ਸਟ੍ਠਿਮ ਪਰਿਚ੍ਛੇਦ

ਕੁਮਾਰੋਦਯੋ

੧. ਰੋਹਣੇ ਨਿਵਸਿਤ੍ਥਾ’ਵ, ਜਯਬਾਹੁਮਹੀਪਤਿ;

ਮਿਤ੍ਤਾਵ੍ਹਾ ਰਾਜਿਨੀ ਚੇਵ, ਤਦਾ ਕਾਲਮਕਂਸੁ ਤੇ.

੨. ਸਿਰੀਵਲ੍ਲਭਜਾਯਾ’ਥ, ਜਨੇਸਿ ਸੁਗਲਾ ਦੁਵੇ;

ਮਾਣਭਰਣਕਂ ਪੁਤ੍ਤਂ, ਪੁਤ੍ਤਿਂ ਲੀਲਾਵਤਿਮ੍ਪਿ ਚ.

੩. ਮਾਣਾਭਰਣਭੂਪਾਲ-ਦੇਵੀ’ਪਿ ਰਤਨਾਵਲੀ;

ਮਿਤ੍ਤਂ ਪਭਾਵਤਿਞ੍ਚਾਪਿ, ਅਲਭੀ ਧੀਤਰੋ ਦੁਵੇ.

੪. ਪਸ੍ਸਨ੍ਤਸ੍ਸ ਉਭੋ ਤਾਯੋ, ਧੀਤਰੋ ਵੀਰਬਾਹੁਨੋ;

ਤਦਾ ਮਹਾਦਿਪਾਦਸ੍ਸ, ਏਵਂ ਆਸਿ ਵਿਤਕ੍ਕਿਤਂ.

੫. ਲੋਕਾਭਿਸਮ੍ਮਤੇ ਸਬ੍ਬ-ਭੂਪਾਲਨ੍ਵਯਮੁਦ੍ਧਨਿ;

ਵਿਸੁਦ੍ਧੇ ਸੋਮਵਂਸਮ੍ਹਿ, ਅਭਿਜਾਤਾ ਮਯਂ ਪਨ.

੬. ਪਿਹਨੀਯਤਰਾਕਾਰਾ, ਸਬ੍ਬਸਤ੍ਤਿਸਮੁਨ੍ਨਤਾ;

ਨਾਨਾਵਿਜ੍ਜਾਸੁ ਨਿਪੁਣਾ, ਹਤ੍ਥਿਅਸ੍ਸਾਦਿਸੁਕ੍ਖਮਾ.

੭. ਤਥਾ ਪੇਕਾਕਿਨਾ ਵੇ’ਤੇ, ਤਯੋ ਵਿਕ੍ਕਮਬਾਹੁਨਾ;

ਪਰਾਜਯਂ ਪਰਿਭਵਂ, ਪਾਪਿਤਾ ਬਹੁਸੋ ਰਣੇ.

੮. ਸੂਨੁਨੋ ਸੁਸਮਤ੍ਥਸ੍ਸ, ਵਿਸੋਧੇਤੁ ਮਿਮਂ ਮਲਂ;

ਨ ਦਿਸ੍ਸਤੇ ਪਾਤੁਭਾਵੋ, ਅਹੋ ਨੋ ਅਪ੍ਪਪੁਞ੍ਞਤਾ.

੯. ਜਨਵਾਦਕਿਲਿਟ੍ਠੇਨ, ਰਾਜਤ੍ਤੇਨਾਪਿ ਕਿਂ ਮਮ;

ਇਦਾਨਿ ਵਿਸਯਾਸਙ੍ਗਂ, ਹਿਤ੍ਵਾ ਕਲ੍ਯਾਣਕਮ੍ਮਸੁ.

੧੦. ਅਪ੍ਪਮਤ੍ਤਸ੍ਸ ਸਤਤਂ, ਨੇਤਬ੍ਬਾ ਵਾਸਰਾ’ਇਤਿ;

ਨਿਯ੍ਯਾਤੇਤ੍ਵਾ ਅਮਚ੍ਚਾਨਂ, ਸਬ੍ਬਂ ਰਜ੍ਜਵਿਚਾਰਣਂ.

