ਦ੍ਵਾਦਸਮ ਪਰਿਚ੍ਛੇਦ

ਨਾਨਾਦੇਸਪਸਾਦੋ

੧. ਥੇਰੋ ਮੋਗ੍ਗਲਿਪੁਤ੍ਤੋ ਸੋ, ਜਿਨਸਾਸਨ ਜੋਤਕੋ;

ਨਿਟ੍ਠਾਪੇਤ੍ਵਾਨ ਸਂਗੀਤਿਂ, ਪੇਕ੍ਖਮਾਨੋ ਅਨਾਗਤਂ.

੨. ਸਾਸਨਸ੍ਸ ਪਤਿਟ੍ਠਾਨਂ, ਪਚ੍ਚਨ੍ਤੇਸੁ ਅਵੇਕ੍ਖਿਯ;

ਪੇਸੇਸਿ ਕਤ੍ਤਿਕੇ ਮਾਸੇ, ਤੇਤੇ ਥੇਰੇ ਤਹਿਂ ਤਹਿਂ.

੩. ਥੇਰਂ ਕਸ੍ਮੀਰਗਨ੍ਧਾਰਂ, ਮਜ੍ਝਨ੍ਤਿਕਮਪੇਸਯਿ;

ਅਪੇਸਯੀ ਮਹਾਦੇਵ-ਤ੍ਥੇਰਂ ਮਹਿਸਮਣ੍ਡਲਂ.

੪. ਵਨਵਾਸਿਂ ਅਪੇਸਯਿ, ਥੇਰਂ ਰਕ੍ਖਿਤਨਾਮਕਂ;

ਤਥਾ’ਪਰਨ੍ਤਕਂ ਯੋਨ-ਧਮ੍ਮਰਕ੍ਖਿਤਨਾਮਕਂ.

੫. ਮਹਾਰਟ੍ਠਂ ਮਹਾਧਮ੍ਮ-ਰਕ੍ਖਿਤਤ੍ਥੇਰ ਨਾਮਕਂ;

ਮਹਾਰਕ੍ਖਿਤ ਥੇਰਂ ਤਂ, ਯੋਨ ਲੋਕਮਪੇਸਯਿ.

੬. ਪੇਸੇਸਿ ਮਜ੍ਝਿਮਂ ਥੇਰਂ, ਹਿਮਵਨ੍ਤਪਦੇਸਕਂ;

ਸੁਵਣ੍ਣਭੂਮਿਂ ਥੇਰੇ ਦ੍ਵੇ, ਸੋਣਮੁਤ੍ਤਰ ਮੇਵ ਚ.

੭. ਮਹਾਮਹਿਨ੍ਦਤ੍ਥੇਰਂ ਤਂ, ਥੇਰ ਇਟ੍ਟਿਯਮੁਤ੍ਤਿਯਂ;

ਸਮ੍ਬਲਂ ਭਦ੍ਦਸਾਲਞ੍ਚ, ਸਕੇ ਸਦ੍ਧਿਵਿਹਾਰਿਕੇ.

੮. ਲਂਕਾਦੀਪੇ ਮਨੁਞ੍ਞਮ੍ਹਿ, ਮਨੁਞ੍ਞਂ ਜਿਨਸਾਸਨਂ;

ਪਤਿਟ੍ਠਾਪੇਥ ਤੁਮ੍ਹੇ’ਤਿ, ਪਞ੍ਚ ਥੇਰੇ ਅਪੇਸਯਿ.

੯. ਤਦਾ ਕਸ੍ਮੀਰਗਨ੍ਧਾਰੇ, ਪਕ੍ਕਂ ਸਸ੍ਸਂ ਮਹਿਦ੍ਧਿਕੋ;

ਅਰਵਾਲੋ ਨਾਗਰਾਜਾ, ਵਸ੍ਸਂ ਕਰਕਸਞ੍ਞਿਤਂ.

