਰੇਨ੍ਤਿ. ਤਤ੍ਥ ਨਿਬ੍ਬਾਨਂ ਤੇਸਂ ਧਮ੍ਮਾਨਂ ਉਪ੍ਪਤ੍ਤਿਯਾ ਬਲਵਪਚ੍ਚਯੋ ਹੋਤਿ.
ਲੋਕੇ ਨਾਨਾਵੋਹਾਰਭੂਤਾ ਨਾਮਪਞ੍ਞਤ੍ਤਿਯੋ ਚ ਬੁਦ੍ਧ ਸਾਸਨੇ ਤਿਪਿਟਕਪਰਿਯਤ੍ਤਿਧਮ੍ਮਭੂਤਾ ਨਾਮਪਞ੍ਞਤ੍ਤਿਯੋ ਚ ਤੇਸਂ ਤੇਸਂ ਅਤ੍ਥਾਨਂ ਜਾਨਨਤ੍ਥਾਯ ਬਲਵਪਚ੍ਚਯੋ.
ਤਤ੍ਥ ਸਙ੍ਖਤਧਮ੍ਮਾ ਨਾਮ ਪਚ੍ਚਯੇ ਸਤਿ ਉਪ੍ਪਜ੍ਜਨ੍ਤਿ, ਅਸਤਿ ਨੁਪ੍ਪਜ੍ਜਨ੍ਤਿ. ਉਪ੍ਪਜ੍ਜਿਤ੍ਵਾਪਿ ਪਚ੍ਚਯੇ ਸਤਿ ਤਿਟ੍ਠਨ੍ਤਿ, ਅਸਤਿ ਨ ਤਿਟ੍ਠਨ੍ਤਿ. ਤਸ੍ਮਾ ਤੇਸਂ ਉਪ੍ਪਤ੍ਤਿਯਾ ਵਾ ਠਿਤਿਯਾ ਵਾ ਪਚ੍ਚਯੋ ਨਾਮ ਇਚ੍ਛਿਤਬ੍ਬੋ. ਨਿਬ੍ਬਾਨਂ ਪਨ ਪਞ੍ਞਤ੍ਤਿ ਚ ਅਸਙ੍ਖਤਧਮ੍ਮਾ ਹੋਨ੍ਤਿ ਅਜਾਤਿਧਮ੍ਮਾ ਅਨੁਪ੍ਪਾਦਧਮ੍ਮਾ ਨਿਚ੍ਚ ਧਮ੍ਮਾ ਧੁਵਧਮ੍ਮਾ. ਤਸ੍ਮਾ ਤੇਸਂ ਉਪ੍ਪਾਦਾਯ ਵਾ ਠਿਤਿਯਾ ਵਾ ਪਚ੍ਚਯੋ ਨਾਮ ਨਤ੍ਥੀਤਿ.
ਕੁਸਲੋ ਕੁਸਲਸ੍ਸ ਉਪਨਿਸ੍ਸਯੋ. ਸਦ੍ਧਂ ਉਪਨਿਸ੍ਸਾਯ ਦਾਨਂ ਦੇਤਿ, ਸੀਲਂ ਸਮਾਦਿਯਤੀਤਿਆਦਿਨਾ ਸੁਪਾਕਟੋ. ਤਥਾ ਰਾਗਂ ਉਪਨਿਸ੍ਸਾਯ ਪਾਣਂ ਹਨਤਿ, ਅਦਿਨ੍ਨਂ ਆਦਿਯਤੀਤਿਆਦਿਨਾ ਸਪ੍ਪਾਯਂ ਉਤੁਂ ਸਪ੍ਪਾਯਂ ਭੋਜਨਂ ਉਪਨਿਸ੍ਸਾਯ ਕਾਯਿਕਂ ਸੁਖਂ ਪਚ੍ਚਨੁਭੋਤੀਤਿਆਦਿਨਾ ਚ ਅਕੁਸਲੋ ਅਕੁਸਲਸ੍ਸ, ਅਬ੍ਯਾਕਤੋ ਅਬ੍ਯਾਕਤਸ੍ਸ ਉਪਨਿਸ੍ਸਯੋਪਿ ਸੁਪਾਕਟੋ.
ਕੁਸਲੋ ਪਨ ਅਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਦਾਨਂ ਦਤ੍ਵਾ ਤੇਨ ਦਾਨੇਨ ਅਤ੍ਤਾਨਂ ਉਕ੍ਕਂਸੇਤਿ, ਪਰਂ ਵਮ੍ਭੇਤਿ. ਤਥਾ ਸੀਲ ਸਮ੍ਪਨ੍ਨੋ ਹੁਤ੍ਵਾ ਸਮਾਧਿਸਮ੍ਪਨ੍ਨੋ ਹੁਤ੍ਵਾ ਪਞ੍ਞਾਸਮ੍ਪਨ੍ਨੋ ਹੁਤ੍ਵਾ ਅਤ੍ਤਾਨਂ ਉਕ੍ਕਂਸੇਤਿ, ਪਰਂ ਵਮ੍ਭੇਤਿ.
