ਤਤਿਯ ਪਰਿਚ੍ਛੇਦ

ਪਠਮਧਮ੍ਮਸਂਗੀਤਿ

੧. ਪਞ੍ਚਨੇਤ੍ਤੋ ਜਿਨੋ ਪਞ੍ਚ-ਚਤ੍ਤਾਲੀਸਸਮਾ’ਸਮੋ;

ਠਤ੍ਵਾ ਸਬ੍ਬਾਨਿ ਕਿਚ੍ਚਾਨਿ, ਕਤ੍ਵਾ ਲੋਕਸ੍ਸ ਸਬ੍ਬਥਾ.

੨. ਕੁਸਿਨਾਰਾਯਯਮਕ-ਸਾਲਾਨਮਨ੍ਤਰੇ ਵਰੇ;

ਵੇਸਾਖਪੁਣ੍ਣਮਾਯਂ ਸੋ, ਦੀਪੋ ਲੋਕਸ੍ਸ ਨਿਬ੍ਬੁਤੋ.

੩. ਸਙ੍ਖ੍ਯਾਪਥਮਤਿਕ੍ਕਨ੍ਤਾ, ਭਿਕ੍ਖੂ ਤਤ੍ਥ ਸਮਾਗਤਾ;

ਖਤ੍ਤਿਯਾ ਬ੍ਰਾਹ੍ਮਣਾ ਵਸ੍ਸਾ, ਸੁਦ੍ਧਾ ਦੇਵਾ ਤਥੇਵ ਚ.

੪. ਸਤ੍ਤਸਤਸਹਸ੍ਸਾਨਿ, ਤੇਸੁ ਪਾਮੋਕ੍ਖਭਿਕ੍ਖਵੋ;

ਥੇਰੋ ਮਹਾਕਸ੍ਸਪੋਵ, ਸਙ੍ਘਤ੍ਥੇਰੋ ਤਦਾ ਅਹੁ.

੫. ਸਤ੍ਥੁਸਰੀਰਸਾਰੀਰ-ਧਾਤੁਕਿਚ੍ਚਾਨਿ ਕਾਰਿਯ;

ਇਚ੍ਛਨ੍ਤੋ ਸੋ ਮਹਾਥੇਰੋ, ਸਤ੍ਥੁ ਧਮ੍ਮਚਿਰਟ੍ਠਿਤਿਂ.

੬. ਲੋਕਨਾਥੇ ਦਸਬਲੇ, ਸਤ੍ਤਾਹਪਰਿਨਿਬ੍ਬੁਤੇ;

ਦੁਬ੍ਭਾਸਿਤਂ ਸੁਭਦ੍ਦਸ੍ਸ, ਬੁਦ੍ਧਸ੍ਸ ਵਚਨਂ ਸਰਂ.

੭. ਸਰਂ ਚੀਵਰਦਾਨਞ੍ਚ, ਸਮਤ੍ਤੇ ਠਪਨਂ ਤਥਾ;

ਸਦ੍ਧਮ੍ਮਠਪਨਤ੍ਥਾਯ, ਮੁਨਿਨਾ’ਨੁਗ੍ਗਹਂ ਕਤਂ.

੮. ਕਾਤੁਂ ਸਦ੍ਧਮ੍ਮਸਂਗੀਤਿਂ, ਸਮ੍ਬੁਦ੍ਧਾਨਮਤੇ ਯਤਿ;

ਨਵਙ੍ਗਸਾਸਨਧਰੇ, ਸਬ੍ਬਙ੍ਗਸਮੁਪਾਗਤੇ.

੯. ਭਿਕ੍ਖੂ ਪਞ੍ਚਸਤੇਯੇਵ, ਮਹਾਖੀਣਾਸਵੇ ਵਰੇ;

ਸਮ੍ਮਨ੍ਨਿ ਏਕੇਨੂਨੇ ਤੁ, ਆਨਨ੍ਦਤ੍ਥੇਰਕਾਰਣਾ.

੧੦. ਪੁਨ ਆਨਨ੍ਦਤ੍ਥੇਰਾ’ਪਿ, ਭਿਕ੍ਖੂਹਿ ਅਭਿਯਾਚਿਤੋ;

ਸਮ੍ਮਨ੍ਨਿ ਕਾਤੁਂ ਸਂਗੀਤਿਂ, ਸਾ ਨ ਸਕ੍ਕਾ ਹਿ ਤਂ ਵਿਨਾ.

੧੧. ਸਾਧੁਕੀਲ਼ਨਸਤ੍ਤਾਹਂ, ਸਤ੍ਤਾਹਂ ਧਾਤੁਭਾਜਨਂ;

ਇਚ੍ਚਦ੍ਧਮਾਸਂ ਖੇਪੇਤ੍ਵਾ, ਸਬ੍ਬਲੋਕਾਨੁਕਮ੍ਪਕਾ.

