੪. ਸਮਾਸਕਪ੍ਪ
ਸਤ੍ਤਮਕਣ੍ਡ
੩੧੬. , ੩੩੧. ਨਾਮਾਨਂ ਸਮਾਸੋ ਯੁਤ੍ਤਤ੍ਥੋ.
ਤੇਸਂ ਨਾਮਾਨਂ ਪਯੁਜ੍ਜਮਾਨਪਦਤ੍ਥਾਨਂ ਯੋ ਯੁਤ੍ਤਤ੍ਥੋ, ਸੋ ਸਮਾਸਸਞ੍ਞੋ ਹੋਤਿ.
ਕਥਿਨਦੁਸ੍ਸਂ, ਆਗਨ੍ਤੁਕਭਤ੍ਤਂ, ਜੀਵਿਤਿਨ੍ਦ੍ਰਿਯਂ, ਸਮਣਬ੍ਰਾਹ੍ਮਣਾ, ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਬ੍ਰਾਹ੍ਮਣ ਗਹਪਤਿਕਾ.
ਨਾਮਾਨਮਿਤਿ ਕਿਮਤ੍ਥਂ? ਦੇਵਦਤ੍ਤੋ ਪਚਤਿ, ਯਞ੍ਞਦਤ੍ਤੋ ਪਚਤਿ.
ਯੁਤ੍ਤਤ੍ਥੋਤਿ ਕਿਮਤ੍ਥਂ? ਭਤੋ ਰਞ੍ਞੋ ਪੁਤ੍ਤੋ ਦੇਵਦਤ੍ਤਸ੍ਸ.
ਸਮਾਸਇਚ੍ਚਨੇਨ ਕ੍ਵਤ੍ਥੋ? ਕ੍ਵਚਿ ਸਮਾਸਨ੍ਤਗਤਾਨਮਕਾਰਨ੍ਤੋ.
੩੧੭. , ੩੩੨. ਤੇਸਂ ਵਿਭਤ੍ਤਿਯੋ ਲੋਪਾ ਚ.
ਤੇਸਂ ਯੁਤ੍ਤਤ੍ਥਾਨਂ ਸਮਾਸਾਨਂ ਵਿਭਤ੍ਤਿਯੋ ਲੋਪਾ ਚ ਹੋਨ੍ਤਿ.
ਕਥਿਨਦੁਸ੍ਸਂ, ਆਗਨ੍ਤੁਕਭਤ੍ਤਂ.
ਤੇਸਂਗਹਣੇਨ ਸਮਾਸਤਦ੍ਧਿਤਾਖ੍ਯਾਤਕਿਤਕਾਨਂ ਵਿਭਤ੍ਤਿਪਚ੍ਚਯਪਦਕ੍ਖਰਾਗਮਾ ਚ ਲੋਪਾ ਹੋਨ੍ਤਿ. ਵਾਸਿਟ੍ਠੋ, ਵੇਨਤੇਯ੍ਯੋ.
ਚਗ੍ਗਹਣ ਮਵਧਾਰਣਤ੍ਥਂ, ਪਭਙ੍ਕਰੋ, ਅਮਤਦ੍ਦਦੋ, ਮੇਧਙ੍ਕਰੋ, ਦੀਪਙ੍ਕਰੋ.
੩੧੮. , ੩੩੩. ਪਕਤਿ ਚਸ੍ਸ ਸਰਨ੍ਤਸ੍ਸ.
ਲੁਤ੍ਤਾਸੁ ਵਿਭਤ੍ਤੀਸੁ ਅਸ੍ਸ ਸਰਨ੍ਤਸ੍ਸ ਲਿਙ੍ਗਸ੍ਸ ਪਕਤਿਰੂਪਾਨਿ ਹੋਨ੍ਤਿ.
ਚਕ੍ਖੁਸੋਤਂ, ਮੁਖਨਾਸਿਕਂ, ਰਾਜਪੁਤ੍ਤੋ, ਰਾਜਪੁਰਿਸੋ.
੩੧੯. , ੩੩੦. ਉਪਸਗ੍ਗਨਿਪਾਤਪੁਬ੍ਬਕੋ ਅਬ੍ਯਯੀਭਾਵੋ.
ਉਪਸਗ੍ਗਨਿਪਾਤਪੁਬ੍ਬਕੋ ਸਮਾਸੋ ਅਬ੍ਯਯੀਭਾਵਸਞ੍ਞੋ ਹੋਤਿ.
ਨਗਰਸ੍ਸ ਸਮੀਪੇ ਪਵਤ੍ਤਤਿ ਕਥਾ ਇਤਿ ਉਪਨਗਰਂ, ਦਰਥਾਨਂ ਅਭਾਵੋ ਨਿਦ੍ਦਰਥਂ, ਮਕਸਾਨਂ ਅਭਾਵੋ ਨਿਮ੍ਮਕਸਂ, ਵੁਡ੍ਢਾਨਂ ਪਟਿਪਾਟਿ ਯਥਾਵੁਡ੍ਢਂ, ਯੇ ਯੇ ਵੁਡ੍ਢਾ ਵਾ ਯਥਾਵੁਡ੍ਢਂ, ਜੀਵਸ੍ਸ ਯਤ੍ਤਕੋ ਪਰਿਚ੍ਛੇਦੋ ਯਾਵਜੀਵਂ, ਚਿਤ੍ਤਮਧਿਕਿਚ੍ਚ ਪਵਤ੍ਤਨ੍ਤਿ ਤੇ ਧਮ੍ਮਾਤਿ ਅਧਿਚਿਤ੍ਤਂ, ਪਬ੍ਬਤਸ੍ਸ ਤਿਰੋ ਤਿਰੋਪਬ੍ਬਤਂ, ਸੋਤਸ੍ਸ ਪਤਿ ਪਵਤ੍ਤਤਿ ਨਾਵਾ ਇਤਿ ਪਤਿਸੋਤਂ, ਪਾਸਾਦਸ੍ਸ ਅਨ੍ਤੋ ਅਨ੍ਤੋਪਾਸਾਦਂ.
ਅਬ੍ਯਯੀਭਾਵਮਿਚ੍ਚਨੇਨ ਕ੍ਵਤ੍ਥੋ? ਅਂਵਿਭਤ੍ਤੀਨ ਮਕਾਰਨ੍ਤਾ ਅਬ੍ਯਯੀਭਾਵਾ.
੩੨੦. , ੩੩੫. ਸੋ ਨਪੁਂਸਕਲਿਙ੍ਗੋ.
ਸੋ ਅਬ੍ਯਯੀਭਾਵਸਮਾਸੋ ਨਪੁਂਸਕਲਿਙ੍ਗੋਵ ਦਟ੍ਠਬ੍ਬੋ.
ਕੁਮਾਰੀਸੁ ਅਧਿਕਿਚ੍ਚ ਪਵਤ੍ਤਤਿ ਕਥਾ ਇਤਿ ਅਧਿਕੁਮਾਰਿ, ਵਧੁਯਾ ਸਮੀਪੇ ਪਵਤ੍ਤਤਿ ਕਥਾ ਇਤਿ ਉਪਵਧੁ, ਗਙ੍ਗਾਯ ਸਮੀਪੇ ਪਵਤ੍ਤਤਿ ਕਥਾ ਇਤਿ ਉਪਗਙ੍ਗਂ, ਮਣਿਕਾਯ ਸਮੀਪੇ ਪਵਤ੍ਤਤਿ ਕਥਾ ਇਤਿ ਉਪਮਣਿਕਂ.