ਕੁਸਲੋ ਅਬ੍ਯਾਕਤਸ੍ਸਪਿ ਬਲਵੂਪਨਿਸ੍ਸਯੋ. ਸਬ੍ਬਾਨਿ ਚਤੁਭੂਮਿਕਕੁਸਲਕਮ੍ਮਾਨਿ ਵਾ ਕਮ੍ਮਪਰਿਵਾਰਾਨਿ ਕੁਸਲਾਨਿ ਵਾ ਕਾਲਨ੍ਤਰੇ ਚਤੁਭੂਮਿਕਾਨਂ ਵਿਪਾਕਾਬ੍ਯਾਕਤਾਨਂ ਬਲਵੂਪਨਿਸ੍ਸਯੋ. ਦਾਨਪਾਰਮਿਂ ਪੂਰੇਨ੍ਤਾ ਪੂਰਣਕਾਲੇ ਬਹੁਂ ਕਾਯਿਕਦੁਕ੍ਖਂ ਪਚ੍ਚਨੁਭਵਨ੍ਤਿ. ਤਥਾ ਸੀਲਪਾਰਮਿਂ ਨਿਕ੍ਖਮਪਾਰਮਿਂ ਪਞ੍ਞਾਪਾਰਮਿਂ ਵੀਰਿਯਪਾਰਮਿਂ ਖਨ੍ਤਿਪਾਰਮਿਂ ਸਚ੍ਚਪਾਰਮਿਂ ਅਧਿਟ੍ਠਾਨਪਾਰਮਿਂ ਮੇਤ੍ਤਾਪਾਰਮਿਂ ਉਪੇਕ੍ਖਾ ਪਾਰਮਿਂ. ਏਸੇਵ ਨਯੋ ਝਾਨਭਾਵਨਾ ਮਗ੍ਗਭਾਵਨਾਸੁਪਿ.
ਅਕੁਸਲੋ ਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਇਧੇਕਚ੍ਚੋ ਪਾਪਂ ਕਤ੍ਵਾ ਪਚ੍ਛਾ ਵਿਪ੍ਪਟਿਸਾਰੀ ਹੁਤ੍ਵਾ ਤਸ੍ਸ ਪਾਪਸ੍ਸ ਪਹਾਨਾਯ ਦਾਨਸੀਲਝਾਨਮਗ੍ਗਕੁਸਲਾਨਿ ਸਮ੍ਪਾਦੇਤਿ. ਤਂ ਪਾਪਂ ਤੇਸਂ ਕੁਸਲਾਨਂ ਬਲਵੂਪਨਿਸ੍ਸਯੋ.
ਅਕੁਸਲੋ ਅਬ੍ਯਾਕਤਸ੍ਸਪਿ ਬਲਵੂਪਨਿਸ੍ਸਯੋ. ਇਧ ਬਹੂ ਜਨਾ ਦੁਚ੍ਚਰਿਤਾਨਿ ਕਤ੍ਵਾ ਚਤੂਸੁ ਅਪਾਯੇਸੁ ਪਤਿਤ੍ਵਾ ਅਪਾਯਦੁਕ੍ਖਂ ਪਚ੍ਚਨੁਭਵਨ੍ਤਿ. ਦਿਟ੍ਠਧਮ੍ਮੇਪਿ ਕੇਚਿ ਅਤ੍ਤਨੋ ਵਾ ਪਰਸ੍ਸ ਵਾ ਦੁਚ੍ਚਰਿਤਕਮ੍ਮ ਪਚ੍ਚਯਾ ਬਹੁਂ ਦੁਕ੍ਖਂ ਪਚ੍ਚਨੁਭਵਨ੍ਤਿ. ਕੇਚਿ ਦੁਚ੍ਚਰਿਤਕਮ੍ਮੇਨ ਧਨਂ ਲਭਿਤ੍ਵਾ ਸੁਖਂ ਪਚ੍ਚਨੁਭਵਨ੍ਤਿ. ਬਹੁਜ੍ਜਨਾ ਰਾਗਮੂਲਕਂ ਬਹੁਂ ਦੁਕ੍ਖਂ ਪਚ੍ਚਨੁਭਵਨ੍ਤਿ, ਦੋਸਮੂਲਕਂ ਦਿਟ੍ਠਿਮੂਲਕਂ ਮਾਨਮੂਲਕਨ੍ਤਿ.
