੪. ਅਨਨ੍ਤਰਪਚ੍ਚਯੋ
ਕਤਮੋ ਅਨਨ੍ਤਰਪਚ੍ਚਯੋ. ਅਨਨ੍ਤਰੇ ਖਣੇ ਨਿਰੁਦ੍ਧੋ ਚਿਤ੍ਤ ਚੇਤਸਿਕਧਮ੍ਮਸਮੂਹੋ ਅਨਨ੍ਤਰਪਚ੍ਚਯੋ.
ਕਤਮੋ ਧਮ੍ਮੋ ਅਨਨ੍ਤਰਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨੋ. ਪਚ੍ਛਿਮੇ ਅਨਨ੍ਤਰੇ ਏਵ ਖਣੇ ਉਪ੍ਪਨ੍ਨੋ ਚਿਤ੍ਤਚੇਤਸਿਕਧਮ੍ਮਸਮੂਹੋ ਤਸ੍ਸ ਪਚ੍ਚਯਸ੍ਸ ਪਚ੍ਚਯੁਪ੍ਪਨ੍ਨੋ.
ਏਕਸ੍ਮਿਂ ਭਵੇ ਪਟਿਸਨ੍ਧਿਚਿਤ੍ਤਂ ਪਠਮਭਵਙ੍ਗਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ, ਪਠਮ ਭਵਙ੍ਗਚਿਤ੍ਤਂ ਦੁਤਿਯਭਵਙ੍ਗਚਿਤ੍ਤਸ੍ਸ ਅਨਨ੍ਤਰਪਚ੍ਚਯੋਤਿਆਦਿਨਾ ਵਤ੍ਤਬ੍ਬੋ.
ਯਦਾ ਪਨ ਧਮ੍ਮਯਮਕੇ ਸੁਦ੍ਧਾਵਾਸਾਨਂ ਦੁਤਿਯੇ ਅਕੁਸਲੇ ਚਿਤ੍ਤੇ ਵਤ੍ਤਮਾਨੇਤਿ ਵੁਤ੍ਤਨਯੇਨ ਤਸ੍ਸ ਸਤ੍ਤਸ੍ਸ ਅਤ੍ਤਨੋ ਅਭਿਨਵਂ ਅਤ੍ਤਭਾਵਂ ਆਰਬ੍ਭ ਏਤਂ ਮਮ ਏਸੋਹਮਸ੍ਮਿ ਏਸੋ ਮੇ ਅਤ੍ਤਾਤਿ ਪਵਤ੍ਤਂ ਭਵਨਿਕਨ੍ਤਿਕ ਤਣ੍ਹਾਸਹਗਤਚਿਤ੍ਤਂ ਉਪ੍ਪਜ੍ਜਤਿ. ਤਦਾ ਪਠਮਂ ਦ੍ਵਿਕ੍ਖਤ੍ਤੁਂ ਭਵਙ੍ਗਂ ਚਲਤਿ. ਤਤੋ ਮਨੋਦ੍ਵਾਰਾਵਜ੍ਜਨਚਿਤ੍ਤਂ ਉਪ੍ਪਜ੍ਜਤਿ. ਤਤੋ ਸਤ੍ਤ ਭਵਨਿਕਨ੍ਤਿਕਜਵਨਾਨਿ ਉਪ੍ਪਜ੍ਜਨ੍ਤਿ. ਤਤੋ ਪਰਂ ਭਵਙ੍ਗਵਾਰੋ.
ਅਪਿ ਚ ਸੋ ਸਤ੍ਤੋ ਤਦਾ ਪਚ੍ਚੁਪ੍ਪਨ੍ਨਭਵੇ ਕਿਞ੍ਚਿ ਨ ਜਾਨਾਤਿ, ਪੁਬ੍ਬਭਵੇ ਅਤ੍ਤਨਾ ਅਨੁਭੂਤਂ ਆਰਮ੍ਮਣਂ ਅਨੁਸ੍ਸਰਮਾਨੋ ਅਚ੍ਛਤਿ. ਵਤ੍ਥੁਸ੍ਸ ਪਨ ਅਤਿਦੁਬ੍ਬਲਤ੍ਤਾ ਤਞ੍ਚ ਆਰਮ੍ਮਣਂ ਅਪਰਿਬ੍ਯਤ੍ਤਮੇਵ ਹੋਤਿ. ਤਂ ਆਰਬ੍ਭ ਉਦ੍ਧਚ੍ਚਸਹਗਤਚਿਤ੍ਤਮੇਵ ਬਹੁਲਂ ਪਵਤ੍ਤਤਿ.