੩੨੧. , ੩੪੯. ਦਿਗੁਸ੍ਸੇਕਤ੍ਤਂ.
ਦਿਗੁਸ੍ਸ ਸਮਾਸਸ੍ਸ ਏਕਤ੍ਤਂ ਹੋਤਿ, ਨਪੁਂਸਕਲਿਙ੍ਗਤ੍ਤਞ੍ਚ.
ਤਯੋ ਲੋਕਾ ਤਿਲੋਕਂ, ਤਯੋ ਦਣ੍ਡਾ ਤਿਦਣ੍ਡਂ, ਤੀਣਿ ਨਯਨਾਨਿ ਤਿਨਯਨਂ, ਤਯੋ ਸਿਙ੍ਗਾ ਤਿਸਿਙ੍ਗਂ. ਚਤਸ੍ਸੋ ਦਿਸਾ ਚਤੁਦ੍ਦਿਸਂ, ਪਞ੍ਚ ਇਨ੍ਦ੍ਰਿਯਾਨਿ ਪਞ੍ਚਿਨ੍ਦ੍ਰਿਯਂ.
੩੨੨. , ੩੫੯. ਤਥਾ ਦ੍ਵਨ੍ਦੇ ਪਾਣਿ ਤੂਰਿਯ ਯੋਗ੍ਗਸੇਨਙ੍ਗਖੁਦ੍ਦਜਨ੍ਤੁਕ ਵਿਵਿਧਵਿਰੁਦ੍ਧ ਵਿਸਭਾਗਤ੍ਥਾਦੀਨਞ੍ਚ.
ਤਥਾ ਦ੍ਵਨ੍ਦੇ ਸਮਾਸੇ ਪਾਣਿ ਤੂਰਿਯ ਯੋਗ੍ਗ ਸੇਨਙ੍ਗਖੁਦ੍ਦਜਨ੍ਤੁਕ ਵਿਵਿਧਵਿਰੁਦ੍ਧ ਵਿਸਭਾਗਤ੍ਥਇਚ੍ਚੇਵਮਾਦੀਨਂ ਏਕਤ੍ਤਂ ਹੋਤਿ, ਨਪੁਂਸਕਲਿਙ੍ਗਤ੍ਤਞ੍ਚ.
ਤਂ ਯਥਾ? ਚਕ੍ਖੁ ਚ ਸੋਤਞ੍ਚ ਚਕ੍ਖੁਸੋਤਂ, ਮੁਖਞ੍ਚ ਨਾਸਿਕਾ ਚ ਮੁਖਨਾਸਿਕਂ, ਛਵਿ ਚ ਮਂਸਞ੍ਚ ਲੋਹਿਤਞ੍ਚ ਛਵਿਮਂਸਲੋਹਿਤਂ. ਏਵਂ ਪਾਣ੍ਯਙ੍ਗਤ੍ਥੇ.
ਸਙ੍ਖੋ ਚ ਪਣਵੋ ਚ ਸਙ੍ਖਪਣਵਂ, ਗੀਤਞ੍ਚ ਵਾਦਿਤਞ੍ਚ ਗੀਤਵਾਦਿਤਂ, ਦਦ੍ਦਰਿ ਚ ਡਿਣ੍ਡਿਮੋ ਚ ਦਦ੍ਦਰਿਡਿਣ੍ਡਿਮਂ. ਏਵਂ ਤੂਰਿਯਙ੍ਗਤ੍ਥੇ.
ਫਾਲੋ ਚ ਪਾਚਨਞ੍ਚ ਫਾਲਪਾਚਨਂ, ਯੁਗਞ੍ਚ ਨਙ੍ਗਲਞ੍ਚ ਯੁਗਨਙ੍ਗਲਂ. ਏਵਂ ਯੋਗ੍ਗਙ੍ਗਤ੍ਥੇ.
ਅਸਿ ਚ ਚਮ੍ਮਞ੍ਚ ਅਸਿਚਮ੍ਮਂ, ਧਨੁ ਚ ਕਲਾਪੋ ਚ ਧਨੁਕਲਾਪਂ, ਹਤ੍ਥੀ ਚ ਅਸ੍ਸੋ ਚ ਹਤ੍ਥਿਅਸ੍ਸਂ, ਰਥੋ ਚ ਪਤ੍ਤਿਕੋ ਚ ਰਥਪਤ੍ਤਿਕਂ. ਏਵਂ ਸੇਨਙ੍ਗਤ੍ਥੇ.
ਡਂਸਾ ਚ ਮਕਸਾ ਚ ਡਂਸਮਕਸਂ, ਕੁਨ੍ਥੋ ਚ ਕਿਪਿਲ੍ਲਿਕੋ ਚ ਕੁਨ੍ਥਕਿਪਿਲ੍ਲਿਕਂ, ਕੀਟੋ ਚ ਸਰੀਸਪੋ ਚ ਕੀਟਸਰੀਸਪਂ. ਏਵਂ ਖੁਦ੍ਦਜਨ੍ਤੁਕਤ੍ਥੇ.
ਅਹਿ ਚ ਨਕੁਲੋ ਚ ਅਹਿਨਕੁਲਂ, ਬਿਲ਼ਾਰੋ ਚ ਮੂਸਿਕੋ ਚ ਬਿਲ਼ਾਰਮੂਸਿਕਂ, ਕਾਕੋ ਚ ਉਲੂਕੋ ਚ ਕਾਕੋਲੂਕਂ. ਏਵਂ ਵਿਵਿਧਵਿਰੁਦ੍ਧਤ੍ਥੇ.
ਸੀਲਞ੍ਚ ਪਞ੍ਞਾਣਞ੍ਚ ਸੀਲਪਞ੍ਞਾਣਂ, ਸਮਥੋ ਚ ਵਿਪਸ੍ਸਨਾ ਚ ਸਮਥਵਿਪਸ੍ਸਨਂ, ਵਿਜ੍ਜਾ ਚ ਚਰਣਞ੍ਚ ਵਿਜ੍ਜਾਚਰਣਂ. ਏਵਂ ਵਿਸਭਾਗਤ੍ਥੇ.
ਆਦਿਗ੍ਗਹਣਂ ਕਿਮਤ੍ਥਂ? ਦਾਸੀ ਚ ਦਾਸੋ ਚ ਦਾਸਿਦਾਸਂ, ਇਤ੍ਥੀ ਚ ਪੁਮਾ ਚ ਇਤ੍ਥਿਪੁਮਂ, ਪਤ੍ਤੋ ਚ ਚੀਵਰਞ੍ਚ ਪਤ੍ਤਚੀਵਰਂ, ਛਤ੍ਤਞ੍ਚ ਉਪਾਹਨਾ ਚ ਛਤ੍ਤੁਪਾਹਨਂ, ਤਿਕਞ੍ਚ ਚਤੁਕ੍ਕਞ੍ਚ ਤਿਕਚਤੁਕ੍ਕਂ, ਵੇਨੋ ਚ ਰਥਕਾਰੋ ਚ ਵੇਨਰਥਕਾਰਂ, ਸਾਕੁਣਿਕੋ ਚ ਮਾਗਵਿਕੋ ਚ ਸਵਕੁਣਿਕਮਾਗਵਿਕਂ, ਦੀਘੋ ਚ ਮਜ੍ਝਿਮੋ ਚ ਦੀਘਮਜ੍ਝਿਮਂ ਇਚ੍ਚੇਵਮਾਦਿ.
