੪. ਸਮਾਸਕਣ੍ਡ
ਅਥ ਨਾਮਮੇਵ ਅਞ੍ਞਮਞ੍ਞਸਮ੍ਬਨ੍ਧੀਨਂ ਸਮਾਸੋਤਿ ਨਾਮਨਿਸ੍ਸਿਤਤ੍ਤਾ, ਸਯਞ੍ਚ ਨਾਮਿਕਤ੍ਤਾ ਨਾਮਾਨਨ੍ਤਰਂ ਸਮਾਸੋ ਵੁਚ੍ਚਤੇ.
ਸੋ ਚ ਸਞ੍ਞਾਵਸੇਨ ਛਬ੍ਬਿਧੋ ਅਬ੍ਯਯੀਭਾਵੋ ਕਮ੍ਮਧਾਰਯੋ ਦਿਗੁ ਤਪ੍ਪੁਰਿਸੋ ਬਹੁਬ੍ਬੀਹਿ ਦ੍ਵਨ੍ਦੋ ਚਾਤਿ.
ਅਬ੍ਯਯੀਭਾਵਸਮਾਸ
ਤਤ੍ਰ ਪਠਮਂ ਅਬ੍ਯਯੀਭਾਵਸਮਾਸੋ ਵੁਚ੍ਚਤੇ;
ਸੋ ਚ ਨਿਚ੍ਚਸਮਾਸੋਤਿ ਅਸ੍ਸਪਦਵਿਗ੍ਗਹੋ.
‘‘ਉਪਨਗਰਂ’’ਇਤੀਧ – ਉਪਸਦ੍ਦਤੋ ਪਠਮੇਕਵਚਨਂ ਸਿ, ਤਸ੍ਸ ਉਪਸਗ੍ਗਪਰਤ੍ਤਾ ‘‘ਸਬ੍ਬਾਸਮਾਵੁਸੋਪਸਗ੍ਗਨਿਪਾਤਾਦੀਹਿ ਚਾ’’ਤਿ ਲੋਪੋ, ਨਗਰਸਦ੍ਦਤੋ ਛਟ੍ਠੇਕਵਚਨਂ ਸ, ਨਗਰਸ੍ਸ ਸਮੀਪਨ੍ਤਿ ਅਞ੍ਞਪਦੇਨ ਵਿਗ੍ਗਹੇ –
‘‘ਨਾਮਾਨਂ ਸਮਾਸੋ ਯੁਤ੍ਤਤ੍ਥੋ’’ਤਿ ਸਮਾਸਵਿਧਾਨੇ ਸਬ੍ਬਤ੍ਥ ਵਤ੍ਤਤੇ.
੩੩੦. ਉਪਸਗ੍ਗਨਿਪਾਤਪੁਬ੍ਬਕੋ ਅਬ੍ਯਯੀਭਾਵੋ.
ਉਪਸਗ੍ਗਪੁਬ੍ਬਕੋ, ਨਿਪਾਤਪੁਬ੍ਬਕੋ ਚ ਨਾਮਿਕੋ ਯੁਤ੍ਤਤ੍ਥੋ ਤੇਹੇਵ ਅਤ੍ਤਪੁਬ੍ਬਕੇਹਿ ਉਪਸਗ੍ਗਨਿਪਾਤੇਹਿ ਸਹ ਨਿਚ੍ਚਂ ਸਮਸੀਯਤੇ, ਸੋ ਚ ਸਮਾਸੋ ਅਬ੍ਯਯੀਭਾਵਸਞ੍ਞੋ ਹੋਤਿ. ਇਧ ਅਬ੍ਯਯੀਭਾਵਾਦਿਸਞ੍ਞਾਵਿਧਾਯਕਸੁਤ੍ਤਾਨੇਵ ਵਾ ਸਞ੍ਞਾਵਿਧਾਨਮੁਖੇਨ ਸਮਾਸਵਿਧਾਯਕਾਨੀਤਿ ਦਟ੍ਠਬ੍ਬਾਨਿ.
ਤਤ੍ਥ ਅਬ੍ਯਯਮਿਤਿ ਉਪਸਗ੍ਗਨਿਪਾਤਾਨਂ ਸਞ੍ਞਾ, ਲਿਙ੍ਗਵਚਨਭੇਦੇਪਿ ਬ੍ਯਯਰਹਿਤਤ੍ਤਾ, ਅਬ੍ਯਯਾਨਂ ਅਤ੍ਥਂ ਵਿਭਾਵਯਤੀਤਿ ਅਬ੍ਯਯੀਭਾਵੋ ਅਬ੍ਯਯਤ੍ਥਪੁਬ੍ਬਙ੍ਗਮਤ੍ਤਾ, ਅਨਬ੍ਯਯਂ ਅਬ੍ਯਯਂ ਭਵਤੀਤਿ ਵਾ ਅਬ੍ਯਯੀਭਾਵੋ. ਪੁਬ੍ਬਪਦਤ੍ਥਪ੍ਪਧਾਨੋ ਹਿ ਅਬ੍ਯਯੀਭਾਵੋ, ਏਤ੍ਥ ਚ ‘‘ਉਪਸਗ੍ਗਨਿਪਾਤਪੁਬ੍ਬਕੋ’’ਤਿ ਵੁਤ੍ਤਤ੍ਤਾ ਉਪਸਗ੍ਗਨਿਪਾਤਾਨਮੇਵ ਪੁਬ੍ਬਨਿਪਾਤੋ.
੩੩੧. ਨਾਮਾਨਂ ਸਮਾਸੋ ਯੁਤ੍ਤਤ੍ਥੋ.
ਤੇਸਂ ਨਾਮਾਨਂ ਪਯੁਜ੍ਜਮਾਨਪਦਤ੍ਥਾਨਂ ਯੋ ਯੁਤ੍ਤਤ੍ਥੋ, ਸੋ ਸਮਾਸਸਞ੍ਞੋ ਹੋਤਿ, ਤਦਞ੍ਞਂ ਵਾਕ੍ਯਮਿਤਿ ਰੁਲ਼੍ਹਂ.
ਨਾਮਾਨਿ ਸ੍ਯਾਦਿਵਿਭਤ੍ਯਨ੍ਤਾਨਿ, ਸਮਸ੍ਸਤੇਤਿ ਸਮਾਸੋ, ਸਙ੍ਖਿਪਿਯਤੀਤਿ ਅਤ੍ਥੋ.
ਵੁਤ੍ਤਞ੍ਹਿ
‘‘ਸਮਾਸੋ ਪਦਸਙ੍ਖੇਪੋ, ਪਦਪ੍ਪਚ੍ਚਯਸਂਹਿਤਂ;
ਤਦ੍ਧਿਤਂ ਨਾਮ ਹੋਤੇਵਂ, ਵਿਞ੍ਞੇਯ੍ਯਂ ਤੇਸਮਨ੍ਤਰ’’ਨ੍ਤਿ.
ਦੁਵਿਧਞ੍ਚਸ੍ਸ ਸਮਸਨਂ ਸਦ੍ਦਸਮਸਨਮਤ੍ਥਸਮਸਨਞ੍ਚ, ਤਦੁਭਯਮ੍ਪਿ ਲੁਤ੍ਤਸਮਾਸੇ ਪਰਿਪੁਣ੍ਣਮੇਵ ਲਬ੍ਭਤਿ. ਅਲੁਤ੍ਤਸਮਾਸੇ ਪਨ ਅਤ੍ਥਸਮਸਨਮੇਵ ਵਿਭਤ੍ਤਿਲੋਪਾਭਾਵਤੋ, ਤਤ੍ਥਾਪਿ ਵਾ ਏਕਪਦਤ੍ਤੂਪਗਮਨਤੋ ਦੁਵਿਧਮ੍ਪਿ ਲਬ੍ਭਤੇਵ. ਦ੍ਵੇ ਹਿ ਸਮਾਸਸ੍ਸ ਪਯੋਜਨਾਨਿ ਏਕਪਦਤ੍ਤਮੇਕਵਿਭਤ੍ਤਿਤ੍ਤਞ੍ਚਾਤਿ.
ਯੁਤ੍ਤੋ ਅਤ੍ਥੋ ਯੁਤ੍ਤਤ੍ਤੋ, ਅਥ ਵਾ ਯੁਤ੍ਤੋ ਸਙ੍ਗਤੋ, ਸਮ੍ਬਨ੍ਧੋ ਵਾ ਅਤ੍ਥੋ ਯਸ੍ਸ ਸੋਯਂ ਯੁਤ੍ਤਤ੍ਥੋ, ਏਤੇਨ ਸਙ੍ਗਤਤ੍ਥੇਨ ਯੁਤ੍ਤਤ੍ਥਵਚਨੇਨ ਭਿਨ੍ਨਤ੍ਥਾਨਂ ਏਕਤ੍ਥੀਭਾਵੋ ਸਮਾਸਲਕ੍ਖਣਨ੍ਤਿ ਵੁਤ੍ਤਂ ਹੋਤਿ. ਏਤ੍ਥ ਚ ‘‘ਨਾਮਾਨ’’ਨ੍ਤਿ ਵਚਨੇਨ ‘‘ਦੇਵਦਤ੍ਤੋ ਪਚਤੀ’’ਤਿਆਦੀਸੁ ਆਖ੍ਯਾਤੇਨ ਸਮਾਸੋ ਨ ਹੋਤੀਤਿ ਦਸ੍ਸੇਤਿ. ਸਮ੍ਬਨ੍ਧਤ੍ਥੇਨ ਪਨ ਯੁਤ੍ਤਤ੍ਥਗ੍ਗਹਣੇਨ ‘‘ਭਟੋ ਰਞ੍ਞੋ ਪੁਤ੍ਤੋ ਦੇਵਦਤ੍ਤਸ੍ਸਾ’’ਤਿਆਦੀਸੁ ਅਞ੍ਞਮਞ੍ਞਾਨਪੇਕ੍ਖੇਸੁ, ‘‘ਦੇਵਦਤ੍ਤਸ੍ਸ ਕਣ੍ਹਾ ਦਨ੍ਤਾ’’ਤਿਆਦੀਸੁ ਚ ਅਞ੍ਞਸਾਪੇਕ੍ਖੇਸੁ ਅਯੁਤ੍ਤਤ੍ਥਤਾਯ ਸਮਾਸੋ ਨ ਹੋਤੀਤਿ ਦੀਪੇਤਿ.
