੬. ਆਖ੍ਯਾਤਕਪ੍ਪ

ਪਠਮਕਣ੍ਡ

(ਕ)

ਆਖ੍ਯਾਤਸਾਗਰਮਥਜ੍ਜਤਨੀਤਰਙ੍ਗਂ,

ਧਾਤੁਜ੍ਜਲਂ ਵਿਕਰਣਾਗਮਕਾਲਮੀਨਂ;

ਲੋਪਾਨੁਬਨ੍ਧਰਿਯਮਤ੍ਥਵਿਭਾਗਤੀਰਂ,

ਧੀਰਾ ਤਰਨ੍ਤਿ ਕਵਿਨੋ ਪੁਥੁਬੁਦ੍ਧਿਨਾਵਾ.

(ਖ)

ਵਿਚਿਤ੍ਤਸਙ੍ਖਾਰਪਰਿਕ੍ਖਿਤਂ ਇਮਂ,

ਆਖ੍ਯਾਤਸਦ੍ਦਂ ਵਿਪੁਲਂ ਅਸੇਸਤੋ;

ਪਣਮ੍ਯ ਸਮ੍ਬੁਦ੍ਧਮਨਨ੍ਤਗੋਚਰਂ,

ਸੁਗੋਚਰਂ ਯਂ ਵਦਤੋ ਸੁਣਾਥ ਮੇ.

(ਗ)

ਅਧਿਕਾਰੇ ਮਙ੍ਗਲੇ ਚੇਵ, ਨਿਪ੍ਫਨ੍ਨੇ ਚਾਵਧਾਰਣੇ;

ਅਨਨ੍ਤਰੇ ਚ ਪਾਦਾਨੇ, ਅਥਸਦ੍ਦੋ ਪਵਤ੍ਤਤਿ.

੪੧੬. , ੪੨੯. ਅਥ ਪੁਬ੍ਬਾਨਿ ਵਿਭਤ੍ਤੀਨਂ ਛ ਪਰਸ੍ਸਪਦਾਨਿ.

ਅਥ ਸਬ੍ਬਾਸਂ ਵਿਭਤ੍ਤੀਨਂ ਯਾਨਿ ਯਾਨਿ ਪੁਬ੍ਬਕਾਨਿ ਛ ਪਦਾਨਿ, ਤਾਨਿ ਤਾਨਿ ਪਰਸ੍ਸਪਦਸਞ੍ਞਾਨਿ ਹੋਨ੍ਤਿ.

ਤਂ ਯਥਾ? ਤਿ ਅਨ੍ਤਿ, ਸਿ ਥ, ਮਿ ਮ.

ਪਰਸ੍ਸਪਦਮਿਚ੍ਚਨੇਨ ਕ੍ਵਤ੍ਥੋ? ਕਤ੍ਤਰਿ ਪਰਸ੍ਸਪਦਂ.

੪੦੭. , ੪੩੯. ਪਰਾਣ੍ਯਤ੍ਤਨੋਪਦਾਨਿ.

ਸਬ੍ਬਾਸਂ ਵਿਭਤ੍ਤੀਨਂ ਯਾਨਿ ਯਾਨਿ ਪਰਾਨਿ ਛ ਪਦਾਨਿ. ਤਾਨਿ ਤਾਨਿ ਅਤ੍ਤਨੋਪਦਸਞ੍ਞਾਨਿ ਹੋਨ੍ਤਿ.

ਤਂ ਯਥਾ? ਤੇ ਅਨ੍ਤੇ, ਸੇ ਵ੍ਹੇ, ਏ ਮ੍ਹੇ.

ਅਤ੍ਤਨੋਪਦਮਿਚ੍ਚਨੇਨ ਕ੍ਵਤ੍ਥੋ? ਅਤ੍ਤਨੋਪਦਾਨਿ ਭਾਵੇ ਚ ਕਮ੍ਮਨਿ.

੪੦੮. , ੪੩੧. ਦ੍ਵੇ ਦ੍ਵੇ ਪਠਮ ਮਜ੍ਝਿਮੁਤ੍ਤਮਪੁਰਿਸਾ.

ਤਾਸਂ ਸਬ੍ਬਾਸਂ ਵਿਭਤ੍ਤੀਨਂ ਪਰਸ੍ਸਪਦਾਨਂ, ਅਤ੍ਤਨੋਪਦਾਨਞ੍ਚ ਦ੍ਵੇ ਦ੍ਵੇ ਪਦਾਨਿ ਪਠਮਮਜ੍ਝਿਮੁਤ੍ਤਮਪੁਰਿਸਸਞ੍ਞਾਨਿ ਹੋਨ੍ਤਿ.

ਤਂ ਯਥਾ? ਤਿ ਅਨ੍ਤਿ ਇਤਿ ਪਠਮਪੁਰਿਸਾ, ਸਿ ਥ ਇਤਿ ਮਜ੍ਝਿਮਪੁਰਿਸਾ, ਮਿ ਮ ਇਤਿ ਉਤ੍ਤਮਪੁਰਿਸਾ. ਅਤ੍ਤਨੋਪਦਾਨਮ੍ਪਿ ਤੇ ਅਨ੍ਤੇ ਇਤਿ ਪਠਮਪੁਰਿਸਾ, ਸੇ ਵ੍ਹੇ ਇਤਿ ਮਜ੍ਝਿਮਪੁਰਿਸਾ, ਏ ਮ੍ਹੇ ਇਤਿ ਉਤ੍ਤਮਪੁਰਿਸਾ. ਏਵਂ ਸਬ੍ਬਤ੍ਥ.

