੩. ਕਾਰਕਕਪ੍ਪ
ਛਟ੍ਠਕਣ੍ਡ
੨੭੧. , ੮੮, ੩੦੮. ਯਸ੍ਮਾ ਦਪੇਤਿ ਭਯਮਾਦਤ੍ਤੇ ਵਾ ਤਦਪਾਦਾਨਂ.
ਯਸ੍ਮਾ ਵਾ ਅਪੇਤਿ, ਯਸ੍ਮਾ ਵਾ ਭਯਂ ਜਾਯਤੇ, ਯਸ੍ਮਾ ਵਾ ਆਦਤ੍ਤੇ, ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਤਂ ਯਥਾ? ਗਾਮਾ ਅਪੇਨ੍ਤਿ ਮੁਨਯੋ, ਨਗਰਾ ਨਿਗ੍ਗਤੋ ਰਾਜਾ, ਚੋਰਾ ਭਯਂ ਜਾਯਤੇ, ਆਚਰਿਯੁਪਜ੍ਝਾਯੇਹਿ ਸਿਕ੍ਖਂ ਗਣ੍ਹਾਤਿ ਸਿਸ੍ਸੋ.
ਅਪਾਦਾਨਮਿਚ੍ਚਨੇਨ ਕ੍ਵਤ੍ਥੋ? ਅਪਾਦਾਨੇ ਪਞ੍ਚਮੀ.
੨੭੨. , ੩੦੯. ਧਾਤੁਨਾ ਮਾਨਮੁਪਸਗ੍ਗਯੋਗਾਦ੍ਵੀਸ੍ਵਪਿ ਚ.
ਧਾਤੁਨਾਮਾਨਂ ਪਯੋਗੇ ਚ ਉਪਸਗ੍ਗਯੋਗਾਦੀਸ੍ਵਪਿ ਚ ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਧਾਤੂਨਂ ਪਯੋਗੇ ਤਾਵ ਜਿਇਚ੍ਚੇਤਸ੍ਸ ਧਾਤੁਸ੍ਸ ਪਰਾਪੁਬ੍ਬਸ੍ਸ ਪਯੋਗੇ ਯੋ ਅਸਹੋ, ਸੋ ਅਪਾਦਾਨਸਞ੍ਞੋ ਹੋਤਿ.
ਤਂ ਯਥਾ? ਬੁਦ੍ਧਸ੍ਮਾ ਪਰਾਜੇਨ੍ਤਿ ਅਞ੍ਞਤਿਤ੍ਥਿਯਾ.
ਭੂਇਚ੍ਚੇਤਸ੍ਸ ਧਾਤੁਸ੍ਸ ਪਪੁਬ੍ਬਸ੍ਸ ਪਯੋਗੇ ਯਤੋ ਅਚ੍ਛਿਨ੍ਨਪ੍ਪਭਵੋ, ਸੋ ਅਪਾਦਾਨਸਞ੍ਞੋ ਹੋਤਿ.
ਤਂ ਯਥਾ? ਹਿਮਵਤਾ ਪਭਵਨ੍ਤਿ ਪਞ੍ਚ ਮਹਾਨਦਿਯੋ, ਅਨਵਤਤ੍ਤਮ੍ਹਾ ਪਭਵਨ੍ਤਿ ਮਹਾਸਰਾ, ਅਚਿਰਵਤਿਯਾ ਪਭਵਨ੍ਤਿ ਕੁਨ੍ਨਦਿਯੋ.
ਨਾਮਪ੍ਪਯੋਗੇਪਿ ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਤਂ ਯਥਾ? ਉਰਸ੍ਮਾ ਜਾਤੋ ਪੁਤ੍ਤੋ, ਭੂਮਿਤੋ ਨਿਗ੍ਗਤੋ ਰਸੋ, ਉਭਤੋ ਸੁਜਾਤੋ ਪੁਤ੍ਤੋ ਮਾਤਿਤੋ ਚ ਪਿਤਿਤੋ ਚ.
ਉਪਸਗ੍ਗਯੋਗੇ ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਤਂ ਯਥਾ? ਅਪਸਾਲਾਯ ਆਯਨ੍ਤਿ ਵਾਣਿਜਾ, ਆਬ੍ਰਹ੍ਮਲੋਕਾ ਸਦ੍ਦੋ ਅਬ੍ਭੁਗ੍ਗਚ੍ਛਤਿ ਉਪਰਿ ਪਬ੍ਬਤਾ ਦੇਵੋ ਵਸ੍ਸਤਿ, ਬੁਦ੍ਧਸ੍ਮਾ ਪਤਿ ਸਾਰਿਪੁਤ੍ਤੋ ਧਮ੍ਮਦੇਸਨਾਯ ਭਿਕ੍ਖੂ ਆਲਪਤਿ ਤੇਮਾਸਂ, ਘਤਮਸ੍ਸ ਤੇਲਸ੍ਮਾ ਪਤਿ ਦਦਾਤਿ, ਉਪ੍ਪਲਮਸ੍ਸ ਪਦੁਮਸ੍ਮਾ ਪਤਿ ਦਦਾਤਿ, ਕਨਕਮਸ੍ਸ ਹਿਰਞ੍ਞਸ੍ਮਾ ਪਤਿ ਦਦਾਤਿ.
ਆਦਿਗ੍ਗਹਣੇਨ ਕਾਰਕਮਜ੍ਝੇਪਿ ਪਞ੍ਚਮੀਵਿਭਤ੍ਤਿ ਹੋਤਿ. ਇਤੋ ਪਕ੍ਖਸ੍ਮਾ ਵਿਜ੍ਝਤਿ ਮਿਗਂ ਲੁਦ੍ਦਕੋ, ਕੋਸਾ ਵਿਜ੍ਝਤਿ ਕੁਞ੍ਜਰਂ, ਮਾਸਸ੍ਮਾ ਭੁਞ੍ਜਤਿ ਭੋਜਨਂ.
ਅਪਿਗ੍ਗਹਣੇਨ ਨਿਪਾਤਪਯੋਗੇਪਿ ਪਞ੍ਚਮੀਵਿਭਤ੍ਤਿ ਹੋਤਿ ਦੁਤਿਯਾ ਚ ਤਤਿਯਾ ਚ. ਰਹਿਤਾ ਮਾਤੁਜਾ ਪੁਞ੍ਞਂ ਕਤ੍ਵਾ ਦਾਨਂ ਦੇਤਿ, ਰਹਿਤਾ ਮਾਤੁਜਂ, ਰਹਿਤਾ ਮਾਤੁਜੇਨ ਵਾ. ਰਿਤੇ ਸਦ੍ਧਮ੍ਮਾ ਕੁਤੋ ਸੁਖਂ ਲਭਤਿ, ਰਿਤੇ ਸਦ੍ਧਮ੍ਮਂ, ਰਿਤੇ ਸਦ੍ਧਮ੍ਮੇਨ ਵਾ. ਤੇ ਭਿਕ੍ਖੂ ਨਾਨਾ ਕੁਲਾ ਪਬ੍ਬਜਿਤਾ, ਵਿਨਾ ਸਦ੍ਧਮ੍ਮਾ ਨਤ੍ਥਞ੍ਞੋ ਕੋਚਿ ਨਾਥੋ ਲੋਕੇ ਵਿਜ੍ਜਤਿ, ਵਿਨਾ ਸਦ੍ਧਮ੍ਮਂ, ਵਿਨਾ ਸਦ੍ਧਮ੍ਮੇਨ ਵਾ. ਵਿਨਾ ਬੁਦ੍ਧਸ੍ਮਾ, ਵਿਨਾ ਬੁਦ੍ਧਂ, ਵਿਨਾ ਬੁਦ੍ਧੇਨ ਵਾ.
