੭. ਕਿਬ੍ਬਿਧਾਨਕਪ੍ਪ

ਪਠਮਕਣ੍ਡ

(ਕ)

ਬੁਦ੍ਧਂ ਞਾਣਸਮੁਦ੍ਦਂ, ਸਬ੍ਬਞ੍ਞੁਂ ਲੋਕਹੇਤੁ’ਖੀਣਮਤਿਂ;

ਵਨ੍ਦਿਤ੍ਵਾ ਪੁਬ੍ਬਮਹਂ, ਵਕ੍ਖਾਮਿ ਸਸਾਧਨਂ ਹਿ ਕਿਤਕਪ੍ਪਂ.

(ਖ)

ਸਾਧਨਮੂਲਂ ਹਿ ਪਯੋਗਂ,

ਆਹੁ ਪਯੋਗਮੂਲਮਤ੍ਥਞ੍ਚ;

ਅਤ੍ਥੇਸੁ ਵਿਸਾਰਦਮਤਯੋ,

ਸਾਸਨਸ੍ਸੁਧਰਾ ਜਿਨਸ੍ਸ ਮਤਾ.

(ਗ)

ਅਨ੍ਧੋ ਦੇਸਕਵਿਕਲੋ,

ਘਤਮਧੁਤੇਲਾਨਿ ਭਾਜਨੇਨ ਵਿਨਾ;

ਨਟ੍ਠੋ ਨਟ੍ਠਾਨਿ ਯਥਾ,

ਪਯੋਗਵਿਕਲੋ ਤਥਾ ਅਤ੍ਥੋ.

(ਘ)

ਤਸ੍ਮਾ ਸਂਰਕ੍ਖਣਤ੍ਥਂ, ਮੁਨਿਵਚਨਤ੍ਥਸ੍ਸ ਦੁਲ੍ਲਭਸ੍ਸਾਹਂ;

ਵਕ੍ਖਾਮਿ ਸਿਸ੍ਸਕਹਿਤਂ, ਕਿਤਕਪ੍ਪਂ ਸਾਧਨੇਨ ਯੁਤਂ.

੫੨੪. , ੫੬੧. ਧਾਤੁਯਾ ਕਮ੍ਮਾਦਿਮ੍ਹਿ ਣੋ.

ਧਾਤੁਯਾ ਕਮ੍ਮਾਦਿਮ੍ਹਿ ਣਪਚ੍ਚਯੋ ਹੋਤਿ.

ਕਮ੍ਮਂ ਕਰੋਤੀਤਿ ਕਮ੍ਮਕਾਰੋ, ਏਵਂ ਕੁਮ੍ਭਕਾਰੋ, ਮਾਲਾਕਾਰੋ, ਕਟ੍ਠਕਾਰੋ, ਰਥਕਾਰੋ, ਰਜਤਕਾਰੋ, ਸੁਵਣ੍ਣਕਾਰੋ, ਪਤ੍ਤਗ੍ਗਾਹੋ, ਤਨ੍ਤਵਾਯੋ, ਧਞ੍ਞਮਾਯੋ, ਧਮ੍ਮਕਾਮੋ, ਧਮ੍ਮਚਾਰੋ.

੫੨੫. , ੫੬੫. ਸਞ੍ਞਾਯਮ ਨੁ.

ਸਞ੍ਞਾਯਮਭਿਧੇਯ੍ਯਾਯਂ ਧਾਤੁਯਾ ਕਮ੍ਮਾਦਿਮ੍ਹਿ ਅਕਾਰਪਚ੍ਚਯੋ ਹੋਤਿ, ਨਾਮਮ੍ਹਿ ਚ ਨੁਕਾਰਾਗਮੋ ਹੋਤਿ.

ਅਰਿਂ ਦਮੇਤੀਤਿ ਅਰਿਨ੍ਦਮੋ, ਰਾਜਾ. ਵੇਸ੍ਸਂ ਤਰਤੀਤਿ ਵੇਸ੍ਸਨ੍ਤਰੋ, ਰਾਜਾ. ਤਣ੍ਹਂ ਕਰੋਤੀਤਿ ਤਣ੍ਹਙ੍ਕਰੋ, ਭਗਵਾ. ਮੇਧਂ ਕਰੋਤੀਤਿ ਮੇਧਙ੍ਕਰੋ, ਭਗਵਾ. ਸਰਣਂ ਕਰੋਤੀਤਿ ਸਰਣਙ੍ਕਰੋ, ਭਗਵਾ. ਦੀਪਂ ਕਰੋਤੀਤਿ ਦੀਪਙ੍ਕਰੋ, ਭਗਵਾ.

੫੨੬. , ੫੬੭. ਪੁਰੇ ਦਦਾ ਚ ਇਂ.

