੫. ਤਦ੍ਧਿਤਕਣ੍ਡ
ਅਪਚ੍ਚਤਦ੍ਧਿਤ
ਅਥ ਨਾਮਤੋ ਏਵ ਵਿਭਤ੍ਯਨ੍ਤਾ ਅਪਚ੍ਚਾਦਿਅਤ੍ਥਵਿਸੇਸੇ ਤਦ੍ਧਿਤੁਪ੍ਪਤ੍ਤੀਤਿ ਨਾਮਤੋ ਪਰਂ ਤਦ੍ਧਿਤਵਿਧਾਨਮਾਰਭੀਯਤੇ.
ਤਤ੍ਥ ਤਸ੍ਮਾ ਤਿਵਿਧਲਿਙ੍ਗਤੋ ਪਰਂ ਹੁਤ੍ਵਾ ਹਿਤਾ ਸਹਿਤਾਤਿ ਤਦ੍ਧਿਤਾ, ਣਾਦਿਪਚ੍ਚਯਾਨਮੇਤਂ ਅਧਿਵਚਨਂ, ਤੇਸਂ ਵਾ ਨਾਮਿਕਾਨਂ ਹਿਤਾ ਉਪਕਾਰਾ ਤਦ੍ਧਿਤਾਤਿ ਅਨ੍ਵਤ੍ਥਭੂਤਪਰਸਮਞ੍ਞਾਵਸੇਨਾਪਿ ਣਾਦਿਪ੍ਪਚ੍ਚਯਾਵ ਤਦ੍ਧਿਤਾ ਨਾਮ.
‘‘ਵਸਿਟ੍ਠਸ੍ਸ ਅਪਚ੍ਚ’’ਨ੍ਤਿ ਵਿਗ੍ਗਹੇ –
‘‘ਲਿਙ੍ਗਞ੍ਚ ਨਿਪਚ੍ਚਤੇ’’ਤਿ ਇਤੋ ਲਿਙ੍ਗਗ੍ਗਹਣਮਨੁਵਤ੍ਤਤੇ.
੩੬੧. ਵਾ ਣ’ਪਚ੍ਚੇ.
ਛਟ੍ਠਿਯਨ੍ਤਤੋ ਲਿਙ੍ਗਮ੍ਹਾ ਣਪ੍ਪਚ੍ਚਯੋ ਹੋਤਿ ਵਿਕਪ੍ਪੇਨ ‘‘ਤਸ੍ਸ ਅਪਚ੍ਚ’’ਮਿਚ੍ਚੇਤਸ੍ਮਿਂ ਅਤ੍ਥੇ.
ਸੋ ਚ –
੩੬੨. ਧਾਤੁਲਿਙ੍ਗੇਹਿ ਪਰਾ ਪਚ੍ਚਯਾ.
ਧਾਤੂਹਿ, ਲਿਙ੍ਗੇਹਿ ਚ ਪਚ੍ਚਯਾ ਪਰਾਵ ਹੋਨ੍ਤੀਤਿ ਪਰਿਭਾਸਤੋ ਅਪਚ੍ਚਤ੍ਥਸਮ੍ਬਨ੍ਧਿਲਿਙ੍ਗਤੋ ਛਟ੍ਠਿਯਨ੍ਤਾਯੇਵ ਪਰੋ ਹੋਤਿ. ਪਟਿਚ੍ਚ ਏਤਸ੍ਮਾ ਅਤ੍ਥੋ ਏਤੀਤਿ ਪਚ੍ਚਯੋ, ਪਤੀਯਨ੍ਤਿ ਅਨੇਨ ਅਤ੍ਥਾਤਿ ਵਾ ਪਚ੍ਚਯੋ, ‘‘ਵੁਤ੍ਤਤ੍ਥਾਨਮਪ੍ਪਯੋਗੋ’’ਤਿ ਅਪਚ੍ਚਸਦ੍ਦਸ੍ਸ ਅਪ੍ਪਯੋਗੋ, ‘‘ਤੇਸਂ ਵਿਭਤ੍ਤਿਯੋ ਲੋਪਾ ਚੇ’’ਤਿ ਵਿਭਤ੍ਤਿਲੋਪੋ ਚ.
੩੬੩. ਤੇਸਂ ਣੋ ਲੋਪਂ.
ਤੇਸਂ ਤਦ੍ਧਿਤਪ੍ਪਚ੍ਚਯਾਨਂ ਣਾਨੁਬਨ੍ਧਾਨਂ ਣਕਾਰੋ ਲੋਪਮਾਪਜ੍ਜਤੇ.
੩੬੪. ਵੁਦ੍ਧਾਦਿਸਰਸ੍ਸ ਵਾਸਂਯੋਗਨ੍ਤਸ੍ਸ ਸਣੇ ਚ.
ਆਦਿਸਰਸ੍ਸ ਵਾ ਆਦਿਬ੍ਯਞ੍ਜਨਸ੍ਸ ਵਾ ਅਸਂਯੋਗਨ੍ਤਸ੍ਸ ਵੁਦ੍ਧਿ ਹੋਤਿ ਸਣਕਾਰਪ੍ਪਚ੍ਚਯੇ ਪਰੇ. ਸਂਯੋਗੋ ਅਨ੍ਤੋ ਅਸ੍ਸਾਤਿ ਸਂਯੋਗਨ੍ਤੋ, ਤਦਞ੍ਞੋ ਅਸਂਯੋਗਨ੍ਤੋ. ਅਥ ਵਾ ਵਵਤ੍ਥਿਤਵਿਭਾਸਤ੍ਥੋਯਂ ਵਾਸਦ੍ਦੋ, ਤਦਾ ਚ ਪਕਤਿਭੂਤੇ ਲਿਙ੍ਗੇ ਸਰਾਨਮਾਦਿਸਰਸ੍ਸ ਅਸਂਯੋਗਨ੍ਤਸ੍ਸ ਵੁਦ੍ਧਿ ਹੋਤਿ ਸਣਕਾਰੇ ਤਦ੍ਧਿਤਪ੍ਪਚ੍ਚਯੇ ਪਰੇਤਿ ਅਤ੍ਥੋ.
ਤੇਨ –
ਵਾਸਿਟ੍ਠਾਦੀਸੁ ਨਿਚ੍ਚਾਯਂ, ਅਨਿਚ੍ਚੋਲ਼ੁਮ੍ਪਿਕਾਦਿਸੁ;
ਨ ਵੁਦ੍ਧਿ ਨੀਲਪੀਤਾਦੋ, ਵਵਤ੍ਥਿਤਵਿਭਾਸਤੋ.
ਚਸਦ੍ਦਗ੍ਗਹਣਮਵਧਾਰਣਤ੍ਥਂ.
ਤਸ੍ਸਾ ਵੁਦ੍ਧਿਯਾ ਅਨਿਯਮਪ੍ਪਸਙ੍ਗੇ ਨਿਯਮਤ੍ਥਂ ਪਰਿਭਾਸਮਾਹ.
੩੬੫. ਅਯੁਵਣ੍ਣਾਨਞ੍ਚਾਯੋ ਵੁਦ੍ਧੀ.
ਤੇਸਂ ਅਕਾਰਇਵਣ੍ਣੁਵਣ੍ਣਾਨਮੇਵ ਯਥਾਕ੍ਕਮਂ ਆ ਏਓਇਚ੍ਚੇਤੇ ਵੁਦ੍ਧਿਯੋ ਹੋਨ੍ਤਿ. ਚਸਦ੍ਦਗ੍ਗਹਣਮਵੁਦ੍ਧਿਸਮ੍ਪਿਣ੍ਡਨਤ੍ਥਂ, ਅਵਧਾਰਣਤ੍ਥਂ ਵਾ. ਇ ਚ ਉ ਚ ਯੁ, ਯੁ ਏਵ ਵਣ੍ਣਾ ਯੁਵਣ੍ਣਾ, ਅ ਚ ਯੁਵਣ੍ਣਾ ਚ ਅਯੁਵਣ੍ਣਾ. ਆ ਚ ਏ ਚ ਓ ਚ ਆਯੋ. ਪੁਨ ਵੁਦ੍ਧਿਗ੍ਗਹਣਂ ‘‘ਨੇਗਮਜਾਨਪਦਾ’’ਤਿਆਦੀਸੁ ਉਤ੍ਤਰਪਦਵੁਦ੍ਧਿਭਾਵਤ੍ਥਂ, ਏਤ੍ਥ ਚ ‘‘ਅਯੁਵਣ੍ਣਾਨ’’ਨ੍ਤਿ ਠਾਨਨਿਯਮਵਚਨਂ ਆਯੋਨਂ ਵੁਦ੍ਧਿਭਾਵਪ੍ਪਸਙ੍ਗਨਿਵਤ੍ਤਨਤ੍ਥਂ.
ਯਥਾ ਹਿ ਕਤਵੁਦ੍ਧੀਨਂ, ਪੁਨ ਵੁਦ੍ਧਿ ਨ ਹੋਤਿਹ;
ਤਥਾ ਸਭਾਵਵੁਦ੍ਧੀਨਂ, ਆਯੋਨਂ ਪੁਨ ਵੁਦ੍ਧਿ ਨ.
ਤਤੋ ਅਕਾਰਸ੍ਸ ਆਕਾਰੋ ਵੁਦ੍ਧਿ, ‘‘ਸਰਲੋਪੋਮਾਦੇਸਪ੍ਪਚ੍ਚਯਾਦਿਮ੍ਹਿ ਸਰਲੋਪੇ ਤੁ ਪਕਤੀ’’ਤਿ ਸਰਲੋਪਪਕਤਿਭਾਵਾ, ‘‘ਨਯੇ ਪਰਂ ਯੁਤ੍ਤੇ’’ਤਿ ਪਰਨਯਨਂ ਕਤ੍ਵਾ ਤਦ੍ਧਿਤਤ੍ਤਾ ‘‘ਤਦ੍ਧਿਤਸਮਾਸ’’ਇਚ੍ਚਾਦਿਨਾ ਨਾਮਬ੍ਯਪਦੇਸੇ ਕਤੇ ਪੁਰੇ ਵਿਯ ਸ੍ਯਾਦ੍ਯੁਪ੍ਪਤ੍ਤਿ.
ਵਾਸਿਟ੍ਠੋ, ਵਸਿਟ੍ਠਸ੍ਸ ਪੁਤ੍ਤੋ ਵਾ, ਵਾਸਿਟ੍ਠਾ ਇਚ੍ਚਾਦਿ ਪੁਰਿਸਸਦ੍ਦਸਮਂ. ਤਸ੍ਸ ਨਤ੍ਤੁਪਨਤ੍ਤਾਦਯੋਪਿ ਤਦੁਪਚਾਰਤੋ ਵਾਸਿਟ੍ਠਾਯੇਵ. ਏਵਂ ਸਬ੍ਬਤ੍ਥ ਗੋਤ੍ਤਤਦ੍ਧਿਤੇ ਪਠਮਪ੍ਪਕਤਿਤੋਯੇਵ ਪਚ੍ਚਯੋ ਹੋਤਿ.
ਇਤ੍ਥਿਯਂ ਣਪ੍ਪਚ੍ਚਯਨ੍ਤਤ੍ਤਾ ‘‘ਣਵ ਣਿਕ ਣੇਯ੍ਯ ਣ ਨ੍ਤੂਹੀ’’ਤਿ ਵਾਸਿਟ੍ਠਸਦ੍ਦਤੋ ਈਪਚ੍ਚਯੋ. ਸਰਲੋਪਾਦਿਂ ਕਤ੍ਵਾ ਇਤ੍ਥਿਪ੍ਪਚ੍ਚਯਨ੍ਤਤ੍ਤਾ ‘‘ਤਦ੍ਧਿਤਸਮਾਸ’’ਇਚ੍ਚਾਦਿਸੁਤ੍ਤੇ ਚਗ੍ਗਹਣੇਨ ਨਾਮਬ੍ਯਪਦੇਸੇ ਕਤੇ ਸ੍ਯਾਦ੍ਯੁਪ੍ਪਤ੍ਤਿ, ਵਾਸਿਟ੍ਠੀ ਕਞ੍ਞਾ, ਵਾਸਿਟ੍ਠੀ, ਵਾਸਿਟ੍ਠਿਯੋ ਇਚ੍ਚਾਦਿ ਇਤ੍ਥਿਸਦ੍ਦਸਮਂ.