ਪਠਮਮਜ੍ਝਿਮੁਤ੍ਤਮਪੁਰਿਸਮਿਚ੍ਚਨੇਨ ਕ੍ਵਤ੍ਥੋ? ਨਾਮਮ੍ਹਿ ਪਯੁਜ੍ਜਮਾਨੇਪਿ ਤੁਲ੍ਯਾਧਿਕਰਣੇ ਪਠਮੋ, ਤੁਮ੍ਹੇ ਮਜ੍ਝਿਮੋ, ਅਮ੍ਹੇ ਉਤ੍ਤਮੋ.

੪੦੯. , ੪੪੧. ਸਬ੍ਬੇਸਮੇਕਾਭਿਧਾਨੇ ਪਰੋ ਪੁਰਿਸੋ.

ਸਬ੍ਬੇਸਂ ਤਿਣ੍ਣਂ ਪਠਮਮਜ੍ਝਿਮੁਤ੍ਤਮ ਪੁਰਿਸਾਨਂ ਏਕਾਭਿਧਾਨੇ ਪਰੋ ਪੁਰਿਸੋ ਗਹੇਤਬ੍ਬੋ.

ਸੋ ਚ ਪਠਤਿ, ਤ੍ਵਞ੍ਚ ਪਠਸਿ, ਤੁਮ੍ਹੇ ਪਠਥ. ਸੋ ਚ ਪਚਤਿ, ਤ੍ਵਞ੍ਚ ਪਚਸਿ. ਤੁਮ੍ਹੇ ਪਚਥ. ਏਵਂ ਸੇਸਾਸੁ ਵਿਭਤ੍ਤੀਸੁ ਪਰੋ ਪੁਰਿਸੋ ਯੋਜੇਤਬ੍ਬੋ.

੪੧੦. , ੪੩੨. ਨਾਮਮ੍ਹਿ ਪਯੁਜ੍ਜਮਾਨੇਪਿ ਤੁਲ੍ਯਾਧਿਕਰਣੇ ਪਠਮੋ.

ਨਾਮਮ੍ਹਿ ਪਯੁਜ੍ਜਮਾਨੇਪਿ ਅਪ੍ਪਯੁਜ੍ਜਮਾਨੇਪਿ ਤੁਲ੍ਯਾਧਿਕਰਣੇ ਪਠਮਪੁਰਿਸੋ ਹੋਤਿ.

ਸੋ ਗਚ੍ਛਤਿ, ਤੇ ਗਚ੍ਛਨ੍ਤਿ.

ਅਪ੍ਪਯੁਜ੍ਜਮਾਨੇਪਿ – ਗਚ੍ਛਤਿ, ਗਚ੍ਛਨ੍ਤਿ.

ਤੁਲ੍ਯਾਧਿਕਰਣੇਤਿ ਕਿਮਤ੍ਥਂ? ਤੇਨ ਹਞ੍ਞਸੇ ਤ੍ਵਂ ਦੇਵਦਤ੍ਤੇਨ.

੪੧੧. , ੪੩੬. ਤੁਮ੍ਹੇ ਮਜ੍ਝਿਮੋ.

ਤੁਮ੍ਹੇ ਪਯੁਜ੍ਜਮਾਨੇਪਿ ਅਪ੍ਪਯੁਜ੍ਜਮਾਨੇਪਿ ਤੁਲ੍ਯਾਧਿਕਰਣੇ ਮਜ੍ਝਿਮਪੁਰਿਸੋ ਹੋਤਿ.

ਤ੍ਵਂ ਯਾਸਿ, ਤੁਮ੍ਹੇ ਯਾਥ.

ਅਪ੍ਪਯੁਜ੍ਜਮਾਨੇਪਿ – ਯਾਸਿ, ਯਾਥ.

ਤੁਲ੍ਯਾਧਿਕਰਣੇਤਿ ਕਿਮਤ੍ਥਂ? ਤਯਾ ਪਚ੍ਚਤੇ ਓਦਨੋ.

੪੧੨. , ੪੩੭. ਅਮ੍ਹੇ ਉਤ੍ਤਮੋ.

ਅਮ੍ਹੇ ਪਯੁਜ੍ਜਮਾਨੇਪਿ ਅਪ੍ਪਯੁਜ੍ਜਮਾਨੇਪਿ ਤੁਲ੍ਯਾਧਿਕਰਣੇ ਉਤ੍ਤਮਪੁਰਿਸੋ ਹੋਤਿ.

ਅਹਂ ਯਜਾਮਿ, ਮਯਂ ਯਜਾਮ.

ਅਪ੍ਪਯੁਜ੍ਜਮਾਨੇਪਿ – ਯਜਾਮਿ, ਯਜਾਮ.

ਤੁਲ੍ਯਾਧਿਕਰਣੇਤਿ ਕਿਮਤ੍ਥਂ? ਮਯਾ ਇਜ੍ਜਤੇ ਬੁਦ੍ਧੋ.

੪੧੩. , ੪੨੭. ਕਾਲੇ.

‘‘ਕਾਲੇ’’ ਇਚ੍ਚੇਤਂ ਅਧਿਕਾਰਤ੍ਥਂ ਵੇਦਿਤਬ੍ਬਂ.

੪੧੪. , ੪੨੮. ਵਤ੍ਤਮਾਨਾ ਪਚ੍ਚੁਪ੍ਪਨ੍ਨੇ.

ਪਚ੍ਚੁਪ੍ਪਨ੍ਨੇ ਕਾਲੇ ਵਤ੍ਤਮਾਨਾਵਿਭਤ੍ਤਿ ਹੋਤਿ.

