ਰੂਪ ਸਙ੍ਗਹ ਪਰਮਤ੍ਥਦੀਪਨੀ

੧੫੬. ਏਵਂ ਚਿਤ੍ਤਚੇਤਸਿਕੇ ਦ੍ਵੀਹਿ ਪਭੇਦਪ੍ਪਵਤ੍ਤੀਹਿ ਦਸ੍ਸੇਤ੍ਵਾ ਇਦਾਨਿ ਯਥਾਨੁਪ੍ਪਤ੍ਤਂ ਰੂਪਂ ਦਸ੍ਸੇਨ੍ਤੋ ਆਦਿਗਾਥ ਮਾਹ. ਤਤ੍ਥ ਏਤਂ ਪਰਿਮਾਣਂ ਅਸ੍ਸਾਤਿ ਏਤ੍ਤਾਵਂ. ਤੇਨ ਏਤ੍ਤਵਤਾ. ਨਿਪਾਤਪਦਂਵਾ ਏਤਂ. ਹਿ ਸਦ੍ਦੋ ਪਦਪੂਰਣੇ. ਪਭੇਦੋਚ ਪਵਤ੍ਤਿਚ ਪਭੇਦਪ੍ਪਵਤ੍ਤਿਯੋ. ਤਾਹਿ ਸਹ ਯੇ ਵਤ੍ਤਨ੍ਤਿ ਤੇ ਸਪ੍ਪਭੇਦਪ੍ਪਵਤ੍ਤਿਕਾ. ਏਤ੍ਤਾਵਤਾ ਸਪ੍ਪਭੇਦਪ੍ਪਵਤ੍ਤਿਕਾ ਚਿਤ੍ਤਚੇਤਸਿਕਾ ਧਮ੍ਮਾ ਮਯਾ ਵਿਭਤ੍ਤਾ. ਇਦਾਨਿ ਰੂਪਂ ਪਵੁਚ੍ਚਤੀਤਿ ਯੋਜਨਾ. ਸਙ੍ਖੇਪਤੋ ਉਦ੍ਦਿਸਨਂ ਕਥਨਂ ਸਮੁਦ੍ਦੇਸੋ. ਸਮੁਦ੍ਦਿਟ੍ਠਸ੍ਸ ਰੂਪਸ੍ਸ ਪੁਨ ਵਿਭਜਨਂ ਵਿਭਾਗੋ. ਸਮੁਟ੍ਠਾਤਿ ਰੂਪਂ ਏਤੇਨਾਤਿ ਸਮੁਟ੍ਠਾਨਂ. ਕਮ੍ਮਾਦਿ. ਕਲਾ ਵੁਚ੍ਚਨ੍ਤਿ ਅਵਯਵਾ. ਤਾ ਅਪ੍ਪੇਨ੍ਤਿ ਪਵਿਸਨ੍ਤਿ ਏਤ੍ਥਾਤਿ ਕਲਾਪੋ. ਪਿਣ੍ਡੀਤਿ ਅਤ੍ਥੋ. ਪਵਤ੍ਤਿਕ੍ਕਮਤੋਤਿ ਉਪ੍ਪਤ੍ਤਿਕ੍ਕਮਤੋ. ਸਲਕ੍ਖਣਤੋ ਸਸਮ੍ਭਾਰਤੋਚ ਮਹਨ੍ਤਾਨਿ ਹੁਤ੍ਵਾ ਭਵਨ੍ਤਿ ਪਾਤੁਭਵਨ੍ਤੀਤਿ ਮਹਾਭੂਤਾਨਿ. ਤਾਨਿ ਹਿ ਅਤ੍ਤਨੋ ਸਭਾਵਤੋਪਿ ਮਹਨ੍ਤਾਨਿਏਵ ਹੁਤ੍ਵਾ ਪਾਤੁਭਵਨ੍ਤਿ ਉਪਾਦਾਰੂਪਾਨਿ ਉਪਾਦਾਯਾਤਿ.

[੧੭੫] ਵਿਭਾਵਨਿਯਂ ਪਨ ਮਹਾਟੀਕਾਯਞ੍ਚ

‘‘ਸਸਮ੍ਭਾਰਧਾਤੁਵਸੇਨਾਤਿ’’ ਵੁਤ੍ਤਂ. ਤਂ ਅਨੁਪਪਨ੍ਨਂ.

ਨ ਹਿ ਸਸਮ੍ਭਾਰਵਤ੍ਥੁਵਸੇਨੇਵ ਤੇਸਂ ਅਯਂ ਵੋਹਾਰੋ ਪਵਤ੍ਤੋਤਿ ਸਕ੍ਕਾ ਵਤ੍ਤੁਂ. ਨਚ ਸਲਕ੍ਖਣਤੋ ਮਹਤ੍ਤੇਨ ਵਿਨਾ ਤੇਸਂ ਸਸਮ੍ਭਾਰਤੋ ਮਹਤ੍ਤਂਨਾਮ ਸਮ੍ਭਵਤੀਤਿ. ਤਸ੍ਮਾ ਯਂ ਤੇਸਂ ਇਨ੍ਦ੍ਰਿਯਾਨਿਨ੍ਦ੍ਰਿਯਬਦ੍ਧਸਨ੍ਤਾਨੇਸੁ ਪਥਵਿਪਬ੍ਬਤਾਦਿਵਸੇਨ ਸਮੁਦ੍ਦੇ ਮਚ੍ਛਕਚ੍ਛਪਾਦਿਵਸੇਨ ਸਸਮ੍ਭਾਰਤੋ ਮਹਤ੍ਤਂ. ਤਂਪਿ ਸਲਕ੍ਖਣਮਹਤ੍ਤਮੂਲਕਮੇਵਾਤਿ ਦਟ੍ਠਬ੍ਬਂ. ਮਹਾਭੂਤਾਤਿਵਾ ਲੋਕੇ ਵਿਸਂਵਾਦ ਕਟ੍ਠੇਨ ਮਾਯਾਕਾਰਾਵਾ ਆਵਿਸਨਗਹਣੇਸੁ ਅਚਿਨ੍ਤੇਯ੍ਯਟ੍ਠਾਨਟ੍ਠੇਨ ਯਕ੍ਖਾਦਯੋਵਾ ਵਞ੍ਚਕਟ੍ਠੇਨ ਯਕ੍ਖਿਨਿਯੋਵਾ ਵੁਚ੍ਚਨ੍ਤਿ. ਤੇਨੇਵਟ੍ਠੇਨ ਤੇਹਿ ਸਦਿਸਤ੍ਤਾ ਇਮਾਨਿਪਿ ਮਹਾਭੂਤਾਵਿਯਾਤਿ ਮਹਾਭੂਤਾਨਿ. ਉਭਯਤ੍ਥਪਿਚ ਮਹਨ੍ਤਾਨਿ ਅਭੂਤਾਨਿ ਅਬ੍ਭੁਤਾਨਿਵਾ ਏਤੇਸੂਤਿ ਨਿਬ੍ਬਚਨਂ ਯੁਜ੍ਜਤਿਯੇਵ.

[੧੭੬] ਵਿਭਾਵਨਿਯਂ ਪਨ

ਯਕ੍ਖਿਨਿਂ ਵਿਸੁਂ ਉਪਮਾਮਤ੍ਤਂ ਕਤ੍ਵਾ ‘‘ਮਨਾਪਵਣ੍ਣਸਣ੍ਠਾਨਾ ਦੀਹਿਵਾ ਸਤ੍ਤਾਨਂ ਵਞ੍ਚਿਕਾ ਯਕ੍ਖਿਨੀਆਦਯੋ ਵਿਯ ਮਨਾਪ ਇਤ੍ਥਿਪੁਰਿਸਰੂਪਦਸ੍ਸਨਾਦਿਨਾ ਸਤ੍ਤਾਨਂ ਵਞ੍ਚਕਤ੍ਤਾ ਮਹਨ੍ਤਾਨਿ ਅਭੂਤਾਨਿ ਏਤੇਸੂਤਿ ਮਹਾਭੂਤਾਤਿ’’ ਵੁਤ੍ਤਂ. ਤਂ ਅਟ੍ਠਕਥਾ ਯ ਨ ਸਮੇਤਿ.

ਅਟ੍ਠਕਥਾਯਞ੍ਹਿ ਮਹਾਭੂਤਸਾਮਞ੍ਞਤੋਤਿ ਪਦਸ੍ਸ ਵਿਤ੍ਥਾਰੇ ਏਵ ਮਾਯਾਕਾਰੋ ਯਕ੍ਖੋ ਯਕ੍ਖਿਨੀਤਿ ਤਯੋ ਮਹਾਭੂਤਾ ਵੁਤ੍ਤਾਤਿ. ਚਤੁਨ੍ਨਞ੍ਚਮਹਾਭੂਤਾਨਨ੍ਤਿ ਉਪਯੋਗਤ੍ਥੇ ਸਾਮਿਵਚਨਂ. ਉਪਾਦਾਯਾਤਿ ਦਲ਼੍ਹਂ ਨਿਸ੍ਸਾਯ. ਪਵਤ੍ਤਨ੍ਤਿ ਪਾਠਸੇਸੋ. ਉਪਾਦਾਯ ਰੂਪਨ੍ਤਿਵਾ ਸਮਾਸਪਦਂ ਦਟ੍ਠਬ੍ਬਂ.

[੧੭੭] ਵਿਭਾਵਨਿਯਂ ਪਨ

‘‘ਉਪਾਦਾਯ ਪਵਤ੍ਤਂ ਰੂਪਂ ਉਪਾਦਾਰੂਪਨ੍ਤਿ’’ ਵੁਤ੍ਤਂ. ਤਂ ਇਧ ਨ ਯੁਜ੍ਜਤਿ.

ਨ ਹਿ ਇਮਸ੍ਮਿਂ ਪਾਠੇ ਕਤ੍ਥਚਿ ਯਕਾਰਵਿਰਹੋ ਦਿਟ੍ਠੋ. ਤਥਾ ਹਿ ਮੂਲਟੀਕਾਯਂ ਉਪਾਦਾਯਤਿ ਨਿਸ੍ਸਯਤੀਤਿ ਉਪਾਦਾਯਂ. ਤਮੇਵ ਰੂਪਨ੍ਤਿਪਿ ਵੁਤ੍ਤਂ. ਪਥਯਤੀਤਿ ਪਥਵੀ. ਸਹਜਾਤਰੂਪਾਨਂ ਪਤਿਟ੍ਠਾਨ ਭਾਵੇਨ ਪਕ੍ਖਾਯਤਿ ਉਪਟ੍ਠਾਤੀਤਿ ਅਤ੍ਥੋ. ਪੁਥੁ ਮਹਨ੍ਤੀ ਹੁਤ੍ਵਾ ਜਾਯਤੀਤਿਪਿ ਪਥਵੀ. ਪਕਾਰੇਨ ਥਵੀਯਤਿ ਸਬ੍ਬੇਸਂ ਰੂਪਸਮ੍ਭਾਰਾਨਂ ਅਧਿਟ੍ਠਾਨਤ੍ਤਾ. ਅਯਂ ਤੇਸਂ ਅਧਿਟ੍ਠਾਨਾ ਪਤਿਟ੍ਠਾਨਾ ਵਤ੍ਥੁਭੂਤਾ ਭੂਮਿ ਭੂਤਾਤਿਆਦਿਨਾ ਨਾਨਾਪ੍ਪਕਾਰੇਨ ਗੁਣਪਦੇਨ ਅਭਿਤ੍ਥਵੀਯਤੀਤਿ ਪਥਵੀ. ਸਾਏਵ ਨਿਸਤ੍ਤਨਿਜੀਵਟ੍ਠੇਨ ਧਾਤੂਤਿ ਪਥਵੀਧਾਤੁ. ਆਪੇਤਿ ਸਹਜਾਤਰੂਪਾਨਿ ਬ੍ਯਾਪੇਤ੍ਵਾ ਤਿਟ੍ਠਤਿ, ਅਪ੍ਪਾਯਤਿ ਵਾ ਤਾਨਿ ਸੁਟ੍ਠੁ ਬ੍ਰੂਹੇਤਿ ਵਡ੍ਢੇਤੀਤਿ ਆਪੋ. ਤਾਨਿਵਾ ਅਵਿਪ੍ਪਕਿਣ੍ਣਾਨਿ ਕਤ੍ਵਾ ਭੁਸੋ ਪਾਤਿ ਰਕ੍ਖਤਿ, ਪਿਵਤਿਵਾ ਵਿਵਨ੍ਤੋ ਵਿਯ ਤਾਨਿ ਸਙ੍ਗਣ੍ਹਤਿ ਸਮ੍ਪਿਣ੍ਡੇਤੀਤਿ ਆਪੋ. ਸੋਯੇਵ ਧਾਤੂਤਿ ਆਪੋਧਾਤੁ. ਤੇ ਜਤਿ ਤਿਕ੍ਖਭਾਵੇਨ ਸਮੁਜ੍ਜਲਨ੍ਤੋ ਵਿਯ ਸਹਜਾਤਧਮ੍ਮਾਨਂ ਮਜ੍ਝੇ ਪਕਾਸਤਿ, ਤੇਜੇਤਿਵਾ ਨਿਸੇਤਿ ਸਹਜਾਤਧਮ੍ਮੇ ਤਿਕ੍ਖਥਾਮ ਬਲੇ ਕਰੋਤਿ, ਪਰਿਪਾਚੇਤਿਵਾ ਉਸ੍ਮਾਪੇਤੀਤਿ ਤੇਜੋ, ਸੋ ਏਵ ਧਾਤੂਤਿ ਤੇਜੋਧਾਤੁ. ਵਾਯਤਿ ਸਮੀਰੇਤਿ ਦੇਸਨ੍ਤਰੁਪ੍ਪਤ੍ਤਿ ਹੇਤੁਭਾਵੇਨ ਭੂਤਸਙ੍ਘਾਟਂ ਦੇਸਨ੍ਤਰਂ ਗਮੇਤੀਤਿ ਵਾਯੋ. ਵਾਯਤਿ ਵਾ ਸਹਜਾਤਧਮ੍ਮੇ ਅਪਤਮਾਨੇ ਕਤ੍ਵਾ ਵਹਤੀਤਿ ਵਾਯੋ. ਸੋਏਵ ਧਾਤੂਤਿ ਵਾਯੋਧਾਤੁ. ਤਤ੍ਥ ਕਕ੍ਖਲ਼ਲਕ੍ਖਣਾ ਪਥਵੀ. ਆਬਨ੍ਧਨਲਕ੍ਖਣੋ ਆਪੋ. ਉਣ੍ਹਤ੍ਤਲਕ੍ਖਣੋ ਤੇਜੋ. ਵਿਤ੍ਥਮ੍ਭਨਲਕ੍ਖਣੋ ਵਾਯੋ. ਏਤ੍ਥ ਸਿਯਾ, ਕਸ੍ਮਾ ਪਥਵੀ ਕਕ੍ਖਲ਼ਲਕ੍ਖਣਾਤਿ ਵੁਤ੍ਤਾ. ਨਨੁ ਸਾ ਮੁਦੁਭੂਤਾਪਿ ਹੋਤੀਤਿ. ਸਚ੍ਚਂ, ਮੁਦੁਭੂਤਾਪਿ ਪਨ ਸਾ ਸੇਸਭੂਤਤ੍ਤਯਂ ਉਪਾਦਾਯ ਕਕ੍ਖਲ਼ਾ ਤ੍ਵੇਵ ਸਙ੍ਖ੍ਯਂ ਗਚ੍ਛਤਿ. ਅਞ੍ਞਮਞ੍ਞਂ ਉਪਾਦਾਯੇਵ ਪਨ ਅਯਂਮੁਦੁ ਅਯਂ ਕਕ੍ਖਲ਼ਾਤਿ ਭਵਤਿ. ਤੇਨੇਵ ਮੁਦੁਕਕ੍ਖਲ਼ਾਨਂ ਦੀਘਰਸ੍ਸਾਨਂ ਵਿਯ ਅਨਵਟ੍ਠਾਨਤਾ ਹੋਤਿ. ਮੁਦੁਭੂਤਾਪਿ ਹਿ ਤਤੋ ਮੁਦੁਤਰਂ ਪਤ੍ਵਾ ਕਕ੍ਖਲ਼ਾਨਾਮ ਜਾਤਾ. ਕਕ੍ਖਲ਼ਾਪਿ ਕਕ੍ਖਲ਼ਤਰਂ ਪਤ੍ਵਾ ਮੁਦੁਭੂਤਾਨਾਮ ਜਾਤਾਤਿ. ਆਬਨ੍ਧਨਲਕ੍ਖਣੋ ਆਪੋਤਿ ਵੁਤ੍ਤੋ. ਸੋਚ ਪਕਤਿਉਦਕੇ ਅਧਿਮਤ੍ਤੋਤਿ ਪਕਤਿਉਦਕਂ ਬਦ੍ਧਂ ਘਨੀਭੂਤਮੇਵ ਸਿਯਾਤਿ ਚੇ. ਨ. ਆਬਨ੍ਧਿਤਬ੍ਬਾਯ ਪਥਵਿਯਾ ਤਤ੍ਥ ਪਰਿਦੁਬ੍ਬਲਤ੍ਤਾਤਿ, ਯਤ੍ਥ ਪਨ ਪਥਵੀ ਬਲਵਤੀ ਹੋਤਿ ਤਤ੍ਥੇਵ ਸੋ ਬਦ੍ਧਤਰਂ ਆਬਨ੍ਧਤੀਤਿ. ਉਣ੍ਹਤ੍ਤ ਲਕ੍ਖਣੋ ਤੇਜੋਤਿ ਵੁਤ੍ਤੋ. ਏਵਞ੍ਚਸਤਿ ਸੀਤਭਾਵੋ ਤੇਜੋਯੇਵ ਨ ਸਿਯਾਤਿ ਚੇ. ਨ. ਉਸਤਿ ਦਹਤਿ ਪਰਿਪਾਚੇਤਿ ਪਰਿਣ ਤਭਾਵਂ ਗਮੇਤੀਤਿ ਉਣ੍ਹੋਨਾਮ. ਸੀਤਭਾਵੋਚ ਦਹਤਿ ਪਰਿਪਾਚੇਤਿ ਤਬ੍ਭਾਵਂ ਗਮੇਤਿਯੇਵਾਤਿ. ਵੁਤ੍ਤਞ੍ਚ ਮੂਲਟੀਕਾਯਂ ਤੇਜੋਏਵ ਹਿ ਸੀਤਂ. ਹਿਮਪਾਤਸਮਯਾਦੀਸੁ ਸੀਤਸ੍ਸ ਪਰਿਪਾਚਕਤਾਦਸ੍ਸਨ ਤੋਤਿ. ਵਿਤ੍ਥਮ੍ਭਨ ਲਕ੍ਖਣੋ ਵਾਯੋਤਿ ਵੁਤ੍ਤੋ. ਸੋ ਪਨ ਘਨ ਥਦ੍ਧੇਸੁ ਸਿਲਾਥਮ੍ਭਾਦੀਸੁ ਨਲਬ੍ਭਤੀਤਿ ਚੇ. ਨ. ਤਤ੍ਥ ਹਿ ਪਥਵੀ ਅਤ੍ਤਨਾ ਸਹਜਾਤਵਾਯੁਵਿਤ੍ਥਮ੍ਭਨਂ ਲਭਿਤ੍ਵਾ ਥਾਮਪ੍ਪਤ੍ਤਾ ਥਿਰਤਰਪ੍ਪਤ੍ਤਾਚ ਹੁਤ੍ਵਾ ਵਹਤੀਤਿ. ਚਕ੍ਖਤੀਤਿ ਚਕ੍ਖੁ. ਸਮਵਿਸਮਂ ਆਚਿਕ੍ਖਤਿ ਸਮਵਿਸਮਜਾਨਨਸ੍ਸ ਤਮ੍ਮੂਲਕਤ੍ਤਾ. ਰੂਪਂਵਾ ਅਸ੍ਸਾਦੇਤਿ ਆਪਾਤਂ ਆਗਤਾਗਤਸ੍ਸ ਰੂਪਸ੍ਸ ਅਨਿਰਾਕਰਣਤੋ. ਤਂਵਾ ਵਿਭਾਵੇਤੀਤਿ ਅਤ੍ਥੋ. ਸੁਣਾਤੀਤਿ ਸੋਤਂ. ਸੁਣਨ੍ਤਿ ਸੁਯ੍ਯਨ੍ਤਿਵਾ ਏਤੇ ਨਾਤਿ ਸੋਤਂ. ਘਾਯਤੀਤਿ ਘਾਨਂ. ਘਾਯਨ੍ਤਿ ਘਾਯਿਯਨ੍ਤਿਵਾ ਏਤੇਨਾਤਿ ਘਾਨਂ. ਜੀਵਿਤਨਿਮਿਤ੍ਤਂ ਰਸੋ ਜੀਵਿਤਨ੍ਤਿ ਵੁਚ੍ਚਤਿ. ਤਸ੍ਮਿਂ ਨਿਨ੍ਨਤਾਯ ਤਂ ਅਵ੍ਹਾਯਤੀਤਿ ਜਿਵ੍ਹਾ. ਅਥਵਾ. ਜੀਵਿਤਂ ਵਹਤਿ ਏਤਾਯਵਾ ਤਂ ਵਹਨ੍ਤਿ ਪਵਤ੍ਤੇਨ੍ਤਿ ਜੀਵਿਤਵੁਤ੍ਤਿਸਮ੍ਪਾਦਨਤ੍ਤਾਤਿ ਜਿਵ੍ਹਾ. ਜੀਤਿਵਾ ਜਯੋ ਪਰਾਜਯੋਵਾ ਵੁਚ੍ਚਤਿ. ਤਦੁਭਯਂ ਵਹਤਿ ਵਹਨ੍ਤਿਵਾ ਏਤਾਯਾਤਿ ਜਿਵ੍ਹਾ. ਸਸਮ੍ਭਾਰਜਿਵ੍ਹਾ. ਯਥਾਹ –

ਪੁਰਿਸਸ੍ਸ ਹਿ ਜਾਤਸ੍ਸ, ਕੁਦਾਰੀ ਜਾਯਤੇ ਮੁਖੇ;

ਯਾਯ ਛਿਨ੍ਦਤਿ ਅਤ੍ਤਾਨਂ, ਨਰੋ ਦੁਬ੍ਭਾਸਿਤਂ ਭਣਨ੍ਤਿ.

ਇਧ ਪਨ ਤਂ ਸਹਚਰਿਤਤ੍ਤਾ ਜਿਵ੍ਹਾਤਿ ਪਸਾਦਰੂਪਮੋ ਵੁਚ੍ਚਤਿ. ਕੁਚ੍ਛਿਤਾਨਂ ਕੇਸਾਦੀਨਂ ਪਾਪਧਮ੍ਮਾਨਞ੍ਚ ਆਯੋ ਉਪ੍ਪਤ੍ਤਿਟ੍ਠਾਨਨ੍ਤਿ ਕਾਯੋ. ਸਸਮ੍ਭਾਰਕਾਯੋ. ਇਧ ਪਨ ਤਂ ਸਹਚਰਿਤੋ ਪਸਾਦ ਕਾਯੋਏਵ ਅਧਿਪ੍ਪੇਤੋ. ਪਸੀਦਨ੍ਤੀਤਿ ਪਸਾਦਾ. ਪਸੀਦਨ੍ਤਿ ਵਾ ਏਤ੍ਥ ਚਨ੍ਦਮਣ੍ਡਲਾਦੀਨਿ ਆਰਮ੍ਮਣਨਿਮਿਤ੍ਤਾਨਿ ਤਤ੍ਥ ਸਂਸੀਦਮਾਨਾਨਿ ਵਿਯ ਸਰੂਪਤੋ ਸਨ੍ਦਿਸ੍ਸਨ੍ਤੀਤਿ ਪਸਾਦਾ, ਸੁਪਰਿਸੁਦ੍ਧਆਦਾਸਮਣ੍ਡਸਦਿਸਾ ਕਮ੍ਮਜਮਣ੍ਡਾ. ਇਮੇ ਪਨ ਪਞ੍ਚ ਦਟ੍ਠੁਕਾਮਤਾਦਿ ਨਿਦਾਨ ਕਮ੍ਮਸਮੁਟ੍ਠਾਨ ਭੂਤਪਸਾਦ ਲਕ੍ਖਣਾ ਰੂਪਾਦਿ ਅਭਿਘਾਤਾਰਹ ਭੂਤਪਸਾਦਲਕ੍ਖਣਾ ਵਾ ਚਕ੍ਖੁਪਸਾਦਾਦਯੋ ਦਟ੍ਠਬ੍ਬਾ. ਤਤ੍ਥ ਚਕ੍ਖੁ ਤਾਵ ਸੇਤਮਣ੍ਡਲ ਪਰਿਕ੍ਖਿਤ੍ਤਸ੍ਸ ਕਣ੍ਹਮਣ੍ਡਲਸ੍ਸ ਮਜ੍ਝੇ ਊਕਾਸਿਰਪਮਾਣੇ ਅਤਿਮੁਖੇ ਠਿਤਾਨਂ ਸਰੀਰਸਣ੍ਠਾਨੁਪ੍ਪਤ੍ਤਿ ਪਦੇਸਭੂਤੇ ਦਿਟ੍ਠਮਣ੍ਡਲੇ ਤੇਲਮਿਵ ਸਤ੍ਤਪਿਚੁਪਟਲਾਨਿ ਸਤ੍ਤਅਕ੍ਖਿਪਟਲਾਨਿ ਬ੍ਯਾਪੇਤ੍ਵਾ ਤਿਟ੍ਠਤਿ. ਸੋਤਂ ਸੋਤਬਿਲਬ੍ਭਨ੍ਤਰੇ ਅਙ੍ਗੁਲਿਵੇਠਨਾਕਾਰਂ ਉਪਚਿਤਤਨੁਤਮ੍ਬਲੋਮਂ ਪਦੇਸਂ ਬ੍ਯਾਪੇਤ੍ਵਾ ਤਿਟ੍ਠਤਿ. ਘਾਨਂ ਨਾਸਿਕਬ੍ਭਨ੍ਤਰੇ ਅਜਪਦਸਣ੍ਠਾਨਂ ਪਦੇਸਂ ਬ੍ਯਾਪੇਤ੍ਵਾ ਤਿਟ੍ਠਤਿ. ਜਿਵ੍ਹਾ ਸਸਮ੍ਭਾਰ ਜਿਵ੍ਹਾਮਜ੍ਝੇ ਉਪ੍ਪਲ ਦਲਗ੍ਗ ਸਣ੍ਠਾਨਂ ਪਦੇਸਂ ਬ੍ਯਾਪੇਤ੍ਵਾ ਤਿਟ੍ਠਤਿ. ਕਾਯੋ ਪਨ ਮਹਨ੍ਤਿ ਯਾ ਕਪ੍ਪਾਸ ਪਟਲਵਟ੍ਟਿਯਂ ਆਸਿਤ੍ਤਤੇਲਂਵਿਯ ਥਪੇਤ੍ਵਾ ਪਾਚਕ ਤੇਜਸ੍ਸ ਪਤਿਟ੍ਠਾਨਟ੍ਠਾਨਂ ਕੇਸਗ੍ਗ ਲੋਮਗ੍ਗ ਨਖਗ੍ਗ ਸੁਕ੍ਖਚਮ੍ਮਾਨਿਚ ਅਵਸੇਸਂ ਸਕਲਸਰੀਰਂ ਬ੍ਯਾਪੇਤ੍ਵਾ ਤਿਟ੍ਠਤੀਤਿ. ਤੇ ਪਨ ਪਞ੍ਚ ਯਥਾਰਹਂ ਪਞ੍ਚਦ੍ਵਾਰਿਕਚਿਤ੍ਤਾਨਂ ਵਤ੍ਥੁਦ੍ਵਾਰਭਾਵਂ ਸਾਧੇਨ੍ਤਿ. ਤੇਸੁਚ ਏਕੇਕਸ੍ਸ ਚਤਸ੍ਸੋ ਚਤਸ੍ਸੋ ਧਾਤੁਯੋ ਸਨ੍ਧਾਰਣਆਬਨ੍ਧਨ ਪਰਿਪਾਚਨ ਸਮੁਦੀਰਣ ਕਿਚ੍ਚੇਹਿ ਉਪਕਾਰਂ ਕਰੋਨ੍ਤਿ. ਯਥਾਖਤ੍ਤਿ ਯਕੁਮਾਰਸ੍ਸ ਚਤਸ੍ਸੋ ਧਾਤਿਯੋ ਧਾਰਣ ਨਹਾਪਨ ਮਣ੍ਡਨ ਬੀਜਨ ਕਿਚ੍ਚੇਹੀਤਿ. ਉਤੁਚਿਤ੍ਤਾਹਾਰਾਚ ਨਂ ਉਪਤ੍ਥਮ੍ਭੇਨ੍ਤਿ. ਯਥਾ ਤਂ ਖਤ੍ਤਿਯਕੁਮਾਰਂ ਪਿਤੁ ਜੇਟ੍ਠਭਾਤੁ ਜੇਟ੍ਠਭਗਿਨਿਯੋਵਿਯ. ਆਯੁਚ ਨਂ ਸੁਟ੍ਠੁ ਅਨੁਪਾਲੇਤਿ. ਯਥਾ ਤਂ ਖਤ੍ਤਿਯਕੁਮਾਰਂ ਦਿਸਾਪਾਮੋਕ੍ਖੋ ਰਾਜਸਮ੍ਮਤੋ ਮਹਾਭਿਸਕ੍ਕੋਵਿਯ. ਵਣ੍ਣਾਦਯੋਚ ਨਂ ਪਰਿਵਾਰੇਨ੍ਤਿ. ਯਥਾ ਤਂ ਖਤ੍ਤਿਯਕੁਮਾਰਂ ਸਹਜਾਤਾ ਅਮਚ੍ਚਪੁਤ੍ਤਾ ਵਿਯਾਤਿ. ਯਸ੍ਮਾ ਪਨ ਸਤ੍ਤਾਨਂ ਚਿਤ੍ਤਂ ਨਾਮ ਵਿਚਿਤ੍ਤਂ ਹੋਤਿ. ਚਿਤ੍ਤਵਿਚਿਤ੍ਤਤਾਯ ਸਞ੍ਞਾਵਿਚਿਤ੍ਤਾ. ਸਞ੍ਞਾਵਿਚਿਤ੍ਤਤਾਯ ਤਣ੍ਹਾਵਿਚਿਤ੍ਤਾ. ਤਣ੍ਹਾਵਿਚਿਤ੍ਤ ਤਾਯ ਕਮ੍ਮਾਨਿ ਵਿਚਿਤ੍ਤਾਨਿ. ਕਮ੍ਮਵਿਚਿਤ੍ਤਤਾਯ ਕਮ੍ਮਸਮੁਟ੍ਠਾਨਾਨਿ ਭੂਤਾਨਿ ਵਿਚਿਤ੍ਤਾਨਿ. ਭੂਤਵਿਚਿਤ੍ਤਤਾਯ ਇਮੇ ਪਸਾਦਾ ਵਿਚਿਤ੍ਤਾ. ਅਞ੍ਞਮਞ੍ਞਂ ਅਸਦਿਸਾ ਹੋਨ੍ਤਿ. ਤੇਹਿ ਪਸਾਦਮਣ੍ਡਭੂਤਾਪਿ ਸਮਾਨਾ ਕੇਚਿ ਰੂਪਸ੍ਸੇਵ ਅਭਿਘਾਤਾਰਹਾ ਹੋਨ੍ਤਿ, ਨ ਸਦ੍ਦਾਦੀਨਂ. ਕੇਚਿ ਸਦ੍ਦਾਦੀਨਂ ਏਵ, ਨ ਰੂਪਸ੍ਸਾਤਿ. ਤਸ੍ਮਾ ਤੇਸਂ ਅਞ੍ਞਮਞ੍ਞਞ੍ਚ ਅਞ੍ਞਰੂਪੇਹਿਚ ਲਕ੍ਖਣਤੋ ਅਸਂਮਿਸ੍ਸਤਾ ਵੇਦਿਤਬ੍ਬਾਤਿ.

ਰੂਪਯਤੀਤਿ ਰੂਪਂ. ਵਣ੍ਣਵਿਸੇਸਂ ਆਪਜ੍ਜਿਤ੍ਵਾ ਹਦਯਙ੍ਗਤਭਾਵਂ ਪਕਾਸੇਤਿ. ਪਕਤਿਯਾਪਿ ਵਾ ਯਂਕਿਞ੍ਚਿਦਬ੍ਬਂ ਸਮਵਿਸਮਂਵਾ ਪਕਾਸੇ ਤੀਤਿ ਅਤ੍ਥੋ. ਸਪ੍ਪਤਿ ਸੋਤਵਿਞ੍ਞੇਯ੍ਯਭਾਵਂ ਗਚ੍ਛਤੀਤਿ ਸਦ੍ਦੋ. ਸਦ੍ਦਯਤੀਤਿ ਸਦ੍ਦੋ. ਤਂ ਤਂ ਅਤ੍ਥਂਵਾ ਅਤ੍ਤਨੋ ਵਤ੍ਥੁਂਵਾ ਆਚਿਕ੍ਖਤੀਤਿ ਅਤ੍ਥੋ. ਸਦਤਿਵਾ ਤਂ ਤਂ ਦਿਸਂਵਾ ਦੇਸਂਵਾ ਖਣੇਨ ਵਿਸ੍ਸਰਤਿ ਵਿਪ੍ਫਰਤੀਤਿ ਸਦ੍ਦੋ. ਗਨ੍ਧਯਤੀਤਿ ਗਨ੍ਧੋ. ਅਤ੍ਤਨੋ ਵਤ੍ਥੁਂਸੂਚੇਤੀਤਿ ਅਤ੍ਥੋ. ਗਚ੍ਛਤੀਤਿ ਗੋ. ਵਾਤੋ. ਤੇਨ ਧਾਰੀਯਤੀਤਿ ਗਨ੍ਧੋ. ਰਸੀਯਤਿ ਅਸ੍ਸਾਦੀਯਤੀਤਿ ਰਸੋ. ਰਸਨ੍ਤਿਵਾ ਤਂ ਅਸ੍ਸਾਦੇਨ੍ਤੀਤਿ ਰਸੋ. ਫੁਸੀਯਤੀਤਿ ਫੋਟ੍ਠਬ੍ਬਂ. ਫੁਸਨਞ੍ਚੇਤ੍ਥ ਪਸਾਦੇਨ ਸਹ ਘਟ੍ਟਨਂ ਕਲਾਪਨ੍ਤਰਭੂਤੇਹਿ ਸਦ੍ਧਿਂ ਪਟਿਹਨਨਞ੍ਚ ਵੇਦਿਤਬ੍ਬਂ. ਤਦੁਭਯਂਪਿ ਆਪੋ ਧਾਤੁਯਾ ਨਤ੍ਥੀਤਿ ਵੁਤ੍ਤਂ ਆਪੋਧਾਤੁਵਿਵਜ੍ਜਿਤਨ੍ਤਿ. ਕਸ੍ਮਾ ਪਨ ਤਂ ਤਸ੍ਸਾ ਨਤ੍ਥਿ. ਨਨੁ ਸੀਤਤਾਵਾ ਦ੍ਰਵਤਾਵਾ ਫੁਸਿਤ੍ਵਾ ਗਯ੍ਹਤੀਤਿ. ਵੁਚ੍ਚਤੇ, ਸੀਤਤਾ ਹਿ ਤੇਜੋਯੇਵ, ਨ ਆਪੋ. ਯਦਿ ਹਿ ਸਾ ਆਪੋਯੇਵ ਸਿਯਾ. ਪਕ੍ਕੁਮਿਤੇ ਸਨ੍ਤਤ੍ਤੇ ਲੋਹਰਸੇਪਿਸ੍ਸ ਸੀਤਤਾ ਲਬ੍ਭਮਾਨਾ ਸਿਯਾ. ਸੋ ਹਿ ਰਸੋ ਆਪਾਧਿਕੋ ਹੋਤੀਤਿ. ਏਵਂ ਪਨ ਨਲਬ੍ਭਤਿ. ਤਸ੍ਮਾ ਸਾ ਤੇਜੋਯੇਵ, ਨ ਆਪੋਤਿ. ਅਪਿਚ, ਸੀਤੁਣ੍ਹਾਨਂ ਏਕਸ੍ਮਿਂ ਕਲਾਪੇ ਸਹ ਅਪ੍ਪਵਤ੍ਤਨਤੋ ਓਰਪਾਰਾਨਂ ਵਿਯ ਤੇਸਂ ਅਨਵਟ੍ਠਾਨਤੋਚ ਵਿਞ੍ਞਾਯਤਿ. ਨ ਹਿ ਸੀਤਕਲਾਪੇ ਉਣ੍ਹਂ, ਉਣ੍ਹਕਲਾਪੇਵਾ ਸੀਤਂ ਸਹ ਪਵਤ੍ਤਤਿ. ਯਸ੍ਮਿਂਚ ਵਤ੍ਥੁਮ੍ਹਿ ਪੁਬ੍ਬੇ ਸੀਤਸਞ੍ਞਾ ਸਣ੍ਠਾਤਿ. ਪਚ੍ਛਾ ਤਤੋ ਸੀਤਤਰੇ ਆਗਤੇ ਤਸ੍ਮਿਂਯੇਵ ਪੁਨ ਉਣ੍ਹਸਞ੍ਞਾ ਸਣ੍ਠਾਤਿ. ਪੁਬ੍ਬੇ ਉਣ੍ਹਸਞ੍ਞਾਯਂਪਿ ਏਸੇਵ ਨਯੋ. ਤਥਾ ਉਣ੍ਹੇ ਮਨ੍ਦੇ ਸੀਤਸਞ੍ਞਾ ਸਣ੍ਠਾਤਿ. ਸੀਤੇ ਮਨ੍ਦੇ ਉਣ੍ਹਸਞ੍ਞਾਤਿ.

ਅਥ ਪਨ ਦ੍ਰਵਭਾਵਭੂਤੋ ਆਪੋ ਫੁਸਿਤ੍ਵਾ ਗਯ੍ਹਤਿ. ਅਯੋ ਪਿਣ੍ਡਾਦੀਸੁ ਆਬਨ੍ਧਨਭੂਤੋਪਿ ਫੁਸਿਤ੍ਵਾਵ ਗਯ੍ਹੇਯ੍ਯ. ਏਵਞ੍ਚ ਸਤਿ ਯਥਾ ਤੇਸੁ ਇਤਰਾਨਿ ਤੀਣਿ ਭੂਤਾਨਿ ਵਿਨਾ ਇਤਰੀਤਰੇਨ ਵਿਸੁਂ ਵਿਸੁਂ ਕਾਯਿਕ ਸੁਖਦੁਕ੍ਖਾਨਂ ਆਰਮ੍ਮਣਭੂਤਾਨਿ ਹੋਨ੍ਤਿ. ਤਥਾ ਸੋਪਿ ਵਿਨਾ ਇਤਰੇਹਿ ਵਿਸੁਂ ਕਾਯਿਕਸੁਖਦੁਕ੍ਖਾਨਂ ਆਰਮ੍ਮਣਭੂਤੋਏਵ ਸਿਯਾ. ਨ ਪਨ ਹੋਤਿ. ਯਞ੍ਹਿ ਤਾਨਿ ਅਯੋਪਿਣ੍ਡਾਦੀਨਿ ਫੁਸਨ੍ਤਾਨਂ ਕਾਯਿਕਂ ਸੁਖਂਵਾ ਦੁਕ੍ਖਂਵਾ ਉਪ੍ਪਜ੍ਜਤਿ, ਤਂ ਸਣ੍ਹਥਦ੍ਧਤਾ ਵਸੇਨਵਾ ਉਪ੍ਪਜ੍ਜਤਿ. ਸੀਤੁਣ੍ਹਤਾਵਸੇਨਵਾ ਅਬ੍ਭਨ੍ਤਰਥਮ੍ਭਨਸ੍ਸ ਮਨ੍ਦਗਾਲ਼੍ਹਤਾਵਸੇਨਵਾ. ਨੋ ਅਞ੍ਞਥਾਤਿ. ਤਸ੍ਮਾ ਪੁਰਿਮਭਾਗੇ ਤੀਣਿ ਭੂਤਾਨਿ ਫੁਸਿਤ੍ਵਾਵਾ ਵਣ੍ਣਂ ਦਿਸ੍ਵਾਵਾ ਪਚ੍ਛਾ ਭਾਗੇ ਸੁਦ੍ਧੇਨ ਮਨੋ ਵਿਞ੍ਞਾਣਸਨ੍ਤਾਨੇਨ ਦੀਘਰਸ੍ਸਾਦਿਸਣ੍ਠਾਨਂਵਾ ਰਤ੍ਤਿਯਂ ਅਲਾਤਚਕ੍ਕਂ ਵਾ ਤਂਤਂਛਿਦ੍ਦਵਿਵਰਂਵਾ ਜਾਨਨ੍ਤਾ ਵਿਯ ਪਥਮਂ ਦ੍ਰਵਤਾਸਹਿਤਾਨਿ ਵਿਲੀਨਾਨਿ ਮੁਦੂਨਿ ਤੀਣਿ ਭੂਤਾਨਿ ਪਥਵਿਂ ਏਵ ਵਾ ਫੁਸਿਤ੍ਵਾ ਪਚ੍ਛਾ ਸੁਦ੍ਧੇਨ ਮਨੋ ਵਿਞ੍ਞਾਣਸਨ੍ਤਾਨੇਨ ਵਿਸੁਂ ਦ੍ਰਵਭਾਵਂ ਅਦ੍ਦਤਿਨ੍ਤਭਾਵਂ ਜਾਨਨ੍ਤਿ. ਏਵਂ ਸਨ੍ਤੇਪਿ ਤਂ ਫੁਸਿਤ੍ਵਾ ਜਾਨਨ੍ਤਾ ਇਚ੍ਚੇਵ ਮਞ੍ਞਨ੍ਤਿ ਅਵਿਸੇਸਵਿਦੁਨੋਤਿ. ਗੁਨ੍ਨਂ ਅਭਿਣ੍ਹਂ ਚਰਣਟ੍ਠਾਨਂ ਗੋਚਰੋ. ਗੋਚਰਸਦਿਸਤ੍ਤਾ ਇਧ ਗੋਚਰੋ. ਗੋਤਿਵਾ ਇਧ ਚਕ੍ਖਾਦੀਨਿ ਇਨ੍ਦ੍ਰਿਯਾਨਿ ਵੁਚ੍ਚਨ੍ਤਿ. ਤਾਨਿ ਵਿਞ੍ਞਾਣਾਧਿਟ੍ਠਿਤਾਨਿ ਹੁਤ੍ਵਾ ਏਤੇਸੁ ਚਰਨ੍ਤਿ. ਏਤਾਨਿਵਾਤੇਸੁ ਚਰਨ੍ਤਿ ਪਵਤ੍ਤਨ੍ਤਿ ਘਟ੍ਟੇਨ੍ਤੀਤਿ ਗੋਚਰਾ. ਤੇਯੇਵ ਇਧ ਏਕਤ੍ਤਂ ਉਪਨੇਤ੍ਵਾ ਗੋਚਰਰੂਪਨ੍ਤਿ ਵੁਤ੍ਤਂ. ਇਮਾਨਿਪਨ ਪਞ੍ਚ ਯਥਾਕ੍ਕਮਂ ਚਕ੍ਖਾਦੀਸੁ ਪਟਿਹਨਨ ਲਕ੍ਖਣਾਨਿ ਰੂਪਾਦੀਨੀਤਿ ਵੇਦਿਤਬ੍ਬਾਨਿ.

ਇਤ੍ਥੀ ਵੁਚ੍ਚਤਿ ਅਵਿਸਦਾਕਾਰਸਣ੍ਠਿਤਂ ਖਨ੍ਧਪਞ੍ਚਕਂ. ਯਸ੍ਸ ਪਨ ਧਮ੍ਮਸ੍ਸ ਆਨੁਭਾਵੇਨ ਤਂ ਤਥਾ ਸਣ੍ਠਾਤਿ ਪਵਤ੍ਤਤਿ. ਸੋ ਇਤ੍ਥਿ ਯਾ ਭਾਵੋਤਿ ਇਤ੍ਥਤ੍ਤਂ. ਪੁਰਿਸੋ ਵੁਚ੍ਚਤਿ ਵਿਸਦਾਕਾਰਸਣ੍ਠਿਤਂ ਖਨ੍ਧਪਞ੍ਚਕਂ. ਸੇਸਂ ਵੁਤ੍ਤਨਯਮੇਵ. ਤਤ੍ਥ ਇਤ੍ਥਿਲਿਙ੍ਗ ਇਤ੍ਥਿਨਿਮਿਤ੍ਤ ਇਤ੍ਥਿ ਕੁਤ੍ਤ ਇਤ੍ਥਾਕਪ੍ਪਾਨਂ ਹੇਤੁਭਾਵ ਲਕ੍ਖਣਂ ਇਤ੍ਥਤ੍ਤਂ. ਪੁਰਿਸਲਿਙ੍ਗ ਪੁਰਿਸਨਿਮਿਤ੍ਤ ਪੁਰਿਸਕੁਤ੍ਤ ਪੁਰਿਸਾਕਪ੍ਪਾਨਂ ਹੇਤੁਭਾਵ ਲਕ੍ਖਣਂ ਪੁਰਿਸਤ੍ਤਂ. ਤਤ੍ਥ ਲਿਙ੍ਗਨ੍ਤਿ ਪਧਾਨਙ੍ਗਭੂਤਂ ਮਹਾਸਣ੍ਠਾਨਂ. ਨਿਮਿਤ੍ਤਨ੍ਤਿ ਪਚ੍ਚਙ੍ਗਭੂਤਂ ਖੁਦ੍ਦਕਸਣ੍ਠਾਨਂ. ਕੁਤ੍ਤਨ੍ਤਿ ਕੀਲ਼ਾਲਿਲਾਦਿ ਕ੍ਰਿਯਾਵਿਸੇਸੋ. ਆਕਪ੍ਪੋਤਿ ਗਮਨਾਦਿਕੋ ਆਕਾਰਵਿਕਾਰੋ. ਸਬ੍ਬੇਪੇਤੇ ਖਨ੍ਧਪਞ੍ਚਕਸ੍ਸ ਪਵਤ੍ਤਿਵਿਸੇਸਾਏਵ. ਯੇ ਸਦ੍ਦਸਤ੍ਥੇਸੁ ਲਿਙ੍ਗਨ੍ਤਿ ਵੁਚ੍ਚਨ੍ਤਿ. ਯੇਸਞ੍ਚ ਵਸੇਨ ਅਯਂ ਇਤ੍ਥੀਏਵ, ਨ ਪੁਰਿਸੋ. ਅਯਂ ਪੁਰਿਸੋਏਵ, ਨ ਇਤ੍ਥੀਤਿ ਸਞ੍ਜਾਨਨ੍ਤਿ. ਯਸ੍ਮਾ ਪਨੇਤ੍ਥ ਸਣ੍ਠਾਨਾਦੀਨਂ ਅਵਿਸਦਾਦਿਭਾਵੋਏਵ ਅਤ੍ਥਤੋ ਇਤ੍ਥਿਪੁਰਿਸਤਾ ਹੋਤਿ. ਤਦੁਭਯਮੁਤ੍ਤਭਾਵੋਚ ਨਪੁਂਸਕਤਾ. ਸੋਚ ਅਕ੍ਖਰਪਦ ਸਙ੍ਖਾਤੇਸੁ ਵਚਨੇਸੁ ਚ ਵਚਨਤ੍ਥੇਸੁਚ ਯਥਾਰਹਂ ਸਨ੍ਦਿਸ੍ਸਤਿਯੇਵ. ਤਸ੍ਮਾ ਇਨ੍ਦ੍ਰਿਯਰਹਿਤੇਸੁਪਿ ਪਦੇਸੁਚ ਰੁਕ੍ਖਾਦੀਸੁ ਪਦਤ੍ਥੇਸੁਚ ਪਰਿਯਾਯੇਨ ਇਤ੍ਥਿਪੁਮਨਪੁਂਸਕਤਾਸਿਦ੍ਧਿ ਵੇਦਿਤਬ੍ਬਾਤਿ.

[੧੭੮] ਯਂ ਪਨ ਵਿਭਾਵਨਿਯਂ

‘‘ਇਤ੍ਥੀਨਂ ਅਙ੍ਗਜਾਤਂ ਇਤ੍ਥਿਲਿਙ੍ਗ’’ਨ੍ਤਿ ਵੁਤ੍ਤਂ. ਤਂ ਨ ਸੁਨ੍ਦਰਂ.

ਨ ਹਿ ਕਤ੍ਥਚਿ ਪਾਲ਼ਿਯਂ ਅਟ੍ਠਕਥਾਸੁਚ ਨਿਮਿਤ੍ਤਸਦ੍ਦੋਵਿਯ ਲਿਙ੍ਗਸਦ੍ਦੋ ਅਙ੍ਗਜਾਤੇ ਪਾਕਟੋ ਦਿਟ੍ਠੋਤਿ.

[੧੭੯] ਯਞ੍ਚ ਤਤ੍ਥ

‘‘ਇਤ੍ਥਿਸਣ੍ਠਾਨਂ ਇਤ੍ਥਾਕਪ੍ਪੋ’’ਤਿ ਵੁਤ੍ਤਂ. ਤਂਪਿ ਨ ਸੁਨ੍ਦਰਂ.

ਨ ਹਿ ਲਿਙ੍ਗਸਦ੍ਦੋ ਵਿਯ ਆਕਪ੍ਪਸਦ੍ਦੋ ਸਣ੍ਠਾਨੇ ਪਾਕਟੋ ਦਿਟ੍ਠੋਤਿ. ਸੇਸਂਪਨ ਤਤ੍ਥ ਵੁਤ੍ਤਂ ਯਂਕਿਞ੍ਚਿ ਅਟ੍ਠਕਥਾਯ ਅਸਮੇਨ੍ਤਂਪਿ ਤੇਨ ਪਰਿਯਾਯੇਨ ਯੁਜ੍ਜਤਿਯੇਵ. ਭਵਨ੍ਤਿ ਪਵਤ੍ਤਨ੍ਤਿ ਤਂਸਹਿਤੇ ਖਨ੍ਧਸਨ੍ਤਾਨੇ ਏਸਾ ਇਤ੍ਥੀ, ਏਸੋ ਪੁਰਿਸੋਤਿ ਏਵਂ ਪਵਤ੍ਤਾ ਸਦ੍ਦ ਬੁਦ੍ਧਿਯੋ ਏਤੇਨਾਤਿ ਭਾਵੋ ਭਵਨ੍ਤਿਵਾ ਪਾਤੁਭਵਨ੍ਤਿ ਤਂਸਹਿਤੇ ਖਨ੍ਧਸਨ੍ਤਾਨੇ ਲਿਙ੍ਗਾਦੀਨਿ ਏਤਸ੍ਮਿਂ ਸਤੀਤਿ ਭਾਵੋ. ਸੋ ਏਵ ਰੂਪਨ੍ਤਿ ਭਾਵਰੂਪਂ. ਹਦਨ੍ਤਿ ਸਤ੍ਤਾ ਤਂਤਂਅਤ੍ਥਂਵਾ ਅਨਤ੍ਥਂਵਾ ਪੂਰੇਨ੍ਤਿ ਏਤੇਨਾਤਿ ਹਦਯਂ. ਹਦਨ੍ਤਿਵਾ ਸਤ੍ਤਾ ਇਤੋ ਨਾਨਾਵਿਕਕ੍ਕੇ ਓਸਜਨ੍ਤਿ ਮੁਞ੍ਚਨ੍ਤੀਤਿ ਹਦਯਂ. ਹਰਨ੍ਤਿਵਾ ਪਰਿਹਰਨ੍ਤਿ ਤਂ ਸਤ੍ਤਾ ਜੀਵਿਤਂਵਿਯ ਦਯਨ੍ਤਿ ਰਕ੍ਖਨ੍ਤਿਚਾਤਿ ਹਦਯਂ. ਵਸਨ੍ਤਿ ਨਿਵਸਨ੍ਤਿ ਚਿਤ੍ਤਚੇਤ ਸਿਕਾਧਮ੍ਮਾ ਏਤ੍ਥਾਤਿ ਵਤ੍ਥੁ. ਹਦਯਞ੍ਚ ਤਂ ਵਤ੍ਥੁਚਾਤਿ ਹਦਯਵਤ੍ਥੁ. ਧਾਤੁਦ੍ਵਯਨਿਸ੍ਸਯਲਕ੍ਖਣਂ ਵਤ੍ਥੁਰੂਪਂ. ਤਂ ਪਨ ਹਦਯਕੋਸਬ੍ਭਨ੍ਤਰੇ ਅਡ੍ਢਪਸਤਮਤ੍ਤਂ ਲੋਹਿਤਂ ਬ੍ਯਾਪੇਤ੍ਵਾ ਤਿਟ੍ਠਤੀਤਿ ਵੇਦਿਤਬ੍ਬਂ. ਧਮ੍ਮਸਙ੍ਗਣਿਯਂ ਪਨ ਦੇਸਨਾਭੇਦਰਕ੍ਖਨਤ੍ਥਂ ਅਵਤ੍ਵਾ ਪਟ੍ਠਾਨੇਏਵ ਤਂ ਵੁਤ੍ਤਂ. ਯਥਾਹ-ਵਤ੍ਥੁ ਕੁਸਲਾਨਂ ਖਨ੍ਧਾਨਂ ਨਿਸ੍ਸਯਪਚ੍ਚਯੇਨ ਪਚ੍ਚਯੋ. ਵਤ੍ਥੁ ਅਕੁਸਲਾਨਂ ਖਨ੍ਧਾਨਂ ਨਿਸ੍ਸਯਪਚ੍ਚਯੇਨ ਪਚ੍ਚਯੋਤਿਆਦਿ. ਏਤ੍ਥਚ ਛਹਿ ਵਤ੍ਥੂਹਿ ਅਞ੍ਞਂ ਵਤ੍ਥੁਨਾਮ ਨਤ੍ਥਿ. ਤੇਸੁਚ ਪੁਰਿਮਾਨਿ ਪਞ੍ਚ ਕੁਸਲਾਦੀਨਂ ਨਿਸ੍ਸਯਾਏਵ ਨ ਹੋਨ੍ਤਿ. ਤਸ੍ਮਾ ਤੇਸਂ ਨਿਸ੍ਸਯਭਾਵੇਨ ਤਤ੍ਥ ਵੁਤ੍ਤਂ ਵਤ੍ਥੁਨਾਮ ਵਿਸੁਂ ਏਕਂ ਵਤ੍ਥੁਰੂਪਮੇਵਾਤਿ ਸਿਦ੍ਧਨ੍ਤਿ.

[੧੮੦] ਵਿਭਾਵਨਿਯਂ ਪਨ

ਯਂ ਰੂਪਂ ਨਿਸ੍ਸਾਯਾਤਿ ਪਾਠਸ੍ਸ ਉਦ੍ਧਟਤ੍ਤਾ ਰੂਪਸਾਮਞ੍ਞਪਸਙ੍ਗੋ ਹੋਤੀਤਿ ਤਂ ਵਿਸੋਧੇਤੁਂ ਯੁਤ੍ਤਿਨਾਮ ਵੁਤ੍ਤਾ. ਪਟ੍ਠਾਨੇ ਪਨ ਬਹੂਸੁ ਅਨਞ੍ਞਸਾਧਾਰਣੇਸੁ ਠਾਨੇਸੁ ਵਤ੍ਥੁਨਾਮੇਨ ਵਿਸੇਸੇਤ੍ਵਾ ਵੁਤ੍ਤਤ੍ਤਾ ਸੋਪਸਙ੍ਗੋ ਨਤ੍ਥਿਯੇਵਾਤਿ ਦਟ੍ਠਬ੍ਬਂ.

ਜੀਵਨ੍ਤਿ ਸਹਜਾਤਧਮ੍ਮਾ ਯੇਨਾਤਿ ਜੀਵਿਤਂ. ਤੇਸਂ ਜੀਵਨੇ ਆਧਿਪਚ੍ਚਯੋਗੇਨ ਤੇਸੁ ਇਨ੍ਦਂ ਇਸ੍ਸਰਂ ਅਤ੍ਤਾਨਂ ਕਰੋਤੀਤਿ ਇਨ੍ਦ੍ਰਿਯਂ. ਜੀਵਿਤਞ੍ਚ ਤਂ ਇਨ੍ਦ੍ਰਿਯਞ੍ਚਾਤਿ ਜੀਵਿਤਿਨ੍ਦ੍ਰਿਯਂ. ਸਹਜਾਤਾ ਨੁਪਾਲਨ ਲਕ੍ਖਣਂ ਜੀਵਿਤਿਨ੍ਦ੍ਰਿਯਂ. ਯਥਾ ਹਿ ਬੀਜਨਿਬ੍ਬਤ੍ਤਾਨਿ ਉਪ੍ਪਲਾਦੀਨਿ ਬੀਜੇਵਿਨਟ੍ਠੇਪਿ ਉਦਕਾਨੁਪਾਲਿਤਾਨਿ ਚਿਰਂਪਿ ਕਾਲਂ ਜੀਵਨ੍ਤਿ. ਏਵਮੇਵਂ ਨਿਰੁਦ੍ਧ ਕਮ੍ਮਨਿਬ੍ਬਤ੍ਤਾਨਿ ਕਮ੍ਮਜਰੂਪਾਨਿ ਕਮ੍ਮੇ ਅਸਨ੍ਤੇਪਿ ਜੀਵਿਤਾਨੁਪਾਲਿਤਾਨਿ ਸਨ੍ਤਤਿਵਸੇਨ ਵਸ੍ਸਸਤਂਪਿ ਵਸ੍ਸਸਹਸ੍ਸਂਪਿ ਕਪ੍ਪਂਪਿ ਸੋਲ਼ਸਕਪ੍ਪਸਹਸ੍ਸਾਨਿਪਿ ਜੀਵਨ੍ਤਿਯੇਵ, ਤਥਾ ਹਿ ਜੀਵਿਤਰਹਿਤਾਨਿ ਇਤਰਰੂਪਾਨਿ ਜੀਵਨ੍ਤਾਨਿਨਾਮ ਨਹੋਨ੍ਤਿ. ਤਾਨਿ ਹਿ ਯੇਨ ਏਕੇਨ ਚਿਤ੍ਤੇਨਵਾ ਉਤੁਨਾਵਾ ਆਹਾਰੇਨਵਾ ਜਾਯਨ੍ਤਿ. ਤਸ੍ਮਿਂ ਨਿਰੁਦ੍ਧੇ ਨਿਰੁਜ੍ਝਨ੍ਤਿ, ਪਰਂ ਮੁਹੁਤ੍ਤਮਤ੍ਤਂਪਿ ਸਨ੍ਤਾਨਂ ਘਟੇਤੁਂ ਨਸਕ੍ਕੋਨ੍ਤਿ. ਤੇਸੁ ਹਿ ਚਿਤ੍ਤਜਰੂਪਾਨਂ ਸਨ੍ਤਤਿਪਚ੍ਚੁਪ੍ਪਨ੍ਨਂ ਏਕਵੀਥਿ ਏਕਜਵਨਵਾਰ ਏਕਸਮਾਪਤ੍ਤਿਵਾਰੇਨ ਪਰਿਚ੍ਛਿਨ੍ਨਂ ਹੋਤਿ. ਉਤੁਜਾਹਾਰਜਾਨਞ੍ਚ ਸਭਾਗੇਕ ਉਤੁਆਹਾਰ ਵਸੇਨ ਪਰਿਚ੍ਛਿਨ੍ਨਂ ਹੋਤਿ. ਕਮ੍ਮਜਰੂਪਾਨਂ ਪਨ ਵਿਸੁਂ ਸਨ੍ਤਤਿਪਚ੍ਚੁਪ੍ਪਨ੍ਨਂਨਾਮ ਨਤ੍ਥਿ. ਤੇਸਂ ਏਕਭਵਪਰਿਚ੍ਛਿਨ੍ਨਂ ਅਦ੍ਧਾਪਚ੍ਚੁਪ੍ਪਨ੍ਨਮੇਵ ਹੋਤੀਤਿ. ਯਦਿ ਏਵਂ ਅਰੂਪਧਮ੍ਮਾਨਂ ਕਥਨ੍ਤਿ. ਤੇਹਿ ਜੀਵਿਤਯੋਗੇਨ ਜੀਵਨ੍ਤਾਏਵ ਹੋਨ੍ਤਿ. ਏਵਂਸਨ੍ਤੇਪਿ ਤੇਸਂ ਸਨ੍ਤਤਿਪਚ੍ਚੁਪ੍ਪਨ੍ਨਂ ਦਿਸ੍ਸਤੀਤਿ. ਵੁਚ੍ਚਤੇ, ਅਰੂਪਧਮ੍ਮੇਸੁ ਵਿਪਾਕਾਨਿ ਤਾਵ ਕਮ੍ਮਜਰੂਪਸਦਿਸਾਨਿ. ਤਾਨਿਪਿ ਹਿ ਅਸਤਿ ਵੀਥਿਚਿਤ੍ਤੁਪ੍ਪਾਦੇ ਯਾਵਜੀਵਂਪਿ ਏਕਸਨ੍ਤਤਿਵਸੇਨ ਪਵਤ੍ਤਿਸ੍ਸਨ੍ਤਿਯੇਵ. ਇਤਰਾਨਿ ਪਨ ਯਸ੍ਸ ਆਰਮ੍ਮਣਸ੍ਸ ਆਪਾਤਾਗਤਤ੍ਤਾ ਉਪ੍ਪਜ੍ਜਨ੍ਤਿ. ਤਸ੍ਮਿਂ ਨਿਰੁਦ੍ਧੇ ਤਦਭਾਵੇਪਿ ਤਦਾਰਮ੍ਮਣਾ ਬਹੂ ਚਿਤ੍ਤਸਨ੍ਤਤਿਯੋ ਜੀਵਿਤਸ੍ਸਅਦ੍ਧਾਨਫਰਣਾਨੁਭਾਵੇਨ ਪਵਤ੍ਤਨ੍ਤਿਯੇਵ. ਅਪਿਚ, ਯਾਵਖਨ੍ਧਪਰਿਨਿਬ੍ਬਾਨਾ ਅਨਨ੍ਤਰਪਚ੍ਚਯੁਪਨਿਬਨ੍ਧੇਨ ਅਬ੍ਬੋਚ੍ਛਿਨ੍ਨਂ ਪਵਤ੍ਤਮਾਨਾਯ ਚਿਤ੍ਤਸਨ੍ਤਤਿਯਾਵਸੇਨਪਿ ਅਯਮਤ੍ਥੋ ਵਤ੍ਤਬ੍ਬੋ. ਤੇਨੇਵ ਹਿ ਕਿਲੇਸਸੀਸਂ ਅਵਿਜ੍ਜਾ. ਪਵਤ੍ਤਸੀਸਂ ਜੀਵਿਤਿਨ੍ਦ੍ਰਿਯਨ੍ਤਿ ਵੁਤ੍ਤਂ.

[੧੮੧] ਵਿਭਾਵਨਿਯਂ ਪਨ

ਆਹਾਰਜਾਦੀਨਂ ਆਹਾਰਾਦਿਯੇਵ ਉਪ੍ਪਤ੍ਤਿਯਾਪਿ ਠਿਤਿਯਾਪਿ ਕਾਰਣਂ ਹੋਤਿ. ਕਸ੍ਮਾ, ਤਙ੍ਖਣੇ ਧਰਮਾਨਤ੍ਤਾ. ਕਮ੍ਮ ਜਾਨਂ ਪਨ ਕਮ੍ਮਂ ਉਪ੍ਪਤ੍ਤਿਯਾਏਵ ਕਾਰਣਂ, ਨ ਠਿਤਿਯਾ. ਕਸ੍ਮਾ, ਤਙ੍ਖਣਾਭਾਵਤੋ. ਜੀਵਿਤੇਨ ਪਨ ਅਨੁਪਾਲਿਤਤ੍ਤਾ ਏਵ ਤੇਸਂ ਖਣਟ੍ਠਿਤਿ ਸਿਦ੍ਧਾਤਿ ਇਮਿਨਾ ਧਿਪ੍ਪਾਯੇਨ ਯਂ ਵੁਤ੍ਤਂ ‘‘ਯਥਾਸਕਂ ਖਣਮਤ੍ਤਟ੍ਠਾਯੀਨਂਪਿ ਹਿ ਸਹਜਾਤਾਨਂ ਪਵਤ੍ਤਿਹੇਤੁਭਾਵੇਨ ਅਨੁਪਾਲਕਂ. ਨ ਹਿ ਤੇਸਂ ਕਮ੍ਮਂਯੇਵ ਠਿਤਿਕਾਰਣਂ ਹੋਤਿ. ਆਹਾਰਜਾਦੀਨਂ ਆਹਾਰਾਦਿ ਵਿਯ ਕਮ੍ਮਸ੍ਸ ਤਙ੍ਖਣਾਭਾਵ ਤੋਤਿ’’. ਤਂ ਨ ਯੁਤ੍ਤਂ.

ਧਮ੍ਮਾਨਞ੍ਹਿ ਖਣਟ੍ਠਿਤਿਨਾਮ ਏਕਕਲਾਪਗਤਸਹਜਾਤਪਚ੍ਚਯਾ ਯਤ੍ਤਾਏਵ ਹੋਤਿ. ਨ ਨਾਨਾਕਲਾਪਗਤਜਨਕਪਚ੍ਚਯਾਯਤ੍ਤਾ. ਇਤਰਥਾ ਉਪ੍ਪਾਦਕ੍ਖਣੇ ਲਬ੍ਭਮਾਨਾਨਂ ਉਪਚਯਸਨ੍ਤਤੀਨਂ ਵਿਯ ਠਿਤਿਕ੍ਖਣੇ ਲਬ੍ਭਮਾਨਾਯ ਜਰਤਾਯਪਿ ਕੁਤੋਚਿਸਮੁਟ੍ਠਾਨਤਾ ਪਾਲ਼ਿਯਂ ਵੁਤ੍ਤਾ ਸਿਯਾਤਿ. ਅਪਿਚ, ਖਣਟ੍ਠਿਤਿਨਾਮ ਸਭਾਵਸਿਦ੍ਧਾਏਵ. ਨ ਹਿ ਉਪ੍ਪਨ੍ਨਾ ਧਮ੍ਮਾ ਪਚ੍ਚਯਵੇਕਲ੍ਲੇਨ ਅਤ੍ਤਨੋ ਖਣੇਸੁ ਪਰਿਪੁਣ੍ਣਂ ਅਟ੍ਠਤ੍ਵਾ ਅਨ੍ਤਰਾਵ ਭਿਜ੍ਜਨ੍ਤੀਤਿ ਅਤ੍ਥਿ. ਨਚ ਪਚ੍ਚਯਾਧਿਮਤ੍ਤੇਨ ਅਤਿਰੇ ਕਤਰਂ ਤਿਟ੍ਠਨ੍ਤੀਤਿ ਅਤ੍ਥਿ. ਤਸ੍ਮਾ ਖਣਟ੍ਠਿਤਿਯਂ ਉਪਤ੍ਥਮ੍ਭਯਮਾਨਾਪਿ ਆਹਾਰਾਦਯੋ ਅਨੁਪਾਲਯਮਾਨਞ੍ਚ ਜੀਵਿਤਂ ਪਚ੍ਛਾ ਬਲਵਰੂਪਸਨ੍ਤਤਿ ਪਵਤ੍ਤਿਅਤ੍ਥਾਯਏਵ ਉਪਤ੍ਥਮ੍ਭੇਨ੍ਤਿ ਪਾਲੇਤਿਚ. ਨ ਖਣਟ੍ਠਿਤਿਪਵਤ੍ਤਿਯਾਤਿ. ਏਤ੍ਤਾਵਤਾ ਸਬ੍ਬੇਸਂਪਿ ਖਣਟ੍ਠਿਤਿਨਾਮ ਧਰਮਾਨਜਨਕਾਯਤ੍ਤਾ ਵਾ ਜੀਵਿਤਾਯਤ੍ਤਾਵਾ ਨਹੋਤੀਤਿ ਸਿਦ੍ਧਂ ਹੋਤਿ. ਯਦਿ ਪਨ ਤਂ ਸਨ੍ਤਤਿਪਵਤ੍ਤਿਮੇਵ ਸਨ੍ਧਾਯ ਵੁਤ੍ਤਂ ਸਿਯਾ, ਏਵਂਸਤਿ ਯੁਜ੍ਜੇਯ੍ਯਾਤਿ. ਅਟ੍ਠ ਕਥਾਯਂਪਿ ਸਨ੍ਤੇਪਿਚ ਅਨੁਪਾਲਨ ਲਕ੍ਖਣਾਦਿਮ੍ਹਿ ਵਿਧਾਨੇ ਅਤ੍ਥਿਕ੍ਖਣੇਯੇਵ ਤਂ ਤੇਧਮ੍ਮੇ ਪਾਲੇਤੀਤਿਆਦਿਵਚਨੇ ਯਥਾਸਨ੍ਤਤਿਟ੍ਠਿਤਿ ਲਬ੍ਭਤਿ. ਤਥਾ ਵਿਚਾਰੇਤ੍ਵਾ ਗਹੇਤਬ੍ਬਾਤਿ. ਇਦਂ ਪਨ ਪਾਚਕਗ੍ਗਿਨਾ ਸਹ ਸਕਲਂ ਉਪਾਦਿਨ੍ਨਕਸਰੀਰਂ ਬ੍ਯਾਪੇਤ੍ਵਾ ਤਿਟ੍ਠਤੀਤਿ. ਕਬਲ਼ਂ ਕਰੀਯਤੀਤਿ ਕਬਲ਼ੀਕਾਰੋ. ਆਹਰੀਯਤਿ ਅਜ੍ਝੋਹਰੀਯਤੀਤਿ ਆਹਾਰੋ. ਕਬਲ਼ੀਕਾਰੋਚ ਸੋ ਆਹਾਰੋਚਾਤਿ ਕਬਲ਼ੀਕਾਰਾਹਾਰੋ. ਕਬਲ਼ੀਕਾਰੋ ਆਹਾਰੋਤਿਪਿ ਪਾਠੋ. ਇਦਞ੍ਚ ਸਵਤ੍ਥੁਕ ਵਚਨਂ ਦਟ੍ਠਬ੍ਬਂ. ਅਥਵਾ, ਕਬਲ਼ੀਕਾਰਾਹਾਰਭਕ੍ਖਾਨਂ ਸਤ੍ਤਾਨਂ ਅਤ੍ਤਭਾਵਂ ਭੁਸੋ ਹਰਤਿ ਅਦ੍ਧਾਨਂ ਪਵਤ੍ਤੇਤੀਤਿ ਆਹਾਰੋ. ਖਜ੍ਜ ਭੋਜ੍ਜਾਦਿਕੇ ਕਬਲ਼ੀਕਾਰੇ ਆਹਾਰੋ ਤਨ੍ਨਿਸ੍ਸਿਤਤ੍ਤਾ ਤਪ੍ਪਰਿਯਾ ਪਨ੍ਨਤ੍ਤਾਚਾਤਿ ਕਬਲ਼ੀਕਾਰਾਹਾਰੋ. ਇਮਸ੍ਮਿਂਅਤ੍ਥੇ ਸਤਿ ਨਿਬ੍ਬਤ੍ਤਿਤ ਓਜਾ ਏਵ ਲਬ੍ਭਤਿ. ਅਤ੍ਥਤੋ ਪਨ ਅਙ੍ਗਮਙ੍ਗਾਨੁਸਾਰਿਨੋ ਰਸਸ੍ਸ ਸਾਰਭੂਤੋ ਉਪਤ੍ਥਮ੍ਭਬਲਕਾਰੋ ਭੂਤਨਿਸ੍ਸਿਤੋ ਪਰਮਸਿਨਿਦ੍ਧਸਿ ਨੇਹੋ ਇਧ ਆਹਾਰਰੂਪਂਨਾਮ. ਤਤ੍ਥ ਅਙ੍ਗਮਙ੍ਗਾਨੁਸਾਰਿਨੋ ਰਸਸ੍ਸਾਤਿ ਅਜ੍ਝੋਹਰਿਤ੍ਵਾ ਆਮਾਸਯੇ ਪਤਿਟ੍ਠਿਤਾਨਿ ਆਹਾਰਵਤ੍ਥੂਨਿ ਪਾਚਕਤੇਜੇਨ ਵਿਵੇਚਿਤਾਨਿ ਰਸਾਦਿਭਾਵੇਨ ਪਞ੍ਚਧਾ ਵਿਭਾਗਂ ਗਚ੍ਛਨ੍ਤਿ. ਤਤ੍ਥ ਪਣੀਤ ਸਿਨਿਦ੍ਧ ਲਹੁਕ ਸਿਨੇਹ ਕੋਟ੍ਠਾਸੋ ਰਸੋਨਾਮ. ਯੇ ਲੋਕੇ ਰਸਧਾਤੂਤਿ ਵੁਚ੍ਚਤਿ. ਸੋ ਪਾਚਕ ਤੇਜਬਲੇਨ ਤਤੋ ਉਤ੍ਤਰਿਤ੍ਵਾ ਰਸਹਰਣਿਧਮਨਿਜਾਲਾਨੁਸਾਰੇਨ ਹੇਟ੍ਠਾਚ ਉਦ੍ਧਞ੍ਚ ਸਕਲਸਰੀਰੇ ਅਙ੍ਗਮਙ੍ਗਾਨਿ ਅਨੁਸਰਨ੍ਤੋ ਅਨੁਫਰਨ੍ਤੋ ਅਙ੍ਗਮਙ੍ਗਾਨੁਸਾਰੀਤਿ ਵੁਚ੍ਚਤਿ. ਤਸ੍ਸ ਸਾਰਭੂਤੋ ਉਪਤ੍ਥਮ੍ਭਂ ਬਲਂ ਕਰੋਤੀਤਿ ਉਪਤ੍ਥਮ੍ਭਬਲਕਾਰੋ. ਸੋ ਹਿ ਆਮਾਸਯੇ ਪਤਿਟ੍ਠਿਤ ਮਤ੍ਤੋਵ ਸਕਲਸਰੀਰੇ ਭੂਤੇਸੁ ਉਪਤ੍ਥਮ੍ਭਕਬਲਂ ਜਨੇਤੀਤਿ.

[੧੮੨] ਵਿਭਾਵਨਿਯਂ ਪਨ

‘‘ਅਙ੍ਗਮਙ੍ਗਾ ਨਸਾਰਿ ਰਸਹਰ ਸਙ੍ਖਾਤਾਤਿ’’ ਪਾਠੋ. ਸੋ ਦੁਪ੍ਪਾਠੋ.