੧੧. ਤਹਿਂ ਸਤ੍ਤ’ਟ੍ਠਮਾਸਞ੍ਹਿ, ਵਸਂ ਰਤ੍ਤਿਯਮੇਕਦਾ;

ਦੇਵਰਾਜਘਰੇਸੇਯ੍ਯਂ, ਕਪ੍ਪੇਸਿ ਸੀਲਸਂਯਤੋ.

੧੨. ਤਤੋ ਪਚ੍ਚੂਸਕਾਲਮ੍ਹਿ, ਦੇਵਪੁਤ੍ਤਂ ਮਹਿਦ੍ਧਿਕਂ;

ਵਿਚਿਤ੍ਤਵਤ੍ਥਾਭਰਣਂ, ਗਨ੍ਧਮਾਲਾਵਿਭੂਸਿਤਂ.

੧੩. ਉਲ਼ਾਰਤਰਰੂਪੇਨ, ਦੇਹੋਭਾਸੇਨ ਅਤ੍ਤਨੋ;

ਓਭਾਸੇਨ੍ਤਂ ਅਸੇਸਾ’ਸਾ, ਸੂਰਿਯਞ੍ਚ ਨ ਭੁਗ੍ਗਤਂ.

੧੪. ਵਦਨ੍ਤਂ ਸੁਪਿਨੇ ਏਵਂ, ਅਦਕ੍ਖਿ ਦਰਣੀਪਤਿ;

ਪਸੀਦਸ੍ਸੁ ਮਹਾਭਾਗ, ਪਿਤੋਭਵ ਮਹਿਪਤਿ.

੧੫. ਧਞ੍ਞਲਕ੍ਖਣਸਮ੍ਪਨ੍ਨੋ, ਇਚ੍ਛਿਤਤ੍ਥਸ੍ਸਸਾਧਕੋ;

ਵਿਨੀਤੋ ਲੋਕਕੁਹਰ-ਬ੍ਯਾਪਿਤੇਜੋ ਪਰਕ੍ਕਮੋ.

੧੬. ਆਣਬਲਯਸੋਕਿਤ੍ਤਿ-ਭਾਸੁਰੋ ਸਗ੍ਗੁਣਾਕਰੋ;

ਲੋਕਸਾਸਨਸਂਵੁਦ੍ਧਿ-ਕਰੋ ਪੁਤ੍ਤਵਰੋ ਤਵ.

੧੭. ਲਬ੍ਭੀਸ੍ਸਤੇ ਮਹਾਰਾਜ, ਨ ਚਿਰਸ੍ਸੇਵ ਸਮ੍ਪਤਿ;

ਪੁਤ੍ਤਦਾਰਾਧਿਵੁਤ੍ਥਂ ਤਂ, ਪੁਰਂ ਖਿਪ੍ਪਂ ਪਯਾਹੀਤਿ.

੧੮. ਪਬੁਜ੍ਝਿਤ੍ਵਾਨ ਸਞ੍ਜਾਤ-ਪੀਤਿਵੇਗੋਥ ਰਤ੍ਤਿਯਾ;

ਵਿਭਾਤਾਯ ਤਤੋਪੋਙ੍ਖ-ਗਾਮਂ ਗਞ੍ਛਿਨਰੁਤ੍ਤਮੋ.

੧੯. ਯਥਾ ਦਿਟ੍ਠਪ੍ਪਕਾਰਨ੍ਤਂ, ਕਥੇਸਿ ਸੁਪਿਨਂ ਸੁਭਂ;

ਮਹੇਸੀ ਪਮੁਖਾਨਂ ਸੋ, ਅਮਚ੍ਚਾਨਂ ਮਹੀਪਤਿ.

੨੦. ਸਦ੍ਧਿਂ ਮਹੇਸਿਯਾ ਤਤ੍ਥ, ਪਤ੍ਥੇਨ੍ਤੋ ਪੁਤ੍ਤਮੁਤ੍ਤਮਂ;

ਚਿਨ੍ਤੋਨ੍ਤੋ ਦਾਨਸੀਲਾਦਿਂ, ਸੁਭਂ ਨਾਨਪ੍ਪਕਾਰਕਂ.

