ਸੋਲ਼ਸਮ ਪਰਿਚ੍ਛੇਦ

ਚੇਤਿਯਪਬ੍ਬਤਵਿਹਾਰ ਪਟਿਗ੍ਗਹਕੋ

੧. ਪੁਰੇ ਚਰਿਤ੍ਵਾ ਪਿਣ੍ਡਾਯ, ਕਰਿਤ੍ਵਾ ਜਨਸਙ੍ਗਹਂ;

ਰਾਜਗੇਹਮ੍ਹਿ ਭੁਞ੍ਜਨ੍ਤੋ, ਕਾਰੇਨ੍ਤੋ ਰਾਜਸਙ੍ਗਹਂ.

੨. ਛਬ੍ਬਸਦਿਵਸੇ ਥੇਰੋ, ਮਹਾਮੇਘਵਨੇ ਵਸੀ;

ਆਸਲ਼੍ਹਸੁਕ੍ਕਪਕ੍ਖਸ੍ਸ, ਤੇਰਸੇ ਦਿਵਸੇ ਪਨ.

੩. ਰਾਜਗੇਹਮ੍ਹਿ ਭੁਞ੍ਜਿਤ੍ਵਾ, ਮਹਾਰਞ੍ਞੋ ਮਹਾਮਤਿ;

ਮਹਾ’ਪ੍ਪਮਾਦਸੁਤ੍ਤਨ੍ਤਂ, ਦੇਸਯਿਤ੍ਵਾ ਤਤੋ ਚ ਸੋ.

੪. ਵਿਹਾਰਕਰਣਂ ਇਚ੍ਛਂ, ਤਤ੍ਥ ਚੇਤਿਯਪਬ੍ਬਤੇ;

ਨਿਕ੍ਖਮ੍ਮ ਪੁਰਿਮਦ੍ਵਾਰਾ, ਅਗਾ ਚੇਤਿਯਪਬ੍ਬਤਂ.

੫. ਥੇਰਂ ਤਤ੍ਥ ਗਤਂ ਸੁਤ੍ਵਾ, ਰਥਂ ਆਰੁਯ੍ਹ ਭੂਪਤਿ;

ਦੇਵਿਯੋ ਦ੍ਵੇ ਚ ਆਦਾਯ, ਥੇਰਸ੍ਸਾਨੁਪਦਂ ਅਕਾ.

੬. ਥੇਰਾ ਨਾਗਚਤੁਕ੍ਕਮ੍ਹਿ, ਨਹਾਤ੍ਵਾ ਰਹਦੇ ਤਹਿਂ;

ਪਬ੍ਬਤਾਰੋਹਣਤ੍ਥਾਯ, ਅਟ੍ਠਂਸੁ ਪਟਿਪਾਟਿਯਾ.

੭. ਰਾਜਾ ਰਥਾ ਤਦੋ’ਰੁਯ੍ਹ, ਸਬ੍ਬੇ ਥੇਰੇ’ਭਿਵਾਦਯਿ;

ਉਣ੍ਹੇ ਕਿਲਨ੍ਤੇ ਕਿਂਰਾਜ, ਆਗਤੋਸੀ’ਤਿ ਅਹੁਤੇ.

੮. ਤੁਮ੍ਹਾਕਂ ਗਮਨਾਸਙ੍ਕੀ, ਆਗਤੋਮ੍ਹੀ’ਤਿ ਭਾਸਿਤੇ;

ਇਧੇਵ ਵਸ੍ਸਂ ਵਸਿਤੁਂ, ਆਗਤਮ੍ਹਾ’ਤਿ ਭਾਸਿਯ.

੯. ਤਸ੍ਸੂਪਨਾਯਿਕਂ ਥੇਰੋ, ਖਨ੍ਧਕਂ ਖਨ੍ਧਕੋਵਿਦੋ;

ਕਥੇਸਿ ਰਞ੍ਞੋ ਤਂ ਸੁਤ੍ਵਾ, ਭਾਗਿਨੇਯ੍ਯੋ ਚ ਰਾਜਿਨੋ.