ਅਬ੍ਯਾਕਤੋ ਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਧਨ ਸਮ੍ਪਤ੍ਤਿਯਾ ਦਾਨਂ ਦੇਤਿ, ਸੀਲਂ ਪੂਰੇਤਿ, ਪਞ੍ਞਂ ਪੂਰੇਤਿ, ਭਾਵਨਾਸਪ੍ਪਾਯਂ ਆਵਾਸਂ ਵਾ ਲੇਣਂ ਵਾ ਗੁਹਂਵਾ ਰੁਕ੍ਖਂ ਵਾ ਅਰਞ੍ਞਂ ਵਾ ਪਬ੍ਬਤਂ ਵਾ ਗੋਚਰਗਾਮਂ ਵਾ ਉਤੁਸਪ੍ਪਾਯਂ ਵਾ ਆਹਾਰਸਪ੍ਪਾਯਂ ਵਾ ਲਭਿਤ੍ਵਾ ਤਂ ਤਂ ਭਾਵਨਂ ਭਾਵੇਤਿ.
ਅਬ੍ਯਾਕਤੋ ਅਕੁਸਲਸ੍ਸਪਿ ਬਲਵੂਪਨਿਸ੍ਸਯੋ. ਲੋਕੇ ਚਕ੍ਖੁਸਮ੍ਪਦਂ ਨਿਸ੍ਸਾਯ ਬਹੂਨਿ ਦਸ੍ਸਨਮੂਲਾਨਿ ਅਕੁਸਲਾਨਿ ਉਪ੍ਪਜ੍ਜਨ੍ਤਿ. ਏਸ ਨਯੋ ਸੋਤਸਮ੍ਪਦਾਦੀਸੁ. ਤਥਾ ਹਤ੍ਥਸਮ੍ਪਦਂ ਪਾਦਸਮ੍ਪਦਂ ਸਤ੍ਥਸਮ੍ਪਦਂ ਆਵੁਧਸਮ੍ਪਦਨ੍ਤਿਆਦਿਨਾਪਿ ਵਤ੍ਤਬ੍ਬੋ. ਏਵਂ ਉਪਨਿਸ੍ਸਯੋ ਤਿਵਿਧੋ ਹੋਤਿ.
ਇਧ ਸੁਤ੍ਤਨ੍ਤੂਪਨਿਸ੍ਸਯੋਪਿ ਵਤ੍ਤਬ੍ਬੋ. ਕਲ੍ਯਾਣਮਿਤ੍ਤਂ ਉਪ ਨਿਸ੍ਸਾਯ ਪਾਪਮਿਤ੍ਤਂ ਉਪਨਿਸ੍ਸਾਯ ਗਾਮਂ ਉਪਨਿਸ੍ਸਾਯ ਅਰਞ੍ਞਂ ਉਪਨਿਸ੍ਸਾਯਾਤਿਆਦਿਨਾ ਬਹੂਸੁ ਠਾਨੇਸੁ ਆਗਤੋ. ਅਪਿ ਚ ਪਞ੍ਚਨਿਯਾਮਧਮ੍ਮਾ ਸਤ੍ਤਲੋਕ ਸਙ੍ਖਾਰਲੋਕ ਓਕਾਸਲੋਕ ਸਙ੍ਖਾਤਾਨਂ ਤਿਣ੍ਣਂ ਲੋਕਾਨਂ ਅਵਿਚ੍ਛਿਨ੍ਨਪ੍ਪਵਤ੍ਤਿਯਾ ਬਲਵਪਚ੍ਚਯਾ ਹੋਨ੍ਤਿ. ਅਯਞ੍ਚ ਅਤ੍ਥੋ ਨਿਯਾਮਦੀਪਨਿਯਂ ਅਮ੍ਹੇਹਿ ਵਿਤ੍ਥਾਰਤੋ ਦੀਪਿਤੋਤਿ.
ਕੇਨਟ੍ਠੇਨ ਆਰਮ੍ਮਣੂਪਨਿਸ੍ਸਯੋਤਿ. ਅਧਿਪਤਿਭੂਤਂ ਆਰਮ੍ਮਣਮੇਵ ਆਰਮ੍ਮਣਿਕਧਮ੍ਮਾਨਂ ਬਲਵਨਿਸ੍ਸਯਟ੍ਠੇਨ ਆਰਮ੍ਮਣੂਪ ਨਿਸ੍ਸਯੋ.