ਪਾਟਲਿਪੁਤ੍ਤਂ ਗਚ੍ਛਤਿ, ਸਾਵਤ੍ਥਿਂ ਪਵਿਸਤਿ.

੪੧੫. , ੪੫੧. ਆਣਤ੍ਯਾ ਸਿਟ੍ਠੇ’ਨੁਤ੍ਤਕਾਲੇ ਪਞ੍ਚਮੀ.

ਆਣਤ੍ਯਤ੍ਥੇ ਚ ਆਸੀਸਤ੍ਥੇ ਚ ਅਨੁਤ੍ਤਕਾਲੇ ਪਞ੍ਚਮੀ ਵਿਭਤ੍ਤਿ ਹੋਤਿ.

ਕਰੋਤੁ ਕੁਸਲਂ, ਸੁਖਂ ਤੇ ਹੋਤੁ.

੪੧੬. , ੪੫੪. ਅਨੁਮਤਿਪਰਿਕਪ੍ਪਤ੍ਥੇਸੁ ਸਤ੍ਤਮੀ.

ਅਨੁਮਤ੍ਯਤ੍ਥੇ ਚ ਪਰਿਕਪ੍ਪਤ੍ਥੇ ਚ ਅਨੁਤ੍ਤਕਾਲੇ ਸਤ੍ਤਮੀ ਵਿਭਤ੍ਤਿ ਹੋਤਿ.

ਤ੍ਵਂ ਗਚ੍ਛੇਯ੍ਯਾਸਿ, ਕਿਮਹਂ ਕਰੇਯ੍ਯਾਮਿ.

੪੧੭. , ੪੬੦. ਅਪਚ੍ਚਕ੍ਖੇ ਪਰੋਕ੍ਖਾਤੀਤੇ.

ਅਪਚ੍ਚਕ੍ਖੇ ਅਤੀਤੇ ਕਾਲੇ ਪਰੋਕ੍ਖਾਵਿਭਤ੍ਤਿ ਹੋਤਿ.

ਸੁਪਿਨੇ ਕਿਲਮਾਹ, ਏਵਂ ਕਿਲ ਪੋਰਾਣਾਹੁ.

੪੧੮. , ੪੫੬. ਹਿਯ੍ਯੋਪਭੁਤਿ ਪਚ੍ਚਕ੍ਖੇ ਹਿਯ੍ਯਤ੍ਤਨੀ.

ਹਿਯ੍ਯੋਪਭੁਤਿ ਅਤੀਤੇ ਕਾਲੇ ਪਚ੍ਚਕ੍ਖੇ ਵਾ ਅਪਚ੍ਚਕ੍ਖੇ ਵਾ ਹਿਯ੍ਯਤ੍ਤਨੀ ਵਿਭਤ੍ਤਿ ਹੋਤਿ.

ਸੋ ਅਗਮਾ ਮਗ੍ਗਂ, ਤੇ ਅਗਮੂ ਮਗ੍ਗਂ.

੪੧੯. , ੪੬੯. ਸਮੀਪੇ’ਜ੍ਜਤਨੀ.

ਅਜ੍ਜਪ੍ਪਭੁਤਿ ਅਤੀਤੇ ਕਾਲੇ ਪਚ੍ਚਕ੍ਖੇ ਵਾ ਅਪਚ੍ਚਕ੍ਖੇ ਵਾ ਸਮੀਪੇ ਅਜ੍ਜਤਨੀਵਿਭਤ੍ਤਿ ਹੋਤਿ.

ਸੋ ਮਗ੍ਗਂ ਅਗਮੀ, ਤੇ ਮਗ੍ਗਂ ਅਗਮੁਂ.

੪੨੦. , ੪੭੧. ਮਾਯੋਗੇ ਸਬ੍ਬਕਾਲੇ ਚ.

ਹਿਯ੍ਯਤ੍ਤਨੀਅਜ੍ਜਤਨੀਇਚ੍ਚੇਤਾ ਵਿਭਤ੍ਤਿਯੋ ਯਦਾ ਮਾਯੋਗਾ, ਤਦਾ ਸਬ੍ਬਕਾਲੇ ਚ ਹੋਨ੍ਤਿ.

ਮਾ ਗਮਾ, ਮਾ ਵਚਾ, ਮਾ ਗਮੀ, ਮਾ ਵਚੀ.

ਚਗ੍ਗਹਣੇਨ ਪਞ੍ਚਮੀਵਿਭਤ੍ਤਿਪਿ ਹੋਤਿ. ਮਾ ਗਚ੍ਛਾਹਿ.

੪੨੧. , ੪੭੩. ਅਨਾਗਤੇ ਭਵਿਸ੍ਸਨ੍ਤੀ.

ਅਨਾਗਤੇ ਕਾਲੇ ਭਵਿਸ੍ਸਨ੍ਤੀ ਵਿਭਤ੍ਤਿ ਹੋਤਿ.

ਸੋ ਗਚ੍ਛਿਸ੍ਸਤਿ, ਕਰਿਸ੍ਸਤਿ. ਤੇ ਗਚ੍ਛਿਸ੍ਸਨ੍ਤਿ, ਕਰਿਸ੍ਸਨ੍ਤਿ.

੪੨੨. , ੪੭੫. ਕ੍ਰਿਯਾਤਿਪਨ੍ਨੇ’ਤੀਤੇ ਕਾਲਾਤਿਪਤ੍ਤਿ.

ਕ੍ਰਿਯਾਤਿਪਨ੍ਨਮਤ੍ਤੇ ਅਤੀਤੇ ਕਾਲੇ ਕਾਲਾਤਿਪਤ੍ਤਿ ਵਿਭਤ੍ਤਿ ਹੋਤਿ.