ਪੁਰਸਦ੍ਦੇ ਆਦਿਮ੍ਹਿ ਦਦਇਚ੍ਚੇਤਾਯ ਧਾਤੁਯਾ ਅਕਾਰਪਚ੍ਚਯੋ ਹੋਤਿ, ਪੁਰਸਦ੍ਦਸ੍ਸ ਅਕਾਰਸ੍ਸ ਚ ਇਂ ਹੋਤਿ.

ਪੁਰੇ ਦਾਨਂ ਅਦਾਸੀਤਿ ਪੁਰਿਨ੍ਦਦੋ ਦੇਵਰਾਜਾ.

੫੨੭. , ੫੬੮. ਸਬ੍ਬਤੋ ਣ੍ਵੁ ਤ੍ਵਾਵੀ ਵਾ.

ਸਬ੍ਬਤੋ ਧਾਤੁਤੋ ਕਮ੍ਮਾਦਿਮ੍ਹਿ ਵਾ ਅਕਮ੍ਮਾਦਿਮ੍ਹਿ ਵਾ ਅਕਾਰ ਣ੍ਵੁ ਤੁ ਆਵੀਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.

ਤਂ ਕਰੋਤੀਤਿ ਤਕ੍ਕਰੋ, ਹਿਤਂ ਕਰੋਤੀਤਿ ਹਿਤਕਰੋ, ਵਿਨੇਤਿ ਏਤ੍ਥ, ਏਤੇਨਾਤਿ ਵਾ ਵਿਨਯੋ ਨਿਸ੍ਸਾਯ ਨਂ ਵਸਤੀਤਿ ਨਿਸ੍ਸਯੋ.

ਣ੍ਵੁਮ੍ਹਿ – ਰਥਂ ਕਰੋਤੀਤਿ ਰਥਕਾਰਕੋ, ਅਨ੍ਨਂ, ਦਦਾਤੀਤਿ ਅਨ੍ਨਦਾਯਕੋ, ਵਿਨੇਤਿ ਸਤ੍ਤੇਤਿ ਵਿਨਾਯਕੋ, ਕਰੋਤੀਤਿ ਕਾਰਕੋ, ਦਦਾਤੀਤਿ ਦਾਯਕੋ, ਨੇਤੀਤਿ ਨਾਯਕੋ.

ਤੁਮ੍ਹਿ – ਤਂ ਕਰੋਤੀਤਿ ਤਕ੍ਕਤ੍ਤਾ, ਤਸ੍ਸ ਕਤ੍ਤਾਤਿ ਵਾ ਤਕ੍ਕਤ੍ਤਾ. ਭੋਜਨਂ ਦਦਾਤੀਤਿ ਭੋਜਨਦਾਤਾ, ਭੋਜਨਸ੍ਸ ਦਾਤਾਤਿ ਵਾ ਭੋਜਨਦਾਤਾ. ਕਰੋਤੀਤਿ ਕਤ੍ਤਾ. ਸਰਤੀਤਿ ਸਰਿਤਾ.

ਆਵੀਮ੍ਹਿ – ਭਯਂ ਪਸ੍ਸਤੀਤਿ ਭਯਦਸ੍ਸਾਵੀ ਇਚ੍ਚੇਵਮਾਦਿ.

੫੨੮. , ੫੭੭. ਵਿਸ ਰੁਜ ਪਦਾਦਿਤੋ ਣ.

ਵਿਸ ਰੁਜ ਪਦਇਚ੍ਚੇਵਮਾਦੀਹਿ ਧਾਤੂਹਿ ਣ ਪਚ੍ਚਯੋ ਹੋਤਿ.

ਪਵਿਸਤੀਤਿ ਪਵੇਸੋ, ਰੁਜਤੀਤਿ ਰੋਗੋ, ਉਪ੍ਪਜ੍ਜਤੀਤਿ ਉਪ੍ਪਾਦੋ, ਫੁਸਤੀਤਿ ਫਸ੍ਸੋ, ਉਚਤੀਤਿ ਓਕੋ, ਭਵਤੀਤਿ ਭਾਵੋ, ਅਯਤੀਤਿ ਆਯੋ, ਸਮ੍ਮਾ ਬੁਜ੍ਝਤੀਤਿ ਸਮ੍ਬੋਧੋ, ਵਿਹਰਤੀਤਿ ਵਿਹਾਰੋ.

੫੨੯. , ੫੮੦. ਭਾਵੇ ਚ.

ਭਾਵਤ੍ਥਾਭਿਧੇਯ੍ਯੇ ਸਬ੍ਬਧਾਤੂਹਿ ਣਪਚ੍ਚਯੋ ਹੋਤਿ.

ਪਚ੍ਚਤੇ, ਪਚਨਂ ਵਾ ਪਾਤੋ, ਚਜਤੇ, ਚਜਨਂ ਵਾ ਚਾਗੋ, ਏਵਂ ਯਾਗੋ, ਯੋਗੋ, ਭਾਗੋ, ਪਰਿਦਾਹੋ.

੫੩੦. , ੫੮੪. ਕ੍ਵਿ ਚ.

