੧੧. ਪਚ੍ਛਾਜਾਤਪਚ੍ਚਯੋ

ਪਚ੍ਛਿਮਂ ਪਚ੍ਛਿਮਂ ਪਚ੍ਚੁਪ੍ਪਨ੍ਨਂ ਚਿਤ੍ਤਂ ਪੁਰੇਜਾਤਸ੍ਸ ਪਚ੍ਚੁਪ੍ਪਨ੍ਨਸ੍ਸ ਚਤੁ ਸਮੁਟ੍ਠਾਨਿਕਸ੍ਸ ਰੂਪਕਾਯਸ੍ਸ ਵੁਡ੍ਢਿਵਿਰੁਲ਼੍ਹਿਯਾ ਪਚ੍ਛਾਜਾਤਪਚ੍ਚਯੋ. ਯਥਾ ਤਂ ਪਚ੍ਛਿਮਵਸ੍ਸੇਸੁ ਅਨੁਵਸ੍ਸਂ ਵਸ੍ਸਮਾਨਾਨਿ ਵਸ੍ਸੋਦਕਾਨਿ ਪੁਰਿਮਵਸ੍ਸੇਸੁ ਜਾਤਾਨਂ ਰੁਕ੍ਖਪੋਤਕਾਨਂ ਵੁਡ੍ਢਿਵਿਰੁਲ਼੍ਹਿਯਾ ਪਚ੍ਛਾਜਾਤ ਪਚ੍ਚਯਾ ਹੋਨ੍ਤੀਤਿ.

ਤਤ੍ਥ ਪਚ੍ਛਿਮਂ ਪਚ੍ਛਿਮਂ ਚਿਤ੍ਤਨ੍ਤਿ ਪਠਮਭਵਙ੍ਗਤੋ ਪਟ੍ਠਾਯ ਯਾਵ ਚੁਤਿ ਚਿਤ੍ਤਾ ਸਬ੍ਬਂ ਚਿਤ੍ਤਂ ਵੁਚ੍ਚਤਿ. ਪੁਰੇਜਾਤਸ੍ਸਾਤਿ ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਂ ਕਮ੍ਮਜਰੂਪਕਾਯਂ ਆਦਿਂ ਕਤ੍ਵਾ ਅਜ੍ਝਤ੍ਤਸਨ੍ਤਾਨਪਰਿਯਾਪਨ੍ਨੋ ਸਬ੍ਬੋ ਚਤੁਸਮੁਟ੍ਠਾਨਿਕਰੂਪਕਾਯੋ ਵੁਚ੍ਚਤਿ.

ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਸ੍ਸ ਕਮ੍ਮਜਰੂਪਕਾਯਸ੍ਸ ਪਠਮ ਭਵਙ੍ਗਾਦੀਨਿ ਪਨ੍ਨਰਸਭਵਙ੍ਗਚਿਤ੍ਤਾਨਿ ਪਚ੍ਛਾਜਾਤਪਚ੍ਚਯਾ ਹੋਨ੍ਤਿ. ਪਟਿਸਨ੍ਧਿ ਚਿਤ੍ਤਂ ਪਨ ਤੇਨ ਕਾਯੇਨ ਸਹੁਪ੍ਪਨ੍ਨਤ੍ਤਾ ਪਚ੍ਛਜਾਤਂ ਨ ਹੋਤਿ. ਸੋਲ਼ਸਮਭਵਙ੍ਗਚਿਤ੍ਤਞ੍ਚ ਤਸ੍ਸ ਕਾਯਸ੍ਸ ਭਿਜ੍ਜਨਕ੍ਖੇਤ੍ਤੇ ਉਪ੍ਪਨ੍ਨਤ੍ਤਾ ਪਚ੍ਚਯੋ ਨ ਹੋਤਿ. ਤਸ੍ਮਾ ਪਨ੍ਨਰਸਭਵਙ੍ਗਚਿਤ੍ਤਾਨੀਤਿ ਵੁਤ੍ਤਂ.

ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕ੍ਖਣੇ ਪਨ ਦ੍ਵੇ ਰੂਪਕਾਯਾ ਉਪ੍ਪਜ੍ਜਨ੍ਤਿ ਕਮ੍ਮਜਰੂਪਕਾਯੋ ਚ ਉਤੁਜਰੂਪਕਾਯੋਚ. ਤਥਾ ਭਙ੍ਗਕ੍ਖਣੇਪਿ. ਪਠਮਭਵਙ੍ਗਸ੍ਸ ਉਪ੍ਪਾਦਕ੍ਖਣੇ ਪਨ ਤਯੋ ਰੂਪਕਾਯਾ ਉਪ੍ਪਜ੍ਜਨ੍ਤਿ ਕਮ੍ਮਜਰੂਪਕਾਯੋ ਚ ਉਤੁਜਰੂਪਕਾਯੋ ਚ ਚਿਤ੍ਤਜਰੂਪਕਾਯੋ ਚ. ਯਦਾ ਬਹਿਦ੍ਧਾਹਾਰਪ੍ਫਰਣਂ ਲਭਿਤ੍ਵਾ ਅਜ੍ਝਤ੍ਤਾਹਾਰੋ ਆਹਾਰਜਰੂਪਕਾਯਂ ਜਨੇਤਿ, ਤਤੋ ਪਟ੍ਠਾਯ ਚਤੁਸਮੁਟ੍ਠਾਨਿਕਾ ਚਤ੍ਤਾਰੋ ਰੂਪਕਾਯਾ ਦੀਪ ਜਾਲਾ ਵਿਯ ਪਵਤ੍ਤਨ੍ਤਿ. ਤੇ ਉਪ੍ਪਾਦਕ੍ਖਣਂ ਅਤਿਕ੍ਕਮ੍ਮ ਯਾਵ ਠਿਤਿਭਾਵੇਨ ਧਰਨ੍ਤਿ, ਤਾਵ ਪਨ੍ਨਰਸਚਿਤ੍ਤਾਨਿ ਤੇਸਂ ਕਾਯਾਨਂ ਪਚ੍ਛਾਜਾਤਪਚ੍ਚਯਾ ਹੋਨ੍ਤਿਯੇਵ.

ਵੁਡ੍ਢਿਵਿਰੁਲ਼੍ਹਿਯਾਤਿ ਚਤੁਸਮੁਟ੍ਠਾਨਿਕਰੂਪਸਨ੍ਤਤਿਯਾ ਉਪਰੂਪਰਿ ਵੁਡ੍ਢਿਯਾ ਚ ਵਿਰੁਲ਼੍ਹਿਯਾ ਚ. ਤਥਾਹਿ ਪੁਰਿਮਾ ਪੁਰਿਮਾ ਚਤ੍ਤਾਰੋ ਰੂਪਕਾਯਾ ਸਚੇ ਪਚ੍ਛਾਜਾਤ ਪਚ੍ਚਯਂ ਪੁਨਪ੍ਪੁਨਂ ਲਭਨ੍ਤਿ, ਏਵਂ ਸਤਿ ਤੇ ਨਿਰੁਜ੍ਝਨ੍ਤਾਪਿ ਪਚ੍ਛਾਰੂਪਸਨ੍ਤਤਿਪਰਮ੍ਪਰਾਨਂ ਵੁਡ੍ਢਿਯਾ ਚ ਵਿਰੁਲ਼੍ਹਿਯਾ ਚ ਵੇਪੁਲ੍ਲਾਯ ਚ ਬਲਵ ਪਚ੍ਚਯਾ ਹੁਤ੍ਵਾ ਨਿਰੁਜ੍ਝਨ੍ਤੀਤਿ. ਪਚ੍ਛਾਜਾਤਪਚ੍ਚਯਦੀਪਨਾ ਨਿਟ੍ਠਿਤਾ.