੧੨. ਵਸ੍ਸਂ ਵਸਂ ਰਾਜਗਹੇ, ਕਸ੍ਸਾਮ ਧਮ੍ਮਸਙ੍ਗਹਂ;

ਨਾਞ੍ਞੇਹਿ ਤਤ੍ਤ ਵਤ੍ਥਬ੍ਬ-ਮਿਤਿ ਕਤ੍ਵਾਨ ਨਿਚ੍ਛਯਂ.

੧੩. ਸੋਕਾਤੁਰਂ ਤਤ੍ਥ ਤਤ੍ਥ, ਅਸ੍ਸਾਸੇਨ੍ਤੋ ਮਹਾਜਨਂ;

ਜਮ੍ਬੁਦੀਪਮ੍ਹਿ ਤੇ ਥੇਰਾ, ਵਿਚਰਿਤ੍ਵਾਨ ਚਾਰਿਕਂ.

੧੪. ਆਸਲ਼੍ਹਿਸੁਕ੍ਕਪਕ੍ਖਮ੍ਹਿ, ਸੁਕ੍ਕਪਕ੍ਖਠਿਤਤ੍ਥਿਕਾ;

ਉਪਾਗਮੁਂ ਰਾਜਗਹਂ, ਸਮ੍ਪਨ੍ਨਚਤੁਪਚ੍ਚਯਂ.

੧੫. ਤਤ੍ਥੇਵ ਵਸ੍ਸੂਪਗਤਾ, ਤੇ ਮਹਾਕਸ੍ਸਪਾਦਯੋ;

ਥੇਰਾ ਥਿਰਗੁਣੂਪੇਤਾ, ਸਮ੍ਬੁਦ੍ਧਮਤਕੋਵਿਦਾ.

੧੬. ਵਸ੍ਸਾਨਂ ਪਠਮਂ ਮਾਸਂ, ਸਬ੍ਬਸੇਨਾਸਨੇਸੁ’ਪਿ;

ਕਾਰੇਸੁਂ ਪਟਿਸਙ੍ਖਾਰਂ, ਵਤ੍ਵਾਨਾ’ਜਾਤਸਤ੍ਤੁਨੋ.

੧੭. ਵਿਹਾਰਪਟਿਸਙ੍ਖਾਰੇ, ਨਿਟ੍ਠਿਤੇ ਅਹੁ ਭੂਪਤਿ;

ਇਦਾਨਿ ਧਮ੍ਮਸਂਗੀਤਿਂ, ਕਰਿਸ੍ਸਾਮਿ ਮਯਂ ਇਤਿ.

੧੮. ਕਤ੍ਤਬ੍ਬਂ ਕਿਨ੍ਤਿਪੁਟ੍ਠਸ੍ਸ, ਨਿਸਜ੍ਜਠਾਨਮਾਦਿਸੁਂ;

ਰਾਜਾ ਕਤ੍ਥਾਤਿ ਪੁਚ੍ਛਿਤ੍ਵਾ, ਵੁਤ੍ਤਠਾਨਮ੍ਹਿ ਤੇਹਿ ਸੋ.

੧੯. ਸੀਘਂ ਵੇਭਾਰਸੇਲਸ੍ਸ, ਪਸ੍ਸੇ ਕਾਰੇਸਿ ਮਣ੍ਡਪਂ;

ਸਤ੍ਤਪਣ੍ਣਿਗੁਹਾਦ੍ਵਾਰੇ, ਰਮ੍ਮਂ ਦੇਵਸਭੋਪਮਂ.

੨੦. ਸਬ੍ਬਥਾ ਮਣ੍ਡਯਿਤ੍ਵਾ ਤਂ, ਅਤ੍ਥਰਾਪੇਸਿ ਤਤ੍ਥ ਸੋ;

ਭਿਕ੍ਖੂਨਂ ਗਣਨਾਯੇਵ, ਅਨਗ੍ਘਤ੍ਥਰਣਾਨਿ ਚ.

੨੧. ਨਿਸ੍ਸਾਯ ਦਕ੍ਖਿਣਂ ਭਾਗਂ, ਉਤ੍ਤਰਾਮੁਖਮੁਤ੍ਤਮਂ;

ਥੇਰਾਸਨਂ ਸੁਪਞ੍ਞਤ੍ਤਂ, ਆਸਿ ਤਤ੍ਥ ਮਹਾਰਹਂ.

