ਏਕਸਟ੍ਠਿਮ ਪਰਿਚ੍ਛੇਦ

ਸਙ੍ਖਤ੍ਥਲਿਪੁਰਾਭਿਗਮਨੋ

੧. ਸੁਤ੍ਵਾ ਦ੍ਵੇ ਭਾਤਰੋ ਅਞ੍ਞੇ, ਜੇਟ੍ਠਸ੍ਸੋ ਪਰਤਿਂਸਦਾ;

ਖਿਪ੍ਪਂ ਸਰਟ੍ਠਾ ਆਗਮ੍ਮ, ਕਾਰੇਸੁਂ ਅਨ੍ਤਿਮਂ ਵਿਧਿਂ.

੨. ਅਥ ਕਿਤ੍ਤਿਸਿਰਿਮੇਘੋ, ਰਟ੍ਠਂ ਜੇਟ੍ਠਸ੍ਸ ਭਾਤੁਨੋ;

ਅਤ੍ਤਾਧੀਨਂ ਕਰਿਤ੍ਵਾਨ, ਆਮਨ੍ਤਿਯ ਕਣਿਟ੍ਠਕਂ.

੩. ਦਤ੍ਵਾ ਰਟ੍ਠਦ੍ਵਯਂ ਅਞ੍ਞਂ, ਵਤ੍ਥੁਂ ਤਤ੍ਥੇਵ ਆਦਿਸਿ;

ਸੋ’ਪਿ ਜੇਟ੍ਠਸ੍ਸ ਭਾਤੁਸ੍ਸ, ਵਚਨਂ ਸਮ੍ਪਟਿਚ੍ਛਿਯ.

੪. ਸਮਾਦਾਯ ਕੁਮਾਰਞ੍ਚ, ਦੇਵਿਞ੍ਚ ਰਤਨਾਵਲਿਂ;

ਧੀਤਰੋ ਦ੍ਵੇ ਚ ਗਨ੍ਤਾਨ, ਮਹਾ ਨਾਮਹੁਲਂ ਪੁਰਂ.

੫. ਸਮਗ੍ਗਾ ਨਿਵਸਂ ਤਤ੍ਥ, ਕੁਮਾਰਸ੍ਸ ਸਿਖਾਮਹਂ;

ਕਾਰੇਤ੍ਵਾ ਪਰਿਹਾਰੇਨ, ਵਡ੍ਢੇਸਿ ਮਹਤਾ ਸਦਾ.

੬. ਤਤੋ ਸੋ ਦੇਵਿਯਾ ਜੇਟ੍ਠਂ-ਧੀਤਰਂ ਮਿਤ੍ਤਨਾਮਿਕਂ;

ਦਾਤੁਕਾਮੋ ਸਪੁਤ੍ਤਸ੍ਸ, ਸਹਾਮਚ੍ਚੇਹਿ ਮਨ੍ਤਯਿ.

੭. ਕਾਲਿਙ੍ਗਨ੍ਵਯਸਮ੍ਭੂਤਾ, ਪਾਯੇਨਖਲੁ ਭੂਮਿਪਾ;

ਸਾਮਿਭਾਵਂ ਗਤਾ ਅਸ੍ਮਿਂ, ਲਙ੍ਕਾਦੀਪਮ੍ਹੀ ਭੂਯਸੋ.

੮. ਕਾਲਿਙ੍ਗਗੋਤ੍ਤ ਸਮ੍ਭੂਤ, ਗਜਬਾਹੁਸ੍ਸ ਦਾਤਵੇ;

ਗੂਲ਼ਰੂਪੇਨ ਦੇਵੀ’ਯਂ, ਯਦਿ ਪੇਸੇਯ੍ਯ ਧੀਤਰਂ.