ਨਪੁਂਸਕੇ ਵਾਸਿਟ੍ਠਂ ਅਪਚ੍ਚਂ, ਵਾਸਿਟ੍ਠਾਨਿ ਅਪਚ੍ਚਾਨਿ ਇਚ੍ਚਾਦਿ ਚਿਤ੍ਤਸਦ੍ਦਸਮਂ. ਏਵਂ ਉਪਰਿਪਿ ਤਦ੍ਧਿਤਨ੍ਤਸ੍ਸ ਤਿਲਿਙ੍ਗਤਾ ਵੇਦਿਤਬ੍ਬਾ.
ਭਾਰਦ੍ਵਾਜਸ੍ਸ ਪੁਤ੍ਤੋ ਭਾਰਦ੍ਵਾਜੋ, ਵੇਸਾਮਿਤ੍ਤਸ੍ਸ ਪੁਤ੍ਤੋ ਵੇਸਾਮਿਤ੍ਤੋ, ਗੋਤਮਸ੍ਸ ਪੁਤ੍ਤੋ ਗੋਤਮੋ. ਏਤ੍ਥ ਚ ਅਯੁਵਣ੍ਣਤ੍ਤਾਭਾਵਾ ਆਕਾਰਾਦੀਨਂ ਨ ਵੁਦ੍ਧਿ ਹੋਤਿ. ਵਸੁਦੇਵਸ੍ਸ ਅਪਚ੍ਚਂ ਵਾਸੁਦੇਵੋ, ਬਲਦੇਵੋ. ‘‘ਚਿਤ੍ਤਕੋ’’ਤਿਆਦੀਸੁ ਪਨ ਸਂਯੋਗਨ੍ਤਤ੍ਤਾ ਵੁਦ੍ਧਿ ਨ ਭਵਤਿ.
‘‘ਵਚ੍ਛਸ੍ਸ ਅਪਚ੍ਚ’’ਨ੍ਤਿ ਵਿਗ੍ਗਹੇ ਣਮ੍ਹਿ ਸਮ੍ਪਤ੍ਤੇ ‘‘ਵਾ ਣ’ਪਚ੍ਚੇ’’ਤਿ ਇਤੋ ਵਾਤਿ ਤਦ੍ਧਿਤਵਿਧਾਨੇ ਸਬ੍ਬਤ੍ਥ ਵਤ੍ਤਤੇ, ਤੇਨ ਸਬ੍ਬਤ੍ਥ ਵਾਕ੍ਯਵੁਤ੍ਤਿਯੋ ਭਵਨ੍ਤਿ. ‘‘ਅਪਚ੍ਚੇ’’ਤਿ ਪਦਂ ਯਾਵ ਸਂਸਟ੍ਠਗ੍ਗਹਣਾਵ ਵਤ੍ਤਤੇ.
੩੬੬. ਣਾਯਨ ਣਾਨ ਵਚ੍ਛਾਦਿਤੋ.
ਵਚ੍ਛ ਕਚ੍ਚਇਚ੍ਚੇਵਮਾਦਿਤੋ ਛਟ੍ਠਿਯਨ੍ਤਤੋ ਗੋਤ੍ਤਗਣਤੋ ਣਾਯਨ ਣਾਨਇਚ੍ਚਤੇ ਪਚ੍ਚਯਾ ਹੋਨ੍ਤਿ ਵਾ ‘‘ਤਸ੍ਸਾਪਚ੍ਚ’’ਮਿਚ੍ਚੇਤਸ੍ਮਿਂ ਅਤ੍ਥੇ. ਸਬ੍ਬਤ੍ਥ ਣਕਾਰਾਨੁਬਨ੍ਧੋ ਵੁਦ੍ਧਤ੍ਥੋ, ਸੇਸਂ ਪੁਬ੍ਬਸਮਂ, ਸਂਯੋਗਨ੍ਤਤ੍ਤਾ ਵੁਦ੍ਧਿਅਭਾਵੋਵ ਵਿਸੇਸੋ.
ਵਚ੍ਛਾਯਨੋ ਵਚ੍ਛਾਨੋ ਵਚ੍ਛਸ੍ਸ ਪੁਤ੍ਤੋ ਵਾ. ਏਵਂ ਕਚ੍ਚਸ੍ਸ ਪੁਤ੍ਤੋ ਕਚ੍ਚਾਯਨੋ ਕਚ੍ਚਾਨੋ, ਮੋਗ੍ਗਲ੍ਲਸ੍ਸ ਪੁਤ੍ਤੋ ਮੋਗ੍ਗਲ੍ਲਾਯਨੋ ਮੋਗ੍ਗਲ੍ਲਾਨੋ. ਏਵਂ ਅਗ੍ਗਿਵੇਸ੍ਸਾਯਨੋ ਅਗ੍ਗਿਵੇਸ੍ਸਾਨੋ, ਕਣ੍ਹਾਯਨੋ ਕਣ੍ਹਾਨੋ, ਸਾਕਟਾਯਨੋ ਸਾਕਟਾਨੋ, ਮੁਞ੍ਚਾਯਨੋ ਮੁਞ੍ਚਾਨੋ, ਕੁਞ੍ਜਾਯਨੋ ਕੁਞ੍ਜਾਨੋ ਇਚ੍ਚਾਦਿ. ਆਕਤਿਗਣੋ’ਯਂ.
‘‘ਕਤ੍ਤਿਕਾਯ ਅਪਚ੍ਚ’’ਨ੍ਤਿ ਵਿਗ੍ਗਹੇ –
੩੬੭. ਣੇਯ੍ਯੋ ਕਤ੍ਤਿਕਾਦੀਹਿ.
ਆਦਿਸਦ੍ਦੋਯਂ ਪਕਾਰੇ ਵਤ੍ਤਤੇ. ਕਤ੍ਤਿਕਾ ਵਿਨਤਾਰੋਹਿਣੀਇਚ੍ਚੇਵਮਾਦੀਹਿ ਇਤ੍ਥਿਯਂ ਵਤ੍ਤਮਾਨੇਹਿ ਲਿਙ੍ਗੇਹਿ ਣੇਯ੍ਯਪ੍ਪਚ੍ਚਯੋ ਹੋਤਿ ਵਾ ‘‘ਤਸ੍ਸਾਪਚ੍ਚ’’ਮਿਚ੍ਚੇਤਸ੍ਮਿਂ ਅਤ੍ਥੇ.
ਵਿਭਤ੍ਤਿਲੋਪੇ ‘‘ਪਕਤਿ ਚਸ੍ਸ ਸਰਨ੍ਤਸ੍ਸਾ’’ਤਿ ਪਕਤਿਭਾਵੋ. ਕਤ੍ਤਿਕੇਯ੍ਯੋ, ਕਤ੍ਤਿਕਾਯ ਪੁਤ੍ਤੋ ਵਾ. ਏਵਂ ਵਿਨਤਾਯ ਅਪਚ੍ਚਂ ਵੇਨਤੇਯ੍ਯੋ, ਇਕਾਰਸ੍ਸੇਕਾਰੋ ਵੁਦ੍ਧਿ, ਰੋਹਿਣਿਯਾ ਪੁਤ੍ਤੋ ਰੋਹਿਣੇਯ੍ਯੋ, ਗਙ੍ਗਾਯ ਅਪਚ੍ਚਂ ਗਙ੍ਗੇਯ੍ਯੋ, ਭਗਿਨਿਯਾ ਪੁਤ੍ਤੋ ਭਾਗਿਨੇਯ੍ਯੋ, ਨਦਿਯਾਪੁਤ੍ਤੋ ਨਾਦੇਯ੍ਯੋ. ਏਵਂ ਅਨ੍ਤੇਯ੍ਯੋ, ਆਹੇਯ੍ਯੋ, ਕਾਮੇਯ੍ਯੋ. ਸੁਚਿਯਾ ਅਪਚ੍ਚਂ ਸੋਚੇਯ੍ਯੋ, ਏਤ੍ਥ ਉਕਾਰਸ੍ਸੋਕਾਰੋ ਵੁਦ੍ਧਿ, ਬਾਲਾਯ ਅਪਚ੍ਚਂ ਬਾਲੇਯ੍ਯੋ ਇਚ੍ਚਾਦਿ.
‘‘ਦਕ੍ਖਸ੍ਸਾਪਚ੍ਚ’’ਨ੍ਤਿ ਵਿਗ੍ਗਹੇ ਣਮ੍ਹਿ ਸਮ੍ਪਤ੍ਤੇ –
੩੬੮. ਅਤੋ ਣਿ ਵਾ.
ਅਕਾਰਨ੍ਤਤੋ ਲਿਙ੍ਗਮ੍ਹਾ ਣਿਪਚ੍ਚਯੋ ਹੋਤਿ ਵਾ ‘‘ਤਸ੍ਸਾਪਚ੍ਚ’’ਮਿਚ੍ਚੇਤਸ੍ਮਿਂ ਅਤ੍ਥੇ. ਦਕ੍ਖਿ, ਦਕ੍ਖੀ, ਦਕ੍ਖਯੋ, ਦੋਣਸ੍ਸ ਅਪਚ੍ਚਂ ਦੋਣਿ. ਏਵਂ ਵਾਸਵਿ, ਸਕ੍ਯਪੁਤ੍ਤਿ, ਨਾਟਪੁਤ੍ਤਿ, ਦਾਸਪੁਤ੍ਤਿ, ਦਾਸਰਥਿ. ਵਾਰੁਣਿ, ਕਣ੍ਡਿ, ਬਾਲਦੇਵਿ, ਪਾਵਕਿ, ਜਿਨਦਤ੍ਤਸ੍ਸ ਅਪਚ੍ਚਂ ਜੇਨਦਤ੍ਤਿ, ਸੁਦ੍ਧੋਦਨਿ, ਅਨੁਰੁਦ੍ਧਿ ਇਚ੍ਚਾਦਿ.
ਪੁਨ ਵਾਗ੍ਗਹਣੇਨ ਅਪਚ੍ਚਤ੍ਥੇ ਣਿਕਪ੍ਪਚ੍ਚਯੋ, ਅਦਿਤਿਆਦਿਤੋ ਣ੍ਯਪ੍ਪਚ੍ਚਯੋ ਚ. ਯਥਾ – ਸਕ੍ਯਪੁਤ੍ਤਸ੍ਸ ਪੁਤ੍ਤੋ ਸਕ੍ਯਪੁਤ੍ਤਿਕੋ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਕਕਾਰਸ੍ਸ ਯਕਾਰੋ, ਸਕ੍ਯਪੁਤ੍ਤਿਯੋ. ਏਵਂ ਨਾਟਪੁਤ੍ਤਿਕੋ, ਜੇਨਦਤ੍ਤਿਕੋ, ਵਿਮਾਤੁਯਾ ਪੁਤ੍ਤੋ ਵੇਮਾਤਿਕੋ.
‘‘ਅਦਿਤਿਯਾ ਪੁਤ੍ਤੋ’’ਤਿ ਅਤ੍ਥੇ ਣ੍ਯਪ੍ਪਚ੍ਚਯੋ, ਵੁਦ੍ਧਿ ਚ.
੩੬੯. ਅਵਣ੍ਣੋ ਯੇ ਲੋਪਞ੍ਚ.
ਅਵਣ੍ਣੋ ਤਦ੍ਧਿਤਭੂਤੇ ਯਪ੍ਪਚ੍ਚਯੇ ਪਰੇ ਲੋਪਮਾਪਜ੍ਜਤੇ. ਚਸਦ੍ਦੇਨ ਇਵਣ੍ਣੋਪੀਤਿ ਇਕਾਰਲੋਪੋ, ‘‘ਯਵਤਂ ਤਲਨਦਕਾਰਾਨਂ ਬ੍ਯਞ੍ਜਨਾਨਿ ਚ ਲ ਞ ਜਕਾਰਤ੍ਤ’’ਨ੍ਤਿ ਤ੍ਯਕਾਰਸਂਯੋਗਸ੍ਸ ਚਕਾਰੋ, ‘‘ਪਰਦ੍ਵੇਭਾਵੋ ਠਾਨੇ’’ਤਿ ਦ੍ਵਿਤ੍ਤਂ, ਆਦਿਚ੍ਚੋ. ਏਵਂ ਦਿਤਿਯਾ ਪੁਤ੍ਤੋ ਦੇਚ੍ਚੋ.
‘‘ਕੁਣ੍ਡਨਿਯਾ ਪੁਤ੍ਤੋ’’ਤਿ ਅਤ੍ਥੇ ਣ੍ਯਪ੍ਪਚ੍ਚਯੇ ਕਤੇ –
‘‘ਕ੍ਵਚਾਦਿਮਜ੍ਝੁਤ੍ਤਰੇਸੂ’’ਤਿ ਵਤ੍ਤਤੇ.