ਸਬ੍ਬਧਾਤੂਹਿ ਕ੍ਵਿਪਚ੍ਚਯੋ ਹੋਤਿ.

ਸਮ੍ਭਵਤੀਤਿ ਸਮ੍ਭੂ, ਵਿਸੇਸੇਨ ਭਵਤੀਤਿ ਵਿਭੂ, ਭੁਜੇਨ ਗਚ੍ਛਤੀਤਿ ਭੁਜਗੋ, ਸਂ ਅਤ੍ਤਾਨਂ ਖਨਤਿ, ਸਂ ਸਟ੍ਠੁ ਖਨਤੀਤਿ ਵਾ ਸਙ੍ਖੋ.

੫੩੧. , ੫੮੯. ਧਰਾਦੀਹਿ ਰਮ੍ਮੋ.

ਧਰਇਚ੍ਚੇਵਮਾਦੀਹਿ ਧਾਤੂਹਿ ਰਮ੍ਮਪਚ੍ਚਯੋ ਹੋਤਿ.

ਧਰਤਿ ਤੇਨਾਤਿ ਧਮ੍ਮੋ, ਕਰੀਯਤੇ ਤਨ੍ਤਿ ਕਮ੍ਮਂ.

੫੩੨. , ੫੯੦. ਤਸ੍ਸੀਲਾਦੀਸੁ ਣੀਤ੍ਵਾਵੀ ਚ.

ਸਬ੍ਬੇਹਿ ਧਾਤੂਹਿ ਤਸ੍ਸੀਲਾਦੀਸ੍ਵਤ੍ਥੇਸੁ ਣੀ ਤੁ ਆਵੀ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.

ਪਿਯਂ ਪਸਂਸਿਤੁਂ ਸੀਲਂ ਯਸ੍ਸ ਰਞ੍ਞੋ, ਸੋ ਹੋਤਿ ਰਾਜਾ ਪਿਯਪਸਂਸੀ, ਬ੍ਰਹ੍ਮਂ ਚਰਿਤੁਂ ਸੀਲਂ ਯਸ੍ਸ ਪੁਗ੍ਗਲਸ੍ਸ ਸੋ ਹੋਤਿ ਪੁਗ੍ਗਲੋ ਬ੍ਰਹ੍ਮਚਾਰੀ, ਪਸਯ੍ਹ ਪਵਤ੍ਤਿਤੁਂ ਸੀਲਂ ਯਸ੍ਸ ਰਞ੍ਞੋ, ਸੋ ਹੋਤਿ ਰਾਜਾ ਪਸਯ੍ਹਪਵਤ੍ਥਾ, ਭਯਂ ਪਸ੍ਸਿਤੁਂ ਸੀਲਂ ਯਸ੍ਸ ਸਮਣਸ੍ਸ, ਸੋ ਹੋਤਿ ਸਮਣੋ ਭਯਦਸ੍ਸਾਵੀ ਇਚ੍ਚੇਵਮਾਦਿ.

੫੩੩. , ੫੯੧. ਸਦ੍ਦ ਕੁ ਧ ਚਲ ਮਣ੍ਡਤ੍ਥਰੁਧਾਦੀਹਿਯੁ.

ਸਦ੍ਦ ਕੁਧ ਚਲ ਮਣ੍ਡਤ੍ਥੇਹਿ ਚ ਰੁਚਾਦੀਹਿ ਚ ਧਾਤੂਹਿ ਯੁਪਚ੍ਚਯੋ ਹੋਤਿ ਤਸ੍ਸੀਲਾਦੀਸ੍ਵਤ੍ਥੇਸੁ.

ਘੋਸਨਸੀਲੋ ਘੋਸਨੋ, ਭਾਸਨਸੀਲੋ ਭਾਸਨੋ. ਏਵਂ ਵਿਗ੍ਗਹੋ ਕਾਤਬ੍ਬੋ. ਕੋਧਨੋ, ਦੋਸਨੋ, ਚਲਨੋ, ਕਮ੍ਪਨੋ, ਫਨ੍ਦਨੋ, ਮਣ੍ਡਨੋ, ਵਿਭੂਸਨੋ, ਰੋਚਨੋ, ਜੋਤਨੋ, ਵਡ੍ਢਨੋ.

੫੩੪. , ੫੬੨. ਪਾਰਾਦਿਗਮਿਮ੍ਹਾ ਰੂ.

ਗਮੁਇਚ੍ਚੇਤਮ੍ਹਾ ਧਾਤੁਮ੍ਹਾ ਪਾਰਸਦ੍ਦਾਦਿਮ੍ਹਾ ਰੂਪਚ੍ਚਯੋ ਹੋਤਿ ਤਸ੍ਸੀਲਾਦੀਸ੍ਵਤ੍ਥੇਸੁ.

ਭਵਸ੍ਸ ਪਾਰਂ ਭਵਪਾਰਂ, ਭਵਪਾਰਂ ਗਨ੍ਤੁਂ ਸੀਲਂ ਯਸ੍ਸ ਪੁਰਿਸਸ੍ਸ, ਸੋ ਹੋਤਿ ਪੁਰਿਸੋ ਭਵਪਾਰਗੂ.

