ਸਤ੍ਤਰਸਮ ਪਰਿਚ੍ਛੇਦ
ਧਾਤੁਆਗਮਨੋ
੧. ਵੁਤ੍ਥਵਸ੍ਸੋ ਪਵਾਰੇਤ੍ਵਾ, ਕਤ੍ਤਿਕਪੁਣ੍ਣਮਾਸਿਯਂ;
ਅਵੋਚੇ’ਦਂ ਮਹਾਰਾਜਂ, ਮਹਾਥੇਰੋ ਮਹਾਮਤਿ.
੨. ਚਿਰਦਿਟ੍ਠੋ ਹਿ ਸਮ੍ਬੁਦ੍ਧੋ, ਸਤ੍ਥਾ ਨੋ ਮਨੁਜਾਧਿਪ;
ਅਨਾਥਵਾਸਂ ਅਵਸਿਮ੍ਹ, ਨਤ੍ਥਿ ਨੋ ਪੂਜਿਯਂ ਇਧ.
੩. ‘‘ਭਾਸਿਤ੍ਥ ਨਨੁ ਭਨ੍ਤੇਮੇ, ਸਮ੍ਬੁਦ੍ਧੋ ਨਿਬ੍ਬੁਤੋ’’ ਇਤਿ;
ਆਹ ਧਾਤੂਸੁ ਦਿਟ੍ਠੇਸੁ, ਦਿਟ੍ਠੋ ਹੋਤਿ ਜਿਨੋ’’ ਇਤਿ.
੪. ਵਿਦਿਤੋ ਵੋ ਅਧਿਪ੍ਪਾਯੋ, ਥੂਪਸ੍ਸ ਕਾਰਣੇ ਮਯਾ;
ਕਾਰੇਸ੍ਸਾਮਿ ਅਹਂ ਥੂਪਂ, ਤੁਮ੍ਹੇ ਜਾਨਾਥ ਧਾਤੁਯੋ.
੫. ਮਨ੍ਤੇਹਿ ਸੁਮਨੇਨਾਤਿ, ਥੇਰੋ ਰਾਜਾਨਮਬ੍ਰਵਿ;
ਰਾਜਾ’ਹ ਸਾਮਣੇਰਂ ਤਂ, ਕੁਤੋ ਲਚ੍ਛਾਮ ਧਾਤੁਯੋ.
੬. ਵਿਭੂਸਯਿਤ੍ਵਾ ਨਗਰਂ, ਮਗ੍ਗਞ੍ਚ ਮਨੁਜਾਧਿਪ;
ਉਪੋਸਥੀ ਸਪਰਿਸੋ, ਹਤ੍ਥਿਂ ਆਰੁਯ੍ਹ ਮਙ੍ਗਲਂ.
੭. ਸੇਤਚ੍ਛਤ੍ਤਂ ਧਾਰਯਨ੍ਤੋ, ਤਾਲਾਵਚਰਸਂਹਿਤੋ;
ਮਹਾਨਾਗਵਨੁਯ੍ਯਾਨਂ, ਸਾਯਨ੍ਹਸਮਯੇ ਵਜ.
੮. ਧਾਤੁਭੇਦਞ੍ਞੁਨੋ ਰਾਜ, ਧਾਤੁਯੋ ਤਤ੍ਥ ਲਚ੍ਛਸਿ;
ਇਚ੍ਛਾਹ ਸਾਮਣੇਰੋ ਸੋ, ਸੁਮਨੋ ਤਂ ਸੁਮਾਨਸਂ.
੯. ਥੇਰੋ’ਥ ਰਾਜਕੁਲਤੋ, ਗਨ੍ਤ੍ਵਾ ਚੇਤਿਯਪਬ੍ਬਤਂ;
ਆਮਨ੍ਤਿਯ ਸਾਮਣੇਰਂ, ਸੁਮਨਂ ਸੁਮਨੋ ਗਤਿਂ.