੩੭੦. ਤੇਸੁ ਵੁਦ੍ਧਿਲੋਪਾਗਮਵਿਕਾਰਵਿਪਰੀਤਾਦੇਸਾ ਚ.
ਤੇਸੁ ਆਦਿਮਜ੍ਝੁਤ੍ਤਰੇਸੁ ਅਵਿਹਿਤਲਕ੍ਖਣੇਸੁ ਜਿਨਵਚਨਾਨੁਪਰੋਧੇਨ ਕ੍ਵਚਿ ਵੁਦ੍ਧਿ ਲੋਪ ਆਗਮ ਵਿਕਾਰ ਵਿਪਰੀਤਆਦੇਸਾ ਹੋਨ੍ਤੀਤਿ ਸਂਯੋਗਨ੍ਤਤ੍ਤੇਪਿ ਆਦਿਵੁਦ੍ਧਿ, ਇਕਾਰਲੋਪੇ ਨ੍ਯਸ੍ਸਞਾਦੇਸੋ, ਕੋਣ੍ਡਞ੍ਞੋ, ਕੁਰੁਨੋ ਪੁਤ੍ਤੋ ਕੋਰਬ੍ਯੋ, ਏਤ੍ਥਾਪਿ ਤੇਨੇਵ ਉਕਾਰਸ੍ਸ ਅਵਾਦੇਸੋ, ਭਾਤੁਨੋ ਪੁਤ੍ਤੋ ਭਾਤਬ੍ਯੋ.
‘‘ਉਪਗੁਸ੍ਸ ਅਪਚ੍ਚ’’ਨ੍ਤਿ ਵਿਗ੍ਗਹੇ –
੩੭੧. ਣਵੋਪਗ੍ਵਾਦੀਹਿ.
ਉਪਗੁ ਮਨੁਇਚ੍ਚੇਵਮਾਦੀਹਿ ਉਕਾਰਨ੍ਤੇਹਿ ਗੋਤ੍ਤਗਣੇਹਿ ਣਵਪ੍ਪਚ੍ਚਯੋ ਹੋਤਿ ਵਾ ‘‘ਤਸ੍ਸਾਪਚ੍ਚ’’ਮਿਚ੍ਚੇਤਸ੍ਮਿਂ ਅਤ੍ਥੇ. ਆਦਿਸਦ੍ਦਸ੍ਸ ਚੇਤ੍ਥ ਪਕਾਰਵਾਚਕਤ੍ਤਾ ਉਕਾਰਨ੍ਤਤੋਯੇਵਾਯਂ. ਓਪਗਵੋ, ਓਪਗਵੀ, ਓਪਗਵਂ, ਮਨੁਨੋ ਅਪਚ੍ਚਂ ਮਾਨਵੋ, ‘‘ਮਾਨੁਸੋ’’ਤਿ ਣਪ੍ਪਚ੍ਚਯੇ, ਸਾਗਮੇ ਚ ਕਤੇ ਰੂਪਂ, ਭਗ੍ਗੁਨੋ ਅਪਚ੍ਚਂ ਭਗ੍ਗਵੋ, ਪਣ੍ਡੁਨੋ ਅਪਚ੍ਚਂ ਪਣ੍ਡਵੋ, ਉਪਵਿਨ੍ਦੁਸ੍ਸ ਅਪਚ੍ਚਂ ਓਪਵਿਨ੍ਦਵੋ ਇਚ੍ਚਾਦਿ.
‘‘ਵਿਧਵਾਯ ਅਪਚ੍ਚ’’ਨ੍ਤਿ ਅਤ੍ਥੇ –
੩੭੨. ਣੇਰ ਵਿਧਵਾਦਿਤੋ.
ਵਿਧਵਾਦਿਤੋ ਣੇਰਪ੍ਪਚ੍ਚਯੋ ਹੋਤਿ ਵਾ ਅਪਚ੍ਚਤ੍ਥੇ. ਵਿਗਤੋ ਧਵੋ ਪਤਿ ਏਤਿਸ੍ਸਾਤਿ ਵਿਧਵਾ, ਵੇਧਵੇਰੋ, ਬਨ੍ਧੁਕਿਯਾ ਅਭਿਸਾਰਿਣਿਯਾ ਪੁਤ੍ਤੋ ਬਨ੍ਧੁਕੇਰੋ, ਸਮਣਸ੍ਸ ਉਪਜ੍ਝਾਯਸ੍ਸ ਪੁਤ੍ਤੋ ਪੁਤ੍ਤਟ੍ਠਾਨਿਯਤ੍ਤਾਤਿ ਸਾਮਣੇਰੋ, ਨਾਲ਼ਿਕੇਰੋ ਇਚ੍ਚਾਦਿ.
ਅਪਚ੍ਚਤਦ੍ਧਿਤਂ.
ਸਂਸਟ੍ਠਾਦਿਅਨੇਕਤ੍ਥਤਦ੍ਧਿਤ
‘‘ਤਿਲੇਨ ਸਂਸਟ੍ਠ’’ਨ੍ਤਿ ਵਿਗ੍ਗਹੇ –
੩੭੩. ਯੇਨ ਵਾ ਸਂਸਟ੍ਠਂ ਤਰਤਿ ਚਰਤਿ ਵਹਤਿ ਣਿਕੋ.
ਯੇਨ ਵਾ ਸਂਸਟ੍ਠਂ, ਯੇਨ ਵਾ ਤਰਤਿ, ਯੇਨ ਵਾ ਚਰਤਿ, ਯੇਨ ਵਾ ਵਹਤਿ, ਤਤੋ ਤਤਿਯਨ੍ਤਤੋ ਲਿਙ੍ਗਮ੍ਹਾ ਤੇਸੁ ਸਂਸਟ੍ਠਾਦੀਸ੍ਵਤ੍ਥੇਸੁ ਣਿਕਪ੍ਪਚ੍ਚਯੋ ਹੋਤਿ ਵਾ. ਤੇਲਿਕਂ ਭੋਜਨਂ, ਤਿਲੇਨ ਅਭਿਸਙ੍ਖਤਨ੍ਤਿ ਅਤ੍ਥੋ. ਤੇਲਿਕੀ ਯਾਗੁ. ਗੁਲ਼ੇਨ ਸਂਸਟ੍ਠਂ ਏਗਾਲ਼ਿਕਂ. ਏਵਂ ਘਾਤਿਕਂ, ਦਾਧਿਕਂ, ਮਾਰਿਚਿਕਂ, ਲੋਣਿਕਂ.
ਨਾਵਾਯ ਤਰਤੀਤਿ ਨਾਵਿਕੋ, ਉਲ਼ੁਮ੍ਪੇਨ ਤਰਤੀਤਿ ਓਲ਼ੁਮ੍ਪਿਕੋ, ਵੁਦ੍ਧਿਅਭਾਵਪਕ੍ਖੇ ਉਲ਼ੁਮ੍ਪਿਕੋ. ਏਵਂ ਕੁਲ੍ਲਿਕੋ, ਗੋਪੁਚ੍ਛਿਕੋ. ਸਕਟੇਨ ਚਰਤੀਤਿ ਸਾਕਟਿਕੋ. ਏਵਂ ਪਾਦਿਕੋ, ਦਣ੍ਡਿਕੋ, ਧਮ੍ਮੇਨ ਚਰਤਿ ਪਵਤ੍ਤਤੀਤਿ ਧਮ੍ਮਿਕੋ. ਸੀਸੇਨ ਵਹਤੀਤਿ ਸੀਸਿਕੋ, ਵਾਗ੍ਗਹਣੇਨ ਈਕਾਰਸ੍ਸ ਵੁਦ੍ਧਿ ਨ ਹੋਤਿ. ਏਵਂ ਅਂਸਿਕੋ, ਖਨ੍ਧਿਕੋ, ਹਤ੍ਥਿਕੋ, ਅਙ੍ਗੁਲਿਕੋ.
ਪੁਨ ਵਾਗ੍ਗਹਣੇਨ ਅਞ੍ਞਤ੍ਥੇਸੁਪਿ ਣਿਕਪ੍ਪਚ੍ਚਯੋ, ਪਰਦਾਰਂ ਗਚ੍ਛਤੀਤਿ ਪਾਰਦਾਰਿਕੋ, ਪਥਂ ਗਚ੍ਛਤੀਤਿ ਪਥਿਕੋ.
‘‘ਵਿਨਯਮਧੀਤੇ, ਅਵੇਚ੍ਚਾਧੀਤੇ’’ਤਿ ਵਾ ਵਿਗ੍ਗਹੇ –
‘‘ਣਿਕੋ’’ਤਿ ਵਤ੍ਤਤੇ.
੩੭੪. ਤਮਧੀਤੇ ਤੇਨਕਤਾਦਿਸਨ੍ਨਿਧਾਨਨਿਯੋਗਸਿਪ੍ਪਭਣ੍ਡਜੀਵਿਕਤ੍ਥੇਸੁ ਚ.
ਚਤੁਪ੍ਪਦਮਿਦਂ. ਤਮਧੀਤੇਤਿ ਅਤ੍ਥੇ, ਤੇਨ ਕਤਾਦੀਸ੍ਵਤ੍ਥੇਸੁ ਚ ਤਮ੍ਹਿ ਸਨ੍ਨਿਧਾਨੋ, ਤਤ੍ਥ ਨਿਯੁਤ੍ਤੋ, ਤਮਸ੍ਸ ਸਿਪ੍ਪਂ, ਤਮਸ੍ਸ ਭਣ੍ਡਂ, ਤਮਸ੍ਸ ਜੀਵਿਕਾ ਇਚ੍ਚੇਤੇਸ੍ਵਤ੍ਥੇਸੁ ਚ ਦੁਤਿਯਾਦਿਵਿਭਤ੍ਯਨ੍ਤੇਹਿ ਲਿਙ੍ਗੇਹਿ ਣਿਕਪ੍ਪਚ੍ਚਯੋ ਹੋਤਿ ਵਾ. ਵੇਨਯਿਕੋ. ਏਵਂ ਸੁਤ੍ਤਨ੍ਤਿਕੋ, ਆਭਿਧਮ੍ਮਿਕੋ.
‘‘ਬ੍ਯਾਕਰਣਮਧੀਤੇ’’ਤਿ ਅਤ੍ਥੇ ਣਿਕਪ੍ਪਚ੍ਚਯਾਦਿਮ੍ਹਿ ਕਤੇ –
‘‘ਵੁਦ੍ਧਾਦਿਸਰਸ੍ਸ ਵਾਸਂਯੋਗਨ੍ਤਸ੍ਸ ਸਣੇ ਚਾ’’ਤਿ ਵਤ੍ਤਮਾਨੇ –
੩੭੫. ਮਾਯੂਨਮਾਗਮੋ ਠਾਨੇ.
ਇ ਉਇਚ੍ਚੇਭੇਸਂ ਆਦਿਸਰਾਨਂ ਅਸਂਯੋਗਨ੍ਤਾਨਂ ਮਾ ਵੁਦ੍ਧਿ ਹੋਤਿ ਸਣੇ, ਤਤ੍ਰੇਵ ਵੁਦ੍ਧਿ ਆਗਮੋ ਹੋਤਿ ਚ ਠਾਨੇਤਿ ਏਕਾਰਵੁਦ੍ਧਾਗਮੋ.
‘‘ਠਾਨੇ’’ਤਿ ਵਚਨਾ ਚੇਤ੍ਥ, ਯੂਨਮਾਦੇਸਭੂਤਤੋ;
ਯਵੇਹਿ ਪੁਬ੍ਬੇਵ ਏਓ-ਵੁਦ੍ਧਿਯੋ ਹੋਨ੍ਤਿ ਆਗਮਾ.
ਯਕਾਰਸ੍ਸ ਦ੍ਵਿਭਾਵੋ.
