੮. ਉਣਾਦਿਕਪ੍ਪ
ਛਟ੍ਠਕਣ੍ਡ
੬੨੪. , ੫੬੩. ਕਤ੍ਤਰਿ ਕਿਤ.
ਕਤ੍ਤੁਇਚ੍ਚੇਤਸ੍ਮਿਂ ਅਤ੍ਥੇ ਕਿਤ ਪਚ੍ਚਯਾ ਹੋਨ੍ਤਿ.
ਕਾਰੁ, ਕਾਰੁਕੋ, ਕਾਰਕੋ, ਪਾਚਕੋ, ਕਤ੍ਤਾ, ਜਨਿਤਾ, ਪਚਿਤਾ, ਨੇਤਾ.
੬੨੫. , ੬੦੫. ਭਾਵਕਮ੍ਮੇਸੁ ਕਿਚ੍ਚਤ੍ਤ ਖਤ੍ਥਾ.
ਭਾਵਕਮ੍ਮਇਚ੍ਚੇਤੇਸ੍ਵਤ੍ਥੇਸੁ ਕਿਚ੍ਚ ਤ੍ਤ ਖਤ੍ਥਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.
ਉਪਸਮ੍ਪਾਦੇਤਬ੍ਬਂ ਉਪਸਮ੍ਪਾਦਨੀਯਂ ਭਵਤਾ, ਸਯਿਤਬ੍ਬਂ ਭਵਤਾ, ਕਤ੍ਤਬ੍ਬਂ ਭਵਤਾ, ਭੋਤ੍ਤਬ੍ਬੋ ਓਦਨੋ ਭਵਤਾ, ਅਸਿਤਬ੍ਬਂ ਭੋਜਨਂ ਭਵਤਾ, ਅਸਿਤਂ ਭਵਤਾ, ਸਯਿਤਂ ਭਵਤਾ, ਪਚਿਤਂ ਭਵਤਾ, ਅਸਿਤਂ ਅਸਨਂ ਭਵਤਾ, ਸਯਿਤਂ ਸਯਨਂ ਭਵਤਾ, ਪਚਿਤੋ ਓਦਨੋ ਭਵਤਾ, ਕਿਞ੍ਚਿਸ੍ਸਯੋ, ਈਸਸ੍ਸਯੋ, ਦੁਸ੍ਸਯੋ, ਸੁਸ੍ਸਯੋ ਭਵਤਾ.
੬੨੬. , ੬੩੪. ਕਮ੍ਮਨਿ ਦੁਤਿਯਾਯ ਤ੍ਤੋ.
ਕਮ੍ਮਨਿ ਇਚ੍ਚੇਤਸ੍ਮਿਂ ਅਤ੍ਥੇ ਦੁਤਿਯਾਯਂ ਵਿਭਤ੍ਤਿਯਂ ਕਤ੍ਤਰਿ ਤ੍ਤਪਚ੍ਚਯੋ ਹੋਤਿ.
ਦਾਨਂ ਦਿਨ੍ਨੋ ਦੇਵਦਤ੍ਤੋ, ਸੀਲਂ ਰਕ੍ਖਿਤੋ ਦੇਵਦਤ੍ਤੋ, ਭਤ੍ਤਂ ਭੁਤ੍ਤੋ ਦੇਵਦਤ੍ਤੋ, ਗਰੁਂ ਉਪਾਸਿਤੋ ਦੇਵਦਤ੍ਤੋ.
੬੨੭. , ੬੫੨. ਖ੍ਯਾਦੀਹਿ ਮਾਨ ਮ ਚ ਤੋ ਵਾ.
ਖਿ ਭੀ ਸੁ ਰੁ ਹੁ ਵਾ ਧੂ ਹਿ ਲੂ ਪੀ ਅਦਇਚ੍ਚੇਵਮਾਦੀਹਿ ਧਾਤੂਹਿ ਮਨ ਪਚ੍ਚਯੋ ਹੋਤਿ, ਮਸ੍ਸ ਚ ਤੋ ਹੋਤਿ ਵਾ.
ਖੀਯਨ੍ਤਿ ਉਪਦ੍ਦਵਾ ਏਤ੍ਥਾਤਿ ਖੇਮੋ, ਭਾਯਿਤਬ੍ਬੋਤਿ ਭੇਮੋ, ਭਾਯਨ੍ਤਿ ਏਤਸ੍ਮਾਤਿ ਵਾ ਭੇਮੋ, ਰਂਸਿਯੋ ਅਭਿਸ੍ਸਵੇਤੀਤਿ ਸੋਮੋ, ਰਵਤਿ ਗਚ੍ਛਤੀਤਿ ਰੋਮੋ, ਹੁਵਤਿ ਜੁਹ੍ਵਤਿ ਏਤੇਨਾਤਿ ਹੋਮੋ, ਪਟਿਲੋਮਵਸੇਨ ਵਾਤਿ ਗਚ੍ਛਤੀਤਿ ਵਾਮੋ, ਲਾਮਕਵਸੇਨ ਵਾਤਿ ਗਚ੍ਛਤਿ ਪਵਤ੍ਤਤੀਤਿ ਵਾ ਵਾਮੋ, ਧੁਨਾਤਿ ਕਮ੍ਪਤੀਤਿ ਧੂਮੋ, ਸੇਟ੍ਠਭਾਵੇਨ ਹਿਨੋਤਿ ਪਵਤ੍ਤਤਿ ਚਿਤ੍ਤਂ ਏਤਸ੍ਮਿਨ੍ਤਿ ਹੇਮੋ, ਲੁਨਿਤਬ੍ਬੋਤਿ ਲੋਮੋ, ਮਂਸਚਮ੍ਮਾਨਿ ਲੁਨਾਤਿ ਛਿਨ੍ਦਤੀਤਿ ਵਾ ਲੋਮੋ, ਪਿਯਨਂ ਪੇਮੋ, ਪਿਯਾਯਿਤਬ੍ਬੋਤਿ ਵਾ ਪੇਮੋ, ਸੁਖਦੁਕ੍ਖਂ ਅਦਤਿ ਭਕ੍ਖਤੀਤਿ ਅਤ੍ਤਾ, ਜਾਤਿਜਰਾਮਰਣਾਦੀਹਿ ਅਦੀਯਤੇ ਭਕ੍ਖੀਯਤੇਤਿ ਵਾ ਅਤ੍ਤਾ, ਆਤੁਮਾ.
੬੨੮. , ੬੫੩. ਸਮਾਦੀਹਿ ਥ ਮਾ.
ਸਮੁ ਦਮੁ ਦਰ ਰਹ ਦੁ ਹਿ ਸਿ ਭੀ ਦਾ ਯਾ ਸਾ ਠਾਭਸਇਚ੍ਚੇਵਮਾਦੀਹਿ ਧਾਤੂਹਿ ਥ ਮ ਪਚ੍ਚਯਾ ਹੋਨ੍ਤਿ.
ਸਮੇਤੀਤਿ ਸਮਥੋ, ਦਮਤੀਤਿ ਦਮਥੋ, ਦਮਨਂ ਵਾ ਦਮਥੋ, ਦਮਿਤਬ੍ਬੋਤਿ ਵਾ ਦਮਥੋ, ਦਰਤੀਤਿ ਦਰਥੋ, ਜਿਣ੍ਣਭਾਵਂ ਰਹਿਸ੍ਸਤਿ ਗਣ੍ਹਿਸ੍ਸਤੀਤਿ ਰਥੋ, ਦਬ੍ਬਸਮ੍ਭਾਰੇ ਰਹਤਿ ਗਣ੍ਹਾਤੀਤਿ ਵਾ ਰਥੋ, ਦਵਤਿ ਗਚ੍ਛਤੀਤਿ ਦੁਮੋ, ਦਵਤਿ ਵੁਦ੍ਧਿ ਵਿਰੁਲ਼੍ਹਿ ਗਚ੍ਛਤਿ ਪਵਤ੍ਤਤੀਤਿ ਉਦ੍ਧਂ ਵਾ ਦੁਮੋ, ਪਥਵੀਪਬ੍ਬਤਾਦੀਸੁ ਗਚ੍ਛਤਿ ਪਤਤੀਤਿ ਹਿਮੋ, ਕਮ੍ਮਵਾਚਾਯ ਬਨ੍ਧਤਿ ਏਤ੍ਥਾਤਿ ਸੀਮਾ. ਬਨ੍ਧਿਤਬ੍ਬਾਤਿ ਵਾ ਸੀਮਾ. ਭਾਯਨ੍ਤਿ ਏਤਸ੍ਮਾਤਿ ਭੀਮੋ, ਸਤ੍ਤੇ ਅਵਖਣ੍ਡੇਨ੍ਤਿ ਨਿਵਾਰੇਨ੍ਤਿ ਏਤੇਨਾਤਿ ਦਾਮੋ, ਮੂਸਿਕਾਦੀਹਿ ਖਾਦੀਯਤਿ ਅਵਖਣ੍ਡੀਯਤੀਤਿ ਵਾ ਦਾਮੋ, ਯਾਤਿ ਗਚ੍ਛਤੀਤਿ ਯਾਮੋ, ਪਰੇਸਂ ਚਿਤ੍ਤਂ ਗਣ੍ਹਿਤੁਂ ਸਮਤ੍ਥੇਤੀਤਿ ਸਾਮੋ, ਤਿਟ੍ਠਨ੍ਤਿ ਏਤੇਨਾਤਿ ਥਾਮੋ, ਭਸਤਿ ਭਸ੍ਮੀਕਰੀਯਤੀਤਿ ਭਸ੍ਮਾ.
੬੨੯. , ੫੬੯. ਗਹਸ੍ਸੁ’ਪਧਸ੍ਸੇ ਵਾ.
ਗਹਇਚ੍ਚੇਤਸ੍ਸ ਧਾਤੁਸ੍ਸ ਉਪਧਸ੍ਸ ਅਕਾਰਸ੍ਸ ਏਤ੍ਤ ਹੋਤਿ ਵਾ.
ਦਬ੍ਬਸਮ੍ਭਾਰ ਗਣ੍ਹਾਤੀਤਿ ਗੇਹਂ, ਗਹਂ.
੬੩੦. , ੬੫੪. ਮਸੁਸ੍ਸ ਸੁਸ੍ਸ ਚ੍ਛਰ ਚ੍ਛੇਰਾ.
ਮਸੁਇਚ੍ਚੇਤਸ੍ਸ ਪਾਟਿਪਦਿਕਸ੍ਸ ਸੁਸ੍ਸ ਚ੍ਛਰਚ੍ਛੇਰਾਦੇਸਾ ਹੋਨ੍ਤਿ.
ਮਚ੍ਛਰਤੀਤਿ ਮਚ੍ਛਰੋ, ਏਵਂ ਮਚ੍ਛੇਰੋ.
੬੩੧. , ੬੫੫. ਆਪੁਬ੍ਬਚਰਸ੍ਸ ਚ.
