ਏਕੂਨਸਟ੍ਠਿਮ ਪਰਿਚ੍ਛੇਦ

ਚਤੁਰਾਜਚਰਿਯ ਨਿਦ੍ਦੇਸੋ

੧. ਤਦਾਰਞ੍ਞੋ ਨੁਜਾਮਿਤ੍ਤਾ, ਤਸ੍ਸ ਪੁਤ੍ਤਾ ਤਯੋ’ਪਿ ਚ;

ਮਹਾਮਚ੍ਚਾ ਚਯਤਯੋ, ਤਥਾ ਯਤਨਵਾਸਿਨੋ.

੨. ਤਬ੍ਬੇਤੇ ਆਦਿਪਾਦਸ੍ਸ, ਰੋਹਣੇ ਵਸਤੋ ਸਤੋ;

ਅਨਾਰੋਚਾਪਯਿਤ੍ਵਾਨ, ਭੂਪਾਲਮਤਸਾਸਨਂ.

੩. ਸਮ੍ਭੂਯਮਨ੍ਤਯਿਤ੍ਵਾਨ, ਸਮਾਨਚ੍ਛਨ੍ਦਤਂ ਗਤਾ;

ਅਦਂਸੁ ਯੁਵਰਾਜਸ੍ਸ, ਲਙ੍ਕਾਰਜ੍ਜਾਭਿਸੇਚਨਂ.

੪. ਓਪਰਜ੍ਜੇ ਨਿਵੇਸੇਸੁਂ, ਮਾਨਭਰਣਨਾਮਕਂ;

ਕੁਮਾਰਂ ਪੁਬ੍ਬਚਾਰਿਤ੍ਤ-ਮਗ੍ਗਂ ਲਙ੍ਘਿਤ੍ਥ ਤੇ’ਖਿਲਾ.

੫. ਤਯੋ’ਥ ਭਾਤਰੋ ਸਬ੍ਬੇ, ਤੇ ਮਾਣਭਰਣਾਦਯੋ;

ਜਯਬਾਹੁਮਹੀਪਾਲ-ਸਹਿਤਾ ਸਹਸਾ ਤਦਾ.

੬. ਮੁਤ੍ਤਾਮਣਿਪ੍ਪਭੂਤਿਕਂ, ਰਤਨਂ ਸਾਰਸਮ੍ਮਤਂ;

ਸਬ੍ਬਂ ਹਤ੍ਥਗਤਂ ਕਤ੍ਵਾ, ਵਾਹਨਞ੍ਚ ਗਜਾਦਿਕਂ.

੭. ਸਕਲਂ ਬਲਮਾਦਾਯ, ਪੁਲਤ੍ਥਿਨਗਰਾ ਤਦਾ;

ਖਿਪ੍ਪਂ ਤਂ ਵਿਕ੍ਕਮਭੁਜਂ, ਗਣ੍ਹਿਸਾਮਾ’ਤਿ ਨਿਕ੍ਖਮੁਂ.

੮. ਸੁਤ੍ਵਾ ਪਵਤ੍ਤਿਂ ਸਕਲਂ, ਇਮਂ ਵਿਕ੍ਕਮਬਾਹੁਸੋ;

ਤਾ ਤਸ੍ਸਨ੍ਤਿਮਸਕ੍ਕਾਰਂ, ਵਿਧਾਤੁਂ ਹਨ੍ਦਨੋ ਲਭਿਂ.

੯. ਇਦਾਨਿ ਖਿਪ੍ਪਂ ਗਨ੍ਤ੍ਵਾਨ, ਪੁਲਤ੍ਥਿਨਗਰਂ ਤਹਿਂ,

ਤਾ ਤਸ੍ਸਾਲ਼ਾਹਨਟ੍ਠਾਨ ਦਸ੍ਸਨੇ ਨੇਵ ਸੋ ਅਹਂ.