ਸੋ ਚੇ ਤਂ ਯਾਨਂ ਅਲਭਿਸ੍ਸਾ, ਅਗਚ੍ਛਿਸ੍ਸਾ. ਤੇ ਚੇ ਤਂ ਯਾਨਂ ਅਲਭਿਸ੍ਸਂਸੁ, ਅਗਚ੍ਛਿਸ੍ਸਂਸੁ.

੪੨੩. , ੪੨੬. ਵਤ੍ਤਮਾਨਾ ਤਿ ਅਨ੍ਤਿ, ਸਿ ਥ, ਮਿ ਮ, ਤੇ ਅਨ੍ਤੇ, ਸੇ ਵ੍ਹੇ, ਏ ਮ੍ਹੇ.

ਵਤ੍ਤਮਾਨਾ ਇਚ੍ਚੇਸਾ ਸਞ੍ਞਾ ਹੋਤਿ ਤਿ ਅਨ੍ਤਿ, ਸਿ ਥ, ਮਿ ਮ, ਤੇ ਅਨ੍ਤੇ, ਸੇ ਵ੍ਹੇ, ਏ ਮ੍ਹੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਵਤ੍ਤਮਾਨਾ ਇਚ੍ਚਨੇਨ ਕ੍ਵਤ੍ਥੋ? ਵਤ੍ਤਮਾਨਾ ਪਚ੍ਚੁਪ੍ਪਨ੍ਨੇ.

੪੨੪. , ੪੫੦. ਪਞ੍ਚਮੀ ਤੁ ਅਨ੍ਤੁ, ਹਿਥ, ਮਿਮ, ਤਂ ਅਨ੍ਤਂ, ਸ੍ਸੁ ਵ੍ਹੋ, ਏ ਆਮਸੇ.

ਪਞ੍ਚਮੀਇਚ੍ਚੇਸਾ ਸਞ੍ਞਾ ਹੋਤਿ ਤੁ ਅਨ੍ਤੁ, ਹਿ ਥ, ਮਿਮ, ਤਂ ਅਨ੍ਤਂ, ਸ੍ਸੁ ਵ੍ਹੋ, ਏ ਆਮਸੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਪਞ੍ਚਮੀਇਚ੍ਚਨੇਨ ਕ੍ਵਤ੍ਥੋ? ਆਣਤ੍ਯਾਸਿਟ੍ਠੇ, ਨੁਤ੍ਤਕਾਲੇ ਪਞ੍ਚਮੀ.

੪੨੫. , ੪੫੩. ਸਤ੍ਤਮੀ ਏਯ੍ਯ ਏਯ੍ਯੁਂ, ਏਯ੍ਯਾ ਸਿ ਏਯ੍ਯਾ ਥ, ਏਯ੍ਯਾਮਿ ਏਯ੍ਯਾਮ, ਏਥ ਏਰਂ, ਏਥੋ ਏਯ੍ਯਾਵ੍ਹੋ, ਏਯ੍ਯਂ ਏਯ੍ਯਾਮ੍ਹੇ.

ਸਤ੍ਤਮੀ ਇਚ੍ਚੇਸਾ ਸਞ੍ਞਾ ਹੋਤਿ ਏਯ੍ਯ ਏਯ੍ਯੁਂ, ਏਯ੍ਯਾਸਿ ਏਯ੍ਯਾਥ, ਏਯ੍ਯਾਮਿ ਏਯ੍ਯਾਮ, ਏਥ ਏਰਂ, ਏਥੋ, ਏਯ੍ਯਾਵ੍ਹੋ, ਏਯ੍ਯਂ ਏਯ੍ਯਾਮ੍ਹੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਸਤ੍ਤਮੀ ਇਚ੍ਚਨੇਨ ਕ੍ਵਤ੍ਥੋ? ਅਨੁਮਤਿਪਰਿਕਪ੍ਪਤ੍ਥੇਸੁ ਸਤ੍ਤਮੀ.

੪੨੬. , ੪੫੯. ਪਰੋਕ੍ਖਾ ਅਉ ਏਤ੍ਥ, ਅਂਮ੍ਹ, ਤ੍ਥਰੇ, ਤ੍ਥੋ ਵ੍ਹੋ, ਇਂ ਮ੍ਹੇ.

ਪਰੋਕ੍ਖਾ ਇਚ੍ਚੇਸਾ ਸਞ੍ਞਾ ਹੋਤਿ ਅ ਉ, ਏਤ੍ਥ, ਅਂ ਮ੍ਹ, ਤ੍ਥ ਰੇ ਤ੍ਥੋ ਵ੍ਹੋ, ਇਂ ਮ੍ਹੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਪਰੋਕ੍ਖਾ ਇਚ੍ਚਨੇਨ ਕ੍ਵਤ੍ਥੋ? ਅਪਚ੍ਚਕ੍ਖੇ ਪਰੋਕ੍ਖਾਤੀਤੇ.

੪੨੭. , ੪੫੫. ਹਿਯ੍ਯਤ੍ਤਨੀ ਆਊ, ਓਤ੍ਥ, ਅਂਮ੍ਹਾ, ਤ੍ਥਤ੍ਥੁਂ, ਸੇ ਵ੍ਹਂ, ਇਂ ਮ੍ਹਸੇ.