ਚਗ੍ਗਹਣੇਨ ਅਞ੍ਞਤ੍ਥਾਪਿ ਪਞ੍ਚਮੀਵਿਭਤ੍ਤਿ ਹੋਤਿ. ਯਤੋਹਂ ਭਗਿਨਿ ਅਰਿਯਾਯ ਜਾਤਿਯਾ ਜਾਤੋ. ਯਤੋ ਸਰਾਮਿ ਅਤ੍ਤਾਨਂ, ਯਤੋ ਪਤ੍ਤੋਸ੍ਮਿ ਵਿਞ੍ਞੁਤਂ, ਯਤ੍ਵਾਧਿਕਰਣਮੇਨਂ ਚਕ੍ਖੁਨ੍ਦ੍ਰਿਯਂ ਅਸਂਵੁਤਂ ਵਿਹਰਨ੍ਤਂ ਅਭਿਜ੍ਝਾਦੋਮਨਸ੍ਸਾ ਪਾਪਕਾ ਅਕੁਸਲਾ ਧਮ੍ਮਾ ਅਨ੍ਵਾਸਵੇਯ੍ਯੁਂ.
੨੭੩. , ੩੧੦. ਰਕ੍ਖਣਤ੍ਥਾਨਮਿਚ੍ਛਿਤਂ.
ਰਕ੍ਖਣਤ੍ਥਾਨਂ ਧਾਤੂਨਂ ਪਯੋਗੇ ਯਂ ਇਚ੍ਛਿਤਂ, ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਕਾਕੇ ਰਕ੍ਖਨ੍ਤਿ ਤਣ੍ਡੁਲਾ, ਯਵਾ ਪਟਿਸੇਧੇਨ੍ਤਿ ਗਾਵੋ.
੨੭੪. , ੩੧੧. ਯੇਨ ਵਾ’ ਦਸ੍ਸਨਂ.
ਯੇਨ ਵਾ ਅਦਸ੍ਸਨਮਿਚ੍ਛਿਤਂ, ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਉਪਜ੍ਝਾਯਾ ਅਨ੍ਤਰਧਾਯਤਿ ਸਿਸ੍ਸੋ, ਮਾਤਰਾ ਚ ਪਿਤਰਾ ਚ ਅਨ੍ਤਰਧਾਯਤਿ ਪੁਤ੍ਤੋ.
ਵਾਤਿ ਕਿਮਤ੍ਥਂ? ਸਤ੍ਤਮੀਵਿਭਤ੍ਯਤ੍ਤਂ. ਜੇਤਵਨੇ ਅਨ੍ਤਰਧਾਯਤਿ ਭਗਵਾ.
੨੭੫. , ੩੧੨. ਦੂਰਨ੍ਤਿ ਕਦ੍ਧ ਕਾਲ ਨਿਮ੍ਮਾਨ ਤ੍ਵਾਲੋਪ ਦਿਸਾਯੋਗਵਿਭਤ੍ਤਾਰਪ੍ਪਯੋਗ ਸੁਦ੍ਧਪ੍ਪਮੋਚਨ ਹੇਤੁ ਵਿਵਿਤ੍ਤਪ੍ਪਮਾਣ ਪੁਬ੍ਬਯੋਗਬਨ੍ਧਨ ਗੁਣਵਚਨ ਪਞ੍ਹ ਕਥਨ ਥੋਕਾਕਤ੍ਤੂਸੁ ਚ.
ਦੂਰਤ੍ਥੇ, ਅਨ੍ਤਿਕਤ੍ਥੇ, ਅਦ੍ਧਨਿਮ੍ਮਾਨੇ, ਕਾਲਨਿਮ੍ਮਾਨੇ, ਤ੍ਵਾਲੋਪੇ, ਦਿਸਾਯੋਗੇ, ਵਿਭਤ੍ਤੇ, ਆਰਪ੍ਪਯੋਗੇ, ਸੁਦ੍ਧੇ, ਪਮੋਚਨੇ, ਹੇਤ੍ਵਤ੍ਥੇ, ਵਿਵਿਤ੍ਤਤ੍ਥੇ, ਪਮਾਣੇ, ਪੁਬ੍ਬਯੋਗੇ, ਬਨ੍ਧਨਤ੍ਥੇ, ਗੁਣਵਚਨੇ, ਪਞ੍ਹੇ, ਕਥਨੇ, ਥੋਕੇ, ਅਕਤ੍ਤਰਿ ਚ ਇਚ੍ਚੇਤੇਸ੍ਵਤ੍ਥੇਸੁ, ਪਯੋਗੇਸੁ ਚ, ਤਂ ਕਾਰਕਂ ਅਪਾਦਾਨਸਞ੍ਞਂ ਹੋਤਿ.
ਦੂਰਤ੍ਥੇਤਾਵ – ਕੀਵ ਦੂਰੋ ਇਤੋ ਨਲ਼ਕਾਰਗਾਮੋ, ਦੂਰਤੋ ਵਾ ਗਮ੍ਮ, ਆਰਕਾ ਤੇ ਮੋਘਪੁਰਿਸਾ ਇਮਸ੍ਮਾ ਧਮ੍ਮਵਿਨਯਾ. ਦੁਤਿਯਾ ਚ ਤਤਿਯਾ ਚ, ਦੂਰਂ ਗਾਮਂ ਆਵਤੋ, ਦੂਰੇਨ ਗਾਮੇਨ ਵਾ ਆਗਤੋ. ਆਰਕਾ ਇਮਂ ਧਮ੍ਮਵਿਨਯਂ, ਅਨੇਨ ਧਮ੍ਮਵਿਨਯੇਨ ਵਾ ਇਚ੍ਚੇਵਮਾਦਿ.
ਅਨ੍ਤਿਕਤ੍ਥੇ – ਅਨ੍ਤਿਕਂ ਗਾਮਾ, ਆਸਨ੍ਨਂ ਗਾਮਾ, ਸਮੀਪਂ ਗਾਮਾ, ਸਮੀਪਂ ਸਦ੍ਧਮ੍ਮਾ. ਦੁਤਿਯਾ ਚ ਤਤਿਯਾ ਚ, ਅਨ੍ਤਿਕਂ ਗਾਮਂ, ਅਨ੍ਤਿਕਂ ਗਾਮੇਨ ਵਾ. ਆਸਨ੍ਨਂ ਗਾਮਂ, ਆਸਨ੍ਨਂ ਗਾਮੇਨ ਵਾ. ਸਮੀਪਂ ਗਾਮਂ. ਸਮੀਪਂ ਗਾਮੇਨ ਵਾ. ਸਮੀਪਂ ਸਦ੍ਧਮ੍ਮਂ, ਸਮੀਪਂ ਸਦ੍ਧਮ੍ਮੇਨ ਵਾ ਇਚ੍ਚੇਵਮਾਦਿ.
ਅਦ੍ਧਨਿਮ੍ਮਾਨੇ – ਇਤੋ ਮਥੁਰਾਯ ਚਤੂਸੁ ਯੋਜਨੇਸੁ ਸਙ੍ਕਸ੍ਸਂ ਨਾਮ ਨਗਰਂ ਅਤ੍ਥਿ, ਤਤ੍ਥ ਬਹੂ ਜਨਾ ਵਸਨ੍ਤਿ ਇਚ੍ਚੇਵਮਾਦਿ.
ਕਾਲਨਿਮ੍ਮਾਨੇ – ਇਤੋ ਭਿਕ੍ਖਵੇ ਏਕਨਵੁਤਿਕਪ੍ਪੇ ਵਿਪਸ੍ਸੀ ਨਾਮ ਭਗਵਾ ਲੋਕੇ ਉਦਪਾਦਿ, ਇਤੋ ਤਿਣ੍ਣਂ ਮਾਸਾਨਂ ਅਚ੍ਚਯੇਨ ਪਰਿਨਿਬ੍ਬਾਯਿਸ੍ਸਤਿ ਇਚ੍ਚੇਵਮਾਦਿ.
ਤ੍ਵਾਲੋਪੇ ਕਮ੍ਮਾਧਿਕਰਣੇਸੁ – ਪਾਸਾਦਾ ਸਙ੍ਕਮੇਯ੍ਯ, ਪਾਸਾਦਂ ਅਭਿਰੁਹਿਤ੍ਵਾ ਵਾ. ਪਬ੍ਬਤਾ ਸਙ੍ਕਮੇਯ੍ਯ, ਪਬ੍ਬਤਂ ਅਭਿਰੁਹਿਤ੍ਵਾ ਵਾ. ਹਤ੍ਥਿਕ੍ਖਨ੍ਧਾ ਸਙ੍ਕਮੇਯ੍ਯ, ਹਤ੍ਥਿਕ੍ਖਨ੍ਧਂ ਅਭਿਰੁਹਿਤ੍ਵਾ ਵਾ. ਆਸਨਾ ਵੁਟ੍ਠਹੇਯ੍ਯ. ਆਸਨੇ ਨਿਸੀਦਿਤ੍ਵਾ ਵਾ ਇਚ੍ਚੇਵਮਾਦਿ.