੨੨. ਤਸ੍ਮਿਂ ਮਣ੍ਡਪਮਜ੍ਝਸ੍ਮਿਂ, ਪੁਰਤ੍ਥਮੁਖਮੁਤ੍ਤਮਂ;

ਧਮ੍ਮਾਸਨਂ ਸੁਪਞ੍ਞਤ੍ਤਂ, ਅਹੋਸਿ ਸੁਗਤਾਰਹਂ.

੨੩. ਰਾਜਾ’ਰੋਚਯਿ ਥੇਰਾਨਂ, ਕਮ੍ਮਂ ਨੋ ਨਿਟ੍ਠਿਤਂ ਇਤਿ;

ਤੇ ਥੇਰਾ ਥੇਰਮਾਨਨ੍ਦ-ਮਾਨਨ੍ਦਕਰਮਬ੍ਰਵੁਂ.

੨੪. ਸ੍ਵੇ ਸਨ੍ਨਿਪਾਤੋ ਆਨਨ੍ਦ, ਸੇਖੇਨ ਗਮਨਂ ਤਹਿਂ;

ਨ ਯੁਤ੍ਤਨ੍ਤੇ ਸਦਤ੍ਥੇ ਤ੍ਵਂ, ਅਪ੍ਪਮਤ੍ਤੋ ਤਤੋ ਭਵ.

੨੫. ਇਚ੍ਚੇਵਂ ਚੋਦਿਤੋ ਥੇਰੋ, ਕਤ੍ਵਾਨ ਵੀਰਿਯਂ ਸਮਂ;

ਇਰਿਯਾਪਥਤੋ ਮੁਤ੍ਤਂ, ਅਰਹਤ੍ਤਮਪਾਪੁਣਿ.

੨੬. ਵਸ੍ਸਾਨਂ ਦੁਤਿਯੇ ਮਾਸੇ, ਦੁਤਿਯੇ ਦਿਵਸੇ ਪਨ;

ਰੁਚਿਰੇ ਮਣ੍ਡਪੇ ਤਸ੍ਮਿਂ, ਥੇਰਾ ਸਨ੍ਨਿਪਤਿਂਸੁ ਤੇ.

੨੭. ਠਪੇਤ੍ਵਾ’ਨਨ੍ਦਤ੍ਥੇਰਸ੍ਸ, ਅਨੁਚ੍ਛਵਿਕਮਾਸਨਂ;

ਆਸਨੇਸੁ ਨਿਸੀਦਿਂਸੁ, ਅਰਹਨ੍ਤੋ ਯਥਾਰਹਂ.

੨੮. ਥੇਰੋ’ਰਹਤ੍ਤਪਤ੍ਤਿਂ ਸੋ, ਞਾਪੇਤੁਂ ਤੇਹਿ ਨਾਗਮਾ;

ਕੁਹਿਂ ਆਨਨ੍ਦਤ੍ਥੇਰੋ’ਤਿ, ਵੁਚ੍ਚਮਾਨੇ ਤੁ ਕੇਹਿਚਿ.

੨੯. ਨਿਮ੍ਮੁਜ੍ਜਿਤ੍ਵਾ ਪਥਵਿਯਾ, ਗਨ੍ਤ੍ਵਾ ਜੋਤਿਪਥੇਨ ਵਾ;

ਨਿਸੀਦਿ ਥੇਰੋ ਆਨਨ੍ਦੋ, ਅਤ੍ਤਨੋ ਠਪਿਤਾਸਨੇ.

੩੦. ਉਪਾਲਿਥੇਰੋ ਵਿਨਯੇ, ਸੇਸਧਮ੍ਮੇ ਅਸੇਸਕੇ;

ਆਨਨ੍ਦਤ੍ਥੇਰਮਕਰੁਂ, ਸਬ੍ਬੇ ਥੇਰਾ ਧੁਰਨ੍ਧਰੇ.

੩੧. ਮਹਾਥੇਰੋ ਸਕਤ੍ਤਾਨਂ, ਵਿਨਯਂ ਪੁਚ੍ਛਿਤੁਂ ਸਯਂ;

ਸਮ੍ਮਨ੍ਨੁ’ਪਾਲਿਥੇਰੋ ਚ, ਵਿਸ੍ਸਜ੍ਜੇਤੁਂ ਤਮੇਵ ਤੁ.

੩੨. ਥੇਰਾਸਨੇ ਨਿਸੀਦਿਤ੍ਵਾ, ਵਿਨਯਂ ਤਮਪੁਚ੍ਛਿ ਸੋ;

ਧਮ੍ਮਾਸਨੇ ਨਿਸੀਦਿਤ੍ਵਾ, ਵਿਸ੍ਸਜ੍ਜੇਸਿ ਤਮੇਵ ਸੋ.

