ਤੇਰਸਮ ਪਰਿਚ੍ਛੇਦ

ਮਹਿਨ੍ਦਾਗਮਨੋ

੧. ਮਹਾਮਹਿਨ੍ਦਤ੍ਥੇਰੋ ਸੋ, ਤਦਾ ਦ੍ਵਾਦਸਵਸ੍ਸਿਕੋ;

ਉਪਜ੍ਝਾਯੇਨ ਆਣਤ੍ਤੋ, ਸਙ੍ਘੇਨ ਚ ਮਹਾਮਤੀ.

੨. ਲਂਕਾਦੀਪਂ ਪਸਾਦੇਤੁਂ,

ਕਾਲਂ ਪੇਕ੍ਖਂ ਵਿਚਿਨ੍ਤਯੀ;

‘‘ਵੁਡ੍ਢੋ ਮੁਟਸਿਵੋ ਰਾਜਾ,

ਰਾਜਾ ਹੋਤੁ ਸੁਤੋ’’ ਇਤਿ.

੩. ਤਦਨ੍ਤਰੇ ਞਾਤਿਗਣਂ, ਦਟ੍ਠੁਂ ਕਤ੍ਵਾਨ ਮਾਨਸਂ;

ਉਪਜ੍ਝਾਯਞ੍ਚ ਸਙ੍ਘਞ੍ਚ, ਵਨ੍ਦਿਤ੍ਵਾ ਪੁਚ੍ਛ ਭੂਪਤਿਂ.

੪. ਆਦਾਯ ਚਤੁਰੋ ਥੇਰੇ, ਸਙ੍ਘਮਿਤ੍ਤਾਯ ਅਤ੍ਰਜਂ;

ਸੁਮਨਂ ਸਾਮਣੇਰਞ੍ਚ, ਛਲ਼ਾਭਿਞ੍ਞਂ ਮਹਿਦ੍ਧਿਕਂ.

੫. ਞਾਤੀਨਂ ਸਙ੍ਗਹਂ ਕਾਤੁਂ, ਅਗਮਾ ਦਕ੍ਖਿਣਾਗਿਰਿਂ;

ਤਤੋ ਤਤ੍ਥ ਚਰਨ੍ਤਸ੍ਸ, ਛਮ੍ਮਾਸਾ ਸਮਤਿਕ੍ਕਮੁਂ.

੬. ਕਮੇਨ ਵੇਦਿਸਗਿਰਿਂ, ਨਗਰਂ ਮਾਤੁਦੇਵਿਯਾ;

ਸਮ੍ਪਤ੍ਵਾ ਮਤਰਂ ਪਸ੍ਸਿ, ਦੇਵੀ ਦਿਸ੍ਵਾ ਪਿਯਂ ਸੁਤਂ.

੭. ਭੋਜਯਿਤ੍ਵਾ ਸਪਰਿਸਂ, ਅਤ੍ਤਨਾਯੇਵ ਕਾਰਿਤਂ;

ਵਿਹਾਰਂ ਚੇਤਿਯਗਿਰਿਂ, ਥੇਰਂ ਆਰੋਪਯੀ ਸੁਭਂ.

੮. ਅਵਨ੍ਤਿਰਟ੍ਠਂ ਭੁਞ੍ਜਨ੍ਤੋ, ਪਿਤਰਾ ਦਿਨ੍ਨਮਤ੍ਤਨੋ;

ਸੋ ਅਸੋਕ ਕੁਮਾਰੋ ਹਿ, ਉਜ੍ਜੇਨੀਗਮਨਾ ਪੁਰਾ.

੯. ਵੇਦਿਸੇ ਨਗਰੇ ਵਾਸਂ, ਉਪਗਨ੍ਤ੍ਵਾ ਤਹਿਂ ਸੁਭਂ;

ਦੇਵਿਨ੍ਨਾਮ ਲਭਿਤ੍ਵਾਨ, ਕੁਮਾਰਿਂ ਸੇਟ੍ਠਿਧੀਤਰਂ.

੧੦. ਸਂਵਾਸਂ ਤਾਯ ਕਪ੍ਪੇਸਿ, ਗਬ੍ਭਂ ਗਣ੍ਹਿਯ ਤੇਨ ਸਾ;

ਉਜ੍ਜੇਨਿਯਂ ਕੁਮਾਰਂ ਤਂ, ਮਹਿਨ੍ਦਂ ਜਨਯੀ ਸੁਭਂ.

੧੧. ਵਸ੍ਸਦ੍ਵਯਮਤਿਕ੍ਕਮ੍ਮ, ਸਙ੍ਘਮਿਤ੍ਤਞ੍ਚ ਧੀਤਰਂ;

ਤਸ੍ਮਿਂ ਕਾਲੇ ਵਸਤਿ ਸਾ, ਵੇਦਿਸੇ ਨਗਰੇ ਤਹਿਂ.