ਤਸ੍ਸੀਲਾਦੀਸ੍ਵੀਤਿ ਕਿਮਤ੍ਥਂ? ਪਾਰਙ੍ਗਤੋ.

ਪਾਰਾਦਿਗਮਿਮ੍ਹਾਤਿ ਕਿਮਤ੍ਥਂ? ਅਨੁਗਾਮੀ.

੫੩੫. , ੫੯੩. ਭਿਕ੍ਖਾਦਿਤੋ ਚ.

ਭਿਕ੍ਖਇਚ੍ਚੇਵਮਾਦੀਹਿ ਧਾਤੂਹਿ ਰੂਪਚ੍ਚਯੋ ਹੋਤਿ ਤਸ੍ਸੀਲਾਦੀਸ੍ਵਤ੍ਥੇਸੁ.

ਭਿਕ੍ਖਨਸੀਲੋ ਯਾਚਨਸੀਲੋ ਭਿਕ੍ਖੁ, ਵਿਜਾਨਨਸੀਲੋ ਵਿਞ੍ਞੂ.

੫੩੬. , ੫੯੪. ਤਨਤ੍ਯਾਦੀਨਂ ਣੁਕੋ.

ਹਨਤ੍ਯਾਦੀਨਂ ਧਾਤੂਨਂ ਅਨ੍ਤੇ ਣੁਕਪਚ੍ਚਯੋ ਹੋਤਿ ਤਸ੍ਸੀਲਾਦੀਸ੍ਵਤ੍ਥੇਸੁ.

ਆਹਨਨਸੀਲੋ ਆਘਾਤੁਕੋ, ਕਰਣਸੀਲੋ ਕਾਰੁਕੋ.

੫੩੭. , ੫੬੬. ਨੁ ਨਿਗ੍ਗਹਿਤਂ ਪਦਨ੍ਤੇ.

ਪਦਨ੍ਤੇ ਨੁਕਾਰਾਗਮੋ ਨਿਗ੍ਗਹਿਤਮਾਪਜ੍ਜਤੇ.

ਅਰਿਂ ਦਮੇਤੀਤਿ ਅਰਿਨ੍ਦਮੋ, ਰਾਜਾ. ਵੇਸ੍ਸਂ ਤਰਤੀਤਿ ਵੇਸ੍ਸਨ੍ਤਰੋ, ਰਾਜਾ. ਪਭਂ ਕਰੋਤੀਤਿ ਪਭਙ੍ਕਰੋ, ਭਗਵਾ.

੫੩੮. , ੫੯੫. ਸਂਹਨਾਞ੍ਞਾਯ ਵਾ ਰੋ ਘੋ.

ਸਂਪੁਬ੍ਬਾਯ ਹਨਇਚ੍ਚੇਤਾਯ ਧਾਤੁਯਾ, ਅਞ੍ਞਾਯ ਵਾ ਧਾਤੁਯਾ ਰਪਚ੍ਚਯੋ, ਹਨਸ੍ਸ ਚ ਘੋ ਹੋਤਿ.

ਸਮਗ੍ਗਂ ਕਮ੍ਮਂ ਸਮੁਪਗਚ੍ਛਤੀਤਿ ਸਙ੍ਘੋ, ਸਮਨ੍ਤਤੋ ਨਗਰਸ੍ਸ ਮਾਹਿਰੇ ਖਞ੍ਞਤੀਤਿ ਪਰਿਖਾ, ਅਨ੍ਤਂ ਕਰੋਤੀਤਿ ਅਨ੍ਤਕੋ.

ਸਂਇਤਿ ਕਿਮਤ੍ਥਂ? ਉਪਹਨਨਂ ਉਪਘਾਤੋ.

੫੩੯. , ੫੫੮. ਰਮ੍ਹਿ ਰਨ੍ਤੋ ਰਾਦਿਨੋ.

ਰਮ੍ਹਿ ਪਚ੍ਚਯੇ ਪਰੇ ਸਬ੍ਬੋ ਧਾਤ੍ਵਨ੍ਤੋ ਰਕਾਰਾਦਿ ਲੋਪੋ ਹੋਤਿ.

ਅਨ੍ਤਕੋ, ਪਾਰਗੂ, ਸਤ੍ਥਾ, ਦਿਟ੍ਠੋ ਇਚ੍ਚੇਵਮਾਦਿ.

੫੪੦. , ੫੪੫. ਭਾਵਕਮ੍ਮੇਸੁ ਤਬ੍ਬਾਨੀਯਾ.

ਭਾਵਕਮ੍ਮਇਚ੍ਚੇਤੇਸ੍ਵਤ੍ਥੇਸੁ ਤਬ੍ਬ ਅਨੀਯਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਸਬ੍ਬਧਾਤੂਹਿ.