ਆਪੁਬ੍ਬਸ੍ਸ ਚਰਇਚ੍ਚੇਤਸ੍ਸ ਧਾਤੁਸ੍ਸ ਚ੍ਛਰਿਯਚ੍ਛਰਚ੍ਛੇਰਾ ਦੇਸਾ ਹੋਨ੍ਤਿ, ਆਪੁਬ੍ਬਸ੍ਸ ਚ ਰਸ੍ਸੋ ਹੋਤਿ.
ਆਭੁਸੋ ਚਰਿਤਬ੍ਬਨ੍ਤਿ ਅਚ੍ਛਰਿਯਂ. ਏਵਂ ਅਚ੍ਛਰਂ, ਅਚ੍ਛੇਰਂ.
ਚਗ੍ਗਹਣੇਨ ਮਸੁਸ੍ਸ ਸੁਸ੍ਸਾਪਿ ਚ੍ਛਰਿਯਾਦੇਸੋ ਹੋਤਿ, ਮਚ੍ਛਰਿਯਂ.
੬੩੨. , ੬੫੬. ਅਲ ਕਲ ਸਲੇਹਿ ਲਯਾ.
ਅਲ ਕਲ ਸਲਇਚ੍ਚੇਤੇਹਿ ਧਾਤੂਹਿ ਲ ਯਪਚ੍ਚਯਾ ਹੋਨ੍ਤਿ.
ਅਲਤਿ ਸਮਤ੍ਥੇਤੀਤਿ ਅਲ੍ਲਂ, ਕਲਿਤਬ੍ਬਂ ਸਙ੍ਖ੍ਯਾਤਬ੍ਬਨ੍ਤਿ ਕਲ੍ਲਂ, ਸਲਤਿ ਗਚ੍ਛਤਿ ਪਵਿਸਤੀਤਿ ਸਲ੍ਲਂ. ਏਵਂ ਅਲ੍ਯਂ, ਕਲ੍ਯਂ, ਸਲ੍ਯਂ.
੬੩੩. , ੬੫੭. ਯਾਣ ਲਾਣਾ.
ਤੇਹਿ ਕਲ ਸਲਇਚ੍ਚੇਤੇਹਿ ਧਾਤੂਹਿ ਯਾਣ ਲਾਣਪਚ੍ਚਯਾ ਹੋਨ੍ਤਿ.
ਕਲਿਤਬ੍ਬਂ ਸਙ੍ਖ੍ਯਾਤਬ੍ਬਨ੍ਤਿ ਕਲ੍ਯਾਣਂ, ਗਣਤੋ ਪਟਿਕ੍ਕਮਿਤ੍ਵਾ ਸਲਨ੍ਤਿ ਏਤ੍ਥਾਤਿ ਪਟਿਸਲ੍ਯਾਣਂ. ਏਵਂ ਸਲ੍ਲਾਣੋ, ਪਟਿਸਲ੍ਲਾਣੋ.
੬੩੪. , ੬੫੮. ਮਥਿਸ੍ਸ ਥਸ੍ਸ ਲੋ ਚ.
ਮਥਇਚ੍ਚੇਤਸ੍ਸ ਧਾਤੁਸ੍ਸ ਥਸ੍ਸ ਲਾਦੇਸੋਹੋਤਿ. ਅਞ੍ਞਮਞ੍ਞਂ ਮਥਤਿ ਵਿਲੋਲ਼ਤੀਤਿ ਮਲ੍ਲੋ, ਮਲ੍ਲਂ.
ਚਗ੍ਗਹਣੇਨ ਲਤੋ ਕੋ ਚ ਆਗਮੋ ਹੋਤਿ. ਮਲ੍ਲਕੋ, ਮਲ੍ਲਕਂ.
੬੩੫. , ੫੫੯. ਪੇਸਾਤਿਸਗ੍ਗਪਤ੍ਤਕਾਲੇਸੁਕਿਚ੍ਚਾ.
ਪੇਸ ਅਤਿਸਗ੍ਗ ਪਤ੍ਤਕਾਲਇਚ੍ਚੇਤੇਸ੍ਵਤ੍ਥੇਸੁ ਕਿਚ੍ਚਪਚ੍ਚਯਾ ਹੋਨ੍ਤਿ.
ਕਤ੍ਤਬ੍ਬਂ ਕਮ੍ਮਂ ਭਵਤਾ, ਕਰਣੀਯਂ ਕਿਚ੍ਚਂ ਭਵਤਾ, ਭੋਤ੍ਤਬ੍ਬਂ ਭੋਜਨਂ ਭਵਤਾ, ਭੋਜਨੀਯਂ ਭੋਜਨਂ ਭਵਤਾ, ਅਜ੍ਝਯਿਤਬ੍ਬਂ ਅਜ੍ਝੇਯ੍ਯਂ ਭਵਤਾ, ਅਜ੍ਝਯਨੀਯਂ ਅਜ੍ਝੇਯ੍ਯਂ ਭਵਤਾ.
੬੩੬. , ੬੫੯. ਅਵਸ੍ਸਕਾ’ਧਮਿਣੇਸੁ ਣੀ ਚ.
ਅਵਸ੍ਸਕ ਅਧਮਿਣਇਚ੍ਚੇਤੇਸ੍ਵਤ੍ਥੇਸੁ ਣੀਪਚ੍ਚਯੋ ਹੋਤਿ, ਕਿਚ੍ਚਾ ਚ.
ਅਵਸ੍ਸਤੇ ਤਾਵ – ਕਾਰੀਸਿ ਮੇ ਕਮ੍ਮਂ ਅਵਸ੍ਸਂ ਹਾਰੀਸਿ ਮੇ ਭਾਰਂ ਅਵਸ੍ਸਂ.
ਅਧਮਿਣੇ – ਦਾਯੀਸਿ ਮੇ ਸਤਂ ਇਣਂ, ਧਾਰੀਸਿ ਮੇ ਸਹਸ੍ਸਂ ਇਣਂ.
ਕਿਚ੍ਚਾ ਚ – ਦਾਤਬ੍ਬਂ ਮੇ ਭਵਤਾ ਸਤਂ ਇਣਂ. ਧਾਰਯਿਤਬ੍ਬਂ ਮੇ ਭਵਤਾ ਸਹਸ੍ਸਂ ਇਣਂ, ਕਤ੍ਤਬ੍ਬਂ ਮੇ ਭਵਤਾ ਗੇਹਂ, ਕਰਣੀਯਂ ਮੇ ਭਵਤਾ ਕਿਚ੍ਚਂ, ਕਾਰਿਯਂ ਮੇ ਭਵਤਾ ਸਯਨਂ.
੬੩੭. , ੦. ਅਰਹਸਕ੍ਕਾਦੀਹਿ ਤੁਂ.
ਅਰਹ ਸਕ੍ਕ ਭਬ੍ਬਇਚ੍ਚੇਵਮਾਦੀਹਿ ਪਯੋਗੇ ਸਤਿ ਸਬ੍ਬਧਾਤੂਹਿ ਤੁਂਪਚ੍ਚਯੋ ਹੋਤਿ.
ਅਰਹਾ ਭਵਂ ਵਤ੍ਤੁਂ, ਅਰਹਾ ਭਵਂ ਕਤ੍ਤੁਂ, ਸਕ੍ਕਾ ਭਵਂ ਹਨ੍ਤੁਂ, ਸਕ੍ਕਾ ਭਵਂ ਜਨੇਤੁਂ, ਜਨਿਤੁਂ, ਭਵਿਤੁਂ, ਸਕ੍ਕਾ ਭਵਂ ਦਾਤੁਂ, ਸਕ੍ਕਾ ਭਵਂ ਗਨ੍ਤੁਂ, ਤਬ੍ਬੋ ਭਵਂ ਜਨੇਤੁਂ ਇਚ੍ਚੇਵਮਾਦਿ.
੬੩੮. , ੬੬੦. ਵਜਾਦੀਹਿਪਬ੍ਬਜ੍ਜਾਦਯੋ ਨਿਪ੍ਪਜ੍ਜਨ੍ਤੇ.
ਵਜਇਚ੍ਚੇਵਮਾਦੀਹਿ ਧਾਤੂਹਿ, ਉਪਸਗ੍ਗਪਚ੍ਚਯਾਦੀਹਿ ਚ ਪਬ੍ਬਜ੍ਜਾਦਯੋ ਸਦ੍ਦਾ ਨਿਪ੍ਪਜ੍ਜਨ੍ਤੇ.
ਪਠਮਮੇਵ ਵਜਿਤਬ੍ਬਾਤਿ ਪਬ੍ਬਜ੍ਜਾ, ਇਞ੍ਜਨਂ ਏਜ੍ਜਾ, ਸਮਜ੍ਜਨਂ ਸਮਜ੍ਜਾ, ਨਿਸੀਦਨਂ ਨਿਸਜ੍ਜਾ, ਵਿਜਾਨਨਂ ਵਿਜ੍ਜਾ ਵਿਸਜ੍ਜਨਂ ਵਿਸਜ੍ਜਾ, ਪਦਨਂ ਪਜ੍ਜਾ, ਹਨਨਂ ਵਜ੍ਝਾ, ਏਸਨਂ ਇਚ੍ਛਾ, ਅਤਿਏਸਨਂ ਅਤਿਚ੍ਛਾ, ਸਦਨਂ ਸਜ੍ਜਾ, ਸਯਨ੍ਤਿ ਏਤ੍ਥਾਤਿ ਸੇਯ੍ਯਾ, ਸਮ੍ਮਾ ਚਿਤ੍ਤਂ ਨਿਧੇਤਿ ਏਤਾਯਾਤਿ ਸਦ੍ਧਾ, ਚਰਿਤਬ੍ਬਾ ਚਰਿਯਾ, ਕਰਣਂ ਕਿਰਿਯਾ, ਰੁਜਨਂ ਰੁਚ੍ਛਾ, ਪਦਨਂ ਪਚ੍ਛਾ, ਰਿਞ੍ਚਨਂ ਰਿਚ੍ਛਾ, ਤਿਕਿਚ੍ਛਨਂ ਤਿਤਿਚ੍ਛਾ, ਸਂਕੋਚਨਂ ਸਂਕੁਚ੍ਛਾ, ਮਦਨਂ ਮਚ੍ਛਾ, ਲਭਨਂ ਲਚ੍ਛਾ, ਰਦਿਹਬ੍ਬਾਤਿ ਰਚ੍ਛਾ, ਰਦਨਂ ਵਿਲੇਖਨਂ ਵਾਰਚ੍ਛਾ, ਅਧੋ ਭਾਗੇਨ ਗਚ੍ਛਤੀਤਿ ਤਿਰਚ੍ਛਾ, ਤਿਰਚ੍ਛਾਨੋ, ਅਜਨਂ ਅਚ੍ਛਾ, ਤਿਤਿਕ੍ਖਤੀਤਿ ਤਿਤਿਕ੍ਖਾ, ਸਹ ਆਗਮਨਂ ਸਾਗਚ੍ਛਾ, ਦੁਟ੍ਠੁ ਭਕ੍ਖਨਂ ਦੋਭਚ੍ਛਾ, ਦੁਟ੍ਠੁ ਰੋਸਨਂ ਦੁਰੁਚ੍ਛਾ, ਪੁਚ੍ਛਨਂ ਪੁਚ੍ਛਾ, ਮੁਹਨਂ ਮੁਚ੍ਛਾ, ਵਸਨਂ ਵਚ੍ਛਾ, ਕਚਨਂ ਕਚ੍ਛਾ, ਸਹ ਕਥਨਂ ਸਾਕਚ੍ਛਾ, ਤੁਦਨਂ ਤੁਚ੍ਛਾ, ਵਿਸਨਂ ਵਿਚ੍ਛਾ, ਪਿਸਨਂ ਪਿਚ੍ਛਿਲ੍ਲਾ, ਸੁਖਦੁਕ੍ਖਂ ਮੁਦਤਿ ਭਕ੍ਖਤੀਤਿ ਮਚ੍ਛੋ, ਸਤ੍ਤਾਨਂ ਪਾਣਂ ਮੁਸੇਤਿ ਚਜੇਤੀਤਿ ਮਚ੍ਚੁ, ਸਤਨਂ ਸਚ੍ਚਂ, ਉਦ੍ਧਂ ਧੁਨਾਤਿ ਕਮ੍ਪਤੀਤਿ ਉਦ੍ਧਚ੍ਚਂ, ਨਟਨਂ ਨਚ੍ਚਂ, ਨਿਤਨਂ ਨਿਚ੍ਚਂ, ਤਥਨਂ ਤਚ੍ਛਂ ਇਚ੍ਚੇਵਮਾਦਿ.