ਦਿਸਾਯੋਗੇ – ਅਵਿਚਿਤੋ ਯਾਵ ਉਪਰਿਭਵਗ੍ਗਮਨ੍ਤਰੇ ਬਹੂ ਸਤ੍ਤਨਿਕਾਯਾ ਵਸਨ੍ਤਿ, ਯਤੋ ਖੇਮਂ ਤਤੋ ਭਯਂ, ਪੁਰਤ੍ਥਿਮਤੋ, ਦਕ੍ਖਿਣਤੋ, ਪਚ੍ਛਿਮਤੋ, ਉਤ੍ਤਰਤੋ ਅਗ੍ਗੀ ਪਜ੍ਜਲਨ੍ਤਿ, ਯਤੋ ਅਸ੍ਸੋਸੁਂ ਭਗਵਨ੍ਤਂ, ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਇਚ੍ਚੇਵਮਾਦਿ.
ਵਿਭਤ੍ਤੇ – ਯਤੋ ਪਣੀਤਤਰੋ ਵਾ ਵਿਸਿਟ੍ਠਤਰੋ ਵਾ ਨਤ੍ਥਿ. ਛਟ੍ਠੀ ਚ, ਛਨ੍ਨਵੁਤੀਨਂ ਪਾਸਣ੍ਡਾਨਂ, ਧਮ੍ਮਾਨਂ ਪਵਰਂ ਯਦਿਦਂ ਸੁਗਤਵਿਨਯੋ ਇਚ੍ਚੇਵਮਾਦਿ.
ਆਰਪ੍ਪਯੋਗੇ – ਗਾਮਧਮ੍ਮਾ ਵਸਲਧਮ੍ਮਾ ਅਸਦ੍ਧਮ੍ਮਾ ਆਰਤਿ ਵਿਰਤਿ ਪਟਿਵਿਰਤਿ, ਪਾਣਾਤਿਪਾਤਾ ਵੇਰਮਣੀ ਇਚ੍ਚੇਵਮਾਦਿ.
ਸੁਦ੍ਧੇ – ਲੋਭਨਿਯੇਹਿ ਧਮ੍ਮੇਹਿ ਸੁਦ੍ਧੋ ਅਸਂਸਟ੍ਠੋ, ਮਾਤਿਤੋ ਚ ਪਿਤਿਤੋ ਚ ਸੁਦ੍ਧੋ ਅਸਂਸਟ੍ਠੋ ਅਨੁਪਕੁਦ੍ਧੋ ਅਗਰਹਿਤੋ ਇਚ੍ਚੇਵਮਾਦਿ.
ਪਮੋਚਨੇ – ਪਰਿਮੁਤ੍ਤੋ ਦੁਕ੍ਖਸ੍ਮਾਤਿ ਵਦਾਮਿ, ਮੁਤ੍ਤੋਸ੍ਮਿ ਮਾਰਬਨ੍ਧਨਾ, ਨ ਤੇ ਮੁਚ੍ਚਨ੍ਤਿ ਮਚ੍ਚੁਨਾ ਇਚ੍ਚੇਵਮਾਦਿ.
ਹੇਤ੍ਵਤ੍ਥੇ – ਕਸ੍ਮਾ ਹੇਤੁਨਾ, ਕੇਨ ਹੇਤੁਨਾ, ਕਿਸ੍ਸ ਹੇਤੁਨਾ, ਕਸ੍ਮਾ ਨੁ ਤੁਮ੍ਹਂ ਦਹਰਾ ਨ ਮੀਯਰੇ, ਕਸ੍ਮਾ ਇਧੇਵ ਮਰਣਂ ਭਵਿਸ੍ਸਤਿ ਇਚ੍ਚੇਵਮਾਦਿ.
ਵਿਵਿਤ੍ਤਤ੍ਥੇ – ਵਿਵਿਤ੍ਤੋ ਪਾਪਕਾ ਧਮ੍ਮਾ, ਵਿਵਿਚ੍ਚੇਵ ਕਾਮੇਹਿ ਵਿਵਿਚ੍ਚ ਅਕੁਸਲੇਹਿ ਧਮ੍ਮੇਹਿ ਇਚ੍ਚੇਵਮਾਦਿ.
ਪਮਾਣੇ – ਦੀਘਸੋ ਨਵਵਿਦਤ੍ਥਿਯੋ ਸੁਗਤਵਿਦਤ੍ਥਿਯਾ ਪਮਾਣਿਕਾ ਕਾਰੇਤਬ੍ਬਾ, ਮਜ੍ਝਿਮਸ੍ਸ ਪੁਰਿਸਸ੍ਸ ਅਡ੍ਢ ਤੇਲ਼ਸਹਤ੍ਥਾ ਇਚ੍ਚੇਵਮਾਦਿ.
ਪੁਬ੍ਬਯੋਗੇ – ਪੁਬ੍ਬੇਵ ਸਮ੍ਮੋਧਾ ਇਚ੍ਚੇਵਮਾਦਿ.
ਬਨ੍ਧਨਤ੍ਥੇ – ਸਤਸ੍ਮਾ ਬਨ੍ਧੋ ਨਰੋ. ਤਤਿਯਾ ਚ, ਸਤੇਨ ਬਨ੍ਧੋ ਨਰੋ ਰਞ੍ਞਾ ਇਣਤ੍ਥੇਨ ਇਚ੍ਚੇਵਮਾਦਿ.
ਗੁਣਵਚਨੇ – ਪੁਞ੍ਞਾਯ ਸੁਗਤਿਂ ਯਨ੍ਤਿ, ਚਾਗਾਯ ਵਿਪੁਲਂ ਧਨਂ, ਪਞ੍ਞਾਯ ਵਿਮੁਤ੍ਤਿਮਨੋ, ਇਸ੍ਸਰਿਯਾਯ ਜਨਂ ਰਕ੍ਖਤਿ ਰਾਜਾ ਇਚ੍ਚੇਵਮਾਦਿ.
ਪਞ੍ਹੇ ਤ੍ਵਾਲੋਪੇ ਕਮ੍ਮਾਧਿਕਰਣੇਸੁ – ਅਭਿਧਮ੍ਮਾ ਪੁਚ੍ਛਨ੍ਤਿ, ਅਭਿਧਮ੍ਮਂ ਸੁਤ੍ਵਾ, ਅਭਿਧਮ੍ਮੇ ਠਤ੍ਵਾ ਵਾ. ਵਿਨਯਾ ਪੁਚ੍ਛਨ੍ਤਿ, ਵਿਨਯਂ ਸੁਤ੍ਵਾ, ਵਿਨਯੇ ਠਤ੍ਵਾ ਵਾ. ਦੁਤਿਯਾ ਚ ਤਤਿਯਾ ਚ, ਅਭਿਧਮ੍ਮਂ, ਅਭਿਧਮ੍ਮੇਨ ਵਾ. ਵਿਨਯਂ, ਵਿਨਯੇਨ ਵਾ. ਏਵ ਸੁਤ੍ਤਾ, ਗੇਯ੍ਯਾ, ਗਾਥਾਯ, ਵੇਯ੍ਯਾਕਰਣਾ, ਉਦਾਨਾ, ਇਤਿਵੁਤ੍ਤਕਾ, ਜਾਤਕਾ, ਅਬ੍ਭੁਤਧਮ੍ਮਾ, ਵੇਦਲ੍ਲਾ ਇਚ੍ਚੇਵਮਾਦਿ.