੧੦. ਵਸ੍ਸਾ ਪੇਤ੍ਵਾ ਸਮੁਦ੍ਦਸ੍ਮਿਂ, ਸਬ੍ਬਂ ਖਿਪਤਿਦਾਰੁਣੋ;

ਤਤ੍ਰ ਮਜ੍ਝਨ੍ਤਿਕਤ੍ਥੇਰੋ, ਖਿਪ੍ਪਂ ਗਨ੍ਤ੍ਵਾ ਵਿਹਾਯਸਾ.

੧੧. ਅਰਵਾਲਦਹੇਵਾਰਿ-ਪਿਟ੍ਠੇ ਚਙ੍ਕਮਨਾਦਿਕੇ;

ਅਕਾਸਿ ਦਿਸ੍ਵਾ ਤਂਨਾਗਾ, ਰੁਟ੍ਠਾਰਞ੍ਞੋ ਨਿਵੇਦਯੁਂ.

੧੨. ਨਾਗਰਾਜਾ’ਥਰੁਟ੍ਠੋ ਸੋ, ਵਿਵਿਧਾ ਭਿਸਿਕਾ’ਕਰਿ;

ਵਾਤਾ ਮਹਨ੍ਤਾ ਵਾਯਨ੍ਤਿ, ਮੇਘੋ ਗਜ੍ਜਤਿ ਵਸ੍ਸਤਿ.

੧੩. ਫਲਨ੍ਤ੍ਯ’ਸਨਿਯੋ ਵਿਜ੍ਜੁ, ਨਿਚ੍ਛਰਨ੍ਤਿ ਤਤੋ ਤਤੋ;

ਮਹਿਰੁਹਾ ਪਬ੍ਬਤਾਨਂ, ਕੂਟਾਨਿ ਪਪਤਨ੍ਤਿ ਚ.

੧੪. ਵਿਰੂਪਰੂਪਾ ਨਾਗਾ ਚ, ਭਿਂਸਾਪੇਨ੍ਤਿ ਸਮਨ੍ਤਤੋ;

ਸਯਂ ਧੁਪਾਯਤਿ ਜਲਤਿ, ਅਕ੍ਕੋਸਨ੍ਤੋ ਅਨੇਕਧਾ.

੧੫. ਸਬ੍ਬਂ ਤਂ ਇਦ੍ਧਿਯਾ ਥੇਰੋ, ਪਟਿਬਾਹਿਯ ਭਿਂਸਨਂ;

ਅਵੋਚ ਨਾਗਰਾਜਂ ਤਂ, ਦਸ੍ਸੇਨ੍ਤੋ ਬਲਮੁਤ੍ਤਮਂ.

੧੬. ਸਦੇਵ ਕੋਪਿ ਚੇ ਲੋਕੋ, ਆਗਨ੍ਤ੍ਵਾ ਤਾਸਯੇਯ੍ਯ ਮਂ;

ਨ ਮੇ ਪਟਿਬਲੋ ਅਸ੍ਸ, ਜਨੇਤੁਂ ਭਯਭੇਰਵਂ.

੧੭. ਸਚੇ’ਪਿ ਤ੍ਵਂ ਮਹਿਂ ਸਬ੍ਬਂ, ਸਸਮੁਦ੍ਦਂ ਸਪਬ੍ਬਤਂ;

ਉਕ੍ਖਿਪਿਤ੍ਵਾ ਮਹਾਨਾਗ, ਖਿਪੇਯ੍ਯਾਸਿ ਮਮੋ’ਪਰਿ.

੧੮. ਨੇਵ ਮੇ ਸਕ੍ਕੁਣੇਯ੍ਯਾਸਿ, ਜਨੇਤੁਂ ਭਯਭੇਰਵਂ;

ਅਞ੍ਞਦਤ੍ਥੁ ਤਵੇ‘ਵ’ਸ੍ਸ, ਵਿਘਾਤੋ ਉਰਗਾਧਿਪ.