੬੩੯. , ੫੮੫. ਕ੍ਵਿਲੋਪੋ ਚ.
ਕ੍ਵਿਲੋਪੋ ਹੋਤਿ, ਪੁਨ ਚ ਨਿਪ੍ਪਜ੍ਜਨ੍ਤੇ.
ਵਿਵਿਧੇਹਿ ਸੀਲਾਦਿਗੁਣੇਹਿ ਭਵਤੀਤਿ ਵਿਭੂ, ਵਿਸੇਸੇਨ ਵਾ ਭਵਤੀਤਿ ਵਿਭੂ, ਸਯਂ ਅਤ੍ਤਨਾ ਭਵਤੀਤਿ ਸਯਮ੍ਭੂ, ਅਭਿਵਿਤ੍ਵਾ ਭਵਤੀਤਿ ਅਭਿਭੂ, ਸਂ ਸੁਟ੍ਠੁ ਧੁਨਾਤਿ ਕਮ੍ਪਤੀਤਿ ਸਨ੍ਧੂ, ਵਿਸੇਸੇਨ ਭਾਤਿ ਦਿਬ੍ਬਤੀਤਿ ਵਿਭਾ, ਨਿਸ੍ਸੇਸੇਨ ਭਾਤਿ ਦਿਬ੍ਬਤੀਤਿ ਨਿਭਾ, ਪਕਾਰੇਨ ਭਾਤਿ ਦਿਬ੍ਬਤੀਤਿ ਪਭਾ, ਸਹ ਭਾਸਨ੍ਤਿ ਏਤ੍ਥਾਤਿ ਸਭਾ, ਆਭੁਸੋ ਭਾਤਿ ਦਿਬ੍ਬਤੀਤਿ ਆਭਾ, ਭੁਜੇਨ ਕੁਟਿਲੇਨ ਗਚ੍ਛਤੀਤਿ ਭੁਜਗੋ, ਤੁਰਿਤਤੁਰਿਤੋ ਗਚ੍ਛਤੀਤਿ ਤੁਰਗੋ, ਸਂ ਸੁਟ੍ਠੁ ਪਥਵਿਂ ਖਨਤੀਤਿ ਸਙ੍ਖੋ, ਵਿਸੇਸੇਨ ਯਮਤਿ ਉਪਰਮਤੀਤਿ ਵਿਯੋ, ਸੁਟ੍ਠੁ ਮਨਤਿ ਜਾਨਾਤੀਤਿ ਸੁਮੋ, ਪਰਿ ਸਮਨ੍ਤਤੋ ਤਨੋਤਿ ਵਿਤ੍ਥਾਰੇਤੀਤਿ ਪਰਿਤੋ ਇਚ੍ਚੇਵਮਾਦਿ.
੬੪੦. , ੦. ਸਚਜਾਨਂ ਕਗਾ ਣਾਨੁਬਨ੍ਧੇ.
ਸਚ ਜਾਨਂ ਧਾਤੂਨਮਨ੍ਤਾਨਂ ਚਜਾਨਂ ਕਗਾਦੇਸਾ ਹੋਨ੍ਤਿ ਯਥਾਸਙ੍ਖ੍ਯਂ ਣਾਨੁਬਨ੍ਧੇ ਪਚ੍ਚਯੇ ਪਰੇ.
ਓਕੋ, ਪਾਕੋ, ਸੇਕੋ, ਸੋਕੋ, ਵਿਵੇਕੋ, ਚਾਗੋ, ਯੋਗੋ, ਭੋਗੋ, ਰੋਗੋ, ਰਾਗੋ, ਭਾਗੋ, ਭਙ੍ਗੋ, ਰਙ੍ਗੋ, ਸਙ੍ਗੋ.
੬੪੧. , ੫੭੨. ਨੁਦਾਦੀਹਿ ਯੁਣ੍ਵੂਨਮਨਾਨਨਾਕਾਨਨਕਾ ਸਕਾਰਿਤੇਹਿ ਚ.
ਨੁਦ ਸੂਦ ਜਨ ਸੁ ਲੂ ਹੁ ਪੁ ਭੂ ਞਾ ਅ ਸ ਸਮੁਇਚ੍ਚੇਵਮਾਦੀਹਿ ਧਾਤੂਹਿ, ਫਨ੍ਦ ਚਿਤਿ ਆਣ ਇਚ੍ਚੇਵਮਾਦੀਹਿ ਸਕਾਰਿਤੇਹਿ ਚ ਯੁਣ੍ਵੂਨਂ ਪਚ੍ਚਯਾਨਂ ਅਨ ਆਨਨ ਅਕ ਆਨਨਕਾਦੇਸਾ ਹੋਨ੍ਤਿ ਯਥਾਸਙ੍ਖ੍ਯਂ ਕਤ੍ਤਰਿ, ਭਾਵਕਰਣੇਸੁ ਚ.
ਕਤ੍ਤਰਿ ਤਾਵ – ਪਨੁਦਤੀਤਿ ਪਨੂਦਨੋ. ਏਵਂ ਸੂਦਨੋ, ਜਨਨੋ, ਸਵਣੋ, ਲਵਨੋ, ਹਵਨੋ, ਪਵਨੋ, ਭਵਨੋ, ਞਾਣੋ, ਅਸਨੋ, ਸਮਣੋ.
ਭਾਵੇ ਚ – ਪਨੁਦਤੇ ਪਨੂਦਨਂ. ਏਵਂ ਸੂਦਨਂ, ਜਨਨਂ, ਸਵਣਂ, ਲਵਨਂ, ਹਵਨਂ, ਪਵਨਂ, ਭਵਨਂ, ਞਾਣਂ, ਅਸਨਂ, ਸਮਣਂ, ਸਞ੍ਜਾਨਨਂ, ਕੁਯਤੇ ਕਾਨਨਂ.
ਕਾਰਿਤੇ ਚ – ਫਨ੍ਦਾਪੀਯਤੇ ਫਨ੍ਦਾਪਨਂ, ਚੇਤਾਪੀਯਤੇ ਚੇਤਾਪਨਂ, ਆਣਾਪੀਯਤੇ ਆਣਾਪਨਂ.
ਕਰਣੇ – ਨੁਦਨ੍ਤਿ ਅਨੇਨਾਤਿ ਨੂਦਨਂ, ਏਵਂ ਸੂਦਨਂ, ਜਨਨਂ, ਸਵਣਂ, ਲਵਣਂ, ਹਵਨਂ, ਪਵਨਂ, ਭਗਨਂ, ਞਾਣਂ, ਅਸਨਂ, ਸਵਣਂ.
ਪੁਨ ਕਤ੍ਤਰਿ – ਨੁਦਤੀਤਿ ਨੂਦਕੋ, ਸੂਦਤੀਤਿ ਸੂਦਧਕਾ, ਜਨੇਤੀਤਿ ਜਨਕੋ, ਸੁਣੋਤੀਤਿ ਸਾਵਕੋ, ਲੁਨਾਤੀਤਿ ਲਾਵਕੋ, ਜੁਹੋਤੀਤਿ ਹਾਵਕੋ, ਪੁਨਾਤੀਤਿ ਪਾਵਕੋ, ਭਵਤੀਤਿ ਭਾਵਕੋ, ਜਾਨਾਤੀਤਿ ਜਾਨਕੋ, ਅਸਤੀਤਿ ਅਸਕੋ, ਉਪਾਸਤੀਤਿ ਉਪਾਸਕੋ, ਸਮੇਤੀਤਿ ਸਮਕੋ.
ਕਾਰਿਤੇ ਤੁ – ਫਨ੍ਦਾਪਯਤੀਤਿ ਫਨ੍ਦਾਪਯਕੋ. ਏਵਂ ਆਣਾਪਯਕੋ, ਚੇਤਾਪਯਕੋ, ਸਞ੍ਜਾਨਨਕੋ.
੬੪੨. , ੫੮੮. ਇ ਯ ਤ ਮ ਕਿ ਏ ਸਾਨ’ਮਨ੍ਤਸ੍ਸਰੋ ਦੀਘਂ ਕ੍ਵਚਿ ਦੁ ਸ ਸ੍ਸ ਗੁਣਂ ਦੋ ਰਂ ਸਕ੍ਖੀ ਚ.
ਇਯ ਤ ਮ ਕਿ ਏ ਸਇਚ੍ਚੇਤੇਸਂ ਸਬ੍ਬਨਾਮਾਨਮਨ੍ਤੋ ਸਰੋ ਦੀਘਮਾਪਜ੍ਜਤੇ, ਕ੍ਵਚਿ ਦੁਸਇਚ੍ਚੇਤਸ੍ਸ ਧਾਤੁਸ੍ਸ ਉਕਾਰੋ ਗੁਣਮਾਪਜ੍ਜਤੇ, ਦਕਾਰੋ ਰਕਾਰਮਾਪਜ੍ਜਤੇ, ਧਾਤ੍ਵਨ੍ਤਸ੍ਸ ਸਸ੍ਸ ਚ ਸ ਕ੍ਖ ਈਇਚ੍ਚੇਤੇ ਆਦੇਸਾ ਹੋਨ੍ਤਿ ਯਥਾਸਮ੍ਭਵਂ. ਏਤੇ ਸਦ੍ਦਾ ਸਕੇਨ ਸਕੇਨ ਨਾਮੇਨ ਯਥਾਨੁਪਰੋਧੇਨ ਬੁਦ੍ਧਸਾਸਨੇ ਪਚ੍ਛਾ ਪੁਨ ਨਿਪ੍ਪਜ੍ਜਨ੍ਤੇ.