ਕਥਨੇ ਤ੍ਵਾਲੋਪੇ ਕਮ੍ਮਾਧਿਕਰਣੇਸੁ – ਅਭਿਧਮ੍ਮਾ ਕਥਯਨ੍ਤਿ, ਅਭਿਧਮ੍ਮਂ ਸੁਤ੍ਵਾ, ਅਭਿਧਮ੍ਮੇ ਠਤ੍ਵਾ ਵਾ. ਵਿਨਯਾ ਕਥਯਨ੍ਤਿ, ਵਿਨਯਂ ਸੁਤ੍ਵਾ, ਵਿਨਯੇ ਠਤ੍ਵਾ ਵਾ. ਦੁਤਿਯਾ ਚ ਤਤਿਯਾ ਚ, ਅਭਿਧਮ੍ਮਂ, ਅਭਿਧਮ੍ਮੇਨ ਵਾ. ਵਿਨਯਂ ਵਿਨਯੇਨ ਵਾ. ਏਵਂ ਸੁਤ੍ਤਾ, ਗੇਯ੍ਯਾ, ਗਾਥਾਯ, ਵੇਯ੍ਯਾਕਰਣਾ, ਉਦਾਨਾ, ਇਤਿਵੁਤ੍ਤਕਾ, ਜਾਤਕਾ, ਅਬ੍ਭੁਤਧਮ੍ਮਾ, ਵੇਦਲ੍ਲਾ ਇਚ੍ਚੇਵਮਾਦਿ.
ਥੋਕੇ – ਥੋਕਾ ਮੁਚ੍ਚਨ੍ਤਿ. ਅਪ੍ਪਮਤ੍ਤਕਾ ਮੁਚ੍ਚਨ੍ਤਿ, ਕਿਚ੍ਛਾ ਮੁਚ੍ਚਨ੍ਤਿ. ਤਤਿਯਾ ਚ. ਥੋਕੇਨ, ਅਪ੍ਪਮਤ੍ਤਕੇਨ, ਕਿਚ੍ਛੇਨ ਵਾ ਇਚ੍ਚੇਵਮਾਦਿ.
ਅਕਤ੍ਤਰਿਚ – ਕਮ੍ਮਸ੍ਸ ਕਤਤ੍ਤਾ ਉਪਚਿਤਤ੍ਤਾ ਉਸ੍ਸਨ੍ਨਤ੍ਤਾ ਵਿਪੁਲਤ੍ਤਾ ਚਕ੍ਖੁਵਿਞ੍ਞਾਣਂ ਉਪ੍ਪਨ੍ਨਂ ਹੋਤਿ ਇਚ੍ਚੇਵਮਾਦਿ.
ਚਗ੍ਗਹਣੇਨ ਸੇਸੇਸੁਪਿ ਯੇ ਮਯਾ ਨੋਪਦਿਟ੍ਠਾ ਅਪਾਦਾਨਪਯੋਗਿਕਾ, ਤੇ ਪਯੋਗਵਿਚਕ੍ਖਣੇਹਿ ਯਥਾਯੋਗਂ ਯੋਜੇਤਬ੍ਬਾ.
੨੭੬. , ੩੦੨. ਯਸ੍ਸ ਦਾਤੁਕਾਮੋ ਰੋਚਤੇ ਧਾਰਯਤੇ ਵਾ ਤਂ ਸਮ੍ਪਦਾਨਂ.
ਯਸ੍ਸ ਵਾ ਦਾਤੁਕਾਮੋ ਯਸ੍ਸ ਵਾਰੋਚਤੇ, ਯਸ੍ਸ ਵਾ ਧਾਰਯਤੇ, ਤਂ ਕਾਰਕਂ ਸਮ੍ਪਦਾਨਸਞ੍ਞਂ ਹੋਤਿ.
ਸਮਣਸ੍ਸ ਚੀਵਰਂ ਦਦਾਤਿ, ਸਮਣਸ੍ਸ ਰੋਚਤੇ ਸਚ੍ਚਂ, ਦੇਵਦਤ੍ਤਸ੍ਸ ਸੁਵਣ੍ਣਚ੍ਛਤ੍ਤਂ ਧਾਰਯਤੇ ਯਞ੍ਞਦਤ੍ਤੋ.
ਸਮ੍ਪਦਾਨਮਿਚ੍ਚਨੇਨ ਕ੍ਵਤ੍ਥੋ? ਸਮ੍ਪਦਾਨੇ ਚਤੁਤ੍ਥੀ.
ਵਾਤਿ ਵਿਕਪ੍ਪਨਤ੍ਥਂ, ਧਾਤੁਨਾਮਾਨਂ ਪਯੋਗੇ ਵਾ ਉਪਸਗ੍ਗਪ੍ਪਯੋਗੇ ਵਾ ਨਿਪਾਤਪ੍ਪਯੋਗੇ ਵਾ ਸਤਿ ਅਤ੍ਥਵਿਕਪ੍ਪਨਤ੍ਥਂ ਵਾਤਿ ਪਦਂ ਪਯੁਜ੍ਜਤਿ.
੨੭੭. , ੩੦੩. ਸਿਲਾਘ ਹਨੁ ਠਾ ਸਪ ਧਾਰ ਪਿਹ ਕੁਧ ਦੁਹਿਸ੍ਸੋਸੂਯ ਰਾਧਿਕ੍ਖ ਪਚ੍ਚਾਸੁਣ ਅਨੁਪਤਿਗਿਣ ਪੁਬ੍ਬਕਤ੍ਤਾਰੋਚਨਤ੍ਥ ਤਦਤ੍ਥ ਤੁਮਤ੍ਥਾਲਮਤ੍ਥ ਮਞ੍ਞਾਨਾਦਰਪ੍ਪਾਣਿਨਿ, ਗਤ੍ਯਤ੍ਥਕਮ੍ਮਨਿ, ਆਸੀਸਤ੍ਥ ਸਮ੍ਮੁਤਿ ਭਿਯ੍ਯ ਸਤ੍ਤਮ੍ਯਤ੍ਥੇਸੁ ਚ.
ਸਿਲਾਘ ਹਨੁ ਠਾ ਸਪ ਧਾਰ ਪਿਹ ਕੁਧ ਦੁਹ ਇਸ੍ਸਇਚ੍ਚੇਤੇਸਂ ਧਾਤੂਨਂ ਪਯੋਗੇ, ਉਸੂਯਤ੍ਥਾਨਞ੍ਚ ਪਯੋਗੇ, ਰਾਧਿਕ੍ਖਪ੍ਪਯੋਗੇ, ਪਚ੍ਚਾਸੁਣਅਨੁਪਤਿਗਿਣਾਨਂ ਪੁਬ੍ਬਕਤ੍ਤਰਿ, ਆਰੋਚਨਤ੍ਥੇ, ਤਦਤ੍ਥੇ, ਤੁਮਤ੍ਥੇ, ਅਲਮਤ੍ਥੇ, ਮਞ੍ਞਤਿਪ੍ਪਯੋਗੇ ਅਨਾਦਰੇ ਅਪ੍ਪਾਣਿਨਿ, ਗਤ੍ਯਤ੍ਥਾਨਂ ਧਾਤੂਨਂ ਕਮ੍ਮਨਿ, ਆਸੀਸਤ੍ਥੇ ਚ ਸਮ੍ਮੁਤਿ ਭਿਯ੍ਯ ਸਤ੍ਤਮ੍ਯਤ੍ਥੇਸੁ ਚ, ਤਂ ਕਾਰਕਂ ਸਮ੍ਪਦਾਨਸਞ੍ਞਂ ਹੋਤਿ.
ਸਿਲਾਘਪ੍ਪਯੋਗੇ ਤਾਵ – ਬੁਦ੍ਧਸ੍ਸ ਸਿਲਾਘਤੇ, ਧਮ੍ਮਸ੍ਸ ਸਿਲਾਘਤੇ, ਸਙ੍ਘਸ੍ਸ ਸਿਲਾਘਤੇ, ਸਕਂਉਪਜ੍ਝਾਯਸ੍ਸ ਸਿਲਾਘਤੇ, ਤਵ ਸਿਲਾਘਤੇ ਮਮ ਸਿਲਾਘਤੇ ਇਚ੍ਚੇਵਮਾਦਿ.
ਹਨੁਪ੍ਪਯੋਗੇ – ਹਨੁਤੇ ਤੁਯ੍ਹਮੇਵ, ਹਨੁਤੇ ਮਯ੍ਹਮੇਵ ਇਚ੍ਚੇਵਮਾਦਿ.