੩੨੩. , ੩੬੦. ਵਿਭਾਸਾ ਰੁਕ੍ਖ ਤਿਣ ਪਸੁਖ ਨ ਧਞ੍ਞ ਜਨਪਦਾਦੀਨਞ੍ਚ.
ਰੁਕ੍ਖਤਿਣ ਪਸੁ ਧਨ ਧਞ੍ਞ ਜਨਪਦਇਚ੍ਚੇਵਮਾਦੀਨਂ ਵਿਭਾਸਾ ਏਕਤ੍ਤਂ ਹੋਤਿ, ਨਪੁਂਸਕਲਿਙ੍ਗਤ੍ਤਞ੍ਚ ਦ੍ਵਨ੍ਦੇ ਸਮਾਸੇ. ਅਸ੍ਸਤ੍ਥੋ ਚ ਕਪੀਤਨੋ ਚ ਅਸ੍ਸਤ੍ਥਕਪੀਤਨਂ, ਅਸ੍ਸਤ੍ਥਕਪੀਤਨਾ ਵਾ. ਉਸੀਰਞ੍ਚ ਬੀਰਣਞ੍ਚ ਉਸੀਰਬੀਰਣਂ, ਉਸੀਰਬੀਰਣਾ ਵਾ. ਅਜੋ ਚ ਏਲ਼ਕੋ ਚ ਅਜੇਲ਼ਕਂ, ਅਜੇਲ਼ਕਾ ਵਾ. ਹਿਰਞ੍ਞਞ੍ਚ ਸੁਵਣ੍ਣਞ੍ਚ ਹਿਰਞ੍ਞਸੁਵਣ੍ਣਂ, ਹਿਰਞ੍ਞਸੁਵਣ੍ਣਾ ਵਾ. ਸਾਲਿ ਚ ਯਵੋ ਚ ਸਾਲਿਯਵਂ, ਸਾਲਿਯਵਾ ਵਾ. ਕਾਸੀ ਚ ਕੋਸਲਾ ਚ ਕਾਸਿਕੋਸਲਂ, ਕਾਸਿਕੋਸਲਾ ਵਾ.
ਆਦਿਗ੍ਗਹਣਂ ਕਿਮਤ੍ਥਂ? ਸਾਵਜ੍ਜਞ੍ਚ ਅਨਵਜ੍ਜਞ੍ਚ ਸਾਵਜ੍ਜਾਨਵਜ੍ਜਂ, ਸਾਵਜ੍ਜਾ ਨਵਜ੍ਜਾ ਵਾ. ਹੀਨਞ੍ਚ ਪਣੀਤਞ੍ਚ ਹੀਨਪਣੀਤਂ. ਹੀਨਪਣੀਤਾ ਵਾ. ਕਣ੍ਹੋ ਚ ਸੁਕ੍ਕੋ ਚ ਕਣ੍ਹਸੁਕ੍ਕਂ, ਕਣ੍ਹਸੁਕ੍ਕਾ ਵਾ.
੩੨੪. , ੩੩੯. ਦ੍ਵਿਪਦੇ ਤੁਲ੍ਯਾਧਿਕਰਣੇ ਕਮ੍ਮਧਾਰਯੋ.
ਦ੍ਵੇ ਪਦਾਨਿ ਤੁਲ੍ਯਾਧਿਕਰਣਾਨਿ ਯਦਾ ਸਮਸ੍ਯਨ੍ਤੇ, ਤਦਾ ਸੋ ਸਮਾਸੋ ਕਮ੍ਮਧਾਰਯਸਞ੍ਞੋ ਹੋਤਿ.
ਮਹਨ੍ਤੋ ਚ ਸੋ ਪੁਰਿਸੋ ਚਾਤਿ ਮਹਾਪੁਰਿਸੋ, ਕਣ੍ਹੋ ਚ ਸੋ ਸਪ੍ਪੋ ਚਾਤਿ ਕਣ੍ਹਸਪ੍ਪੋ, ਨੀਲਞ੍ਚ ਤਂ ਉਪ੍ਪਲਞ੍ਚਾਤਿ ਨੀਲੁਪ੍ਪਲਂ, ਲੋਹਿਤਞ੍ਚ ਤਂ ਚਨ੍ਦਨਞ੍ਚਾਤਿ ਲੋਹਿਤਚਨ੍ਦਨਂ, ਬ੍ਰਾਹ੍ਮਣੀ ਚ ਸਾ ਦਾਰਿਕਾ ਚਾਤਿ ਬ੍ਰਾਹ੍ਮਣਦਾਰਿਕਾ, ਖਤ੍ਤਿਯਾ ਚ ਸਾ ਕਞ੍ਞਾ ਚਾਤਿ ਖਤ੍ਤਿਯਕਞ੍ਞਾ.
ਕਮ੍ਮਧਾਰਯਇਚ੍ਚਨੇਨ ਕ੍ਵਤ੍ਥੋ? ਕਮ੍ਮਧਾਰਯਸਞ੍ਞੇ ਚ.
੩੨੫. , ੩੪੮. ਸਙ੍ਖ੍ਯਾਪੁਬ੍ਬੋ ਦਿਗੁ.
ਸਙ੍ਖ੍ਯਾਪੁਬ੍ਬੋ ਕਮ੍ਮਧਾਰਯਸਮਾਸੋ ਦਿਗੁਸਞ੍ਞੋ ਹੋਤਿ.
ਤੀਣਿ ਮਲਾਨਿ ਤਿਮਲਂ, ਤੀਣਿ ਫਲਾਨਿ ਤਿਫਲਂ, ਤਯੋ ਲੋਕਾ ਤਿਲੋਕਂ, ਤਯੋ ਦਣ੍ਡਾ ਤਿਦਣ੍ਡਂ, ਚਤਸ੍ਸੋ ਦਿਸਾ ਚਤੁਦ੍ਦਿਸਂ, ਪਞ੍ਚ ਇਨ੍ਦ੍ਰਿਯਾਨਿ ਪਞ੍ਚਿਨ੍ਦ੍ਰਿਯਂ, ਸਤ੍ਤ ਗੋਦਾਵਰਿਯੋ ਸਤ੍ਤਗੋਦਾਵਰਂ.
ਦਿਗੁਇਚ੍ਚਨੇਨ ਕ੍ਵਤ੍ਥੋ? ਦਿਗੁਸ੍ਸੇ ਕਤ੍ਤਂ.
੩੨੬. , ੩੪੧. ਉਭੇ ਤਪ੍ਪੁਰਿਸਾ.
ਉਭੇ ਦਿਗੁਕਮ੍ਮਧਾਰਯਸਮਾਸਾ ਤਪ੍ਪੁਰਿਸਸਞ੍ਞਾ ਹੋਨ੍ਤਿ.
