੭. ਕਿਬ੍ਬਿਧਾਨਕਣ੍ਡ
ਤੇਕਾਲਿਕ
ਕਿਚ੍ਚਪ੍ਪਚ੍ਚਯਨ੍ਤਨਯ
ਅਥ ਧਾਤੂਹਿਯੇਵ ਭਾਵਕਮ੍ਮਕਤ੍ਤੁਕਰਣਾਦਿਸਾਧਨਸਹਿਤਂ ਕਿਬ੍ਬਿਧਾਨਮਾਰਭੀਯਤੇ.
ਤਤ੍ਥ ਕਿਚ੍ਚਕਿਤਕਵਸੇਨ ਦੁਵਿਧਾ ਹਿ ਪਚ੍ਚਯਾ, ਤੇਸੁ ਕਿਚ੍ਚਸਞ੍ਞਾਯ ਪਠਮਂ ਵੁਤ੍ਤਤ੍ਤਾ, ਕਿਚ੍ਚਾਨਮਪ੍ਪਕਤ੍ਤਾ ਚ ਕਿਚ੍ਚਪ੍ਪਚ੍ਚਯਾ ਤਾਵ ਵੁਚ੍ਚਨ੍ਤੇ.
ਭੂ ਸਤ੍ਤਾਯਂ, ‘‘ਭੂਯਤੇ, ਅਭਵਿਤ੍ਥ, ਭਵਿਸ੍ਸਤੇ ਵਾ ਦੇਵਦਤ੍ਤੇਨਾ’’ਤਿ ਵਿਗ੍ਗਹੇ –
‘‘ਧਾਤੁਯਾ ਕਮ੍ਮਾਦਿਮ੍ਹਿ ਣੋ’’ਤਿ ਇਤੋ ‘‘ਧਾਤੁਯਾ’’ਤਿ ਸਬ੍ਬਤ੍ਥ ਪਚ੍ਚਯਾਦਿਵਿਧਾਨੇ ਵਤ੍ਤਤੇ, ‘‘ਪਰਾ, ਪਚ੍ਚਯਾ’’ਤਿ ਚ ਅਧਿਕਾਰੋ.
੫੪੫. ਭਾਵਕਮ੍ਮੇਸੁ ਤਬ੍ਬਾਨੀਯਾ.
ਭਾਵਕਮ੍ਮਇਚ੍ਚੇਤੇਸ੍ਵਤ੍ਥੇਸੁ ਸਬ੍ਬਧਾਤੂਹਿ ਤਬ੍ਬ ਅਨੀਯਇਚ੍ਚੇਤੇ ਪਚ੍ਚਯਾ ਪਰਾ ਹੋਨ੍ਤਿ. ਯੋਗਵਿਭਾਗੇਨ ਅਞ੍ਞਤ੍ਥਾਪਿ.
ਤਤ੍ਥ –
ਅਕਮ੍ਮਕੇਹਿ ਧਾਤੂਹਿ, ਭਾਵੇ ਕਿਚ੍ਚਾ ਭਵਨ੍ਤਿ ਤੇ;
ਸਕਮ੍ਮਕੇਹਿ ਕਮ੍ਮਤ੍ਥੇ, ਅਰਹਸਕ੍ਕਤ੍ਥਦੀਪਕਾ.
ਤੇ ਚ –
੫੪੬. ਣਾਦਯੋ ਤੇਕਾਲਿਕਾ.
ਤਿਕਾਲੇ ਨਿਯੁਤ੍ਤਾ ਤੇਕਾਲਿਕਾ, ਯੇ ਇਧ ਤਤਿਯੇ ਧਾਤ੍ਵਾਧਿਕਾਰੇ ਵਿਹਿਤਾ ਅਨਿਦ੍ਦਿਟ੍ਠਕਾਲਾ ਣਾਦਯੋ ਪਚ੍ਚਯਾ, ਤੇ ਤੇਕਾਲਿਕਾ ਹੋਨ੍ਤੀਤਿ ਪਰਿਭਾਸਤੋ ਕਾਲਤ੍ਤਯੇਪਿ ਹੋਨ੍ਤਿ.
ਸੀਹਗਤਿਯਾ ‘‘ਕ੍ਵਚੀ’’ਤਿ ਵਤ੍ਤਤੇ.
੫੪੭. ਯਥਾਗਮਮਿਕਾਰੋ.
ਯਥਾਗਮਂ ਯਥਾਪਯੋਗਂ ਜਿਨਵਚਨਾਨੁਪਰੋਧੇਨ ਧਾਤੂਹਿ ਪਰੋ ਇਕਾਰਾਗਮੋ ਹੋਤਿ ਕ੍ਵਚਿ ਬ੍ਯਞ੍ਜਨਾਦਿਕੇਸੁ ਕਿਚ੍ਚਕਿਤਕਪ੍ਪਚ੍ਚਯੇਸੁ, ‘‘ਅਞ੍ਞੇਸੁ ਚਾ’’ਤਿ ਵੁਦ੍ਧਿ, ‘‘ਓ ਅਵ ਸਰੇ’’ਤਿ ਅਵਾਦੇਸੋ, ‘‘ਨਯੇ ਪਰਂ ਯੁਤ੍ਤੇ’’ਤਿ ਪਰਂ ਨੇਤਬ੍ਬਂ.
੫੪੮. ਤੇ ਕਿਚ੍ਚਾ.
ਯੇ ਇਧ ਵੁਤ੍ਤਾ ਤਬ੍ਬਾਨੀਯਣ੍ਯ ਤੇਯ੍ਯ ਰਿਚ੍ਚਪ੍ਪਚ੍ਚਯਾ, ਤੇ ਕਿਚ੍ਚਸਞ੍ਞਾ ਹੋਨ੍ਤੀਤਿ ਵੇਦਿਤਬ੍ਬਾ. ਤਤੋ ‘‘ਅਞ੍ਞੇ ਕਿਤਿ’’ਤਿ ਵਚਨਤੋ ਕਿਚ੍ਚਪ੍ਪਚ੍ਚਯਾਨਮਕਿਤਕਤ੍ਤਾ ਨਾਮਬ੍ਯਪਦੇਸੇ ਅਸਮ੍ਪਤ੍ਤੇ ‘‘ਤਦ੍ਧਿਤਸਮਾਸਕਿਤਕਾ ਨਾਮਂਵਾਤਵੇਤੁਨਾਦੀਸੁ ਚਾ’’ਤਿ ਏਤ੍ਥ ਚਗ੍ਗਹਣੇਨ ਨਾਮਬ੍ਯਪਦੇਸੋ, ਤਤੋ ਸ੍ਯਾਦ੍ਯੁਪ੍ਪਤ੍ਤਿ. ਭਾਵੇ ਭਾਵਸ੍ਸੇਕਤ੍ਤਾ ਏਕਵਚਨਮੇਵ, ‘‘ਸਿ’’ਨ੍ਤਿ ਅਮਾਦੇਸੋ. ਭਵਿਤਬ੍ਬਂ ਭਵਤਾ ਪਞ੍ਞੇਨ, ਭਵਨੀਯਂ.
ਇਧ ਬ੍ਯਞ੍ਜਨਾਦਿਤ੍ਤਾਭਾਵਾ ਅਨੁਵਤ੍ਤਿਤਕ੍ਵਚਿਗ੍ਗਹਣੇਨ ਇਕਾਰਾਗਮਾਭਾਵੋ. ਭਾਵੇ ਕਿਚ੍ਚਪ੍ਪਚ੍ਚਯਨ੍ਤਾ ਨਪੁਂਸਕਾ. ਕਮ੍ਮੇ ਤਿਲਿਙ੍ਗਾ.
ਕਮ੍ਮਨਿ ਅਭਿਪੁਬ੍ਬੋ, ਅਭਿਭੂਯਤੇ, ਅਭਿਭੂਯਿਤ੍ਥ, ਅਭਿਭੂਯਿਸ੍ਸਤੇਤਿ ਅਭਿਭਵਿਤਬ੍ਬੋ ਕੋਧੋ ਪਣ੍ਡਿਤੇਨ, ਅਭਿਭਵਿਤਬ੍ਬਾ ਤਣ੍ਹਾ, ਅਭਿਭਵਿਤਬ੍ਬਂ ਦੁਕ੍ਖਂ, ਏਵਂ ਅਭਿਭਵਨੀਯੋ, ਅਭਿਭਵਨੀਯਾ, ਅਭਿਭਵਨੀਯਂ, ਪੁਰਿਸ ਕਞ੍ਞਾ ਚਿਤ੍ਤਸਦ੍ਦਨਯੇਨ ਨੇਤਬ੍ਬਂ, ਏਵਂ ਸਬ੍ਬਤ੍ਥ.
ਏਤ੍ਥ ਹਿ –
ਤਬ੍ਬਾਦੀਹੇਵ ਕਮ੍ਮਸ੍ਸ, ਵੁਤ੍ਤਤ੍ਤਾਵ ਪੁਨਤ੍ਤਨਾ;
ਵਤ੍ਤਬ੍ਬਸ੍ਸ ਅਭਾਵਾ ਨ, ਦੁਤਿਯਾ ਪਠਮਾ ਤਤੋ.
ਆਸ ਉਪਵੇਸਨੇ, ਆਸੀਯਿਤ੍ਥ, ਆਸੀਯਤੇ, ਆਸੀਯਿਸ੍ਸਤੇਤਿ ਆਸਿਤਬ੍ਬਂ ਤਯਾ, ਆਸਨੀਯਂ. ਕਮ੍ਮੇ ਉਪਾਸਿਤਬ੍ਬੋ ਗਰੁ, ਉਪਾਸਨੀਯੋ.
ਸੀ ਸਯੇ, ਅਸੀਯਿਤ੍ਥ, ਸੀਯਤੇ, ਸੀਯਿਸ੍ਸਤੇਤਿ ਸਯਿਤਬ੍ਬਂ ਭਵਤਾ, ਸਯਨੀਯਂ, ‘‘ਏ ਅਯਾ’’ਤਿ ਅਯਾਦੇਸੋ, ਅਤਿਸਯਿਤਬ੍ਬੋ ਪਰੋ, ਅਤਿਸਯਨੀਯੋ.