‘‘ਅਤ੍ਥਵਸਾ ਵਿਭਤ੍ਤਿਵਿਪਰਿਣਾਮੋ’’ਤਿ ਵਿਪਰਿਣਾਮੇਨ ‘‘ਯੁਤ੍ਤਤ੍ਥਾਨ’’ਨ੍ਤਿ ਵਤ੍ਤਤੇ.
੩੩੨. ਤੇਸਂ ਵਿਭਤ੍ਤਿਯੋ ਲੋਪਾ ਚ.
ਇਧ ਪਦਨ੍ਤਰੇਨ ਵਾ ਤਦ੍ਧਿਤਪ੍ਪਚ੍ਚਯੇਹਿ ਵਾ ਆਯਾਦਿਪ੍ਪਚ੍ਚਯੇਹਿ ਵਾ ਏਕਤ੍ਥੀਭੂਤਾ ਯੁਤ੍ਤਤ੍ਥਾ ਨਾਮ, ਤੇਨ ‘‘ਤੇਸਂ ਯੁਤ੍ਤਤ੍ਥਾਨਂ ਸਮਾਸਾਨਂ, ਤਦ੍ਧਿਤਾਯਾਦਿਪ੍ਪਚ੍ਚਯਨ੍ਤਾਨਞ੍ਚ ਵਿਭਤ੍ਤਿਯੋ ਲੋਪਨੀਯਾ ਹੋਨ੍ਤੀ’’ਤਿ ਅਤ੍ਥੋ. ਸਮਾਸਗ੍ਗਹਣਾਧਿਕਾਰੇ ਪਨ ਸਤਿ ਤੇਸਂਗਹਣੇਨ ਵਾ ਤਦ੍ਧਿਤਾਯਾਦਿਪ੍ਪਚ੍ਚਯਨ੍ਤ ਵਿਭਤ੍ਤਿਲੋਪੋ. ਚਗ੍ਗਹਣਂ ‘‘ਪਭਙ੍ਕਰੋ’’ਤਿਆਦੀਸੁ ਲੋਪਨਿਵਤ੍ਤਨਤ੍ਥਂ.
ਵਿਪਰਿਣਾਮੇਨ ‘‘ਲੁਤ੍ਤਾਸੁ, ਵਿਭਤ੍ਤੀਸੂ’’ਤਿ ਵਤ੍ਤਤੇ, ਯੁਤ੍ਤਤ੍ਥਗ੍ਗਹਣਞ੍ਚ.
੩੩੩. ਪਕਤਿ ਚਸ੍ਸ ਸਰਨ੍ਤਸ੍ਸ.
ਲੁਤ੍ਤਾਸੁ ਵਿਭਤ੍ਤੀਸੁ ਸਰਨ੍ਤਸ੍ਸ ਅਸ੍ਸ ਯੁਤ੍ਤਤ੍ਥਭੂਤਸ੍ਸ ਤਿਵਿਧਸ੍ਸਪਿ ਲਿਙ੍ਗਸ੍ਸ ਪਕਤਿਭਾਵੋ ਹੋਤਿ. ਚਸਦ੍ਦੇਨ ਕਿਂਸਮੁਦਯ ਇਦਪ੍ਪਚ੍ਚਯਤਾਦੀਸੁ ਨਿਗ੍ਗਹੀਤਨ੍ਤਸ੍ਸਪਿ. ਨਿਮਿਤ੍ਤਾਭਾਵੇ ਨੇਮਿਤ੍ਤਕਾਭਾਵਸ੍ਸ ਇਧ ਅਨਿਚ੍ਛਿਤਤ੍ਤਾ ਅਯਮਤਿਦੇਸੋ.
ਸਕਤ੍ਥਵਿਰਹੇਨਿਧ ਸਮਾਸਸ੍ਸ ਚ ਲਿਙ੍ਗਭਾਵਾਭਾਵਾ ਵਿਭਤ੍ਤੁਪ੍ਪਤ੍ਤਿਯਮਸਮ੍ਪਤ੍ਤਾਯਂ ਨਾਮਬ੍ਯਪਦੇਸਾਤਿਦੇਸਮਾਹ.
੩੩੪. ਤਦ੍ਧਿਤਸਮਾਸਕਿਤਕਾ ਨਾਮਂਵਾ’ਤਵੇਤੁਨਾਦੀਸੁ ਚ.
ਤਦ੍ਧਿਤਨ੍ਤਾ, ਕਿਤਨ੍ਤਾ, ਸਮਾਸਾ ਚ ਨਾਮਮਿਵ ਦਟ੍ਠਬ੍ਬਾ ਤਵੇਤੁਨ ਤ੍ਵਾਨ ਤ੍ਵਾਦਿਪ੍ਪਚ੍ਚਯਨ੍ਤੇ ਵਜ੍ਜੇਤ੍ਵਾ. ਚਗ੍ਗਹਣਂ ਕਿਚ੍ਚਪ੍ਪਚ੍ਚਯਆਈਇਨੀਇਤ੍ਥਿਪ੍ਪਚ੍ਚਯਨ੍ਤਾਦਿਸ੍ਸਪਿ ਨਾਮਬ੍ਯਪਦੇਸਤ੍ਥਂ. ਇਧ ਸਮਾਸਗ੍ਗਹਣਂ ਅਤ੍ਥਵਤਂ ਸਮੁਦਾਯਾਨਂ ਨਾਮਬ੍ਯਪਦੇਸੋ ਸਮਾਸਸ੍ਸੇਵਾਤਿ ਨਿਯਮਤ੍ਥਨ੍ਤਿ ਅਪਰੇ.
‘‘ਅਬ੍ਯਯੀਭਾਵੋ’’ਤਿ ਵਤ੍ਤਤੇ.
੩੩੫. ਸੋ ਨਪੁਂਸਕਲਿਙ੍ਗੋ.
ਸੋ ਅਬ੍ਯਯੀਭਾਵਸਮਾਸੋ ਨਪੁਂਸਕਲਿਙ੍ਗੋਵ ਦਟ੍ਠਬ੍ਬੋਤਿ ਨਪੁਂਸਕਲਿਙ੍ਗਤ੍ਤਂ. ਏਤ੍ਥ ਹਿ ਸਤਿਪਿ ਲਿਙ੍ਗਾਤਿਦੇਸੇ ‘‘ਅਧਿਪਞ੍ਞ’’ਨ੍ਤਿਆਦੀਸੁ ‘‘ਅਧਿਞਾਣਂ’’ਨ੍ਤਿਆਦਿ ਰੂਪਪ੍ਪਸਙ੍ਗੋ ਨ ਹੋਤਿ ਸਦ੍ਦਨ੍ਤਰਤ੍ਤਾ, ‘‘ਤਿਪਞ੍ਞ’’ਨ੍ਤਿਆਦੀਸੁ ਵਿਯਾਤਿ ਦਟ੍ਠਬ੍ਬਂ, ਨ ਚਾਯਂ ਅਤਿਦੇਸੋ, ਸੁਤ੍ਤੇ ਅਤਿਦੇਸਲਿਙ੍ਗਸ੍ਸ ਇਵਸਦ੍ਦਸ੍ਸ ਅਦਸ੍ਸਨਤੋ. ਪੁਰੇ ਵਿਯ ਸ੍ਯਾਦ੍ਯੁਪ੍ਪਤ੍ਤਿ.
‘‘ਕ੍ਵਚੀ’’ਤਿ ਵਤ੍ਤਤੇ.
੩੩੬. ਅਂ ਵਿਭਤ੍ਤੀਨਮਕਾਰਨ੍ਤਾ ਅਬ੍ਯਯੀਭਾਵਾ.
ਤਸ੍ਮਾ ਅਕਾਰਨ੍ਤਾ ਅਬ੍ਯਯੀਭਾਵਾ ਪਰਾਸਂ ਵਿਭਤ੍ਤੀਨਂ ਕ੍ਵਚਿ ਅਂ ਹੋਤਿ, ਸੇਸਂ ਨੇਯ੍ਯਂ.
ਤਂ ਉਪਨਗਰਂ, ਨਗਰਸ੍ਸ ਸਮੀਪਂ ਤਿਟ੍ਠਤੀਤਿ ਅਤ੍ਥੋ. ਤਾਨਿ ਉਪਨਗਰਂ, ਆਲਪਨੇਪੇਵਂ, ਤਂ ਉਪਨਗਰਂ ਪਸ੍ਸ, ਤਾਨਿ ਉਪਨਗਰਂ.
ਨ ਪਞ੍ਚਮ੍ਯਾਯਮਮ੍ਭਾਵੋ, ਕ੍ਵਚੀਤਿ ਅਧਿਕਾਰਤੋ;
ਤਤਿਯਾਸਤ੍ਤਮੀਛਟ੍ਠੀ-ਨਨ੍ਤੁ ਹੋਤਿ ਵਿਕਪ੍ਪਤੋ.
ਤੇਨ ਉਪਨਗਰਂ ਕਤਂ, ਉਪਨਗਰੇਨ ਵਾ, ਤੇਹਿ ਉਪਨਗਰਂ, ਉਪਨਗਰੇਹਿ ਵਾ, ਤਸ੍ਸ ਉਪਨਗਰਂ ਦੇਹਿ, ਤੇਸਂ ਉਪਨਗਰਂ, ਉਪਨਗਰਾ ਆਨਯ, ਉਪਨਗਰਮ੍ਹਾ ਉਪਨਗਰਸ੍ਮਾ, ਉਪਨਗਰੇਹਿ, ਉਪਨਗਰਂ ਸਨ੍ਤਕਂ, ਉਪਨਗਰਸ੍ਸ ਵਾ, ਤੇਸਂ ਉਪਨਗਰਂ, ਉਪਨਗਰਾਨਂ ਵਾ, ਉਪਨਗਰਂ ਨਿਧੇਹਿ, ਉਪਨਗਰਮ੍ਹਿ ਉਪਨਗਰਸ੍ਮਿਂ, ਉਪਨਗਰਂ ਉਪਨਗਰੇਸੁ ਵਾ. ਏਵਂ ਉਪਕੁਮ੍ਭਂ.
