ਚੁਦ੍ਦਸਮ ਪਰਿਚ੍ਛੇਦ

ਨਗਰਪ੍ਪਵੇਸਨੋ

੧. ਦੇਵਾਨਂਪਿਯਤਿਸ੍ਸੋ ਸੋ, ਰਾਜਾ ਸਲਿਲਕੀਲ਼ਿਤਂ;

ਦਤ੍ਵਾ ਨਗਰਵਾਸੀਨਂ, ਮਿਗਵਂ ਕੀਲ਼ਿਤੁਂ ਅਗਾ.

੨. ਚਤ੍ਤਾਲੀਸਸਹਸ੍ਸੇਹਿ, ਨਰੇਹਿ ਪਰਿਵਾਰਿਤੋ;

ਧਾਵਨ੍ਤੋ ਪਦਸਾਯੇਵ, ਅਗਮਾ ਮਿਸ੍ਸਕਂ ਨਗਂ.

੩. ਥੇਰੇ ਦਸ੍ਸੇਤੁਮਿਚ੍ਛਨ੍ਤੋ, ਦੇਵੋ ਤਸ੍ਮਿਂ ਮਹੀਧਰੇ;

ਗੁਮ੍ਭਂਭਕ੍ਖਯਮਾਨੋ’ਵ, ਅਟ੍ਠਾ ਗੋਕਣ੍ਣਰੂਪਵਾ.

੪. ਰਾਜਾ ਦਿਸ੍ਵਾ ‘‘ਪਮਤ੍ਤਂ ਤਂ, ਨ ਯੁਤ੍ਤਂ ਵਿਜ੍ਝਿਤੁਂ’’ ਇਤਿ;

ਜਿਯਾ ਸਦ੍ਦਮਕਾਧਾਪਿ, ਗੋਕਣ੍ਣੋ ਪਬ੍ਬਤਨ੍ਤਰਂ.

੫. ਰਾਜਾ’ਨੁਧਾਵਿ ਸੋਧਿਂ, ਥੇਰਾਨਂ ਸਨ੍ਤਿਕਂ ਗਤੋ;

ਥੇਰੇ ਦਿਟ੍ਠੇ ਨਰਿਨ੍ਦੇਨ, ਸਯਮਨ੍ਤਰਧਾਯਿਸੋ.

੬. ਥੇਰੋ ‘‘ਬਹੂਸੁ ਦਿਟ੍ਠੇਸੁ, ਅਤਿਭਾਯਿਸ੍ਸਤੀ’’ ਤਿਸੋ;

ਅਤ੍ਤਾਨਮੇਵ ਦਸ੍ਸੇਸਿ, ਪਸ੍ਸਿਤ੍ਵਾ ਤਂ ਮਹੀਪਤਿਂ.

੭. ਭੀਤੋ ਅਟ੍ਠਾਸਿ ਤਂ ਥੇਰੋ, ‘‘ਏਹਿ ਤਿਸ੍ਸਾਤਿ ਅਬ੍ਰਵਿ;

ਤਿਸ੍ਸਾ’ਤਿ ਵਚਨੇਨੇਵ, ਰਾਜਾ ਯਕ੍ਖੋ’’ਤਿ ਚਿਨ੍ਤਯੀ.

੮. ਸਮਣਾ ਮਯਂ ਮਹਾਰਾਜ, ਧਮ੍ਮਰਾਜਸ੍ਸ ਸਾਵਕਾ;

ਤਮੇਵ ਅਨੁਕਮ੍ਪਾਯ, ਜਮ੍ਬੁਦੀਪਾ ਇਧਾਗਤਾ.

੯. ਇਚ੍ਚਾਹ ਥੇਰੋ ਤਂ ਸੁਤ੍ਵਾ, ਰਾਜਾ ਵੀਤਭਯੋ ਅਹੁ;

ਸਰਿਤ੍ਵਾ ਸਖੀਸਨ੍ਦੇਸਂ, ‘‘ਸਮਾਣਾ’’ ਇਤਿ ਨਿਚ੍ਛਿਤੋ.