੨੧. ਅਥੇਕਦਿਵਸਂਕਾਲੇ, ਪਚ੍ਚੂਸੇ ਸੁਪਿਨੇ ਪਨ;

ਸਬ੍ਬਲਕ੍ਖਣਸਮ੍ਪਨ੍ਨਂ, ਸਬ੍ਬਸੇਤਂ ਮਨੋਹਰਂ.

੨੨. ਦਨ੍ਤੀਪੋਤਵਰਂ ਦਨ੍ਤਂ, ਕਣ੍ਣੇ ਗਣਿਯਪੇਮਤੋ;

ਪਵਿਸਨ੍ਤਮਿਵਤ੍ਤਾਨਂ, ਸੇਯ੍ਯਾਗਬ੍ਭਂ ਮਹੇਸਿਯਾ.

੨੩. ਸਮ੍ਪਸ੍ਸਿਯ ਪਬੁਜ੍ਝਿਤ੍ਵਾ, ਉਟ੍ਠਾਯ ਸਯਨਾਵਰਾ;

ਸਞ੍ਜਾਤਪੀਤਿਪਾਮੋਜ੍ਜ-ਵੇਗਪੀਣਿਤਮਾਨਸੋ.

੨੪. ਤਾਯਂ ਵੇਲਾਯਮੇਦਾਸੁ-ਸੇਯ੍ਯਾਗਬ੍ਭਂ ਮਹੇਸਿਯਾ;

ਪਵਿਸ੍ਸਸੁਪਿਨਂ ਤਸ੍ਸਾ, ਯਥਾਦਿਟ੍ਠਂ ਪਕਾਸਯੀ.

੨੫. ਅਹਮ੍ਪਿ ਤਾਦਿਸਂ ਹਤ੍ਥਿ-ਪੋਤਕਂ ਸਯਨਂ ਮਮ;

ਪਦਕ੍ਖਿਣਂ ਕਰਿਤ੍ਵਾਨ, ਠਿਤਂ ਸੋਣ੍ਡੇ ਸਮਾਦਿਯ.

੨੬. ਆਕਡ੍ਢਿਤ੍ਵਾਨ ਸਯਨਂ, ਸਮਾਰੋਪਿਯ ਪੇਮਤੋ;

ਆਲਿਙ੍ਗਿਂ ਸੁਪਿਨਮ੍ਹੀਤਿ, ਦੇਵੀ ਚਾਪਿ ਤਮਬ੍ਰਵੀ.

੨੭. ਉਭੋ ਤੇ ਅਞ੍ਞਮਞ੍ਞਸ੍ਸ, ਦਿਟ੍ਠਮੇਵਂ ਪਕਾਸਿਯ;

ਉਟ੍ਠਾਪੇਸੁਂ ਪਹਟ੍ਠਾਵ, ਵੀਤਨਿਦ੍ਦਾਰੁਣਂ ਤਦਾ.

੨੮. ਤਤੋ ਪਾਤੋ ਉਪਟ੍ਠਾਤੁ, ਮੁਪਯਾਤਂ ਪੁਰੋਹਿਤਂ;

ਨੇਮਿਤ੍ਤਕੇ ਚ ਪੁਚ੍ਛਿਂਸੁ, ਸੁਨਿਤ੍ਵਾ ਤੇ ਪਮੋਦਿਤਾ.

੨੯. ਨ ਚਿਰਸ੍ਸੇਵ ਪੁਤ੍ਤਸ੍ਸ, ਧਞ੍ਞਲਕ੍ਖਣਸਾਲਿਨੋ;

ਉਪ੍ਪਤ੍ਤਿਯਾ ਅਵਸ੍ਸਂ’ਵ, ਭਵਂਤਬ੍ਬਨ੍ਤਿ ਕਿਤ੍ਤਯੁਂ.

