ਕਮ੍ਮਟ੍ਠਾਨ ਸਙ੍ਗਹ ਪਰਮਤ੍ਥਦੀਪਨੀ
੧੭੦. ਏਵਂ ਅਟ੍ਠਹਿ ਪਰਿਚ੍ਛੇਦੇਹਿ ਸਪਚ੍ਚਯਪਭੇਦਂ ਨਾਮਰੂਪ ਵਿਭਾਗਂ ਦਸ੍ਸੇਤ੍ਵਾ ਇਦਾਨਿ ਵਿਦਿਤਨਾਮਰੂਪ ਵਿਭਾਗਸ੍ਸ ਕਮ੍ਮਟ੍ਠਾਨਵਿਧਾਨਂ ਦਸ੍ਸੇਨ੍ਤੋ ਸਮਥਵਿਪਸ੍ਸਨਾਨਨ੍ਤਿਆਦਿ ਮਾਹ. ਇਤੋ ਪਚ੍ਚਯ ਸਙ੍ਗਹਤੋ ਪਰਂ ਸਮਥਵਿਪਸ੍ਸਨਾਨਂ ਭਾਵਨਾਨਂ ਦੁਵਿਧਂਪਿ ਕਮ੍ਮਟ੍ਠਾਨਂ ਯਥਾਕ੍ਕਮਂ ਪਵਕ੍ਖਾਮੀਤਿ ਯੋਜਨਾ. ਤਤ੍ਥ ਕਿਲੇਸੇ ਅਞ੍ਞੇਪਿਵਾ ਵਿਤਕ੍ਕਾਦਯੋ ਓਲ਼ਾਰਿਕਧਮ੍ਮੇ ਸਮੇਤੀਤਿ ਸਮਥੋ. ਤਥਾ ਪਵਤ੍ਤੋ ਏਕਗ੍ਗਤਾਸਙ੍ਖਾਤੋ ਸਮਾਧਿ. ਵਿਸੇਸੇਨ ਪਸ੍ਸਨ੍ਤਿ ਏਤਾਯਾਤਿ ਵਿਪਸ੍ਸਨਾ. ਅਨਿਚ੍ਚਾਨੁਪਸ੍ਸਨਾਦਿਕਾ ਭਾਵਨਾਪਞ੍ਞਾ. ਤਾਯ ਹਿ ਯੋਗਿਨੋ ਖਨ੍ਧੇਸੁ ਲੋਕਿਯਮਹਾਜਨੇਨ ਪਸ੍ਸਿਤਂ ਇਤ੍ਥਿਪੁਰਿਸਾਦਿਕਂ ਨਿਚ੍ਚਸੁਖਾਦਿਕਞ੍ਚ ਅਤਿਕ੍ਕਮਿਤ੍ਵਾ ਵਿਸੇਸੇਨ ਅਨਿਚ੍ਚਾਦਿਕਮੇਵ ਪਸ੍ਸਨ੍ਤੀਤਿ. ਭਾਵੇਤਬ੍ਬਾਤਿ ਭਾਵਨਾ. ਭਾਵੇਨ੍ਤਿਵਾ ਚਿਤ੍ਤਸਨ੍ਤਾਨਂ ਏਤਾਹੀਤਿ ਭਾਵਨਾ. ਕਿਰਿਯਾ ਕਮ੍ਮਂ. ਤਿਟ੍ਠਤਿ ਏਤ੍ਥਾਤਿ ਠਾਨਂ. ਕਮ੍ਮਸ੍ਸ ਠਾਨਨ੍ਤਿ ਕਮ੍ਮਟ੍ਠਾਨਂ. ਵੀਰਿਯਾਰਬ੍ਭਸਙ੍ਖਾਤਸ੍ਸ ਯੋਗਕਮ੍ਮਸ੍ਸ ਪਵਤ੍ਤਿਟ੍ਠਾਨਨ੍ਤਿ ਅਤ੍ਥੋ. ਕਸਿਣਮਣ੍ਡਲਾਦਿਕਂ ਕਸਿਣਭਾਵਨਾਦਿਕਞ੍ਚ. ਆਦਿਮਜ੍ਝ ਪਰਿਯੋਸਾਨਾਨਞ੍ਹਿ ਸਮੁਦਾਯਭੂਕਂ ਏਕਮੇਤਂ ਪਥਵੀਕਸਿਣ ਭਾਵਨਾਦਿਕਂ ਭਾਵਨਾਕਮ੍ਮਂਪਿ ਅਤ੍ਤਨੋ ਅਵਯਵਭੂਤਸ੍ਸ ਯੋਗ ਕਮ੍ਮਸ੍ਸ ਪਵਤ੍ਤਿਟ੍ਠਾਨਂ ਸਮ੍ਭਵਤੀਤਿ.
ਵਿਭਾਵਨਿਯਂ ਪਨ
ਉਤ੍ਤਰੁਤ੍ਤਰ ਯੋਗਕਮ੍ਮਸ੍ਸ ਪਦਟ੍ਠਾਨਤਾਯ ਕਮ੍ਮਟ੍ਠਾਨਭੂਤਂ ਭਾਵਨਾਵਿਧਿਞ੍ਚਾਤਿਪਿ ਵੁਤ੍ਤਂ. ਤਮ੍ਪਿ ਯੁਜ੍ਜਤਿਯੇਵ.
ਯੋਗਕਮ੍ਮਮੇਵਵਾ ਸੁਖਵਿਸੇਸਾਨਂ ਅਧਿਟ੍ਠਾਨਟ੍ਠੇਨਠਾਨਨ੍ਤਿ ਕਮ੍ਮਟ੍ਠਾਨਂ. ਤਤ੍ਥਾਤਿ ਤਸ੍ਮਿਂ ਦੁਵਿਧੇਪਿ ਕਮ੍ਮਟ੍ਠਾਨੇ. ਸਮਥਸਙ੍ਗਹੇਤਿ ਸਮਥ ਕਮ੍ਮਟ੍ਠਾਨਸਙ੍ਗਹੇ. ਦਸਕਸਿਣਾਨੀਤਿ ਦਸਕਸਿਣਮਣ੍ਡਲਾਨਿ ਕਸਿਣਜ੍ਝਾਨਾਨਿਚ. ਤਦੁਭਯਾਨਿਪਿ ਹਿ ਯੋਗਾਨੁਯੋਗਸਙ੍ਖਾਤਸ੍ਸ ਸਮਥ ਕਮ੍ਮਸ੍ਸ ਪਵਤ੍ਤਿਟ੍ਠਾਨਤ੍ਤਾ ਸਮਥਕਮ੍ਮਟ੍ਠਾਨਾਨਿਨਾਮ ਹੋਨ੍ਤੀਤਿ. ਦਸਅਸੁਭਾਤਿ ਦਸਅਸੁਭਵਤ੍ਥੂਨਿ ਅਸੁਭਜ੍ਝਾਨਾਨਿਚ. ਦਸਅਨੁਸ੍ਸਤਿ ਯੋਤਿ ਬੁਦ੍ਧਗੁਣਾਦੀਨਿ ਦਸਅਨੁਸ੍ਸਤਿਟ੍ਠਾਨਾਨਿ ਅਨੁਸ੍ਸਰਣਸਤਿ ਯੋਚ. ਸੇਸਾਨਿਪਿ ਯਥਾਨੁਰੂਪਂ ਵਤ੍ਤਬ੍ਬਾਨੀਤਿ. ਚਰਣਂ ਚਰਿਯਾ. ਸਮੁਦਾਚਰਣਨ੍ਤਿ ਅਤ੍ਥੋ. ਪਵਤ੍ਤਿਬਹੁਲਤਾਤਿ ਵੁਤ੍ਤਂ ਹੋਤਿ. ਰਾਗਸ੍ਸ ਚਰਿਯਾ ਰਾਗਚਰਿਯਾ. ਰਾਗਚਰਿਤਾਤਿ ਪਾਠੋ, ਸੋ ਅਟ੍ਠਕਥਾਯਂ ਨਤ੍ਥਿ, ਪੁਗ੍ਗਲਟ੍ਠਾਨੇਏਵ ਸੋ ਯੁਤ੍ਤੋਤਿ. ਏਸਨਯੋ ਸੇਸੇਸੁਪਿ.
[੨੪੩] ਯੋ ਪਨ ਵਿਭਾਵਨਿਯਂ
ਚਰਿਯਾਨਂ ਸਂਸਗ੍ਗਭੇਦੋ ਵੁਤ੍ਤੋ. ਸੋ ਇਧ ਨਾਧਿਪ੍ਪੇਤੋ.
ਨਹਿ ਕਮ੍ਮਟ੍ਠਾਨਾਨਂਨਾਮ ਸਂਸਗ੍ਗਚਰਿਤਸ੍ਸਪਿ ਏਕਸ੍ਸ ਦ੍ਵੇ ਤੀਣਿ ਦਾਤਬ੍ਬਾਨਿ ਹੋਤੀਤਿ. ਤੇਨੇਵ ਹਿ ਸੋ ਭੇਦੋ ਅਟ੍ਠਕਥਾਯਂ ਨਗਰੁਕਤੋਤਿ. ਸਬ੍ਬਾਪਿ ਅਪ੍ਪਨਾਯ ਪੁਬ੍ਬਭਾਗਪਵਤ੍ਤਾ ਕਾਮਾਵਚਰ ਭਾਵਨਾ ਪਰਿਕਮ੍ਮਭਾਵਨਾਨਾਮ. ਸਾ ਪਨ ਅਪ੍ਪਨਾਯ ਆਸਨ੍ਨੇ ਦੂਰੇਤਿ ਦੁਵਿਧਾ ਹੋਤਿ. ਤਤ੍ਥ ਯਾ ਆਸਨ੍ਨੇ, ਸਾ ਅਪ੍ਪਨਂ ਉਪੇਚ੍ਚ ਸਮੀਪੇ ਠਤ੍ਵਾ ਪਵਤ੍ਤਤ੍ਤਾ ਉਪਚਾਰਭਾਵਨਾਤਿ ਵੁਚ੍ਚਤਿ. ਇਤਰਾ ਪਨ ਪਰਿਕਮ੍ਮ ਭਾਵਨਾਏਵਨਾਮ. ਇਤਿ ਪਰਿਕਮ੍ਮਭਾਵਨਾਪਿ ਸਮਾਨਾ ਪੁਬ੍ਬਾਪਰਵਿਸੇਸ ਪਾਕਟਭਾਵਤ੍ਥਂ ਅਟ੍ਠਕਥਾਸੁ ਦ੍ਵੀਹਿ ਨਾਮੇਹਿ ਗਹਿਤਾਤਿ ਵੁਤ੍ਤਂ ਪਰਿਕਮ੍ਮਭਾਵਨਾ.ਲ. ਤਿਸ੍ਸੋਭਾਵਨਾਤਿ ਤਾਸਂ ਪਨ ਵਿਸੇਸੋ ਪਰਤੋ ਆਗਮਿਸ੍ਸਤਿ. ਪਰਿਕਮ੍ਮਨਿਮਿਤ੍ਤਨ੍ਤਿ ਪਰਿਕਮ੍ਮਭਾਵਨਾਯ ਆਰਮ੍ਮਣਭੂਤਂ ਕਸਿਣਮਣ੍ਡਲਾਦਿਨਿਮਿਤ੍ਤਂ. ਤਞ੍ਚ ਤਸ੍ਸਾ ਆਰਮ੍ਮਣ ਭਾਵੇਨ ਏਕਂਪਿ ਸਮਾਨਂ ਪੁਬ੍ਬਾਪਰਵਿਸੇਸਪਾਕਟਭਾਵਤ੍ਥਂ ਪਰਿਕਮ੍ਮਨਿਮਿਤ੍ਤਂ ਉਗ੍ਗਹਨਿਮਿਤ੍ਤਨ੍ਤਿ ਦ੍ਵਿਧਾ ਭਿਨ੍ਦਿਤ੍ਵਾ ਵੁਤ੍ਤਂ. ਤੇਸਂਪਿ ਵਿਸੇਸੋ ਆਗਮਿਸ੍ਸਤਿ. ਵਿਦਤ੍ਥਿਚਤੁਰਙ੍ਗੁਲਸਙ੍ਖਾਤੇਨ ਪਰਿਤ੍ਤਪਮਾਣੇਨਵਾ ਖਲ ਮਣ੍ਡਲਾਦਿਸਙ੍ਖਾਤੇਨ ਮਹਨ੍ਤਪਮਾਣੇਨਵਾ ਕਤਂ ਅਕਤਂਵਾ ਪਥਵੀ ਮਣ੍ਡਲਤਲਮੇਵ ਅਸੇਸਫਰਿਤਬ੍ਬਟ੍ਠੇਨ ਕਸਿਣਨ੍ਤਿ ਪਥਵੀਕਸਿਣਂ. ਸਕਲਸਦ੍ਦਪਰਿਯਾਯੋ ਹਿ ਕਸਿਣਸਦ੍ਦੋ. ਯਥਾ ਕਸਿਣੇਨ ਜਮ੍ਬੁਦੀਪਸ੍ਸਾਤਿ. ਤਸ੍ਮਾ ਯਤ੍ਤਕੇ ਪਥਵੀਤਲੇ ਨਿਮਿਤ੍ਤਂ ਗਣ੍ਹਾਤਿ, ਤਤ੍ਤਕਂ ਚਿਤ੍ਤੇਨ ਅਸੇਸਂ ਫਰਿਤ੍ਵਾ ਏਵ ਗਹੇਤਬ੍ਬਂ ਹੋਤਿ. ਨ ਪਨ ਤਸ੍ਸ ਏਕਦੇਸੇ ਠਤ੍ਵਾਤਿ, ਤੇਨ ਵੁਤ੍ਤਂ ਪਥਵੀਮਣ੍ਡਲਤਲਮੇਵ ਅਸੇਸਫਰਿਤਬ੍ਬਟ੍ਠੇਨ ਕਸਿਣਨ੍ਤਿ ਪਥਵੀਕਸਿਣਨ੍ਤਿ. ਏਸਨਯੋ ਸੇਸਕਸਿਣੇਸੁਪੀਤਿ. ਏਤ੍ਥਚ, ਅਵਿਭੂਤਵਣ੍ਣਾਯ ਪਥਵਿਯਾ ਏਕ ਤਲਭਾਵੇਨਸਨ੍ਨਿਵਿਟ੍ਠਾਸਣ੍ਠਾਨਪਞ੍ਞਤ੍ਤਿਇਧਪਥਵੀਕਸਿਣਂਨਾਮ. ਤਥਾ ਆਪੋਕਸਿਣਂ ਤੇਜੋਕਸਿਣਞ੍ਚ. ਫੁਟ੍ਠਟ੍ਠਾਨੇ ਚਿਤ੍ਤੇਨ ਸਣ੍ਠਾਨਂ ਕਤ੍ਵਾ ਗਹਿਤਾ ਵਾਯੁਵਟ੍ਟਿ ਵਾਯੋਕਸਿਣਂਨਾਮ. ਨੀਲਵਣ੍ਣਵਿਸਿਟ੍ਠਾਏਕਾ ਸਣ੍ਠਾਨਪਞ੍ਞਤ੍ਤਿ ਨੀਲਕਸਿਣਂਨਾਮ. ਤਥਾ ਪੀਤਲੋਹਿਤੋ ਦਾਤਕਸਿਣਾਨਿਪਿ. ਚਨ੍ਦਸੂਰਿਯਅਗ੍ਗੋਭਾਸਵਿਸਿਟ੍ਠਾ ਕਤ੍ਥਚਿ ਦਿਸ੍ਸਮਾਨਾ ਸਣ੍ਠਾਨਪਞ੍ਞਤ੍ਤਿ ਆਲੋਕਕਸਿਣਂਨਾਮ. ਤਿਤ੍ਤਿਛਿਦ੍ਦਵਾਤ ਪਾਨਛਿਦ੍ਦਾਦੀਸੁ ਦਿਸ੍ਸਮਾਨਾ ਆਕਾਸਵਿਸਿਟ੍ਠਾ ਸਣ੍ਠਾਨਪਞ੍ਞਤ੍ਤਿ ਆਕਾਸਕਸਿਣਂਨਾਮਾਤਿ. ਅਤਿਵਿਯ ਧੁਮਾਤਂ ਸੁਨਭਾਵਂ ਗਤਨ੍ਤਿ ਉਦ੍ਧੁਮਾਤਂ. ਤਦੇਵ ਕੁਚ੍ਛਿਤਤ੍ਤਾ ਉਦ੍ਧੁਮਾਤਕਂ. ਤਥਾਭੂਤਸ੍ਸ ਛਵਸਰੀਰਸ੍ਸੇਤਂ ਨਾਮਂ. ਤਦੇਵ ਪੂਤਿਭਾਵਂ ਗਤਕਾਲੇ ਪੁਰਿਮਵਣ੍ਣਂ ਵਿਜਹਿਤ੍ਵਾ ਪੁਨ ਨੀਲਭਾਵਂ ਪਤ੍ਤਂ ਵਿਨੀਲਕਂ. ਤਦੇਵ ਪੁਨ ਪਚ੍ਚਿਤ੍ਵਾ ਤਤੋ ਤਤੋ ਵਿਸਨ੍ਦਮਾਨਪੁਬ੍ਬਯੁਤ੍ਤਂ ਵਿਪੁਬ੍ਬਕਂ. ਯੁਦ੍ਧਭੂਮਿਯਾਦੀਸੁ ਸਤ੍ਥੇਨ ਮਜ੍ਝੇ ਛਿਨ੍ਦਿਤ੍ਵਾ ਥਪਿਤਂ ਵਿਰੂਪਛਿਨ੍ਨਸਰੀਰਂ ਵਿਚ੍ਛਿਨ੍ਨਕਂਨਾਮ. ਸੋਣ ਸਿਙ੍ਗਾਲਾਦੀਹਿ ਵਿਵਿਧਾਕਾਰੇਨ ਖਾਯਿਤਪਦੇਸਯੁਤ੍ਤਂ ਸਰੀਰਂ ਵਿਕ੍ਖਾਯਿਤਕਂਨਾਮ. ਸੋਣਸਿਙ੍ਗਾਲਾਦੀਹਿ ਏਵ ਖਣ੍ਡਾਖਣ੍ਡਿਕਂ ਕਤ੍ਵਾ ਅਪਕਡ੍ਢਿਤ੍ਵਾ ਤਤੋ ਤਤੋ ਖਿਤ੍ਤਅਙ੍ਗਪਚ੍ਚਙ੍ਗਯੁਤ੍ਤਂ ਸਰੀਰਂ ਵਿਤ੍ਤਕ੍ਖਿਕਂ ਨਾਮ. ਅਙ੍ਗਪਚ੍ਚਙ੍ਗੇਸੁ ਸਤ੍ਥੇਨ ਹਨਿਤ੍ਵਾ ਖਣ੍ਡਾਖਣ੍ਡਿਕਂ ਕਤ੍ਵਾ ਤਤੋ ਤਤੋ ਖਿਤ੍ਤਅਙ੍ਗਪਚ੍ਚਙ੍ਗਯੁਤ੍ਤਂ ਸਰੀਰਂ ਹਤਵਿਕ੍ਖਿਤ੍ਤਕਂਨਾਮ. ਪਗ੍ਘਰਿਤ ਲੋਹਿਤਸਰੀਰਂ ਲੋਹਿਤਕਂ ਨਾਮ. ਪੁਲ਼ੁਵਪਰਿਪੂਰਂ ਸਰੀਰਂ ਪੁਲ਼ੁਵਕਂ. ਸਕਲੋ ਅਟ੍ਠਿਸਙ੍ਘਾਟੋਵਾ ਏਕਮੇਕਂਵਾ ਅਟ੍ਠਿ ਅਟ੍ਠਿਕਂ ਨਾਮ. ਪੁਨਪ੍ਪੁਨਂ ਨਿਰਨ੍ਤਰਂ ਸਰਣਂ ਅਨੁਸ੍ਸਤਿ. ਬੁਦ੍ਧਗੁਣਸ੍ਸ ਅਨੁਸ੍ਸਤਿ ਬੁਦ੍ਧਾਨੁਸ੍ਸਤਿ. ਏਸ ਨਯੋ ਸੇਸਾਸੁਪੀਤਿ. ਤਤ੍ਥ ਅਰਹਤਾਦਿਗੁਣੋ ਬੁਦ੍ਧਗੁਣੋਨਾਮ. ਸ੍ਵਕ੍ਖਾਤਤਾਦਿਗੁਣੋ ਧਮ੍ਮਗੁਣੋਨਾਮ. ਸੁਪ੍ਪਟਿਪਨ੍ਨਤਾਦਿਗੁਣੋ ਸਙ੍ਘਗੁਣੋ ਨਾਮ. ਅਤ੍ਤਨੋ ਸੀਲਸ੍ਸ ਅਖਣ੍ਡਤਾਦਿ ਗੁਣੋ ਸੀਲਗੁਣੋਨਾਮ. ਅਤ੍ਤਨੋ ਦਾਨਸ੍ਸ ਵਿਗਤਮਲਮਚ੍ਛੇਰਤਾਦਿ ਗੁਣੋ ਚਾਗਗੁਣੋਨਾਮ. ਅਤ੍ਤਾਨਂ ਦੇਵਤ੍ਤਂਵਾ ਸਕ੍ਕਤ੍ਤਂਵਾ ਬ੍ਰਹ੍ਮਤ੍ਤਂਵਾ ਵਹਿਤੁਂ ਸਮਤ੍ਥਾ ਅਤ੍ਤਨੋ ਸਦ੍ਧਾਦਿਗੁਣਾ ਦੇਵਤਾਗੁਣਾਨਾਮ. ਵਤ੍ਤ ਪਟਿਪਤ੍ਤਿਵਸੇਨਵਾ ਧੁਤਙ੍ਗਸਮਾਦਾਨਵਸੇਨਵਾ ਝਾਨਸਮਾਪਤ੍ਤਿਵਸੇਨਵਾ ਵਿਪਸ੍ਸਨਾਵਸੇਨਵਾ ਅਤ੍ਤਨੋ ਸਨ੍ਤਾਨੇ ਚਿਰਂਵਿਕਾਲਂ ਵਿਕ੍ਖਮ੍ਭਿਤਾਨਂ ਕਾਮਰਾਗਾਦੀਨਂ ਵੂਪਸਮੋ ਅਤ੍ਤਨਾਅਧਿਗਤਨਿਬ੍ਬਾਨਞ੍ਚ ਉਪਸਮੋਨਾਮ. ਏਕਭਵਪਰਿਯਾਪਨ੍ਨਸ੍ਸ ਅਤ੍ਤਨੋ ਖਨ੍ਧਸਨ੍ਤਾਨਸ੍ਸ ਭੇਦੋ ਮਰਣਂ ਨਾਮ. ਕੇਸਕਾਯਾਦੀਨਂ ਨਾਨਾਕਾਯਾਨਂ ਸਮੂਹਭੂਤੋ ਅਯਂ ਕਾਯੋ ਕਾਯੋਨਾਮ. ਅਤ੍ਤਨਿ ਨਿਰਨ੍ਤਰਂ ਪਵਤ੍ਤਮਾਨਾ ਅਸ੍ਸਾਸ ਪਸ੍ਸਾਸਾ ਆਨਾਪਾਣਂਨਾਮ. ਮਿਜ੍ਜਤਿ ਸਿਨਿਯ੍ਹਤੀਤਿ ਮੇਤ੍ਤਾ. ਯਂ ਆਰਬ੍ਭ ਉਪ੍ਪਜ੍ਜਤਿ. ਤਸ੍ਸ ਹਿਤਸੁਖਂ ਅਵਿਪ੍ਪਕਿਣ੍ਣਂ ਕਤ੍ਵਾ ਸਙ੍ਗਣ੍ਹਤੀਤਿ ਅਤ੍ਥੋ. ਮਿਤ੍ਤਸ੍ਸਵਾ ਏਸਾ ਮਿਤ੍ਤੇਸੁਵਾ ਭਵਾਤਿ ਮੇਤ੍ਤਾ. ਅਤ੍ਥਤੋ ਪਨ ਪਰਸਤ੍ਤਾਨਂ ਹਿਤੂਪਸਂਹਾਰਵਸੇਨ ਪਵਤ੍ਤੋ ਅਦੋਸੋਏਵ. ਪਰਸਤ੍ਤਾਨਂ ਹਿਤੂਪਸਂਹਾਰ ਹਿਤਮੋਦਨ ਅਹਿਤਾਪਨਯਨਸਙ੍ਖਾਤਂ ਬ੍ਯਾਪਾਰਤ੍ਤਯਂ ਪਹਾਯ ਤੇਸਂ ਕਮ੍ਮਸਕਤਾਨੁਬ੍ਰੂਹਨਵਸੇਨ ਉਪਪਤ੍ਤਿਤੋ ਯੁਤ੍ਤਿਤੋ ਪੇਕ੍ਖਤੀਤਿ ਉਪੇਕ੍ਖਾ. ਤਥਾ ਪਵਤ੍ਤਾ ਤਤ੍ਰਮਜ੍ਝਤ੍ਤਤਾਏਵ. ਅਪ੍ਪਮਾਣੇਸੁਸਤ੍ਤੇਸੁ ਭਵਾਤਿ ਅਪ੍ਪਮਞ੍ਞਾ. ਨ ਹਿ ਏਤ੍ਤਕੇਸੁ ਏਵ ਸਤ੍ਤੇਸੁ ਏਤਾ ਪਵਤ੍ਤੇਤਬ੍ਬਾ. ਨ ਤਤੋ ਅਞ੍ਞੇਸੂਤਿ ਏਵਂ ਏਤਾਸਂ ਵਿਸਯਪਰਿਚ੍ਛੇਦੋਨਾਮ ਅਤ੍ਥੀਤਿ. ਏਵਂਸਨ੍ਤੇਪਿ ਆਦਿਕਮ੍ਮਿ ਕੇਨ ਆਦਿਤੋ ਏਕਸ੍ਮਿਂ ਪੁਗ੍ਗਲੇ ਅਤ੍ਤਨੋ ਭਾਵਨਾਚਿਤ੍ਤਂ ਲਦ੍ਧਾਸੇਵਨਂ ਲਦ੍ਧਵਿਸੇਸਞ੍ਚ ਕਤ੍ਵਾ ਪਚ੍ਛਾ ਦ੍ਵੀਸੁ ਤੀਸੂਤਿਆਦਿਨਾ ਵਡ੍ਢਿਤ੍ਵਾ ਸੀਮਸਮ੍ਭੇਦੋਚ ਓਧਿਸੋਫਰਣ ਅਨੋਧਿਸੋਫਰਣ ਦਿਸਾਫਰਣਾਨਿਵ ਕਤ੍ਤਬ੍ਬਾਨੀਤਿ. ਯਂ ਪਨ ਵਿਭਙ੍ਗੇ ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤੀਤਿਆਦਿਨਾ ਪਟਿਸਮ੍ਭਿਦਾਮਗ੍ਗੇਚ ਸਬ੍ਬੇਸਤ੍ਤਾ ਅਵੇਰਾ ਹੋਨ੍ਤੂਤਿਆਦਿਨਾ ਮੇਤ੍ਤਾਵਿਧਾਨਂ ਨਾਮ ਵੁਤ੍ਤਂ. ਤਂ ਮੇਤ੍ਤਾਝਾਨੇ ਵਸੀਭਾਵਪ੍ਪਤ੍ਤਾਨਂ ਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਏਤਾ ਪਨ ਵਿਸੇਸੇਨ ਦੋਸਪਕ੍ਖਿਕਾਨਂ ਕਿਲੇਸਾਨਂ ਉਜੁਪਟਿਪਕ੍ਖਭੂਤਾ ਹੋਨ੍ਤੀਤਿ ਤਂਸਮਙ੍ਗਿਨੋਚ ਨਿਚ੍ਚਂ ਸੋਮ੍ਮਹਦਯਭਾਵੇਨ ਬ੍ਰਹ੍ਮਸਦਿ ਸਤ੍ਤਾ ਬ੍ਰਹ੍ਮਾਨੋਨਾਮ. ਤੇਸਂ ਵਿਹਾਰੋਤਿ ਬ੍ਰਹ੍ਮਵਿਹਾਰੋ. ਸੇਟ੍ਠਾਨਂਵਾ ਸੇਟ੍ਠਭੂਤੋਵਾ ਵਿਹਾਰੋਤਿ ਬ੍ਰਹ੍ਮਵਿਹਾਰੋਤਿ. ਆਹਾਰੇਤਿ ਅਸਿਤ ਪੀਤ ਖਾਯਿਤ ਸਾਯਿਤ ਵਸੇਨ ਚਤੁਪ੍ਪਭੇਦੇ ਅਜ੍ਝੋਹਟਾਹਾਰੇ. ਪਟਿਕੂਲਸਞ੍ਞਾਤਿ ਆਹਾਰਹੇਤੁ ਅਨੁਭਵਿਤਬ੍ਬਾਨਂ ਦੁਕ੍ਖਧਮ੍ਮਾਨਂ ਪਚ੍ਚਵੇਕ੍ਖਨਵਸੇਨ ਸਰਸਪਟਿਕੂਲਤਾ ਪਚ੍ਚਵੇਕ੍ਖਨਵਸੇਨ ਆਸਯਨਿਧਾਨ ਪਕ੍ਕਾਪਕ੍ਕਫਲਨਿਸ੍ਸਨ੍ਦਪਚ੍ਚਵੇਕ੍ਖਨ ਵਸੇਨ ਚ ਤਤ੍ਥ ਨਿਕਨ੍ਤਿ ਪਹਾਨਸਞ੍ਞਾ. ਚਤੁਧਾਤੁਵਵਤ੍ਥਾਨਨ੍ਤਿ ਸਰੀਰਗਤਾਨਂ ਪਥਵਿਆਦੀਨਂ ਚਤੁਨ੍ਨਂ ਮਹਾਧਾਤੂਨਂ ਸਲਕ੍ਖਣਾ ਦਿਵਸੇਨ ਵਿਸੁਂ ਵਿਸੁਂ ਪਰਿਚ੍ਛਿਨ੍ਦਿਤ੍ਵਾ ਸਮਨੁਪਸ੍ਸਨਂ. ਤਞ੍ਹਿ ਚਤਸ੍ਸੋ ਧਾਤੁਯੋ ਵਵਤ੍ਥਪਿਯਨ੍ਤਿ ਵਿਨਿਚ੍ਛਿਯਨ੍ਤਿ ਸਲ੍ਲਕ੍ਖਿਯਨ੍ਤਿ ਏਤੇਨਾਤਿ ਚਤੁਧਾਤੁਵਵਤ੍ਥਾਨਨ੍ਤਿ ਵੁਚ੍ਚਤੀਤਿ. ਅਸੁਭਸਞ੍ਞਾ ਭਾਵੇਤਬ੍ਬਾ ਰਾਗਸ੍ਸਪਹਾਨਾਯਾਤਿ ਵਚਨਤੋ ਦਸਅਸੁਭਾ.ਲ. ਰਾਗਚਰਿਤਸ੍ਸ ਸਪ੍ਪਾਯਾਤਿ ਵੁਤ੍ਤਂ. ਤਤ੍ਥ ਰਾਗੇਨ ਚਰਤੀਤਿ ਰਾਗਚਰਿਤੋ. ਸੋ ਹਿ ਕਾਮਂ ਕਦਾਚਿ ਦੋਸੇਨ ਚਰਤਿ. ਕਦਾਚਿ ਮੋਹੇਨ. ਕਦਾਚਿ ਸਦ੍ਧਾਦੀਸੁਪਿ ਅਞ੍ਞਤਰੇਨ. ਰਾਗੋ ਪਨਸ੍ਸ ਉਸ੍ਸਨ੍ਨੋ. ਤਸ੍ਮਾ ਉਸ੍ਸਨ੍ਨੇਨ ਰਾਗੇਨ ਸੋ ਰਾਗਚਰਿਤੋਤਿ ਸਙ੍ਖ੍ਯਂ ਗਚ੍ਛਤੀਤਿ. ਏਸਨਯੋ ਸੇਸੇਸੁਪਿ. ਮੇਤ੍ਤਾ ਭਾਵੇਤਬ੍ਬਾ ਬ੍ਯਾਪਾਦਸ੍ਸ ਪਹਾਨਾਯਾਤਿ ਵਚਨਤੋ ਮੇਤ੍ਤਾਦੀਨਂ ਤਿਣ੍ਣਂ ਬ੍ਰਹ੍ਮਵਿਹਾਰਾਨਂ ਯਥਾਕ੍ਕਮਂ ਬ੍ਯਾਪਾਦਵਿਹਿਂਸਾ ਅਰਤੀਨਂ ਨਿਸ੍ਸਰਣਤਾਵਚਨਤੋ ਸੁਪਰਿਸੁਦ੍ਧਾਨਞ੍ਚ ਵਣ੍ਣਕਸਿਣਾਨਂ ਦੋਸਵਤ੍ਥੁਤ੍ਤਾਭਾਵਤੋ ਚਤਸ੍ਸੋਅਪ੍ਪਮਞ੍ਞਾਯੋ.ਲ. ਦੋਸਚਰਿਤਸ੍ਸਾਤਿ ਵੁਤ੍ਤਂ. ਏਤ੍ਥਚ ਆਦਿਕਮ੍ਮਿਕਸ੍ਸੇਵਾਯਂ ਚਰਿਯਵਿਭਾਗੋ. ਉਪੇਕ੍ਖਾਚ ਆਦਿਕਮ੍ਮਿਕਸ੍ਸ ਨਸਮ੍ਭਵਤਿ. ਵਕ੍ਖਤਿਹਿ ਉਪੇਕ੍ਖਾਪਞ੍ਚਮਜ੍ਝਾਨਿਕਾਤਿ. ਤਸ੍ਮਾ ਯਸ੍ਸ ਪੁਰਿਮਾ ਤਿਸ੍ਸੋ ਸਪ੍ਪਾਯਾ. ਤਸ੍ਸ ਤਦਨੁਗਤਿਕਾ ਉਪੇਕ੍ਖਾਪਿ ਸਪ੍ਪਾਯਾਨਾਮ ਹੋਤੀਤਿ ਕਤ੍ਵਾ ਚਤਸ੍ਸੋ ਅਪ੍ਪਮਞ੍ਞਾਯੋਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਇਤਰਥਾ ਨਿਸ੍ਸਰਣਞ੍ਹੇਤਂ ਰਾਗਸ੍ਸ. ਯਦਿਦਂ ਉਪੇਕ੍ਖਾ ਚੇਤੋ ਵਿਮੁਤ੍ਤੀਤਿ ਵਚਨਤੋ ਉਪੇਕ੍ਖਾ ਰਾਗਚਰਿਤਸ੍ਸਾਤਿ ਵਤ੍ਤਬ੍ਬਂ ਸਿਯਾਤਿ. ਨੀਲਾਦੀਨਿਚ ਚਤ੍ਤਾਰਿ ਕਸਿਣਾਨੀਤਿ ਇਦਞ੍ਚ ਮਨਾਪਿਯਰੂਪਾਨਿ ਨੀਲਾਦੀਨਿ ਸਨ੍ਧਾਯ ਵੁਤ੍ਤਂ. ਅਮਨਾਪਿਯਾਨਿ ਪਨ ਤਾਨਿ ਰਾਗਚਰਿਤਸ੍ਸੇਵ ਸਪ੍ਪਾਯਾਨੀਤਿ. ਆਨਾਪਾਣਸਤਿ ਭਾਵੇਤਬ੍ਬਾ ਵਿਤਕ੍ਕੁਪਚ੍ਛੇਦਾਯਾਤਿ ਵਚਨਤੋ ਆਨਾਪਾਣਂਵਿਤਕ੍ਕਚਰਿਤਸ੍ਸਾਤਿ ਵੁਤ੍ਤਂ. ਮੋਹਚਰਿਤੋ ਪਨ ਪਕਤਿਯਾ ਪਮਾਦਬਹੁਲੋ ਹੋਤਿ ਵਿਕ੍ਖਿਤ੍ਤਚਿਤ੍ਤੋਚ. ਆਨਾਪਾਣਞ੍ਚਨਾਮ ਨਿਰਨ੍ਤਰਂ ਪਵਤ੍ਤਮਾਨਂ ਤਸ੍ਸ ਸਤਿਂ ਉਪ੍ਪਾਦੇਨ੍ਤਂ ਵਿਯ ਪਵਤ੍ਤਤੀਤਿ ਤਂ ਮੋਹਚਰਿਤਸ੍ਸਸਪ੍ਪਾਯਨ੍ਤਿ ਵੁਤ੍ਤਂ ਸਿਯਾ.
[੨੪੪] ਵਿਭਾਵਨਿਯਂ ਪਨ
ਬੁਦ੍ਧਿਵਿਸਯਭਾਵੇਨ ਮੋਹਪਟਿਪਕ੍ਖਤ੍ਤਾਤਿ ਕਾਰਣਂ ਵੁਤ੍ਤਂ. ਤਂ ਯੁਤ੍ਤਂ ਵਿਯ ਨ ਦਿਸ੍ਸਤਿ.