ਠਾਪਯੋਗੇ – ਉਪਤਿਟ੍ਠੇਯ੍ਯ ਸਕ੍ਯਪੁਤ੍ਤਾਨਂ ਵਡ੍ਢਕੀ, ਭਿਕ੍ਖੁਸ੍ਸ ਭੁਞ੍ਜਨ੍ਤਸ੍ਸ ਪਾਨੀਯੇਨ ਵਾ ਵਿਧੂਪਨੇਨ ਵਾ ਉਪਤਿਟ੍ਠੇਯ੍ਯ ਭਿਕ੍ਖੁਨੀ ਇਚ੍ਚੇਵਮਾਦਿ.
ਸਪਪ੍ਪਯੋਗੇ – ਤੁਯ੍ਹਂ ਸਪਤੇ, ਮਯ੍ਹਂ ਸਪਤੇ ਇਚ੍ਚੇਵਮਾਦਿ.
ਧਾਰਪ੍ਪਯੋਗੇ – ਸੁਵਣ੍ਣਂ ਤੇ ਧਾਰਯਤੇ ਇਚ੍ਚੇਵਮਾਦਿ.
ਪਿਹਪ੍ਪਯੋਗੇ – ਬੁਦ੍ਧਸ੍ਸ ਅਞ੍ਞਤਿਤ੍ਥਿਯਾ ਪਿਹਯਨ੍ਤਿ, ਦੇਵਾ ਦਸ੍ਸਨਕਾਮਾ ਤੇ, ਯਤੋ ਇਚ੍ਛਾਮਿ ਭਦ੍ਦਨ੍ਤਸ੍ਸ, ਸਮਿਦ੍ਧਾਨਂ ਪਿਹਯਨ੍ਤਿ ਦਲਿਦ੍ਦਾ ਇਚ੍ਚੇਵਮਾਦਿ.
ਕੁਧਦੁਹਇਸ੍ਸਉਸੂਯਪ੍ਪਯੋਗੇ – ਕੋਧਯਤਿ ਦੇਵ ਦਤ੍ਤਸ੍ਸ, ਤਸ੍ਸ ਕੁਜ੍ਝ ਮਹਾਵੀਰ, ਮਾ ਰਟ੍ਠਂ ਵਿਨਸ੍ਸ ਇਦਂ. ਦੁਹਯਤਿ ਦਿਸਾਨਂ ਮੇਘੋ, ਤਿਤ੍ਥਿਯਾ ਸਮਣਾਨਂ ਇਸ੍ਸਯਨ੍ਤਿ ਗੁਣਗਿਦ੍ਧੇਨ, ਤਿਤ੍ਥਿਯਾ ਸਮਣਾਨਂ ਇਸ੍ਸਯਨ੍ਤਿ ਲਾਭਗਿਦ੍ਧੇਨ, ਦੁਜ੍ਜਨਾ ਗੁਣਵਨ੍ਤਾਨਂ ਉਸੂਯਨ੍ਤਿ ਗੁਣਗਿਦ੍ਧੇਨ, ਕਾ ਉਸੂਯਾ ਵਿਜਾਨਤਂ ਇਚ੍ਚੇਵਮਾਦਿ.
ਰਾਧ ਇਕ੍ਖ ਇਚ੍ਚੇਤੇਸਂ ਧਾਤੂਨਂ ਪਯੋਗੇ ਯਸ੍ਸ ਅਕਥਿਤਸ੍ਸ ਪੁਚ੍ਛਨਂ ਕਮ੍ਮਵਿਕ੍ਖ੍ਯਾਪਨਤ੍ਥਞ੍ਚ, ਤਂ ਕਾਰਕਂ ਸਮ੍ਪਦਾਨਸਞ੍ਞਂ ਹੋਤਿ, ਦੁਤਿਯਾ ਚ.
ਆਰਾਧੋਹਂ ਰਞ੍ਞੋ, ਆਰਾਧੋਹਂ ਰਾਜਾਨਂ, ਕ੍ਯਾਹਂ ਅਯ੍ਯਾਨਂ ਅਪਰਜ੍ਝਾਮਿ, ਕ੍ਯਾਹਂ ਅਯ੍ਯੇ ਅਪਰਜ੍ਝਾਮਿ, ਚਕ੍ਖੁਂ ਜਨਸ੍ਸ ਦਸ੍ਸਨਾਯ ਤਂ ਵਿਯ ਮਞ੍ਞੇ, ਆਯਸ੍ਮਤੋ ਉਪਾਲਿਤ੍ਥੇਰਸ੍ਸ ਉਪਸਮ੍ਪਦਾਪੇਕ੍ਖੋ ਉਪਤਿਸ੍ਸੋ, ਆਯਸ੍ਮਨ੍ਤਂ ਵਾ ਇਚ੍ਚੇਵਮਾਦਿ.
ਪਚ੍ਚਾਸੁਣ ਅਨੁਪਤਿਗਿਣਾਨਂ ਪੁਬ੍ਬਕਤ੍ਤਰਿ ਸੁਣੋਤਿਸ੍ਸ ਪਚ੍ਚਾਯੋਗੇ ਯਸ੍ਸ ਕਮ੍ਮੁਨੋ ਪੁਬ੍ਬਸ੍ਸ ਯੋ ਕਤ੍ਤਾ, ਸੋ ਸਮ੍ਪਦਾਨਸਞ੍ਞੋ ਹੋਤਿ.
ਤਂ ਯਥਾ? ਭਗਵਾ ਭਿਕ੍ਖੂ ਏਤਦਵੋਚ.
ਭਿਕ੍ਖੂਤਿ ਅਕਥੀਤ ਕਮ੍ਮਂ, ਏਤਨ੍ਤਿ ਕਥਿਤਕਮ੍ਮਂ. ਯਸ੍ਸ ਕਮ੍ਮੁਨੋ ਪੁਬ੍ਬਸ੍ਸ ਯੋ ਕਤ੍ਤਾ, ਸੋ‘ਭਗਵਾ’ਤਿ ‘‘ਯੋ ਕਰੋਤਿ ਸ ਕਤ੍ਤਾ’’ਤਿ ਸੁਤ੍ਤਵਚਨੇਨ ਕਤ੍ਤੁਸਞ੍ਞੋ. ਏਵਂ ਯਸ੍ਸ ਕਮ੍ਮੁਨੋ ਪੁਬ੍ਬਸ੍ਸ ਯੋ ਕਤ੍ਤਾ, ਸੋ ਸਮ੍ਪਦਾਨਸਞ੍ਞੋ ਹੋਤਿ.
ਤਂ ਯਥਾ? ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ, ਆਸੁਣਨ੍ਤਿ ਬੁਦ੍ਧਸ੍ਸ ਭਿਕ੍ਖੂ.
ਗਿਣਸ੍ਸ ਅਨੁਪਤਿਯੋਗੇ ਯਸ੍ਸ ਕਮ੍ਮੁਨੋ ਪੁਬ੍ਬਸ੍ਸ ਯੋ ਕਤ੍ਤਾ, ਸੋ ਸਮ੍ਪਦਾਨਸਞ੍ਞੋ ਹੋਤਿ.
ਤਂ ਯਥਾ? ਭਿਕ੍ਖੁ ਜਨਂ ਧਮ੍ਮਂ ਸਾਵੇਤਿ, ਤਸ੍ਸ ਭਿਕ੍ਖੁਨੋ ਜਨੋ ਅਨੁਗਿਣਾਤਿ, ਤਸ੍ਸ ਭਿਕ੍ਖੁਨੋ ਜਨੋ ਪਤਿਗਿਣਾਤਿ.
ਯੋ ਵਦੇਤਿ ਸ‘ਕਤ੍ਤਾ’ਤਿ,
ਵੁਤ੍ਤਂ ‘ਕਮ੍ਮ’ਨ੍ਤਿ ਵੁਚ੍ਚਤਿ;
ਯੋ ਪਟਿਗ੍ਗਾਹਕੋ ਤਸ੍ਸ,
‘ਸਮ੍ਪਦਾਨਂ’ ਵਿਜਾਨਿਯਾ.
ਇਚ੍ਚੇਵਮਾਦਿ.