੩੦. ਤਂ ਸੁਣਿਤ੍ਵਾ ਅਮਚ੍ਚਾ ਚ, ਤਥਾ ਨਗਰਵਾਸਿਨੋ;

ਅਵਿਨ੍ਦਿਂਸੁ ਜਨਿਨ੍ਦੋ ਚ, ਸਬ੍ਬੇਪੀਤਿ ਮਹੁਸ੍ਸਵਂ.

੩੧. ਤਤੋ ਪਟ੍ਠਾਯ ਸੋਤ੍ਥਾਨਂ, ਪਤ੍ਥਯਂ ਪਤ੍ਥਿਵੋਭੁਸਂ;

ਭਿਕ੍ਖੁਸਙ੍ਘੇਨ ਬਹੁਸੋ, ਭਣਾਪੇਸਿ ਪਰਿਤ੍ਤਕਂ.

੩੨. ਮਣਿਮੁਤ੍ਤਾਦਿਕਂ ਚਿਤ੍ਤਂ, ਮਹਗ੍ਘਮਨੁਵਾਸਰਂ;

ਪਰਿਚ੍ਚਜਿ ਦਾਨਮੁਖੇ, ਯਾਚਕਾਨਮਨੇਕਸੋ.

੩੩. ਪੁਰੋਹਿਤਾਦਿਵਿਪ੍ਪੇਹਿ, ਵੇਦਵੇਦਙ੍ਗਵਿਞ੍ਞੂਹਿ;

ਵਤ੍ਤਾਪੇਸਿ ਚ ਹੋਮਾਦਿ-ਵਿਧਾਨਂ ਸੋਤ੍ਥਿ ਸਮ੍ਮਤਂ.

੩੪. ਸੁਵਿਨਟ੍ਠੇ ਵਿਹਾਰੇ ਚ, ਧਾਤੁਗਬ੍ਭੇ ਚ ਵਾਪਿਯੋ;

ਜਿਣ੍ਣਾ ਚ ਪਟਿਸਙ੍ਖਤ੍ਤੁਂ, ਯੋਜਯੀ ਰਾਜਕਪ੍ਪਿਕੇ.

੩੫. ਦਿਨਂ ਨਯਨ੍ਤੇ ਕਲ੍ਯਾਣ-ਕਮ੍ਮੇਨੇ’ਵਂ ਨਰਿਸ੍ਸਰੇ;

ਨ ਚਿਰਂ ਸਣ੍ਠਹਿ ਗਬ੍ਭ-ਵਰੋ ਕੁਚ੍ਛਿਮ੍ਹਿ ਦੇਵਿਯਾ.

੩੬. ਤਤੋਵਗਮ੍ਮ ਤਂ ਹਟ੍ਠ-ਪਹਟ੍ਠੋ ਸੋ ਨਰਿਸ੍ਸਰੋ;

ਮਹਨ੍ਤਂ ਦੇਵਿਯਾ ਗਬ੍ਭ-ਪਰਿਹਾਰਮਦਾਪਯਿ.

੩੭. ਪਰਿਪਕ੍ਕਗਬ੍ਭਾ ਦੇਵੀ, ਕਮੇਨ ਜਨਯੀਸੁਕਂ;

ਸਮਯੇ ਭਦ੍ਦਨਕ੍ਖਤ੍ਤ-ਮੁਹੁਤ੍ਤੇਨਭਿਲਕ੍ਖਿਤੇ.

੩੮. ਸੁਪ੍ਪਸਨ੍ਨਾ ਅਸੇਸਾ ਚ, ਦਿਸਾਯੋ ਤਂਖਣੇ ਅਹੁ;

ਸਮੀਰਣੇ ਚ ਵਾਸਿਂਸੁ, ਸੁਗਨ੍ਧਿਮੁਦੁਸੀਤਲਾ.

੩੯. ਦਨ੍ਤੀਨਂ ਕੋਞ੍ਚਨਾਦੇਨ, ਹਯਾਨਂ ਹੇਸਿਤੇਨ ਚ;

ਰਾਜਙ੍ਗਣਂ ਤਦਾਜਾਤਂ, ਮਹਾਕੋਲਾਹਲਾ ਕੂਲਂ.