੧੦. ਏਹਿ ਤ੍ਵਂ ਭਦ੍ਰ ਸੁਮਨ, ਗਨ੍ਤ੍ਵਾ ਪੁਪ੍ਫਪੁਰਂ ਵਰਂ;
ਅਯ੍ਯਕਂ ਤੇ ਮਹਾਰਾਜਂ, ਏਵਂ ਨੋ ਵਚਨਂ ਵਦ.
੧੧. ਸਹਾਯੋ ਤੇ ਮਹਾਰਾਜ, ਮਹਾਰਾਜਾ ਮਰੁਪ੍ਪਿਯੋ;
ਪਸਨ੍ਨੋ ਬੁਦ੍ਧਸਮਯੇ, ਥੂਪਂ ਕਾਰੇਤੁਮਿਚ੍ਛਤਿ.
੧੨. ਮੁਨਿਨੋ ਧਾਤੁਯੋ ਦੇਹਿ, ਪਤ੍ਤਂ ਭੁਤ੍ਤਞ੍ਚ ਸਤ੍ਥੁਨਾ;
ਸਰੀਰਧਾਤੁਯੋ ਸਨ੍ਤਿ, ਬਹਵੋ ਹਿ ਤਵਨ੍ਤਿਕੇ.
੧੩. ਪਤ੍ਤਪੂਰਾ ਗਹੇਤ੍ਵਾ ਤਾ, ਗਨ੍ਤ੍ਵਾ ਦੇਵਪੁਰਂ ਵਰਂ;
ਸਕ੍ਕਂ ਦੇਵਾਨਮਿਨ੍ਦਂ ਤਂ, ਏਵਂ ਨੋ ਵਚਨਂ ਵਦ.
੧੪. ਤਿਲੋਕਦਕ੍ਖਿਣੇਯ੍ਯਸ੍ਸ, ਦਾਠਾਧਾਤੁ ਚ ਦਕ੍ਖਿਣਾ;
ਤਵਨ੍ਤਿਕਮ੍ਹਿ ਦੇਵਿਨ੍ਦ, ਦਕ੍ਖਿਣਕ੍ਖਕਧਾਤੁ ਚ.
੧੫. ਦਾਠਂ ਤ੍ਵਮੇਵ ਪੂਜੇਹਿ, ਅਕ੍ਖਕਂ ਦੇਹਿ ਸਤ੍ਥੁਨੋ;
ਲਂਕਾਦੀਪਸ੍ਸ ਕਿਚ੍ਚੇਸੁ, ਮਾਪਮਜ੍ਜ ਸੁਰਾਧਿਪ.
੧੬. ‘‘ਏਵਂ ਭਨ੍ਤੇ’’ਤਿ ਵਤ੍ਵਾ ਸੋ, ਸਾਮਣੇਰੋ ਮਹਿਦ੍ਧਿਕੋ;
ਤਙ੍ਖਣਂਯੇਵ ਅਗਮਾ, ਧਮ੍ਮਾਸੋਕਸ੍ਸ ਸਨ੍ਤਿਕਂ.
੧੭. ਸਾਲਮੂਲਮ੍ਹਿ ਠਪਿਤਂ, ਮਹਾਬੋਧਿਂ ਤਹਿਂ ਸੁਤਂ;
ਕਤ੍ਤਿਕਚ੍ਛਣਪੂਜਾਹਿ, ਪੂਜਿਯਂ ਤਞ੍ਚ ਅਦ੍ਦਸ.
੧੮. ਥੇਰਸ੍ਸ ਵਚਨਂ ਵਤ੍ਵਾ, ਰਾਜਤੋ ਲਦ੍ਧਧਾਤੁਯੋ;
ਪਤ੍ਤਪੂਰਂ ਗਹੇਤ੍ਵਾਨ, ਹਿਮਵਨ੍ਤਮੁਪਾਗਮਿ.
੧੯. ਹਿਮਵਨ੍ਤੇ ਠਪੇਤ੍ਵਾਨ, ਸਧਾਤੁਂ ਪਤ੍ਤਮੁਤ੍ਤਮਂ;
ਦੇਵਿਨ੍ਦਸਨ੍ਤਿਕਂ ਗਨ੍ਤ੍ਵਾ, ਥੇਰਸ੍ਸ ਵਚਨਂ ਭਣਿ.