੧੦. ਧਨੁਂ ਸਰਞ੍ਚ ਨਿਕ੍ਖਿਪ੍ਪ, ਉਪਸਙ੍ਕਮ੍ਮ ਤਂ ਇਸਿਂ;

ਸਮ੍ਮੋਦਮਾਨੋ ਥੇਰੇਨ, ਸੋ ਨਿਸੀਦਿ ਤਦਨ੍ਤਿਕੇ.

੧੧. ਤਦਾ ਤਸ੍ਸ ਮਨੁਸ੍ਸਾ ਤੇ, ਆਗਮ੍ਮ ਪਰਿਵਾਰਯੁਂ;

ਤਦਾ ਸੇਸੇ ਛ ਦਸ੍ਸੇਸਿ, ਮਹਾਥੇਰੋ ਸਹਾਗਤੇ.

੧੨. ਤੇ ਦਿਸ੍ਵਾ ਅਬ੍ਰਵੀ ਰਾਜਾ, ‘‘ਕਦਾ’’ ਮੇ ਆਗਤਾ ਇਤਿ;

‘‘ਮਯਾ ਸਦ੍ਧਿਂ’’ਤਿ ਥੇਰੇਨ, ਵੁਤ੍ਤੇ ਪੁਚ੍ਛਿ ਇਦਂ ਪੁਨ.

੧੩. ‘‘ਸਨ੍ਤਿ ਈਦਿਸਕਾ ਅਞ੍ਞੇ, ਜਮ੍ਬੁਦੀਪੇ ਯਤੀ’’ ਇਤਿ;

ਆਹ ‘‘ਕਾਸਾਵਪਜ੍ਜੋ ਤੋ, ਜਮ੍ਬੁਦੀਪੋ ਤਹਿਂ ਪਨ.

੧੪. ਤੇਵਿਜ੍ਜਾ ਇਦ੍ਧਿਪ੍ਪਤ੍ਤਾ ਚ, ਚੇਤੋਪਰਿਯਕੋਵਿਦਾ;

‘‘ਦਿਬ੍ਬਸੋਤਾ’ਰਹਨ੍ਤੋ ਚ, ਬਹੂ ਬੁਦ੍ਧਸ੍ਸ ਸਾਵਕਾ’’.

੧੫. ਪੁਚ੍ਛਿ ‘‘ਕੇਨਾਗਤਤ੍ਥਾ’’ਤਿ, ਨ ਥਲੇਨ ਨ ਵਾਰਿਨਾ;

ਆਗਤਮ੍ਹਾ’’ਤਿ ਵੁਤ੍ਤੇ ਸੋ, ਵਿਜਾਨਿ ਨਭਸਾਗਮਂ.

੧੬. ਵੀਮਂਸਂਸੋ ਮਹਾਪਞ੍ਞੋ, ਕਣ੍ਹਂ ਪਞ੍ਹਮਪੁਚ੍ਛਿਤਂ;

ਪੁਟ੍ਠੋ ਪੁਟ੍ਠੋ ਵਿਯਾਕਾਸਿ, ਤਂਤਂ ਪਞ੍ਹਂ ਮਹੀਪਤਿ.

੧੭. ਰੁਕ੍ਖੋਯਂ ਰਾਜਕਿਨ੍ਨਾਮੋ, ਅਞ੍ਞੋ ਨਾਮ ਅਯਂ ਤਰੁ;

ਇਮਂ ਮੁਞ੍ਚਿਯ ਅਤ੍ਥ’ਮ੍ਬੋ, ਸਨ੍ਤਿ ਅਮ੍ਬਤਰੂ ਬਹੁਂ.

੧੮. ਇਮਞ੍ਚ ਅਮ੍ਬਂ ਤੇਚ’ਮ੍ਬੇ, ਮੁਞ੍ਚਿਯਤ੍ਥਿ ਮਹੀਰੁਹਾ;

ਸਨ੍ਤਿ ਭਨ੍ਤੇ ਬਹੁ ਰੁਕ੍ਖਾ, ਅਨਮ੍ਬਾਪਨ ਤੇ ਤਰੁ.