੧੯. ਤਂਸੁਤ੍ਵਾ ਨਿਮ੍ਮਦਸ੍ਸ’ਸ੍ਸ, ਥੇਰੋ ਧਮ੍ਮਮਦੇਸਯਿ;

ਤਤੋ ਸਰਣਸੀਲੇਸੁ, ਨਾਗਰਾਜਾ ਪਤਿਟ੍ਠਹਿ.

੨੦. ਤਥੇਵ ਚਤੁਰਾਸੀਤਿ-ਸਹਸ੍ਸਾਨਿ ਭੁਜਙ੍ਗਮਾ;

ਹਿਮਵਨ੍ਤੇਵ ਗਨ੍ਧਬ੍ਬਾ, ਯਕ੍ਖਾ ਕੁਮ੍ਭਣ੍ਡਕਾ ਬਹੂ.

੨੧. ਪਣ੍ਡਕੋ ਨਾਮ ਯਕ੍ਖੋ ਤੁ, ਸਦ੍ਧਿਂਹਾਰਿਤ ਯਕ੍ਖਿਯਾ;

ਪਞ੍ਚਸਤੇਹਿ ਪੁਤ੍ਤੇਹਿ, ਫਲਂ ਪਾਪੁਣਿ ਆਦਿਕਂ.

੨੨. ‘‘ਮਾ’’ਦਾਨਿ ਕੋਧਂ ਜਨਿਯਿਤ੍ਥ, ਇਤੋ ਉਦ੍ਧਂ ਯਥਾਪੁਰੇ;

ਸਸਘਾਤਞ੍ਚ ਮਾ’ਕਤ੍ਥ, ਸੁਖਕਾਮਾਹਿ ਪਾਣਿਨੋ.

੨੩. ਕਰੋਥ ਮੇਤ੍ਤਂ ਸਤ੍ਤੇਸੁ, ਵਸਨ੍ਤੁ ਮਨੁਜਾ ਸੁਖਂ;

ਇਤਿ ਤੇਨਾ’ਨੁਸਿਟ੍ਠਾ ਤੇ, ਤਥੇਵ ਪਟਿਪਜ੍ਜਿਸੁਂ.

੨੪. ਤਤੋ ਰਤਨਪਲ੍ਲਙ੍ਕੇ, ਥੇਰਂ ਸੋ ਉਰਗਾਧਿਪੋ;

ਨਿਸੀਦਾਪਿਯ ਅਟ੍ਠਾਸਿ, ਬੀਜਮਾਨੋ ਤਦਨ੍ਤਿਕੇ.

੨੫. ਤਦਾ ਕਸ੍ਮੀਰਗਨ੍ਧਾਰ-ਵਾਸਿਨੋ ਮਨੁਜਾ’ਗਤਾ;

ਨਾਗਰਾਜਸ੍ਸ ਪੂਜਤ੍ਥਂ, ਮਨ੍ਤ੍ਵਾ ਥੇਰਂ ਮਹਿਦ੍ਧਿਕਂ.

੨੬. ਥੇਰਮੇਵਾ’ਭਿ ਵਾਦੇਤ੍ਵਾ, ਏਕਮਨ੍ਤਂ ਨਿਸੀਦਿਸੁਂ;

ਤੇਸਂ ਧਮ੍ਮਮਦੇਸੇਸਿ, ਥੇਰੋ ਆਸਿਵਿਸੋਪਮਂ.

੨੭. ਅਸੀਤਿਯਾ ਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ;

ਸਤਸਹਸ੍ਸ ਪੁਰਿਸਾ, ਪਬ੍ਬਜੁਂ ਥੇਰਸਨ੍ਤਿਕੇ.

੨੮. ਤਤੋਪ੍ਪਭੁਪਤਿ ਕਸ੍ਮਿਰ-ਗਨ੍ਧਾਰਂ ਤੇ ਇਦਾਨਿਪਿ;

ਆਸੁਂ ਕਾਸਾਵ ਪਜ੍ਜੋਤਾ, ਵਤ੍ਥੁਤ੍ਤਯਪਰਾਯਨਾ.