ਇਮਮਿਵ ਨਂ ਪਸ੍ਸਤੀਤਿ ਈਦਿਸੋ, ਯਮਿਵ ਨਂ ਪਸ੍ਸਤੀਤਿ ਯਾਦਿਸੋ, ਤਮਿਵ ਨਂ ਪਸ੍ਸਤੀਤਿ ਤਾਦਿਸੋ, ਮਮਿਵ ਨਂ ਪਸ੍ਸਤੀਤਿ ਮਾਦਿਸੋ, ਕਿਮਿਵ ਨਂ ਪਸ੍ਸਤੀਤਿ ਕੀਦਿਸੋ, ਏਤਮਿਵ ਨਂ ਪਸ੍ਸਤੀਤਿ ਏਦਿਸੋ, ਸਮਾਨਮਿਵ ਨਂ ਪਸ੍ਸਤੀਤਿ ਸਾਦਿਸੋ. ਇਮਮਿਵ ਨਂ ਪਸ੍ਸਤੀਤਿ ਈਰਿਸੋ, ਯਮਿਵ ਨਂ ਪਸ੍ਸਤੀਤਿ ਯਾਰਿਸੋ, ਤਮਿਵ ਨਂ ਪਸ੍ਸਤੀਤਿ ਤਾਰਿਸੋ, ਮਮਿਵ ਨਂ ਪਸ੍ਸਤੀਤਿ ਮਾਰਿਸੋ, ਕਿਮਿਵ ਨਂ ਪਸ੍ਸਤੀਤਿ ਕੀਰਿਸੋ, ਏਤਮਿਵ ਨਂ ਪਸ੍ਸਤੀਤਿ ਏਰਿਸੋ, ਸਮਾਨਮਿਵ ਨਂ ਪਸ੍ਸਤੀਤਿ ਸਾਰਿਸੋ. ਇਮਮਿਵ ਨਂ ਪਸ੍ਸਤੀਤਿ ਈਦਿਕ੍ਖੋ, ਯਮਿਵ ਨਂ ਪਸ੍ਸਤੀਤਿ ਯਾਦਿਕ੍ਖੋ, ਤਮਿਵ ਨਂ ਪਸ੍ਸਤੀਤਿ ਤਾਦਿਕ੍ਖੋ, ਏਵਂ ਮਾਦਿਕ੍ਖੋ, ਕੀਦਿਕ੍ਖੋ, ਏਦਿਕ੍ਖੋ, ਸਾਦਿਕ੍ਖੋ. ਈਦੀ, ਯਾਦੀ, ਤਾਦੀ, ਮਾਦੀ, ਕੀਦੀ, ਏਦੀ, ਸਾਦੀ.
ਚਗ੍ਗਹਣੇਨ ਤੇਸਮੇਵ ਸਦ੍ਦਾਨਂ ਇਯਇਚ੍ਚੇਵਮਾਦੀਨਮਨ੍ਤੋ ਚ ਸਰੋ ਕ੍ਵਚਿ ਦੀਘਤ੍ਥਮਾਹੁ. ਈਦਿਕ੍ਖੋ, ਯਾਦਿਕ੍ਖੋ, ਤਾਦਿਕ੍ਖੋ, ਮਾਦਿਕ੍ਖੋ, ਕੀਦਿਕ੍ਖੋ, ਏਦਿਕ੍ਖੋ, ਸਾਦਿਕ੍ਖੋ. ਇਦਿਸੋ, ਸਦਿਸੋ, ਸਰਿਸੋ, ਸਰਿਕ੍ਖੋ.
੬੪੩. , ੬੩੫. ਭ੍ਯਾਦੀਹਿ ਮਤਿ ਬੁਧਿ ਪੂਜਾਦੀਹਿ ਚ ਤ੍ਤੋ.
ਭੀਇਚ੍ਚੇਵਮਾਦੀਹਿ ਧਾਤੂਹਿ, ਮਤਿ. ਬੁਧਿ ਪੂਜਾਦਿਤੋ ਚ ਤ੍ਤ ਪਚ੍ਚਯੋ ਹੋਤਿ.
ਭਾਯਿਤਬ੍ਬੋਤਿ ਭੀਤੋ, ਸੁਪਿਤਬ੍ਬੋਤਿ ਸੁਤ੍ਤੋ, ਮਿਜ੍ਜਿਤਬ੍ਬੋ ਸਿਨੇਹੇਤਬ੍ਬੋਤਿ ਮਿਤ੍ਤੋ, ਸਮ੍ਮਨ੍ਨਿਤਬ੍ਬੋਤਿ ਸਮ੍ਮਤੋ, ਸਂ ਸੁਟ੍ਠੁ ਮਾਨਿਤਬ੍ਬੋ ਪੂਜੇਤਬ੍ਬੋਤਿ ਸਮ੍ਮਤੋ, ਸਮ੍ਮਾਨੀਯਿਤ੍ਥਾਤਿ ਸਮ੍ਮਤੋ, ਸਂਕਪ੍ਪੀਯਤੇਤਿ ਸਙ੍ਕਪ੍ਪਿਤੋ, ਸਂਕਪ੍ਪੀਯਿਤ੍ਥਾਤਿ ਸਙ੍ਕਪ੍ਪਿਤੋ, ਸਮ੍ਪਾਦੀਯਤੇਤਿ ਸਮ੍ਪਾਦਿਤੋ, ਸਮ੍ਪਾਦੀਯਿਤ੍ਥਾਤਿ ਸਮ੍ਪਾਦਿਤੋ, ਅਵਧਾਰੀਯਤੇਤਿ ਅਵਧਾਰਿਤੋ, ਅਵਧਾਰੀਯਿਤ੍ਥਾਤਿ ਅਵਧਾਰਿਤੋ, ਬੁਜ੍ਝਿਤਬ੍ਬੋ ਞਾਤਬ੍ਬੋਤਿ ਬੁਦ੍ਧੋ, ਅਜ੍ਝਯਿਤਬ੍ਬੋਤਿ ਇਤੋ, ਏਤਬ੍ਬੋ ਗਨ੍ਤਬ੍ਬੋਤਿ ਇਤੋ, ਵਿਦਿਤਬ੍ਬੋ ਞਾਤਬ੍ਬੋਤਿ ਵਿਦਿਤੋ, ਤਕ੍ਕੀਯਤੇਤਿ ਤਕ੍ਕਿਤੋ, ਪੂਜੀਯਤੇਤਿ ਪੂਜਿਤੋ, ਪੂਜੀਯਿਤ੍ਥਾਤਿ ਪੂਜਿਤੋ, ਅਪਚਾਯਿਤਬ੍ਬੋਤਿ ਅਪਚਾਯਿਤੋ, ਮਾਨਿਤਬ੍ਬੋ ਪੂਜੇਤਬ੍ਬੋਤਿ ਮਾਨਿਤੋ, ਅਪਚੀਯਤੇਤਿ ਅਪਚਿਤੋ, ਵਨ੍ਦੀਯਤੇਤਿ ਵਨ੍ਦਿਤੋ, ਵਨ੍ਦੀਯਿਤ੍ਥਾਤਿ ਵਨ੍ਦਿਤੋ, ਸਕ੍ਕਰੀਯਤੇਤਿ ਸਕ੍ਕਾਰਿਤੋ, ਸਕ੍ਕਰੀਯਿਤ੍ਥਾਤਿ ਸਕ੍ਕਾਰਿਤੋ.
੬੪੪. , ੬੬੧. ਵੇਪੁ ਸੀ ਦਵ ਵਮੁ ਕੁ ਦਾ ਭੂ ਹ੍ਵਾਦੀਹਿ ਥੁ ਤ੍ਤਿਮ ਣਿਮਾ ਨਿਬ੍ਬਤ੍ਤੇ.
ਵੇਪੁ ਸੀ ਦਵ ਵਮੁ ਕੁ ਦਾ ਭੂ ਹੁਇਚ੍ਚੇਵਮਾਦੀਹਿ ਧਾਤੂਹਿ ਯਥਾਸਮ੍ਭਵਂ ਥੁ ਤ੍ਤਿਮ ਣਿਮਪਚ੍ਚਯਾ ਹੋਨ੍ਤਿ ਨਿਬ੍ਬਤ੍ਤਤ੍ਥੇ.
ਵੇਪਨਂ ਵੇਪੋ, ਤੇਨ ਨਿਬ੍ਬਤ੍ਤੋ ਵੇਪਥੁ, ਸਯਨਂ ਸਯੋ, ਤੇਨ ਨਿਬ੍ਬਤ੍ਤੋ ਸਯਥੁ, ਦਵਨਂ ਦਵੋ, ਤੇਨ ਨਿਬ੍ਬਤ੍ਤੋ ਦਵਥੁ. ਵਮਨਂ ਵਮੋ, ਤੇਨ ਨਿਬ੍ਬਤ੍ਤੋ ਵਮਥੁ. ਕੁਤ੍ਤਿ ਕਰਣਂ, ਤੇਨ ਨਿਬ੍ਬਤ੍ਤਂ ਕੁਤ੍ਤਿਮਂ. ਦਾਤਿ ਦਾਨਂ, ਤੇਨ ਨਿਬ੍ਬਤ੍ਤਂ ਦਤ੍ਤਿਮਂ. ਭੂਤਿ ਭਵਨਂ, ਤੇਨ ਨਿਬ੍ਬਤ੍ਤਂ ਭੋਤ੍ਤਿਮਂ. ਅਵਹੁਤਿ ਅਵਹਨਂ, ਤੇਨ ਨਿਬ੍ਬਤ੍ਤਂ ਓਹਾਵਿਮਂ.
੬੪੫. , ੬੬੨. ਅਕ੍ਕੋਸੇ ਨਮ੍ਹਾਨਿ.
ਅਕ੍ਕੋਸਇਚ੍ਚੇਤਸ੍ਮਿਂ ਅਤ੍ਥੇ ਨਮ੍ਹਿ ਪਟਿਸੇਧਯੁਤ੍ਤੇ ਆਨਿਪਚ੍ਚਯੋ ਹੋਤਿ ਧਾਤੂਹਿ.
ਨ ਗਮਿਤਬ੍ਬਂ ਅਗਮਾਨਿ ਤੇ ਜਮ੍ਮ ਦੇਸਂ, ਨ ਕਤ੍ਤਬ੍ਬਂ ਅਕਰਾਣਿ ਤੇ ਜਮ੍ਮ ਕਮ੍ਮਂ.
ਨਮ੍ਹੀਤਿ ਕਿਮਤ੍ਥਂ? ਵਿਪਤ੍ਤਿ ਤੇ ਜਮ੍ਮ, ਵਿਕਤਿ ਤੇ ਜਮ੍ਮ.
ਅਕ੍ਕੋਸੇਤਿ ਕਿਮਤ੍ਥਂ? ਨ ਗਨ੍ਤਬ੍ਬਾ ਅਗਤਿ ਤੇ.
੬੪੬. , ੪੧੯. ਏਕਾਦਿਤੋ ਸਕਿਸ੍ਸ ਕ੍ਖਤ੍ਤੁਂ.