੧੯. ਅਞ੍ਞੇ ਅਮ੍ਬੇ ਅਨਮ੍ਬੇ ਚ, ਮੁਞ੍ਚਿਯ’ਤ੍ਥਿ ਮਹੀਰੁਹਾ;

ਅਯਂ ਭਨ੍ਤੇ ਅਮ੍ਬਰੁਕ੍ਖੋ, ਪਣ੍ਡਿਤੋ’ਸਿ ਨਰਿਸ੍ਸਰ.

੨੦. ਸਨ੍ਤਿ ਤੇ ਞਾਤਕਾ ਰਾਜ, ਸਨ੍ਤਿ ਭਨ੍ਤੇ ਬਹੁਜ੍ਜਨਾ;

ਸਨ੍ਤਿ ਅਞ੍ਞਾਤਕਾ ਰਾਜ, ਸਨ੍ਤਿ ਤੇ ਞਾਤਿਤੋ ਬਹੂ.

੨੧. ਞਾਤਕੇ ਤੇ ਚ ਅਞ੍ਞੇ ਚ, ਮੁਞ੍ਚਿਯ’ਞ੍ਞੋਪਿ ਅਤ੍ਥਿ ਨੁ;

‘‘ਭਨ੍ਤੇ’’ ਹਮੇਵ ਸਾਧੁ ਤ੍ਵਂ, ਪਣ੍ਡਿਤੋ’ਸਿ ਨਰਿਸ੍ਸਰ.

੨੨. ਪਣ੍ਡਿਤੋ’ਤਿ ਵਿਦਿਤ੍ਵਾਨ, ਚੂਲ਼ਹਤ੍ਥਿਪਦੋਪਮਂ;

ਸੁਤ੍ਤਨ੍ਤਂ ਦੇਸਯੀ ਥੇਰੋ, ਮਹੀਪਸ੍ਸ ਮਹਾਮਤੀ.

੨੩. ਦੇਸਨਾਪਰਿਯੋਸਾਨੇ, ਸਦ੍ਧਿਂ ਤੇਹਿ ਨਰੇਹਿ ਸੋ;

ਚਤ੍ਤਾਲੀਸਸਹਸ੍ਸੇਹਿ, ਸਰਣੇਸੁ ਪਤਿਟ੍ਠਹਿ.

੨੪. ਭਤ੍ਤਾ’ਭੀਹਾਰਂ ਸਾਯਨ੍ਹੇ, ਰਞ੍ਞੋ ਅਭਿਹਰੁਂ ਤਦਾ;

‘‘ਨ ਭੁਞ੍ਜਿਸ੍ਸ’’ਨ੍ਤਿ ਦਾਨਿ ਮੇ, ਇਤਿ ਜਨਮ੍ਮਿ ਭੂਪਤਿ.

੨੫. ਪੁਚ੍ਛਿਤੁਂਯੇਵ ਯੁਤ੍ਤਨ੍ਤਿ, ਭਤ੍ਤੇਨਾ’ਪੁਚ੍ਛਿਤੇ ਇਸਿ;

ਨ ਭੁਞ੍ਜਾਮ ਇਦਾਨੀ’ਤਿ, ਵੁਤ੍ਤੇ ਕਾਲਞ੍ਚ ਪੁਚ੍ਛਿਸੋ.

੨੬. ਕਾਲਂ ਵੁਤ੍ਤੇ’ਬ੍ਰਵਿ ਏਵਂ, ‘‘ਗਚ੍ਛਾਮ ਨਗਰਂ’’ਇਤਿ;

ਤੁਵਂ ਗਚ੍ਛ ਮਹਾਰਾਜ, ਵਸਿਸ੍ਸਾਮ ਮਯਂ ਇਧ.

੨੭. ਏਵਂ ਸਤਿ ਕੁਮਾਰੋ’ਯਂ, ਅਮ੍ਹੇਹਿ ਸਹ ਗਚ੍ਛਤੁ;

ਅਯਞ੍ਹਿ ਆਗਤਫਲੋ, ਰਾਜ ਵਿਞ੍ਞਾਤਸਾਸਨੋ.

੨੮. ਅਪੇਕ੍ਖਮਾਨੋ ਪਬ੍ਬਜ੍ਜਂ, ਵਸਤ’ਮ੍ਹਾਕਮਨ੍ਤਿਕੇ;

ਇਦਾਨਿ ਪਬ੍ਬਜੇਸ੍ਸਾਮ, ਇਮਂ ਤ੍ਵਂ ਗਚ੍ਛ ਭੂਮਿਪ.