ਅਭਾਵੇ – ਦਰਥਾਨਂ ਅਭਾਵੋ ਨਿਦ੍ਦਰਥਂ, ਨਿਮ੍ਮਸਕਂ.
ਪਚ੍ਛਾਅਤ੍ਥੇ – ਰਥਸ੍ਸ ਪਚ੍ਛਾ ਅਨੁਰਥਂ, ਅਨੁਵਾਤਂ.
ਯੋਗ੍ਗਤਾਯਂ – ਯਥਾਸਰੂਪਂ, ਅਨੁਰੂਪਂ, ਰੂਪਯੋਗ੍ਗਨ੍ਤਿ ਅਤ੍ਥੋ.
ਵਿਚ੍ਛਾਯਂ – ਅਤ੍ਤਾਨਮਤ੍ਤਾਨਂ ਪਤਿ ਪਚ੍ਚਤ੍ਤਂ, ਅਦ੍ਧਮਾਸਂ ਅਦ੍ਧਮਾਸਂ ਅਨੁ ਅਨ੍ਵਦ੍ਧਮਾਸਂ.
ਅਨੁਪੁਬ੍ਬਿਯਂ – ਜੇਟ੍ਠਾਨਂ ਅਨੁਪੁਬ੍ਬੋ ਅਨੁਜੇਟ੍ਠਂ.
ਪਟਿਲੋਮੇ – ਸੋਤਸ੍ਸ ਪਟਿਲੋਮਂ ਪਟਿਸੋਤਂ, ਪਟਿਪਥਂ, ਪਤਿਵਾਤਂ, ਅਤ੍ਤਾਨਂ ਅਧਿਕਿਚ੍ਚ ਪਵਤ੍ਤਾ ਅਜ੍ਝਤ੍ਤਂ.
ਪਰਿਯਾਦਾਭਿਵਿਧੀਸੁ ਆਪਾਣਕੋਟਿਯਾ ਆਪਾਣਕੋਟਿਕਂ, ‘‘ਕ੍ਵਚਿ ਸਮਾਸਨ੍ਤਗਤਾਨਮਕਾਰਨ੍ਤੋ’’ਤਿ ਕਪ੍ਪਚ੍ਚਯੋ, ਆਕੁਮਾਰੇਹਿ ਯਸੋ ਕਚ੍ਚਾਯਨਸ੍ਸ ਆਕੁਮਾਰਂ.
ਸਮਿਦ੍ਧਿਯਂ – ਭਿਕ੍ਖਾਯ ਸਮਿਦ੍ਧੀਤਿ ਅਤ੍ਥੇ ਸਮਾਸੇਵ ਨਪੁਂਸਕਲਿਙ੍ਗਤ੍ਤੇ ਚ ਕਤੇ –
‘‘ਸਮਾਸਸ੍ਸ, ਅਨ੍ਤੋ’’ਤਿ ਚ ਵਤ੍ਤਤੇ.
੩੩੭. ਸਰੋ ਰਸ੍ਸੋ ਨਪੁਂਸਕੇ.
ਨਪੁਂਸਕੇ ਵਤ੍ਤਮਾਨਸ੍ਸ ਸਮਾਸਸ੍ਸ ਅਨ੍ਤੋ ਸਰੋ ਰਸ੍ਸੋ ਹੋਤਿ. ਏਤ੍ਥ ਚ ਅਬ੍ਯਯੀਭਾਵਗ੍ਗਹਣਂ ਨਾਨੁਵਤ੍ਤੇਤਬ੍ਬਂ, ਤੇਨ ਦਿਗੁਦ੍ਵਨ੍ਦਬਹੁਬ੍ਬੀਹੀਸੁਪਿ ਨਪੁਂਸਕੇ ਵਤ੍ਤਮਾਨਸ੍ਸ ਸਮਾਸਨ੍ਤਸ੍ਸਰਸ੍ਸ ਰਸ੍ਸਤ੍ਤਂ ਸਿਦ੍ਧਂ ਹੋਤਿ. ‘‘ਅਂ ਵਿਭਤ੍ਤੀਨ’’ਮਿਚ੍ਚਾਦਿਨਾ ਅਮਾਦੇਸੋ, ਸੁਭਿਕ੍ਖਂ. ਗਙ੍ਗਾਯ ਸਮੀਪੇ ਵਤ੍ਤਤੀਤਿ ਉਪਗਙ੍ਗਂ, ਮਣਿਕਾਯ ਸਮੀਪਂ ਉਪਮਣਿਕਂ.
ਇਤ੍ਥੀਸੁ ਅਮਿਕਿਚ੍ਚਾਤਿ ਅਤ੍ਥੇ ਸਮਾਸਨਪੁਂਸਕਰਸ੍ਸਤ੍ਤਾਦੀਸੁ ਕਤੇਸੁ –
‘‘ਅਬ੍ਯਯੀਭਾਵਾ, ਵਿਭਤ੍ਤੀਨ’’ਨ੍ਤਿ ਚ ਵਤ੍ਤਤੇ.
੩੩੮. ਅਞ੍ਞਸ੍ਮਾ ਲੋਪੋ ਚ.
ਅਕਾਰਨ੍ਤਤੋ ਅਞ੍ਞਸ੍ਮਾ ਅਬ੍ਯਯੀਭਾਵਸਮਾਸਾ ਪਰਾਸਂ ਵਿਭਤ੍ਤੀਨਂ ਲੋਪੋ ਚ ਹੋਤਿ. ਅਧਿਤ੍ਤਿ, ਇਤ੍ਥੀਸੁ ਅਧਿਕਿਚ੍ਚ ਕਥਾ ਪਵਤ੍ਤਤੀਤਿ ਅਤ੍ਥੋ. ਅਧਿਤ੍ਥਿ ਪਸ੍ਸ, ਅਧਿਤ੍ਥਿ ਕਤਂ ਇਚ੍ਚਾਦਿ, ਏਵਂ ਅਧਿਕੁਮਾਰਿ, ਵਧੁਯਾ ਸਮੀਪਂ ਉਪਵਧੁ, ਗੁਨ੍ਨਂ ਸਮੀਪਂ ਉਪਗੁ, ਓਕਾਰਸ੍ਸ ਰਸ੍ਸਤ੍ਤਂ ਉਕਾਰੋ. ਏਵਂ ਉਪਸਗ੍ਗਪੁਬ੍ਬਕੋ.
ਨਿਪਾਤਪੁਬ੍ਬਕੋ ਯਥਾ – ਵੁਡ੍ਢਾਨਂ ਪਟਿਪਾਟਿ, ਯੇ ਯੇ ਵੁਡ੍ਢਾ ਵਾ ਯਥਾਵੁਡ੍ਢਂ, ਪਦਤ੍ਥਾਨਤਿਕ੍ਕਮੇ – ਯਥਾਕ੍ਕਮਂ, ਯਥਾਸਤ੍ਤਿ, ਯਥਾਬਲਂ ਕਰੋਤਿ, ਬਲਮਨਤਿਕ੍ਕਮਿਤ੍ਵਾ ਕਰੋਤੀਤਿ ਅਤ੍ਥੋ. ਜੀਵਸ੍ਸ ਯਤ੍ਤਕੋ ਪਰਿਚ੍ਛੇਦੋ ਯਾਵਜੀਵਂ, ਯਾਵਤਾਯੁਕਂ, ਕਪ੍ਪਚ੍ਚਯੋ. ਯਤ੍ਤਕੇਨ ਅਤ੍ਥੋ ਯਾਵਦਤ੍ਥਂ, ਪਬ੍ਬਤਸ੍ਸ ਪਰਭਾਗੋ ਤਿਰੋਪਬ੍ਬਤਂ, ਤਿਰੋਪਾਕਾਰਂ, ਤਿਰੋਕੁਟ੍ਟਂ, ਪਾਸਾਦਸ੍ਸ ਅਨ੍ਤੋ ਅਨ੍ਤੋਪਾਸਾਦਂ, ਅਨ੍ਤੋਨਗਰਂ, ਅਨ੍ਤੋਵਸ੍ਸਂ, ਨਗਰਸ੍ਸ ਬਹਿ ਬਹਿਨਗਰਂ, ਪਾਸਾਦਸ੍ਸ ਉਪਰਿ ਉਪਰਿਪਾਸਾਦਂ, ਉਪਰਿਮਞ੍ਚਂ, ਮਞ੍ਚਸ੍ਸ ਹੇਟ੍ਠਾ ਹੇਟ੍ਠਾਮਞ੍ਚਂ, ਹੇਟ੍ਠਾਪਾਸਾਦਂ, ਭਤ੍ਤਸ੍ਸ ਪੁਰੇ ਪੁਰੇਭਤ੍ਤਂ, ਏਵਂ ਪਚ੍ਛਾਭਤ੍ਤਂ.
ਸਾਕਲ੍ਲਤ੍ਥੇ – ਸਹ ਮਕ੍ਖਿਕਾਯ ਸਮਕ੍ਖਿਕਂ ਭੁਞ੍ਜਤਿ, ਨ ਕਿਞ੍ਚਿ ਪਰਿਵਜ੍ਜੇਤੀਤਿ ਅਤ੍ਥੋ. ‘‘ਤੇਸੁ ਵੁਦ੍ਧੀ’’ਤਿਆਦਿਨਾ ਸਹਸਦ੍ਦਸ੍ਸ ਸਾਦੇਸੋ. ਗਙ੍ਗਾਯ ਓਰਂ ਓਰਗਙ੍ਗਮਿਚ੍ਚਾਦਿ.