ਵੇਯ੍ਯਾਕਰਣਿਕੋ, ਨ੍ਯਾਯਮਧੀਤੇਤਿ ਨੇਯ੍ਯਾਯਿਕੋ. ਏਵਂ ਤਕ੍ਕਿਕੋ, ਵੇਦਿਕੋ, ਨੇਮਿਤ੍ਤਿਕੋ, ਕਾਯੇਨ ਕਤੋ ਪਯੋਗੋ ਕਾਯਿਕੋ, ਕਾਯੇਨ ਕਤਂ ਕਮ੍ਮਂ ਕਾਯਿਕਂ, ਵਚਸਾ ਕਤਂ ਕਮ੍ਮਂ ਵਾਚਸਿਕਂ. ਏਵਂ ਮਾਨਸਿਕਂ, ਏਤ੍ਥ ਚ ‘‘ਸਸਰੇ ਵਾਗਮੋ’’ਤਿ ਸੁਤ੍ਤੇ ਵਵਤ੍ਥਿਤਵਾਸਦ੍ਦੇਨ ਪਚ੍ਚਯੇ ਪਰੇਪਿ ਸਾਗਮੋ, ਥੇਰੇਹਿ ਕਤਾ ਸਙ੍ਗੀਤਿ ਥੇਰਿਕਾ. ਏਵਂ ਪਞ੍ਚਸਤਿਕਾ, ਸਤ੍ਤਸਤਿਕਾ, ਏਤ੍ਥ ‘‘ਣਵਣਿਕਾ’’ਦਿਸੁਤ੍ਤੇ ਅਨੁਵਤ੍ਤਿਤਵਾਗ੍ਗਹਣੇਨ ਈਪਚ੍ਚਯੋ ਨ ਹੋਤਿ.
ਸਨ੍ਨਿਧਾਨਤ੍ਥੇ ਸਰੀਰੇ ਸਨ੍ਨਿਧਾਨਾ ਵੇਦਨਾ ਸਾਰੀਰਿਕਾ, ਸਾਰੀਰਿਕਂ ਦੁਕ੍ਖਂ. ਏਵਂ ਮਾਨਸਿਕਾ, ਮਾਨਸਿਕਂ.
ਨਿਯੁਤ੍ਤਤ੍ਥੇ ਦ੍ਵਾਰੇ ਨਿਯੁਤ੍ਤੋ ਦੋਵਾਰਿਕੋ, ਏਤ੍ਥ ‘‘ਮਾਯੂਨਮਾਗਮੋ ਠਾਨੇ’’ਤਿ ਵਕਾਰਤੋ ਪੁਬ੍ਬੇਓਕਾਰਾਗਮੋ. ਏਵਂ ਭਣ੍ਡਾਗਾਰਿਕੋ, ਨਾਗਰਿਕੋ, ਨਵਕਮ੍ਮਿਕੋ, ਵਨਕਮ੍ਮਿਕੋ, ਆਦਿਕਮ੍ਮਿਕੋ, ਓਦਰਿਕੋ, ਰਥਿਕੋ, ਪਥਿਕੋ, ਉਪਾਯੇ ਨਿਯੁਤ੍ਤੋ ਓਪਾਯਿਕੋ, ਚੇਤਸਿ ਨਿਯੁਤ੍ਤਾ ਚੇਤਸਿਕਾ.
ਸਿਪ੍ਪਤ੍ਥੇ ਵੀਣਾਵਾਦਨਂ ਵੀਣਾ, ਵੀਣਾ ਅਸ੍ਸ ਸਿਪ੍ਪਂ ਵੇਣਿਕੋ. ਏਵਂ ਪਾਣਵਿਕੋ, ਮੋਦਿਙ੍ਗਿਕੋ, ਵਂਸਿਕੋ.
ਭਣ੍ਡਤ੍ਥੇ ਗਨ੍ਧੋ ਅਸ੍ਸ ਭਣ੍ਡਨ੍ਤਿ ਗਨ੍ਧਿਕੋ. ਏਵਂ ਤੇਲਿਕੋ, ਗੋਲ਼ਿਕੋ, ਪੂਵਿਕੋ, ਪਣ੍ਣਿਕੋ, ਤਮ੍ਬੂਲਿਕੋ, ਲੋਣਿਕੋ.
ਜੀਵਿਕਤ੍ਥੇ ਉਰਬ੍ਭਂ ਹਨ੍ਤ੍ਵਾ ਜੀਵਤਿ, ਉਰਬ੍ਭਮਸ੍ਸ ਜੀਵਿਕਾਤਿ ਵਾ ਓਰਬ੍ਭਿਕੋ. ਏਵਂ ਮਾਗਵਿਕੋ, ਏਤ੍ਥ ਵਕਾਰਾਗਮੋ. ਸੂਕਰਿਕੋ, ਸਾਕੁਣਿਕੋ, ਮਚ੍ਛਿਕੋ ਇਚ੍ਚਾਦਿ.
‘‘ਤੇਨ ਕਤਾਦੀ’’ਤਿ ਏਤ੍ਥ ਆਦਿਗ੍ਗਹਣੇਨ ਤੇਨ ਹਤਂ, ਤੇਨ ਬਦ੍ਧਂ, ਤੇਨ ਕੀਤਂ, ਤੇਨ ਦਿਬ੍ਬਤਿ, ਸੋ ਅਸ੍ਸ ਆਵੁਧੋ, ਸੋ ਅਸ੍ਸ ਆਬਾਧੋ, ਤਤ੍ਥ ਪਸਨ੍ਨੋ, ਤਸ੍ਸ ਸਨ੍ਤਕਂ, ਤਮਸ੍ਸ ਪਰਿਮਾਣਂ, ਤਸ੍ਸ ਰਾਸਿ, ਤਂ ਅਰਹਤਿ, ਤਮਸ੍ਸ ਸੀਲਂ, ਤਤ੍ਥ ਜਾਤੋ, ਤਤ੍ਥ ਵਸਤਿ, ਤਤ੍ਰ ਵਿਦਿਤੋ, ਤਦਤ੍ਥਾਯ ਸਂਵਤ੍ਤਤਿ, ਤਤੋ ਆਗਤੋ, ਤਤੋ ਸਮ੍ਭੂਤੋ, ਤਦਸ੍ਸ ਪਯੋਜਨਨ੍ਤਿ ਏਵਮਾਦਿਅਤ੍ਥੇ ਚ ਣਿਕਪ੍ਪਚ੍ਚਯੋ ਹੋਤਿ. ਯਥਾ – ਜਾਲੇਨ ਹਤੋ, ਹਨਤੀਤਿ ਵਾ ਜਾਲਿਕੋ. ਏਵਂ ਬਾਲ਼ਿਸਿਕੋ, ਵਾਕਰਿਕੋ, ਸੁਤ੍ਤੇਨ ਬਦ੍ਧੋ ਸੁਤ੍ਤਿਕੋ, ਵਰਤ੍ਤਾਯ ਬਦ੍ਧੋ ਵਾਰਤ੍ਤਿਕੋ ਨਾਗੋ.
ਵਤ੍ਥੇਨ ਕੀਤਂ ਭਣ੍ਡਂ ਵਤ੍ਥਿਕਂ. ਏਵਂ ਕੁਮ੍ਭਿਕਂ, ਫਾਲਿਕਂ, ਸੋਵਣ੍ਣਿਕਂ, ਸਾਤਿਕਂ. ਅਕ੍ਖੇਨ ਦਿਬ੍ਬਤੀਤਿ ਅਕ੍ਖਿਕੋ. ਏਵਂ ਸਾਲਾਕਿਕੋ, ਤਿਨ੍ਦੁਕਿਕੋ, ਅਮ੍ਬਫਲਿਕੋ. ਚਾਪੋ ਅਸ੍ਸ ਆਵੁਧੋਤਿ ਚਾਪਿਕੋ. ਏਵਂ ਤੋਮਰਿਕੋ, ਮੁਗ੍ਗਰਿਕੋ, ਮੋਸਲਿਕੋ.
ਵਾਤੋ ਅਸ੍ਸ ਆਬਾਧੋਤਿ ਵਾਤਿਕੋ. ਏਵਂ ਸੇਮ੍ਹਿਕੋ, ਪਿਤ੍ਤਿਕੋ.
ਬੁਦ੍ਧੇ ਪਸਨ੍ਨੋ ਬੁਦ੍ਧਿਕੋ. ਏਵਂ ਧਮ੍ਮਿਕੋ, ਸਙ੍ਘਿਕੋ. ਬੁਦ੍ਧਸ੍ਸ ਸਨ੍ਤਕੋ ਬੁਦ੍ਧਿਕੋ. ਏਵਂ ਧਮ੍ਮਿਕੋ, ਸਙ੍ਘਿਕੋ ਵਿਹਾਰੋ, ਸਙ੍ਘਿਕਾ ਭੂਮਿ, ਸਙ੍ਘਿਕਂ ਚੀਵਰਂ, ਪੁਗ੍ਗਲਿਕਂ.
ਕੁਮ੍ਭੋ ਅਸ੍ਸ ਪਰਿਮਾਣਨ੍ਤਿ ਕੁਮ੍ਭਿਕਂ. ਏਵਂ ਖਾਰਿਕਂ, ਦੋਣਿਕਂ. ਕੁਮ੍ਭਸ੍ਸ ਰਾਸਿ ਕੁਮ੍ਭਿਕੋ. ਕੁਮ੍ਭਂ ਅਰਹਤੀਤਿ ਕੁਮ੍ਭਿਕੋ. ਏਵਂ ਦੋਣਿਕੋ, ਅਟ੍ਠਮਾਸਿਕੋ, ਕਹਾਪਣਿਕੋ, ਆਸੀਤਿਕਾ ਗਾਥਾ, ਨਾਵੁਤਿਕਾ, ਸਾਤਿਕਂ, ਸਾਹਸ੍ਸਿਕਂ. ਸਨ੍ਦਿਟ੍ਠਮਰਹਤੀਤਿ ਸਨ੍ਦਿਟ੍ਠਿਕੋ, ‘‘ਏਹਿ ਪਸ੍ਸਾ’’ਤਿ ਇਮਂ ਵਿਧਿਂ ਅਰਹਤੀਤਿ ਏਹਿਪਸ੍ਸਿਕੋ.
ਸੀਲਤ੍ਥੇ ਪਂਸੁਕੂਲਧਾਰਣਂ ਪਂਸੁਕੂਲਂ, ਤਂ ਸੀਲਮਸ੍ਸਾਤਿ ਪਂਸੁਕੂਲਿਕੋ. ਏਵਂ ਤੇਚੀਵਰਿਕੋ, ਏਕਾਸਨੇ ਭੋਜਨਸੀਲੋ ਏਕਾਸਨਿਕੋ, ਰੁਕ੍ਖਮੂਲੇ ਵਸਨਸੀਲੋ ਰੁਕ੍ਖਮੂਲਿਕੋ, ਤਥਾ ਆਰਞ੍ਞਿਕੋ, ਸੋਸਾਨਿਕੋ.
ਜਾਤਤ੍ਥੇ ਅਪਾਯੇ ਜਾਤੋ ਆਪਾਯਿਕੋ. ਏਵਂ ਨੇਰਯਿਕੋ, ਸਾਮੁਦ੍ਦਿਕੋ ਮਚ੍ਛੋ, ਵਸ੍ਸੇਸੁ ਜਾਤੋ ਵਸ੍ਸਿਕੋ, ਵਸ੍ਸਿਕਾ, ਵਸ੍ਸਿਕਂ ਪੁਪ੍ਫਂ, ਸਾਰਦਿਕੋ, ਹੇਮਨ੍ਤਿਕੋ, ਵਾਸਨ੍ਤਿਕੋ, ਚਾਤੁਦ੍ਦਸਿਕੋ, ਰਾਜਗਹੇ ਜਾਤੋ, ਰਾਜਗਹੇ ਵਸਤੀਤਿ ਵਾ ਰਾਜਗਹਿਕੋ ਜਨੋ, ਮਗਧੇਸੁ ਜਾਤੋ, ਵਸਤੀਤਿ ਵਾ ਮਾਗਧਿਕੋ, ਮਾਗਧਿਕਾ, ਮਾਗਧਿਕਂ, ਸਾਵਤ੍ਥਿਯਂ ਜਾਤੋ, ਵਸਤੀਤਿ ਵਾ ਸਾਵਤ੍ਥਿਕੋ, ਕਾਪਿਲਵਤ੍ਥਿਕੋ, ਵੇਸਾਲਿਕੋ.
ਲੋਕੇ ਵਿਦਿਤੋ ਲੋਕਿਕੋ, ਲੋਕਾਯ ਸਂਵਤ੍ਤਤੀਤਿਪਿ ਲੋਕਿਕੋ. ਤਥਾ ਮਾਤਿਤੋ ਆਗਤਂ ਮਾਤਿਕਂ, ਪਿਤਿਤੋ ਆਗਤਂ ਪੇਤ੍ਤਿਕਂ ਨਾਮਂ.
ਸਮ੍ਭੂਤਤ੍ਥੇ ਮਾਤਿਤੋ ਸਮ੍ਭੂਤਂ ਮਤ੍ਤਿਕਂ. ਏਵਂ ਪੇਤ੍ਤਿਕਂ. ਉਪਧਿਤਸ੍ਸ ਪਯੋਜਨਂ ਓਪਧਿਕਂ.