੪੦. ਅਚ੍ਛੇਰਾਤਿਸਯੇ ਏਵਂ, ਪਾਤੁਭੂਤੇ ਅਨੇਕਧਾ;

ਦਿਸ੍ਵਾ ਤਂ ਵਿਮ੍ਹਯਪ੍ਪਤ੍ਤੋ, ਮਾਣਭਰਣਭੂਪਤਿ.

੪੧. ਸੁਤ੍ਵਾ ਨਿਜਸ੍ਸ ਪੁਤ੍ਤਸ੍ਸ, ਤਦਾ ਸਞ੍ਜਾਤਸਾਸਨਂ;

ਅਮਤੇਨਾਭਿਸਿਤ੍ਤੋਵ, ਪੀਤਿਪੁਣ੍ਣਮਨੋਰਥੋ.

੪੨. ਮੋਚਾਪੇਤ੍ਵਾ ਤਦਾ ਕਾਰਾ-ਘਰੇ ਬਦ੍ਧੇ ਬਹੂਜਨੇ;

ਦਾਨਂ ਉਲ਼ਾਰਂ ਸਮਣ-ਬ੍ਰਾਹ੍ਮਣਾਨਂ ਪਦਾਪਯਿ.

੪੩. ਅਮਚ੍ਚਪਮੁਖਾ ਚਾਪਿ, ਜਨਾਪੁਰਨਿਵਾਸਿਨੋ;

ਕਦਲੀਤੋਰਣਾਦੀਹਿ, ਰਾਜਧਾਨੀ ਮਨੇਕਧਾ.

੪੪. ਅਲਙ੍ਕਰਿਤ੍ਵਾ ਸਕਲਂ, ਸੁਮਣ੍ਡਿਤਪਸਾਧਿਤਾ;

ਛਣਂ ਮਹਨ੍ਤਂ ਵਤ੍ਤੇਸੁਂ, ਕਤਿਪਾਹਂ ਮਨੋਰਮਂ.

੪੫. ਵੇਦੇ ਵੁਤ੍ਤਵਿਧਾਨੇਨ, ਜਾਤਕਮ੍ਮਾਦਿਕਂ ਵਿਧਿਂ;

ਸਬ੍ਬਂ ਸਮਾਪਯਿਤ੍ਵਾਨ, ਕੁਮਾਰਸ੍ਸਾ’ਵਨੀਪਤਿ.

੪੬. ਪੁਰੋਹਿਤਾਦਯੋ ਵਿਪ੍ਪੇ, ਤਤੋ ਲਕ੍ਖਣਪਾਠਕੇ;

ਆਣਾਪੇਤ੍ਵਾਨ ਸਕ੍ਕਾਰ-ਸਮ੍ਮਾਨਵਿਧਿਪੁਬ੍ਬਕਂ.

੪੭. ਨਿਯੋਜੇਸਿ ਕੁਮਾਰਸ੍ਸ, ਲਕ੍ਖਣਾਨਂ ਪਟਿਗ੍ਗਹੇ;

ਸਾਧਕਂ ਸਕਲਂ ਤਸ੍ਸ, ਯਤ੍ਥਪਾਦਾਦਿਲਕ੍ਖਣਂ.

੪੮. ਉਪਧਾਰਿਯ ਮਹਾਮਚ੍ਚ-ਗਣਮਜ੍ਝਗਤਸ੍ਸ ਤੇ;

ਰਾਜਿਨੋ ਦੇਵਿਯਾ ਚਾਪਿ, ਪਕਾਸੇਸੁਂ ਪਮੋਦਿਤਾ.

੪੯. ਲਙ੍ਕਾਦੀਪਂ ਠਪੇਤ੍ਵਾਨ, ਜਮ੍ਬੁਦੀਪਤਲਮ੍ਪਿ ਚ;

ਏਕਚ੍ਛਤ੍ਤਙ੍ਕਿਤਂ ਕਤ੍ਵਾ-ਨੁਭੋਤ੍ਤੁਂ ਨਿਪੁਣੋ ਇਤਿ.