ਪਦ ਗਤਿਮ੍ਹਿ, ਉਪ੍ਪਜ੍ਜਿਤ੍ਥ, ਉਪ੍ਪਜ੍ਜਤੇ, ਉਪ੍ਪਜ੍ਜਿਸ੍ਸਤੇਤਿ ਉਪ੍ਪਜ੍ਜਿਤਬ੍ਬਂ ਤੇਨ, ਉਪ੍ਪਜ੍ਜਨੀਯਂ, ਏਤ੍ਥ ਚ ‘‘ਕਤ੍ਤਰੀ’’ਤਿ ਅਧਿਕਾਰਂ ਵਿਨਾ ‘‘ਦਿਵਾਦਿਤੋ ਯੋ’’ਤਿ ਵਿਨਾਧਿਕਾਰਯੋਗਵਿਭਾਗੇਨ ਯਪ੍ਪਚ੍ਚਯੋ, ‘‘ਤਸ੍ਸ ਚਵਗ੍ਗਯਕਾਰ’’ਇਚ੍ਚਾਦਿਨਾ ਚਵਗ੍ਗੋ, ‘‘ਪਰਦ੍ਵੇਭਾਵੋ ਠਾਨੇ’’ਤਿ ਦ੍ਵਿਭਾਵੋ, ਪਟਿਪਜ੍ਜਿਤਬ੍ਬੋ ਮਗ੍ਗੋ, ਪਟਿਪਜ੍ਜਨੀਯੋ.
ਬੁਧ ਅਵਗਮਨੇ, ਅਬੁਜ੍ਝਿਤ੍ਥ, ਬੁਜ੍ਝਤੇ, ਬੁਜ੍ਝਿਸ੍ਸਤੇਤਿ ਬੁਜ੍ਝਿਤਬ੍ਬੋ ਧਮ੍ਮੋ, ਬੁਜ੍ਝਨੀਯੋ.
ਸੁ ਸਵਣੇ, ਅਸੂਯਿਤ੍ਥ, ਸੂਯਤੇ, ਸੂਯਿਸ੍ਸਤੇਤਿ ਸੋਤਬ੍ਬੋ ਧਮ੍ਮੋ, ਇਧ ਯਥਾਗਮਗ੍ਗਹਣੇਨ ਇਕਾਰਾਗਮਾਭਾਵੋ, ਸੁਣਿਤਬ੍ਬੋ, ‘‘ਸ੍ਵਾਦਿਤੋ ਣੁ ਣਾ ਉਣਾ ਚਾ’’ਤਿ ਵਿਨਾਧਿਕਾਰਯੋਗਵਿਭਾਗੇਨ ਣਾਪਚ੍ਚਯੋ, ਸਵਣੀਯੋ.
ਕਰ ਕਰਣੇ, ਕਰੀਯਿਤ੍ਥ, ਕਰੀਯਤਿ, ਕਰੀਯਿਸ੍ਸਤੀਤਿ ਅਤ੍ਥੇ ਤਬ੍ਬਾ’ਨੀਯਾ.
‘‘ਅਨ੍ਤਸ੍ਸ, ਕਰਸ੍ਸ, ਚ, ਤਤ੍ਤ’’ਨ੍ਤਿ ਚ ਵਤ੍ਤਤੇ.
੫੪੯. ਤੁਂ ਤੁ ਨ ਤਬ੍ਬੇਸੁ ਵਾ.
ਕਰਇਚ੍ਚੇਤਸ੍ਸ ਧਾਤੁਸ੍ਸ ਅਨ੍ਤਭੂਤਸ੍ਸ ਰਕਾਰਸ੍ਸ ਤਕਾਰਤ੍ਤਂ ਹੋਤਿ ਵਾ ਤੁਂ ਤੁ ਨ ਤਬ੍ਬਇਚ੍ਚੇਤੇਸੁ ਪਚ੍ਚਯੇਸੁ ਪਰੇਸੁ. ਕਤ੍ਤਬ੍ਬੋ ਭਵਤਾ ਧਮ੍ਮੋ, ਕਤ੍ਤਬ੍ਬਾ ਪੂਜਾ, ਕਤ੍ਤਬ੍ਬਂ ਕੁਸਲਂ, ਤਤ੍ਤਾਭਾਵੇ ‘‘ਕਰੋਤਿਸ੍ਸਾ’’ਤਿ ਵਤ੍ਤਮਾਨੇ ‘‘ਤਵੇਤੁਨਾਦੀਸੁ ਕਾ’’ਤਿ ਏਤ੍ਥ ਆਦਿਸਦ੍ਦੇਨ ਤਬ੍ਬੇਪਿ ਕਾਦੇਸੋ, ਕਾਤਬ੍ਬਂ ਹਿਤਂ.
੫੫੦. ਰਹਾਦਿਤੋ ਣ.
ਰਕਾਰ ਹਹਾਰਾਦ੍ਯਨ੍ਤੇਹਿ ਧਾਤੂਹਿ ਪਰਸ੍ਸ ਅਨਾਨੀਯਾਦਿਨਕਾਰਸ੍ਸ ਣਕਾਰੋ ਹੋਤਿ. ਆਦਿਸਦ੍ਦੇਨ ਰਮੁ ਅਪਞਾਤਾਦਿਤੋਪਿ.
ਰਹਾਦਿਤੋ ਪਰਸ੍ਸੇਤ੍ਥ, ਨਕਾਰਸ੍ਸ ਅਸਮ੍ਭਵਾ;
ਅਨਾਨੀਯਾਦਿਨਸ੍ਸੇਵ, ਸਾਮਥ੍ਯਾਯਂ ਣਕਾਰਤਾ.
ਕਰਣੀਯੋ ਧਮ੍ਮੋ, ਕਰਣਾਰਹੋਤਿ ਅਤ੍ਥੋ, ਕਰਣੀਯਾ, ਕਰਣੀਯਂ.
ਭਰ ਭਰਣੇ, ਭਰੀਯਤੀਤਿ ਭਰਿਤਬ੍ਬੋ, ਭਰਣੀਯੋ.
ਗਹ ਉਪਾਦਾਨੇ, ਅਗਯ੍ਹਿਤ੍ਥ, ਗਯ੍ਹਤਿ, ਗਯ੍ਹਿਸ੍ਸਤੀਤਿ ਗਹੇਤਬ੍ਬੋ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਇਕਾਰਸ੍ਸੇਕਾਰੋ, ਸਙ੍ਗਣ੍ਹਿਤਬ੍ਬੋ, ‘‘ਗਹਾਦਿਤੋ ਪ੍ਪਣ੍ਹਾ’’ਤਿ ਵਿਨਾਧਿਕਾਰਯੋਗਵਿਭਾਗੇਨ ਣ੍ਹਾਪਚ੍ਚਯੋ, ਹਲੋਪਸਰਲੋਪਾਦਿ, ਸਙ੍ਗਣ੍ਹਣੀਯੋ, ਗਹਣੀਯੋ.
ਆਦਿਗ੍ਗਹਣੇਨ ਰਮੁ ਕੀਲ਼ਾਯਂ, ਰਮੀਯਿਤ੍ਥ, ਰਮੀਯਤਿ, ਰਮੀਯਿਸ੍ਸਤੀਤਿ ਰਮਿਤਬ੍ਬੋ, ਰਮਣੀਯੋ ਵਿਹਾਰੋ.
ਅਪ ਪਾਪੁਣਨੇ, ਉਣਾਪਚ੍ਚਯੋ, ਪਾਪੀਯਤੀਤਿ ਪਾਪੁਣਿਤਬ੍ਬੋ, ‘‘ਗੁਪਾਦੀਨਞ੍ਚਾ’’ਤਿ ਧਾਤ੍ਵਨ੍ਤਸ੍ਸ ਲੋਪੋ, ਦ੍ਵਿਤ੍ਤਞ੍ਚ, ਪਤ੍ਤਬ੍ਬੋ, ਪਤ੍ਤੇਯ੍ਯੋ, ਪਾਪੁਣਣੀਯੋ, ਪਾਪਣੀਯੋ.
‘‘ਅਨ੍ਤਸ੍ਸ, ਵਾ’’ਤਿ ਚ ਵਤ੍ਤਤੇ.
੫੫੧. ਗਮ ਖਨ ਹਨਾਦੀਨਂ ਤੁਂਤਬ੍ਬਾਦੀਸੁ ਨ.
ਗਮ ਖਨ ਹਨਇਚ੍ਚੇਵਮਾਦੀਨਂ ਮਕਾਰ ਨਕਾਰਨ੍ਤਾਨਂ ਧਾਤੂਨਮਨ੍ਤਸ੍ਸ ਨਕਾਰੋ ਹੋਤਿ ਵਾ ਤੁਂ ਤਬ੍ਬ ਤਵੇ ਤੁਨ ਤ੍ਵਾਨਤ੍ਵਾਇਚ੍ਚੇਵਮਾਦੀਸੁ ਤਕਾਰਾਦਿਪ੍ਪਚ੍ਚਯੇਸੁ ਪਰੇਸੁ. ਅਗਚ੍ਛੀਯਿਤ੍ਥ, ਗਚ੍ਛੀਯਤਿ, ਗਚ੍ਛੀਯਿਸ੍ਸਤੀਤਿ ਗਨ੍ਤਬ੍ਬੋ ਮਗ੍ਗੋ, ਗਮਿਤਬ੍ਬਂ, ਗਮਨੀਯਂ.
ਖਨੁ ਅਵਦਾਰਣੇ, ਅਖਞ੍ਞਿਤ੍ਥ, ਖਞ੍ਞਤਿ, ਖਞ੍ਞਿਸ੍ਸਤੀਤਿ ਖਨ੍ਤਬ੍ਬਂ ਆਵਾਟਂ, ਖਨਿਤਬ੍ਬਂ, ‘‘ਕ੍ਵਚਿ ਧਾਤੂ’’ਤਿਆਦਿਨਾ ਖਨਨ੍ਤਸ੍ਸ ਣਤ੍ਤਞ੍ਚ, ਖਣਿਤਬ੍ਬਂ, ਖਣਣੀਯਂ, ਖਨਨੀਯਂ ਵਾ.
ਹਨ ਹਿਂਸਾ ਗਤੀਸੁ, ਅਹਞ੍ਞਿਤ੍ਥ, ਹਞ੍ਞਤੇ, ਹਞ੍ਞਿਸ੍ਸਤੇਤਿ ਹਨ੍ਤਬ੍ਬਂ, ਹਨਿਤਬ੍ਬਂ, ਹਨਨੀਯਂ.