ਏਵਞ੍ਹਿ ਸਤਿ ਸੋ ਬੁਦ੍ਧਿਚਰਿਤੇਨ ਸਹ ਵਤ੍ਤਬ੍ਬੋ ਸਿਯਾਤਿ. ਕਾਮਞ੍ਚ ਬੁਦ੍ਧਗੁਣਾਦਯੋਪਿ ਏਕਨ੍ਤੇਨ ਬੁਦ੍ਧਿਵਿਸਯਾਏਵ ਹੋਨ੍ਤਿ. ਤੇ ਪਨ ਵਿਸੇਸਤੋ ਸਦ੍ਧਂ ਉਪਬ੍ਰੂਹਯਨ੍ਤੀਤਿ ਵੁਤ੍ਤਂ ਬੁਦ੍ਧਾਨੁਸ੍ਸਤਿ ਆਦਯੋ.ਲ. ਸਦ੍ਧਾਚਰਿਤਸ੍ਸਾਤਿ. ਪਰਮਤ੍ਥਤੋ ਸੁਖੁਮਤਰਾਨਿ ਮਰਣਾਦੀਨਿ ਵਿਪੁਲਬੁਦ੍ਧੀਨਂ ਏਵ ਵਿਸਯਾਨਾਮ ਹੋਨ੍ਤੀਤਿ ਵੁਤ੍ਤਂ ਮਰਣ. ਲ. ਬੁਦ੍ਧਿਚਰਿਤਸ੍ਸਾਤਿ. ਸੇਸਾਨਿਪਨਸਬ੍ਬਾਨਿਪੀਤਿ ਚਤ੍ਤਾਰਿ ਭੂਤ ਕਸਿਣਾਨਿ ਦ੍ਵੇ ਆਲੋਕਾਕਾਸਕਸਿਣਾਨਿ ਚਤ੍ਤਾਰੋ ਆਰੁਪ੍ਪਾਚਾਤਿ ਦਸਵਿਧਾਨਿ ਕਮ੍ਮਟ੍ਠਾਨਾਨਿ. ਤਤ੍ਥਾਪੀਤਿ ਤੇਸੁ ਦਸਸੁ ਸੇਸ ਕਮ੍ਮਟ੍ਠਾਨੇਸੁਪਿ. ਪੁਥੁਲਂ ਖਲਮਣ੍ਡਲਾਦਿਪਮਾਣਂ ਮੋਹਚਰਿਤਸ੍ਸ ਸਪ੍ਪਾਯਂ. ਸਮ੍ਬਾਧਸ੍ਮਿਞ੍ਹਿ ਓਕਾਸੇ ਚਿਤ੍ਤਂ ਭਿਯ੍ਯੋ ਸਂਮੋਹਂ ਆਪਜ੍ਜਤੀਤਿ. ਖੁਦ੍ਦਕਂ ਵਿਦਤ੍ਥਿਚਤੁਰਙ੍ਗੁਲਪਮਾਣਂ ਵਿਤਕ੍ਕਚਰਿਤਸ੍ਸੇਵ ਸਪ੍ਪਾਯਂ. ਮਹਨ੍ਤਞ੍ਹਿ ਵਿਤਕ੍ਕਸਨ੍ਧਾਵਨਸ੍ਸ ਪਚ੍ਚਯੋ ਹੋਤੀਤਿ. ਤਤ੍ਥਚ ਵਿਤਕ੍ਕਚਰਿਤਸ੍ਸੇਵਾਤਿ ਏਤ੍ਥ ਏਵਸਦ੍ਦੋ ਖੁਦ੍ਦਕਨ੍ਤਿਪਦੇ ਯੁਜ੍ਜਤਿ. ਵਿਤਕ੍ਕਚਰਿਤਸ੍ਸ ਖੁਦ੍ਦਕਮੇਵ ਸਪ੍ਪਾਯਂ. ਨ ਪੁਥੁਲਨ੍ਤਿ. ਸਬ੍ਬਞ੍ਚੇਤਂ ਉਜੁਵਿਪਚ੍ਚਨਿਕਵਸੇਨਚੇਵ ਅਤਿਸਪ੍ਪਾਯਤਾਯਚ ਵੁਤ੍ਤਂ. ਰਾਗਾਦੀਨਂ ਪਨ ਅਵਿਕ੍ਖਮ੍ਭਿਕਾ ਸਦ੍ਧਾਦੀਨਞ੍ਚ ਅਨੁਪਕਾਰਿਕਾ ਕੁਸਲਭਾਵਨਾਨਾਮ ਨਤ੍ਥੀਤਿਪਿ ਅਟ੍ਠਕਥਾਯਂ ਵੁਤ੍ਤਂ. ਸਬ੍ਬਤ੍ਥਾਪੀਤਿ ਸਬ੍ਬੇਸੁਪਿ ਚਤ੍ਤਾਲੀਸ ਕਮ੍ਮਟ੍ਠਾਨੇਸੁ. ਪਰਿਕਮ੍ਮਭਾਵਨਾ ਲਬ੍ਭਤੇਵ ਪਰਿਕਮ੍ਮੇਨ ਵਿਨਾ ਏਕਸ੍ਸਪਿ ਕਮ੍ਮਟ੍ਠਾਨਸ੍ਸ ਅਸਮ੍ਪਜ੍ਜਨਤੋ. ਦਸਸੁਕਮ੍ਮਟ੍ਠਾਨੇਸੁਉਪਚਾਰਭਾਵਨਾਵ ਸਮ੍ਪਜ੍ਜਤਿ ਨਤ੍ਥਿ ਅਪ੍ਪਨਾ. ਕਸ੍ਮਾ ਇਤਿ ਚੇ. ਬੁਦ੍ਧ ਧਮ੍ਮ ਸਙ੍ਘ ਸੀਲ ਚਾਗ ਦੇਵਤਾ ਉਪਸਮ ਗੁਣਾਨਂ ਤਾਵ ਗਮ੍ਭੀਰਤਾਯ ਨਾਨਾਪ੍ਪਕਾਰਗੁਣਾ ਨੁਸ੍ਸਰਣਾਧਿਮੁਤ੍ਤਤਾਯਗਾਤਿ ਹਿ ਅਟ੍ਠਕਥਾਯਂ ਵੁਤ੍ਤਂ. ਤਤ੍ਥ ਗਮ੍ਭੀਰ ਤਾਯਾਤਿ ਏਤੇਨ ਏਕੇਕਸ੍ਸਪਿ ਗੁਣਪਦਸ੍ਸ ਗਮ੍ਭੀਰਤ੍ਤਾ ਤਬ੍ਬਿਸਯੋ ਸਮਾਧਿ ਮਹਾਸਮੁਦ੍ਦੇ ਸਸਕੋ ਵਿਯ ਤਤ੍ਥ ਅਪ੍ਪਨਂ ਪਤ੍ਵਾ ਨਿਚ੍ਚਲਭਾਵੇਨ ਪਤਿਟ੍ਠਾਤੁਂ ਨਸਕ੍ਕੋਤੀਤਿ ਦਸ੍ਸੇਤਿ. ਨਾਨਾਪ੍ਪਕਾਰ ਗੁਣਾਨੁਸ੍ਸਰਣਾਧਿਮੁਤ੍ਤਤਾਯਵਾਤਿ ਏਤੇਨ ਤੇਸਂ ਗੁਣਾਨਂ ਅਤਪ੍ਪ ਨਿਯਸਭਾਵਤ੍ਤਾ ਏਤ੍ਤਕੇਏਵ ਗੁਣਪਦੇ ਠਤ੍ਵਾ ਅਪ੍ਪਨਂ ਪਾਪੇਸ੍ਸਾਮੀਤਿ ਅਤ੍ਤਨੋ ਚਿਤ੍ਤਂ ਸਨ੍ਧਾਰੇਤੁਂਪਿ ਨਸਕ੍ਕੋਤੀਤਿ ਦਸ੍ਸੇਤੀਤਿ. ਸੇਸੇਸੁ ਪਨ ਮਰਣਸਞ੍ਞਾਵਵਤ੍ਥਾਨੇਸੁ ਮਰਣਂ ਤਾਵ ਸਭਾਵ ਧਮ੍ਮਤ੍ਤਾ ਸਂਵੇਜਨੀਯਧਮ੍ਮਤ੍ਤਾਚ ਇਤਰਾਨਿਚ ਦ੍ਵੇ ਸਭਾਵਧਮ੍ਮਤਾਯ ਗਮ੍ਭੀਰਤ੍ਤਾ ਅਪ੍ਪਨਾਯ ਪਤਿਟ੍ਠਾ ਨਹੋਨ੍ਤੀਤਿ. ਯਦਿਏਵਂ ਕਸ੍ਮਾ ਲੋਕੁਤ੍ਤਰਜ੍ਝਾਨਾਨਿ ਅਤਿਗਮ੍ਭੀਰੇ ਨਿਬ੍ਬਾਨਸਙ੍ਖਾਤੇ ਸਭਾਵਧਮ੍ਮੇ ਅਪ੍ਪਨਂ ਪਾਪੁਣਨ੍ਤਿ. ਦੁਤੀਯਚਤੁਤ੍ਥਾਰੁਪ੍ਪਜ੍ਝਾਨਾਨਿਚ ਪਥਮਤਤੀਯਾਰੁਪ੍ਪ ਸਙ੍ਖਾਤੇ ਸਭਾਵਧਮ੍ਮੇਤਿ. ਵੁਚ੍ਚਤੇ, ਲੋਕੁਤ੍ਤਰਜ੍ਝਾਨਾਨਿ ਤਾਵ ਵਿਸੁਦ੍ਧਿਤੋ ਸਮ੍ਮਸਨਞਾਣਤੋਚ ਪਟ੍ਠਾਯ ਅਨੁਕ੍ਕਮੇਨ ਉਪਰੁਪਰਿਪਵਤ੍ਤਾਨਂ ਵਿਸੁਦ੍ਧਿਭਾਵਨਾਨਂ ਬਲੇਨ ਅਤਿਗਮ੍ਭੀਰੇਪਿ ਨਿਬ੍ਬਾਨਸਙ੍ਖਾਤੇ ਸਭਾਵਧਮ੍ਮੇ ਅਪ੍ਪਨਾਭਾਵੇਨ ਪਤਿਟ੍ਠਾਤੁਂ ਸਕ੍ਕੋਨ੍ਤਿ. ਆਰੁਪ੍ਪਜ੍ਝਾਨਾਨਿਚ ਅਪ੍ਪਨਾਪਤ੍ਤਸ੍ਸੇਵ ਪਞ੍ਚਮਜ੍ਝਾਨਸਮਾਧਿਸ੍ਸ ਉਦਯਮਤ੍ਤਾਨਿ ਹੋਨ੍ਤੀਤਿ ਆਰਮ੍ਮਣਸਮਤਿਕ੍ਕਮਨਮਤ੍ਤਕਰਣੇਨ ਸਭਾਵਧਮ੍ਮੇਪਿ ਆਰਮ੍ਮਣੇ ਅਪ੍ਪਨਾਭਾਵੇਨ ਪਤਿਟ੍ਠਾਤੁਂ ਸਕ੍ਕੋਨ੍ਤੀਤਿ. ਤਤ੍ਥਾਪੀਤਿ ਤੇਸੁ ਸਮਤਿਂਸਅਪ੍ਪਨਾਕਮ੍ਮਟ੍ਠਾਨੇਸੁਪਿ. ਪਞ੍ਚਕਜ੍ਝਾਨੇ ਨਿਯੁਤ੍ਤਾਨਿ ਪਞ੍ਚਕਜ੍ਝਾਨਿ ਕਾਨਿ. ਝਾਨਪਞ੍ਚਕਸ੍ਸ ਆਰਮ੍ਮਣਭਾਵਯੋਗ੍ਯਾਨੀਤਿ ਵੁਤ੍ਤਂਹੋਤਿ. ਪਟਿਕੂਲਾਰਮ੍ਮਣਾਨਿਨਾਮ ਅਤਿਅਨਿਟ੍ਠਾਨਿ ਲੂਖਾਨਿ ਚਿਤ੍ਤਰਭਿਜਨਨੇ ਪਰਿਦੁਬ੍ਬਲਾਨਿ ਹੋਨ੍ਤੀਤਿ ਨ ਤਾਨਿ ਅਤ੍ਤਨਿ ਚਿਤ੍ਤਂ ਰੋਚੇਤ੍ਵਾ ਥਪੇਤੁਂ ਸਕ੍ਕੋਨ੍ਤਿ. ਤਸ੍ਮਾ ਵਿਤਕ੍ਕੇਨ ਵਿਨਾ ਚਿਤ੍ਤਂ ਤਤ੍ਥ ਏਕਗ੍ਗਂ ਹੁਤ੍ਵਾ ਨ ਤਿਟ੍ਠਤਿ. ਵਿਤਕ੍ਕਬਲੇਨੇਵ ਤਿਟ੍ਠਤੀਤਿ ਵੁਤ੍ਤਂ ਦਸਅਸੁਭਾ.ਲ. ਪਥਮਜ੍ਝਾਨਿਕਾਤਿ. ਯਦਿਏਵਂ ਕਥਂ ਤੇਸੁ ਸੋਮਨਸ੍ਸਜ੍ਝਾਨਂ ਹੋਤੀਤਿ ਨੀਵਰਣਸਨ੍ਤਾਪਂ ਪਹਾਨਬਲੇਨਚੇਵ ਤਂ ਤਂ ਆਨਿਸਂਸਦਸ੍ਸਨ ਞਾਣਬਲੇਨਚ. ਬ੍ਯਾਧਿਦੁਕ੍ਖਪੀਲ਼ਿਤਸ੍ਸ ਰੋਗਿਨੋ ਵਮਨਵਿਰੇਚਨਪਵਤ੍ਤਿਯਂ ਵਿਯ ਬਹੁਂ ਦਾਨਿ ਵੇਤ੍ਤਨਂ ਲਭਿਸ੍ਸਾਮੀਤਿ ਆਨਿਸਂਸਦਸ੍ਸਾਵਿਨੋ ਪੁਪ੍ਫਚ੍ਛਟ੍ਟਕਸ੍ਸ ਗੂਥਰਾਸਿਦਸ੍ਸਨੇ ਵਿਯ ਚਾਤਿ ਦਟ੍ਠਬ੍ਬਂ. ਮੇਤ੍ਤਾਦਯੋ ਤਯੋ ਬ੍ਰਹ੍ਮਵਿਹਾਰਾ ਦੋਮਨਸ੍ਸਸਮੁਟ੍ਠਿਤਾਨਂ ਬ੍ਯਾਪਾਦਵਿਹਿਂ ਸਾਅਰਤੀਨਂ ਨਿਸ੍ਸਰਣਭੂਤਾ ਹੋਨ੍ਤੀਤਿ ਨ ਤੇ ਕਦਾਚਿ ਸੋਮਨਸ੍ਸੇਨ ਵਿਨਾ ਅਪ੍ਪਨਂ ਪਾਪੁਣਨ੍ਤੀਤਿ ਵੁਤ੍ਤਂ ਮੇਤ੍ਤਾਦਯੋ ਤਯੋ ਚਤੁਕ੍ਕਜ੍ਝਾਨਿਕਾਤਿ. ਉਪੇਕ੍ਖਾ ਪਨ ਸਤ੍ਤੇਸੁ ਸਬ੍ਬਸੋ ਉਦਾਸਿਨਪਕ੍ਖੇ ਠਤ੍ਵਾ ਭਾਵਿਤਬ੍ਬਤ੍ਤਾ ਕਦਾਚਿਪਿ ਉਪੇਕ੍ਖਾਵੇਦਨਾਯ ਵਿਨਾ ਅਪ੍ਪਨਂ ਨਪਾਪੁਣਾਤੀਤਿ ਵੁਤ੍ਤਂ ਉਪੇਕ੍ਖਾਪਞ੍ਚਮਜ੍ਝਾਨਿਕਾਤਿ. ਚਤ੍ਤਾਰੋਪਨਆਰੁਪ੍ਪਾਤਿ ਕਸਿਣੁਗ੍ਘਾਟਿਮਾਕਾਸਾਦੀਨਿ ਚਤ੍ਤਾਰਿ ਆਰੁਪ੍ਪਾਰਮ੍ਮਣਾਨਿ. ਸਬ੍ਬਤ੍ਥਾਪੀਤਿ ਸਬ੍ਬੇਸੁਪਿ ਚਤ੍ਤਾਲੀਸਕਮ੍ਮਟ੍ਠਾਨੇਸੁ. ਯਥਾਰਹਨ੍ਤਿ ਤਂਤਂਆਰਮ੍ਮਣਾਨੁਰੂਪਂ. ਆਰਮ੍ਮਣੇਨ ਵਿਨਾ ਪਰਿਕਮ੍ਮਂਨਾਮ ਨ ਸਿਜ੍ਝਤਿ. ਆਰਮ੍ਮਣਸ੍ਸ ਸੁਟ੍ਠੁ ਦਲ਼੍ਹਵਿਭੂਤਗਹਣਸਙ੍ਖਾਤੇਨ ਉਗ੍ਗਹੇਨ ਵਿਨਾ ਆਰਮ੍ਮਣਸਮ੍ਪਤ੍ਤਿ ਨਾਮ ਨਤ੍ਥਿ. ਅਸਤਿਚ ਆਰਮ੍ਮਣਸਮ੍ਪਤ੍ਤਿਯਾ ਉਪਚਾਰਜ੍ਝਾਨਂਪਿ ਤਾਵ ਨ ਸਮ੍ਪਜ੍ਜਤਿ. ਪਗੇਵ ਅਪ੍ਪਨਾਝਾਨਨ੍ਤਿ ਵੁਤ੍ਤਂ ਪਰਿਕਮ੍ਮਨਿਮਿਤ੍ਤਂ.ਲ. ਲਬ੍ਭਨ੍ਤੇਵਾਤਿ. ਤਤ੍ਥ ਸਬ੍ਬਤ੍ਥਾਪੀਤਿ ਸਬ੍ਬੇਸੁਪਿ ਚਤ੍ਤਾਲੀਸਕਮ੍ਮਟ੍ਠਾਨੇਸੁ. ਯਥਾਰਹਨ੍ਤਿ ਤਂਤਂਕਮ੍ਮਟ੍ਠਾਨਾਨੁਰੂਪਂ. ਪਰਿਯਾਯੇਨਾਤਿ ਇਦਂ ਪਨ ਕਸ੍ਸਚਿ ਆਰਮ੍ਮਣਸ੍ਸ ਚਕ੍ਖੁਨਾ ਪਸ੍ਸਨ੍ਤਸ੍ਸੇਵ ਅਵਿਭੂਤਤਰਤ੍ਤਾ ਵੁਤ੍ਤਂ. ਯਤ੍ਥ ਪਨ ਪਥਮਂ ਸਭਾਵਧਮ੍ਮਂ ਗਣ੍ਹਿਤ੍ਵਾ ਪਚ੍ਛਾ ਤਾਦਿਸੇ ਤਦਾਕਾਰੇ ਤਂਸਣ੍ਠਾਨੇ ਪਞ੍ਞਤ੍ਤਾਰਮ੍ਮਣੇ ਉਪਚਾਰੋਵਾ ਅਪ੍ਪਨਾਵਾ ਪਵਤ੍ਤਤਿ. ਤਤ੍ਥੇਵ ਪਟਿਭਾਗਨਿਮਿਤ੍ਤਂਨਾਮ ਲਬ੍ਭਤੀਤਿ ਵੁਤ੍ਤਂ ਪਟਿਭਾਗ ਨਿਮਿਤ੍ਤਂਪਨਾਤਿਆਦਿ. ਵੁਤ੍ਤਮੇਵਤ੍ਥਂ ਦਲ਼੍ਹਂ ਕਰੋਨ੍ਤੋ ਤਤ੍ਥਹੀਤਿਆਦਿਮਾਹ. ਏਵਂ ਸਮਥਕਮ੍ਮੇ ਪਥਮਂ ਉਗ੍ਗਹਕੋਸਲ੍ਲਂ ਦਸ੍ਸੇਤ੍ਵਾ ਇਦਾਨਿ ਆਦਿਤੋ ਪਟ੍ਠਾਯ ਭਾਵਨਾਵਿਧਾਨਂ ਦਸ੍ਸੇਨ੍ਤੋ ਕਥਨ੍ਤਿਆਦਿ ਮਾਹ. ਨਿਮਿਤ੍ਤਂ ਉਗ੍ਗਣ੍ਹਨ੍ਤਸ੍ਸਾਤਿ ਆਰਮ੍ਮਣਸ੍ਸ ਯਥਾ ਸਣ੍ਠਿਤਂ ਆਕਾਰਂ ਚਿਤ੍ਤੇ ਉਪਰੁਪਰਿ ਵਿਭੂਤਂ ਕਤ੍ਵਾ ਗਣ੍ਹਨ੍ਤਸ੍ਸ ਸਮਨੁਪਸ੍ਸਨ੍ਤਸ੍ਸ. ਸਾਚਭਾਵਨਾਤਿ ਉਗ੍ਗਹਣਾਕਾਰੇਨ ਪਵਤ੍ਤ ਜਵਨਵੀਥਿਪਰਂਪਰਸਙ੍ਖਾਤਾ ਸਾ ਚਿਤ੍ਤਭਾਵਨਾ ਪਰਿਕਮ੍ਮਭਾਵਨਾ ਨਾਮ. ਪੁਨਪ੍ਪੁਨਂ ਕਰਣਵਸੇਨ ਵਡ੍ਢਨਾਕਾਰਸਣ੍ਠਿਤਤ੍ਤਾ. ਸਮੁਗ੍ਗਹਿਤਂ ਹੋਤੀਤਿ ਵਤ੍ਵਾ ਯਥਾ ਸੁਟ੍ਠੁ ਉਗ੍ਗਹਿਤਂ ਸਮੁਗ੍ਗਹਿਤਂਨਾਮ ਹੋਤਿ ਤਂ ਦਸ੍ਸੇਤੁਂ ਚਕ੍ਖੁਨਾਪਸ੍ਸਨ੍ਤਸ੍ਸੇਵਮਨੋਦ੍ਵਾਰਸ੍ਸ ਆਪਾਤਮਾਗਤਨ੍ਤਿ ਵੁਤ੍ਤਂ. ਤਤ੍ਥ ਮਨੋਦ੍ਵਾਰਸ੍ਸਆਪਾਤਮਾਗਤਨ੍ਤਿ ਚਕ੍ਖੂਨਿ ਨਿਮ੍ਮਿਲਿਤ੍ਵਾਵਾ ਅਞ੍ਞਸ੍ਮਿਂ ਠਾਨੇ ਠਤ੍ਵਾਵਾ ਆਵਜ੍ਜਨ੍ਤਸ੍ਸ ਚਕ੍ਖੁਨਾ ਦਿਟ੍ਠਸਦਿਸਂ ਮਨੋਦ੍ਵਾਰੇ ਪਚ੍ਚੁਪਟ੍ਠਿਤਂ ਹੋਤਿ. ਉਗ੍ਗਹਨਿਮਿਤ੍ਤਂਨਾਮ. ਸੁਟ੍ਠੁ ਅਵਿਨਸ੍ਸਮਾਨਂ ਕਤ੍ਵਾ ਗਹਿਤਤ੍ਤਾ. ਸਾਚ ਭਾਵਨਾ ਸਮਾਧਿਯਤਿ. ਨ ਤਾਵ ਭਾਵਨਨ੍ਤਰਭਾਵਂ ਪਾਪੁਣਾਤੀਤਿ ਅਧਿਪ੍ਪਾਯੋ. ਤਥਾ ਸਮਾਹਿਤਸ੍ਸਾਤਿ ਤੇਨ ਮਤ੍ਥਕਪਤ੍ਤੇਨ ਪਰਿਕਮ੍ਮਸਮਾਧਿਨਾ ਸਮਾਹਿਤਸ੍ਸ ਏਤਸ੍ਸ ਯੋਗਿਨੋ. ਤਤੋਪਰਨ੍ਤਿ ਉਗ੍ਗਹਨਿਮਿਤ੍ਤੁਪ੍ਪਤ੍ਤਿ ਤੋ ਪਰਂ. ਭਾਵਨਮਨੁਯੁਞ੍ਜਨ੍ਤਸ੍ਸ ਚਿਤ੍ਤੇ ਸਨ੍ਨਿਸਿਨ੍ਨਨ੍ਤਿ ਸਮ੍ਬਨ੍ਧੋ. ਤਤ੍ਥ ਅਨੁਯੁਞ੍ਜਨ੍ਥਸ੍ਸਾਤਿ ਨਿਰਨ੍ਤਰਂ ਪਦਹਨ੍ਤਸ੍ਸ. ਤਪ੍ਪਟਿਭਾਗਨ੍ਤਿ ਸਭਾਵ ਧਮ੍ਮਭੂਤੇਨ ਤੇਨ ਉਗ੍ਗਹਨਿਮਿਤ੍ਤੇਨ ਸਦਿਸਂ. ਵਤ੍ਥੁਧਮ੍ਮਵਿਮੁਚ੍ਚਿਤਨ੍ਤਿ ਮੇਘਵਲਾਹਕਨ੍ਤਰਤੋਵਾ ਰਾਹੁਮੁਖਤੋਵਾ ਨਿਕ੍ਖਨ੍ਤਚਨ੍ਦਮਣ੍ਡਲਂ ਵਿਯ ਸਭਾਵਧਮ੍ਮਭੂਤਾ ਉਗ੍ਗਹਨਿਮਿਤ੍ਤਤੋ ਵਿਮੁਚ੍ਚਿਤ੍ਵਾ ਵਿਸੁਂ ਉਪਟ੍ਠਿਤਂ. ਤਤੋਯੇਵ ਪਞ੍ਞਤ੍ਤਿਸਙ੍ਖਾਤਂ ਨਿਮਿਤ੍ਤਪਞ੍ਞਤ੍ਤਿਇਤਿ ਕਥਿਤਂ. ਭਾਵਨਾ ਮਯਨ੍ਤਿ ਕੇਵਲਂ ਭਾਵਨਾਚਿਤ੍ਤਬਲੇਨ ਪਸਿਦ੍ਧਂ. ਆਲਮ੍ਬਣਨ੍ਤਿ ਤਦੇਵ ਸਮੁਗ੍ਗਹਿਤਂ ਨਿਮਿਤ੍ਤਾਲਮ੍ਬਣਂ ਚਿਤ੍ਤੇਸਨ੍ਨਿਸਨ੍ਨਂਸਮਪ੍ਪਿਤਂਹੋਤੀਤਿ ਮਨੋਦ੍ਵਾਰਿਕਚਿਤ੍ਤਸਨ੍ਤਾਨੇ ਸਨ੍ਨਿਸਿਨ੍ਨਂ ਨਿਚ੍ਚਲਭਾਵੇਨ ਸਣ੍ਠਿਤਂ ਹੁਤ੍ਵਾ ਸੁਟ੍ਠੁ ਅਪ੍ਪਿਤਂ ਪਵੇਸਿਤਂ ਹੋਤਿ. ਤਨ੍ਤਿ ਨਿਮਿਤ੍ਤਾਲਮ੍ਬਣਂ ਪਵੁਚ੍ਚਤੀਤਿ ਸਮ੍ਬਨ੍ਧੋ. ਯਸ੍ਮਾ ਚਨ੍ਦਮਣ੍ਡਲਾਦਿਕਸ੍ਸ ਵਿਯ ਤਸ੍ਸ ਨਿਮਿਤ੍ਤਾਲਮ੍ਬਣਸ੍ਸ ਪਰਿਸੁਦ੍ਧਪਰਿਯੋਦਾਤਭਾਵੇਨ ਉਪਟ੍ਠਿਤਤਾਨਾਮ ਕਿਲੇਸਮਲਵਿਕ੍ਖਮ੍ਭਨੇਨ ਪਰਿਸੁਦ੍ਧਪਰਿਯੋਦਾਤਭਾਵਂ ਪਤ੍ਵਾ ਓਭਾਸਜਾਤਸ੍ਸ ਚਿਤ੍ਤਸ੍ਸ ਵਸੇਨੇਵ ਹੋਤਿ. ਨ ਤਸ੍ਸ ਆਲਮ੍ਬਣਸ੍ਸ ਵਸੇਨ. ਨਹਿ ਪਞ੍ਞਤ੍ਤਿ ਧਮ੍ਮੇ ਤਾਦਿਸੋ ਗੁਣੋਨਾਮ ਉਪਲਬ੍ਭਤੀਤਿ. ਤਸ੍ਮਾ ਪਟਿਭਾਗ ਨਿਮਿਤ੍ਤੇ ਸਮੁਪ੍ਪਨ੍ਨੇ ਨੀਵਰਣਸਙ੍ਖਾਤਾਨਂ ਪਟਿਬਨ੍ਧਕਧਮ੍ਮਾਨਂ ਵਿਕ੍ਖਮ੍ਭਿਤਤਾ ਸਿਦ੍ਧਾ ਹੋਤੀਤਿ ਵੁਤ੍ਤਂ ਤਤੋਪਟ੍ਠਾਯਾਤਿਆਦਿ. ਪਟਿਬਨ੍ਧਨ੍ਤਿ ਨੀਵਾਰੇਨ੍ਤਿ ਨਿਸ੍ਸਰਣਪਕ੍ਖਿਕਂ ਚਿਤ੍ਤਂ ਪਾਤੇਨ੍ਤੀਤਿ ਪਟਿਬਨ੍ਧਾ. ਨੀਵਰਣ ਧਮ੍ਮਾ. ਵਿਸੇਸੇਨ ਪਹੀਨਾ ਪਟਿਬਨ੍ਧਾ ਏਤਾਯਾਤਿ ਪਟਿਬਨ੍ਧਵਿਪ੍ਪਹੀਨਾ. ਸਮਾਸੇਵਨ੍ਤਸ੍ਸਾਤਿ ਸੁਟ੍ਠੁ ਆਸੇਵਨ੍ਤਸ੍ਸ. ਸਤ੍ਤਵਿਧਂ ਨਿਮਿਤ੍ਤ ਰਕ੍ਖਣਵਿਧਾਨਂ ਸਮ੍ਪਾਦੇਤ੍ਵਾ ਚਕ੍ਕਵਤ੍ਤਿਗਬ੍ਭਂ ਵਿਯ ਸੁਟ੍ਠੁ ਰਕ੍ਖਿਤ੍ਵਾ ਪੁਨਪ੍ਪੁਨਂ ਭਾਵਨਾਵਸੇਨ ਸੇਵਨ੍ਤਸ੍ਸਾਤਿ ਅਤ੍ਥੋ.
ਆਵਾਸੋ ਗੋਚਰੋ ਭਸ੍ਸਂ, ਪੁਗ੍ਗਲੋ ਭੋਜਨਂ ਉਤੁ;
ਇਰਿਯਾਪਥੋਤਿ ਸਤ੍ਤੇ ਤੇ, ਅਸਪ੍ਪਾਯੇ ਵਿਵਜ੍ਜਯੇ.
ਸਪ੍ਪਾਯੇ ਸਤ੍ਤ ਸੇਵੇਥ, ਏਵਞ੍ਹਿ ਪਟਿਪਜ੍ਜਤੋ;
ਨਚਿਰੇਨੇਵ ਕਾਲੇਨ, ਹੋਤਿ ਕਸ੍ਸਚਿ ਅਪ੍ਪਨਾਤਿ ਹਿ ਵੁਤ੍ਤਂ.
ਰੂਪਾਵਚਰਪਥਮਜ੍ਝਾਨਂਅਪ੍ਪੇਤੀਤਿ ਕਾਮਤਣ੍ਹਾਯ ਵਿਸਯਭਾਵਂ ਅਤਿਕ੍ਕਮਿਤ੍ਵਾ ਸਾਤਿਸਯਂ ਸਣ੍ਹਸੁਖੁਮਭਾਵਪ੍ਪਤ੍ਤਂ ਉਪਚਾਰਜ੍ਝਾਨਤੋ ਸਤਗੁਣੇਨਵਾ ਸਹਸ੍ਸਗੁਣੇਨਵਾ ਥਿਰਤਰਜ੍ਝਾਨਙ੍ਗਯੁਤ੍ਤਂ ਰੂਪਾਵਚਰ ਸਙ੍ਖਾਤਂ ਪਥਮਜ੍ਝਾਨਂ ਤਸ੍ਮਿਂ ਨਿਮਿਤ੍ਤੇ ਅਨੁਪਵਿਸਿਤ੍ਵਾ ਵਿਯ ਵਤ੍ਤਤੀਤਿ ਅਤ੍ਥੋ. ਤਮੇਵ ਪਥਮਜ੍ਝਾਨਂ ਵਸੀਭੂਤਂ ਕਤ੍ਵਾਤਿ ਸਮ੍ਬਨ੍ਧੋ. ਪਞ੍ਚਸੁ ਵਸੀਤਾਸੁ ਪਨ ਪਥਮਜ੍ਝਾਨਤੋ ਵੁਟ੍ਠਾਯ ਪਥਮਂ ਵਿਤਕ੍ਕਂ ਆਵਜ੍ਜਤਿ. ਤਤੋ ਵਿਚਾਰਂ. ਤਤੋ ਪੀਤਿਂ. ਤਤੋ ਸੁਖਂ. ਤਤੋ ਸਮਾਧਿਂ. ਤਤੋ ਪੁਨ ਵਿਤਕ੍ਕਂ. ਤਤੋ ਵਿਚਾਰਨ੍ਤਿ ਏਵਂ ਪੁਨਪ੍ਪੁਨਂ ਝਾਨਙ੍ਗਾਨਿ ਆਵਜ੍ਜਨ੍ਤਸ੍ਸ ਯਦਾ ਤਂਤਂਝਾਨਙ੍ਗਾਲਮ੍ਬਣਾ ਚਿਤ੍ਤਵਾਰਾ ਅਨ੍ਤਰਨ੍ਤਰਾ ਕਤਿਪਯਭਵਙ੍ਗੇਹਿ ਅਨ੍ਤਰਿਤਾ ਹੁਤ੍ਵਾ ਨਿਰਨ੍ਤਰਭੂਤਾ ਵਿਯ ਪਵਤ੍ਤਨ੍ਤਿ. ਤਦਾ ਆਵਜ੍ਜਨ ਪਚ੍ਚਵੇਕ੍ਖਨ ਵਸਿਤਾਯੋ ਵਸੀਭੂਤਾਨਾਮ ਹੋਨ੍ਤਿ. ਏਤਾ ਪਨ ਸਬ੍ਬਞ੍ਞੁਬੁਦ੍ਧਾਨਂ ਮਤ੍ਥਕਪ੍ਪਤ੍ਤਾ ਹੋਨ੍ਤਿ. ਤੇਸਞ੍ਹਿ ਯਮਕਪਾਟਿ ਹਾਰਿਯਾਦਿਕਾਲੇਸੁ ਲਹੁਕਪਵਤ੍ਤਿਂ ਇਚ੍ਛਨ੍ਤਾਨਂ ਤਂਤਂਝਾਨਙ੍ਗਾ ਰਮ੍ਮਣਾਚਿਤ੍ਤਵਾਰਾਪਿ ਚਤੁਪਞ੍ਚਜਵਨਿਕਾਏਵ ਪਵਤ੍ਤਨ੍ਤਿ. ਅਨ੍ਤਰਭਵਙ੍ਗਾਨਿਪਿ ਪਚ੍ਛਿਮਵਾਰਸ੍ਸ ਉਪਚਾਰ ਭੂਤਾਨਿ ਭਵਙ੍ਗ ਚਲਨ ਸਙ੍ਖਾਤਾਨਿ ਦ੍ਵੇਏਵ ਪਵਤ੍ਤਨ੍ਤਿ. ਯਤ੍ਥ ਅਪਰਂ ਝਾਨਙ੍ਗਂ ਆਪਾਤ ਮਾਗਚ੍ਛਤਿ. ਨਹਿ ਆਰਮ੍ਮਣੇ ਆਪਾਤਂ ਅਨਾਗਤੇ ਭਵਙ੍ਗਂ ਚਲਤਿ. ਨਚ ਵਿਨਾ ਭਵਙ੍ਗਚਲਨੇਨ ਆਵਜ੍ਜਨੁਪ੍ਪਤ੍ਤਿਨਾਮ ਅਤ੍ਥੀਤਿ. ਥਪੇਤ੍ਵਾ ਸਬ੍ਬਞ੍ਞੁਬੁਦ੍ਧੇ ਅਞ੍ਞੇਸਂ ਵਸਿਭਾਵਪਤ੍ਤਾਨਂਪਿ ਅਨ੍ਤਰਨ੍ਤਰਾ ਭਵਙ੍ਗਚਾਰੇ ਗਣਨਾਨਾਮ ਨਤ੍ਥੀਤਿ ਪਟਿਸਮ੍ਭਿਦਾਮਗ੍ਗਟ੍ਠਕਥਾਯਂ ਵੁਤ੍ਤਂ. ਵਿਸੁਦ੍ਧਿਮਗ੍ਗੇ ਪਨ ਅਯਂ ਪਨ ਮਤ੍ਥਕਪ੍ਪਤ੍ਤਾਵਸੀ ਭਗਵਤੋ ਯਮਕਪਾਟਿਹਾਰਿਯਕਾਲੇ ਲਬ੍ਭਤਿ. ਅਞ੍ਞੇਸਂਵਾ ਏਵਰੂਪੇ ਕਾਲੇਤਿ ਵੁਤ੍ਤਂ. ਝਾਨਸ੍ਸ ਸੀਘਤਰਂ ਸਮਾਪਜ੍ਜਨਸਮਤ੍ਥਤਾ ਸਮਾਪਜ੍ਜਨਵਸੀਨਾਮ. ਤੇਨੇਵ ਹਿ ਪਾਲ਼ਿਯਂ ਸਮਾਪਜ੍ਜਨੇ ਦਨ੍ਧਾਯਿਤਤ੍ਤਂ ਨਤ੍ਥੀਤਿ ਵੁਤ੍ਤਂ. ਏਸਨਯੋ ਸੇਸਾਸੁਪੀਤਿ. ਤਥਾ ਸਮਾਪਜ੍ਜਿਤਂ ਝਾਨਂ ਅਚ੍ਛਰਾਮਤ੍ਤਾਦਿਵਸੇਨ ਅਤਿਪਰਿਤ੍ਤਕਂਪਿ ਖਣਂ ਥਪੇਤੁਂ ਸਮਤ੍ਥਤਾ ਅਧਿਟ੍ਠਾਨਵਸੀਨਾਮ. ਸਮਾਪਜ੍ਜਿਤਜ੍ਝਾਨਤੋ ਸੀਘਤਰਂ ਵੁਟ੍ਠਾਤੁਂ ਸਮਤ੍ਥਤਾ ਵੁਟ੍ਠਾਨਵਸੀਨਾਮ. ਪਚ੍ਚਵੇਕ੍ਖਨਵਸੀ ਪਨ ਆਵਜ੍ਜਨਵਸਿਯਾ ਸਿਦ੍ਧਾਯ ਸਿਦ੍ਧਾਏਵ ਹੋਤੀਤਿ.
ਵਿਭਾਵਨਿਯਂ ਪਨ
ਯਤ੍ਤਕਂ ਕਾਲਂ ਇਚ੍ਛਤਿ. ਤਤ੍ਤਕਂ ਚਿਰਤਰਂ ਝਾਨਂ ਥਪੇਤੁਂ ਸਮਤ੍ਥਤਾ ਅਧਿਟ੍ਠਾਨਵਸਿਤਾਨਾਮਾਤਿਪਿ ਵੁਤ੍ਤਂ. ਤਥਾ ਪਰਿਚ੍ਛਿਨ੍ਨ ਕਾਲਤੋ ਅਨ੍ਤੋ ਅਵੁਟ੍ਠਹਿਤ੍ਵਾ ਯਥਾਪਰਿਚ੍ਛਿਨ੍ਨਕਾਲਵਸੇਨੇਵ ਵੁਟ੍ਠਾਨਸਮਤ੍ਥਤਾ ਵੁਟ੍ਠਾਨਵਸਿਤਾਨਾਮਾਤਿ. ਤਂਪਿ ਯੁਜ੍ਜਤਿਯੇਵ.
