੧੦. ਪੁਰੇਜਾਤਪਚ੍ਚਯੋ

ਤਿਵਿਧੋ ਪੁਰੇਜਾਤਪਚ੍ਚਯੋ. ਵਤ੍ਥੁਪੁਰੇਜਾਤਪਚ੍ਚਯੋ ਚ ਆਰਮ੍ਮਣਪੁਰੇਜਾਤਪਚ੍ਚਯੋ ਚ ਵਤ੍ਥਾਰਮ੍ਮਣਪੁਰੇਜਾਤਪਚ੍ਚਯੋ ਚ.

ਤਤ੍ਥ ਵਤ੍ਥੁਪੁਰੇਜਾਤੋ ਚ ਵਤ੍ਥਾਰਮ੍ਮਣਪੁਰੇਜਾਤੋ ਚ ਪੁਬ੍ਬੇ ਨਿਸ੍ਸਯਪਚ੍ਚਯੇ ਨਿਸ੍ਸਯਨਾਮੇਨ ਵੁਤ੍ਤਾ ਏਵ.

ਆਰਮ੍ਮਣਪੁਰੇਜਾਤੋ ਨਾਮ ਪਚ੍ਚੁਪ੍ਪਨ੍ਨਾਨਿ ਅਟ੍ਠਾਰਸਨਿਪ੍ਫਨ੍ਨਰੂਪਾਨਿ ਏਵ. ਤੇਸੁਪਿ ਪਚ੍ਚੁਪ੍ਪਨ੍ਨਾਨਿ ਰੂਪਸਦ੍ਦਾਦੀਨਿ ਪਞ੍ਚਾਰਮ੍ਮਣਾਨਿ ਪਞ੍ਚਨ੍ਨਂ ਪਞ੍ਚਵਿਞ੍ਞਾਣ ਵੀਥਿਚਿਤ੍ਤਾਨਂ ਨਿਯਮਤੋ ਆਰਮ੍ਮਣਪੁਰੇਜਾਤਪਚ੍ਚਯਾ ਹੋਨ੍ਤਿ. ਯਥਾ ਹਿ ਵੀਣਾਸਦ੍ਦਾ ਨਾਮ ਵੀਣਾਤਨ੍ਤੀਸੁ ਵੀਣਾਦਣ੍ਡਕੇਨ ਪਹਰਣ ਪਚ੍ਚਯਾ ਏਵ ਉਪ੍ਪਜ੍ਜਨ੍ਤਿ. ਏਵਞ੍ਚ ਸਤਿ ਤੇ ਸਦ੍ਦਾ ਪੁਰੇਜਾਤਾਹਿ ਵੀਣਾਤਨ੍ਤਿ ਵੀਣਾਦਣ੍ਡਕੇਹਿ ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਨ੍ਤਿ. ਏਵਮੇਵਂ ਪਞ੍ਚ ਵਿਞ੍ਞਾਣ ਵੀਥਿਚਿਤ੍ਤਾਨਿਪਿ ਪਞ੍ਚਸੁ ਵਤ੍ਥੁਦ੍ਵਾਰੇਸੁ ਪਞ੍ਚਨ੍ਨਂ ਆਰਮ੍ਮਣਾਨਂ ਆਪਾਤਾਗਮਨ ਪਚ੍ਚਯਾ ਏਵ ਉਪ੍ਪਜ੍ਜਨ੍ਤਿ. ਆਪਾਤਾਗਮਨਞ੍ਚ ਤੇਸਂ ਦ੍ਵਿਨ੍ਨਂ ਠਿਤਿਪਤ੍ਤਕਾਲੇ ਏਵ ਹੋਤਿ. ਨ ਕੇਵਲਞ੍ਚ ਤਸ੍ਮਿਂ ਕਾਲੇ ਤਾਨਿ ਪਞ੍ਚਾਰਮ੍ਮਣਾਨਿ ਤੇਸੁ ਪਞ੍ਚਵਤ੍ਥੂਸੁ ਏਵ ਆਪਾਤਮਾਗਚ੍ਛਨ੍ਤਿ. ਅਥ ਖੋ ਭਵਙ੍ਗਮਨੋਦ੍ਵਾਰੇਪਿ ਆਪਾਤਂ ਆਗਚ੍ਛਨ੍ਤਿਯੇਵ. ਤਸ੍ਮਿਂ ਆਪਾਤਗਮਨਤ੍ਤਾ ਏਵ ਤਂ ਭਵਙ੍ਗਮ੍ਪਿ ਦ੍ਵਿਕ੍ਖਤ੍ਤੁਂ ਚਲਿਤ੍ਵਾ ਉਪਚ੍ਛਿਜ੍ਜਤਿ, ਭਵਙ੍ਗੁਪਚ੍ਛੇਦੇ ਏਵ ਤਾਨਿ ਵੀਥਿਚਿਤ੍ਤਾਨਿ ਉਪ੍ਪਜ੍ਜਨ੍ਤਿ. ਏਵਞ੍ਚ ਸਤਿ ਤਾਨਿ ਵੀਥਿਚਿਤ੍ਤਾਨਿ ਪੁਰੇਜਾਤੇਹਿ ਵਤ੍ਥੁ ਦ੍ਵਾਰਾਰਮ੍ਮਣੇਹਿ ਵਿਨਾ ਉਪ੍ਪਜ੍ਜਿਤੁਂ ਨ ਸਕ੍ਕੋਨ੍ਤੀਤਿ. ਤਾਨਿ ਪਨ ਸਬ੍ਬਾਨਿਪਿ ਅਟ੍ਠਾਰਸਨਿਪ੍ਫਨ੍ਨਰੂਪਾਨਿ ਨਿਰੁਦ੍ਧਾਨਿ ਹੁਤ੍ਵਾ ਅਤੀਤਾਨਿਪਿ ਹੋਨ੍ਤਿ, ਅਨੁਪ੍ਪਨ੍ਨਾਨਿ ਹੁਤ੍ਵਾ ਅਨਾਗਤਾਨਿਪਿ ਹੋਨ੍ਤਿ. ਉਪ੍ਪਨ੍ਨਾਨਿ ਹੁਤ੍ਵਾ ਪਚ੍ਚੁਪ੍ਪਨ੍ਨਾਨਿਪਿ ਹੋਨ੍ਤਿ. ਸਬ੍ਬਾਨਿਪਿ ਮਨੋਵਿਞ੍ਞਾਣਵੀਥਿਚਿਤ੍ਤਾਨਂ ਆਰਮ੍ਮਣਾਨਿ ਹੋਨ੍ਤਿ. ਤੇਸੁ ਪਚ੍ਚੁਪ੍ਪਨ੍ਨਾਨਿ ਏਵ ਤੇਸਂ ਆਰਮ੍ਮਣਪੁਰੇਜਾਤਪਚ੍ਚਯਾ ਹੋਨ੍ਤਿ. ਯਦਾ ਦੂਰੇ ਵਾ ਪਟਿਚ੍ਛਨ੍ਨੇ ਵਾ ਠਿਤਂ ਤਂ ਤਂ ਆਰਮ੍ਮਣਵਤ੍ਥੁਂ ਮਨਸਾ ਏਵ ਆਰਮ੍ਮਣਂ ਕਰੋਤਿ, ਤਦਾ ਤਂ ਤਂ ਵਤ੍ਥੁ ਸਚੇ ਤਤ੍ਥ ਤਤ੍ਥ ਵਿਜ੍ਜਮਾਨਂ ਹੋਤਿ, ਪਚ੍ਚੁਪ੍ਪਨ੍ਨਂ ਨਾਮ ਹੋਤਿ. ਪੁਰੇਜਾਤਪਚ੍ਚਯਦੀਪਨਾ ਨਿਟ੍ਠਿਤਾ.