੩੩. ਵਿਨਯਞ੍ਞੂਨਮਗ੍ਗੇਨ, ਵਿਸ੍ਸਜ੍ਜਿਤਕਮੇਨ ਤੇ;

ਸਬ੍ਬੇ ਸਜ੍ਝਾਯਮਕਰੁਂ, ਵਿਨਯਂ ਨਯਕੋਵਿਦਾ.

੩੪. ਅਗ੍ਗਂ ਬਹੁਸ੍ਸੁਤਾਦੀਨਂ, ਕੋਸਾਰਕ੍ਖਂ ਮਹੇਸਿਨੋ;

ਸਮ੍ਮਨ੍ਨਿਤ੍ਵਾਨ ਅਤ੍ਤਾਨਂ, ਥੇਰੋ ਧਮ੍ਮਮਪੁਚ੍ਛਿ ਸੋ.

੩੫. ਤਥਾ ਸਮ੍ਮਨ੍ਨਿਯ’ਤ੍ਤਾਨਂ, ਧਮ੍ਮਾਸਨਾਗਤੋ ਸਯਂ;

ਵਿਸ੍ਸਜ੍ਜੇਸਿ ਤਮਾਨਨ੍ਦ-ਤ੍ਥੇਰੋ ਧਮ੍ਮਮਸੇਸਤੋ.

੩੬. ਵੇਦੇਹਮੁਨਿਨਾ ਤੇਨ, ਵਿਸ੍ਸਜ੍ਜਿਤਕਮੇਨ ਤੇ;

ਸਬ੍ਬੇ ਸਜ੍ਝਾਯਮਕਰੁਂ, ਧਮ੍ਮਂ ਧਮ੍ਮਤ੍ਥਕੋਵਿਦਾ.

੩੭. ਏਵਂ ਸਤ੍ਤਹਿ ਮਾਸੇਹਿ, ਧਮ੍ਮਸਂਗੀਤਿ ਨਿਟ੍ਠਿਤਾ;

ਸਬ੍ਬਲੋਕਹਿਤਤ੍ਥਾਯ, ਸਬ੍ਬਲੋਕਹਿ ਤੇਹਿ ਸਾ.

੩੮. ਮਹਾਕਸ੍ਸਪਥੇਰੇਨ, ਇਦਂ ਸੁਗਤਸਾਸਨਂ;

ਪਞ੍ਚਵਸ੍ਸਸਹਸ੍ਸਾਨਿ, ਸਮਤ੍ਥਂ ਵਤ੍ਤਨੇ ਕਤਂ.

੩੯. ਅਤੀਵ ਜਾਤਪਾਮੋਜ੍ਜਾ, ਸਨ੍ਧਾਰਕਜਲਨ੍ਤਿਕਾ;

ਸਂਗੀਤਿਪਰਿਯੋਸਾਨੇ, ਛਦ੍ਧਾਕਮ੍ਪਿ ਮਹਾਮਹੀ.

੪੦. ਅਚ੍ਛਰਿਯਾਨਿ ਚਾ’ਹੇਸੁਂ, ਲੋਕੇਨੇਕਾਨਿਨੇਕਧਾ;

ਥੇਰੇਹੇਵ ਕਤਤ੍ਤਾ ਚ, ਥੇਰਿਯਾਯਂ ਪਰਮ੍ਪਰਾ.

੪੧. ਪਠਮਂ ਸਙ੍ਗਹਂ ਕਤ੍ਵਾ, ਸਬ੍ਬਲੋਕਹਿਤਂ ਬਹੁਂ;

ਤੇ ਯਾਵਤਾਯੁਕਂ ਠਤ੍ਵਾ, ਥੇਰਾ ਸਬ੍ਬੇਪਿ ਨਿਬ੍ਬੁਤਾ.

੪੨. ਥੇਰਾ’ਪਿ ਤੇ ਮਤਿਪਦੀਪਹਤਨ੍ਧਕਾਰਾ,

ਲੋਕਨ੍ਧਕਾਰਹਨਨਮ੍ਹਿ ਮਹਾਪਦੀਪਾ;

ਨਿਬ੍ਬਾਪਿਤਾ ਮਰਣਘੋਰਮਹਾਨਿਲੇਨ,

ਤੇਨਾਪਿ ਜੀਵਿਤਮਦਂ ਮਤਿਮਾ ਜਹੇਯ੍ਯਾਤਿ.

ਸੁਜਨਪ੍ਪਸਾਦਂਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਪਠਮਧਮ੍ਮਸਂਗੀਤਿਨਾਮ

ਤਤਿਯੋ ਪਰਿਚ੍ਛੇਦੋ.