ਕੇਨਟ੍ਠੇਨ ਅਨਨ੍ਤਰੂਪਨਿਸ੍ਸਯੋਤਿ. ਪੁਰਿਮਂ ਅਨਨ੍ਤਰਚਿਤ੍ਤਮੇਵ ਪਚ੍ਛਿਮਸ੍ਸ ਅਨਨ੍ਤਰਚਿਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯ ਬਲਵਨਿਸ੍ਸਯਟ੍ਠੇਨ ਅਨਨ੍ਤਰੂਪਨਿਸ੍ਸਯੋ. ਮਾਤਾ ਵਿਯ ਪੁਰਿਮਚਿਤ੍ਤਂ, ਪੁਤ੍ਤੋ ਵਿਯ ਪਚ੍ਛਿਮਚਿਤ੍ਤਂ. ਯਥਾ ਮਾਤਾ ਅਤ੍ਤਨੋ ਅਨਨ੍ਤਰੇ ਪੁਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯ ਬਲਵੂਪ ਨਿਸ੍ਸਯੋ ਹੋਤਿ, ਤਥਾ ਪੁਰਿਮਚਿਤ੍ਤਂ ਪਚ੍ਛਿਮਚਿਤ੍ਤਸ੍ਸ ਉਪ੍ਪਜ੍ਜਨਤ੍ਥਾਯਾਤਿ.
ਕੇਨਟ੍ਠੇਨ ਪਕਤੂਪਨਿਸ੍ਸਯੋਤਿ. ਪਕਤਿਯਾਵ ਲੋਕੇ ਪਣ੍ਡਿਤਾਨਂ ਪਾਕਟੋ ਉਪਨਿਸ੍ਸਯੋ ਪਕਤੂਪਨਿਸ੍ਸਯੋ.
ਏਤ੍ਥ ਚ ਅਨਨ੍ਤਰੂਪਨਿਸ੍ਸਯਾਨੁਭਾਵੋ ਅਨਨ੍ਤਰਚਿਤ੍ਤੇ ਏਵ ਫਰਤਿ. ਪਕਤੂਪਨਿਸ੍ਸਯਾਨੁਭਾਵੋ ਪਨ ਦੂਰੇਪਿ ਫਰਤਿਯੇਵ. ਤਥਾ ਹਿ ਇਮਸ੍ਮਿਂ ਭਵੇ ਪੁਰਿਮੇਸੁ ਦਿਵਸੇਸੁ ਵਾ ਮਾਸੇਸੁ ਵਾ ਸਂਵਚ੍ਛਰੇਸੁ ਵਾ ਦਿਟ੍ਠਸੁਤਘਾਯਿਤਸਾਯਿਤਫੁਸਿਤਵਿਞ੍ਞਾਤਾਨਿ ਆਰਮ੍ਮਣਾਨਿ ਪਚ੍ਛਾਤਥਾਰੂਪੇ ਪਚ੍ਚਯੇ ਸਤਿ ਵਸ੍ਸਸਤੇਪਿ ਮਨੋਦ੍ਵਾਰੇ ਆਪਾਤਂ ਆਗਚ੍ਛਨ੍ਤਿ. ਇਦਂ ਨਾਮ ਪੁਬ੍ਬੇ ਮਯਾ ਦਿਟ੍ਠਂ ਸੁਤਨ੍ਤਿਆਦਿਨਾ ਸਤ੍ਤਾ ਅਨੁਸ੍ਸਰਨ੍ਤਿ. ਓਪਪਾਤਿਕਸਤ੍ਤਾ ਪਨ ਪੁਰਿਮਭਵਂਪਿ ਅਨੁਸ੍ਸਰਨ੍ਤਿ. ਤਥਾ ਮਨੁਸ੍ਸੇਸੁਪਿ ਅਪ੍ਪੇਕਚ੍ਚੇ ਜਾਤਿਸ੍ਸਰਸਞ੍ਞਾਲਾਭਿਨੋ. ਤਥਾ ਪੁਬ੍ਬੇ ਅਨੇਕਸਤਸਹਸ੍ਸੇਸੁ ਦਿਟ੍ਠਾਦੀਸੁ ਵਤ੍ਥੂਸੁ ਪਚ੍ਛਾ ਏਕਸ੍ਮਿਂ ਖਣੇ ਏਕਂ ਵਤ੍ਥੁਂ ਦਿਸ੍ਵਾ ਵਾ ਸੁਤ੍ਵਾ ਵਾ ਤਸ੍ਮਿਂ ਏਵ ਖਣੇ ਬਹੂਸੁਪਿ ਤੇਸੁ ਮਨੋਵਿਞ੍ਞਾਣਸਨ੍ਤਾਨਂ ਫਰਮਾਨਂ ਪਵਤ੍ਤਤੀਤਿ. ਉਪਨਿਸ੍ਸਯਪਚ੍ਚਯ ਦੀਪਨਾ ਨਿਟ੍ਠਿਤਾ.