੫੦. ਤੇ ਸਨ੍ਤਪ੍ਪਿਯ ਭੋਗੇਹਿ, ਭਿਯ੍ਯੋ ਪੁਚ੍ਛਿਤ੍ਥ ਸਾਦਰਂ;

ਸਨ੍ਦਿਸ੍ਸਮਾਨਂ ਯਂਕਿਞ੍ਚਿ, ਅਰਿਟ੍ਠਂ ਅਤ੍ਥਿ ਨਤ੍ਥੀ’ਤਿ.

੫੧. ਦੀਘਾਯੁਕੋ ਕੁਮਾਰੋ’ਯਂ, ਕਿਞ੍ਚਿ ਪਞ੍ਞਾਯਤੇ ਵਤ;

ਜਨਕਾਰਿਟ੍ਠਯੋਗੋ’ਤਿ, ਤੇ ਮਹੀਪਤਿਨੋ’ਬ੍ਰਵੁਂ.

੫੨. ਤਸ੍ਸਾਰਿਜਨਸਮ੍ਮਦ੍ਦਿ-ਪਤਾਪਭੁਜਯੋ ਗਤੋ;

ਸੋ ਪਰਕ੍ਕਮਬਾਹੂ’ਤਿ, ਅਨ੍ਵਤ੍ਥਨਾਮਮਗ੍ਗਹੀ.

੫੩. ਕਣ੍ਣਵੇ ਧਮਹਞ੍ਚੇਵ, ਅਨ੍ਨੁਪਾਸਨਮਙ੍ਗਲਂ;

ਕਾਰਾਪਿਯ ਵਿਧਾਨਞ੍ਞੂ, ਯਥਾਵਿਧਿਮਸੇਸਤੋ.

੫੪. ਰਞ੍ਞੋ ਵਿਕ੍ਕਮਬਾਹੁਸ੍ਸ, ਸਪੁਤ੍ਤੁਪ੍ਪਤ੍ਤਿਸਾਸਨਂ;

ਵਤ੍ਤੁਂ ਸਦੂਤੇ ਪੇਸੇਸਿ, ਪੁਲਤ੍ਥਿਨਗਰਂ ਤਦਾ.

੫੫. ਤੇਹਿਸੋ ਭਾਗਿਨੇਯ੍ਯਸ੍ਸ, ਮਹਾਭਾਗਤ੍ਤਨਮ੍ਪਿ ਚ;

ਜਨਕਾਰਿਟ੍ਠਯੋਗਞ੍ਚ, ਸੁਤ੍ਵਾ ਵਿਕ੍ਕਮਬਾਹੁਸੋ.

੫੬. ਧਞ੍ਞਂ ਵਿਜਯਰਾਜਾਦਿ-ਰਾਜਮਾਲਾਯ ਨਾਯਕਂ;

ਮਣਿਂਵ ਭਾਸੁਰਂ ਮਯ੍ਹਂ, ਭਾਗਿਨੇਯ੍ਯਂ ਜਨੇਸਿਸੋ.

੫੭. ਹਾਨਿ ਯਾਕਾਚਿਸਤਤਂ, ਯਥਾ ਤਸ੍ਸ ਨ ਹੇਸ੍ਸਤਿ;

ਤਥਾ ਮਮਨ੍ਤਿਕੇਯੇਵ, ਕੁਮਾਰੋ ਏਤ੍ਥ ਵਡ੍ਢਤਂ.

੫੮. ਅਲਦ੍ਧਂ ਲਭਿਤੁਂ ਲਾਭਂ, ਲਦ੍ਧਞ੍ਚ ਪਰਿਰਕ੍ਖਿਤੁਂ;

ਸਬ੍ਬਥਾ ਨ ਸਮਤ੍ਥੋਯਂ, ਪੁਤ੍ਤੋ ਗਜਬਾਹੁ ਮਮ.