ਅਬ੍ਯਯੀਭਾਵਸਮਾਸੋ ਨਿਟ੍ਠਿਤੋ.
ਕਮ੍ਮਧਾਰਯਸਮਾਸ
ਅਥ ਕਮ੍ਮਧਾਰਯਸਮਾਸੋ ਵੁਚ੍ਚਤੇ.
ਸੋ ਚ ਨਵਵਿਧੋ ਵਿਸੇਸਨਪੁਬ੍ਬਪਦੋ ਵਿਸੇਸਨੁਤ੍ਤਰਪਦੋ ਵਿਸੇਸਨੋਭਯਪਦੋ ਉਪਮਾਨੁਤ੍ਤਰਪਦੋ ਸਮ੍ਭਾਵਨਾਪੁਬ੍ਬਪਦੋ ਅਵਧਾਰਣਪੁਬ੍ਬਪਦੋ ਨਨਿਪਾਤਪੁਬ੍ਬਪਦੋ ਕੁਪੁਬ੍ਬਪਦੋ ਪਾਦਿਪੁਬ੍ਬਪਦੋ ਚਾਤਿ.
ਤਤ੍ਥ ਵਿਸੇਸਨਪੁਬ੍ਬਪਦੋ ਤਾਵ – ‘‘ਮਹਨ੍ਤ ਪੁਰਿਸ’’ਇਤੀਧ ਉਭਯਤ੍ਥ ਪਠਮੇਕਵਚਨਂ ਸਿ, ਤੁਲ੍ਯਾਧਿਕਰਣਭਾਵਪ੍ਪਸਿਦ੍ਧਤ੍ਥਂ ਚਸਦ੍ਦ ਤਸਦ੍ਦਪ੍ਪਯੋਗੋ, ਮਹਨ੍ਤੋ ਚ ਸੋ ਪੁਰਿਸੋ ਚਾਤਿ ਵਿਗ੍ਗਹੇ –
ਇਤੋ ਪਰਂ ‘‘ਵਿਭਾਸਾ ਰੁਕ੍ਖਤਿਣ’’ਇਚ੍ਚਾਦਿਤੋ ‘‘ਵਿਭਾਸਾ’’ਤਿ ਸਮਾਸਵਿਧਾਨੇ ਸਬ੍ਬਤ੍ਥ ਵਤ੍ਤਤੇ.
੩੩੯. ਦ੍ਵਿਪਦੇ ਤੁਲ੍ਯਾਧਿਕਰਣੇ ਕਮ੍ਮਧਾਰਯੋ.
ਦ੍ਵੇ ਪਦਾਨਿ ਨਾਮਿਕਾਨਿ ਤੁਲ੍ਯਾਧਿਕਰਣਾਨਿ ਅਞ੍ਞਮਞ੍ਞੇਨ ਸਹ ਵਿਭਾਸਾ ਸਮਸ੍ਯਨ੍ਤੇ, ਤਸ੍ਮਿਂ ਦ੍ਵਿਪਦੇ ਤੁਲ੍ਯਾਧਿਕਰਣੇ ਸਤਿ ਸੋ ਸਮਾਸੋ ਕਮ੍ਮਧਾਰਯਸਞ੍ਞੋ ਚ ਹੋਤਿ.
ਦ੍ਵੇ ਪਦਾਨਿ ਦ੍ਵਿਪਦਂ, ਤੁਲ੍ਯਂ ਸਮਾਨਂ ਅਧਿਕਰਣਂ ਅਤ੍ਥੋ ਯਸ੍ਸ ਪਦਦ੍ਵਯਸ੍ਸ ਤਂ ਤੁਲ੍ਯਾਧਿਕਰਣਂ, ਤਸ੍ਮਿਂ ਦ੍ਵਿਪਦੇ ਤੁਲ੍ਯਾਧਿਕਰਣੇ. ਭਿਨ੍ਨਪ੍ਪਵਤ੍ਤਿਨਿਮਿਤ੍ਤਾਨਂ ਦ੍ਵਿਨ੍ਨਂ ਪਦਾਨਂ ਵਿਸੇਸਨਵਿਸੇਸਿਤਬ੍ਬਭਾਵੇਨ ਏਕਸ੍ਮਿਂ ਅਤ੍ਥੇ ਪਵਤ੍ਤਿ ਤੁਲ੍ਯਾਧਿਕਰਣਤਾ. ਕਮ੍ਮਮਿਵ ਦ੍ਵਯਂ ਧਾਰਯਤੀਤਿ ਕਮ੍ਮਧਾਰਯੋ. ਯਥਾ ਹਿ ਕਮ੍ਮਂ ਕ੍ਰਿਯਞ੍ਚ ਪਯੋਜਨਞ੍ਚ ਦ੍ਵਯਂ ਧਾਰਯਤਿ, ਕਮ੍ਮੇ ਸਤਿ ਕ੍ਰਿਯਾਯ, ਪਯੋਜਨਸ੍ਸ ਚ ਸਮ੍ਭਵਤੋ, ਤਥਾ ਅਯਂ ਸਮਾਸੋ ਏਕਸ੍ਸ ਅਤ੍ਥਸ੍ਸ ਦ੍ਵੇ ਨਾਮਾਨਿ ਧਾਰਯਤਿ, ਤਸ੍ਮਿਂ ਸਮਾਸੇ ਸਤਿ ਏਕਤ੍ਥਜੋਤਕਸ੍ਸ ਨਾਮਦ੍ਵਯਸ੍ਸ ਸਮ੍ਭਵਤੋ.
ਪੁਰੇ ਵਿਯ ਸਮਾਸਸਞ੍ਞਾਵਿਭਤ੍ਤਿਲੋਪਪਕਤਿਭਾਵਾ, ਸਮਾਸੇਨੇਵ ਤੁਲ੍ਯਾਧਿਕਰਣਭਾਵਸ੍ਸ ਵੁਤ੍ਤਤ੍ਤਾ ‘‘ਵੁਤ੍ਤਤ੍ਥਾਨਮਪ੍ਪਯੋਗੋ’’ਤਿ ਚਸਦ੍ਦ ਤਸਦ੍ਦਾਨਮਪ੍ਪਯੋਗੋ.
੩੪੦. ਮਹਤਂ ਮਹਾ ਤੁਲ੍ਯਾਧਿਕਰਣੇ ਪਦੇ.
ਮਹਨ੍ਤ ਸਦ੍ਦਸ੍ਸ ਮਹਾ ਹੋਤਿ ਤੁਲ੍ਯਾਧਿਕਰਣੇ ਉਤ੍ਤਰਪਦੇ ਪਰੇ. ਮਹਤਨ੍ਤਿ ਬਹੁਵਚਨਗ੍ਗਹਣੇਨ ਕ੍ਵਚਿ ਮਹਆਦੇਸੋ ਚ, ਏਤ੍ਥ ਚ ਵਿਸੇਸਨਸ੍ਸ ਪੁਬ੍ਬਨਿਪਾਤੋ ਵਿਸੇਸਨਭੂਤਸ੍ਸ ਪੁਬ੍ਬਪਦਸ੍ਸ ਮਹਾਦੇਸਵਿਧਾਨਤੋਵ ਵਿਞ੍ਞਾਯਤਿ.
‘‘ਕਮ੍ਮਧਾਰਯੋ, ਦਿਗੂ’’ਤਿ ਚ ਵਤ੍ਤਤੇ.
੩੪੧. ਉਭੇ ਤਪ੍ਪੁਰਿਸਾ.
ਉਭੇ ਕਮ੍ਮਧਾਰਯਦਿਗੁਸਮਾਸਾ ਤਪ੍ਪੁਰਿਸਸਞ੍ਞਾ ਹੋਨ੍ਤਿ.
ਤਸ੍ਸ ਪੁਰਿਸੋ ਤਪ੍ਪੁਰਿਸੋ, ਤਪ੍ਪੁਰਿਸਸਦਿਸਤ੍ਤਾ ਅਯਮ੍ਪਿ ਸਮਾਸੋ ਅਨ੍ਵਤ੍ਥਸਞ੍ਞਾਯ ਤਪ੍ਪੁਰਿਸੋਤਿ ਵੁਤ੍ਤੋ. ਯਥਾ ਹਿ ਤਪ੍ਪੁਰਿਸਸਦ੍ਦੋ ਗੁਣਮਤਿਵਤ੍ਤੋ, ਤਥਾ ਅਯਂ ਸਮਾਸੋਪਿ. ਉਤ੍ਤਰਪਦਤ੍ਥਪ੍ਪਧਾਨੋ ਹਿ ਤਪ੍ਪੁਰਿਸੋਤਿ. ਤਤੋ ਨਾਮਬ੍ਯਪਦੇਸੋ ਸ੍ਯਾਦ੍ਯੁਪ੍ਪਤ੍ਤਿ. ਅਯਂ ਪਨ ਤਪ੍ਪੁਰਿਸੋ ਅਭਿਧੇਯ੍ਯਵਚਨੋ, ਪਰਲਿਙ੍ਗੋ ਚ.