੯. ਭਿਯ੍ਯੋ ਵਿਵਾਹਸਮ੍ਬਦ੍ਧੋ, ਬਲਵਾ ਸੋ ਭਵਿਸ੍ਸਤਿ;

ਮਯ੍ਹਂ ਏਸੋ ਨਿਰਾਲਮ੍ਬੋ, ਪੁਤ੍ਤੋ ਹੇਹੀਤਿ ਸਬ੍ਬਥਾ.

੧੦. ਤਸ੍ਮਾ ਮੇ ਸੁਨੂਨੋ ਏਸਾ, ਦਾਤੁਂ ਯੁਤ੍ਤਾ ਕੁਮਾਰਿਕਾ;

ਏਵਂ ਸਤਿ ਵਤਮ੍ਹਾਕਂ, ਵਡ੍ਢਿਯੇ’ਵ ਸਿਯਾ ‘‘ਇਤਿ’’.

੧੧. ਦੇਵੀਪਿ ਸੁਤ੍ਵਾ ਤਂ ਸਬ੍ਬ-ਮਾਦਿਚ੍ਚਨ੍ਵਯ ਮਣ੍ਡਨਾ;

ਸਬ੍ਬਥਾ ਤਮਨਿਚ੍ਛਨ੍ਤਿ, ਇਦਮਾਹ ਮਹੀਪਤਿਂ.

੧੨. ਘਾਤੇਤ੍ਵਾ ਸਕਲੇ ਯਕ੍ਖੇ, ਕੁਮਾਰੋ ਵਿਜਯਵ੍ਹਯੋ;

ਲਂਕਾਦੀਪਮਿਮਂ’ਕਾਸਿ, ਮਨੁਸ੍ਸਾਵਾਸਕਂ ਸਦਾ.

੧੩. ਤਤੋ ਪਭੁਤਿ ਅਮ੍ਹਾਕਂ, ਘਟੇਸੁਂ ਵਿਜਯਨ੍ਵਯਂ;

ਕਾਲਿਙ੍ਗਵਂਸਜੇਹੇਵ, ਸਮ੍ਬਨ੍ਧਂ ਕਤ੍ਵ ਪੁਬ੍ਬਕਂ.

੧੪. ਅਞ੍ਞਭੂਪਾਲ ਸਮ੍ਬਨ੍ਧੋ, ਸੁਤਪੁਬ੍ਬੋ ਪਿਨਤ੍ਥਿਨੋ;

ਸੋਮਵਂਸ ਸਮੁਮ੍ਭੂਤੇ, ਠਪੇਤ੍ਵਾ ਧਰਣਿਸ੍ਸਰੇ.

੧੫. ਤੁਯ੍ਹਂ ਜਾਤੋਤਿ ਅਮ੍ਹਾਕਂ, ਸਮ੍ਬਨ੍ਧੋ ਸੋ ਕਥਂ ਸਿਯਾ;

ਅਰਿਯਨ੍ਵਯ ਸਮ੍ਭੂਤ, ਕੁਮਾਰੇਨ ਸਹਾਮੁਨਾ.

੧੬. ਏਵਂ ਸੋ ਦੇਵਿਯਾ ਤਾਯ, ਨੇਕਸੋ ਵਾਰਯਨ੍ਤਿਯਾ;

ਪਸਯ੍ਹਸਕ ਪੁਤ੍ਥਸ੍ਸ, ਤਂ ਕੁਮਾਰਿਮਦਾਪਯਿ.

੧੭. ਸੋ ਅਨੇਕਗੁਣੋਦਾਰ- ਭਰਿਯਾਨੁਗਤੋ ਤਤੋ;

ਰਞ੍ਜਯਨ੍ਤੋ ਜਨੇ ਸਬ੍ਬੇ, ਜਨਕਸਨ੍ਤਿਕੇ ਵਸਿ.