੨੯. ਗਨ੍ਤ੍ਵਾ ਮਹਾਦੇਵਤ੍ਥੇਰੋ, ਦੇਸਂ ਮਹਿਸਮਣ੍ਡਲਂ;

ਸੁਤ੍ਤਨ੍ਤਂ ਦੇਵਦੂਤਂ ਸੋ, ਕਥੇਸਿ ਜਨਮਜ੍ਝਗੋ.

੩੦. ਚਤ੍ਤਾਲੀਸ ਸਹਸ੍ਸਾਨਿ, ਧਮ੍ਮਚਕ੍ਖੁਂ ਵਿਸੋਧਯੁਂ;

ਚਤ੍ਤਾਲੀਸ ਸਹਸ੍ਸਾਨਿ, ਪਬ੍ਬਜਿਂਸੁ ਤਦਨ੍ਤਿਕੇ.

੩੧. ਗਨ੍ਤ੍ਵਾ’ਥ ਰਕ੍ਖਿਤਤ੍ਥੇਰੋ, ਵਨਵਾਸਿਂ ਨਭੇ ਠਿਤੋ;

ਸਂਯੁਤ੍ਤਮਨਮਤਗ੍ਗਂ, ਕਥੇਸਿ ਜਨਮਜ੍ਝਗੋ.

੩੨. ਸਟ੍ਠਿ ਨਰਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ;

ਸਤ੍ਤਤਿਂਸ ਸਹਸ੍ਸਾਨਿ, ਪਬ੍ਬਜਿਂਸੁ ਤਦਨ੍ਤਿਕੇ.

੩੩. ਵਿਹਾਰਾਨਂ ਪਞ੍ਚਸਤਂ, ਤਸ੍ਮਿਂਦੇਸੇ ਪਤਿਟ੍ਠਹਿ;

ਪਤਿਟ੍ਠਾਪੇਸਿ ਤਤ੍ਥੇਵਂ, ਥੇਰੋ ਸੋ ਜਿਨਸਾਸਨਂ.

੩੪. ਗਨ੍ਤ੍ਵਾ’ਪਰਨ੍ਤਕਂ ਥੇਰੋ, ਯੋਨਕੋ ਧਮ੍ਮਰਕ੍ਖਿਤੋ;

ਅਗ੍ਗਿਕ੍ਖਨ੍ਧੋਪਮਂ ਸੁਤ੍ਤਂ, ਕਥੇਤ੍ਵਾ ਜਨਮਜ੍ਝਗੋ.

੩੫. ਸਤ੍ਤਤਿਂਸ ਸਹਸ੍ਸਾਨਿ, ਪਾਣੇ ਤਤ੍ਥ ਸਮਾਗਤੇ;

ਧਮ੍ਮਾਮਤਮਪਾਯੇਸਿ, ਧਮ੍ਮਾ ਧਮ੍ਮੇਸੁ ਕੋਵਿਦੋ.

੩੬. ਪੁਰਿਸਾਨਞ੍ਚ ਸਹਸ੍ਸਞ੍ਚ, ਇਤ੍ਥਿਯੋ ਚ ਤਤੋ’ਧਿਕਾ;

ਖਤ੍ਤਿਯਾਨਂ ਕੁਲਾਯੇਵ, ਨਿਕ੍ਖਮਿਤ੍ਵਾਨ ਪਬ੍ਬਜੁਂ.

੩੭. ਮਹਾਰਟ੍ਠਮਿਸੀ ਗਨ੍ਤ੍ਵਾ, ਸੋ ਮਹਾਧਮ੍ਮਰਕ੍ਖਿਤੋ;

ਮਹਾਨਾਰਦਕਸ੍ਸਪਵ੍ਹਂ, ਜਾਤਕਂ ਕਥਯੀ ਤਹਿਂ.

੩੮. ਮਗ੍ਗਫਲਂ ਪਾਪੁਣਿਂਸੁ, ਚਤੁਰਾਸੀਤਿ ਸਹਸ੍ਸਕਾ;

ਤੇਰਸਨ੍ਤੁ ਸਹਸ੍ਸਾਨਿ, ਪਬ੍ਬਜਿਂਸੁ ਤਦਨ੍ਤਿਕੇ.