੧੦. ਸੋਕਭਾਰਂ ਵਿਨੋਦੇਸ੍ਸਂ, ਮਮ ਚੇਤੋ ਗਤਂ ਇਤਿ;

ਕਤਦਲ਼੍ਹ ਵਵਤ੍ਥਾਨੋ, ਵਿਨਿਗ੍ਗਮ੍ਮ ਤਤੋ ਪੁਰਾ.

੧੧. ਪੁਲਤ੍ਥਿਪੁਰਮਾਗਚ੍ਛਂ, ਆਦਿਪਾਦੋ’ਤਿ ਸਾਸਸੋ;

ਸਤ੍ਤਟ੍ਠਸਤਸਙ੍ਖੇਨ, ਬਲੇਨ ਪਰਿਵਾਰਿਤੋ.

੧੨. ਅਨ੍ਤਰਾਲਪਥੇਯੇਵ, ਗੁਤ੍ਤਹਾਲਕਮਣ੍ਡਲੇ;

ਗਾਮੇ ਪਨ ਸਮੁਕ੍ਕਵ੍ਹੇ, ਦਿਸ੍ਵਾ ਸੇਨਙ੍ਗਮਾਗਤਂ.

੧੩. ਮਹਨ੍ਤਂ ਯੁਦ੍ਧਸਨ੍ਨਦ੍ਧਂ, ਏਕਵੀਰੋ ਭਯਾਤਿਕੋ;

ਯੁਜ੍ਝਿਤ੍ਵਾ ਤੇ ਪਲਾਪੇਸਿ, ਖਣੇਨੇਵ ਦਿਸੋਦਿਸਂ.

੧੪. ਤਯੋ ਤੇ ਭਾਤਰੋ ਤਤ੍ਥ, ਸਮ੍ਪਤ੍ਤਾਵ ਜਯਾ ਤਤੋ;

ਅਭਿਮਾਨੁਦ੍ਧਤਾ ਖਿਪ੍ਪਂ, ਅਨ੍ਨਯ੍ਹ ਬਲਵਾਹਨਂ.

੧੫. ਆਦਿਪਾਦਕਜਮ੍ਬੂਤਿ, ਵਿਸ੍ਸੁਤਮ੍ਹਿ ਪਦੇਸਕੇ;

ਸਙ੍ਗਾਮੇਸੁਂ ਪਰਾਜੇਸਿ, ਭਿਯ੍ਯੋ ਯੁਜ੍ਝਿਤ੍ਥ ਸੋ ਤਯੋ.

੧੬. ਤਤਿਯਂ ਕਟਗਾਮਸ੍ਮਿਂ, ਕਾਲ਼ਵਾਪ੍ਯਂ ਚਤੁਤ੍ਥਕਂ;

ਪਞ੍ਚਮਂ ਉਦ੍ਧਟਦ੍ਵਾਰੇ, ਛਟ੍ਠਂਸੋ ਪਙ੍ਕਵੇਲਕੇ.

੧੭. ਤੇਹਿ ਯੁਦ੍ਧਂ ਕਰਿਤ੍ਵਾਨ, ਗਹੀਤਵਿਜਯੋ ਸਦਾ;

ਪੁਲਤ੍ਥਿਪੁਰਮਾਗਞ੍ਚਿ, ਸਹਾਮਚ੍ਚ ਪਰਿਜ੍ਜਨੋ.

੧੮. ਸਚਿਨ੍ਤਿਤਕ੍ਕਮੇਨੇਵ, ਪਸ੍ਸਿਤ੍ਵਾਲ਼ਾਹਨਂ ਪਿਤੁ;

ਵਿਦੂਰਿਤਮਹਾਸੇਕੋ, ਲਦ੍ਧਸ੍ਸਾਸੋ ਪੁਰੇਵਸਂ.