ਏਕਾਦਿਤੋ ਸਕਿਸ੍ਸ ਕ੍ਖਤ੍ਤੁਂ ਹੋਤਿ.
ਏਕਸ੍ਸ ਪਦਤ੍ਥਸ੍ਸ ਸਕਿਂ ਵਾਰਂ ਏਕਕ੍ਖਤ੍ਤੁਂ, ਦ੍ਵਿਨ੍ਨਂ ਪਦਤ੍ਥਾਨਂ ਸਕਿਂ ਵਾਰਂ ਦ੍ਵਿਕ੍ਖਤ੍ਤੁਂ, ਤਿਣ੍ਣਂ ਪਦਤ੍ਥਾਨਂ ਸਕਿਂ ਵਾਰਂ ਤਿਕ੍ਖਤ੍ਤੁਂ, ਏਵਂ ਚਤੁਕ੍ਖਤ੍ਤੁਂ, ਪਞ੍ਚਕ੍ਖਤ੍ਤੁਂ, ਛਕ੍ਖਤ੍ਤੁਂ, ਸਤ੍ਤਕ੍ਖਤ੍ਤੁਂ, ਅਟ੍ਠਕ੍ਖਤ੍ਤੁਂ, ਨਵਕ੍ਖਤ੍ਤੁਂ, ਦਸਕ੍ਖਤ੍ਤੁਂ. ਇਚ੍ਚੇਵਮਾਦਯੋ ਸਦ੍ਦਾ ਯੋਜੇਤਬ੍ਬਾ.
੬੪੭. , ੬੬੩. ਸੁਨਸ੍ਸੁਨਸ੍ਸੋਣ ਵਾਨੁਵਾਨੂਨੁਨਖੁਨਾਨਾ.
ਸੁਨਇਚ੍ਚੇਤਸ੍ਸ ਪਾਟਿਪਦਿਕਸ੍ਸ ਉਨਸ੍ਸ ਓਣ ਵਾਨ ਉਵਾਨ ਊਨ ਉਨਖ ਉਨ ਆ ਆਨਾਦੇਸਾ ਹੋਨ੍ਤਿ.
ਸਾਮਿਕਸ੍ਸ ਸਦ੍ਦਂ ਸੁਣਾਤੀਤਿ ਸੋਣੋ, ਸਾਮਿਕਸ੍ਸ ਸਦ੍ਦਂ ਸੁਣਾਤੀਤਿ ਸ੍ਵਾਨੋ, ਏਵਂ ਸੁਵਾਨੋ, ਸੂਨੋ, ਸੁਨਖੋ, ਸੁਨੋ, ਸਾ, ਸਾਨੋ.
੬੪੮. , ੬੬੪. ਤਰੁਣਸ੍ਸ ਸੁਸੁ ਚ.
ਤਰੁਣਇਚ੍ਚੇਤਸ੍ਸ ਪਾਟਿਪਦਿਕਸ੍ਸ ਸੁਸੁ ਆਦੇਸੋ ਹੋਤਿ.
ਸੁਸੁ ਕਾਲ਼ਕੇਸੋ.
੬੪੯. , ੬੬੫. ਯੁਵਸ੍ਸੁਵਸ੍ਸੁਵੁਵਾਨੁਨੂਨਾ.
ਯੁਵਇਚ੍ਚੇਤਸ੍ਸ ਪਾਟਿਪਦਿਕਸ੍ਸ ਉਵਸ੍ਸ ਉਵਉਵਾਨ ਉਨਊਨਾਦੇਸਾ ਹੋਨ੍ਤਿ.
ਯੁਵਾ, ਯੁਵਾਨੋ, ਯੁਨੋ, ਯੂਨੋ.
੬੫੦. , ੬੫੧. ਕਾਲੇ ਵਤ੍ਤਮਾਨਾਤੀਤੇ ਣ੍ਵਾਦਯੋ.
ਕਾਲੇ ਵਤ੍ਤਮਾਨਤ੍ਥੇ ਚ ਅਤੀਤਤ੍ਥੇ ਚ ਣੁ ਯੁ ਤਪਚ੍ਚਯਾ ਹੋਨ੍ਤਿ.
ਅਕਾਸਿ, ਕਰੋਤੀਤਿ ਕਾਰੁ, ਅਗਚ੍ਛਿ, ਗਚ੍ਛਤੀਤਿ, ਵਾਯੁ, ਅਭਵਿ, ਭਵਤੀਤਿ ਭੂਤਂ.
੬੫੧. , ੬੪੭. ਤਵਿਸ੍ਸਤਿ ਗਮਾਦੀਹਿ ਣੀ ਘਿਣ.
ਭਵਿਸ੍ਸਤਿਕਾਲਤ੍ਥੇ ਗਮੁ ਭਜ ਸੁ ਠਾਇਚ੍ਚੇਵਮਾਦੀਹਿ ਧਾਤੂਹਿ ਣੀ ਘਿਣ ਪਚ੍ਚਯਾ ਹੋਨ੍ਤਿ.
ਆਯਤਿਂ ਗਮਿਤੁਂ ਸੀਲਂ ਯਸ੍ਸ, ਸੋ ਹੋਤੀਤਿ ਗਾਮੀ, ਆਯਤਿਂ ਭਜਿਤੁਂ ਸੀਲਂ ਯਸ੍ਸ, ਸੋ ਹੋਤੀਤਿ ਭਾਜੀ, ਆਯਤਿਂ ਪਸ੍ਸਾਪਿਤੁਂ ਸੀਲਂ ਯਸ੍ਸ, ਸੋ ਹੋਤੀਤਿ ਪਸ੍ਸਾਵਿ, ਆਯਤਿਂ ਪਟ੍ਠਾਯਿਤੁਂ ਸੀਲਂ ਯਸ੍ਸ, ਸੋ ਹੋਤੀਤਿ ਪਟ੍ਠਾਯਿ.
੬੫੨. , ੬੪੮. ਕ੍ਰਿਯਾਯਂ ਣ੍ਵੁ ਤਵੋ.
ਕ੍ਰਿਯਾਯਮਤ੍ਥੇ ਣ੍ਵੁ ਤੁਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਭਵਿਸ੍ਸਤਿਕਾਲੇ.
‘‘ਕਰਿਸ੍ਸ’’ਨ੍ਤਿ ਕਾਰਕੋ ਵਜਤਿ, ‘‘ਭੁਞ੍ਜਿਸ੍ਸ’’ਨ੍ਤਿ ਭੋਤ੍ਤਾ ਵਜਤਿ.
੬੫੩. , ੩੦੬. ਭਾਵਵਾਚਿਮ੍ਹਿ ਚਤੁਤ੍ਥੀ.
ਭਾਵਵਾਚਿਮ੍ਹਿ ਚਤੁਤ੍ਥੀਵਿਭਤ੍ਤਿ ਹੋਤਿ ਭਵਿਸ੍ਸਤਿਕਾਲੇ,
ਪਚਿਸ੍ਸਤੇ, ਪਚਨਂ ਵਾ ਪਾਕੋ, ਪਾਕਾਯ ਵਜਤਿ. ਭੁਞ੍ਜਿਸ੍ਸਤੇ, ਭੋਜਨਂ ਵਾ ਭੋਗੋ, ਭੋਗਾਯ ਵਜਤਿ. ਨਚ੍ਚਿਸ੍ਸਤੇ, ਨਚ੍ਚਨਂ ਵਾ ਨਚ੍ਚਂ, ਨਚ੍ਚਾਯ ਵਜਤਿ.
੬੫੪. , ੬੪੯. ਕਮ੍ਮਨਿ ਣੋ.
ਕਮ੍ਮਨਿ ਉਪਪਦੇ ਣਪਚ੍ਚਯੋ ਹੋਤਿ ਭਵਿਸ੍ਸਤਿਕਾਲੇ.
ਨਗਰਂ ਕਰਿਸ੍ਸਤਿ ਨਗਰਕਾਰੋ ਵਜਤਿ, ਸਾਲਿਂ ਲਾਵਿਸ੍ਸਤਿ ਸਾਲਿਲਾਵੋ ਵਜਤਿ, ਧਞ੍ਞਂ ਵਪਿਸ੍ਸਤਿ ਧਞ੍ਞਵਾਪੋ ਵਜਤਿ, ਭੋਗਂ ਦਦਿਸ੍ਸਤਿ ਭੋਗਦਾਯੋ ਵਜਤਿ, ਸਿਨ੍ਧੁਂ ਪਿਵਿਸ੍ਸਤਿ ਸਿਨ੍ਧੁਪਾਯੋ ਵਜਤਿ.
੬੫੫. , ੬੫੦. ਸੇਸੇ ਸ੍ਸਂ ਨ੍ਤੁਮਾਨਾਨਾ.
ਸੇਸਇਚ੍ਚੇਤਸ੍ਮਿਂ ਅਤ੍ਥੇ ਸ੍ਸਂ ਨ੍ਤੁ ਮਾਨ ਆਨ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਭਵਿਸ੍ਸਤਿਕਾਲੇ ਕਮ੍ਮੂਪਪਦੇ.
ਕਮ੍ਮਂ ਕਰਿਸ੍ਸਤਿ ਕਮ੍ਮਂ ਕਰਿਸ੍ਸਂ, ਏਵਂ ਕਮ੍ਮਂ ਕਰੋਨ੍ਤੋ, ਕਮ੍ਮਂ ਕੁਰੁਮਾਨੋ, ਕਮ੍ਮਂ ਕਰਾਨੋ ਵਜਤਿ. ਭੋਜਨਂ ਭੁਞ੍ਜਿਸ੍ਸਤਿ ਭੋਜਨਂ ਭੁਞ੍ਜਿਸ੍ਸਂ, ਏਵਂ ਭੋਜਨਂ ਭੁਞ੍ਜਨ੍ਤੋ, ਭੋਜਨਂ ਭੁਞ੍ਜਮਾਨੋ, ਭੋਜਨਂ ਭੁਞ੍ਜਾਨੋ ਵਜਤਿ. ਖਾਦਨਂ ਖਾਦਿਸ੍ਸਤਿ ਖਾਦਨਂ ਖਾਦਿਸ੍ਸਂ, ਏਵਂ ਖਾਦਨਂ ਖਾਦਨ੍ਤੋ, ਖਾਦਨਂ ਖਾਦਮਾਨੋ, ਖਾਦਨਂ ਖਾਦਾਨੋ ਵਜਤਿ. ਮਗ੍ਗਂ ਚਰਿਸ੍ਸਤਿ ਮਗ੍ਗਂ ਚਰਿਸ੍ਸਂ, ਏਵਂ ਮਗ੍ਗਂ ਚਰਨ੍ਤੋ, ਮਗ੍ਗਂ ਚਰਮਾਨੋ, ਮਗ੍ਗਂ ਚਰਾਨੋ ਵਜਤਿ. ਭਿਕ੍ਖਂ ਭਿਕ੍ਖਿਸ੍ਸਤਿ ਭਿਕ੍ਖਂ ਭਿਕ੍ਖਿਸ੍ਸਂ, ਏਵਂ ਭਿਕ੍ਖਂ ਭਿਕ੍ਖਨ੍ਤੋ, ਭਿਕ੍ਖਂ ਭਿਕ੍ਖਮਾਨੋ, ਭਿਕ੍ਖਂ ਭਿਕ੍ਖਾਨੋ ਵਜਤਿ.