੨੦. ਚੂਲ਼ਾਮਣਿ ਚੇਤਿਯਮ੍ਹਾ, ਗਹੇਤ੍ਵਾ ਦਕ੍ਖਿਣਕ੍ਖਕਂ;
ਸਾਮਣੇਰਸ੍ਸ ਪਾਦਾਸਿ, ਸਕ੍ਕੋ ਦੇਵਾਨਮਿਸ੍ਸਰੋ.
੨੧. ਤਂ ਧਾਤੁਂ ਧਾਤੁਪਤ੍ਤਞ੍ਚ, ਆਦਾਯ ਸੁਮਨੋ ਤਤੋ;
ਆਗਮ੍ਮ ਚੇਤਿਯਗਿਰਿਂ, ਥੇਰਸ੍ਸ’ਦਾਸਿ ਤਂ ਯਤਿ.
੨੨. ਮਹਾਨਾਗਵਨੁਯ੍ਯਾਨਂ, ਵੁਤ੍ਤੇਨਾ ਵਿਧਿਨਾ’ਗਮਾ;
ਸਾਯਨ੍ਹਾਸਮਯੇ ਰਾਜਾ, ਰਾਜਸੇਨਾ ਪੁਰਕ੍ਖਤੋ.
੨੩. ਠਪੇਸਿ ਧਾਤੁਯੋ ਸਬ੍ਬਾ, ਥੇਰੋ ਤਤ੍ਥੇਵ ਪਬ੍ਬਤੇ;
ਮਿਸ੍ਸਕਂ ਪਬ੍ਬਤਂ ਤਸ੍ਮਾ, ਆਹੁ ਚੇਤਿਯ ਪਬ੍ਬਤਂ.
੨੪. ਠਪੇਤ੍ਵਾ ਧਾਤੁਪਤ੍ਤਂ ਤਂ, ਥੇਰੋ ਚੇਤਿਯਪਬ੍ਬਤੇ;
ਗਹੇਤ੍ਵਾ ਅਕ੍ਖਕਂ ਧਾਤੁਂ, ਸਙ੍ਕੇਤਂ ਸਗਣੋ’ਗਮਾ.
੨੫. ਸਚਾਯਂ ਮੁਨਿਨੋ ਧਾਤੁ, ਛਤ੍ਤਂ ਨਮਤੁ ਮੇ ਸਯਂ;
ਜਣ੍ਣੁਕੇਹਿ ਕਰੀਧਾਤੁ, ਧਾਤੁਚਙ੍ਕੋਟਕੋ ਅਯਂ.
੨੬. ਸਿਰਸ੍ਮਿਂ ਮੇ ਪਤਿਟ੍ਠਾਤੁ, ਆਗਮ੍ਮ ਸਹ ਧਾਤੁਕੋ;
ਇਤਿ ਰਾਜਾ ਵਿਚਿਨ੍ਤੇਸਿ, ਚਿਨ੍ਤਿਤਂ ਤਂ ਤਥਾ ਅਹੁ.
੨੭. ਅਮਤੇਨਾ’ਭਿਸਿਤ੍ਤੋਵ, ਅਹੁ ਹਟ੍ਠੋ’ਤਿ ਭੂਪਤਿ;
ਸੀਸਤੋ ਤਂ ਗਹੇਤ੍ਵਾਨ, ਹਤ੍ਥਿਕ੍ਖਨ੍ਧੇ ਠਪੇਸਿਤਂ.
੨੮. ਹਟ੍ਠੋ ਹਤ੍ਤੀ ਕੁਞ੍ਚਨਾਦਂ, ਅਕਾ ਕਮ੍ਪਿਤ੍ਥ ਮੇਦਿਨੀ;
ਤਤੋ ਨਾਗੋ ਨਿਵਤ੍ਤਿਤ੍ਵਾ, ਸਥੇਰ ਬਲਵਾਹਨੋ.