੫੯. ਸੂਰਭਾਵਾਦਿਯੁਤ੍ਤੋ’ਪਿ, ਮਹਿਨ੍ਦਵ੍ਹਪਰੋਸੁਤੋ;

ਨਿਹੀਨੋ ਮਾਤੁਗੋਤ੍ਤੇਨ, ਨ ਰਜ੍ਜਸ੍ਸ ਰਹੋ ਮਮ.

੬੦. ਠਿਤਸ੍ਸ ਵਿਕ੍ਕਜਾਤੇਨ, ਨੇਕਸੋ ਸਞ੍ਚਿਤੇਨ ਮੇ;

ਰਜ੍ਜਸ੍ਸ ਭਾਗਿਨੇਯ੍ਯੋ’ਵ, ਕਾਮਂ ਭਾਗੀ ਭਵਿਸ੍ਸਤਿ.

੬੧. ਇਤਿਪੇਸੇਸਿ ਦੂਤੇ ਸੋ, ਆਨੇਤੁਂ ਤਂ ਕੁਮਾਰਕਂ;

ਕੁਮਾਰਾ ਭਰਣਂ ਦਤ੍ਵਾ, ਸੇਸਂ ਸਾਰਞ੍ਚੁਪਾਯਨਂ.

੬੨. ਸਬ੍ਬਂ ਦੂਤਮੁਖਾ ਸੁਤ੍ਵਾ, ਵੀਰਬਾਹੁ ਮਹੀਪਤਿ;

ਤਸ੍ਸੇਤਂ ਵਚਨਂ ਯੁਤ੍ਤਂ, ਵੁਤ੍ਤਂ ਮੇਹਿਤ ਬੁਦ੍ਧਿਯਾ.

੬੩. ਤਥਾਪਿ ਚ ਨਿਜਾਰਿਟ੍ਠ-ਪਟਿਕਾਰਤ੍ਥਮੀਦਿਸਂ;

ਓਰਸਂ ਪੁਤ੍ਤਰਤਨਂ, ਪੇਸੇਤੁਂ ਨਾ’ਨੁਰੂਪਕਂ.

੬੪. ਕਿਞ੍ਚ ਤਤ੍ਥ ਕੁਮਾਰਮ੍ਹਿ, ਨੀਤੇ ਵਿਕ੍ਕਮ ਬਾਹੁਨੋ;

ਪਕ੍ਖੋ ਲਦ੍ਧਮਹਾਵਾਹ-ਬਲੋ ਵਿਯ ਹੁਤਾਸਨੋ.

੬੫. ਅਚ੍ਚੁਨ੍ਨਤੇਨ ਮਹਤਾ, ਤੇਜਸਾ ਸਞ੍ਜਲਿਸ੍ਸਤਿ;

ਹਾਨਿਰੇਵ ਵਤਮ੍ਹਾਕਂ, ਮਹਤੀ ਹੇਸ੍ਸਤੇ ਭੁਸਂ.

੬੬. ਇਤਿ ਹਤ੍ਥੇ ਗਤਾਨਂ ਸੋ, ਦੂਤਾਨਂ ਥਨਯਂ ਸਕਂ;

ਅਪੇਸੇਤ੍ਵਾ ਵਿਸਜ੍ਜੇਸਿ, ਪਸਾਦਿਯ ਮਨੇਨ ਸੋ.

੬੭. ਸਪੁਤ੍ਤਦਾਰੇਹਿ ਸਮਗ੍ਗਵਾਸਂ,

ਨਰਾਦਿਨਾਥੋ ਨਿਵਸਂ ਤਹਿਂਸੋ;

ਤਿਬ੍ਬੇਨ ਫੁਟ੍ਠੋ ਮਹਤਾਗਦੇਨ,

ਰਜ੍ਜੇਨ ਸਦ੍ਧਿਂ ਵਿਜਹਿਤ੍ਥ ਦੇਸਂ.

ਸੁਜਨਪ੍ਪਸਾਦਸਂਵੇ ਗਤ੍ਥਾਯ ਕਤੇ ਮਹਾਵਂਸੇ

ਕੁਮਾਰੋਦਯੋ ਨਾਮ

ਸਟ੍ਠਿਮੋ ਪਰਿਚ੍ਛੇਦੋ.