ਸਕਤ੍ਥੇਪਿ ਅਸਙ੍ਖਾਰੋਯੇਵ ਅਸਙ੍ਖਾਰਿਕਂ. ਏਵਂ ਸਸਙ੍ਖਾਰਿਕਂ, ਨਾਮਮੇਵ ਨਾਮਿਕਂ. ਏਵਂ ਆਖ੍ਯਾਤਿਕਂ, ਓਪਸਗ੍ਗਿਕਂ, ਨੇਪਾਤਿਕਂ, ਚਤੁਮਹਾਰਾਜੇ ਭਤ੍ਤਿ ਏਤੇਸਨ੍ਤਿ ਚਾਤੁਮਹਾਰਾਜਿਕਾ. ਏਵਂ ਅਞ੍ਞਤ੍ਥੇਪਿ ਯੋਜੇਤਬ੍ਬਂ.
‘‘ਕਸਾਵੇਨ ਰਤ੍ਤ’’ਨ੍ਤਿ ਵਿਗ੍ਗਹੇ –
੩੭੬. ਣ ਰਾਗਾ ਤੇਨਰਤ੍ਤਂ ਤਸ੍ਸੇਦਮਞ੍ਞਤ੍ਥੇਸੁ ਚ.
ਰਾਗਤ੍ਥਵਾਚਕਾ ਲਿਙ੍ਗਮ੍ਹਾ ‘‘ਤੇਨ ਰਤ੍ਤ’’ਮਿਚ੍ਚੇਤਸ੍ਮਿਂ ਅਤ੍ਥੇ, ‘‘ਤਸ੍ਸੇ’’ਤਿ ਛਟ੍ਠਿਯਨ੍ਤਤੋ ‘‘ਇਦ’’ਮਿਚ੍ਚੇਤਸ੍ਮਿਂ ਅਤ੍ਥੇ ਚ ਅਞ੍ਞਤ੍ਥੇਸੁ ਚ ਣਪ੍ਪਚ੍ਚਯੋ ਹੋਤਿ ਵਾ.
ਕਾਸਾਵਂ ਵਤ੍ਥਂ. ਏਵਂ ਕਾਸਾਯਂ, ਕੁਸੁਮ੍ਭੇਨ ਰਤ੍ਤਂ ਕੋਸੁਮ੍ਭਂ, ਹਲਿਦ੍ਦਿਯਾ ਰਤ੍ਤਂ ਹਾਲਿਦ੍ਦਂ, ਪਤ੍ਤਙ੍ਗਂ, ਮਞ੍ਜਿਟ੍ਠਂ, ਕੁਙ੍ਕੁਮਂ, ਨੀਲੇਨ ਰਤ੍ਤਂ ਨੀਲਂ. ਏਵਂ ਪੀਤਂ.
ਇਦਮਤ੍ਥੇ ਮਹਿਂਸਸ੍ਸ ਇਦਂ ਮਾਹਿਂਸਂ ਮਂਸਂ, ਦਧਿ ਸਪ੍ਪਿ ਚਮ੍ਮਾਦਿਕਂ ਵਾ, ਸੂਕਰਸ੍ਸ ਇਦਂ ਸੂਕਰਂ, ਕਚ੍ਚਾਯਨਸ੍ਸ ਇਦਂ ਕਚ੍ਚਾਯਨਂ ਬ੍ਯਾਕਰਣਂ. ਏਵਂ ਸੋਗਤਂ ਸਾਸਨਂ.
‘‘ਇਸਿਸ੍ਸ ਇਦ’’ਨ੍ਤਿ ਅਤ੍ਥੇ ਣਪ੍ਪਚ੍ਚਯੇ ਕਤੇ ਵੁਦ੍ਧਿਮ੍ਹਿ ਸਮ੍ਪਤ੍ਤੇ –
‘‘ਸਣੇ, ਯੂਨਮਾਗਮੋ ਠਾਨੇ’’ਤਿ ਚ ਵਤ੍ਤਤੇ.
੩੭੭. ਆਤ੍ਤਞ੍ਚ.
ਇ ਉਇਚ੍ਚੇਤੇਸਂ ਆਦਿਸਰਾਨਂ ਆਤ੍ਤਞ੍ਚ ਹੋਤਿ ਸਣਕਾਰਪ੍ਪਚ੍ਚਯੇ ਪਰੇ, ਚਸਦ੍ਦੇਨ ਰਿਕਾਰਾਗਮੋ ਚ ਠਾਨੇਤਿ ਇਕਾਰਸ੍ਸ ਆਤ੍ਤਂ.
ਠਾਨਾਧਿਕਾਰਤੋ ਆਤ੍ਤਂ, ਇਸੂਸਭਉਜਾਦਿਨਂ;
ਇਸਿਸ੍ਸ ਤੁ ਰਿਕਾਰਾਗ-ਮੋ ਚਾਤ੍ਤਾਨਨ੍ਤਰੇ ਭਵੇ.
ਆਰਿਸ੍ਯਂ, ਉਸਭਸ੍ਸ ਇਦਂ ਆਸਭਂ ਠਾਨਂ, ਆਸਭੀ ਵਾਚਾ.
ਅਞ੍ਞਤ੍ਥਗ੍ਗਹਣੇਨ ਪਨ ਅਵਿਦੂਰਭਵੋ, ਤਤ੍ਰ ਭਵੋ, ਤਤ੍ਰ ਜਾਤੋ, ਤਤੋ ਆਗਤੋ, ਸੋ ਅਸ੍ਸ ਨਿਵਾਸੋ, ਤਸ੍ਸ ਇਸ੍ਸਰੋ, ਕਤ੍ਤਿਕਾਦੀਹਿ ਨਿਯੁਤ੍ਤੋ ਮਾਸੋ, ਸਾਸ੍ਸ ਦੇਵਤਾ, ਤਮਵੇਚ੍ਚਾਧੀਤੇ, ਤਸ੍ਸ ਵਿਸਯੋ ਦੇਸੋ, ਤਸ੍ਮਿਂ ਦੇਸੇ ਅਤ੍ਥਿ, ਤੇਨ ਨਿਬ੍ਬਤ੍ਤਂ, ਤਂ ਅਰਹਤਿ, ਤਸ੍ਸ ਵਿਕਾਰੋ, ਤਮਸ੍ਸ ਪਰਿਮਾਣਨ੍ਤਿ ਇਚ੍ਚੇਵਮਾਦੀਸ੍ਵਤ੍ਥੇਸੁ ਚ ਣਪ੍ਪਚ੍ਚਯੋ. ਯਥਾ – ਵਿਦਿਸਾਯ ਅਵਿਦੂਰੇ ਭਵੋ ਵੇਦਿਸੋ ਗਾਮੋ, ਉਦੁਮ੍ਬਰਸ੍ਸ ਅਵਿਦੂਰੇ ਭਵਂ ਓਦੁਮ੍ਬਰਂ ਵਿਮਾਨਂ.
ਭਵਤ੍ਥੇ ਮਨਸਿ ਭਵਂ ਮਾਨਸਂ ਸੁਖਂ, ਸਾਗਮੋ. ਸਰੇ ਭਵੋ ਸਾਰਸੋ ਸਕੁਣੋ, ਸਾਰਸਾ ਸਕੁਣੀ, ਸਾਰਸਂ ਪੁਪ੍ਫਂ, ਉਰਸਿ ਭਵੋ ਓਰਸੋ ਪੁਤ੍ਤੋ, ਉਰਸਿ ਸਂਵਡ੍ਢਿਤਤ੍ਤਾ, ਮਿਤ੍ਤੇ ਭਵਾ ਮੇਤ੍ਤਾ, ਮੇਤ੍ਤੀ ਵਾ, ਪੁਰੇ ਭਵਾ ਪੋਰੀ ਵਾਚਾ.
ਜਾਤਾਦੀਸੁ ਪਾਵੁਸੇ ਜਾਤੋ ਪਾਵੁਸੋ ਮੇਘੋ, ਪਾਵੁਸਾ ਰਤ੍ਤਿ, ਪਾਵੁਸਂ ਅਬ੍ਭਂ, ਸਰਦੇ ਜਾਤੋ ਸਾਰਦੋ ਮਾਸੋ, ਸਾਰਦਾ ਰਤ੍ਤਿ, ਸਾਰਦਂ ਪੁਪ੍ਫਂ. ਏਵਂ ਸਿਸਿਰੋ, ਹੇਮਨ੍ਤੋ, ਵਸਨ੍ਤੋ, ਵਿਮ੍ਹੋ, ਮਥੁਰਾਯਂ ਜਾਤੋ ਮਾਥੁਰੋ ਜਨੋ, ਮਾਥੁਰਾ ਗਣਿਕਾ, ਮਾਥੁਰਂ ਵਤ੍ਥਂ. ਮਥੁਰਾਯ ਆਗਤੋ ਮਾਥੁਰੋ, ਮਥੁਰਾ ਅਸ੍ਸ ਨਿਵਾਸੋਤਿ ਮਾਥੁਰੋ, ਮਥੁਰਾਯ ਇਸ੍ਸਰੋ ਮਾਥੁਰੋ ਰਾਜਾ. ‘‘ਸਬ੍ਬਤੋ ਕੋ’’ਤਿ ਏਤ੍ਥ ਪੁਨ ਸਬ੍ਬਤੋਗ੍ਗਹਣੇਨ ਤਦ੍ਧਿਤਤੋਪਿ ਕ੍ਵਚਿ ਸਸਰਕਕਾਰਾਗਮੋ, ਮਾਥੁਰਕੋ ਵਾ, ਰਾਜਗਹੇ ਜਾਤੋ, ਰਾਜਗਹਾ ਆਗਤੋ, ਰਾਜਗਹੋ ਅਸ੍ਸ ਨਿਵਾਸੋਤਿ ਵਾ, ਰਾਜਗਹਸ੍ਸ ਇਸ੍ਸਰੋਤਿ ਵਾ ਰਾਜਗਹੋ, ਰਾਜਗਹਕੋ ਵਾ. ਏਵਂ ਸਾਗਲੋ, ਸਾਗਲਕੋ ਵਾ, ਪਾਟਲਿਪੁਤ੍ਤੋ, ਪਾਟਲਿਪੁਤ੍ਤਕੋ ਵਾ, ਵੇਸਾਲਿਯਂ ਜਾਤੋਤਿਆਦਿਅਤ੍ਥੇ ਵੇਸਾਲੋ, ਵੇਸਾਲਕੋ ਵਾ, ਕੁਸਿਨਾਰੇ ਜਾਤੋ ਕੋਸਿਨਾਰੋ, ਕੋਸਿਨਾਰਕੋ ਵਾ. ਏਵਂ ਸਾਕੇਤੋ, ਸਾਕੇਤਕੋ ਵਾ, ਕੋਸਮ੍ਬੋ, ਕੋਸਮ੍ਬਕੋ ਵਾ, ਇਨ੍ਦਪਤ੍ਤੋ, ਇਨ੍ਦਪਤ੍ਤਕੋ ਵਾ, ਕਪਿਲ੍ਲੋ, ਕਪਿਲ੍ਲਕੋ ਵਾ, ਭਾਰੁਕਚ੍ਛੋ, ਭਾਰੁਕਚ੍ਛਕੋ ਵਾ, ਨਗਰੇ ਜਾਤੋ, ਨਗਰਾ ਆਗਤੋ, ਨਗਰੇ ਵਸਤੀਤਿ ਵਾ ਨਾਗਰੋ, ਨਾਗਰਕੋ ਵਾ. ਏਵਂ ਜਾਨਪਦੋ.