੧੨. ਥੇਰੋ ਤਤ੍ਥ ਨਿਸੀਦਿਤ੍ਵਾ, ਕਾਲਞ੍ਞੂ ਇਤਿ ਚਿਨ੍ਤਯਿ;

ਪਿਤਰਾ ਮੇ ਸਮਾਣਤ੍ਤਂ, ਅਭਿਸੇਕ ਮਹੁਸ੍ਸਵਂ.

੧੩. ਦੇਵਾਨਂਪਿਯਤਿਸ੍ਸੋ ਸੋ, ਮਹਾਰਾਜਾ’ਨੁਭੋਤੁ ਚ;

ਵਤ੍ਥੁਤ੍ਤਯਗੁਣੇ ਚਾਪਿ, ਸੁਤ੍ਵਾ ਜਾਨਾਤੁ ਦੂਹਤੋ.

੧੪. ਆਰੋਹਤੁ ਮਿਸ੍ਸਨਗਂ, ਜੇਟ੍ਠਮਾਸਸ੍ਸੁ’ਪੋਸਥੇ;

ਤਦਹੇਵ ਗਮਿਸ੍ਸਾਮ, ਲਂਕਾਦੀਪਵਰਂ ਮਯਂ.

੧੫. ਮਹਿਨ੍ਦੋ ਉਪਸਙ੍ਕਮ੍ਮ, ਮਹਿਨ੍ਦਤ੍ਥੇਰ ਮੁਤ੍ਤਮਂ;

ਯਾਹਿ ਲਂਕਂ ਪਸਾਦੇਤੁਂ, ਸਮ੍ਬੁਦ੍ਧੇਨਾ’ਸਿ ਬ੍ਯਾਕਤੋ.

੧੬. ਮਯਮ੍ਪਿ ਤਤ੍ਥੁਪਤ੍ਥਮ੍ਭਾ, ਭਵਿਸ੍ਸਾਮਾ’ਤਿ ਅਬ੍ਰਵਿ;

ਦੇਵਿਯਾ ਭਗਿਨੀ ਧੀਤੁ-ਪੁਤ੍ਤੋ ਭਣ੍ਡੁਕ ਨਾਮਕੋ.

੧੭. ਥੇਰੇਨ ਦੇਵਿਯਾ ਧਮ੍ਮਂ, ਸੁਤ੍ਵਾ ਦੇਸਿਤਮੇਵ ਤੁ;

ਅਨਾਗਾਮਿਫਲਂ ਪਤ੍ਵਾ, ਵਸਿ ਥੇਰਸ੍ਸ ਸਨ੍ਤਿਕੇ.

੧੮. ਤਤ੍ਥ ਮਾਸਂ ਵਸਿਤ੍ਵਾਨ, ਜੇਟ੍ਠਮਾਸਸ੍ਸੁ’ ਪੋਸਥੇ;

ਥੇਰੋ ਚਤੂਹਿ ਥੇਰੇਹਿ, ਸੁਮਨੇਨਾ’ਥ ਭਣ੍ਡੁਨਾ.

੧੯. ਸਦ੍ਧਿਂ ਤੇਨ ਗਹਟ੍ਠੇਨ, ਨ ਰਤੋ ਞਾਤਿਹੇਤੁਨਾ;

ਤਸ੍ਮਾ ਵਿਹਾਰਾ ਆਕਾਸਂ, ਉਗ੍ਗਨ੍ਤ੍ਵਾ ਸੋ ਮਹਿਦ੍ਧਿਕੋ.

੨੦. ਖਣੇਨੇਵ ਇਧਾਗਮ੍ਮ, ਰਮ੍ਮੇ ਮਿਸ੍ਸਕ ਪਬ੍ਬਤੇ;

ਅਟ੍ਠਾਸਿ ਵਿਲੁਕੂਟਮ੍ਹਿ, ਰੁਚਿਰਮ੍ਬਤ੍ਥਲੇ ਵਰੇ.

੨੧. ਲਂਕਾਪਸਾਦ ਗੁਣੇਨ ਵਿਯਾਕਤੋ ਸੋ;

ਲਂਕਾਹਿਤਾਯ ਮੁਨਿਨਾ ਸਯਿਤੇਨ ਅਨ੍ਤੇ;

ਲਂਕਾਯ ਸਤ੍ਥੁਸਦਿਸੋ ਹਿਤਹੇਤੁ ਤਸ੍ਸਾ;

ਲਂਕਾਮਰੂਹਿ ਮਹਿਤੋ’ਭਿਨਿਸੀਦਿ ਤਤ੍ਤਾਤਿ.

ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਮਹਿਨ੍ਦਾਗਮਨੋ ਨਾਮ

ਤੇਰਸਮੋ ਪਰਿਚ੍ਛੇਦੋ.