ਮਨ ਞਾਣੇ, ਅਮਞ੍ਞਿਤ੍ਥ, ਮਞ੍ਞਤੇ, ਮਞ੍ਞਿਸ੍ਸਤੇਤਿ ਮਨ੍ਤਬ੍ਬੋ, ਮਨਿਤਬ੍ਬੋ, ਯਪ੍ਪਚ੍ਚਯੇ ਚਵਗ੍ਗਾਦਿ, ਮਞ੍ਞਿਤਬ੍ਬਂ, ਮਞ੍ਞਨੀਯਂ.
ਪੂਜ ਪੂਜਾਯਂ, ਅਪੂਜੀਯਿਤ੍ਥ, ਪੂਜੀਯਤਿ, ਪੂਜੀਯਿਸ੍ਸਤੀਤਿ ਅਤ੍ਥੇ ਤਬ੍ਬਾਨੀਯਾ. ‘‘ਚੁਰਾਦਿਤੋ ਣੇ ਣਯਾ’’ਤਿ ਅਕਤ੍ਤਰਿਪਿ ਣੇਣਯਾ, ਇਕਾਰਾਗਮਾਨੀਯੇਸੁ ‘‘ਸਰਲੋਪੋ’’ਤਿਆਦਿਨਾ ਕਾਰਿਤਸਰਸ੍ਸ ਲੋਪੋ, ਪੂਜੇਤਬ੍ਬੋ, ਪੂਜਯਿਤਬ੍ਬੋ, ਪੂਜਨੀਯੋ ਭਗਵਾ.
‘‘ਤਬ੍ਬਾਨੀਯਾ’’ਤਿ ਯੋਗਵਿਭਾਗੇਨ ਕਤ੍ਤੁਕਰਣੇਸੁਪਿ, ਯਾ ਪਾਪੁਣਨੇ, ਨਿਯ੍ਯਾਤੀਤਿ ਨਿਯ੍ਯਾਨੀਕੋ ਮਗ੍ਗੋ. ਗਚ੍ਛਨ੍ਤੀਤਿ ਗਮਨੀਯਾ ਭੋਗਾ. ਨਹ ਸੋਚੇ, ਨਹਾਯਤਿ ਏਤੇਨਾਤਿ ਨਹਾਨੀਯਂ ਚੁਣ੍ਣਂ.
‘‘ਭਾਵਕਮ੍ਮੇਸੂ’’ਤਿ ਅਧਿਕਾਰੋ.
੫੫੨. ਣ੍ਯੋ ਚ.
ਭਾਵਕਮ੍ਮੇਸੁ ਸਬ੍ਬਧਾਤੂਹਿ ਣ੍ਯਪ੍ਪਚ੍ਚਯੋ ਹੋਤਿ, ਚਗ੍ਗਹਣੇਨ ‘‘ਞਾਤੇਯ੍ਯ’’ਨ੍ਤਿਆਦੀਸੁ ਤੇਯ੍ਯਪ੍ਪਚ੍ਚਯੋ ਚ.
੫੫੩. ਕਾਰਿਤਂ ਵਿਯ ਣਾਨੁਬਨ੍ਧੋ.
ਅਨੁਬਨ੍ਧੋ ਅਪ੍ਪਯੋਗੀ, ਣਕਾਰਾਨੁਬਨ੍ਧੋ ਪਚ੍ਚਯੋ ਕਾਰਿਤਂ ਵਿਯ ਦਟ੍ਠਬ੍ਬੋਤਿ ਕਾਰਿਤਬ੍ਯਪਦੇਸੋ, ‘‘ਕਾਰਿਤਾਨਂ ਣੋ ਲੋਪ’’ਨ੍ਤਿ ਣਲੋਪੋ, ‘‘ਅਸਂਯੋਗਨ੍ਤਸ੍ਸ ਵੁਦ੍ਧਿ ਕਾਰਿਤੇ’’ਤਿ ਵੁਦ੍ਧਿ, ਇਕਾਰਾਗਮੋ, ਕਤ੍ਤਬ੍ਬਂ ਕਾਰਿਯਂ.
ਹਰ ਹਰਣੇ, ਅਹਰੀਯਿਤ੍ਥ, ਹਰੀਯਤਿ, ਹਰੀਯਿਸ੍ਸਤੀਤਿ ਵਾ ਹਰਿਤਬ੍ਬਂ ਹਾਰਿਯਂ.
ਭਰ ਭਰਣੇ, ਭਰਿਤਬ੍ਬਂ ਭਾਰਿਯਂ.
ਲਭ ਲਾਭੇ, ਲਭਿਤਬ੍ਬਂ ਲਬ੍ਭਂ, ‘‘ਯਵਤਂ ਤਲਨ’’ਇਚ੍ਚਾਦਿਸੁਤ੍ਤੇ ਕਾਰਗ੍ਗਹਣੇਨ ਯਵਤੋ ਭਕਾਰਸ੍ਸ ਭਕਾਰੋ, ਦ੍ਵਿਤ੍ਤਂ.
ਸਾਸ ਅਨੁਸਿਟ੍ਠਿਮ੍ਹਿ, ਸਾਸਿਤਬ੍ਬੋ ਸਿਸ੍ਸੋ, ‘‘ਕ੍ਵਚਿ ਧਾਤੂ’’ਤਿਆਦਿਨਾ ਆਕਾਰਸ੍ਸਿਕਾਰੋ.
ਵਚ ਵਿਯਤ੍ਤਿਯਂ ਵਾਚਾਯਂ, ਣ੍ਯਪ੍ਪਚ੍ਚਯਾਦਿਮ੍ਹਿ ਕਤੇ ‘‘ਅਨ੍ਤਾਨਂ, ਣਾਨੁਬਨ੍ਧੇ’’ਤਿ ਚ ਵਤ੍ਤਤੇ.
੫੫੪. ਕਗਾ ਚਜਾਨਂ.
ਚਜਇਚ੍ਚੇਤੇਸਂ ਧਾਤ੍ਵਨ੍ਤਾਨਂ ਕਕਾਰ ਗਕਾਰਾਦੇਸਾ ਹੋਨ੍ਤਿ ਣਕਾਰਾਨੁਬਨ੍ਧੇ ਪਚ੍ਚਯੇ ਪਰੇਤਿ ਚਸ੍ਸ ਕਾਦੇਸੋ. ਵਚਨੀਯਂ ਵਾਕ੍ਯਂ.
ਭਜ ਸੇਵਾਯਂ, ਭਜਨੀਯਂ ਭਾਗ੍ਯਂ, ਜਸ੍ਸ ਗਾਦੇਸੋ.
ਚਿ ਚਯੇ, ਅਚੀਯਿਤ੍ਥ, ਚੀਯਤਿ, ਚੀਯਿਸ੍ਸਤੀਤਿ ਚੇਤਬ੍ਬਂ ਚੇਯ੍ਯਂ, ਇਕਾਰਸ੍ਸੇਕਾਰੋ ਵੁਦ੍ਧਿ, ਯਕਾਰਸ੍ਸ ਦ੍ਵਿਤ੍ਤਂ, ਵਿਨਿਪੁਬ੍ਬੋ ‘‘ਦੋ ਧਸ੍ਸ ਚਾ’’ਤਿ ਸੁਤ੍ਤੇ ਚਗ੍ਗਹਣੇਨ ਚਕਾਰਸ੍ਸ ਛਕਾਰੋ, ਵਿਨਿਚ੍ਛੇਯ੍ਯਂ, ਵਿਨਿਚ੍ਛਿਤਬ੍ਬਂ, ਵਿਨਿਚ੍ਛਨੀਯਂ. ‘‘ਕਿਯਾਦਿਤੋ ਨਾ’’ਤਿ ਵਿਨਾਧਿਕਾਰਯੋਗਵਿਭਾਗੇਨ ਤਬ੍ਬਾਨੀਯ ਤੁਂ ਤੁਨਾ ਦੀਸੁ ਚ ਨਾਪਚ੍ਚਯੋ, ਵਿਨਿਚ੍ਛਿਨਿਤਬ੍ਬਂ, ਵਿਨਿਚ੍ਛਿਨਨੀਯਂ.
ਨੀ ਪਾਪੁਣਨੇ, ਅਨੀਯਿਤ੍ਥ, ਨੀਯਤਿ, ਨੀਯਿਸ੍ਸਤੀਤਿ ਨੇਯ੍ਯੋ, ਨੇਯ੍ਯਾ, ਨੇਯ੍ਯਂ. ਨੇਤਬ੍ਬਂ.
ਣ੍ਯਗ੍ਗਹਣਂ ਛਟ੍ਠੀਯਨ੍ਤਵਸੇਨਾਨੁਵਤ੍ਤਤੇ, ਮਣ੍ਡੂਕਗਤਿਯਾ ਅਨ੍ਤਗ੍ਗਹਣਞ੍ਚ ਤਤਿਯਨ੍ਤਵਸੇਨ.
੫੫੫. ਭੂਤੋਬ੍ਬ.
ਭੂ ਇਚ੍ਚੇਤਸ੍ਮਾ ਪਰਸ੍ਸ ਣ੍ਯਪ੍ਪਚ੍ਚਯਸ੍ਸ ਸਹ ਧਾਤ੍ਵਨ੍ਤੇਨ ਅਬ੍ਬਾਦੇਸੋ ਹੋਤਿ. ਭਵਿਤਬ੍ਬੋ ਭਬ੍ਬੋ, ਭਬ੍ਬਾ, ਭਬ੍ਬਂ.
‘‘ਣ੍ਯਸ੍ਸ, ਅਨ੍ਤੇਨਾ’’ਤਿ ਚ ਵਤ੍ਤਤੇ.
੫੫੬. ਵਦ ਮਦ ਗਮੁ ਯੁਜ ਗਰਹਾਕਾਰਾਦੀਹਿ ਜ੍ਜਮ੍ਮਗ੍ਗਯ੍ਹੇਯ੍ਯਾਗਾਰੋ ਵਾ.