ਜਨਪਦਨਾਮੇਸੁ ਪਨ ਸਬ੍ਬਤ੍ਥ ਬਹੁਵਚਨਮੇਵ ਭਵਤਿ. ਯਥਾ – ਅਙ੍ਗੇਸੁ ਜਾਤੋ, ਅਙ੍ਗੇਹਿ ਆਗਤੋ, ਅਙ੍ਗਾ ਅਸ੍ਸ ਨਿਵਾਸੋ, ਅਙ੍ਗਾਨਂ ਇਸ੍ਸਰੋ ਵਾ ਅਙ੍ਗੋ, ਅਙ੍ਗਕੋ ਵਾ, ਮਾਗਧੋ, ਮਾਗਧਕੋ ਵਾ, ਕੋਸਲੋ, ਕੋਸਲਕੋ ਵਾ, ਵੇਦੇਹੋ, ਵੇਦੇਹਕੋ ਵਾ, ਕਮ੍ਬੋਜੋ, ਕਮ੍ਬੋਜਕੋ ਵਾ, ਗਨ੍ਧਾਰੋ, ਗਨ੍ਧਾਰਕੋ ਵਾ, ਸੋਵੀਰੋ, ਸੋਵੀਰਕੋ ਵਾ, ਸਿਨ੍ਧਵੋ, ਸਿਨ੍ਧਵਕੋ ਵਾ, ਅਸ੍ਸਕੋ, ਕਾਲਿਙ੍ਗੋ, ਪਞ੍ਚਾਲੋ, ਸਕ੍ਕੋ, ਤਥਾ ਸੁਰਟ੍ਠੇ ਜਾਤੋ, ਸੁਰਟ੍ਠਸ੍ਸ ਇਸ੍ਸਰੋ ਵਾ ਸੋਰਟ੍ਠੋ, ਸੋਰਟ੍ਠਕੋ ਵਾ. ਏਵਂ ਮਹਾਰਟ੍ਠੋ, ਮਹਾਰਟ੍ਠਕੋ ਵਾ ਇਚ੍ਚਾਦਿ.
ਨਕ੍ਖਤ੍ਤਯੋਗੇ ਕਤ੍ਤਿਕਾਯ ਪੁਣ੍ਣਚਨ੍ਦਯੁਤ੍ਤਾਯ ਯੁਤ੍ਤੋ ਮਾਸੋ ਕਤ੍ਤਿਕੋ, ਮਗਸਿਰੇਨ ਚਨ੍ਦਯੁਤ੍ਤੇਨ ਨਕ੍ਖਤ੍ਤੇਨ ਯੁਤ੍ਤੋ ਮਾਸੋ ਮਾਗਸਿਰੋ. ਏਵਂ ਫੁਸ੍ਸੇਨ ਯੁਤ੍ਤੋ ਮਾਸੋ ਫੁਸ੍ਸੋ, ਮਘਾਯ ਯੁਤ੍ਤੋ ਮਾਸੋ ਮਾਘੋ, ਫਗ੍ਗੁਨਿਯਾ ਯੁਤ੍ਤੋ ਮਾਸੋ ਫਗ੍ਗੁਨੋ, ਚਿਤ੍ਤਾਯ ਯੁਤ੍ਤੋ ਮਾਸੋ ਚਿਤ੍ਤੋ, ਵਿਸਾਖਾਯ ਯੁਤ੍ਤੋ ਮਾਸੋ ਵੇਸਾਖੋ, ਜੇਟ੍ਠਾਯ ਯੁਤ੍ਤੋ ਮਾਸੋ ਜੇਟ੍ਠੋ, ਉਤ੍ਤਰਾਸਾਲ਼੍ਹਾਯ ਯੁਤ੍ਤੋ ਮਾਸੋ ਆਸਾਲ਼੍ਹੋ, ਆਸਾਲ਼੍ਹੀ ਵਾ, ਸਵਣੇਨ ਯੁਤ੍ਤੋ ਮਾਸੋ ਸਾਵਣੋ, ਸਾਵਣੀ. ਭਦ੍ਦੇਨ ਯੁਤ੍ਤੋ ਮਾਸੋ ਭਦ੍ਦੋ, ਅਸ੍ਸਯੁਜੇਨ ਯੁਤ੍ਤੋ ਮਾਸੋ ਅਸ੍ਸਯੁਜੋ, ਬੁਦ੍ਧੋ ਅਸ੍ਸ ਦੇਵਤਾਤਿ ਬੁਦ੍ਧੋ. ਏਵਂ ਸੋਗਤੋ, ਮਾਹਿਨ੍ਦੋ, ਯਾਮੋ, ਸੋਮੋ.
ਬ੍ਯਾਕਰਣਂ ਅਵੇਚ੍ਚਾਧੀਤੇ ਵੇਯ੍ਯਾਕਰਣੋ. ਏਵਂ ਮੋਹੁਤ੍ਤੋ, ਨੇਮਿਤ੍ਤੋ, ਅਙ੍ਗਵਿਜ੍ਜੋ, ਵਤ੍ਥੁਵਿਜ੍ਜੋ. ਵਸਾਤੀਨਂ ਵਿਸਯੋ ਦੇਸੋ ਵਾਸਾਤੋ, ਉਦੁਮ੍ਬਰਾ ਅਸ੍ਮਿਂ ਪਦੇਸੇ ਸਨ੍ਤੀਤਿ ਓਦੁਮ੍ਬਰੋ ਦੇਸੋ.
ਸਹਸ੍ਸੇਨ ਨਿਬ੍ਬਤ੍ਤਾ ਸਾਹਸ੍ਸੀ ਪਰਿਖਾ, ਪਯਸਾ ਨਿਬ੍ਬਤ੍ਤਂ ਪਾਯਾਸਂ, ਸਹਸ੍ਸਂ ਅਰਹਤੀਤਿ ਸਾਹਸ੍ਸੀ ਗਾਥਾ, ਅਯਸੋ ਵਿਕਾਰੋ ਆਯਸੋ. ਏਵਂ ਸੋਵਣ੍ਣੋ, ਪੁਰਿਸੋ ਪਰਿਮਾਣਮਸ੍ਸਾਤਿ ਪੋਰਿਸਂ ਉਦਕਂ.
ਚਗ੍ਗਹਣੇਨ ਤਤ੍ਥ ਜਾਤੋ, ਤਤ੍ਥ ਵਸਤਿ, ਤਸ੍ਸ ਹਿਤਂ, ਤਂ ਅਰਹਤੀਤਿਆਦੀਸੁ ਣੇਯ੍ਯਪ੍ਪਚ੍ਚਯੋ. ਬਾਰਾਣਸਿਯਂ ਜਾਤੋ, ਵਸਤੀਤਿ ਵਾ ਬਾਰਾਣਸੇਯ੍ਯਕੋ, ਪੁਰੇ ਵਿਯ ਕਕਾਰਾਗਮੋ. ਏਵਂ ਚਮ੍ਪੇਯ੍ਯਕੋ, ਸਾਗਲੇਯ੍ਯਕੋ, ਮਿਥਿਲੇਯ੍ਯਕੋ ਜਨੋ, ਗਙ੍ਗੇਯ੍ਯੋ ਮਚ੍ਛੋ, ਸਿਲਾਯ ਜਾਤਂ ਸੇਲੇਯ੍ਯਕਂ, ਕੁਲੇ ਜਾਤੋ ਕੋਲੇਯ੍ਯਕੋ ਸੁਨਖੋ, ਵਨੇ ਜਾਤਂ ਵਾਨੇਯ੍ਯਂ ਪੁਪ੍ਫਂ. ਏਵਂ ਪਬ੍ਬਤੇਯ੍ਯੋ ਮਾਨੁਸੋ, ਪਬ੍ਬਤੇਯ੍ਯਾ ਨਦੀ, ਪਬ੍ਬਤੇਯ੍ਯਂ ਓਸਧਂ, ਪਥਸ੍ਸ ਹਿਤਂ ਪਾਥੇਯ੍ਯਂ, ਸਪਤਿਸ੍ਸ ਹਿਤਂ ਸਾਪਤੇਯ੍ਯਂ ਧਨਂ, ਪਦੀਪੇਯ੍ਯਂ ਤੇਲਂ, ਮਾਤੁ ਹਿਤਂ ਮਤ੍ਤੇਯ੍ਯਂ. ਏਵਂ ਪੇਤ੍ਤੇਯ੍ਯਂ. ਦਕ੍ਖਿਣਮਰਹਤੀਤਿ ਦਕ੍ਖਿਣੇਯ੍ਯੋ ਇਚ੍ਚਾਦਿ.
੩੭੮. ਜਾਤਾਦੀਨਮਿਮਿਯਾ ਚ.
ਜਾਤਇਚ੍ਚੇਵਮਾਦੀਨਂ ਸਦ੍ਦਾਨਂ ਅਤ੍ਥੇ ਇਮ ਇਯਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਵਾ.
ਪਚ੍ਛਾ ਜਾਤੋ ਪਚ੍ਛਿਮੋ, ਪਚ੍ਛਿਮਾ ਜਨਤਾ, ਪਚ੍ਛਿਮਂ ਚਿਤ੍ਤਂ, ਅਨ੍ਤੇ ਜਾਤੋ ਅਨ੍ਤਿਮੋ, ਅਨ੍ਤਿਮਾ, ਅਨ੍ਤਿਮਂ. ਏਵਂ ਮਜ੍ਝਿਮੋ, ਪੁਰਿਮੋ, ਉਪਰਿਮੋ, ਹੇਟ੍ਠਿਮੋ, ਪਚ੍ਚਨ੍ਤਿਮੋ, ਗੋਪ੍ਫਿਮੋ, ਗਨ੍ਥਿਮੋ.
ਤਥਾ ਇਯਪ੍ਪਚ੍ਚਯੇ ਮਨੁਸ੍ਸਜਾਤਿਯਾ ਜਾਤੋ ਮਨੁਸ੍ਸਜਾਤਿਯੋ, ਮਨੁਸ੍ਸਜਾਤਿਯਾ, ਮਨੁਸ੍ਸਜਾਤਿਯਂ. ਏਵਂ ਅਸ੍ਸਜਾਤਿਯੋ, ਹਤ੍ਥਿਜਾਤਿਯੋ, ਬੋਧਿਸਤ੍ਤਜਾਤਿਯੋ, ਦਬ੍ਬਜਾਤਿਯੋ, ਸਮਾਨਜਾਤਿਯੋ, ਲੋਕਿਯੋ ਇਚ੍ਚਾਦਿ.
ਆਦਿਗ੍ਗਹਣੇਨ ਤਤ੍ਥ ਨਿਯੁਤ੍ਤੋ, ਤਦਸ੍ਸ ਅਤ੍ਥਿ, ਤਤ੍ਥ ਭਵੋਤਿਆਦੀਸ੍ਵਪਿ ਇਮ ਇਯਪ੍ਪਚ੍ਚਯਾ ਹੋਨ੍ਤਿ, ਚਸਦ੍ਦੇਨ ਇਕਪ੍ਪਚ੍ਚਯੋ ਚ. ਅਨ੍ਤੇ ਨਿਯੁਤ੍ਤੋ ਅਨ੍ਤਿਮੋ, ਅਨ੍ਤਿਯੋ, ਅਨ੍ਤਿਕੋ, ਪੁਤ੍ਤੋ ਅਸ੍ਸ ਅਤ੍ਥਿ, ਤਸ੍ਮਿਂ ਵਾ ਵਿਜ੍ਜਤੀਤਿ ਪੁਤ੍ਤਿਮੋ, ਪੁਤ੍ਤਿਯੋ, ਵੁਤ੍ਤਿਕੋ, ਕਪ੍ਪੋ ਅਸ੍ਸ ਅਤ੍ਥੀਤਿ ਕਪ੍ਪਿਯੋ, ਜਟਾ ਅਸ੍ਸ ਅਤ੍ਥੀਤਿ ਜਟਿਯੋ, ਹਾਨਭਾਗੋ ਅਸ੍ਸ ਅਤ੍ਥੀਤਿ ਹਾਨਭਾਗਿਯੋ. ਏਵਂ ਠਿਤਿਭਾਗਿਯੋ, ਬੋਧਿਸ੍ਸ ਪਕ੍ਖੇ ਭਵਾ ਬੋਧਿਪਕ੍ਖਿਯਾ, ਪਞ੍ਚਵਗ੍ਗੇ ਭਵਾ ਪਞ੍ਚਵਗ੍ਗਿਯਾ. ਏਵਂ ਛਬ੍ਬਗ੍ਗਿਯਾ, ਉਦਰਿਯਂ, ਅਤ੍ਤਨੋ ਇਦਨ੍ਤਿ ਅਤ੍ਤਨਿਯਂ, ਨਕਾਰਾਗਮੋ.
ਚਸਦ੍ਦਗ੍ਗਹਣੇਨ ਕਿਯ ਯਣ੍ਯਪ੍ਪਚ੍ਚਯਾ ਚ. ਜਾਤਿਯਾ ਨਿਯੁਤ੍ਤੋ ਜਾਤਿਕਿਯੋ. ਏਵਂ ਅਨ੍ਧਕਿਯੋ, ਜਚ੍ਚਨ੍ਧੇ ਨਿਯੁਤ੍ਤੋ ਜਚ੍ਚਨ੍ਧਕਿਯੋ. ਸਸ੍ਸ ਅਯਨ੍ਤਿ ਸਕਿਯੋ. ਏਵਂ ਪਰਕਿਯੋ.