ਪਾਲ਼ਿਯਞ੍ਹਿ ਪਥਮਜ੍ਝਾਨਂ ਯਤ੍ਥਿਚ੍ਛਕਂ ਯਦਿਚ੍ਛਕਂ ਯਾਵਤਿਚ੍ਛਕਂ ਅਧਿਟ੍ਠਾਤਿ. ਅਧਿਟ੍ਠਾਨਾਯ ਦਨ੍ਧਾਯਿਤਤ੍ਤਂ ਨਤ੍ਥੀਤਿਆਦਿਨਾ ਸੀਘਤਰਂਵਾ ਹੋਤੁ. ਚਿਰਤਰਂਵਾ. ਯਤ੍ਤਕਂ ਕਾਲਂ ਝਾਨਂ ਥਪੇਤੁਂਵਾ ਯਤ੍ਤਕੇ ਕਾਲੇ ਤਤੋ ਉਟ੍ਠਾਤੁਂਵਾ ਇਚ੍ਛਤਿ. ਤਤ੍ਤਕਂ ਕਾਲਂ ਅਨੂਨਂਵਾ ਅਨਧਿਕਂਵਾ ਕਤ੍ਵਾ ਅਧਿਟ੍ਠਾਤੁਂਵਾ ਵੁਟ੍ਠਾਤੁਂਵਾ ਸਮਤ੍ਥਤਾਪਿ ਦਸ੍ਸਿਤਾਯੇਵ ਹੋਤੀਤਿ. ਏਵਞ੍ਚਸਤਿ ਵੁਟ੍ਠਾਨਵਸਿਤਾਪਿ ਅਧਿਟ੍ਠਾਨਵਸਿਤਾਯ ਸਿਦ੍ਧਾਯ ਸਿਦ੍ਧਾਏਵਾਤਿ ਤਾਸਂ ਦ੍ਵਿਨ੍ਨਂ ਵਿਸੇਸਕਪ੍ਪਨਾਪਿ ਨਿਪ੍ਪਯੋਜਨਾ ਹੋਤੀਤਿ ਦਟ੍ਠਬ੍ਬਾ. ਵਸਨਂ ਵਸੀ. ਸਮਤ੍ਥਤਾਤਿ ਅਤ੍ਥੋ. ਇਸ੍ਸਰ ਭਾਵੋਤਿ ਵੁਤ੍ਤਂ ਹੋਤਿ. ਵਸੀਏਵ ਵਸਿਤਾ. ਯਥਾ ਦੇਵੋਏਵ ਦੇਵਤਾਤਿ. ਕਤ੍ਵਾ ਪਦਹਤੋਤਿ ਸਮ੍ਬਨ੍ਧੋ. ਵਿਤਕ੍ਕਾਦਿਕਂ ਓਲ਼ਾਰਿਕਙ੍ਗਂ ਪਹਾਨਾਯਾਤਿ ਏਤ੍ਥ ਪਥਮਜ੍ਝਾਨਂ ਤਾਵ ਵਸੀਭੂਤਂ ਕਤ੍ਵਾ ਠਿਤਸ੍ਸ ਵਿਤਕ੍ਕੋ ਓਲ਼ਾਰਿਕਤੋ ਉਪਟ੍ਠਾਤਿ. ਤਦਾ ਅਹੋਵਤਮੇ ਅਵਿਤਕ੍ਕਂ ਝਾਨਂ ਅਸ੍ਸਾਤਿ ਏਵਮਸ੍ਸ ਅਜ੍ਝਾਸਯੋ ਸਣ੍ਠਾਤਿ. ਤਦਾ ਅਵਿਤਕ੍ਕਂ ਝਾਨਂ ਸਮਾਪਜ੍ਜਿਸ੍ਸਾਮੀਤਿ ਪੁਨ ਤਸ੍ਮਿਂ ਪਟਿਭਾਗਨਿਮਿਤ੍ਤੇ ਪਰਿਕਮ੍ਮਂ ਕਰੋਨ੍ਤਸ੍ਸ ਸਾ ਭਾਵਨਾ ਵਿਤਕ੍ਕਵਿਰਾਗਭਾਵਨਾਨਾਮ ਹੋਤਿ. ਸਾਪਿ ਯਾਵ ਵਿਤਕ੍ਕੇ ਨਿਕਨ੍ਤਿ ਨ ਪਰਿਯਾਦਿਯਤਿ, ਤਾਵ ਪਰਿਕਮ੍ਮਭਾਵਨਾਨਾਮ. ਪਰਿਯਾਦਿਨ੍ਨਾਯ ਪਨ ਵਿਤਕ੍ਕਨਿਕਨ੍ਤਿਯਾ ਉਪਚਾਰ ਭਾਵਨਾਨਾਮ ਹੋਤਿ. ਏਸਨਯੋ ਸੇਸਜ੍ਝਾਨੁਪਚਾਰੇਸੁਪਿ. ਏਵਂ ਤਂਤਂਝਾਨਙ੍ਗਵਿਰਾਗਭਾਵਨਾਬਲੇਨ ਵਿਤਕ੍ਕਾਦਿਕਸ੍ਸ ਓਲ਼ਾਰਿਕਸ੍ਸ ਤਸ੍ਸ ਤਸ੍ਸ ਝਾਨਙ੍ਗਸ੍ਸ ਪਜਹਨਤ੍ਥਾਯ. ਵਿਚਾਰਾਦਿਸੁਖੁਮਙ੍ਗੁਪ੍ਪਤ੍ਤਿਯਾਤਿ ਵਿਚਾਰਾਦੀਨਂ ਸੁਖੁਮਾਨਂ ਚਤੁਨ੍ਨਂ ਤਿਣ੍ਣਂ ਦ੍ਵਿਨ੍ਨਂ ਪੁਨ ਦ੍ਵਿਨ੍ਨਂਵਾ ਝਾਨਙ੍ਗਾਨਂ ਤੇਨ ਤੇਨ ਵਿਤਕ੍ਕਾਦਿਨਾ ਓਲ਼ਾਰਿਕੇਨ ਅਙ੍ਗੇਨ ਵਿਨਾ ਪੁਨ ਉਪ੍ਪਤ੍ਤਿਯਾ. ਪਾਹਤੋਤਿ ਪਦਹਨ੍ਤਸ੍ਸ. ਪਧਾਨਨਾਮਕਂ ਆਤਾਪਵੀਰਿਯਂ ਕਰੋਨ੍ਤਸ੍ਸਾਤਿ ਅਤ੍ਥੋ. ਦੁਤੀਯਜ੍ਝਾਨਾਦਯੋਤਿ ਦੁਤੀਯਜ੍ਝਾਨਾਦੀਨਿ ਸੇਸਰੂਪਾਵਚਰਜ੍ਝਾਨਾਨਿ. ਯਥਾਰਹਨ੍ਤਿ ਇਦਂ ਦ੍ਵਾਵੀਸਕਮ੍ਮਟ੍ਠਾਨੇਸੁ ਦੁਤੀਯਜ੍ਝਾਨਾਦੀਨਂ ਅਨੁਰੂਪਾਨਿ ਕਸਿਣਆਨਾਪਾਣਾਨਿ ਸਨ੍ਧਾਯ ਵੁਤ੍ਤਂ. ਅਵਸੇਸੇਸੁ ਪਨ ਅਟ੍ਠਾਰਸਕਮ੍ਮਟ੍ਠਾਨੇਸੁ ਯਸ੍ਮਾ ਅਰੂਪਜ੍ਝਾਨਾਨਿ ਨਾਮ ਆਰਮ੍ਮਣਾਤਿਕ੍ਕਮਨਵਸੇਨੇਵ ਪਵਤ੍ਤਨ੍ਤਿ. ਤਦਤਿਕ੍ਕਮਨਤ੍ਥਞ੍ਚ ਕਸਿਣੁਗ੍ਘਾਟਨਂਨਾਮ ਹੋਤਿ. ਤਸ੍ਮਾ ਯੇਸੁ ਤਦੁਗ੍ਘਾਟਨਂ ਸਮ੍ਭਵਤਿ. ਤਾਨਿਯੇਵ ਕਸਿਣਾਨਿ ਦਸ੍ਸੇਤੁਂ ਆਕਾਸਵਜ੍ਜਿਤਕਸਿਣੇਸੂਤਿ ਵੁਤ੍ਤਂ. ਆਕਾਸਕਸਿਣਞ੍ਹਿ ਉਗ੍ਘਾਟੀਯਮਾਨਂਪਿ ਆਕਾਸ ਮੇਵ ਹੋਤੀਤਿ ਨਤ੍ਥਿ ਤਤ੍ਥ ਤਦਤਿਕ੍ਕਮਨਸਮ੍ਭਵੋਤਿ. ਉਗ੍ਘਾਟੇਤ੍ਵਾਤਿ ਯਥਾਦਿਟ੍ਠੇ ਕਸਿਣਨਿਮਿਤ੍ਤੇ ਕਸਿਣਨਿਮਿਤ੍ਤਸਞ੍ਞਂ ਅਕਤ੍ਵਾ ਤਤ੍ਥ ਆਕਾਸਂ ਅਨਨ੍ਤਂ ਆਕਾਸਂ ਅਨਨ੍ਤਨ੍ਤਿ ਆਕਾਸਸਞ੍ਞਂ ਪਵਤ੍ਤੇਨ੍ਤਸ੍ਸ ਚਿਤ੍ਤੇ ਤਂਕਸਿਣਨਿਮਿਤ੍ਤਂ ਅਨ੍ਤਰਧਾਯਤਿ. ਤਪ੍ਪਮਾਣਂ ਆਕਾਸਮੇਵ ਉਪਟ੍ਠਾਤਿ. ਏਵਂ ਕਸਿਣਸਞ੍ਞਾਵਿਧਮਨੇਨ ਆਕਾਸਸਞ੍ਞਾਪਵਤ੍ਤਨੇਨਚ ਯਂਕਿਞ੍ਚਿ ਕਸਿਣਂ ਉਗ੍ਘਾਟੇਤ੍ਵਾ ਵਿਯੋਜੇਤ੍ਵਾਤਿ ਅਤ੍ਥੋ. ਲਦ੍ਧਂ ਆਕਾਸਂ ਆਰਬ੍ਭਾਤਿ ਪਾਟ੍ਠਸੇਸੇਨ ਸਮ੍ਬਨ੍ਧੋ. ਏਸਨਯੋ ਪਥਮਾ ਰੁਪ੍ਪਵਿਞ੍ਞਾਣਨ੍ਤਿਆਦੀਸੁਪਿ. ਅਨਨ੍ਤਵਸੇਨਾਤਿ ਅਨਨ੍ਤਂ ਆਕਾਸਨ੍ਤਿ ਏਵਂ ਪਵਤ੍ਤਮਨਸਿਕਾਰਵਸੇਨ. ਸਨ੍ਤਮੇਤਂ ਪਣੀਤਮੇਤਨ੍ਤਿ ਪਰਿਕਮ੍ਮਂ ਕਰੋਨ੍ਤਸ੍ਸਾਤਿ ਏਤ੍ਥ ਤਥਾ ਸਮ੍ਭਾਵੇਤ੍ਵਾ ਪਰਿਕਮ੍ਮਂ ਕਰੋਨ੍ਤਸ੍ਸਪਿ ਆਰਮ੍ਮਣਸ੍ਸ ਸਮਤਿਕ੍ਕਨ੍ਤਤ੍ਤਾ ਉਪਰਿ ਝਾਨਂ ਹੋਤਿਯੇਵਾਤਿ ਵੁਤ੍ਤਂ ਚਤੁਤ੍ਥਾਰੁਪ੍ਪਮਪ੍ਪੇਤੀਤਿ. ਪਰਿਕਮ੍ਮਂਕਤ੍ਵਾਤਿ ਸੋ ਭਗਵਾ ਇਤਿਪਿ ਅਰਹਨ੍ਤਿਆਦਿਨਾ ਸਮਨੁਸ੍ਸਰਣਪਰਿਕਮ੍ਮਂ ਕਤ੍ਵਾ. ਤਸ੍ਮਿਨ੍ਤਿ ਤਸ੍ਮਿਂ ਬੁਦ੍ਧਗੁਣਾਦਿਕੇ ਆਲਮ੍ਬਣੇ. ਭੂਮਤ੍ਥੇ ਚੇਤਂ ਭੁਮ੍ਮਵਚਨਂ. ਨਿਮਿਤ੍ਤੇਤਿ ਤਸ੍ਸ ਆਰਮ੍ਮਣਸ੍ਸ ਆਕਾਰਸਙ੍ਖਾਤੇ ਨਿਮਿਤ੍ਤੇ. ਭਾਵਲਕ੍ਖਣੇ ਚੇਤਂ ਭੁਮ੍ਮਵਚਨਂ. ਸਾਧੁਕਮੁਗ੍ਗਹਿਤੇਤਿ ਆਰਮ੍ਮਣਸ੍ਸ ਵਿਭੂਤਤਰ ਵਸੇਨਵਾ ਚਿਤ੍ਤਸ੍ਸ ਤਸ੍ਮਿਂ ਨਿਨ੍ਨਪੋਣਪਬ੍ਭਾਰਵਸੇਨਵਾ ਸੁਟ੍ਠੁ ਉਗ੍ਗਹਿਤੇ. ਉਪਚਾਰੋਚ ਸਮ੍ਪਜ੍ਜਤਿ ਅਰਿਯਸਾਵਕਾਨਂ ਦਿਟ੍ਠਸਚ੍ਚਾਨਨ੍ਤਿ ਅਧਿਪ੍ਪਾਯੋ. ਇਤਰੇਸਂਪਿ ਵਾ ਮਰਣਸਞ੍ਞਾਵਵਤ੍ਥਾਨੇਸੂਤਿ. ਏਤ੍ਥਚ ਨੀਵਰਣਵਿਕ੍ਖਮ੍ਭਨੇਨ ਝਾਨਙ੍ਗਪਾਤੁਭਾਵੇਨਚਉਪਚਾਰਸਮ੍ਪਦਾ ਵੇਦਿਤਬ੍ਬਾ. ਏਵਂ ਚਤ੍ਤਾਲੀਸਕਮ੍ਮਟ੍ਠਾਨੇਸੁਯਥਾਰਹਂਸਮਥਜ੍ਝਾਨਾਨਂ ਪਵਤ੍ਤਿਂ ਦਸ੍ਸੇਤ੍ਵਾਇਦਾਨਿਤੇਸੁਸਮਥਜ੍ਝਾਨੇਸੁਕਸਿਣਜ੍ਝਾਨਾਨਂ ਨਿਸਨ੍ਦਭੂਤਂਅਭਿਞ੍ਞਾ ਪਵਤ੍ਤਿਂ ਦਸ੍ਸੇਤੁਂ ਅਭਿਞ੍ਞਾਵਸੇਨਪਵਤ੍ਤਮਾਨਨ੍ਤਿਆਦਿ ਵੁਤ੍ਤਂ. ਤਤ੍ਥ ਯੋ ਕਤਾਧਿਕਾਰੋ ਹੋਤਿ. ਆਸਨ੍ਨਭਵੇ ਸਮਥਜ੍ਝਾਨੇਸੁ ਕਤਾਭਿਯੋਗੋਵਾ ਹੋਤਿ, ਪੂਰਿਤਬੋਧਿਸਮ੍ਭਾਰੋ ਮਹਾਪੁਰਿਸ ਜਾਤਿਕੋਵਾ. ਤਸ੍ਸ ਅਟ੍ਠਵਿਧੇਸੁ ਨਵਵਿਧੇਸੁਵਾ ਸਮਥਜ੍ਝਾਨੇਸੁਸਿਜ੍ਝ ਮਾਨੇਸੁ ਅਭਿਞ੍ਞਾਪਿ ਸਿਜ੍ਝਤਿਯੇਵ. ਰੂਪਜ੍ਝਾਨਮਤ੍ਤੇਸੁਪਿ ਸਿਜ੍ਝਨ੍ਤੇਸੁ ਸਿਜ੍ਝਤਿ ਯੇਵਾਤਿਪਿ ਵਦਨ੍ਤਿ. ਤੇਨੇਵ ਹਿ ਅਟ੍ਠਸਾਲਿਨਿਯਂ ਵਿਸੁਦ੍ਧਿਮਗ੍ਗੇਚ ਆਰੁਪ੍ਪਜ੍ਝਾਨਾਨਂਪਚ੍ਚਯਭਾਵਂਅਨੁਪਗਤਸ੍ਸਪਿਆਕਾਸਕਸਿਣਜ੍ਝਾਨਸ੍ਸ ਅਭਿਞ੍ਞਾਪਾਦਕਤਾਸਮ੍ਭਵੋ ਵੁਤ੍ਤੋਤਿ. ਦੀਘਨਿਕਾਯਟ੍ਠਕਥਾਯਂ ਪਨ ਨਹਿ ਅਟ੍ਠਸੁ ਸਮਾਪਤ੍ਤੀਸੁ ਚੁਦ੍ਦਸਹਾਕਾਰੇਹਿ ਚਿਣ੍ਣਵਸੀਭਾਵਂ ਵਿਨਾ ਉਪਰਿ ਅਭਿਞ੍ਞਾਧਿਗਮੋ ਹੋਤੀਤਿ ਵੁਤ੍ਤਂ. ਤਂ ਪਨ ਥਪੇਤ੍ਵਾ ਪੁਰਿਸ ਵਿਸੇਸੇ ਅਵਸੇਸਾਨਂ ਬਹੂਨਂ ਆਦਿਕਮ੍ਮਿਕਕੁਲਪੁਤ੍ਤਾਨਂ ਸਾਧਾਰਣਵਸੇਨ ਵੁਤ੍ਤਨ੍ਤਿ ਯੁਤ੍ਤਂ. ਤੇਨੇਵ ਹਿ ਵਿਸੁਦ੍ਧਿਮਗ੍ਗੇ ਇਮੇਹਿ ਪਨ ਚੁਦ੍ਦਸਹਿ ਆਕਾਰੇਹਿ ਚਿਤ੍ਤਂ ਅਪਰਿਦਮੇਤ੍ਵਾ ਪੁਬ੍ਬੇ ਅਭਾਵਿਤਭਾਵਨੋ ਆਦਿਕਮ੍ਮਿਕੋ ਯੋਗਾਵਚਰੋ ਇਦ੍ਧਿਵਿਕੁਬ੍ਬਨਂ ਸਮ੍ਪਾਦੇਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤੀਤਿ ਵੁਤ੍ਤਂ. ਤਸ੍ਮਾ ਤਾਦਿਸਾਨਂ ਅਟ੍ਠਸੁ ਸਮਾਪਤ੍ਤੀਸੁ ਚਿਣ੍ਣਵਸੀਭਾਵਾਨਂ ਅਭਿਞ੍ਞਾਕਮ੍ਮੇ ਆਦਿਕਮ੍ਮਿਕਕੁਲਪੁਤ੍ਤਾਨਂ ਕਸਿਣਾ ਨੁਲੋਮਤੋ ਕਸਿਣਪਟਿਲੋਮਤੋਤਿਆਦਿਨਾ ਨਯੇਨ ਵੁਤ੍ਤੇਹਿ ਚੁਦ੍ਦਸਹਿ ਆਕਾਰੇਹਿ ਅਤ੍ਤਨੋ ਰੂਪਪਞ੍ਚਮਜ੍ਝਾਨਚਿਤ੍ਤਂ ਪਰਿਦਮੇਤ੍ਵਾ ਤਿਕ੍ਖਂ ਸੂਰਂ ਅਭਿਨੀਹਾਰਕ੍ਖਮਂ ਕਤ੍ਵਾ ਇਦਾਨਿ ਇਦ੍ਧਿਵਿਕੁਬ੍ਬਨਂ ਕਰਿਸ੍ਸਾ ਮੀਤਿ ਆਰਭਨ੍ਤਾਨਂ ਅਭਿਞ੍ਞਾਵਸੇਨ ਪਵਤ੍ਤਮਾਨਂ ਪਨ ਰੂਪਾਵਚਰਪਞ੍ਚ ਮਜ੍ਝਾਨਂ ਰੂਪਾਦੀਸੁ ਛਸੁ ਆਲਮ੍ਬਣੇਸੁ ਯਥਾਰਹਂ ਅਪ੍ਪੇਤੀਤਿ ਯੋਜਨਾ ਵੇਦਿਤਬ੍ਬਾ. ਅਭਿਞ੍ਞਾਪਾਦਕਪਞ੍ਚਮਜ੍ਝਾਨਾ ਵੁਟ੍ਠਹਿਤ੍ਵਾਤਿ ਅਭਿਞ੍ਞਾਯ ਪਾਦਕਤ੍ਥਾਯ ਯਂਅਭਿਞ੍ਞਾਜਾਤਿਕਂ ਰੂਪਾਵਚਰਪਞ੍ਚਮਜ੍ਝਾਨਂ ਸਬ੍ਬਪਥਮਂ ਸਮਾਪਜ੍ਜਿਯਤਿ. ਤਤੋ ਭਵਙ੍ਗਪਵਤ੍ਤਿਵਸੇਨ ਵੁਟ੍ਠਹਿਤ੍ਵਾ. ਅਧਿਟ੍ਠਾਤਬ੍ਬਨ੍ਤਿ ਅਧਿਟ੍ਠੇਯ੍ਯਂ. ਸਵਤ੍ਥੁਕਂ ਸਤਰੂਪਸਹਸ੍ਸਰੂਪਾਦਿਕਂ ਨਿਮ੍ਮਿਤਰੂਪਂ. ਤਂ ਅਧਿਟ੍ਠੇਯ੍ਯਂ ਆਦਿ ਯਸ੍ਸ ਅਵਤ੍ਥੁਕਸ੍ਸ ਆਵਿਭਾਵਤਿਰੋਭਾਵਾਦਿਕਸ੍ਸ ਕਮ੍ਮਸ੍ਸਾਤਿ ਅਧਿਟ੍ਠੇਯ੍ਯਾਦਿਕਂ. ਆਵਜ੍ਜਿਤ੍ਵਾ ਪਰਿਕਮ੍ਮਂਕਰੋਨ੍ਤਸ੍ਸਾਤਿ ਏਤ੍ਥ ਇਦ੍ਧਿਵਿਧੇ ਤਾਵ ਯਂਯਂਸਤਾਦਿਕਂ ਨਿਮ੍ਮਿਤਰੂਪਂਵਾ ਆਵਿਭਾਵਾਦਿਕਂ ਨਿਮ੍ਮਿਤਕਮ੍ਮਂਵਾ ਨਿਪ੍ਫਾਦੇਤੁਂ ਇਚ੍ਛਤਿ. ਤਂ ਤਂ ਅਵਜ੍ਜਿਤ੍ਵਾ ਸਲ੍ਲਕ੍ਖੇਤ੍ਵਾ ਸਤਂ ਹੋਮਿ ਸਹਸ੍ਸਂ ਹੋਮੀਤਿਵਾ ਸਤਂ ਹੋਤੁ ਸਹਸ੍ਸਂ ਹੋਤੂਤਿਵਾ ਇਦਞ੍ਚਿਦਞ੍ਚ ਹੋਤੁ ਏਵਞ੍ਚੇਵਞ੍ਚ ਹੋਤੂਤਿਵਾ ਪਰਿਕਮ੍ਮਂ ਕਰੋਨ੍ਤਸ੍ਸ. ਦਿਬ੍ਬਸੋਤਾਦੀਸੁ ਪਨ ਯਂ ਯਂ ਆਰਮ੍ਮਣਂ ਸੋਤੁਂਵਾ ਪਸ੍ਸਿਤੁਂਵਾ ਜਾਨਿਤੁਂਵਾ ਅਨੁਸ੍ਸਰਿਤੁਂਵਾ ਇਚ੍ਛਤਿ. ਤਂ ਤਂ ਸਲ੍ਲਕ੍ਖੇਤ੍ਵਾ ਅਸੁਕਸ੍ਸ ਅਸੁਕਾਨਂਵਾ ਸਦ੍ਦਂ ਸੁਣੋਮੀਤਿਆਦਿਨਾ ਪਰਿਕਮ੍ਮਂ ਕਰੋਨ੍ਤਸ੍ਸ. ਅਟ੍ਠਕਥਾਯਂ ਪਨ ਪਰਿਕਮ੍ਮਂ ਕਤ੍ਵਾ ਪੁਨ ਪਾਦਕਜ੍ਝਾਨਸਮਾਪਜ੍ਜਨਂ ਆਗਤਮੇਵ. ਯਥਾਹ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਸਚੇ ਸਤਂ ਇਚ੍ਛਤਿ. ਸਤਂ ਹੋਮੀਤਿ ਪਰਿਕਮ੍ਮਂ ਕਤ੍ਵਾ ਪੁਨ ਅਭਿਞ੍ਞਾਪਾਦਕਂ ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਧਿਟ੍ਠਾਤਿ. ਅਧਿਟ੍ਠਾਨਚਿਤ੍ਤੇਨ ਸਹੇਵ ਸਤਂ ਹੋਤੀਤਿ. ਤਤ੍ਥਚ ਆਦਿਤੋ ਪਾਦਕਜ੍ਝਾਨਸਮਾਪਜ੍ਜਨਂ ਪਰਿਕਮ੍ਮ ਚਿਤ੍ਤਸ੍ਸ ਸਮਾਦਾਨਤ੍ਥਾਯ ਹੋਤਿ. ਪਚ੍ਛਿਮਂ ਪਨ ਅਭਿਞ੍ਞਾਯ ਅਨੁ ਬਲਪ੍ਪਦਾਨਤ੍ਥਾਯਾਤਿ. ਤਥਾ ਹਿ ਪਾਦਕਜ੍ਝਾਨਬਲੇਨ ਸੁਟ੍ਠੁ ਸਮਾਹਿਤਂ ਪਰਿਕਮ੍ਮਚਿਤ੍ਤਂਨਾਮ ਅਤ੍ਤਨੋ ਵਿਸਯੇ ਅਭਿਞ੍ਞਾਚਿਤ੍ਤਗਤਿਕਂ ਹੋਤਿ. ਪੁਬ੍ਬੇਨਿਵਾਸਾਨੁਸ੍ਸਰਣਕਾਲੇ ਤੇਨੇਵ ਚਿਤ੍ਤੇਨ ਤਸ੍ਮਿਂ ਭਵੇ ਅਤੀਤਂ ਧਮ੍ਮਜਾਤਂ ਯਾਵ ਪਟਿਸਨ੍ਧਿਯਾ ਜਾਨਾਤਿ. ਤੇਨੇਵ ਹਿ ਅਟ੍ਠਕਥਾਯਂ ਤਂਸਮ੍ਪਯੁਤ੍ਤਂ ਞਾਣਂ ਪਰਿਕਮ੍ਮਸਮਾਧਿਞਾਣਨ੍ਤਿ ਵੁਤ੍ਤਂ. ਅਤੀਤਂਸਞਾਣਨ੍ਤਿਪਿ ਵੁਚ੍ਚਤੀਤਿ. ਸੇਸਾਭਿਞ੍ਞਾਸੁਪਿ ਤਸ੍ਸ ਞਾਣਸ੍ਸ ਵਿਸਯਵਿਸੇਸੋ ਯਥਾਰਹਂ ਵਤ੍ਤਬ੍ਬੋਤਿ. ਥੇਰੇਨ ਪਨ ਪਚ੍ਛਿਮਂ ਪਾਦਕਜ੍ਝਾਨਸਮਾਪਜ੍ਜਨਂਨਾਮ ਨ ਸਬ੍ਬੇਸਂ ਹੋਤਿ. ਨ ਹਿ ਅਭਿਞ੍ਞਾਸੁ ਵਸੀਭਾਵਪਤ੍ਤਾਨਂ ਪੁਨ ਪਾਦਕਜ੍ਝਾਨੇਨ ਕਿਚ੍ਚਂ ਅਤ੍ਥੀਤਿ ਕਤ੍ਵਾ ਤਂ ਇਧ ਨਗਹਿਤਨ੍ਤਿ ਦਟ੍ਠਬ੍ਬਂ. ਰੂਪਾਦੀਸੁਆਲਮ੍ਬਣੇਸੁਯਥਾਰਹਮਪ੍ਪੇਤੀਤਿ ਏਤ੍ਥ ਇਦ੍ਧਿਵਿਧਞਾਣਂ ਤਾਵ ਤੇਕਾਲਿਕਭੂਤੇਸੁ ਛਸੁ ਆਰਮ੍ਮਣੇਸੁ ਪਵਤ੍ਤਤਿ. ਤਞ੍ਹਿ ਰੂਪਾਦੀਸੁ ਛਸੁ ਆਰਮ੍ਮਣਧਮ੍ਮੇਸੁ ਯਂ ਯਂ ਨਿਪ੍ਫਾਦੇਤਿ. ਤਂ ਤਂ ਆਰਮ੍ਮਣਂ ਕਤ੍ਵਾ ਪਵਤ੍ਤਤਿ. ਪਾਦਕਜ੍ਝਾਨਚਿਤ੍ਤਂ ਪਨ ਕਾਯਗਤਿਕਂ ਅਧਿਟ੍ਠਹਿਤ੍ਵਾ ਦਿਸ੍ਸਮਾਨੇਨਕਾਯੇਨ ਆਕਾਸੇਗਮਨਕਾਲੇ ਅਤੀਤਂ ਪਾਦਕਜ੍ਝਾਨਚਿਤ੍ਤਂ ਆਰਬ੍ਭ ਪਵਤ੍ਤਤਿ. ਕਾਯਂ ਚਿਤ੍ਤਗਤਿਕਂ ਅਧਿਟ੍ਠਹਿਤ੍ਵਾ ਅਦਿਸ੍ਸਮਾਨੇਨ ਕਾਯੇਨ ਗਮਨਕਾਲੇ ਪਚ੍ਚੁਪ੍ਪਨ੍ਨਂ ਰੂਪਕਾਯਂ ਆਰਬ੍ਭ ਪਵਤ੍ਤਤਿ. ਤਥਾਪਵਤ੍ਤਮਾਨਸ੍ਸ ਪਨ ਤਸ੍ਸ ਞਾਣਸ੍ਸ ਕਿਞ੍ਚਿਰੂਪਂ ਆਰਮ੍ਮਣ ਮਤ੍ਤਂ ਹੋਤਿ. ਕਿਞ੍ਚਿ ਆਰਮ੍ਮਣਪੁਰੇਜਾਤਂ. ਕਿਞ੍ਚਿ ਵਤ੍ਥਾਰਮ੍ਮਣ ਪੁਰੇਜਾਤਂ ਹੋਤੀਤਿ ਦਟ੍ਠਬ੍ਬਂ. ਅਨਾਗਤੇ ਇਦਂਨਾਮ ਹੋਤੂਤਿ ਅਧਿਟ੍ਠਾਨ ਕਾਲੇ ਅਨਾਗਤਂ ਤਂਤਂਰੂਪਧਮ੍ਮਂ ਆਰਬ੍ਭ ਪਵਤ੍ਤਤੀਤਿ. ਪਚ੍ਚੁਪ੍ਪਨ੍ਨੋ ਸਦ੍ਦੋ ਦਿਬ੍ਬਸੋਤਸ੍ਸ ਆਰਮ੍ਮਣਂ ਹੋਤਿ. ਅਤੀਤੇ ਸਤ੍ਤਦਿਵਸਾਨਿ ਅਨਾਗਤੇ ਸਤ੍ਤਦਿਵਸਾਨੀਤਿ ਏਤ੍ਥਨ੍ਤਰੇ ਕਾਲੇ ਅਤੀਤਾ ਨਾਗਤਪਚ੍ਚੁਪ੍ਪਨ੍ਨਭੂਤਂ ਪਰਸ੍ਸਚਿਤ੍ਤਂ ਚਤ੍ਤਾਰੋਵਾ ਖਨ੍ਧਾ ਚੇਤੋਪਰਿਯ ਞਾਣਸ੍ਸ. ਚਿਤ੍ਤਞ੍ਹਿ ਜਾਨਨ੍ਤੋ ਤਂ ਸਮ੍ਪਯੁਤ੍ਤਧਮ੍ਮਂਪਿ ਇਚ੍ਛਨ੍ਤੋ ਜਾਨਿਸ੍ਸਤਿਯੇਵ. ਏਵਞ੍ਚ ਕਤ੍ਵਾ ਪਟ੍ਠਾਨੇ ਕੁਸਲਾ ਖਨ੍ਧਾ ਚੇਤੋ ਪਰਿਯਞਾਣਸ੍ਸ ਯਥਾਕਮ੍ਮੁਪਗਞਾਣਸ੍ਸ ਆਰਮ੍ਮਣਪਚ੍ਚਯੇਨ ਪਚ੍ਚਯੋਤਿ ਞਾਣਦ੍ਵਯਂ ਏਕਤੋ ਕਤ੍ਵਾ ਵੁਤ੍ਤਂ. ਏਤ੍ਥਚ ਅਟ੍ਠਕਥਾਯਂ ਤਾਵ ਪਰਚਿਤ੍ਤਸ੍ਸ ਪਚ੍ਚੁਪ੍ਪਨ੍ਨਾਲਮ੍ਬਣਤਾਨਾਮ ਸਨ੍ਤਤਿਵਸੇਨਵਾ ਅਦ੍ਧਾ ਵਸੇਨਵਾ ਯੋਜਿਤਾ. ਯਦਿ ਹਿ ਖਣਿਕਵਸੇਨ ਯੋਜੇਯ੍ਯ. ਆਵਜ੍ਜਨੇ ਪਚ੍ਚੁਪ੍ਪਨ੍ਨਂ ਯਂਕਿਞ੍ਚਿ ਏਕਂ ਚਿਤ੍ਤਂ ਆਵਜ੍ਜੇਤ੍ਵਾ ਨਿਰੁਦ੍ਧੇ ਜਵਨਾਨਿਪਿ ਤਦੇਵ ਆਵਜ੍ਜਨੇਨ ਸਦ੍ਧਿਂ ਨਿਰੁਦ੍ਧਂ ਅਤੀਤਂ ਗਣ੍ਹਨ੍ਤੀਤਿ ਤਾਨਿ ਕਾਲਤੋ ਆਵਜ੍ਜਨੇਨ ਸਹ ਭਿਨ੍ਨਾਲਮ੍ਬਣਾਨਿ ਨਾਮ ਹੋਨ੍ਤਿ. ਨਚ ਅਨਿਟ੍ਠੇ ਮਗ੍ਗਫਲਵੀਥਿਤੋ ਅਞ੍ਞਸ੍ਮਿਂ ਠਾਨੇ ਕਾਲਮਤ੍ਤੇਨਾਪਿ ਤੇਸਂ ਤੇਨ ਸਹ ਭਿਨ੍ਨਾਲਮ੍ਬਣਤਾ ਅਟ੍ਠਕਥਾਚਰਿਯੇਹਿ ਅਨੁ ਮਤਾਤਿ. ਤਸ੍ਮਾ ਈਦਿਸੇਸੁ ਠਾਨੇਸੁ ਪਚ੍ਚੁਪ੍ਪਨ੍ਨਂਨਾਮ ਸਨ੍ਤਤਿਵਸੇਨ ਅਦ੍ਧਾਵਸੇਨਚ ਗਹੇਤੁਂ ਯੁਤ੍ਤਨ੍ਤਿ. ਮੂਲਟੀਕਾਯਂ ਪਨ ਖਣਿਕਪਚ੍ਚੁਪ੍ਪਨ੍ਨ ਵਸੇਨੇਵ ਯੋਜਿਤਂ. ਨਹਿ ਅਭਿਧਮ੍ਮੇ ਅਤੀਤਾਰਮ੍ਮਣਤ੍ਤਿਕਂ ਸਨ੍ਤਤਿ ਅਦ੍ਧਾਨਵਸੇਨੇਵ ਵੁਤ੍ਤਨ੍ਤਿ ਸਕ੍ਕਾ ਵਤ੍ਤੁਂ. ਇਤਰਥਾ ਪਚ੍ਚੁਪ੍ਪਨ੍ਨੋ ਧਮ੍ਮੋ ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ ਆਸੇਵਨਪਚ੍ਚਯੇਨ ਪਚ੍ਚਯੋਤਿ ਵਤ੍ਤਬ੍ਬੋ ਸਿਯਾ. ਨ ਤੁ ਵੁਤ੍ਤੋ. ਅਤੀਤੋ ਧਮ੍ਮੋ ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ ਆਸੇਵਨਪਚ੍ਚਯੇਨ ਪਚ੍ਚਯੋਤਿਚ੍ਚੇਵ ਪਨ ਵੁਤ੍ਤੋ, ਤਸ੍ਮਾ ਆਵਜ੍ਜਨਾਦੀਨਿ ਸਬ੍ਬਾਨਿ ਚਿਤ੍ਤਾਨਿ ਪਚ੍ਚੇਕਂ ਅਤ੍ਤਨਾ ਖਣਵਸੇਨ ਸਹੁਪ੍ਪਨ੍ਨਾਨਿ ਪਰਸ੍ਸ ਚਿਤ੍ਤਾਨਿਗਣ੍ਹਨ੍ਤੀਤਿ ਯੁਤ੍ਤਂ, ਨਚ ਤਾਨਿ ਧਮ੍ਮਤੋ ਭਿਨ੍ਨਾ ਲਮ੍ਬਣਾਨਿਨਾਮ ਹੋਨ੍ਤਿ. ਗਹਣਾ ਕਾਰਸ੍ਸ ਅਭਿਨ੍ਨਤ੍ਤਾ. ਆਵਜ੍ਜਨਂਪਿ ਹਿ ਚਿਤ੍ਤਨ੍ਤੇਵ ਆਵਜ੍ਜਤਿ. ਜਵਨਾਨਿਚ ਚਿਤ੍ਤਂ ਚਿਤ੍ਤਨ੍ਤੇਵ ਜਵਨ੍ਤਿ. ਤਾਨਿਚ ਸਬ੍ਬਾਨਿ ਚਿਤ੍ਤਾਨਿਏਵ ਹੋਨ੍ਤੀਤਿ. ਅਤੀਤਾਨਨ੍ਤਰ ਚੁਤਿਤੋ ਪਨ ਪਟ੍ਠਾਯ ਅਤੀਤਾ ਖਨ੍ਧਾ ਖਨ੍ਧੁਪਨਿ ਬਨ੍ਧਾ ਨਾਮ ਗੋਤ੍ਤਕਸਿਣ ਨਿਮਿਤ੍ਤਾਦਿਕਾ ਪਞ੍ਞਤ੍ਤਿਯੋ ਨਿਬ੍ਬਾਨਞ੍ਚ ਪੁਬ੍ਬੇਨਿਵਾਸਞਾਣਸ੍ਸ ਆਰਮ੍ਮਣਂ ਹੋਤਿ. ਪਚ੍ਚੁਪ੍ਪਨ੍ਨਂ ਰੂਪਾਰਮ੍ਮਣਂ ਦਿਬ੍ਬਚਕ੍ਖੁਸ੍ਸਾਤਿ ਏਵਂ ਰੂਪਾਦੀਸੁ ਛਸੁ ਆਲਮ੍ਬਣੇਸੁ ਯਥਾਰਹ ਮਪ੍ਪੇਤੀਤਿ. ਇਦਾਨਿ ਅਭਿਞ੍ਞਾਵਸੇਨ ਪਵਕ੍ਖਸ੍ਸ ਤਸ੍ਸ ਪਞ੍ਚਮਜ੍ਝਾਨਸ੍ਸ ਕਿਚ੍ਚਭੇਦੇਨ ਪਭੇਦਂ ਦਸ੍ਸੇਤੁਂ ਇਦ੍ਧਿਵਿਧਨ੍ਤਿਆਦਿਗਾਥ ਮਾਹ. ਤਤ੍ਥ ਯਂ ਯਂ ਅਧਿਟ੍ਠਾਤਿ. ਯਥਾ ਯਥਾਚ ਅਧਿਟ੍ਠਾਤਿ. ਤਸ੍ਸ ਤਸ੍ਸ ਤਥਾ ਤਥਾਵਾ ਇਜ੍ਝਨ ਸਙ੍ਖਾਤੋ ਵਿਧੋ ਕੋਟ੍ਠਾਸੋ ਪਕਾਰੋਵਾ ਏਤਸ੍ਸਾਤਿ ਇਦ੍ਧਿਵਿਧਂ. ਤਂ ਪਨ ਤਿਵਿਧਂ ਅਧਿਟ੍ਠਾ ਨਿਦ੍ਧਿ ਵਿਕੁਬ੍ਬਨਿਦ੍ਧਿ ਮਨੋਮਯਿਦ੍ਧਿ ਵਸੇਨ. ਤਤ੍ਥ ਅਤ੍ਤਨੋ ਪਕਤਿਵਣ੍ਣਂ ਅਵਿਜਹਿਤ੍ਵਾ ਤਸ੍ਸੇਵ ਸਤ ਸਹਸ੍ਸਾਦਿ ਬਹੁਭਾਵ ਕਰਣ ਵਸੇਨਵਾ ਆਕਾਸਗਮਨਾਦਿਵਸੇਨ ਵਾ ਬਹਿਦ੍ਧਾ ਨਾਨਾਵਣ੍ਣ ਪਾਟਿਹਾਰਿਯ ਦਸ੍ਸਨ ਵਸੇਨਵਾ ਪਵਤ੍ਤਿਤਾ ਇਦ੍ਧਿ ਅਧਿਟ੍ਠਾਨਿਦ੍ਧਿਨਾਮ. ਪਕਤਿਵਣ੍ਣਂ ਪਨ ਵਿਜਹਿਤ੍ਵਾ ਅਤ੍ਤਾਨਮੇਵ ਕੁਮਾਰਵਣ੍ਣਨਾਗਵਣ੍ਣਾਦਿਕਂ ਕਤ੍ਵਾ ਦਸ੍ਸਨਵਸੇਨ ਪਵਤ੍ਤਿਤਾ ਇਦ੍ਧਿ ਵਿਕੁਬ੍ਬਨਿਦ੍ਧਿਨਾਮ. ਅਤ੍ਤਨੋ ਸਰੀਰਬ੍ਭਨ੍ਤਰੇ ਅਞ੍ਞਂ ਸਬ੍ਬਸੋ ਅਤ੍ਤਨਾ ਸਦਿਸਂ ਸਰੀਰਂ ਨਿਮ੍ਮਿਨਿਤ੍ਵਾ ਨੀਹਰਿਤ੍ਵਾ ਦਸ੍ਸਨਵਸੇਨ ਪਵਤ੍ਤਿਤਾ ਇਦ੍ਧਿ ਮਨੋਮਯਿਦ੍ਧਿਨਾਮ. ਦਿਵੇ ਭਵਂ ਦਿਬ੍ਬਂ. ਦੇਵਲੋਕੇ ਜਾਤਨ੍ਤਿ ਅਤ੍ਥੋ. ਦਿਬ੍ਬਞ੍ਚ ਤਂ ਸੋਤਞ੍ਚਾਤਿ ਦਿਬ੍ਬਸੋਤਂ. ਦੇਵਾਨਂ ਉਲ਼ਾਰਕਮ੍ਮਨਿਬ੍ਬਤ੍ਤਾ ਦੂਰੇਪਿ ਪਟਿਚ੍ਛਨ੍ਨੇਪਿ ਆਰਮ੍ਮਣਸਮ੍ਪਟਿਚ੍ਛਨਸਮਤ੍ਥਂ ਪਸਾਦਸੋਤਂ. ਦਿਬ੍ਬਸੋਤਸਦਿਸਤ੍ਤਾ ਪਨ ਇਦਂ ਅਭਿਞ੍ਞਾਞਾਣਂਪਿ ਦਿਬ੍ਬਸੋਤਨ੍ਤਿ ਵੁਚ੍ਚਤਿ. ਕਸਿਣਜ੍ਝਾਨ ਸਙ੍ਖਾਤੇਨਵਾ ਦਿਬ੍ਬਵਿਹਾਰੇਨ ਪਟਿਲਦ੍ਧਤ੍ਤਾ ਸਯਞ੍ਚ ਤਸ੍ਮਿਂ ਦਿਬ੍ਬਵਿਹਾਰੇ ਪਰਿਯਾਪਨ੍ਨਤ੍ਤਾ ਦਿਬ੍ਬਞ੍ਚ ਤਂ ਸੋਤਞ੍ਚਾਤਿ ਦਿਬ੍ਬਸੋਤਂ. ਪਰਸ੍ਸ ਚਿਤ੍ਤਂ ਵਿਜਾਨਨ੍ਤਿ ਏਤੇਨਾਤਿ ਪਰਚਿਤ੍ਤਵਿਜਾਨਨਂ. ਤਦੇਵ ਚੇਤੋਪਰਿਯਾਯਨ੍ਤਿ ਪਰਿਚ੍ਛਿਜ੍ਜ ਜਾਨਨ੍ਤਿ ਏਤੇਨਾਤਿ ਕਤ੍ਵਾ ਚੇਤੋਪਰਿਯਞਾਣਨ੍ਤਿਪਿ ਵੁਚ੍ਚਤਿ. ਪੁਬ੍ਬੇ ਨਿਵਾਸੋ ਵੁਚ੍ਚਤਿ ਅਤੀਤਭਵੇਸੁ ਅਤ੍ਤਨੋ ਛਸੁ ਦ੍ਵਾਰੇਸੁ ਆਪਾਤਂ ਆਗਤਾ ਸੁਟ੍ਠੁ ਵਿਦਿਤਾ ਧਮ੍ਮਾ. ਪੁਬ੍ਬੇ ਅਤੀਤਜਾਤੀਸੁ ਗੋਚਰ ਨਿਵਾਸਵਸੇਨ ਨਿਵਸਿਂਸੁ ਅਤ੍ਤਨੋ ਛਦ੍ਵਾਰਿਕਾਨਿ ਚਿਤ੍ਤਾਨਿ ਏਤ੍ਥਾਤਿ ਕਤ੍ਵਾ. ਸਬ੍ਬਞ੍ਞੁਬੁਦ੍ਧਾਨਂ ਪਨ ਪਰੇਸਂ ਛਦ੍ਵਾਰਗਹਿਤਾਪਿ ਧਮ੍ਮਾ ਪੁਬ੍ਬੇ ਨਿਵਾਸੋ ਹੋਤਿਯੇਵ, ਪੁਬ੍ਬੇ ਨਿਵਾਸਸ੍ਸ ਅਨੁਸ੍ਸਰਣਂ ਪੁਬ੍ਬੇਨਿਵਾਸਾਨੁਸ੍ਸਤਿ. ਇਧ ਪਨ ਤਂ ਸਮ੍ਪਯੁਤ੍ਤਞਾਣਂ ਅਧਿਪ੍ਪੇਤਂ. ਪੁਬ੍ਬੇ ਵੁਤ੍ਤਨਯੇਨ ਦਿਬ੍ਬਞ੍ਚ ਤਂ ਚਕ੍ਖੁਚਾਤਿ ਦਿਬ੍ਬਚਕ੍ਖੁ. ਤਂ ਸਦਿਸਤ੍ਤਾ ਇਦਂ ਅਭਿਞ੍ਞਾਞਾਣਂਪਿ ਦਿਬ੍ਬਚਕ੍ਖੂਤਿ ਵੁਚ੍ਚਤਿ. ਦਿਬ੍ਬਵਿਹਾਰ ਵਸੇਨ ਪਟਿਲਦ੍ਧਤ੍ਤਾ ਸਯਞ੍ਚ ਦਿਬ੍ਬਵਿਹਾਰਸਨ੍ਨਿਸ੍ਸਿਤਤ੍ਤਾ ਦਿਬ੍ਬਞ੍ਚ ਤਂ ਚਕ੍ਖੁਚਾਤਿ ਦਿਬ੍ਬਚਕ੍ਖੁ. ਯਥਾਕਮ੍ਮੁਪਗਞਾਣਂ ਅਨਾਗਤਂਸਞਾਣਨ੍ਤਿ ਇਮਾਨਿ ਦ੍ਵੇ ਞਾਣਾਨਿ ਇਮਸ੍ਸੇਵ ਪਰਿਭਣ੍ਡਞਾਣਾਨਿਨਾਮ. ਨਹਿ ਤੇਸਂ ਪਟਿਲਾਭਤ੍ਥਾਯ ਵਿਸੁਂ ਚਿਤ੍ਤਪਰਿਦਮਨਪਰਿਕਮ੍ਮਂਨਾਮ ਅਤ੍ਥਿ. ਦਿਬ੍ਬਚਕ੍ਖੁਞਾਣੇ ਪਟਿਲਦ੍ਧੇ ਤੇਸਂਪਿ ਪਟਿਲਦ੍ਧਤ੍ਤਾਤਿ. ਤਤ੍ਥ ਦਿਬ੍ਬਚਕ੍ਖੁਨਾ ਨਿਰਯੇਸੁ ਦੁਕ੍ਖਂ ਦੇਵੇਸੁਵਾ ਸੁਖਂ ਅਨੁਭਵਨ੍ਤੇ ਸਤ੍ਤੇ ਦਿਸ੍ਵਾ ਤੇਸਂ ਅਤੀਤਂ ਕਮ੍ਮਂ ਜਾਨਿਸ੍ਸਾਮੀਤਿ ਪਰਿਕਮ੍ਮਂ ਕਰੋਨ੍ਤਸ੍ਸ ਤਂ ਕਮ੍ਮਾਰਮ੍ਮਣਂ ਯਥਾਕਮ੍ਮੁਪਗਞਾਣਂ ਪਵਤ੍ਤਤਿ. ਤਤੋ ਚਵਿਤ੍ਵਾ ਕਤ੍ਥ ਭਵਿਸ੍ਸਨ੍ਤੀਤਿ ਤੇਸਂ ਅਨਾਗਤੇ ਪਵਤ੍ਤਿਂ ਪਸ੍ਸਿਸ੍ਸਾਮੀਤਿ ਪਰਿਕਮ੍ਮਂ ਕਰੋਨ੍ਤਸ੍ਸ ਤੇਸਂ ਅਨਾਗਤਖਨ੍ਧਾਰਮ੍ਮਣਂ ਅਨਾਗਤਂਸਞਾਣਂ ਪਵਤ੍ਤਤਿ. ਪੁਬ੍ਬੇ ਨਿਵਾਸਾਨੁਸ੍ਸਤਿ ਞਾਣਂ ਵਿਯਚ ਸਬ੍ਬਂਪਿ ਅਨਾਗਤਧਮ੍ਮਜਾਤਂ ਏਤਸ੍ਸ ਆਰਮ੍ਮਣਂ ਹੋਤਿਯੇਵ. ਏਤਞ੍ਹਿ ਅਤ੍ਤਨੋ ਵਿਸਯੇ ਸਬ੍ਬਞ੍ਞੁਤਞਾਣਗਤਿਕਨ੍ਤਿ ਅਟ੍ਠਕਥਾਯਂ ਵੁਤ੍ਤਂ.