੬੫੬. , ੬੬੬. ਛਵਾਦੀਤਿ ਤਤ੍ਰਣ.
ਛ ਦ ਚਿ ਤਿ ਸੁ ਨੀ ਵਿ ਦ ਪਦ ਤਨੁ ਯਤ ਅਦ ਮਦ ਯੁਜ ਵਤੁਮਿਦ ਮਾ ਪੁ ਕ ਲ ਵਰ ਵੇ ਪੁ ਗੁਪ ਦਾ ਇਚ੍ਚੇਵਮਾਦੀਹਿ ਧਾਤੂਹਿ ਤਤ੍ਰਣ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਯਥਾਸਮ੍ਭਵਂ.
ਆਤਪਂ ਛਾਦੇਤੀਤਿ ਛਤ੍ਤਂ, ਛਤ੍ਰਂ. ਆਰਮ੍ਮਣਂ ਚਿਨ੍ਤੇਤੀਤਿ ਚਿਤ੍ਤਂ, ਚਿਤ੍ਰਂ. ਚਿਨ੍ਤੇਨ੍ਤਿ ਸਮ੍ਪਯੁਤ੍ਤਧਮ੍ਮਾ ਏਥੇਨਾਤਿ ਵਾ ਚਿਤ੍ਤਂ, ਚਿਤ੍ਰਂ. ਅਤ੍ਥੇ ਅਭਿਸ੍ਸਵੇਤੀਤਿ ਸੁਤ੍ਤਂ, ਸੁਤ੍ਰਂ. ਅਤ੍ਥੇ ਸੂਚੇਤੀਤਿ ਵਾ ਸੁਤ੍ਤਂ, ਸੁਤ੍ਰਂ. ਸਤ੍ਤੇ ਨੇਤੀਤਿ ਨੇਤ੍ਤਂ, ਨੇਤ੍ਰਂ. ਸਤ੍ਤੇ ਇਚ੍ਛਿਤਟ੍ਠਾਨਂ ਨੇਨ੍ਤਿ ਏਤੇਨਾਤਿ ਵਾ ਨੇਤ੍ਤਂ, ਨੇਤ੍ਰਂ. ਪਕਾਰੇਨ ਵਿਦਤੀਤਿ ਪਵਿਤ੍ਤਂ, ਪਵਿਤ੍ਰਂ. ਵਿਵਿਧੇਨ ਆਕਾਰੇਨ ਮਙ੍ਗ ਪਾਪਂ ਪੁਨਾਤਿ, ਸੋਧੇਤੀਤਿ ਪਵਿਤ੍ਤਂ, ਪਵਿਤ੍ਰਂ. ਸੁਚਿਭਾਵਂ ਵਾ ਪਾਪੁਣਾਤੀਤਿ ਪਵਿਤ੍ਤਂ, ਪਵਿਤ੍ਰਂ. ਪਦਤਿ ਪਾਪੁਣਾਤੀਤਿ ਪਤ੍ਤੋ, ਪਤ੍ਰੋ. ਆਹਾਰਾ ਪਤਨ੍ਤਿ ਏਤ੍ਥ ਭਾਜਨੇਤਿ ਪਤ੍ਤਂ, ਪਤ੍ਰਂ. ਪਦਤਿ ਪਵਤ੍ਤਤੀਤਿ ਵਾ ਪਤ੍ਤਂ, ਪਤ੍ਰਂ. ਤਨੋਤਿ ਵਿਤ੍ਥਾਰੇਤੀਤਿ ਤਨ੍ਤਂ, ਤਨ੍ਤ੍ਰਂ, ਤਨਿਤਬ੍ਬਂ ਵਿਤ੍ਥਾਰੇਤਬ੍ਬਨ੍ਤਿ ਵਾ ਤਨ੍ਤਂ, ਤਨ੍ਤ੍ਰ. ਯਤਤੀਤਿ ਯਤ੍ਤਂ, ਯਤ੍ਰਂ. ਯਤਤਿ ਵੀਰਿਯਂ ਕਰੋਤਿ ਏਤੇਨਾਤਿ ਵਾ ਯਤ੍ਤਂ, ਯਤ੍ਰਂ. ਯਤਨਂ ਵਾ ਯਤ੍ਤਂ, ਯਤ੍ਰਂ. ਸੁਖਦੁਕ੍ਖਂ ਅਦਤਿ ਭਕ੍ਖਤੀਤਿ ਅਤ੍ਤਾ, ਅਤ੍ਰਾ. ਮਦਤੀਤਿ ਮਤ੍ਤਂ, ਮਤ੍ਰਂ. ਵਤ੍ਥੁਂ ਯੁਜ੍ਜਨ੍ਤਿ ਏਤੇਨਾਤਿ ਯੋਤ੍ਤਂ, ਯੋਤ੍ਰਂ. ਵਤ੍ਤਤੀਤਿ ਵਤ੍ਤਂ, ਵਤ੍ਰਂ. ਮਿਦਤਿ ਸਿਨੇਹਂ ਕਰੋਤੀਤਿ ਮਿਤ੍ਤਂ. ਮਿਤ੍ਰਂ. ਮਿਦਤਿ ਸਿਨੇਹਤਿ ਏਤਾਯਾਤਿ ਮੇਤ੍ਤਾ, ਮੇਤ੍ਰਾ. ਪਰਿ ਸਮਨ੍ਤ ਤੋ ਸਬ੍ਬਾਕਾਰੇਨ ਮਿਨਨ੍ਤਿ ਏਤਾਯਾਤਿ ਮਤ੍ਤਾ, ਮਤ੍ਰਾ. ਮਾਨਨਂ ਵਾ ਮਤ੍ਤਂ, ਮਤ੍ਰਂ. ਅਤ੍ਤਨੋ ਕੁਲਂ ਪੁਨਾਤਿ ਸੋਧੇਤੀਤਿ ਪੁਤ੍ਤੋ, ਪੁਤ੍ਰੋ. ਕਲਿਤਬ੍ਬਂ ਸਙ੍ਖ੍ਯਾਤਬ੍ਬਨ੍ਤਿ ਕਲਤ੍ਤਂ, ਕਲਤ੍ਰਂ. ਸਂਸੁਟ੍ਠੁ ਵਾਰੇਤਿ ਏਤੇਨਾਤਿ ਵਰਤ੍ਤਂ, ਵਰਤ੍ਰਂ. ਵੇਪਤਿ ਕਮ੍ਪਤੀਤਿ ਵੇਤ੍ਤਂ, ਵੇਤ੍ਰਂ. ਗੋਪਿਤਬ੍ਬਂ ਰਕ੍ਖਿਤਬ੍ਬਨ੍ਤਿ ਗੁਤ੍ਤਂ. ਗੁਤ੍ਰਂ, ਗੋਤ੍ਤਂ, ਗੋਤ੍ਰਂ. ਦਾਤਿ ਅਵਖਣ੍ਡਤਿ ਏਤੇਨਾਤਿ ਦਾਤ੍ਤਂ, ਦਾਤ੍ਰਂ ਇਚ੍ਚੇਵਮਾਦਿ.
੬੫੭. , ੬੬੭. ਵਦਾਦੀਹਿ ਣਿਤ੍ਤੋ ਗਣੇ.
ਵਦ ਚਰ ਵਰਇਚ੍ਚੇਵਮਾਦੀਹਿ ਧਾਤੂਹਿ ਣਿਤ੍ਤਪਚ੍ਚਯੋ ਹੋਤਿ ਗਣਤ੍ਥੇ.
ਵਾਦਿਤਾਨਂ ਗਣੋ ਵਾਦਿਤ੍ਤਂ. ਏਵਂ ਚਾਰਿਤ੍ਤਂ, ਵਾਰਿਤ੍ਤਂ, ਇਚ੍ਚੇਵਮਾਦਿ.
੬੫੮. , ੬੬੮. ਮਿਦਾਦੀਹਿ ਤ੍ਤਿਤਿਯੋ.
ਮਿਦ ਪਦ ਰਨ੍ਜ ਤਨੁ ਧਾਇਚ੍ਚੇਵਮਾਦੀਹਿ ਧਾਤੂਹਿ ਤ੍ਤਿ ਤਿ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.
ਮਿਦਤਿ ਸਿਨੇਹਤੀਤਿ ਮੇਤ੍ਤਿ, ਪਦਤਿ ਗਚ੍ਛਤੀਤਿ ਪਤ੍ਤਿ, ਰਨ੍ਜਤਿ ਏਤ੍ਥਾਤਿ ਰਤ੍ਤਿ, ਤਨੋਤਿ ਵਿਤ੍ਥਾਰੇਤੀਤਿ ਤਨ੍ਤਿ, ਅਤ੍ਤਨੋ ਕੁਲਂ ਤਨੋਤਿ ਵਿਤ੍ਥਾਰੇਤੀਤਿ ਵਾ ਤਨ੍ਤਿ, ਪਰੇਸਂ ਇਤ੍ਥੀਨਂ ਪੁਤ੍ਤਂ ਧਾਰੇਤੀਤਿ ਧਾਤਿ, ਖੀਰਂ ਧਾਰੇਤੀਤਿ ਵਾ ਧਾਤਿ, ਅਤ੍ਤਨੋ ਸਭਾਵਂ ਧਾਰੇਤੀਤਿ ਵਾ ਧਾਤਿ ਇਚ੍ਚੇਵਮਾਦਿ.
੬੫੯. , ੬੬੯. ਉਸੁ ਰਨ੍ਜ ਦਂਸਾਨਂ ਦਂਸਸ੍ਸ ਦਡ੍ਢੋਢ ਠਾ ਚ.
ਉਸੁ ਰਨ੍ਜ ਦਂਸਇਚ੍ਚੇਤੇਸਂ ਧਾਤੂਨਂ ਦਂਸਸ੍ਸ ਦਡ੍ਢਾਦੇਸੋ ਹੋਤਿ, ਢ ਠਪਚ੍ਚਯਾ ਚ ਹੋਨ੍ਤਿ.
ਉਸੀਯਤੇ ਉਡ੍ਢੋ, ਰਨ੍ਜਨ੍ਤਿ ਏਤ੍ਥਾਤਿ ਰਟ੍ਠਂ, ਦਂਸੀਯਤੇਤਿ ਦਡ੍ਢੋ.
੬੬੦. , ੬੭੦. ਸੂਵੁਸਾਨਮੂਵੁਸਾਨਮਤੋਥੋਚ.
ਸੂਵੁ ਅਸਇਚ੍ਚੇਤੇਸਂ ਧਾਤੂਨਂ ਊਉਅਸਾਨਂ ਅਤਾਦੇਸੋ ਹੋਤਿ, ਥਪਚ੍ਚਯੋ ਚ.
