੮. ਨਿਸ੍ਸਯਪਚ੍ਚਯੋ

ਤਿਵਿਧੋ ਨਿਸ੍ਸਯਪਚ੍ਚਯੋ, ਸਹਜਾਤਨਿਸ੍ਸਯੋ ਵਤ੍ਥੁ ਪੁਰੇਜਾਤਨਿਸ੍ਸਯੋ ਵਤ੍ਥਾਰਮ੍ਮਣਪੁਰੇਜਾਤਨਿਸ੍ਸਯੋ.

ਤਤ੍ਥ ਕਤਮੋ ਸਹਜਾਤਨਿਸ੍ਸਯੋ. ਸਬ੍ਬੋ ਸਹਜਾਤ ਪਚ੍ਚਯੋ ਸਹਜਾਤਨਿਸ੍ਸਯੋ. ਤਸ੍ਮਾ ਤਤ੍ਥ ਪਚ੍ਚਯਵਿਭਾਗੋ ਚ ਪਚ੍ਚਯੁਪ੍ਪਨ੍ਨਵਿਭਾਗੋ ਚ ਸਹਜਾਤਪਚ੍ਚਯੇ ਵੁਤ੍ਤਨਯੇਨ ਵੇਦਿਤਬ੍ਬੋ.

ਕਤਮੋ ਪਨ ਵਤ੍ਥੁਪੁਰੇਜਾਤਨਿਸ੍ਸਯੋ. ਛ ਵਤ੍ਥੂਨਿ ਚਕ੍ਖੁ ਵਤ੍ਥੁ ਸੋਤਵਤ੍ਥੁ ਘਾਨਵਤ੍ਥੁ ਜਿਵ੍ਹਾਵਤ੍ਥੁ ਕਾਯਵਤ੍ਥੁ ਹਦਯਵਤ੍ਥੁ. ਇਮਾਨਿ ਛਵਤ੍ਥੂਨਿ ਪਵਤ੍ਤਿਕਾਲੇ ਸਤ੍ਤਾਨਂ ਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇ ਜਾਤਨਿਸ੍ਸਯੋ.

ਵਤ੍ਥੁਰੂਪਮੇਵ ਪੁਰੇਜਾਤਂ ਹੁਤ੍ਵਾ ਨਿਸ੍ਸਯੋ ਵਤ੍ਥੁਪੁਰੇਜਾਤ ਨਿਸ੍ਸਯੋ. ਤਤ੍ਥ ਚਿਤ੍ਤਚੇਤਸਿਕਾਨਂ ਨਿਸ੍ਸਯਟ੍ਠਾਨਟ੍ਠੇਨ ਵਤ੍ਥੁ ਨਾਮ. ਪੁਰੇਜਾਤਨ੍ਤਿ ਅਤ੍ਤਨੋ ਅਤ੍ਤਨੋ ਪਚ੍ਚਯੁਪ੍ਪਨ੍ਨਸ੍ਸ ਧਮ੍ਮਸ੍ਸ ਉਪ੍ਪਤ੍ਤਿਕ੍ਖਣਤੋ ਪੁਰਿਮੇ ਖਣੇ ਜਾਤਂ.

ਤਤ੍ਥ ਪਟਿਸਨ੍ਧਿਚਿਤ੍ਤਂ ਤਦਾ ਪੁਰੇਜਾਤਸ੍ਸ ਵਤ੍ਥੁਰੂਪਸ੍ਸ ਅਭਾਵਤੋ ਅਤ੍ਤਨਾ ਸਹੁਪ੍ਪਨ੍ਨਮੇਵ ਹਦਯਵਤ੍ਥੁਰੂਪਂ ਨਿਸ੍ਸਾਯ ਉਪ੍ਪਜ੍ਜਤਿ. ਪਠਮ ਭਵਙ੍ਗਚਿਤ੍ਤਂ ਪਨ ਪਟਿਸਨ੍ਧਿਚਿਤ੍ਤੇਨ ਸਹੁਪ੍ਪਨ੍ਨਹਦਯ ਵਤ੍ਥੁਰੂਪਂ ਨਿਸ੍ਸਾਯ ਉਪ੍ਪਜ੍ਜਤਿ. ਦੁਤਿਯਭਵਙ੍ਗਚਿਤ੍ਤਂ ਪਠਮਭਵਙ੍ਗਚਿਤ੍ਤੇਨ ਸਹੁਪ੍ਪਨ੍ਨਂ ਨਿਸ੍ਸਾਯ ਉਪ੍ਪਜ੍ਜਤਿ. ਏਵਂ ਤਤਿਯਭਵਙ੍ਗਚਿਤ੍ਤਂ ਦੁਤਿਯ ਭਵਙ੍ਗਚਿਤ੍ਤੇਨ ਸਹੁਪ੍ਪਨ੍ਨਨ੍ਤਿਆਦਿਨਾ ਯਾਵਮਰਣਾਸਨ੍ਨਕਾਲਾ ਦ੍ਵਿਨ੍ਨਂ ਮਨੋਧਾਤੁਮਨੋਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇਜਾਤਨਿਸ੍ਸਯੋ ਵੇਦਿਤਬ੍ਬੋ.

