ਦੁਤਿਯਪਰਿਚ੍ਛੇਦ

ਮਹਾਸਮ੍ਮਤਵਂਸ

੧. ਮਹਾਸਮ੍ਮਤ ਰਾਜਸ੍ਸ, ਵਂਸਜੋ ਹਿ ਮਹਾਮੁਨਿ;

ਕਪ੍ਪਸ੍ਸਾਦਿਮ੍ਹਿ ਰਾਜਾ’ਸਿ, ਮਹਾਸਮ੍ਮਤਨਾਮਕੋ.

੨. ਰੋਜੋ ਚ ਵਰਰੋਜੋ ਚ, ਤਥਾ ਕਲ੍ਯਾਣਕਾ ਦੁਵੇ;

ਉਪੋਸਥੋ ਚ ਮਨ੍ਧਾਤਾ, ਚਰਕੋ’ਪਚਰਾ ਦੁਵੇ.

੩. ਚੇਤੀਯੋ ਮੁਚਲੋ ਚੇਵ, ਮਹਾਮੂਚਲਨਾਮਕੋ;

ਮੁਚਲਿਨ੍ਦੋ ਸਾਗਰੋ ਚੇਵ, ਸਾਗਰੋ ਦੇਵ ਵਨਾਮਕੋ.

੪. ਭਰਤੋ ਭਗੀਰਥੋ ਚੇਵ, ਰੁਚਿ ਚ ਸੁਰੁਚਿ ਪਿਚ;

ਪਤਾਪੋ ਮਹਾਪਤਾਪੋ, ਪਨਾਦਾ ਚ ਤਥਾ ਦੁਵੇ.

੫. ਸੁਦਸ੍ਸਨੋ ਚ ਨੇਰੁ ਚ, ਤਥਾ ਏਵ ਦੁਵੇ ਦੁਵੇ;

ਪਚ੍ਛਿਮਾ ਚਾ’ਤਿ ਰਾਜਾਨੋ, ਤਸ੍ਸ ਪੁਤ੍ਤਪਪੁਤ੍ਤਕਾ.

੬. ਅਸਂਖਿਯਾਯੁਕਾ ਏਤੇ, ਅਟ੍ਠਵੀਸਤਿ ਭੂਮਿਪਾ;

ਕੁਸਾਵਤਿਂ ਰਾਜਗਹਂ, ਮਿਥਿਲਞ੍ਚਾਪਿ ਆਵਸੁਂ.

੭. ਤਤੋ ਸਤਞ੍ਚ ਰਾਜਨੋ, ਛਪ੍ਪਞ੍ਞਾਸ ਚ ਸਟ੍ਠਿ ਚ;

ਚਤੁਰਾਸੀਤਿ ਸਹਸ੍ਸਾਨਿ, ਛਤ੍ਤਿਂਸਾ ਚ ਤਤੋ ਪਰੇ.

੮. ਦ੍ਵਤ੍ਤਿਂਸ ਅਟ੍ਠਵੀਸਾ ਚ, ਦ੍ਵਾਵੀਸਤਿ ਤਤੋ ਪਰੇ;

ਅਟ੍ਠਾਰਸ ਸਤ੍ਤਰਸ, ਪਞ੍ਚਦਸ ਚਤੁਦ੍ਦਸ.

੯. ਨਵ ਸਤ੍ਤ ਦ੍ਵਾਦਸ ਚ, ਪਞ੍ਚਵੀਸ ਤਤੋਪਰੇ;

ਪਞ੍ਚਵੀਸਂ ਦ੍ਵਾਦਸ ਚ, ਦ੍ਵਾਦਸਞ੍ਚ ਨਵਾ ਪਿਚ.

੧੦. ਚਤੁਰਾਸੀਤਿਸਹਸ੍ਸਾਨਿ, ਮਖਾਦੇਵਾਦਿਕਾਪਿ ਚ;

ਚਤੁਰਾਸੀਤਿਸਹਸ੍ਸਾਨਿ, ਕਲ਼ਾਰਾਜਨਕਾਦਯੋ.

੧੧. ਸੋਲ਼ਸ ਯਾਵ ਓਕ੍ਕਾਤਂ, ਪਪੁਤ੍ਤਾ ਰਾਸਿਤੋ ਇਮੇ;

ਵਿਸੁਂ ਵਿਸੁਂ ਪੁਰੇ ਰਜ੍ਜਂ, ਕਮਤੋ ਅਨੁਸਾਸਿਸੁਂ.

੧੨. ਓਕ੍ਕਾਮੁਖੋ ਜੇਟ੍ਠਪੁਤ੍ਤੋ, ਓਕ੍ਕਾਕਸਾ’ਸਿ ਭੂਪਤਿ;

ਨਿਪੁਰੋ ਚਨ੍ਦੀਮਾ ਚਨ੍ਦਂ-ਮੁਖੋ ਚ ਸਿਵਿ ਸਞ੍ਜਯੋ.

੧੩. ਵੇਸ੍ਸਨ੍ਤਰ ਮਹਾਰਾਜਾ, ਜਾਲੀ ਚ ਸੀਹਵਾਹਨੋ;

ਸੀਹਸ੍ਸਰੋ ਚ ਇਚ੍ਚੇਤੇ, ਤਸ੍ਸ ਪੁਤ੍ਤ ਪ ਪੁਤ੍ਤਕਾ.

੧੪. ਦ੍ਵੇਅਸੀਤਿ ਸਹਸ੍ਸਾਨਿ, ਸੀਹਸ੍ਸਰਸ੍ਸ ਰਾਜਿਨੋ;

ਪੁਤ੍ਤ ਪ ਪੁਤ੍ਤ ਰਾਜਾਨੋ, ਜਯਸੇਨੋ ਤਦਨ੍ਤਿਮੋ.

੧੫. ਏਤੇ ਕਪਿਲਵਤ੍ਥੁਸ੍ਮਿਂ, ਸਕ੍ਯਰਾਜਾਤਿ ਵਿਸ੍ਸੁਤਾ;

ਸੀਹਹਨੁ ਮਹਾਰਾਜਾ, ਜਯਸੇਨਸ੍ਸ ਅਤ੍ਰਜੋ.

੧੬. ਜਯਸੇਨਸ੍ਸ ਧੀਤਾ ਚ, ਨਾਮੇਨਾ’ਸਿ ਯਸੋਧਰਾ;

ਦੇਵਦਯੇ ਦੇਵਦਹ-ਸਕ੍ਕੋ ਨਾਮਾ’ਸਿ ਭੂਪਤਿ.

੧੭. ਅਞ੍ਜਨੋ ਚਾ’ਥ ਕਚ੍ਚਾਨਾ, ਆਸੁਂ ਤਸ੍ਸ ਸੁਤਾ ਦੁਵੇ;

ਮਹੇਸੀਚਾ’ਸਿ ਕਚ੍ਚਾਨਾ, ਰਞ੍ਞੋ ਸੀਹਹਨੁਸ੍ਸ ਸਾ.

੧੮. ਆਸੀ ਅਞ੍ਜਨਸਕ੍ਕਸ੍ਸ, ਮਹੇਸੀ ਸਾ ਯਸੋਧਰਾ;

ਅਞ੍ਜਨਸ੍ਸ ਦੁਵੇ ਧੀਤਾ, ਮਾਯਾ ਚਾਥ ਪਜਾਪਤਿ.

੧੯. ਪੁਤ੍ਤਾ ਦੁਵੇ ਦਣ੍ਡਪਾਣੀ, ਸੁਪ੍ਪਬੁਦ੍ਧੋ ਚ ਸਾਕਿਯੋ;

ਪਞ੍ਚ ਪੁਤ੍ਤਾ ਦੁਵੇ ਧੀਤਾ, ਆਸੁਂ ਸੀਹਹਨੁਸ੍ਸਰੇ.

੨੦. ਸੁਦ੍ਧੋਦਨੋ ਧੋਤੋਦਨੋ, ਸਕ੍ਕਸੁਕ੍ਕਮਿਤੋਦਨੋ;

ਅਮਿਤਾ ਪਮਿਤਾਚਾ’ਤਿ, ਇਮੇ ਪਞ੍ਚ ਇਮਾ ਦੁਵੇ.

੨੧. ਸੁਪ੍ਪਬੁਦ੍ਧਸ੍ਸ ਸਕ੍ਕਸ੍ਸ, ਮਹੇਸੀ ਅਮਿਤਾ ਅਹੁ;

ਤਸ੍ਸਾ’ਸੁਂ ਭਦ੍ਦਕਚ੍ਚਾਨਾ, ਦੇਵਦਤ੍ਤੋ ਦੁਵੇ ਸੁਤਾ.

੨੨. ਮਾਯਾ ਮਹਾਪਜਾਪਤਿ ਚੇਵ, ਸੁਦ੍ਧੋਦਨ ਮਹੇਸੀਯੋ;

ਸੁਦ੍ਧੋਦਨ ਮਹਾਰਞ੍ਞੋ, ਪੁਤ੍ਤੋ ਮਾਯਾਯ ਸੋ ਜਿਨੋ.

੨੩. ਮਹਾ ਸਮ੍ਮਤਵਂਸਮ੍ਹਿ, ਅਸਮ੍ਭਿਨ੍ਨੇ ਮਹਾਮੁਨਿ;

ਏਵਂ ਪਵਤ੍ਤੇ ਸਞ੍ਜਾਤੋ, ਸਬ੍ਬ ਖਤ੍ਥਿਯ ਮੁਦ੍ਧਨਿ.