ਯਪ੍ਪਚ੍ਚਯੋ ਸਾਧੁਹਿਤਭਵਜਾਤਾਦਿਅਤ੍ਥੇਸੁ. ਯਥਾ – ਕਮ੍ਮਨਿ ਸਾਧੁ ਕਮ੍ਮਞ੍ਞਂ. ਸਭਾਯਂ ਸਾਧੁ ਸਬ੍ਭਂ, ‘‘ਯਵਤਂ ਤਲਨਾ’’ਦਿਨਾ ਉਕਾਰਾਦਿ. ਏਵਂ ਮੇਧਾਯ ਹਿਤਂ ਮੇਜ੍ਝਂ ਘਟਂ. ਪਾਦਾਨਂ ਹਿਤਂ ਪਜ੍ਜਂ ਤੇਲਂ, ਰਥਸ੍ਸ ਹਿਤਾ ਰਚ੍ਛਾ, ਗਾਮੇ ਭਵੋ ਗਮ੍ਮੋ, ਗਵੇ ਭਵਂ ਗਬ੍ਯਂ, ‘‘ਓਸਰੇ ਚਾ’’ਤਿ ਸੁਤ੍ਤੇ ਚਸਦ੍ਦੇਨ ਯਪ੍ਪਚ੍ਚਯੇ ਪਰੇਪਿ ਅਵਾਦੇਸੋ. ਕਵਿਮ੍ਹਿ ਭਵਂ ਕਬ੍ਯਂ, ਦਿਵਿ ਭਵਾ ਦਿਬ੍ਯਾ, ਥਨਤੋ ਜਾਤਂ ਥਞ੍ਞਂ, ਧਨਾਯ ਸਂਵਤ੍ਤਤੀਤਿ ਧਞ੍ਞਂ.
ਣ੍ਯਪ੍ਪਚ੍ਚਯੋ ਪਰਿਸਾਯਂ ਸਾਧੁ ਪਾਰਿਸਜ੍ਜੋ, ਦਕਾਰਾਗਮੋ, ਸਮਣਾਨਂ ਹਿਤਾ ਸਾਮਞ੍ਞਾ ਜਨਾ, ਬ੍ਰਾਹ੍ਮਣਾਨਂ ਹਿਤਾ ਬ੍ਰਾਹ੍ਮਞ੍ਞਾ, ਅਰੂਪੇ ਭਵਾ ਆਰੁਪ੍ਪਾ ਇਚ੍ਚਾਦਿ.
‘‘ਰਾਜਪੁਤ੍ਤਾਨਂ ਸਮੂਹੋ’’ਤਿ ਵਿਗ੍ਗਹੇ –
੩੭੯. ਸਮੂਹਤ੍ਥੇ ਕਣਣਾ.
ਛਟ੍ਠਿਯਨ੍ਤਤੋ ‘‘ਤੇਸਂ ਸਮੂਹੋ’’ਤਿ ਅਤ੍ਥੇ ਕਣਣਇਚ੍ਚੇਤੇ ਪਚ੍ਚਯਾ ਹੋਨ੍ਤਿ. ਰਾਜਪੁਤ੍ਤਕੋ, ਰਾਜਪੁਤ੍ਤਕਂ ਵਾ, ਰਾਜਪੁਤ੍ਤੋ. ਏਵਂ ਮਾਨੁਸ੍ਸਕੋ, ਮਾਨੁਸ੍ਸੋ, ਮਾਥੁਰਕੋ, ਮਾਥੁਰੋ, ਪੋਰਿਸਕੋ, ਪੋਰਿਸੋ, ਵੁਦ੍ਧਾਨਂ ਸਮੂਹੋ ਵੁਦ੍ਧਕੋ, ਵੁਦ੍ਧੋ. ਏਵਂ ਮਾਯੂਰਕੋ, ਮਾਯੂਰੋ, ਕਾਪੋਤੋ, ਕੋਕਿਲੋ, ਮਾਹਿਂਸਕੋ, ਮਾਹਿਂਸੋ, ਓਟ੍ਠਕੋ, ਓਰਬ੍ਭਕੋ, ਅਟ੍ਠਨ੍ਨਂ ਸਮੂਹੋ ਅਟ੍ਠਕੋ, ਰਾਜਾਨਂ ਸਮੂਹੋ ਰਾਜਕੋ, ਭਿਕ੍ਖਾਨਂ ਸਮੂਹੋ ਭਿਕ੍ਖੋ, ਸਿਕ੍ਖਾਨਂ ਸਮੂਹੋ ਸਿਕ੍ਖੋ, ਦ੍ਵਿਨ੍ਨਂ ਸਮੂਹੋ ਦ੍ਵਯਂ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਇਕਾਰਸ੍ਸ ਅਯਾਦੇਸੋ. ਏਵਂ ਤਿਣ੍ਣਂ ਸਮੂਹੋ ਤਯਂ ਇਚ੍ਚਾਦਿ.
‘‘ਸਮੂਹਤ੍ਥੇ’’ਤਿ ਵਤ੍ਤਤੇ.
੩੮੦. ਗਾਮਜਨਬਨ੍ਧੁਸਹਾਯਾਦੀਹਿ ਤਾ.
ਗਾਮਜਨਬਨ੍ਧੁਸਹਾਯਇਚ੍ਚੇਵਮਾਦੀਹਿ ਤਾਪਚ੍ਚਯੋ ਹੋਤਿ ਸਮੂਹਤ੍ਥੇ. ਗਾਮਾਨਂ ਸਮੂਹੋ ਗਾਮਤਾ. ਏਵਂ ਜਨਤਾ, ਬਨ੍ਧੁਤਾ, ਸਹਾਯਤਾ, ਨਾਗਰਤਾ. ‘‘ਤਾ’’ਤਿ ਯੋਗਵਿਭਾਗੇਨ ਸਕਤ੍ਥੇਪਿ ਦੇਵੋਯੇਵ ਦੇਵਤਾ, ਤਾਪਚ੍ਚਯਨ੍ਤਸ੍ਸ ਨਿਚ੍ਚਮਿਤ੍ਥਿਲਿਙ੍ਗਤਾ.
੩੮੧. ਤਦਸ੍ਸ ਠਾਨਮਿਯੋ ਚ.
‘‘ਤਦਸ੍ਸ ਠਾਨ’’ਮਿਚ੍ਚੇਤਸ੍ਮਿਂ ਅਤ੍ਥੇ ਛਟ੍ਠਿਯਨ੍ਤਤੋ ਇਯਪ੍ਪਚ੍ਚਯੋ ਹੋਤਿ. ਮਦਨਸ੍ਸ ਠਾਨਂ ਮਦਨਿਯੋ, ਮਦਨਿਯਾ, ਮਦਨਿਯਂ, ਬਨ੍ਧਨਸ੍ਸ ਠਾਨਂ ਬਨ੍ਧਨਿਯਂ. ਏਵਂ ਮੁਚ੍ਛਨਿਯਂ. ਰਜਨਿਯਂ, ਗਮਨਿਯਂ, ਦਸ੍ਸਨਿਯਂ, ਉਪਾਦਾਨਿਯਂ, ਪਸਾਦਨਿਯਂ. ਚਸਦ੍ਦੇਨ ਹਿਤਾਦਿਅਤ੍ਥੇਪਿ ਉਪਾਦਾਨਾਨਂ ਹਿਤਾ ਉਪਾਦਾਨਿਯਾ ਇਚ੍ਚਾਦਿ.
੩੮੨. ਉਪਮਤ੍ਥਾਯਿਤਤ੍ਤਂ.
ਉਪਮਤ੍ਥੇ ਉਪਮਾਵਾਚਿਲਿਙ੍ਗਤੋ ਆਯਿਤਤ੍ਤਪ੍ਪਚ੍ਚਯੋ ਹੋਤਿ. ਧੂਮੋ ਵਿਯ ਦਿਸ੍ਸਤੀਤਿ ਧੂਮਾਯਿਤਤ੍ਤਂ. ਏਵਂ ਤਿਮਿਰਾਯਿਤਤ੍ਤਂ.
‘‘ਤਦਸ੍ਸ ਠਾਨ’’ਨ੍ਤਿ ਵਤ੍ਤਤੇ.
੩੮੩. ਤਨ੍ਨਿਸ੍ਸਿਤਤ੍ਥੇ ਲੋ.
‘‘ਤਨ੍ਨਿਸ੍ਸਿਤ’’ਨ੍ਤਿ ਅਤ੍ਥੇ, ‘‘ਤਦਸ੍ਸਠਾਨ’’ਨ੍ਤਿ ਅਤ੍ਥੇ ਚ ਲਪ੍ਪਚ੍ਚਯੋ ਹੋਤਿ. ਦੁਟ੍ਠੁ ਨਿਸ੍ਸਿਤਂ, ਦੁਟ੍ਠੁ ਠਾਨਂ ਵਾ ਦੁਟ੍ਠੁਲ੍ਲਂ, ਦੁਟ੍ਠੁਲ੍ਲਾ ਵਾਚਾ, ਲਸ੍ਸ ਦ੍ਵਿਭਾਵੋ. ਏਵਂ ਵੇਦਲ੍ਲਂ.
‘‘ਅਭਿਜ੍ਝਾ ਅਸ੍ਸ ਪਕਤਿ, ਅਭਿਜ੍ਝਾ ਅਸ੍ਸ ਬਹੁਲਾ’’ਤਿ ਵਾ ਵਿਗ੍ਗਹੇ –
੩੮੪. ਆਲੁ ਤਬ੍ਬਹੁਲੇ.
ਪਠਮਾਵਿਭਤ੍ਯਨ੍ਤਤੋ ਆਲੁਪ੍ਪਚ੍ਚਯੋ ਹੋਤਿ ‘‘ਤਦਸ੍ਸ ਬਹੁਲ’’ਮਿਚ੍ਚੇਤਸ੍ਮਿਂ ਅਤ੍ਥੇ. ਅਭਿਜ੍ਝਾਲੁ, ਅਭਿਜ੍ਝਾਲੂ, ਅਭਿਜ੍ਝਾਲਵੋ. ਏਵਂ ਸੀਤਾਲੁ, ਧਜਾਲੁ, ਦਯਾਲੁ. ‘‘ਸਬ੍ਬਤੋ ਕੋ’’ਤਿ ਏਤ੍ਥ ਪੁਨ ਸਬ੍ਬਤੋਗ੍ਗਹਣੇਨ ਕਕਾਰਾਗਮੋ, ਅਭਿਜ੍ਝਾਲੁਕੋ, ਅਭਿਜ੍ਝਾਲੁਕਾ, ਅਭਿਜ੍ਝਾਲੁਕਂ. ਏਵਂ ਸੀਤਾਲੁਕੋ, ਦਯਾਲੁਕੋ, ਤਥਾ ਹੀਨੋਵ ਹੀਨਕੋ. ਏਵਂ ਪੋਤਕੋ, ਕੁਮਾਰਕੋ, ਮਾਣਵਕੋ, ਮੁਦੁਕੋ, ਉਜੁਕੋ, ਅਪ੍ਪਮਤ੍ਤਕਂ, ਓਰਮਤ੍ਤਕਂ, ਸੀਲਮਤ੍ਤਕਂ ਇਚ੍ਚਾਦਿ.
‘‘ਯਦਨੁਪਪਨ੍ਨਾ ਨਿਪਾਤਨਾ ਸਿਜ੍ਝਨ੍ਤੀ’’ਤਿ ਇਮਿਨਾ ਪਟਿਭਾਗਕੁਚ੍ਛਿਤਸਞ੍ਞਾਨੁਕਮ੍ਪਾਦਿਅਤ੍ਥੇਸੁ ਕਪ੍ਪਚ੍ਚਯੋ. ਪਟਿਭਾਗਤ੍ਥੇ ਹਤ੍ਥਿਨੋ ਇਵ ਹਤ੍ਥਿਕਾ. ਏਵਂ ਅਸ੍ਸਕਾ. ਕੁਚ੍ਛਿਤਤ੍ਥੇ ਕੁਚ੍ਛਿਤੋ ਸਮਣੋ ਸਮਣਕੋ. ਏਵਂ ਬ੍ਰਾਹ੍ਮਣਕੋ, ਮੁਣ੍ਡਕੋ, ਪਣ੍ਡਿਤਕੋ, ਵੇਯ੍ਯਾਕਰਣਕੋ. ਸਞ੍ਞਾਯਂ ਕਤਕੋ, ਭਟਕੋ. ਅਨੁਕਮ੍ਪਾਯਂ ਪੁਤ੍ਤਕੋ.