ਮਹਾਪੁਰਿਸੋ, ਮਹਾਪੁਰਿਸਾ ਇਚ੍ਚਾਦਿ ਪੁਰਿਸਸਦ੍ਦਸਮਂ, ਏਵਂ ਮਹਾਵੀਰੋ, ਮਹਾਮੁਨਿ, ਮਹਨ੍ਤਞ੍ਚ ਤਂ ਬਲਞ੍ਚਾਤਿ ਮਹਾਬਲਂ, ਮਹਬ੍ਭਯਂ, ਮਹਆਦੇਸੋ. ਸਨ੍ਤੋ ਚ ਸੋ ਪੁਰਿਸੋ ਚਾਤਿ ਸਪ੍ਪੁਰਿਸੋ, ‘‘ਸਨ੍ਤਸਦ੍ਦਸ੍ਸ ਸੋ ਭੇ ਬੋ ਚਨ੍ਤੇ’’ਤਿ ਏਤ੍ਥ ਚਸਦ੍ਦੇਨ ਸਨ੍ਤਸਦ੍ਦਸ੍ਸ ਸਮਾਸੇ ਅਭਕਾਰੇਪਿ ਸਾਦੇਸੋ, ਤਥਾ ਪੁਬ੍ਬਪੁਰਿਸੋ, ਪਰਪੁਰਿਸੋ, ਪਠਮਪੁਰਿਸੋ, ਮਜ੍ਝਿਮਪੁਰਿਸੋ, ਉਤ੍ਤਮਪੁਰਿਸੋ, ਦਨ੍ਤਪੁਰਿਸੋ, ਪਰਮਪੁਰਿਸੋ, ਵੀਰਪੁਰਿਸੋ, ਸੇਤਹਤ੍ਥੀ, ਕਣ੍ਹਸਪ੍ਪੋ, ਨੀਲੁਪ੍ਪਲਂ, ਲੋਹਿਤਚਨ੍ਦਨਂ.
ਕ੍ਵਚਿ ਵਿਭਾਸਾਧਿਕਾਰਤੋ ਨ ਭਵਤਿ, ਯਥਾ – ਪੁਣ੍ਣੋ ਮਨ੍ਤਾਨਿਪੁਤ੍ਤੋ, ਚਿਤ੍ਤੋ ਗਹਪਤਿ, ਸਕ੍ਕੋ ਦੇਵਰਾਜਾਤਿ.
ਪੁਮਾ ਚ ਸੋ ਕੋਕਿਲੋ ਚਾਤਿ ਅਤ੍ਥੇ ਸਮਾਸੇ ਕਤੇ –
‘‘ਲੋਪ’’ਨ੍ਤਿ ਵਤ੍ਤਤੇ.
੩੪੨. ਪੁਮਸ੍ਸ ਲਿਙ੍ਗਾਦੀਸੁ ਸਮਾਸੇਸੁ.
ਪੁਮਇਚ੍ਚੇਤਸ੍ਸ ਅਨ੍ਤੋ ਅਕਾਰੋ ਲੋਪਮਾਪਜ੍ਜਤੇ ਲਿਙ੍ਗਾਦੀਸੁ ਪਰਪਦੇਸੁ ਸਮਾਸੇਸੁ, ‘‘ਅਂਮੋ ਨਿਗ੍ਗਹੀਤਂ ਝਲਪੇਹੀ’’ਤਿ ਮਕਾਰਸ੍ਸ ਨਿਗ੍ਗਹੀਤਂ. ਪੁਙ੍ਕੋਕਿਲੋ. ਏਵਂ ਪੁਨ੍ਨਾਗੋ.
ਖਤ੍ਤਿਯਾ ਚ ਸਾ ਕਞ੍ਞਾ ਚਾਤਿ ਵਿਗ੍ਗਯ੍ਹ ਸਮਾਸੇ ਕਤੇ –
‘‘ਤੁਲ੍ਯਾਧਿਕਰਣੇ, ਪਦੇ, ਇਤ੍ਥਿਯਂ ਭਾਸਿਤਪੁਮਿਤ੍ਥੀ ਪੁਮਾਵ ਚੇ’’ਤਿ ਚ ਵਤ੍ਤਤੇ.
੩੪੩. ਕਮ੍ਮਧਾਰਯਸਞ੍ਞੇ ਚ.
ਕਮ੍ਮਧਾਰਯਸਞ੍ਞੇ ਚ ਸਮਾਸੇ ਇਤ੍ਥਿਯਂ ਵਤ੍ਤਮਾਨੇ ਤੁਲ੍ਯਾਧਿਕਰਣੇ ਉਤ੍ਤਰਪਦੇ ਪਰੇ ਪੁਬ੍ਬਭੂਤੋ ਇਤ੍ਥਿਵਾਚਕੋ ਸਦ੍ਦੋ ਪੁਬ੍ਬੇ ਭਾਸਿਤਪੁਮਾ ਚੇ, ਸੋ ਪੁਮਾ ਇਵ ਦਟ੍ਠਬ੍ਬੋਤਿ ਪੁਬ੍ਬਪਦੇ ਇਤ੍ਥਿਪ੍ਪਚ੍ਚਯਸ੍ਸ ਨਿਵਤ੍ਤਿ ਹੋਤਿ.
ਖਤ੍ਤਿਯਕਞ੍ਞਾ, ਖਤ੍ਤਿਯਕਞ੍ਞਾਯੋ ਇਚ੍ਚਾਦਿ. ਏਵਂ ਰਤ੍ਤਲਤਾ, ਦੁਤਿਯਭਿਕ੍ਖਾ, ਬ੍ਰਾਹ੍ਮਣੀ ਚ ਸਾ ਦਾਰਿਕਾ ਚਾਤਿ ਬ੍ਰਾਹ੍ਮਣਦਾਰਿਕਾ, ਨਾਗਮਾਣਵਿਕਾ.
ਪੁਬ੍ਬਪਦਸ੍ਸੇਵਾਯਂ ਪੁਮ੍ਭਾਵਾਤਿਦੇਸੋ, ਤੇਨ ‘‘ਖਤ੍ਤਿਯਕੁਮਾਰੀ ਕੁਮਾਰਸਮਣੀ ਤਰੁਣਬ੍ਰਾਹ੍ਮਣੀ’’ਤਿਆਦੀਸੁ ਉਤ੍ਤਰਪਦੇਸੁ ਇਤ੍ਥਿਪ੍ਪਚ੍ਚਯਸ੍ਸ ਨ ਨਿਵਤ੍ਤਿ ਹੋਤਿ.
ਇਤ੍ਥਿਯਮਿਚ੍ਚੇਵ ਕਿਂ? ਕੁਮਾਰੀਰਤਨਂ, ਸਮਣੀਪਦੁਮਂ.
ਭਾਸਿਤਪੁਮਾਤਿ ਕਿਂ? ਗਙ੍ਗਾਨਦੀ, ਤਣ੍ਹਾਨਦੀ, ਪਥਵੀਧਾਤੁ. ‘‘ਨਨ੍ਦਾਪੋਕ੍ਖਰਣੀ, ਨਨ੍ਦਾਦੇਵੀ’’ਤਿਆਦੀਸੁ ਪਨ ਸਞ੍ਞਾਸਦ੍ਦਤ੍ਤਾ ਨ ਹੋਤਿ.
ਤਥਾ ਪੁਰਤ੍ਥਿਮੋ ਚ ਸੋ ਕਾਯੋ ਚਾਤਿ ਪੁਰਤ੍ਥਿਮਕਾਯੋ, ਏਤ੍ਥ ਚ ਕਾਯੇਕਦੇਸੋ ਕਾਯਸਦ੍ਦੋ. ਏਵਂ ਪਚ੍ਛਿਮਕਾਯੋ, ਹੇਟ੍ਠਿਮਕਾਯੋ, ਉਪਰਿਮਕਾਯੋ, ਸਬ੍ਬਕਾਯੋ, ਪੁਰਾਣਵਿਹਾਰੋ, ਨਵਾਵਾਸੋ, ਕਤਰਨਿਕਾਯੋ, ਕਤਮਨਿਕਾਯੋ, ਹੇਤੁਪ੍ਪਚ੍ਚਯੋ, ਅਬਹੁਲਂ ਬਹੁਲਂ ਕਤਨ੍ਤਿ ਬਹੁਲੀਕਤਂ, ਜੀਵਿਤਪ੍ਪਧਾਨਂ ਨਵਕਂ ਜੀਵਿਤਨਵਕਂ ਇਚ੍ਚਾਦਿ.
ਵਿਸੇਸਨੁਤ੍ਤਰਪਦੇ ਜਿਨਵਚਨਾਨੁਪਰੋਧਤੋ ਥੇਰਾਚਰਿਯਪਣ੍ਡਿਤਾਦਿ ਵਿਸੇਸਨਂ ਪਰਞ੍ਚ ਭਵਤਿ. ਯਥਾ – ਸਾਰਿਪੁਤ੍ਤੋ ਚ ਸੋ ਥੇਰੋ ਚਾਤਿ ਸਾਰਿਪੁਤ੍ਤਤ੍ਥੇਰੋ. ਏਵਂ ਮਹਾਮੋਗ੍ਗਲ੍ਲਾਨਤ੍ਥੇਰੋ, ਮਹਾਕਸ੍ਸਪਤ੍ਥੇਰੋ, ਬੁਦ੍ਧਘੋਸਾਚਰਿਯੋ, ਧਮ੍ਮਪਾਲਾਚਰਿਯੋ, ਆਚਰਿਯਗੁਤ੍ਤਿਲੋਤਿ ਵਾ, ਮਹੋਸਧੋ ਚ ਸੋ ਪਣ੍ਡਿਤੋ ਚਾਤਿ ਮਹੋਸਧਪਣ੍ਡਿਤੋ. ਏਵਂ ਵਿਧੁਰਪਣ੍ਡਿਤੋ, ਵਤ੍ਥੁਵਿਸੇਸੋ.
ਵਿਸੇਸਨੋਭਯਪਦੋ ਯਥਾ – ਸੀਤਞ੍ਚ ਤਂ ਉਣ੍ਹਞ੍ਚਾਤਿ ਸੀਤੁਣ੍ਹਂ, ਸਿਨਿਦ੍ਧੋ ਚ ਸੋ ਉਣ੍ਹੋ ਚਾਤਿ ਸਿਨਿਦ੍ਧੁਣ੍ਹੋ, ਮਾਸੋ. ਖਞ੍ਜੋ ਚ ਸੋ ਖੁਜ੍ਜੋ ਚਾਤਿ ਖਞ੍ਜਖੁਜ੍ਜੋ. ਏਵਂ ਅਨ੍ਧਬਧਿਰੋ, ਕਤਾਕਤਂ, ਛਿਦ੍ਦਾਵਛਿਦ੍ਦਂ, ਉਚ੍ਚਾਵਚਂ, ਛਿਨ੍ਨਭਿਨ੍ਨਂ, ਸਿਤ੍ਤਸਮ੍ਮਟ੍ਠਂ, ਗਤਪਚ੍ਚਾਗਤਂ.
ਉਪਮਾਨੁਤ੍ਤਰਪਦੇ ਅਭਿਧਾਨਾਨੁਰੋਧਤੋ ਉਪਮਾਨਭੂਤਂ ਵਿਸੇਸਨਂ ਪਰਂ ਭਵਤਿ. ਯਥਾ – ਸੀਹੋ ਵਿਯ ਸੀਹੋ, ਮੁਨਿ ਚ ਸੋ ਸੀਹੋ ਚਾਤਿ ਮੁਨਿਸੀਹੋ. ਏਵਂ ਮੁਨਿਵਸਭੋ, ਮੁਨਿਪੁਙ੍ਗਵੋ, ਬੁਦ੍ਧਨਾਗੋ, ਬੁਦ੍ਧਾਦਿਚ੍ਚੋ, ਰਂਸਿ ਵਿਯ ਰਂਸਿ, ਸਦ੍ਧਮ੍ਮੋ ਚ ਸੋ ਰਂਸਿ ਚਾਤਿ ਸਦ੍ਧਮ੍ਮਰਂਸਿ. ਏਵਂ ਵਿਨਯਸਾਗਰੋ, ਪੁਣ੍ਡਰੀਕਮਿਵ ਪੁਣ੍ਡਰੀਕੋ, ਸਮਣੋ ਚ ਸੋ ਪੁਣ੍ਡਰੀਕੋ ਚਾਤਿ ਸਮਣਪੁਣ੍ਡਰੀਕੋ, ਸਮਣਪਦੁਮੋ. ਚਨ੍ਦੋ ਵਿਯ ਚਨ੍ਦੋ, ਮੁਖਞ੍ਚ ਤਂ ਚਨ੍ਦੋ ਚਾਤਿ ਮੁਖਚਨ੍ਦੋ. ਏਵਂ ਮੁਖਪਦੁਮਂ ਇਚ੍ਚਾਦਿ.
ਸਮ੍ਭਾਵਨਾਪੁਬ੍ਬਪਦੋ ਯਥਾ – ਧਮ੍ਮੋ ਇਤਿ ਬੁਦ੍ਧਿ ਧਮ੍ਮਬੁਦ੍ਧਿ. ਏਵਂ ਧਮ੍ਮਸਞ੍ਞਾ, ਧਮ੍ਮਸਙ੍ਖਾਤੋ, ਧਮ੍ਮਸਮ੍ਮਤੋ, ਪਾਣਸਞ੍ਞਿਤਾ, ਅਸੁਭਸਞ੍ਞਾ, ਅਨਿਚ੍ਚਸਞ੍ਞਾ, ਅਨਤ੍ਤਸਞ੍ਞਾ, ਧਾਤੁਸਞ੍ਞਾ, ਧੀਤੁਸਞ੍ਞਾ, ਅਤ੍ਤਸਞ੍ਞਾ, ਅਤ੍ਥਿਸਞ੍ਞਾ, ਅਤ੍ਤਦਿਟ੍ਠਿ ਇਚ੍ਚਾਦਿ.
ਅਵਧਾਰਣਪੁਬ੍ਬਪਦੋ ਯਥਾ – ਗੁਣੋ ਏਵ ਧਨਂ ਗੁਣਧਨਂ. ਏਵਂ ਸਦ੍ਧਾਧਨਂ, ਸੀਲਧਨਂ, ਪਞ੍ਞਾਧਨਂ, ਚਕ੍ਖੁ ਏਵ ਇਨ੍ਦ੍ਰਿਯਂ ਚਕ੍ਖੁਨ੍ਦ੍ਰਿਯਂ. ਏਵਂ ਚਕ੍ਖਾਯਤਨਂ, ਚਕ੍ਖੁਧਾਤੁ, ਚਕ੍ਖੁਦ੍ਵਾਰਂ, ਰੂਪਾਰਮ੍ਮਣਮਿਚ੍ਚਾਦਿ.
ਨਨਿਪਾਤਪੁਬ੍ਬਪਦੋ ਯਥਾ – ਨ ਬ੍ਰਾਹ੍ਮਣੋਤਿ ਅਤ੍ਥੇ ਕਮ੍ਮਧਾਰਯਸਮਾਸੇ, ਵਿਭਤ੍ਤਿਲੋਪਾਦਿਮ੍ਹਿ ਚ ਕਤੇ –
‘‘ਉਭੇ ਤਪ੍ਪੁਰਿਸਾ’’ਤਿ ਤਪ੍ਪੁਰਿਸਸਞ੍ਞਾ.
੩੪੪. ਅਤ੍ਤਂ ਨਸ੍ਸ ਤਪ੍ਪੁਰਿਸੇ.
ਨਸ੍ਸ ਨਿਪਾਤਪਦਸ੍ਸ ਤਪ੍ਪੁਰਿਸੇ ਉਤ੍ਤਰਪਦੇ ਪਰੇ ਸਬ੍ਬਸ੍ਸੇਵ ਅਤ੍ਤਂ ਹੋਤਿ. ਤਪ੍ਪੁਰਿਸੇਕਦੇਸਤ੍ਤਾ ਤਪ੍ਪੁਰਿਸੋ, ਅਬ੍ਰਾਹ੍ਮਣੋ.
ਨ ਨਿਸੇਧੋ ਸਤੋ ਯੁਤ੍ਤੋ,
ਦੇਸਾਦਿਨਿਯਮਂ ਵਿਨਾ;
ਅਸਤੋ ਚਾਫਲੋ ਤਸ੍ਮਾ,
ਕਥਮਬ੍ਰਾਹ੍ਮਣੋਤਿ ਚੇ?
ਨਿਸੇਧਤ੍ਥਾਨੁਵਾਦੇਨ, ਪਟਿਸੇਧਵਿਧਿ ਕ੍ਵਚਿ;
ਪਰਸ੍ਸ ਮਿਚ੍ਛਾਞਾਣਤ੍ਤਾ-ਖ੍ਯਾਪਨਾਯੋਪਪਜ੍ਜਤੇ.
ਦੁਵਿਧੋ ਚਸ੍ਸਤ੍ਥੋ ਪਸਜ੍ਜਪ੍ਪਟਿਸੇਧਪਰਿਯੁਦਾਸਵਸੇਨ.
ਤਤ੍ਥ ਯੋ ‘‘ਅਸੂਰਿਯਪਸ੍ਸਾ ਰਾਜਦਾਰਾ’’ਤਿਆਦੀਸੁ ਵਿਯ ਉਤ੍ਤਰਪਦਤ੍ਥਸ੍ਸ ਸਬ੍ਬਥਾ ਅਭਾਵਂ ਦੀਪੇਤਿ, ਸੋ ਪਸਜ੍ਜਪ੍ਪਟਿਸੇਧਵਾਚੀ ਨਾਮ. ਯੋ ਪਨ ‘‘ਅਬ੍ਰਾਹ੍ਮਣ ਅਮਨੁਸ੍ਸਾ’’ਤਿਆਦੀਸੁ ਵਿਯ ਉਤ੍ਤਰਪਦਤ੍ਥਂ ਪਰਿਯੁਦਾਸਿਤ੍ਵਾ ਤਂਸਦਿਸੇ ਵਤ੍ਥੁਮ੍ਹਿ ਕਾਰਿਯਂ ਪਟਿਪਾਦਯਤਿ, ਸੋ ਪਰਿਯੁਦਾਸਵਾਚੀ ਨਾਮ.
ਵੁਤ੍ਤਞ੍ਚ
‘‘ਪਸਜ੍ਜਪ੍ਪਟਿਸੇਧਸ੍ਸ, ਲਕ੍ਖਣਂ ਵਤ੍ਥੁਨਤ੍ਥਿਤਾ;
ਵਤ੍ਥੁਤੋ ਅਞ੍ਞਤ੍ਰ ਵੁਤ੍ਤਿ, ਪਰਿਯੁਦਾਸਲਕ੍ਖਣ’’ਨ੍ਤਿ.
ਨਨ੍ਵੇਵਂ ਸਨ੍ਤੇਪਿ ‘‘ਅਬ੍ਰਾਹ੍ਮਣੋ’’ਤਿਆਦੀਸੁ ਕਥਮੁਤ੍ਤਰਪਦਤ੍ਥਪ੍ਪਧਾਨਤਾ ਸਿਯਾਤਿ?
ਵੁਚ੍ਚਤੇ – ਬ੍ਰਾਹ੍ਮਣਾਦਿਸਦ੍ਦਾਨਂ ਬ੍ਰਾਹ੍ਮਣਾਦਿਅਤ੍ਥਸ੍ਸੇਵ ਤਂਸਦਿਸਾਦਿਅਤ੍ਥਸ੍ਸਾਪਿ ਵਾਚਕਤ੍ਤਾ, ਬ੍ਰਾਹ੍ਮਣਾਦਿਸਦ੍ਦਾ ਹਿ ਕੇਵਲਾਬ੍ਰਾਹ੍ਮਣਾਦਿਅਤ੍ਥੇਸ੍ਵੇਵ ਪਾਕਟਾ, ਭੂਸਦ੍ਦੋ ਵਿਯਸਤ੍ਤਾਯਂ, ਯਦਾ ਤੇ ਪਨ ਅਞ੍ਞੇਨ ਸਦਿਸਾਦਿਵਾਚਕੇਨ ਨਇਤਿ ਨਿਪਾਤੇਨ ਯੁਜ੍ਜਨ੍ਤਿ, ਤਦਾ ਤਂਸਦਿਸਤਦਞ੍ਞਤਬ੍ਬਿਰੁਦ੍ਧਤਦਭਾਵੇਸੁਪਿ ਵਤ੍ਤਨ੍ਤਿ, ਭੂਸਦ੍ਦੋ ਵਿਯ ਅਨ੍ਵਭਿਯਾਦਿਯੋਗੇ ਅਨੁਭਵਨਅਭਿਭਵਨਾਦੀਸੁ, ਤਸ੍ਮਾ ਉਤ੍ਤਰਪਦਤ੍ਥਜੋਤਕੋਯੇਵੇਤ੍ਥ ਨਇਤਿ ਨਿਪਾਤੋਤਿ ਨ ਦੋਸੋ, ਤੇਨ ਅਬ੍ਰਾਹ੍ਮਣੋਤਿ ਬ੍ਰਾਹ੍ਮਣਸਦਿਸੋਤਿ ਵੁਤ੍ਤਂ ਹੋਤਿ. ਏਵਂ ਅਮਨੁਸ੍ਸੋ, ਅਸ੍ਸਮਣੋ.