ਹਿਯ੍ਯਤ੍ਤਨੀ ਇਚ੍ਚੇਸਾ ਸਞ੍ਞਾ ਹੋਤਿ ਆ ਊ, ਓ ਤ੍ਥ, ਅਂ ਮ੍ਹਾ, ਤ੍ਥ ਤ੍ਥੁਂ, ਸੇ ਵ੍ਹਂ, ਇਂ ਮ੍ਹਸੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਹਿਯ੍ਯਤ੍ਤਨੀ ਇਚ੍ਚਨੇਨ ਕ੍ਵਤ੍ਥੋ? ਹਿਯ੍ਯੋਪਭੁਤਿ ਪਚ੍ਚਕ੍ਖੇ ਹਿਯ੍ਯਤ੍ਤਨੀ.

੪੨੮. , ੪੬੮. ਅਜ੍ਜਤਨੀ ਈ ਉਂ, ਓ ਤ੍ਥ, ਇਂ ਮ੍ਹਾ, ਆ ਊ, ਸੇ ਵ੍ਹਂ, ਅਂ ਮ੍ਹੇ.

ਅਜ੍ਜਤਨੀ ਇਚ੍ਚੇਸਾ ਸਞ੍ਞਾ ਹੋਤਿ ਈ ਉਂ, ਓ ਤ੍ਥ, ਇਂਮ੍ਹਾ, ਆ ਊ, ਸੇਵ੍ਹਂ, ਅਂ ਮ੍ਹੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਅਜ੍ਜਤਨੀ ਇਚ੍ਚਨੇਨ ਕ੍ਵਤ੍ਥੋ? ਸਮੀਪੇਜ੍ਜਤਨੀ.

੪੨੯. , ੪੭੨. ਭਵਿਸ੍ਸਨ੍ਤੀ ਸ੍ਸਤਿ ਸ੍ਸਨ੍ਤਿ, ਸ੍ਸਸਿ ਸ੍ਸਥ, ਸ੍ਸਾਮਿ ਸ੍ਸਾਮ, ਸ੍ਸਤੇ ਸ੍ਸਨ੍ਤੇ, ਸ੍ਸਸੇ ਸ੍ਸਵ੍ਹੇ, ਸ੍ਸਂ ਸ੍ਸਾਮ੍ਹੇ.

ਭਵਿਸ੍ਸਨ੍ਤੀ ਇਚ੍ਚੇਸਾ ਸਞ੍ਞਾ ਹੋਤਿ ਸ੍ਸਤਿ ਸ੍ਸਨ੍ਤਿ, ਸ੍ਸਸਿ ਸ੍ਸਥ, ਸ੍ਸਾਮਿ ਸ੍ਸਾਮ, ਸ੍ਸਤੇ ਸ੍ਸਨ੍ਤੇ, ਸ੍ਸਸੇ ਸ੍ਸਵ੍ਹੇ, ਸ੍ਸਂ ਸ੍ਸਾਮ੍ਹੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਭਵਿਸ੍ਸਨ੍ਤੀ ਇਚ੍ਚਨੇਨ ਕ੍ਵਤ੍ਥੋ? ਅਨਾਗਤੇ ਭਵਿਸ੍ਸਨ੍ਤੀ.

੪੩੦. , ੩੭੩. ਕਾਲਾਤਿਪਤ੍ਤਿ ਸ੍ਸਾ ਸ੍ਸਂਸੁ, ਸ੍ਸੇ ਸ੍ਸਥ, ਸ੍ਸਂ ਸ੍ਸਾਮ੍ਹਾ, ਸ੍ਸਥ ਸਿਸ੍ਸੁ, ਸ੍ਸਸੇ ਸ੍ਸਵ੍ਹੇ, ਸ੍ਸਿਂ ਸ੍ਸਾਮ੍ਹਸੇ.

ਕਾਲਾਤਿਪਤ੍ਤਿ ਇਚ੍ਚੇਸਾ ਸਞ੍ਞਾ ਹੋਤਿ ਸ੍ਸਾ ਸ੍ਸਂਸੁ, ਸ੍ਸੇ ਸ੍ਸਥ, ਸ੍ਸਂ ਸ੍ਸਾਮ੍ਹਾ, ਸ੍ਸਥ ਸ੍ਸਿਸੁ, ਸ੍ਸਸੇ ਸ੍ਸਵ੍ਹੇ, ਸ੍ਸਿਂ ਸ੍ਸਾਮ੍ਹਸੇ ਇਚ੍ਚੇਤੇਸਂ ਦ੍ਵਾਦਸਨ੍ਨਂ ਪਦਾਨਂ.

ਕਾਲਾਤਿਪਤ੍ਤਿ ਇਚ੍ਚਨੇਨ ਕ੍ਵਤ੍ਥੋ? ਕ੍ਰਿਯਾਤਿਪਨ੍ਨੇ’ ਤੀਤੇ ਕਾਲਾਤਿਪਤ੍ਤਿ.

੪੩੧. , ੪੫੮. ਹਿਯ੍ਯਤ੍ਤਨੀ ਸਤ੍ਤਮੀ ਪਞ੍ਚਮੀ ਵਤ੍ਤਮਾਨਾ ਸਬ੍ਬਧਾਤੁਕਂ.

ਹਿਯ੍ਯਤ੍ਤਨਾਦਯੋ ਚਤਸ੍ਸੋ ਵਿਭਤ੍ਤਿਯੋ ਸਬ੍ਬਧਾਤੁਕ ਸਞ੍ਞਾ ਹੋਨ੍ਤਿ.

ਅਗਮਾ, ਗਚ੍ਛੇਯ੍ਯ, ਗਚ੍ਛਤੁ, ਗਚ੍ਛਤਿ.

ਸਬ੍ਬਧਾਤੁਕ ਇਚ੍ਚਨੇਨ ਕ੍ਵਤ੍ਥੋ? ਇਕਾਰਾਗਮੋ ਅਸਬ੍ਬਧਾਤੁਕਮ੍ਹਿ.