ਆਰੋਚਨਤ੍ਥੇ – ਆਰੋਚਯਾਮਿ ਵੋ ਭਿਕ੍ਖਵੇ, ਆਮਨ੍ਤਯਾਮਿ ਵੋ ਭਿਕ੍ਖਵੇ, ਪਟਿਵੇਦਯਾਮਿ ਵੋ ਭਿਕ੍ਖਵੇ, ਆਰੋਚਯਾਮਿ ਤੇ ਮਹਾਰਾਜ, ਆਮਨ੍ਤਯਾਮਿ ਤੇ ਮਹਾਰਾਜ, ਪਟਿਵੇਦਯਾਮਿ ਤੇ ਮਹਾਰਾਜ ਇਚ੍ਚੇਵਮਾਦਿ.
ਤਦਤ੍ਥੇ – ਊਨਸ੍ਸ ਪਾਰਿਪੂਰਿਯਾ ਤਂ ਚੀਵਰਂ ਨਿਕ੍ਖਿਪਿਤਬ੍ਬਂ. ਬੁਦ੍ਧਸ੍ਸ ਅਤ੍ਥਾਯ, ਧਮ੍ਮਸ੍ਸ ਅਤ੍ਥਾਯ, ਸਙ੍ਘਸ੍ਸ ਅਤ੍ਥਾਯ, ਜੀਵਿਤਂ ਪਰਿਚ੍ਚਜਾਮਿ ਇਚ੍ਚੇਵਮਾਦਿ.
ਤੁਮਤ੍ਥੇ -ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ ਬੁਦ੍ਧੋ ਲੋਕੇ ਉਪ੍ਪਜ੍ਜਤਿ. ਭਿਕ੍ਖੂਨਂ ਫਾਸੁਵਿਹਾਰਾਯ ਵਿਨਯੋ ਪਞ੍ਞਤ੍ਤੋ ਇਚ੍ਚੇਵਮਾਦਿ.
ਅਲਮਤ੍ਥਪ੍ਪਯੋਗੇ-ਅਲਮਿਤਿ ਅਰਹਤਿ ਪਟਿਕ੍ਖਿਤ੍ਤੇਸੁ. ਅਲਂ ਮੇ ਬੁਦ੍ਧੋ, ਅਲਂ ਮੇ ਰਜ੍ਜਂ, ਅਲਂ ਭਿਕ੍ਖੁ ਪਤ੍ਤਸ੍ਸ, ਅਲਂ ਮਲ੍ਲੋ ਮਲ੍ਲਸ੍ਸ, ਅਰਹਤਿ ਮਲ੍ਲੋ ਮਲ੍ਲਸ੍ਸ. ਪਟਿਕ੍ਖਿਤ੍ਤੇ ਅਲਂ ਤੇ ਰੂਪਂ ਕਰਣੀਯਂ, ਅਲਂ ਮੇ ਹਿਰਞ੍ਞਸੁਵਣ੍ਣੇਨ ਇਚ੍ਚੇਵਮਾਦਿ.
ਮਞ੍ਞਤਿਪ੍ਪਯੋਗੇ ਅਨਾਦਰੇ ਅਪ੍ਪਾਣਿਨਿ-ਕਟ੍ਠਸ੍ਸ ਤੁਵਂ ਮਞ੍ਞੇ, ਕਲਿਙ੍ਗਰਸ੍ਸ ਤੁਵਂ ਮਞ੍ਞੇ.
ਅਨਾਦਰੇਤਿ ਕਿਮਤ੍ਥਂ? ਸੁਵਣ੍ਣਂ ਵਿਯ ਤਂ ਮਞ੍ਞੇ.
ਅਪ੍ਪਾਣਿਨੀਤਿ ਕਿਮਤ੍ਥਂ? ਗਦ੍ਰਭਂ ਤੁਵਂ ਮਞ੍ਞੇ ਇਚ੍ਚੇਵਮਾਦਿ.
ਗਤ੍ਯਤ੍ਥਕਮ੍ਮਨਿ-ਗਾਮਸ੍ਸ ਪਾਦੇਨ ਗਤੋ, ਨਗਰਸ੍ਸ ਪਾਦੇਨ ਗਤੋ, ਅਪ੍ਪੋ ਸਗ੍ਗਾਯ ਗਚ੍ਛਤਿ, ਸਗ੍ਗਸ੍ਸ ਗਮਨੇਨ ਵਾ, ਮੂਲਾਯ ਪਟਿਕਸ੍ਸੇਯ੍ਯ ਸਙ੍ਘੋ. ਦੁਤਿਯਾ ਚ, ਗਾਮਂ ਪਾਦੇਨ ਗਤੋ, ਨਗਰਂ ਪਾਦੇਨ ਗਤੋ, ਅਪ੍ਪੋ ਸਗ੍ਗਂ ਗਚ੍ਛਤਿ, ਸਗ੍ਗਂ ਗਮਨੇਨ ਵਾ, ਮੂਲਂ ਪਟਿਕਸ੍ਸੇਯ੍ਯ ਸਙ੍ਘੋ ਇਚ੍ਚੇਵਮਾਦਿ.
ਆਸੀਸਤ੍ਥੇ-ਆਯਸ੍ਮਤੋ ਦੀਘਾਯੁਕੋ ਹੋਤੁ, ਭਦ੍ਦਂ ਭਵਤੋ ਹੋਤੁ, ਕੁਸਲਂ ਭਵਤੋ ਹੋਤੁ, ਅਨਾਮਯਂ ਭਵਤੋ ਹੋਤੁ, ਸੁਖਂ ਭਵਤੋ ਹੋਤੁ, ਸ੍ਵਾਗਤਂ ਭਵਤੋ ਹੋਤੁ, ਅਤ੍ਥੋ ਭਵਤੋ ਹੋਤੁ, ਹਿਤਂ ਭਵਤੋ ਹੋਤੁ ਇਚ੍ਚੇਵਮਾਦਿ.
ਸਮ੍ਮੁਤਿਪ੍ਪਯੋਗੇ– ਅਞ੍ਞਤ੍ਰ ਸਙ੍ਘਸਮ੍ਮੁਤਿਯਾ ਭਿਕ੍ਖੁਸ੍ਸ ਵਿਪ੍ਪਵਤ੍ਥੁਂ ਨ ਵਟ੍ਟਤਿ, ਸਾਧੁ ਸਮ੍ਮੁਤਿ ਮੇ ਤਸ੍ਸ ਭਗਵਤੋ ਦਸ੍ਸਨਾਯ ਇਚ੍ਚੇਵਮਾਦਿ.
ਭਿਯ੍ਯਪ੍ਪਯੋਗੇ – ਭਿਯ੍ਯੋਸੋ ਮਤ੍ਤਾਯਂ ਇਚ੍ਚੇਵਮਾਦਿ.
ਸਤ੍ਤਮ੍ਯਤ੍ਥੇ – ਤੁਯ੍ਹਞ੍ਚਸ੍ਸ ਆਵਿ ਕਰੋਮਿ, ਤਸ੍ਸ ਮੇ ਸਕ੍ਕੋ ਪਾਤੁਰਹੋਸਿ ਇਚ੍ਚੇਵਮਾਦਿ.
ਅਤ੍ਥਗ੍ਗਹਣੇਨ ਬਹੂਸੁ ਅਕ੍ਖਰਪ੍ਪਯੋਗੇਸੁ ਦਿਸ੍ਸਤਿ.
ਤਂ ਯਥਾ? ਉਪਮਂ ਮਤ ਕਰਿਸ੍ਸਾਮਿ, ਧਮ੍ਮਂ ਵੋ ਦੇਸੇਸ੍ਸਾਮਿ.
ਸਾਰਤ੍ਥੇ ਚ – ਦੇਸੇਤੁ ਭਨ੍ਤੇ ਭਗਵਾ ਧਮ੍ਮਂ ਭਿਕ੍ਖੂਨਂ. ਤਸ੍ਸ ਫਾਸੁ ਵਿਹਾਰਾਯ ਹੋਤਿ, ਏਤਸ੍ਸ ਪਹਿਣੇਯ੍ਯ, ਯਥਾ ਨੋ ਭਗਵਾ ਬ੍ਯਾਕਰੇਯ੍ਯ, ਤਥਾਪਿ ਤੇਸਂ ਬ੍ਯਾਕਰਿਸ੍ਸਾਮ, ਕਪ੍ਪਤਿ ਸਮਣਾਨਂ ਆਯੋਗੋ, ਅਮ੍ਹਾਕਂ ਮਣਿਨਾ ਅਤ੍ਥੋ, ਕਿਮਤ੍ਥੋ ਮੇ ਬੁਦ੍ਧੇਨ, ਸੇਯ੍ਯੋ ਮੇ ਅਤ੍ਥੋ, ਬਹੂਪਕਾਰਾ ਭਨ੍ਤੇ ਮਹਾਪਜਾ ਪਤਿਗੋਤਮੀ ਭਗਵਤੋ, ਬਹੂਪਕਾਰਾ ਭਿਕ੍ਖਵੇ ਮਾਤਾਪਿਤਰੋ ਪੁਤ੍ਤਾਨਂ ਇਚ੍ਚੇਵਮਾਦਿ.