ਤਂ ਪਨ ਸੇਨ੍ਦ੍ਰਿਯਕਾਯੋਪਤ੍ਥਮ੍ਭਨਲਕ੍ਖਣਂ ਆਹਾਰਰੂਪਂ. ਓਜਾਲਕ੍ਖਣਂ ਵਾ. ਤਤ੍ਥ ਉਦਯਤਿ ਪਸਵਤੀਤਿ ਓਜਾ. ਅਵਸਦ੍ਦੋਵਾ ਰਕ੍ਖਣੇ. ਰਕ੍ਖਣਞ੍ਚੇਤ੍ਥ ਉਪਤ੍ਥਮ੍ਭਨਮੇਵ. ਅਵਤਿ ਜਨੇਤਿਚਾਤਿ ਓਜਾ. ਕਿਂ ਅਵਤਿ. ਅਤ੍ਤਨੋ ਨਿਸ੍ਸਯਵਤ੍ਥੁਂ. ਕਿਂਚ ਜਨੇਤਿ. ਆਹਾਰਸਮੁਟ੍ਠਾਨਰੂਪਂ. ਉਦਯਾਨਨ੍ਤਰਂ ਰੂਪਂ ਜਨੇਤੀਤਿ ਓਜਾਤਿਪਿ ਵਦਨ੍ਤਿ. ਅਞ੍ਞਾਪਦੇਸਰਹਿਤੇਨ ਕਕ੍ਖਲ਼ਤ੍ਤਾਦਿਨਾ ਅਤ੍ਤਨੋ ਭਾਵੇਨ ਸਿਦ੍ਧਂ ਰੂਪਂ ਸਭਾਵਰੂਪਂ. ਉਪ੍ਪਾਦਾਦਿਨਾ ਅਨਿਚ੍ਚਤਾਦਿਨਾਚ ਸਙ੍ਖਹਲਕ੍ਖਣੇਨ ਸਹਿਤਂ ਰੂਪਂ ਸਲਕ੍ਖਣਰੂਪਂ. ਉਜੁਕਤੋਵ ਕਮ੍ਮਾਦੀਹਿ ਪਚ੍ਚਯੇਹਿ ਨਿਪ੍ਫਾਦਿਤਂ ਰੂਪਂ ਨਿਪ੍ਫਨ੍ਨਰੂਪਂ. ਰੁਪ੍ਪਨਲਕ੍ਖਣਸਮ੍ਪਨ੍ਨਂ ਨਿਪ੍ਪਰਿਯਾਯਰੂਪਂ ਰੂਪਰੂਪਂ. ਯਥਾ ਦੁਕ੍ਖਦੁਕ੍ਖਂ ਅਜ੍ਝਤ੍ਤਅਜ੍ਝਤ੍ਤਨ੍ਤਿ. ਸਙ੍ਖਤਲਕ੍ਖਣਯੁਤ੍ਤ ਤਾਯ ਅਨਿਚ੍ਚਤਾਦਿਕਂ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਸਮ੍ਮਸਨਾਰਹਂ ਰੂਪਂ ਸਮ੍ਮਸਨਰੂਪਂ. ਤੇ ਤੇ ਦਬ੍ਬਸਮ੍ਭਾਰਾਵਾ ਰੂਪਕਲਾਪਾਵਾ ਵਿਸੁਂਵਿਸੁਂ ਭੁਸੋ ਕਾਸਨ੍ਤਿ ਪਕਾਸਨ੍ਤਿ ਏਤੇਨਾਤਿ ਆਕਾਸੋ. ਨਿਸਤ੍ਤ ਨਿਜੀਵਟ੍ਠੇਨ ਧਾਤੁ. ਆਕਾਸਸਙ੍ਖਾਤਾ ਧਾਤੂਤਿ ਆਕਾਸਧਾਤੁ. ਪਰਿਤੋ ਸਮਨ੍ਤਤੋ ਛਿਨ੍ਦਤਿ ਕਲਾਪਨ੍ਤਰਭੂਤਾਨਿ ਕਲਾਪਨ੍ਤਰ ਭੂਤੇਹਿ ਸਦ੍ਧਿਂ ਅਸਂਮਿਸ੍ਸਂ ਏਕਤ੍ਤਂ ਅਨੁਪਗਮਨਂ ਕਰੋਤੀਤਿ ਪਰਿਚ੍ਛੇਦੋ. ਤੇਹਿਵਾ ਪਰਿਚ੍ਛਿਨ੍ਦੀਯਤਿ ਅਤ੍ਤਨੋਵਾ ਪਰੇਸਂਵਾ ਅਕਤ੍ਵਾਮਜ੍ਝੇ ਵਿਸੁਂ ਥਪੀਯਤਿ. ਤੇਸਂਵਾ ਛਿਦ੍ਦਵਿਵਰਮਤ੍ਤਭੂਤੋ. ਨ ਵਿਸੁਂ ਏਕੋ ਉਪ੍ਪਾਦਸਹਿਤੋ ਸਭਾਵਧਮ੍ਮੋ. ਨਾਪਿ ਕਸ੍ਸਚਿ ਰੂਪਕਲਾਪਸ੍ਸ ਪਕ੍ਖਭੂਤੋਤਿ ਪਰਿਚ੍ਛੇਦੋ. ਵਿਕਾਰਲਕ੍ਖਣਰੂਪਾਨਿ ਹਿ ਅਸਭਾਵਧਮ੍ਮਭੂਤਾਨਿਪਿ ਤਂਤਂ ਰੂਪਕਲਾਪੇਸੁ ਸਨ੍ਦਿਸ੍ਸਮਾਨਤਾ ਤਂਤਂਰੂਪਕਲਾਪਪਕ੍ਖਿਕਾਨਿਏਵ ਹੋਨ੍ਤਿ. ਅਯਂ ਪਨ ਤੇਹਿ ਰੂਪ ਕਲਾਪੇਹਿ ਸਬ੍ਬਸੋ ਵਿਮੁਤ੍ਤਭਾਵੇਨ ਬਹਿਭੂਤਤ੍ਤਾ ਕਸ੍ਸਚਿ ਰੂਪ ਕਲਾਪਸ੍ਸ ਪਕ੍ਖਭੂਤੋ ਨ ਹੋਤੀਤਿ. ਅਸਭਾਵਧਮ੍ਮਤ੍ਤਾਚ ਪਨ ਕੇਨਚਿ ਰੂਪੇਨ ਫੁਸਨ ਪਰਿਯਾਯੋਪਿ ਤਸ੍ਸ ਸਬ੍ਬਸੋ ਨਤ੍ਥੀਤਿ ਕਤ੍ਵਾ ਸੋ ਅਸਂਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਪਾਲ਼ਿਯਂ ਵੁਤ੍ਤੋ. ਅਟ੍ਠਕਥਾਯਂ ਪਨ ਘਨਪਿਣ੍ਡਵਤ੍ਥੂਸੁ ਪਟਿਘਫੋਟ੍ਠਬ੍ਬਸਭਾਵਾਨਂ ਨਾਨਾ ਕਲਾਪਗਤਭੂਤਾਨਂ ਅਞ੍ਞਮਞ੍ਞਸਂਫੁਟ੍ਠਤਾ ਅਤ੍ਥੀਤਿ ਕਤ੍ਵਾ ਅਸਂਫੁਟ੍ਠਂ ਚਤੂਹਿ ਮਹਾਭੂਤੇਹੀਤਿ ਏਤੇਹਿ ਅਸਂਫੁਟ੍ਠਂ ਅਜਟਾਕਾਸਂ ਕਂਥਿਤਨ੍ਤਿ ਵੁਤ੍ਤਂ. ਟੀਕਾਯਂ ਪਨ ਅਯਂ ਨਿਦ੍ਦੇਸੋ ਅਜਟਾਕਾਸਨਿਦ੍ਦੇਸੋ ਨਹੋਤਿ, ਪਰਿਚ੍ਛੇਦਰੂਪਨਿਦ੍ਦੇਸੋਯੇਵ. ਸੋਚ ਘਨਪਿਣ੍ਡ ਵਤ੍ਥੂਸੁਏਵ ਵੇਦਿਤਬ੍ਬੋ. ਤੇਸੁਚ ਭੂਤਾਨਂ ਅਸਂਫੁਟ੍ਠਤਾਨਾਮ ਨਤ੍ਥਿ. ਤਸ੍ਮਾ ਭੂਤਾਨਂ ਅਞ੍ਞਮਞ੍ਞਅਬ੍ਯਾਪਿਤਾ ਏਕਤ੍ਤਂ ਅਨੁਪਗਤਤਾਏਵ. ਤਤ੍ਥ ਅਸਂਫੁਟ੍ਠਤਾਨਾਮ ਯੁਤ੍ਤਾ ਸਿਯਾਤਿ ਅਧਿਪ੍ਪਾਯੇਨ ਅਬ੍ਯਾਪਿਕਤਾ ਹਿ ਅਸਂਫੁਟ੍ਠਤਾਤਿ ਵੁਤ੍ਤਂ. ਅਤ੍ਥਤੋ ਪਨ ਨਾਨਾਕਲਾਪਗਤਾਨਂ ਭੂਤਾਨਂ ਪਰਿਯਨ੍ਤਤਾ ਸਙ੍ਖਾਤੋ ਅਨ੍ਤਰਾਲ਼ਧਮ੍ਮੋ. ਰੂਪਪਰਿਚ੍ਛੇਦਲਕ੍ਖਣਂ ਪਰਿਚ੍ਛੇਦਰੂਪਂ. ਯਾ ਪਨ ਚਲਮਾਨੇਨ ਕਾਯਙ੍ਗੇਨ ਅਤ੍ਤਾਨਞ੍ਚ ਅਤ੍ਤਸਮਙ੍ਗਿਨੋ ਪੁਗ੍ਗਲਸ੍ਸ ਅਧਿਪ੍ਪਾਯਞ੍ਚ ਪਚ੍ਚਕ੍ਖੇ ਠਿਤੇ ਜਨੇ ਵਿਞ੍ਞਾਪੇਤਿ ਪਾਕਟਂ ਕਤ੍ਵਾ ਦਸ੍ਸੇਤਿ. ਸਯਞ੍ਚ ਤੇਨ ਕਾਯਙ੍ਗੇਨ ਤੇਹਿ ਜਨੇਹਿ ਵਿਞ੍ਞਾਯਤਿ. ਸਾ ਕਾਯਵਿਞ੍ਞਤ੍ਤਿਨਾਮ. ਯਾ ਉਚ੍ਚਾਰੀਯਮਾਨੇਨ ਵਾਚਙ੍ਗੇਨ ਸਦ੍ਦੇਨ ਅਤ੍ਤਾਨਞ੍ਚ ਅਤ੍ਤਸਮਙ੍ਗਿਨੋ ਪੁਗ੍ਗਲਸ੍ਸ ਅਧਿਪ੍ਪਾਯਞ੍ਚ ਸੋਤਪਥੇ ਠਿਤੇ ਜਨੇ ਵਿਞ੍ਞਾਪੇਤਿ. ਸਯਞ੍ਚ ਤੇਨਵਾਚਙ੍ਗੇਨ ਤੇਹਿ ਜਨੇਹਿ ਵਿਞ੍ਞਾਯਤਿ. ਸਾ ਵਚੀਵਿਞ੍ਞਤ੍ਤਿਨਾਮ. ਅਥਵਾ, ਵਿਞ੍ਞਾਪੇਨ੍ਤਿ ਜਨਾ ਵਿਞ੍ਞਾਯਨ੍ਤਿਵਾ ਜਨੇਹਿ ਅਞ੍ਞਮਞ੍ਞਸ੍ਸ ਚਿਤ੍ਤਾਨਿ ਏਤਾਯਾਤਿ ਵਿਞ੍ਞਤ੍ਤਿ. ਸਸਮ੍ਭਾਰੇ ਅਙ੍ਗਪਚ੍ਚਙ੍ਗਭੂਤੇ ਕਾਯੇ ਪਵਤ੍ਤਾ ਵਿਞ੍ਞਤ੍ਤਿ ਕਾਯਵਿਞ੍ਞਤ੍ਤਿ. ਚੋਪਨ ਕਾਯਸਙ੍ਖਾਤੋ ਕਾਯੋ ਏਵਵਾ ਵਿਞ੍ਞਤ੍ਤਿ ਕਾਯਵਿਞ੍ਞਤ੍ਤਿ. ਚਿਤ੍ਤਜਸਦ੍ਦਸਙ੍ਖਾਤਾਯ ਵਾਚਾਯ ਪਵਤ੍ਤਾ ਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤਿ. ਚੋਪਨਵਾਚਾ ਸਙ੍ਖਾਤਾ ਵਾਚਾ ਏਵਵਾ ਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤਿ. ਤਤ੍ਥ ਚਿਤ੍ਤਵਸੇਨ ਯਂਕਿਞ੍ਚਿ ਕਾਯਙ੍ਗਵਿਕਾਰਂ ਕਰੋਨ੍ਤਸ੍ਸ ਤਂਤਂਅਙ੍ਗਂ ਸਨ੍ਤਮ੍ਭਨ੍ਤਾ ਸਨ੍ਧਾਰੇਨ੍ਤਾ ਚਾਲੇਨ੍ਤਾ ਅਙ੍ਗਮਙ੍ਗਾਨੁਸਾਰਿਸਙ੍ਖਾਤਾ ਚਿਤ੍ਤਜਵਾਤਕਲਾਪਾ ਤਂਤਂਅਙ੍ਗਂ ਪੂਰੇਤ੍ਵਾ ਉਪ੍ਪਜ੍ਜਨ੍ਤਿ. ਉਪ੍ਪਜ੍ਜਨ੍ਤਾਚ ਯਥਾਵਾ ਤਥਾਵਾ ਅਨੁਪ੍ਪਜ੍ਜਿਤ੍ਵਾ ਯਸ੍ਸ ਤੇਹਿ ਚਿਤ੍ਤਜਵਾਤਕਲਾਪੇਤਿ ਸਹਜਾਤਸ੍ਸ ਚੋਪਨਕਾਯਸ੍ਸ ਆਨੁਭਾਵੇਨ ਸਬ੍ਬੇ ਤੇ ਕਲਾਪਾ ਯਥਾਧਿਪ੍ਪੇਤਦਿਸਾਭਿਮੁਖਾਏਵ ਉਪ੍ਪਜ੍ਜਨ੍ਤਿ. ਅਯਂ ਚੋਪਨਕਾਯਸਙ੍ਖਾਤੋ ਆਕਾਰਵਿਕਾਰੋ ਕਾਯਵਿਞ੍ਞਤ੍ਤਿ ਨਾਮ. ਨਿਯਾਮਕਸਦਿਸੀ ਹਿ ਅਯਂ ਕਾਯਵਿਞ੍ਞਤ੍ਤਿ. ਤੇਚ ਨਾਵਾਸਦਿ ਸਾਤਿ. ਯਥਾ ਹਿ ਨਿਯਾਮਕੋ ਨਾਵਾਯ ਮੂਲਭਾਗੇ ਠਤ੍ਵਾ ਏਕਂ ਮਹਾਫਿਯਂ ਦਲ਼੍ਹਂ ਗਹੇਤ੍ਵਾ ਨਦਿਸੋਤੇ ਚਾਰੇਤ੍ਵਾ ਸਕਲਂ ਮਹਾਨਾਵਂ ਇਚ੍ਛਿਤਦਿਸਾਭਿਮੁਖਂ ਨਿਯੋਜੇਤਿ. ਨ ਯਂਵਾ ਤਂਵਾ ਦਿਸਂ ਗਨ੍ਤੁਂ ਦੇਤਿ. ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਂ. ਏਕਚਿਤ੍ਤਕ੍ਖਣਿਕਾ ਹਿ ਵਿਞ੍ਞਤ੍ਤਿ ਤੇਸਂ ਮੂਲਭਾਗੇਏਵ ਲਬ੍ਭਮਾਨਾ ਤੇ ਯਥਾਧਿਪ੍ਪੇਤਦਿਸਾਭਿਮੁਖੇ ਏਵਂ ਕਤ੍ਵਾ ਨਿਯੋਜੇਤੀਤਿ ਸਾ ਨਿਯਾਮਕਸਦਿਸੀ ਹੋਤੀਤਿ. ਏਤ੍ਥਚ ਯਦੇਤਂ ਅਟ੍ਠਕਥਾਯਂ. ਏਕਜਵਨਵੀਥਿਯਂ ਸਤ੍ਤਸੁ ਜਵਨੇਸੁ ਪਥਮ ਜਵਨਸਮੁਟ੍ਠਿਤਾ ਵਾਯੋਧਾਤੁ ਅਤ੍ਤਨਾ ਸਹਜਾਤਰੂਪਕਾਯਂ ਸਂਥਮ੍ਭੇਤੁਂ ਸਨ੍ਧਾਰੇਤੁਂ ਸਕ੍ਕੋਤਿ. ਅਪਰਾਪਰਂ ਪਨ ਚਾਲੇਤੁਂ ਨਸਕ੍ਕੋਤਿ. ਦੁਤੀਯਾਦੀਸੁਪਿ ਏਸੇਵ ਨਯੋ. ਸਤ੍ਤਮਚਿਤ੍ਤੇਨ ਪਨ ਸਮੁਟ੍ਠਿਤਾ ਵਾਯੋਧਾਤੁ ਹੇਟ੍ਠਾ ਛਹਿਚਿਤ੍ਤੇਹਿ ਸਮੁਟ੍ਠਿਤਂ ਵਾਯੋਧਾਤੁਂ ਉਪਤ੍ਥਮ੍ਭਨਪਚ੍ਚਯਂ ਲਭਿਤ੍ਵਾਅਤ੍ਤਨਾਸਹਜਾਤਂ ਰੂਪਕਾਯਂ ਸਂਥਮ੍ਭੇਤੁਂ ਸਨ੍ਧਾਰੇਤੁਂ ਚਾਲੇਤੁਂ ਅਭਿਕ੍ਕਮਾਪੇਤੁਂ ਸਕ੍ਕੋਤੀਤਿ ਵੁਤ੍ਤਂ. ਤਂ ਅਭਿਕ੍ਕਮਾਮੀਤਿ ਕਾਯਂ ਪਗ੍ਗਣ੍ਹਨ੍ਤਾਨਂ ਅਨੇਕਸਹਸ੍ਸੇਸੁ ਜਵਨ ਵਾਰੇਸੁ ਪਵਤ੍ਤਮਾਨੇਸੁ ਯਸ੍ਮਿਂਵਾਰੇ ਚਲਨਸਙ੍ਖਾਤਂ ਦੇਸਨ੍ਤਰਪਾਪਨਂ ਜਾਯਤਿ, ਤਂ ਸਨ੍ਧਾਯ ਵੁਤ੍ਤਂ. ਨ ਹਿ ਕਤਿਪਯਜਵਨਵਾਰੇਹਿ ਚਲਨਂ ਜਾਯਤਿ. ਯਦਿ ਜਾਯੇਯ੍ਯ, ਇਦ੍ਧਿਮਨ੍ਤਾਨਂ ਇਦ੍ਧਿਯਾਗਮਨਂ ਵਿਯ ਸਬ੍ਬੇਸਂਪਿ ਸੀਘਤਰਂ ਗਮਨਂ ਪਞ੍ਞਾਯੇਯ੍ਯ. ਕਸ੍ਮਾ, ਏਕਚ੍ਛਰਕ੍ਖਣੇਪਿ ਅਨੇਕਕੋਟਿਸਤਸਹਸ੍ਸਚਿਕ੍ਕਪਵਤ੍ਤਿਯਾ ਸਮ੍ਭਵਤੋ. ਅਯਞ੍ਚ ਅਤ੍ਥੋ ਉਪਰਿ ਅਕ੍ਖਰੁਪ੍ਪਤ੍ਤਿਵਿਚਾਰਣਾਯਂ ਪਾਕਟੋ ਭਵਿਸ੍ਸਤੀਤਿ. ਤਸ੍ਮਾ ਤਤੋ ਪੁਰਿਮਵਾਰੇਸੁ ਸਂਥਮ੍ਭਨਸਨ੍ਧਾਰਣਾਨਿਏਵ ਸਮ੍ਪਜ੍ਜਨ੍ਤੀਤਿ ਵੇਦਿਤਬ੍ਬਂ. ਯਾ ਚੇਤ੍ਥ ਸਤ੍ਤਯੁਗਸਕਟੋਪਮਾ ਵੁਤ੍ਤਾ, ਸਾਪਿ ਨਾਨਾਜਵਨਵੀਥੀਸੁ ਸਮੁਟ੍ਠਿਤਾਨਂ ਵਾਯੋਧਾਤੂਨਂ ਅਪਰਾਪਰਂ ਉਪਤ੍ਥਮ੍ਭਨੇਚ ਯੁਜ੍ਜਤਿਯੇਵ. ਤਥਾ ਹਿ ਚਲਨਚਿਤ੍ਤਜਰੂਪਸਨ੍ਤਤਿਯਂ ਪਵਤ੍ਤਾਨਿ ਉਤੁਜਰੂਪਸਙ੍ਘਾਟਾਨਿਪਿ ਵਿਞ੍ਞਤ੍ਤਿਸਹਿਤਾਨਿ ਵਿਯ ਤਦਾਕਾਰਵਨ੍ਤਾਨਿ ਸਵੇਗਾਨਿ ਸਵਿਪ੍ਫਾਰਾਨਿਏਵ ਪਵਤ੍ਤਨ੍ਤਿ. ਤਸ੍ਮਾ ਪੁਬ੍ਬਾਪਰਪਵਤ੍ਤਾਨਂ ਨਾਨਾ ਜਵਨਵੀਥੀਨਂ ਅਨ੍ਤਰਨ੍ਤਰਾ ਭਵਙ੍ਗਸਮਯੇਸੁਪਿ ਅਭਿਕ੍ਕਮਨਾਦਿਕਂ ਚਲਨਂ ਸਮ੍ਪਜ੍ਜਤਿਯੇਵ. ਏਕਾਬਦ੍ਧਪਵਤ੍ਤਾਨਿਚ ਚਤੁਸਮੁਟ੍ਠਾਨਿਕਰੂਪਾਨਿਨਾਮ ਏਕਸ੍ਸ ਵਿਸਯੇ ਇਤਰਾਨਿ ਏਕਸਮੁਟ੍ਠਾਨਾਨਿ ਵਿਯ ਸਬ੍ਬਸੋ ਤਦਨੁ ਪਰਿਵਤ੍ਤੀਨਿ ਹੋਨ੍ਤੀਤਿ ਚਿਤ੍ਤਜੇ ਚਲਨ੍ਤੇ ਇਤਰਾਨਿਪਿ ਚਲਨ੍ਤਿ ਯੇਵਾਤਿ ਦਟ੍ਠਬ੍ਬਂ. ਚਲਨਞ੍ਚੇਤ੍ਥ ਪਚ੍ਛਿਮਪਚ੍ਛਿਮਾਨਂ ਰੂਪਕਲਾਪਸਙ੍ਘਾਟਾਨਂ ਪੁਰਿਮ ਪੁਰਿਮਾਨਂ ਉਪ੍ਪਨ੍ਨਦੇਸਤੋ ਦੇਸਨ੍ਤਰੇ ਯਥਾਪਵਤ੍ਤਸਨ੍ਨਿਵੇਸਾਕਾਰੇਨ ਅਪਰਾਪਰਂ ਉਪ੍ਪਜ੍ਜਮਾਨਂ ਵੇਦਿਤਬ੍ਬਂ. ਨ ਹਿ ਰੂਪਾਰੂਪਧਮ੍ਮਾਨਂ ਉਪ੍ਪਨ੍ਨ ਦੇਸੇ ਅਨਿਰੁਜ੍ਝਿਤ੍ਵਾ ਕੇਸਗ੍ਗਮਤ੍ਤਂਪਿ ਦੇਸਨ੍ਤਰ ਸਙ੍ਕਮਨਂਨਾਮ ਅਤ੍ਥਿ. ਇਤਰਥਾ ਖਣਿਕਧਮ੍ਮਤਾ ਅਬ੍ਯਾਪਾਰਧਮ੍ਮਤਾ ਅਵਸਵਤ੍ਤਿਤਾਚ ਤੇਸਂ ਨਸਿਯਾਤਿ. ਯਂਕਿਞ੍ਚਿ ਵਚੀਭੇਦਂ ਕਰੋਨ੍ਤਸ੍ਸ ਕਣ੍ਠਟ੍ਠਾਨਾਦਿ ਗਤਉਪਾਦਿਨ੍ਨਕ ਪਥਵੀਧਾਤੂਸੁ ਚਲਮਾਨਕਣ੍ਠਪਦੇਸਾਦਿਗਤਚਿਤ੍ਤਜ ਪਥਵੀਧਾਤੂਨਂ ਸਙ੍ਘਟ੍ਟਨਸਙ੍ਖਾਤੇਨ ਠਾਨਕਰਣਸਨ੍ਨਿਪਾਤੇਨ ਸਹੇਵਯੋ ਵਚੀਘੋਸਸਙ੍ਖਾਤੋ ਚਿਤ੍ਤਜਸਦ੍ਦੋ ਜਾਯਤਿ. ਸੋ ਯੇਨ ਅਤ੍ਤਨਾ ਸਹ ਜਾਤੇਨ ਆਕਾਰਵਿਕਾਰੇਨ ਯਥਾਧਿਪ੍ਪਾਯਂ ਤਂਤਂ ਵਣ੍ਣਵਿਸੇਸਤ੍ਤਂ ਉਪਗਚ੍ਛਤਿ. ਯੇਨਚ ਸੁਣਨ੍ਤਾਨਂ ਤਂਤਂਅਤ੍ਥਜੋਤਕੋ ਅਕ੍ਖਰਸਨ੍ਨਿਪਾਤਭੂਤੋ ਪਦਬ੍ਯਞ੍ਜਨਵਿਸੇਸੋ ਉਪਲਬ੍ਭਤਿ. ਸੋ ਚੋਪਨਵਾਚਾਸਙ੍ਖਾਤੋ ਆਕਾਰਵਿਕਾਰੋ ਵਚੀਵਿਞ੍ਞਤ੍ਤਿਨਾਮ. ਅਟ੍ਠਕਥਾਯਂ ਪਨ ਤਸ੍ਸਾ ਪਨ ਚਿਤ੍ਤਸਮੁਟ੍ਠਾਨਾਯ ਪਥਵੀਧਾਤੁਯਾ ਉਪਾਦਿਨ੍ਨਘਟ੍ਟਨਸ੍ਸ ਪਚ੍ਚਯਭੂਤੋ ਏਕੋ ਆਕਾਰਵਿਕਾਰੋ ਵਚੀ ਵਿਞ੍ਞਤ੍ਤਿਨਾਮਾਤਿ ਵੁਤ੍ਤਂ. ਤਤ੍ਥ ਉਪਾਦਿਨ੍ਨਘਟ੍ਟਨਸ੍ਸ ਪਚ੍ਚਯਭੂਤੋਤਿ ਕਮ੍ਮਜਭੂਤਾਯ ਚਤੁਜਭੂਤਾਯਏਵਵਾ ਉਪਾਦਿਨ੍ਨਪਥਵੀਧਾਤੁਯਾ ਸਹਘਟ੍ਟਨਂ ਪਟਿਚ੍ਚ ਸਦ੍ਦਵਿਸੇਸਪਵਤ੍ਤਿਯਾ ਪਚ੍ਚਯਭੂਤੋਤਿ ਅਤ੍ਥੋ. ਘਟ੍ਟਨਸ੍ਸ ਪਚ੍ਚਯੋ ਪਨ ਚਲਮਾਨਕਣ੍ਠਪਦੇਸਾਦਿਵਿਕਾਰਭੂਤੋ ਕਾਯਙ੍ਗਵਿਸੇਸੋਏਵ ਸਿਯਾ. ਵਿਕਾਰਦ੍ਵਯਞ੍ਚ ਅਸਂਮਿਸ੍ਸਂ ਕਤ੍ਵਾ ਵੇਦਿਤਬ੍ਬਨ੍ਤਿ. ਏਤ੍ਥਚ ਉਪਾਦਿਨ੍ਨਕਪਥਵੀਹਿ ਸਹ ਘਟ੍ਟਨਂ ਚਿਤ੍ਤਜਪਥਵੀਨਂ ਕਿਚ੍ਚਂ. ਯਂ ਪਨ ਤਾਸਂ ਯਥਾਵਾ ਤਥਾਵਾ ਅਘਟ੍ਟੇਤ੍ਵਾ ਯਥਾ ਇਚ੍ਛਿਤਕ੍ਖਰਂ ਸਮ੍ਪਜ੍ਜਤਿ. ਤਥਾ ਘਟ੍ਟਨਪਕਾਰਵਿਧਾਨਂ. ਇਦਂ ਕਾਯਵਿਞ੍ਞਤ੍ਤਿਯਾ ਕਿਚ੍ਚਂ. ਘਟ੍ਟਨੇਨ ਸਹੇਵ ਉਪ੍ਪਨ੍ਨਸਦ੍ਦਾਨਂ ਤਂਤਂਵਣ੍ਣਤ੍ਤ ਪਤ੍ਤਿਯਾ ਵਿਦਹਨਮੇਵ ਵਚੀਵਿਞ੍ਞਤ੍ਤਿਯਾ ਕਿਚ੍ਚਂ. ਕੁਮ੍ਭਥੁਨਤਲਂ ਵਿਯਚ ਉਪਾਦਿਨ੍ਨਕਪਥਵੀ. ਪਹਰਣਹਤ੍ਥੋ ਵਿਯ ਚਿਤ੍ਤਜਪਥਵੀ. ਹਤ੍ਥਪਰਿ ਵਤ੍ਤਨ ਵਿਕਾਰੋ ਵਿਯ ਕਾਯਵਿਞ੍ਞਤ੍ਤਿ. ਸਦ੍ਦਵਿਕਾਰੋ ਵਿਯ ਵਚੀਵਿਞ੍ਞਤ੍ਤਿ. ਕੁਮ੍ਭਥੁਨਸ੍ਸ ਨਾਨਾਸਦ੍ਦਪਭੇਦੋਵਿਯ ਨਾਨਾਵਣ੍ਣਭੇਦੋਤਿ. ਏਤ੍ਥਚ ਯਦੇਤਂ ਅਟ੍ਠਕਥਾਯਂ ਇਦਂ ਵਕ੍ਖਾਮਿ ਏਤਂ ਵਕ੍ਖਾਮੀਤਿ ਉਪ੍ਪਜ੍ਜਮਾਨਂ ਚਿਤ੍ਤਂ ਅਟ੍ਠਰੂਪਾਨਿ ਸਮੁਟ੍ਠਾਪੇਤਿ. ਤੇਸਂ ਅਬ੍ਭਨ੍ਤਰੇ ਚਿਤ੍ਤ ਸਮੁਟ੍ਠਾਨਾ ਪਥਵੀਧਾਤੁ ਉਪਾਦਿਨ੍ਨਕਂ ਘਟ੍ਟਯਮਾਨਾਵ ਉਪ੍ਪਜ੍ਜਤਿ. ਤੇਨ ਧਾਤੁਘਟ੍ਟਨੇਨ ਸਹੇਵ ਸਦ੍ਦੋ ਉਪ੍ਪਜ੍ਜਤੀਤਿਚ ਪੁਰਿਮਚਿਤ੍ਤਸਮੁਟ੍ਠਾ ਨਾਯ ਉਪਤ੍ਥਮ੍ਭਨਕਿਚ੍ਚਂਪਿ ਨਤ੍ਥੀਤਿਚ ਵੁਤ੍ਤਂ. ਤਂਪਿ ਅਨੇਕਸਤੇਸੁ ਜਵਨਵਾਰੇਸੁ ਪਵਤ੍ਤਮਾਨੇਸੁ ਯਸ੍ਮਿਂਵਾਰੇ ਪਰਿਬ੍ਯਤ੍ਤਂ ਅਕ੍ਖਰਂ ਪਵਤ੍ਤਤਿ, ਤਂ ਸਨ੍ਧਾਯ ਵੁਤ੍ਤਨ੍ਤਿ ਗਹੇਤਬ੍ਬਂ. ਤੇਨੇਵ ਹਿ ਮੂਲ ਟੀਕਾਯਂ ਉਪਤ੍ਥਮ੍ਭਨਕਿਚ੍ਚਂ ਨਤ੍ਥਿ ਲਦ੍ਧਾਸੇਵਨੇਨ ਚਿਤ੍ਤੇਨੇਵ ਘਟ੍ਟਨਸ੍ਸ ਬਲਵਭਾਵਤੋਤਿ ਵੁਤ੍ਤਂ. ਏਤ੍ਥਚ ਲਦ੍ਧਾਸੇਵਨੇਨਾਤਿ ਏਤੇਨ ਪੁਬ੍ਬਭਾਗੇ ਨਾਨਾਜਵਨਵੀਥੀਹਿ ਲਦ੍ਧਾਸੇਵਨਭਾਵਂ ਦਸ੍ਸੇਤਿ. ਪਥਮ ਜਵਨਚਿਤ੍ਤਸ੍ਸਪਿ ਲਦ੍ਧਾਸੇਵਨਤਾਯ ਅਧਿਪ੍ਪੇਤਤ੍ਤਾ. ਨਚ ਏਕਜਵਨ ਵਾਰਮਤ੍ਤੇਨ ਪਰਿਬ੍ਯਤ੍ਤਂ ਏਕਕ੍ਖਰਂ ਸਮ੍ਪਜ੍ਜਤੀਤਿ ਸਕ੍ਕਾ ਵਿਞ੍ਞਾਤੁਂ. ਕਸ੍ਮਾ, ਤਸ੍ਸ ਏਕਦ੍ਵਿਅਚ੍ਛਰਕ੍ਖਣਮਤ੍ਤੇਨ ਕਾਲੇਨ ਵਤ੍ਤਬ੍ਬਤ੍ਤਾ ਏਕਚ੍ਛਰਕ੍ਖਣੇਚ ਅਨੇਕਸਤਸਹਸ੍ਸਾਨਂ ਜਵਨਵੀਥੀਨਂ ਪਵਤ੍ਤਿਸਮ੍ਭਵਤੋ. ਵੁਤ੍ਤਞ੍ਚ –

ਏਕਮਤ੍ਤਾ ਤਯੋ ਰਸ੍ਸਾ, ਦ੍ਵਿਮਤ੍ਤਾ ਦੀਘਮੁਚ੍ਚਰੇ;

ਤਿਮਤ੍ਤੋ ਤੁ ਗੀਤੋ ਞੇਯ੍ਯੋ, ਬ੍ਯਞ੍ਜਨਾ ਅਡ੍ਢਮਤ੍ਤਿਕਾਤਿ.

ਮਿਲਿਨ੍ਦਪਞ੍ਹੇਚ ਸਾਧਿਕੇ ਵੀਹਿਵਾਹਸਤੇ ਵੀਹਿਬੀਜਾਨਿ ਏਕਚ੍ਛਰਕ੍ਖਣੇ ਉਪ੍ਪਨ੍ਨਸ੍ਸ ਚਿਤ੍ਤਸ੍ਸ ਕਲਂਪਿ ਨਉਪੇਨ੍ਤਿ. ਕਲਭਾਗਂਪਿ ਨਉਪੇਨ੍ਤੀਤਿ ਦੀਪਿਤਂ. ਏਕਕ੍ਖਰਂ ਉਚ੍ਚਾਰੇਨ੍ਤਸ੍ਸਚ ਤਤ੍ਤਕਂਪਿ ਕਾਲਂ ਉਚ੍ਚਾਰਣਚਿਤ੍ਤਬ੍ਯਾਪਾਰੋ ਸਨ੍ਦਿਸ੍ਸਤਿਯੇਵ. ਨਚ ਪਰਮਤ੍ਥਤੋ ਏਕਮੇਵ ਸਦ੍ਦਂ ਉਚ੍ਚਾਰੇਮੀਤਿਵਾ ਸੁਣੋਮੀਤਿਵਾ ਸਕ੍ਕਾ ਨਿਯਮੇਤ੍ਵਾ ਉਚ੍ਚਾਰੇਤੁਂ ਸੋਤੁਞ੍ਚ. ਤਥਾ ਨਿਯਮੇਨ੍ਤਸ੍ਸਪਿ ਸਦ੍ਦਾਨਂ ਪੁਬ੍ਬਾਪਰਤੋ ਅਨੇਕਸਤਸਹਸ੍ਸਸ੍ਸੇਵ ਉਚ੍ਚਾਰਣ ਸਵਨ ਸਮ੍ਭਵਤੋ. ਏਕਮੇਵਾਤਿ ਅਭਿਮਾਨੋ ਪਨ ਸਮੂਹਘਨ ਸਨ੍ਤਤਿਘਨੇਹਿ ਪਟਿਚ੍ਛਨ੍ਨਤ੍ਤਾਏਵ ਹੋਤੀਤਿ ਦਟ੍ਠਬ੍ਬਂ. ਸੇਸਮੇਤ੍ਥ ਕਾਯਵਿਞ੍ਞਤ੍ਤਿਯਂ ਵੁਤ੍ਤਨ ਯੇਨ ਯਥਾਸਮ੍ਭਵਂ ਵੇਦਿਤਬ੍ਬਨ੍ਤਿ. ਏਤ੍ਥਚ ਵਿਞ੍ਞਤ੍ਤਿਸਦ੍ਦੋ ਕਾਯੇਨ ਵਿਞ੍ਞਾਪੇਤਿ ਵਾਚਾਯ ਵਿਞ੍ਞਾਪੇਤੀਤਿਆਦਿਸੁ ਬੋਧਨਤ੍ਥੋ. ਸੁਦਿਨ੍ਨ ਕਣ੍ਡੇ ਤਿਕ੍ਖਤ੍ਤੁਂ ਵਿਞ੍ਞਾਪੇਤੀਤਿਆਦੀਸੁ ਪਵਤ੍ਤਨਤ੍ਥੋ. ਇਧ ਪਨ ਦੁਵਿਧੋਪਿ ਯੁਜ੍ਜਤਿ. ਏਵਞ੍ਹਿ ਸਤਿ ਪਰਂ ਬੋਧੇਤੁਕਾਮਤਾਰਹਿ ਤੇਸੁ ਸਬ੍ਬੇਸੁ ਕਾਯਙ੍ਗਵਾਚਙ੍ਗਚੋਪਨੇਸੁਪਿ ਪਵਤ੍ਤਕਵਿਞ੍ਞਤ੍ਤਿਯਾ ਲਬ੍ਭਮਾਨਤਾ ਵੇਦਿਤਬ੍ਬਾ ਹੋਤੀਤਿ. ਮੂਲਟੀਕਾਯਂ ਪਨ ਪਰਂ ਬੋਧੇਤੁਕਾਮਤਾਯ ਵਿਨਾਪਿ ਅਭਿਕ੍ਕਮਨਾਦਿਪਵਤ੍ਤਨੇਨ ਸੋ ਚਿਤ੍ਤ ਸਹਭੂਵਿਕਾਰੋ ਅਧਿਪ੍ਪਾਯਂ ਵਿਞ੍ਞਾਪੇਤਿ. ਸਯਞ੍ਚ ਵਿਞ੍ਞਾਯਤੀਤਿ ਦ੍ਵਿਧਾਪਿ ਵਿਞ੍ਞਤ੍ਤਿਯੇਵਾਤਿ ਵੁਤ੍ਤਂ, ਤਤ੍ਥ ਦ੍ਵੀਸੁ ਬੋਧਨਵਿਞ੍ਞਤ੍ਤੀਸੁ ਪੁਰਿਮਾ ਕਾਯਵਿਞ੍ਞਤ੍ਤਿ ਅਙ੍ਗਪਚ੍ਚਙ੍ਗਸ੍ਸ ਚਲਮਾਨਵਣ੍ਣਂ ਚਕ੍ਖੁਵਿਞ੍ਞਾਣਵੀਥਿਯਾ ਚਲਮਾਨਙ੍ਗਪਚ੍ਚਙ੍ਗਂ ਕਾਯਵਿਞ੍ਞਾਣਵੀਥਿਯਾ ਗਹੇਤ੍ਵਾ ਪਚ੍ਛਾ ਸੁਦ੍ਧੇਨ ਮਨੋਦ੍ਵਾਰਿਕਜਵਨੇਨਏਵ ਵਿਞ੍ਞਾਯਤਿ ਪਚ੍ਛਿਮਾਚ ਵਚੀਵਿਞ੍ਞਤ੍ਤਿ ਉਚ੍ਚਾਰਿਯਮਾਨਂ ਸਦ੍ਦਂ ਸੋਤਵਿਞ੍ਞਾਣਵੀਥਿਯਾ ਗਹੇਤ੍ਵਾ ਪਚ੍ਛਾ ਸੁਦ੍ਧੇਨ ਮਨੋਦ੍ਵਾਰਿਕਜਵਨੇਨਏਵ ਵਿਞ੍ਞਾਯਤਿ, ਨ ਪਞ੍ਚਦ੍ਵਾਰਿਕਜਵਨੇਨ. ਸਾ ਹਿ ਅਤ੍ਤਾਨਂ ਜਾਨਨ੍ਤੇਏਵ ਪਰਸਤ੍ਤੇ ਅਤ੍ਤਨਾ ਸਮਙ੍ਗਿਨੋ ਪੁਗ੍ਗਲਸ੍ਸ ਚਿਤ੍ਤਂ ਵਿਞ੍ਞਾਪੇਤਿ, ਨ ਅਜਾਨਨ੍ਤੇ. ਞਾਪਕ ਹੇਤੁ ਹਿ ਨਾਮ ਅਤ੍ਤਾਨਂ ਜਾਨਨ੍ਤੇਏਵ ਞਾਪੇਤਬ੍ਬਂ ਞਾਪੇਤਿ, ਨੋ ਅਜਾਨਨ੍ਤੇ. ਏਵਞ੍ਚ ਕਤ੍ਵਾ ਕਾਯਙ੍ਗ ਚੋਪਨਂ ਦਿਸ੍ਵਾਵਾ ਪਰਾਮਸਿਤ੍ਵਾਵਾ ਸਦ੍ਦਂ ਸੁਤ੍ਵਾਵਾ ਪਰਸ੍ਸ ਤਂਤਂਅਧਿਪ੍ਪਾਯਂ ਜਾਨਨ੍ਤਾਨਂ ਤਿਰਚ੍ਛਾਨ ਗਤਾਨਂਪਿ ਪਥਧਂ ਵਿਞ੍ਞਤ੍ਤਿਜਾਨਨਂ ਸਿਦ੍ਧਂ ਭਵਤਿ. ਤਂਜਾਨਨੇਨ ਵਿਨਾ ਅਧਿਪ੍ਪਾਯਜਾਨਨਸ੍ਸ ਅਸਮ੍ਭਵਤੋ. ਵਿਞ੍ਞਤ੍ਤਿਂ ਜਾਨਨ੍ਤਾਨਂਚ ਪੁਰਿਮਸਿਦ੍ਧਸਙ੍ਕੇਤ ਸਮ੍ਬਨ੍ਧ ਜਾਨਨੇਨ ਵਿਨਾ ਅਧਿਪ੍ਪਾਯਜਾਨਨਂ ਨ ਸਮ੍ਭਵਤੀਤਿ ਮਜ੍ਝੇ ਵਿਸੁਂ ਪੁਬ੍ਬਸਙ੍ਕੇਤ ਸਮ੍ਬਨ੍ਧਗਹਨਂਪਿ ਇਚ੍ਛਨ੍ਤਿ, ਦ੍ਵੀਸੁ ਪਨ ਪਵਤ੍ਤਕਵਿਞ੍ਞਤ੍ਤੀਸੁ ਪਰਂ ਅਭਿਕ੍ਕਮਨ੍ਤਂ ਚਕ੍ਖੁਵਿਞ੍ਞਾਣਵੀਥਿਯਾ ਦਿਸ੍ਵਾ ਅਭਿਕ੍ਕਮਨਵਿਞ੍ਞਤ੍ਤਿਞ੍ਚ ਅਭਿਕ੍ਕਮਨਚਿਤ੍ਤਞ੍ਚ ਮਨੋਵਿਞ੍ਞਾਣਵੀਥਿਯਾ ਜਾਨਨ੍ਤਿ. ਏਸਨਯੋ ਪਟਿਕ੍ਕਮਨਾਦੀਸੁ. ਤਥਾ ਪਰਸ੍ਸ ਕਥਂ ਸੋਤਵਿਞ੍ਞਾਣਵੀਥਿਯਾ ਸੁਤ੍ਵਾ ਕਥਨਵਿਞ੍ਞਤ੍ਤਿਞ੍ਚ ਕਥਨਚਿਤ੍ਤਞ੍ਚ ਮਨੋਵਿਞ੍ਞਾਣਵੀਥਿਯਾ ਜਾਨਨ੍ਤਿ. ਪਰਂ ਰਤ੍ਤਚਿਤ੍ਤੇਨ ਕਾਯਙ੍ਗਂ ਚਾਲੇਨ੍ਤਂ ਦਿਸ੍ਵਾ ਚਲਨਵਿਞ੍ਞਤ੍ਤਿਞ੍ਚ ਰਾਗਚਿਤ੍ਤਞ੍ਚ ਜਾਨਨ੍ਤਿ. ਰਤ੍ਤਸ੍ਸ ਕਥਂ ਸੁਤ੍ਵਾ ਕਥਨ ਵਿਞ੍ਞਤ੍ਤਿਞ੍ਚ ਰਾਗਚਿਤ੍ਤਞ੍ਚ ਜਾਨਨ੍ਤਿ. ਏਸਨਯੋ ਸਬ੍ਬਾਸੁ ਕਾਯਿਕਵਾਚਸਿਕਕ੍ਰਿਯਾਸੂਤਿ. ਲਹੁਨੋ ਭਾਵੋ ਲਹੁਤਾ. ਮੁਦੁਨੋ ਭਾਵੋ ਮੁਦੁਤਾ. ਕਮ੍ਮਨਿ ਸਾਧੁ ਕਮ੍ਮਞ੍ਞਂ. ਕਮ੍ਮਯੋਗ੍ਯਨ੍ਤਿ ਅਤ੍ਥੋ. ਕਮ੍ਮਞ੍ਞਸ੍ਸ ਭਾਵੋ ਕਮ੍ਮਞ੍ਞਤਾ.