ਅਞ੍ਞਤ੍ਥੇ – ਨ ਬ੍ਯਾਕਤਾ ਅਬ੍ਯਾਕਤਾ, ਅਸਂਕਿਲਿਟ੍ਠਾ, ਅਪਰਿਯਾਪਨ੍ਨਾ.
ਵਿਰੁਦ੍ਧਤ੍ਥੇ – ਨ ਕੁਸਲਾ ਅਕੁਸਲਾ, ਕੁਸਲਪਟਿਪਕ੍ਖਾਤਿ ਅਤ੍ਥੋ. ਏਵਂ ਅਲੋਭੋ, ਅਮਿਤ੍ਤੋ.
ਪਸਜ੍ਜਪ੍ਪਟਿਸੇਧੇ – ਨ ਕਤ੍ਵਾ ਅਕਤ੍ਵਾ, ਅਕਾਤੁਨ ਪੁਞ੍ਞਂ ਅਕਰੋਨ੍ਤੋ.
‘‘ਨਸ੍ਸ, ਤਪ੍ਪੁਰਿਸੇ’’ਤਿ ਚ ਵਤ੍ਤਤੇ.
੩੪੫. ਸਰੇ ਅਨ.
ਨਇਚ੍ਚੇਤਸ੍ਸ ਪਦਸ੍ਸ ਤਪ੍ਪੁਰਿਸੇ ਉਤ੍ਤਰਪਦੇ ਅਨ ਹੋਤਿ ਸਰੇ ਪਰੇ.
ਨ ਅਸ੍ਸੋ ਅਨਸ੍ਸੋ, ਨ ਅਰਿਯੋ ਅਨਰਿਯੋ. ਏਵਂ ਅਨਿਸ੍ਸਰੋ, ਅਨਿਟ੍ਠੋ, ਅਨੁਪਵਾਦੋ, ਨ ਆਦਾਯ ਅਨਾਦਾਯ, ਅਨੋਲੋਕੇਤ੍ਵਾ ਇਚ੍ਚਾਦਿ.
ਕੁਪੁਬ੍ਬਪਦੋ ਯਥਾ – ਕੁਚ੍ਛਿਤਮਨ੍ਨਨ੍ਤਿ ਨਿਚ੍ਚਸਮਾਸਤ੍ਤਾ ਅਞ੍ਞਪਦੇਨ ਵਿਗ੍ਗਹੋ, ਕਮ੍ਮਧਾਰਯਸਮਾਸੇ ਕਤੇ –
‘‘ਤਪ੍ਪੁਰਿਸੇ, ਸਰੇ’’ਤਿ ਚ ਵਤ੍ਤਤੇ.
੩੪੬. ਕਦਦ ਕੁਸ੍ਸ.
ਕੁਇਚ੍ਚੇਤਸ੍ਸ ਨਿਪਾਤਸ੍ਸ ਤਪ੍ਪੁਰਿਸੇ ਉਤ੍ਤਰਪਦੇ ਕਦ ਹੋਤਿ ਸਰੇ ਪਰੇ. ਕਦਨ੍ਨਂ. ਏਵਂ ਕਦਸਨਂ.
ਸਰੇਤਿ ਕਿਂ? ਕੁਦਾਰਾ, ਕੁਪੁਤ੍ਤਾ, ਕੁਦਾਸਾ, ਕੁਦਿਟ੍ਠਿ.
‘‘ਕੁਸ੍ਸਾ’’ਤਿ ਵਤ੍ਤਤੇ.
੩੪੭. ਕਾਪ੍ਪਤ੍ਥੇਸੁ ਚ.
ਕੁਇਚ੍ਚੇਤਸ੍ਸ ਅਪ੍ਪਤ੍ਥੇ ਵਤ੍ਤਮਾਨਸ੍ਸ ਕਾ ਹੋਤਿ ਤਪ੍ਪੁਰਿਸੇ ਉਤ੍ਤਰਪਦੇ ਪਰੇ. ਬਹੁਵਚਨੁਚ੍ਚਾਰਣਤੋ ਕੁਚ੍ਛਿਤਤ੍ਥੇ ਚ ਕ੍ਵਚਿ ਤਪ੍ਪੁਰਿਸੇ. ਅਪ੍ਪਕਂ ਲਵਣਂ ਕਾਲਵਣਂ. ਏਵਂ ਕਾਪੁਪ੍ਫਂ, ਕੁਚ੍ਛਿਤੋ ਪੁਰਿਸੋ ਕਾਪੁਰਿਸੋ, ਕੁਪੁਰਿਸੋ ਵਾ.
ਪਾਦਿਪੁਬ੍ਬਪਦੋ ਚ ਨਿਚ੍ਚਸਮਾਸੋਵ, ਪਧਾਨਂ ਵਚਨਂ ਪਾਵਚਨਂ, ਭੁਸਂ ਵਦ੍ਧਂ ਪਵਦ੍ਧਂ, ਸਰੀਰਂ, ਸਮਂ, ਸਮ੍ਮਾ ਵਾ ਆਧਾਨਂ ਸਮਾਧਾਨਂ, ਵਿਵਿਧਾ ਮਤਿ ਵਿਮਤਿ, ਵਿਵਿਧੋ ਕਪ੍ਪੋ ਵਿਕਪ੍ਪੋ, ਵਿਸਿਟ੍ਠੋ ਵਾ ਕਪ੍ਪੋ ਵਿਕਪ੍ਪੋ, ਅਧਿਕੋ ਦੇਵੋ ਅਤਿਦੇਵੋ. ਏਵਂ ਅਧਿਦੇਵੋ, ਅਧਿਸੀਲਂ, ਸੁਨ੍ਦਰੋ ਗਨ੍ਧੋ ਸੁਗਨ੍ਧੋ, ਕੁਚ੍ਛਿਤੋ ਗਨ੍ਧੋ ਦੁਗ੍ਗਨ੍ਧੋ, ਸੋਭਨਂ ਕਤਂ ਸੁਕਤਂ, ਅਸੋਭਨਂ ਕਤਂ ਦੁਕ੍ਕਟਂ ਇਚ੍ਚਾਦਿ.
ਯੇ ਇਧ ਅਵਿਹਿਤਲਕ੍ਖਣਾ ਨਾਮਨਿਪਾਤੋਪਸਗ੍ਗਾ, ਤੇਸਂ ‘‘ਨਾਮਾਨਂ ਸਮਾਸੋ’’ਤਿ ਯੋਗਵਿਭਾਗੇਨ ਸਮਾਸੋ ਦਟ੍ਠਬ੍ਬੋ. ਯਥਾ – ਅਪੁਨਗੇਯ੍ਯਾ ਗਾਥਾ, ਅਚਨ੍ਦਮੁਲ੍ਲੋਕਿਕਾਨਿ ਮੁਖਾਨਿ, ਅਸ੍ਸਦ੍ਧਭੋਜੀ, ਅਲਵਣਭੋਜੀਤਿਆਦੀਸੁ ਅਯੁਤ੍ਤਤ੍ਥਤ੍ਤਾ ਨਾਞ੍ਞੇਨ ਸਮਾਸੋ.
ਤਥਾ ਦਿਟ੍ਠੋ ਪੁਬ੍ਬਨ੍ਤਿ ਦਿਟ੍ਠਪੁਬ੍ਬੋ ਤਥਾਗਤਂ. ਏਵਂ ਸੁਤਪੁਬ੍ਬੋ ਧਮ੍ਮਂ, ਗਤਪੁਬ੍ਬੋ ਮਗ੍ਗਂ, ਕਮ੍ਮਨਿ ਦਿਟ੍ਠਾ ਪੁਬ੍ਬਨ੍ਤਿ ਦਿਟ੍ਠਪੁਬ੍ਬਾ ਦੇਵਾ ਤੇਨ. ਏਵਂ ਸੁਤਪੁਬ੍ਬਾ ਧਮ੍ਮਾ, ਗਤਪੁਬ੍ਬਾ ਦਿਸਾ, ਪਹਾਰੋ, ਪਰਾਭਵੋ, ਵਿਹਾਰੋ, ਆਹਾਰੋ, ਉਪਹਾਰੋ ਇਚ੍ਚਾਦਿ.
ਕਮ੍ਮਧਾਰਯਸਮਾਸੋ.
ਦਿਗੁਸਮਾਸ
ਅਥ ਦਿਗੁਸਮਾਸੋ ਵੁਚ੍ਚਤੇ.
ਤਯੋ ਲੋਕਾ ਸਮਾਹਟਾ ਚਿਤ੍ਤੇਨ ਸਮ੍ਪਿਣ੍ਡਿਤਾ, ਤਿਣ੍ਣਂ ਲੋਕਾਨਂ ਸਮਾਹਾਰੋਤਿ ਵਾ ਅਤ੍ਥੇ –
‘‘ਨਾਮਾਨਂ ਸਮਾਸੋ ਯੁਤ੍ਤਤ੍ਥੋ’’ਤਿ ਵਤ੍ਤਮਾਨੇ ‘‘ਦ੍ਵਿਪਦੇ’’ਤਿਆਦਿਨਾ ਕਮ੍ਮਧਾਰਯਸਮਾਸੋ, ਤਤੋ ਸਮਾਸਸਞ੍ਞਾਯਂ, ਵਿਭਤ੍ਤਿਲੋਪੇ, ਪਕਤਿਭਾਵੇ ਚ ਕਤੇ –
‘‘ਕਮ੍ਮਧਾਰਯੋ’’ਤਿ ਵਤ੍ਤਤੇ.