ਯਥਾ ਵੀਣਾਸਦ੍ਦਾ ਨਾਮ ਵੀਣਾਤਨ੍ਤੀਸੁ ਵੀਣਾਦਣ੍ਡਕੇਹਿ ਪਹਰਣਵੇਗੇਨ ਏਵ ਜਾਯਨ੍ਤਿ, ਨੋ ਅਞ੍ਞਥਾ. ਤਥਾ ਪਞ੍ਚਵਿਞ੍ਞਾਣਾਨਿ ਨਾਮ ਪਞ੍ਚਵਤ੍ਥੁਸਙ੍ਖਾਤੇਸੁ ਪਞ੍ਚਦ੍ਵਾਰੇਸੁ ਪਞ੍ਚਨ੍ਨਂ ਆਰਮ੍ਮਣਾਨਂ ਆਪਾਤਾ ਗਮਨਵੇਗੇਨ ਏਵ ਜਾਯਨ੍ਤਿ, ਨੋ ਅਞ੍ਞਥਾ.

ਆਪਾਤਾਗਮਨਞ੍ਚ ਤੇਸਂ ਦ੍ਵਾਰਾਰਮ੍ਮਣਾਨਂ ਠਿਤਿਪਤ੍ਤਕਾਲੇ ਏਵ ਹੋਤਿ. ਆਪਾਤਾਗਮਨਪਚ੍ਚਯਾ ਚ ਦ੍ਵਿਕ੍ਖਤ੍ਤੁਂ ਭਵਙ੍ਗਂ ਚਲਤਿ. ਭਵਙ੍ਗਚਲਨ ਪਚ੍ਚਯਾ ਚ ਆਵਜ੍ਜਨਂ ਉਪ੍ਪਜ੍ਜਤਿ. ਆਵਜ੍ਜਨਪਚ੍ਚਯਾ ਚ ਤਾਨਿ ਪਞ੍ਚਵਿਞ੍ਞਾਣਾਨਿ ਉਪ੍ਪਜ੍ਜਨ੍ਤਿ. ਤਸ੍ਮਾ ਚਕ੍ਖਾਦੀਨਿ ਪਞ੍ਚਵਤ੍ਥੂਨਿ ਪੁਰੇ ਅਤੀਤਭਵਙ੍ਗਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਉਪ੍ਪਨ੍ਨਾਨਿ ਏਵ ਪਞ੍ਚਵਿਞ੍ਞਾਣਧਾਤੂਨਂ ਵਤ੍ਥੁਪੁਰੇਜਾਤਪਚ੍ਚਯਾ ਹੋਨ੍ਤਿ.

ਮਰਣਾਸਨ੍ਨਕਾਲੇ ਪਨ ਸਬ੍ਬਾਨਿ ਛ ਵਤ੍ਥੂਨਿ ਚੁਤਿਚਿਤ੍ਤਤੋ ਪੁਰੇ ਸਤ੍ਤਰਸਮਸ੍ਸ ਭਵਙ੍ਗਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਏਵ ਉਪ੍ਪਜ੍ਜਨ੍ਤਿ, ਤਤੋ ਪਰਂ ਨ ਉਪ੍ਪਜ੍ਜਨ੍ਤਿ. ਤਸ੍ਮਾ ਮਰਣਾਸਨ੍ਨਕਾਲੇ ਭਵਙ੍ਗਚਿਤ੍ਤਾਨਿ ਚ ਸਬ੍ਬਾਨਿ ਛਦ੍ਵਾਰਿਕਵੀਥਿਚਿਤ੍ਤਾਨਿ ਚ ਚੁਤਿਚਿਤ੍ਤਞ੍ਚ ਪੁਰੇਤਰਂ ਉਪ੍ਪਨ੍ਨਾਨਿ ਤਾਨਿਯੇਵ ਅਤ੍ਤਨੋ ਅਤ੍ਤਨੋ ਵਤ੍ਥੂਨਿ ਨਿਸ੍ਸਾਯ ਉਪ੍ਪਜ੍ਜਨ੍ਤਿ. ਅਯਂ ਵਤ੍ਥੁਪੁਰੇਜਾਤ ਨਿਸ੍ਸਯੋ.