ਭਵਿਤਬ੍ਬਂ, ਭਵਨੀਯਂ, ਆਸਿਤਬ੍ਬਂ, ਆਸਨੀਯਂ, ਪਜ੍ਜਿਤਬ੍ਬਂ, ਪਜ੍ਜਨੀਯਂ, ਕਤ੍ਤਬ੍ਬਂ, ਕਰਣੀਯਂ, ਗਨ੍ਤਬ੍ਬਂ, ਗਮਨੀਯਂ.

੫੪੧. , ੫੫੨. ਣ੍ਯੋ ਚ.

ਭਾਵਕਮ੍ਮੇਸੁ ਸਬ੍ਬਧਾਤੂਹਿ ਣ੍ਯਪਚ੍ਚਯੋ ਹੋਤਿ.

ਕਤ੍ਤਬ੍ਬਂ ਕਾਰਿਯਂ, ਜੇਤਬ੍ਬਂ ਜੇਯ੍ਯਂ, ਨੇਤਬ੍ਬਂ ਨੇਯ੍ਯਂ, ਇਚ੍ਚੇਵਮਾਦਿ.

ਚਗ੍ਗਹਣੇਨ ਤੇਯ੍ਯਪਚ੍ਚਯੋ ਹੋਤਿ. ਞਾਤਬ੍ਬਂ ਞਾਤੇਯ੍ਯਂ, ਦਟ੍ਠੇਯ੍ਯਂ, ਪਤ੍ਤੇਯ੍ਯਂ ਇਚ੍ਚੇਵਮਾਦਿ.

੫੪੨. , ੫੫੭. ਕਰਮ੍ਹਾ ਰਿਚ੍ਚ.

ਕਰਇਚ੍ਚੇਤਮ੍ਹਾ ਧਾਤੁਮ੍ਹਾ ਰਿਚ੍ਚਪਚ੍ਚਯੋ ਹੋਤਿ ਭਾਵਕਮ੍ਮੇਸੁ.

ਕਤ੍ਤਬ੍ਬਂ ਕਿਚ੍ਚਂ.

੫੪੩. , ੫੫੫. ਭੂਤੋ’ਬ੍ਬ.

ਭੂਇਚ੍ਚੇਤਾਯ ਧਾਤੁਯਾ ਣ੍ਯਪਚ੍ਚਯਸ੍ਸ ਊਕਾਰੇਨ ਸਹ ਅਬ੍ਬਾਦੇਸੋ ਹੋਤਿ ਭਾਵਕਮ੍ਮੇਸੁ.

ਭਵਿਤਬ੍ਬੋ ਭਬ੍ਬੋ, ਭਵਿਤਬ੍ਬਂ ਭਬ੍ਬਂ.

੫੪੪. , ੫੫੬. ਵਦ ਮਦ ਗਮੁ ਯੁਜ ਗਰਹਾਕਾਰਾਦੀਹਿ ਜ੍ਜ ਮ੍ਮ ਗ੍ਗ ਯ੍ਹੇਯ੍ਯਾ ਗਾਰੋ ਵਾ.

ਵਦ ਮਦ ਗਮੁ ਯੁਜ ਗਰਹਾਕਾਰਨ੍ਤਇਚ੍ਚੇਵਮਾਦੀਹਿ ਧਾਤੂਹਿ ਣ੍ਯਪਚ੍ਚਯਸ੍ਸ ਯਥਾਸਙ੍ਖ੍ਯਂ ਜ੍ਜ ਮ੍ਮ ਗ੍ਗ ਯ੍ਹ ਏਯ੍ਯਾਦੇਸਾ ਹੋਨ੍ਤਿ ਵਾ ਧਾਤ੍ਵਨ੍ਤੇਨ ਸਹ, ਗਰਸ੍ਸਂ ਚ ਗਾਰੋ ਹੋਤਿ ਭਾਵਕਮ੍ਮੇਸੁ.

ਵਤ੍ਤਬ੍ਬਂ ਵਜ੍ਜਂ, ਮਦਨੀਯਂ ਮਜ੍ਜਂ, ਗਮਨੀਯਂ ਗਮ੍ਮਂ, ਯੋਜਨੀਯਂ ਯੋਗ੍ਗਂ, ਗਰਹਿਤਬ੍ਬਂ ਗਾਰਯ੍ਹਂ, ਦਾਤਬ੍ਬਂ ਦੇਯ੍ਯਂ, ਪਾਤਬ੍ਬਂ ਪੇਯ੍ਯਂ, ਹਾਤਬ੍ਬਂ ਹੇਯ੍ਯਂ, ਮਾਤਬ੍ਬਂ ਮੇਯ੍ਯਂ, ਞਾਤਬ੍ਬਂ ਞੇਯ੍ਯਂ, ਇਚ੍ਚੇਵਮਾਦਿ.

੫੪੫. , ੫੪੮. ਤੇ ਕਿਚ੍ਚਾ.