ਤਥਾ ਕਿਂਯਤੇਤਤੋ ਪਰਿਮਾਣਤ੍ਥੇ ਤ੍ਤਕਵਨ੍ਤੁਪ੍ਪਚ੍ਚਯਾ. ਕਿਂ ਪਰਿਮਾਣਮਸ੍ਸਾਤਿ ਕਿਤ੍ਤਕਂ. ਏਵਂ ਯਤ੍ਤਕਂ, ਤਤ੍ਤਕਂ, ਏਤ੍ਤਕਂ. ਵਨ੍ਤੁਮ੍ਹਿ ਆਤ੍ਤਞ੍ਚ, ਯਂ ਪਰਿਮਾਣਮਸ੍ਸਾਤਿ ਯਾਵਾ, ਯਾਵਨ੍ਤੋ, ਗੁਣਵਨ੍ਤੁਸਮਂ. ਏਵਂ ਤਾਵਾ, ਤਾਵਨ੍ਤੋ. ਏਤਾਵਾ, ਏਤਾਵਨ੍ਤੋ ਇਚ੍ਚਾਦਿ.
‘‘ਸੁਵਣ੍ਣੇਨ ਪਕਤ’’ਨ੍ਤਿ ਵਿਗ੍ਗਹੇ –
੩੮੫. ਤਪ੍ਪਕਤਿਵਚਨੇ ਮਯੋ.
ਤਪ੍ਪਕਤਿਵਚਨਤ੍ਥੇ ਮਯਪ੍ਪਚ੍ਚਯੋ ਹੋਤਿ, ਪਕਰੀਯਤੀਤਿ ਪਕਤਿ, ਤੇਨ ਪਕਤਿ ਤਪ੍ਪਕਤਿ, ਤਪ੍ਪਕਤਿਯਾ ਵਚਨਂ ਕਥਨਂ ਤਪ੍ਪਕਤਿਵਚਨਂ. ਸੁਵਣ੍ਣਮਯੋ ਰਥੋ, ਸੋਵਣ੍ਣਮਯੋ ਵਾ, ਸੁਵਣ੍ਣਮਯਾ ਭਾਜਨਵਿਕਤਿ, ਸੁਵਣ੍ਣਮਯਂ ਭਾਜਨਂ. ਏਵਂ ਰੂਪਿਯਮਯਂ, ਰਜਤਮਯਂ, ਜਤੁਮਯਂ, ਦਾਰੁਮਯਂ, ਮਤ੍ਤਿਕਾਮਯਂ, ਇਦ੍ਧਿਯਾ ਨਿਬ੍ਬਤ੍ਤਂ ਇਦ੍ਧਿਮਯਂ.
ਮਨਤੋ ਨਿਪ੍ਫਨ੍ਨਾ ਮਨੋਮਯਾ, ਅਯਸਾਪਕਤਂ ਅਯੋਮਯਂ. ਏਤ੍ਥ ਚ ‘‘ਮਨੋਗਣਾਦੀਨ’’ਨ੍ਤਿ ਵਤ੍ਤਮਾਨੇ –
੩੮੬. ਏਤੇਸਮੋ ਲੋਪੇ.
ਏਤੇਸਂ ਮਨੋਗਣਾਦੀਨਂ ਅਨ੍ਤੋ ਓਤ੍ਤਮਾਪਜ੍ਜਤੇ ਵਿਭਤ੍ਤਿਲੋਪੇ ਕਤੇਤਿ ਓਕਾਰੋ.
ਗਵੇਨ ਪਕਤਂ ਕਰੀਸਂ, ਗੋਤੋ ਨਿਬ੍ਬਤ੍ਤਨ੍ਤਿ ਵਾ ਗੋਮਯਂ. ‘‘ਮਯੋ’’ਤਿਯੋਗਵਿਭਾਗੇਨ ਸਕਤ੍ਥੇਪਿ ਦਾਨਮੇਵ ਦਾਨਮਯਂ, ਸੀਲਮਯਂ ਇਚ੍ਚਾਦਿ.
ਸਂਸਟ੍ਠਾਦਿਅਨੇਕਤ੍ਥਤਦ੍ਧਿਤਂ.
ਭਾਵਤਦ੍ਧਿਤ
‘‘ਅਲਸਸ੍ਸ ਭਾਵੋ’’ਤਿ ਵਿਗ੍ਗਹੇ –
੩੮੭. ਣ੍ਯਤ੍ਤਤਾ ਭਾਵੇ ਤੁ.
ਛਟ੍ਠਿਯਨ੍ਤਤੋ ਣ੍ਯਤ੍ਤਤਾਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ‘‘ਤਸ੍ਸ ਭਾਵੋ’’ ਇਚ੍ਚੇਤਸ੍ਮਿਂ ਅਤ੍ਥੇ, ਤੁਸਦ੍ਦਗ੍ਗਹਣੇਨ ਤ੍ਤਨਣੇਯ੍ਯਾਦਿਪ੍ਪਚ੍ਚਯਾ ਚ. ਭਵਨ੍ਤਿ ਏਤਸ੍ਮਾ ਬੁਦ੍ਧਿਸਦ੍ਦਾ ਇਤਿ ਭਾਵੋ, ਸਦ੍ਦਪ੍ਪਵਤ੍ਤਿਨਿਮਿਤ੍ਤਂ ਵੁਚ੍ਚਤਿ, ਵੁਤ੍ਤਞ੍ਚ – ‘‘ਯਸ੍ਸ ਗੁਣਸ੍ਸ ਹਿ ਭਾਵਾ ਦਬ੍ਬੇ ਸਦ੍ਦਨਿਵੇਸੋ ਤਦਭਿਧਾਨੇਣ੍ਯਤ੍ਤਤਾਦਯੋ’’ਤਿ. ਣ੍ਯਤ੍ਤਤ੍ਤਨਨ੍ਤਾਨਂ ਨਿਚ੍ਚਂ ਨਪੁਂਸਕਤ੍ਤਂ, ਤਾਪਚ੍ਚਯਨ੍ਤਸ੍ਸ ਸਭਾਵਤੋ ਨਿਚ੍ਚਮਿਤ੍ਥਿਲਿਙ੍ਗਤਾ. ਣ੍ਯਪ੍ਪਚ੍ਚਯੋਯਂ ਗੁਣਵਚਨੇ ਬ੍ਰਾਹ੍ਮਣਾਦੀਹਿ, ਤਤ੍ਥ ‘‘ਅਵਣ੍ਣੋ ਯੇ ਲੋਪਞ੍ਚਾ’’ਤਿ ਅਵਣ੍ਣਲੋਪੋ, ਆਦਿਵੁਦ੍ਧਿ.
ਆਲਸ੍ਯਂ. ਏਵਂ ਆਰੋਗ੍ਯਂ, ਉਦਗ੍ਗਸ੍ਸ ਭਾਵੋ ਓਦਗ੍ਯਂ, ਸਖਿਨੋ ਭਾਵੋ ਸਖ੍ਯਂ, ਅਣਣਸ੍ਸ ਭਾਵੋ ਆਣਣ੍ਯਂ, ਵਿਧਵਾਯ ਭਾਵੋ ਵੇਧਬ੍ਯਂ, ਦੁਬ੍ਬਲਸ੍ਸ ਭਾਵੋ ਦੁਬ੍ਬਲ੍ਯਂ, ਚਪਲਸ੍ਸ ਭਾਵੋ ਚਾਪਲ੍ਯਂ.
ਵਿਯਤ੍ਤਸ੍ਸ ਭਾਵੋ ਵੇਯ੍ਯਤ੍ਤਿਯਂ, ਮਚ੍ਛਰਸ੍ਸ ਭਾਵੋ ਮਚ੍ਛਰਿਯਂ. ਏਵਂ ਇਸ੍ਸਰਿਯਂ, ਆਲਸਿਯਂ, ਮੁਣ੍ਡਿਯਂ, ਮੂਲ਼੍ਹਿਯਂ. ਏਤ੍ਥ ‘‘ਵੇਯ੍ਯਤ੍ਤਿਯ’’ਨ੍ਤਿਆਦੀਸੁ ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਯਮ੍ਹਿ ਇਕਾਰਾਗਮੋ.
‘‘ਪਣ੍ਡਿਤਸ੍ਸ ਭਾਵੋ ਪਣ੍ਡਿਤ੍ਯ’’ਨ੍ਤਿਆਦੀਸੁ ‘‘ਯਵਤਂ ਤਲਨਦਕਾਰਾਨਂ ਬ੍ਯਞ੍ਜਨਾਨਿ ਚਲਞਜਕਾਰਤ੍ਤ’’ਨ੍ਤਿ ਤ੍ਯਕਾਰਸਂਯੋਗਾਦੀਨਂ ਚਲਞਜਕਾਰਾਦੇਸਾ, ਦ੍ਵਿਤ੍ਤਂ. ਪਣ੍ਡਿਚ੍ਚਂ, ਬਹੁਸ੍ਸੁਤਸ੍ਸ ਭਾਵੋ ਬਾਹੁਸ੍ਸਚ੍ਚਂ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਉਕਾਰਸ੍ਸ ਅਕਾਰੋ, ਏਵਂ ਪੋਰੋਹਿਚ੍ਚਂ, ਅਧਿਪਤਿਸ੍ਸ ਭਾਵੋ ਆਧਿਪਚ੍ਚਂ, ਮੁਟ੍ਠਸ੍ਸਤਿਸ੍ਸ ਭਾਵੋ ਮੁਟ੍ਠਸ੍ਸਚ੍ਚਂ, ਇਵਣ੍ਣਲੋਪੋ. ਕੁਸਲਸ੍ਸ ਭਾਵੋ ਕੋਸਲ੍ਲਂ. ਏਵਂ ਵੇਪੁਲ੍ਲਂ, ਸਮਾਨਾਨਂ ਭਾਵੋ ਸਾਮਞ੍ਞਂ, ਗਿਲਾਨਸ੍ਸ ਭਾਵੋ ਗੇਲਞ੍ਞਂ, ‘‘ਕ੍ਵਚਾਦਿਮਜ੍ਝੁਤ੍ਤਰਾ’’ਦਿਸੁਤ੍ਤੇਨ ਸਂਯੋਗੇ ਪਰੇ ਰਸ੍ਸਤ੍ਤਂ.
ਸੁਹਦਸ੍ਸ ਭਾਵੋਸੋਹਜ੍ਜਂ. ਏਵਂ ਵੇਸਾਰਜ੍ਜਂ, ਕੁਸੀਦਸ੍ਸਭਾਵੋਕੋਸਜ੍ਜਂ, ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਈਕਾਰਸ੍ਸ ਅਕਾਰੋ. ਤਥਾ ‘‘ਪੁਰਿਸਸ੍ਸ ਭਾਵੋ ਪੋਰਿਸ’’ਨ੍ਤਿਆਦੀਸੁ ‘‘ਯਵਤਂ ਤਲਨਾ’’ਦਿਸੁਤ੍ਤੇ ਕਾਰਗ੍ਗਹਣੇਨ ਯਵਤਂ ਸਕਾਰਕਚਟਪਵਗ੍ਗਾਨਂ ਸਕਾਰਕਚਟਪਵਗ੍ਗਾਦੇਸਾ. ਸੁਮਨਸ੍ਸ ਭਾਵੋ ਸੋਮਨਸ੍ਸਂ. ਏਵਂ ਦੋਮਨਸ੍ਸਂ, ਸੋਵਚਸ੍ਸਂ, ਦੋਵਚਸ੍ਸਂ, ਏਤ੍ਥ ਸਕਾਰਾਗਮੋ. ਤਥਾ ਨਿਪਕਸ੍ਸ ਭਾਵੋ ਨੇਪਕ੍ਕਂ, ਦ੍ਵਿਤ੍ਤਂ. ਏਵਂ ਆਧਿਕ੍ਕਂ, ਦੁਭਗਸ੍ਸ ਭਾਵੋ ਦੋਭਗ੍ਗਂ, ਵਾਣਿਜਸ੍ਸ ਭਾਵੋ ਵਾਣਿਜ੍ਜਂ, ਰਾਜਿਨੋ ਭਾਵੋ ਰਜ੍ਜਂ, ‘‘ਕ੍ਵਚਾ’’ਦਿਨਾ ਰਸ੍ਸਤ੍ਤਂ. ਸਰੂਪਸ੍ਸ ਭਾਵੋ ਸਾਰੁਪ੍ਪਂ. ਏਵਂ ਓਪਮ੍ਮਂ, ਸੋਖੁਮ੍ਮਂ.