ਅਦਨ੍ਧਤਾਲਕ੍ਖਣਾ ਰੂਪਸ੍ਸ ਲਹੁਤਾ. ਅਥਦ੍ਧਤਾ ਲਕ੍ਖਣਾ ਰੂਪਸ੍ਸ ਮੁਦੁਤਾ. ਸਰੀਰਕ੍ਰਿਯਾਨੁਕੂਲਕਮ੍ਮਞ੍ਞਭਾਵਲਕ੍ਖਣਾ ਰੂਪਸ੍ਸ ਕਮ੍ਮਞ੍ਞਤਾ. ਅਞ੍ਞਮਞ੍ਞਂ ਅਵਿਜਹਨ੍ਤਿਯੋਪਿ ਏਤਾ ਵਿਰੁਦ੍ਧਪਚ੍ਚਯਸਪ੍ਪਾਯ ਪਚ੍ਚਯਾਨਂ ਵਸੇਨ ਅਸਂਮਿਸ੍ਸਤੋ ਵੇਦਿਤਬ੍ਬਾ. ਤਥਾ ਹਿ ਅਤ੍ਤਨੋ ਕਾਯਵਿਰੁਦ੍ਧਂ ਉਤੁਂਵਾ ਆਹਾਰਂਵਾ ਚਿਤ੍ਤਕ੍ਰਿਯਂਵਾ ਸੇਵਨ੍ਤਾਨਂ ਸਰੀਰਗਤਾ ਧਾਤੁਯੋ ਕਦਾਚਿ ਸਕਲਸਰੀਰਂਵਾ ਸਰੀਰੇਕਦੇਸਂਵਾ ਖੋਭੇਤ੍ਵਾ ਵਿਸੇਸਤੋ ਪੂਤਿਮੁਖ ਸਪ੍ਪਸਙ੍ਖਾਤਆਪੋ ਪਰਿਯੁਟ੍ਠਾਨਂ ਕਤ੍ਵਾ ਕਾਯਂ ਅਸਯ੍ਹਭਾਰਂ ਵਿਯ ਗਰੁਂ ਭਾਰਿਯਂ ਕਰੋਨ੍ਤਿ. ਇਰਿਯਾ ਪਥਪਰਿਵਤ੍ਤਨੇ ਕਾਯਭਾਰਿਯਨਿਮਿਤ੍ਤਂ ਦੁਕ੍ਖਂ ਉਪ੍ਪਾਦੇਨ੍ਤਿ. ਤਦਾਰੂਪਸ੍ਸ ਲਹੁਤਾ ਨਪਵਤ੍ਤਤਿ. ਪੁਨ ਅਤ੍ਤਨੋ ਸਰੀਰਸਪ੍ਪਾਯਂ ਉਤੁਂਵਾ ਆਹਾਰਂਵਾ ਚਿਤ੍ਤਕਿਰਿਯਂਵਾ ਸੇਵਨ੍ਤਾਨਂ ਸੋ ਧਾਤੁਕ੍ਖੋਭੋ ਵੂਪਸਮ੍ਮਤਿ. ਕਾਯੋ ਸਲ੍ਲਹੁਕੋ ਹੋਤਿ. ਇਰਿਯਾਪਥਪਰਿਵਤ੍ਤਨੇ ਕਾਯ ਭਾਰਿਯਨਿਮਿਤ੍ਤਂ ਦੁਕ੍ਖਂਨਾਮ ਨਤ੍ਥਿ. ਤਦਾ ਸਾ ਪਵਤ੍ਤਤਿ. ਏਸਨਯੋ ਸੇਸਾਸੁਪਿ. ਵਿਸੇਸਨਤੋ ਪਨੇਤ੍ਥ ਮੁਦੁਭਾਯਂ ਕਟ੍ਠਮੁਖਸਪ੍ਪਸਙ੍ਖਾਤ ਪਥਵੀਪਰਿਯੁਟ੍ਠਾਨਂ ਕਤ੍ਵਾ ਸੁਕ੍ਖਕਟ੍ਠਂਵਿਯ ਕਾਯਂ ਥਦ੍ਧਂ ਕਕ੍ਖਲ਼ਂਕਰੋਨ੍ਤਿ. ਇਰਿਯਾਪਥਪਰਿਵਤ੍ਤਨੇ ਅਙ੍ਗਮਙ੍ਗਾਨਂਛਿਜ੍ਜਨਭਿਜ੍ਜਨਾਕਾਰਪਤ੍ਤਂ ਥਦ੍ਧਂ ਕਕ੍ਖਲ਼ਨਿਮਿਤ੍ਤਂ ਦੁਕ੍ਖਂ ਉਪ੍ਪਾਦੇਨ੍ਤੀਤਿ ਵਤ੍ਤਬ੍ਬਂ. ਕਮ੍ਮਞ੍ਞਤਾਯਂ ਸਤ੍ਥਮੁਖਸਪ੍ਪਸਙ੍ਖਾਤ ਵਾਯੋ ਪਰਿਯੁਟ੍ਠਾਨਂ ਵਾਯੋਵਿਸਮਂ ਕਤ੍ਵਾ ਦਾਮਰਿਕਚੋਰਪਰਿਯੁਟ੍ਠਿਤਂ ਪਚ੍ਚਨ੍ਤਰਟ੍ਠਂ ਵਿਯ ਕਾਯਂ ਵਿਵਟ੍ਟਮਾਨਂ ਕਰੋਨ੍ਤਿ, ਸਬ੍ਬਇਰਿਯਾਪਥੇਸੁ ਸੁਖਂਨਾਮ ਨਤ੍ਥੀਤਿ ਵਤ੍ਤਬ੍ਬਂ. ਤੇਜੋਧਾਤੁ ਪਨ ਤਾਸਂ ਸਬ੍ਬਾਸਂਪਿ ਮੂਲਭੂਤਾ ਹੋਤੀਤਿ ਵੇਦਿਤਬ੍ਬਾ.

ਇਮਾ ਪਨ ਅਰੋਗਿਨੋ ਕਲ੍ਲਭਾਵੋਵਿਯ ਸੁਪਰਿਮਦ੍ਦਿਤਚਮ੍ਮਸ੍ਸ ਮੁਦੁਭਾਵੋਵਿਯ ਸੁਦਨ੍ਧਸੁਵਣ੍ਣਸ੍ਸ ਕਮ੍ਮਕ੍ਖਮਭਾਵੋਵਿਯ ਰੂਪਕਾਯਸ੍ਸ ਇਰਿਯਾਪਥਪਰਿਵਤ੍ਤਨੇ ਸਲ੍ਲਹੁਕਤਾਦਿਵਸੇਨ ਸਨ੍ਦਿਸ੍ਸਮਾਨਾ ਵਿਸੇਸਾਕਾਰਾ ਹੋਨ੍ਤੀਤਿ ਕਤ੍ਵਾ ਵਿਕਾਰਰੂਪਂ ਨਾਮ. ਚਯਨਂ ਚਯੋ. ਪਿਣ੍ਡਵਸੇਨ ਅਭਿਨਿਬ੍ਬਤ੍ਤੀਤਿ ਅਤ੍ਥੋ. ਆਦਿਤੋ ਉਪਰਿਤੋਚ ਚਯੋ ਉਪਚਯੋ. ਪਥਮਾਭਿਨਿਬ੍ਬਤ੍ਤਿ ਉਪਰੁਪਰਿਵਡ੍ਢਿਚਾਤਿ ਅਤ੍ਥੋ. ਅਯਞ੍ਹਿ ਉਪਸਦ੍ਦੋ ਉਪਞ੍ਞਤ੍ਤਨ੍ਤਿਆਦੀਸੁ ਵਿਯ ਪਥਮਤ੍ਥੋ ਉਪਸਿਤ੍ਤਨ੍ਤਿਆਦੀਸੁ ਵਿਯਚ ਉਪਰਿ ਅਤ੍ਥੋਤਿ. ਵੁਤ੍ਤਞ੍ਚ ਮੂਲਟੀਕਾਯਂ ਉਪਸਦ੍ਦੋ ਪਥਮਤ੍ਥੋ ਉਪਰਿਅਤ੍ਥੋਚ ਹੋਤੀਤਿ. ਤੇਨੇਵਹਿ ਪਾਲ਼ਿਯਂ ਯੋ ਆਯਤਨਾਨਂ ਆਚਯੋ, ਸੋ ਰੂਪਸ੍ਸ ਉਪਚਯੋ. ਯੋਰੂਪਸ੍ਸ ਉਪਚਯੋ, ਸਾ ਰੂਪਸ੍ਸ ਸਨ੍ਤਤੀਤਿ ਵੁਤ੍ਤਂ. ਤਨਨਂ ਵਿਤ੍ਥਾਰਣਂ ਤਤਿ. ਸਮ੍ਬਨ੍ਧਾ ਤਤਿ ਪੁਨਪ੍ਪੁਨਂਵਾ ਤਤਿ ਸਨ੍ਤਤਿ. ਯਥਾ ਪਵਤ੍ਤਾਨਂ ਆਯਤਨਾਨਂ ਅਦ੍ਧਾਨਪੂਰਣਵਸੇਨ ਪਵਤ੍ਤੀਤਿ ਅਤ੍ਥੋ. ਤਤ੍ਥ ਗਬ੍ਭਸੇਯ੍ਯਕਾਨਂ ਸਤ੍ਤਾਨਂ ਪਟਿਸਨ੍ਧਿਕ੍ਖਣੇ ਰੂਪਾਨਂ ਉਪ੍ਪਾਦੋ ਪਥਮਾਨਿਬ੍ਬਤ੍ਤਿਅਤ੍ਥੇਨ ਉਪਚਯੋਨਾਮ. ਤਤੋ ਪਰਂ ਯਾਵ ਸਬ੍ਬਪਥਮਂ ਉਪ੍ਪਨ੍ਨਾਨਂ ਚਕ੍ਖੁ ਸੋਤ ਘਾਨਜਿਵ੍ਹਾਨਂ ਉਪ੍ਪਾਦੋ, ਏਤ੍ਥਨ੍ਤਰੇ ਰੂਪਾਨਂ ਉਪ੍ਪਾਦੋ ਉਪਰਿ ਵਡ੍ਢਿਅਤ੍ਥੇਨ ਉਪਚਯੋਨਾਮ. ਤਤੋ ਪਰਂ ਯਾਵਜੀਵਂ ਚਤੁਸਨ੍ਤਤਿਰੂਪਾਨਂ ਉਪ੍ਪਾਦੋ ਸਨ੍ਤਤਿਨਾਮ. ਵੁਤ੍ਤਞ੍ਹੇਤਂ ਅਟ੍ਠਕਥਾਯਂ ਨਦੀਤੀਰੇ ਨਿਖਾਤਕੂਪਸ੍ਮਿਂ ਉਦਕੁਗ੍ਗਮਨਕਾਲੋਵਿਯ ਆਚਯੋ ਨਿਬ੍ਬਤ੍ਤਿ. ਪਰਿਪੁਣ੍ਣਕਾਲੋਵਿਯ ਉਪਚਯੋ ਵਡ੍ਢਿ. ਅਜ੍ਝੋਤ੍ਥਰਿਤ੍ਵਾ ਗਮਨਕਾਲੋ ਵਿਯ ਸਨ੍ਤਤਿ ਪਵਤ੍ਤੀਤਿ.

ਵਿਭਾਵਨਿਯਂ ਪਨ

ਪਟਿਸਨ੍ਧਿਤੋ ਪਟ੍ਠਾਯ ਯਾਵਚਕ੍ਖਾਦਿ ਦਸਕਾਨਂ ਉਪ੍ਪਤ੍ਤਿ. ਏਤ੍ਥਨ੍ਤਰੇ ਰੂਪੁਪ੍ਪਾਦੋ ਉਪਚਯੋਨਾਮ. ਤਤੋ ਪਰਂ ਸਨ੍ਤਤਿ ਨਾਮਾਤਿ ਵੁਤ੍ਤਂ. ਤਂਪਿ ਤੇਨ ਪਰਿਯਾਯੇਨ ਯੁਜ੍ਜਤਿਯੇਵ.

ਸਂਸੇਦਜੋਪਵਾਤਿਕਾਨਂ ਪਨ ਪਟਿਸਨ੍ਧਿਕ੍ਖਣੇ ਰੂਪਾਨਂ ਉਪ੍ਪਾਦੋ ਪਥਮਾ ਭਿਨਿਬ੍ਬਤ੍ਤਿ ਅਤ੍ਥੇਨ ਪਰਿਪੁਣ੍ਣ ਵਡ੍ਢਿ ਅਤ੍ਥੇਨਚ ਉਪਚਯੋ ਨਾਮ, ਤਤੋ ਪਰਂ ਰੂਪਾਨਂ ਉਪ੍ਪਾਦੋ ਸਨ੍ਤਤਿਨਾਮ. ਅਪਿਚ, ਤਿਸਮੁਟ੍ਠਾਨਿਕ ਰੂਪਾਨਂਪਿ ਵਿਸੁਂ ਵਿਸੁਂ ਸਨ੍ਤਤਿਪਚ੍ਚੁਪ੍ਪਨ੍ਨਂਨਾਮ ਅਤ੍ਥਿ. ਤਸ੍ਸਚ ਏਕੇਕਸ੍ਸ ਨਿਬ੍ਬਤ੍ਤਿ ਵਡ੍ਢਿ ਪਵਤ੍ਤਿ ਵਸੇਨ ਤਿਸ੍ਸੋ ਤਿਸ੍ਸੋਅਵਤ੍ਥਾ ਹੋਨ੍ਤਿ. ਤਤ੍ਥ ਏਕੇਕਸਨ੍ਤਤਿਯਂ ਆਦਿਮ੍ਹਿ ਸਨ੍ਤਤਿਸੀਸਰੂਪਾਨਂ ਸਬ੍ਬਪਥਮਂ ਉਪ੍ਪਾਦੋ ਨਿਬ੍ਬਤ੍ਤਿਨਾਮ. ਤਤੋ ਵਡ੍ਢਨਰੂਪਾਨਂ ਉਪ੍ਪਾਦੋ ਵਡ੍ਢੀਨਾਮ. ਵਡ੍ਢਨੇ ਸਮਤ੍ਤੇ ਅਵਡ੍ਢਿਤ੍ਵਾ ਪਬਨ੍ਧਟ੍ਠਿਤਿਵਸੇਨ ਵਤ੍ਤਨਵਸੇਨਉਪ੍ਪਾਦੋਪਵਤ੍ਤਿਨਾਮ. ਤਤ੍ਥ ਚ ਨਿਬ੍ਬਤ੍ਤਿਵਡ੍ਢਿਯੋ ਉਪਚਯੋਨਾਮ. ਪਵਤ੍ਤਿਸਨ੍ਤਤਿ ਨਾਮ. ਸਙ੍ਖੇਪਤੋ ਪਨ ਲੋਕੇ ਸਬ੍ਬਾਸੁ ਇਨ੍ਦ੍ਰਿਯਾਨਿਨ੍ਦ੍ਰਿਯਬਦ੍ਧਰੂਪਪਵਤ੍ਤੀਸੁ ਸਨ੍ਦਿਸ੍ਸਮਾਨੇ ਜਾਯਨ ਵਡ੍ਢਨ ਪਵਤ੍ਤਨਸਙ੍ਖਾਤੇ ਅਵਤ੍ਥਾਭੇਦੇ ਦਿਸ੍ਵਾ ਉਪਚਯਸਨ੍ਤ ਤਿਯੋ ਵੇਦਿਤਬ੍ਬਾ. ਤਤ੍ਰਾਯਂ ਨਯੋ-ਰੁਕ੍ਖਤਿਣਾਦੀਨਿਵਾ ਸਾਖਾ ਪਤ੍ਤਪੁਪ੍ਫਫਲਾਦੀਨਿਵਾ ਆਦਿਮ੍ਹਿ ਜਾਯਨ੍ਤਿ. ਜਾਯਿਤ੍ਵਾ ਵਡ੍ਢਨ੍ਤਿ. ਵਡ੍ਢਨੇ ਸਮਤ੍ਤੇ ਅਵਡ੍ਢਿਤ੍ਵਾ ਪਬਨ੍ਧਵਸੇਨ ਪਵਤ੍ਤਿਤ੍ਵਾ ਭਿਜ੍ਜਨ੍ਤੀਤਿ. ਜੀਰਣਂ ਜਰਾ, ਜੀਰਨ੍ਤਿ ਜਿਣ੍ਣਭਾਵਂ ਗਚ੍ਛਨ੍ਤਿ ਏਤਾਯਾਤਿ ਜਰਾ. ਸਾਯੇਵ ਜਰਤਾ. ਉਪ੍ਪਾਦਜਰਾਭਙ੍ਗੇਹਿ ਨਿਚ੍ਚਲਤਿ ਨਕਮ੍ਪਤੀਤਿ ਨਿਚ੍ਚੋ ਅਸਙ੍ਖਤ ਧਮ੍ਮੋ. ਨ ਨਿਚ੍ਚੋ ਅਨਿਚ੍ਚੋ, ਸਙ੍ਖਤਧਮ੍ਮੋ. ਅਨਿਚ੍ਚਸ੍ਸ ਭਾਵੋ ਅਨਿਚ੍ਚਤਾ, ਭਙ੍ਗੋ.

[੧੮੩] ਵਿਭਾਵਨਿਯਂ ਪਨ

‘‘ਨਿਚ੍ਚਧੁਵਭਾਵੇਨ ਨ ਇਚ੍ਚਂ ਅਨੁਗਨ੍ਤਬ੍ਬਨ੍ਤਿ ਅਨਿਚ੍ਚ’’ਨ੍ਤਿ ਵੁਤ੍ਤਂ. ਤਂ ਨ ਸੁਨ੍ਦਰਂ.

ਨਿਚ੍ਚਸਦ੍ਦੋ ਹਿ ਸਾਸਨੇ ਲੋਕੇਚ ਪਾਕਟੋ. ਸੋ ਏਵ ਇਧ ਨਕਾਰਯੁਤ੍ਤੋ ਅਨਿਚ੍ਚੋਤਿ ਵੁਤ੍ਤੋਤਿ. ਲਕ੍ਖੀਯਨ੍ਤਿ ਸਲ੍ਲਕ੍ਖੀਯਨ੍ਤਿ ਵਿਨਿਚ੍ਛੀਯਨ੍ਤਿ ਧਮ੍ਮਾ ਇਮੇ ਸਙ੍ਖਤਾਤਿ ਏਤੇਨਾਤਿ ਲਕ੍ਖਣਂ. ਸਙ੍ਖਤ ਭਾਵਜਾਨਨਨਿਮਿਤਨ੍ਤਿ ਅਤ੍ਥੋ. ਯਥਾਹ- ਅਙ੍ਗੁਤ੍ਤਰੇ ਤੀਣਿ ਮਾਨਿ ਭਿਕ੍ਖਵੇ ਸਙ੍ਖਤਸ੍ਸ ਸਙ੍ਖਤਲਕ੍ਖਣਾਨਿ. ਕਤਮਾਨਿ ਤੀਣਿ, ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਸ੍ਸ ਅਞ੍ਞਥਤ੍ਤਂ ਪਞ੍ਞਾਯਤੀਤਿ. ਨਨੁ ਪਾਲ਼ਿਯਂ ਜਾਤਿਨਾਮ ਆਗਤਾ. ਤਸ੍ਮਾ ਸਾਪਿ ਇਧ ਵਤ੍ਤਬ੍ਬਾਤਿ ਵੁਤ੍ਤਂ ਜਾਤਿਰੂਪਮੇਵਾਤਿਆਦਿ. ਏਤ੍ਥਾਤਿ ਰੂਪਸਮੁਦ੍ਦੇਸੇ. ਜਨਨਂ ਪਾਤੁਭਵਨਂ ਜਾਤਿ. ਜਾਯਨ੍ਤਿਵਾ ਏਤਾਯਾਤਿ ਜਾਤਿ, ਉਪਚਯ ਸਨ੍ਤਤਿ ਨਾਮੇਨਪਵੁਚ੍ਚਤਿ ਤਸ੍ਸਾਜਾਤਿਯਾਤਥਾ ਅਵਤ੍ਥਾਭੇਦਯੋਗਤੋਤਿ ਅਧਿਪ੍ਪਾਯੋ. ਸਾ ਹਿ ਆਦਿਤੋ ਪਟਿਸਨ੍ਧਿਰੂਪਾਨਿ ਪਾਤੁਭਵਨ੍ਤਾਨਿ ਕਰੋਤਿ. ਪੁਨ ਅਪਰਿਪੁਣ੍ਣਾਨਿਚ ਆਯਤਨਾਨਿ ਪੂਰੇਤਿ. ਪੂਰਿਤਾਨਿ ਚ ਦੀਘਂਪਿ ਅਦ੍ਧਾਨਂ ਅਬ੍ਬੋਚ੍ਛਿਨ੍ਨਂ ਕਤ੍ਵਾ ਪਵਤ੍ਤੇਤਿ ਪਬਨ੍ਧਯਤੀਤਿ. ਏਕਾ ਦਸਵਿਧਂਪੀਤਿ ਮਹਾਭੂਤਾਦਿਭਾਵੇਨ ਏਕਤ੍ਤਂ ਉਪਨਯਨਵਸੇਨ ਏਕਾ ਦਸਪਭੇਦਂਪਿ. ਕਥਂ ਸਰੂਪਵਸੇਨ ਅਟ੍ਠਵੀਸਤਿਵਿਧਂ ਹੋਤੀਤਿ ਪੁਚ੍ਛਿਤ੍ਵਾ ਭੂਤਪ੍ਪਸਾਦ ਵਿਸਯਾਤਿਆਦਿਨਾ ਏਕਾਦਸਵਿਧਸ੍ਸੇਵ ਸਰੂਪਤੋ ਦਸ੍ਸਨਂ ਅਨ੍ਤੋਗਧਭੇਦਾਨਂ ਪੁਬ੍ਬੇ ਵੁਤ੍ਤਭਾਵੇਨ ਸੁਪਾਕਟਤ੍ਤਾਤਿ ਦਟ੍ਠਬ੍ਬਂ. ਤੇਨਾਹ-ਅਟ੍ਠਾਰਸਵਿਧਨ੍ਤਿ.

ਚਤ੍ਤਾਰਿ ਭੂਤਾਨਿ ਪਞ੍ਚਪਸਾਦਾ ਅਗਹਿਤਗਹਣੇਨ ਚਤ੍ਤਾਰੋ ਵਿਸਯਾ ਗੋਚਰਾ. ਦੁਵਿਧੋ ਭਾਵੋ. ਏਕਂ ਹਦਯਂ. ਇਤਿ ਇਦਂ ਸੋਲ਼ਸਵਿਧਂ ਰੂਪਂ ਜੀਵਿਤਾਹਾਰਰੂਪੇਹਿ ਸਹ ਅਟ੍ਠਾਰਸਵਿਧਂ ਹੋਤਿ ਤਥਾ ਏਕੋ ਪਰਿਚ੍ਛੇਦੋ. ਦੁਵਿਧਾ ਵਿਞ੍ਞਤ੍ਤਿ. ਅਗਹਿਤਗਹਣੇਨ ਤਿਵਿਧੋ ਵਿਕਾਰੋ. ਚਤੁਬ੍ਬਿਧਂ ਲਕ੍ਖਣਨ੍ਤਿ ਦਸ ਅਨਿਪ੍ਫਨ੍ਨਾਚਾਤਿ ਰੂਪਂ ਸਰੂਪਤੋ ਅਟ੍ਠਵੀਸਤਿਵਿਧਂ ਭਵੇਤਿ ਯੋਜਨਾ. ਏਤ੍ਥਚ ਪਚ੍ਛਿਮਾਨਿ ਦਸਰੂਪਾਨਿ ਸਭਾਵਤੋ ਅਨੁਪਲਬ੍ਭਮਾਨਤ੍ਤਾ ਪਚ੍ਚਯੇਹਿ ਨਿਪ੍ਫਾਦਿਤਾਨਿ ਰੂਪਾਨਿ ਨ ਹੋਨ੍ਤੀਤਿ ਅਨਿਪ੍ਫਨ੍ਨਾਨਿ ਨਾਮ. ਅਪਿ ਚੇਤ੍ਥ ਅਭਿਧਮ੍ਮੇ ਵਿਸੁਂ ਉਦ੍ਦਿਟ੍ਠਾਨਿ ਨਿਦ੍ਦਿਟ੍ਠਾਨਿਚ ਏਤਾਨਿ ਸਭਾਵਤੋ ਅਨੁਪਲਬ੍ਭਮਾਨਾਨੀਤਿ ਵਾ ਪਰਮਤ੍ਥਤੋ ਅਵਿਜ੍ਜਮਾਨਾਨੀਤਿਵਾ ਨਸਕ੍ਕਾ ਵਤ੍ਤੁਂ. ਵੋਹਾਰਸਿਦ੍ਧ ਮਤ੍ਤਭਾਵਂ ਅਤਿਕ੍ਕਮ੍ਮ ਤਾਦਿਸੇਨ ਸੁਦ੍ਧਧਮ੍ਮਗਤਿਯਾ ਸਿਦ੍ਧੇਨ ਪਰਮਤ੍ਥ ਲਕ੍ਖਣੇਨ ਉਪਲਦ੍ਧਤ੍ਤਾ. ਇਤਰਥਾ ਨਿਬ੍ਬਤ੍ਤਿਲਕ੍ਖਣਰਹਿਤਂ ਅਸਙ੍ਖਤ ਨਿਬ੍ਬਾਨਂਪਿ ਸਭਾਵਤੋ ਅਨੁਪਲਬ੍ਭਮਾਨਂ ਪਰਮਤ੍ਥਤੋ ਅਵਿਜ੍ਜਮਾਨਞ੍ਚ ਨਾਮ ਸਿਯਾਤਿ. ਤਸ੍ਮਾ ਨਿਬ੍ਬਤ੍ਤਿ ਲਕ੍ਖਣਰਹਿਤਤ੍ਤਾਏਵ ਏਤਾਨਿ ਅਨਿਪ੍ਫਨ੍ਨਾਨਿਨਾਮ. ਨ ਸਭਾਵਤੋ ਅਨੁਪਲਬ੍ਭਮਾਨਤ੍ਤਾਤਿ ਯੁਤ੍ਤਂ ਸਿਯਾਤਿ. [ਰੂਪਸਮੁਦ੍ਦੇਸੋ]

੧੫੭. ਰੂਪਵਿਭਾਗੇਸਬ੍ਬਞ੍ਚ ਪਨ ਏਤਂ ਯਥਾਸਮੁਦ੍ਦਿਟ੍ਠਂ ਅਟ੍ਠਵੀਸਤਿ ਵਿਧਂ ਰੂਪਂ ਅਹੇਤੁਕਟ੍ਠੇਨ ਏਕਵਿਧਮੇਵ. ਨ ਸਹੇਤੁਕਾ ਹੇਤੁਕ ਵਸੇਨ ਦੁਵਿਧਂ. ਤਥਾਸਪ੍ਪਚ੍ਚਯਟ੍ਠੇਨ ਏਕਵਿਧਮੇਵ. ਨ ਸਪ੍ਪਚ੍ਚਯਾਪਚ੍ਚਯ ਵਸੇਨ ਦੁਵਿਧਨ੍ਤਿ ਏਵਂ ਪਵਤ੍ਤਂ ਏਕਵਿਧਨਯਂ ਤਾਵ ਦਸ੍ਸੇਤੁਂ ਸਬ੍ਬਞ੍ਚਾਤਿਆਦਿਮਾਰਦ੍ਧਂ.

[੧੮੪] ਵਿਭਾਵਨਿਯਂ ਪਨ

ਏਕਵਿਧਨਯੋਪਿ ਰੂਪਵਿਭਾਗੋਏਵਾਤਿ ਕਤ੍ਵਾ ‘‘ਯਥਾ ਉਦ੍ਦਿਟ੍ਠ ਰੂਪਾਨਂ ਏਕਵਿਧਾਦਿਨਯਂ ਦਸ੍ਸਨਤ੍ਥਂ ਸਬ੍ਬਞ੍ਚ ਪਨੇਤਨ੍ਤਿਆਦਿ ਵੁਤ੍ਤ’’ਨ੍ਤਿ ਵੁਤ੍ਤਂ. ਤਂ ਨ ਸਮੇਤਿ.

ਵਕ੍ਖਤਿ ਹਿ –

ਅਜ੍ਝਤ੍ਤਿਕਾਦਿਭੇਦੇਨ, ਵਿਭਜਨ੍ਤਿ ਯਥਾਰਹਨ੍ਤਿ.

ਏਤੇਨ ਅਜ੍ਝਤ੍ਤਿਕਾਦਿਭੇਦੋ ਏਵ ਰੂਪਵਿਭਾਗੋਨਾਮਾਤਿ ਵਿਞ੍ਞਾਯਤਿ.

ਤਤ੍ਥ ਸਬ੍ਬਂਪਿ ਰੂਪਂ ਹੇਤੁਸਮ੍ਪਯੋਗਾ ਭਾਵਤੋ ਅਹੇਤੁਕ ਮੇਵ, ਨ ਕਿਞ੍ਚਿ ਸਹੇਤੁਕਂ. ਕਿਞ੍ਚਿ ਅਹੇਤੁਕਨ੍ਤਿ ਏਵਂ ਵਿਭਾਗੋ ਅਤ੍ਥੀਤਿ ਅਧਿਪ੍ਪਾਯੋ. ਸਪ੍ਪਚ੍ਚਯਂ ਸਾਸਵਂ ਸਙ੍ਖਤਂ ਲੋਕਿਯਨ੍ਤਿ ਪਾਠੋ. ਸਪ੍ਪਚ੍ਚਯਂ ਸਙ੍ਖਤਂ ਲੋਕਿਯਂ ਸਾਸਵਨ੍ਤਿ ਪਨ ਯੁਤ੍ਤੋ. ਪਾਲ਼ਿਯਂਪਿ ਤਥਾ ਦਿਟ੍ਠਤ੍ਤਾ ਸਭਾਗਯੁਗਲ਼ਸਮ੍ਭਵਤੋਚਾਤਿ. ਇਤਰਾਨਿ ਪਨ ਪਾਲ਼ਿਕਮੇਨ ਅਸਮੇਨ੍ਤਾਨਿਪਿ ਸਭਾਗ ਯੁਗਲ਼ਤ੍ਤਾ ਭਾਗਤੋ ਯੁਤ੍ਤਾਨਿਏਵ. ਤਤ੍ਥ ਅਤ੍ਤਨੋ ਜਨਕੇਨ ਪਚ੍ਚਯੇਨ ਸਹੇਵ ਵਤ੍ਤਤੀਤਿ ਸਪਚ੍ਚਯਂ. ਪਚ੍ਚਯੇਹਿ ਸਙ੍ਗਮ੍ਮ ਕਰੀਯਤੀਤਿ ਸਙ੍ਖਤਂ. ਪਞ੍ਚੁਪਾਦਾ ਨਕ੍ਖਨ੍ਧਸਙ੍ਖਾਤੇ ਲੋਕੇਏਵ ਪਰਿਯਾਪਨ੍ਨਨ੍ਤਿ ਲੋਕਿਯਂ. ਅਤ੍ਤਾਨਂ ਆਰਬ੍ਭ ਪਵਤ੍ਤੇਹਿ ਆਸਵੇਹਿ ਸਹੇਵ ਵਤ੍ਤਤੀਤਿ ਸਾਸਵਂ. ਅਕਨਿਟ੍ਠ ਬ੍ਰਹ੍ਮਸਨ੍ਤਾਨ ਭੂਤਂਪਿ ਰੂਪਂ ਕਾਮਤਣ੍ਹਾ ਵਿਸਯਭਾਵੇਨ ਕਾਮੇਏਵ ਪਰਿਯਾਪਨ੍ਨਤ੍ਤਾ ਕਾਮਾਵਚਰਂ. ਨਤ੍ਥਿ ਅਤ੍ਤਨਾ ਗਹਿਤਂ ਕਿਞ੍ਚਿ ਆਰਮ੍ਮਣਂਨਾਮ ਅਸ੍ਸਾਤਿ ਅਨਾਰਮ੍ਮਣਂ. ਯੋ ਧਮ੍ਮੋ ਅਞ੍ਞੇਨ ਪਯੋਗੇਨ ਪਹੀਨੋਪਿ ਸਮੁਦਯਪਹਾਨੇ ਅਸਤਿ ਅਪਹੀਨੋਵ ਹੋਤਿ. ਪੁਨ ਅਵਸ੍ਸਂ ਉਪ੍ਪਜ੍ਜਮਾਨਤ੍ਤਾ. ਅਪ੍ਪਹੀਨੋਪਿ ਤਸ੍ਮਿਂ ਸਤਿ ਪਹੀਨੋਵ ਹੋਤਿ. ਪੁਨ ਅਨੁਪ੍ਪਜ੍ਜਮਾਨਤ੍ਤਾ. ਤਾਦਿਸੋ ਧਮ੍ਮੋ ਪਹਾਨਵਾਯਾਮਸ੍ਸ ਅਟ੍ਠਾਨਤ੍ਤਾ ਅਪ੍ਪਹਾਤਬ੍ਬੋਨਾਮ. ਰੂਪਂਪਿ ਏਦਿਸਮੇਵ ਹੋਤੀਤਿ ਵੁਤ੍ਤਂ ਅਪ੍ਪਹਾਤਬ੍ਬ ਮੇਵਾਤਿ. ਅਟ੍ਠਾਨਤ੍ਤਾ ਪਹਾਨ ਵਾਯਾਮਂ ਨ ਅਰਹਤੀਤਿ ਅਤ੍ਥੋ. ਅਥਵਾ, ਵਿਨਾ ਸਮੁਦਯਪਹਾਨੇਨ ਪਹਾਤੁਂ ਅਸਕ੍ਕੁਣੇਯ੍ਯੋਤਿ ਅਤ੍ਥੋ. ਯਦਿ ਏਵਂ ਰੂਪਂ ਭਿਕ੍ਖਵੇ ਨ ਤੁਮ੍ਹਾਕਂ. ਤਂ ਪਜਹਥ. ਤਂ ਵੋ ਪਹੀਨਂ ਦੀਘਰਤ੍ਤਂ ਅਤ੍ਥਾਯ ਹਿਤਾਯ ਸੁਖਾਯ ਭਵਿਸ੍ਸਤੀਤਿ ਇਦਂ ਕਥਨ੍ਤਿ. ਤਂਪਿ ਤਬ੍ਬਿਸਯਸ੍ਸ ਰਾਗਸ੍ਸ ਪਹਾਨਂ ਸਨ੍ਧਾਯ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਯਥਾਹ –

ਰੂਪੇ ਖੋ ਰਾਧ ਯੋ ਛਨ੍ਦੋ, ਯੋ ਰਾਗੋ, ਯਾਨਨ੍ਦੀ, ਯਾ ਤਣ੍ਹਾ, ਤਂ ਪਜਹਥ. ਏਵਂ ਤਂਰੂਪਂ ਪਹੀਨਂ ਭਵਿਸ੍ਸਤਿ ਉਚ੍ਛਿਨ੍ਨਮੂਲਂ ਤਾਲਾਵਤ੍ਥੁਕਤਂ ਅਨਭਾਵਂਕਤਂ ਆਯਤਿਂ ਅਨੁਪ੍ਪਾਦਧਮ੍ਮਨ੍ਤਿ.

ਅਯਂ ਨਯੋ ਅਞ੍ਞੇਸੁਪਿ ਕੁਸਲਾਦੀਸੁ ਅਪ੍ਪਹਾਤਬ੍ਬੇਸੁ ਵੇਦਿਤਬ੍ਬੋਤਿ. ਏਵਸਦ੍ਦੋ ਚੇਤ੍ਥ ਪੁਰਿਮਪਦੇਸੁਪਿ ਯੋਜੇਤਬ੍ਬੋ. ਇਤਿਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋਵਾ. ਤੇਨ ਪਾਲ਼ਿਯਂ ਆਗਤਂ ਨ ਹੇਤੁ ਹੇਤੁਵਿਪ੍ਪਯੁਤ੍ਤਨ੍ਤਿਆਦਿਂ ਸਙ੍ਗਣ੍ਹਾਤਿ. ਤਸ੍ਸ ਤਸ੍ਸ ਪੁਗ੍ਗਲਸ੍ਸ ਅਤ੍ਤਭਾਵਪਰਿਯਾਪਨ੍ਨੋ ਧਮ੍ਮਸਮੂਹੋ ਅਜ੍ਝਤ੍ਤਂਨਾਮ. ਤਸ੍ਮਿਂਪਿਚ ਯਤ੍ਥ ਤਣ੍ਹਾਯ ਅਤਿਰੇਕਤਰਂ ਦਲ਼੍ਹਪਰਿਗ੍ਗਹੋ ਹੋਤਿ. ਸੋ ਚਕ੍ਖਾਦਿਕੋ ਚਿਤ੍ਤੇਨ ਸਹ ਛਬ੍ਬਿਧੋ ਧਮ੍ਮੋ ਅਜ੍ਝਤ੍ਤਿਕੋ ਨਾਮ. ਅਜ੍ਝਤ੍ਤੇ ਵਿਦਿਤੋ ਪਾਕਟੋਤਿ ਕਤ੍ਵਾ. ਤਥਾ ਹਿ ਸੋ ਅਜ੍ਝਤ੍ਤਜ੍ਝਤ੍ਤਨ੍ਤਿਪਿ ਵੁਤ੍ਤੋ. ਇਤਰਾਨਿ ਪਨ ਰੂਪਾਦਿਨਿ ਫਸ੍ਸਾਦੀਨਿਚ ਤਦੁਪਾਦਾਯ ਤਣ੍ਹਾਪਰਿਗ੍ਗਹਸ੍ਸ ਮਨ੍ਦਤ੍ਤਾ ਬਾਹਿਰਾਨਿ ਨਾਮ. ਯਥਾ ਹਿ ਲੋਕੇ ਮਣਿਵਾ ਸੁਵਣ੍ਣਂਵਾ ਰਜਤਂਵਾ ਬਹਿਗੇਹੇ ਨਿਦਹਿਤ੍ਵਾ ਥਪਿਤਂ ਹੋਤਿ. ਪਚ੍ਛਿਵਾ ਸੁਪ੍ਪਂਵਾ ਘਟੋਵਾ ਸਰਾਵੋਵਾ ਅਨ੍ਤੋ ਗੇਹੇ ਥਪਿਤੋ. ਤਤ੍ਥ ਪਚ੍ਛਿਮਾਨਿ ਛਡ੍ਡੇਤ੍ਵਾਪਿ ਪੁਰਿਮਾਨਿ ਰਕ੍ਖਨ੍ਤਿ. ਤਸ੍ਮਾ ਤਾਨੇਵ ਤਣ੍ਹਾਪਰਿਗ੍ਗਹਦਲ਼੍ਹਤਾਯ ਅਨ੍ਤੋਪਰਿਭੋਗਾਤ੍ਵੇਵ ਵੁਚ੍ਚਨ੍ਤਿ. ਪਚ੍ਛਿਮਾਨਿ ਪਨ ਬਾਹਿਰ ਪਰਿਭੋਗਾਤ੍ਵੇਵ. ਏਵਂ ਸਮ੍ਪਦਮਿਦਂ ਦਟ੍ਠਬ੍ਬਂ. ਇਧਪਿ ਹਿ ਯਦਿ ਸਕ੍ਕੁਣੇਯ੍ਯ. ਰੂਪਾਦੀਨਿ ਫਸ੍ਸਾਦਿਨਿਚ ਸਬ੍ਬਾਨਿ ਛਡ੍ਡੇਤ੍ਵਾਪਿ ਚਕ੍ਖਾਦਿਕਂ ਛਬ੍ਬਿਧਮੇਵ ਅਵਸ੍ਸਂ ਰਕ੍ਖਿਸ੍ਸਨ੍ਤੀਤਿ. ਇਤਿ ਤਣ੍ਹਾ ਪਰਿਗ੍ਗਹਸ੍ਸ ਦਲ਼੍ਹਮਨ੍ਦਤਾ ਵਸੇਨੇਵ ਤੇਸਂ ਦ੍ਵਿਨ੍ਨਂ ਅਜ੍ਝਤ੍ਤਿਕ ਬਾਹਿਰਤਾ ਵੁਤ੍ਤਾ. ਨ ਪਵਤ੍ਤਿਦੇਸਵਸੇਨਾਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ.

[੧੮੫] ਯਂ ਪਨ ਵਿਭਾਵਨਿਯਂ

‘‘ਅਜ੍ਝਤ੍ਤਿਕਰੂਪਂ ਅਤ੍ਥਭਾਵਸਙ੍ਖਾਤਂ ਅਤ੍ਤਾਨਂ ਅਧਿਕਿਚ੍ਚ ਉਦ੍ਦਿਸ੍ਸ ਪਵਤ੍ਤਤ੍ਤਾ. ਕਾਮਂ ਅਞ੍ਞੇਪਿ ਅਜ੍ਝਤ੍ਤਸਮ੍ਭੂਤਾ ਅਤ੍ਥਿ. ਰੁਲ਼੍ਹੀਵਸੇਨ ਪਨ ਚਕ੍ਖਾਦਿਕਮੇਵ ਅਜ੍ਝਤ੍ਤਿਕਨ੍ਤਿ’’ ਵੁਤ੍ਤਂ. ਤਂ ਨ ਸੁਨ੍ਦਰਂ.

[੧੮੬] ਯਞ੍ਚ ਤਤ੍ਥ

‘‘ਅਤ੍ਤਸਙ੍ਖਾਤਂਪਾ ਚਿਤ੍ਤਂ ਅਧਿਕਿਚ੍ਚ ਤਸ੍ਸ ਦ੍ਵਾਰਭਾਵੇਨ ਪਵਤ੍ਤਤੀਥਿ ਅਜ੍ਝਤ੍ਤਂ. ਤਦੇਵ ਅਜ੍ਝਤ੍ਤਿਕਨ੍ਤਿ’’ ਵੁਤ੍ਤਂ. ਤਂਪਿ ਨ ਸੁਨ੍ਦਰਂ.

ਤਸ੍ਮਿਂ ਅਤ੍ਥੇ ਹਿ ਸਤਿ ਚਿਤ੍ਤਸ੍ਸ ਅਜ੍ਝਤ੍ਤਤਾ ਨ ਸਮ੍ਪਜ੍ਜਤਿ. ਅਜ੍ਝਤ੍ਤਧਮ੍ਮ ਅਜ੍ਝਤ੍ਤਿਕਮ੍ਮੋਨਞ੍ਚ ਅਵਿਸੇਸੋ ਆਪਜ੍ਜਤੀਤਿ.