ਯੇ ਪਚ੍ਚਯਾ ਤਬ੍ਬਾਦਯੋ ਰਿਚ੍ਚਨ੍ਤਾ, ਤੇ ਕਿਚ੍ਚਸਞ੍ਞਾਤਿ ਵੇਦਿਤਬ੍ਬਾ.

ਕਿਚ੍ਚਸਞ੍ਞਾਯ ਕਿਂਪਯੋਜਨਂ? ਭਾਵਕਮ੍ਮੇਸੁ ਕਿਚ੍ਚਤ੍ਤਖਤ੍ਥਾ.

੫੪੬. , ੫੬੨. ਅਞ੍ਞੇ ਕਿਤ.

ਅਞ੍ਞੇ ਪਚ੍ਚਯਾ ਕਿਤ ਏਵ ਸਞ੍ਞਾ ਹੋਨ੍ਤਿ.

ਕਿਤ ਸਞ੍ਞਾਯ ਕਿਂਪਯੋਜਨਂ? ਕਤ੍ਤਰਿ ਕਿਤ.

੫੪੭. , ੫੯੬. ਨਨ੍ਦਾਦੀਹਿ ਯੁ.

ਨਨ੍ਦਾਦੀਹਿ ਧਾਤੂਹਿ ਯੁਪਚ੍ਚਯੋ ਹੋਤਿ ਭਾਵਕਮ੍ਮੇਸੁ.

ਨਨ੍ਦੀਯਤੇ ਨਨ੍ਦਨਂ, ਨਿਨ੍ਦਿਤਬ੍ਬਂ ਵਾ ਨਨ੍ਦਨਂ, ਗਹਣੀਯਂ ਗਹਣਂ, ਚਰਿਤਬ੍ਬਂ ਚਰਣਂ, ਏਵਂ ਸਬ੍ਬਤ੍ਥ ਯੋਜੇਤਬ੍ਬਾ.

੫੪੮. , ੫੯੭. ਕਤ੍ਤੁਕਰਣਪਦੇਸੇਸੁ ਚ.

ਕਤ੍ਤੁਕਰਣਪਦੇਸਇਚ੍ਚੇਤੇਸ੍ਵਤ੍ਥੇਸੁ ਚ ਯੁਪਚ੍ਚਯੋ ਹੋਤਿ.

ਕਤ੍ਤਰਿ ਤਾਵ – ਰਜਂ ਹਰਤੀਤਿ ਰਜੋਹਰਣਂ ਤੋਯਂ.

ਕਰਣੇ ਤਾਵ – ਕਰੋਤਿ ਤੇਨਾਤਿ ਕਰਣਂ.

ਪਦੇਸੇ ਤਾਵ – ਤਿਟ੍ਠਨ੍ਤਿ ਤਸ੍ਮਿਨ੍ਤਿ ਠਾਨਂ. ਏਵਂ ਸਬ੍ਬਤ੍ਥ ਯੋਜੇਤਬ੍ਬਾ.

੫੪੯. , ੫੫੦. ਰਹਾਦਿਤੋ ਣ.

ਰਕਾਰਹਕਾਰਾਦ੍ਯਨ੍ਤੇਹਿ ਧਾਤੂਹਿ ਅਨਾਦੇਸਸ੍ਸ ਨਸ੍ਸ ਣੋ ਹੋਤਿ.

ਕਰੋਤਿ ਤੇਨਾਤਿ ਕਰਣਂ, ਪੂਰੇਤਿ ਤੇਨਾਤਿ ਪੂਰਣਂ. ਗਹਣੀਯਂ ਤੇਨਾਤਿ ਗਹਣਂ. ਏਵਮਞ੍ਞੇਪਿ ਯੋਜੇਤਬ੍ਬਾ.

ਇਤਿ ਕਿਬ੍ਬਿਧਾਨਕਪ੍ਪੇ ਪਠਮੋ ਕਣ੍ਡੋ.

ਦੁਤਿਯਕਣ੍ਡ

੫੫੦. , ੫੪੬. ਣਾਦਯੋ ਤੇਕਾਲਿਕਾ.

ਣਾਦਯੋ ਪਚ੍ਚਯਾ ਯੁਪਚ੍ਚਯਨ੍ਤਾ ਤੇਕਾਲਿਕਾਤਿ ਵੇਦਿਤਬ੍ਬਾ.

ਕੁਮ੍ਭਂ ਕਰੋਤਿ ਅਕਾਸਿ ਕਰਿਸ੍ਸਤੀਤਿ ਕੁਮ੍ਭਕਾਰੋ, ਕਰੋਤਿ ਅਕਾਸਿ ਕਰਿਸ੍ਸਤਿ ਤੇਨਾਤਿ ਕਰਣਂ. ਏਵਮਞ੍ਞੇਪਿ ਯੋਜੇਤਬ੍ਬਾ.

੫੫੧. , ੫੯੮. ਸਞ੍ਞਾਯਂ ਦਾ ਧਾਤੋ ਇ.