੨੯. ਪਾਤੋ ਰਥਂ ਪੇਸਯਿਸ੍ਸਂ, ਤੁਮ੍ਹੇ ਤਤ੍ਥ ਠਿਤਾ ਪੁਰਂ;

ਯਾਥਾ’ਤਿ ਥੇਰੇ ਵਨ੍ਦਿਤ੍ਵਾ, ਭਣ੍ਡੁਂਨੇਤ੍ਵ’ਕ ਮਨ੍ਤਕਂ.

੩੦. ਪੁਚ੍ਛਿ ਥੇਰਾਧਿਕਾਰਂਸੋ, ਰਞ੍ਞੋ ਸਬ੍ਬਮਭਾਸਿ ਸੋ;

ਥੇਰਂ ਞਤ੍ਵਾ’ਤਿ ਤੁਟ੍ਠੋਸੋ, ‘‘ਲਾਭਾ ਮੇ’’ਇਤਿ ਚਿਨ੍ਤਯਿ.

੩੧. ਭਣ੍ਡੁਸ੍ਸ ਗੀਹਿਭਾਵੇਨ, ਗਤਾਸਙ੍ਕੋ ਨਰਿਸ੍ਸਰੋ;

ਅਞ੍ਞਾਸਿ ਨਰਭਾਵਂ ਸੋ, ‘‘ਪਬ੍ਬਾਜੇਮ ਇਮਂ’’ ਇਤਿ.

੩੨. ਥੇਰੋ ਤਂ ਗਾਮਸੀਮਾਯਂ, ਤਸ੍ਮਿਂਯੇਵ ਖਣੇ ਅਕਾ;

ਭਣ੍ਡੁਕਸ੍ਸ ਕੁਮਾਰਸ੍ਸ, ਪਬ੍ਬਜ੍ਜਮੁਪਸਮ੍ਪਦਂ.

੩੩. ਤਸ੍ਮਿਂਯੇਵ ਖਣੇ ਸੋ ਚ, ਅਰਹਤ੍ਤਮਪਾਪੁਣਿ;

ਸੁਮਨਂ ਸਾਮਣੇਰਂ ਤਂ, ਥੇਰੋ ਆਮਨ੍ਤਯੀ ਤਤੋ.

੩੪. ਧਮ੍ਮਸਵਨਕਾਲਂ ਤ੍ਵਂ, ਘੋਸੇਹੀ’’ਤਿ ਅਪੁਚ੍ਛਿਸੋ;

ਸਾਵੇਨ੍ਤੋ ਕਿਤ੍ਤਕਂ ਠਾਨਂ, ਭਨ੍ਤੇ ਘੋਸੇਮ’ਹਂ ਇਤਿ.

੩੫. ‘‘ਸਕਲਂ ਤਮ੍ਬਪਣ੍ਣੀ’’ਤਿ, ਵੁਤ੍ਤੇ ਥੇਰੇਨ ਇਦ੍ਧਿਯਾ;

ਸਾਵੇਨ੍ਤੋ ਸਕਲਂ ਲਂਕਂ, ਧਮ੍ਮਕਾਲਮਘੋਸਯੀ.

੩੬. ਰਾਜਾ ਨਾਗਚਤੁਤ੍ਤੇਸੋ, ਸੋਣ੍ਣਿਪਸ੍ਸੇ ਨਿਸੀਦਿਯ;

ਭੁਞ੍ਜਨ੍ਤੋ ਤਂ ਰਵਂ ਸੁਤ੍ਵਾ, ਥੇਰਨ੍ਤਿਕ ਮਪੇਸਯਿ.

੩੭. ‘‘ਉਪਦ੍ਦਵੋ ਨੁ ਅਤ੍ਥੀ’’ਤਿ, ਆਹ ਨਤ੍ਥਿ ਉਦ੍ਦਵੋ;

ਸੋਤੁਂ ਸਮ੍ਬੁਦ੍ਧਵਚਨਂ, ਕਾਲੋ ਘੋਸਾਪਿਤੋ ਇਤਿ.

