੫. ਸਮਨਨ੍ਤਰਪਚ੍ਚਯੋ

ਪਚ੍ਚਯਧਮ੍ਮਵਿਭਾਗੋ ਚ ਪਚ੍ਚਯੁਪ੍ਪਨ੍ਨਧਮ੍ਮਵਿਭਾਗੋ ਚ ਅਨਨ੍ਤਪਚ੍ਚਯ ਸਦਿਸੋ.

ਕੇਨਟ੍ਠੇਨ ਸਮਨਨ੍ਤਰੋਤਿ. ਸੁਟ੍ਠੁ ਅਨਨ੍ਤਰਟ੍ਠੇਨ ਸਮਨਨ੍ਤਰੋ. ਯਥਾ ਸਿਲਾਥਮ੍ਭਾਦੀਸੁ ਰੂਪਕਲਾਪਾ ਏਕਾਬਦ੍ਧਾ ਸਮਾਨਾਪਿ ਰੂਪ ਧਮ੍ਮਭਾਵੇਨ ਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇ ਪਰਿਚ੍ਛੇਦਰੂਪਸਹਿਤਾ ਏਵ ਹੋਨ੍ਤਿ. ਦ੍ਵਿਨ੍ਨਂ ਰੂਪਕਲਾਪਾਨਂ ਮਜ੍ਝੇ ਅਨ੍ਤਰਂ ਨਾਮ ਵਿਵਰਂ ਨਾਮ ਅਤ੍ਥਿਯੇਵ. ਨ ਤਥਾ ਪੁਰਿਮਪਚ੍ਛਿਮਾਨਂ ਦ੍ਵਿਨ੍ਨਂ ਚਿਤ੍ਤਚੇਤਸਿਕ ਕਲਾਪਾਨਂ ਮਜ੍ਝੇ. ਤੇ ਪਨ ਅਰੂਪਧਮ੍ਮਭਾਵੇਨ ਅਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇ ਪਰਿਚ੍ਛੇਦਧਮ੍ਮਸ੍ਸ ਨਾਮ ਕਸ੍ਸਚਿ ਆਕਾਸਵਿਵਰਸ੍ਸ ਅਭਾਵਤੋ ਸਬ੍ਬਸੋ ਅਨ੍ਤਰ ਰਹਿਤਾ ਏਵ ਹੋਨ੍ਤਿ. ਲੋਕਸ੍ਸਪਿ ਦ੍ਵਿਨ੍ਨਂ ਕਲਾਪਾਨਂ ਅਨ੍ਤਰਂ ਨਾਮ ਨ ਦਿਸ੍ਸਤਿ. ਤਤੋ ਇਮੇ ਸਤ੍ਤਾ ਚਿਤ੍ਤਂ ਨਾਮ ਨਿਚ੍ਚਂ ਧੁਵਂ ਥਾਵਰਂ ਅਵਿਪਰਿਣਾਮਧਮ੍ਮਨ੍ਤਿ ਏਵਂ ਚਿਤ੍ਤੇ ਨਿਚ੍ਚਸਞ੍ਞਿਨੋ ਹੋਨ੍ਤਿ. ਏਵਂ ਸੁਟ੍ਠੁ ਅਨਨ੍ਤਰਟ੍ਠੇਨ ਸਮਨਨ੍ਤਰੋ. ਅਨਨ੍ਤਰਟ੍ਠੇਨਾਤਿ ਚ ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਟ੍ਠੇਨਾਤਿ ਪੁਬ੍ਬੇ ਵੁਤ੍ਤਮੇਵ.