੧੯. ਦੁਕ੍ਖੇ ਸਹਾਯ ਭੂਤਾਨ-ਮਤ੍ਤਨੋ ਸੋ ਯਥਾਰਹਂ;

ਅਮਚ੍ਚਾਨਮਦਾ ਸਬ੍ਬ-ਭੋਗੇ ਠਾਨਨ੍ਤਰੇ ਹਿ ਸੋ.

੨੦. ਭਟਾਨਞ੍ਚਾਪਿ ਸਬ੍ਬੇਸਂ, ਸਹਾਯਾਤਾਨਮਤ੍ਤਨੋ;

ਅਨੁਰੂਪਮਦਾ ਵੁਤ੍ਤਿਂ, ਸਰਂ ਦੁਕ੍ਖਸਹਾਯਤਂ.

੨੧. ਮਾਣਾਭਰਣਭੂਪੋਪਿ, ਸਦ੍ਧਿਂ ਸੇਸੇਹਿ ਭਾਤੂਹਿ;

ਕਰਿਤ੍ਵਾ ਰੋਹਣਂ ਪਸ੍ਸਂ, ਰੋਹਣਞ੍ਚ ਸਹਤ੍ਥਗਂ.

੨੨. ਤਤੋ ਕਿਤ੍ਤਿਸਿਰੀਮੇਘੇ, ਸਦ੍ਵਾਦਸਸਹਸ੍ਸਕਂ;

ਰਟ੍ਠਂ ਦਤ੍ਵਾਨ ਵਸਿਤੁਂ, ਤਹਿਂਯੇਵ ਸਮਾਦਿਸਿ.

੨੩. ਆਣਤ੍ਤੋ ਭਾਤਰਾਕਿਤ੍ਤਿ-ਸਿਰੀਮੇਘੋ ਜਨਾਧਿਪੋ;

ਗਨ੍ਤ੍ਵਾ ਵਸਿ ਪੁਰੇਤਤ੍ਥ, ਮਹਾਨਾਗਹੁਲਵ੍ਹਯੇ.

੨੪. ਸਿਰੀਵਲ੍ਲਭਨਾਮਸ੍ਸ, ਕੁਮਾਰਸ੍ਸਾਪਿ ਚਾਦਿਸਿ;

ਦੇਸਮਟ੍ਠਸਹਸ੍ਸਵ੍ਹਂ, ਦਤ੍ਵਾਨ ਵਸਿਤੁਂ ਤਹਿਂ.

੨੫. ਤਥੇਵ ਸੋਪਿ ਗਨ੍ਤ੍ਵਾਨ, ਉਦ੍ਧਨਦ੍ਵਾਰਨਾਮਕਂ;

ਗਾਮਂ ਕਤ੍ਵਾ ਰਾਜਦਾਨਿਂ, ਵਸਨ੍ਤੋ ਅਨੁਸਾਸਿਤਂ.

੨੬. ਸਯਞ੍ਚ ਸਹਸੇਨਾਯ, ਗਨ੍ਤ੍ਵਾ ਦਕ੍ਖਿਣਪਸ੍ਸਕਂ;

ਵੀਰਬਾਹੂਤਿ ਪਞ੍ਞਾਤੋ, ਪੁਙ੍ਖਗਾਮਂ ਸਮਾਵਸਿ.

੨੭. ਮਾਤਾ ਚ ਤਿਣ੍ਣਂ ਭਾਤੂਨਂ, ਜਯਬਾਹੁ ਚ ਭੂਮਿਪੋ;

ਨਿਵਸਿਂਸੁ ਤਦਾ ਕਿਤ੍ਤਿ-ਸਿਰਿਮੇਘਸ੍ਸ ਸਨ੍ਤਿਕੇ.

੨੮. ਤਤੋ ਸਂਵਚ੍ਛਰੇ’ਤੀਤੇ, ਤੇ ਮਾਣਭਰਣਾਦਯੋ;

ਤੇਨਤ੍ਤਨਿ ਕਤਂ ਯੁਦ੍ਧੇ, ਸਬ੍ਬਂ ਵਿਕ੍ਕਮਬਾਹੁਨਾ.