ਸਵਤਿ ਹਿਂਸਤਿ ਏਤੇਨਾਤਿ ਸਤ੍ਥਂ, ਹਿਰੋਤ੍ਤਪ੍ਪਂ ਸਂਵਰਤਿ ਏਤੇਨਾਤਿਵਤ੍ਥਂ, ਸਦ੍ਦਾਨੁਰੂਪਂ ਅਸਤਿਭਵਤੀਤਿ ਅਤ੍ਥੋ,
੬੬੧. , ੬੭੧. ਰਨ੍ਜੁਦਾਦੀਹਿ ਧ ਦਿਦ੍ਦ ਕਿਰਾ ਕ੍ਵਚਿ ਜਦਲੋਪੋਚ.
ਰਨ੍ਜ ਉਦ ਇਦਿ ਚਦਿ ਮਦਿ ਖੁਦ ਛਿਦਿ ਰੁਦਿ ਦਲ ਸੁਸ ਸੁਚ ਵਚ ਵਜ ਇਚ੍ਚੇਵਮਾਦੀਹਿ ਧਾਤੂਹਿ ਧ ਦ ਇਦ੍ਦ ਕ ਇਰਇਚ੍ਚੇਤੇ ਪਚ੍ਚਯਾ ਹੋਨ੍ਤਿ, ਕ੍ਵਚਿ ਜ ਦ ਲੋਪੋ ਚ, ਪੁਨ ਨਿਪ੍ਪਜ੍ਜਨ੍ਤੇ.
ਰਞ੍ਜਿਤਬ੍ਬਨ੍ਤਿ ਰਨ੍ਧਂ, ਰਨ੍ਜਯਿਤ੍ਥਾਤਿ ਵਾ ਰਨ੍ਧਂ, ਅਤ੍ਤਨਿ ਸਨ੍ਨਿਸ੍ਸਿਤਾਨਂ ਮਚ੍ਛਮਕਰਾਨਂ ਪੀਤਿਸੋਮਨਸ੍ਸਂ ਉਨ੍ਦਤਿ ਪਸਵਤਿ ਜਨੇਤੀਤਿ ਸਮੁਦ੍ਦੋ, ਇਨ੍ਦਤਿ ਪਰਮਿਸ੍ਸਰਿਯਂ ਕਰੋਤੀਤਿ ਇਨ੍ਦੋ, ਇਨ੍ਦਤ੍ਤਂ ਅਧਿਪਤਿਭਾਵਂ ਕਰੋਤੀਤਿ ਵਾ ਇਨ੍ਦੋ, ਚਨ੍ਦਿਤਬ੍ਬੋ ਇਚ੍ਛਿਤਬ੍ਬੋਤਿ ਚਨ੍ਦੋ, ਮਨ੍ਦਤਿ ਹਾਸੇਤੀਤਿ ਮਨ੍ਦੋ, ਮਦਿਤਬ੍ਬੋ ਹਾਸੇਤਬ੍ਬੋਤਿ ਵਾ ਮਨ੍ਦੋ, ਖੁਦਤਿ ਪਿਪਾਸੇਤੀਤਿ ਖੁਦ੍ਦੋ, ਛਿਨ੍ਦਿਤਬ੍ਬੋਤਿ ਛਿਦ੍ਦੋ, ਰੁਦਤਿ ਹਿਂਸਤੀਤਿ ਰੁਦ੍ਦੋ, ਦਲਤਿ ਦੁਗ੍ਗਤਭਾਵਂ ਗਚ੍ਛਤੀਤਿ ਦਲਿਦ੍ਦੋ, ਸੁਸ੍ਸਤੀਤਿ ਸੁਕ੍ਕਂ, ਸੁਚਤੀਤਿਸੋਕੋ, ਵਚਿਤਬ੍ਬਨ੍ਤਿ ਵਕ੍ਕਂ, ਅਪ੍ਪਟਿਹਤੋ ਹੁਤ੍ਵਾ ਵਜਤਿ ਗਚ੍ਛਤੀਤਿ ਵਜਿਰਂ ਇਚ੍ਚੇਵਮਾਦਿ.
੬੬੨. , ੬੭੨. ਪਟਿਤੋ ਹਿਸ੍ਸ ਹੇਰਣ ਹੀਰਣ.
ਪਟਿਇਚ੍ਚੇਤਸ੍ਮਾ ਹਿਸ੍ਸ ਧਾਤੁਸ੍ਸ ਹੇਰਣ ਹੀਰਣ ਆਦੇਸਾ ਹੋਨ੍ਤਿ.
ਪਟਿਪਕ੍ਖੇਮਦ੍ਦਿਤ੍ਵਾਗਚ੍ਛਤਿ ਪਵਤ੍ਤਤੀਤਿ ਪਾਟਿਹੇਰਂ, ਪਾਟਿਹੀਰਂ.
੬੬੩. , ੬੭੩. ਕਡ੍ਯਾਦੀਹਿ ਕੋ.
ਕਡਿ ਘਡਿ ਵਡਿ ਕਰਡਿ ਮਡਿ ਸਡਿ ਕੁਠਿ ਭਡਿ ਪਡਿ ਦਡਿ ਰਡਿ ਤਡਿ ਇਸਿਡਿ ਚਡਿ ਗਡਿ ਅਡਿ ਲਡਿ ਮੇਡਿ ਏਰਡਿ ਖਡਿ ਇਚ੍ਚੇਵਮਾਦੀਹਿ ਧਾਤੂਹਿ ਕਪਚ੍ਚਯੋ ਹੋਤਿ ਸਹ ਪਚ੍ਚਯੇਨ ਚ ਨਿਪ੍ਪਜ੍ਜਨ੍ਤੇ ਯਥਾਸਮ੍ਭਵਂ.
ਕਣ੍ਡਿਤਬ੍ਬੋ ਛਿਨ੍ਦਿਤਬ੍ਬੋਤਿ ਕਣ੍ਡੋ, ਘਣ੍ਡਿਤਬ੍ਬੋ ਘਟੇਤਬ੍ਬੋਤਿ ਘਣ੍ਡੋ, ਵਣ੍ਡਨ੍ਤਿ ਏਤ੍ਥਾਤਿ ਵਣ੍ਡੋ, ਕਰਣ੍ਡਿਤਬ੍ਬੋ ਭਾਜੇਤਬ੍ਬੋਤਿ ਕਰਣ੍ਡੋ, ਮਣ੍ਡੀਯਤੇ ਵਿਭੂਸੀਯਤੇ ਏਤੇਨਾਤਿ ਮਣ੍ਡੋ, ਸਣ੍ਡਨ੍ਤਿ ਗੁਮ੍ਬਨ੍ਤਿ ਏਤ੍ਥਾਤਿ ਸਣ੍ਡੋ, ਅਙ੍ਗਮਙ੍ਗਾਨਿ ਕੁਣ੍ਠਤਿ ਛਿਨ੍ਦਤੀਤਿ ਕੁਟ੍ਠਂ, ਭਣ੍ਡਿਤਬ੍ਬਨ੍ਤਿ ਭਣ੍ਡਂ, ਪਣ੍ਡਤਿ ਲਿਙ੍ਗਵੇਕਲ੍ਲਭਾਵਂ ਗਚ੍ਛਤੀਤਿ ਪਣ੍ਡਕੋ. ਦਣ੍ਡਤਿ ਆਣਂ ਕਰੋਤਿ ਏਤੇਨਾਤਿ ਦਣ੍ਡੋ, ਰਣ੍ਡਤਿ ਹਿਂਸਤੀਤਿ ਰਣ੍ਡੋ, ਵਿਸੇਸੇਨ ਤਣ੍ਡਤਿ ਚਾਲੇਤਿ ਪਰੇਸਂ ਵਿਞ੍ਞੂਨਂ ਹਦਯਂ ਕਮ੍ਪੇਤੀਤਿ ਵਿਤਣ੍ਡੋ, ਇਸਿਣ੍ਡਤਿ ਪਰੇਸਂ ਮਦ੍ਦਤੀਤਿ ਇਸਿਣ੍ਡੋ, ਚਣ੍ਡਤਿ ਚਣ੍ਡਿਕ੍ਕਭਾਵਂ ਕਰੋਤੀਤਿ ਚਣ੍ਡੋ, ਗਣ੍ਡਤਿ ਸਨ੍ਨਿਚਯਤਿ ਸਮੂਹਂ ਕਰੋਤਿ ਏਤ੍ਥਾਤਿ ਗਣ੍ਡੋ, ਅਣ੍ਡੀਯਤਿ ਨਿਬ੍ਬਤ੍ਤੀਯਤੀਤਿ ਅਣ੍ਡੋ, ਲਣ੍ਡਿਤਬ੍ਬੋ ਜਿਗੁਚ੍ਛਿਤਬ੍ਬੋਤਿ ਲਣ੍ਡੋ, ਮੇਣ੍ਡਤਿ ਕੁਟਿਲਭਾਵਂ ਗਚ੍ਛਤੀਤਿ ਮੇਣ੍ਡੋ, ਏਰਣ੍ਡਤਿ ਰੋਗਂ ਹਿਂਸਤੀਤਿ ਏਰਣ੍ਡੋ, ਖਣ੍ਡਿਤਬ੍ਬੋ ਛਿਨ੍ਦਿਤਬ੍ਬੋਤਿ ਖਣ੍ਡੋ ਇਚ੍ਚੇਵਮਾਦਿ.
੬੬੪. , ੬੭੪. ਖਾਦਾਮਗਮਾਨਂ ਖ ਨ੍ਧ’ਨ੍ਧ ਗਨ੍ਧਾ.
ਖਾਦ ਅਮ ਗਮੁਇਚ੍ਚੇਤੇਸਂ ਧਾਤੂਨਂ ਖਨ੍ਧ ਅਨ੍ਧ ਗਨ੍ਧਾਦੇਸਾ ਹੋਨ੍ਤਿ, ਕਪਚ੍ਚਯੋ ਚ ਹੋਤਿ.
ਜਾਤਿਜਰਾਮਰਣਾਦੀਹਿ ਸਂਸਾਰਦੁਕ੍ਖੇਹਿ ਖਾਦਿਤਬ੍ਬੋਤਿ ਖਨ੍ਧੋ, ਅਮਤਿ ਅਙ੍ਗਮਙ੍ਗਸ੍ਸ ਰੁਜ੍ਜਨਭਾਵਂ ਗਚ੍ਛਤੀਤਿ ਅਨ੍ਧੋ, ਚਕ੍ਖੁਨਾ ਅਮਤਿ ਰੁਜ੍ਜਤੀਤਿ ਵਾ ਅਨ੍ਧੋ, ਤਂ ਤਂ ਠਾਨਂ ਵਾਤੇਨ ਗਚ੍ਛਤੀਤਿ ਗਨ੍ਧੋ. ਏਵਂ ਖਨ੍ਧਕੋ, ਅਨ੍ਧਕੋ, ਗਨ੍ਧਕੋ.
੬੬੫. , ੬੭੫. ਪਟਾਦੀਹ੍ਯਲਂ.