੩੯. ਗਨ੍ਤ੍ਵਾਨ ਯੋਨਵਿਸਯਂ, ਸੋ ਮਹਾਧਮ੍ਮਰਕ੍ਖਿਤੋ ਇਸਿ;

ਕਾਲ਼ਕਾਰਾਮ ਸੁਤ੍ਤਨ੍ਤਂ, ਕਥੇਸਿ ਜਨਮਜ੍ਝਗੋ.

੪੦. ਪਾਣਸਤ ਸਹਸ੍ਸਾਨਿ, ਸਹਸ੍ਸਾਨਿ ਚ ਸਤ੍ਤਤਿ;

ਮਗ੍ਗਫਲਂ ਪਾਪੁਣਿਂਸੁ, ਦਸ ਸਹਸ੍ਸਾਨਿ ਪਬ੍ਬਜੁਂ.

੪੧. ਗਨ੍ਤ੍ਵਾ ਚਤੂਹਿ ਥੇਰੇਹਿ, ਦੇਸੇਸਿ ਮਜ੍ਝਿਮੋ ਇਸਿ;

ਹਿਮਵਨ੍ਤਪਦੇਸਸ੍ਮਿਂ, ਧਮ੍ਮਚਕ੍ਕਪਵਤ੍ਤਨਂ.

੪੨. ਮਗ੍ਗਫਲਪਾਪੁਣਿਂਸੁ, ਅਸੀਤਿਪਾਣ ਕੋਟਿਯੋ;

ਵਿਸੁਂ ਤੇ ਪਞ੍ਚਰਟ੍ਠਾਨਿ, ਪਞ੍ਚਥੇਰਾ ਪਸਾਦਯੁਂ.

੪੩. ਪੁਰਿਸਸਤਸਹਸ੍ਸਾਨਿ, ਏਕੇਕਸ੍ਸੇਵ ਸਨ੍ਤਿਕੇ;

ਪਬ੍ਬਜਿਂਸੁ ਪਸਾਦੇਨ, ਸਮ੍ਮਾਸਮ੍ਬੁਦ੍ਧ ਸਾਸਨੇ.

੪੪. ਸਦ੍ਧਿਂ ਉਤ੍ਤਰਥੇਰੇਨ, ਸੋਣਤ੍ਥੇਰੋ ਮਹਿਦ੍ਧਿਕੋ;

ਸੁਵਣ੍ਣਭੂਮਿਂ ਅਗਮਾ, ਤਸ੍ਮਿਂ ਤੁ ਸਮਯੇ ਪਨ.

੪੫. ਜਾਤੇ ਜਾਤੇ ਰਾਜਗੇਹੇ, ਦਾਰਕੇ ਰੁਦ੍ਦਰਕ੍ਖਸੀ;

ਸਮੁਦ੍ਦਤੋ ਨਿਕ੍ਖਮਿਤ੍ਵਾ, ਭਕ੍ਖਿਤ੍ਵਾ ਪਨ ਗਚ੍ਛਤਿ.

੪੬. ਤਸ੍ਮਿਂ ਖਣੇ ਰਾਜਗੇਹੇ,

ਜਾਤੋ ਹੋਤਿ ਕੁਮਾਰਕੋ;

ਥੇਰੇ ਮਨੁਸ੍ਸਾ ਪਸ੍ਸਿਤ੍ਵਾ,

ਰਕ੍ਖਸਾਨਂ ਸਹਾਯਕਾ.

੪੭. ਇਤਿ ਚਿਨ੍ਤਿਯ ਮਾਰੇਤੁਂ, ਸਾ ਯੁਵਾ ਉਪਸਙ੍ਕਮੁਂ;

‘‘ਕਿਮੇਤਨ੍ਤਿ’’ਚ ਪੁਚ੍ਛਿਤ੍ਵਾ, ਥੇਰਂ ਤੇ ਏਵ ਮਾਹੁਤੇ.