੧੮. ਏਕਵੀਸਤਿਂ ਵਸ੍ਸਾਨਿ, ਰਜ੍ਜਂ ਵਿਕ੍ਕਮ ਬਾਹੁਸੋ;

ਅਨੁਭੋਤ੍ਵਾ ਯਥਾਕਮ੍ਮਂ, ਕਾਯਭੇਦਾ ਗਤੋ ਪਰਂ.

੧੯. ਤਤੋ ਗਜਭੁਜੋ ਠਿਤਂ, ਸਮ੍ਪਨ੍ਨਬਲਵਾਹਨਂ;

ਰਜ੍ਜਂ ਹਤ੍ਥਗਤਂ ਕਤ੍ਵਾ, ਪੁਲਤ੍ਤਿਨਗਰੇ ਵਸੀ.

੨੦. ਤਤੋ ਕਿਤ੍ਤਿਸਿਰੀਮੇਘ, ਸਿਰੀਵਲ੍ਲਭ ਭੂਮਿਪਾ;

ਵੁਤ੍ਤਨ੍ਤ ਮੇਤਂ ਵਿਞ੍ਞਾਯ, ਏਵਂ ਸਮਨੁਚਿਨ੍ਤਯੁਂ.

੨੧. ਤਸ੍ਸ ਵਿਕ੍ਕਮ ਬਾਹੁਸ੍ਸ, ਵੁਦ੍ਧਭਾਵੇਨ ਨੇਕਧਾ;

ਮੂਲਰਜ੍ਜਾਧਿਪਚ੍ਚਂ ਤਂ, ਅਮ੍ਮਂ ਨਿਨ੍ਦਾਕਰਂ ਨ ਹਿ.

੨੨. ਤਦਤ੍ਥਜਸ੍ਸ ਬਾਲਸ੍ਸ, ਮੂਲਰਜ੍ਜਂ ਪਸਾਸਨੋ;

ਉਪੇਕ੍ਖਣਂ ਪਨਮ੍ਹਾਕਂ, ਨੇਵਾਨੁਚ੍ਛਵਿਕਂ ਵਤ.

੨੩. ਤੇ ਸੋਯਾਵ ਸਰਜ੍ਜਮ੍ਹਿ, ਬਦ੍ਧਮੂਲੋ ਭਵਿਸ੍ਸਤਿ;

ਪਸਯ੍ਹ ਤਾਵ ਤਂ ਰਜ੍ਜਂ, ਵਟ੍ਟਤਿ ਗਣ੍ਹਿਤੁਂ ਇਤਿ.

੨੪. ਵੇਲਕ੍ਕਾਰ ਬਲਂ ਸਬ੍ਬਂ, ਭਿਨ੍ਦਿਂਸੁ ਧਨ ਦਾਨਤੋ;

ਠਪੇਤ੍ਵਾ ਸੇਵਕੇ ਕੇਚਿ, ਤਸ੍ਸਬ੍ਭਨ੍ਤਰਿਕੇ ਤਦਾ.

੨੫. ਗਜਬਾਹੁ ਮਹੀਪਾਲੇ, ਵਿਰਤ੍ਤਾ ਰਟ੍ਠਵਾਸਿਨੋ;

ਉਭਿਨ੍ਨਂ ਰਾਜੂਨਂ ਦੂਤੇ, ਪੇਸਯੁਂ ਨੇਕਸੋ ਤਤੋ.

੨੬. ਰਜ੍ਜਂ ਸਾਧੇਤ੍ਵਾ ਦਸ੍ਸਾਮ, ਏਕੀਭੂਤਾ ਮਯਂ ਪਨ;

ਉਪਤ੍ਥਮ੍ਭਕਭਾਵੋ’ਵ, ਕਾਤਬ੍ਬੋ ਕੇਵਲਂ ਇਤਿ.

੨੭. ਤਤੋ ਦ੍ਵੇ ਭਾਤੁਕਾ ਸੇਨਂ, ਸਕਂ ਸਨ੍ਨਯ੍ਹ ਵੇਗਸਾ;

ਉਭਤੋ ਮੁਖਤੋ ਤਸ੍ਸ, ਰਟ੍ਠਮਜ੍ਝਮੁਪਾਗਮੁਂ.