ਵਿਭਾਵਨਿਯਂ ਪਨ
ਅਨਾਗਤੇ ਸਤ੍ਤਦਿਵਸਤੋ ਪਟ੍ਠਾਯ ਚਿਤ੍ਤਚੇਤਸਿਕਧਮ੍ਮਾ ਦੁਤੀਯਦਿਵਸਤੋ ਪਟ੍ਠਾਯ ਯਂਕਿਞ੍ਚਿ ਆਰਮ੍ਮਣਂ ਏਤਸ੍ਸ ਵਿਸਯੋਤਿ ਅਧਿਪ੍ਪੇਤਂ. ਤਮ੍ਪਿ ਯੁਤ੍ਤਂਵਿਯ ਦਿਸ੍ਸਤਿ.
ਨਹਿ ਭਵਨ੍ਤਰੇਪਿ ਅਨਾਵਤਧਮ੍ਮੇ ਜਾਨਿਤੁਂ ਸਮਤ੍ਥਂ ਏਤਂ ਇਮਸ੍ਮਿਂ ਭਵੇ ਅਨਾਗਤਧਮ੍ਮੇ ਨਜਾਨਾਤੀਤਿ ਸਕ੍ਕਾ ਭਵਿਤੁਂ. ਯਥਾ ਚੇਤਂ, ਤਥਾ ਪੁਬ੍ਬੇਨਿਵਾਸਞਾਣਂਪਿ ਇਮਸ੍ਮਿਂ ਭਵੇ ਪਰਸਨ੍ਤਾਨਗਤੇ ਅਤੀਤਧਮ੍ਮੇਤਿ. ਪਾਲ਼ਿਯਂ ਪਨ ਅਟ੍ਠਕਥਾਸੁਚ ਭਵਨ੍ਤਰਗਤਧਮ੍ਮੇਹਿ ਏਵ ਞਾਣਦ੍ਵਯਂ ਯੋਜਿਤਂ. ਤਂ ਪਨ ਅਸਾਧਾਰਣਕਾਲਵਸੇਨ ਆਨੁਭਾਵਵਿਸੇਸਪਾਕਟਤ੍ਥਂ ਯੋਜਿਤਨ੍ਤਿ ਯੁਤ੍ਤਂ ਸਿਯਾਤਿ. ਗੋਚਰਭੇਦੋਤਿ ਦਸਕਸਿਣਾਦੀਸੁ ਗੋਚਰੇਸੁ ਸਮਥਜ੍ਝਾਨਾਨਂ ਪਵਤ੍ਤਿਭੇਦੋ.
ਸਮਥਕਮ੍ਮਟ੍ਠਾਨਨਯੋ.
੧੭੧. ਸਬ੍ਬਲੋਕਿਯਮਹਾਜਨੇਹਿ ਯਥਾਦਿਟ੍ਠਂ ਪੁਗ੍ਗਲਸਤ੍ਤਇਤ੍ਥਿ ਪੁਰਿਸਾਦਿਕਂ ਨਿਚ੍ਚ ਧੁਵ ਸੁਖ ਅਤ੍ਤ ਨਿਮਿਤ੍ਤਞ੍ਚ ਅਤਿਕ੍ਕਮਿਤ੍ਵਾ ਵਿਸੇਸੇਨ ਪਸ੍ਸਨ੍ਤਿ ਏਤਾਯਾਤਿ ਵਿਪਸ੍ਸਨਾ. ਕਿਰਿਯਾ ਕਮ੍ਮਂ. ਭਾਵਨਾਪਯੋਗੋ. ਵਿਪਸ੍ਸਨਾਯ ਕਮ੍ਮਂ ਵਿਪਸ੍ਸਨਾਕਮ੍ਮਂ. ਵਿਪਸ੍ਸਨਾ ਏਵ ਵਾ ਕਮ੍ਮਨ੍ਤਿ ਵਿਪਸ੍ਸਨਾ ਕਮ੍ਮਂ. ਵਿਪਸ੍ਸਨਾਕਮ੍ਮਸ੍ਸ ਠਾਨਂ ਅਧਿਟ੍ਠਾਨਂ ਭੁਮੀਤਿ ਵਿਪਸ੍ਸਨਾਕਮ੍ਮਟ੍ਠਾਨਂ. ਖਨ੍ਧਾਦਿਧਮ੍ਮਜਾਤਂ. ਵਿਪਸ੍ਸਨਾ ਕਮ੍ਮਮੇਵ ਵਾ ਉਤ੍ਤਰੁਤ੍ਤਰਸ੍ਸ ਭਾਵਨਾ ਵਿਸੇਸਸ੍ਸ ਆਨਿਸਂਸਵਿਸੇਸਸ੍ਸਵਾ ਠਾਨਂ ਆਸਨ੍ਨਕਾਰਣਨ੍ਤਿ ਵਿਪਸ੍ਸਨਾਕਮ੍ਮਟ੍ਠਾਨਂ. ਤਸ੍ਮਿਂ ਵਿਪਸ੍ਸਨਾਕਮ੍ਮਟ੍ਠਾਨੇ ਸਤ੍ਤਵਿਧੇਨ ਵਿਸੁਦ੍ਧਿ ਸਙ੍ਗਹੋ ਤੀਣਿ ਲਕ੍ਖਣਾਨੀਤਿਆਦਿਨਾ ਸਮ੍ਬਨ੍ਧੋ. ਨਿਚ੍ਚਸੀਲਮੇਵ ਸਯਞ੍ਚ ਦੁਸ੍ਸਿਲ੍ਯਮਲਤੋ ਵਿਸੁਦ੍ਧਤ੍ਤਾ ਕਾਯਂ ਵਾਚਞ੍ਚ ਤਤੋ ਵਿਸੋਧਨਤੋ ਵਿਸੁਦ੍ਧੀਤਿ ਸੀਲਵਿਸੁਦ੍ਧਿ. ਸੁਭਾਵਿਤ ਚਿਤ੍ਤਸਨ੍ਤਾਨਮੇਵ ਸਯਞ੍ਚ ਨੀਵਰਣਮਲਤੋ ਵਿਸੁਦ੍ਧਤ੍ਤਾ ਤਂਸਮਙ੍ਗਿਪੁਗ੍ਗਲਞ੍ਚ ਤਤੋ ਵਿਸੋਧਨਤੋ ਵਿਸੁਦ੍ਧੀਤਿ ਚਿਤ੍ਤਵਿਸੁਦ੍ਧਿ. ਚਿਤ੍ਤਸੀਸੇਨ ਚੇਤ੍ਥ ਸਮਾਧਿ ਅਧਿਪ੍ਪੇਤੋ. ਧਮ੍ਮਵਵਤ੍ਥਾਨਞਾਣਸਙ੍ਖਾਤਾ ਦਿਟ੍ਠਿਏਵ ਤਂ ਸਮਙ੍ਗਿਪੁਗ੍ਗਲਂ ਸਕ੍ਕਾਯਦਿਟ੍ਠਿਮਲਤੋ ਵਿਸੋਧਨਤੋ ਵਿਸੁਦ੍ਧੀਤਿ ਦਿਟ੍ਠਿਵਿਸੁਦ੍ਧਿ. ਸੋਲ਼ਸਵਿਧਂ ਅਟ੍ਠਵਿਧਂ ਕਙ੍ਖਂ ਵਿਤਰਨ੍ਤਿ ਅਤਿਕ੍ਕਮਨ੍ਤਿ ਏਤਾਯਾਤਿ ਕਙ੍ਖਾਵਿਤਰਣਾ. ਪਚ੍ਚਯਪਰਿਗ੍ਗਹਞਾਣਂ. ਸਾ ਏਵ ਤਂਸਮਙ੍ਗਿਪੁਗ੍ਗਲਂ ਅਹੇਤੁ ਦਿਟ੍ਠਿ ਵਿਸਮਹੇਤੁਦਿਟ੍ਠੀਹਿ ਸਦ੍ਧਿਂ ਯਥਾਵੁਤ੍ਤਾਹਿ ਦੁਵਿਧਾਹਿ ਕਙ੍ਖਾਹਿ ਵਿਸੋਧਨਤੋ ਵਿਸੁਦ੍ਧੀਤਿ ਕਙ੍ਖਾਵਿਤਰਣਵਿਸੁਦ੍ਧਿ. ਮਗ੍ਗੋਚ ਅਮਗ੍ਗੋਚ ਮਗ੍ਗਾਮਗ੍ਗਾ. ਤਤ੍ਥ ਞਾਣਦਸ੍ਸਨਵਿਸੁਦ੍ਧਾਧਿਗਮਨਸ੍ਸ ਉਪਾਯਭੂਤੋ ਮਨਸਿਕਾਰਵਿਧਿਵਾ ਅਰਿਯਮਗ੍ਗੋਵਾ ਮਗ੍ਗੋਨਾਮ. ਤਸ੍ਸ ਅਨੁਪਾਯਭੂਤੋ ਮਨਸਿਕਾਰੋਵਾ ਅਧਿਮਾਨਵਤ੍ਥੂਨਿਵਾ ਅਮਗ੍ਗੋਨਾਮ. ਮਗ੍ਗਸ੍ਸ ਮਗ੍ਗਤੋ ਅਮਗ੍ਗਸ੍ਸਚ ਅਮਗ੍ਗਤੋ ਜਾਨਨਂ ਦਸ੍ਸਨਞ੍ਚ ਮਗ੍ਗਾਮਗ੍ਗਞਾਣਦਸ੍ਸਨਂ. ਤਮੇਵ ਤਂਸਮਙ੍ਗੀਪੁਗ੍ਗਲਂ ਅਮਗ੍ਗੇ ਮਗ੍ਗਸਞ੍ਞਾਯ ਵਿਸੋਧਨਤੋ ਵਿਸੁਦ੍ਧੀਤਿ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿ ਨਾਮ. ਉਪਰਿ ਵਿਸੇਸਂ ਪਟਿਪਜ੍ਜਨ੍ਤਿ ਏਤਾਯਾਤਿ ਪਟਿਪਦਾ. ਵਿਪਸ੍ਸਨਾਪਰਂਪਰਸਙ੍ਖਾਤੋ ਪੁਬ੍ਬਭਾਗਮਗ੍ਗੋ. ਪਟਿਪਦਾਭੂਤਂ ਞਾਣਦਸ੍ਸਨਨ੍ਤਿ ਪਟਿਪਦਾਞਾਣਦਸ੍ਸਨਂ. ਤਮੇਵ ਨਿਚ੍ਚਸਞ੍ਞਾਦਿਤੋ ਵਿਸੁਦ੍ਧਤ੍ਤਾ ਵਿਸੁਦ੍ਧੀਤਿ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਨਾਮ, ਅਰਿਯਮਗ੍ਗਞਾਣਸਙ੍ਖਾਤ ਞਾਣਦਸ੍ਸਨਮੇਵ ਸਮ੍ਮੋਹਮਲਤੋ ਵਿਸੁਦ੍ਧਤ੍ਤਾ ਵਿਸੁਦ੍ਧੀਤਿ ਞਾਣਦਸ੍ਸਨਵਿਸੁਦ੍ਧਿਨਾਮ. ਏਤ੍ਥਚ ਸੁਤਮਯਾਦਿਵਸੇਨ ਸਿਦ੍ਧਂ ਅਨੁਮਾਨ ਞਾਣਂਪਿ ਞਾਣਮੇਵਾਤਿ ਤਂ ਪਟਿਕ੍ਖਿਪਿਤ੍ਵਾ ਅਤ੍ਥਪਚ੍ਚਕ੍ਖਞਾਣਮੇਵ ਗਹੇਤੁਂ ਸਬ੍ਬਤ੍ਥ ਦਸ੍ਸਨਗਹਣਂ ਕਤਨ੍ਤਿ ਵੇਦਿਤਬ੍ਬਂ. ਲਕ੍ਖੀਯਨ੍ਤਿ ਸਲ੍ਲਕ੍ਖੀਯਨ੍ਤਿ ਇਮੇ ਅਨਿਚ੍ਚਾਏਵਾਤਿ ਏਕਨ੍ਤੇਨ ਵਿਨਿਚ੍ਛੀਯਨ੍ਤਿ ਧਮ੍ਮਾ ਏਤੇਨਾਤਿ ਲਕ੍ਖਣਂ ਅਨਿਚ੍ਚਤਾ ਏਵ ਲਕ੍ਖਣਨ੍ਤਿ ਅਨਿਚ੍ਚਲਕ੍ਖਣਂ. ਪੁਬ੍ਬਪਦੇ ਭਾਵਪਚ੍ਚਯਲੋਪੋ. ਅਞ੍ਞੋਹਿ ਅਨਿਚ੍ਚੋ, ਅਞ੍ਞਾ ਅਨਿਚ੍ਚਤਾਤਿ. ਤਤ੍ਥ ਯਥਾਗਮਨਕ੍ਰਿਯਾਯੋਗੇਨ ਪੁਰਿਸੋ ਗਤੋਤਿ ਵੁਚ੍ਚਤਿ. ਨ ਪਨ ਗਮਨ ਕ੍ਰਿਯਾ ਪੁਰਿਸੋ. ਨਚ ਪੁਰਿਸੋ ਗਮਨਕ੍ਰਿਯਾ. ਅਞ੍ਞਾ ਹਿ ਕ੍ਰਿਯਾ, ਅਞ੍ਞੋ ਪੁਰਿਸੋ. ਤਥਾ ਅਨਿਚ੍ਚਤਾਯੋਗੇਨ ਸਬ੍ਬੋ ਸਙ੍ਖਤਧਮ੍ਮੋ ਅਨਿਚ੍ਚੋਤਿ ਵੁਚ੍ਚਤਿ. ਨ ਪਨ ਅਨਿਚ੍ਚਤਾ ਸੋ ਧਮ੍ਮੋ, ਨਚ ਸੋ ਧਮ੍ਮੋ ਅਨਿਚ੍ਚਤਾ. ਅਞ੍ਞਾ ਹਿ ਅਨਿਚ੍ਚਤਾ, ਅਞ੍ਞੋ ਸੋ ਧਮ੍ਮੋਤਿ. ਕਤਮਾ ਪਨ ਸਾ ਅਨਿਚ੍ਚਤਾਤਿ. ਵਿਪਰਿਣਾਮਾ ਕਾਰੋ. ਜੀਰਣਾਕਾਰੋ ਭਿਜ੍ਜਨਾਕਾਰੋਤਿ ਵੁਤ੍ਤਂ ਹੋਤਿ. ਤਂ ਪਨ ਆਕਾਰਂ ਦਿਸ੍ਵਾ ਤਦਾਕਾਰਵਨ੍ਤੇ ਧਮ੍ਮੇ ਞਾਣਂ ਪਵਤ੍ਤਤਿ ਅਯਂ ਧਮ੍ਮੋ ਅਨਿਚ੍ਚੋਤਿ. ਤਸ੍ਮਾ ਸਾ ਅਨਿਚ੍ਚਤਾਯੇਵ ਇਧ ਲਕ੍ਖਣਨ੍ਤਿਪਿ ਵੁਚ੍ਚਤੀਤਿ. ਏਸਨਯੋ ਸੇਸੇਸੁਪਿ ਦ੍ਵੀਸੁ. ਤਤ੍ਥ ਪਨ ਅਭਿਣ੍ਹਸਂਪਟਿਪੀਲ਼ਨਾਕਾਰੋ ਦੁਕ੍ਖਤਾਨਾਮ. ਅਵਸਵਤ੍ਤਨਾਕਾਰੋ ਅਨਤ੍ਤਤਾਨਾਮਾਤਿ. ਯਥਾਵੁਤ੍ਤਾਯ ਪਨ ਅਨਿਚ੍ਚਤਾਯ ਸਹ ਅਨਿਚ੍ਚਸ੍ਸ ਧਮ੍ਮਸ੍ਸ ਅਨਿਚ੍ਚੇਨ ਵਾ ਧਮ੍ਮੇਨ ਸਹ ਅਨਿਚ੍ਚਤਾਯ ਅਨੁਅਨੁਪਸ੍ਸਨਾ ਅਨਿਚ੍ਚਾਨੁਪਸ੍ਸਨਾ. ਏਸ ਨਯੋ ਸੇਸਾਸੁਪਿ ਦ੍ਵੀਸੁ. ਯਾਵ ਸਰੀਰੇ ਧਮ੍ਮਾਨਂ ਤਿਵਿਧਲਕ੍ਖਣਯੁਤ੍ਤਤਾ ਅਤ੍ਤਨੋ ਞਾਣੇਨ ਪਞ੍ਞਾਯਤਿ. ਤਾਵ ਤੇਸੁ ਤਿਵਿਧਲਕ੍ਖਣਵਿਭਾਵਨਵਸੇਨ ਪੁਨਪ੍ਪੁਨਂ ਮਸਨਂ ਆਮਸਨਂ ਸਮ੍ਮਸਨਂ. ਸਮ੍ਮਸਨਾਕਾਰੇਨ ਪਵਤ੍ਤਂ ਞਾਣਂ ਸਮ੍ਮਸਨਞਾਣਂ. ਉਦਯੋ ਵੁਚ੍ਚਤਿ ਤਂਤਂ ਖਣਾਨੁਰੂਪਂ ਤਂਤਂ ਪਚ੍ਚਯਾਨੁਰੂਪਞ੍ਚ ਨਵਨਵਾਨਂ ਧਮ੍ਮਾਨਂ ਪਾਤੁ ਭਾਵੋ ਚੇਵ ਉਪਰੁਪਰਿ ਵਡ੍ਢਨਞ੍ਚ. ਵਯੋ ਵੁਚ੍ਚਤਿ ਯਤ੍ਥ ਯਤ੍ਥ ਲਦ੍ਧਪਚ੍ਚਯਾ ਨਵਨਵਾ ਧਮ੍ਮਾ ਪਾਤੁਭਵਨ੍ਤਿ ਚੇਵ ਵਡ੍ਢਨ੍ਤਿਚ. ਤਤ੍ਥ ਤਤ੍ਥ ਅਲਦ੍ਧਪਚ੍ਚਯਾਨਂ ਪੁਰਾਣਧਮ੍ਮਾਨਂ ਅਨ੍ਤਰਧਾਨਂ. ਸਮੂਹ ਸਨ੍ਤਤਿਵਸੇਨ ਪਨ ਉਦਯਪਕ੍ਖਸ੍ਸਵਾ ਵਯਪਕ੍ਖਸ੍ਸਵਾ ਸਮਨੁਪਸ੍ਸਨਞਾਣਂ ਉਦਯਬ੍ਬਯਞਾਣਂ. ਤੇਸੁ ਪਨ ਦ੍ਵੀਸੁ ਪਕ੍ਖੇਸੁ ਉਦਯਕੋਟ੍ਠਾਸੋਨਾਮ ਉਪਰੁਪਰਿ ਪਾਕਟੋ ਹੁਤ੍ਵਾ ਆਗਚ੍ਛਤਿ. ਵਯਕੋਟ੍ਠਾਸੋ ਪਨ ਅਪਾਕਟੋ. ਸੋ ਏਵ ਚ ਅਨਿਚ੍ਚਤਾਯ ਪਰਮਾ ਕੋਟੀਤਿ ਤਸ੍ਸੇਵ ਸੁਟ੍ਠੁਤਰਂ ਸਮਨੁਪਸ੍ਸਨਞਾਣਂ ਭਙ੍ਗਞਾਣਂ. ਭਙ੍ਗੇ ਦਿਟ੍ਠੇ ਏਵਂ ਭਿਜ੍ਜਨਸਭਾਵਾਨਂ ਧਮ੍ਮਾਨਂ ਅਨੇਕਸਹਸ੍ਸਸੋਕ ਦੁਕ੍ਖਵਤ੍ਥੁਭਾਵੇਨ ਤਥਾ ਤਥਾ ਭਾਯਿਤਬ੍ਬਪਕਾਰਸਮਨੁਪਸ੍ਸਨਞਾਣਂ ਭਯਞਾਣਂ ਨਾਮ. ਲੋਕੇ ਪਨ ਕਿਞ੍ਚਿ ਭਯਵਤ੍ਥੁਂ ਪਸ੍ਸਨ੍ਤਾਪਿ ਆਸਨ੍ਨੇ ਅਞ੍ਞਸ੍ਮਿਂ ਪਟਿਸਰਣੇ ਸਤਿ ਨ ਭਾਯਨ੍ਤਿ. ਅਸਤਿ ਏਵ ਭਾਯਨ੍ਤਿ. ਏਵਂ ਭਾਯਿਤਬ੍ਬਾਨਂ ਤੇਸਂ ਸਬ੍ਬਸੋ ਅਞ੍ਞਪਟਿਸਰਣਾਭਾਵਦਸ੍ਸਨਂ ਆਦੀਨਵਞਾਣਂ ਨਾਮ. ਕੁਤੋਚਿ ਪਟਿਸਰਣਾਭਾਵੇਨ ਤੇਹਿ ਉਕ੍ਕਣ੍ਠਤਾਕਾਰ ਸਹਿਤਂ ਵਿਪਸ੍ਸਨਾਞਾਣਂ ਨਿਬ੍ਬਿਦਾਞਾਣਂਨਾਮ. ਨਿਬ੍ਬਿਨ੍ਦੀਯਮਾਨੇਹਿ ਤੇਹਿ ਅਤ੍ਤਾਨਂ ਵਿਮੁਚ੍ਚਿਤੁਂ ਅਜ੍ਝਾਸਯਸਹਿਤਂ ਵਿਪਸ੍ਸਨਾਞਾਣਂ ਮੁਚ੍ਚਿਤੁਕਮ੍ਯਤਾਞਾਣਂ ਨਾਮ. ਸੁਟ੍ਠੁ ਮੁਚ੍ਚਿਤੁਂ ਇਚ੍ਛਨ੍ਤਸ੍ਸ ਸੀਘਂ ਮੁਚ੍ਚਨਤ੍ਥਂ ਤੇਸਂ ਧਮ੍ਮਾਨਂ ਚਤ੍ਤਾਲੀਸਾਯ ਆਕਾਰੇਹਿ ਅਨੇਕਾਦੀਨਵਰਾਸਿ ਭਾਵ ਪਟਿਸਙ੍ਖਾਨਵਸੇਨ ਸੁਟ੍ਠੁਵਿਪ੍ਫਾਰਤਰਂ ਪਵਤ੍ਤਮਾਨਂ ਵਿਪਸ੍ਸਨਾ ਞਾਣਂ ਪਟਿਸਙ੍ਖਾਞਾਣਂ ਨਾਮ. ਤੇਸਂ ਪਨ ਅਨੇਕਾਦੀਨਵਰਾਸਿਭਾਵੇ ਸੁਟ੍ਠੁ ਦਿਟ੍ਠੇ ਸਙ੍ਖਾਰੇਸੁ ਨਿਕਨ੍ਤਿਯਾ ਪਰਿਯਾਦਿਨ੍ਨਾਯ ਇਦਾਨਿ ਮੁਚ੍ਚਨੁਪਾਯੋ ਲਦ੍ਧੋਤਿ ਅਧਿਮਤ੍ਤਬ੍ਯਾਪਾਰਂ ਅਕਤ੍ਵਾ ਸਮੇਨ ਵਾਯਾਮੇਨ ਸਙ੍ਖਾਰੇ ਪਰਿਗ੍ਗਣ੍ਹਨ੍ਤਸ੍ਸ ਸਙ੍ਖਾਰਪਰਿਗ੍ਗਹੇ ਮਜ੍ਝਤ੍ਤਾਕਾਰਸਹਿਤਂ ਸਙ੍ਖਾਰੇਸੁਵਾ ਭਯਞ੍ਚ ਨਨ੍ਦਿਞ੍ਚ ਪਹਾਯ ਉਦਾਸਿਨਭਾਵਸਹਿਤਂ ਵਿਪਸ੍ਸਨਾਞਾਣਂ ਸਙ੍ਖਾਰੁਪੇਕ੍ਖਾਞਾਣਂਨਾਮ. ਉਪਰਿ ਮਗ੍ਗਪ੍ਪਵਤ੍ਤਿਂ ਵਹਿਤੁਂ ਸਮਤ੍ਥਭਾਵੇਨ ਮਗ੍ਗੁਪ੍ਪਤ੍ਤਿਯਾ ਅਨੁਲੋਮੇਹਿ ਥਾਮਬਲੇਹਿ ਸਮ੍ਪਨ੍ਨਂ ਵਿਪਸ੍ਸਨਾਞਾਣਂ ਅਨੁਲੋਮਞਾਣਂ ਨਾਮ. ਹੇਟ੍ਠਿਮਾਨਂਵਾ ਞਾਣਾਨਂਤਂ ਅਨੁਲੋਮਂ ਹੋਤਿ ਲਕ੍ਖਣਤ੍ਤਯਸ੍ਸ ਸੁਟ੍ਠੁਤਰਂ ਵਿਭਾਵਨਤੋ. ਉਪਰਿਮਗ੍ਗਸ੍ਸਵਾ ਅਨੁਲੋਮਂ ਹੋਤਿ ਤਸ੍ਸ ਪਰਿਕਮ੍ਮਭਾਵਤੋ, ਪਦਟ੍ਠਾਨਤ੍ਤਾਚਾਤਿਪਿ ਅਨੁਲੋਮਞਾਣਂ ਨਾਮਾਤਿ. ਅਤ੍ਤ ਜੀਵਸੁਞ੍ਞਤਾਦਸ੍ਸਨ ਬਲੇਨ ਖਨ੍ਧੇਸੁ ਕਿਲੇਸਬਨ੍ਧਨਤੋ ਵਿਮੁਚ੍ਚਮਾਨੋ ਮਗ੍ਗੋ ਸੁਞ੍ਞਤਾਵਿਮੋਕ੍ਖੋ ਨਾਮ. ਸਙ੍ਖਾਰਾਨਂ ਯਾਨਿ ਨਿਮਿਤ੍ਤਾਨਿ ਕਿਲੇਸਾਨਂ ਅਵਸ੍ਸਯੋ ਹੋਤਿ. ਤਾਨਿ ਵਿਧਮਿਤ੍ਵਾ ਸਬ੍ਬਸੋ ਧਮ੍ਮਾਨਂ ਅਨਾਥ ਭਾਵ ਦਸ੍ਸਨ ਬਲੇਨ ਵਿਮੁਚ੍ਚਮਾਨੋ ਮਗ੍ਗੋ ਅਨਿਮਿਤ੍ਤੋਵਿਮੋਕ੍ਖੋ ਨਾਮ. ਸਙ੍ਖਾਰੇਸੁ ਸਬ੍ਬਸੋ ਅਸ੍ਸਾਸਾਭਾਵ ਦਸ੍ਸਨਬਲੇਨ ਵਿਮੁਚ੍ਚਮਾਨੋ ਮਗ੍ਗੋ ਅਪ੍ਪਣਿਹਿਤੋਵਿਮੋਕ੍ਖੋਨਾਮ. ਸੁਞ੍ਞਤਾਨੁਪਸ੍ਸਨਾਤਿ ਅਨਤ੍ਤਾਨੁਪਸ੍ਸਨਾ. ਸਾ ਹਿ ਧਮ੍ਮਾਨਂ ਸਮੂਹਘਨ ਸਨ੍ਤਤਿਘਨ ਕਿਚ੍ਚਘਨ ਆਰਮ੍ਮਣਘਨੇਸੁ ਤਂਤਂਘਨ ਵਿਨਿਬ੍ਭੁਜ੍ਜਨ ਵਸੇਨ ਪਵਤ੍ਤਤ੍ਤਾ ਅਤ੍ਤਾ ਇਤਿ ਗਹੇਤਬ੍ਬਸ੍ਸ ਕਸ੍ਸਚਿ ਸਾਰਸ੍ਸ ਅਭਾਵਾਨੁਪਸ੍ਸਨਤੋ ਸੁਞ੍ਞਤਾਨੁਪਸ੍ਸਨਾਤਿ ਵੁਚ੍ਚਤਿ. ਅਨਿਮਿਤ੍ਤਾ ਨੁਪਸ੍ਸਨਾਤਿ ਅਨਿਚ੍ਚਾਨੁਪਸ੍ਸਨਾ. ਸਾਪਿ ਹਿ ਸਨ੍ਤਤਿ ਵਿਚ੍ਛੇਦਨ ਵਸੇਨ ਪਵਤ੍ਤਤ੍ਤਾ ਅਹਨ੍ਤਿ ਗਹਿਤਸ੍ਸ ਨਿਮਿਤ੍ਤਸ੍ਸ ਵਿਧਮਨਤੋ ਅਨਿਮਿਤ੍ਤਾਨੁਪਸ੍ਸਨਾਤਿ ਵੁਚ੍ਚਤਿ. ਅਪਣਿਹਿਤਾਨੁਪਸ੍ਸਨਾਤਿ ਦੁਕ੍ਖਾ ਨੁਪਸ੍ਸਨਾ. ਸਾਪਿ ਹਿ ਮਹਾਆਦੀਨਵਰਾਸਿ ਭਾਵ ਵਿਭਾਵਨਵਸੇਨ ਪਵਤ੍ਤਤ੍ਤਾ ਇਦਂ ਮਮ ਏਤਂ ਮਮਾਤਿ ਗਹੇਤਬ੍ਬਸ੍ਸ ਕਸ੍ਸਚਿ ਪਣਿਹਿਤ ਗੁਣਸ੍ਸ ਅਭਾਵਾਨੁਪਸ੍ਸਨਤੋ ਅਪ੍ਪਣਿਹਿਤਾਨੁਪਸ੍ਸਨਾਤਿ ਵੁਚ੍ਚਤੀਤਿ. ਪਾਤਿਮੋਕ੍ਖਸਂਵਰਸੀਲਨ੍ਤਿ ਵਿਨਯਪਞ੍ਞਤ੍ਤਿਸੀਲਂ. ਤਞ੍ਹਿ ਸਬ੍ਬਲੋ ਕਿਯਸੀਲਾਨਂ ਜੇਟ੍ਠਕਤ੍ਤਾ ਪਤਿਚ ਹੋਤਿ. ਚਤੁਭੂਮਕਕੁਸਲਾਨਂ ਆਦਿਪਭਵਭੂਤਤ੍ਤਾ ਮੁਖਞ੍ਚ. ਇਤਿ ਪਤਿਮੁਖਟ੍ਠੇਨ ਪਾਤਿਮੋਕ੍ਖਨ੍ਤਿ ਵੁਚ੍ਚਤਿ. ਤਮੇਵਚ ਦੁਸ੍ਸਿਲ੍ਯਮਗ੍ਗਸ੍ਸ ਸਂਵਰਣਤੋ ਪਿਦਹਨਤੋ ਸਂਵਰੋਤਿ ਵੁਚ੍ਚਤੀਤਿ. ਯੇਸਂ ਧਮ੍ਮਾਨਂ ਉਪ੍ਪਤ੍ਤਿਯਾ ਚਕ੍ਖਾਦੀਨਿ ਇਨ੍ਦ੍ਰਿਯਾਨਿ ਵਿਫਨ੍ਦਿਤਾਨਿ ਹੋਨ੍ਤਿ. ਲੋਲਾਨਿ ਹੋਨ੍ਤਿ. ਤਦਨੁਬਨ੍ਧਾਚ ਅਕੁਸਲਧਮ੍ਮਾ ਉਪ੍ਪਜ੍ਜਨ੍ਤਿ. ਤੇਸਂ ਉਪ੍ਪਤ੍ਤਿ ਮਗ੍ਗਸ੍ਸ ਸਂਵਰਣਵਸੇਨ ਪਵਤ੍ਤਮਾਨਾ ਸਤਿ ਇਨ੍ਦ੍ਰਿਯ ਸਂਵਰੋਨਾਮ. ਸੋ ਏਵ ਸੀਲਨ੍ਤਿ ਇਨ੍ਦ੍ਰਿਯਸਂਵਰਸੀਲਂ. ਆਜੀਵਨ੍ਤਿ ਜੀਵਿਤਂ ਕਪ੍ਪੇਨ੍ਤਿ ਏਤੇਨਾਤਿ ਆਜੀਵੋ. ਪਚ੍ਚਯਪਰਿਯੇਸਨਵਾਯਾਮੋ. ਸੋਯੇਵ ਬੁਦ੍ਧਪਟਿਕੁਟ੍ਠੇਹਿ ਪੁਪ੍ਫਦਾਨਾਦੀਹਿ ਮਿਚ੍ਛਾਪਯੋਗੇਹਿ ਤਿਵਿਧਕੁਹਨਵਤ੍ਥੁਹਿਚ ਪਰਿਸੁਦ੍ਧਤ੍ਤਾ ਆਜੀਵਪਾਰਿਸੁਦ੍ਧਿਨਾਮ. ਸਾ ਏਵ ਸੀਲਨ੍ਤਿ ਸਮਾਸੋ. ਤਥਾਰੂਪੇਨ ਪਰਿਸੁਦ੍ਧੇਨ ਭਿਕ੍ਖਾਚਾਰਾਦਿਨਾ ਪਯੋਗੇਨ ਪਟਿਲਦ੍ਧਾਨਂ ਪਚ੍ਚਯਾਨਂ ਪਟਿਗ੍ਗਹਣ ਪਰਿਭੁਞ੍ਜਨਕਾਲੇਸੁ ਸਮ੍ਮੋਹਸ੍ਸ ਗੇਧਸ੍ਸ ਮਦਸ੍ਸ ਪਮਾਦਸ੍ਸਚ ਪਹਾਨਤ੍ਥਂ ਤਂਤਂਪਯੋਜਨਮਰਿਯਾਦਂਵਾ ਪਟਿਕੂਲਲਕ੍ਖਣਂਵਾ ਧਾਤੁਮਤ੍ਤਲਕ੍ਖਣਂਵਾ ਪਰਿਗ੍ਗਹਣ ਪਚ੍ਚਵੇਕ੍ਖਨਵਸੇਨ ਪਵਤ੍ਤਂ ਪਚ੍ਚਯਸੇਵਨੇ ਪਟਿਸਙ੍ਖਾਞਾਣਂ ਪਚ੍ਚਯ ਸਨ੍ਨਿਸ੍ਸਿਤਸੀਲਂਨਾਮ. ਪਰਿਸੁਜ੍ਝਤੀਤਿ ਪਰਿਸੁਦ੍ਧਿ. ਪਰਿਸੁਦ੍ਧਿਏਵ ਪਾਰਿਸੁਦ੍ਧਿ. ਸਾ ਏਵ ਸੀਲਨ੍ਤਿ ਸਮਾਸੋ. ਚਤ੍ਤਾਰਿ ਪਾਰਿਸੁਦ੍ਧਿਸੀਲਾਨੀਤਿ ਚਤੁਪਾਰਿ ਸੁਦ੍ਧਿਸੀਲਂ. ਚਿਤ੍ਤਵਿਸੁਦ੍ਧੀਤਿ ਏਤ੍ਥ ਚਿਤ੍ਤਸਦ੍ਦੇਨ ਸਮਾਧਿ ਨਿਦ੍ਦਿਟ੍ਠੋਤਿ ਵੁਤ੍ਤਂ ਦੁਵਿਧੋਪਿਸਮਾਧਿ ਚਿਤ੍ਤਵਿਸੁਦ੍ਧਿਨਾਮਾਤਿ. ਲਕ੍ਖਣਰਸਪਚ੍ਚੁਪਟ੍ਠਾਨਪਦਟ੍ਠਾਨ ਵਸੇਨਾਤਿ ਏਤ੍ਥ ਧਮ੍ਮਾਨਂ ਪਚ੍ਚਤ੍ਤਸਭਾਵੋ ਲਕ੍ਖਣਂਨਾਮ. ਅਗ੍ਗਿਸ੍ਸ ਉਣ੍ਹਤ੍ਤਂ ਵਿਯ. ਤੇਨ ਸਭਾਵੇਨ ਸਾਧੇਤਬ੍ਬਂ ਕਿਚ੍ਚਂਵਾ ਸਾਧਨਪਚ੍ਚਯਾ ਪਟਿਲਦ੍ਧਗੁਣਸਙ੍ਖਾਤਾ ਸਮ੍ਪਤ੍ਤਿਵਾ ਰਸੋਨਾਮ. ਅਗ੍ਗਿਸ੍ਸ ਪਰਿਵਾਚਨ ਜੋਤਨਾਨਿ ਵਿਯ. ਸਾ ਏਵ ਸਮ੍ਪਤ੍ਤਿਵਾ ਕਾਰਿਯਸਙ੍ਖਾਤਂ ਫਲਂਵਾ ਪਚ੍ਚੁਪਟ੍ਠਾਨਂਨਾਮ. ਅਗ੍ਗਿਸ੍ਸ ਧੂਮੋ ਵਿਯ. ਅਤ੍ਤਨੋ ਉਪ੍ਪਤ੍ਤਿਯਾ ਅਸਾਧਾਰਣਪਚ੍ਚਯਸਙ੍ਖਾਤਂ ਆਸਨ੍ਨਕਾਰਣਂ ਪਦਟ੍ਠਾਨਂਨਾਮ. ਤੇਸਂ ਵਸੇਨ ਨਾਮਸ੍ਸਚ ਰੂਪਸ੍ਸਚ ਪਰਿਗ੍ਗਹੋ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਗਹਣਂ ਨਾਮਰੂਪਵਵਤ੍ਥਾਨਂ ਦਿਟ੍ਠਿਵਿਸੁਦ੍ਧਿਨਾਮ. ਏਤ੍ਥਚ ਪਰਿਗ੍ਗਹੋ ਦੁਵਿਧੋ ਸਙ੍ਖੇਪ ਪਰਿਗ੍ਗਹੋ ਵਿਤ੍ਥਾਰਪਰਿਗ੍ਗਹੋਤਿ. ਤਤ੍ਥ ਅਜ੍ਝਤ੍ਤਧਮ੍ਮੇ ਦ੍ਵਿਧਾ ਕਤ੍ਵਾ ਇਦਂ ਨਾਮਮੇਵ, ਨ ਰੂਪਂ. ਇਦਂ ਰੂਪਮੇਵ, ਨ ਨਾਮਂ. ਅਞ੍ਞਂ ਨਾਮਂ ਅਞ੍ਞਂ ਰੂਪਂ. ਤਦੁਭਯਤੋਚ ਅਞ੍ਞੋ ਅਤ੍ਤਾਵਾ ਜੀਵੋਵਾ ਸਤ੍ਤੋਵਾ ਪੁਗ੍ਗਲੋਵਾ ਮਨੁਸ੍ਸੋਵਾ ਦੇਵੋਵਾ ਬ੍ਰਹ੍ਮਾਵਾ ਨਤ੍ਥੀਤਿ ਏਵਂ ਪਚ੍ਚਕ੍ਖਤੋ ਸੁਦਿਟ੍ਠਂ ਕਤ੍ਵਾ ਪਰਿਗ੍ਗਣ੍ਹਨਂ ਸਙ੍ਖੇਪਪਰਿਗ੍ਗਹੋਨਾਮ. ਞਾਣੁਤ੍ਤਰਿਕੋਹਿ ਪੁਗ੍ਗਲੋ ਏਤ੍ਤਕਮਤ੍ਤੇਨਪਿ ਸਕ੍ਕਾਯਦਿਟ੍ਠਿਂ ਵਿਕ੍ਖਮ੍ਭੇਤੁਂ ਸਕ੍ਕੋਤਿ ਸਦ੍ਧਿਂ ਸਞ੍ਞਾ ਚਿਤ੍ਤਵਿਪਲ੍ਲਾਸੇਹੀਤਿ. ਤਯੋ ਹਿ ਵਿਪਲ੍ਲਾਸਾ. ਯਥਾਹ-ਅਨਤ੍ਤਨਿ ਅਤ੍ਤਾਤਿ ਸਞ੍ਞਾਵਿਪਲ੍ਲਾਸੋ ਚਿਤ੍ਤਵਿਪਲ੍ਲਾਸੋ ਦਿਟ੍ਠਿਵਿਪਲ੍ਲਾਸੋਤਿ. ਤਤ੍ਥ ਸਤ੍ਥੁਸਾਸਨਧਮ੍ਮੇ ਸੁਟ੍ਠੁ ਪਤਿਟ੍ਠਿਤੇਨ ਸਦ੍ਧਾਮਤ੍ਤੇਨਪਿ ਦਿਟ੍ਠਿ ਵਿਪਲ੍ਲਾਸੋ ਵਿਕ੍ਖਮ੍ਭਿਤੋ ਹੋਤਿ. ਇਤਰੇ ਪਨ ਨਾਮਰੂਪਪਰਿਗ੍ਗਹੇ ਕਤੇਯੇਵ ਵਿਕ੍ਖਮ੍ਭਿਤਾ ਹੋਨ੍ਤਿ. ਯਾਵਚ ਏਤੇ ਦ੍ਵੇ ਅਵਿਕ੍ਖਮ੍ਭਿਤਾ ਹੋਨ੍ਤਿ. ਤਾਵ ਨਾਮਰੂਪਪਰਿਗ੍ਗਹੋਚ ਅਪਰਿਸੁਦ੍ਧੋਯੇਵ ਹੋਤਿ. ਤਂਮੂਲਿਕਾਚ ਕਿਲੇਸਧਮ੍ਮਾ ਅਵਿਕ੍ਖਮ੍ਭਿਤਾ ਏਵ ਹੋਨ੍ਤੀਤਿ ਅਪਿਚ. ਚਤੁਨ੍ਨਂ ਆਹਾਰਾਨਂ ਵਸੇਨ ਚਤੁਧਾ, ਪਞ੍ਚਨ੍ਨਂ ਖਨ੍ਧਾਨਂ ਵਸੇਨ ਪਞ੍ਚਧਾ, ਛਨ੍ਨਂ ਧਾਤੂਨਂ ਵਸੇਨ ਛਧਾਤਿਆਦਿਨਾ ਨਯੇਨ ਨਾਮਰੂਪਂ ਪਰਿਗ੍ਗਹੇ ਤਬ੍ਬਮੇਵ. ਤਤ੍ਥ ਛ ਧਾਤੁਯੋਨਾਮ ਪਥਵਿਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੁ ਆਕਾਸਧਾਤੁ ਵਿਞ੍ਞਾਣਧਾਤੁਯੋ. ਪਕ੍ਕੁਸਾਤਿ ਕੁਲਪੁਤ੍ਤੋ ਹਿ ਇਮਾ ਛ ਧਾਤੁਯੋ ਪਰਿਗ੍ਗਣ੍ਹਿਤ੍ਵਾ ਅਨਾਗਾਮਿਫਲਂ ਪਤ੍ਵਾ ਚਪਿਤ੍ਵਾ ਸੁਦ੍ਧਾਵਾਸੇਸੁ ਨਿਬ੍ਬਤ੍ਤੋਤਿ. ਯਤ੍ਤਕੇ ਵਾ ਪਨ ਧਮ੍ਮੇ ਪਰਿਗ੍ਗਣ੍ਹਨ੍ਤੋ ਅਤ੍ਤਾ ਮੇਤਿ ਪਵਤ੍ਤਮਾਨੇ ਸਞ੍ਞਾਚਿਤ੍ਤਦਿਟ੍ਠਿ ਵਿਪਲ੍ਲਾਸੇ ਵਿਕ੍ਖਮ੍ਭੇਤੁਂ ਸਕ੍ਕੋਤਿ. ਤਤ੍ਤਕਾਪਿ ਪਰਿਗ੍ਗਹੇਤਬ੍ਬਾ ਯੇਵਾਤਿ. ਇਮਸ੍ਮਿਂ ਪਨ ਸਙ੍ਗਹਪਕਰਣੇ ਯੋ ਯੋ ਚਿਤ੍ਤਚੇਤਸਿਕ ਵਿਭਾਗੋ ਰੂਪਵਿਭਾਗੋਚ ਹੇਟ੍ਠਾ ਵੁਤ੍ਤੋ. ਤਸ੍ਸ ਸਬ੍ਬਸ੍ਸ ਵਸੇਨ ਨਾਮਰੂਪਸ੍ਸ ਪਰਿਗ੍ਗਣ੍ਹਨਂ ਵਿਤ੍ਥਾਰਪਰਿਗ੍ਗਹੋਨਾਮ. ਅਯਂਪਨ ਆਦਿਕਮ੍ਮਿਕਾਨਂ ਅਵਿਸਯੋ. ਪਟਿਵਿਦ੍ਧਚਤੁਸਚ੍ਚਾਨਂ ਪਨ ਆਭਿਧਮ੍ਮਿਕਤ੍ਥੇਰਾਨਂ ਏਵ ਵਿਸਯੋਤਿ ਵੇਦਿਤਬ੍ਬੋ. ਨਾਮਰੂਪਂ ਪਰਿਗ੍ਗਣ੍ਹਨ੍ਤਸ੍ਸ ਪਨ ਨਾਮਰੂਪ ਮਤ੍ਤਤੋ ਉਦ੍ਧਂ ਅਞ੍ਞਸ੍ਸ ਕਸ੍ਸਚਿ ਅਭਾਵਦਸ੍ਸਨਤੋਚ ਸਰੀਰਬ੍ਭਨ੍ਤਰੇ ਜੀਵਸਞ੍ਞਿਤੋ ਅਤ੍ਤਾ ਅਤ੍ਥਿ. ਸੋ ਕਰੋਤਿ, ਸੋ ਪਟਿਸਂਵੇਦੇਤਿ, ਸਂਸਰਤਿ, ਸਨ੍ਧਾਵਤੀਤਿ ਏਵਂ ਪਵਤ੍ਤਾ ਦਿਟ੍ਠਿ ਪਹੀਯਤਿ. ਸੁਦ੍ਧੇ ਨਾਮੇ ਏਵਵਾਰੂਪੇ ਏਵਵਾ ਪੁਗ੍ਗਲਸਤ੍ਤਕ੍ਰਿਯਸਞ੍ਞਿਤਾਨਂ ਈਹਾਬ੍ਯਾਪਾਰਾਨਂ ਸਬ੍ਬਸੋ ਅਭਾਵਦਸ੍ਸਨਤੋ ਤਦੁਭਯਸਂਯੋਗੇਏਵ ਤੇਸਂ ਲਬ੍ਭਮਾਨਤਾ ਦਸ੍ਸਨਤੋਚ ਤਦੁਭਯਂਵਾ ਏਕਮੇਕਂਵਾ ਉਦ੍ਦਿਸ੍ਸ ਅਤ੍ਤਾਤਿ ਪਵਤ੍ਤਾ ਦਿਟ੍ਠਿ ਪਹੀਯਤਿ. ਅਤ੍ਤਾ ਜੀਵੋ ਸਤ੍ਤੋ ਪੁਗ੍ਗਲੋ ਮਨੁਸ੍ਸੋ ਦੇਵੋ ਬ੍ਰਹ੍ਮਾਤਿ ਏਵਮਾਦੀਸੁ ਵੋਹਾਰੇਸੁਚ ਵੋਹਾਰ ਮਤ੍ਤੇ ਅਟ੍ਠਤ੍ਵਾ ਅਤ੍ਤਾਨਾਮ ਏਕਨ੍ਤਤੋ ਅਤ੍ਥਿ ਜੀਵੋਨਾਮ ਏਕਨ੍ਤਤੋ ਅਤ੍ਥੀਤਿਆਦਿਨਾ ਤਦਤ੍ਥਾਭਿਨਿਵੇਸਵਸੇਨ ਅਤਿਧਾਵਨਞ੍ਚ ਪਹੀਯਤੀਤਿ ਦਟ੍ਠਬ੍ਬਂ. ਤਦਤ੍ਥਾਭਿਨਿਵੇਸੋਤਿਚ ਅਤ੍ਤਾਨਾਮ ਅਤ੍ਥਿ ਜੀਵੋਨਾਮ ਅਤ੍ਥੀਤਿਆਦਿਨਾ ਦਲ਼੍ਹਤਰਂ ਅਭਿਨਿਵੇਸੋ. ਅਤਿਧਾਵਨਨ੍ਤਿ ਨਾਮਰੂਪਂ ਅਤ੍ਤਾਤਿਆਦਿਨਾ ਗਹਣਂ. ਪਚ੍ਚਯਪਰਿਗ੍ਗਹੋਤਿ ਏਤ੍ਥਪਿ ਦੁਵਿਧੋ ਪਚ੍ਚਯਪਰਿਗ੍ਗਹੋ ਸਙ੍ਖੇਪਤੋ ਵਿਤ੍ਥਾਰਤੋ ਚਾਤਿ. ਤਤ੍ਥ ਵਤ੍ਥਾਰਮ੍ਮਣਵਸੇਨ ਨਾਮਸ੍ਸ ਚਿਤ੍ਤੋਤੁਕਾਹਾਰਵਸੇਨ ਰੂਪਸ੍ਸ ਅਵਿਜ੍ਜਾਤਣ੍ਹੁਪਾਦਾਨਕਮ੍ਮਵਸੇਨ ਤਦੁਭਯਸ੍ਸਚ ਪਚ੍ਚਯਂ ਪਰਿਗ੍ਗਣ੍ਹਨ੍ਤੋ ਸਙ੍ਖੇਪਤੋ ਪਰਿਗ੍ਗਣ੍ਹਾਤਿਨਾਮ. ਹੇਟ੍ਠਾ ਪਚ੍ਚਯਸਙ੍ਗਹੇ ਵਿਭਤ੍ਤੇਹਿ ਪਟਿਚ੍ਚਸਮੁਪ੍ਪਾਦਨਯ ਪਟ੍ਠਾਨਨਯੇਹਿ ਪਰਿਗ੍ਗਣ੍ਹਨ੍ਤੋ ਵਿਤ੍ਥਾਰਤੋ ਪਰਿਗ੍ਗਣ੍ਹਾਤਿਨਾਮ. ਏਤ੍ਥਪਿ ਪਟ੍ਠਾਨਨਯੇਨ ਪਰਿਗ੍ਗਹੋ ਆਦਿਕਮ੍ਮਿਕਾਨਂ ਅਵਿਸਯੋਏਵ. ਪਚ੍ਚਯਂ ਪਰਿਗ੍ਗਣ੍ਹਨ੍ਤਸ੍ਸਪਨ ਯਥਾਵਵਤ੍ਥਿਤਸ੍ਸ ਸਬ੍ਬਸ੍ਸ ਨਾਮਰੂਪਸ੍ਸ ਸਬ੍ਬਸੋ ਪਚ੍ਚਯਾਯਤ੍ਤਵੁਤ੍ਤਿਕਤਾਦਸ੍ਸਨਤੋ ਅਹੇਤੁਕਦਿਟ੍ਠਿ ਪਹੀਯਤਿ. ਅਤ੍ਤਨੋ ਅਨੁਰੂਪਪਚ੍ਚਯਸਾਮਗ੍ਗਿਯਾ ਵਿਨਾ ਅਞ੍ਞਥਾ ਪਵਤ੍ਤਿਯਾ ਅਦਸ੍ਸਨਤੋ ਇਸ੍ਸਰਨਿਮ੍ਮਾਨ ਕਾਲਨਿਮ੍ਮਾਨਾਦਿਕਾ ਵਿਸਮਹੇਤੁਦਿਟ੍ਠਿਚ ਪਹੀਯਤਿ. ਹੇਤੁਸਮ੍ਭਾਰਪਚ੍ਚਯੇਹਿ ਕਮ੍ਮਪ੍ਪਵਤ੍ਤਿਯਾ ਵਿਪਾਕਪ੍ਪਵਤ੍ਤਿਯਾਚ ਅਞ੍ਞਸ੍ਸ ਕਮ੍ਮਕਾਰਕਸ੍ਸਵਾ ਵਿਪਾਕ ਵੇਦਕਸ੍ਸਵਾ ਕਤ੍ਤੁਨੋ ਅਭਾਵਦਸ੍ਸਨਤੋ ਕਾਰਕ ਵੇਦਕ ਦਿਟ੍ਠਿ ਪਹੀਯਤਿ. ਅਨਮਤਗ੍ਗੇਚ ਸਂਸਾਰੇ ਤੀਸੁ ਅਦ੍ਧਾਸੁ ਹੇਤੁਫਲ ਪਰਂਪਰਾਵਸੇਨ ਕੇਵਲਸ੍ਸ ਨਾਮਰੂਪਮਤ੍ਤਸ੍ਸੇਵ ਪਵਤ੍ਤਿਦਸ੍ਸਨਤੋ ਅਹੋਸਿਂ ਨੁਖੋ ਅਹਮਤੀਤਮਦ੍ਧਾਨਨ੍ਤਿ ਏਵਮਾਦਿਕਾਯ ਪੁਗ੍ਗਲਸਤ੍ਤ ਵਿਸਯਾਯ ਸੋਲ਼ਸਵਿਧਾਯ ਕਙ੍ਖਾਯਚ ਅਤਿਕ੍ਕਮੋ ਹੋਤਿ. ਸਭਾਵਧਮ੍ਮਪਵਤ੍ਤਿਯਾਚ ਸੁਟ੍ਠੁ ਦਿਟ੍ਠਾਯ ਦੇਸਨਾਧਮ੍ਮਸ੍ਸ ਸੁਧਮ੍ਮਤਾ ਦਸ੍ਸਨਤੋ ਬੁਦ੍ਧਸੁਬੁਦ੍ਧਤਞ੍ਚ ਦਿਸ੍ਵਾ ਸਤ੍ਥਰਿ ਕਙ੍ਖਤਿ ਧਮ੍ਮੇ ਕਙ੍ਖਤੀਤਿਆਦਿਨਯਪਵਤ੍ਤਾ ਅਟ੍ਠਵਿਧਾਪਿ ਕਙ੍ਖਾ ਪਹੀਯਤੀਤਿ. ਲੋਕੁਤ੍ਤਰਧਮ੍ਮਾਨਂ ਸਙ੍ਖਤਾਨਂਪਿ ਸਤਂ ਅਸਮ੍ਮਸਨੁਪਗਤ੍ਤਾ ਤੇਭੂਮਕਸਙ੍ਖਾਰੇਸੂਤਿ ਵੁਤ੍ਤਂ. ਅਨੁਸਯਸਮੂਹਨਤ੍ਥਞ੍ਚ ਸਮ੍ਮਸਨਨ੍ਤਿ ਕਤ੍ਵਾ ਯਤ੍ਥ ਕਾਮਰਾਗਾਦਯੋ ਅਨੁਸਯਾ ਅਨੁਸੇਨ੍ਤਿ. ਤੇਯੇਵ ਧਮ੍ਮਾ ਸਮ੍ਮਸਨਾਰਹਾ ਹੋਨ੍ਤੀਤਿ ਵੁਤ੍ਤਂ ਤੇਭੂਮਕਸਙ੍ਖਾਰੇਸੂਤਿ. ਇਮਸ੍ਸ ਚ ਪਦਸ੍ਸ ਲਕ੍ਖਣਤ੍ਤਯਂ ਸਮ੍ਮਸਨ੍ਤਸ੍ਸਾਤਿ ਇਮਿਨਾ ਸਮ੍ਬਨ੍ਧੋ. ਅਤੀਤਾਦਿਭੇਦਭਿਨ੍ਨੇਸੂਤਿ ਅਤੀਤਾਨਾਗਤਪਚ੍ਚੁਪ੍ਪਨ੍ਨਜ੍ਝਤ੍ਤਬਹਿਦ੍ਧਾਦੀਹਿ ਏਕਾਦਸਹਿ ਭੇਦੇਹਿ ਭਿਨ੍ਨੇਸੁ. ਖਨ੍ਧਾਦਿਨਯਂਆਰਬ੍ਭਾਤਿ ਪਟਿਸਮ੍ਭਿਦਾਮਗ੍ਗੇ ਵਿਭਤ੍ਤਂ ਖਨ੍ਧਪਞ੍ਚਕਂ ਦ੍ਵਾਰਛਕ੍ਕਂ ਆਰਮ੍ਮਣਛਕ੍ਕਂ ਵਿਞ੍ਞਾਣਛਕ੍ਕਂ ਫਸ੍ਸਛਕ੍ਕਂ ਵੇਦਨਾਛਕ੍ਕਂ ਸਞ੍ਞਾਛਕ੍ਕਨ੍ਤਿ ਏਵਮਾਦਿਕਂ ਸਮ੍ਮਸਨਭੂਮਿਵਿਭਾਗਨਯਂ ਆਰਬ੍ਭ ਅਨੁਗਨ੍ਤ੍ਵਾ ਤਂਨਯਾਨੁਸਾਰੇਨਾਤਿ ਅਤ੍ਥੋ. ਤਤ੍ਥ ਪਨ ਤੇਵੀਸਤਿਯਾ ਧਮ੍ਮਕੋਟ੍ਠਾਸੇਸੁ ਯਸ੍ਸ ਯੋ ਕੋਟ੍ਠਾਸੋ ਪਾਕਟੋ ਹੋਤਿ. ਤੇਨ ਤਂ ਗਹੇਤ੍ਵਾ ਸਮ੍ਮਸਨਂ ਆਰਭਿਤਬ੍ਬਂ. ਸਕ੍ਕੋਨ੍ਤੇਨ ਪਨ ਸਬ੍ਬਮ੍ਪਿ ਗਹੇਤ੍ਵਾ ਆਰਭਿਤਬ੍ਬਮੇਵ. ਕਲਾਪਵਸੇਨਸਂਖਿਪਿਤ੍ਵਾਤਿ ਖਨ੍ਧਪਞ੍ਚਕੇਨ ਯੇ ਰੂਪਂ ਤਾਵ ਅਤੀਤਾਨਾਗਤਪਚ੍ਚੁਪ੍ਪਨ੍ਨਾਦਿਭੇਦਭਿਨ੍ਨਂਪਿ ਸਮਾਨਂ ਸਬ੍ਬਂ ਏਕਰੂਪਪਿਣ੍ਡਭਾਵੇਨ ਸਂਖਿਪਿਤ੍ਵਾ ਏਸ ਨਯੋ ਵੇਦਨਾ ਦੀਸੁਪੀਤਿ. ਤਤ੍ਰਾਯਂ ਨਯੋ. ਯਂਕਿਞ੍ਚਿ ਰੂਪਂ ਅਤੀਤਾਨਾਗਤਪਚ੍ਚੁਪ੍ਪਨ੍ਨਂ ਅਜ੍ਝਤ੍ਤਂਵਾ ਬਹਿਦ੍ਧਾਵਾ ਓਲ਼ਾਰਿਤਂਵਾ ਸੁਖੁਮਂਵਾ ਹੀਨਂਵਾ ਪਣੀਤਂਵਾ ਯਂ ਦੂਰੇ ਸਨ੍ਤਿਕੇਵਾ. ਸਬ੍ਬਂ ਰੂਪਂ ਅਨਿਚ੍ਚਂ ਖਯਟ੍ਠੇਨ ਦੁਕ੍ਖਂ ਭਯਟ੍ਠੇਨ ਅਨਤ੍ਤਾ ਅਸਾਰਕਟ੍ਠੇਨ. ਯਾਕਾਚਿ ਵੇਦਨਾ.ਲ. ਯਾਕਾਚਿ ਸਞ੍ਞਾ.ਲ. ਯੇਕੇਚਿ ਸਙ੍ਖਾਰਾ.ਲ. ਯਂਕਿਞ੍ਚਿ ਵਿਞ੍ਞਾਣਂ.ਲ. ਸਬ੍ਬਂ ਵਿਞ੍ਞਾਣਂ ਅਨਿਚ੍ਚਂ ਖਯਟ੍ਠੇਨ. ਦੁਕ੍ਖਂ ਭਯਟ੍ਠੇਨ ਅਨਤ੍ਤਾ ਅਸਾਰਕਟ੍ਠੇਨਾਤਿ. ਏਤ੍ਥਚ ਸਬ੍ਬਂ ਰੂਪਂ.ਲ. ਸਬ੍ਬਂ ਵਿਞ੍ਞਾਣਨ੍ਤਿ ਗਹਣਮੇਵ ਕਲਾਪਵਸੇਨ ਸਙ੍ਖਿਪਨਨ੍ਤਿ ਦਟ੍ਠਬ੍ਬਂ. ਅਨਿਚ੍ਚਂਖਯਟ੍ਠੇਨਾਤਿ ਏਤ੍ਥ ਰੂਪਂ ਅਨਿਚ੍ਚਂ ਖਯਟ੍ਠੇਨ. ਵੇਦਨਾ ਅਨਿਚ੍ਚਾ. ਸਞ੍ਞਾ ਅਨਿਚ੍ਚਾ. ਸਙ੍ਖਾਰਾ ਅਨਿਚ੍ਚਾ. ਵਿਞ੍ਞਾਣਂ ਅਨਿਚ੍ਚਂ ਖਯਟ੍ਠੇਨਾਤਿਆਦਿਨਾ ਨਯੇਨ ਸਮ੍ਮਸਿਤਬ੍ਬਧਮ੍ਮਪਰਿਗ੍ਗਹੇਨ ਸਹੇਵ ਸਮ੍ਮਸਨਂ ਕਾਤਬ੍ਬਂ. ਇਤਰਥਾ ਸਮ੍ਮਸਨਂ ਨ ਰੁਹਤਿ. ਤਦਤ੍ਥਸ੍ਸ ਪਨ ਪਾਕਟਤ੍ਤਾ ਇਧ ਅਨਿਚ੍ਚਂ ਖਯਟ੍ਠੇਨਾਤਿਆਦਿਨਾ ਸਮ੍ਮਸਨਪਦਮੇਵ ਥੇਰੇਨ ਗਹਿਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਰੂਪਂ ਅਨਿਚ੍ਚਂ ਖਯਟ੍ਠੇਨਾਤਿ ਤਂਤਂਰੂਪਂ ਞਾਣੇਨ ਦਲ਼੍ਹਂ ਗਹੇਤ੍ਵਾ ਅਯਂ ਪਥਵਿਧਾਤੁ ਅਨਿਚ੍ਚਾ ਖਯਟ੍ਠੇਨ. ਅਯਂ ਆਪੋਧਾਤੁ ਅਨਿਚ੍ਚਾ ਖਯਟ੍ਠੇਨਾਤਿਆਦਿਨਾ ਸਮ੍ਮਸਨਂ ਕਾਤਬ੍ਬਂ. ਤਤ੍ਥ ਇਮਸ੍ਮਿਂ ਕਾਯੇ ਸਬ੍ਬਂ ਥਦ੍ਧਕ੍ਰਿਯਾਮਤ੍ਤਂ ਪਥਵੀਨਾਮ. ਸਾਚ ਕ੍ਰਿਯਾ ਸੀਤੁਣ੍ਹਪਰਿਵਤ੍ਤਿਯਾਵਾ ਪਰਿਵਤ੍ਤਤਿ. ਨਾਨਾਹਾਰਪਰਿਵਤ੍ਤਿਯਾ ਵਾ ਨਾਨਾਚਿਤ੍ਤਪਰਿਵਤ੍ਤਿਯਾਵਾ ਨਾਨਿਰਿਯਾਪਥਪਰਿਵਤ੍ਤਿਯਾਵਾ ਨਾਨਾ ਕਾਯਿਕਕ੍ਰਿਯਾ ਪਰਿਵਤ੍ਤਿਯਾਵਾ ਪਰਿਵਤ੍ਤਤਿ. ਨਾਨਾਸਨ੍ਤਤਿ ਸਙ੍ਕਨ੍ਤਿ ਹੋਤੀਤਿ ਅਤ੍ਥੋ. ਤਤ੍ਥ ਨਵਨਵਾਸੁ ਕ੍ਰਿਯਾਸਨ੍ਤਤੀਸੁ ਪਾਤੁਭੋਨ੍ਤੀਸੁ ਪੁਬ੍ਬਪੁਬ੍ਬਕ੍ਰਿਯਾਸਨ੍ਤਤਿਯੋ ਨਸ੍ਸਨ੍ਤਿ. ਯਸ੍ਮਾਚ ਸਨ੍ਤਤਿ ਨਾਮ ਧਮ੍ਮਤੋ ਵਿਸੁਂ ਨਤ੍ਥਿ, ਤਸ੍ਮਾ ਨਵਨਵਸਨ੍ਤਤੀਨਂ ਪਾਤੁਭਾਵੋਨਾਮ ਨਵਨਵਕ੍ਰਿਯਾਨਂ ਉਪ੍ਪਤ੍ਤਿਏਵ. ਪੁਬ੍ਬਪੁਬ੍ਬਸਨ੍ਤਤੀਨਂ ਨਸ੍ਸਨਂਨਾਮ ਪੁਬ੍ਬਪੁਬ੍ਬ ਕ੍ਰਿਯਾਨਂ ਭਿਜ੍ਜਨਮੇਵਾਤਿ. ਏਵਂ ਅਤ੍ਤਨੋ ਕਾਯੇ ਨਾਨਾਥਦ੍ਧਕ੍ਰਿਯਾਨਂ ਪਰਿਵਤ੍ਤਿਂ ਪਸ੍ਸਨ੍ਤੋ ਪਥਵਿਧਾਤੁਯਾ ਖਯਵਯਂ ਪਸ੍ਸਤਿ. ਤਞ੍ਚ ਪਸ੍ਸਨ੍ਤੋ ਤਂਸਹਜਾਤਾਨਂ ਰੂਪਾਨਂ ਖਯਵਯਂ ਪਸ੍ਸਤਿਯੇਵ. ਆਪੋ ਨਾਮ ਆਬਨ੍ਧਨਕ੍ਰਿਯਾਮਤ੍ਤਂ. ਤੇਜੋਨਾਮ ਸੀਤਕ੍ਰਿਯਾਮਤ੍ਤਂ ਉਣ੍ਹ ਕ੍ਰਿਯਾਮਤ੍ਤਞ੍ਚ. ਵਾਯੋਨਾਮ ਵਿਤ੍ਥਮ੍ਭਨਕ੍ਰਿਯਾਮਤ੍ਤਂ. ਇਮਾਚ ਕ੍ਰਿਯਾ ਖਣੇ ਖਣੇ ਪਰਿਵਤ੍ਤਨ੍ਤਿਯੇਵ. ਇਮਾਸਞ੍ਚ, ਵਿਸੁਂ ਵਿਸੁਂ ਸਨ੍ਤਤਿਪਰਿਵਤ੍ਤਿਂ ਪਸ੍ਸਨ੍ਤੋ ਆਪਾਦੀਨਂ ਤਂਸਹਜਾਤਰੂਪਾਨਞ੍ਚ ਖਯਵਯਂ ਪਸ੍ਸਤਿ. ਸਨ੍ਤਤਿਪਰਿਵਤ੍ਤਿਂ ਪਨ ਬਹਿਦ੍ਧਾ ਚਕ੍ਖੁਨਾ ਦਿਸ੍ਵਾ ਜਾਨਾਤਿ, ਸਰੀਰਬ੍ਭਨ੍ਤਰੇ ਪਨ ਕਾਯਸਂਫਸ੍ਸੇਨ ਜਾਨਾਤਿ. ਸਨ੍ਤਤਿਸਰੀਰਭੂਤਾਨਂ ਪਨ ਧਾਤੂਨਂ ਖਯਵਯਂ ਞਾਣੇਨਏਵ ਪਸ੍ਸਤਿ. ਤਸ੍ਮਾ ਅਤ੍ਤਨੋ ਸਰੀਰਬ੍ਭਨ੍ਤਰੇ ਤਂਤਂਸਨ੍ਤਤਿ ਪਰਿਵਤ੍ਤਿਂ ਞਤ੍ਵਾਵਾ ਤਥਾ ਤਥਾ ਕਪ੍ਪੇਤ੍ਵਾ ਵਾ ਰੂਪਧਾਤੂਨਂ ਅਨਿਚ੍ਚਤ੍ਤਂ ਞਾਣੇਨ ਸੁਦਿਟ੍ਠਂ ਕਤ੍ਵਾ ਪੁਨਪ੍ਪੁਨਂ ਸਮ੍ਮਸਿਤਬ੍ਬਂ. ਸੇਸਖਨ੍ਧੇਸੁਪਿ ਤਂਤਂਸਨ੍ਤਤਿਨਾਨਾਤ੍ਤਂ ਞਤ੍ਵਾ ਵੇਦਨਾਦੀਨਂ ਖਯਵਯਂ ਸੁਦਿਟ੍ਠਂ ਕਤ੍ਵਾ ਸਮ੍ਮਸਨਂ ਕਾਤਬ੍ਬਨ੍ਤਿ. ਭਯਟ੍ਠੇਨਾਤਿ ਭਾਯਿਤਬ੍ਬਟ੍ਠੇਨ. ਯਞ੍ਹਿ ਅਨਿਚ੍ਚਂ ਹੋਤਿ. ਖਣਮਤ੍ਤੇਪਿ ਵਿਪਰਿਣਾਮਧਮ੍ਮਂ. ਤਂ ਏਕਨ੍ਤੇਨ ਭਾਯਿਤਬ੍ਬਮੇਵ. ਕਸ੍ਮਾ, ਤਞ੍ਹਿ ਯੋ ਅਭਾਯਿਤ੍ਵਾ ਵਿਸ੍ਸਾਸਂ ਕਰੋਤਿ. ਏਤਂ ਮੇਤਿ ਅਤ੍ਤਨੋ ਅਙ੍ਗਂ ਕਤ੍ਵਾ ਪਰਿਹਰਤਿ. ਤਂ ਅਪਰਿਯਨ੍ਤੇਹਿ ਅਨੇਕਸਹਸ੍ਸੇਹਿ ਅਭਿਸਙ੍ਖਰਣਦੁਕ੍ਖੇਹਿਵਾ ਵਿਪਰਿਣਾਮਦੁਕ੍ਖੇਹਿਵਾ ਅਭਿਣ੍ਹਂ ਪੀਲ਼ੇਤਿ. ਬਾਧਤਿ. ਇਤਿ ਨਾਨਾਦੁਕ੍ਖਧਮ੍ਮੇਹਿ ਅਭਿਣ੍ਹਂ ਸਮ੍ਪਟਿਪੀਲ਼ਨਸਭਾਵਤ੍ਤਾ ਏਕਨ੍ਤੇਨ ਭਾਯਿਤਬ੍ਬਟ੍ਠੇਨ ਦੁਕ੍ਖਂਨਾਮਾਤਿ. ਅਤ੍ਤਪਟਿਪਕ੍ਖਤ੍ਤਾ ਅਨਤ੍ਤਾ. ਯੋ ਹਿ ਇਤੋ ਉਦ੍ਧਂ ਮਯ੍ਹਂ ਅਬ੍ਭਨ੍ਤਰਿਮਤਰੋਨਾਮ ਨਤ੍ਥੀਤਿ ਏਵਂ ਪਰਮਜ੍ਝਤ੍ਤਭਾਵੇਨ ਪਰਿਗ੍ਗਹਿਤੋ ਹੋਤਿ. ਸੋ ਅਤ੍ਤਾਤਿ ਵੁਚ੍ਚਤਿ. ਕਤਮੋ ਪਨ ਤਥਾਪਰਿਗ੍ਗਹਿ ਤਬ੍ਬੋਤਿ. ਯੋ ਅਤ੍ਤਨੋ ਵਸੇ ਸਬ੍ਬਸੋ ਵਤ੍ਤਤਿ. ਯਥਾ ਵੁਤ੍ਤੇਹਿ ਅਭਿਸਙ੍ਖਰਣਕਿਚ੍ਚੇਹਿ ਵਿਨਾ ਕੇਵਲਂ ਅਤ੍ਤਨੋ ਛਨ੍ਦੇਨਵਾ ਵਸੇਨਵਾ ਅਜ੍ਝਾਸਯੇਨਵਾ ਆਣਾਵਿਧਾਨੇਨਵਾ ਨਿਚ੍ਚਂ ਅਵਿਰਜ੍ਝਮਾਨੋ ਪਵਤ੍ਤਤਿ. ਸੋ ਤਥਾ ਪਰਿਗ੍ਗਹੇਤਬ੍ਬੋਤਿ. ਤਥਾਰੂਪੋ ਏਵ ਹਿ ਧਮ੍ਮੋ ਨਿਚ੍ਚਂ ਸੁਖਕਾਮਾਨਂ ਦੁਕ੍ਖਪਟਿਕੂਲਾਨਂ ਸਤ੍ਤਾਨਂ ਅਤ੍ਤਕਿਚ੍ਚਂ ਕਰੋਤਿ ਨਾਮਾਤਿ. ਯੋ ਪਨ ਨਿਚ੍ਚਂ ਸੁਖਕਾਮਾਨਂ ਤੇਸਂ ਯਥਾਪਵਤ੍ਤਂ ਸੁਖਂ ਵਿਦ੍ਧਂਸੇਤਿ ਵਿਕਿਰੇਤਿ. ਦੁਕ੍ਖਪਟਿਕੂਲਾਨਂ ਤੇਸਂ ਅਭਿਸਙ੍ਖਰਣਾਦਿ ਮੂਲਕਂ ਨਾਨਾਦੁਕ੍ਖਂ ਜਨੇਤਿ ਵਡ੍ਢੇਤਿ. ਸੋ ਅਤ੍ਤਪਟਿਪਕ੍ਖੋਏਵ ਹੋਤਿ. ਇਦਞ੍ਚ ਰੂਪਂ ਏਦਿਸਮੇਵ ਹੋਤਿ. ਇਤਿ ਅਤ੍ਤਕਿਚ੍ਚਸ੍ਸ ਅਕਰਣਤੋ ਅਤ੍ਤਪਟਿਪਕ੍ਖਕਿਚ੍ਚਸ੍ਸ ਕਰਣਤੋਚ ਰੂਪਂ ਅਨਤ੍ਤਾਨਾਮਾਤਿ. ਕਸ੍ਮਾ ਪਨੇਤਂ ਅਤ੍ਤਨੋ ਵਸੇ ਨਵਤ੍ਤਤਿ ਅਤ੍ਤਕਿਚ੍ਚਂ ਨ ਕਰੋਤਿ ਅਤ੍ਤਪਟਿਪਕ੍ਖਕਿਚ੍ਚਂ ਕਰੋਤੀਤਿ ਆਹ ਅਸਾਰਕਟ੍ਠੇਨਾਤਿ. ਤਤ੍ਥ ਸਾਰੋਨਾਮ ਪਚ੍ਚਯਸਾਮਗ੍ਗਿਯਾ ਵਿਨਾ ਕੇਵਲਂ ਅਜ੍ਝਾਸਯਮਤ੍ਤੇਨ ਉਪ੍ਪਜ੍ਜਿਤੁਂਵਾ ਉਪ੍ਪਜ੍ਜਿਤ੍ਵਾਚ ਪਚ੍ਚਯੁਪਤ੍ਥਮ੍ਭੇਨ ਵਿਨਾ ਯਦਿਚ੍ਛਕਂ ਪਤਿਟ੍ਠਾਤੁਂ ਵਾ ਸਮਤ੍ਥਭਾਵਸਙ੍ਖਾਤੋ ਥਾਮਬਲਵਿਸੇਸੋ ਵੁਚ੍ਚਤਿ. ਰੂਪਂ ਪਨ ਸਯਂਪਿ ਏਵਰੂਪੋ ਸਾਰੋਨਾਮ ਨ ਹੋਤਿ. ਨਚ ਏਵਰੂਪੇਨ ਸਾਰੇਨ ਯੁਤ੍ਤਨ੍ਤਿ. ਨਹਿ ਤਸ੍ਸ ਪਚ੍ਚਯਸਾਮਗ੍ਗਿਯਾ ਵਿਨਾ ਉਪ੍ਪਜ੍ਜਿਤੁਂਵਾ ਉਪ੍ਪਜ੍ਜਿਤ੍ਵਾਪਿ ਪਚ੍ਚਯੁਪਤ੍ਥਮ੍ਭੇਨ ਵਿਨਾ ਖਣਮਤ੍ਤਂਪਿ ਪਤਿਟ੍ਠਾਤੁਂਵਾ ਥਾਮੋਵਾ ਬਲਂਵਾ ਅਤ੍ਥਿ. ਯਞ੍ਚ ਅਤ੍ਤਨੋ ਥਾਮੇਨ ਬਲੇਨ ਵਿਨਾ ਕੇਵਲਂ ਪਚ੍ਚਯਸਾਮਗ੍ਗਿ ਬਲੇਨੇਵ ਉਪ੍ਪਜ੍ਜਤਿ. ਪਚ੍ਚਯੁਪਤ੍ਥਮ੍ਭੇਨੇਵ ਪਤਿਟ੍ਠਾਤਿ. ਤਂ ਅਨੇਕ ਸਹਸ੍ਸਾਨਿ ਪਚ੍ਚਯਾਭਿਸਙ੍ਖਰਣਦੁਕ੍ਖਾਨਿ ਜਨੇਤ੍ਵਾ ਏਕਨ੍ਤੇਨ ਨਿਚ੍ਚਂ ਅਤ੍ਤਪਟਿਪਕ੍ਖਕਿਚ੍ਚਂ ਕਰੋਤਿ, ਪੀਲ਼ੇਤਿ, ਬਾਧਤਿਯੇਵਾਤਿ. ਏਸਨਯੋ ਵੇਦਨਾ ਅਨਿਚ੍ਚਾ ਖਯਟ੍ਠੇਨਾਤਿਆਦੀਸੁ. ਇਤਿ ਲਕ੍ਖਣਤ੍ਤਯਂ ਸਮ੍ਮ ਸਨ੍ਤਸ੍ਸਾਤਿ ਸਮ੍ਬਨ੍ਧੋ. ਅਦ੍ਧਾਨਵਸੇਨਾਤਿ ਏਕੇਕਭਵਪਰਿਚ੍ਛਿਨ੍ਨਸ੍ਸ ਪਵਤ੍ਤਕਾਲਸ੍ਸ ਵਸੇਨ. ਨਹਿ ਭਵਨ੍ਤਰੇ ਉਪ੍ਪਨ੍ਨਂ ਖਨ੍ਧਪਞ੍ਚਕਂ ਅਞ੍ਞਂ ਭਵਨ੍ਤਰਂ ਗਚ੍ਛਤਿ. ਤਸ੍ਮਿਂ ਤਸ੍ਮਿਂ ਭਵੇਏਵ ਅਸੇਸਂ ਨਿਰੁਜ੍ਝਤੀਤਿ. ਅਪਿਚ, ਏਕਸ੍ਮਿਂ ਭਵੇਪਿ ਤਿਣ੍ਣਂ ਵਯਾਨਂ ਮਨ੍ਦਾਦੀਨਂ ਦਸਨ੍ਨਂ ਦਸਕਾਨਂ ਸਂਵਚ੍ਛਰਉਤੁ ਮਾਸ ਪਕ੍ਖਤਿਥਿ ਅਹੋਰਤ੍ਤਿ ਯਾਮ ਪਹਾਰਾਦੀਨਞ੍ਚ ਵਸੇਨ ਅਦ੍ਧਾਨਭੇਦੋ ਯੋਜੇਤਬ੍ਬੋ. ਸਨ੍ਤਤਿਵਸੇਨਾਤਿ ਸਭਾਗੇਕਸਨ੍ਤਾਨਵਸੇਨ ਪਵਤ੍ਤਮਾਨਾਯ ਰੂਪਸਨ੍ਤਤਿਯਾਵਾ ਅਰੂਪ ਸਨ੍ਤਤਿਯਾਵਾ ਵਸੇਨ. ਖਣਵਸੇਨਾਤਿ ਰੂਪਾਰੂਪਧਮ੍ਮਾਨਂ ਆਯੁ ਪਰਿਮਾਣਸਙ੍ਖਾਤਸ੍ਸ ਖਣਸ੍ਸ ਵਸੇਨ. ਏਤ੍ਥਚ ਖਣਵਸੇਨ ਸਮ੍ਮਸਨਂਨਾਮ ਸਬ੍ਬਞ੍ਞੁਬੁਦ੍ਧਾਨਂ ਏਵ ਵਿਸਯੋ ਸਿਯਾ, ਨ ਸਾਵਕਾਨਂ. ਨਹਿ ਤੇ ਏਵਂ ਪਰਿਤ੍ਤਕੇ ਖਣੇ ਉਪ੍ਪਾਦਂਵਾ ਨਿਰੋਧਂਵਾ ਸਮ੍ਪਾਪੁਣਿਤੁਂ ਸਕ੍ਕੋਨ੍ਤੀਤਿ. ਤਸ੍ਮਾ ਅਦ੍ਧਾਸਨ੍ਤਤਿਵਸੇਨ ਸਮ੍ਮਸਨਮੇਵ ਇਧਾ ਧਿਪ੍ਪੇਤਨ੍ਤਿ ਦਟ੍ਠਬ੍ਬਂ. ਲਕ੍ਖਣਤ੍ਤਯਂਸਮ੍ਮਸਨ੍ਤਸ੍ਸਾਤਿ ਤੇਸੁ ਤੇਭੂਮਕ ਸਙ੍ਖਾਰੇਸੁ ਧਮ੍ਮੇਸੁ ਤਿਲਕ੍ਖਣਾਨਿ ਆਰੋਪੇਤ੍ਵਾ ਤੇ ਧਮ੍ਮੇ ਪੁਨਪ੍ਪੁਨਂ ਆਮਸਨ੍ਤਸ੍ਸ ਪਰਿਮਜ੍ਜਨ੍ਤਸ੍ਸ. ਤੇਸਂ ਧਮ੍ਮਾਨਂ ਅਨਿਚ੍ਚ ਜਾਤਿਕਤਂਵਾ ਦੁਕ੍ਖਜਾਤਿਕਤਂਵਾ ਅਨਤ੍ਤਜਾਤਿਕਤਂਵਾ ਞਾਣੇ ਸੁਟ੍ਠੁ ਪਾਕਟਂ ਕਰੋਨ੍ਤਸ੍ਸਾਤਿ ਅਤ੍ਥੋ. ਵਿਸੇਸਤੋ ਪਨ ਇਮਸ੍ਮਿਂ ਞਾਣੇ ਅਨਿਚ੍ਚਲਕ੍ਖਣਦਸ੍ਸਨਮੇਵ ਪਧਾਨਂ. ਤਸ੍ਮਿਂ ਦਿਟ੍ਠੇਯੇਵ ਇਤਰਾਨਿ ਕਮੇਨ ਦਿਟ੍ਠਾਨਿ ਹੋਨ੍ਤਿ. ਅਦਿਟ੍ਠੇਚ ਅਦਿਟ੍ਠਾਨੀਤਿ. ਤਸ੍ਮਾ ਆਦਿਤੋ ਅਨਿਚ੍ਚਲਕ੍ਖਣਸ੍ਸੇਵ ਸੁਟ੍ਠੁ ਪਾਕਟਭਾਵੋ ਅਧਿਪ੍ਪੇਤੋਤਿ. ਤੇਸ੍ਵੇਵਾਤਿ ਤੇਭੂਮਕਸਙ੍ਖਾਰੇਸੁ ਏਵ. ਪਚ੍ਚਯਵਸੇਨਾਤਿ ਰੂਪਕ੍ਖਨ੍ਧੇ ਤਾਵ ਅਵਿਜ੍ਜਾਤਣ੍ਹੁਪਾਦਾਨਕਮ੍ਮਾਹਾਰਸਙ੍ਖਾਤਾਨਂ ਪਚ੍ਚਯਾਨਂ ਵਸੇਨ. ਵੇਦਨਾਸਞ੍ਞਾਸਙ੍ਖਾਰੇਸੁ ਪਨ ਆਹਾਰਟ੍ਠਾਨੇ ਫਸ੍ਸੋ ਵਤ੍ਤਬ੍ਬੋ. ਵਿਞ੍ਞਾਣੇਚ ਨਾਮਰੂਪਂ. ਤਤ੍ਰਾਯਂ ਨਯੋ. ਅਤੀਤਾਨਨ੍ਤਰਭਵੇ ਅਵਿਜ੍ਜਾਤਣ੍ਹੁਪਾਦਾਨ ਕਮ੍ਮੇਸੁ ਅਪ੍ਪਹੀਨਵਸੇਨ ਸਮੁਦਿਤੇਸੁ ਇਮਸ੍ਮਿਂ ਭਵੇ ਪਟਿਸਨ੍ਧਿਤੋ ਪਟ੍ਠਾਯ ਰੂਪਸਨ੍ਤਤਿਯੋ ਵੇਦਨਾਸਞ੍ਞਾਸਙ੍ਖਾਰ ਵਿਞ੍ਞਾਣਸਨ੍ਤਤਿਯੋਚ ਸਮੁਦੇਨ੍ਤਿ. ਯਾਵ ਮਰਣਕਾਲਾ ਖਣੇ ਖਣੇ ਨਾਨਾਕਲਾਪਵਸੇਨ ਉਦੇਨ੍ਤਿ ਪਸਵਨ੍ਤਿ. ਤੇਸੁ ਪਨ ਤਸ੍ਮਿਂ ਭਵੇ ਏਵ ਪਹੀਨਵਸੇਨ ਨਿਰੁਦ੍ਧੇਸੁ ਤਾ ਰੂਪਾਰੂਪਸਨ੍ਤਤਿਯੋ ਨਿਰੁਜ੍ਝਨ੍ਤਿ. ਭਵਨ੍ਤਰੇ ਪੁਨ ਅਨੁਪ੍ਪਾਦਸਙ੍ਖਾਤਂ ਨਿਰੋਧਂ ਪਾਪੁਣਨ੍ਤਿ. ਏਤ੍ਥ ਪਨ ਯਥਾ ਉਦਕੇ ਸਤਿ ਮਚ੍ਛਾਨਾਮ ਹੋਨ੍ਤਿ, ਅਸਤਿ ਨ ਹੋਨ੍ਤਿ. ਏਵਂ ਕਮ੍ਮਜੇਸੁ ਨਾਮਰੂਪੇਸੁ ਸਤਿ ਇਤਰਾਨਿ ਨਾਮਰੂਪਾਨਿ ਹੋਨ੍ਤਿ. ਅਸਤਿ ਨ ਹੋਨ੍ਤੀਤਿ ਇਤਰਾਨਿ ਸਬ੍ਬਾਨਿ ਕਮ੍ਮਜੇਸੁ ਸਙ੍ਗਹੇਤ੍ਵਾ ਕਮ੍ਮਵਸੇਨ ਉਦਯਬ੍ਬਯਵਿਧਾਨਂ ਗਹਿਤਨ੍ਤਿ ਦਟ੍ਠਬ੍ਬਂ. ਏਵਂ ਅਵਿਜ੍ਜਾਤਣ੍ਹੁਪਾਦਾਨਕਮ੍ਮਪਚ੍ਚਯਾਨਂ ਵਸੇਨ ਪਞ੍ਚਕ੍ਖਨ੍ਧਸ੍ਸ ਉਦਯਬ੍ਬਯਪਵਤ੍ਤਿ ਹੋਤੀਤਿ. ਕਮ੍ਮਵਸੇਨ ਪਨ ਇਮਸ੍ਮਿਂ ਭਵੇ ਸਮੁਦੇਨ੍ਤਾਨਿਪਿ ਪਟਿਸਨ੍ਧਿਤੋ ਪਟ੍ਠਾਯ ਖਣੇ ਖਣੇ ਕਬਲ਼ੀਕਾਰਾਹਾਰੂਪਤ੍ਥਮ੍ਭਨਂ ਲਦ੍ਧਾ ਏਵ ਯਥਾ ਪਵਤ੍ਤਰੂਪਸਨ੍ਤਤਿਯੋ ਅਨੁਬਨ੍ਧ ਮਾਨਾ ਨਵਨਵਾ ਰੂਪਸਨ੍ਤਤਿਯੋ ਸਮੁਦੇਨ੍ਤਿ. ਅਲਦ੍ਧਾ ਪਨ ਨਿਰੁਜ੍ਝਨ੍ਤਿ. ਤਂ ਸਨ੍ਤਤਿਯਂ ਪੁਨ ਅਨੁਪ੍ਪਾਦਸਙ੍ਖਾਤਂ ਏਕਭਵਨਿਰੋਧਂ ਪਾਪੁਣਨ੍ਤਿ, ਯਥਾ ਪਵਤ੍ਤਸਨ੍ਤਤਿਯੋ ਵਾ ਛਿਜ੍ਜਨ੍ਤਿ ਭਿਜ੍ਜਨ੍ਤਿ ਅਨ੍ਤਰਧਾਯਨ੍ਤੀਤਿ.
ਵੇਦਨਾਸਞ੍ਞਾਸਙ੍ਖਾਰਾ ਪਨ ਬਹਿਦ੍ਧਾ ਆਰਮ੍ਮਣੇਸੁ ਆਪਾਤਾਗਤੇਸੁ ਆਰਮ੍ਮਣਸਮ੍ਫਸ੍ਸਂ ਲਦ੍ਧਾਏਵ ਛਦ੍ਵਾਰਿਕਾ ਕੁਸਲਾਕੁਸਲਵਿਪਾਕ ਕ੍ਰਿਯਭੂਤਾ ਸਮੁਦੇਨ੍ਤਿ. ਨਵਨਵਾ ਸਨ੍ਤਤਿਯੋ ਪਾਤੁਭਵਨ੍ਤਿ. ਅਲਦ੍ਧਾ ਪਨ ਨਿਰੁਜ੍ਝਨ੍ਤਿ. ਸਨ੍ਤਤਿਂ ਨ ਘਟੇਨ੍ਤਿ. ਵਿਞ੍ਞਾਣਂਚ ਸਹਜਾਤ ਨਾਮੇਚ ਵਤ੍ਥੁਰੂਪੇਚ ਪਵਤ੍ਤਮਾਨੇਏਵ ਪਵਤ੍ਤਤਿ. ਨਿਵਤ੍ਤਮਾਨੇ ਨਿਵਤ੍ਤਤੀਤਿ. ਖਣਵਸੇਨਾਤਿ ਵੁਤ੍ਤਪ੍ਪਕਾਰੇ ਪਚ੍ਚਯੇ ਅਨਪੇਕ੍ਖਿਤ੍ਵਾ ਕੇਵਲਂ ਨਾਮਰੂਪਾਨਂ ਪਵਤ੍ਤਿਕ੍ਖਣਵਸੇਨ. ਖਣਸਦ੍ਦੇਨ ਚੇਤ੍ਥ ਸਮ੍ਮਸਨਞਾਣੇ ਵੁਤ੍ਤਰੂਪਸਨ੍ਤਤਿ ਨਾਮਸਨ੍ਤਤਿਯੋਪਿ ਗਹੇਤਬ੍ਬਾ. ਨਹਿ ਸਾਵਕਾਨਂ ਞਾਣਂ ਖਣਵਸੇਨ ਨਾਮਰੂਪਾਨਂ ਉਦਯਂਵਾ ਵਯਂ ਵਾ ਸਮ੍ਪਾਪੁਣਿਤੁਂ ਸਕ੍ਕੋਤੀਤਿ. ਯਥਾ ਪਨ ਰਤ੍ਤਨ੍ਧਕਾਰੇ ਅਨ੍ਤੋ ਲੇਣੇ ਮਹਨ੍ਤੋ ਤਮੋਖਨ੍ਧੋ ਜਾਯਤਿ. ਦੀਪਂ ਜਾਲੇਨ੍ਤਸ੍ਸ ਪਨ ਦੀਪੋਭਾਸੋ ਏਕਕ੍ਖਣੇ ਏਵ ਸਕਲਂ ਅਨ੍ਤੋਲੇਣਂ ਫਰਮਾਨੋ ਉਦੇਤਿ. ਤਮੋਖਨ੍ਧੋ ਵੇਤਿ. ਆਲੋਕਸ੍ਸ ਉਦਯੋ ਹੋਤਿ. ਤਮੋਖਨ੍ਧਸ੍ਸ ਵਯੋ. ਪੁਨ ਦੀਪੇ ਨਿਬ੍ਬਾਪੀਯਮਾਨੇ ਤਮੋਖਨ੍ਧਸ੍ਸ ਉਦਯੋ ਹੋਤਿ. ਆਲੋਕਸ੍ਸ ਵਯੋ. ਏਵ ਮੇਵਂ ਸਰੀਰੇ ਨਾਨਾਉਤੁਵਸੇਨਵਾ ਨਾਨਾਹਾਰਵਸੇਨਵਾ ਨਾਨਾਚਿਤ੍ਤ ਵਸੇਨਵਾ ਨਾਨਿਰਿਯਾਪਥਵਸੇਨਵਾ ਨਾਨਾਪਯੋਗਵਸੇਨਵਾ ਉਦਯਪਕ੍ਖਾਨਂ ਵਯਪਕ੍ਖਾਨਞ੍ਚ ਨਾਨਾਸਨ੍ਤਤੀਨਂ ਉਦਯਞ੍ਚ ਉਦਯਤੋ ਵਯਞ੍ਚ ਵਯਤੋ ਸੁਦਿਟ੍ਠਂ ਕਤ੍ਵਾ ਸਮਨੁਪਸ੍ਸਨ੍ਤਸ੍ਸਾਤਿ ਅਤ੍ਥੋ. ਏਵਂ ਸਮਨੁਪਸ੍ਸਨ੍ਤਸ੍ਸ ਪਨ ਆਰਦ੍ਧਵਿਪਸ੍ਸਕਭਾਵਂ ਪਤ੍ਤਸ੍ਸ ਉਦਯਬ੍ਬਯ ਞਾਣੇ ਤਿਕ੍ਖੇ ਸੂਰੇ ਵਹਨ੍ਤੇ ਦਸਵਿਧਾ ਵਿਪਸ੍ਸਨੁਪਕ੍ਕਿਲੇਸਸਙ੍ਖਾਤਾ ਪਾਰਿਪਨ੍ਥਕਧਮ੍ਮਾ ਉਪ੍ਪਜ੍ਜਨ੍ਤਿ. ਤੇ ਦਸ੍ਸੇਤੁਂ ਓਭਾਸੋਤਿਆਦਿਗਾਥ ਮਾਹ. ਤਤ੍ਥ ਓਭਾਸੋਤਿ ਵਿਪਸ੍ਸਨਾ ਚਿਤ੍ਤਸਮੁਟ੍ਠਿਤੋ ਸਰੀਰੋਭਾਸੋ. ਪੀਤੀਤਿ ਵਿਪਸ੍ਸਨਾਚਿਤ੍ਤਸਮ੍ਪਯੁਤ੍ਤਾ ਪਞ੍ਚਵਿਧਾ ਪੀਤਿ. ਪਸ੍ਸਦ੍ਧੀਤਿ ਦੁਵਿਧਾਪਸ੍ਸਦ੍ਧਿ. ਅਧਿਮੋਕ੍ਖੋਤਿ ਸਦ੍ਧਾਧਿਮੋਕ੍ਖੋ. ਪਗ੍ਗਹੋਤਿ ਵੀਰਿਯਂ. ਸੁਖਨ੍ਤਿ ਸੋਮਨਸ੍ਸਂ. ਞਾਣਨ੍ਤਿ ਵਿਪਸ੍ਸਨਾ ਞਾਣਂ. ਉਪਟ੍ਠਾਨਨ੍ਤਿ ਸਤਿ. ਉਪੇਕ੍ਖਾਤਿ ਤਤ੍ਰਮਜ੍ਝਤ੍ਤੁਪੇਕ੍ਖਾ ਚੇਵ ਆਵਜ੍ਜਨੁਪੇਕ੍ਖਾ ਚ. ਨਿਕਨ੍ਤੀਤਿ ਓਭਾਸਾਦੀਹਿ ਸਹ ਵਿਪਸ੍ਸਨਾਯ ਆਲਯਂ ਕੁਰੁਮਾਨਾ ਸੁਖੁਮਾ ਤਣ੍ਹਾ. ਅਯਮੇਵ ਪਨ ਏਕਨ੍ਤਤੋ ਵਿਪਸ੍ਸਨੁਪਕ੍ਕਿਲੇਸੋ ਹੋਤਿ. ਓਭਾਸਾਦਯੋ ਪਨ ਤਸ੍ਸਾ ਵਤ੍ਥੁਭੂਤਤ੍ਤਾ ਉਪਕ੍ਕਿਲੇਸਾਤਿ ਵੁਤ੍ਤਾ. ਤੇਸੁ ਹਿ ਉਪ੍ਪਜ੍ਜਮਾਨੇਸੁ ਨ ਵਤ ਮੇ ਇਤੋ ਪੁਬ੍ਬੇ ਏਵਰੂਪੋ ਓਭਾਸੋ ਉਪ੍ਪਨ੍ਨਪੁਬ੍ਬੋ. ਏਵਰੂਪਾ ਪੀਤਿ.ਲ. ਉਪੇਕ੍ਖਾ ਉਪ੍ਪਨ੍ਨਪੁਬ੍ਬਾ ਅਦ੍ਧਾ ਮਗ੍ਗਂ ਪਤ੍ਤੋਸ੍ਮਿ. ਫਲਂ ਪਤ੍ਤੋਸ੍ਮੀਤਿ ਏਵਂ ਅਸ੍ਸਾਦਸਹਿਤਾ ਅਮਗ੍ਗੇ ਮਗ੍ਗਸਞ੍ਞਾ ਅਫਲੇ ਫਲਸਞ੍ਞਾ ਉਪ੍ਪਜ੍ਜਤਿ. ਤਦਾ ਕੋਚਿ ਅਬ੍ਯਤ੍ਤੋ ਯੋਗਾਵਚਰੋ ਕਮ੍ਮਟ੍ਠਾਨਂ ਵਿਸ੍ਸਜ੍ਜੇਤ੍ਵਾ ਅਧਿਮਾਨਵਸੇਨ ਵਿਕ੍ਖਿਪਨ੍ਤੋ ਵਿਚਰਤੀਤਿ. ਬ੍ਯਤ੍ਤੋ ਪਨ ਤਾਵਦੇਵ ਸਭਿਂ ਪਟਿਲਭਿਤ੍ਵਾ ਇਦਾਨਿ ਮਮ ਏਤੇਸੁ ਓਭਾਸਾਦੀਸੁ ਏਤਂ ਮਮ ਏਸੋ ਹ ਮਸ੍ਮਿ ਏਸੋ ਮੇ ਅਤ੍ਤਾਤਿ ਚਿਤ੍ਤਸ੍ਸ ਨਿਕਾਮਨਾਕਾਰੋ ਪਞ੍ਞਾਯਤਿ. ਨਚ ਲੋਕੁਤ੍ਤਰਧਮ੍ਮੋਨਾਮ ਈਦਿਸਸ੍ਸ ਨਿਕਾਮਨਸ੍ਸ ਵਤ੍ਥੁ. ਅਦ੍ਧਾ ਮਮ ਸਂਕਿਲੇਸਧਮ੍ਮੋ ਉਪ੍ਪਨ੍ਨੋ. ਸੋ ਵਡ੍ਢਮਾਨੋ ਮਂ ਨਿਯ੍ਯਾਨਮੁਖਤੋ ਪਾਤੇਤ੍ਵਾ ਵਟ੍ਟਮੁਖੇ ਯੋਜੇਸ੍ਸਤਿ. ਹਨ੍ਦ ਤੇਸ੍ਵੇਵ ਲਕ੍ਖਣਤ੍ਤਯਂ ਆਰੋਪੇਤ੍ਵਾ ਨਿਕਨ੍ਤਿਂ ਸੋਧੇਤ੍ਵਾ ਯਥਾਪਵਤ੍ਤਂ ਵਿਪਸ੍ਸਨਾਵੀਥਿਂ ਪਟਿਪਾਦੇਸ੍ਸਾਮੀਤਿ ਤੇ ਓਭਾਸਾਦਯੋ ਏਵ ਤਾਵ ਪਰਿਗ੍ਗਣ੍ਹਾਤਿ. ਅਯਂ ਮੇ ਓਭਾਸੋ ਅਨਿਚ੍ਚੋ ਖਯਟ੍ਠੇਨ ਦੁਕ੍ਖੋ ਭਯਟ੍ਠੇਨ ਅਨਤ੍ਤਾ ਅਸਾਰਕਟ੍ਠੇਨਾਤਿਆਦਿਨਾ ਸਮ੍ਮਸਤੀਤਿ ਅਤ੍ਥੋ. ਏਵਂ ਤੇ ਓਭਾਸਾਦਿਕੇ ਵਿਪਸ੍ਸਨਾਯ ਉਪਕ੍ਕਿਲੇਸਭੂਤੇ ਪਰਿਪਨ੍ਥ ਧਮ੍ਮੇ ਪਰਿਗ੍ਗਣ੍ਹਿਤ੍ਵਾ ਤਪ੍ਪਰਿਗ੍ਗਹਵਸੇਨ ਤੇਸੁ ਨਿਕਨ੍ਤਿਂ ਪਰਿਯਾਦਿ ਯਿਤ੍ਵਾ ਠਿਤਸ੍ਸ ਉਪ੍ਪਨ੍ਨਂ ਮਗ੍ਗਾਮਗ੍ਗਲਕ੍ਖਣਵਵਤ੍ਥਾਨਞਾਣਂ ਮਗ੍ਗਾਮਗ੍ਗਞਾਣ ਦਸ੍ਸਨਵਿਸੁਦ੍ਧਿਨਾਮ. ਅਮਗ੍ਗੇਸੁ ਓਭਾਸਾਦੀਸੁ ਮਗ੍ਗਸਞ੍ਞਾਮਲਤੋ ਯਥਾ ਵੁਤ੍ਤਨਿਕਨ੍ਤਿਮਲਤੋਚ ਵਿਸੁਦ੍ਧਤ੍ਤਾ. ਤਞ੍ਹਿ ਞਾਣਂ ਤੇਸੁ ਨਿਕਨ੍ਤਿਯਾਪਿ ਵਿਕ੍ਖਮ੍ਭਿਤਾਯ ਏਵ ਓਭਾਸਾਦਿਪਟਿਬਨ੍ਧਤੋ ਸੁਟ੍ਠੁ ਪਰਿਸੁਦ੍ਧਂਨਾਮ ਹੋਤੀਤਿ.
[੨੪੫] ਵਿਭਾਵਨਿਯਂ ਪਨ
ਅਨਿਚ੍ਚਾਦਿਵਸੇਨ ਓਭਾਸਾਦਿ ਪਟਿਬਨ੍ਧਪਰਿਗ੍ਗਹਂ ਵਿਸੁਂ ਅਵਤ੍ਵਾ ਮਗ੍ਗਾਮਗ੍ਗਜਾਨਨਮਤ੍ਤੇਨੇਵ ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿਨਾਮ ਵੁਤ੍ਤਾ. ਸਾ ਅਟ੍ਠਕਥਾਯ ਨ ਸਮੇਤਿ.