ਪਟ ਕਲ ਕੁਸ ਕਦ ਭਗਨ੍ਦ ਮੇਖ ਵਕ੍ਕ ਤਕ੍ਕ ਪਲ੍ਲ ਸਦ੍ਦ ਮੂਲ ਬਿਲ ਵਿਦ ਚਡਂ ਪਞ੍ਚ ਵਾ ਵਸ ਪਚਿ ਮਚ ਮੁਸ ਗੋਤ੍ਥੁ ਪੁਥੁ ਬਹੁ ਮਙ੍ਗ ਬਹ ਕਮ੍ਬ ਸਮ੍ਬ ਅਗ੍ਗਇਚ੍ਚੇਵਮਾਦੀਹਿ ਧਾਤੂਹਿ ਪਾਟਿ ਪਦਿਕੇਹਿ ਚ ਉਤ੍ਤਰਪਦੇਸੁ ਅਲਪਚ੍ਚਯੋ ਹੋਤਿ, ਪਚ੍ਛਾ ਪੁਨ ਨਿਪ੍ਪਜ੍ਜਨ੍ਤੇ.
ਪਟੇ ਅਲਨ੍ਤਿ ਪਟਲਂ, ਕਲੇ ਅਲਨ੍ਤਿ ਕਲਲਂ, ਪਾਪਕੇ ਅਕੁਸਲੇ ਧਮ੍ਮੇ ਕੁਸਤਿ ਛਿਨ੍ਦਤੀਤਿ ਕੁਸਲਂ, ਕੁਸਭੂਤੇ ਯਥਾਸਭਾਵਧਮ੍ਮੇ ਅਲਨ੍ਤਿ ਵਾ ਕੁਸਲਂ, ਕੁਸੇ ਉਦ੍ਦਿਸ੍ਸ ਦਾਨੇ ਅਲਨ੍ਤਿ ਵਾ ਕੁਸਲਂ, ਕੁਸੇ ਸਞ੍ਚਯੇ ਧਮ੍ਮਸਮੁਦਾਯੇ ਅਲਨ੍ਤਿ ਵਾ ਕੁਸਲਂ, ਕਦ੍ਦੇ ਮਦ੍ਦੇ ਅਲਨ੍ਤਿ ਕਦਲਂ, ਭਗਨ੍ਦੇ ਸੇਚਨੇ ਅਲਨ੍ਤਿ ਭਗਨ੍ਦਲਂ, ਭਗਨ੍ਦੇ ਮੁਤ੍ਤਕਰੀਸਹਰਣੇ ਅਲਨ੍ਤਿ ਵਾ ਭਗਨ੍ਦਲਂ, ਮੇਖੇ ਕਟਿਵਿਚਿਤ੍ਤੇ ਅਲਨ੍ਤਿ ਮੇਖਲਂ, ਵਕ੍ਕੇ ਰੁਕ੍ਖਤਚੇ ਅਲਨ੍ਤਿ ਵਕ੍ਕਲਂ, ਤਕ੍ਕੇ ਰੁਕ੍ਖਸਿਲੇਸੇ ਅਲਨ੍ਤਿ ਤਕ੍ਕਲਂ, ਪਲ੍ਲੇ ਨਿਨ੍ਨਟ੍ਠਾਨੇ ਅਲਨ੍ਤਿ ਪਲ੍ਲਲਂ, ਸਦ੍ਦੇ ਹਰਿਤੇ ਅਲਨ੍ਤਿ ਸਦ੍ਦਲਂ, ਮੂਲੇ ਪਤਿਟ੍ਠਾਨੇ ਅਲਨ੍ਤਿ ਮੁਲਾਲਂ, ਬਿਲ਼ੇ ਨਿਸ੍ਸਯੇ ਅਲਨ੍ਤਿ ਬਿਲਾਲਂ, ਵਿਦੇ ਵਿਜ੍ਜਮਾਨੇ ਅਲਨ੍ਤਿ ਵਿਦਲਂ, ਚਣ੍ਡੇ ਅਲਨ੍ਤਿ ਚਣ੍ਡਾਲੋ, ਪਞ੍ਚਨ੍ਨਂ ਰਾਜੂਨਂ ਅਲਨ੍ਤਿ ਪਞ੍ਚਾਲੋ, ਵਾ ਗਤਿਗਨ੍ਧਨੇਸੁ ਅਲਨ੍ਤਿ ਵਾਲਂ, ਵਾ ਪਦਗਮਨੇ ਅਲਨ੍ਤਿ ਵਾ ਵਾਲ਼ੋ, ਵਸੇ ਅਚ੍ਛਾਦਨੇ ਅਲਨ੍ਤਿ ਵਸਲੋ, ਪਚੇ ਵਿਤ੍ਥਾਰੇ ਅਲਨ੍ਤਿ ਪਚਲੋ, ਮਚੇ ਚੋਰਕਮ੍ਮੇ ਅਲਨ੍ਤਿ ਮਚਲੋ, ਮੁਸੇ ਥੇਯ੍ਯੇ, ਮੁਸੇ ਪਾਣਚਾਗੇ ਵਾ ਅਲਨ੍ਤਿ ਮੁਸਲੋ, ਗੋਤ੍ਤੇ ਵਂਸੇ ਸਿਙ੍ਗਾਲਜਾਤਿਯਂ ਅਲਨ੍ਤਿ ਗੋਤ੍ਥੁਲੋ, ਪੁਥੁਮ੍ਹਿ ਵਿਤ੍ਥਾਰੇ ਅਲਨ੍ਤਿ ਪੁਥੁਲੋ, ਬਹੁਮ੍ਹਿ ਸਙ੍ਖ੍ਯਾਨੇ ਅਲਨ੍ਤਿ ਬਹੁਲੋ, ਬਹੁਮ੍ਹਿ ਵੁਦ੍ਧਿਮ੍ਹਿ ਅਲਨ੍ਤਿ ਵਾ ਬਹੁਲੋ, ਮਙ੍ਗਮ੍ਹਿ ਗਮਨੇ ਅਲਨ੍ਤਿ ਮਙ੍ਗਲਂ, ਬਹੁਮ੍ਹਿ ਵੁਦ੍ਧਿਮ੍ਹਿ ਅਲਨ੍ਤਿ ਬਹਲਂ, ਕਮ੍ਬਮ੍ਹਿ ਸਞ੍ਚਲਨੇ ਅਲਨ੍ਤਿ ਕਮ੍ਬਲਂ. ਸਮ੍ਬਮ੍ਹਿ ਮਣ੍ਡਲੇ ਅਲਨ੍ਤਿ ਸਮ੍ਬਲਂ, ਅਗ੍ਗੇ ਗਤਿਕੋਟਿਲ੍ਲੇ ਅਲਨ੍ਤਿ ਅਗ੍ਗਲ਼ਂ. ਇਚ੍ਚੇਵਮਾਦਯੋ ਅਞ੍ਞੇਪਿ ਸਦ੍ਦਾ ਭਵਨ੍ਤਿ.
੬੬੬. , ੬੭੬. ਪੁਥਸ੍ਸ ਪੁਥੁ ਪਥਾ ਮੋ ਵਾ.
ਪੁਥਇਚ੍ਚੇਤਸ੍ਸ ਪਾਟਿਪਦਿਕਸ੍ਸ ਪੁਥੁ ਪਥਾਦੇਸਾ ਹੋਨ੍ਤਿ, ਕ੍ਵਚਿ ਅਮਪਚ੍ਚਯੋ ਹੋਤਿ.
ਪੁਥ ਹੁਤ੍ਵਾ ਜਾਤਨ੍ਤਿ ਪੁਥਵੀ ਪਥਮੇ ਜਾਤੋ ਪਥਮੋ, ਪਥਵੀ, ਪਠਮੋ ਵਾ, ਪੁਥੁ ਕਿਲੇਸੇ ਜਨੇਤੀਤਿ ਪੁਥੁਜ੍ਜਨੋ, ਪੁਥੁ ਹੁਤ੍ਵਾ ਜਾਤਨ੍ਤਿ ਪਥਵੀ, ਪਥਵੀ ਵਾ.
੬੬੭. , ੬੭੭. ਸਸ੍ਵਾਦੀਹਿ ਤੁ ਦਵੋ.
ਸਸੁ ਦਦ ਅਦ ਮਦਇਚ੍ਚੇਵਮਾਦੀਹਿ ਧਾਤੂਹਿ ਤੁ ਦੁਇਚ੍ਚੇਤੇ ਪਚ੍ਚਯਾ ਹੋਨ੍ਤਿ.
ਅਞ੍ਞੇ ਸਤ੍ਤੇ ਸਸਤਿ ਹਿਂਸਤੀਤਿ ਸਤ੍ਤੁ, ਦੁਕ੍ਖਂ ਦਦਾਤੀਤਿ ਦਦ੍ਦੁ, ਦੁਕ੍ਖੇਨ ਅਦਤਿ ਭਕ੍ਖਤਿ ਏਤ੍ਥਾਤਿ ਅਦ੍ਦੁ, ਦੁਕ੍ਖਂ ਅਦਤਿ ਅਨੁਭਵਤਿ ਜਨੋ ਏਤੇਨਾਤਿ ਵਾ ਅਦ੍ਦੁ, ਦੁਕ੍ਖਂ ਭਾਜਨਂ ਆਧਾਰਂ ਭਾਵਤੀਤਿ ਵਾ ਅਦ੍ਦੁ, ਮਦਤਿ ਉਮ੍ਮਤ੍ਤਂ ਕਰੋਤੀਤਿ ਮਦ੍ਦੁ, ਮਦਤਿ ਮਦ੍ਦਭਾਵਂ ਕਰੋਤੀਤਿ ਵਾ ਮਦ੍ਦੁ.
੬੬੮. , ੬੭੮. ਝਾਦੀਹਿ ਈਵਰੋ.
ਚਿ ਪਾ ਧਾਇਚ੍ਚੇਵਮਾਦੀਹਿ ਧਾਤੂਹਿ ਈਵਰਪਚ੍ਚਯੋਹੋਤਿ.
ਚੀਯਤੀਤਿ ਚੀਵਰਂ, ਪਿਵਤੀਤਿ ਪੀਵਰੋ, ਪਾਤਬ੍ਬਂ ਰਕ੍ਖਿਤਬ੍ਬਨ੍ਤਿ ਵਾ ਪੀਵਰਂ. ਧਾਰੇਤਿ ਧਾਰੇਤ੍ਵਾ ਜੀਵਿਤਂ ਕਪ੍ਪੇਤੀਤਿ ਧੀਵਰੋ, ਧੀਵਰਂ.
੬੬੯. , ੬੭੯. ਮੁਨਾਦੀਹਿ ਚਿ.
ਮੁਨ ਯਤ ਅਗ੍ਗ ਪਤ ਕਵ ਸੁਚ ਰੁਚ ਮਹਾਲ ਭਦ੍ਦਾਲ ਮਨਇਇਚ੍ਚੇਵਮਾਦੀਹਿ ਧਾਤੂਹਿ, ਪਾਟਿਪਦਿਕੇਹਿ ਚ ਇਪਚ੍ਚਯੋ ਹੋਤਿ.