ਯਂ ਪਨ ਤਤ੍ਥ

ਅਥਵਾ ਯਦਿ ਮਯਂ ਨ ਹੋਮ, ਤ੍ਵਂ ਕਟ੍ਠਕਲਿਙ੍ਗਰੂਪਮੋ ਭਵਿਸ੍ਸਤੀਤਿ ਵਦਨ੍ਤਾ ਵਿਯ ਅਤ੍ਤਭਾਵਸ੍ਸ ਸਾਤਿਸਯਂ ਉਪਕਾਰਕਤ੍ਤਾ ਚਕ੍ਖਾਦਿਨੇਵ ਵਿਸੇਸਤੋ ਅਜ੍ਝਤ੍ਤਿਕਾਨੀਤਿ ਵੁਤ੍ਤਂ. ਤਂ ਯੁਤ੍ਤਤਰਂ.

ਤਥਾ ਉਪਕਾਰਾਤਿਸਯਤ੍ਤਾਏਵ ਹਿ ਤੇਸੁ ਸਤ੍ਤਾਨਂ ਪਰਿਗ੍ਗਹ ਦਲ਼੍ਹਤਾ ਹੋਤੀਤਿ. ਸਤ੍ਤਵਿਧਂਪਿ ਦ੍ਵਾਰਰੂਪਂਨਾਮ. ਯਥਾਕ੍ਕਮਂ ਵੀਥਿ ਚਿਤ੍ਤਾਨਂ ਪਾਣਾਤਿਪਾਤਾਦਿਕਮ੍ਮਾਨਞ੍ਚ ਪਵਤ੍ਤਿਮੁਖਤ੍ਤਾ. ਤਤ੍ਥ ਪਨ ਪਞ੍ਚ ਵਿਧਂ ਪਸਾਦਰੂਪਂ ਉਪਪਤ੍ਤਿਦ੍ਵਾਰਂਨਾਮ. ਵਿਞ੍ਞਤ੍ਤਿਦ੍ਵਯਂ ਕਮ੍ਮਦ੍ਵਾਰਂਨਾਮਾਤਿ ਓਲ਼ਾਰਿਕਰੂਪਂ ਪਕਤਿਯਾ ਥੂਲਸਭਾਵਤ੍ਤਾ ਘਟ੍ਟਨਸਙ੍ਖਾਤਸ੍ਸਚ ਅਤ੍ਤਨੋ ਕਿਚ੍ਚਸ੍ਸ ਓਲ਼ਾਰਿਕਤ੍ਤਾ. ਸਨ੍ਤਿਕੇਰੂਪਂ ਦੂਰੇ ਪਵਤ੍ਤਸ੍ਸਪਿ ਸੀਘਤਰਂ ਞਾਣੇਨ ਗਹਣਯੋਗ੍ਯਤ੍ਤਾ. ਸਪ੍ਪਟਿਘਰੂਪਞ੍ਚਾਤਿ ਏਤ੍ਥ ਪਟਿਹਨਨਂ ਪਟਿਘੋ. ਸੋ ਦੁਵਿਧੋ ਵਿਸਯਵਿਸਯੀਨਂ ਪਟਿਘਟ੍ਟਨਂ ਮਹਾ ਭੂਤਾਨਂ ਅਞ੍ਞਮਞ੍ਞਪਟਿਘਟ੍ਟਨਨ੍ਤਿ. ਤਤ੍ਥ ਯੇਨ ਪਟਿਘਟ੍ਟਨੇਨ ਪਸਾਦ ਦ੍ਵਾਰਾਨਂ ਭਵਙ੍ਗਸ੍ਸਚ ਵਿਕਾਰਪ੍ਪਤ੍ਤਿ ਹੋਤਿ. ਇਦਂ ਵਿਸਯਵਿਸਯੀਨਂ ਪਟਿਘਟ੍ਟਨਂਨਾਮ. ਯੇਨ ਰੁਪ੍ਪਨਲਕ੍ਖਣਾਨਂ ਰੂਪਧਮ੍ਮਾਨਂ ਰੁਪ੍ਪਨ ਕੁਪ੍ਪਨ ਘਟ੍ਟਨ ਪੀਲ਼ਨ ਭਿਜ੍ਜਨਾਦਯੋ ਪਵਤ੍ਤਨ੍ਤਿ. ਇਦਂ ਮਹਾਭੂਤਾਨਂ ਅਞ੍ਞਮਞ੍ਞਪਟਿਘਟ੍ਟਨਂ ਨਾਮ. ਪਟਿਘੇਨ ਸਹ ਵਤ੍ਤਤੀਤਿ ਸਪ੍ਪਟਿਘਂ.

[੧੮੭] ਵਿਭਾਵਨਿਯਂ ਪਨ

‘‘ਯੋ ਸਯਂ ਨਿਸ੍ਸਯਵਸੇਨਚ ਸਮ੍ਪਤ੍ਤਾਨਂ ਅਸਮ੍ਪਤ੍ਤਾਨਞ੍ਚ ਪਟਿਮੁਖਭਾਵੋ ਅਞ੍ਞਮਞ੍ਞਪਤਨਂ. ਸੋ ਪਟਿਘੋ ਵਿਯਾਤਿ ਪਟਿਘੋ. ਯਥਾਹਿ ਪਟਿਘਾਤੇ ਸਤਿ ਦੁਬ੍ਬਲਸ੍ਸ ਚਲਨਂ ਹੋਤਿ. ਏਵਂ ਅਞ੍ਞਮਞ੍ਞਪਟਿਮੁਖਭਾਵੇ ਸਤਿ ਅਰੂਪਸਭਾਵਤ੍ਤਾ ਦੁਬ੍ਬਲਸ੍ਸ ਭਵਙ੍ਗਸ੍ਸ ਚਲਨਂ ਹੋਤੀਤਿ’’ ਏਵਂ ਮਹਾਭੂਤਘਟ੍ਟਨਂ ਉਪਮਾਮਤ੍ਤਂ ਕਤ੍ਵਾ ਵਿਸਯਵਿਸਯਿਘਟ੍ਟਨਮੇਵ ਗਹਿਤਂ. ਤਂ ਅਨੁਪਪਨ੍ਨਂ.

ਏਵਞ੍ਹਿ ਸਤਿ ਯਾਨਿ ਲੋਕੇ ਅਜ੍ਝਤ੍ਤਬਹਿਦ੍ਧਾਸਨ੍ਤਾਨੇਸੁ ਘਟ੍ਟਨਾਨਿ ਦਿਸ੍ਸਨ੍ਤਿ. ਯੇਸਂ ਵਸੇਨ ਰੂਪਧਮ੍ਮੇਸੁ ਅਞ੍ਞਮਞ੍ਞਂ ਲਗ੍ਗਨ ਬਨ੍ਧਨ ਥਮ੍ਭਨ ਧਾਰਣ ਚਲਨਾਦੀਨਿਵਾ ਵਡ੍ਢਨ ਹਾਯਨ ਛੇਦਨ ਭੇਦਨ ਵਿਲੀਨ ਵਿਕਿਰਣਾਦੀਨਿਵਾ ਪਵਤ੍ਤਨ੍ਤਿ. ਤਾਨਿ ਇਧ ਅਸਙ੍ਗਹਿਤਾਨਿ ਸਿਯੁਂ. ਨਚ ਤਾਨਿ ਅਨੁਗ੍ਗਹ ਉਪਘਾਤ ਵਸੇਨ ਪਵਤ੍ਤਿਭੂਤ ਸਨ੍ਨਿਪਾਤ ਸਙ੍ਖਾਤਂ ਘਟ੍ਟਨਂਵਿਨਾ ਅਞ੍ਞਪਕਾਰਾਨਿਏਵ ਸਕ੍ਕਾ ਭਵਿਤੁਨ੍ਤਿ. ਇਤਰਂ ਸੋਲ਼ਸਵਿਧਂ ਵੁਤ੍ਤਪਟਿਪਕ੍ਖਵਸੇਨ ਸੁਖੁਮਰੂਪਂ ਦੂਰੇਰੂਪਂ ਅਪਟਿਘਰੂਪਞ੍ਚ. ਉਪਾਦਿਨ੍ਨਰੂਪਂ ਨਾਮ ਕਤ੍ਥਚਿ ਯਂਕਿਞ੍ਚਿ ਸਰੀਰਟ੍ਠਕਰੂਪਂ ਵੁਚ੍ਚਤਿ. ਕਤ੍ਥਚਿ ਕਮ੍ਮਸਮੁਟ੍ਠਾਨ ਮੇਵ ਤਦੁਭਯਂਪਿ ਤਣ੍ਹਾਦਿਟ੍ਠੀਹਿ ਤੁਸਂ ਆਦਿਨ੍ਨਪਰਾਮਟ੍ਠਤ੍ਤਾ ਉਪਾਦਿਨ੍ਨਂ ਨਾਮ ਨਿਪ੍ਪਰਿਯਾਯਤੋ ਪਨ ਕਮ੍ਮਸਮੁਟ੍ਠਾਨਮੇਵ ਉਪਾਦਿਨ੍ਨਂਨਾਮ. ਕਸ੍ਮਾ ਤਸ੍ਸੇਵ ਸਤ੍ਤਸਨ੍ਤਾਨੇ ਨਿਚ੍ਚਕਾਲਂ ਪਵਤ੍ਤਿਵਸੇਨ ਸਾਤਿਸਯਂ ਭੁਸਂ ਆਦਿਨ੍ਨਗਹਿਤਪਰਾਮਟ੍ਠਤਾਸਮ੍ਭਵਤੋਤਿ ਵੁਤ੍ਤਂ ਕਮ੍ਮਜਂਉਪਾਦਿਨ੍ਨਰੂਪਨ੍ਤਿ. ਏਤਂ ਮਮਾਤਿਆਦਿਨਾ ਤਣ੍ਹਾਦਿਟ੍ਠੀਹਿ ਭੁਸਂ ਆਦਿਯਤੀਤਿ ਉਪਾਦਿਨ੍ਨਂ. ਅਟ੍ਠਕਥਾਯਂ ਪਨ ਤਣ੍ਹਾਦਿਟ੍ਠੀਹਿ ਉਪੇਤੇਨ ਕਮ੍ਮੁਨਾ ਅਤ੍ਤਨੋ ਫਲਭਾਵੇਨ ਆਦਿਨ੍ਨਂ ਗਹਿਤਨ੍ਤਿ ਇਮਮਤ੍ਥਂ ਦਸ੍ਸੇਤਿ. ਸਹ ਨਿਦਸ੍ਸਨੇਨ ਸਨਿਦਸ੍ਸਨਂ. ਨਿਦਸ੍ਸਨਨ੍ਤਿ ਚਕ੍ਖੁਵਿਞ੍ਞਾਣੇਨ ਦਟ੍ਠਬ੍ਬਭਾਵੋ ਵੁਚ੍ਚਤਿ. ਸੋ ਪਨ ਧਮ੍ਮਤੋ ਅਨਞ੍ਞਤ੍ਤੇਪਿ ਅਞ੍ਞੇ ਵਿਯ ਕਤ੍ਵਾ ਉਪਚਰੀਯਤਿ. ਏਵਞ੍ਹਿ ਸਤਿ ਅਤ੍ਥਵਿਸੇਸਬੋਧੋ ਹੋਤੀਤਿ. ਨਿਦਸ੍ਸਨਨ੍ਤਿਵਾ ਚਕ੍ਖੁਵਿਞ੍ਞਾਣਕਿਚ੍ਚਂ ਵੁਚ੍ਚਤਿ. ਤੇਨ ਸਹ ਵਤ੍ਤਤੀਤਿ ਸਨਿਦਸ੍ਸਨਨ੍ਤਿਪਿ ਯੁਜ੍ਜਤਿਯੇਵ. ਚਕ੍ਖਾਦਿਦ੍ਵਯਂ ਅਸਮ੍ਪਤ੍ਤਵਸੇਨ ਗੋਚਰਗ੍ਗਾਹਿਕਂ. ਘਾਨਾਦਿਤ੍ਤਯਂ ਸਮ੍ਪਤ੍ਤਵਸੇਨ ਗੋਚਰਗ੍ਗਾਹਿਕਨ੍ਤਿ ਪਞ੍ਚਵਿਧਂਪਿ ਗੋਚਰਗ੍ਗਾਹਿਕਰੂਪਨ੍ਤਿ ਯੋਜਨਾ. ਤਤ੍ਥ ਪਸਾਦੇ ਅਲ੍ਲੀਯਿਤ੍ਵਾ ਲਗ੍ਗਿਤ੍ਵਾ ਉਪ੍ਪਨ੍ਨਂ ਆਰਮ੍ਮਣਂ ਸਮ੍ਪਤ੍ਤਂਨਾਮ. ਕੇਸਗ੍ਗਮਤ੍ਤਂਪਿ ਮੁਞ੍ਚਿਤ੍ਵਾ ਉਪ੍ਪਨ੍ਨਂ ਅਸਮ੍ਪਤ੍ਤਂਨਾਮ. ਕਸ੍ਮਾ ਪਨੇਤ੍ਥ ਚਕ੍ਖਾਦਿਦ੍ਵਯਂ ਅਸਮ੍ਪਤ੍ਤਮੇਵ ਗਣ੍ਹਾਤਿ. ਘਾਨਾਦਿਤ੍ਤਯਂ ਸਮ੍ਪਤ੍ਤਮੇਵਾਤਿ, ਪਚ੍ਚਯਵਿਸੇਸਤੋ. ਆਲੋਕੋ ਹਿ ਰੂਪਗਹਣੇ ਚਕ੍ਖੁਸ੍ਸ ਪਚ੍ਚਯੋ. ਆਕਾਸੋਚ ਸਦ੍ਦਗਹਣੇ ਸੋਤਸ੍ਸਾਤਿ ਚਕ੍ਖੁਰੂਪੇਸੁਚ ਅਞ੍ਞਮਞ੍ਞਂ ਲਗ੍ਗਿਤ੍ਵਾ ਉਪ੍ਪਜ੍ਜਮਾਨੇਸੁ ਆਲੋਕਪਰਿਵਾਰਸ੍ਸ ਓਕਾਸੋ ਨਤ੍ਥਿ. ਤਥਾ ਸੋਤਸਦ੍ਦੇਸੁਚ ਆਕਾਸਪਰਿਵਾਰਸ੍ਸਾਤਿ. ਵਾਯੁਆਪਪਥਵਿਯੋ ਪਨ ਘਾਨਾਦਿਤ੍ਤਯਸ੍ਸ ਗਨ੍ਧਾਦਿਗਹਣੇ ਪਚ੍ਚਯਾ ਹੋਨ੍ਤਿ. ਤਤ੍ਥ ਵਾਯੁਨਾਮ ਗਨ੍ਧਾਕਡ੍ਢਨਕੋ ਨਾਸਵਾਤੋਯੇਵ, ਸੋਚ ਸਮ੍ਪਤ੍ਤਸ੍ਸੇਵ ਪਚ੍ਚਯੋ. ਆਪੋਨਾਮ ਜਿਵ੍ਹਾਤੇਮਨਕੋ ਆਪੋ, ਸੋਪਿ ਸਮ੍ਪਤ੍ਤਸ੍ਸੇਵ ਪਚ੍ਚਯੋ. ਨ ਹਿ ਰਸੋ ਸੁਕ੍ਖਜਿਵ੍ਹਾਯ ਫਰਤੀਤਿ. ਪਥਵੀਚ ਘਟ੍ਟਨਤ੍ਥਾਯ ਪਚ੍ਚਯੋ. ਨ ਹਿ ਦੁਬ੍ਬਲਪਥਵੀਸਨ੍ਨਿਸ੍ਸਯੋ ਆਲੋਕੋਵਾ ਰਜੋਵਾਕਾਯੇ ਪਤਮਾਨੋਪਿ ਪਸਾਦੇ ਘਟ੍ਟੇਤੀਤਿ. ਇਤਿ ਪਚ੍ਚਯਵਿਸੇਸਤੋ ਤੇਸਂ ਸਮ੍ਪਤ੍ਤਾਸਮ੍ਪਤ੍ਤਵਸੇਨ ਗਹਣ ਵਿਸੇਸੋ ਹੋਤੀਤਿ. ਤਤ੍ਥ ਚਕ੍ਖੁਸ੍ਸ ਤਾਵ ਅਸਮ੍ਪਤ੍ਤਗਹਣਂ ਪਾਕਟਂ. ਤਞ੍ਹਿ ਸਮੀਪੇ ਅਕ੍ਖਿਵਣ੍ਣਂਵਾ ਭਮੁਕਮੂਲਂਵਾ ਨਪਸ੍ਸਤਿ. ਦੂਰੇ ਪਨ ਮਹਨ੍ਤਂ ਚਨ੍ਦਮਣ੍ਡਲਾਦਿਕਂਵਾ ਫਲਿਕਾਦਿਤਿਰੋਹਿਤਂਵਾ ਵਣ੍ਣਂ ਪਸ੍ਸਤਿ. ਦਿਸਾਦੇਸਵਵਤ੍ਥਾਨਞ੍ਚਸ੍ਸ ਪਞ੍ਞਾਯਤੀਤਿ. ਸੋਤਸ੍ਸ ਪਨ ਕਥਨ੍ਤਿ, ਤਤ੍ਥ ਹਿ ਦੂਰੇ ਸਦ੍ਦੋ ਚਿਰੇਨ ਸੁਯ੍ਯਮਾਨੋ ਦਿਸ੍ਸਤਿ ਪਚ੍ਛਿਮਦਿਸਾਭਾਗੇ ਉਪ੍ਪਨ੍ਨੋਪਿ ਸਦ੍ਦੋ ਅਨ੍ਤਰਾ ਮਹਨ੍ਤੇ ਚੇਤਿਯਾਦਿਕੇ ਅਨ੍ਤਰਿਤੇ ਸਤਿ ਦਕ੍ਖਿਣਪਸ੍ਸਤੋਵਾ ਸੁਯ੍ਯਤਿ. ਉਤ੍ਤਰਪਸ੍ਸਤੋਵਾ. ਅਸੁਯ੍ਯਮਾਨੋਵਾ ਹੋਤੀਤਿ. ਵੁਚ੍ਚਤੇ, ਉਪ੍ਪਨ੍ਨੋ ਸਦ੍ਦਸਙ੍ਘਾਟੋ ਆਸਨ੍ਨੇ ਠਿਤਾਨਂ ਆਦਿਤੋ ਪਟ੍ਠਾਯ ਯਾਵ ਅਵਸਾਨਾ ਕਮੇਨ ਪਾਕਟੀਭੂਤੋ ਹੋਤਿ. ਪਟਿਘਟ੍ਟਨਾਨਿਘਂਸੋਚ ਬਲਵਾ ਹੋਤਿ. ਅਹਂ ਸੁਣੋਮੀਤਿ ਪਵਤ੍ਤਾ ਸਲ੍ਲਕ੍ਖਣਵੀਥਿਯੋ ਸੀਘਤਰਂ ਨਿਰਨ੍ਤਰਂ ਵਿਯ ਪਵਤ੍ਤਨ੍ਤਿ. ਦੂਰੇ ਠਿਤਾਨਂ ਪਨ ਪਟਿਘਟ੍ਟਨਾਨਿਘਂਸੋ ਮਨ੍ਦਤਰੋ ਹੋਤਿ. ਆਦਿਤੋ ਅਪਾਕਟੋ. ਮਜ੍ਝੇਵਾ ਅਵਸਾਨੇਵਾ ਪਿਣ੍ਡਵਸੇਨ ਪਾਕਟੀਭੂਤੋ. ਸਲ੍ਲਕ੍ਖਣਵੀਥਿਯੋ ਚਿਰੇਨ ਪਰੇਨ ਪਵਤ੍ਤਨ੍ਤਿ. ਤਸ੍ਮਾ ਤੇਸਂ ਲਹੁਂ ਸੁਤੋ. ਚਿਰੇਨ ਸੁਤੋਤਿ ਅਤਿਮਾਨੋ ਹੋਤੀਤਿ. ਅਪਿਚ, ਸਦ੍ਦੋਨਾਮ ਨਿਸ੍ਸਯਧਾਤੁਪਰਂਪਰਾਯ ਪਵਤ੍ਤਿਤ੍ਵਾ ਦੂਰਂਪਿ ਦੇਸਂ ਗਚ੍ਛਤਿਯੇਵ. ਏਵਂ ਗਚ੍ਛਨ੍ਤੋਚ ਗਤਗਤਟ੍ਠਾਨੇਏਵ ਠਤ੍ਵਾ ਸਵਨੂਪਚਾਰੇ ਠਿਤਾਨਂ ਸੋਤਸਹਸ੍ਸਂਪਿ ਘਟ੍ਟੇਤਿ. ਮਹਨ੍ਤੇ ਪਨ ਚੇਤਿਯਾਦਿਕੇ ਅਨ੍ਤਰਿਤੇ ਸਤਿ ਯਤੋ ਆਕਾਸੋ ਉਜੁਂ ਵਿਵਟੋ ਹੋਤਿ. ਤਤੋ ਦਕ੍ਖਿਣਪਸ੍ਸਤੋਵਾ ਉਤ੍ਤਰਪਸ੍ਸਤੋਵਾ ਗਤਗਤਠਾਨਤੋਵਸੋਤਂ ਘਟ੍ਟੇਤਿ. ਮਨ੍ਦਤਰੋ ਪਨ ਸਦ੍ਦੋਅਸੁਯ੍ਯ ਮਾਨੋਪਿ ਹੋਤਿ. ਏਵਂ ਗਚ੍ਛਨ੍ਤੋਚ ਯਾਵ ਸੋਤਪਸਾਦੇ ਅਲ੍ਲੀਯਿਤ੍ਵਾ ਨੁਪ੍ਪਜ੍ਜਤਿ. ਤਾਵ ਅਸਮ੍ਪਤ੍ਤੋਯੇਵ ਹੋਤਿ. ਯੋ ਪਨ ਅਲ੍ਲੀ ਯਿਤ੍ਵਾ ਉਪ੍ਪਜ੍ਜਤਿ. ਸੋ ਸਮ੍ਪਤ੍ਤੋਨਾਮ ਹੋਤਿ. ਨ ਸੋ ਸੁਯ੍ਯਤੀਤਿ. ਯਦਿ ਪਨ ਸੋਤਂ ਸਮ੍ਪਤ੍ਤਵਿਸਯਂ ਸਿਯਾ. ਯਥਾ ਅਨ੍ਤੋ ਕੁਚ੍ਛਿਗਤੋ ਗਨ੍ਧੋ ਬਹਿ ਨਘਾਯਿਯਤਿ. ਤਥਾ ਅਨ੍ਤੋ ਕੁਚ੍ਛਿਗਤੋ ਸਦ੍ਦੋਪਿ ਬਹਿ ਨਸੁਯੇਯ੍ਯ. ਗਨ੍ਧਸ੍ਸ ਵਿਯ ਦਿਸਾਦੇਸਵਵਤ੍ਥਾਨਂ ਵਿਸ੍ਸਨ ਸਿਯਾਤਿ.

[੧੮੮] ਵਿਭਾਵਨਿਯਂ ਪਨ

‘‘ਗਨ੍ਤ੍ਵਾ ਵਿਸਯਦੇਸਂ ਤਂ, ਫਰਿਤ੍ਵਾ ਗਣ੍ਹਤੀਤਿ ਚੇ. ਅਧਿਟ੍ਠਾਨ ਵਿਧਾ ਨੇਪਿ, ਤਸ੍ਸ ਸੋ ਗੋਚਰੋ ਸਿਯਾ.’’ ਤਿਪਿ ਵਿਚਾਰਿਤਂ. ਤਂ ਨ ਸੁਨ੍ਦਰਂ.

ਨ ਹਿ ਚਕ੍ਖਾਦਿਦ੍ਵਯਸ੍ਸ ਬਹਿਦ੍ਧਾ ਵਿਸਯਦੇਸਗਮਨਸਙ੍ਗੋ ਅਤ੍ਥੀਤਿ. ਗੋਚਰਂ ਗਣ੍ਹਾਤੀਤਿ ਗੋਚਰਗ੍ਗਾਹਿਕਂ. ਪਸਾਦ ਮਣ੍ਡਭੂਤਤ੍ਤਾ ਆਪਾਤਮਾਗਤਂ ਆਰਮ੍ਮਣਨਿਮਿਤ੍ਤਂ ਸਮ੍ਪਟਿਚ੍ਛਤੀਤਿ ਅਤ੍ਥੋ.

ਵਿਭਾਵਨਿਯਂ ਪਨ

ਵਿਞ੍ਞਾਣਾਧਿਟ੍ਠਿਤਂ ਹੁਤ੍ਵਾ ਤਂਤਂ ਗੋਚਰਗਹਣ ਸਭਾਵਤ੍ਤਾਤਿ ਵੁਤ੍ਤਂ.

ਵਣ੍ਣੋਤਿ ਰੂਪਾਰਮ੍ਮਣਸ੍ਸੇਤਂ ਨਾਮਂ. ਓਜਾਤਿ ਆਹਾਰ ਰੂਪ ਮਾਹ. ਵਿਨਿਭੁਜ੍ਜਤੀਤਿ ਵਿਨਿਬ੍ਭੋਗੋ. ਠਾਨਤੋ ਦੇਸਤੋ ਉਪ੍ਪਤ੍ਤਿਕਾਰਣਤੋ ਵਿਸੁਂਵਿਸੁਂ ਵਵਤ੍ਥਪੀਯਤੀਤਿ ਅਤ੍ਥੋ. ਨਵਿਨਿਬ੍ਭੋ ਗੋਤਿ ਅਵਿਨਿਬ੍ਭੋਗੋ. ਸੋ ਏਵ ਰੂਪਨ੍ਤਿ ਅਵਿਨਿਬ੍ਭੋਗਰੂਪਂ. ਆਚਰਿਯਾਨਨ੍ਦਤ੍ਥੇਰੇਨਪਨੇਤ੍ਥ ਗਨ੍ਧਰਸਓਜਾ ਕਤ੍ਥਚਿ ਵਿਨੀਭੁਤ੍ਤਾ ਦਿਸ੍ਸਨ੍ਤੀਤਿ ਪਞ੍ਚਵਿਧਮੇਵ ਅਵਿਨਿਬ੍ਭੋਗਰੂਪਂ ਇਚ੍ਛਿਤਂ. ਤਂ ਪਰਤੋ ਆਗਮਿਸ੍ਸਤੀਤਿ. [ਰੂਪਵਿਭਾਗੋ].

੧੫੮. ਕਮ੍ਮਨ੍ਤਿ ਏਕਾ ਚੇਤਨਾਏਵ. ਸਾਯੇਵ ਹਿ ਪਟ੍ਠਾਨੇ ਨਾਨਾਕ੍ਖਣਿਕ ਕਮ੍ਮਪਚ੍ਚਯਭਾਵੇਨ ਵੁਤ੍ਤਾ. ਯਥਾਹ-ਨਾਨਾਕ੍ਖਣਿਕਾ ਕੁਸਲਾਕੁਸਲਾ ਚੇਤਨਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋਤਿ. ਚਿਤ੍ਤਨ੍ਤਿ ਪਨ ਸਸਮ੍ਪਯੁਤ੍ਤਧਮ੍ਮਂ ਅਧਿਪ੍ਪੇਤਂ. ਪਟ੍ਠਾਨੇ ਚੇਤਸਿਕਧਮ੍ਮਾਨਂਪਿ ਰੂਪਸਮੁਟ੍ਠਾਪਨਭਾਵੇਨ ਵੁਤ੍ਤਤ੍ਤਾ. ਯਥਾਹ-ਹੇਤੂ ਹੇਤੁਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂ ਸਮੁਟ੍ਠਾਨਾਨਞ੍ਚ ਰੂਪਾਨਂ ਹੇਤੁ ਪਚ੍ਚਯੇਨ ਪਚ੍ਚਯੋਤਿਆਦਿ. ਉਤੂਤਿ ਤੇਜੋਯੇਵ. ਸੋ ਹਿ ਕਪ੍ਪਸਣ੍ਠਾਪਨਵਸੇਨ ਸਕਲਂ ਓਕਾਸ ਲੋਕਂਪਿ ਨਾਨਾਸਰੀਰਸਣ੍ਠਾਪਨਵਸੇਨ ਸਕ ਲਂ ਰੂਪਮਯਂ ਕਾਯਂ ਸਤ੍ਤਲੋਕਂਪਿ ਨਾਨਾਰੁਕ੍ਖਤਿਣਾਦੀਨਂ ਅਬ੍ਭਪਟਲਮੇਘਵੁਟ੍ਠਿਜਲਅਗ੍ਗਿ ਵਾਤਾਦੀਨਞ੍ਚ ਸਣ੍ਠਾਪਨਵਸੇਨ ਸਕਲਂ ਸਙ੍ਖਾਰਲੋਕਂਪਿ ਉਦਯਤਿ ਪਸਵਤਿ ਜਨੇਤਿ ਵਡ੍ਢੇਤਿ. ਤਸ੍ਮਾ ਉਤੂਤਿ ਵੁਚ੍ਚਤੀਤਿ. ਅਰਤਿ ਗਚ੍ਛਤਿ ਪਵਤ੍ਤਤੀਤਿ ਉਤੂਤਿਪਿ ਵਦਨ੍ਤਿ. ਆਹਾਰੋਤਿ ਓਜਾਏਵ. ਰੂਪਵਿਰਾਗਭਾਵਨਾਭੂਤਂ ਅਰੂਪਕੁਸਲਂ ਕਮ੍ਮਜਰੂਪਂ ਨਜਨੇਤੀਤਿ ਵੁਤ੍ਤਂ ਪਞ੍ਚਵੀਸਤਿਵਿਧਂਪੀਤਿ. ਅਤਿਸਙ੍ਖਤਨ੍ਤਿ ਅਤੀਤਕਾਲੇ ਯਥਾਕਾ ਲਨ੍ਤਰੇ ਰੂਪਂ ਜਨੇਤਿ, ਤਥਾ ਵਿਸੇਸੇਤ੍ਵਾ ਸੁਟ੍ਠੁਕਤਂ. ਅਜ੍ਝਤ੍ਤਿ ਕਸਨ੍ਤਾਨੇਤਿ ਵੁਤ੍ਤਂ, ਅਜ੍ਝਤ੍ਤਸਨ੍ਤਾਨੇਤਿ ਪਨ ਵਤ੍ਤਬ੍ਬਂ. ਅਜ੍ਝਤ੍ਤ ਮੇਵ ਅਜ੍ਝਤ੍ਤਿਕਨ੍ਤਿਵਾ ਇਕਸਦ੍ਦਸ੍ਸ ਅਤ੍ਥੋ ਦਟ੍ਠਬ੍ਬੋ. ਪਟਿਸਨ੍ਧਿਮੁਪਾਦਾਯਾਤਿ ਪਟਿਸਨ੍ਧਿਚਿਤ੍ਤਸ੍ਸ ਉਪ੍ਪਾਦਕ੍ਖਣਂ ਉਪਾਦਾਯ. ਖਣੇਖਣੇਤਿ ਏਕੇਕਸ੍ਸ ਚਿਤ੍ਤਸ੍ਸ ਤੀਸੁ ਤੀਸੁ ਖਣੇਸੁ. ਆਚਰਿਯਾਨਨ੍ਦਤ੍ਥੇਰੋ ਪਨ ਸਬ੍ਬੇਸਂਪਿ ਚਤੁਸਮੁਟ੍ਠਾਨਿਕਰੂਪਾਨਂ ਏਕੇਕਸ੍ਸ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇਏਵ ਉਪ੍ਪਾਦਂ ਭਙ੍ਗਕ੍ਖਣੇਏਵ ਨਿਰੋਧਞ੍ਚ ਆਹ. ਅਹਂ ਪਨਸ੍ਸਾ ਧਿਪ੍ਪਾਯੋ-ਸਬ੍ਬਾਨਿਪਿ ਚਤੁਸਮੁਟ੍ਠਾਨਿਕਰੂਪਾਨਿ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇਏਵ ਉਪ੍ਪਜ੍ਜਨ੍ਤਿ, ਨ ਭਙ੍ਗਕ੍ਖਣੇ. ਯਥਾਹ –

ਯਸ੍ਸਵਾ ਪਨ ਸਮੁਦਯਸਚ੍ਚਂ ਨਿਰੁਜ੍ਝਤਿ, ਤਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤੀਤਿ. ਨੋਤਿ.

ਤਥਾ ਤਾਨਿ ਚਿਤ੍ਤਸ੍ਸ ਭਙ੍ਗਕ੍ਖਣੇਏਵ ਨਿਰੁਜ੍ਝਨ੍ਤਿ. ਨ ਉਪ੍ਪਾਦਕ੍ਖਣੇ. ਯਥਾਹ –

ਯਸ੍ਸ ਕੁਸਲਾ ਧਮ੍ਮਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ, ਤਸ੍ਸ ਅਬ੍ਯਾਕਤਾ ਧਮ੍ਮਾ ਨਿਰੁਜ੍ਝਨ੍ਤੀਤਿ. ਨੋਤਿ.

ਅਰੂਪਭਵਂ ਸਨ੍ਧਾਯ ਏਤਂ ਯਮਕਦ੍ਵਯਂ ਵੁਤ੍ਤਂ. ਰੂਪਾਨਿ ਪਨ ਚਿਤ੍ਤਸ੍ਸ ਭਙ੍ਗਕ੍ਖਣੇਪਿ ਉਪ੍ਪਜ੍ਜਨ੍ਤਿ. ਉਪ੍ਪਾਦਕ੍ਖਣੇਪਿ ਨਿਰੁਜ੍ਝਨ੍ਤੀਤਿ ਚੇ. ਨ. ਏਵਞ੍ਹਿ ਸਤਿ –

ਯਸ੍ਸਵਾ ਪਨ ਸਮੁਦਯਸਚ੍ਚਂ ਨਿਰੁਜ੍ਝਤਿ, ਤਸ੍ਸ ਦੁਕ੍ਖਸਚ੍ਚਂ ਉਪ੍ਪਜ੍ਜਤੀਤਿ. ਅਰੂਪੇ ਤਣ੍ਹਾਯ ਭਙ੍ਗਕ੍ਖਣੇ ਤੇਸਂ ਸਮੁਦਯਸਚ੍ਚਂ ਨਿਰੁਜ੍ਝਤਿ. ਨੋਚ ਤੇਸਂ ਦੁਕ੍ਖਸਚ੍ਚਂ ਉਪ੍ਪਜ੍ਜਤਿ. ਪਞ੍ਚਵੋਕਾਰੇ ਤਣ੍ਹਾਯ ਭਙ੍ਗਕ੍ਖਣੇ ਤੇਸਂ ਸਮੁਦਯਸਚ੍ਚਞ੍ਚ ਨਿਰੁਜ੍ਝਤਿ, ਦੁਕ੍ਖਸਚ੍ਚਞ੍ਚ ਉਪ੍ਪਜ੍ਜਤੀਤਿਚ.

ਇਤਰਤ੍ਥਚ

ਅਰੂਪੇ ਕੁਸਲਾਨਂ ਉਪ੍ਪਾਦਕ੍ਖਣੇ ਤੇਸਂ ਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ. ਨੋਚ ਤੇਸਂ ਅਬ੍ਯਾਕਤਾ ਧਮ੍ਮਾ ਨਿਰੁਜ੍ਝਨ੍ਤਿ. ਪਞ੍ਚਵੋਕਾਰੇ ਕੁਸਲਾਨਂ ਉਪ੍ਪਾਦਕ੍ਖਣੇ ਤੇਸਂ ਕੁਸਲਾ ਧਮ੍ਮਾਚ ਉਪ੍ਪਜ੍ਜਨ੍ਤਿ. ਅਬ੍ਯਾਕਤਾ ਧਮ੍ਮਾਚ ਨਿਰੁਜ੍ਝਨ੍ਤੀਤਿਚ.

ਏਵਂ ਪਰਿਪੁਣ੍ਣਪਞ੍ਹਾਏਵ ਉਦ੍ਧਟਾ ਸਿਯੁਂ. ਨੋਤਿ ਪਨ ਪਟਿਸੇਧੋਵ ਉਦ੍ਧਟੋ. ਤਸ੍ਮਾ ਨਯਿਦਂ ਅਰੂਪਭਵਂ ਸਨ੍ਧਾਯ ਵੁਤ੍ਤਨ੍ਤਿ ਸਕ੍ਕਾ ਵਤ੍ਤੁਨ੍ਤਿ. ਚਿਤ੍ਤਜਰੂਪਂ ਸਨ੍ਧਾਯ ਵੁਤ੍ਤਨ੍ਤਿ ਚੇ. ਤਮ੍ਪਿ ਨ. ਕਮ੍ਮਜਰੂਪਸ੍ਸ ਵਿਗਹਣੇ ਵਿਰੋਧਸ੍ਸ ਯਮਕਪਾਠਨ੍ਤਰਸ੍ਸ ਅਭਾਵਤੋ. ਅਨੁਲੋਮਸ੍ਸੇਵਚ ਭਾਵਤੋ. ਯਥਾਹ –

ਯਸ੍ਸਵਾਪਨ ਯਤ੍ਥ ਮਨਿਨ੍ਦ੍ਰਿਯਂ ਨ ਉਪ੍ਪਜ੍ਜਤਿ. ਤਸ੍ਸ ਤਤ੍ਥ ਜੀਵਿਤਿਨ੍ਦ੍ਰਿਯਂ ਨਉਪ੍ਪਜ੍ਜਤੀਤਿ. ਅਸਞ੍ਞਸਤ੍ਤਾਨਂ ਤੇਸਂ ਤਤ੍ਥ ਮਨਿਨ੍ਦ੍ਰਿਯਂ ਨ ਉਪ੍ਪਜ੍ਜਤਿ. ਨੋਚ ਤੇਸਂ ਤਤ੍ਥ ਜੀਵਿਤਿਨ੍ਦ੍ਰਿਯਂ ਨ ਉਪ੍ਪਜ੍ਜਤਿ.

ਸਬ੍ਬੇਸਂ ਚਵਨ੍ਤਾਨਂ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਤੇਸਂ ਤਤ੍ਥ ਮਨਿਨ੍ਦ੍ਰਿਯਞ੍ਚ ਨਉਪ੍ਪਜ੍ਜਤਿ. ਜੀਵਿਤਿਨ੍ਦ੍ਰਿਯਞ੍ਚ ਨਉਪ੍ਪਜ੍ਜਤੀਤਿ.