੨੮. ਪਹਿਣਿਂਸੁ ਚ ਤੇ ਦੂਤੇ, ਤਤੋ ਗਜਬੋਹੁਵ੍ਹਯੋ;

ਭੂਮਿਪਾਲੋ ਨਿਜਾਮਚ੍ਚੇ, ਸਨ੍ਨਿਪਾਤਿਯ ਮਨ੍ਤਯਿ.

੨੯. ਵੇਲ਼ਕ੍ਕਾਰਬਲਂ ਸਬ੍ਬ-ਮੁਜੁਪਚ੍ਚਤ੍ਤਿਕਂ ਅਹੁ;

ਰਾਜਾਨੋ ਦ੍ਵੇ ਚ ਨੋ ਰਟ੍ਠਂ, ਸਙ੍ਗਾਮਤ੍ਥਮੁਪਾਗਤਾ.

੩੦. ਪਠਮਂ ਤੇਸੁ ਪਕ੍ਖਸ੍ਸ, ਏਕਸ੍ਸ ਬਲਿਨੋ ਭੁਸਂ;

ਮੁਖਭਙ੍ਗੇ ਕਤੇ ਖਿਪ੍ਪਂ, ਤਤੋ ਅਞ੍ਞੇ ਸੁਸਾਧਿਯਾ.

੩੧. ਇਤਿ ਨਿਚ੍ਛਿਯ ਸੇਨਙ੍ਗਂ, ਸਬ੍ਬਮਾਦਾਯ ਅਤ੍ਤਨੋ;

ਸਿਰਿਵਲ੍ਲਭਰਾਜਾਭਿ-ਮੁਖਂ ਯੁਦ੍ਧਾ’ਯੁਪਾਗਮਿ.

੩੨. ਸਿਰਿਵਲ੍ਲਭਰਾਜਾਪਿ, ਸਙ੍ਗਾਮ ਮਹਿਭਿਂਸਨਂ;

ਪਾਤੋ ਪਟ੍ਠਾਯ ਸਾਯਨ੍ਹ-ਕਾਲਂ ਯਾਵ ਪਵਤ੍ਤਯਂ.

੩੩. ਅਸਕ੍ਕੁਣਨ੍ਤੋ’ਭਿਭਵਂ, ਵਿਧਾਤੁਂ ਤਸ੍ਸ ਕਞ੍ਚਿਪਿ;

ਤਤੋਵ ਸੋ ਨਿਵਤ੍ਤਿਤ੍ਵਾ, ਸਕਂ ਰਟ੍ਠਂ ਗਤੋ ਲਹੁਂ.

੩੪. ਗਜਬਾਹੁਸ੍ਸਗੋਕਣ੍ਣ-ਸਚਿਵੇਨ ਪਰਾਜਿਤੋ;

ਅਗਾ ਰਟ੍ਠਂ ਸਕਂ ਕਿਤ੍ਤਿ-ਸਿਰਿਮੇਘੋ’ਪਿ ਭੂਪਤਿ.

੩੫. ਗਜਬਾਹੁਨਰਿਨ੍ਦੋਪਿ, ਸਙ੍ਗਾਮੇ ਤਮ੍ਹਿ ਕਿਞ੍ਚਿਪਿ;

ਪਰਿਹਾਨਿਮਸਮ੍ਪਤ੍ਤੋ, ਪੁਨਾ’ਗਮ੍ਮ ਪੁਰਨ੍ਤਿਕਂ.

੩੬. ਬਲਨਾਥੇ ਵਿਨਿਗ੍ਗਯ੍ਹ, ਸਾਪਰਾਧੇ ਬਹੂ ਬਲੀ;

ਰਟ੍ਠਂ ਵੂਪਸਮੇਤ੍ਵਾਨ, ਪਾਵੇਕ੍ਖਿ ਨਗਰਂ ਸਕਂ.