ਸੇਸੇਸੁ ਅਕ੍ਖਰਪ੍ਪਯੋਗੇਸੁਪਿ ਅਞ੍ਞੇਪਿ ਪਯੋਗਾ ਪਯੋਗਵਿਚਕ੍ਖਣੇਹਿ ਯੋਜੇਤਬ੍ਬਾ.
ਚਗ੍ਗਹਣਂ ਵਿਕਪ੍ਪਨਤ੍ਥਵਾਗ੍ਗਹਣਾਨੁਕਡ੍ਢਨਤ੍ਥਂ. ਯੇ ਕੇਚਿ ਸਦ੍ਦਾ ਸਮ੍ਪਦਾਨਪ੍ਪਯੋਗਿਕਾ ਮਯਾ ਨੋਪਦਿਟ੍ਠਾ, ਤੇਸਂ ਗਹਣਤ੍ਥਂ ਇਧ ਵਿਕਪ੍ਪੀਯਤਿ ਵਾਸਦ੍ਦੋ.
ਤਂ ਯਥਾ? ਭਿਕ੍ਖੁਸਙ੍ਘਸ੍ਸ ਪਭੂ ਅਯਂ ਭਗਵਾ, ਦੇਸਸ੍ਸ ਪਭੂ ਅਯਂ ਰਾਜਾ. ਖੇਤ੍ਤਸ੍ਸ ਪਭੂ ਅਯਂ ਗਹਪਤਿ, ਅਰਞ੍ਞਸ੍ਸ ਪਭੂ ਅਯਂ ਲੁਦ੍ਦਕੋ ਇਚ੍ਚੇਵਮਾਦਿ. ਕ੍ਵਚਿ ਦੁਤਿਯਾ ਤਤਿਯਾ ਪਞ੍ਚਮੀ ਛਟ੍ਠੀ ਸਤ੍ਤਮ੍ਯਤ੍ਥੇਸੁ ਚ.
੧੭੮. , ੩੨੦. ਯੋਧਾਰੋ ਤਮੋਕਾਸਂ.
ਯੋ ਆਧਾਰੋ, ਤਂ ਓਕਾਸਸਞ੍ਞਂ ਹੋਤਿ. ਸ੍ਵਾਧਾਰੋ ਚਤੁਬ੍ਬਿਧੋ ਬ੍ਯਾਪਿਕੋ, ਓਪਸਿਲੇਸਿਕੋ, ਵੇਸਯਿਕੋ ਸਾਮੀਪਿਕੋ ਚਾਤਿ.
ਤਤ੍ਥ ਬ੍ਯਾਪਿਕੋ ਤਾਵ–ਜਲੇਸੁ ਖੀਰਂ ਤਿਟ੍ਠਤਿ, ਤਿਲੇਸੁ ਤੇਲਂ, ਉਚ੍ਛੂਸੁ ਰਸੋ.
ਓਪਸਿਲੇਸਿਕੋ–ਪਰਿਯਙ੍ਕੇ ਰਾਜਾ ਸੇਤਿ, ਆਸਨੇ ਉਪਵਿਟ੍ਠੋ ਸਙ੍ਘੋ.
ਵੇਸਯਿਕੋ–ਭੂਮੀਸੁ ਮਨੁਸ੍ਸਾ ਚਰਨ੍ਤਿ, ਅਨ੍ਤਲਿਕ੍ਖੇ ਵਾਯੂ ਵਾਯਨ੍ਤਿ. ਆਕਾਸੇ ਸਕੁਣਾ ਪਕ੍ਖਨ੍ਦਨ੍ਤਿ.
ਸਾਮੀਪਿਕੋ–ਵਨੇ ਹਤ੍ਥਿਨੋ ਚਰਨ੍ਤਿ, ਗਙ੍ਗਾਯਂ ਘੋਸੋ ਤਿਟ੍ਠਤਿ, ਵਜੇ ਗਾਵੋ ਦੁਹਨ੍ਤਿ, ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ.
ਓਕਾਸਮਿਚ੍ਚਨੇਨ ਕ੍ਵਤ੍ਥੋ? ਓਕਾਸੇ ਸਤ੍ਤਮੀ.
੨੭੯. , ੨੯੨. ਯੇਨ ਵਾ ਕਯਿਰਤੇ ਤਂ ਕਰਣਂ.
ਯੇਨ ਵਾ ਕਯਿਰਤੇ, ਯੇਨ ਵਾ ਪਸ੍ਸਤਿ, ਯੇਨ ਵਾ ਸੁਣਾਤਿ, ਤਂ ਕਾਰਕਂ ਕਰਣਸਞ੍ਞਂ ਹੋਤਿ.
ਦਤ੍ਤੇਨ ਵਿਹਿਂ ਲੁਨਾਤਿ, ਵਾਸਿਯਾ ਕਟ੍ਠਂ ਤਚ੍ਛਤਿ, ਫਰਸੁਨਾ ਰੁਕ੍ਖਂ ਛਿਨ੍ਦਤਿ, ਕੁਦਾਲੇਨ ਪਥਵਿਂ ਖਣਤਿ, ਸਤ੍ਥੇਨ ਕਮ੍ਮਂ ਕਰੋਤਿ. ਚਕ੍ਖੁਨਾ ਰੂਪਂ ਪਸ੍ਸਤਿ.
ਕਰਣਮਿਚ੍ਚਨੇਨ ਕ੍ਵਤ੍ਥੋ? ਕਰਣੇ ਤਤਿਯਾ.
੨੮੦. , ੨੮੫. ਯਂ ਕਰੋਤਿ ਤਂ ਕਮ੍ਮਂ.
ਯਂ ਵਾ ਕਰੋਤਿ, ਯਂ ਵਾ ਪਸ੍ਸਤਿ, ਯਂ ਵਾ ਸੁਣਾਤਿ, ਤਂ ਕਾਰਕਂ ਕਮ੍ਮਸਞ੍ਞਂ ਹੋਤਿ.
ਛਤ੍ਤਂ ਕਰੋਤਿ, ਰਥਂ ਕਰੋਤਿ, ਰੂਪਂ ਪਸ੍ਸਤਿ, ਸਦ੍ਦਂ ਸੁਣਾਤਿ, ਕਣ੍ਟਕਂ ਮਦ੍ਦਤਿ, ਵਿਸਂ ਗਿਲਤਿ.
ਕਮ੍ਮਮਿਚ੍ਚਨੇਨ ਕ੍ਵਤ੍ਥੋ? ਕਮ੍ਮਤ੍ਥੇ ਦੁਤਿਯਾ.
੨੮੧. , ੨੯੪. ਯੋ ਕਰੋਤਿ ਸ ਕਤ੍ਤਾ.
ਯੋ ਕਰੋਤਿ, ਸੋ ਕਤ੍ਤੁਸਞ੍ਞੋ ਹੋਤਿ.
ਅਹਿਨਾ ਦਟ੍ਠੋ ਨਰੋ, ਗਰੁਲ਼ੇਨ ਹਤੋ ਨਾਗੋ. ਬੁਦ੍ਧੇਨ ਜਿਤੋ ਮਾਰੋ, ਉਪਗੁਤ੍ਤੇਨ ਮਾਰੋ ਬਨ੍ਧੋ.
ਕਤ੍ਤੁਇਚ੍ਚਨੇਨ ਕ੍ਵਤ੍ਥੋ? ਕਤ੍ਤਰਿ ਚ.
੨੮੨. , ੨੯੫. ਯੋ ਕਾਰੇਤਿ ਸ ਹੇਤੁ.