ਨ ਬ੍ਰਾਹ੍ਮਣੋ ਅਬ੍ਰਾਹ੍ਮਣੋ, ਨ ਵਸਲੋ ਅਵਸਲੋ, ਨ ਭਿਕ੍ਖੁ ਅਭਿਕ੍ਖੁ, ਨ ਪਞ੍ਚਵਸ੍ਸਂ ਅਪਞ੍ਚਵਸ੍ਸਂ, ਨ ਪਞ੍ਚਪੂਲੀ ਅਪਞ੍ਚਪੂਲੀ, ਨ ਸਤ੍ਤਗੋਦਾਵਰਂਅਸਤ੍ਤਗੋਦਾਵਰਂ, ਨ ਦਸਗਵਂ ਅਦਸਗਵਂ, ਨ ਪਞ੍ਚਗਵਂ ਅਪਞ੍ਚਗਵਂ.
ਤਪ੍ਪੁਰਿਸਇਚ੍ਚਨੇਨ ਕ੍ਵਤ੍ਥੋ? ਅਤ੍ਤਂ ਨਸ੍ਸ ਤਪ੍ਪੁਰਿਸੇ.
੩੨੭. , ੩੫੧. ਅਮਾਦਯੋ ਪਰਪਦੇਭਿ.
ਤਾ ਅਮਾਦਯੋ ਨਾਮੇਹਿ ਪਰਪਦੇਭਿ ਯਦਾ ਸਮਸ੍ਯਨ੍ਤੇ, ਤਦਾ ਸੋ ਸਮਾਸੋ ਤਪ੍ਪੁਰਿਸਸਞ੍ਞੋ ਹੋਤਿ.
ਭੂਮਿਂ ਗਤੋ ਭੂਮਿਗਤੋ, ਸਬ੍ਬਰਤ੍ਤਿਂ ਸੋਭਣੋ ਸਬ੍ਬਰਤ੍ਤਿਸੋਭਣੋ. ਅਪਾਯਂ ਗਤੋ ਅਪਾਯਗਤੋ, ਇਸ੍ਸਰੇਨ ਕਤਂ ਇਸ੍ਸਰਕਤਂ, ਸਲ੍ਲੇਨ ਵਿਦ੍ਧੋ ਸਲ੍ਲਵਿਦ੍ਧੋ, ਕਥਿਨਸ੍ਸ ਦੁਸ੍ਸਂ ਕਥਿਨਦੁਸ੍ਸਂ, ਆਗਨ੍ਤੁਕਸ੍ਸ ਭਤ੍ਤਂ ਆਗਨ੍ਤੁਕਭਤ੍ਤਂ, ਮੇਥੁਨਾ ਅਪੇਤੋ ਮੇਥੁਨਾਪੇਤੋ, ਚੋਰਾ ਭਯਂ ਚੋਰਭਯਂ, ਰਞ੍ਞੋ ਪੁਤ੍ਤੋ ਰਾਜਪੁਤ੍ਤੋ, ਧਞ੍ਞਾਨਂ ਰਾਸਿ ਧਞ੍ਞਰਾਸਿ, ਰੂਪੇ ਸਞ੍ਞਾ ਰੂਪਸਞ੍ਞਾ, ਸਂਸਾਰੇ ਦੁਕ੍ਖਂ ਸਂਸਾਰਦੁਕ੍ਖਂ.
੩੨੮. , ੩੫੨. ਅਞ੍ਞਪਦਤ੍ਥੇਸੁ ਬਹੁਬ੍ਬੀਹਿ.
ਅਞ੍ਞੇਸਂ ਪਦਾਨਂ ਅਤ੍ਥੇਸੁ ਦ੍ਵੇ ਨਾਮਾਨਿ ਬਹੂਨਿ ਨਾਮਾਨਿ ਯਦਾ ਸਮਸ੍ਯਨ੍ਤੇ, ਤਦਾ ਸੋ ਸਮਾਸੋ ਬਹੁਬ੍ਬੀਹਿ ਸਞ੍ਞੋ ਹੋਤਿ.
ਆਗਤਾ ਸਮਣਾ ਇਮਂ ਸਙ੍ਘਾਰਾਮਂ ਸੋਯਂ ਆਗਤਸਮਣੋ, ਸਙ੍ਘਾਰਾਮੋ. ਜਿਤਾਨਿ ਇਨ੍ਦ੍ਰਿਯਾਨਿ ਅਨੇਨ ਸਮਣੇਨ ਸੋਯਂ ਜਿਤਿਨ੍ਦ੍ਰਿਯੋ, ਸਮਣੋ. ਦਿਨ੍ਨੋ ਸੁਙ੍ਕੋ ਯਸ੍ਸ ਰਞ੍ਞੋ ਸੋਯਂ ਦਿਨ੍ਨਸੁਙ੍ਕੋ, ਰਾਜਾ. ਨਿਗ੍ਗਤਾ ਜਨਾ ਅਸ੍ਮਾ ਗਾਮਾ ਸੋਯਂ ਨਿਗ੍ਗਤਜਨੋ, ਗਾਮੋ. ਛਿਨ੍ਨੋ ਹਤ੍ਤੋ ਯਸ੍ਸ ਪੁਰਿਸਸ੍ਸ ਸੋਯਂ ਛਿਨ੍ਨਹਤ੍ਥੋ, ਪੁਰਿਸੋ. ਸਮ੍ਪਨ੍ਨਾਨਿ ਸਸ੍ਸਾਨਿ ਯਸ੍ਮਿਂ ਜਨਪਦੇ ਸੋਯਂ ਸਮ੍ਪਨ੍ਨਸਸ੍ਸੋ, ਜਨਪਦੋ.
ਨਿਗ੍ਰੋਧਸ੍ਸ ਪਰਿਮਣ੍ਡਲੋ ਨਿਗ੍ਰੋਧਪਰਿਮਣ੍ਡਲੋ, ਨਿਗ੍ਰੋਧਪਰਿਮਣ੍ਡਲੋ ਇਵ ਪਰਿਮਣ੍ਡਲੋ ਯੋ ਰਾਜਕੁਮਾਰੋ ਸੋਯਂ ਨਿਗ੍ਰੋਧਪਰਿਮਣ੍ਡਲੋ. ਅਥ ਵਾ ਨਿਗ੍ਰੋਧਪਰਿਮਣ੍ਡਲੋ ਇਵ ਪਰਿਮਣ੍ਡਲੋ ਯਸ੍ਸ ਰਾਜਕੁਮਾਰਸ੍ਸ ਸੋਯਂ ਨਿਗ੍ਰੋਧਪਰਿਮਣ੍ਡਲੋ, ਰਾਜਕੁਮਾਰੋ.
ਚਕ੍ਖੁਨੋ ਭੂਤੋ ਚਕ੍ਖੁਭੂਤੋ, ਚਕ੍ਖੁਭੂਤੋ ਇਵ ਭੂਤੋ ਯੋ ਭਗਵਾ ਸੋਯਂ ਚਕ੍ਖੁਭੂਤੋ, ਭਗਵਾ.
ਸੁਵਣ੍ਣਸ੍ਸ ਵਣ੍ਣੋ ਸੁਵਣ੍ਣਵਣ੍ਣੋ, ਸੁਵਣ੍ਣਵਣ੍ਣੋ ਵਿਯ ਵਣ੍ਣੋ ਯਸ੍ਸ ਭਗਵਤੋ ਸੋਯਂ ਸੁਵਣ੍ਣਵਣ੍ਣੋ, ਭਗਵਾ.