੨੯. ਦੁਰਾਰੋਹਂ ਮਹਨ੍ਤਂ ਤਂ, ਪਰਾਜਯਤਰਾਭਵਂ;

ਅਨੁਸ੍ਸਰਨ੍ਤਬਹੁਸੋ, ਅਭਿਮਾਨਸਮੁਨ੍ਨਤਾ.

੩੦. ਮੁਦ੍ਧਾਭਿਸਿਤ੍ਤਰਾਜੂਨ-ਮੇਕਾਕੀਰਾਜਰਟ੍ਠਕਂ;

ਵਿਨਾਯਮਭਿਸੇਕੇਨ, ਕਥਂ ਨਾਮਾਨੁਭੋਸ੍ਸਤਿ.

੩੧. ਇਤਿ ਇਸ੍ਸਾ ਪਰਤ੍ਤਞ੍ਚ, ਯਾਤਾ ਸਙ੍ਗਯ੍ਹਸਾਵਕੇ;

ਭਿਯ੍ਯੋ ਸਮ੍ਭੂਯਸਙ੍ਗਾਮ-ਕਰਣਤ੍ਥਾਯ ਨਿਕ੍ਖਮੁਂ.

੩੨. ਸੁਤ੍ਵਾ ਤਮਤ੍ਥਂ ਦੂਤੇਹਿ, ਸੋ ਵਿਕ੍ਕਮਭੁਜੋਪਿ ਚ;

ਅਗਾ ਤੇਸਂਵ ਵਿਸਯਂ, ਮਹਾਸੇਨਾਪੁਰਕ੍ਖਤੋ.

੩੩. ਦੇਸੇ ਦਕ੍ਖਿਣਕੇ ਬੋਧਿ-ਸੇਨਪਬ੍ਬਤਗਾਮਕੇ;

ਯੁਜ੍ਝਿਤ੍ਵਾ ਤੇ ਪਰਾਜੇਸਿ, ਤਯੋ ਵਿਕ੍ਕਮਬਾਹੁਸੋ.

੩੪. ਰਿਪਵੋ ਦਾਨਿ ਮੇ ਸਬ੍ਬੇ, ਉਮ੍ਮੂਲੇਸ੍ਸਾਮਹਂ ਇਤਿ;

ਪਲਾਯਨ੍ਤੇ ਨੁਬਨ੍ਧਿਤ੍ਥ, ਪਦਾਨੁਪਦਿਕਂ’ਵ ਤੇ.

੩੫. ਤੇ ਚ ਦੁਗ੍ਗਂ ਪਲਾਯਿਂਸੁ, ਪਞ੍ਚਯੋਜਨਰਟ੍ਠਕੇ;

ਖਿਪ੍ਪਂ ਪਾਵੇਕ੍ਖਿ ਕਲ੍ਯਾਣਿਂ, ਸੋ’ਪਿ ਤੇ ਗਹਣਤ੍ਥਿਕੋ.

੩੬. ਵੀਰੋ ਅਰਿਯਦੇਸਿਯੋ, ਵੀਰਦੇਵੋਤਿ ਪਾਕਟੋ;

ਪਲ਼ਨ੍ਦੀਪਿਸ੍ਸਰੋ ਏਕੋ, ਭੂਸਂ ਸਹਸਿਕੋ ਤਦਾ.

੩੭. ਸਦ੍ਧਿਂ ਸੂਰੇਹਿ ਯੋਧੇਹਿ, ਮਹਾਤਿਤ੍ਥਮ੍ਹਿ ਓਤਰਿ;

ਕਾਤੁਂ ਹਤ੍ਥਗਹਂ ਸਕ੍ਕਾ, ਲਂਕਾਦੀਪਨ੍ਤਿ ਚਿਨ੍ਤਿਯ.