ਯੋ ਕਤ੍ਤਾਰਂ ਕਾਰੇਤਿ, ਸੋ ਹੇਤੁਸਞ੍ਞੋ ਹੋਤਿ, ਕਤ੍ਤਾ ਚ.
ਸੋ ਪੁਰਿਸੋ ਤਂ ਪੁਰਿਸਂ ਕਮ੍ਮਂ ਕਾਰੇਤਿ ਸੋ ਪੁਰਿਸੋ ਤੇਨ ਪੁਰਿਸੇਨ ਕਮ੍ਮਂ ਕਾਰੇਤਿ, ਸੋ ਪੁਰਿਸੋ ਤਸ੍ਸ ਪੁਰਿਸਸ੍ਸ ਕਮ੍ਮਂ ਕਾਰੇਤਿ. ਏਵਂ ਹਾਰੇਤਿ ਪਾਠੇਤਿ ਪਾਚੇਤਿ, ਧਾਰੇਤਿ.
ਹੇਤੁਇਚ੍ਚਨੇਨ ਕ੍ਵਤ੍ਥੋ? ਧਾਤੂਹਿ ਣੇ ਣਯ ਣਾਪੇ ਣਾਪਯਾ ਕਾਰਿਤਾਨਿ ਹੇਤ੍ਵਤ੍ਥੇ.
੨੮੩. , ੩੧੬. ਯਸ੍ਸ ਵਾ ਪਰਿਗ੍ਗਹੋ ਤਂ ਸਾਮੀ.
ਯਸ੍ਸ ਵਾ ਪਰਿਗ੍ਗਹੋ, ਤਂ ਸਾਮੀਸਞ੍ਞਂ ਹੋਤਿ.
ਤਸ੍ਸ ਭਿਕ੍ਖੁਨੋ ਪਟਿਵੀਸੋ, ਤਸ੍ਸ ਭਿਕ੍ਖੁਨੋ ਪਤ੍ਤੋ, ਤਸ੍ਸ ਭਿਕ੍ਖੁਨੋ ਚੀਵਰਂ, ਅਤ੍ਤਨੋ ਮੁਖਂ.
ਸਾਮੀਇਚ੍ਚਨੇਨ ਕ੍ਵਤ੍ਥੋ? ਸਾਮਿਸ੍ਮਿਂ ਛਟ੍ਠੀ.
੨੮੪. , ੨੮੩. ਲਿਙ੍ਗਤ੍ਥੇ ਪਠਮਾ.
ਲਿਙ੍ਗਤ੍ਥਾਭਿਧਾਨਮਤ੍ਤੇ ਪਠਮਾਵਿਭਤ੍ਤਿ ਹੋਤਿ.
ਪੁਰਿਸੋ, ਪੁਰਿਸਾ, ਏਕੋ, ਦ੍ਵੇ, ਚ, ਵਾ, ਹੇ, ਅਹੇ, ਰੇ, ਅਰੇ.
੨੮੫. , ੭੦. ਆਲਪਨੇ ਚ.
ਆਲਪਨਤ੍ਥਾ ਧਿਕੇ ਲਿਙ੍ਗਤ੍ਥਾਭਿਧਾਨਮਤ੍ਤੇ ਚ ਪਠਮਾਵਿਭਤ੍ਤਿ ਹੋਤਿ.
ਭੋ ਪੁਰਿਸ, ਭਵਨ੍ਤੋ ਪੁਰਿਸਾ, ਭੋ ਰਾਜ, ਭਵਨ੍ਤੋ ਰਾਜਾਨੋ, ਹੇ ਸਖੇ, ਹੇ ਸਖਿਨੋ.
੨੮੬. , ੨੯੧. ਕਰਣੇ ਤਤਿਯਾ.
ਕਰਣਕਾਰਕੇ ਤਤਿਯਾਵਿਭਤ੍ਤਿ ਹੋਤਿ.
ਅਗ੍ਗਿਨਾ ਕੁਟਿਂ ਝਾਪੇਤਿ, ਮਨਸਾ ਚੇ ਪਦੁਟ੍ਠੇਨ, ਮਨਸਾ ਚੇ ਪਸਨ੍ਨੇਨ, ਕਾਯੇਨ ਕਮ੍ਮਂ ਕਰੋਤਿ.
੨੮੭. , ੨੯੯. ਸਹਾਦਿਯੋਗੇ ਚ.
ਸਹਾਦਿਯੋਗਤ੍ਥੇ ਚ ਤਤਿਯਾਵਿਭਤ੍ਤਿ ਹੋਤਿ.
ਸਹਾਪਿ ਗਗ੍ਗੇਨ ਸਙ੍ਘੋ ਉਪੋਸਥਂ ਕਰੇਯ੍ਯ, ਵਿਨਾਪਿ ਗਗ੍ਗੇਨ, ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਂ, ਸਹਸ੍ਸੇਨ ਸਮਂ ਮਿਤਾ.
੨੮੮. , ੨੯੩. ਕਤ੍ਤਰਿ ਚ.
ਕਤ੍ਤਰਿ ਚ ਤਤਿਯਾਵਿਭਤ੍ਤਿ ਹੋਤਿ.
ਰਞ੍ਞਾ ਹਤੋ ਪੋਸੋ, ਯਕ੍ਖੇਨ ਦਿਨ੍ਨੋ ਵਰੋ, ਅਹਿਨਾ ਦਟ੍ਠੋ ਨਰੋ.
੨੮੯. , ੨੯੭. ਹੇਤ੍ਵਤ੍ਥੇ ਚ.
ਹੇਤ੍ਵਤ੍ਥੇ ਚ ਤਤਿਯਾਵਿਭਤ੍ਤਿ ਹੋਤਿ.
ਅਨ੍ਨੇਨ ਵਸਤਿ, ਧਮ੍ਮੇਨ ਵਸਤਿ, ਵਿਜ੍ਜਾਯ ਵਸਤਿ, ਸਕ੍ਕਾਰੇਨ ਵਸਤਿ.
੨੯੦. , ੨੯੮. ਸਤ੍ਤਮ੍ਯਤ੍ਥੇ ਚ.
ਸਤ੍ਤਮ੍ਯਤ੍ਥੇ ਚ ਤਤਿਯਾਵਿਭਤ੍ਤਿ ਹੋਤਿ.
ਤੇਨ ਕਾਲੇਨ, ਤੇਨ ਸਮਯੇਨ. (ਯੇਨ ਕਾਲੇਨ, ਯੇਨ ਸਮਯੇਨ,) ਤੇਨ ਖੋ ਪਨ ਸਮਯੇਨ.
੨੯੧. , ੨੯੯. ਯੇਨਙ੍ਗਵਿਕਾਰੋ.
ਯੇਨ ਬ੍ਯਾਧਿਮਤਾ ਅਙ੍ਗੇਨ ਅਙ੍ਗਿਨੋ ਵਿਕਾਰੋ ਲਕ੍ਖੀਯਤੇ. ਤਤ੍ਥ ਤਤਿਯਾਵਿਭਤ੍ਤਿ ਹੋਤਿ.
ਅਕ੍ਖਿਨਾ ਕਾਣੋ, ਹਤ੍ਥੇਨ ਕੁਣੀ, ਕਾਣਂ ਪਸ੍ਸਤਿ ਨੇਤ੍ਤੇਨ, ਪਾਦੇਨ ਖਞ੍ਜੋ, ਪਿਟ੍ਠਿਯਾ ਖੁਜ੍ਜੋ.
੨੯੨. , ੩੦੦. ਵਿਸੇਸਨੇ ਚ.
ਵਿਸੇਸਨਤ੍ਥੇ ਚ ਤਤਿਯਾਵਿਭਤ੍ਤਿ ਹੋਤਿ.
ਗੋਤ੍ਤੇਨ ਗੋਤਮੋ ਨਾਥੋ, ਸੁਵਣ੍ਣੇਨ ਅਭਿਰੂਪੋ, ਤਪਸਾ ਉਤ੍ਤਮੋ.
੨੯੩. , ੩੦੧. ਸਮ੍ਪਦਾਨੇ ਚਤੁਤ੍ਥੀ.
ਸਮ੍ਪਦਾਨਕਾਰਕੇ ਚਤੁਤ੍ਥੀਵਿਭਤ੍ਤਿ ਹੋਤਿ.