ਇਤਿ ਆਖ੍ਯਾਤਕਪ੍ਪੇ ਪਠਮੋ ਕਣ੍ਡੋ.

ਦੁਤਿਯਕਣ੍ਡ

੪੩੨. , ੩੬੨. ਧਾਤੁਲਿਙ੍ਗੇਹਿ ਪਰਾ ਪਚ੍ਚਯਾ.

ਧਾਤੁਲਿਙ੍ਗਇਚ੍ਚੇਤੇਹਿ ਪਰਾ ਪਚ੍ਚਯਾ ਹੋਨ੍ਤਿ.

ਕਰੋਤਿ, ਗਚ੍ਛਤਿ. ਯੋ ਕੋਚਿ ਕਰੋਤਿ, ਤਂ ਅਞ੍ਞੋ ‘‘ਕਰੋਹਿ ਕਰੋਹਿ’’ ਇਚ੍ਚੇਵਂ ਬ੍ਰਵੀਤਿ, ਅਥ ਵਾ ਕਰੋਨ੍ਤਂ ਪਯੋਜਯਤਿ = ਕਾਰੇਤਿ. ਸਙ੍ਘੋ ਪਬ੍ਬਤਮਿਵ ਅਤ੍ਤਾਨਮਾਚਰਤਿ = ਪਬ੍ਬਤਾਯਤਿ. ਤਲ਼ਾਕਂ ਸਮੁਦ੍ਦਮਿਵ ਅਤ੍ਤਾਨਮਾਚਰਤਿ = ਸਮੁਦ੍ਦਾਯਤਿ, ਸਦ੍ਦੋ ਚਿਚ੍ਚਿਟਮਿਵ ਅਤ੍ਤਾਨਮਾਚਰਤਿ = ਚਿਚ੍ਚਿਟਾਯਤਿ, ਵਸਿਟ੍ਠਸ੍ਸ ਅਪਚ੍ਚਂ ਵਾਸਿਟ੍ਠੋ. ਏਵਮਞ੍ਞੇਪਿ ਯੋਜੇਤਬ੍ਬਾ.

੪੩੩. , ੫੨੮. ਤਿਜ ਗੁਪ ਕਿਤ ਮਾਨੇ ਹਿ ਖ ਛ ਸਾ ਵਾ.

ਤਿਜ ਗੁਪ ਕਿਤ ਮਾਨੁ ਇਚ੍ਚੇਤੇਹਿ ਧਾਤੂਹਿ ਖ ਛ ਸ ਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਵਾ.

ਤਿਤਿਕ੍ਖਤਿ, ਜਿਗੁਚ੍ਛਤਿ, ਤਿਕਿਚ੍ਛਤਿ, ਵੀਮਂਸਤਿ.

ਵਾਤਿ ਕਿਮਤ੍ਥਂ? ਤੇਜਤਿ, ਗੋਪਤਿ, ਮਾਨੇਤਿ.

੪੩੪. , ੫੩੪. ਭੁਜ ਘਸ ਹਰ ਸੁ ਪਾਦੀਹਿ ਤੁਮਿਚ੍ਛਤ੍ਥੇਸੁ.

ਭੁਜ ਘਸ ਹਰ ਸੁ ਪਾਇਚ੍ਚੇਵਮਾਦੀਹਿ ਧਾਤੂਹਿ ਤੁਮਿਚ੍ਛਤ੍ਥੇਸੁ ਖ ਛ ਸਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਵਾ.

ਭੋਤ੍ਤੁਮਿਚ੍ਛਤਿ=ਬੁਭੁਕ੍ਖਤਿ, ਘਸਿਤੁਮਿਚ੍ਛਤਿ=ਜਿਘਚ੍ਛਤਿ, ਹਰਿਤੁਮਿਚ੍ਛਤਿ=ਜਿਗੀਸਤਿ, ਸੋਤੁਮਿਚ੍ਛਤਿ=ਸੁਸ੍ਸੁਸਤਿ, ਪਾਤੁਮਿਚ੍ਛਤਿ=ਪਿਵਾਸਤਿ.

ਵਾਤਿ ਕਿਮਤ੍ਥਂ? ਭੋਤ੍ਤੁਮਿਚ੍ਛਤਿ.

ਤੁਮਿਚ੍ਛਤ੍ਥੇਸੂਤਿ ਕਿਮਤ੍ਥਂ? ਭੁਞ੍ਜਤਿ.

੪੩੫. , ੫੩੬. ਆਯ ਨਾਮਤੋ ਕਤ੍ਤੂਪਮਾਨਾਦਾਚਾਰੇ.

ਨਾਮਤੋ ਕਤ੍ਤੂਪਮਾਨਾ ਆਚਾਰਤ੍ਥੇ ਆਯਪਚ੍ਚਯੋ ਹੋਤਿ.

ਸਙ੍ਘੋ ਪਬ੍ਬਤਮਿਵ ਅਤ੍ਤਾਨਮਾਚਰਤਿ = ਪਬ੍ਬਤਾਯਤਿ, ਤਲ਼ਾਕਂ ਸਮੁਦ੍ਦਮਿਵ ਅਤ੍ਤਾਨਮਾਚਰਤਿ = ਸਮੁਦ੍ਦਾਯਤਿ, ਸਦ੍ਦੋ ਚਿਚ੍ਚਿਟਮਿਵ ਅਤ੍ਤਾਨਮਾਚਰਤਿ = ਚਿਚ੍ਚਿਟਾਯਤਿ. ਏਵਮਞ੍ਞੇਪਿ ਯੋਜੇਤਬ੍ਬਾ.