ਏਵਂ ਸਨ੍ਤੇ ਨਿਰੋਧਸਮਾਪਤ੍ਤਿਕਾਲੇ ਪੁਰਿਮਚਿਤ੍ਤਂ ਨਾਮ ਨੇਵ ਸਞ੍ਞਾਨਾਸਞ੍ਞਾਯਤਨਚਿਤ੍ਤਂ, ਪਚ੍ਛਿਮਚਿਤ੍ਤਂ ਨਾਮ ਅਰਿਯਫਲਚਿਤ੍ਤਂ, ਦ੍ਵਿਨ੍ਨਂ ਚਿਤ੍ਤਾਨਂ ਅਨ੍ਤਰੇ ਏਕਰਤ੍ਤਿਦਿਵਮ੍ਪਿ ਦ੍ਵੇਰਤ੍ਤਿਦਿਵਾਨਿਪਿ.ਲ. ਸਤ੍ਤਰਤ੍ਤਿਦਿਵਾਨਿਪਿ ਅਚਿਤ੍ਤਕੋ ਹੋਤਿ. ਅਸਞ੍ਞਸਤ੍ਤਭੂਮਿਯਂਪਿ ਪੁਰਿਮੇ ਕਾਮਭਵੇ ਚੁਤਿਚਿਤ੍ਤਂ ਪੁਰਿਮਚਿਤ੍ਤਂ ਨਾਮ. ਪਚ੍ਛਿਮੇ ਕਾਮਭਵੇ ਪਟਿਸਨ੍ਧਿਚਿਤ੍ਤਂ ਪਚ੍ਛਿਮਚਿਤ੍ਤਂ ਨਾਮ, ਦ੍ਵਿਨ੍ਨਂ ਚਿਤ੍ਤਾਨਂ ਅਨ੍ਤਰੇ ਅਸਞ੍ਞਸਤ੍ਤਭਵੇ ਪਞ੍ਚਕਪ੍ਪਸਤਾਨਿ ਪੁਗ੍ਗਲੋ ਅਚਿਤ੍ਤਕੋ ਤਿਟ੍ਠਤਿ. ਤਤ੍ਥ ਦ੍ਵੇ ਪੁਰਿਮਚਿਤ੍ਤਾਨਿ ਅਤ੍ਤਨੋ ਅਨਨ੍ਤਰੇ ਅਤ੍ਤਸਦਿਸਸ੍ਸ ਧਮ੍ਮਨ੍ਤਰਸ੍ਸ ਉਪ੍ਪਾਦਨਪਚ੍ਚਯਸਤ੍ਤਿਰਹਿਤਾਨਿ ਹੋਨ੍ਤੀਤਿ. ਨ ਹੋਨ੍ਤਿ. ਮਹਨ੍ਤੇਹਿ ਪਨ ਭਾਵਨਾਪਣਿਧਿਬਲੇਹਿ ਪਟਿਬਾਹਿਤਤ੍ਤਾ ਪੁਰਿਮਚਿਤ੍ਤਾਨਿ ਚ ਨਿਰੁਜ੍ਝਮਾਨਾਨਿ ਅਨਨ੍ਤਰੇ ਧਮ੍ਮਨ੍ਤਰਸ੍ਸ ਉਪ੍ਪਾਦਨ ਸਤ੍ਤਿਸਹਿਤਾਨਿ ਏਵ ਨਿਰੁਜ੍ਝਨ੍ਤਿ. ਪਚ੍ਛਿਮਚਿਤ੍ਤਾਨਿ ਚ ਉਪ੍ਪਜ੍ਜਮਾਨਾਨਿ ਤਸ੍ਮਿਂ ਖਣੇ ਏਕਾਬਦ੍ਧਭਾਵੇਨ ਅਨੁਪ੍ਪਜ੍ਜਿਤ੍ਵਾ ਚਿਰਕਾਲੇ ਏਵ ਉਪ੍ਪਜ੍ਜਨ੍ਤਿ. ਨ ਚ ਏਤ੍ਤਕਮਤ੍ਤੇਨ ਪੁਰਿਮਚਿਤ੍ਤਾਨਂ ਅਨਨ੍ਤਰੇ ਧਮ੍ਮਨ੍ਤਰਸ੍ਸ ਉਪ੍ਪਾਦਨ ਸਤ੍ਤਿਨਾਮ ਨਤ੍ਥੀਤਿ ਚ, ਤੇ ਅਨਨ੍ਤਰਪਚ੍ਚਯਧਮ੍ਮਾ ਨਾਮ ਨ ਹੋਨ੍ਤੀਤਿ ਚ ਸਕ੍ਕਾ ਵਤ੍ਤੁਂ. ਯਥਾ ਤਂ ਰਞ੍ਞੋ ਯੋਧਾ ਨਾਮ ਅਤ੍ਥਿ, ਕਦਾਚਿ ਰਾਜਾ ਕਾਲਂ ਞਤ੍ਵਾ ਤੁਮ੍ਹੇ ਇਦਾਨਿ ਮਾਯੁਜ੍ਝਥ, ਯੁਦ੍ਧਕਾਲੋ ਨ ਹੋਤਿ, ਅਸੁਕਸ੍ਮਿਂ ਕਾਲੇ ਏਵ ਯੁਜ੍ਝਥਾਤਿ ਵਦੇਯ੍ਯ. ਤੇ ਚ ਤਦਾ ਅਯੁਜ੍ਝਮਾਨਾ ਵਿਚਰੇਯ੍ਯੁਂ. ਏਵਂ ਸਨ੍ਤੇਪਿ ਤੇਸਂ ਯੁਜ੍ਝਨਸਤ੍ਤਿ ਨਾਮ ਨਤ੍ਥੀਤਿ ਚ, ਤੇ ਯੋਧਾ ਨਾਮ ਨ ਹੋਨ੍ਤੀਤਿ ਚ ਨ ਸਕ੍ਕਾ ਵਤ੍ਤੁਨ੍ਤਿ.

ਏਤ੍ਥ ਵਦੇਯ੍ਯੁਂ, ਇਮਸ੍ਮਿਂ ਪਚ੍ਚਯੇ ਤੇ ਪਨ ਅਰੂਪਧਮ੍ਮਭਾਵੇਨ ਅਸਣ੍ਠਾਨ ਜਾਤਿਕਤ੍ਤਾ ਮਜ੍ਝੇਪਰਿਚ੍ਛੇਦਧਮ੍ਮਸ੍ਸ ਨਾਮ ਕਸ੍ਸਚਿ ਅਭਾਵਤੋ ਸਬ੍ਬਸੋ ਅਨ੍ਤਰਰਹਿਤਾ ਏਵ ਹੋਨ੍ਤੀਤਿ ਵੁਤ੍ਤਂ. ਏਵਂ ਸਨ੍ਤੇ ਪੁਬ੍ਬੇ ਆਰਮ੍ਮਣ ਪਚ੍ਚਯੇ ਭੇਰਿਸਦ੍ਦਵੀਣਾਸਦ੍ਦੋਪਮਾਹਿ ਯੋ ਚਿਤ੍ਤਾਨਂ ਖਣੇ ਖਣੇ ਉਪ੍ਪਾਦੋ ਚ ਨਿਰੋਧੋ ਚ ਵੁਤ੍ਤੋ, ਸੋ ਅਮ੍ਹੇਹਿ ਕਥਂ ਪਚ੍ਚੇਤਬ੍ਬੋਤਿ. ਅਞ੍ਞਮਞ੍ਞਵਿਰੁਦ੍ਧਾਨਂ ਨਾਨਾਚਿਤ੍ਤਾਨਂ ਖਣਮਤ੍ਤੇਪਿ ਪੁਬ੍ਬਾਪਰ ਪਰਿਵਤ੍ਤਨਸ੍ਸ ਲੋਕੇ ਪਞ੍ਞਾਯਨਤੋ. ਅਯਮਤ੍ਥੋ ਪੁਬ੍ਬੇ ਚਿਤ੍ਤ ਯਮਕਦੀਪਨਿਯਂ ਵਿਤ੍ਥਾਰਤੋ ਵੁਤ੍ਤੋਯੇਵਾਤਿ. ਸਮਨਨ੍ਤਰਪਚ੍ਚਯ ਦੀਪਨਾ ਨਿਟ੍ਠਿਤਾ.