੨੯. ਪੁਰਤ੍ਥਿਮੇਨ ਦ੍ਵਾਰੇਨ, ਪਵਿਸਿਤ੍ਵਾ ਪੁਰਂ ਸੁਭਂ;
ਦਕ੍ਖਿਣੇਨ ਚ ਦ੍ਵਾਰੇਨ, ਨਿਕ੍ਖਮਿਤ੍ਵਾ ਤਤੋ ਪੁਨ.
੩੦. ਥੂਪਾਰਾਮੇ ਚੇਤਿਯਸ੍ਸ, ਠਾਨਤੋ ਪਚ੍ਛਤੋ ਕਤਂ;
ਪਮੋਜਵਤ੍ਥੁਂ ਗਨ੍ਤ੍ਵਾਨ, ਬੋਧਿਠਾਨੇ ਨਿਵਤ੍ਤਿਯ.
੩੧. ਪੁਰਤ੍ਥਾਵਦਨੋ ਅਠਾ, ਥੂਪਠਾਨਂ ਤਦਾ ਹਿਤਂ;
ਕਦਮ੍ਬਪੁਪ੍ਫਆਦਾਰਿ-ਵਲ੍ਲੀਹਿ ਚਿਤਕਂ ਅਹੁ.
੩੨. ਮਨੁਸ੍ਸਦੇਵੋ ਦੇਵੇਹਿ, ਤਂ ਠਾਨਂ ਰਕ੍ਖਿਤਂ ਸੁਚਿਂ;
ਸੋਧਾਪੇਤ੍ਵਾ ਭੂਸਯਿਤ੍ਵਾ, ਤਙ੍ਖਣਂਯੇਵ ਸਾਧੁਕਂ.
੩੩. ਧਾਤੁਂ ਓਰੋਪਨਤ੍ਥਾਯ, ਆਰਭੀ ਹਤ੍ਥਿਕ੍ਖਨ੍ਧਤੋ;
ਨਾਗੋ ਨ ਇਚ੍ਛਿਤਂ ਰਾਜਾ, ਥੇਰਂ ਪੁਚ੍ਛਿਤ੍ਥ ਤਂ ਮਨਂ.
੩੪. ਅਤ੍ਤਨੋ ਖਨ੍ਧਸਮਕੇ, ਠਾਨੇ ਠਪਨਮਿਚ੍ਛਤਿ;
ਧਾਤੁਓਰੋਪਨਂ ਤੇਨ, ਨ ਇਟ੍ਠਮੀ’ਤਿ ਸੋ ਬ੍ਰਵਿ.
੩੫. ਆਣਾਪੇਤ੍ਵਾ ਖਣਂਯੇਵ,
ਸੁਕ੍ਖਾਤੋ’ਭਯਵਾਪਿਤੋ;
ਸੁਕ੍ਖਕਦ੍ਦਮ ਖਣ੍ਡੇਹਿ,
ਚਿਤਾ ਪੇਤ੍ਵਾਨ ਤਂ ਸਮਂ.
੩੬. ਅਲਙ੍ਕਰਿਤ੍ਵਾਨ ਬਹੁਧਾ, ਰਾਜਾ ਤਂ ਠਾਨਮੁਤ੍ਤਮਂ;
ਓਰੋਪੇਤ੍ਵਾ ਹਤ੍ਥਿਕ੍ਖਨ੍ਧਾ, ਧਾਤੁਂ ਤਤ੍ਥ ਠਪੇਸਿਤਂ.
੩੭. ਧਾਤਾਰਕ੍ਖਂ ਸਂਵਿਧਾਯ, ਠਪੇਤ੍ਵਾ ਤਤ੍ਥ ਹਤ੍ਥਿਨਂ;
ਧਾਤੁਥੂਪਸ੍ਸ ਕਰਣੇ, ਰਾਜਾ ਤੁਰਿਤਮਾਨਸੋ.