ਵਦ ਮਦ ਗਮੁ ਯੁਜ ਗਰਹਇਚ੍ਚੇਵਮਾਦੀਹਿ ਧਾਤੂਹਿ, ਆਕਾਰਨ੍ਤੇਹਿ ਚ ਪਰਸ੍ਸ ਣ੍ਯਪ੍ਪਚ੍ਚਯਸ੍ਸ ਧਾਤ੍ਵਨ੍ਤੇਨ ਸਹ ਯਥਾਕ੍ਕਮਂ ਜ੍ਜ ਮ੍ਮ ਗ੍ਗ ਯ੍ਹ ਏ ਯ੍ਯਇਚ੍ਚੇਤੇ ਆਦੇਸਾ ਹੋਨ੍ਤਿ ਵਾ, ਗਰਸ੍ਸ ਚ ਗਾਰਾਦੇਸੋ, ਗਰਹਸ੍ਸ ਗਰਸ੍ਸੇਵਾਯਂ ਗਾਰੋ. ਵਵਤ੍ਥਿਤਵਿਭਾਸਤ੍ਥੋਯਂ ਵਾਸਦ੍ਦੋ.
ਵਦ ਵਿਯਤ੍ਤਿਯਂ ਵਾਚਾਯਂ, ਅਵਜ੍ਜਿਤ੍ਥ, ਵਜ੍ਜਤਿ, ਵਜ੍ਜਿਸ੍ਸਤੀਤਿ ਵਾ ਵਜ੍ਜਂ ਵਦਨੀਯਂ, ਰਸ੍ਸਤ੍ਤਂ. ਵਜ੍ਜਂ ਦੋਸੋ.
ਮਦ ਉਮ੍ਮਾਦੇ, ਅਮਜ੍ਜਿਤ੍ਥ, ਮਜ੍ਜਤੇ, ਮਜ੍ਜਿਸ੍ਸਤਿ ਏਤੇਨਾਤਿ ਮਜ੍ਜਂ ਮਦਨੀਯਂ. ਮਦਗ੍ਗਹਣੇਨ ਕਰਣੇਪਿ ਣ੍ਯਪ੍ਪਚ੍ਚਯੋ. ਗਮੁ ਸਪ੍ਪ ਗਤਿਮ੍ਹਿ, ਗਨ੍ਤਬ੍ਬਂ ਗਮ੍ਮਂ.
ਯੁਜ ਯੋਗੇ, ਅਯੁਜ੍ਜਿਤ੍ਥ, ਯੁਜ੍ਜਤੇ, ਯੁਜ੍ਜਿਸ੍ਸਤੀਤਿ ਯੋਗ੍ਗਂ, ਨਿਯੋਜ੍ਜੋ ਵਾ.
ਗਰਹ ਨਿਨ੍ਦਾਯਂ, ਅਗਰਯ੍ਹਿਤ੍ਥ, ਗਰਹੀਯਤਿ, ਗਰਹੀਯਿਸ੍ਸਤੀਤਿ ਅਤ੍ਥੇ ਣ੍ਯਪ੍ਪਚ੍ਚਯੋ, ਤਸ੍ਸਿਮਿਨਾ ਧਾਤ੍ਵਨ੍ਤੇਨ ਸਹ ਯ੍ਹਾਦੇਸੋ, ਗਰਸ੍ਸ ਗਾਰਾਦੇਸੋ ਚ, ਗਾਰਯ੍ਹੋ, ਗਾਰਯ੍ਹਾ, ਗਾਰਯ੍ਹਂ, ਗਰਹਣੀਯਂ.
ਆਦਿਸਦ੍ਦੇਨ ਅਞ੍ਞੇਪਿ ਦਮਜਹਨ੍ਤਾ ਗਯ੍ਹਨ੍ਤੇ. ਗਦ ਵਿਯਤ੍ਤਿਯਂ ਵਾਚਾਯਂ, ਗਜ੍ਜਤੇ, ਗਦਨੀਯਂ ਵਾ ਗਜ੍ਜਂ. ਪਦ ਗਤਿਮ੍ਹਿ, ਪਜ੍ਜਨੀਯਂ ਪਜ੍ਜਂ ਗਾਥਾ. ਖਾਦ ਭਕ੍ਖਣੇ, ਖਜ੍ਜਤੇਤਿ ਖਜ੍ਜਂ ਖਾਦਨੀਯਂ. ਦਮੁ ਦਮਨੇ, ਅਦਮ੍ਮਿਤ੍ਥ, ਦਮ੍ਮਤੇ, ਦਮੀਯਿਸ੍ਸਤੀਤਿ ਦਮ੍ਮੋ ਦਮਨੀਯੋ. ਭੁਜ ਪਾਲਨਬ੍ਯਵਹਰਣੇਸੁ, ਅਭੁਜ੍ਜਿਤ੍ਥ, ਭੁਜ੍ਜਤਿ, ਭੁਜ੍ਜਿਸ੍ਸਤੀਤਿ ਭੋਗ੍ਗਂ, ਭੋਜ੍ਜਂ ਵਾ, ਕਾਰਗ੍ਗਹਣੇਨ ਯਸ੍ਸ ਜਕਾਰੋ. ਗਹੇਤਬ੍ਬਂ ਗਯ੍ਹਮਿਚ੍ਚਾਦਿ.
ਆਕਾਰਨ੍ਤਤੋ ਪਨ ਦਾ ਦਾਨੇ, ਅਦੀਯਿਤ੍ਥ, ਦੀਯਤਿ, ਦੀਯਿਸ੍ਸਤੀਤਿ ਅਤ੍ਥੇ ਣ੍ਯਪ੍ਪਚ੍ਚਯੋ, ਤਸ੍ਸਿਮਿਨਾ ਧਾਤ੍ਵਨ੍ਤੇਨ ਆਕਾਰੇਨ ਸਹ ਏਯ੍ਯਾਦੇਸੋ, ਦੇਯ੍ਯਂ, ਦਾਤਬ੍ਬਂ. ਅਨੀਯੇ ‘‘ਸਰਲੋਪੋ’’ਤਿਆਦਿਨਾ ਪੁਬ੍ਬਸਰਸ੍ਸ ਲੋਪੇ ਸਮ੍ਪਤ੍ਤੇ ਤਤ੍ਥੇਵ ਤੁਗ੍ਗਹਣੇਨ ਨਿਸੇਧੇਤ੍ਵਾ ‘‘ਸਰਾ ਸਰੇ ਲੋਪ’’ਨ੍ਤਿ ਆਕਾਰੇ ਲੁਤ੍ਤੇ ਪਰਸਰਸ੍ਸ ਦੀਘੋ, ਦਾਨੀਯਂ.
ਪਾ ਪਾਨੇ, ਅਪੀਯਿਤ੍ਥ, ਪੀਯਤਿ, ਪੀਯਿਸ੍ਸਤੀਤਿ ਪੇਯ੍ਯਂ, ਪਾਤਬ੍ਬਂ, ਪਾਨੀਯਂ. ਹਾ ਚਾਗੇ, ਅਹੀਯਿਤ੍ਥ, ਹੀਯਤਿ, ਹੀਯਿਸ੍ਸਤੀਤਿ ਹੇਯ੍ਯਂ, ਹਾਤਬ੍ਬਂ, ਹਾਨੀਯਂ. ਮਾ ਮਾਨੇ, ਅਮੀਯਿਤ੍ਥ, ਮੀਯਤਿ, ਮੀਯਿਸ੍ਸਤੀਤਿ ਮੇਯ੍ਯਂ, ਮਾਤਬ੍ਬਂ, ਮਿਨਿਤਬ੍ਬਂ, ਮੇਤਬ੍ਬਂ ਵਾ. ਞਾ ਅਵਬੋਧਨੇ, ਅਞ੍ਞਾਯਿਤ੍ਥ, ਞਾਯਤਿ, ਞਾਯਿਸ੍ਸਤੀਤਿ ਞੇਯ੍ਯਂ, ਞਾਤਬ੍ਬਂ, ਞਾਤੇਯ੍ਯਂ. ‘‘ਞਾਸ੍ਸ ਜਾ ਜਂ ਨਾ’’ਤਿ ਜਾਦੇਸੇ ‘‘ਕਿਯਾਦਿਤੋ ਨਾ’’ਤਿ ਵਿਨਾਧਿਕਾਰਯੋਗਵਿਭਾਗੇਨ ਨਾਪਚ੍ਚਯੋ, ਇਕਾਰਾਗਮੋ ਚ, ਜਾਨਿਤਬ੍ਬਂ, ਵਿਜਾਨਨੀਯਂ. ਖ੍ਯਾਪਕਥਨੇ, ਸਙ੍ਖ੍ਯਾਤਬ੍ਬਂ, ਸਙ੍ਖ੍ਯੇਯ੍ਯਂ ਇਚ੍ਚਾਦਿ.
੫੫੭. ਕਰਮ੍ਹਾ ਰਿਚ੍ਚ.
ਕਰਧਾਤੁਤੋ ਰਿਚ੍ਚਪ੍ਪਚ੍ਚਯੋ ਹੋਤਿ ਭਾਵਕਮ੍ਮੇਸੁ.
੫੫੮. ਰਮ੍ਹਿ ਰਨ੍ਤੋ ਰਾਦਿ ਨੋ.
ਰਕਾਰਾਨੁਬਨ੍ਧੇ ਪਚ੍ਚਯੇ ਪਰੇ ਸਬ੍ਬੋ ਧਾਤ੍ਵਨ੍ਤੋ ਰਾਦਿ ਪਚ੍ਚਯਰਕਾਰਮਰਿਯਾਦੋ ਨੋ ਹੋਤਿ, ਲੋਪਮਾਪਜ੍ਜਤੇਤਿ ਅਤ੍ਥੋ. ਰਨ੍ਤੋਤਿ ਏਤ੍ਥ ਰਕਾਰੋ ਸਨ੍ਧਿਜੋ, ਕਤ੍ਤਬ੍ਬਂ ਕਿਚ੍ਚਂ. ‘‘ਰਿਚ੍ਚਾ’’ਤਿ ਯੋਗਵਿਭਾਗੇਨ ਭਰਾਦਿਤੋਪਿ ਰਿਚ੍ਚਪ੍ਪਚ੍ਚਯੋ, ਯਥਾ, ਭਰੀਯਤੀਤਿ ਭਚ੍ਚੋ, ਸਰਲੋਪੋ. ਇ ਗਤਿਮ੍ਹਿ, ਪਤਿ ਏਤਬ੍ਬੋ ਪਟਿਚ੍ਚੋ.