ਯਦਾ ਗਬ੍ਭੋ ਥੋਕਂ ਵਡ੍ਢਮਾਨੋ ਹੋਤਿ ਅਤਿਰੇਕਦ੍ਵੇਮਾਸਂ ਗਤੋ, ਤਦਾ ਚਕ੍ਖਾਦੀਨਿ ਇਨ੍ਦ੍ਰਿਯਾਨਿ ਪਰਿਪੁਣ੍ਣਾਨਿ ਹੋਨ੍ਤਿ. ਏਵਂ ਸਨ੍ਤੇਪਿ ਮਾਤੁਗਬ੍ਭੇ ਆਲੋਕਾਦੀਨਂ ਪਚ੍ਚਯਾਨਂ ਅਭਾਵਤੋ ਚਕ੍ਖੁਵਿਞ੍ਞਾਣਾਦੀਨਿ ਚਤ੍ਤਾਰਿ ਵਿਞ੍ਞਾਣਾਨਿ ਨੁਪ੍ਪਜ੍ਜਨ੍ਤਿ, ਕਾਯਵਿਞ੍ਞਾਣਮਨੋਵਿਞ੍ਞਾਣਾਨਿ ਏਵ ਉਪ੍ਪਜ੍ਜਨ੍ਤਿ. ਸੋ ਸਤ੍ਤੋ ਮਾਤੁਯਾ ਇਰਿਯਾਪਥਪਰਿਵਤ੍ਤਨਾਦੀਸੁ ਬਹੂਨਿ ਦੁਕ੍ਖਦੋਮਨਸ੍ਸਾਨਿ ਪਚ੍ਚਨੁਭੋਤਿ. ਵਿਜਾਯਨਕਾਲੇ ਪਨ ਭੁਸਂ ਦੁਕ੍ਖਂ ਨਿਗਚ੍ਛਤਿਯੇਵ. ਵਿਜਾਯਿਤ੍ਵਾਪਿ ਯਾਵ ਵਤ੍ਥੁਰੂਪਾਨਿ ਮੁਦੂਨਿ ਹੋਨ੍ਤਿ, ਪਰਿਪਾਕਂ ਨ ਗਚ੍ਛਨ੍ਤਿ, ਤਾਵ ਸੋ ਅਤਿਮਨ੍ਦਰੂਪੋ ਉਤ੍ਤਾਨਸੇਯ੍ਯਕੋ ਹੁਤ੍ਵਾ ਅਚ੍ਛਤਿ. ਨ ਕਿਞ੍ਚਿ ਪਚ੍ਚੁਪ੍ਪਨ੍ਨਂ ਆਰਮ੍ਮਣਂ ਸਲ੍ਲਕ੍ਖੇਤਿ. ਯੇਭੁਯ੍ਯੇਨ ਪੁਰਿਮ ਭਵਾਨੁਸਾਰੀ ਏਵ ਤਸ੍ਸ ਵਿਞ੍ਞਾਣਂ ਹੋਤਿ. ਸਚੇ ਸੋ ਨਿਰਯ ਭਵਤੋ ਆਗਤੋ ਹੋਤਿ, ਸੋ ਵਿਰੂਪਮੁਖਬਹੁਲੋ ਹੋਤਿ. ਪੁਰਿਮਾਨਿ ਨਿਰਯਾਰਮ੍ਮਣਾਨਿ ਆਰਬ੍ਭ ਖਣੇ ਖਣੇ ਵਿਰੂਪਮੁਖਮਸ੍ਸ ਪਞ੍ਞਾਯਤਿ. ਅਥ ਦੇਵਲੋਕਤੋ ਆਗਤੋ ਹੋਤਿ, ਦਿਬ੍ਬਾਨਿ ਆਰਮ੍ਮਣਾਨਿ ਆਰਬ੍ਭ ਵਿਪ੍ਪਸਨ੍ਨਮੁਖਬਹੁਲੋ ਹੋਤਿ, ਖਣੇ ਖਣੇ ਮਿਹਿਤਮੁਖਮਸ੍ਸ ਪਞ੍ਞਾਯਤਿ.