ਕਤਮੋ ਪਨ ਵਤ੍ਥਾਰਮ੍ਮਣਪੁਰੇਜਾਤਨਿਸ੍ਸਯੋ. ਯਦਾ ਅਤ੍ਤਨੋ ਅਜ੍ਝਤ੍ਤਂ ਵਤ੍ਥੁਰੂਪਂ ਆਰਬ੍ਭ ਯਂ ਰੂਪਂ ਨਿਸ੍ਸਾਯ ਮਮ ਮਨੋਵਿਞ੍ਞਾਣਂ ਵਤ੍ਤਤਿ, ਏਤਂ ਮਮ ਏਸੋ ਹਮਸ੍ਮਿ ਏਸੋ ਮੇ ਅਤ੍ਤਾਤਿ ਏਵਂ ਤਣ੍ਹਾਮਾਨ ਦਿਟ੍ਠੀਹਿ ਗਹਣਵਸੇਨ ਵਾ ਏਤਂ ਅਨਿਚ੍ਚਂ ਏਤਂ ਦੁਕ੍ਖਂ ਏਤਂ ਅਨਤ੍ਤਾਤਿ ਏਵਂ ਸਮ੍ਮਸਨਵਸੇਨ ਵਾ ਆਵਜ੍ਜਨਾਦੀਨਿ ਮਨੋਦ੍ਵਾਰਿਕਵੀਥਿ ਚਿਤ੍ਤਾਨਿ ਪਵਤ੍ਤਨ੍ਤਿ. ਤਦਾ ਤਂ ਤਂ ਵਤ੍ਥੁਰੂਪਂ ਪਚ੍ਚੇਕਂ ਤੇਸਂ ਨਿਸ੍ਸਯਵਤ੍ਥੁ ਚ ਹੋਤਿ ਤੇਸਂ ਆਰਮ੍ਮਣਞ੍ਚ. ਤਸ੍ਮਾ ਤਂ ਤਂ ਹਦਯਰੂਪਂ ਤਸ੍ਸ ਤਸ੍ਸ ਚਿਤ੍ਤੁਪ੍ਪਾਦਸ੍ਸ ਵਤ੍ਥਾਰਮ੍ਮਣਪੁਰੇਜਾਤਪਚ੍ਚਯੋ ਹੋਤਿ. ਅਯਂ ਵਤ੍ਥਾਰਮ੍ਮਣ ਪੁਰੇਜਾਤਨਿਸ੍ਸਯੋ. ਏਵਂ ਨਿਸ੍ਸਯਪਚ੍ਚਯੋ ਤਿਵਿਧੋ ਹੋਤਿ.

ਇਧ ਸੁਤ੍ਤਨ੍ਤਨਿਸ੍ਸਯੋਪਿ ਵਤ੍ਤਬ੍ਬੋ. ਇਮੇ ਮਨੁਸ੍ਸਾ ਵਾ ਤਿਰਚ੍ਛਾਨਗਤਾ ਵਾ ਰੁਕ੍ਖਾਦਯੋ ਵਾ ਮਹਾਪਥਵਿਯਂ ਪਤਿਟ੍ਠਿਤਾ, ਮਹਾ ਪਥਵੀ ਚ ਹੇਟ੍ਠਾ ਮਹਾਉਦਕਕ੍ਖਨ੍ਧੇ, ਮਹਾਉਦਕਕ੍ਖਨ੍ਧੋ ਚ ਹੇਟ੍ਠਾ ਮਹਾਵਾਤਕ੍ਖਨ੍ਧੇ, ਮਹਾਵਾਤਕ੍ਖਨ੍ਧੋ ਚ ਹੇਟ੍ਠਾ ਅਜਟਾਕਾਸੇ, ਮਨੁਸ੍ਸਾ ਗੇਹੇਸੁ, ਭਿਕ੍ਖੂ ਵਿਹਾਰੇਸੁ, ਦੇਵਾ ਦਿਬ੍ਬਵਿਮਾਨੇਸੂਤਿਆਦਿਨਾ ਸਬ੍ਬਂ ਲੋਕਪ੍ਪਵਤ੍ਤਿਂ ਞਤ੍ਵਾ ਨਿਸ੍ਸਯਪਚ੍ਚਯੋ ਵੇਦਿਤਬ੍ਬੋ. ਨਿਸ੍ਸਯਪਚ੍ਚਯਦੀਪਨਾ ਨਿਟ੍ਠਿਤਾ.