ਤਥਾ ਪਰਿਪਨ੍ਥਵਿਮੁਤ੍ਤਸ੍ਸਾਤਿ ਤਥਾ ਪਰਿਗ੍ਗਹੇਤ੍ਵਾ ਤਤੋ ਵਿਪਸ੍ਸਨੁਪਕ੍ਕਿਲੇਸਪਰਿਪਨ੍ਥਤੋ ਵਿਮੁਤ੍ਤਸ੍ਸ ਯਾਵਾਨੁਲੋਮਾਤਿ ਯਾਵਅਨੁਲੋਮਞਾਣਾ. ਤਿਲਕ੍ਖਣਂ ਆਰੋਪੇਤ੍ਵਾਤਿ ਸਮ੍ਬਨ੍ਧੋ. ਵਿਪਸ੍ਸਨਾਪਰਿਪਾਕਂਆਗਮ੍ਮਾਤਿ ਸਙ੍ਖਾਰੁਪੇਕ੍ਖਾਭਾਵਂ ਪਤ੍ਵਾ ਤਿਵਿਧ ਵਿਮੋਕ੍ਖਮੁਖਭਾਵਪ੍ਪਤ੍ਤਿਯਾਚੇਵ ਸਤ੍ਤਅਰਿਯਪੁਗ੍ਗਲਵਿਭਾਗਸ੍ਸ ਪਚ੍ਚਯ ਭਾਵਪ੍ਪਤ੍ਤਿਯਾਚ ਵਿਪਸ੍ਸਨਾਞਾਣਸ੍ਸ ਪਰਿਪਾਕਂ ਆਗਮ੍ਮ ਪਟਿਚ੍ਚ. ਇਦਾਨਿ ਅਪ੍ਪਨਾ ਉਪ੍ਪਜ੍ਜਿਸ੍ਸਤੀਤਿ ਵਤ੍ਤਬ੍ਬਕ੍ਖਣੇਤਿ ਸਮ੍ਬਨ੍ਧੋ. ਅਪ੍ਪਨਾ ਤਿਚ ਸੋਤਾਪਤ੍ਤਿਮਗ੍ਗਅਪ੍ਪਨਾ. ਦ੍ਵੇਤੀਣਿਵਿਪਸ੍ਸਨਾਚਿਤ੍ਤਾਨੀਤਿ ਤਿਕ੍ਖਪਞ੍ਞਸ੍ਸ ਦ੍ਵੇ ਵਿਪਸ੍ਸਨਾਚਿਤ੍ਤਾਨਿ. ਮਨ੍ਦਪਞ੍ਞਸ੍ਸ ਤੀਣਿ ਵਿਪਸ੍ਸਨਾਚਿਤ੍ਤਾਨਿ. ਯਂਕਿਞ੍ਚੀਤਿ ਤੀਸੁ ਲਕ੍ਖਣੇਸੁ ਅਞ੍ਞਤਰਂ ਯਂਕਿਞ੍ਚਿ. ਯਾਸਿਖਾਪਤ੍ਤਾਸਾਨੁਲੋਮਾਸਙ੍ਖਾਰੁਪੇਕ੍ਖਾਤਿ ਮਤ੍ਥਕਪਤ੍ਤਾ ਅਨੁਲੋਮਞਾਣਸਹਿਤਾ ਯਾ ਸਙ੍ਖਾਰੁਪੇਕ੍ਖਾ ਅਤ੍ਥਿ. ਸਾ ਵੁਟ੍ਠਾਨਗਾਮਿਨਿਵਿਪਸ੍ਸਨਾਤਿਚ ਵੁਚ੍ਚਤੀਤਿ ਯੋਜਨਾ. ਸਙ੍ਖਾਰੁਪੇਕ੍ਖਾਞਾਣਂ ਅਨੁਲੋਮਞਾਣਨ੍ਤਿ ਇਮਾਨਿ ਦ੍ਵੇ ਞਾਣਾਨਿ ਵੁਟ੍ਠਾਨਗਾਮਿਨਿ ਵਿਪਸ੍ਸਨਾਨਾਮਾਤਿ ਵੁਚ੍ਚਨ੍ਤੀਤਿ ਵੁਤ੍ਤਂ ਹੋਤਿ. ਇਦਂ ਪਨ ਪਰਿਪਾਕਗਤਵਿਪਸ੍ਸਨਾ ਦਸ੍ਸਨਵਚਨਂ. ਏਤ੍ਥਚ ਵੁਟ੍ਠਾਨਨ੍ਤਿ ਮਗ੍ਗੋ ਵੁਚ੍ਚਤਿ. ਸੋ ਹਿ ਵਿਪਸ੍ਸਨਾਞਾਣਸ੍ਸ ਆਰਮ੍ਮਣਭੂਤ ਸਙ੍ਖਾਰਨਿਮਿਤ੍ਤਤੋਵਾ ਸਯਂ ਸਂਯੋਜਨਵਤ੍ਥੁਭਾਵਤੋਵਾ ਵੁਟ੍ਠਾਤਿ. ਤਂ ਸਮਙ੍ਗਿਪੁਗ੍ਗਲਂਵਾ ਪੁਥੁਜ੍ਜਨਭਾਵਤੋ ਸਮੁਦਯਪਹਾਨਵਸੇਨ ਵਟ੍ਟ ਪਵਤ੍ਤਤੋਚ ਵੁਟ੍ਠਾਪੇਤਿ. ਤਸ੍ਮਾ ਵੁਟ੍ਠਾਨਨ੍ਤਿ ਵੁਚ੍ਚਤਿ. ਅਵਸ੍ਸਂ ਵੁਟ੍ਠਾਨਂ ਗਚ੍ਛਨ੍ਤਿ ਏਤਾਯਾਤਿ ਵੁਟ੍ਠਾਨਗਾਮਿਨੀਤਿ ਏਵਂ ਦ੍ਵਿਨ੍ਨਂ ਞਾਣਾਨਂ ਵੁਟ੍ਠਾਨ ਗਾਮਿਨਿਭਾਵੋ ਵੇਦਿਤਬ੍ਬੋ. ਤਤੋਪਰਨ੍ਤਿ ਦ੍ਵਿਨ੍ਨਂਵਾ ਤਿਣ੍ਣਂਵਾ ਵਿਪਸ੍ਸਨਾ ਚਿਤ੍ਤਾਨਂ ਪਵਤ੍ਤਿਯਾ ਪਰਂ ਨਿਬ੍ਬਾਨਂ ਆਲਮ੍ਬਿਤ੍ਵਾਤਿ ਮਗ੍ਗਸ੍ਸ ਆਵਜ੍ਜਨਟ੍ਠਾਨਿਯਂ ਹੁਤ੍ਵਾ ਤਸ੍ਸ ਪੁਰੇਚਰਭਾਵੇਨ ਨਿਬ੍ਬਾਨਮੇਵ ਆਰਮ੍ਮਣਂ ਕਤ੍ਵਾ. ਤਤੋ ਯੇਵਚ ਤਂ ਵਿਪਸ੍ਸਨਾਨਾਮਂ ਨਲਭਤੀਤਿ. ਪੁਥੁਜ੍ਜਨ ਗੋਤ੍ਤਮਭਿਭਵਨ੍ਤਨ੍ਤਿ ਏਤੇਨ ਗੋਤ੍ਤਂ ਭਵਤਿ ਅਭਿਭਵਤੀਤਿ ਗੋਤ੍ਰਭੁ. ਗੋਤ੍ਤਨ੍ਤਿ ਚੇਤ੍ਥ ਪਰਿਪੁਣ੍ਣਕਿਲੇਸ ਸਮਾਯੋਗੇਨ ਅਨਰਿਯਭਾਵਸਙ੍ਖਾਤਾ ਪੁਥੁਜ੍ਜਨਜਾਤਿ ਵੁਚ੍ਚਤੀਤਿ ਇਮਮਤ੍ਥਂ ਦਸ੍ਸੇਤਿ. ਅਰਿਯਗੋਤ੍ਤਮਭਿਸਮ੍ਭੋਨ੍ਤਞ੍ਚਾਤਿ ਏਤੇਨ ਗੋਤ੍ਤਂ ਭਵਤਿ ਪਾਪੁਣਾਤੀਤਿ ਗੋਤ੍ਰਭੁ. ਗੋਤ੍ਤਨ੍ਤਿਚ ਤਂਤਂ ਕਿਲੇਸ ਵਿਸੁਦ੍ਧਭਾਵ ਸਙ੍ਖਾਤਾ ਅਰਿਯਜਾਤਿ ਵੁਚ੍ਚਤੀਤਿ ਇਮਮਤ੍ਥਂ ਦਸ੍ਸੇਤਿ. ਮਗ੍ਗੋ ਅਪ੍ਪਨਾ ਵੀਥਿਂ ਓਤਰਤੀਤਿ ਸਮ੍ਬਨ੍ਧੋ. ਦੁਕ੍ਖਸਚ੍ਚਂਪਰਿਜਾਨਨ੍ਤੋਤਿ ਤੇਭੂਮਕ ਧਮ੍ਮਾਨਂ ਏਕਨ੍ਤਦੁਕ੍ਖਭਾਵਂ ਪਰਿਚ੍ਛਿਜ੍ਜ ਜਾਨਨ੍ਤੋ. ਪਰਿਜਾਨਨਞ੍ਚੇਤ੍ਥ ਤੇਸਂ ਦੁਕ੍ਖਭਾਵ ਪਟਿਚ੍ਛਾਦਕਸ੍ਸ ਸਮ੍ਮੋਹਸ੍ਸ ਪਹਾਨਮੇਵ ਦਟ੍ਠਬ੍ਬਂ. ਸਮੁਦਯ ਸਚ੍ਚਂਪਜਹਨ੍ਤੋਤਿ ਅਤ੍ਤਨੋ ਚਿਤ੍ਤਸਨ੍ਤਾਨੇ ਅਨੁਸਯਭਾਵੇਨ ਪਵਤ੍ਤਮਾਨਂ ਤਣ੍ਹਾਸਙ੍ਖਾਤਂ ਸਮੁਦਯਸਚ੍ਚਂ ਏਕਦੇਸੇਨਵਾ ਅਨਵਸੇਸੇਨਵਾ ਅਪਚ੍ਛਾਵਤ੍ਤਿਕਂ ਕਤ੍ਵਾ ਪਜਹਨ੍ਤੋ. ਨਿਰੋਧਸਚ੍ਚਂਸਚ੍ਛਿਕਰੋਨ੍ਤੋਤਿ ਚਕ੍ਖੁਮਾ ਵਿਯ ਨਭਮਜ੍ਝੇ ਵਿਰੋਚਮਾਨਂ ਚਨ੍ਦਮਣ੍ਡਲਂ ਅਤ੍ਤਨੋ ਸਨ੍ਤਾਨੇ ਏਕਦੇਸਸ੍ਸਵਾ ਸਕਲਸ੍ਸਵਾ ਕਿਲੇਸ ਵਟ੍ਟਸ੍ਸਵਾ ਆਯਤਿਂ ਭਾਵਿਨੋ ਵਿਪਾਕਵਟ੍ਟਸ੍ਸਂਵਾ ਅਤ੍ਤਨੋ ਸਨ੍ਤਾਨੇ ਪੁਨ ਅਨੁਪ੍ਪਾਦਧਮ੍ਮਭਾਪਤ੍ਤਿਵਸੇਨ ਨਿਰੋਧਸਙ੍ਖਾਤਂ ਨਿਬ੍ਬਾਨਂ ਪਚ੍ਚਕ੍ਖਂ ਕਰੋਨ੍ਤੋ. ਮਗ੍ਗਸਚ੍ਚਂਭਾਵਨਾਵਸੇਨਾਤਿ ਇਤੋ ਪੁਬ੍ਬੇ ਅਨਮਤਗ੍ਗੇ ਸਂਸਾਰੇ ਅਨੁਪ੍ਪਨ੍ਨਪੁਬ੍ਬਸ੍ਸ ਅਟ੍ਠਙ੍ਗਿਕਸ੍ਸ ਮਗ੍ਗਸਚ੍ਚਸ੍ਸ ਉਪ੍ਪਾਦਨਸਙ੍ਖਾਤਾਯ ਭਾਵਨਾਯ ਵਸੇਨ. ਮਗ੍ਗਚੇਤਨਾਯ ਪਨ ਆਨਨ੍ਤਰਿਕਫਲਤ੍ਤਾ ਤਙ੍ਖਣੇ ਅਪਨੀਤਗ੍ਗਿਕੇ ਪਦੇਸੇ ਪੁਨ ਉਦਕਂ ਆਸਿਞ੍ਚਿਤ੍ਵਾ ਨਿਬ੍ਬਾਪੇਨ੍ਤੋ ਵਿਯ ਮਗ੍ਗਾਨੁਕੂਲਪਵਤ੍ਤਿਵਸੇਨ ਦੁਕ੍ਖਪਰਿਜਾਨਨਾਦੀਨਿ ਚਤ੍ਤਾਰਿ ਕਿਚ੍ਚਾਨਿ ਅਨੁਕੁਬ੍ਬਨ੍ਤਾਨਿ ਤਤੋਪਰਂ ਦ੍ਵੇਵਾ ਤੀਣਿਵਾ ਫਲਚਿਤ੍ਤਾਨਿ ਪਵਤ੍ਤਨ੍ਤਿ. ਤਤੋਪਰਂ ਭਵਙ੍ਗਪਾਤੋ ਹੋਤੀਤਿ ਦਸ੍ਸੇਤੁਂ ਤਤੋਪਰਨ੍ਤਿਆਦਿਮਾਹ. ਯਥਾ ਪਨ ਪਸਾਦਚਕ੍ਖੁਨਾਵਾ ਦਿਬ੍ਬਚਕ੍ਖੁਨਾਵਾ ਕਿਞ੍ਚਿਰੂਪਂ ਪਸ੍ਸਨ੍ਤਸ੍ਸ ਤਾਨਿ ਚਕ੍ਖੂਨਿ ਤਂ ਰੂਪਂ ਪਚ੍ਚਕ੍ਖਂ ਕਤ੍ਵਾ ਪਚ੍ਛਾ ਤਸ੍ਸ ਪੁਗ੍ਗਲਸ੍ਸਪਿ ਪਚ੍ਚਕ੍ਖਤੋ ਪਾਤੁਭੂਤਂ ਕਤ੍ਵਾ ਨਿਰੁਜ੍ਝਨ੍ਤਿ. ਨ ਤਾਵ ਤੇਸਂ ਉਪ੍ਪਤ੍ਤਿਕ੍ਖਣੇ ਤਂ ਰੂਪਂ ਤਸ੍ਸ ਅਹਂ ਇਦਂਨਾਮ ਪਸ੍ਸਾਮੀਤਿ ਪਾਕਟਂ ਹੋਤਿ. ਪਚ੍ਛਾ ਪਨ ਪਚ੍ਚਵੇਕ੍ਖਨ ਵਾਰੇਸੁ ਪਵਤ੍ਤਮਾਨੇਸੁਏਵ ਤਂਰੂਪਂ ਤਦਨੁਬਨ੍ਧਾਚ ਨਾਨਾਕਾਰਾ ਤਸ੍ਸ ਪਾਤੁਭੂਤਾ ਹੋਨ੍ਤਿ. ਏਵਮੇਵਂ ਇਧਪਿ ਪਚ੍ਚਵੇਕ੍ਖਨਵਾਰੇਸੁ ਪਵਤ੍ਤਮਾਨੇਸੁਏਵ ਨਿਬ੍ਬਾਨਞ੍ਚ ਤਦਨੁਬਨ੍ਧਾਨਿ ਮਗ੍ਗਫਲਾਦੀਨਿਚ ਪਾਤੁਭਵਨ੍ਤੀਤਿ ਵੁਤ੍ਤਂ ਪੁਨਭਵਙ੍ਗਂ.ਲ. ਪਵਤ੍ਤਨ੍ਤੀਤਿ. ਇਦਾਨਿ ਪਚ੍ਚਵੇਕ੍ਖਨਞਾਣਸ੍ਸ ਭੂਮਿਂ ਦਸ੍ਸੇਤੁਂ ਮਗ੍ਗਂਫਲਞ੍ਚਨਿਬ੍ਬਾਨਨ੍ਤਿਆਦਿਗਾਥ ਮਾਹ. ਤਤ੍ਥ ਪਣ੍ਡਿਤੋਤਿ ਅਰਿਯਾਯ ਪਞ੍ਞਾਯ ਸਮਨ੍ਨਾਗਤੋ ਫਲਟ੍ਠੋ. ਹੀਨੇਤਿ ਪਹੀਨੇ. ਸੇਸੇਤਿ ਅਪਹੀਨੇ ਉਪਰਿਮਗ੍ਗਵਜ੍ਝੇ. ਇਮਾਨਿ ਪਨ ਦ੍ਵੇ ਪਹੀਨਾਵਸਿਟ੍ਠਕਿਲੇਸਪਚ੍ਚਵੇਕ੍ਖਨਾਨਿ ਕੇਸਞ੍ਚਿ ਜੀਵਿਤਸਮਸੀਸਿਪੁਗ੍ਗਲਾਨਂ ਕਿਲੇਸ ਵਿਭਾਗੇਸੁ ਅਕੋਵਿਦਾਨਞ੍ਚ ਨਲਬ੍ਭਨ੍ਤੀਤਿ ਵੁਤ੍ਤਂ ਪਚ੍ਚਵੇਕ੍ਖਤਿਵਾਨਵਾਤਿ. ਏਤ੍ਥਚ ਵਿਸੁਦ੍ਧਿਮਗ੍ਗੇ ਤਾਵ ਸਬ੍ਬਪਥਮਂ ਮਗ੍ਗਪਚ੍ਚਵੇਕ੍ਖਨਂ ਵੁਤ੍ਤਂ. ਤਤੋ ਫਲਪਚ੍ਚਵੇਕ੍ਖਨਂ. ਤਤੋ ਪਹੀਨਕਿਲੇਸਪਚ੍ਚਵੇਕ੍ਖਨਂ. ਤਤੋ ਅਵਸਿਟ੍ਠਕਿਲੇਸਪਚ੍ਚਵੇਕ੍ਖਨਂ. ਅਵਸਾਨੇ ਨਿਬ੍ਬਾਨਪਚ੍ਚਵੇਕ੍ਖਨਂ ਵੁਤ੍ਤਂ. ਪਟਿਸਮ੍ਭਿਦਾਮਗ੍ਗਟ੍ਠਕਥਾਯਂ ਪਨ ਸਬ੍ਬਪਥਮਂ ਕਿਲੇਸਪਚ੍ਚਵੇਕ੍ਖਨਂ ਅਧਿਪ੍ਪੇਤਂ. ਵੁਤ੍ਤਞ੍ਹਿ ਤਤ੍ਥ ਪਚ੍ਚਵੇਕ੍ਖਨੇਸੁ ਪਥਮਂ ਕਿਲੇਸਪਚ੍ਚਵੇਕ੍ਖਨਂ ਹੋਤਿ. ਤਤੋ ਮਗ੍ਗਫਲਨਿਬ੍ਬਾਨਪਚ੍ਚਵੇਕ੍ਖਨਾਨੀਤਿ. ਤਂ ਪਨ ਪਾਲ਼ਿਯਂ ਪਚ੍ਚਵੇਕ੍ਖਨ ਞਾਣਸ੍ਸ ਨਿਦ੍ਦੇਸਤੋ ਪੁਬ੍ਬੇ ਪਥਮਂ ਛਿਨ੍ਨਮਨੁਪਸ੍ਸਨੇ ਪਞ੍ਞਾਵਿਮੁਤ੍ਤਿ ਞਾਣਨ੍ਤਿ ਏਵਂ ਵਿਸੁਂ ਵਿਮੁਤ੍ਤਿਞਾਣਸ੍ਸ ਆਗਤਤ੍ਤਾ ਵੁਤ੍ਤਂ. ਤਤ੍ਥ ਛਿਨ੍ਨਨ੍ਤਿ ਤੇਨ ਤੇਨ ਮਗ੍ਗੇਨ ਸਮੁਚ੍ਛਿਨ੍ਨਂ ਕਿਲੇਸਜਾਤਨ੍ਤਿ ਅਤ੍ਥੋ. ਪਾਲ਼ਿ ਅਨੁ ਸਾਰੇਨ ਵੁਚ੍ਚਮਾਨੇ ਪਨ ਪਥਮਂ ਪਹੀਨਂ ਕਿਲੇਸਾਨਂ ਪਚ੍ਚਵੇਕ੍ਖਨਂ. ਤਤੋ ਪਚ੍ਚੇਕਂ ਮਗ੍ਗਙ੍ਗਬੋਜ੍ਝਙ੍ਗਾਦੀਨਂ ਪਚ੍ਚਵੇਕ੍ਖਨਂ. ਤਤੋ ਤੇਸਂ ਆਰਮ੍ਮਣਭੂਤਸ੍ਸ ਨਿਬ੍ਬਾਨਸ੍ਸ ਪਚ੍ਚਵੇਕ੍ਖਨਂ. ਤਤੋ ਫਲਧਮ੍ਮਾਨਂ ਪਚ੍ਚਵੇਕ੍ਖਨਂ. ਤਤੋ ਤੇਸਂ ਆਰਮ੍ਮਣਭੂਤਸ੍ਸ ਨਿਬ੍ਬਾਨਸ੍ਸ ਪਚ੍ਚਵੇਕ੍ਖਨਨ੍ਤਿ ਵਤ੍ਤਬ੍ਬਂ ਹੋਤਿ. ਪਾਲ਼ਿਯਞ੍ਹਿ ਪਚ੍ਚਵੇਕ੍ਖਨਞਾਣਨਿਦ੍ਦੇਸੇ ਨਿਬ੍ਬਾਨਂ ਮਗ੍ਗਵਾਰੇਪਿ ਫਲਵਾਰੇਪਿ ਦ੍ਵਿਕ੍ਖਤ੍ਤੁਂ ਆਗਤਨ੍ਤਿ. ਇਤਿ ਨਿਬ੍ਬਾਨਪਚ੍ਚਵੇਕ੍ਖਨਂ ਨਾਮ ਇਤਰੇਸਂ ਪਚ੍ਚਵੇਕ੍ਖਨਾਨਂ ਆਦਿਮ੍ਹਿਵਾ ਮਜ੍ਝੇ ਅਨ੍ਤਰਨ੍ਤਰਾਵਾ ਅਵਸਾਨੇਵਾ ਯਤ੍ਥਕਤ੍ਥਚਿ ਪਵਤ੍ਤਤੀਤਿ ਸਿਦ੍ਧਂ ਹੋਤਿ. ਤਥਾ ਕਿਲੇਸਪਚ੍ਚਵੇਕ੍ਖਨਂਪਿ ਮਗ੍ਗਫਲਪਚ੍ਚਵੇਕ੍ਖਨਾਨਂ ਆਦਿਮ੍ਹਿਵਾ ਪਚ੍ਛਾਵਾਤਿ. ਏਵਞ੍ਹਿ ਸਤਿ ਮਗ੍ਗਂ ਫਲਞ੍ਚ ਨਿਬ੍ਬਾਨਨ੍ਤਿ ਅਯਂ ਗਾਥਾਪਿ ਅਵਿਰੁਦ੍ਧਾ ਹੋਤੀਤਿ. ਏਵਞ੍ਚ ਕਤ੍ਵਾ ਅਧਿਮਾਨਨਿਦ੍ਦੇਸਟ੍ਠਕਥਾਸੁ ਸੋ ਹਿ ਮਗ੍ਗਫਲਨਿਬ੍ਬਾਨ ਪਹੀਨ ਕਿਲੇਸਾ ਵਸਿਟ੍ਠਕਿਲੇਸ ਪਚ੍ਚਵੇਕ੍ਖਨੇਨ ਸਞ੍ਜਾਤਸੋਮਨਸ੍ਸੋ ਅਰਿਯਗੁਣਪਟਿਵੇਧੇ ਨਿਕ੍ਕਙ੍ਖੋਤਿ ਵੁਤ੍ਤਂ. ਏਤ੍ਥਚ ਸੋਤਾਪਨ੍ਨਸ੍ਸ ਪਞ੍ਚ ਪਚ੍ਚਵੇਕ੍ਖਨਾਨਿ ਹੋਨ੍ਤਿ. ਤਥਾ ਸਕਦਾਗਾਮਿਸ੍ਸ ਪਞ੍ਚ. ਅਨਾਗਾਮਿਸ੍ਸ ਪਞ੍ਚ. ਅਰਹਤੋ ਪਨ ਅਵਸਿਟ੍ਠਕਿਲੇਸੋਨਾਮ ਨਤ੍ਥੀਤਿ ਚਤ੍ਤਾਰੀਤਿ ਏਕੂਨਵੀਸਤਿ ਪਚ੍ਚਵੇਕ੍ਖਨਾਨਿ ਹੋਨ੍ਤੀਤਿ. ਇਦਞ੍ਚ ਪਰਿਪੁਣ੍ਣ ਵਸੇਨ ਲਬ੍ਭਮਾਨਂ ਸਨ੍ਧਾਯ ਵੁਤ੍ਤਂ. ਅਪਰਿਪੁਣ੍ਣਂਪਿ ਪਨ ਹੋਤਿਯੇਵ. ਤਥਾ ਹਿ ਚੂਲ਼ਦੁਕ੍ਖਕ੍ਖਨ੍ਧਸੁਤ੍ਤਅਟ੍ਠਕਥਾਯਂ ਸਾ ਪਨ ਨ ਸਬ੍ਬੇਸਂ ਪਰਿਪੁਣ੍ਣਾ ਹੋਤਿ. ਏਕੋ ਹਿ ਪਹੀਨਕਿਲੇਸਮੇਵ ਪਚ੍ਚਵੇਕ੍ਖਤਿ. ਏਕੋ ਅਵਸਿਟ੍ਠਕਿਲੇਸਮੇਵ. ਏਕੋ ਮਗ੍ਗਮੇਵ. ਏਕੋ ਫਲਮੇਵ. ਏਕੋਨਿਬ੍ਬਾਨਮੇਵ. ਇਮਾਸੁ ਪਨ ਪਞ੍ਚਸੁਪਚ੍ਚਵੇਕ੍ਖਨਾਸੁ ਏਕਂਵਾਦ੍ਵੇਵਾ ਨੋ ਲਦ੍ਧੁਂ ਨਵਟ੍ਟਤੀਤਿ ਵੁਤ੍ਤਂ. ਏਵਂ ਛਬ੍ਬਿਸੁਦ੍ਧਿਕਮੇਨ ਭਾਵੇਤਬ੍ਬੋ ਚਤੁਬ੍ਬਿਧੋ ਮਗ੍ਗੋ ਞਾਣਦਸ੍ਸਨਵਿਸੁਦ੍ਧਿਨਾਮ ਵੁਚ੍ਚਤੀਤਿ ਸਮ੍ਬਨ੍ਧੋ. ਮਗ੍ਗਸਦ੍ਦੇਨ ਚੇਤ੍ਥ ਚਤੁਬ੍ਬਿਧਂ ਮਗ੍ਗਞਾਣਂ ਤਦਨੁਕੂਲਪਵਤ੍ਤਿਵਸੇਨ ਫਲਞਾਣਞ੍ਚ ਗਹਿਤਨ੍ਤਿ ਦਟ੍ਠਬ੍ਬਂ. ਏਤ੍ਥਾਤਿ ਵਿਪਸ੍ਸਨਾਕਮ੍ਮਟ੍ਠਾਨੇ. ਤਤ੍ਥਾਤਿ ਤੇਸੁ ਅਨੁਪਸ੍ਸਨਾ ਮਗ੍ਗਫਲੇਸੁ. ਅਭਿਨਿਵਿਸਨਂ ਅਭਿਨਿਵੇਸੋ. ਹੇਟ੍ਠਾ ਸਿਲਾਪਥਵਿਯਂ ਨਿਖਾਤਸਿਨੇਰੁਪਾਦਸ੍ਸ ਵਿਯ ਅਜ੍ਝਤ੍ਤਖਨ੍ਧੇਸੁ ਦਲ਼੍ਹਂ ਗਹੇਤ੍ਵਾ ਪਵਤ੍ਤੀਤਿ ਅਤ੍ਥੋ. ਅਤ੍ਤਾ ਇਤਿ ਅਭਿਨਿਵੇਸੋ ਅਤ੍ਤਾਭਿਨਿਵੇਸੋ. ਤਂ ਅਤ੍ਤਾਭਿਨਿਵੇਸਂ. ਮੁਞ੍ਚਨ੍ਤੀਤਿ ਅਜ੍ਝਤ੍ਤਧਮ੍ਮਾਨਂ ਕੇਵਲਂ ਪਚ੍ਚਯਾਯਤ੍ਤ ਵੁਤ੍ਤਿਤਾਯ ਖਣਭਙ੍ਗਸ੍ਸਚ ਅਦਿਟ੍ਠਤ੍ਤਾ ਸੋ ਅਭਿਨਿਵੇਸੋ ਪਵਤ੍ਤਤਿ. ਤਸ੍ਮਾ ਤਂ ਦ੍ਵਯਂ ਸੁਦਿਟ੍ਠਂ ਕਤ੍ਵਾ ਰੂਪਂ ਅਨਤ੍ਤਾ ਵੇਦਨਾ ਅਨਤ੍ਤਾਤਿਆਦਿਨਾ ਪੁਨਪ੍ਪੁਨਂ ਸਮਨੁਪਸ੍ਸਨਾਵਸੇਨ ਤਂ ਅਭਿਨਿਵੇਸਂ ਵਿਮੋਚਯਮਾਨਾਤਿ ਅਤ੍ਥੋ. ਵਿਮੋਕ੍ਖਮੁਖਂ ਹੋਤਿ, ਸੁਞ੍ਞਤਵਿਮੋਕ੍ਖ ਸਙ੍ਖਾਤਸ੍ਸ ਮਗ੍ਗਸ੍ਸ ਫਲਸ੍ਸਚ ਪਵੇਸਨਦ੍ਵਾਰਭੂਤਤ੍ਤਾ, ਵਿਪਲ੍ਲਾਸ ਨਿਮਿਤ੍ਤਨ੍ਤਿ ਵਿਪਰੀਤਵਸੇਨ ਆਸਨਂ ਉਪਗਮਨਂ ਪਵਤ੍ਤਨਂਵਾ ਵਿਪਲ੍ਲਾਸੋ. ਅਨਿਚ੍ਚੇ ਨਿਚ੍ਚਨ੍ਤਿ ਉਪਗਮਨਂ ਪਵਤ੍ਤਨਂਵਾਤਿ ਅਤ੍ਥੋ. ਸੋ ਏਵ ਕਿਲੇ ਸੁਪ੍ਪਤ੍ਤਿਯਾ ਆਸਨ੍ਨਕਾਰਣਤ੍ਤਾ ਨਿਮਿਤ੍ਤਨ੍ਤਿ ਵਿਪਲ੍ਲਾਸਨਿਮਿਤ੍ਤਂ. ਮੁਞ੍ਚਨ੍ਤੀਤਿ ਅਜ੍ਝਤ੍ਤਧਮ੍ਮਾਨਂ ਖਣਭਙ੍ਗਸ੍ਸ ਅਦਿਟ੍ਠਤ੍ਤਾ ਤਂਨਿਮਿਤ੍ਤਂ ਹੋਤੀਤਿ ਤੇਸਂ ਖਣਭਙ੍ਗਂ ਸੁਦਿਟ੍ਠਂ ਕਤ੍ਵਾ ਰੂਪਂ ਅਨਿਚ੍ਚਂ ਵੇਦਨਾ ਅਨਿਚ੍ਚਾਤਿਆਦਿਨਾ ਪੁਨਪ੍ਪੁਨਂ ਸਮਨੁਪਸ੍ਸਨਾਵਸੇਨ ਤਂਨਿਮਿਤ੍ਤਂ ਵਿਮੋਚਯਮਾਨਾਤਿ ਅਤ੍ਥੋ. ਤਣ੍ਹਾਪਣਿਧਿਨ੍ਤਿ ਤਣ੍ਹਾਏਵ ਅਭਿਸਙ੍ਗਵਸੇਨ ਆਰਮ੍ਮਣੇ ਚਿਤ੍ਤਸ੍ਸ ਪਣਿਦਹਨਤੋ ਦਲ਼੍ਹਂ ਥਪਨਤੋ ਪਣਿਧੀਤਿ ਤਣ੍ਹਾਪਣਿਧਿ. ਤਂਤਣ੍ਹਾ ਪਣਿਧਿਂ. ਮੁਞ੍ਚਨ੍ਤੀਤਿ ਅਜ੍ਝਤ੍ਤਧਮ੍ਮਾਨਂ ਮਹਾਆਦੀਨਵਰਾਸਿਭਾਵਸ੍ਸ ਅਦਿਟ੍ਠਤ੍ਤਾ ਸੋਪਣਿਧਿ ਹੋਤੀਤਿ ਤੇਸਂ ਮਹਾਆਦੀਨਵਰਾਸਿਭਾਵਂ ਸੁਦਿਟ੍ਠਂ ਕਤ੍ਵਾ ਰੂਪਂਦੁਕ੍ਖਂ ਵੇਦਨਾਦੁਕ੍ਖਾਤਿਆਦਿਨਾ ਪੁਨਪ੍ਪੁਨਂ ਸਮਨੁਪਸ੍ਸਨਾਵਸੇਨ ਤਂਪਣਿਧਿਂ ਵਿਮੋਚਯਮਾਨਾਤਿ ਅਤ੍ਥੋ. ਤਸ੍ਮਾਤਿ ਯਸ੍ਮਾ ਏਤਾ ਵਿਮੋਕ੍ਖਮੁਖਭੂਤਾ ਤਿਸ੍ਸੋ ਅਨੁਪਸ੍ਸਨਾ ਏਵਂ ਵਿਸੇਸ ਨਾਮਿਕਾ ਹੋਨ੍ਤਿ. ਤਸ੍ਮਾ. ਯਸ੍ਮਾ ਸਙ੍ਖਾਰੇਸੁ ਸੁਞ੍ਞਤਦਸ੍ਸਨਵਸੇਨ ਅਤ੍ਥਸਿਦ੍ਧਿਨਾਮ ਕੇਵਲਂ ਅਤ੍ਤਾਕਿਨਿਵੇਸਭੂਤਸ੍ਸ ਦਿਟ੍ਠਿਗਾਹਸ੍ਸ ਪਟਿਪਕ੍ਖਭੂਤਸ੍ਸ ਞਾਣਸ੍ਸੇਵ ਆਨੁਭਾਵੋ ਹੋਤਿ, ਤਸ੍ਮਾ ਤਥਾ ਸਮਨੁਪਸ੍ਸਿਤ੍ਵਾ ਵਿਮੁਞ੍ਚਨ੍ਤਸ੍ਸ ਵਿਪਸ੍ਸਨਾਪਿ ਮਗ੍ਗੋਪਿ ਸਹਜਾਤਞਾਣ ਕਿਚ੍ਚੇਨ ਨਾਮਂ ਲਭਤੀਤਿ ਵੁਤ੍ਤਂ ਯਦਿਵੁਟ੍ਠਾਨ.ਲ. ਸੁਞ੍ਞਤੋਵਿਮੋਕ੍ਖੋ ਨਾਮਹੋਤਿਮਗ੍ਗੋਤਿ. ਅਨਿਚ੍ਚਦਸ੍ਸਨਵਸੇਨ ਅਤ੍ਥਸਿਦ੍ਧਿਨਾਮ ਨਿਮਿਤ੍ਤਾਤਿ ਨਿਵੇਸਭੂਤਸ੍ਸ ਮਾਨਗਾਹਸ੍ਸ ਪਟਿਪਕ੍ਖਭੂਤਾਯ ਸਦ੍ਧਾਯਪਿ ਆਨੁਭਾਵੋ. ਤਸ੍ਮਾ ਤਥਾ ਸਮਨੁਪਸ੍ਸਿਤ੍ਵਾ ਵਿਮੁਚ੍ਚਨ੍ਤਸ੍ਸ ਵਿਪਸ੍ਸਨਾਪਿ ਮਗ੍ਗੋਪਿ ਸਹਜਾਤਸਦ੍ਧਾ ਕਿਚ੍ਚੇਨ ਨਾਮਂ ਲਭਤੀਤਿ ਵੁਤ੍ਤਂ ਯਦਿਅਨਿਚ੍ਚਤੋ.ਲ. ਅਨਿਮਿਤ੍ਤੋ ਵਿਮੋਕ੍ਖੋਨਾਮਾਤਿ. ਦੁਕ੍ਖਦਸ੍ਸਨਵਸੇਨ ਅਤ੍ਥਸਿਦ੍ਧਿਨਾਮ ਪਣਿਧਿਸਙ੍ਖਾਤ ਤਣ੍ਹਾਗਾਹਪਟਿਪਕ੍ਖਭੂਤਸ੍ਸ ਸਮਾਧਿਸ੍ਸਪਿ ਆਨੁਭਾਵੋ. ਤਸ੍ਮਾ ਤਥਾ ਸਮਨੁਪਸ੍ਸਿਤ੍ਵਾ ਵਿਮੁਚ੍ਚਨ੍ਤਸ੍ਸ ਵਿਪਸ੍ਸਨਾਪਿ ਮਗ੍ਗੋਪਿ ਸਹਜਾਤਸਮਾਧਿਕਿਚ੍ਚੇਨ ਨਾਮਂ ਲਭਤੀਤਿ ਵੁਤ੍ਤਂ. ਯਦਿ ਦੁਕ੍ਖਤੋ. ਲ. ਅਪ੍ਪਣਿਹਿਤੋ ਵਿਮੋਕ੍ਖੋਨਾਮਾਤਿ. ਵੁਤ੍ਤਞ੍ਹੇਤਂ ਪਟਿਸਮ੍ਭਿਦਾਮਗ੍ਗੇ ਅਨਿਚ੍ਚਤੋ ਮਨਸਿਕਰੋਤੋ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਦੁਕ੍ਖਤੋ ਮਨਸਿਕਰੋਤੋ ਸਮਾਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ. ਅਨਤ੍ਤਤੋ ਮਨਸਿਕਰੋਤੋ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤੀਤਿ. ਮਗ੍ਗੇ ਪਨ ਤਿਣ੍ਣਂ ਧਮ੍ਮਾਨਂ ਕਿਚ੍ਚਵਿਸੇਸੋਨਾਮ ਵਿਪਸ੍ਸਨਾਗਮਨਵਸੇਨੇਵ ਸਿਦ੍ਧੋਤਿ ਵੁਤ੍ਤਂ ਮਗ੍ਗੋ. ਲ. ਨਾਮਾਨਿ ਲਭਤੀਤਿ. ਤਤ੍ਥ ਸੁਞ੍ਞਤਵਿਮੋਕ੍ਖੇਨ ਵਿਮੁਤ੍ਤੋ ਅਰਿਯਸਾਵਕੋ ਸੋਤਾਪਤ੍ਤਿਮਗ੍ਗਕ੍ਖਣੇ ਧਮ੍ਮਾਨੁਸਾਰੀਨਾਮ ਹੋਤਿ. ਮਜ੍ਝੇ ਛਸੁ ਮਗ੍ਗਫਲਕ੍ਖਣੇਸੁ ਦਿਟ੍ਠਿਪ੍ਪਤ੍ਤੋ ਨਾਮ. ਅਰਹਤ੍ਤਫਲਕ੍ਖਣੇ ਪਞ੍ਞਾਵਿਮੁਤ੍ਤੋਨਾਮ. ਅਨਿਮਿਤ੍ਤਵਿਮੋਕ੍ਖੇਨ ਵਿਮੁਤ੍ਤੋ ਸੋਤਾਪਤ੍ਤਿਮਗ੍ਗਕ੍ਖਣੇ ਸਦ੍ਧਾਨੁਸਾਰੀਨਾਮ. ਉਪਰਿ ਸਤ੍ਤਸੁ ਠਾਨੇਸੁ ਸਦ੍ਧਾਵਿਮੁਤ੍ਤੋਨਾਮ. ਅਪਣਿਹਿਤਵਿਮੋਕ੍ਖੇਨ ਵਿਮੁਤ੍ਤੋ ਪਨ ਅਟ੍ਠਸੁਪਿ ਠਾਨੇਸੁ ਕਾਯਸਕ੍ਖਿਨਾਮ. ਸੋਯੇਵ ਅਰੂਪਜ੍ਝਾਨਂ ਪਾਦਕਂ ਕਤ੍ਵਾ ਵਿਮੁਤ੍ਤੋ ਅਰਹਤ੍ਤਫਲੇ ਠਿਤੋ ਉਭਤੋਭਾਗਵਿਮੁਤ੍ਤੋ ਨਾਮਾਤਿ ਏਤ੍ਤਾਵਤਾ ਯਂ ਹੇਟ੍ਠਾ ਵੁਤ੍ਤਂ ਵਿਪਸ੍ਸਨਾਪਰਿਪਾਕਮਾਗਮ੍ਮਾਤਿ ਸਙ੍ਖਾਰੁਪੇਕ੍ਖਾਭਾਵਂ ਪਤ੍ਵਾ ਤਿਵਿਧਵਿਮੋਕ੍ਖਮੁਖਭਾਵਪ੍ਪਤ੍ਤਿਯਾਚੇਵ ਸਤ੍ਤਅਰਿਯਪੁਗ੍ਗਲਵਿਭਾਗਸ੍ਸ ਪਚ੍ਚਯਭਾਵਪ੍ਪਤ੍ਤਿਯਾਚ ਵਿਪਸ੍ਸਨਾਞਾਣਸ੍ਸ ਪਰਿਪਾਕਂ ਆਗਮ੍ਮ ਪਟਿਚ੍ਚਾਤਿ. ਤਂ ਸਰੂਪਤੋ ਨਿਦ੍ਦਿਟ੍ਠਂ ਹੋਤੀਤਿ. ਮਗ੍ਗਵੀਥਿਯਂ ਫਲਞ੍ਚ ਮਗ੍ਗਾਗਮਨ ਵਸੇਨ ਤਥਾ ਤੀਣਿ ਨਾਮਾਨਿ ਲਭਤੀਤਿ ਯੋਜਨਾ. ਯਥਾਵੁਤ੍ਤਨਯੇਨ ਵਿਪਸ੍ਸਨ੍ਤਾਨਨ੍ਤਿ ਯਦਿ ਅਨਤ੍ਤਤੋ ਵਿਪਸ੍ਸਤੀਤਿਆਦਿਨਾ ਵੁਤ੍ਤਪ੍ਪਕਾਰਨਯੇਨ ਵਿਪਸ੍ਸਨ੍ਤਾਨਂ ਚਤੁਨ੍ਨਂ ਫਲਟ੍ਠਾਨਂ ਪੁਗ੍ਗਲਾਨਂ. ਯਥਾਸਕਂਫਲਨ੍ਤਿ ਸੋਤਾਪਨ੍ਨਸ੍ਸ ਸੋਤਾਪਤ੍ਤਿਫਲਂ. ਸਕਦਾਗਾਮਿਸ੍ਸ ਸਕਦਾਗਾਮਿਫਲਨ੍ਤਿਆਦਿਨਾ ਨਯੇਨ ਅਤ੍ਤਨੋ ਅਤ੍ਤਨੋ ਸਨ੍ਤਕਭੂਤਂ ਯਂ ਯਂ ਫਲਂ ਵਿਪਸ੍ਸਨਾਗਮਨ ਵਸੇਨੇਵ ਸੁਞ੍ਞਤਾਦਿਵਿਮੋਕ੍ਖੋਤਿਚ ਵੁਚ੍ਚਤਿ. ਨਮਗ੍ਗਾਗਮਨਵਸੇਨਾਤਿ ਅਧਿਪ੍ਪਾਯੋ. ਏਤ੍ਥਚ ਵਿਪਸ੍ਸਨਾਗਮਨ ਵਸੇਨ ਮਗ੍ਗਸ੍ਸ ਅਨਿਮਿਤ੍ਤ ਨਾਮਲਾਭੋਨਾਮ ਸੁਤ੍ਤਨ੍ਤਿਕਪਰਿਯਾਯੇਨ ਵੁਤ੍ਤੋ. ਅਭਿਧਮ੍ਮੇ ਪਨ ਅਨਿਮਿਤ੍ਤੋ ਨਾਮਮਗ੍ਗੋ ਨਆਗਤੋ. ਨਹਿ ਸੋ ਨਿਪ੍ਪਰਿਯਾਯਤੋ ਅਨਿਮਿਤ੍ਤੋਨਾਮ ਹੋਤਿ. ਹੀਨਪਣੀਤਾਦਿਵਸੇਨ ਵਿਭਾਗਾਰਹਸ੍ਸ ਸਙ੍ਖਾਰਨਿਮਿਤ੍ਤਸ੍ਸ ਸਬ੍ਭਾਵਤੋ. ਤੇਨੇਵ ਹਿਸ੍ਸ ਦੁਕ੍ਖਪਟਿਪਦਾ ਦਨ੍ਧਾ ਭਿਞ੍ਞਾਦਿਵਸੇਨਵਾ ਪਾਰਮਿਧਮ੍ਮਾਨਂ ਪਰਿਤ੍ਤਮਹਨ੍ਤਾਦਿਵਸੇਨਵਾ ਹੀਨ ਪਣੀਤ ਪਣੀਤਤਰ ਪਣੀਤਤਮ ਵਿਭਾਗੋ ਸਨ੍ਦਿਸ੍ਸਤੀਤਿ. ਅਟ੍ਠਕਥਾਯਂ ਪਨ ਅਨਿਚ੍ਚਾਨੁਪਸ੍ਸਨਾ ਸਙ੍ਖਾਰੇਸੁ ਨਿਚ੍ਚਨਿਮਿਤ੍ਤਂ ਵਿਧਮਨਵਸੇਨ ਪਵਤ੍ਤਤ੍ਤਾ ਅਨਿਮਿਤ੍ਤਾਨੁਪਸ੍ਸਨਾਨਾਮ ਸਮਾਨਾਪਿ ਸਯਂ ਸਙ੍ਖਾਰਨਿਮਿਤ੍ਤੇ ਪਰਿਯਾਪਨ੍ਨਤ੍ਤਾ ਏਕਨ੍ਤੇਨ ਅਤ੍ਤਨੋਨਾਮਂ ਮਗ੍ਗਸ੍ਸ ਦਾਤੁਂ ਨਸਕ੍ਕੋਤਿ. ਤਸ੍ਮਾ ਮਗ੍ਗੋ ਅਭਿਧਮ੍ਮ ਪਰਿਯਾਯੇਨ ਅਨਿਮਿਤ੍ਤਨਾਮਂ ਨਲਭਤੀਤਿ ਵੁਤ੍ਤਂ. ਸੁਤ੍ਤਨ੍ਤਿਕਪਰਿਯਾਯੇਨ ਪਨ ਯਥਾ ਪਥਵਿਕਸਿਣਾਰਮ੍ਮਣਂ ਝਾਨਂ ਪਥਵਿਕਸਿਣਨ੍ਤਿ ਵੁਚ੍ਚਤਿ. ਏਵਂ ਸੁਞ੍ਞਤਾਦਿਨਾਮਂ ਨਿਬ੍ਬਾਨਂ ਆਰਮ੍ਮਣਂ ਕਤ੍ਵਾ ਪਵਤ੍ਤਾਨਿ ਮਗ੍ਗਫਲਾਨਿਪਿ ਆਰਮ੍ਮਣਵਸੇਨਪਿ ਸੁਞ੍ਞਤਾਦਿਨਾਮਂ ਲਭਨ੍ਤਿ. ਆਰਮ੍ਮਣਕਰਣਵਸੇਨ ਪਨ ਸਮ੍ਪਯੋਗਵਸੇਨਵਾ ਪਲਿਬੋਧਕਰਾਚ ਨਿਮਿਤ੍ਤਕਰਾਚ ਪਣਿਧਿਕਰਾਚ ਰਾਗਾਦਯੋ ਕਿਲੇਸਧਮ੍ਮਾ ਤੇਸੁ ਨਤ੍ਥਿ. ਤਸ੍ਮਾ ਤਾਨਿ ਅਞ੍ਞਂ ਆਗਮਨਂਵਾ ਆਰਮ੍ਮਣਂਵਾ ਅਨਪੇਕ੍ਖਿਤ੍ਵਾ ਅਤ੍ਤਨੋ ਸਭਾਵੇਨਪਿ ਸੁਞ੍ਞਤਾਦਿਨਾਮਂ ਲਭਨ੍ਤੀਤਿ ਦਸ੍ਸੇਤੁਂ ਆਰਮ੍ਮਣਵਸੇਨਾਤਿਆਦਿ ਵੁਤ੍ਤਂ. ਤਤ੍ਥ ਸਰਸਵਸੇਨਾਤਿ ਅਤ੍ਤਨੋ ਸਭਾਵੇਨ. ਨਾਮਤ੍ਤਯਨ੍ਤਿ ਸੁਞ੍ਞਤਾਦਿ ਨਾਮਤ੍ਤਿਕਂ. ਸਬ੍ਬਤ੍ਥਾਤਿ ਸਬ੍ਬਾਸੁ ਮਗ੍ਗਵੀਥਿ ਫਲਸਮਾਪਤ੍ਤਿਵੀਥੀਸੁ. ਸਬ੍ਬੇਸਂਪੀਤਿ ਸਬ੍ਬੇਸਂਪਿ ਮਗ੍ਗਫਲਾਨਂ. ਸਮਮੇਵਾਤਿ ਸਮਾਨਮੇਵ. ਸਦਿਸਮੇਵ. ਏਤ੍ਥਪਨਾਤਿ ਏਤੇਸੁ ਪਨ ਯਥਾਵੁਤ੍ਤੇਸੁ ਮਗ੍ਗਫਲੇਸੁ. ਯਸ੍ਮਾ ਸਬ੍ਬਾਦਿਟ੍ਠਿਯੋਚ ਸੋਲ਼ਸਵਿਧਾ ਵਿਚਿਕਿਚ੍ਛਾਚ ਅਤ੍ਤਦਿਟ੍ਠਿਮੂਲਿਕਾ ਏਵ ਹੋਨ੍ਤਿ. ਅਤ੍ਤਦਿਟ੍ਠਿਯਾ ਨਿਰੁਦ੍ਧਾਯ ਨਿਰੁਜ੍ਝਨ੍ਤਿ ਸਬ੍ਬਾਨਿਚ ਅਪਾਯਗਾਮਿ ਕਮ੍ਮਾਨਿਨਾਮ ਅਤ੍ਤਦਿਟ੍ਠਿਯਾ ਸਤਿਯਾਏਵ ਵਿਪਚ੍ਚਨ੍ਤਿ. ਅਸਤਿਯਾ ਨ ਵਿਪਚ੍ਚਨ੍ਤਿ. ਦਿਟ੍ਠਸਚ੍ਚਾਨਞ੍ਚ ਸਾ ਦਿਟ੍ਠਿ ਸਬ੍ਬਸੋ ਪਹੀਨਾ ਹੋਤਿ. ਤਸ੍ਮਾ ਸੋਤਾਪਤ੍ਤਿਮਗ੍ਗਂ.ਲ. ਪਹੀਨਾਪਾਯ ਗਮਨੋਤਿ ਵੁਤ੍ਤਂ. ਅਪਾਯਂ ਗਚ੍ਛਨ੍ਤਿ ਏਤੇਹੀਤਿ ਅਪਾਯਗਮਨਾਨਿ. ਦਿਟ੍ਠਿਵਿਚਿਕਿਚ੍ਛਾਵਿਪ੍ਪਯੁਤ੍ਤਾ ਅਕੁਸਲਧਮ੍ਮਾਚੇਵ ਪੁਬ੍ਬੇਕਤਦੁਚ੍ਚਰਿਤਕਮ੍ਮਾਨਿਚ. ਪਹੀਨਾਨਿ ਅਪਾਯਗਮਨਾਨਿ ਏਤਸ੍ਸਾਤਿ ਪਹੀਨਾਪਾਯਗਮਨੋ. ਪਟਿਵਿਦ੍ਧਚਤੁਸਚ੍ਚਾਨਂ ਪਹੀਨਅਤ੍ਤਦਿਟ੍ਠੀਨਂ ਬੋਧਿਪਕ੍ਖਿਯਧਮ੍ਮਾ ਏਕਨ੍ਤੇਨ ਉਪਰੂਪਰਿ ਵਡ੍ਢਨਪਕ੍ਖੇ ਠਿਤਾ ਹੋਨ੍ਤਿ. ਕਿਲੇਸਧਮ੍ਮਾ ਪਨ ਹਾਯਨਪਕ੍ਖੇ. ਤਸ੍ਮਾ ਤੇ ਅਨੁਕ੍ਕਮੇਨ ਪਰਿਹਾਯਿਤ੍ਵਾ ਗਚ੍ਛਨ੍ਤਾ ਉਪਰਿਮ ਕੋਟਿਯਾ ਸਤ੍ਤਹਿ ਭਵੇਹਿ ਸਬ੍ਬਸੋ ਪਰਿਕ੍ਖਯਂ ਗਚ੍ਛਨ੍ਤੀਤਿ ਵੁਤ੍ਤਂ ਸਤ੍ਤਕ੍ਖਤ੍ਤੁਪਰਮੋਸੋਤਾਪਨ੍ਨੋਨਾਮ ਹੋਤੀਤਿ, ਤਤ੍ਥ ਸਤ੍ਤਕ੍ਖਤ੍ਤੁਸਦ੍ਦੇਨ ਸਤ੍ਤਪਟਿਸਨ੍ਧਿਗਹਣਵਾਰਾ ਵੁਚ੍ਚਨ੍ਤਿ. ਪਰਮੋਤਿ ਉਕ੍ਕਂਸਪਰਿਚ੍ਛੇਦੋ. ਇਤਿ ਸਤ੍ਤਕ੍ਖਤ੍ਤੁਂ ਪਰਮੋ ਏਤਸ੍ਸਾਤਿ. ਸਤ੍ਤਕ੍ਖਤ੍ਤੁਪਰਮੋ. ਸੋ ਪਨ ਦੇਵੇਸੁ ਸਤ੍ਤਕ੍ਖਤ੍ਤੁ ਪਰਮੋ, ਮਨੁਸ੍ਸੇਸੁ ਸਤ੍ਤਕ੍ਖਤ੍ਤੁ ਪਰਮੋ, ਉਭਯਤ੍ਥ ਸਤ੍ਤਕ੍ਖਤ੍ਤੁ ਪਰਮੋਤਿ ਤਿਵਿਧੋ ਹੋਤਿ. ਯਥਾਹ –
ਕਤਮੋਚ ਪੁਗ੍ਗਲੋ ਸਤ੍ਤਕ੍ਖਤ੍ਤੁਪਰਮੋ ਇਧੇਕਚ੍ਚੋ ਪੁਗ੍ਗਲੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸੋਤਾਪਨ੍ਨੋ ਹੋਤਿ, ਅਵਿਨਿਪਾਤਧਮ੍ਮੋ ਨਿਯਤੋ, ਸਮ੍ਬੋਧਿਪਰਾਯਨੋ, ਸੋ ਸਤ੍ਤਕ੍ਖਤ੍ਤੁਂ ਦੇਵੇਚ ਮਨੁਸ੍ਸੇਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਤ੍ਤਕ੍ਖਤ੍ਤੁ ਪਰਮੋਤਿ.