੩੪੮. ਸਙ੍ਖ੍ਯਾਪੁਬ੍ਬੋ ਦਿਗੁ.
ਸਙ੍ਖ੍ਯਾਪੁਬ੍ਬੋ ਕਮ੍ਮਧਾਰਯਸਮਾਸੋ ਦਿਗੁਸਞ੍ਞੋ ਹੋਤਿ.
ਦ੍ਵੇ ਗਾਵੋ ਦਿਗੁ, ਦਿਗੁਸਦਿਸਤ੍ਤਾ ਅਯਮ੍ਪਿ ਸਮਾਸੋ ਦਿਗੂਤਿ ਵੁਤ੍ਤੋ. ਅਥ ਵਾ ਸਙ੍ਖ੍ਯਾਪੁਬ੍ਬਤ੍ਤਨਪੁਂਸਕੇਕਤ੍ਤਸਙ੍ਖਾਤੇਹਿ ਦ੍ਵੀਹਿ ਲਕ੍ਖਣੇਹਿ ਗਤੋ ਅਵਗਤੋਤਿ ਦਿਗੂਤਿ ਵੁਚ੍ਚਤਿ, ਦ੍ਵੀਹਿ ਵਾ ਲਕ੍ਖਣੇਹਿ ਗਚ੍ਛਤਿ ਪਵਤ੍ਤਤੀਤਿ ਦਿਗੁ. ਏਤ੍ਥ ਚ ‘‘ਸਙ੍ਖ੍ਯਾਪੁਬ੍ਬੋ’’ਤਿ ਵੁਤ੍ਤਤ੍ਤਾ ਸਙ੍ਖ੍ਯਾਸਦ੍ਦਸ੍ਸੇਵ ਪੁਬ੍ਬਨਿਪਾਤੋ, ‘‘ਉਭੇ ਤਪ੍ਪੁਰਿਸਾ’’ਤਿ ਤਪ੍ਪੁਰਿਸਸਞ੍ਞਾ.
‘‘ਨਪੁਂਸਕਲਿਙ੍ਗੋ’’ਤਿ ਵਤ੍ਤਤੇ.
੩੪੯. ਦਿਗੁਸ੍ਸੇਕਤ੍ਤਂ.
ਦਿਗੁਸ੍ਸ ਸਮਾਸਸ੍ਸ ਏਕਤ੍ਤਂ ਹੋਤਿ, ਨਪੁਂਸਕਲਿਙ੍ਗਤ੍ਤਞ੍ਚ.
ਸਮਾਹਾਰਦਿਗੁਸ੍ਸੇਤਂ ਗਹਣਂ, ਤਤ੍ਥ ਸਬ੍ਬਤ੍ਥੇਕਵਚਨਮੇਵ ਹੋਤਿ, ਅਞ੍ਞਤ੍ਰ ਪਨ ਬਹੁਵਚਨਮ੍ਪਿ, ਨਾਮਬ੍ਯਪਦੇਸਸ੍ਯਾਦ੍ਯੁਪ੍ਪਤ੍ਤਿ ਅਮਾਦੇਸਾਦਿ.
ਤਿਲੋਕਂ, ਹੇ ਤਿਲੋਕ, ਤਿਲੋਕਂ, ਤਿਲੋਕੇਨ, ਤਿਲੋਕਸ੍ਸ, ਤਿਲੋਕਾ ਤਿਲੋਕਸ੍ਮਾ ਤਿਲੋਕਮ੍ਹਾ, ਤਿਲੋਕਸ੍ਸ, ਤਿਲੋਕੇ ਤਿਲੋਕਮ੍ਹਿ ਤਿਲੋਕਸ੍ਮਿਂ.
ਏਵਂ ਤਯੋ ਦਣ੍ਡਾ ਤਿਦਣ੍ਡਂ, ਤੀਣਿ ਮਲਾਨਿ ਸਮਾਹਟਾਨਿ, ਤਿਣ੍ਣਂ ਮਲਾਨਂ ਸਮਾਹਾਰੋਤਿ ਵਾ ਤਿਮਲਂ, ਤਿਲਕ੍ਖਣਂ, ਚਤੁਸ੍ਸਚ੍ਚਂ, ਚਤਸ੍ਸੋ ਦਿਸਾ ਚਤੁਦ੍ਦਿਸਂ, ‘‘ਸਰੋ ਰਸ੍ਸੋ ਨਪੁਂਸਕੇ’’ਤਿ ਰਸ੍ਸਤ੍ਤਂ, ਪਞ੍ਚਸਿਕ੍ਖਾਪਦਂ, ਸਲ਼ਾਯਤਨਂ, ਸਤ੍ਤਾਹਂ, ਅਟ੍ਠਸੀਲਂ, ਨਵਲੋਕੁਤ੍ਤਰਂ, ਦਸਸੀਲਂ, ਸਤਯੋਜਨਂ.
ਤਥਾ – ਦ੍ਵੇ ਰਤ੍ਤਿਯੋ ਦ੍ਵਿਰਤ੍ਤਂ, ਤਿਸ੍ਸੋ ਰਤ੍ਤਿਯੋ ਤਿਰਤ੍ਤਂ, ਦ੍ਵੇ ਅਙ੍ਗੁਲਿਯੋ ਦ੍ਵਙ੍ਗੁਲਂ, ਸਤ੍ਤ ਗੋਦਾਵਰਿਯੋ, ਤਾਸਂ ਸਮਾਹਾਰੋਤਿ ਵਾ ਸਤ੍ਤਗੋਦਾਵਰਂ.
ਏਤ੍ਥ ਚ ਰਤ੍ਤਿ ਅਙ੍ਗੁਲਿ ਗੋਦਾਵਰੀਨਮਨ੍ਤਸ੍ਸ –
੩੫੦. ਕ੍ਵਚਿ ਸਮਾਸਨ੍ਤਗਤਾਨਮਕਾਰਨ੍ਤੋ.
ਰਾਜਾਦਿਗਣਸ੍ਸੇਤਂ ਗਹਣਂ, ਤੇਨ ਸਮਾਸਨ੍ਤਗਤਾਨਂ ਰਾਜਾਦੀਨਂ ਨਾਮਾਨਂ ਅਨ੍ਤੋ ਕ੍ਵਚਿ ਅਕਾਰੋ ਹੋਤੀਤਿ ਅਤ੍ਥੋ. ਕਾਰਗ੍ਗਹਣੇਨ ਬਹੁਬ੍ਬੀਹਾਦਿਮ੍ਹਿ ਸਮਾਸਨ੍ਤੇ ਕ੍ਵਚਿ ਕਪ੍ਪਚ੍ਚਯੋ ਹੋਤਿ, ਸੁਰਭਿ ਸੁ ਦੁ ਪੂਤੀਹਿ ਗਨ੍ਧਨ੍ਤਸ੍ਸਿਕਾਰੋ ਚ.
ਅਥ ਵਾ ਅ ਚ ਕੋ ਚ ਅਕਾ, ਰਕਾਰੋ ਪਦਸਨ੍ਧਿਕਰੋ, ਤੇਨ ਕ੍ਵਚਿ ਸਮਾਸਨ੍ਤਗਤਾਨਮਨ੍ਤੋ ਹੁਤ੍ਵਾ ਅ ਕ ਇਚ੍ਚੇਤੇ ਪਚ੍ਚਯਾ ਹੋਨ੍ਤੀਤਿ ਅਤ੍ਥੋ. ਤੇਨ ਪਞ੍ਚ ਗਾਵੋ ਸਮਾਹਟਾਤਿ ਅਤ੍ਥੇ ਸਮਾਸਾਦਿਂ ਕਤ੍ਵਾ ਸਮਾਸਨ੍ਤੇ ਅਪ੍ਪਚ੍ਚਯੇ, ‘‘ਓ ਸਰੇ ਚਾ’’ਤਿ ਅਵਾਦੇਸੇ ਚ ਕਤੇ ‘‘ਪਞ੍ਚਗਵ’’ਨ੍ਤਿਆਦਿ ਚ ਸਿਜ੍ਝਤਿ. ‘‘ਦ੍ਵਿਰਤ੍ਤ’’ਨ੍ਤਿਆਦੀਸੁ ਪਨ ਅਪ੍ਪਚ੍ਚਯੇ ਕਤੇ ਪੁਬ੍ਬਸਰਸ੍ਸ ‘‘ਸਰਲੋਪੋ’’ਤਿਆਦਿਨਾ ਲੋਪੋ.
ਅਸਮਾਹਾਰਦਿਗੁ ਯਥਾ – ਏਕੋ ਚ ਸੋ ਪੁਗ੍ਗਲੋ ਚਾਤਿ ਏਕਪੁਗ੍ਗਲੋ. ਏਵਂ ਏਕਧਮ੍ਮੋ, ਏਕਪੁਤ੍ਤੋ, ਤਯੋ ਭਵਾ ਤਿਭਵਾ, ਚਤਸ੍ਸੋ ਦਿਸਾ ਚਤੁਦ੍ਦਿਸਾ, ਦਸਸਹਸ੍ਸਚਕ੍ਕਵਾਲ਼ਾਨਿ ਇਚ੍ਚਾਦਿ.
ਦਿਗੁਸਮਾਸੋ.
ਤਪ੍ਪੁਰਿਸਸਮਾਸ
ਅਥ ਤਪ੍ਪੁਰਿਸਸਮਾਸੋ ਵੁਚ੍ਚਤੇ.