ਬ੍ਰਹ੍ਮੁਨੋ ਸਰੋ ਬ੍ਰਹ੍ਮਸ੍ਸਰੋ, ਬ੍ਰਹ੍ਮਸ੍ਸਰੋ ਵਿਯ ਸਰੋ ਯਸ੍ਸ ਭਗਵਤੋ ਸੋਯਂ ਬ੍ਰਹ੍ਮਸ੍ਸਰੋ, ਭਗਵਾ.
ਸਯਂ ਪਤਿਤ ਪਣ੍ਣ ਪੁਪ੍ਫਫਲਵਾਯੁਤੋਯਾਹਾਰਾਤਿ ਪਣ੍ਣਞ੍ਚ ਪੁਪ੍ਫਞ੍ਚ ਫਲਞ੍ਚ ਪਣ੍ਣਪੁਪ੍ਫਫਲਾਨਿ, ਸਯਮੇਵ ਪਤਿਤਾਨਿ ਸਯਂਪਤਿਤਾਨਿ, ਸਯਂਪਤਿਤਾਨਿ ਚ ਤਾਨਿ ਪਣ੍ਣਪੁਪ੍ਫਫਲਾਨਿ ਚੇਤਿ ਸਯਂਪਤਿਤਪਣ੍ਣਪੁਪ੍ਫਫਲਾਨਿ ਵਾਯੁ ਚ ਤੋਯਞ੍ਚ ਵਾਯੁਤੋਯਾਨਿ, ਸਯਂਪਤਿਤਪਣ੍ਣਪੁਪ੍ਫਫਲਾਨਿ ਚ ਵਾਯੁਤੋਯਾਨਿ ਚ ਸਯਂਪਤਿਤਪਣ੍ਣਪੁਪ੍ਫਫਲਵਾਯੁਤੋਯਾਨਿ. ਸਯਂਪਤਿਤਪਣ੍ਣਪੁਪ੍ਫਫਲਵਾਯੁਤੋਯਾਨਿ ਆਹਾਰਾ ਯੇਸਂ ਤੇ ਸਯਂਪਤਿਤਪਣ੍ਣਪੁਪ੍ਫਫਲਵਾਯੁਤੋਯਾਹਾਰਾ, ਇਸਯੋ. ਯਮੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਅਯਂ ਪਨ ਦ੍ਵਨ੍ਦਕਮ੍ਮਧਾਰਯਗਬ੍ਭੋ ਤੁਲ੍ਯਾਧਿਕਰਣਪਹੁਬ੍ਬੀਹਿ.
ਅਥ ਵਾ – ਸਯਂਪਤਿਤਪਣ੍ਣਪੁਪ੍ਫਫਲਵਾਯੁਤੋਯੇਹਿ ਆਹਾਰਾ ਯੇਸਂ ਤੇ ਸਯਂਪਤਿਤਪਣ੍ਣਪੁਪ੍ਫਫਲਵਾਯੁਤੋਯਾਹਾਰਾ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਨਾਨਾ ਦੁਮਪਤਿਤ ਪੁਪ੍ਫਵਾਸਿਤ ਸਾਨੂਤਿ ਨਾਨਾਪਕਾਰਾ ਦੁਮਾ ਨਾਨਾਦੁਮਾ, ਨਾਨਾਦੁਮੇਹਿ ਪਤਿਤਾਨਿ ਨਾਨਾਦੁਮਪਤਿ ਤਾਨਿ, ਨਾਨਾਦੁਮਪਤਿਤਾਨਿ ਚ ਤਾਨਿ ਪੁਪ੍ਫਾਨਿ ਚੇਤਿ ਨਾਨਾਦੁਮਪਤਿਤਪੁਪ੍ਫਾਨਿ, ਨਾਨਾਦੁਮਪਤਿਤਪੁਪ੍ਫੇਹਿ ਵਾਸਿਤਾ ਨਾਨਾਦੁਮਪਤਿਤਪੁਪ੍ਫਵਾਸਿਤਾ, ਨਾਨਾਦੁਮਪਤਿਤਪੁਪ੍ਫਵਾਸਿਤਾ ਸਾਨੂ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਨਾਨਾਦੁਮਪਤਿਤਪੁਪ੍ਫਵਾਸਿਤਸਾਨੁ, ਪਬ੍ਬਤਰਾਜਾ. ਅਯਂ ਪਨ ਕਮ੍ਮਧਾਰਯਤਪ੍ਪੁਰਿਸਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਅਥ ਵਾ – ਵਾਸਿਤਾ ਸਾਨੂ ਵਾਸਿਤਸਾਨੁ, ਸਾਪੇਕ੍ਖਤ੍ਤੇ ਸਤਿਪਿ ਗਮਕਤ੍ਤਾ ਸਮਾਸੋ. ਨਾਨਾਦੁਮਪਤਿਤਪੁਪ੍ਫੇਹਿ ਵਾਸਿਤਸਾਨੂ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਨਾਨਾਦੁਮਪਤਿਤਪੁਪ੍ਫਵਾਸਿਤਸਾਨੁ, ਪਬ੍ਬਤਰਾਜਾ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਬ੍ਯਾਲਮ੍ਬਮ੍ਬੁਧਰਬਿਨ੍ਦੁਚੁਮ੍ਬਿਤਕੂਟੋਤਿ ਅਮ੍ਬੁਂ ਧਾਰੇਤੀਤਿ ਅਮ੍ਬੁਧਰੋ, ਕੋ ਸੋ? ਪਜ੍ਜੁਨ੍ਨੋ. ਵਿਵਿਧਾ ਆਲਮ੍ਬੋ ਬ੍ਯਾਲਮ੍ਬੋ, ਬ੍ਯਾਲਮ੍ਬੋ ਚ ਸੋ ਅਮ੍ਬੁਧਰੋ ਚਾਤਿ ਬ੍ਯਾਲਮ੍ਬਮ੍ਬੁਧਰੋ, ਬ੍ਯਾਲਮ੍ਬਮ੍ਬੁਧਰਸ੍ਸ ਬਿਨ੍ਦੂ ਬ੍ਯਾਲਮ੍ਬਮ੍ਬੁਧਰਬਿਨ੍ਦੂ, ਬ੍ਯਾਲਮ੍ਬਮ੍ਬੁਧਰਬਿਨ੍ਦੂਹਿ ਚੁਮ੍ਬਿਤੋ ਬ੍ਯਾਲਮ੍ਬਮ੍ਬੁਧਰਬਿਨ੍ਦੁਚੁਮ੍ਬਿਤੋ, ਬ੍ਯਾਲਮ੍ਬਮ੍ਬੁਰੇਬਿਨ੍ਦੁਚੁਮ੍ਬਿਤੋ ਕੂਟੋ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਬ੍ਯਾਲਮ੍ਬਮ੍ਬੁਧਰਬਿਨ੍ਦੁਚੁਮ੍ਬਿਤਕੂਟੋ. ਅਯਂ ਪਨ ਕਮ੍ਮਧਾਰਯਤਪ੍ਪੁਰਿਸਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਅਥ ਵਾ – ਚੁਮ੍ਬਿਤੋ ਕੂਟੋ ਚੁਮ੍ਬਿਤਕੂਟੋ, ਸਾਪੇਕ੍ਖਤ੍ਤੇ ਸਤਿਪਿ ਗਮਕਤ੍ਤਾ ਸਮਾਸੋ. ਬ੍ਯਾਲਮ੍ਬਮ੍ਬੁਧਰਬਿਨ੍ਦੂਹਿ ਚੁਮ੍ਬਿਤਕੂਟੋ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਬ੍ਯਾਲਮ੍ਬਮ੍ਬੁਧਰਬਿਨ੍ਦੁਚੁਮ੍ਬਿਤਕੂਟੋ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਅਮਿਤ ਬਲ ਪਰਕ੍ਕਮਜੁਤੀਤਿ ਨ ਮਿਤਾ ਅਮਿਤਾ, ਬਲਞ੍ਚ ਪਰਕ੍ਕਮੋ ਚ ਜੁਤਿ ਚ ਬਲਪਰਕ੍ਕਮਜੁਤਿਯੋ, ਅਮਿਤਾ ਬਲਪਰਕ੍ਕਮਜੁਤਿਯੋ ਯਸ੍ਸ ਸੋਯਂ ਅਮਿਤਬਲਪਰਕ੍ਕਮਜੁਤਿ, ਅਯਂ ਪਨ ਕਮ੍ਮਧਾਰਯਦ੍ਵਨ੍ਦਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਪੀਣੋਰਕ੍ਖਂਸ ਬਾਹੂਤਿ ਉਰੋ ਚ ਅਕ੍ਖਞ੍ਚ ਅਂਸੋ ਚ ਬਾਹੁ ਚ ਉਰਕ੍ਖਂਸਬਾਹਵੋ, ਪੀਣਾ ਉਰਕ੍ਖਂਸਬਾਹਵੋ ਯਸ੍ਸ ਭਗਵਤੋ ਸੋਯਂ ਪੀਣੋਰਕ੍ਖਂਸਬਾਹੁ. ਅਯਂ ਪਨ ਦ੍ਵਨ੍ਦਵਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਪੀਣ ਗਣ੍ਡ ਵਦਨ ਥਨੂਰੁਜਘਨਾਤਿ ਗਣ੍ਡੋ ਚ ਵਦਨਞ੍ਚ ਥਨੋ ਚ ਊਰੁ ਚ ਜਘਨਞ੍ਚ ਗਣ੍ਡਵਦਨਥਨੂਰੁਜਘਨਾ, ਪੀਣਾ ਗਣ੍ਡਵਦਨਥਨੂਰੁਜਘਨਾ ਯਸ੍ਸਾ ਸਾਯਂ ਪੀਣਗਣ੍ਡਵਦਨਥਨੂਰੁਜਘਨਾ. ਅਯਮ੍ਪਿ ਦ੍ਵਨ੍ਦਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਵਵਰ ਸੁਰਾਸੁਰ ਗਰੁਡ ਮਨੁਜ ਭੁਜਗ ਗਨ੍ਧਬ੍ਬ ਮਕੁਟ ਕੂਟ ਚੁਮ੍ਬਿਤ ਸੇਲਸਙ੍ਘਟ੍ਟਿਤ ਚਰਣੋਤਿ ਸੁਰਾ ਚ ਅਸੁਰਾ ਚ ਗਰੁਡਾ ਚ ਮਨੁਜਾ ਚ ਭੁਜਗਾ ਚ ਗਨ੍ਧਬ੍ਬਾ ਚ ਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਾ, ਪਵਰਾ ਚ ਤੇ ਸੁਰਾਸੁਰਗਰੁਡਮਨੁਜਭੁਜਗ ਗਨ੍ਧਬ੍ਬਾ ਚੇਤਿ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਾ, ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਾਨਂ ਮਕੁਟਾਨਿ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਾਨਿ, ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਾਨਂ ਕੂਟਾਨਿ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਾਨਿ, ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟੇਸੁ ਚੁਮ੍ਬਿਤਾ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਾ, ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਾ ਚ ਤੇ ਸੇਲਾ ਚਾਤਿ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲਾ, ਪਵਰਸੁਰਾਸੁਰ ਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲੇਹਿ ਸਙ੍ਘਟ੍ਟਿਤਾ ਪਵਰਸੁਰਾਸੁਰ ਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲਸਙ੍ਘਟ੍ਟਿਤਾ, ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲਸਙ੍ਘਟ੍ਟਿਤਾ ਚਰਣਾ ਯਸ੍ਸ ਤਥਾਗਤਸ੍ਸ ਸੋਯਂ ਪਵਰਸੁਰਾਸੁਰਗਰੁਡਮਨੁਜਭੁਜਗਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲਸਙ੍ਘਟ੍ਟਿਤਚਰਣੋ, ਤਥਾਗਤੋ, ਅਯਂ ਪਨ ਦ੍ਵਨ੍ਦਕਮ੍ਮਧਾਰਯਤਪ੍ਪੁਰਿਸਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਅਥ ਵਾ–ਸਙ੍ਘਟ੍ਟਿਤਾ ਚਰਣਾ ਸਙ੍ਘਟ੍ਟਿਤਚਰਣਾ, ਸਾਪੇਕ੍ਖਤ੍ਤੇ ਸਤਿਪਿ ਗਮਕਤ੍ਤਾ ਸਮਾਸੋ. ਪਵਰਸੁਰਾਸੁਰ ਗਰੁਡਮਨੁਜਭੁਜਗ ਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲੇਹਿ ਸਙ੍ਘਟ੍ਟਿਤਚਰਣਾ ਯਸ੍ਸ ਤਥਾਗਤਸ੍ਸ ਸੋਯਂ ਪਵਰਸੁਰਾਸੁਰਗਰੁਡ ਮਨੁਜਭੁਜਗ ਗਨ੍ਧਬ੍ਬਮਕੁਟਕੂਟਚੁਮ੍ਬਿਤਸੇਲਸਙ੍ਘਟ੍ਟਿਤ ਚਰਣੋ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਚਤੁਦ੍ਦਿਸੋਤਿ ਚਤਸ੍ਸੋ ਦਿਸਾ ਯਸ੍ਸ ਸੋਯਂ ਚਤੁਦ੍ਦਿਸੋ, ਭਗਵਾ.
ਪਞ੍ਚਚਕ੍ਖੂਤਿ ਪਞ੍ਚ ਚਕ੍ਖੂਨਿ ਯਸ੍ਸ ਤਥਾਗਤਸ੍ਸ ਸੋਯਂ ਪਞ੍ਚਚਕ੍ਖੁ, ਤਥਾਗਤੋ.
ਦਸਬਲੋਤਿ ਦਸ ਬਲਾਨਿ ਯਸ੍ਸ ਸੋਯਂ ਦਸਬਲੋ, ਭਗਵਾ.
ਅਨਨ੍ਤਞਾਣੋਤਿ ਨਸ੍ਸ ਅਨ੍ਤੋ ਅਨਨ੍ਤਂ, ਅਨਨ੍ਤਂ ਞਾਣਂ ਯਸ੍ਸ ਤਥਾਗਤਸ੍ਸ ਸੋਯਂ ਅਨਨ੍ਤਞਾਣੋ, ਤਥਾਗਤੋ.