੫੫੯. ਪੇਸਾਤਿਸਗ੍ਗਪਤ੍ਤਕਾਲੇਸੁ ਕਿਚ੍ਚਾ.
ਪੇਸ ਅਤਿਸਗ੍ਗ ਪਤ੍ਤਕਾਲਇਚ੍ਚੇਤੇਸ੍ਵਤ੍ਥੇਸੁ ਕਿਚ੍ਚਪ੍ਪਚ੍ਚਯਾ ਹੋਨ੍ਤਿ. ਪੇਸਨਂ ਨਾਮ ‘‘ਕਤ੍ਤਬ੍ਬਮਿਦਂ ਭਵਤਾ’’ਤਿ ਆਣਾਪਨਂ, ਅਜ੍ਝੇਸਨਞ੍ਚ. ਅਤਿਸਗ੍ਗੋਨਾਮ ‘‘ਕਿਮਿਦਂ ਮਯਾ ਕਤ੍ਤਬ੍ਬ’’ਨ੍ਤਿ ਪੁਟ੍ਠਸ੍ਸ ਵਾ ‘‘ਪਾਣੋ ਨ ਹਨ੍ਤਬ੍ਬੋ’’ਤਿਆਦਿਨਾ ਪਟਿਪਤ੍ਤਿਦਸ੍ਸਨਮੁਖੇਨ ਵਾ ਕਤ੍ਤਬ੍ਬਸ੍ਸ ਅਨੁਞ੍ਞਾ. ਪਤ੍ਤਕਾਲੋ ਨਾਮ ਸਮ੍ਪਤ੍ਤਸਮਯੋ ਯੋ ਅਤ੍ਤਨੋ ਕਿਚ੍ਚਕਰਣਸਮਯਮਨੁਪਪਰਿਕ੍ਖਿਤ੍ਵਾ ਨ ਕਰੋਤਿ, ਤਸ੍ਸ ਸਮਯਾਰੋਚਨਂ, ਨ ਤਤ੍ਥ ਅਜ੍ਝੇਸਨਮਤ੍ਥੀਤਿ. ਤੇ ਚ ‘‘ਭਾਵਕਮ੍ਮੇਸੁ ਕਿਚ੍ਚਤ੍ਤਕ੍ਖਤ੍ਥਾ’’ਤਿ ਵੁਤ੍ਤਤ੍ਤਾ ਭਾਵਕਮ੍ਮੇਸ੍ਵੇਵ ਭਵਨ੍ਤਿ.
ਪੇਸਨੇ ਤਾਵ – ਕਰੀਯਤੁ ਭਵਤਾ ਕਮ੍ਮਨ੍ਤਿ ਅਤ੍ਥੇ ਇਮਿਨਾ ਤਬ੍ਬਾਨੀਯਾ, ਸੇਸਂ ਵੁਤ੍ਤਨਯਮੇਵ, ਕਤ੍ਤਬ੍ਬਂ ਕਮ੍ਮਂ ਭਵਤਾ, ਕਰਣੀਯਂ ਕਿਚ੍ਚਂ ਭਵਤਾ.
ਅਤਿਸਗ੍ਗੇ ਭੁਜ੍ਜਤੁ ਭਵਤਾਤਿ ਅਤ੍ਥੇ ਤਬ੍ਬਾਦਿ, ‘‘ਅਞ੍ਞੇਸੁ ਚਾ’’ਤਿ ਵੁਦ੍ਧਿ.
‘‘ਤਸ੍ਸਾ’’ਤਿ ਵਤ੍ਤਤੇ.
੫੬੦. ਭੁਜਾਦੀਨਮਨ੍ਤੋ ਨੋ ਦ੍ਵਿ ਚ.
ਭੁਜਇਚ੍ਚੇਵਮਾਦੀਨਂ ਜਕਾਰਾਦਿਅਨ੍ਤਾਨਂ ਧਾਤੂਨਮਨ੍ਤੋ ਨੋ ਹੋਤਿ, ਪਰਸ੍ਸ ਕਿਚ੍ਚਕਿਤਕਪ੍ਪਚ੍ਚਯਤਕਾਰਸ੍ਸ ਚ ਦ੍ਵੇਭਾਵੋ ਹੋਤਿ. ਭੋਤ੍ਤਬ੍ਬਂ ਭੋਜਨਂ ਭਵਤਾ, ਭੋਜਨੀਯਂ ਭੋਜ੍ਜਂ ਭਵਤਾ.
ਇਕਾਰਾਗਮਯੁਤ੍ਤਤਕਾਰੇ ਪਨ – ‘‘ਨਮਕਰਾਨਮਨ੍ਤਾਨਂ ਨਿਯੁਤ੍ਤਤਮ੍ਹੀ’’ਤਿ ਏਤ੍ਥ ‘‘ਅਨ੍ਤਾਨਂ ਨਿਯੁਤ੍ਤਤਮ੍ਹੀ’’ਤਿ ਯੋਗਵਿਭਾਗੇਨ ਧਾਤ੍ਵਨ੍ਤਲੋਪਾਦਿਨਿਸੇਧੋ, ‘‘ਰੁਧਾਦਿਤੋ ਨਿਗ੍ਗਹੀਤਪੁਬ੍ਬ’’ਨ੍ਤਿ ਵਿਨਾਧਿਕਾਰਯੋਗਵਿਭਾਗੇਨ, ‘‘ਨਿਗ੍ਗਹੀਤਞ੍ਚਾ’’ਤਿ ਵਾ ਨਿਗ੍ਗਹੀਤਾਗਮੋ, ਭੁਞ੍ਜਿਤਬ੍ਬਂ ਤਯਾ, ਯੁਞ੍ਜਿਤਬ੍ਬਂ.
ਸਮਯਾਰੋਚਨੇ ਪਨ – ਇ ਅਜ੍ਝਯਨੇ ਅਧਿਪੁਬ੍ਬੋ, ਅਧੀਯਤਂ ਭਵਤਾਤਿ ਅਤ੍ਥੇ ਤਬ੍ਬਾਨੀਯਾਦਿ, ਇਕਾਰਾਗਮਵੁਦ੍ਧਿਅਯਾਦੇਸਅਜ੍ਝਾਦੇਸਾ ਚ, ਣ੍ਯਪ੍ਪਚ੍ਚਯੇ ਤੁ ਵੁਦ੍ਧਿ, ਯਕਾਰਸ੍ਸ ਦ੍ਵਿਤ੍ਤਞ੍ਚ, ਅਜ੍ਝਯਿਤਬ੍ਬਂ, ਅਜ੍ਝੇਯ੍ਯਂ ਭਵਤਾ, ਅਜ੍ਝਯਨੀਯਂ ਭਵਤਾ, ਅਵਸ੍ਸਂ ਕਤ੍ਤਬ੍ਬਨ੍ਤਿ ਵਾਕ੍ਯੇ ਪਨ ‘‘ਕਿਚ੍ਚਾ’’ਤਿ ਅਧਿਕਿਚ੍ਚ ‘‘ਅਵਸ੍ਸਕਾਧਮਿਣੇਸੁ ਣੀ ਚਾ’’ਤਿ ਅਵਸ੍ਸਕਾਧਮਿਣਤ੍ਥੇ ਚ ਤਬ੍ਬਾਦਯੋ, ਕਤ੍ਤਬ੍ਬਂ ਮੇ ਭਵਤਾ ਗੇਹਂ, ਕਰਣੀਯਂ, ਕਾਰਿਯਂ. ਏਵਂ ਦਾਤਬ੍ਬਂ ਮੇ ਭਵਤਾ ਸਤਂ, ਦਾਨੀਯਂ, ਦੇਯ੍ਯਂ.
ਧਰ ਧਾਰਣੇ, ਚੁਰਾਦਿਤ੍ਤਾ ਣੇਣਯਾ, ਵੁਦ੍ਧਿ, ਇਕਾਰਾਗਮੋ ਚ, ਧਾਰੇਤਬ੍ਬਂ, ਧਾਰਯਿਤਬ੍ਬਂ ਇਚ੍ਚਾਦਿ.
‘‘ਨੁਦਾਦੀਹਿ ਯੁਣ੍ਵੂਨਮਨਾਨਨਾਕਾਨਨਕਾ ਸਕਾਰਿਤੇਹਿ ਚਾ’’ਤਿ ਸਕਾਰਿਤੇਹਿਪਿ ਯੁਣ੍ਵੂਨਮਾਦੇਸਵਿਧਾਨਤੋਯੇਵ ਧਾਤੁਪ੍ਪਚ੍ਚਯਨ੍ਤਤੋਪਿ ਕਿਚ੍ਚਕਿਤਕਪ੍ਪਚ੍ਚਯਾ ਭਵਨ੍ਤੀਤਿ ਦਟ੍ਠਬ੍ਬੋ. ਤੇਨ ਤਿਤਿਕ੍ਖਾਪੀਯਤੀਤਿ ਤਿਤਿਕ੍ਖਾਪੇਤਬ੍ਬੋ. ਏਵਂ ਤਿਕਿਚ੍ਛਾਪੇਤਬ੍ਬੋ ਤਿਕਿਚ੍ਛਾਪਨੀਯੋ. ਅਭਾਵੀਯਿਤ੍ਥ, ਭਾਵੀਯਤਿ, ਭਾਵੀਯਿਸ੍ਸਤੀਤਿ ਭਾਵੇਤਬ੍ਬੋ ਮਗ੍ਗੋ. ਭਾਵਯਿਤਬ੍ਬੋ, ਭਾਵਨੀਯੋ, ਭਾਵਨੀਯਂ, ਭਾਵਨੀਯਾ, ਅਕਾਰੀਯਿਤ੍ਥ, ਕਾਰੀਯਤਿ, ਕਾਰੀਯਿਸ੍ਸਤੀਤਿ ਕਾਰੇਤਬ੍ਬਂ, ਕਾਰਯਿਤਬ੍ਬਂ, ਕਾਰਾਪੇਤਬ੍ਬਂ, ਕਾਰਾਪਯਿਤਬ੍ਬਂ, ਕਾਰਾਪਨੀਯਮਿਚ੍ਚਾਦਿ ਚ ਸਿਦ੍ਧਂ ਭਵਤਿ.