੩੮. ਸਾਮਣੇਰ ਰਵਂ ਸੁਤ੍ਵਾ, ਭੁਮ੍ਮਾਦੇਵਾ ਅਘੋਸਯੁਂ;

ਅਨੁਕ੍ਕਮੇਨ ਸੋ ਸਦ੍ਦੋ, ਬ੍ਰਹ੍ਮਲੋਕਂ ਸਮਾਰੁਹਿ.

੩੯. ਤੇਨ ਘੋਸੇਨ ਦੇਵਾਨਂ, ਸਨ੍ਨਿਪਾਤੋ ਮਹਾ ਅਹੁ;

ਸਮਚਿਤ੍ਤਸੁਤ੍ਤਂ ਦੇਸੇਸਿ, ਥੇਰੋ ਤਸ੍ਮਿਂ ਸਮਾਗਮੇ.

੪੦. ਅਸਂਖਿਯਾਨਂ ਦੇਵਾਨਂ, ਧਮ੍ਮਾਭਿਸਮਯੋ ਅਹੁ;

ਬਹੂ ਨਾਗਾ ਸੁਪਣ੍ਣਾ ਚ, ਸਰਣੇਸੁ ਪਤਿਟ੍ਠਯੁਂ.

੪੧. ਯਥੇਦਂ ਸਾਰਿਪੁਤ੍ਤਸ੍ਸ, ਸੁਤ੍ਤਂ ਥੇਰਸ੍ਸ ਭਾਸਤੋ;

ਤਥਾ ਮਹਿਨ੍ਦਤ੍ਥੇਰਸ੍ਸ, ਅਹੁ ਦੇਵਸਮਾਗਮੋ.

੪੨. ਰਾਜਾ ਪਭਾ ਤੇ ਪਾਹੇਸਿ, ਰਥਂ ਸਾਰਥਿ ਸੋ ਗਤੋ;

‘‘ਆਰੋਹਥ ਰਥਂ ਯਾਮ, ਨਗਰਂ’’ ਇਤਿ ਤੇ’ਬ੍ਰਵਿ.

੪੩. ਨਾ’ਰੋਹਾਮ ਰਥਂ ਗਚ੍ਛ, ਗਚ੍ਛਾਮ ਤਵ ਪਚ੍ਛਤੋ;

ਇਤਿ ਵਤ੍ਵਾਨ ਪੇਸੇਤ੍ਵਾ, ਸਾਰਥਿਂ ਸੁਮਨੋਰਥਂ.

੪੪. ਵੇਹਾਸਮਬ੍ਭੁਗਨ੍ਤ੍ਵਾ, ਤੇ ਨਗਰਸ੍ਸ ਪੁਰਤ੍ਥਤੋ;

ਪਠਮਤ੍ਥੂਪਟ੍ਠਾਨਮ੍ਹਿ, ਓਤਰਿਂਸੁ ਮਹਿਦ੍ਧਿਕਾ.

੪੫. ਥੇਰੇਹਿ ਪਠਮੋਤਿਣ੍ਣ-ਠਾਨਮ੍ਹਿ ਕਤਚੇਤਿਯਂ;

ਅਜ੍ਜਾਪਿ ਵੁਚ੍ਚਤੇ ਤੇਨ, ਏਵਂ ਪਠਮਚੇਤਿਯਂ.

੪੬. ਰਞ੍ਞਾ ਥੇਰਗੁਣਂ ਸੁਤ੍ਵਾ, ਸਬ੍ਬਾ ਅਨ੍ਤੇਪੁਰਿਤ੍ਥਿਯੋ;

ਥੇਰਦਸ੍ਸਨਮਿਚ੍ਛਿਂਸੁ, ਯਸ੍ਮਾ ਤਸ੍ਮਾਮਹੀਪਤਿ.

੪੭. ਅਨ੍ਤੋ’ਵ ਰਾਜਵਤ੍ਥੁਸ੍ਸ, ਰਮ੍ਮਂ ਕਾਰੇਸਿ ਮਣ੍ਡਪਂ;

ਸੇਤੇਹਿ ਵਤ੍ਥਪੁਪ੍ਫੇਹਿ, ਛਾਦਿਤਂ ਸਮਲਙ੍ਕਤਂ.

੪੮. ਉਚ੍ਚਸੇਯ੍ਯਾਵਿਰਮਣਂ, ਸੁਤਤ੍ਤਾ ਥੇਰਸਨ੍ਤਿਕੇ;

ਕਙ੍ਖੀ ‘‘ਉਚ੍ਚਾਸਨੇ ਥੇਰੋ, ਨਿਸੀਦਿਦੇਯ੍ਯਨੁਨੋਤਿ ਚ.

੪੯. ਤਦਨ੍ਤਰੇ ਸਾਰਥਿ ਸੋ, ਥੇਰੇ ਦਿਸ੍ਵਾ ਤਹਿਂ ਠਿਤੇ;

ਚੀਵਰਂ ਪਾਰੁਪਨ੍ਤੇ ਤੇ, ਅਤਿਵਿਮ੍ਹਿਤ ਮਾਨਸੋ.

੫੦. ਗਨ੍ਤ੍ਵਾ ਰਞ੍ਞੋ ਨਿਵੇਦੇਸਿ, ਸੁਤ੍ਵਾ ਸਬ੍ਬਂ ਮਹੀਮਤਿ;

‘‘ਨਿਸਜ੍ਜਂ ਨ ਕਰਿਸ੍ਸਨ੍ਤਿ, ਪੀਠਕੇਸੂ’’ਤਿ ਨਿਚ੍ਛਿਤੋ.

੫੧. ‘‘ਸੁਸਾਧੁ ਭੁਮ੍ਮਤ੍ਥਰਣਂ, ਪਞ੍ਞਾਪੇਥਾ’’ਤਿ ਭਾਸਿਯ;

ਗਨ੍ਤ੍ਵਾ ਪਟਿਪਥਂ ਥੇਰੇ, ਸਕ੍ਕਚ੍ਚਂ ਅਭਿਵਾਦਿਯ.

੫੨. ਮਹਾਮਹਿਨ੍ਦਤ੍ਥੇਰਸ੍ਸ, ਹਤ੍ਥਤੋ ਪਤ੍ਤਮਾਦਿਯ;

ਸਕ੍ਕਾਰਪੂਜਾਵਿਧਿਨਾ, ਪੁਰਂ ਥੇਰਂ ਪਵੇਸਯਿ.

੫੩. ਦਿਸ੍ਵਾ ਆਸਨਪਞ੍ਞਤ੍ਤਿਂ, ਨੇਮਿਤ੍ਤਾ ਬ੍ਯਾਕਰੁਂ ਇਤਿ;

‘‘ਗਹਿਤਾ ਪਥਵੀ’ਮੇਹਿ, ਦੀਪੇ ਹੇਸ੍ਸਨ੍ਤਿ ਇਸ੍ਸਰਾ.

੫੪. ਨਰਿਨ੍ਦੋ ਪੂਜਯਨ੍ਤੋ ਤੇ, ਥੇਰੇ ਅਨ੍ਤੇਪੁਰਂ ਨਯਿ;

ਤਤ੍ਥ ਤੇ ਦੁਸ੍ਸਪੀਠੇਸੁਂ, ਨਿਸੀਦਿਂਸੁ ਯਥਾਰਹਂ.

੫੫. ਤੇ ਯਾਗੁਖਜ੍ਜਭੋਜ੍ਜੇਹਿ, ਸਯਂ ਰਾਜਾ ਅਤਪ੍ਪਯਿ;

ਨਿਟ੍ਠਿਤੇ ਭਤ੍ਤਕਿਚ੍ਚਮ੍ਹਿ, ਸਯਂ ਉਪਨਿਸੀਦਿਯ.

੫੬. ਕਨਿਟ੍ਠਸ੍ਸੋਪਰਾਜਸ੍ਸ, ਮਹਾਨਾਗਸ੍ਸ ਜਾਯਿਕਂ;

ਵਸਨ੍ਤਿਂ ਰਾਜਗੇਹੇ’ਵ, ਪਕ੍ਕੋਸਾ ਪੇਸਿਚਾ’ਨੁਲਂ.