ਯਦਾ ਪਨ ਵਤ੍ਥੁਰੂਪਾਨਿ ਤਿਕ੍ਖਾਨਿ ਹੋਨ੍ਤਿ, ਪਰਿਪਾਕਂ ਗਚ੍ਛਨ੍ਤਿ. ਵਿਞ੍ਞਾਣਾਨਿ ਚਸ੍ਸ ਸੁਵਿਸਦਾਨਿ ਪਵਤ੍ਤਨ੍ਤਿ. ਤਦਾ ਅਮਨ੍ਦਰੂਪੋ ਹੁਤ੍ਵਾ ਕੀਲ਼ਨ੍ਤੋ ਲੀਲ਼ਨ੍ਤੋ ਮੋਦਨ੍ਤੋ ਪਮੋਦਨ੍ਤੋ ਅਚ੍ਛਤਿ. ਪਚ੍ਚੁਪ੍ਪਨ੍ਨੇ ਆਰਮ੍ਮਣਾਨਿ ਸਲ੍ਲਕ੍ਖੇਤਿ. ਮਾਤੁਭਾਸਂ ਸਲ੍ਲਕ੍ਖੇਤਿ. ਇਧ ਲੋਕਾਨੁਸਾਰੀ ਵਿਞ੍ਞਾਣਮਸ੍ਸ ਬਹੁਲਂ ਪਵਤ੍ਤਤਿ. ਪੁਰਿਮਜਾਤਿਂ ਪਮੁਸ੍ਸਤਿ.
ਕਿਂ ਪਨ ਸਬ੍ਬੋਪਿ ਸਤ੍ਤੋ ਇਮਸ੍ਮਿਂ ਠਾਨੇ ਏਵ ਪੁਰਿਮਂ ਜਾਤਿਂ ਪਮੁਸ੍ਸਤੀਤਿ ਚੇ. ਨ ਸਬ੍ਬੋਪਿ ਸਤ੍ਤੋ ਇਮਸ੍ਮਿਂ ਠਾਨੇ ਏਵ ਪਮੁਸ੍ਸਤਿ. ਕੋਚਿ ਅਤਿਰੇਕਤਰਂ ਗਮ੍ਭਵਾਸਦੁਕ੍ਖੇਨ ਪਰਿਪੀਲ਼ਿਤੋ ਗਬ੍ਭੇ ਏਵ ਪਮੁਸ੍ਸਤਿ. ਕੋਚਿ ਵਿਜਾਯਨਕਾਲੇ, ਕੋਚਿ ਇਮਸ੍ਮਿਂ ਠਾਨੇ ਪਮੁਸ੍ਸਤਿ. ਕੋਚਿ ਇਤੋਪਰਮ੍ਪਿ ਦਹਰਕਾਲੇ ਨ ਪਮੁਸ੍ਸਤਿ. ਵੁਡ੍ਢਕਾਲੇ ਏਵ ਪਮੁਸ੍ਸਤਿ. ਕੋਚਿ ਯਾਵਜੀਵਂਪਿ ਨ ਪਮੁਸ੍ਸਤਿ. ਦ੍ਵੇ ਤਯੋ ਭਵੇ ਅਨੁਸ੍ਸਰਨ੍ਤੋਪਿ ਅਤ੍ਥਿਯੇਵ. ਇਮੇ ਜਾਤਿਸ੍ਸਰਸਤ੍ਤਾ ਨਾਮ ਹੋਨ੍ਤਿ.
ਤਤ੍ਥ ਵਿਜਾਯਨਕਾਲਤੋ ਪਟ੍ਠਾਯ ਛਦ੍ਵਾਰਿਕਵੀਥਿਚਿਤ੍ਤਾਨਿ ਪਵਤ੍ਤਨ੍ਤਿ. ਪਚ੍ਚੁਪ੍ਪਨ੍ਨਾਰਮ੍ਮਣਂ ਸਲ੍ਲਕ੍ਖਣਤੋ ਪਟ੍ਠਾਯ ਛਦ੍ਵਾਰਿਕਵੀਥਿ ਚਿਤ੍ਤਾਨਿ ਪਰਿਪੁਣ੍ਣਾਨਿ ਪਵਤ੍ਤਨ੍ਤਿ. ਸਬ੍ਬਤ੍ਥਪਿ ਪੁਰਿਮਂ ਪੁਰਿਮਂ ਅਨਨ੍ਤਰੇ ਨਿਰੁਦ੍ਧਂ ਚਿਤ੍ਤਂ ਪਚ੍ਛਿਮਸ੍ਸ ਪਚ੍ਛਿਮਸ੍ਸ ਅਨਨ੍ਤਰੇ ਉਪ੍ਪਨ੍ਨਸ੍ਸ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ ਹੋਤਿ. ਅਯਞ੍ਚ ਅਨਨ੍ਤਰਪਚ੍ਚਯੋ ਨਾਮ ਅਨਮਤਗ੍ਗੇ ਸਂਸਾਰੇ ਏਕਸ੍ਸ ਸਤ੍ਤਸ੍ਸ ਏਕਪ੍ਪਬਨ੍ਧੋ ਏਵ ਹੋਤਿ. ਯਦਾ ਸਤ੍ਤੋ ਅਰਹਤ੍ਤ ਮਗ੍ਗਂ ਲਭਿਤ੍ਵਾ ਖਨ੍ਧਪਰਿਨਿਬ੍ਬਾਨਂ ਪਾਪੁਣਾਤਿ, ਤਦਾ ਏਵ ਸੋ ਪਬਨ੍ਧੋ ਛਿਜ੍ਜਤਿ.