ਅਮਿਤ ਘਨ ਸਰੀਰੋਤਿ ਨ ਮਿਤਂ ਅਮਿਤਂ, ਘਨਂ ਏਵ ਸਰੀਰਂ ਘਨਸਰੀਰਂ, ਅਮਿਤਂ ਘਨਸਰੀਰਂ ਯਸ੍ਸ ਤਥਾਗਤਸ੍ਸ ਸੋਯਂ ਅਮਿਤਘਨਸਰੀਰੋ, ਤਥਾਗਤੋ.
ਅਮਿਤ ਬਲ ਪਰਕ੍ਕਮ ਪਤ੍ਤੋਤਿ ਨ ਮਿਤਾ ਅਮਿਤਾ, ਬਲਞ੍ਚ ਪਰਕ੍ਕਮੋ ਚ ਬਲਪਰਕ੍ਕਮਾ, ਅਮਿਤਾ ਏਵ ਬਲਪਰਕ੍ਕਮਾ ਅਮਿਤਬਲਪਰਕ੍ਕਮਾ, ਅਮਿਤਬਲਪਰਕ੍ਕਮਾ ਪਤ੍ਤਾ ਯੇਨ ਸੋਯਂ ਅਮਿਤਬਲਪਰਕ੍ਕਮਪਤ੍ਤੋ, ਭਗਵਾ. ਅਯਂ ਪਨ ਕਮ੍ਮਧਾਰਯਦ੍ਵਨ੍ਦਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਮਤ੍ਤ ਭਮਰ ਗਣ ਚੁਮ੍ਬਿਤ ਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੋ ਪਸੋਭਿਤ ਕਨ੍ਦਰੋਤਿ ਮਤ੍ਤਾ ਏਵ ਭਮਰਾ ਮਤ੍ਤਭਮਰਾ, ਮਤ੍ਤਭਮਰਾਨਂ ਗਣਾ ਮਤ੍ਤਭਮਰਗਣਾ, ਮਤ੍ਤਭਮਰਗਣੇਹਿ ਚੁਮ੍ਬਿਤਾਨਿ ਮਤ੍ਤਭਮਰਣਚੁਮ੍ਬਿਤਾਨਿ, ਵਿਕਸਿਤਾਨਿ ਏਵ ਪੁਪ੍ਫਾਨਿ ਵਿਕਸਿਤਪੁਪ੍ਫਾਨਿ, ਮਤ੍ਤਭਮਰਗਣਚੁਮ੍ਬਿਤਾਨਿ ਵਿਕਸਿਤਪੁਪ੍ਫਾਨਿ ਯੇਸਂ ਤੇਹਿ ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਾ, ਵਲ੍ਲਿ ਚ ਨਾਗਰੁਕ੍ਖੋ ਚ ਮਲ੍ਲਿਨਾਗਰੁਕ੍ਖਾ, ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਾ ਚ ਤੇ ਵਲ੍ਲਿਨਾਗਰੁਕ੍ਖਾ ਚੇਤਿ ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖਾ, ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੇਹਿ ਉਪਸੋਭਿਤਾਨਿ ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੋ ਪਸੋਭਿਤਾਨਿ, ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੋ ਪਸੋਭਿਤਾਨਿ ਕਨ੍ਦਰਾਨਿ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫ ਵਲ੍ਲਿਨਾਗਰੁਕ੍ਖੋ ਪਸੋ ਭਿਤਕਨ੍ਦਰੋ, ਪਬ੍ਬਤਰਾਜਾ. ਅਯਂ ਪਨ ਦ੍ਵਨ੍ਦਕਮ੍ਮਧਾਰਯਤਪ੍ਪੁਰਿਸਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਅਥ ਵਾ–ਉਪਸੋਭਿਤਾਨਿ ਕਨ੍ਦਰਾਨਿ ਉਪਸੋਭਿਤਕਨ੍ਦਰਾਨਿ, ਸਾਪੇਕ੍ਖਤ੍ਤੇ ਸਤਿਪਿ ਗਮਕਤ੍ਤਾ ਸਮਾਸੋ. ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੇਹਿ ਉਪਸੋਭਿਤਕਨ੍ਦਰਾਨਿ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਮਤ੍ਤਭਮਰਗਣਚੁਮ੍ਬਿਤਵਿਕਸਿਤਪੁਪ੍ਫਵਲ੍ਲਿਨਾਗਰੁਕ੍ਖੋ ਪਸੋਭਿਤਕਨ੍ਦਰੋ, ਪਬ੍ਬਤਰਾਜਾ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਨਾਨਾ ਰੁਕ੍ਖ ਤਿਣ ਪਤਿਤ ਪੁਪ੍ਫੋਪਸੋਭਿਤ ਕਨ੍ਦਰੋਤਿ ਰੁਕ੍ਖੋ ਚ ਤਿਣਞ੍ਚ ਰੁਕ੍ਖਤਿਣਾਨਿ, ਨਾਨਾ ਪਕਾਰਾਨਿ ਏਵ ਰੁਕ੍ਖਤਿਣਾਨਿ ਨਾਨਾਰੁਕ੍ਖਤਿਣਾਨਿ, ਨਾਨਾਰੁਕ੍ਖਤਿਣੇਹਿ ਪਤਿਤਾਨਿ ਨਾਨਾਰੁਕ੍ਖਤਿਣਪਤਿਤਾਨਿ, ਨਾਨਾਰੁਕ੍ਖਤਿਣਪਤਿਤਾਨਿ ਚ ਤਾਨਿ ਪੁਪ੍ਫਾਨਿ ਚੇਤਿ ਨਾਨਾਰੁਕ੍ਖਤਿਣਪਤਿਤਪੁਪ੍ਫਾਨਿ, ਨਾਨਾਰੁਕ੍ਖਤਿਣਪਤਿਤਪੁਪ੍ਫੇਹਿ ਉਪਸੋਭਿਤਾਨਿ ਨਾਨਾਰੁਕ੍ਖਤਿਣਪਤਿਤ ਪੁਪ੍ਫੋਪਸੋਭਿਤਾਨਿ, ਨਾਨਾਰੁਕ੍ਖਤਿਣਪਤਿਤਪੁਪ੍ਫੋਪਸੋਭਿਤਾਨਿ ਕਨ੍ਦਰਾਨਿ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਨਾਨਾਰੁਕ੍ਖਤਿਣਪਤਿਤਪੁਪ੍ਫੋਪਸੋਭਿਤਕਨ੍ਦਰੋ, ਪਬ੍ਬਤਰਾਜਾ. ਅਯਂ ਪਨ ਦ੍ਵਨ੍ਦਕਮ੍ਮਧਾਰਯਤਪ੍ਪੁਰਿਸਗਬ੍ਭੋ ਤੁਲ੍ਯਾਧਿਕਰਣਬਹੁਬ੍ਬੀਹਿ.