੫੭. ਆਗਮ੍ਮ ਅਨੁਲਾਦੇਵੀ, ਪਞ੍ਚ ਇਤ੍ਥਿਸਤੇਹਿ ਸਾ;

ਥੇਰੇਵਨ੍ਦਿਯ ਪੂਜੇਤ੍ਵਾ, ਏਕਮਨ੍ਤਮੁਪਾਵਿਸਿ.

੫੮. ਪੇਤਵਤ੍ਥੁਂ ਵਿਮਾਨਞ੍ਚ, ਸਚ੍ਚਸਂਯੁਤ੍ਤਮੇਵ ਚ;

ਦੇਸੇਸਿ ਥੇਰੋ ਤਾ ਇਤ੍ਥੀ, ਪਠਮਂ ਫਲਮਜ੍ਝਗੁਂ.

੫੯. ਹਿਯ੍ਯੋ ਦਿਟ੍ਠਮਨੁਸ੍ਸੇਹਿ, ਸੁਤ੍ਵਾ ਥੇਰਗੁਣੇ ਬਹੂ;

ਥੇਰਦਸ੍ਸਨਮਿਚ੍ਛਨ੍ਤਾ, ਸਮਾਗਨ੍ਤ੍ਵਾਨ ਨਾਗਰਾ.

੬੦. ਰਾਜਦ੍ਵਾਰੇ ਮਹਾਸਦ੍ਦਂ, ਅਕਰੁਂ ਤਂ ਮਹੀਪਤਿ;

ਸੁਤ੍ਵਾ ਪੁਚ੍ਛਿਯ ਜਾਨਿਤ੍ਵਾ, ਆਹ ਤੇਸਂ ਹਿਤਤ੍ਥਿਕੋ.

੬੧. ਸਬ੍ਬੇਸਂ ਇਧ ਸਮ੍ਬਾਧੋ, ਸਾਲਾਮਙ੍ਗਲਹਤ੍ਥਿਨੋ;

ਸੋਧੇਥ ਤਤ੍ਥ ਦਕ੍ਖਨ੍ਤਿ, ਥੇਰੇ’ਮੇ ਨਾਗਰਾ’ਇਤਿ.

੬੨. ਸੋਧੇਤ੍ਵਾ ਹਤ੍ਥਿਸਾਲਂ ਤਂ, ਵਿਤਾਨਾਦੀਹਿ ਸਜ੍ਜੁਕਂ;

ਅਲਙ੍ਕਰਿਤ੍ਵਾ ਸਯਨੇ, ਪਞ੍ਞਪੇਸੁਂ ਯਥਾਰਹਂ.

੬੩. ਸਥੇਰੋ ਤਤ੍ਥ ਗਨ੍ਤ੍ਵਾਨ, ਮਹਾਥੇਰੋ ਨਿਸੀਦਿਯ;

ਸੋ ਦੇਵਦੂਤਸੁਤ੍ਤਨ੍ਤਂ, ਕਥੇਸੀ ਕਥਿਕੋ ਮਹਾ.

੬੪. ਤਂ ਸੁਤ੍ਵਾਨ ਪਸੀਦਿਂਸੁ, ਨਗਰਾ ਤੇ ਸਮਾਗਤਾ;

ਤੇਸੁ ਪਾਣਸਹਸ੍ਸਂਤੁ, ਪਠਮਂ ਫਲਮਜ੍ਝਗਾ.

੬੫. ਲਂਕਾਦੀਪੇ ਸੋ ਸਤ੍ਥੁਕਪ੍ਪੋ ਅਕਪ੍ਪੋ;

ਲਂਕਾਧਿਟ੍ਠਾਨੇ ਦ੍ਵੀਸੁ ਠਾਨੇਸੁ ਥੇਰੋ;

ਧਮ੍ਮਂ ਭਾਸਿਤ੍ਵਾ ਦੀਪਭਾਸਾਯ ਏਵਂ;

ਸਦ੍ਧਮ੍ਮੋ ਤਾਰਂ ਕਾਰਯੀ ਦੀਪਦੀਪੋਤਿ.

ਸੁਜਨਪ੍ਪਸਾਦਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਨਗਰਪ੍ਪਵੇਸਨੋ ਨਾਮ

ਚੁਦ੍ਦਸਮੋ ਪਰਿਚ੍ਛੇਦੋ.