ਕਤ੍ਤਬ੍ਬਂ ਕਰਣੀਯਞ੍ਚ, ਕਾਰਿਯਂ ਕਿਚ੍ਚਮਿਚ੍ਚਪਿ;
ਕਾਰੇਤਬ੍ਬਂ ਤਥਾ ਕਾਰਾ-ਪੇਤਬ੍ਬਂ ਕਿਚ੍ਚਸਙ੍ਗਹੋ.
ਕਿਚ੍ਚਪ੍ਪਚ੍ਚਯਨ੍ਤਨਯੋ.
ਤੇਕਾਲਿਕ
ਕਿਤਕਪ੍ਪਚ੍ਚਯਨ੍ਤਨਯ
ਇਦਾਨਿ ਕਿਤਕਪ੍ਪਚ੍ਚਯਾ ਵੁਚ੍ਚਨ੍ਤੇ.
ਕਰ ਕਰਣੇ, ਪੁਰੇ ਵਿਯ ਧਾਤੁਸਞ੍ਞਾਦਿ.
ਕੁਮ੍ਭਇਚ੍ਚੁਪਪਦਂ, ਤਤੋ ਦੁਤਿਯਾ.
‘‘ਕੁਮ੍ਭਂ ਕਰੋਤਿ, ਅਕਾਸਿ, ਕਰਿਸ੍ਸਤੀ’’ਤਿ ਵਾ ਵਿਗ੍ਗਹੇ –
‘‘ਪਰਾ, ਪਚ੍ਚਯਾ’’ਤਿ ਚ ਵਤ੍ਤਤੇ.
੫੬੧. ਧਾਤੁਯਾ ਕਮ੍ਮਾਦਿਮ੍ਹਿ ਣੋ.
ਕਮ੍ਮਸ੍ਮਿਂ ਆਦਿਮ੍ਹਿ ਸਤਿ ਧਾਤੁਯਾ ਪਰੋ ਣਪ੍ਪਚ੍ਚਯੋ ਹੋਤਿ.
ਸੋ ਚ –
੫੬੨. ਅਞ੍ਞੇ ਕਿਤ.
ਤਤਿਯੇ ਧਾਤ੍ਵਾਧਿਕਾਰੇ ਵਿਹਿਤਾ ਕਿਚ੍ਚੇਹਿ ਅਞ੍ਞੇ ਪਚ੍ਚਯਾ ਕਿਤਿਚ੍ਚੇਵ ਸਞ੍ਞਾ ਹੋਨ੍ਤੀਤਿ ਕਿਤਸਞ੍ਞਾ ਕਤਾ.
੫੬੩. ਕਤ੍ਤਰਿ ਕਿਤ.
ਕਤ੍ਤਰਿ ਕਾਰਕੇ ਕਿਤਪਚ੍ਚਯੋ ਹੋਤੀਤਿ ਨਿਯਮਤੋ ਕਤ੍ਤਰਿ ਭਵਤਿ, ਸੋ ਚ ‘‘ਣਾਦਯੋ ਤੇਕਾਲਿਕਾ’’ਤਿ ਵੁਤ੍ਤਤ੍ਤਾ ਕਾਲਤ੍ਤਯੇ ਚ ਹੋਤਿ. ਪੁਰੇ ਵਿਯ ਕਾਰਿਤਬ੍ਯਪਦੇਸਣਲੋਪਵੁਦ੍ਧਿਯੋ, ਪਚ੍ਚਯਨ੍ਤਸ੍ਸਾਲਿਙ੍ਗਤ੍ਤਾ ਸ੍ਯਾਦਿਮ੍ਹਿ ਅਸਮ੍ਪਤ੍ਤੇ ‘‘ਤਦ੍ਧਿਤਸਮਾਸਕਿਤਕਾ ਨਾਮਂਵਾਤਵੇਤੁਨਾਦੀਸੁ ਚਾ’’ਤਿ ਕਿਤਕਨ੍ਤਤ੍ਤਾ ਨਾਮਂਵ ਕਤੇ ਸ੍ਯਾਦ੍ਯੁਪ੍ਪਤ੍ਤਿ, ਤਤੋ ਕੁਮ੍ਭਂ ਕਰੋਤੀਤਿ ਅਤ੍ਥੇ ‘‘ਅਮਾਦਯੋ ਪਰਪਦੇਭੀ’’ਤਿ ਦੁਤਿਯਾਤਪ੍ਪੁਰਿਸਸਮਾਸੋ, ‘‘ਨਾਮਾਨ’’ਨ੍ਤਿਆਦਿਨਾ ਸਮਾਸਸਞ੍ਞਾ, ‘‘ਤੇਸਂ ਵਿਭਤ੍ਤਿਯੋ ਲੋਪਾ ਚਾ’’ਤਿ ਵਿਭਤ੍ਤਿਲੋਪੋ, ‘‘ਪਕਤਿ ਚਸ੍ਸ ਸਰਨ੍ਤਸ੍ਸਾ’’ਤਿ ਪਕਤਿਭਾਵੋ, ਪੁਨ ਸਮਾਸਤ੍ਤਾ ਨਾਮਮਿਵ ਕਤੇ ਸ੍ਯਾਦ੍ਯੁਪ੍ਪਤ੍ਤਿ.
ਸੋ ਕੁਮ੍ਭਕਾਰੋ, ਤੇ ਕੁਮ੍ਭਕਾਰਾ ਇਚ੍ਚਾਦਿ. ਇਤ੍ਥਿਯਂ ਕੁਮ੍ਭਕਾਰੀ, ਕੁਮ੍ਭਕਾਰਿਯੋ ਇਚ੍ਚਾਦਿ, ਤਥਾ ਕਮ੍ਮਂ ਕਰੋਤੀਤਿ ਕਮ੍ਮਕਾਰੋ. ਏਵਂ ਮਾਲਾਕਾਰੋ, ਕਟ੍ਠਕਾਰੋ, ਰਥਕਾਰੋ, ਸੁਵਣ੍ਣਕਾਰੋ, ਸੁਤ੍ਤਕਾਰੋ, ਵੁਤ੍ਤਿਕਾਰੋ, ਟੀਕਾਕਾਰੋ.
ਗਹ ਉਪਾਦਾਨੇ, ਪਤ੍ਤਂ ਅਗਣ੍ਹਿ, ਗਣ੍ਹਾਤਿ, ਗਣ੍ਹਿਸ੍ਸਤੀਤਿ ਵਾ ਪਤ੍ਤਗ੍ਗਾਹੋ. ਏਵਂ ਰਸ੍ਮਿਗ੍ਗਾਹੋ, ਰਜ੍ਜੁਗ੍ਗਾਹੋ.
ਵੇ ਤਨ੍ਤਸਨ੍ਤਾਨੇ, ਤਨ੍ਤਂ ਅਵਾਯਿ, ਵਾਯਤਿ, ਵਾਯਿਸ੍ਸਤੀਤਿ ਵਾ ਤਨ੍ਤਵਾਯੋ, ‘‘ਤੇ ਆਵਾਯਾ ਕਾਰਿਤੇ’’ਤਿ ਆਯਾਦੇਸੋ, ਵਾਕ੍ਯੇ ਪਨੇਤ੍ਥ ‘‘ਤੇ ਆਵਾਯਾ’’ਤਿ ਯੋਗਵਿਭਾਗੇਨ ਆਯਾਦੇਸੋ. ਏਵਂ ਤੁਨ੍ਨਵਾਯੋ.
ਮਾ ਪਰਿਮਾਣੇ, ਧਞ੍ਞਂ ਅਮਿਨਿ, ਮਿਨਾਤਿ, ਮਿਨਿਸ੍ਸਤੀਤਿ ਵਾ ਅਤ੍ਥੇ ਣਪ੍ਪਚ੍ਚਯੇ ਕਤੇ –
‘‘ਣਮ੍ਹੀ’’ਤਿ ਵਤ੍ਤਤੇ.
੫੬੪. ਆਕਾਰਨ੍ਤਾਨਮਾਯੋ.
ਆਕਾਰਨ੍ਤਾਨਂ ਧਾਤੂਨਂ ਅਨ੍ਤਸ੍ਸ ਆਯਾਦੇਸੋ ਹੋਤਿ ਣਕਾਰਾਨੁਬਨ੍ਧੇ ਪਚ੍ਚਯੇ ਪਰੇ, ਸਰਲੋਪਾਦਿ. ਧਞ੍ਞਮਾਯੋ. ਏਵਂ ਦਾਨਂ ਦਦਾਤੀਤਿ ਦਾਨਦਾਯੋ.
ਕਮੁ ਕਨ੍ਤਿਮ੍ਹਿ, ਧਮ੍ਮਂ ਅਕਾਮਯਿ, ਕਾਮਯਤਿ, ਕਾਮਯਿਸ੍ਸਤੀਤਿ ਵਾ ਧਮ੍ਮਕਾਮੋ ਪੁਰਿਸੋ, ਧਮ੍ਮਕਾਮਾ ਕਞ੍ਞਾ, ਧਮ੍ਮਕਾਮਂ ਚਿਤ੍ਤਂ. ਏਵਂ ਅਤ੍ਥਕਾਮੋ, ਹਿਤਕਾਮੋ, ਸੁਖਕਾਮੋ, ਧਮ੍ਮਂ ਪਾਲੇਤੀਤਿ ਧਮ੍ਮਪਾਲੋ ਇਚ੍ਚਾਦਿ.
ਦਮੁ ਦਮਨੇ, ‘‘ਅਰਿਂ ਅਦਮਿ, ਦਮੇਤਿ, ਦਮਿਸ੍ਸਤੀ’’ਤਿ ਵਿਗ੍ਗਹੇ ‘‘ਧਾਤੁਯਾ’’ਤਿ ਅਧਿਕਾਰੋ, ‘‘ਕਮ੍ਮਾਦਿਮ੍ਹੀ’’ਤਿ ਚ ਵਤ੍ਤਤੇ.
੫੬੫. ਸਞ੍ਞਾਯਮਨੁ.