ਏਤ੍ਥ ਹਿ ਅਸਞ੍ਞਸਤ੍ਤਾਨਨ੍ਤਿ ਏਤੇਨ ਰੂਪਜੀਵਿਤਿਨ੍ਦ੍ਰਿਯ ਮੇਵ ਵੁਤ੍ਤਂ. ਯਦਿਚ ਤਂ ਚਿਤ੍ਤਸ੍ਸ ਭਙ੍ਗਕ੍ਖਣੇਪਿ ਉਪ੍ਪਜ੍ਜੇਯ੍ਯ, ਪੁਰਿਮਕੋਟ੍ਠਾਸੇ ਪਵਤ੍ਤੇ ਚਿਤ੍ਤਸ੍ਸ ਭਙ੍ਗਕ੍ਖਣੇ ਅਸਞ੍ਞਸਤ੍ਤਾਨਂ ਤੇਸਂ.ਲ. ਜੀਵਿਤਿਨ੍ਦ੍ਰਿਯਂ ਨਉਪ੍ਪਜ੍ਜਤੀਤਿ ਵੁਤ੍ਤਂ ਸਿਯਾ, ਪਚ੍ਛਿਮਕੋਟ੍ਠਾਸੇਚ ਸਬ੍ਬੇਸਂ ਚਵਨ੍ਤਾਨਂ ਇਚ੍ਚੇਵ ਵੁਤ੍ਤਂ ਸਿਯਾਤਿ. ਪਚ੍ਛਿਮਕੋਟ੍ਠਾਸੇ ਪਨ ਅਰੂਪ ਜੀਵਿਤਿਨ੍ਦ੍ਰਿਯਂ ਸਨ੍ਧਾਯ ਵੁਤ੍ਤਨ੍ਤਿ ਚੇ. ਨ. ਤਥਾ ਗਹਣਤ੍ਥਂ ਯਮਕ ਪਾਠਨ੍ਤਰਾਭਾਵਤੋ ਸਬ੍ਬਞ੍ਞੁਵਿਸਯੇਚ ਠਾਨੇ ਪਾਲ਼ਿਯੋ ਸਂਸਨ੍ਦਿਤ੍ਵਾ ਬਲਵਤਿਯਾ ਪਾਲ਼ਿਯੁਤ੍ਤਿਯਾਏਵ ਠਾਤਬ੍ਬਤੋਤਿ. ਯਸ੍ਮਾਚ ਰੂਪਧਮ੍ਮਾ ਨਾਮ ਦਨ੍ਧਪਵਤ੍ਤਿਨੋ ਹੋਨ੍ਤਿ. ਅਰੂਪਧਮ੍ਮਾ ਲਹੁਪਵਤ੍ਤਿਨੋ ਠਿਤਿਕ੍ਖਣੋਚ ਤੇਸਂ ਵਿਸੁਂ ਗਣਨੂਪਗੋ ਨਤ੍ਥਿ. ਤਸ੍ਮਾ ਅਞ੍ਞੋਯੇਵ ਰੂਪ ਧਮ੍ਮਾਨਂ ਖਣਪਬਨ੍ਧੋ. ਅਞ੍ਞੋ ਅਰੂਪਧਮ੍ਮਾਨਂ. ਤਤ੍ਥ ਸਬ੍ਬੇਪਿ ਰੂਪਧਮ੍ਮਾ ਏਕਚਿਤ੍ਤਕ੍ਖਣਪਰਿਮਾਣੇਨ ਅਤ੍ਤਨੋ ਉਪ੍ਪਾਦਕ੍ਖਣੇਨ ਯੁਤ੍ਤਾ ਖਣੇ ਖਣੇ ਨਿਰਨ੍ਤਰਮੇਵ ਉਪ੍ਪਜ੍ਜਨ੍ਤਿ. ਪਟਿਸਨ੍ਧਿਤੋ ਪਟ੍ਠਾਯ ਸਹੁਪ੍ਪਨ੍ਨਤ੍ਤਾਚ ਪਨ ਦ੍ਵਿਨ੍ਨਂ ਤੇਸਂ ਉਪ੍ਪਾਦਾਦਿਵਾ ਨਿਰੋਧਨ੍ਤੋਵਾ ਯਾਵਜੀਵਂਪਿਸਹੇਵ ਹੋਤੀਤਿਪਿ ਤਸ੍ਸ ਅਧਿਪ੍ਪਾਯੋਤਿ. ਯਮਕ ਪਾਲ਼ਿਯੋ ਪਨ ਨਾਨਾਤ੍ਥਾ, ਨਾਨਾਬ੍ਯਞ੍ਜਨਾ, ਗਮ੍ਭੀਰੋਚ ਸਤ੍ਥੁ ਅਧਿਪ੍ਪਾਯੋ. ਤਸ੍ਮਾ ਸੁਟ੍ਠੁ ਵਿਚਾਰੇਤ੍ਵਾ ਸਲ੍ਲਕ੍ਖੇਤਬ੍ਬੋ. ਨ ਪਨ ਧਮ੍ਮਤਾ ਏਸਾ ਯਮਕਸ੍ਸ. ਯਦਿਦਂ ਯਥਾਲਾਭਯੋਜਨਾਤਿ ਕਤ੍ਵਾ ਅਤ੍ਤਨੋ ਅਧਿਪ੍ਪਾਯੇ ਠਤ੍ਵਾ ਦਿਟ੍ਠਂ ਦਿਟ੍ਠਂ ਯਮਕਪਾਠਂ ਯਥਾਲਾਭਯੋ ਜਨਾਯਏਵ ਸਕ੍ਕਾ ਯੋਜੇਤੁਨ੍ਤਿ. ਰੂਪਵਿਰਾਗਭਾਵਨਾਵਿਸੇਸਭੂਤਂ ਅਰੂਪਕੁਸਲਂ ਤਸ੍ਮਿਂ ਲੋਕੇ ਰੂਪਸਹਿਤਂ ਪਟਿਸਨ੍ਧਿਂ ਨਜਨੇਤਿ. ਸੁਦ੍ਧਅਰੂਪਮੇਵ ਜਨੇਤਿ. ਤਸ੍ਮਾ ਰੂਪਸਨ੍ਤਤਿਸੀਸਸ੍ਸ ਸਬ੍ਬਸੋ ਅਭਾਵਾ ਤਤ੍ਰੁਪ੍ਪਨ੍ਨਾਨਿ ਸਬ੍ਬਾਨਿ ਛਚਤ੍ਤਾਲੀਸਚਿਤ੍ਤਾਨਿ ਰੂਪਂ ਜਨੇਤੁਂ ਨ ਨ ਸਕ੍ਕੋਨ੍ਤਿ. ਅਰੂਪਵਿਪਾਕਾ ਪਨ ਤਤ੍ਥੇਵ ਨਿਯਮੁਪ੍ਪਨ੍ਨਾਤਿ ਅਰੂਪਪਾਕਸ੍ਸੇਵ ਗਹਣਂ ਕਤਂ, ਤੇਨੇਵ ਅਟ੍ਠਕਥਾਯਂ, ਅਞ੍ਞਾਨਿਪਿ ਬਹੂਨਿ ਆਰੁਪ੍ਪੇ ਉਪ੍ਪਨ੍ਨਾਨਿ ਅਨੋਕਾਸਤ੍ਥਾ ਰੂਪਂ ਨਸਮੁਟ੍ਠਾਪੇਨ੍ਤੀਤਿ ਵੁਤ੍ਤਂ ਤਤ੍ਥ ਅਨੋਕਾਸਤਾਨਾਮ ਆਦਿਤੋ ਪਟ੍ਠਾਯ ਉਪ੍ਪਨ੍ਨਸ੍ਸ ਰੂਪਸਨ੍ਤਤਿਸੀਸਸ੍ਸ ਅਭਾਵੋ ਏਵ ਦਟ੍ਠਬ੍ਬੋਤਿ.

[੧੮੯] ਵਿਭਾਵਨਿਯਂ ਪਨ

‘‘ਰੂਪਵਿਰਾਗਭਾਵਨਾਨਿਬ੍ਬਤ੍ਤਤ੍ਤਾ ਹੇਤੁਨੋ ਤਬ੍ਬਿਧੁਰਤਾਯਾ’’ਤਿਪਿ ਕਾਰਣਂ ਵੁਤ੍ਤਂ. ਤਂ ਅਕਾਰਣਂ.

ਰੂਪਾਰੂਪਵਿਰਾਗਭਾਵਨਾਭੂਤਮਗ੍ਗਨਿਬ੍ਬਤ੍ਤਸ੍ਸ ਲੋਕੁਤ੍ਤਰਵਿਪਾਕਸ੍ਸ ਰੂਪੋਕਾਸੇ ਸਤਿ ਰੂਪਜਨਕਤਾਦਸ੍ਸਨਤੋਤਿ. ਝਾਨਙ੍ਗਵਿਰਹੇਨ ਅਙ੍ਗਦੁਬ੍ਬਲਾਨਿਪਿ ਰੂਪਂ ਨ ਜਨੇਨ੍ਤੀਤਿ ਦ੍ਵਿਪਞ੍ਚਵਿਞ੍ਞਾਣਗਹਣਂ ਕਤਂ. ਇਤਰਾ ਨਿਪਿ ਪਨ ਪਨ੍ਨਰਸਕਾਮਰੂਪ ਪਟਿਸਨ੍ਧਿਚਿਤ੍ਤਾਨਿ ਖੀਣਾਸਵਾਨਂ ਪਰਿਨਿਬ੍ਬਾਨਚੁਤਿ ਚਿਤ੍ਤਨ੍ਤਿ ਇਮਾਨਿ ਚਿਤ੍ਤਾਨਿ ਰੂਪਂ ਨ ਸਮੁਟ੍ਠਾਪੇਨ੍ਤਿਯੇਵ. ਏਵਂਸਨ੍ਤੇਪਿ ਤਾਨਿ ਸਬ੍ਬਾਨਿਪਿ ਭਵਙ੍ਗਕਾਲੇ ਅਖੀਣਾਸਵਾਨਞ੍ਚ ਚੁਤਿਕਾਲੇ ਸਮੁਟ੍ਠਾਪੇਨ੍ਤੀਤਿ ਤੇਸਂ ਇਧ ਅਗਹਣਂ ਦਟ੍ਠਬ੍ਬਂ.

[੧੯੦] ਵਿਭਾਵਨਿਯਂ ਪਨ

ਪਟਿਸਨ੍ਧਿਚਿਤ੍ਤਂ ਪਨ ਚੁਤਿਚਿਤ੍ਤਞ੍ਚ ਏਕੂਨਵੀਸਤਿ ਭਵਙ੍ਗਸ੍ਸੇਵ ਅਨ੍ਤੋਗਧਤ੍ਤਾ ਚਿਤ੍ਤਨ੍ਤਰਂ ਨ ਹੋਤੀਤਿ ਨ ਤਸ੍ਸ ਵਜ੍ਜਨਂ ਕਤ’’ਨ੍ਤਿ ਵੁਤ੍ਤਂ. ਤਤ੍ਥ ਏਕੂਨਵੀਸਤਿ ਭਵਙ੍ਗਸ੍ਸੇਵਾਤਿ ਨ ਵਤ੍ਤਬ੍ਬਂ.

ਅਰੂਪਵਿਪਾਕਸ੍ਸ ਸਰੂਪਤੋ ਵਜ੍ਜਿਤਤ੍ਤਾਤਿ. ਕਸ੍ਮਾ ਪਨ ਯਥਾ ਵੁਤ੍ਤਾਨਿ ਪਨ੍ਨਰਸ ਪਟਿਸਨ੍ਧਿਚਿਤ੍ਤਾਨਿ ਪਟਿਸਨ੍ਧਿਕ੍ਖਣੇ ਰੂਪਂ ਨ ਸਮੁਟ੍ਠਾਪੇਨ੍ਤੀਤਿ, ਪਰਿਦੁਬ੍ਬਲਤ੍ਤਾ. ਚਿਤ੍ਤਞ੍ਹਿਨਾਮ ਉਪ੍ਪਾਦਕ੍ਖਣੇਏਵ ਪਰਿਪੁਣ੍ਣਂ ਪਚ੍ਚਯਂ ਲਭਿਤ੍ਵਾ ਬਲਵਂ ਹੋਤਿ. ਰੂਪਞ੍ਚ ਠਿਤਿਕ੍ਖਣੇਵ.

ਤਸ੍ਮਾ ਅਤ੍ਤਨੋ ਬਲਵਨ੍ਤਕ੍ਖਣੇ ਉਪ੍ਪਜ੍ਜਮਾਨਭਾਵੇਨ ਦੁਬ੍ਬਲਂ ਵਤ੍ਥੁਂ ਨਿਸ੍ਸਾਯ ਉਪ੍ਪਨ੍ਨਤ੍ਤਾ ਸਯਂਪਿ ਪਰਿਦੁਬ੍ਬਲਂ ਹੋਤੀਤਿ ਸਬ੍ਬਾਨਿਪਿ ਤਾਨਿ ਤਦਾ ਰੂਪਂ ਨਸਮੁਟ੍ਠਾ ਪੇਨ੍ਤੀਤਿ. ਏਤ੍ਥਚ ਕੇਚਿ ਅਨਨ੍ਤਰਾਸੇਵਨਾਦਿਪਚ੍ਚਯਾ ਚਿਤ੍ਤਸ੍ਸ ਉਪ੍ਪਾਦਕ੍ਖਣੇਏਵ ਫਰਨ੍ਤਿ. ਰੂਪਸ੍ਸ ਪਨ ਉਪਤ੍ਥਮ੍ਭਕਭੂਤਾ ਉਤੁਆਹਾਰਾ ਪਚ੍ਛਾਜਾਤਪਚ੍ਚਯਧਮ੍ਮਾਚ ਠਿਤਿਕ੍ਖਣੇਏਵਫਰਨ੍ਤੀਤਿ ਤੇਸਂ ਯਥਾਕ੍ਕਮਂ ਉਪ੍ਪਾਦਕ੍ਖਣੇ ਠਿਤਿਕ੍ਖਣੇਚ ਪਰਿਪੁਣ੍ਣਪਚ੍ਚਯਲਾਭੋ ਵੇਦਿਤਬ੍ਬੋ.

[੧੯੧] ਵਿਭਾਵਨਿਯਂ ਪਨ

‘‘ਪਚ੍ਛਾਜਾਤ ਪਚ੍ਚਯਰਹਿਤਂ ਪਨ ਆਹਾਰਾਦੀਹਿਚ ਅਨੁਪਤ੍ਥਦ੍ਧਂ ਦੁਬ੍ਬਲਵਤ੍ਥੁਂ ਨਿਸ੍ਸਾਯ ਪਵਤ੍ਤਤ੍ਤਾ ਅਤ੍ਤਨੋਚ ਆਗਨ੍ਤੁਕਤਾਯ ਕਮ੍ਮਜਰੂਪੇਹਿਚ ਚਿਤ੍ਤਸਮੁਟ੍ਠਾਨਰੂਪਾਨਂ ਠਾਨਂ ਗਹੇਤ੍ਵਾ ਠਿਤਤ੍ਤਾ’’ਤਿ ਕਾਰਣਂ ਵੁਤ੍ਤਂ. ਤਤ੍ਥ ਪਚ੍ਛਾਜਾਤ ਪਚ੍ਚਯ ਰਹਿਤਨ੍ਤਿ ਇਦਂ ਵਿਚਾਰੇਤਬ੍ਬਂ.

ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕ੍ਖਣੇ ਪਚ੍ਛਾਜਾਤ ਪਚ੍ਚਯ ਰਹਿਤਸ੍ਸ ਪਿਉਤੁਸ੍ਸ ਰੂਪਜਨਕਭਾਵਸ੍ਸ ਵਕ੍ਖਮਾਨਤ੍ਤਾ. ਨ ਹਿ ਅਤ੍ਤਨਾ ਅਵਿਜ੍ਜਮਾਨਂ ਪਚ੍ਛਿਮਚਿਤ੍ਤਂ ਪੁਰਿਮਚਿਤ੍ਤਕ੍ਖਣੇ ਠਿਤਸ੍ਸ ਕਸ੍ਸਚਿ ਰੂਪਸ੍ਸ ਪਚ੍ਛਾਜਾਤ ਪਚ੍ਚਯੋ ਹੋਤਿ. ਅਤ੍ਥਿ ਪਚ੍ਚਯੇਕਦੇਸਤ੍ਤਾ ਤਸ੍ਸ ਪਚ੍ਚਯਸ੍ਸਾਤਿ. ਖੀਣਾਸਵਾਨਂ ਚੁਤਿਚਿਤ੍ਤਂ ਪਨ ਪਕਤਿਯਾਵ ਵੂਪਸਨ੍ਤਵਟ੍ਟਮੂਲੇ ਸਨ੍ਤਾਨੇ ਪਵਤ੍ਤਤ੍ਤਾ ਸਨ੍ਤਤਰਂ ਹੋਤਿ. ਪੁਨ ਆਯੁਸਙ੍ਖਾਰਾਨਂ ਪਰਿਕ੍ਖਯੇਨ ਦੁਬ੍ਬਲਤਰੇ ਪਰਿਯਨ੍ਤਗਤੇ ਚ ਵਤ੍ਥੁਮ੍ਹਿ ਨਿਸ੍ਸਿਤਤ੍ਤਾ ਦੁਬ੍ਬਲਤਰਞ੍ਚ ਹੋਤੀਤਿ ਤਂ ਰੂਪਂ ਨਸਮੁਟ੍ਠਾਪੇਤੀਤਿ, ਆਚਰਿਯਾਨਨ੍ਦਤ੍ਥੇਰੋ ਪਨ ਸਬ੍ਬਸਤ੍ਤਾਨਂਪਿ ਚੁਤਿਚਿਤ੍ਤਂ ਰੂਪਂ ਨਸਮੁਟ੍ਠਾਪੇਤੀਤਿ ਇਚ੍ਛਤਿ. ਯਥਾਹ-ਖੀਣਾਸਵਾਨਂ ਚੁਤਿਚਿਤ੍ਤਨ੍ਤਿ ਵਿਸੇਸੇਤ੍ਵਾ ਵੁਤ੍ਤਂ.

ਕਾਮਾਵਚਰਾਨਂ ਪਚ੍ਛਿਮਚਿਤ੍ਤਸ੍ਸ ਉਪ੍ਪਾਦਕ੍ਖਣੇ ਯਸ੍ਸ ਚਿਤ੍ਤਸ੍ਸ ਅਨਨ੍ਤਰਾ ਕਾਮਾਵਚਰਾਨਂ ਪਚ੍ਛਿਮਚਿਤ੍ਤਂ ਉਪ੍ਪਜ੍ਜਿਸ੍ਸਤਿ. ਰੂਪਾਵਚਰੇ ਅਰੂਪਾਵਚਰੇ ਪਚ੍ਛਿਮਭਵਿਕਾਨਂ ਯੇਚ ਰੂਪਾਵਚਰਂ ਅਰੂਪਾਵਚਰਂ ਉਪਪਜ੍ਜਿਤ੍ਵਾ ਪਰਿਨਿਬ੍ਬਾਯਿਸ੍ਸਨ੍ਤਿ, ਤੇਸਂ, ਚਵਨ੍ਤਾਨਂ ਤੇਸਂ ਵਚੀ ਸਙ੍ਖਾਰੋ ਨਿਰੁਜ੍ਝਿਸ੍ਸਤਿ, ਨੋਚ ਤੇਸਂ ਕਾਯਸਙ੍ਖਾਰੋ ਨਿਰੁਜ੍ਝਤੀਤਿ –

ਪਨ ਵਚਨਤੋ ਅਞ੍ਞੇਸਂਪਿ ਚੁਤਿਚਿਤ੍ਤਂ ਰੂਪਂ ਨਸਮੁਟ੍ਠਾਪੇਤੀਤਿ ਵਿਞ੍ਞਾਯਤਿ. ਨ ਹਿ ਰੂਪਸਮੁਟ੍ਠਾਪਕ ਚਿਤ੍ਤਸ੍ਸ ਗਬ੍ਭਗਮਨਾਦਿ ਵਿਨਿਬਦ੍ਧਾਭਾਵੇ ਕਾਯਸਙ੍ਖਾਰਾਸਮੁਟ੍ਠਾਪਨਂ ਅਤ੍ਥਿ, ਨ ਚ ਯੁਤ੍ਤਂ ਚੁਤੋਚ ਚਿਤ੍ਤਸਮੁਟ੍ਠਾਨਞ੍ਚਸ੍ਸ ਪਵਤ੍ਤਤੀਤਿ. ਨਾਪਿ ਚੁਤਿਚਿਤ੍ਤਂ ਰੂਪਂ ਸਮੁਟ੍ਠਾਪੇਤੀਤਿ ਪਾਲ਼ਿ ਅਤ੍ਥੀਤਿ.

ਅਨੁਟੀਕਾਯਂ ਪਨ

ਤਸ੍ਮਿਂ ਪਾਠੇ ਤੇਸਂ ਚਵਨ੍ਤਾਨਂ ਨੋਚ ਕਾਯਸਙ੍ਖਾਰੋ ਨਿਰੁਜ੍ਝਤੀਤਿ ਵਚਨਂ ਨ ਕੇਵਲਂ ਚੁਤਿਚਿਤ੍ਤਸ੍ਸੇਵ ਰੂਪਸਮੁਟ੍ਠਾਪਨਾਭਾਵਂ ਸਾਧੇਤਿ, ਅਥਖੋ ਤਤੋ ਪੁਰਿਮਾਨਂ ਸਬ੍ਬੇਸਂ ਮਰਣਾਸਨ੍ਨ ਚਿਤ੍ਤਾਨਂ ਰੂਪਸਮੁਟ੍ਠਾਪਨਾਭਾਵਂਪਿ ਸਾਧੇਤਿਯੇਵਾਤਿ ਦੀਪੇਤਿ. ਚੁਤਿ ਚਿਤ੍ਤਸ੍ਮਿਂਹਿ ਕਾਯਸਙ੍ਖਾਰਸ੍ਸ ਨਿਰੋਧੇ ਪਟਿਸਿਦ੍ਧੇ ਤਤੋ ਪੁਬ੍ਬੇ ਯਾਵ ਸਤ੍ਤਰਸਮਚਿਤ੍ਤਾ ਏਤ੍ਥਨ੍ਤਰੇ ਤਸ੍ਸ ਉਪ੍ਪਾਦੋਪਿ ਪਟਿਸਿਦ੍ਧੋਏਵ ਹੋਤੀਤਿ. ਸਬ੍ਬਞ੍ਚੇਤਂ ਵਿਚਾਰੇਤਬ੍ਬਂ.

ਕਾਯਸਙ੍ਖਾਰੋਤਿ ਹਿ ਅਸ੍ਸਾਸਪਸ੍ਸਾਸੋ ਵੁਚ੍ਚਤਿ. ਸੋਚ ਸੁਟ੍ਠੁ ਓਲ਼ਾਰਿਕੋ ਰੂਪਧਮ੍ਮੋਤਿ ਨਚੁਤਿਚਿਤ੍ਤੇ ਤਨ੍ਨਿਰੋਧਾਭਾਵ ਵਚਨੇਨ ਇਤਰਾਨਿ ਸੁਖੁਮਾਨਿਪਿ ਰੂਪਾਨਿ ਚੁਤਿਚਿਤ੍ਤਂ ਨਜਨੇਤੀਤਿ ਸਕ੍ਕਾ ਵਤ੍ਤੁਂ.

[੧੯੨] ਯਞ੍ਚ ਤਤ੍ਥ

ਨ ਹਿ ਰੂਪਸਮੁਟ੍ਠਾਪਕਚਿਤ੍ਤਸ੍ਸ ਗਬ੍ਭਗਮਨਾਦਿ ਵਿਨਿਬਦ੍ਧਾਭਾਵੇ ਕਾਯਸਙ੍ਖਾਰਾਸਮੁਟ੍ਠਾਪਨਂ ਅਤ੍ਥੀਤਿ ਵੁਤ੍ਤਂ. ਤਂਪਿ ਨ ਯੁਜ੍ਜਤਿ.

ਤਾਨਿਏਵ ਹਿ ਗਬ੍ਭਗਮਨਾਦੀਨਿ ਇਮਸ੍ਸਤ੍ਥਸ੍ਸ ਸਾਧਕਾਨਿ ਭਵਿਤੁਂ ਅਰਹਨ੍ਤਿ ਓਲ਼ਾਰਿਕਸ੍ਸ ਕਾਯਸਙ੍ਖਾਰਸ੍ਸ ਅਸਮੁਟ੍ਠਾਪਕਂਪਿ ਚਿਤ੍ਤਂ ਇਤਰਂ ਸੁਖੁਮਰੂਪਂ ਪਨ ਸਮੁਟ੍ਠਾਪੇਤਿਯੇਵਾਤਿ.

[੧੯੩] ਯਂਪਿ ਤਤ੍ਥ

ਨ ਚ ਯੁਤ੍ਤਂ ਚੁਤੋਚ ਚਿਤ੍ਤਸਮੁਟ੍ਠਾਨਞ੍ਚਸ੍ਸ ਪਵਤ੍ਤਤੀਤਿ ਵੁਤ੍ਤਂ. ਤਂਪਿ ਅਕਾਰਣਂ.

ਨ ਹਿ ਚੁਤਿਤੋ ਪਰਂ ਕਤਿਪਯਖਣਮਤ੍ਤਂ ਚਿਤ੍ਤਜਰੂਪਪਵਤ੍ਤਿਯਾ ਕੋਚਿ ਵਿਰੋਧੋ ਅਤ੍ਥੀਤਿ.

ਯਞ੍ਚ ਤਤ੍ਥ

ਨਾਪਿ ਚੁਤਿਚਿਤ੍ਤਂ ਰੂਪਂ ਸਮੁਟ੍ਠਾਪੇਤੀਤਿ ਪਾਲ਼ਿ ਅਤ੍ਥੀਤਿ ਵੁਤ੍ਤਂ. ਤਤ੍ਥਪਿ ਚੁਤਿਚਿਤ੍ਤਂ ਰੂਪਂ ਨਸਮੁਟ੍ਠਾਪੇਤੀਤਿਪਿ ਨਤ੍ਥਿ, ਅਞ੍ਞਤ੍ਰ ਕਾਯਸਙ੍ਖਾਰਾਤਿ ਨ ਨ ਸਕ੍ਕਾ ਵਤ੍ਤੁਨ੍ਤਿ.

ਏਵਂ ਪਨ ਯੁਤ੍ਤਂ ਸਿਯਾ, ਯਥਾ ਰੂਪਧਮ੍ਮਾ ਆਦਿਤੋ ਪਟਿਸਨ੍ਧਿਕਾਲੇ ਏਕਚਿਤ੍ਤਕ੍ਖਣਮਤ੍ਤੇ ਪਚ੍ਚਯਪਰਿਤ੍ਤਤਾਯਵਾ ਅਤ੍ਤਨੋ ਦਨ੍ਧਵੁਤ੍ਤਿ ਤਾਯਵਾ ਦੁਬ੍ਬਲਾ ਹੋਨ੍ਤਿ, ਤਥਾ ਪਰਿਯੋਸਾਨੇਪਿ ਮਰਣਕਾਲੇ ਪਰਿਕ੍ਖੀਯਮਾਨਪਚ੍ਚਯਤਾਯਵਾ ਨਿਰੋਧਾਸਨ੍ਨਤਾਯਵਾ ਪਰਿਦੁਬ੍ਬਲਾਏਵ ਹੋਨ੍ਤੀਤਿ ਸਕ੍ਕਾ ਵਤ੍ਤੁਂ. ਤਸ੍ਮਾ ਵਤ੍ਥੁਸ੍ਸ ਆਦਿਅਨ੍ਤਨਿਸ੍ਸਿਤਾਨਿ ਪਟਿਸਨ੍ਧਿਚੁਤਿਚਿਤ੍ਤਾਨਿ ਸਮਦੁਬ੍ਬਲਾਨਿਏਵ ਹੋਨ੍ਤੀਤਿ ਸਕ੍ਕਾ ਵਿਞ੍ਞਾਤੁਨ੍ਤਿ.

ਵਿਭਾਵਨਿਯਂ ਪਨ

ਅਭਿਧਮ੍ਮਤ੍ਥਵਿਕਾਸਨਿਯਞ੍ਚ ਪਾਲ਼ਿਵਿਰੋਧਂ ਮਞ੍ਞਮਾਨੋ ਕਿਞ੍ਚਿਮਤ੍ਤਮ੍ਪਿ ਅਵਿਚਾਰੇਤ੍ਵਾ ਟੀਕਾਸੁ ਵੁਤ੍ਤਨਯਮੇਵ ਸੁਟ੍ਠੁ ਵਿਕਾਸਯਿਤ੍ਵਾ ਗਤੋਤਿ.

ਪਥਮਭਵਙ੍ਗਮੁਪਾਦਾਯਾਤਿ ਪਥਮ ਭਵਙ੍ਗਚਿਤ੍ਤਸ੍ਸ ਉਪ੍ਪਾਦਕ੍ਖਣਤੋ ਪਟ੍ਠਾਯ. ਜਾਯਨ੍ਤਮੇਵਾਤਿ ਉਪ੍ਪਾਦਕ੍ਖਣੇ ਉਪ੍ਪਾਦਕ੍ਖਣੇ ਉਪ੍ਪਜ੍ਜ ਮਾਨਮੇਵ, ਨ ਤਿਟ੍ਠਨ੍ਤਂ. ਨਚ ਭਿਜ੍ਜਮਾਨਨ੍ਤਿ ਅਤ੍ਥੋ. ਕਾਰਣਂ ਵੁਤ੍ਤਮੇਵ. ਤਤ੍ਥਾਤਿ ਤਸ੍ਮਿਂ ਪਞ੍ਚਸਤ੍ਤਤਿਵਿਧੇ ਚਿਤ੍ਤੇ. ਅਪ੍ਪਨਾਜਵਨਨ੍ਤਿ ਅਭਿਞ੍ਞਾਦ੍ਵਯਵਜ੍ਜਿਤਂ ਛਬ੍ਬੀਸਤਿਵਿਧਂ ਅਪ੍ਪਨਾਜਵਨਚਿਤ੍ਤਂ. ਇਰਿਯਾਪਥਨ੍ਤਿ ਗਮਨਵਜ੍ਜਿਤਂ ਤਿਵਿਧਂਪਿ ਇਰਿਯਾਪਥਂ.

[੧੯੪] ਵਿਭਾਵਨਿਯਂ ਪਨ

‘‘ਗਮਨਾਦੀ’’ਤਿ ਵੁਤ੍ਤਂ. ਤਂ ਨ ਯੁਜ੍ਜਤਿ.

ਨ ਹਿ ਅਙ੍ਗਪਚ੍ਚਙ੍ਗਾਨਂ ਚਲਨਫਨ੍ਦਨਮਤ੍ਤਂਪਿ ਵਿਞ੍ਞਤ੍ਤਿਯਾ ਵਿਨਾ ਸਿਜ੍ਝਤਿ. ਕੁਤੋ ਗਮਨਂ. ਨਚ ਯਥਾਵੁਤ੍ਤਂ ਅਪ੍ਪਨਾਜਵਨਂ ਵਿਞ੍ਞਤ੍ਤਿਂ ਸਮੁਟ੍ਠਾਪੇਤੁਂ ਸਕ੍ਕੋਤੀਤਿ. ਪਿ ਸਦ੍ਦੇਨ ਤਂ ਨਕੇਵਲਂ ਰੂਪਸਮੁਟ੍ਠਾਪਕਮਤ੍ਤਂਤਿ ਦਸ੍ਸੇਤਿ. ਸਨ੍ਨਾਮੇਤੀਤਿ ਸਨ੍ਧਾਰੇਤਿ ਅਯਮੇਵਵਾ ਪਾਠੋ ਸਿਯਾ, ਵਕ੍ਖਮਾਨੇਹਿ ਚਿਤ੍ਤੇਹਿ ਅਭਿਸਙ੍ਖਤਂ ਯਥਾਪਵਤ੍ਤਂ ਇਰਿਯਾਪਥਂ ਅਪਤਮਾਨਂ ਅਚਲਮਾਨਂ ਧਾਰੇਤਿ ਉਪਤ੍ਥਮ੍ਭੇਤੀਤਿ ਅਤ੍ਥੋ. ਉਪਤ੍ਥਮ੍ਭਨਞ੍ਚੇਤ੍ਥ ਯਥਾਪਵਤ੍ਤਸ੍ਸ ਇਰਿਯਾਪਥਸ੍ਸ ਰਕ੍ਖਨਮਤ੍ਤਂ ਦਟ੍ਠਬ੍ਬਂ. ਨਉਕ੍ਖਿਪਿਤ੍ਵਾ ਵਿਯ ਅਭਿਨੀਹਰਣਂ. ਇਤਰਥਾ ਥਮ੍ਭਨਵਿਞ੍ਞਤ੍ਤਿਯਾ ਪਸਙ੍ਗੋ ਸਿਯਾਤਿ. ਏਤ੍ਥਚ ਯਥਾਨਿਸਿਨ੍ਨਸ੍ਸਵਾ ਠਿਤਸ੍ਸਵਾ ਭਵਙ੍ਗ ਚਿਤ੍ਤੇ ਅਬ੍ਬੋਕਿਣ੍ਣੇ ਪਵਤ੍ਤਮਾਨੇ ਅਙ੍ਗਾਨਿ ਓਸੀਦਨ੍ਤਿ ਪਤਨ੍ਤਿ. ਨ ਤਥਾ ਇਮਸ੍ਮਿਂ ਛਬ੍ਬੀਸਤਿਵਿਧੇ ਜਾਗਰਣਚਿਤ੍ਤੇ ਵਕ੍ਖਮਾਨੇਸੁਚਦ੍ਵਤ੍ਤਿਂਸ ਵਿਧੇਸੁ ਜਾਗਰਣਚਿਤ੍ਤੇਸੁਪਵਤ੍ਤਮਾਨੇਸੁ. ਤੇਸੁ ਪਨ ਪਵਤ੍ਤਮਾਨੇਸੁ ਅਙ੍ਗਾਨਿ ਉਪਤ੍ਥਦ੍ਧਾਨਿ ਹੋਨ੍ਤਿ. ਨ ਓਸੀਦਨ੍ਤਿ ਨ ਪਤਨ੍ਤਿ. ਪੁਬ੍ਬੇ ਯਥਾ ਥਪਿਤਾਨੇਵ ਪਵਤ੍ਤਨ੍ਤੀਤਿ ਵੇਦਿਤਬ੍ਬਂ.

[੧੯੫] ਵਿਭਾਵਨਿਯਂ ਪਨ

‘‘ਨ ਏਵ ਮੇਤੇਸੁ ਦ੍ਵਤ੍ਤਿਂਸਵਿਧੇਸੁ ਵਕ੍ਖਮਾਨੇਸੁ ਚ ਛਬ੍ਬੀਸਤਿ ਯਾ ਜਾਗਰਣਚਿਤ੍ਤੇਸੁ ਪਵਤ੍ਤਮਾਨੇਸੂ’’ਤਿ ਪਾਠੋ.

ਨ ਏਵਮੇਤੇਸੁ ਛਬ੍ਬੀਸਤਿਯਾ ਜਾਗਰਣਚਿਤ੍ਤੇਸੁ ਵਕ੍ਖਮਾਨੇ ਸੁਚ ਦ੍ਵਤ੍ਤਿਂਸ ਵਿਧੇਸੁ ਪਵਤ੍ਤਮਾਨੇਸੂਤਿ ਪਨ ਪਾਠੋ ਯੁਤ੍ਤੋ. ਵੋਟ੍ਠਬ੍ਬਨਨ੍ਤਿ ਮਨੋਦ੍ਵਾਰੇ ਆਵਜ੍ਜਨਮਾਹ. ਨ ਹਿ ਪਞ੍ਚਦ੍ਵਾਰਿਕਾਨਿ ਜਵਨ ਚਿਤ੍ਤਾਨਿਪਿ ਵਿਞ੍ਞਤ੍ਤਿਂ ਸਮੁਟ੍ਠਾਪੇਨ੍ਤਿ. ਇਰਿਯਾਪਥੁਪਤ੍ਥਮ੍ਭਨ ਮਤ੍ਤਂ ਵਾ ਪਿਸਦ੍ਦੇਨ ਗਹਿਥਂ ਸਨ੍ਧਾਯ ਵੋਟ੍ਠਬ੍ਬਨਾਦੀਨਿ ਪਞ੍ਚਦ੍ਵਾਰਿਕਾਨਿਪਿ ਗਹਿਤਾਨਿਤਿ ਦਟ੍ਠਬ੍ਬਂ. ਏਤ੍ਥਚ ਇਰਿਯਾਪਥੋਨਾਮ ਗਮਨਾਦਿਨਾ ਤੇਨ ਤੇਨ ਅਵਤ੍ਥਾਵਿਸੇਸੇਨ ਪਵਤ੍ਤਾ ਰੂਪਧਮ੍ਮਾਏਵ. ਏਵਂ ਸਨ੍ਤੇਪਿ ਕਿਞ੍ਚਿਚਿਤ੍ਤਂ ਰੂਪ ਸਾਮਞ੍ਞਮੇਵ ਜਨੇਤਿ ਨ ਤਤੋਪਰਂ. ਕਿਞ੍ਚਿ ਅਞ੍ਞਚਿਤ੍ਤਸ੍ਸ ਵਸੇਨ ਯਥਾਪਵਤ੍ਤਂ ਇਰਿਯਾਪਥਂ ਰਕ੍ਖਿਤੁਂਏਵ ਸਕ੍ਕੋਤਿ, ਨ ਅਪ੍ਪਵਤ੍ਤਂ ਇਰਿਯਾਪਥਂ ਪਵਤ੍ਤੇਤੁਂ. ਕਿਞ੍ਚਿ ਵਿਞ੍ਞਤ੍ਤਿਂ ਸਮੁਟ੍ਠਾਪੇਤ੍ਵਾ ਅਪ੍ਪਵਤ੍ਤਞ੍ਚ ਇਰਿਯਾਪਥਂ ਪਵਤ੍ਤੇਤੁਂ ਸਕ੍ਕੋਤਿ. ਅਞ੍ਞਾਨਿਚ ਕਾਯਿਕ ਵਾਚਸਿਕ ਵਿਕਾਰਾਨਿ ਜਨੇਤੁਂ ਸਕ੍ਕੋਤਿ. ਯਾਨਿਚ ਚਿਤ੍ਤਾਨਿ ਉਤ੍ਤਰਕਿਚ੍ਚਂ ਜਨੇਤੁਂ ਸਕ੍ਕੋਨ੍ਤਿ. ਤਾਨਿ ਹੇਟ੍ਠਿਮਹੇਟ੍ਠਿਮਂ ਕਿਚ੍ਚਂ ਜਨੇਤੁਂ ਸਕ੍ਕੋਨ੍ਤਿਯੇਵਾਤਿ ਦਸ੍ਸਨਤ੍ਥਂ ਅਯਂ ਵਿਭਾਗੋ ਕਤੋਤਿ ਵੇਦਿਤਬ੍ਬੋ.

[੧੯੬] ਯਂ ਪਨ ਵਿਭਾਵਨਿਯਂ

‘‘ਯਂਪਨ ਚਿਤ੍ਤਂ ਵਿਞ੍ਞਤ੍ਤਿਜਨਕਂ, ਤਂ ਏਕਂਸਤੋ ਇਰਿਯਾਪਥੁ ਪਤ੍ਥਮ੍ਭਕਂ. ਇਰਿਯਾ ਪਥਸ੍ਸ ਵਿਞ੍ਞਤ੍ਤਿਯਾ ਸਹ ਅਵਿਨਾਭਾਵਤੋ’’ਤਿ ਵੁਤ੍ਤਂ. ਤਂ ਨ ਯੁਜ੍ਜਤਿ.

ਇਧ ਹਿ ਇਰਿਯਾਪਥੁਪਤ੍ਥਮ੍ਭਨਂਨਾਮ ਵਿਞ੍ਞਤ੍ਤਿਰਹਿਤਮੇਵਾ ਧਿਪ੍ਪੇਤਂ, ਨ ਵਿਞ੍ਞਤ੍ਤਿਸਹਿਤਂ. ਇਤਰਥਾ ਅਪ੍ਪਨਾਜਵਨਾਨਂਪਿ ਵਿਞ੍ਞਤ੍ਤਿਜਨਕਤਾ ਆਪਜ੍ਜੇਯ੍ਯਾਤਿ. ਸੋਮਨਸ੍ਸਜਵਨਾਨਿ ਤੇਰਸਾਤਿ ਹਸਿਤੁਪ੍ਪਾਦੇਨ ਸਦ੍ਧਿਂ ਲੋਭਮੂਲਤੋ ਮਹਾ ਕੁਸਲਤੋ ਮਹਾ ਕ੍ਰਿਯਤੋ ਚ ਚਤ੍ਤਾਰਿਚਤ੍ਤਾਰੀਤਿ ਤੇਰਸ ਸੋਮਨਸ੍ਸਜਵਨਾਨਿ. ਤੇਸੁਪਨ ਕੁਸਲਾ ਕੁਸਲਤੋ ਅਟ੍ਠਪੁਥੁਜ੍ਜਨਾਨਂ. ਦਿਟ੍ਠਿਵਿਪ੍ਪਯੁਤ੍ਤਾ ਕੁਸਲਕੁਸਲਤੋ ਛਸੇਕ੍ਖਾਨਂ. ਕ੍ਰਿਯਤੋ ਪਞ੍ਚਖੀਣਾਸਵਾਨਨ੍ਤਿ ਦਟ੍ਠਬ੍ਬਂ. ਸਬ੍ਬਂ ਕਾਯਵਚੀਮਨੋਕਮ੍ਮਂ ਞਾਣਪੁਬ੍ਬਙ੍ਗਮਂ ਞਾਣਾਨੁਪਰਿਵਤ੍ਤਨ੍ਤਿ ਵਚਨਤੋ ਵਿਚਾਰਣਕਿਚ੍ਚਰਹਿਤੋ ਹਸਿਤੁਪ੍ਪਾਦੋ ਸਬ੍ਬਞ੍ਞੁਬੁਦ੍ਧਾਨਂ ਨਸਮ੍ਭਵਤੀਤਿ ਏਵਂ ਪਵਤ੍ਤੋ ਵਾਦੋ ਅਟ੍ਠਕਥਾਯਂ ਪਟਿਕ੍ਖਿਤ੍ਤੋਯੇਵ. ਤਸ੍ਮਿਂਵਾਦੇ ਹਿ ਸਤਿ ਇਤਰੇਸਂਪਿ ਅਹੇਤੁਕਚਿਤ੍ਤਾਨਂ ਞਾਣਵਿਪ੍ਪਯੁਤ੍ਤਮਹਾ ਕ੍ਰਿਯਜਵਨਾਨਞ੍ਚ ਬੁਦ੍ਧਾਨਂ ਅਸਮ੍ਭਵੋ ਆਪਜ੍ਜਤਿ. ਤਸ੍ਮਾ ਤੇਸਂ ਹਸਿਤੁਪ੍ਪਾਦਚਿਤ੍ਤੇਨ ਪਵਤ੍ਤਸ੍ਸ ਸਿਤਕਮ੍ਮਸ੍ਸ ਪੁਬ੍ਬਾਪਰਪਵਤ੍ਤਾਨਂ ਞਾਣਾਨਂ ਵਸੇਨ ਞਾਣਪੁਬ੍ਬਙ੍ਗਮਤਾ ਞਾਣਾਨੁਪਰਿਵਤ੍ਤਤਾ ਚ ਵੇਦਿਤਬ੍ਬਾਤਿ. ਸੀਤੁਣ੍ਹੋਤੁ ਸਮਞ੍ਞਾਤਾਤਿ ਇਦਂ ਸੀਤਂ ਇਦਂ ਉਣ੍ਹਨ੍ਤਿ ਏਵਂ ਸਬ੍ਬ ਲੋਕਿਯਮਹਾਜਨੇਹਿ ਸੁਟ੍ਠੁ ਪਰਿਚ੍ਛਿਨ੍ਦਿਤ੍ਵਾ ਞਾਤਾ. ਠਿਤਿਪ੍ਪਤ੍ਤਾਵਾਤਿ ਅਤ੍ਤਨੋ ਠਿਤਿਭਾਵਂ ਠਿਤਿਕ੍ਖਣਂਵਾ ਪਤ੍ਤਾਏਵ. ਨ ਪਨ ਚਿਤ੍ਤਮਿਵ ਜਾਯਨ੍ਤ ਮਤ੍ਤਾਤਿ ਅਤ੍ਥੋ. ਕਾਰਣਂ ਵੁਤ੍ਤਮੇਵ.