ਸਞ੍ਞਾਯਮਭਿਧੇਯ੍ਯਾਯਂ ਦਾ ਧਾਤੋ ਇਪਚ੍ਚਯੋ ਹੋਤਿ.

ਪਠਮਂ ਆਦੀਯਤੀਤਿ ਆਦਿ, ਉਦਕਂ ਦਧਾਤੀਤਿ ਉਦਮਿ, ਮਹੋਦਕਾਨਿ ਦਧਾਤੀਤਿ ਮਹੋਦਧਿ, ਵਾਲਾਨਿ ਦਧਾਤਿ ਤਸ੍ਮਿਨ੍ਤਿ ਵਾਲਧਿ, ਸਮ੍ਮਾ ਧੀਯਤੀਤਿ ਸਨ੍ਧਿ.

੫੫੨. , ੬੦੯. ਤਿ ਕਿਤ ਚਾਸਿਟ੍ਠੇ.

ਸਞ੍ਞਾਯਮਭਿਧੇਯ੍ਯਾਯਂ ਸਬ੍ਬਧਾਤੂਹਿ ਤਿਪਚ੍ਚਯੋ ਹੋਤਿ, ਕਿਤ ਚ ਆਸਿਟ੍ਠੇ.

ਜਿਨੋ ਜਨਂ ਬੁਜ੍ਝਤੂਤਿ ਜਿਨਬੁਦ੍ਧਿ, ਧਨਂ ਅਸ੍ਸ ਭਵਤੂਤਿ ਧਨਭੂਤਿ, ਭਵਤੂਤਿ ਭੂਤੋ, ਭਵਤੂਤਿ ਭਾਵੋ, ਧਮ੍ਮੋ ਜਨਂ ਦਦਾਤੂਤਿ ਧਮ੍ਮਦਿਨ੍ਨੋ, ਵਡ੍ਢਤੂਤਿ ਵਡ੍ਢਮਾਨੋ. ਏਵਮਞ੍ਞੇਪਿ ਯੋਜੇਤਬ੍ਬਾ.

੫੫੩. , ੫੯੯. ਇਤ੍ਥਿਯਮਤਿਯਵੋ ਵਾ.

ਇਤ੍ਥਿਯਮਭਿਧੇਯ੍ਯਾਯਂ ਸਬ੍ਬਧਾਤੂਹਿ ਅਕਾਰ ਤਿ ਯੁ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਵਾ.

ਜੀਰਤੀਤੀ ਜਰਾ, ਮਞ੍ਞਤੀਤਿ ਮਤਿ, ਚੇਤਯਤੀਤਿ ਚੇਤਨਾ, ਵੇਦਯਤੀਤਿ ਵੇਦਨਾ. ਏਵਮਞ੍ਞੇਪਿ ਯੋਜੇਤਬ੍ਬਾ.

੫੫੪. , ੬੦੧. ਕਰਤੋ ਰਿਰਿਯ.

ਕਰਤੋ ਇਤ੍ਥਿਯਮਨਿਤ੍ਥਿਯਂ ਵਾ ਅਭਿਖੇਯ੍ਯਾਯਂ ਰਿਰੀਯਪਚ੍ਚਯੋ ਹੋਤਿ ਵਾ.

ਕਤ੍ਤਬ੍ਬਾ ਕਿਰਿਯਾ, ਕਰਣੀਯਂ ਕਿਰਿਯਂ.

੫੫੫. , ੬੧੨. ਅਤੀਤੇ ਤਤਵਨ੍ਤੁਤਾਵੀ.

ਅਤੀਤੇ ਕਾਲੇ ਸਬ੍ਬਧਾਤੂਹਿ ਤਤਵਨ੍ਤੁਤਾਵੀਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.

ਹੁਤੋ, ਹੁਤਵਾ, ਹੁਤਾਵੀ. ਵੁਸਿਤੋ, ਵੁਸਿਤਵਾ, ਵੁਸਿਤਾਵੀ. ਭੁਤ੍ਤੋ, ਭੁਤ੍ਤਵਾ, ਭੁਤ੍ਤਾਵੀ.

੫੫੬. , ੬੨੨. ਭਾਵਕਮ੍ਮੇਸੁ ਤ.

ਭਾਵਕਮ੍ਮੇਸੁ ਅਤੀਤੇ ਕਾਲੇ ਤਪਚ੍ਚਯੋ ਹੋਤਿ ਸਬ੍ਬਧਾਤੂਹਿ.

ਭਾਵੇ ਤਾਵ – ਤਸ੍ਸ ਗੀਤਂ, ਨਚ੍ਚਂ, ਨਟ੍ਟਂ, ਹਸਿਤਂ.

ਕਮ੍ਮਨਿ ਤਾਵ – ਤੇਨ ਭਾਸਿਤਂ, ਦੇਸਿਤਂ.

੫੫੭. , ੬੦੬. ਬੁਧਗਮਾਦਿਤ੍ਥੇ ਕਤ੍ਤਰਿ.