੧੦. ਮਹਾਰਿਟ੍ਠੋ ਮਹਾਮਚ੍ਚੋ, ਪਞ੍ਚਪਞ੍ਞਾਸਭਾਤੁਹਿ;

ਸਦ੍ਧਿਂ ਜੇਟ੍ਠਕਨਿਟ੍ਠੇਹਿ, ਰਾਜਾਨਮਭਿਤੋ ਠਿਤੋ.

੧੧. ਯਾਚਿਤ੍ਵਾ ਤਦਹੁ ਚੇਵ, ਪਬ੍ਬਜੁਂ ਥੇਰਸਨ੍ਤਿਕੇ;

ਪਤ੍ਤਾਰਹਤ੍ਤਂ ਸਬ੍ਬੇਪਿ, ਤੇ ਖੁਰਗ੍ਗੇ ਮਹਾਮਤੀ.

੧੨. ਕਨ੍ਤਕਚੇਤਿਯਠਾਨੇ, ਪਰਿਤੋ ਤਦਹੇਵ ਸੋ;

ਕਮ੍ਮਾਨਿ ਆਰਭਾਪੇਤ੍ਵਾ, ਲੇਣਾਨਿ ਅਟ੍ਠਸਟ੍ਠਿਯੋ.

੧੩. ਅਗਮਾਸਿ ਪੁਰਂ ਰਾਜਾ, ਥੇਰਾ ਤਤ੍ਥੇਵ ਤੇ ਵਸੁਂ;

ਕਾਲੇ ਪਿਣ੍ਡਾਯ ਨਗਰਂ, ਪਵਿਸਨ੍ਤਾ’ਨੁਕਮ੍ਪਕਾ.

੧੪. ਨਿਟ੍ਠਿਤੇ ਲੇਣਕਮ੍ਮਮ੍ਹਿ, ਆਸਲ਼੍ਹਿਪੁਣ੍ਣਮਾਸਿਯਂ;

ਗਨ੍ਤ੍ਵਾ ਅਦਾਸਿ ਥੇਰਾਨਂ, ਰਾਜਾ ਵਿਹਾਰਦਕ੍ਖਿਣਂ.

੧੫. ਦ੍ਵਤ੍ਤਿਂਸਮਾਲ਼ਕਾਨਞ੍ਚ, ਵਿਹਾਰਸ੍ਸ ਚ ਤਸ੍ਸ ਖੋ;

ਸੀਮਂ ਸੀਮਾਤਿਗੋ ਥੇਰੋ, ਬਨ੍ਧਿਤ੍ਵਾ ਤਦਹੇਵ ਸੋ.

੧੬. ਤੇਸਂ ਪਬ੍ਬਜ੍ਜਾਪੇਕ੍ਖਾਨਂ, ਅਕਾਸਿ ਉਪਸਮ੍ਪਦਂ;

ਸਬ੍ਬੇਸਂ ਸਬ੍ਬਪਠਮਂ, ਬਦ੍ਧੇ ਤੁਮ੍ਬਰੁਮਾਲ਼ਕੇ.

੧੭. ਏਤੇ ਦ੍ਵਾਸਟ੍ਠਿ ਅਰਹਨ੍ਤੋ, ਸਬ੍ਬੇ ਚੇਤਿਯਪਬ੍ਬਤੇ;

ਤਤ੍ਥ ਵਸ੍ਸਂ ਉਪਗਨ੍ਤ੍ਵਾ, ਅਕਂਸੁ ਰਾਜਸਙ੍ਗਹਂ.

੧੮. ਦੇਵਮਨੁਸ੍ਸਗਣਗਣਿਤਂ ਤਂ,

ਤਞ੍ਚ ਗਣਂ ਗੁਣਵਿਤ੍ਥਤਕਿਤ੍ਤਿਂ;

ਯਾਨਮੁਪਚ੍ਚ ਚ ਮਾਨਯਮਾਨਾ,

ਪੁਞ੍ਞਚਯਂ ਵਿਪੁਲਂ ਅਕਰਿਂਸੂਤਿ.

ਸੁਜਨਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਚੇਤਿਯਪਬ੍ਬਤਵਿਹਾਰਪਟਿਗ੍ਗਹਕੋ ਨਾਮ

ਸੋਲ਼ਸਮੋ ਪਰਿਚ੍ਛੇਦੋ.