ਕਮ੍ਮੂਪਪਦੇ ਆਦਿਮ੍ਹਿ ਸਤਿ ਸਞ੍ਞਾਯਂ ਗਮ੍ਯਮਾਨਾਯਂ ਧਾਤੁਯਾ ਅਪ੍ਪਚ੍ਚਯੋ ਹੋਤਿ, ਉਪਪਦਨ੍ਤੇ ਨੁਕਾਰਾਗਮੋ ਚ. ਏਤ੍ਥ ਚ ‘‘ਨੁ ਨਿਗ੍ਗਹੀਤਂ ਪਦਨ੍ਤੇ’’ਤਿ ਸੁਤ੍ਤੇ ‘‘ਪਦਨ੍ਤੇ’’ਤਿ ਵਚਨਤੋ ਉਪਪਦਨ੍ਤੇਯੇਵ ਨੁਕਾਰਾਗਮੋ ਹੋਤੀਤਿ ਦਟ੍ਠਬ੍ਬਂ. ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਉਕਾਰਲੋਪੋ. ਅਯਂ ਪਨ ਨ੍ਵਾਗਮੋ ਸਮਾਸਂ ਕਤ੍ਵਾ ਉਪਪਦਵਿਭਤ੍ਤਿਲੋਪੇ ਕਤੇਯੇਵ ਹੋਤੀਤਿ ਵੇਦਿਤਬ੍ਬਂ.
੫੬੬. ਨੁ ਨਿਗ੍ਗਹੀਤਂ ਪਦਨ੍ਤੇ.
ਉਪਪਦਭੂਤਨਾਮਪਦਨ੍ਤੇ ਵਤ੍ਤਮਾਨੋ ਨੁਕਾਰਾਗਮੋ ਨਿਗ੍ਗਹੀਤਮਾਪਜ੍ਜਤੇ, ਨਿਗ੍ਗਹੀਤਸ੍ਸ ਵਗ੍ਗਨ੍ਤਤ੍ਤਂ, ਸੇਸਂ ਸਮਂ, ਵੁਦ੍ਧਾਭਾਵੋਵ ਵਿਸੇਸੋ, ਅਰਿਨ੍ਦਮੋ ਰਾਜਾ.
ਤਥਾ ਤਰ ਤਰਣੇ, ਵੇਸ੍ਸਂ ਤਰਤੀਤਿ ਵੇਸ੍ਸਨ੍ਤਰੋ, ਤਣ੍ਹਂ ਕਰੋਤਿ ਹਿਂਸਤੀਤਿ ਤਣ੍ਹਙ੍ਕਰੋ ਭਗਵਾ. ਏਵਂ ਮੇਧਙ੍ਕਰੋ, ਸਰਣਙ੍ਕਰੋ, ਦੀਪਙ੍ਕਰੋ.
‘‘ਆਦਿਮ੍ਹਿ, ਅ’’ਇਤਿ ਚ ਵਤ੍ਤਤੇ.
੫੬੭. ਪੁਰੇ ਦਦਾ ਚ ਇਂ.
ਪੁਰਸਦ੍ਦੇ ਆਦਿਮ੍ਹਿ ਸਤਿ ‘‘ਦਦ ਦਾਨੇ’’ਇਚ੍ਚੇਤਾਯ ਧਾਤੁਯਾ ਅਪ੍ਪਚ੍ਚਯੋ ਹੋਤਿ, ਪੁਰਸਦ੍ਦੇ ਅਕਾਰਸ੍ਸ ਇਞ੍ਚ ਹੋਤਿ. ਏਤ੍ਥ ਚ ‘‘ਤਦਨੁਪਰੋਧੇਨਾ’’ਤਿ ਪਰਿਭਾਸਤੋ ਪੁਰਸਦ੍ਦਨ੍ਤਸ੍ਸੇਵ ਇਂ ਹੋਤੀਤਿ ਦਟ੍ਠਬ੍ਬਂ. ਣਾਦੀਨਂ ਤੇਕਾਲਿਕਤ੍ਤੇਪਿ ਉਪਪਦਤ੍ਥਵਿਸੇਸੇਨ ਅਤੀਤੇਯੇਵਾਯਮਪ੍ਪਚ੍ਚਯੋ ਹੋਤੀਤਿ ਦਟ੍ਠਬ੍ਬਂ. ਪੁਰੇ ਦਾਨਂ ਅਦਦੀਤਿ ਪੁਰਿਨ੍ਦਦੋ ਸਕ੍ਕੋ. ਇਧਾਪਿ ਵਿਭਤ੍ਤਿਲੋਪੇ ਕਤੇਯੇਵ ਇਂਆਦੇਸੋ.
‘‘ਕਮ੍ਮਾਦਿਮ੍ਹਿ, ਅ’’ਇਤਿ ਚ ਵਤ੍ਤਤੇ.
੫੬੮. ਸਬ੍ਬਤੋ ਣ੍ਵੁ ਤ੍ਵਾਵੀ ਵਾ.
ਸਬ੍ਬਤੋ ਧਾਤੁਤੋ ਕਮ੍ਮਾਦਿਮ੍ਹਿ ਵਾ ਅਕਮ੍ਮਾਦਿਮ੍ਹਿ ਵਾ ਸਤਿ ਅ ਣ੍ਵੁ ਤੁ ਆਵੀ ਇਚ੍ਚੇਤੇ ਚਤ੍ਤਾਰੋ ਪਚ੍ਚਯਾ ਹੋਨ੍ਤਿ. ਵਾਗ੍ਗਹਣਂ ‘‘ਅਕਮ੍ਮਾਦਿਮ੍ਹਿ ਵਾ’’ਤਿ ਵਿਕਪ੍ਪਨਤ੍ਥਂ.
ਅਪ੍ਪਚ੍ਚਯੇ ਤਾਵ – ਧਰ ਧਾਰਣੇ, ਧਮ੍ਮਂ ਅਧਰਿ, ਧਰਤਿ, ਧਰਿਸ੍ਸਤੀਤਿ ਵਾ ਧਮ੍ਮਧਰੋ. ਏਵਂ ਵਿਨਯਧਰੋ. ਤਥਾ ਤਂ ਕਰੋਤੀਤਿ ਤਕ੍ਕਰੋ, ਦ੍ਵਿਤ੍ਤਂ. ਏਵਂ ਹਿਤਕਰੋ, ਦਿਵਸਕਰੋ, ਦਿਨਕਰੋ, ਦਿਵਾਕਰੋ, ਨਿਸਾਕਰੋ, ਧਨੁਂ ਗਣ੍ਹਾਤੀਤਿ ਧਨੁਗ੍ਗਹੋ. ਏਵਂ ਕਟਗ੍ਗਹੋ, ਸਬ੍ਬਕਾਮਂ ਦਦਾਤੀਤਿ ਸਬ੍ਬਕਾਮਦਦੋ, ਸਬ੍ਬਦਦੋ.
ਆਤੋ ਪਨ – ਅਨ੍ਨਂ ਅਦਾਸਿ, ਦਦਾਤਿ, ਦਦਿਸ੍ਸਤੀਤਿ ਅਨ੍ਨਦੋ. ਏਵਂ ਧਨਦੋ, ਸਚ੍ਚਂ ਸਨ੍ਦਹਤੀਤਿ ਸਚ੍ਚਸਨ੍ਧੋ. ਪਾ ਪਾਨੇ, ਮਜ੍ਜਂ ਪਿਵਤੀਤਿ ਮਜ੍ਜਪੋ. ਤਾ ਪਾਲਨੇ, ਗਵਂ ਸਦ੍ਦਂ ਤਾਯਤੀਤਿ ਗੋਤ੍ਤਂ. ਏਵਂ ਕਤ੍ਤਰਿ.
ਅਕਮ੍ਮਾਦਿਮ੍ਹਿ ਪਨ ‘‘ਯਸ੍ਮਾ ਦਪੇਤੀ’’ਤਿ ਸੁਤ੍ਤੇ ਭਯਗ੍ਗਹਣੇਨ ਸੇਸਸਾਧਨੇਪਿ ਅਪ੍ਪਚ੍ਚਯੋ.
ਨੀ ਪਾਪੁਣਨੇ ਵਿਪੁਬ੍ਬੋ, ਵਿਨੇਸਿ, ਵਿਨੇਤਿ, ਵਿਨੇਸ੍ਸਤਿ ਏਤੇਨ, ਏਤ੍ਥਾਤਿ ਵਾ ਵਿਨਯੋ, ‘‘ਅਞ੍ਞੇਸੁ ਚਾ’’ਤਿ ਵੁਦ੍ਧਿ, ਅਯਾਦੇਸੋ ਚ, ਨਯਨਂ ਨਯੋ. ਸਿ ਸੇਵਾਯਂ ਨਿਪੁਬ੍ਬੋ, ਨਿਸ੍ਸੀਯਿਤ੍ਥ, ਨਿਸ੍ਸੀਯਤਿ, ਨਿਸ੍ਸੀਯਿਸ੍ਸਤੀਤਿ ਵਾ ਨਿਸ੍ਸਯੋ. ਸਿ ਸਯੇ, ਅਨੁਸਯਿ, ਅਨੁਸੇਤਿ, ਅਨੁਸੇਸ੍ਸਤੀਤਿ ਵਾ ਅਨੁਸਯੋ.
ਇ ਗਤਿਮ੍ਹਿ ਪਤਿਪੁਬ੍ਬੋ, ਪਟਿਚ੍ਚ ਏਕਸ੍ਮਾ ਫਲਮੇਤੀਤਿ ਪਚ੍ਚਯੋ, ਸਮੁਦਯੋ. ਚਿ ਚਯੇ, ਵਿਨਿਚ੍ਛੀਯਤੇ ਅਨੇਨ, ਵਿਨਿਚ੍ਛਯਨਂ ਵਾ ਵਿਨਿਚ੍ਛਯੋ, ਉਚ੍ਚਯਨਂ ਉਚ੍ਚਯੋ, ਸਞ੍ਚਯੋ, ਧਮ੍ਮਂ ਵਿਚਿਨਾਤੀਤਿ ਧਮ੍ਮਵਿਚਯੋ. ਖੀ ਖਯੇ, ਖਯਨਂ ਖਯੋ. ਜਿ ਜਯੇ, ਵਿਜਯਨਂ ਵਿਜਯੋ, ਜਯੋ. ਕੀ ਦਬ੍ਬਵਿਨਿਮਯੇ, ਵਿਕ੍ਕਯਨਂ ਵਿਕ੍ਕਯੋ, ਕਯੋ. ਲੀ ਸਿਲੇਸਨੇ, ਅਲ੍ਲੀਯਤਿ ਏਤ੍ਥਾਤਿ ਆਲਯੋ, ਲਯੋ. ਏਵਂ ਇਵਣ੍ਣਨ੍ਤਤੋ.