੩੮. ਬਹੂ ਮਨੁਸ੍ਸੇ ਯੋਜੇਤ੍ਵਾ, ਇਤ੍ਥਿਕਾਕਰਣੇ ਲਹੁਂ;
ਧਾਤੁਕਿਚ੍ਚਂ ਵਿਚਿਨ੍ਤੇਨ੍ਤੋ, ਸਾਮਚ੍ਚੋ ਪਾਵਿਸੀ ਪੁਰਂ.
੩੯. ਮਹਾਮਹਿਨ੍ਦਤ੍ਥੇਰੋ ਤੁ, ਮਹਾ ਮੇਘਵਨਂ ਸੁਭਂ;
ਸਗਣੋ ਅਭਿਗਨ੍ਤ੍ਵਾਨ, ਤਤ੍ਥ ਵਾਸਮਕਪ੍ਪਯਿ.
੪੦. ਰਤ੍ਤਿਂ ਨਾਗੋ’ਨੁਪਰਿਯਾਤਿ, ਤਂ ਠਾਨਂ ਸੋ ਸਧਾਤੁ ਕਂ;
ਬੋਧਿਠਾਨਮ੍ਹਿ ਸਾਲਾਯ, ਦਿਵਾਠਾਤਿ ਸਧਾਤੁਕੋ.
੪੧. ਵਤ੍ਥੁਸ੍ਸ ਤਸ੍ਸੋ’ਪਰਿਤੋ, ਥੂਪਂ ਥੇਰਮਤਾਨੁ ਗੋ;
ਜਙ੍ਘਾਮਤ੍ਤਂ ਚਿਤਾਪੇਤ੍ਵਾ, ਕਤਿਪਾਹੇਨ ਭੂਪਤਿ.
੪੨. ਤਤ੍ਥ ਧਾਤੁਪਤਿਟ੍ਠਾਨਂ, ਘੋਸਾਪੇਤ੍ਵਾ ਉਪਾਗਮਿ;
ਤਤੋ ਤਤੋ ਸਮਨ੍ਤੋ ਚ, ਸਮਾਗਮਿ ਮਹਾਜਨੋ.
੪੩. ਤਸ੍ਮਿਂ ਸਮਾਗਮੇ ਧਾਤੁ, ਹਤ੍ਥਿਕ੍ਖਨ੍ਧਾ ਨਗਾਗ੍ਗਤਾ;
ਸਤ੍ਤਤਾਲਪ੍ਪਮਾਣਮ੍ਹਿ, ਦਿਸ੍ਸਨ੍ਤਿ ਨਭਸਿਟ੍ਠਿਤਾ.
੪੪. ਵਿਮ੍ਹਾਪਯਨ੍ਤਿ ਜਨਤਂ, ਯਮਕਂ ਪਾਟਿਹਾਰਿਯਂ;
ਕਣ੍ਣਮ੍ਬਮੂਲੇ ਬੁਦ੍ਧੋ’ਵ, ਅਕਰਿ ਲੋਮਹਂਸਨਂ.
੪੫. ਤਤੋ ਨਿਕ੍ਖਨ੍ਤਜਾਲਾਹਿ, ਜਲਧਾਰਾਹਿ ਚਾ’ਸਕਿਂ;
ਅਯਂ ਓਭਾਸਿਤਾ’ਸਿਤ੍ਤਾ, ਸਬ੍ਬਾਲਂਕਾਮਹੀ ਮਹੁ.
੪੬. ਪਰਿਨਿਬ੍ਬਾਨਮਞ੍ਚਮ੍ਹਿ, ਨਿਪਨ੍ਨੇਨ ਜਿਨੇਨ ਹਿ;
ਕਤਂ ਮਹਾਅਧਿਟ੍ਠਾਨ-ਪਞ੍ਚਕਂ ਪਞ੍ਚਚਕ੍ਖੁਨਾ.
੪੭. ਗਯ੍ਹਮਾਨਾ ਮਹਾਬੋਧਿ ਸਾਖਾਸੋਕੇਨ ਦਕ੍ਖਿਣਾ;
ਛਿਜ੍ਜਿਤ੍ਵਾਨ ਸਯਂਯੇਵ, ਪਤਿਟ੍ਠਾਤੁ ਕਟਾਹਕੇ.