[੧੯੭] ਯਂ ਪਨ ਵਿਭਾਵਨਿਯਂ

‘‘ਪਚ੍ਛਾਜਾਤਾਦਿਪਚ੍ਚਯੁਪਤ੍ਥਮ੍ਭਲਾਭੇਨ ਠਿਤਿਕ੍ਖਣੇਏਵ ਉਤੁਓਜਾਨਂ ਬਲਵਭਾਵੋਤਿ ਵੁਤ੍ਤਂ ਤੇਜੋਧਾਤੁ ਠਿਤਿਪ੍ਪਤ੍ਤਾਤਿਆਦਿ’’. ਤਤ੍ਥ ਪਚ੍ਛਾਜਾਤਪਚ੍ਚਯਵਚਨਂ ਹੇਟ੍ਠਾ ਵਿਚਾਰਿਤਮੇਵ.

ਅਪਿਚ, ਯਦਿ ਉਤੁਨੋ ਬਲਵਭਾਵੋ ਰੂਪੁਪ੍ਪਾਦਨਞ੍ਚ ਪਚ੍ਛਾਜਾਤਪਚ੍ਚਯਾਯਤ੍ਤਂ ਸਿਯਾ. ਏਵਂ ਸਤਿ ਸੋ ਪਟਿਸਨ੍ਧਿਚਿਤ੍ਤਸ੍ਸ ਠਿਤਿਕ੍ਖਣੇ ਰੂਪਂ ਨ ਸਮੁਟ੍ਠਾਪੇਯ੍ਯ, ਤਦਾ ਪਚ੍ਛਾਜਾਤਪਚ੍ਚਯਸ੍ਸੇਵ ਅਭਾਵਤੋ. ਵਕ੍ਖਤਿਚ ਠਿਤਿਕਾਲਮੁਪਾਦਾਯ ਉਤੁਸਮੁਟ੍ਠਾਨਾਤਿ. ਏਤ੍ਥਚ ਠਿਤਿਕਾਲਨ੍ਤਿ ਪਟਿਸਨ੍ਧਿਚਿਤ੍ਤਸ੍ਸ ਠੀਤਿਕਾਲੋ ਵੁਤ੍ਤੋਤਿ. ਤਸ੍ਮਾ ਪਚ੍ਛਾਜਾਤਪਚ੍ਚਯਵਚਨਂ ਵਿਚਾਰੇਤ੍ਵਾ ਸਮ੍ਪਟਿਚ੍ਛਿਤਬ੍ਬਨ੍ਤਿ. ਓਜਾਸਙ੍ਖਾਤੋ ਆਹਾਰੋਤਿ ਕਮ੍ਮਸਮੁਟ੍ਠਾਨਾਦਿਵਸੇਨ ਚਤੁਬ੍ਬਿਧੋ ਅਜ੍ਝਤ੍ਤਸਨ੍ਤਾਨ ਗਤੋਅਸਿਤਪੀਤਖਾਯਿਤਸਾਯਿਤਵਸੇਨ ਚਤੁਬ੍ਬਿਧੋ, ਬਹਿਦ੍ਧਸਨ੍ਤਾ ਨਗਤੋਚ ਓਜਾਸਙ੍ਖਾਤੋ ਦੁਵਿਧਾਹਾਰੋ. ਤਦੁਭਯਾਪਿਚ ਸਂਸਗ੍ਗ ਵਸੇਨ ਲਦ੍ਧੁਪਤ੍ਥਮ੍ਭਾ ਏਵਰੂਪਂ ਸਮੁਟ੍ਠਾਪੇਨ੍ਤੀਤਿ ਵੁਤ੍ਤਂ ਅਜ੍ਝੋਹਰਣ ਕਾਲੇਤਿ. ਏਤ੍ਥਚ ਬਹਿਦ੍ਧਾਸਮ੍ਭੂਤੇਨ ਉਤੁਨਾ ਸਹ ਅਜ੍ਝਤ੍ਤ ਸਮ੍ਭੂਤਾਨਂ ਚਤੁਸਮੁਟ੍ਠਾਨਾਨਂ ਉਤੁਓਜਾਨਂ ਵਿਯ ਬਹਿਦ੍ਧਾਸਮ੍ਭੂਤਾਯ ਓਜਾਯਪਿ ਅਜ੍ਝਤ੍ਤਂ ਰੂਪਸਮੁਟ੍ਠਾਨਂ ਸਬ੍ਬਅਟ੍ਠਕਥਾਸੁ ਵੁਤ੍ਤਂ.

ਯਥਾਹ-ਮਜ੍ਝਿਮਟ੍ਠਕਥਾਯਂ

ਕਬਲ਼ੀਕਾਰਾਹਾਰੋ ਤਾਵ ਮੁਖੇ ਥਪਿਤਮਤ੍ਤੋ ਏਵ ਅਟ੍ਠਰੂਪਾਨਿ ਸਮੁਟ੍ਠਾਪੇਤਿ. ਦਨ੍ਤਵਿਚੁਣ੍ਣਿਤਂ ਪਨ ਅਜ੍ਝੋਹਰੀਯਮਾਨਂ ਏਕੇਕਂ ਸਿਤ੍ਥਂ ਅਟ੍ਠ ਅਟ੍ਠ ਰੂਪਾਨਿ ਸਮੁਟ੍ਠਾਪੇਤੀਤਿ.

ਆਚਰਿਯਧਮ੍ਮਪਾਲਤ੍ਥੇਰੇਨ ਪਨ ਯਦਿ ਬਹਿਦ੍ਧਸਮ੍ਭੂਤਾ ਓਜਾ ਰੂਪਂ ਸਮੁਟ੍ਠਾਪੇਯ੍ਯ, ਏਵਂ ਸਤਿ ਯਥਾ ਬਹਿਦ੍ਧਸਮ੍ਭੂਤੋ ਉਤੁ ਅਜ੍ਝਤ੍ਤਞ੍ਚ ਬਹਿਦ੍ਧਾਚ ਰੂਪਂ ਸਮੁਟ੍ਠਾਪੇਤਿ. ਤਥਾ ਸਾ ਬਹਿਦ੍ਧਾਪਿ ਰੂਪਂ ਸਮੁਟ੍ਠਾਪੇਯ੍ਯ. ਨ ਪਨ ਸਮੁਟ੍ਠਾਪੇਤਿ. ਤਸ੍ਮਾ ਸਾ ਅਜ੍ਝਤ੍ਤਂ ਪਤ੍ਵਾਪਿ ਰੂਪਂ ਨ ਸਮੁਟ੍ਠਾ ਪੇਤਿਯੇਵ. ਏਕਨ੍ਤੇਨ ਪਨ ਅਜ੍ਝਤ੍ਤਓਜਾਏਵ ਸਮੁਟ੍ਠਾਪੇਤਿ. ਸਾ ਪਨ ਤਸ੍ਸਾ ਉਪਤ੍ਥਮ੍ਭਨਪਚ੍ਚਯੋਏਵ ਹੋਤੀਤਿ ਅਧਿਪ੍ਪਾਯੇਨ ਮੁਖੇ ਥਪਿਤਮਤ੍ਤੋਏਵ. ਨ ਸਙ੍ਖਾਦਿਤੋ. ਤਤ੍ਤਕੇਨਪਿ ਅਬ੍ਭਨ੍ਤਰਸ੍ਸ ਪਚ੍ਚਯੋ ਹੋਤਿਯੇਵ, ਕੇਨਾਹ ਅਟ੍ਠ ਅਟ੍ਠ ਰੂਪਾਨਿ ਸਮੁਟ੍ਠਾਪੇਤੀਤਿ ਮਜ੍ਝਿਮਟੀਕਾਯਂ ਵੁਤ੍ਤਂ. ਯਸ੍ਮਾ ਪਨ ਉਪਾਦਿਨ੍ਨਕਾ ਉਤੁ ਓਜਾਨਾਮ ਸੁਟ੍ਠੁ ਪਣੀਤਰੂਪਾ ਹੋਨ੍ਤਿ, ਤਸ੍ਮਾ ਬਹਿਦ੍ਧਾ ਓਜਾਪਿ ਅਜ੍ਝਤ੍ਤਂ ਪਤ੍ਵਾ ਤੇਨ ਉਤੁਨਾ ਸੁਟ੍ਠੁ ਸੇਦਿਯਮਾਨਾ ਤਾਯਚ ਓਜਾਯ ਸੁਟ੍ਠੁ ਉਪਤ੍ਥਮ੍ਭੀਯ ਮਾਨਾ ਸਰੀਰੇ ਮੇਦਸਿਨੇਹੁਪਚਯਵਸੇਨ ਰੂਪਂ ਸਮੁਟ੍ਠਾਪੇਤਿਯੇਵਾਤਿ ਯੁਤ੍ਤਂ. ਅਜ੍ਝੋਹਰਣਕਾਲੇਤਿ ਇਦਞ੍ਚ ਸੁਟ੍ਠੁ ਬਲਵਭਾਵਪ੍ਪਤ੍ਤ ਕਾਲਂ ਸਨ੍ਧਾਯ ਵੁਤ੍ਤਂ. ਵਿਸੁਦ੍ਧਿਮਗ੍ਗੇ ਪਨ ਮਾਤਰਾ ਪਰਿਭੁਤ੍ਤਾਹਾਰੋਪਿ ਦਾਰਕਸ੍ਸ ਸਰਰਂ ਫਰਿਤ੍ਵਾ ਰੂਪਂ ਸਮੁਟ੍ਠਾਪੇਤਿ. ਸਰੀਰੇ ਮਕ੍ਖਿਤਾਹਾ ਰੋਪਿ ਰੂਪਂ ਸਮੁਟ੍ਠਾਪੇਤੀਤਿ ਵੁਤ੍ਤਂ. ਮੁਖੇ ਥਪਿਤਮਤ੍ਤੋਏਵ ਅਟ੍ਠਰੂਪਾਨਿ ਸਮੁਟ੍ਠਾਪੇਤੀਤਿਚ ਪੁਬ੍ਬੇ ਵੁਤ੍ਤਨ੍ਤਿ. ਠਾਨ ਪਤ੍ਤੋਵਾਤਿ ਅਤ੍ਤਨੋ ਠਿਤਿਕ੍ਖਣਂ ਪਤ੍ਤੋਏਵ. ਏਤ੍ਥਚ ਚਤੂਸੁ ਸਮੁਟ੍ਠਾਨੇਸੁ ਉਤੁਏਵ ਮਹਨ੍ਤੋ ਮਹਾਥਾਮੋ ਮਹਾਵਿਪ੍ਫਾਰੋਚ ਹੋਤਿ. ਸੋ ਹਿ ਸਕਲਸ੍ਸਪਿ ਓਕਾਸਲੋਕਸ੍ਸ ਬਹਿਦ੍ਧਾ ਸਙ੍ਖਾਰਲੋਕਸ੍ਸਚ ਸਮੁਟ੍ਠਾ ਪਕੋ ਵਿਨਾਸਕੋ ਚ ਹੋਤਿ. ਸਤ੍ਤਲੋਕਸ੍ਸਚ ਸੋਏਵ ਮਹਨ੍ਤੋ ਅਜ੍ਝਤ੍ਤਸਮ੍ਭਾਰਭੂਤੋ ਹੋਤਿ. ਇਤਰਾਨਿ ਪਨ ਤੀਣਿ ਤਸ੍ਸ ਪਰਿਵਾਰਮਤ੍ਤਾਨਿਏਵ ਸਮ੍ਪਜ੍ਜਨ੍ਤੀਤਿ.

ਹਦਯ ਇਨ੍ਦ੍ਰਿਯ ਰੂਪਾਨਿ ਕਮ੍ਮਜਾਨੇਵ, ਨ ਚਿਤ੍ਤਜਾਦਿਨਿ. ਯਦਿਏਵਂ ਵਿਪ੍ਪਸਨ੍ਨਾਨਿ ਖੋ ਤੇ ਆਵੁਸੋ ਸਾਰਿਪੁਤ੍ਤ ਇਨ੍ਦ੍ਰਿਯਾਨਿ. ਕਤਰੇਨ ਤ੍ਵਂ ਏਤਰਹਿ ਵਿਹਾਰੇਨ ਵਿਹਰਸੀਤਿ ਕਸ੍ਮਾ ਵੁਤ੍ਤਨ੍ਤਿ. ਇਨ੍ਦ੍ਰਿਯਸਮ੍ਭਾਰਾਨਂ ਵਣ੍ਣਾਨਂ ਸਮਾਪਤ੍ਤਿ ਚਿਤ੍ਤਸਮੁਟ੍ਠਿਤਾਨਂ ਵਿਸਦਵਿਪ੍ਪਸਨ੍ਨਤਾਵਸੇਨ ਉਪਚਰਿ ਤਤ੍ਤਾਤਿ. ਤਥਾ ਹਿ ਏਕਾਬਦ੍ਧਪਵਤ੍ਤਾਨਿ ਚਤੁਜਰੂਪਾਨਿ ਏਕਸ੍ਮਿਂ ਵਿਪ੍ਪਸਨ੍ਨੇ ਸਬ੍ਬਾਨਿ ਵਿਪ੍ਪਸਨ੍ਨਾਨੇਵ ਹੋਨ੍ਤਿ. ਮਿਲਾਤੇਚ ਮਿਲਾਤਾਨੇਵਾਤਿ. ਉਤੁਚਿਤ੍ਤਾਹਾਰਾ ਪਨ ਤੇਸਂ ਨਵਨ੍ਨਂ ਉਪਤ੍ਥਮ੍ਭਨਪਚ੍ਚਯਾ ਹੋਨ੍ਤੀਤਿ ਵੇਦਿਤਬ੍ਬਂ. ਏਤ੍ਥ ਚ ਉਪ੍ਪਲਪਦੁਮਾਨਿ ਵਿਯ ਕਮ੍ਮਜਰੂਪਾਨਿ ਦਟ੍ਠਬ੍ਬਾਨਿ. ਤੇਸਂ ਬੀਜਂ ਵਿਯ ਕਮ੍ਮਂ. ਕਦ੍ਦਮੋਦਕਾਨਿ ਵਿਯ ਉਤੁਆਹਾਰਾਦੀਨਿ. ਵਿਞ੍ਞਤ੍ਤਿ ਦ੍ਵਯਂ ਚਿਤ੍ਤਜਮੇਵ. ਤਥਾ ਹਿ ਤਂ ਚਿਤ੍ਤਸਹਭੂ ਚਿਤ੍ਤਾਨੁਪਰਿਵਤ੍ਤਿਧਮ੍ਮੇਸੁ ਭਗਵਤਾ ਨਿਦ੍ਦਿਟ੍ਠਨ੍ਤਿ. ਸਦ੍ਦੋਚਿਤ੍ਤੋਤੁਜੋਤਿ ਕਸ੍ਮਾ ਵੁਤ੍ਤਂ. ਨਨੁਨਿਧਿਕਣ੍ਡਸੁਤ੍ਤੇ ਸੁਵਣ੍ਣਤਾ ਸੁਸਰਤਾ ਸੁਸਣ੍ਠਾਨਂ ਸੁਰੂਪਤਾਤਿਆਦਿਨਾ ਤਾਦਿਸੇਨ ਕਮ੍ਮਵਿਸੇਸੇਨ ਸਦ੍ਦਸਮ੍ਪਤ੍ਤਿਨਾਮ ਵੁਤ੍ਤਾਤਿ. ਸਚ੍ਚਂ, ਕਮ੍ਮਵਿਸੇਸੇਨ ਪਨ ਯਥਾ ਸੁਵਿਸਦੋ ਸੁਮਧੁਰੋ ਸਦ੍ਦੋ ਪਵਤ੍ਤਤਿ, ਤਥਾ ਠਾਨਕਰਣਗਤਾਨਂ ਉਪਾਦਿਨ੍ਨਕਸਰੀਰਾਨਂ ਸੁਸਣ੍ਠਿਤਤਾ ਵਾਤ ਸੇਮ੍ਹਾਦੀਹਿ ਅਪਲਿਬੁਦ੍ਧਤਾਚ ਹੋਤਿ. ਤਸ੍ਮਾ ਤਮ੍ਮੂਲਿਕਾਸਦ੍ਦਸਮ੍ਪਤ੍ਤਿ ਕਮ੍ਮਫਲੇਸੁ ਪਕ੍ਖਿਪਿਤ੍ਵਾ ਸੁਸਰਤਾਤਿ ਵੁਤ੍ਤਾ. ਨ ਏਕਨ੍ਤੇਨ ਸਦ੍ਦਸ੍ਸ ਕਮ੍ਮਜਨਿਤਤ੍ਤਾਤਿ ਵੇਦਿਤਬ੍ਬਾ.

ਲਹੁਤਾਦਿਤ੍ਤਯਂ ਉਤੁਚਿਤ੍ਤਾਹਾਰੇਹਿ ਸਮ੍ਭੋਤੀਤਿ ਕਸ੍ਮਾ ਵੁਤ੍ਤਂ. ਨਨੁ ਅਪ੍ਪਾਬਾਧਸਂਵਤ੍ਤਨਿਕਾ ਏਸਾ ਮਾਣਵ ਪਟਿਪਦਾ, ਯਦਿਦਂ ਅਵਿਹਿਂਸਾਤਿ ਵੁਤ੍ਤਂ. ਅਪ੍ਪਾਬਾਧ ਪਚ੍ਚਯਸਮੁਟ੍ਠਿਤਞ੍ਚ ਏਤਂ ਰੂਪਤ੍ਤਯਂ. ਤਥਾ ਹਿ ਦਨ੍ਧਤ੍ਤਾਦਿ ਕਰ ਧਾਤੁਕ੍ਖੋਤ ਪਟਿਪਕ੍ਖਪਚ੍ਚਯ ਸਮੁਟ੍ਠਾਨਤਾ ਏਤਸ੍ਸ ਵੁਤ੍ਤਾਤਿ. ਵੁਚ੍ਚਤੇ, ਕਮ੍ਮਜਰੂਪਾਨਿਨਾਮ ਉਦਕੇ ਪਕ੍ਖਿਤ੍ਤਾਨਿ ਸਤਪਾਕਤੇਲਾਨਿ ਵਿਯ ਪਕਤਿਯਾਵ ਕਮ੍ਮਾਨੁਰੂਪਂ ਲਹੁ ਮੁਦੁ ਕਮ੍ਮਞ੍ਞ ਭੂਤਾਨਿ ਹੋਨ੍ਤਿ. ਤਸ੍ਮਾ ਤੇਸਂ ਵਿਸੁਂ ਲਹੁਤਾਦਿ ਵਿਕਾਰੋਨਾਮ ਨਤ੍ਥਿ. ਯਤੋ ਤੇਸਂ ਏਕਸ੍ਮਿਂਭਵੇ ਏਕਾਅਦ੍ਧਾ ਪਚ੍ਚੁਪ੍ਪਨ੍ਨਤਾਵ ਲਬ੍ਭਤੀਤਿ. ਏਵਞ੍ਚ ਕਤ੍ਵਾ ਯਮਕੇਸੁਪਿ ਤੇਸਂ ਕਾਲਭੇਦੋ ਪਟਿਸਨ੍ਧਿਵੁਤਿਪਰਿਚ੍ਛਿਨ੍ਨੇਨ ਅਦ੍ਧਾ ਪਚ੍ਚੁਪ੍ਪਨ੍ਨੇਨੇਵ ਗਹਿਤੋਤਿ. ਯਸ੍ਮਾ ਪਨ ਚਿਤ੍ਤਂਨਾਮ ਨਾਨਾਨੀਵਰਣਭੇਦਵਸੇਨਵਾ ਸੁਖ ਦੁਕ੍ਖ ਪੀਤਿ ਪਸ੍ਸਦ੍ਧਿ ਸਦ੍ਧਾ ਪਞ੍ਞਾਦਿ ਵਸੇਨਵਾ ਨਾਨਾ ਖਣੇਸੁ ਨਾਨਾ ਅਵਤ੍ਥਾ ਯੁਤ੍ਤਂ ਹੋਤਿ. ਤਥਾ ਉਤੁਆਹਾਰਾਚ ਸਪ੍ਪਾਯਾ ਸਪ੍ਪਾਯਭੇਦਵਸੇਨ. ਤਸ੍ਮਾ ਤੇਹਿ ਤੀਹਿ ਸਮੁਟ੍ਠਿਤ ਰੂਪਾਨਿਏਵ ਨਾਨਾਖਣੇਸੁ ਗਰੁਕਲਹੁਕਾਦਿ ਵਸੇਨ ਨਾਨਾਵਿਕਾਰਯੁਤ੍ਤਾਨਿ ਹੋਨ੍ਤਿ. ਯਤੋ ਤੇਸਂ ਸਨ੍ਤਤਿ ਸਮਯ ਵਸੇਨ ਕਾਲਭੇਦੋ ਲਬ੍ਭਤਿ. ਏਵਞ੍ਚ ਕਤ੍ਵਾ ਯਮਕੇਸੁਪਿ ਅਕਮ੍ਮਜਾਨਂ ਪਵਤ੍ਤਿਕਾਲੇ ਖਣਸਨ੍ਤਤਿਵਸੇਨਪਿ ਕਾਲਭੇਦੋ ਗਹਿਤੋਤਿ. ਨਨੁ ਕਮ੍ਮਵਿਪਾਕਜਾ ਆਬਾਧਾਤਿ ਵੁਤ੍ਤਂ. ਸਤਿਚ ਕਮ੍ਮ ਸਮੁਟ੍ਠਾਨੇ ਆਬਾਧਰੂਪੇ ਤਤੋਵੁਟ੍ਠਾਨਭੂਤੋ ਕਮ੍ਮਜੋ ਲਹੁਤਾਦਿ ਗੁਣੋਪਿ ਵਿਸੁਂ ਲਬ੍ਭਮਾਨੋ ਸਿਯਾਤਿ. ਨ. ਯੇਸਞ੍ਹਿ ਵਸੇਨ ਇਮਸ੍ਮਿਂ ਸਰੀਰੇ ਕਮ੍ਮਵਿਪਾਕਜਾਨਾਮ ਆਬਾਧਾ ਉਪ੍ਪਜ੍ਜਨ੍ਤਿ. ਤਾਨਿ ਉਪਪੀਲ਼ਕੁਪ ਘਾਤਕਕਮ੍ਮਾਨਿਪਿ ਗਤਿਕਾਲਪਯੋਗ ਵਿਪਤ੍ਤਿਯੋ ਲਭਮਾਨਾਨਿ ਏਵ ਸਰੀਰਟ੍ਠਕਾ ਪਥਵਾਦਯੋ ਵਾਤਪਿਤ੍ਤਾਦਯੋਚ ਉਤੁਸਮੁਟ੍ਠਾਨਾ ਧਾਤੁਯੋ ਖੋਭੇਤ੍ਵਾ ਨਾਨਾਬਾਧੇ ਉਪ੍ਪਾਦੇਨ੍ਤਿ. ਉਤੁਸਮੁਟ੍ਠਾਨਾਸੁ ਪਨ ਖੁਬ੍ਭਿਤਾਸੁ ਇਤਰਾਨਿ ਤਦਨੁਗਤਿਕਾਨਿ ਏਵ ਹੋਨ੍ਤਿ. ਤੇਨੇਵ ਹਿ ਸੀਤੇਨਪਿ ਰੁਪ੍ਪਤਿ, ਉਣ੍ਹੇਨਪਿ ਰੁਪ੍ਪਤਿ, ਜਿਗਚ੍ਛਾਯਪਿ ਰੁਪ੍ਪਤਿ, ਵਿਪਾਸਾਯਪਿ ਰੁਪ੍ਪਤੀਤਿਆਦਿਨਾ ਉਤੁਪਧਾਨੋਵ ਰੂਪਧਮ੍ਮਾਨਂ ਰੁਪ੍ਪਨਪਚ੍ਚਯੋ ਵੁਤ੍ਤੋਤਿ. ਤਸ੍ਮਾ ਕੇਵਲਂ ਕਮ੍ਮਸਮੁਟ੍ਠਾਨੋ ਆਬਾਧੋਨਾਮ ਨਤ੍ਥਿ. ਯਤੋ ਯਥਾਵੁਤ੍ਤੋ ਕਮ੍ਮਜੋ ਲਹੁਤਾਦਿਗੁਣੋਨਾਮ ਵਿਸੁਂ ਲਬ੍ਭਮਾਨੋ ਸਿਯਾਤਿ.

ਯਸ੍ਮਾ ਪਨ ਅਵਿਹਿਂਸਾ ਕਮ੍ਮਨਿਬ੍ਬਤ੍ਤਾ ਸਤ੍ਤਾ ਤੇਸਂ ਉਪਪੀਲ਼ਕਾਦੀਨਂ ਕਮ੍ਮਾਨਂ ਸੁਵਿਦੂਰਤਾਯਚੇਵ ਸਰੀਰਕੋਟ੍ਠਾਸਾਨਂ ਘਨਸਿਨਿਦ੍ਧਸਣ੍ਠਿਤਿਯਾ ਦੁਕ੍ਖੋਭਨਿਯਤਾਯਚ ਨਿਬ੍ਬਤ੍ਤਭਵੇ ਨਿਰਾਬਾਧਾ ਹੋਨ੍ਤਿ. ਤਸ੍ਮਾ ਤਦਤ੍ਥਂ ਸਨ੍ਧਾਯ ਅਪ੍ਪਾਬਾਧਸਂਵਤ੍ਤਨਿਕਾ ਏਸਾ ਮਾਣਵਪਟਿਪਦਾ. ਯਦਿਦਂ ਅਵਿਹਿਂਸਾਤਿ ਵੁਤ੍ਤਂ, ਨ ਪਨ ਅਪ੍ਪਾਬਾਧਨਿਮਿਤ੍ਤਸ੍ਸ ਲਹੁਤਾਦਿਤ੍ਤਯਸ੍ਸ ਕਮ੍ਮਸਮੁਟ੍ਠਾਨਤਾਯ. ਏਵਞ੍ਚ ਕਤ੍ਵਾ ਰੂਪਕਣ੍ਡੇਨ ਕਮ੍ਮਸ੍ਸਕਟਤ੍ਤਾਰੂਪੇਸੁ ਏਵ ਏਤਂ ਰੂਪਤ੍ਤਯਂ ਨਿਦ੍ਦਿਟ੍ਠਨ੍ਤਿ ਦਟ੍ਠਬ੍ਬਂ. ਰੂਪਕਲਾਪਾਨਾਮ ਏਕਸ੍ਮਿਂ ਪਰਮਾਣੁਸ੍ਮਿਂਪਿ ਬਹੁਵਿਧਾ ਹੁਤ੍ਵਾ ਪਵਤ੍ਤਨ੍ਤਿ. ਤਸ੍ਮਾ ਚਤੁਜਰੂਪ ਕਲਾਪੇਸੁ ਘਨਭਾਵੇਨ ਪਵਤ੍ਤਮਾਨੇਸੁ ਕਲਾਪਨ੍ਤਰਭੂਤਾ ਆਕਾਸਧਾਤੁਪਿ ਦਿਸ੍ਸਮਾਨਾਏਵ ਹੋਤੀਤਿ ਕਤ੍ਵਾ ਚਤੁਜੇਸੁ ਤਸ੍ਸਾ ਗਹਣਂ ਕਤਂ. ਕਾਮਂ ਸਬ੍ਬਾਨਿਪਿ ਅਨਿਪ੍ਫਨ੍ਨਰੂਪਾਨਿ ਕੇਨਚਿ ਪਚ੍ਚਯੇਨ ਅਨਿਪ੍ਫਾਦਿਤਾਨਿ ਹੋਨ੍ਤਿ. ਤੇਸੁ ਪਨ ਨ ਤਥਾ ਲਕ੍ਖਣਰੂਪਾਨਿ. ਯਥਾ ਇਤਰਾਨਿ ਚਿਤ੍ਤਾਦਿ ਪਚ੍ਚਯ ਵਿਸੇਸੇਨ ਦਿਸ੍ਸਮਾਨ ਵਿਸੇਸਾਨਿ ਹੋਨ੍ਤੀਤਿ ਵੁਤ੍ਤਂ ਲਕ੍ਖਣਰੂਪਾਨਿ ਨ ਕੁਤੋਚਿ ਜਾਯਨ੍ਤੀਤਿ. ਜਾਯਮਾਨਾਦਿ ਰੂਪਾਨਨ੍ਤਿ ਜਾਯਮਾਨ ਜਿਯ੍ਯਮਾਨ ਮਿਯ੍ਯਮਾਨਾਨਂ ਰੂਪਕਲਾਪਾਨਂ. ਸਭਾਵਤ੍ਤਾਤਿ ਜਾਤਿਜਰਾਮਰਣਸਙ੍ਖਾਤਲਕ੍ਖਣਸਭਾਵਮਤ੍ਤਤ੍ਤਾ. ਏਤ੍ਥਚ ਰੂਪਕਣ੍ਡੇ ਉਤੁਸਮੁਟ੍ਠਾਨਨ੍ਤਿ ਚ ਆਹਾਰਸਮੁਟ੍ਠਾਨਨ੍ਤਿ ਚ ਵੁਤ੍ਤਂ ਨਤ੍ਥਿ. ਪਟ੍ਠਾਨੇ ਏਵ ਵੁਤ੍ਤਂ.

ਏਤ੍ਥ ਸਿਯਾ, ਜਰਤਾ ਅਨਿਚ੍ਚਤਾ ਪਾਲ਼ਿਯਮੇਵ ਨ ਕੁਤੋਚਿ ਸਮੁਟ੍ਠਾਨਾਤਿ ਵੁਤ੍ਤਾ. ਤਸ੍ਮਾ ਇਧਪਿ ਤਾਸਂ ਨਕੁਤੋਚਿ ਸਮੁਟ੍ਠਾਨੇਸੁ ਗਹਣਂ ਯੁਤ੍ਤਂ. ਉਪਚਯਸਨ੍ਤਤਿਯੋ ਪਨ ਪਾਲ਼ਿਯਂਪਿ ਕੁਤੋਚਿ ਸਮੁਟ੍ਠਾਨੇਸੁ ਵੁਤ੍ਤਾ. ਅਟ੍ਠਕਥਾਯਂਪਿ ਤਾਹਿ ਸਦ੍ਧਿਂ ਵਿਸਤਿ ਕਮ੍ਮਜਰੂਪਾਨਿ ਸਤ੍ਤਰਸ ਚਿਤ੍ਤਜਰੂਪਾਨਿ ਚੁਦ੍ਦਸ ਉਤੁਜਰੂਪਾਨਿ ਤੇਰਸ ਆਹਾਰਜ ਰੂਪਾਨਿ ਵੁਤ੍ਤਾਨਿ. ਤਸ੍ਮਾ ਇਧ ਤਾਸਂ ਨਕੁਤੋਚਿਸਮੁਟ੍ਠਾਨਤਾ ਨਵਤ੍ਤਬ੍ਬਾਤਿ. ਵੁਚ੍ਚਤੇ, ਰੂਪਜਨਕਾਨਂ ਜਨਨਬ੍ਯਾਪਾਰੋਨਾਮ ਅਤ੍ਤਨਾ ਜਨਿਤਰੂਪਾਨਂ ਉਪ੍ਪਾਦਕ੍ਖਣੇ ਏਵ ਫਰਤਿ. ਨ-ਤਤੋ ਪਰਂ, ਤਸ੍ਮਾ ਤਸ੍ਮਿਂ ਖਣੇ ਲਬ੍ਭਮਾਨਾ ਉਪਚਯਸਨ੍ਤਤਿਯੋਯੇਵ ਕੁਤੋਚਿ ਜਾਤਪਰਿਯਾਯਂ ਅਰਹਨ੍ਤਿ, ਨ ਜਰਤਾ ਅਨਿਚ੍ਚਤਾਯੋਤਿ ਕਤ੍ਵਾ ਪਾਲ਼ਿਯਂ ਅਟ੍ਠਕਥਾ ਯਂਚ ਤਾਸਂਏਵ ਕੁਤੋਚਿ ਸਮੁਟ੍ਠਾਨੇਸੁ ਗਹਣਂ ਕਤਂ. ਅਪਿਚ, ਪੁਬ੍ਬੇ ਅਜਾਤਾ ਧਮ੍ਮਾ ਪਚ੍ਚਯੇ ਸਤਿ ਜਾਯਨ੍ਤਿ. ਅਸਤਿ ਨ ਜਾਯਨ੍ਤੀਤਿ ਅਤ੍ਥਿ. ਜਾਤਾ ਪਨ ਧਮ੍ਮਾ ਪਚ੍ਚਯੇ ਸਤਿ ਜਿਯ੍ਯਨ੍ਤਿ, ਮਿਯ੍ਯਨ੍ਤਿ. ਅਸਤਿ ਨਜਿਯ੍ਯਨ੍ਤਿ ਨਮਿਯ੍ਯਨ੍ਤੀਤਿ ਨਤ੍ਥਿ, ਤਸ੍ਮਾ ਪੁਰਿਮਾਨਂ ਦ੍ਵਿਨ੍ਨਂ ਪਵਤ੍ਤਿ ਏਕਨ੍ਤੇਨ ਪਚ੍ਚਯਾਯਤ੍ਤਾ ਹੋਤਿ. ਪਚ੍ਛਿਮਾਨਂ ਦ੍ਵਿਨ੍ਨਂ ਪਵਤ੍ਤਿ ਪਨ ਏਕਨ੍ਤੇਨ ਪਚ੍ਚਯ ਨਿਰਪੇਕ੍ਖਾ ਹੋਤੀਤਿ ਇਮਿਨਾ ਪਰਿਯਾਯੇਨ ਤਾਸਂ ਤੇਸੁ ਗਹਣਂ ਅਗਹਣਞ੍ਚ ਵੇਦਿਤਬ੍ਬਂ. ਯਂ ਪਨ ਸੁਤ੍ਤਪਦੇਸੁ ਜਰਾਮਰਣਂ ਭਿਕ੍ਖਵੇ ਸਙ੍ਖਤਂ ਪਟਿਚ੍ਚ ਸਮੁਪ੍ਪਨ੍ਨਨ੍ਤਿ ਵੁਤ੍ਤਂ. ਤਂ ਜਾਤਿਯਾ ਸਤਿਏਵ ਤਦੁਭਯਂ ਪਞ੍ਞਾਯਤਿ. ਅਸਤਿ ਨ ਪਞ੍ਞਾਯਤੀਤਿ ਇਮਿਨਾ ਪਰਿਯਾਯੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਇਧ ਪਨ ਪੁਬ੍ਬੇ ਵੁਤ੍ਤਨਯੇਨ ਇਤਰ ਅਨਿਪ੍ਫਨ੍ਨਰੂਪਾਨਿ ਵਿਯ ਚਤ੍ਤਾਰਿਪਿ ਏਤਾਨਿ ਚਿਤ੍ਤਾਦਿਪਚ੍ਚਯਵਿਸੇਸੇਨ ਦਿਸ੍ਸਮਾਨਵਿਸੇਸਾਨਿ ਨ ਹੋਨ੍ਤੀਤਿ ਚਤੁਨ੍ਨਂਪਿ ਨ ਕੁਤੋਚਿ ਜਾਤਤਾ ਵੁਤ੍ਤਾ. ਏਵਂਸਨ੍ਤੇਪਿ ਸਾਰਤਰਂ ਪਾਲ਼ਿਨਯਂ ਅਤਿਧਾਵਨ੍ਤੋ ਵਿਯ ਹੋਤੀਤਿ ਉਪਚਯਸਨ੍ਤ ਤੀਨਂ ਕੁਤੋਚਿ ਸਮੁਟ੍ਠਾਨੇਸੁ ਸਙ੍ਗਹੋਏਵ ਸੇਯ੍ਯੋਤਿ. [ਰੂਪਸਮੁਟ੍ਠਾਨਨਯੋ]

੧੫੯. ਏਕੋ ਏਵ ਜਾਤਿ ਸਙ੍ਖਾਤੋ ਉਪ੍ਪਾਦੋ ਏਤੇਸਨ੍ਤਿ ਏਕੁਪ੍ਪਾਦਾ. ਏਕੋਏਵ ਅਨਿਚ੍ਚਤਾਸਙ੍ਖਾਤੋ ਨਿਰੋਧੋ ਏਤੇਸਨ੍ਤਿ ਏਕਨਿਰੋਧਾ. ਏਕਸਦ੍ਦੋ ਚੇਤ੍ਥ ਸਙ੍ਖਾਨੇ ਪਵਤ੍ਤੋ. ਤਸ੍ਮਾ ਤੇਨ ਯਾਨਿ ਰੂਪਾਨਿ ਏਕਾਯਏਵ ਜਾਤਿਯਾ ਜਾਯਨ੍ਤਿ. ਏਕਾਯ ਏਵ ਅਨਿਚ੍ਚਤਾਯ ਨਿਰੁਜ੍ਝਨ੍ਤਿ. ਤੇਸਂ ਪਿਣ੍ਡਿ ਇਧ ਰੂਪਕਲਾਪੋਨਾਮਾਤਿ ਦਸ੍ਸੇਤਿ. ਯੇ ਪਨ ਕਲਾਪਗਤ ਰੂਪਗਣਨਾਯ ਏਕਸ੍ਮਿਂ ਕਲਾਪੇਪਿ ਅਨੇਕਾਨਿ ਜਾਤਿਆਦੀਨਿ ਕਪ੍ਪੇਨ੍ਤਿ, ਤੇਸਂ ਮੂਲਟੀਕਾਯ ਨਸਮੇਤਿ. ਯੁਤ੍ਤਿਚ ਨਤ੍ਥਿ. ਵੁਤ੍ਤਞ੍ਹਿ ਤਤ੍ਥ ਏਕੇਕਕਲਾਪ ਪਰਿਯਾਪਨ੍ਨਾਨਂ ਰੂਪਾਨਂ ਸਹੇਵ ਉਪ੍ਪਾਦਾਦਿਪਵਤ੍ਤਿਤੋ ਏਕੇਕਕਲਾਪਸ੍ਸ ਉਪ੍ਪਾਦਾਦਯੋ ਏਕੇਕਾਵ ਹੋਨ੍ਤੀਤਿ ਯਥਾ ਏਕੇਕਸ੍ਸ ਕਲਾਪਸ੍ਸ ਜੀਵਿਤਿਨ੍ਦ੍ਰਿਯਂ ਕਲਾਪਾ ਨੁਪਾਲਕਂ ਉਪਾਦਾਯ ਰੂਪਨ੍ਤਿ ਵੁਚ੍ਚਤਿ. ਏਵਂ ਕਲਾਪੁਪ੍ਪਾਦਾਦਿ ਸਭਾਵਾ ਜਾਤਿਆਦਯੋ ਉਪਾਦਾਯਰੂਪਾਨਿਚ੍ਚੇਵ ਵੁਚ੍ਚਨ੍ਤਿ. ਏਵਂ ਵਿਕਾਰਪਰਿਚ੍ਛੇਦ ਰੂਪਾਨਿਚ ਯੋਜੇਤਬ੍ਬਾਨੀਤਿ. ਯਦਿਚ ਯੋ ਆਯਤਨਾਨਂ ਆਚਯੋ. ਸੋ ਰੂਪਸ੍ਸ ਉਪਚਯੋਤਿਚ ਯੋ ਰੂਪਸ੍ਸ ਉਪਚਯੋ. ਸਾਰੂਪਸ੍ਸ ਸਨ੍ਤਤੀਤਿਚ ਵੁਤ੍ਤਤ੍ਤਾ ਤਾਨਿ ਜਾਤਿਆਦੀਨਿ ਲਕ੍ਖਣਰੂਪਾਨਿ ਵਿਸੁਂਵਿਸੁਂ ਰੂਪਾਨਂਏਵ, ਨਕਲਾਪਸ੍ਸਾਤਿ ਵੁਚ੍ਚੇਯ੍ਯੁਂ. ਚਤੁਨ੍ਨਂ ਮਹਾਭੂਤਾਨਂ ਉਪਾਦਾਯ ਪਸਾਦੋ ਰੂਪੀਨਂ ਧਮ੍ਮਾਨਂ ਆਯੂਤਿਆਦਿਨਾ ਵੁਤ੍ਤਤ੍ਤਾ ਚਕ੍ਖਾਦਿ ਜੀਵਿਤਾਦੀਨਿਪਿ ਏਕਸ੍ਮਿਂ ਕਲਾਪੇ ਅਨੇਕਾਨਿਏਵ ਆਪਜ੍ਜੇਯ੍ਯੁਂ. ਤਸ੍ਮਾ ਤਥਾ ਕਪ੍ਪਨਂ ਅਕਤ੍ਵਾ ਏਕਸ੍ਮਿਂ ਕਲਾਪੇ ਅਞ੍ਞਾਨਿ ਉਪਾਦਾਰੂਪਾਨਿ ਵਿਯ ਲਕ੍ਖਣਰੂਪਾਨਿਪਿ ਏਕੇਕਾਨਿਏਵਾਤਿ ਨਿਟ੍ਠਂ ਗਨ੍ਤਬ੍ਬਨ੍ਤਿ.