ਆਸੁਣਨ੍ਤੀਤਿ ਅਸ੍ਸਵਾ, ਅਵਾਦੇਸੋ, ਪਟਿਸ੍ਸਵਨਂ ਪਟਿਸ੍ਸਵੋ. ਸੁ ਗਤਿਮ੍ਹਿ, ਆਭਵਗ੍ਗਾ ਸਵਨ੍ਤੀਤਿ ਆਸਵਾ. ਰੁ ਸਦ੍ਦੇ, ਰਵਤੀਤਿ ਰਵੋ. ਭਵਤੀਤਿ ਭਵੋ. ਪਭਵਤਿ ਏਤਸ੍ਮਾਤਿ ਪਭਵੋ. ਲੂ ਛੇਦਨੇ, ਲਵਨਂ ਲਵੋ. ਏਵਂ ਉਵਣ੍ਣਨ੍ਤਤੋ.
ਨਿਗ੍ਗਣ੍ਹਾਤਿ, ਨਿਗ੍ਗਹਣਂ ਵਾ ਨਿਗ੍ਗਹੋ, ਪਗ੍ਗਹੋ, ਸਙ੍ਗਣ੍ਹਾਤਿ ਤੇਨ, ਸਙ੍ਗਹਣਂ ਵਾ ਸਙ੍ਗਹੋ. ਵਰ ਵਰਣੇ, ਸਂਵਰਣਂ ਸਂਵਰੋ. ਦਰ ਆਦਰੇ, ਆਦਰਣਂ ਆਦਰੋ. ਆਗਚ੍ਛਤਿ, ਆਗਮਨਨ੍ਤਿ ਵਾ ਆਗਮੋ, ਆਗਮੀਯਨ੍ਤਿ ਏਤ੍ਥ, ਏਤੇਨ ਵਾ ਅਤ੍ਥਾਤਿ ਆਗਮੋ ਪਰਿਯਤ੍ਤਿ. ਸਪ੍ਪਤੀਤਿ ਸਪ੍ਪੋ. ਦਿਬ੍ਬਤੀਤਿ ਦੇਵੋ. ਕਮੁ ਪਦਵਿਕ੍ਖੇਪੇ, ਪਕ੍ਕਮਨਂ, ਪਕ੍ਕਮਤੀਤਿ ਵਾ ਪਕ੍ਕਮੋ. ਏਵਂ ਵਿਕ੍ਕਮੋ.
ਚਰ ਚਰਣੇ, ਵਨੇ ਚਰਤੀਤਿ ਵਨਚਰੋ, ਕਾਮੋ ਅਵਚਰਤਿ ਏਤ੍ਥਾਤਿ ਕਾਮਾਵਚਰੋ ਲੋਕੋ, ਕਾਮਾਵਚਰਾ ਸਞ੍ਞਾ, ਕਾਮਾਵਚਰਂ ਚਿਤ੍ਤਂ. ਗਾਵੋ ਚਰਨ੍ਤਿ ਏਤ੍ਥਾਤਿ ਗੋਚਰੋ, ਛਟ੍ਠੀਤਪ੍ਪੁਰਿਸੋ.
ਪਾਦੇਨ ਪਿਵਤੀਤਿ ਪਾਦਪੋ. ਏਵਂ ਕਚ੍ਛਪੋ, ਤਤਿਯਾਤਪ੍ਪੁਰਿਸੋ.
ਰੁਹ ਜਨਨੇ, ਸਿਰਸ੍ਮਿਂ ਰੁਹਤੀਤਿ ਸਿਰੋਰੁਹੋ, ਗੁਹਾਯਂ ਸਯਤੀਤਿ ਗੁਹਾਸਯਂ ਚਿਤ੍ਤਂ. ਏਵਂ ਕੁਚ੍ਛਿਸਯਾ ਵਾਤਾ. ਠਾ ਗਤਿਨਿਵਤ੍ਤਿਮ੍ਹਿ, ਪਬ੍ਬਤੇ ਅਟ੍ਠਾਸਿ, ਤਿਟ੍ਠਤਿ, ਠਸ੍ਸਤੀਤਿ ਵਾ ਪਬ੍ਬਤਟ੍ਠੋ ਪੁਰਿਸੋ, ਪਬ੍ਬਤਟ੍ਠਾ ਨਦੀ, ਪਬ੍ਬਤਟ੍ਠਂ ਓਸਧਂ. ਏਵਂ ਥਲਟ੍ਠਂ, ਜਲਟ੍ਠਂ, ਸਤ੍ਤਮੀਤਪ੍ਪੁਰਿਸੋ.
੫੬੯. ਗਹਸ੍ਸੁਪਧਸ੍ਸੇ ਵਾ.
ਗਹਇਚ੍ਚੇਤਸ੍ਸ ਧਾਤੁਸ੍ਸ ਉਪਧਸ੍ਸ ਏਤ੍ਤਂ ਹੋਤਿ ਵਾ, ਉਪਧਾਤਿ ਅਨ੍ਤਕ੍ਖਰਤੋ ਪੁਬ੍ਬਕ੍ਖਰਸ੍ਸ ਪਰਸਮਞ੍ਞਾ, ਗਯ੍ਹਤੀਤਿ ਗੇਹਂ, ਗਹਂ ਵਾ.
ਣ੍ਵੁਪ੍ਪਚ੍ਚਯੇ ਰਥਂ ਕਰੋਤੀਤਿ ਅਤ੍ਥੇ ਣ੍ਵੁਪ੍ਪਚ੍ਚਯੋ, ਸੋ ਚ ‘‘ਅਞ੍ਞੇ ਕਿਤ’’ਤਿ ਕਿਤਸਞ੍ਞਤ੍ਤਾ ‘‘ਕਤ੍ਤਰਿ ਕਿਤ’’ਤਿ ਕਤ੍ਤਰਿਯੇਵ ਭਵਤਿ, ਤਤੋ ਕਾਰਿਤਬ੍ਯਪਦੇਸ ਣਲੋਪਵੁਦ੍ਧਿਯੋ.
੫੭੦. ਅਨਕਾ ਯੁਣ੍ਵੂਨਂ.
ਯੁਣ੍ਵੁਇਚ੍ਚੇਤੇਸਂ ਪਚ੍ਚਯਾਨਂ ਅਨ ਅਕਇਚ੍ਚੇਤੇ ਆਦੇਸਾ ਹੋਨ੍ਤੀਤਿ ਅਕਾਦੇਸੋ. ਸੇਸਂ ਕੁਮ੍ਭਕਾਰਸਦ੍ਦਸਮਂ, ਰਥਕਾਰਕੋ. ਤਥਾ ਅਨ੍ਨਂ ਦਦਾਤੀਤਿ ਅਨ੍ਨਦਾਯਕੋ, ‘‘ਆਕਾਰਨ੍ਤਾਨਮਾਯੋ’’ਤਿ ਆਯਾਦੇਸੋ, ‘‘ਇਤ੍ਥਿਯਮਤੋ ਆਪਚ੍ਚਯੋ’’ਤਿ ਆਪਚ੍ਚਯੋ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਅਕਾਰਸ੍ਸ ਇਕਾਰੋ, ਅਨ੍ਨਦਾਯਿਕਾ ਕਞ੍ਞਾ, ਅਨ੍ਨਦਾਯਕਂ ਕੁਲਂ. ਲੋਕਂ ਨੇਤੀਤਿ ਲੋਕਨਾਯਕੋ, ਵਿਨੇਤਿ ਸਤ੍ਤੇਤਿ ਵਿਨਾਯਕੋ, ‘‘ਤੇ ਆਵਾਯਾ ਕਾਰਿਤੇ’’ਤਿ ਆਯਾਦੇਸੋ.
ਅਕਮ੍ਮੂਪਪਦੇ ਕਰੋਤੀਤਿ ਕਾਰਕੋ, ਕਾਰਿਕਾ, ਕਾਰਕਂ. ਦਦਾਤੀਤਿ ਦਾਯਕੋ, ਦਾਯਿਕਾ, ਦਾਯਕਂ. ਨੇਤੀਤਿ ਨਾਯਕੋ, ਨਾਯਿਕਾ, ਨਾਯਕਂ. ਭਗਵਤੋ ਓਵਾਦਾਨੁਸਾਸਨਿਂ ਅਸੁਣਿ, ਸੁਣਾਤਿ, ਸੁਣਿਸ੍ਸਤੀਤਿ ਵਾ ਸਾਵਕੋ, ਸਾਵਿਕਾ, ਆਵਾਦੇਸੋ. ਲੁਨਾਤੀਤਿ ਲਾਵਕੋ. ਪੁ ਪਵਨੇ, ਪੁਨਾਤੀਤਿ ਪਾਵਕੋ, ਭਵਤੀਤਿ ਭਾਵਕੋ, ਉਪਾਸਤੀਤਿ ਉਪਾਸਕੋ, ਉਪਾਸਿਕਾ. ਗਣ੍ਹਾਤੀਤਿ ਗਾਹਕੋ.
ਪਚਤੀਤਿ ਪਾਚਕੋ. ਅਯਜਿ, ਯਜਤਿ, ਯਜਿਸ੍ਸਤੀਤਿ ਵਾ ਯਾਜਕੋ. ਏਤ੍ਥ ਹਿ ‘‘ਕਗਾ ਚਜਾਨ’’ਨ੍ਤਿ ਚਜਾਨਂ ਕਗਤ੍ਤੇ ਸਮ੍ਪਤ੍ਤੇ –
੫੭੧. ਨ ਕਗਤ੍ਤਂ ਚਜਾ ਣ੍ਵੁਮ੍ਹਿ.
ਧਾਤ੍ਵਨ੍ਤਭੂਤਾ ਚਕਾਰਜਕਾਰਾ ਕਕਾਰ ਗਕਾਰਤ੍ਤਂ ਨਾਪਜ੍ਜਨ੍ਤੇ ਣ੍ਵੁਪ੍ਪਚ੍ਚਯੇ ਪਰੇਤਿ ਪਟਿਸਿਦ੍ਧਤ੍ਤਾ ਨ ਭਵਤਿ.