੪੩੬. , ੫੩੭. ਈਯੂਪਮਾਨਾ ਚ.

ਨਾਮਤੋ ਉਪਮਾਨਾ ਆਚਾਰਤ੍ਥੇ ਚ ਈਯਪਚ੍ਚਯੋ ਹੋਤਿ.

ਅਛਤ੍ਤਂ ਛਤ੍ਤਮਿਵ ਆਚਰਤਿ =ਛਤ੍ਤੀਯਤਿ, ਅਪੁਤ੍ਤਂ ਪੁਤ੍ਤਮਿਵ ਆਚਰਤਿ=ਪੁਤ੍ਤੀਯਤਿ.

ਉਪਮਾਨਾਤਿ ਕਿਮਤ੍ਥਂ? ਧਮ੍ਮਂ ਆਚਰਤਿ.

ਆਚਾਰੇਤਿ ਕਿਮਤ੍ਥਂ? ਅਛਤ੍ਤਂ ਛਤ੍ਤਮਿਵ ਰਕ੍ਖਤਿ. ਏਵਮਞ੍ਞੇਪਿ ਯੋਜੇਤਬ੍ਬਾ.

੪੩੭. , ੫੩੮. ਨਾਮਮ੍ਹਾ’ਤ੍ਤਿਚ੍ਛਤ੍ਥੇ.

ਨਾਮਮ੍ਹਾ ਅਤ੍ਤਨੋ ਇਚ੍ਛਤ੍ਥੇ ਈਯਪਚ੍ਚਯੋ ਹੋਤਿ.

ਅਤ੍ਤਨੋ ਪਤ੍ਤਮਿਚ੍ਛਤਿ = ਪਤ੍ਤੀਯਤਿ. ਏਵਂ ਵਤ੍ਥੀਯਤਿ, ਪਰਿਕ੍ਖਾਰੀਯਤਿ, ਚੀਵਰੀਯਤਿ, ਧਨੀਯਤਿ, ਘਟੀਯਤਿ.

ਅਤ੍ਤਿਚ੍ਛਤ੍ਥੇਤਿ ਕਿਮਤ੍ਥਂ? ਅਞ੍ਞਸ੍ਸ ਪਤ੍ਤਮਿਚ੍ਛਤਿ. ਏਵਮਞ੍ਞੇਪਿ ਯੋਜੇਤਬ੍ਬਾ.

੪੩੮. , ੫੪੦. ਧਾਤੂਹਿ ਣੇ ਣਯ ਣਾਪੇ ਣਾਪਯਾ ਕਾਰਿਤਾਨਿ ਹੇਤ੍ਵਤ੍ਥੇ.

ਸਬ੍ਬੇਹਿ ਧਾਤੂਹਿ ਣੇਣਯ ਣਾਪੇ ਣਾਪਯਇਚ੍ਚੇਤੇ ਪਚ੍ਚਯਾ ਹੋਨ੍ਤਿ ਕਾਰਿਤਸਞ੍ਞਾ ਚ ਹੇਤ੍ਵਤ੍ਥੇ.

ਯੋ ਕੋਚਿ ਕਰੋਤਿ, ਤਂ ਅਞ੍ਞੋ ‘‘ਕਰੋਹਿ ਕਰੋਹਿ’’ ਇਚ੍ਚੇਵਂ ਬ੍ਰਵੀਤਿ, ਅਥ ਵਾ ਕਰੋਨ੍ਤਂ ਪਯੋਜਯਤਿ = ਕਾਰੇਤਿ, ਕਾਰਯਤਿ, ਕਾਰਾਪੇਤਿ, ਕਾਰਾ ਪਯਤਿ. ਯੇ ਕੇਚਿ ਕਰੋਨ੍ਤਿ, ਤੇ ਅਞ੍ਞੇ ‘‘ਕਰੋਥ ਕਰੋਥ’’ ਇਚ੍ਚੇਵਂ ਬ੍ਰੁਵਨ੍ਤਿ = ਕਾਰੇਨ੍ਤਿ, ਕਾਰਯਨ੍ਤਿ, ਕਾਰਾਪੇਨ੍ਤਿ, ਕਾਰਾਪਯਨ੍ਤਿ. ਯੋ ਕੋਚਿ ਪਚਤਿ, ਤਂ ਅਞ੍ਞੋ ‘‘ਪਚਾਹਿ ਪਚਾਹਿ’’ਇਚ੍ਚੇਵਂ ਬ੍ਰਵੀਤਿ, ਅਥ ਵਾ ਪਚਨ੍ਤਂ ਪਯੋਜਯਤਿ = ਪਾਚੇਤਿ, ਪਾਚਯਤਿ, ਪਾਚਾਪੇਤਿ, ਪਾਚਾਪਯਤਿ. ਯੇ ਕੇਚਿ ਪਚਨ੍ਤਿ, ਤੇ ਅਞ੍ਞੇ ‘‘ਪਚਥ ਪਚਥ’’ ਇਚ੍ਚੇਵਂ ਬ੍ਰੁਵਨ੍ਤਿ = ਪਾਚੇਨ੍ਤਿ, ਪਾਚਯਨ੍ਤਿ, ਪਾਚਾਪੇਨ੍ਤਿ. ਪਾਚਾਪਯਨ੍ਤਿ. ਏਵਂ ਭਣੇਤਿ, ਭਣਯਤਿ, ਭਣਾਪੇਤਿ, ਭਣਾਪਯਤਿ. ਭਣੇਨ੍ਤਿ, ਭਣਯਨ੍ਤਿ, ਭਣਾਪੇਨ੍ਤਿ, ਭਣਾਪਯਨ੍ਤਿ. ਤਥਰਿਵ ਅਞ੍ਞੇਪਿ ਯੋਜੇਤਬ੍ਬਾ.