੨੪. ਸਿਦ੍ਧਤ੍ਥਸ੍ਸ ਕੁਮਾਰਸ੍ਸ, ਬੋਧਿਸਤ੍ਤਸ੍ਸ ਸਾ ਅਹੁ;

ਮਹੇਸੀ ਭਦ੍ਦਕਚ੍ਚਾਨਾ, ਪੁਤ੍ਤੋ ਤਸ੍ਸਾ’ਸਿ ਰਾਹੁਲੋ.

੨੫. ਬਿਮ੍ਬਿਸਾਰੋ ਚ ਸਿਦ੍ਧਤ੍ਥ-ਕੁਮਾਰੋ ਚ ਸਹਾਯਕਾ;

ਉਭਿਨ੍ਨਂ ਪਿਤਰੋ ਚਾਪਿ, ਸਹਾਯਾਏਵ ਤੇ ਅਹੁਂ.

੨੬. ਬੋਧਿਸਤ੍ਤੋ ਬਿਮ੍ਬਿਸਾਰਾ, ਪਞ੍ਚਵਸ੍ਸਾਧਿਕੋ ਅਹੁ;

ਏਕੂਨਤਿਂਸੋ ਵਯਸਾ, ਬੋਧਿਸਤ੍ਤੋ’ਭਿਨਿਕ੍ਖਮਿ.

੨੭. ਪਦਹਿਤ੍ਵਾਨ ਛਬ੍ਬਸ੍ਸਂ, ਬੋਧਿਂ ਪਤ੍ਵਾ ਕਮੇਨ ਚ;

ਪਞ੍ਚਤਿਂਸੋ ਥ ਵਯਸਾ, ਬਿਮ੍ਬਿਸਾਰਮੁਪਾਗਮਿ.

੨੮. ਬਿਮ੍ਬਿਸਾਰੋ ਪਨ੍ਨਰਸ-ਵਸ੍ਸੋ’ਥ ਪੀਤਰਂ ਸਯਂ;

ਅਭਿਸਿਤ੍ਤੋ ਮਹਾਪਞ੍ਞੋ, ਪਤ੍ਤੋ ਰਜ੍ਜਸ੍ਸ ਤਸ੍ਸ ਤੁ.

੨੯. ਪਤ੍ਤੇ ਸੋਲ਼ਸਮੇ ਵਸ੍ਸੇ, ਸਤ੍ਥਾ ਧਮ੍ਮਮਦੇਸਯਿ;

ਦ੍ਵਾਪਞ੍ਞਾਸੇਵ ਵਸ੍ਸਾਨਿ, ਰਜ੍ਜਂ ਕਾਰੇਸਿ ਸੋ ਪਨ.

੩੦. ਰਜ੍ਜੇ ਸਮਾ ਪਨ੍ਨਰਸ, ਪੁਬ੍ਬੇ ਜਿਨਸਮਾਗਮਾ;

ਸਤ੍ਤਤਿਂਸ ਸਮਾ ਤਸ੍ਸ, ਧਰਮਾਨੇ ਤਥਾਗਤੇ.

੩੧. ਬਿਮ੍ਬਿਸਾਰਸੁਤੋ’ਜਾਤ-ਸਤ੍ਤੁਤਂ ਘਾਤੀਯਾ’ਮਤਿ;

ਰਜ੍ਜਂ ਦ੍ਵਤ੍ਤਿਂਸਵਸ੍ਸਾਨਿ, ਮਹਾਮਿਤ੍ਤਦ੍ਦੁਕਾਰਯੀ.

੩੨. ਅਜਾਤਸਤ੍ਤੁਨੋ ਵਸ੍ਸੇ, ਅਟ੍ਠਮੇ ਮੁਨਿ ਨਿਬ੍ਬੁਤੋ;

ਪਚ੍ਛਾ ਸੋ ਕਾਰਯੀ ਰਜ੍ਜਂ, ਵਸ੍ਸਾਨਿ ਚਤੁਵੀਸਤਿ.

੩੩. ਤਥਾਗਤੋ ਸਕਲਲੋਕਗ੍ਗਤਂ ਗਤੋ;

ਅਨਿਚ੍ਚਤਾਵ ਸਮਵਸੋ ਉਪਾਗਤੋ;

ਇਤਿ’ਧ ਯੋ ਭਯਜਨਨਿਂ ਅਨਿਚ੍ਚਤਂ,

ਅਵੇਕ੍ਖਤੇ ਸ ਭਵਤਿ ਦੁਕ੍ਖਪਾਰਗੂਤਿ.

ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਮਹਾਸਮ੍ਮਤਵਂਸੋ ਨਾਮ

ਦੁਤਿਯੋ ਪਰਿਚ੍ਛੇਦੋ.