ਏਕੋ ਸਮਾਨੋ ਮਹਾਭੂਤਸਙ੍ਖਾਤੋ ਨਿਸ੍ਸਯੋ ਏਤੇਸਨ੍ਤਿ ਏਕਨਿਸ੍ਸਯਾ. ਏਤ੍ਥ ਪਨ ਸਮਾਨਤ੍ਥੇ ਏਕਸਦ੍ਦੋ ਯੁਤ੍ਤੋ. ਚਤੁਨ੍ਨਂ ਭੂਤਾਨਂ ਨਿਸ੍ਸਯਤਾਸਮ੍ਭਵਤੋ. ਯਾਨਿਚਏਕੁਪ੍ਪਾਦਤਾਦੀਹਿਤੀਹਿਲਕ੍ਖਣੇਹਿ ਯੁਤ੍ਤਾਨਿ. ਤਾਨਿ ਏਕਨ੍ਤੇਨ ਸਹਵੁਤ੍ਤੀਨਿ ਨਾਮ ਹੋਨ੍ਤੀਤਿ ਵੁਤ੍ਤਂ ਸਹਵੁਤ੍ਤਿਨੋਤਿ. ਦਸਪਰਿਮਾਣਾਨਿਅਸ੍ਸਾਤਿਦਸਕਂ. ਦਸਨ੍ਨਂ ਸਮੂਹੋ ਵਾ ਦਸਕਂ. ਚਕ੍ਖੁਨਾ ਉਪਲਕ੍ਖਿਤਂ ਦਸਕਨ੍ਤਿ ਚਕ੍ਖੁਦਸਕਂ. ਚਕ੍ਖੁਪਧਾਨਂਵਾ ਦਸਕਂ ਚਕ੍ਖੁਦਸਕਂ. ਏਸਨਯੋ ਸੇਸੇਸੁਪਿ. ਯਸ੍ਮਾ ਪਨ ਚਿਤ੍ਤਜੋ ਸਦ੍ਦੋ ਵਿਞ੍ਞਤ੍ਤਿਵਿਕਾਰੇਨ ਵਿਨਾ ਨਪਵਤ੍ਤਤਿ. ਵਿਞ੍ਞਤ੍ਤਿਵਿਕਾਰੋਚ ਤੇਨ ਸਦ੍ਦੇਨ ਵਿਨਾ ਨਪਵਤ੍ਤਤਿ. ਤਸ੍ਮਾ ਚਿਤ੍ਤਜਂ ਸਦ੍ਦਨਵਕਂਵਾ ਵਚੀਵਿਞ੍ਞਤ੍ਤਿਨਵਕਂਵਾ ਨਸਮ੍ਭਵਤੀਤਿ ਅਧਿਪ੍ਪਾਯੇਨ ਵਚੀਵਿਞ੍ਞਤ੍ਤਿ ਸਦ੍ਦੇ ਹਿ ਚ ਸਹਵਚੀਵਿਞ੍ਞਤ੍ਤਿ ਦਸਕਨ੍ਤਿ ਵੁਤ੍ਤਂ. ਏਤ੍ਥ ਪਨ ਵਿਞ੍ਞਤ੍ਤਿ ਵਿਕਾਰੋ ਸਦ੍ਦੇਨ ਵਿਨਾ ਨਪਵਤ੍ਤਤੀਤਿ ਇਦਂ ਤਾਵ ਯੁਜ੍ਜਤਿ. ਯਾ ਤਾਯ ਵਾਚਾਯ ਵਿਞ੍ਞਤ੍ਤਿ ਵਿਞ੍ਞਾਪਨਾ ਵਿਞ੍ਞਾਪਿਤਤ੍ਤਂ. ਇਦਂ ਤਂਰੂਪਂ ਵਚੀਵਿਞ੍ਞਤ੍ਤੀਤਿ ਹਿ ਵੁਤ੍ਤਂ. ਵਿਞ੍ਞਤ੍ਤਿਵਿਕਾਰਰਹਿਤਂ ਪਨ ਚਿਤ੍ਤਜਂ ਸਦ੍ਦਨਵਕਂ. ਅਟ੍ਠਕਥਾਸੁ ਆਗਤਮੇਵ. ਯਥਾਹ-ਪਟਿਚ੍ਚਸਮੁਪ੍ਪਾਦ ਨਿਦ੍ਦੇਸੇਸੁ ਪਟਿਸਨ੍ਧਿਕ੍ਖਣਤੋ ਉਦ੍ਧਂ ਪਵਤ੍ਤਉਤੁਤੋਚੇਵ ਚਿਤ੍ਤਤੋਚ ਸਦ੍ਦਨਵਕਨ੍ਤਿ.

ਮਹਾਅਟ੍ਠਕਥਾ ਨਯੇਨ ਵਿਞ੍ਞਤ੍ਤਿ ਰਹਿਤੋ ਵਿਤਕ੍ਕ ਵਿਪ੍ਫਾਰ ਸਦ੍ਦੋਨਾਮ ਅਸੋਤ ਵਿਞ੍ਞੇਯ੍ਯੋ ਚਿਤ੍ਤਜੋ ਸਦ੍ਦੋ ਲਬ੍ਭਤਿ. ਸੋ ਪਨ ਸਙ੍ਗਹਕਾਰੇਨ ਪਟਿਸਿਦ੍ਧੋ. ਯਥਾਹ-ਪਟ੍ਠਾਨੇਪਿ ਚਿਤ੍ਤਸਮੁਟ੍ਠਾਨਂ ਸਦ੍ਦਾਯਤਨਂ ਸੋਤਵਿਞ੍ਞਾਣਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋਤਿ ਆਵਤਂ. ਤਸ੍ਮਾ ਵਿਨਾ ਵਿਞ੍ਞਤ੍ਤਿਘਟ੍ਟਨਾਯ ਉਪ੍ਪਜ੍ਜਮਾਨੋ ਅਸੋਤ ਵਿਞ੍ਞੇਯ੍ਯੋ ਵਿਤਕ੍ਕਵਿਪ੍ਫਾਰਸਦ੍ਦੋਨਾਮ ਨਤ੍ਥੀਤਿ. ਵਿਸੁਦ੍ਧਿਮਗ੍ਗੇ ਅਸ੍ਸਾਸ ਪਸ੍ਸਾਸੇ ਚਿਤ੍ਤਜਂ ਸਦ੍ਦਨਵਕਂ ਵੁਤ੍ਤਂ. ਯਥਾਹ-ਚਿਤ੍ਤਜੇ ਅਸ੍ਸਾਸ ਪਸ੍ਸਾਸ ਕੋਟ੍ਠਾਸੇਪਿ ਓਜਟ੍ਠਮਕਞ੍ਚੇਵ ਸਦ੍ਦੋਚਾਤਿ ਨਵਾਤਿ, ਸਦ੍ਦਨਵਕੇਚ ਆਗਤੇ ਸਦ੍ਦਲਹੁਤਾਦਿ ਦ੍ਵਾਦਸਕਂਪਿ ਆਗਤਮੇਵ ਹੋਤਿ. ਤਸ੍ਮਾ ਸੁਦ੍ਧਟ੍ਠਕਂ, ਸਦ੍ਦਨਵਕਂ, ਕਾਯਵਿਞ੍ਞਤ੍ਤਿ ਨਾਕਂ, ਵਚੀਵਿਞ੍ਞਤ੍ਤਿ ਦਸਕਂ, ਲਹੁਤਾਦੇਕਾ ਦਸਕਂ, ਸਦ੍ਦਲਹੁਤਾਦਿਦ੍ਵਾਦਸਕਂ, ਕਾਯਵਿਞ੍ਞਤ੍ਤਿ ਲਹੁਤਾਦਿ ਦ੍ਵਾਦਸਕਂ, ਵਚੀਵਿਞ੍ਞਤ੍ਤਿਸਦ੍ਦਲਹੁਤਾਦਿ ਤੇ ਰਸਕਨ੍ਤਿ ਅਟ੍ਠਚਿਤ੍ਤਜਕਲਾਪਾ ਪਚ੍ਚੇਤਬ੍ਬਾਤਿ. ਸਚ੍ਚਸਙ੍ਖੇਪੇ ਪਨ ਸਦ੍ਦ ਲਹੁਤਾਦਿ ਦ੍ਵਾਦਸਕਂ ਵਿਸੁਂ ਅਗਹੇਤ੍ਵਾ ਚਿਤ੍ਤਜ ਕਲਾਪਾ ਸਤ੍ਤੇਵ ਵੁਤ੍ਤਾ.

ਟੀਕਾਸੁ ਪਨਸ੍ਸ ਪੋਰਾਣਟੀਕਾਯਂ

ਮਹਾਟ੍ਠਕਥਾਨਯੇਨ ਵਿਞ੍ਞਤ੍ਤਿਰਹਿਤੇ ਅਸੋਤ ਵਿਞ੍ਞੇਯ੍ਯੇ ਵਿਤਕ੍ਕ ਵਿਪ੍ਫਾਰਸਦ੍ਦੇ ਸਦ੍ਦਨਵਕਂ ਦਸ੍ਸੇਤ੍ਵਾ ਪੁਨ ਵਾਦਨ੍ਤਰਂ ਦਸ੍ਸੇਨ੍ਤੇਨ. ਅਪਿਚ, ਮਹਾਜਨਸਨ੍ਨਿਪਾਤਸ੍ਸ ਦੂਰਤੋ ਅਪਞ੍ਞਾਯਮਾਨਕ੍ਖਰਪਦਬ੍ਯਞ੍ਜਨਤ੍ਥੋ ਚਿਤ੍ਤਸਮੁਟ੍ਠਾਨਨਿਘੋਸਸਦ੍ਦੋ ਅਵਿਞ੍ਞਤ੍ਤਿਕੋ ਏਵਾਤਿ ਵਦਨ੍ਤਿ. ਤਥਾ ਮਿਗਪਕ੍ਖੀਨਂਚ ਅਞ੍ਞਮਞ੍ਞਂ ਭਾਸਂ ਅਜਾਨਨ੍ਤਾਨਂ ਅਨ੍ਧਦਮਿਲ਼ਾਦਿਨਂ ਅਵਿਞ੍ਞਤ੍ਤਿਕੋ ਚਿਤ੍ਤਸਮੁਟ੍ਠਾਨਸਦ੍ਦੋ ਅਤ੍ਥੀਤਿ ਵੁਤ੍ਤਂ.

ਤਤ੍ਥ ਵਿਞ੍ਞਤ੍ਤਿਰਹਿਤੋ ਅਸੋਤਵਿਞ੍ਞੇਯ੍ਯੋ ਵਿਤਕ੍ਕਵਿਪ੍ਫਾਰ ਸਦ੍ਦੋ ਅਟ੍ਠਸਾਲਿਨਿਯਂ ਪਟਿਕ੍ਖਿਤ੍ਤੋ. ਮਹਾਜਨਸਨ੍ਨਿਪਾਤਸ੍ਸ ਚਿਤ੍ਤ ਸਮੁਟ੍ਠਾਨ ਨਿਘੋਸਸਦ੍ਦੋਪਿ ਆਸਨ੍ਨੇ ਠਿਤਾਨਂ ਪਞ੍ਞਾਯਮਾਨਕ੍ਖਰਪਦ ਬ੍ਯਞ੍ਜਨਤ੍ਥੋ ਸਵਿਞ੍ਞਤ੍ਤਿਕੋਏਵ ਹੋਤਿ. ਇਤਰਥਾ ਸਬ੍ਬੇਪਿ ਚਿਤ੍ਤ ਜਸਦ੍ਦਾ ਦੂਰਤਰੇ ਠਿਤਾਨਂ ਅਪਞ੍ਞਾਯਮਾਨ ਪਦਬ੍ਯਞ੍ਜਨਾਏਵ ਹੋਨ੍ਤੀਤਿ ਸਬ੍ਬੇਪਿ ਵਿਞ੍ਞਤ੍ਤਿਰਹਿਤਾ ਸਿਯੁਨ੍ਤਿ. ਨਚ ਮਿਗਪਕ੍ਖਿਆਦੀਨਂ ਚਿਤ੍ਤਜੋ ਸਦ੍ਦੋ ਵਿਞ੍ਞਤ੍ਤਿਰਹਿਤੋ ਹੋਤਿ. ਸਮਾਨਜਾਤਿਯਾਨਂ ਪਰੇਸਂ ਅਧਿਪ੍ਪਾਯਤ੍ਥ ਵਿਞ੍ਞਾਪਨਤੋਤਿ.

ਪਚ੍ਛਿਮ ਟੀਕਾਯਂ ਪਨਸ੍ਸ

ਸਦ੍ਦਨਵਕਂ ਪਨੇਤ੍ਥ ਅਚ੍ਛਰਾ ਸਙ੍ਘਾਤ ਪਾਣਿਪ੍ਪਹਾਰਾਦਿ ਸਦ੍ਦ ਸਹਿਤਂ ਅਟ੍ਠਕਮੇਵਾਤਿ ਵੁਤ੍ਤਂ. ਤਂਪਿ ਨ ਯੁਤ੍ਤਂ.

ਤਾਦਿਸੋ ਹਿ ਸਦ੍ਦੋ ਚਿਤ੍ਤਪਚ੍ਚਯੋ ਉਤੁਸਮੁਟ੍ਠਾਨੋਏਵ. ਤਸ੍ਮਾ ਵਿਸੁਦ੍ਧਿਮਗ੍ਗੇ ਵੁਤ੍ਤਨਯੇਨ ਅਸ੍ਸਾਸਪਸ੍ਸਾਸੇਵਾ ਅਵਚੀਘੋਸੇਸੁ ਕਦਾਚਿ ਚਿਤ੍ਤਸਹਿਤੇਸੁ ਉਕ੍ਕਾਸਿਤ ਖਿਪਿਤ ਵਮਿਤ ਛਡ੍ਡਿਤਸਦ੍ਦਾਦੀਸੁ ਪਿਵਾ ਏਤਂ ਸਦ੍ਦਨਵਕਂ ਵੇਦਿਤਬ੍ਬਨ੍ਤਿ. ਉਤੁਜਕਲਾਪੇਸੁ ਪਚ੍ਛਿਮਾ ਦ੍ਵੇਪਿ ਕਸ੍ਮਾ ਬਹਿਦ੍ਧਾ ਨਲਬ੍ਭਨ੍ਤਿ. ਨਨੁ ਬਹਿਦ੍ਧਾਪਿ ਰੂਪਾਨਂ ਲਹੁ ਗਰੁ ਮੁਦੁ ਥਦ੍ਧ ਕਮ੍ਮਞ੍ਞਤਾ ਦਿਸ੍ਸਨ੍ਤੀਤਿ. ਸਚ੍ਚਂ, ਤਾ ਪਨ ਭੂਤਾਨਂ ਓਮਤ੍ਤਾਧਿਮਤ੍ਤ ਵਸੇਨ ਹੋਨ੍ਤਿ, ਨ ਪਨ ਲਹੁਤਾਦਿਤ੍ਤਯਵਸੇਨਾਤਿ ਦਟ੍ਠਬ੍ਬਂ. ਕਸ੍ਮਾ ਪਨ ਆਕਾਸਧਾਤੁਚ ਲਕ੍ਖਣਰੂਪਾਨਿਚ ਰੂਪਕਲਾਪੇਸੁ ਨਗਹਿਤਾਨੀਤਿ ਵੁਤ੍ਤਂ ਕਲਾਪਾਨਨ੍ਤਿਆਦਿ. ਆਕਾਸਧਾਤੁਕਲਾਪਾਨਂ ਪਰਿਚ੍ਛੇਦ ਮਤ੍ਤਤ੍ਤਾ ਕਸ੍ਸਚਿ ਰੂਪਕਲਾਪਸ੍ਸ ਅਙ੍ਗਭੂਤਾ ਅਵਯਵਭੂਤਾ ਨ ਹੋਤਿ, ਲਕ੍ਖਣਰੂਪਾਨਿਚ ਸਬ੍ਬੇਸਂਪਿ ਕਲਾਪਾਨਂ ਉਪ੍ਪਾਦਾਦਿ ਲਕ੍ਖਣ ਮਤ੍ਤਤ੍ਤਾ ਵਿਕਾਰਰੂਪਾਨਿ ਵਿਯ ਕਲਾਪਾਨਂ ਭੇਦਕਰਾਨਿ ਅਙ੍ਗਭੂਤਾਨਿ ਕਲਾਪਵਿਸੇਸਪਞ੍ਞਾਪਨਸ੍ਸ ਕਾਰਣਭੂਤਾਨਿ ਨ ਹੋਨ੍ਤਿ. ਤਸ੍ਮਾ ਤਾਨਿ ਤੇਸੁ ਨਗਹਿਤਾਨੀਤਿ ਦਸ੍ਸੇਤਿ. ਏਤੇਨ ਏਕੁਪ੍ਪਾਦਾਤਿਆਦਿਨਾ ਪੁਬ੍ਬੇ ਵੁਤ੍ਤਨਿਯਮੋ ਨਿਪ੍ਫਨ੍ਨਰੂਪਾਨਞ੍ਞੇਵ, ਨ ਅਨਿਪ੍ਫਨ੍ਨਰੂਪਾਨਂ. ਤੇਸਂ ਪਨ ਕਲਾਪ ਭੇਦ ਕਰਣ ਮੇਵ ਕਲਾਪਙ੍ਗਨ੍ਤਿ ਚ ਦੀਪੇਤਿ. ਏਵਞ੍ਚ ਕਤ੍ਵਾ ਏਕਨਿਰੋਧਙ੍ਗਰਹਿਤਸ੍ਸਪਿ ਵਿਞ੍ਞਤ੍ਤਿਦ੍ਵਯਸ੍ਸ ਕਲਾਪਭੇਦ ਕਰਤ੍ਤਾਏਵ ਤੇਸੁ ਗਹਣਂ ਸੁਟ੍ਠੁ ਉਪਪਨ੍ਨਂ ਹੋਤੀਤਿ ਵੇਦਿਤਬ੍ਬਨ੍ਤਿ. [ਕਲਾਪਯੋਜਨਾ]

੧੬੦. ਯਥਾਰਹਨ੍ਤਿ ਸਭਾਵਕਾ ਭਾਵਕਾਨਂ ਪਰਿਪੁਣ੍ਣਾਪਰਿ ਪੁਣ੍ਣਿਨ੍ਦ੍ਰਿਯਾਨਞ੍ਚ ਅਰਹਾਨੁਰੂਪਤੋ. ਅਨੂਨਾਨੀਤਿ ਪਰਿਪੁਣ੍ਣਾਨਿ. ਨਞ੍ਹਿ ਇਦਂ ਨਾਮਰੂਪਂ ਕਾਮਲੋਕੇ ਪਵਤ੍ਤਿਯਂ ਨ ਲਬ੍ਭਤੀਤਿ ਅਤ੍ਥੀਤਿ.

[੧੯੮] ਵਿਭਾਵਨਿਯਂ ਪਨ

‘‘ਯਥਾਰਹਨ੍ਤਿ ਸਭਾਵਕਪਰਿਪੁਣ੍ਣਾਯਤਨਾਨਂ ਅਨੁਰੂਪਤੋ’’ਤਿ ਵੁਤ੍ਤਂ, ਤਂ ਨ ਸੁਨ੍ਦਰਂ.

ਨ ਹਿ ਅਨੂਨਾਨੀਤਿ ਇਦਂ ਪੁਗ੍ਗਲਵਸੇਨ ਵਿਸੇਸਨਂ ਹੋਤੀਤਿ. ਸਂਸੇਦਜਾਨਞ੍ਚੇਵਓਪਪਾਤਿਕਾਨਞ੍ਚਾਤਿ ਏਤ੍ਥ ਮਹਾਸੀਹਨਾਦਸੁਤ੍ਤੇ-

ਚਤਸ੍ਸੋ ਖੋ ਇਮਾ ਸਾਰਿਪੁਤ੍ਤ ਯੋਨਿਯੋ. ਕਤਮਾ ਚਤਸ੍ਸੋ, ਅਣ੍ਡਜਾ ਯੋਨਿ ਜਲਾਬੁਜਾ ਯੋਨਿ ਸਂਸੇਦਜਾਯੋਨਿ ਓਪਪਾਤਿਕਾ ਯੋਨੀਤਿ. ਯੇ ਖੋ ਤੇ ਸਾਰਿਪੁਤ੍ਤ ਸਤ੍ਤਾ ਅਣ੍ਡਕੋਸਂ ਅਭਿਨਿਬ੍ਭਿਜ੍ਜ ਅਭਿਨਿਬ੍ਭਿਜ੍ਜ ਜਾਯਨ੍ਤਿ, ਅਯਂ ਵੁਚ੍ਚਤਿ ਸਾਰਿਪੁਤ੍ਤ ਅਣ੍ਡਜਾ ਯੋਨਿ. ਯੇ ਖੋ ਤੇ ਸਾਰਿਪੁਤ੍ਤ ਸਤ੍ਤਾ ਵਤ੍ਥਿਕੋਸਂ ਅਭਿਨਿਬ੍ਭਿਜ੍ਜ ਅਭਿਨਿਬ੍ਭਿਜ੍ਜ ਜਾਯਨ੍ਤਿ. ਅਯਂ ਵੁਚ੍ਚਤਿ ਸਾਰਿਪੁਤ੍ਤ ਜਲਾਬੁਜਾ ਯੋਨਿ. ਯੇ ਖੋ ਤੇਸਾਰਿ ਪੁਤ੍ਤਸਤ੍ਤਾਪੂਤਿਮਚ੍ਛੇਵਾ ਜਾਯਨ੍ਤਿ. ਪੂਤਿਕੁਣਪੇਵਾ ਪੂਤਿਕੁਮ੍ਮਾਸੇਵਾ ਚਨ੍ਦਨਿਕਾਯਵਾ ਓਲ਼ਿਗਲ੍ਲੇਵਾ ਜਾਯਨ੍ਤਿ, ਅਯਂ ਵੁਚ੍ਚਤਿ ਸਾਰਿਪੁਤ੍ਤ ਸਂਸੇਦਜਾ ਯੋਨਿ. ਦੇਵਾ ਨੇਰਕਾ ਏਕਚ੍ਚੇ ਚ ਮਨੁਸ੍ਸਾ ਏਕਚ੍ਚੇਚ ਵਿਨਿਪਾਤਿਕਾ ਅਯਂ ਵੁਚ੍ਚਤਿ ਸਾਰਿਪੁਤ੍ਤ ਓਪਪਾਤਿਕਾ ਯੋਨੀਤਿ ਵੁਤ੍ਤਂ.

ਅਟ੍ਠਕਥਾਯਞ੍ਚ ਅਣ੍ਡੇ ਜਾਤਾ ਅਣ੍ਡਜਾ. ਜਲਾਬੁਮ੍ਹਿ ਜਾਤਾ ਜਲਾਬੁਜਾ. ਸਂਸੇਦੇ ਜਾਤਾ ਸਂਸੇਦਜਾ. ਵਿਨਾ ਏਤੇਹਿ ਕਾਰਣੇਹਿ ਉਪ੍ਪਤ੍ਤਿਤ੍ਵਾ ਵਿਯ ਨਿਬ੍ਬਤ੍ਤਾ ਅਭਿਨਿਬ੍ਬਤ੍ਤਾਤਿ ਓਪਪਾਤਿਕਾ. ਅਭਿਨਿਬ੍ਭਿਜ੍ਜ ਜਾਯਨ੍ਤੀਤਿ ਭਿਨ੍ਦਿਤ੍ਵਾ ਨਿਕ੍ਖਮਨਵਸੇਨ ਜਾਯਨ੍ਤਿ. ਪੂਤਿ ਕੁਣਪੇਤਿਆਦੀਹਿ ਅਨਿਟ੍ਠਟ੍ਠਾਨਾਨੇਵ ਦਸ੍ਸਿਤਾਨਿ. ਇਟ੍ਠੇਸੁ ਸਪ੍ਪਿ ਤੇਲਮਧੁਫਾਣਿਤਾਦੀਸੁ ਸਤ੍ਤਾ ਜਾਯਨ੍ਤਿਏਵਾਤਿ ਵੁਤ੍ਤਂ. ਏਤ੍ਥਚ ਪੁਰਿਮੇਸੁ ਦ੍ਵੀਸੁ ਪਾਲ਼ਿਨਯੇਨ ਅਣ੍ਡਂ ਵੁਚ੍ਚਤਿ ਅਣ੍ਡਕੋਸੋ. ਜਲਾਬੁਵੁਚ੍ਚਤਿ ਵਤ੍ਥਿਕੋਸੋ, ਤਤੋ ਜਾਤਾ ਵਿਜਾਤਾ ਨਿਕ੍ਖਨ੍ਤਾਤਿ ਅਣ੍ਡਜਾ ਜਲਾਬੁਜਾਤਿਚ ਵੁਚ੍ਚਨ੍ਤੀਤਿ ਵੇਦਿਤਬ੍ਬਾ. ਤਤ੍ਥ ਜਰਂ ਜੀਰਣਂ ਭੇਦਂ ਯਾਤਿ ਉਪੇਤੀਤਿ ਜਲਾਬੂਤਿ ਸਦ੍ਦਨੀਤਿਯਂ ਵੁਤ੍ਤਂ. ਜਲਂ ਵੁਚ੍ਚਤਿ ਕਲਲਂ. ਤਂ ਆਵੁਨਾਤਿ ਪਟਿਚ੍ਛਾਦੇਤਿ ਅਵਤਿਵਾ ਰਕ੍ਖਤੀਤਿ ਜਲਾਬੁ, ਗਬ੍ਭਪਲਿਵੇਠਨਾਸਯੋ. ਸਂਸੀਦਨ੍ਤਿ ਏਤ੍ਥਾਤਿ ਸਂਸੇਦੋ. ਪੂਤਿਮਚ੍ਛਾ ਦਿਕੋ ਸਪ੍ਪਿਤੇਲਾਦਿਕੋ ਪਦੁਮਗਬ੍ਭਵੇਲ਼ੁਗਬ੍ਭਰੁਕ੍ਖਸੁਸਿਰਪੁਪ੍ਫਫਲਾਦਿ ਕੋਚ ਅਲ੍ਲਕਿਲਿਨ੍ਨਪਦੇਸੋ. ਉਪਪਤ੍ਤਿਕ੍ਖਣੇਏਵ ਪਰਿਪੁਣ੍ਣਅਙ੍ਗਪਚ੍ਚਙ੍ਗਤ੍ਤਾ ਤਤੋ ਤਤੋ ਉਪ੍ਪਤਿਤ੍ਵਾ ਵਿਯ ਜਾਯਨ੍ਤੀਤਿ ਓਪਪਾਤਿਕਾ.

ਵਿਭਾਵਨਿਯਂ ਪਨ

ਅਣ੍ਡਜਾਦਯੋਪਿ ਅਣ੍ਡਕੋਸਾਦਿਮ੍ਹਿ ਓਕ੍ਕਮਨ੍ਤਾ ਉਪ੍ਪਤਨ੍ਤਾ ਏਵ ਨਾਮ ਹੋਨ੍ਤੀਤਿ ਤੇਸਂਪਿ ਓਪਪਾਤਿਕਤ੍ਤਪਸਙ੍ਗਂ ਮਞ੍ਞਮਾਨੋ ਉਪਪਾਤੋ ਨੇਸਂ ਅਤ੍ਥੀਤਿ ਓਪਪਾਤਿਕਾਤਿ ਵਤ੍ਵਾ ਉਕ੍ਕਂਸਗਤਿ ਪਰਿਚ੍ਛੇਦਵਸੇਨ ਚੇਤ੍ਥ ਵਿਸਿਟ੍ਠਓਪਪਾਤੋ ਗਹਿਤੋ. ਯਥਾ ਅਭਿਰੂਪਸ੍ਸ ਕਞ੍ਞਾ ਦਾਤਬ੍ਬਾਤਿ ਵਦਤਿ.

ਉਕ੍ਕਟ੍ਠਵਸੇਨਾਤਿ ਪਰਿਪੁਣ੍ਣਾਯਤਨਭਾਵਸਙ੍ਖਾਤੇਨ ਉਕ੍ਕਂਸਤਾਵੇਨ, ਤਤ੍ਥ ਓਪਪਾਤਿਕਾ ਅਙ੍ਗਪਚ੍ਚਙ੍ਗੇਹਿ ਸਹ ਸਬ੍ਬਸੋ ਪਰਿਪੁਣ੍ਣੇਨ ਅਤ੍ਤਭਾਵੇਨ ਜਾਯਨ੍ਤਿ. ਪੁਨ ਤੇਸਂ ਵਡ੍ਢਨਕਿਚ੍ਚਂ ਨਤ੍ਥਿ. ਸਂਸੇਦਜਾਨਂ ਪਨ ਆਯਤਨਾਨਿ ਏਵ ਪਰਿਪੁਣ੍ਣਾਨਿ ਹੋਨ੍ਤਿ. ਅਙ੍ਗਪਚ੍ਚਙ੍ਗਾਨਿ ਪਨ ਪੁਨ ਵਡ੍ਢਿਤ੍ਵਾਏਵ ਪਰਿਪੁਣ੍ਣਾਨਿ ਜਾਤਾਨੀਤਿ ਵੇਦਿਤਬ੍ਬਂ. ਓਮਕਵਸੇਨਾਤਿ ਅਵਕਂਸਵਸੇਨ. ਚਕ੍ਖੁਸੋਤਘਾਨਭਾਵਸੇਕਾਨਿਕਦਾਚਿਪਿ ਨ ਲਬ੍ਭਨ੍ਤਿ ਜਾਤਿਬਧਿਰ ਜਚ੍ਚਘਾਨਕਾਨਂ ਅਭਾਵਕਾਨਞ੍ਚ ਸਮ੍ਭਵਤੋਤਿ ਅਪ੍ਪੋਯੋ. ਤਤ੍ਥ ਤਾਨਿ ਸਬ੍ਬਾਨਿਪਿ ਸੁਗਤਿ ਦੁਗ੍ਗਤਿ ਜਾਤਿਯਾਨਂ ਅਹੇਤੁਕਸਂਸੇਦਜਾਨਂ ਕਦਾਚਿ ਨਲਬ੍ਭਨ੍ਤਿ. ਸੁਗਤਿਯਂ ਪਨ ਓਪਪਾਤਿਕਭਾਵੋਨਾਮ ਸੇਟ੍ਠੋ ਅਤ੍ਤਭਾਵ ਪਟਿਲਾਭੋਤਿ ਨਯੇਨ ਕੇਨਚਿ ਓਮਕੇਨ ਕਮ੍ਮੇਨ ਲਬ੍ਭਤਿ. ਤਸ੍ਮਾ ਸੁਗਤਿਜਾਤਿ ਯਾਨਂ ਓਪਪਾਤਿਕਾਨਂ ਅਪਰਿਪੁਣ੍ਣਿਨ੍ਦ੍ਰਿਯਤਾਨਾਮ ਨਤ੍ਥਿ ਅਞ੍ਞਤ੍ਰ ਅਭਾਵਕੇਹਿ ਆਦਿਕਪ੍ਪਿਕੇਹਿਤਿ. ਦੁਗ੍ਗਤਿਜਾਤਿਯਾਨਂਪਿ ਪਨ ਤੇਸਂ ਕਦਾਚਿ ਚਕ੍ਖੁ ਸੋਤ ਭਾਵ ਵੇਕਲ੍ਲਤਾਏਵ ਵਤ੍ਤਬ੍ਬਾ. ਨ ਘਾਨਵੇਕਲ੍ਲਤਾ. ਕਾਮਧਾਤੁਯਂ ਪਨ ਅਘਾਨਕੋ ਓਪਪਾਤਿਕੋ ਨਤ੍ਥੀਤਿ ਹਿ ਅਟ੍ਠ ਕਥਾਯਂ ਵੁਤ੍ਤਂ. ਜਿਵ੍ਹਾਵੇਕਲ੍ਲਤਾਨਾਮ ਸਬ੍ਬੇਸਂਪਿ ਨਤ੍ਥਿ ਯੇਵਾਤਿ ਵੇਦਿਤਬ੍ਬਂ. ਤਥਾ ਹਿ ਧਮ੍ਮਹਦਯਵਿਭਙ੍ਗੇ –

ਕਾਮਧਾਤੁਯਾ ਉਪਪਤ੍ਤਿਕ੍ਖਣੇ ਕਸ੍ਸਚਿ ਏਕਾਦਸਾ ਯਤਨਾਨਿ ਪਾਤੁਭਵਨ੍ਤਿ. ਕਸ੍ਸਚਿ ਦਸ. ਕਸ੍ਸਚਿਅਪਰਾਨਿ ਦਸ. ਕਸ੍ਸਚਿ ਨਵ. ਕਸ੍ਸਚਿ ਸਤ੍ਤਾਯਤਨਾਨਿ ਪਾਤੁਭਵਨ੍ਤੀਤਿ ਵੁਤ੍ਤਂ.

ਤਤ੍ਥ ਕਾਮਧਾਤੁਯਨ੍ਤਿ ਕਾਮਲੋਕੇ. ਉਪਪਤ੍ਤਿਕ੍ਖਣੇਤਿ ਪਟਿਸਨ੍ਧਿਚਿਤ੍ਤਸ੍ਸ ਉਪ੍ਪਾਦਕ੍ਖਣੇ. ਕਸ੍ਸਚਿ ਏਕਾਦਸਾ ਯਤਨਾਨੀਤਿਆਦਿਸੁ ਚਤੂਸੁ ਵਾਕ੍ਯੇਸੁ ਸਂਸੇਦਜੋਪਪਾਤਿਕਾ ਵੁਤ੍ਤਾ. ਕਸ੍ਸਚਿ ਸਤ੍ਤਾਯਤਨਾਨੀਤਿ ਏਤ੍ਥ ਪਨ ਗਬ੍ਭਸੇਯ੍ਯਕੋਵ ਵੁਤ੍ਤੋ. ਤਤ੍ਥ ਯਸ੍ਮਾ ਸਤ੍ਤਾਯਤਨਂ ਨਾਮ ਪਟਿਸਨ੍ਧਿਕ੍ਖਣੇ ਨ ਲਬ੍ਭਤਿ. ਪਵਤ੍ਤਿ ਕਾਲੇਯੇਵ ਲਬ੍ਭਤਿ. ਤਸ੍ਮਾ ਏਕਾਦਸਯਤਨਾਨੀਤਿ ਵੁਤ੍ਤਂ. ਕਸ੍ਸਚਿ ਦਸਾਤਿ ਚਕ੍ਖੁਵੇਕਲ੍ਲਵਸੇਨ. ਕਸ੍ਸਚਿ ਅਪਰਾਨਿ ਦਸਾਤਿ ਸੋਤ ਵੇਕਲ੍ਲਵਸੇਨ. ਕਸ੍ਸਚਿ ਨਵਾਤਿ ਚਕ੍ਖੁਸੋਤ ਦ੍ਵਯ ਵੇਕਲ੍ਲ ਵਸੇਨ ਵੁਤ੍ਤਂ. ਯਦਿਚ ਅਘਾਨਕੋ ਓਪਪਾਤਿਕੋਨਾਮ ਸਿਯਾ. ਤਦਾ ਸੁਦ੍ਧਜਚ੍ਚਘਾਨਕੇਨ ਸਦ੍ਧਿਂ ਤਯੋ ਦਸਕਵਾਰਾ ਵੁਤ੍ਤਾ ਸਿਯੁਂ. ਤਥਾ ਜਚ੍ਚਨ੍ਧਘਾਨਕ ਜਚ੍ਚਬਧਿਰਘਾਨਕੇਹਿ ਸਦ੍ਧਿਂ ਤਯੋ ਨਵਕਵਾਰਾ ਏਕੋਚ ਅਟ੍ਠਕਵਾਰੋ ਵੁਤ੍ਤੋ ਸਿਯਾ ਤਿਣ੍ਣਂ ਵਿਪਨ੍ਨਾਨਂ ਵਸੇਨ. ਤਥਾ ਅਵੁਤ੍ਤਤ੍ਤਾ ਪਨ ਨਤ੍ਥਿ ਅਘਾਨਕੋ ਓਪਪਾਤਿ ਕੋਤਿ ਵਿਞ੍ਞਾਯਤੀਤਿ. ਤਸ੍ਮਿਂ ਪਨ ਵਿਭਙ੍ਗੇ ਇਨ੍ਦ੍ਰਿਯਵਾਰੇ ਨਪੁਂਸਕਾਨਂ ਓਪਪਾਤਿਕਾਨਨ੍ਤਿ ਅਵੁਤ੍ਤਤ੍ਤਾ ਥਪੇਤ੍ਵਾ ਆਦਿਕਪ੍ਪਿਕੇ ਅਭਾਵਕੋਪਿ ਓਪਪਾਤਿਕੋ ਨਤ੍ਥਿਯੇਵਾਤਿ. ਪਾਲ਼ਿਯਂ ਅਵੁਤ੍ਤਂਪਿ ਪਨ ਸਂਸੇਦਜਾਨਂ ਵੁਤ੍ਤਪਕਾਰਂ ਚਕ੍ਖਾਦਿਵੇਕਲ੍ਲਂ ਅਟ੍ਠਕਥਾਵਸੇਨ ਵੇਦਿਤਬ੍ਬਂ. ਯਥਾਹ-ਸਤ੍ਤਤਿ ਉਕ੍ਕਂਸਤੋਵ ਰੂਪਾਨਿ ਸਂਸੇਦਜੋਪਪਾਤ ਯੋਨੀਸੁ. ਅਥਵਾ, ਅਵਕਂਸਤੋ ਤਿਂਸਾਤਿ. ਤਤ੍ਥ ਤਿਂਸਾਤਿ ਜਿਵ੍ਹਾਕਾਯ ਵਤ੍ਥੁ ਦਸਕਾਨਂ ਵਸੇਨ ਤਿਂਸਰੂਪਾਨੀਤਿ ਚ ਵੁਤ੍ਤਂ. ਇਦਞ੍ਹਿ ਵਚਨਂ ਸਂਸੇਦਜਾਨਂ ਵਸੇਨ ਵੁਤ੍ਤਨ੍ਤਿ ਮਹਾਟੀਕਾਯਂ ਵੁਤ੍ਤਂ. ਆਚਰਿਯਾ ਨਨ੍ਦਤ੍ਥੇਰੇਨ ਪਨ ਯਮਕੇ ਘਾਨਜਿਵ੍ਹਾਨਂ ਅਞ੍ਞਮਞ੍ਞਂ ਅਵਿਨਾਭਾਵ ਵੁਤ੍ਤਿਤਾ ਵੁਤ੍ਤਾਤਿ ਜਿਵ੍ਹਾ ਵੇਕਲ੍ਲਤਾ ਵਿਯ ਘਾਨਵੇਕਲ੍ਲਤਾਪਿ ਨਤ੍ਥੀਤਿ ਇਚ੍ਛਿਤਂ. ਇਨ੍ਦ੍ਰਿਯ ਯਮਕੇ ਪਨ –

ਯਸ੍ਸਵਾ ਪਨ ਇਤ੍ਥਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਘਾਨਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ. ਅਘਾਨਕਾਨਂ ਇਤ੍ਥੀਨਂ ਉਪਪਜ੍ਜਨ੍ਤੀਨਂ ਤਾਸਂ ਇਤ੍ਥਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਨੋਚ ਤਾਸਙ੍ਘਾਨਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿਚ. ਯਸ੍ਸਵਾ ਪਨ ਪੁਰਿਸਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਤਸ੍ਸ ਘਾਨਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿ. ਅਘਾਨਕਾਨਂ ਪੁਰਿਸਾਨਂ ਉਪਪਜ੍ਜਨ੍ਤਾਨਂ ਤੇਸਂ ਪੁਰਿਸਿਨ੍ਦ੍ਰਿਯਂ ਉਪ੍ਪਜ੍ਜਤਿ, ਨੋਚ ਤੇਸਂ ਘਾਨਿਨ੍ਦ੍ਰਿਯਂ ਉਪ੍ਪਜ੍ਜਤੀਤਿਚ ਵੁਤ੍ਤਂ.

ਤਸ੍ਮਾ ਅਟ੍ਠਕਥਾਯਂ ਵੁਤ੍ਤਨਯੇਨ ਘਾਨਵੇਕਲ੍ਲਤਾਪਿ ਅਤ੍ਥੀਤਿ ਯੁਤ੍ਤਂ.