ਕੇਨਟ੍ਠੇਨ ਅਨਨ੍ਤਰੋ, ਕੇਨਟ੍ਠੇਨ ਪਚ੍ਚਯੋਤਿ. ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨ ਅਨਨ੍ਤਰੋ, ਉਪਕਾਰਕਟ੍ਠੇਨ ਪਚ੍ਚਯੋ. ਤਤ੍ਥ ਅਤ੍ਤਸਦਿਸਸ੍ਸਾਤਿ ਸਾਰਮ੍ਮਣ ਭਾਵੇਨ ਅਤ੍ਤਨਾ ਸਦਿਸਸ੍ਸ. ਸਾਰਮ੍ਮਣਭਾਵੇਨਾਤਿ ਚ ਯੋ ਧਮ੍ਮੋ ਆਰਮ੍ਮਣੇਨ ਵਿਨਾ ਨ ਪਵਤ੍ਤਤਿ, ਸੋ ਸਾਰਮ੍ਮਣੋ ਨਾਮ, ਏਵਂ ਸਾਰਮ੍ਮਣਭਾਵੇਨ. ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨਾਤਿ ਪੁਰਿਮਸ੍ਮਿਂ ਚਿਤ੍ਤੇ ਨਿਰੁਦ੍ਧੇਪਿ ਤਸ੍ਸ ਚਿਨ੍ਤਨਕਿਰਿਯਾਵੇਗੋ ਨ ਵੂਪਸਮ੍ਮਤਿ, ਪਚ੍ਛਿਮਂ ਚਿਤ੍ਤਂ ਉਪ੍ਪਾਦੇਤ੍ਵਾ ਏਵ ਵੂਪਸਮ੍ਮਤਿ, ਏਵਂ ਪਚ੍ਛਿਮਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨ.
ਤਤ੍ਥ ਪੁਰਿਮਾ ਪੁਰਿਮਾ ਮਾਤੁਪਰਮ੍ਪਰਾ ਵਿਯ ਅਨਨ੍ਤਰਪਚ੍ਚਯਪਰਮ੍ਪਰਾ ਦਟ੍ਠਬ੍ਬਾ. ਪਚ੍ਛਿਮਾ ਪਚ੍ਛਿਮਾ ਧੀਤੁਪਰਮ੍ਪਰਾ ਵਿਯ ਤਸ੍ਸ ਪਚ੍ਚਯੁਪ੍ਪਨ੍ਨਪਰਮ੍ਪਰਾ ਦਟ੍ਠਬ੍ਬਾ. ਏਵਂ ਸਨ੍ਤੇ ਅਰਹਨ੍ਤਾਨਂ ਸਬ੍ਬਪਚ੍ਛਿਮਂ ਪਰਿਨਿਬ੍ਬਾਨਚਿਤ੍ਤਮ੍ਪਿ ਪੁਨ ਪਟਿਸਨ੍ਧਿਚਿਤ੍ਤਸਙ੍ਖਾਤਂ ਧਮ੍ਮਨ੍ਤਰਂ ਉਪ੍ਪਾਦੇਯ੍ਯਾਤਿ. ਨ ਉਪ੍ਪਾਦੇਯ੍ਯ. ਕਸ੍ਮਾ, ਤਦਾ ਕਮ੍ਮਕਿਲੇਸਵੇਗਾਨਂ ਸਬ੍ਬਸੋ ਪਟਿਪ੍ਪਸ੍ਸਦ੍ਧਿਭਾਵੇਨ ਅਚ੍ਚਨ੍ਤਸਨ੍ਤਤਰਤ੍ਤਾ ਤਸ੍ਸ ਚਿਤ੍ਤਸ੍ਸਾਤਿ. ਅਨਨ੍ਤਰਪਚ੍ਚਯ ਦੀਪਨਾ ਨਿਟ੍ਠਿਤਾ.