ਬੁਧਗਮੁਇਚ੍ਚੇਵਮਾਦੀਹਿ ਧਾਤੂਹਿ ਤਦਤ੍ਥੇ ਗਮ੍ਯਮਾਨੇ ਤਪਚ੍ਚਯੋ ਹੋਤਿ ਕਤ੍ਤਰਿ ਸਬ੍ਬਕਾਲੇ.

ਸਬ੍ਬੇ ਸਙ੍ਖਤਾਸਙ੍ਖਤੇ ਧਮ੍ਮੇ ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤੀਤਿ ਬੁਦ੍ਧੋ, ਸਰਣਙ੍ਗਤੋ, ਸਮਥਙ੍ਗਤੋ, ਅਮਥਙ੍ਗਤੋ, ਜਾਨਾਤਿ ਅਜਾਨਿ ਜਾਨਿਸ੍ਸਤੀਤਿ ਞਾਤੋ, ਇਚ੍ਚੇਵਮਾਦਿ.

੫੫੮. , ੬੦੨. ਜਿਤੋ ਇਨ ਸਬ੍ਬਤ੍ਥ.

ਜਿਇਚ੍ਚੇਤਾਯ ਧਾਤੁਯਾ ਇਨਪਚ੍ਚਯੋ ਹੋਤਿ ਸਬ੍ਬਕਾਲੇ ਕਤ੍ਤਰਿ.

ਪਾਪਕੇ ਅਕੁਸਲੇ ਧਮ੍ਮੇ ਜਿਨਾਤਿ ਅਜਿਨਿ ਜਿਨਿਸ੍ਸਤੀਤਿ ਜਿਨੋ.

੫੫੯. , ੬੦੩. ਸੁਪਤੋ ਚ.

ਸੁਪਇਚ੍ਚੇਤਾਯ ਧਾਤੁਯਾ ਇਨਪਚ੍ਚਯੋ ਹੋਤਿ ਕਤ੍ਤਰਿ, ਭਾਵੇ ਚ.

ਸੁਪਤੀਤਿ ਸੁਪਿਨਂ, ਸੁਪੀਯਤੇ ਸੁਪਿਨਂ.

੫੬੦. , ੬੦੪. ਈਸਂਦੁਸੂਹਿ ਖ.

ਈਸਂਦੁਸੁਸਦ੍ਦਾਦੀਹਿ ਸਬ੍ਬਧਾਤੂਹਿ ਖਪਚ੍ਚਯੋ ਹੋਤਿ.

ਈਸਸ੍ਸਯੋ, ਦੁਸ੍ਸਯੋ, ਸੁਸ੍ਸਯੋ ਭਵਤਾ, ਈਸਕ੍ਕਰਂ, ਦੁਕ੍ਕਰਂ, ਸੁਕਰਂ, ਭਵਤਾ.

੫੬੧. , ੬੩੬. ਇਚ੍ਛਤ੍ਥੇਸੁ ਸਮਾਨਕਤ੍ਤੁਕੇਸੁ ਤਵੇ ਤੁਂ ਵਾ.

ਇਚ੍ਛਤ੍ਥੇਸੁ ਸਮਾਨਕਤ੍ਤੁਕੇਸੁ ਸਬ੍ਬਧਾਤੂਹਿਤਵੇਤੁਂਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਸਬ੍ਬਕਾਲੇ ਕਤ੍ਤਰਿ.

ਪੁਞ੍ਞਾਨਿ ਕਾਤਵੇ, ਸਦ੍ਧਮ੍ਮਂ ਸੋਤੁ ਮਿਚ੍ਛਤਿ.

੫੬੨. , ੬੩੮. ਅਰਹਸਕ੍ਕਾਦੀਸੁ ਚ.

ਅਰਹਸਕ੍ਕਾਦੀਸੁ ਚ ਅਤ੍ਥੇਸੁ ਸਬ੍ਬਧਾਤੂਹਿ ਤੁਂਪਚ੍ਚਯੋ ਹੋਤਿ.

ਕੋ ਤਂ ਨਿਨ੍ਦਿਤੁਮਰਹਤਿ, ਸਕ੍ਕਾ ਜੇਤੁਂ ਧਨੇਨ ਵਾ. ਏਵਮਞ੍ਞੇਪਿ ਯੋਜੇਤਬ੍ਬਾ.

੫੬੩. , ੬੩੯. ਪਤ੍ਤਵਚਨੇ ਅਲਮਤ੍ਥੇਸੁ ਚ.

ਪਤ੍ਤਵਚਨੇ ਅਲਮਤ੍ਥੇਸੁ ਸਬ੍ਬਧਾਤੂਹਿ ਤੁਂਪਚ੍ਚਯੋ ਹੋਤਿ.

ਅਲਮੇਵ ਦਾਨਾਨਿ ਦਾਤੁਂ, ਅਲਮੇਵ ਪੁਞ੍ਞਾਨਿ ਕਾਤੁਂ.