੩੮. ਸੋ ਵਿਕ੍ਕਮਭੁਜੋ ਸੁਤ੍ਵਾ, ਪਵਤ੍ਤਿਂ ਭੂਭੁਜੋ ਤਦਾ;

ਯਾਵਤਾ ਨਾਤ੍ਰ ਲਂਕਾਯਂ, ਲਦ੍ਧੋਗਾਹੋ ਭਵਿਸ੍ਸਤਿ.

੩੯. ਤਾਵ ਉਮ੍ਮੂਲਨੀਯੋਤਿ, ਕਲ੍ਯਾਣਿਮ੍ਹਾ ਵਿਨਿਗ੍ਗਤੋ;

ਮਹਾਤਿਤ੍ਥਮ੍ਹਿ ਮਨ੍ਨਾਰ-ਨਾਮਕਂ ਗਾਮਕਂ ਗਤੋ.

੪੦. ਕਤ੍ਵਾਨ ਵੀਰਦੇਵੋ’ਪਿ, ਸਙ੍ਗਾਮਂ ਤੇਨ ਰਾਜਿਨਾ;

ਅਨੀਕਙ੍ਗਾਦਯੋ ਰਾਜ-ਪੁਤ੍ਤੇ ਦ੍ਵੇ ਭਾਤਰੋਪਿ ਚ.

੪੧. ਸੇਨਾਧਿਨਾਯਕਞ੍ਚੇਵ, ਕਿਤ੍ਤਿਨਾਮਪ੍ਪਕਾਸਿਤਂ;

ਘਾਤੇਤ੍ਵਾ ਸਹਸਾ ਵੀਰ-ਸਮ੍ਮਤੇ ਚ ਬਹੂਜਨੇ.

੪੨. ਗਾਹੇਤ੍ਵਾ ਜੀਵਗ੍ਗਾਹਂਸੋ, ਰਕ੍ਖਕਞ੍ਚ ਚਮੂਪਤਿਂ;

ਸਬਲਂ ਤਂ ਪਰਾਜੇਤ੍ਵਾ, ਅਨੁਬਨ੍ਧਿ ਪਦਾਪਦਂ.

੪੩. ਪਲਾਯਮਾਨੋ ਸੋ ਭੀਤੋ, ਆਗਨ੍ਤ੍ਵਾਨ ਨਿਜਂ ਪੁਰਂ;

ਹਤ੍ਥਸਾਰਂ ਸਮਾਦਾਯ, ਕੋਟ੍ਠਸਾਰਂ ਗਤੋ ਲਹੁਂ.

੪੪. ਪਚ੍ਛਤੋ ਪਚ੍ਛਤੋ ਵੀਰ-ਦੇਵੋ ਤਮਨੁਬਨ੍ਧਿਯ;

ਆਗਨ੍ਤ੍ਵਾਨ ਪੁਰੇਵਾਸਂ, ਕਤਿਪਾਹਂ ਵਿਧਾਯਸੋ.

੪੫. ਗਣ੍ਹਿਤੁਂ ਵਿਕ੍ਕਮਭੁਜਂ, ਤਤ੍ਥੇਵ ਤੁਰਿਤਂ ਅਗਾ;

ਪੇਸਯਿਤ੍ਵਾ ਸਕਂ ਸੋਪਿ, ਮਹਨ੍ਤਂ ਸਕਲਂ ਬਲਂ.

੪੬. ਯੁਜ੍ਝਾਪੇਤ੍ਵਾਨ ਘਾਤੇਤ੍ਵਾ, ਗਾਮੇ ਅਨ੍ਤਰਵਿਟ੍ਠਿਕੇ;

ਮਹਾਕਦ੍ਦਮਦੁਗ੍ਗਮ੍ਹਿ, ਵੀਰਦੇਵਂ ਮਹਬ੍ਬਲੋ.