ਹੇਤ੍ਵਤ੍ਥੇਤਿ ਕਿਮਤ੍ਥਂ? ਕਰੋਤਿ, ਪਚਤਿ.

ਅਤ੍ਥਗ੍ਗਹਣੇਨ ਅਲਪਚ੍ਚਯੋ ਹੋਤਿ, ਜੋਤਲਤਿ.

੪੩੯. , ੫੩੯. ਧਾਤੁਰੂਪੇ ਨਾਮਸ੍ਮਾ ਣਯੋ ਚ.

ਤਸ੍ਮਾ ਨਾਮਸ੍ਮਾ ਣਯਪਚ੍ਚਯੋ ਹੋਤਿ ਕਾਰਿਤਸਞ੍ਞੋ ਚ ਧਾਤੁਰੂਪੇ ਸਤਿ.

ਹਤ੍ਥਿਨਾ ਅਤਿਕ੍ਕਮਤਿ ਮਗ੍ਗਂ = ਅਤਿਹਤ੍ਥਯਤਿ, ਵੀਣਾਯ ਉਪਗਾਯਤਿ ਗੀਤਂ = ਉਪਵੀਣਯਤਿ, ਦਲ਼੍ਹਂ ਕਰੋਤਿ ਵੀਰਿਯਂ = ਦਲ਼੍ਹਯਤਿ, ਵਿਸੁਦ੍ਧਾ ਹੋਤਿ ਰਤ੍ਤਿ = ਵਿਸੁਦ੍ਧਯਤਿ.

ਚਗ੍ਗਹਣੇਨ ਆਰ ਆਲਇਚ੍ਚੇਤੇ ਪਚ੍ਚਯਾ ਹੋਨ੍ਤਿ. ਸਨ੍ਤਂ ਕਰੋਤਿ = ਸਨ੍ਤਾਰਤਿ, ਉਪਕ੍ਕਮਂ ਕਰੋਤਿ = ਉਪਕ੍ਕਮਾਲਤਿ.

੪੪੦. , ੪੪੫. ਭਾਵਕਮ੍ਮੇਸੁ ਯੋ.

ਸਬ੍ਬੇਹਿ ਧਾਤੂਹਿ ਭਾਵਕਮ੍ਮੇਸੁ ਯਪਚ੍ਚਯੋ ਹੋਤਿ.

ਠੀਯਤੇ, ਬੁਜ੍ਝਤੇ, ਪਚ੍ਚਤੇ, ਲਬ੍ਭਤੇ, ਕਰੀਯਤੇ, ਯੁਜ੍ਜਤੇ, ਉਚ੍ਚਤੇ.

ਭਾਵਕਮ੍ਮੇਸੂਤਿ ਕਿਮਤ੍ਥਂ? ਕਰੋਤਿ, ਪਚਤਿ, ਪਠਤਿ.

੪੪੧. , ੪੪੭. ਤਸ੍ਸ ਚਵਗ੍ਗਯਕਾਰਵਕਾਰਤ੍ਤਂ ਸਧਾਤ੍ਵਨ੍ਤਸ੍ਸ.

ਤਸ੍ਸ ਯਪਚ੍ਚਯਸ੍ਸ ਚਵਗ੍ਗਯਕਾਰਵਕਾਰਤ੍ਤਂ ਹੋਤਿ ਧਾਤੂਨਂ ਅਨ੍ਤੇਨ ਸਹ ਯਥਾਸਮ੍ਭਵਂ.

ਵੁਚ੍ਚਤੇ, ਵੁਚ੍ਚਨ੍ਤੇ, ਉਚ੍ਚਤੇ, ਉਚ੍ਚਨ੍ਤੇ, ਪਚ੍ਚਤੇ, ਪਚ੍ਚਨ੍ਤੇ. ਮਜ੍ਜਤੇ, ਮਜ੍ਜਨ੍ਤੇ, ਯੁਜ੍ਜਤੇ, ਯੁਜ੍ਜਨ੍ਤੇ. ਬੁਜ੍ਝਤੇ, ਬੁਜ੍ਝਨ੍ਤੇ, ਕੁਜ੍ਝਤੇ, ਕੁਜ੍ਝਨ੍ਤੇ, ਉਜ੍ਝਤੇ, ਉਜ੍ਝਨ੍ਤੇ. ਹਞ੍ਞਤੇ, ਹਞ੍ਞਨ੍ਤੇ. ਕਯ੍ਯਤੇ, ਕਯ੍ਯਨ੍ਤੇ. ਦਿਬ੍ਬਤੇ, ਦਿਬ੍ਬਨ੍ਤੇ.

੪੪੨. , ੪੪੮. ਇਵਣ੍ਣਾਗਮੋ ਵਾ.

ਸਬ੍ਬੇਹਿ ਧਾਤੂਹਿ ਯਮ੍ਹਿ ਪਚ੍ਚਯੇ, ਪਰੇ ਇਵਣ੍ਣਾਗਮੋ ਹੋਤਿ ਵਾ.

ਕਰੀਯਤੇ, ਕਰੀਯਤਿ, ਗਚ੍ਛੀਯਤੇ, ਗਚ੍ਛੀਯਤਿ.

ਵਾਤਿ ਕਿਮਤ੍ਥਂ? ਕਯ੍ਯਤੇ.

੪੪੩. , ੪੪੯. ਪੁਬ੍ਬਰੂਪਞ੍ਚ.