ਏਤ੍ਥ ਹਿ ਚ ਸਦ੍ਦੋ ਅਨਿਯਮਤ੍ਥੋ. ਏਤੇਨ ਯੋਚ ਦੇਵੇਏਵ ਸਤ੍ਤਕ੍ਖਤ੍ਤੁਂ ਸਂਸਰਤਿ. ਯੋਚ ਮਨੁਸ੍ਸੇਏਵ ਸਤ੍ਤਕ੍ਖਤ੍ਤੁਂ ਸਂਸਰਤਿ. ਯੋਚ ਦੇਵੇਚ ਮਨੁਸ੍ਸੇਚ ਮਿਸ੍ਸਕਭਵ ਵਸੇਨ ਸਤ੍ਤਕ੍ਖਤ੍ਤੁਂ ਸਂਸਰਤਿ. ਤਿਵਿਧੋ ਪੇਸੋ ਸਤ੍ਤਕ੍ਖਤ੍ਤੁ ਪਰਮੋਨਾਮਾਤਿ ਦਸ੍ਸੇਤਿ. ਅਟ੍ਠਕਥਾਯਂ ਪਨ ਮਿਸ੍ਸਕਭਵ ਵਸੇਨਸ੍ਸ ਅਤ੍ਥੋ ਵੁਤ੍ਤੋ. ਏਤ੍ਥਚ ਯਸ੍ਮਾ ਮਹਗ੍ਗਤਜ੍ਝਾਨਸ੍ਸਚ ਉਪਰਿਮਗ੍ਗ ਵਿਪਸ੍ਸਨਾ ਯਚ ਆਨੁਭਾਵਂ ਅਨਪੇਕ੍ਖਿਤ੍ਵਾ ਕੇਵਲਂ ਇਮਸ੍ਸ ਮਗ੍ਗਸ੍ਸ ਆਨੁਭਾਵਗਤਿਯਾ ਏਵ ਸਤ੍ਤਕ੍ਖਤ੍ਤੁਪਰਮੋਨਾਮ ਵੁਤ੍ਤੋ. ਸੋਚ ਪਾਲ਼ਿਯਂ ਕਤਮੇਸਂ ਪਞ੍ਚਨ੍ਨਂ ਇਧ ਨਿਟ੍ਠਾ. ਸਤ੍ਤਕ੍ਖਤ੍ਤੁਪਰਮਸ੍ਸ ਕੋਲਂ ਕੋਲਸ੍ਸ ਏਕਬੀਜਿਸ੍ਸ ਸਕਦਾਗਾਮਿਸ੍ਸ ਯੋਚ ਦਿਟ੍ਠੇਵਧਮ੍ਮੇ ਅਰਹਾਤਿ ਵੁਤ੍ਤਤ੍ਤਾ ਕਾਮਭਵੇਏਵ ਝਾਨਰਹਿਤੋ ਸੁਕ੍ਖਵਿਪਸ੍ਸਕੋਵਾ ਪਰਿਹੀਨਜ੍ਝਾਨੋਵਾ ਦਟ੍ਠਬ੍ਬੋ. ਤੇਨੇਵਚ ਪਟਿਸਮ੍ਭਿਦਾਮਗ੍ਗਟ੍ਠ ਕਥਾਯਂ ਤਯੋਪਿ ਇਮੇ ਸੋਤਾਪਨ੍ਨਾ ਕਾਮਭਵਵਸੇਨ ਵੁਤ੍ਤਾ. ਰੂਪਾਰੂਪਭਵੇ ਪਨ ਬਹੁਕਾਪਿ ਪਟਿਸਨ੍ਧਿਯੋ ਗਣ੍ਹਨ੍ਤੀਤਿ ਵੁਤ੍ਤਂ. ਅਙ੍ਗੁਤ੍ਤਰਟ੍ਠਕਥਾਯਞ੍ਚ ਅਟ੍ਠਮਂ ਭਵਨ੍ਤਿ ਕਾਮਭਵੇ ਅਟ੍ਠਮਂ ਪਟਿਸਨ੍ਧਿਨ੍ਤਿ ਵੁਤ੍ਤਂ. ਤਸ੍ਮਾ ਯੇ ਕਾਮਭਵੇਯੇਵ ਸਤ੍ਤਵਾਰਤੋ ਓਰਂਵਾ ਦਿਟ੍ਠਧਮ੍ਮੇ ਯੇਵਵਾ ਉਪਰਿਮਗ੍ਗਂ ਗਣ੍ਹਨ੍ਤਿ. ਤੇਸਂ ਤਥਾਰੂਪੋ ਪਵਤ੍ਤਿਵਿਸੇਸੋ ਉਪਰਿ ਮਗ੍ਗਵਿਪਸ੍ਸਨਾਬਲੇਨ ਸਿਦ੍ਧੋਤਿ ਵੇਦਿਤਬ੍ਬੋ. ਤਥਾ ਹਿ ਅਟ੍ਠਕਥਾਸੁ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਨਿਯਾਮੇਤੀਤਿ ਵੁਤ੍ਤਂ. ਯੇ ਪਨ ਦਿਟ੍ਠਧਮ੍ਮੇਵਾ ਸਕ੍ਕਅਨਾਥਪਿਣ੍ਡਿਕਵਿਸਾਖਾਦਯੋ ਵਿਯ ਸਤ੍ਤਸੁ ਭਵੇਸੁ ਯਤ੍ਥਕਤ੍ਥਚਿ ਭਵੇਵਾ ਝਾਨਂ ਉਪ੍ਪਾਦੇਤ੍ਵਾ ਬ੍ਰਹ੍ਮਲੋਕਂ ਗਚ੍ਛਨ੍ਤਿ. ਯੇਚ ਬ੍ਰਹ੍ਮਲੋਕੇਯੇਵ ਸੋਤਾਪਤ੍ਤਿਮਗ੍ਗਂ ਲਭਿਤ੍ਵਾ ਤਤ੍ਥੇਵ ਪਰਿਨਿਬ੍ਬਾਯਨ੍ਤਿ. ਤੇਸਂ ਤਥਾਰੂਪੋ ਪਵਤ੍ਤਿ ਵਿਸੇਸੋ ਮਹਗ੍ਗਤਜ੍ਝਾਨਬਲੇਨ ਸਿਦ੍ਧੋਤਿ. ਯਸ੍ਮਾਚ ਪਾਲ਼ਿਯਂ ਸਤ੍ਤਕ੍ਖਤ੍ਤੁਂ ਦੇਵੇਚਾਤਿ ਏਤੇਨ ਕਾਮਭਵੇ ਸਤ੍ਤ ਓਪਪਾਤਿਕ ਪਟਿਸਨ੍ਧਿਯੋ ਦਸ੍ਸੇਤਿ. ਸਤ੍ਤਕ੍ਖਤ੍ਤੁਂ ਮਨੁਸ੍ਸੇਚਾਤਿ ਏਤੇਨ ਸਤ੍ਤ ਗਬ੍ਭਸੇਯ੍ਯਕਪਟਿਸਨ੍ਧਿਯੋ ਦਸ੍ਸੇਤੀਤਿ ਉਭਯੇਨ ਚੁਦ੍ਦਸ ਪਟਿਸਨ੍ਧਿਯੋ ਦਸ੍ਸਿਤਾ ਹੋਨ੍ਤਿ. ਤਸ੍ਮਾ ਤੇਨ ਪਰਿਯਾਯੇਨ ਲਬ੍ਭਮਾਨੇ ਚੁਦ੍ਦਸਭਵੇ ਸਨ੍ਧਾਯ ਸਕ੍ਕਪਞ੍ਹਸੁਤ੍ਤੇ –
ਇਤੋ ਸਤ੍ਤ ਤਤੋ ਸਤ੍ਤ, ਸਂਸਰਾਨਿ ਚਤੁਦ੍ਦਸਾਤਿ ਵੁਤ੍ਤਂ. ਤਥਾ ਅਙ੍ਗੁਤ੍ਤਰੇਚ ਤਿਕਨਿਪਾਤੇ ਸਚੇ ਉਦਾਯਿ ਆਨਨ੍ਦੋ ਅਵਿਤਰਾਗੋ ਕਾਲਂ ਕਰੇਯ੍ਯ, ਤੇਨ ਚਿਤ੍ਤਪਸਾਦੇਨ ਸਤ੍ਤਕ੍ਖਤ੍ਤੁਂ ਦੇਵੇਸੁ ਦੇਵਰਜ੍ਜਂ ਕਰੇਯ੍ਯ. ਸਤ੍ਤਕ੍ਖਤ੍ਤੁਂ ਇਮਸ੍ਮਿਂਯੇਵ ਜਮ੍ਬੁਦੀਪੇ ਮਹਾਰਜ੍ਜਂ ਕਰੇਯ੍ਯ. ਅਪਿਚ ਉਦਾਯਿ ਆਨਨ੍ਦੋ ਦਿਟ੍ਠੇਵਧਮ੍ਮੇ ਪਰਿਨਿਬ੍ਬਾ ਯਿਸ੍ਸਤੀਤਿ ਵੁਤ੍ਤਂ. ਕੇਚਿ ਪਨ ਇਮੇਹਿ ਸੁਤ੍ਤਪਦੇਹਿ ਸਤ੍ਤਕ੍ਖਤ੍ਤੁ ਪਰਮਸ੍ਸ ਸੋਤਾਪਨ੍ਨਸ੍ਸ ਕਾਮਭਵੇ ਚੁਦ੍ਦਸ ਪਟਿਸਨ੍ਧਿਯੋ ਇਚ੍ਛਨ੍ਤਿ. ਮਹਾਵਗ੍ਗਸਂਯੁਤ੍ਤਟੀਕਾਯਞ੍ਚ ਕੇਚਿ ਪਨ ਕਾਮਭਵੇ ਸਤ੍ਤਕ੍ਖਤ੍ਤੁਂਏਵ ਉਪ੍ਪਜ੍ਜਤਿ, ਨ ਤਤੋ ਉਦ੍ਧਨ੍ਤਿ ਵਦਨ੍ਤਿ. ਤਂ ਵੀਮਂਸਿਤਬ੍ਬਨ੍ਤਿ ਵੁਤ੍ਤਂ. ਵਿਭਙ੍ਗੇ ਪਨ ਤਤ੍ਥ ਤਤ੍ਥ ਅਟ੍ਠਾਨਸੁਤ੍ਤੇਸੁਚ ਅਟ੍ਠਾਨਮੇਤਂ ਅਨਵਕਾਸੋ ਯਂ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ਅਟ੍ਠਮਂ ਭਵਂ ਨਿਬ੍ਬਤ੍ਤੇਯ੍ਯ, ਨੇਤਂ ਠਾਨਂ ਵਿਜ੍ਜਤੀਤਿਚ, ਅਙ੍ਗੁਤ੍ਤਰੇ ਛਕ੍ਕਨਿਪਾਤੇ ਅਭਬ੍ਬੋ ਦਿਟ੍ਠਸਮ੍ਪਨ੍ਨੋ ਪੁਗ੍ਗਲੋ ਅਟ੍ਠਮਂ ਭਵਂ ਨਿਬ੍ਬਤ੍ਤੇਤੁਨ੍ਤਿ ਚ, ਮਹਾਨਿਦ੍ਦੇਸੇ ਅਜਿਤਪਞ੍ਹੇ ਸੋਹਾਪਤ੍ਤਿਮਗ੍ਗਞਾਣੇਨ ਅਭਿਸਙ੍ਖਾਰਵਿਞ੍ਞਾਣਸ੍ਸ, ਨਿਰੋਧੇਨ ਸਤ੍ਤਭਵੇ ਥਪੇਤ੍ਵਾ ਅਨਮ ਤਗ੍ਗੇਸਂਸਾਰੇ ਯੇ ਉਪ੍ਪਜ੍ਜੇਯ੍ਯੁਂ ਨਾਮਞ੍ਚ ਰੂਪਞ੍ਚ, ਏਤ੍ਥੇਤੇ ਨਿਰੁਜ੍ਝਨ੍ਤਿ. ਵੂਪਸਮਨ੍ਤਿ. ਅਤ੍ਥਂ ਗਚ੍ਛਨ੍ਤਿ. ਪਟਿਪਸ੍ਸਮ੍ਭਨ੍ਤੀਤਿਚ, ਏਵਂ ਦਲ਼੍ਹਂ ਕਤ੍ਵਾ ਵੁਤ੍ਤਤ੍ਤਾ ਯਥਾਵੁਤ੍ਤਨਯੇਨੇਵ ਤੇਸਂ ਸੁਤ੍ਤਪਦਾਨਂ ਅਤ੍ਥੋ ਵੇਦਿਤਬ੍ਬੋਤਿ. ਰਾਗਦੋਸਮੋਹਾਨਨ੍ਤਿ ਕਾਮਰਾਗਸ੍ਸ ਦੋਸਸ੍ਸ ਤਦੇਕਟ੍ਠਮੋਹਸ੍ਸਚ. ਤਨੁਕਰਤ੍ਤਾਤਿ ਯਥਾ ਸੋਤਾਪਨ੍ਨਸਨ੍ਤਾਨੇ ਉਪ੍ਪਜ੍ਜਨ੍ਤਾ ਧਮ੍ਮਿਕੇਸੁ ਕਾਮਵਤ੍ਥੂਸੁ ਬਲਵਨ੍ਤਾ ਹੁਤ੍ਵਾ ਉਪ੍ਪਜ੍ਜਨ੍ਤਿ. ਯਤੋ ਤੇਸਂ ਮੇਥੁਨਵਤ੍ਥੁਸਮਾਯੋਗੋਪਿ ਪਵਤ੍ਤਤਿ, ਤਥਾ ਉਪ੍ਪਜ੍ਜਿਤੁਂ ਅਸਮਤ੍ਥੇ ਕਤ੍ਵਾ ਸਂਲਿਖਨਵਸੇਨ ਤਨੁਕਰਣਤੋ. ਅਧਿਚ੍ਚੁਪ੍ਪਤ੍ਤਿਵਸੇਨਚ ਪਰਿਯੁਟ੍ਠਾਨਮਨ੍ਦਤਾਵਸੇਨਚ ਤਨੁਕਭਾਵਂ ਸਾਧਨਤੋਤਿ ਅਤ੍ਥੋ. ਤਤ੍ਥ ਅਧਿਚ੍ਚੁਪ੍ਪਤ੍ਤਿਵਸੇਨਾਤਿ ਕਦਾਚਿ ਚਿਰੇਨ ਉਪ੍ਪਤ੍ਤਿਵਸੇਨ. ਪਰਿਯੁਟ੍ਠਾਨਮਨ੍ਦਤਾਯਾਤਿ ਚਿਰੇਨ ਉਪ੍ਪਜ੍ਜਨ੍ਤਾਨਂਪਿ ਮਨ੍ਦਤਰਂ ਪਰਿਯੁਟ੍ਠਾਨਵਸੇਨ. ਮਹਾਸਿਵਤ੍ਥੇਰੇਨ ਪਨ ਤੇਸਂਪਿ ਮੇਥੁਨਵਤ੍ਥੁ ਸਮਾਯੋਗੋ ਇਚ੍ਛਿਤੋ. ਸੋ ਮਹਾਟ੍ਠਕਥਾਯਂ ਪਟਿਕ੍ਖਿਤ੍ਤੋ. ਯਞ੍ਚ ਛਕ੍ਕਨਿਪਾਤੇ ਮਿਗਾਸਾਲਵਤ੍ਥੁਮ੍ਹਿ ਅਬ੍ਰਹ੍ਮਚਾਰਿਨੋਪਿ ਇਸਿਦਤ੍ਤਸ੍ਸ ਬ੍ਰਾਹ੍ਮਣਸ੍ਸ ਸਕਦਾਗਾਮਿਤ੍ਤਂ ਭਗਵਤਾ ਬ੍ਯਾਕਤਂ, ਤਂਪਿ ਤਸ੍ਸ ਆਸਨ੍ਨਮਰਣਕਾਲੇ ਅਧਿਗਮਵਸੇਨ ਬ੍ਯਾਕਤਨ੍ਤਿ ਵੇਦਿਤਬ੍ਬਂ. ਸਕਿਂਦੇਵ ਇਮਂ ਲੋਕਂ ਆਗਨ੍ਤ੍ਵਾ ਆਗਮਨਤੋ ਸਕਦਾਗਾਮੀਨਾਮ ਹੋਤੀਤਿ ਯੋਜਨਾ. ਯਮੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਪਥਮਪਰਿਚ੍ਛੇਦੇ ਵੁਤ੍ਤਮੇਵ. ਅਰਹਤ੍ਤਂਭਾਵੇਤ੍ਵਾਤਿ ਅਰਹਤ੍ਤਮਗ੍ਗਂ ਭਾਵੇਤ੍ਵਾਖੀਣਾ ਚਤ੍ਤਾਰੋ ਆਸਵਾ ਯਸ੍ਸਾਤਿ ਖੀਣਾਸਵੋ. ਦਕ੍ਖਿਣਾ ਵੁਚ੍ਚਤਿ ਕਮ੍ਮਞ੍ਚ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾ ਆਯਤਿਂ ਫਲਪਟਿਲਾਭਤ੍ਥਾਯ ਦਿਨ੍ਨਦਾਨਂ. ਦਕ੍ਖਨ੍ਤਿ ਵਡ੍ਢਨ੍ਤਿ ਸਤ੍ਤਾ ਏਤਾਯਾਤਿ ਕਤ੍ਵਾ. ਤਾਯ ਪਨ ਦਕ੍ਖਿਣਾਯ ਵਿਪਤ੍ਤਿਕਰਾਨਂ ਕਿਲੇਸਾਨਂ ਸਬ੍ਬਸੋ ਅਭਾਵਤੋ ਸਮ੍ਪਤ੍ਤਿਕਰਾਨਞ੍ਚ ਸੀਲਕ੍ਖਨ੍ਧਾਦਿਗੁਣਾਨਂ ਸਬ੍ਬਸੋ ਪਰਿਪੁਣ੍ਣਤ੍ਤਾ ਦਕ੍ਖਿਣੇਯ੍ਯੇਸੁ ਅਗ੍ਗੋ ਜੇਟ੍ਠਕੋ ਹੁਤ੍ਵਾ ਤਂਦਕ੍ਖਿਣਂ ਪਟਿਗ੍ਗਹਿਤੁਂ ਅਰਹਤੀਤਿ ਅਗ੍ਗਦਕ੍ਖਿਣੇਯ੍ਯੋ. ਪੁਗ੍ਗਲਭੇਦੋਤਿ ਚਤੁਨ੍ਨਂ ਫਲਟ੍ਠਪੁਗ੍ਗਲਾਨਂ ਸਙ੍ਖੇਪਭੇਦੋ. ਵਿਤ੍ਥਾਰਭੇਦੋ ਪਨ ਏਵਂ ਵੇਦਿਤਬ੍ਬੋ, ਅਟ੍ਠਕਥਾਸੁ ਤਾਵ ਚਤੁਵੀਸਤਿ ਸੋਤਾਪਨ੍ਨਾ, ਦ੍ਵਾਦਸ ਸਕਦਾਗਾਮਿਨੋ, ਅਟ੍ਠਚਤ੍ਤਾਲੀਸ ਅਨਾਗਾਮਿਨੋ, ਦ੍ਵਾਦਸ ਅਰਹਨ੍ਤੋਤਿ ਫਲਟ੍ਠਾਨਂ ਛਨ੍ਨਵੁਤਿਭੇਦੋ ਵੁਤ੍ਤੋ. ਤਤ੍ਥ ਸਦ੍ਧਾਧਿਮੁਤ੍ਤੋ ਪਞ੍ਞਾਧਿਮੁਤ੍ਤੋਤਿ ਦ੍ਵੇ ਸੋਤਾਪਨ੍ਨਾ ਹੋਨ੍ਤਿ. ਤੇ ਏਕਬੀਜੀ ਕੋਲਂਕੋਲੋ ਸਤ੍ਤਕ੍ਖਤ੍ਤੁਪਰਮੋਚਾਤਿ ਤੀਹਿ ਗੁਣਿਤਾ ਛ. ਪੁਨ ਚਤੂਹਿ ਪਟਿਪਦਾਹਿ ਗੁਣਿਤਾ ਚਤੁਵੀਸਤਿ ਹੋਨ੍ਤਿ. ਤਿਵਿਧ ਵਿਮੋਕ੍ਖਚਤੁਪਟਿਪਦਾਨਂ ਪਨ ਭੇਦੇਨ ਦ੍ਵਾਦਸ ਸਕਦਾਗਾਮਿਨੋ ਦ੍ਵਾਦਸ ਅਰਹਨ੍ਤੋਚ ਹੋਨ੍ਤਿ. ਅਨਾਗਾਮਿਨੋ ਪਨ ਅਵਿਹੇਸੁ ਤਾਵ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚ ਪਰਿਨਿਬ੍ਬਾਯੀ, ਏਕੋ ਉਦ੍ਧਂ ਸੋਤੋ ਅਕਨਿਟ੍ਠਗਾਮੀਤਿ ਪਞ੍ਚ. ਤੇਯੇਵ ਸਸਙ੍ਖਾਰਪਰਿਨਿਬ੍ਬਾਯੀ ਅਸਙ੍ਖਾਰਪਰਿਨਿਬ੍ਬਾਯੀਚਾਤਿ ਦ੍ਵੀਹਿ ਗੁਣਿਤਾ ਦਸ. ਤਥਾ ਅਤਪ੍ਪਸੁ ਦਸ੍ਸਸੁਦਸ੍ਸੀਸੁ ਤਿਚਤ੍ਤਾਲੀਸ ਹੋਨ੍ਤਿ. ਅਕਨਿਟ੍ਠੇ ਪਨ ਉਦ੍ਧਂਸੋਤੋ ਅਕਨਿਟ੍ਠਗਾਮੀਨਾਮ ਨਤ੍ਥੀਤਿ ਚਤ੍ਤਾਰੋ ਸਸਙ੍ਖਾਰਪਰਿਨਿਬ੍ਬਾਯਿਨੋ ਚਤ੍ਤਾਰੋ ਅਸਙ੍ਖਾਰਪਰਿਨਿਬ੍ਬਾਯਿਨੋਤਿ ਅਟ੍ਠਾਤਿ. ਸਬ੍ਬੇ ਅਟ੍ਠਚਤ੍ਤਾਲੀਸ ਹੋਨ੍ਤੀਤਿ. ਸੁਤ੍ਤਨਿਪਾਤਟ੍ਠਕਥਾਯਂ ਪਨ ਦ੍ਵਾਦਸ ਸੋਤਾਪਨ੍ਨਾ, ਦ੍ਵਾਦਸ ਸਕਦਾਗਾਮਿਨੋ, ਚਤੁਵੀਸਤਿ ਅਨਾਗਾਮਿਨੋ, ਦ੍ਵੇ ਅਰਹਨ੍ਤੋ, ਚਤ੍ਤਾਰੋ ਮਗ੍ਗਟ੍ਠਾਤਿ ਚਤੁਪਞ੍ਞਾਸ ਹੋਨ੍ਤਿ. ਤੇਯੇਵ ਸਦ੍ਧਾਧੁਰ ਪਞ੍ਞਾਧੁਰ ਵਸੇਨ ਦ੍ਵੀਹਿ ਗੁਣਿਤਾ ਅਟ੍ਠਸਤਂ ਪੁਗ੍ਗਲਾ ਹੋਨ੍ਤੀਤਿ ਆਗਤੋ. ਏਤ੍ਥਾਤਿ ਏਤਸ੍ਮਿਂ ਪੁਗ੍ਗਲਭੇਦੇ. ਸਬ੍ਬੇਸਂਪੀਤਿ ਚਤੁਨ੍ਨਂ ਫਲਟ੍ਠਾਨਂਪਿ ਸਾਧਾਰਣਾਵ. ਨ ਨਿਰੋਧਸਮਾਪਤ੍ਤਿ ਵਿਯ ਏਕਚ੍ਚਾਨਂਏਵ ਸਾਧਾਰਣਾਤਿ ਅਧਿਪ੍ਪਾਯੋ. ਅਤਿਵਿਯ ਮਮਾਯਿਤਸ੍ਸ ਅਭਿਨਿਨ੍ਦਿ ਤਸ੍ਸ ਅਜ੍ਝੋਸਿਤਸ੍ਸ ਅਤ੍ਤਨੋ ਚਿਤ੍ਤਸਨ੍ਤਾਨਸ੍ਸ ਅਪਵਤ੍ਤਿਕਰਣਂ ਨਾਮ ਬਹਲਰਾਗਵਿਮੁਤ੍ਤਾਨਂਏਵ ਸਿਜ੍ਝਤੀਤਿ ਵੁਤ੍ਤਂ, ਅਨਾਗਾਮੀਨਞ੍ਚੇਵ ਅਰਹਨ੍ਤਾਨਞ੍ਚਲਬ੍ਭਤੀਤਿ. ਤੇਸਂਪਿ ਅਟ੍ਠਸਮਾਪਤ੍ਤਿਲਾਭੀਨਂ ਕਾਮਰੂਪਭਵਗਤਾਨਞ੍ਞੇਵ ਇਧ ਗਹਣਂ ਦਟ੍ਠਬ੍ਬਂ. ਕਸ੍ਮਾ, ਆਦਿਤੋ ਪਟ੍ਠਾਯ ਅਨੁਪੁਬ੍ਬਨਿਰੋਧਬਲੇਨੇਵ ਗਨ੍ਤਬ੍ਬਤ੍ਤਾ. ਤੇਨਾਹ ਤਤ੍ਥਾਤਿਆਦਿ. ਤਤ੍ਰਾਯਂ ਵਿਧਿ, ਪਥਮਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਤਤ੍ਥ ਗਤੇ ਸਙ੍ਖਾਰੇ ਅਨਿਚ੍ਚਤੋ ਦੁਕ੍ਖਤੋ ਅਨਤ੍ਤਤੋ ਵਿਪਸ੍ਸਤਿ. ਤਤੋ ਦੁਤੀਯਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਤਤ੍ਥਗਤੇ ਸਙ੍ਖਾਰੇ ਤਥੇਵ ਵਿਪਸ੍ਸਤਿ. ਤਤੋ ਤਤੀਯਂ ਝਾਨਂ. ਤਤੋ ਚਤੁਤ੍ਥਂ ਝਾਨਂ. ਤਤੋ ਪਞ੍ਚਮਂ ਝਾਨਂ. ਤਤੋ ਆਕਾਸਾਨਞ੍ਚਾਯਤਨਂ. ਤਤੋ ਵਿਞ੍ਞਾਣਞ੍ਚਾ ਯਤਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਤਤ੍ਥਗਤੇ ਸਙ੍ਖਾਰੇ ਤਥੇਵ ਵਿਪਸ੍ਸਤਿ. ਤਤੋ ਆਕਿਞ੍ਚਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਨਾਨਾਬਦ੍ਧਅਵਿਕੋਪਨਂ ਸਙ੍ਘਪਤਿਮਾਨਨਂ ਸਤ੍ਥੁਪਕ੍ਕੋਸਨਂ ਅਦ੍ਧਾਨ ਪਰਿਚ੍ਛੇਦੋਤਿ ਇਮਂ ਚਤੁਬ੍ਬਿਧਂ ਪੁਬ੍ਬਕਿਚ੍ਚਂ ਕਰੋਤਿ. ਤਤੋ ਨੇਵਸਞ੍ਞਾ ਨਾਸਞ੍ਞਾਯਤਨਂ ਸਮਾਪਜ੍ਜਤਿ. ਏਕਂਵਾ ਦ੍ਵੇਵਾ ਚਿਤ੍ਤਵਾਰੇ ਅਤਿਕ੍ਕਮਿਤ੍ਵਾ ਅਚਿਤ੍ਤਕੋ ਹੋਤਿ ਨਿਰੋਧਂ ਫੁਸਤੀਤਿ. ਤਤ੍ਥਤਤ੍ਥੇਵਾਤਿ ਤਤੋ ਤਤੋ ਝਾਨਤੋ ਤਸ੍ਮਿਂ ਤਸ੍ਮਿਂ ਵੁਟ੍ਠਿਤਕਾਲੇਏਵ. ਵਿਪਸ੍ਸਨ੍ਤੋਤਿ ਨਿਰੋਧਸ੍ਸ ਸਮਥ ਵਿਪਸ੍ਸਨਾ ਯੁਗਨਨ੍ਧਬਲੇਨੇਵ ਪਤ੍ਤਬ੍ਬਤ੍ਤਾ ਵਿਪਸ੍ਸਨਾਬਲੇਨਪਿ ਚਿਤ੍ਤਸਨ੍ਤਾਨਸ੍ਸ ਸਣ੍ਹਸੁਖੁਮਭਾਵਾ ਪਾਦਨਤ੍ਥਂ ਇਦਂ ਪਥਮਜ੍ਝਾਨਂ ਅਨਿਚ੍ਚਨ੍ਤਿਆਦਿਨਾ ਨਯੇਨ ਵਿਪਸ੍ਸਨ੍ਤੋ. ਯਾਵਆਕਿਞ੍ਚਞ੍ਞਾਯਤਨਂਗਨ੍ਤ੍ਵਾਤਿ ਯਾਵ ਆਕਿਞ੍ਚਞ੍ਞਾਯਤਨਜ੍ਝਾਨਂ, ਤਾਵ ਸਮਾਪਜ੍ਜਨਵੁਟ੍ਠਾਨਵਿਪਸ੍ਸਨਾਵਸੇਨ ਗਨ੍ਤ੍ਵਾ. ਆਵਜ੍ਜਨਾਧਿਟ੍ਠਾਨ ਪਚ੍ਚਵੇਕ੍ਖਨਾਨਿਪੇਤ੍ਥ ਇਚ੍ਛਿਤਬ੍ਬਾਨਿਯੇਵ. ਤੇਨੇਵ ਹਿ ਪਟਿਸਮ੍ਭਿਦਾਮਗ੍ਗੇ ਪਞ੍ਚਵਿਧਾ ਵਸਿਯੋ ਨਿਰੋਧਪਰਿਕਮ੍ਮੇਸੁ ਵੁਤ੍ਤਾਤਿ. ਤਤੋਪਰਨ੍ਤਿ ਆਕਿਞ੍ਚਞ੍ਞਾਯਤਨਜ੍ਝਾਨਗਤੇ ਸਙ੍ਖਾਰੇਵਿਪਸ੍ਸਨਾਨਨ੍ਤਰਂ, ਅਧਿਟ੍ਠਾਤਬ੍ਬਨ੍ਤਿ ਅਧਿਟ੍ਠੇਯ੍ਯਂ. ਅਤ੍ਤਨੋ ਸਰੀਰਾਬਨ੍ਧੇ ਪਰਿਕ੍ਖਾਰੇ ਥਪੇਤ੍ਵਾ ਨਾਨਾਬਨ੍ਧਾਨਿ ਚਿਵਰਾਦੀਨਿ ਪਰਿਕ੍ਖਾਰਾਨਿ ਅਗ੍ਗਿਆਦਿਨਾ ਪਰਿਸ੍ਸਯੇਨ ਮਾਵਿਨਸ੍ਸਨ੍ਤੂਤਿਵਾ, ਏਕਸੀਮਾਯਂ ਸਙ੍ਘਕਮ੍ਮੇ ਕਰੀਯਮਾਨੇ ਸਙ੍ਘੋ ਮਂ ਪਭਿਮਾਨੇਸ੍ਸਤਿ, ਤਦਾ ਵੁਟ੍ਠਹਾਮੀਤਿਵਾ, ਸਤ੍ਥਾ ਮਂ ਕੇਨਚਿਕਾਰਣੇਨ ਪਕ੍ਕੋਸਾ ਪੇਸ੍ਸਤਿ, ਤਦਾ ਵੁਟ੍ਠਹਾਮੀਤਿਵਾ ਅਧਿਟ੍ਠਾਨਕਿਚ੍ਚਂ. ਆਦਿਸਦ੍ਦੇਨ ਨਿਰੋਧਬ੍ਭਨ੍ਤਰੇਏਵ ਮਰਣਂ ਨੁਖੋ ਮੇ ਭਵਿਸ੍ਸਤੀਤਿ ਏਵਂ ਪਵਤ੍ਤੋ ਅਦ੍ਧਾਨ ਪਰਿਚ੍ਛੇਦੋ ਗਹਿਤੋ. ਦ੍ਵਿਨ੍ਨਂ.ਲ. ਵੋਚ੍ਛਿਜ੍ਜਤਿਚਿਤ੍ਤਸਨ੍ਤਤਿ ਤਦਤ੍ਥਾਯ ਆਦਿਤੋ ਪਟ੍ਠਾਯ ਤਥਾਰੂਪਸ੍ਸ ਪਯੋਗਵਿਸੇਸਸ੍ਸ ਸੁਟ੍ਠੁ ਕਤਤ੍ਤਾ. ਤਤੋਤਿ ਤਸ੍ਮਿਂ ਕਾਲੇ. ਅਨਾਗਾਮਿਨੋ ਅਨਾਗਾਮਿ ਫਲਚਿਤ੍ਤਂ ਨਿਰਾਵਜ੍ਜਨਂਪਿ ਨਿਪ੍ਪਰਿਕਮ੍ਮਂਪੀਤਿ ਅਧਿਪ੍ਪਾਯੋ. ਤਥਾਹਿ ਆਦਿਤੋ ਪਟ੍ਠਾਯ ਪੁਨਪ੍ਪੁਨਂ ਪਵਤ੍ਤਿਤਂ ਵਿਪਸ੍ਸਨਾਪਰਿਕਮ੍ਮਮੇਵ ਤਸ੍ਸ ਪਰਿਕਮ੍ਮਟ੍ਠਾਨੇ ਤਿਟ੍ਠਤਿ. ਨ ਵਿਸੁਂ ਆਸਨ੍ਨਪਰਿਕਮ੍ਮਂ ਨਾਮ ਅਤ੍ਥੀਤਿ. ਪਚ੍ਚਵੇਕ੍ਖਨਨ੍ਤਿ ਫਲਪਚ੍ਚਵੇਕ੍ਖਨਂ. ਏਵਂ ਦੁਵਿਧਂ ਕਮ੍ਮਟ੍ਠਾਨਨਯਂ ਨਿਦ੍ਦਿਸਿਤ੍ਵਾ ਇਦਾਨਿ ਯਦਤ੍ਥਂ ਸੋ ਨਿਦ੍ਦਿਸੀਯਤਿ, ਤਦਤ੍ਥੇ ਸੋਤੁਜਨੇ ਨਿਯੋਜੇਨ੍ਤੋ ਭਾਵੇ ਤਬ੍ਬਨ੍ਤਿ ਗਾਥਮਾਹ. ਤਤ੍ਥ ਪਟਿਪਜ੍ਜਿਤਬ੍ਬਾਤਿ ਪਟਿਪਤ੍ਤਿ. ਪਟਿਪਜ੍ਜਨ੍ਤਿਵਾ ਏਤਾਯ ਉਪਰੁਪਰਿ ਵਿਸੇਸਨ੍ਤਿ ਪਟਿਪਤ੍ਤਿ. ਸੀਲਾਦਿਧਮ੍ਮੋ. ਰਸੀਯਤਿ ਨਿਰਾਮਿਸਸੁਖਾਨੁਭਵਨਵਸੇਨ ਅਨੁਭਵੀਯਤੀਤਿ ਰਸੋ. ਝਾਨਮਗ੍ਗ ਫਲਭੂਤੋ ਅਧਿਗਮਧਮ੍ਮੋ. ਅਰਹਤ੍ਤ ਫਲਮੇਵਵਾ. ਤਦੁਭਯਂ ਪਟਿਚ੍ਚ ਉਪ੍ਪਨ੍ਨਪੀਤਿਸੋਮਨਸ੍ਸਮੇਵਵਾ. ਪਟਿਪਤ੍ਤਿਯਾ ਰਸੋ ਪਟਿਪਤ੍ਤਿ ਰਸੋ. ਸੋਏਵ ਅਸ੍ਸਾਦਿਤਬ੍ਬਟ੍ਠੇਨ ਅਸ੍ਸਾਦੋ ਚਾਤਿ ਪਟਿਪਤ੍ਤਿ ਰਸਸ੍ਸਾਦੋ. ਸਾਸਨੇ ਪਟਿਪਤ੍ਤਿਰਸਸ੍ਸਾਦਂ ਪਤ੍ਥਯਨ੍ਤੇਨ ਭਿਕ੍ਖੁਨਾ ਇਚ੍ਚੇਵਂ ਮਯਾ ਨਿਦ੍ਦਿਟ੍ਠਂ ਉਤ੍ਤਮਂ ਭਾਵਨਾਦ੍ਵਯਂ ਭਾਵੇਤਬ੍ਬਨ੍ਤਿ ਸਮ੍ਬਨ੍ਧੋ.
ਇਤਿ ਪਰਮਤ੍ਥਦੀਪਨਿਯਾਨਾਮ ਅਭਿਧਮ੍ਮਤ੍ਥਸਙ੍ਗਹਸ੍ਸ
ਚਤੁਤ੍ਥਵਣ੍ਣਨਾਯ ਕਮ੍ਮਟ੍ਠਾਨਸਙ੍ਗਹਸ੍ਸ
ਪਰਮਤ੍ਥਦਿਪਨਾ ਨਿਟ੍ਠਿਤਾ.