੪੭. ਅਭਿਸੇਕਂ ਵਿਨਾਯੇਵ, ਪੁਲਤ੍ਥਿ ਨਗਰੇ ਵਸਂ;

ਅਕਾਸਿ ਰਾਜਰਟ੍ਠਸ੍ਸ, ਪਸਾਸਨਵਿਧਿਂ ਵਿਭੂ.

੪੮. ਅਪਨੀਯਰਣੇ ਛਨ੍ਦਂ, ਭਾਤਰੋਪਿ ਤਯੋ ਤਤੋ;

ਆਵਸਿਂਸੁ ਯਥਾਪੁਬ੍ਬਂ, ਗਨ੍ਤ੍ਵਾ ਰਟ੍ਠਂ ਸਕਂ ਸਕਂ.

੪੯. ਚਤੁਰੋਪਿ ਮਹੀਪਾਲਾ, ਯਤਮਾਨਾ ਚਿਰਂ ਤਹਿਂ;

ਏਕਚ੍ਛਤ੍ਤਙ੍ਕਿਤਂ ਕਾਤੁਂ, ਨੇਵ ਸਕ੍ਖਿਂਸੁ ਸਬ੍ਬਸੋ.

੫੦. ਅਨਿਸਮ੍ਮਕਾਰਿਭਾਵੇਨ, ਕੁਲੀਨੇ ਪਰਿਹਾਪਯੁਂ;

ਠਪੇਸੁਞ੍ਚ ਮਹਨ੍ਤਤ੍ਤੇ, ਹੀਨੇ ਸਾਭਿਮਤੇ ਜਨੇ.

੫੧. ਵਡ੍ਢਿਤਂਨੇਕਧਾ ਸਮ੍ਮਾ, ਰਞ੍ਞਾ ਵਿਜਯਬਾਹੁਨਾ;

ਸਾਸਨਞ੍ਚ ਤਥਾਲੋਕਂ, ਹਾਪਯਿਂਸੁ ਸੁਬੁਦ੍ਧਿਨੋ.

੫੨. ਕੁਲੀਨਾਨਂ ਮਨੁਸ੍ਸਾਨ-ਮਭਾਵੇਪਿ ਚ ਤਾਦਿਸੇ;

ਦੋਸੇ ਵਿਤ੍ਤਂ ਤਦਾਯਤ੍ਤਂ, ਪਸਯ੍ਹਾਵਹਰਿਂਸੁ ਚ.

੫੩. ਪੀਲ਼ੇਤੁਂ ਸਕਲਂ ਲੋਕ-ਮੁਦ੍ਧਰਨ੍ਤਾਧਿਕਂ ਬਲਿਂ;

ਉਚ੍ਛੂਵ ਉਚ੍ਛੁਯਨ੍ਤੇਤੇ, ਖੀਣਕੋ ਸਾਧਨੇਸਿਨੋ.

੫੪. ਉਦ੍ਧਰਿਤ੍ਵਾਨ ਬੁਦ੍ਧਾਦਿ-ਸਨ੍ਤਕੇ ਭੋਗਗਾਮਕੇ;

ਸੋ ਵਿਕ੍ਕਮਭੁਜੋ ਰਾਜਾ, ਸੇਵਕੇਸੁ ਸਮਪ੍ਪਯੀ.

੫੫. ਪੁਲਤ੍ਥਿਨਗਰੇ ਨੇਕ-ਵਿਹਾਰੇ ਧਾਤੁਮਣ੍ਡਿਤੇ;

ਸੋਵ ਦੇਸਨ੍ਤਰੀਯਾਨਂ, ਭਟਾਨਂ ਵਸਿਤੁਂ ਅਦਾ.

੫੬. ਸਦ੍ਧੇਹਿ ਪਤ੍ਤਧਾਤੁਸ੍ਸ, ਦਾਠਾਧਾਤੁਵਰਸ੍ਸ ਚ;

ਪੂਜਨਤ੍ਥਾਯ ਦਿਨ੍ਨਾਨਿ, ਮਣਿਮੁਤ੍ਤਾਦਿਕਾਨਿ ਚ.