੩੭. ਰਟ੍ਠੇ ਸਕੇ ਸਕੇਯੇਵ, ਤਤੋ ਪਭੂਤਿ ਭੂਮਿਪਾ;

ਅਞ੍ਞੋਞ੍ਞਮਿਤ੍ਤੇ ਸਮ੍ਬਨ੍ਧਂ, ਵਿਧਾਯ ਵਿਹਰਿਂਸੁ ਤੇ.

੩੮. ਤਤੋ ਪਰਕ੍ਕਮਭੁਜੋ, ਧਰਣੀ ਪਾਲਨਨ੍ਦਨੋ;

ਮੇਧਾਵੀਨੇਕਸਿਪ੍ਪੇਸੁ, ਸਿਕ੍ਖਮਾਨੋ ਸੁਸਾਧੁਕਂ.

੩੯. ਵਿਚਾਰਕ੍ਖਮਪਞ੍ਞਤ੍ਤਾ, ਕਿਚ੍ਚਾ ਕਿਚ੍ਚੇਸੁ ਨੇਕਸੋ;

ਅਚ੍ਚੁਲ਼ਾਰਾਸਯਤ੍ਤਾ ਚ, ਮਹਾਭਾਗਤ੍ਤਨੇਨ ਚ.

੪੦. ਅਤ੍ਤਨੋ ਮਾਤੁਭਗਿਨੀ, ਸਹਵਾਸ ਸੁਖਮ੍ਹਿ ਚ;

ਅਲਗ੍ਗਮਾਨਸੋਨੇਕ, ਬਲਾਕੀਲ਼ਾਰਸੇਸੁ ਚ.

੪੧. ਸੂਰਭਾਵਾਦਿਸਂਯੁਤ੍ਤਾ, ਰਾਜਪੁਤ੍ਤਾ ਤੁ ਮਾਦਿਸਾ;

ਪਚ੍ਚਨ੍ਤੇ ਈਦਿਸੇ ਦੇਸੇ, ਕਥਂ ਨਾਮ ਵਸਿਸ੍ਸਰੇ.

੪੨. ਜਾਤਦੇਸਞ੍ਚ ਮੇ ਦਾਨਿ, ਯੁਵਰਾਜਪਭੋਗਿਯਂ;

ਗਮਿਸ੍ਸਾਮੀਤਿ ਨਿਗ੍ਗਞ੍ਛਿ, ਤਮ੍ਹਾ ਪਰਿਜਨਤ੍ਥਿਤੋ.

੪੩. ਕਮੇਨ ਸਨ੍ਤਿਕਂ ਸਙ੍ਖ-ਨਾਯਕਤ੍ਥਲਿਸਞ੍ਞਿਨੋ;

ਗਾਮਸ੍ਸਾਗਾ ਅਹਿਂ ਕਿਤ੍ਤਿ-ਸਿਰਿਮੇਘੋ ਨਿਸਮ੍ਮ ਤਂ.

੪੪. ਅਭਾਵਾ ਰਜ੍ਜ ਦਾਯਾਦ-ਸਮਾਨਸ੍ਸ’ਤ੍ਰਜਸ੍ਸ ਮੇ;

ਏਕਾਕੀ’ਹਨ੍ਤਿ ਯੋ ਚਿਤ੍ਤ-ਸਨ੍ਤਾਪੋ ਸਨ੍ਤਤਂ ਗਤੋ.

੪੫. ਜੇਟ੍ਠਂਵ ਭਾਤਰਂ ਮਯ੍ਹਂ, ਤਂ ਦੇਹਪਟਿਬਿਮ੍ਬਕਂ;

ਦਟ੍ਠੁਂ ਮੇ ਸਤ੍ਤਤਂ ਪੁਞ੍ਞਂ, ਮਹਨ੍ਤਮੁਦਿਤਂਤਿਚ.