੪੮. ਪਤਿਟ੍ਠਹਿਤ੍ਵਾ ਸਾ ਸਾਖਾ, ਛਬ੍ਬਣ੍ਣਰਸ੍ਮਿਯੋ ਸੁਭਾ;
ਰਞ੍ਜਯਨ੍ਤੀ ਦਿਸਾ ਸਬ੍ਬਾ, ਫਲਪਤ੍ਤੇਹਿ ਮੁਚ੍ਚਤੁ.
੪੯. ਸਸੁਵਣ੍ਣਕਟਾਹਾ ਸਾ, ਉਗ੍ਗਨ੍ਤ੍ਵਾਨ ਮਨੋਰਮਾ;
ਅਦਿਸ੍ਸਮਾਨਾ ਸਤ੍ਤਾਹਂ, ਹਿਮਗਬ੍ਭਮ੍ਹਿ ਤਿਟ੍ਠਤੁ.
੫੦. ਥੂਪਾਰਾਮੇ ਪਤਿਟ੍ਠਨ੍ਤਂ, ਮਮ ਦਕ੍ਖਿਣਅਕ੍ਖਕਂ;
ਕਰੋਤੁ ਨਭਮੁਗ੍ਗਨ੍ਤ੍ਵਾ, ਯਮਯਂ ਪਾਟਿਹਾਰਿਯਂ.
੫੧. ਲਙ੍ਕਾ ਲਙ੍ਕਾਰਭੂਤਮ੍ਹਿ, ਹੇਮਮਾਲਿਕਚੇਤਿਯੇ;
ਪਤਿਟ੍ਠਹਨ੍ਤਿਯੋ ਧਾਤੁ, ਦੋਣਮਤ੍ਤਾ ਪਮਾਣਤੋ.
੫੨. ਬੁਦ੍ਧਵੇਸਧਰਾ ਹੁਤ੍ਵਾ, ਉਗ੍ਗਨ੍ਤ੍ਵਾ ਨਭਸਿਟ੍ਠਿਤਾ;
ਪਤਿਟ੍ਠਂ ਤੁ ਕਰਿਤ੍ਵਾਨ, ਯਮਕਂ ਪਾਟਿਹਾਰਿਯਂ.
੫੩. ਅਧਿਟ੍ਠਾਨਾਨਿ ਪਞ੍ਚੇ’ਵ, ਅਧਿਟ੍ਠਾਸਿ ਤਥਾਗਤੋ;
ਅਕਾਸਿ ਤਸ੍ਮਾ ਸਾ ਧਾਤੁ, ਤਦਾ ਤਂ ਪਾਟਿਹਾਰਿਯਂ.
੫੪. ਆਕਾਸਾ ਓਤਰਿਤ੍ਵਾ ਸਾ, ਅਟ੍ਠਾਭੂਪਸ੍ਸ ਮੁਦ੍ਧਨਿ;
ਅਤੀਵਹਟ੍ਠੋ ਤਂ ਰਾਜਾ, ਪਤਿਟ੍ਠਾਪੇਸਿ ਚੇਤਿਯੇ.
੫੫. ਪਤਿਟ੍ਠਿਤਾਯ ਤਸ੍ਸਾ ਚ, ਧਾਤੁਯਾ ਚੇਤਿਯੇ ਤਦਾ;
ਅਹੁ ਮਹਾਭੂਮਿਚਾਲੋ, ਅਬ੍ਭੁਤੋ ਲੋਮਹਂਸਨੋ.
੫੬. ਏਵਂ ਅਚਿਨ੍ਤਿਯਾ ਬੁਦ੍ਧਾ, ਬੁਦ੍ਧਧਮ੍ਮਾ ਅਚਿਨ੍ਤਿਯਾ;
ਅਚਿਨ੍ਤਿਯੇ ਪਸਨ੍ਨਾਨਂ, ਵਿਪਾਕੋ ਹੋਤਿ ਅਚਿਨ੍ਤਿਯੋ.