੪੮. ਸਮਣਾ ਮਯਂ ਹਿਮਵਨ੍ਤਾ, ਨ ਰਕ੍ਖਸਿ ਸਹਾਯਕਾ;

ਰਕ੍ਖਸੀ ਸਾ ਸਪਰਿਸਾ, ਨਿਕ੍ਖਨ੍ਤਾ ਹੋਤਿ ਸਾਗਰਾ.

੪੯. ਤਂ ਦਿਸ੍ਵਾਨ ਮਹਾਰਾਵਂ, ਵਿਰਵਿਂਸੁ ਮਹਾਜਨਾ;

ਦਿਗੁਣੇ ਰਕ੍ਖਸੇ ਥੇਰੋ, ਮਾਪਯਿਤ੍ਵਾ ਭਯਾਨਕੇ.

੫੦. ਤਂ ਰਕ੍ਖਸਿਂ ਸਪਰਿਸਂ, ਪਰਿਕ੍ਖਿਪਿ ਸਮਨ੍ਤਤੋ;

ਇਦਂ ਇਮੇਹਿ ਉਦ੍ਧਨ੍ਤਿ, ਮਨ੍ਤ੍ਵਾ ਭੀਤਾ ਪਲਾਯਿਸਾ.

੫੧. ਤਸ੍ਸ ਦੇਸਸ੍ਸ ਆਰਕ੍ਖਂ, ਠਪੇਤ੍ਵਾਨ ਸਮਨ੍ਤਤੋ;

ਤਸ੍ਮਿਂ ਸਮਾਗਮੇ ਥੇਰੋ, ਬ੍ਰਹ੍ਮਜਾਲਮਦੇਸਯਿ.

੫੨. ਸਰਣੇਸੁ ਚ ਸੀਲੇਸੁ, ਅਟ੍ਠਂਸੁ ਬਹਵੋ ਜਨਾ;

ਸਟ੍ਠਿਯਾ ਤੁ ਸਹਸ੍ਸਾਨਂ, ਧਮ੍ਮਾਭਿਸਮਯੋ ਅਹੁ.

੫੩. ਅਡ੍ਢੁਡ੍ਢਾਨਿ ਸਹਸ੍ਸਾਨਿ, ਪਬ੍ਬਜੁਂ ਕੁਲਦਾਰਕਾ;

ਪਬ੍ਬਜਿਂਸੁ ਦਿਯਡ੍ਢਨ੍ਤੁ, ਸਹਸ੍ਸਂ ਕੁਲਧੀਤਰੋ.

੫੪. ਤਤੋਪ੍ਪਭੁਤਿ ਸਞ੍ਜਾਤੇ, ਰਾਜਗੇਹੇ ਕੁਮਾਰਕੇ;

ਨਾਮਂ ਕਰਿਂਸੁ ਰਾਜਾਨੋ, ਸੋਣੁਤ੍ਤਰ ਸਨਾਮਕੇ.

੫੫. ਮਹਾਜਨਸ੍ਸਾਪਿ ਜਿਨਸ੍ਸ ਕਡ੍ਢਨਂ;

ਵਿਹਾਯ ਪਤ੍ਤਂ ਅਮਤਂ ਸੁਖਮ੍ਪਿਤੇ;

ਕਰਿਂਸੁ ਲੋਕਸ੍ਸ ਹਿਤਂ ਤਹਿਂ ਤਹਿਂ;

ਭਵੇਯ੍ਯ ਯੋ ਲੋਕਹਿਤੇ ਪਮਾਦਵਾਤਿ.

ਸੁਜਨਪ੍ਪਸਾਦ ਸਂਵੇਗਤ੍ਥਾਯ ਕਤੇ ਮਹਾਵਂਸੇ

ਨਾਨਾਦੇਸਪਸਾਦੋ ਨਾਮ ਦ੍ਵਾਦਸਮੋ ਪਰਿਚ੍ਛੇਦੋ.