੫੭. ਚਨ੍ਦਨਾਗਰੁਕਪ੍ਪੁਰਂ, ਸੁਵਣ੍ਣਾਦਿਮਯਾ ਬਹੂ;

ਪਟਿਮਾਯੋ ਚ ਅਚ੍ਛਿਜ੍ਜ, ਯਥਾਕਾਮਂ ਵਯਂ ਨਯੀ.

੫੮. ਸਾਸਨਸ੍ਸ ਚ ਲੋਕਸ੍ਸ, ਕ੍ਰਿਯਮਾਨਮੁਪਦ੍ਦਵਂ;

ਪਸ੍ਸਨ੍ਤਾ ਬਹੁਸੋ ਤਸ੍ਮਿਂ, ਤਦਾ ਨਿਬ੍ਬਨ੍ਨਮਾਨਸਾ.

੫੯. ਅਟ੍ਠਮੂਲਵਿਹਾਰੇਸੁ, ਯਤਯੋ ਗਰੁਸਮ੍ਮਤਾ;

ਪਂਸੁਕੂਲਿਕਭਿਕ੍ਖੂ ਚ, ਕੋਟ੍ਠਾਸਦ੍ਵਯਨਿਸ੍ਸਿਤਾ.

੬੦. ਏਵਂ ਤਿਤ੍ਥਿਯਤੁਲ੍ਯਾਨਂ, ਸਾਸਨੋਪਦ੍ਦਵਂ ਬਹੁਂ;

ਕਰੋਨ੍ਤਾਨਂ ਸਕਾ ਸਮ੍ਭਾ-ਪਯਾਤਂ ਪਵਰਂ ਇਤਿ.

੬੧. ਦਾਠਾਧਾਤੁਵਰਂ ਪਤ੍ਤ-ਧਾਤੁਮਾਦਾਯ ਰੋਹਣਂ;

ਗਨ੍ਤ੍ਵਾ ਵਾਸਮਕਪ੍ਪੇਸੁਂ, ਫਾਸੁਠਾਨੇ ਤਹਿਂ ਤਹਿਂ.

੬੨. ਤਥੇਵ ਫਾਸੁਠਾਨੇਸੁ, ਵਿਪ੍ਪਕਿਣ੍ਣਾ ਤਹਿਂ ਤਹਿਂ;

ਤੇ ਕੁਲੀਨਾ ਨਿਲੀਨਾ’ਵ, ਹੁਤ੍ਵਾ ਵਾਸਮਕਪ੍ਪਯੁਂ.

੬੩. ਪਕ੍ਖਦ੍ਵਯਮਹੀਪਾਲ-ਗਯ੍ਹਾਸੀਮਾ ਸੁਠਾਪਿਤਾ;

ਸਾਮਨ੍ਤਾ ਅਞ੍ਞਮਞ੍ਞੇਹਿ, ਕਰੋਨ੍ਤੋ ਬਹੁਸੋ ਰਣਂ.

੬੪. ਸੁਸਮਿਦ੍ਧੇਸੁ ਨੇਕੇਸੁ, ਗਾਮੇਸੁ ਨਿਗਮੇਸੁ ਚ;

ਅਗ੍ਗਿਂ ਦੇਨ੍ਤਾ ਤਲ਼ਾਕੇ ਚ, ਛਿਨ੍ਦਨ੍ਤਾ ਜਲਪੂਰਿਤੇ.

੬੫. ਨਾਸੇਨ੍ਤਾ ਸਬ੍ਬਥਾ ਸਬ੍ਬ-ਮਾਤਿਕਾਵਰਣਾਨਿ ਚ;

ਛਿਨ੍ਦਨ੍ਤਾ ਨਾਲ਼ਿਕੇਰਾਦਿ, ਸੋ ਪਕਾਰੇ ਚ ਭੂਰੁਹੇ.