੪੬. ਪਾਮੁਜ੍ਜਵੇਗਵਸਗੋ, ਨਗਰਂ ਤਂ ਮਨੋਹਰਂ;

ਅਲਙ੍ਕਾਰਾ ਪਯਿਤ੍ਵਾਨ, ਤੋਰਣਾਦੀਹਿ ਨੇਕਧਾ.

੪੭. ਗਨ੍ਤ੍ਵਾ ਪਟਿਪਥਂਯੇਵ, ਬਲੋਘਪਰਿਵਾਰਿਤੋ;

ਨਰਿਨ੍ਦੋ ਤਿਥਿਨਕ੍ਖਤ੍ਤ-ਵਿਸੇਸੇ ਸੁਭਸਮ੍ਮਤੇ.

੪੮. ਅਨਞ੍ਞਸਾਧਾਰਣਤਂ, ਸਮ੍ਪਤ੍ਤੇਹਿ ਗੁਣੇਹਿ ਚ;

ਲਕ੍ਖਣੇਹਿ ਚ ਸਬ੍ਬੇਹਿ, ਕਲ੍ਯਾਣੇਯਿ ਸੁਸਂਯੁਤਂ.

੪੯. ਦਿਸ੍ਵਾ ਕੁਮਾਰਂ ਸਨ੍ਤੁਟ੍ਠੋ, ਆਲਿਙ੍ਗਿਤ੍ਵਾਨ ਪੇਮਤੋ;

ਉਰੇ ਕਤ੍ਵਾਨ ਚੁਮ੍ਬਿਤ੍ਵਾ, ਮਤ੍ਥਕਮ੍ਹਿ ਪੁਨਪ੍ਪੁਨਂ.

੫੦. ਜਨਸ੍ਸ ਬਲਤੋ ਤਸ੍ਸ, ਪਸ੍ਸਤੋ ਲੋਚਨੇਹਿ ਸੋ;

ਸਨ੍ਤੋਸ ਅਸ੍ਸੁਧਾਰਾਯੋ, ਵਸ੍ਸਾਪੇਨ੍ਤੋ ਨਿਰਨ੍ਤਰਂ.

੫੧. ਮਨੁਞ੍ਞਮੇਕ ਮਾਰੁਯ੍ਹ, ਵਾਹਨਂ ਸਹ ਸੂਨੁਨਾ;

ਭੇਰਿਨਿ ਦੇਨ ਪੂਰੇਨ੍ਤੋ, ਦਿਸਾ ਦਸ ਸਮਨ੍ਤਤੋ.

੫੨. ਪਵਿਸਿਤ੍ਵਾ ਪੁਰਂ ਤਤ੍ਥ, ਅਲਙ੍ਕਾਰੇ ਮਨੋਰਮੇ;

ਦਸ੍ਸਯਨ੍ਤੋ ਸਪੁਤ੍ਤਸ੍ਸ, ਪਾਵਿਸਿ ਰਾਜਮਨ੍ਦਿਰਂ.

੫੩. ਲਦ੍ਧਾ ਤਤੋ ਕਞ੍ਚੁਕੀ-ਸੁਪਕਾਰ,

ਵਗਾਦਿਨੇਕੇ ਪਰਿਚਾਰਕੇ ਸੋ;

ਨਾਨਾਗੁਣਾ ਰਾਧਿਤਮਾਨਸਸ੍ਸ,

ਵਸੀਸਕਾਸੇ ਪਿਤੁਨੋ ਸੁਖੇਨ.

ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਸਙ੍ਖਤ੍ਥਲਿਪੁਰਾਭਿਗਮਨੋ ਨਾਮ

ਏਕਸਟ੍ਠਿਮੋ ਪਰਿਚ੍ਛੇਦੋ.