੫੭. ਤਂ ਪਾਟਿਹਾਰਿਯਂ ਦਿਸ੍ਵਾ, ਪਸੀਦਿਂਸੁ ਜਨੇ ਜਨਾ;
ਮਤ੍ਤਾਭਯੋ ਰਾਜਪੁਤ੍ਤੋ, ਕਨਿਟ੍ਠੋ ਰਾਜਿਨੋ ਪਨ.
੫੮. ਮੁਨਿਸ੍ਸਰੇ ਪਸੀਦਿਤ੍ਵਾ, ਯਾਚਿਤ੍ਵਾਨ ਨਰਿਸ੍ਸਰਂ;
ਪੁਰਿਸਾਨਂ ਸਹਸ੍ਸੇਨ, ਸਹ ਪਬ੍ਬਜਿਸਾਸਨੇ.
੫੯. ਚੇਤਾਰਿਗਾਮਤੋ ਚਾਪਿ, ਦ੍ਵਾਰਮਣ੍ਡਲਤੋਪਿ ਚ;
ਵਿਹੀਰਬੀਜਤੋ ਚਾਪਿ, ਤਥਾ ਗਲ੍ਲਕਪਿਟ੍ਠਿਤੋ.
੬੦. ਤਥੋ’ਪਤਿਸ੍ਸਗਾਮਾ ਚ, ਪਞ੍ਚ ਪਞ੍ਚ ਸਤਾਨਿ ਚ;
ਪਬ੍ਬਜੁਂ ਦਾਰਕਾ ਹਟ੍ਠਾ, ਜਾਤਸਦ੍ਧਾ ਤਥਾਗਤੇ.
੬੧. ਏਵਂ ਪੁਰਾ ਬਾਹਿਰਾ ਚ, ਸਬ੍ਬੇ ਪਬ੍ਬਜਿਤਾ ਤਦਾ;
ਤਿਂਸ ਭਿਕ੍ਖੁਸਹਸ੍ਸਾਨਿ, ਅਹੇਸੁਂ ਜਿਨਸਾਸਨੇ.
੬੨. ਥੂਪਾਰਾਮੇ ਥੂਪਵਰਂ, ਨਿਟ੍ਠਾਪੇਤ੍ਵਾ ਮਹੀਪਤਿ;
ਰਤਨਾਦੀਹਿ’ਨੇਕੇਹਿ, ਸਦਾ ਪੂਜਮਕਾਰਯਿ.
੬੩. ਰਾਜੋਰੋਧਾ ਖਤ੍ਤਿਯਾ ਚ, ਅਮਚ੍ਚਾ ਨਾਗਰਾ ਤਥਾ;
ਸਬ੍ਬੇ ਜਨਪਦਾ ਚੇਵ, ਪੁਜਾ’ਕਂਸੁ ਵਿਸੁਂ ਵਿਸੁਂ.
੬੪. ਥੂਪਪੁਬ੍ਬਙ੍ਗਮਂ ਰਾਜਾ, ਵਿਹਾਰਂ ਤਤ੍ਥ ਕਾਰਯਿ;
ਥੂਪਾਰਾਮੋਤਿ ਤੇਨੇ’ਸ, ਵਿਹਾਰੋ ਵਿਸ੍ਸੁਤੋ ਅਹੁ.
੬੫. ਸਕਧਾਤੁਸਰੀਰਕੇਨ ਚੇ’ਵਂ,
ਪਰਿਨਿਬ੍ਬਾਨਗਤੋਪਿ ਲੋਕਨਾਥੋ;
ਜਨਕਾਯਹਿਤਂ ਸੁਖਞ੍ਚ ਸਮ੍ਮਾ,
ਬਹੁਧਾ’ਕਾਸਿ ਠਿਤੇ ਜਿਨੇ ਕਥਾਵਕਾਤਿ.
ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ
ਧਾਤੁਅਗਮਨੋ ਨਾਮ
ਸਤ੍ਤਰਸਮੋ ਪਰਿਚ੍ਛੇਦੋ.