੬੬. ਯਥਾ ਪੋਰਾਣਕਗ੍ਗਾਮ-ਠਾਨਨ੍ਤਿਪਿ ਨ ਞਾਯਤੇ;

ਵਿਨਾਸੇਸੁਂ ਤਥਾ ਰਟ੍ਠਂ, ਅਞ੍ਞਮਞ੍ਞਵਿਰੋਧਿਨੋ.

੬੭. ਤੇ ਚ ਭੂਮਿ ਪਤੀਗਾਮ-ਵਿਲੋਪਂ ਪਤ੍ਥਮੋਸਨਂ;

ਕਾਰੇਨ੍ਤਾ ਨਿਜਚਾਰੇਹਿ, ਆਚਰੁਂ ਲੋਕੁਪਦ੍ਦਵਂ.

੬੮. ਕੁਲੀਨਾਨਂ ਮਨੁਸ੍ਸਾਨਂ, ਦਾਸਕਮ੍ਮਕਰਾਪਿ ਚ;

ਸਸਾਮਿਨੋ’ਤਿ ਵਤ੍ਤਨ੍ਤਾ, ਨਿਸ੍ਸਙ੍ਕਾ ਵੀਤਭੀਤਿਕਾ.

੬੯. ਹੁਤ੍ਵਾ ਯੁਧੀਯਾ ਰਾਜੂਨਂ, ਅਬ੍ਭਨ੍ਤਰਪਵਤ੍ਤਿਨੋ;

ਬਲਵਨ੍ਤਤਰਾ ਜਾਤਾ, ਲਦ੍ਧਠਾਨਨ੍ਤਰਾ ਤਦਾ.

੭੦. ਜਨਾ ਸਮਨ੍ਤਕੂਟਾਦਿ-ਨੇਕਦੁਗ੍ਗਨਿਵਾਸਿਨੋ;

ਅਦੇਨ੍ਤਾ ਭੂਮਿਪਾਲਾਨਂ, ਪੁਬ੍ਬਪਟ੍ਠਪਿਤਂ ਕਰਂ.

੭੧. ਰਾਜਾਣਮਗਣੇਨ੍ਤਾ ਤੇ, ਗਤਾ ਦਾਮਰਿਕਤ੍ਤਨਂ;

ਸਕਂ ਸਕਂ’ਵ ਵਿਸਯ-ਮਾਵਸਿਂਸੁ ਸਮੁਦ੍ਧਤਾ.

੭੨. ਅਨਤ੍ਥੇ ਨਿਚਿਤਾ ਨਾਮ, ਪਰਿਵਤ੍ਤਨ੍ਤਿ ਸਬ੍ਬਤਾ;

ਇਤਿ ਵਤ੍ਤਬ੍ਬ ਤਂਯੇਵ, ਯਾਤਂ ਲਙ੍ਕਾਤਲਂ ਤਦਾ.

੭੩. ਏਵਂ ਗਾਮਕਭੋਜਕਾ ਵਿਯ ਭੁਸਂਤੇਜੋ ਵਿਹੀਨਾ ਸਦਾ;

ਅਚ੍ਚਨ੍ਤਂ ਬ੍ਯਸਨਾਤਿ ਸਤ੍ਤਹਦਯਾ ਰਾਜਾਭਿਮਾਨੁਜ੍ਝਿਤਾ.

੭੪. ਨਿਚ੍ਚਂ ਅਤ੍ਤਪਰਤ੍ਥਸਿਦ੍ਧਿਵਿਧੁਰਾਸਙ੍ਗਾ ਵਿਹੀਨਾਸਯਾ;

ਸਬ੍ਬੇ ਤੇ ਵਿਹਰਿਂਸੁ ਭੂਮਿਪਤਯੋ ਚਾਰਿਤ੍ਤਮਗ੍ਗਾਤਿਗਾ.