ਅਥ ਵਾ–ਉਪਸੋਭਿਤਾਨਿ ਏਵ ਕਨ੍ਦਰਾਨਿ ਉਪਸੋਭਿਤਕਨ੍ਦਰਾਨਿ, (ਸਾਪੇਕ੍ਖਤ੍ਤੇ ਸਤਿਪਿ ਗਮਕਤ੍ਤਾ ਸਮਾਸੋ.) ਨਾਨਾਰੁਕ੍ਖਤਿਣਪਤਿਤਪੁਪ੍ਫੇਹਿ ਉਪਸੋਭਿਤਕਨ੍ਦਰਾਨਿ ਯਸ੍ਸ ਪਬ੍ਬਤਰਾਜਸ੍ਸ ਸੋਯਂ ਨਾਨਾਰੁਕ੍ਖਤਿਣਪਤਿਤਪੁਪ੍ਫੋਪਸੋਭਿਤਕਨ੍ਦਰੋ, ਪਬ੍ਬਤਰਾਜਾ. ਅਯਂ ਪਨ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਨਾਨਾ ਮੁਸਲ ਫਾਲ ਪਬ੍ਬਤ ਤਰੁ ਕਲਿਙ੍ਗਰ ਸਰ ਧਨੁਗਦਾਸਿ ਤੋਮਰਹਤ੍ਥਾਤਿ ਮੁਸਲੋ ਚ ਫਾਲੋ ਚ ਪਬ੍ਬਤੋ ਚ ਤਰੁ ਚ ਕਲਿਙ੍ਗਰੋ ਚ ਸਰੋ ਚ ਧਨੁ ਚ ਗਦਾ ਚਅਸਿ ਚ ਤੋਮਰੋ, ਚ ਮੁਸਲਫਾਲਪਬ੍ਬਤਤਰੁਕਲਿਙ੍ਗਰਸਰਧਨੁਗਦਾਸਿਤੋਮਰਾ, ਨਾਨਾ ਪਕਾਰਾ ਏਵ ਮੁਸਲਫਾਲਪਬ੍ਬਤਤਰੁਕਲਿਙ੍ਗਰਸਰਧਨੁਗਦਾਸਿਤੋਮਰਾ ਨਾਨਾਮੁਸਲਫਾਲਪਬ੍ਬਤਤਰੁਕਲਿਙ੍ਗਰਸਰਧਨੁਗਦਾਸਿਤੋਮਰਾ, ਨਾਨਾਮੁਸਲਫਾਲਪਬ੍ਬਤਤਰੁਕਲਿਙ੍ਗਰਸਰਧਨੁਗਦਾਸਿਤੋਮਰਾ ਹਤ੍ਥੇਸੁ ਯੇਸਂ ਤੇ ਨਾਨਾਮੁਸਲਫਾਲਪਬ੍ਬਤਤਰੁਕਲਿਙ੍ਗਰ ਸਰਧਨੁਗਦਾਸਿਤੋਮਰਹਤ੍ਥਾ. ਅਯਂ ਪਨ ਦ੍ਵਨ੍ਦਕਮ੍ਮਧਾਰਯਗਬ੍ਭੋ ਭਿਨ੍ਨਾਧਿਕਰਣਬਹੁਬ੍ਬੀਹਿ.
ਬਹੁਬ੍ਬੀਹਿ ਇਚ੍ਚਨੇਨ ਕ੍ਵਤ੍ਥੋ? ਬਹੁਬ੍ਬੀਹਿਮ੍ਹਿ ਚ.
੩੨੯. , ੩੫੭. ਨਾਮਾਨਂ ਸਮੁਚ੍ਚਯੋ ਦ੍ਵਨ੍ਦੋ.
ਨਾਮਾਨਂ ਏਕਵਿਭਤ੍ਤਿਕਾਨਂ ਯੋ ਸਮੁਚ੍ਚਯੋ, ਸੋ ਦ੍ਵਨ੍ਦਸਞ੍ਞੋ ਹੋਤਿ.
ਚਨ੍ਦਿਮਾ ਚ ਸੂਰਿਯੋ ਚ ਚਨ੍ਦਿਮਸੂਰਿਯਾ, ਸਮਣੋ ਚ ਬ੍ਰਾਹ੍ਮਣੋ ਚ ਸਮਣਬ੍ਰਾਹ੍ਮਣਾ, ਸਾਰਿਪੁਤ੍ਤੋ ਚ ਮੋਗ੍ਗਲ੍ਲਾਨੋ ਚ ਸਾਰਿਪੁਤ੍ਤਮੋਗ੍ਗਲ੍ਲਾਨਾ, ਬ੍ਰਾਹ੍ਮਣੋ ਚ ਗਹਪਤਿਕੋ ਚ ਬ੍ਰਾਹ੍ਮਣਗਹਪਤਿਕਾ, ਯਮੋ ਚ ਵਰੁਣੋ ਚ ਯਮਵਰੁਣਾ, ਕੁਵੇਰੋ ਚ ਵਾਸਵੋ ਚ ਕੁਵੇਰਵਾਸਵਾ.
ਦ੍ਵਨ੍ਦਇਚ੍ਚਨੇਨ ਕ੍ਵਤ੍ਥੋ? ਦ੍ਵਨ੍ਦਟ੍ਠਾ ਵਾ.
੩੩੦. , ੩੪੦. ਮਹਤਂ ਮਹਾ ਤੁਲ੍ਯਾਧਿਕਰਣੇ ਪਦੇ.
ਤੇਸਂ ਮਹਨ੍ਤਸਦ੍ਦਾਨਂ ਮਹਾਆਦੇਸੋ ਹੋਤਿ ਤੁਲ੍ਯਾਧਿਕਰਣੇ ਪਦੇ.
ਮਹਨ੍ਤੋ ਚ ਸੋ ਪੁਰਿਸੋ ਚਾਤਿ ਮਹਾਪੁਰਿਸੋ, ਮਹਨ੍ਤੀ ਚ ਸਾ ਦੇਵੀ ਚਾਤਿ ਮਹਾਦੇਵੀ, ਮਹਨ੍ਤਞ੍ਚ ਤਂ ਬਲਞ੍ਚਾਤਿ ਮਹਾਬਲਂ, ਮਹਨ੍ਤੋ ਚ ਸੋ ਨਾਗੋ ਚਾਤਿ ਮਹਾਨਾਗੋ, ਮਹਨ੍ਤੋ ਚ ਸੋ ਯਸੋ ਚਾਤਿ ਮਹਾਯਸੋ, ਮਹਨ੍ਤਞ੍ਚ ਤਂ ਪਦੁਮਵਨਞ੍ਚਾਤਿ ਮਹਾਪਦੁਮਵਨਂ, ਮਹਨ੍ਤੀ ਚ ਸਾ ਨਦੀ ਚਾਤਿ ਮਹਾਨਦੀ, ਮਹਨ੍ਤੋ ਚ ਸੋ ਮਣਿ ਚਾਤਿ ਮਹਾਮਣਿ, ਮਹਨ੍ਤੋ ਚ ਸੋ ਗਹਪਤਿਕੋ ਚਾਤਿ ਮਹਾਗਹਪਤਿਕੋ, ਮਹਨ੍ਤਞ੍ਚ ਤਂ ਧਨਞ੍ਚਾਤਿ ਮਹਾਧਨਂ, ਮਹਨ੍ਤੋ ਚ ਸੋ ਪੁਞ੍ਞੋ ਚਾਤਿ ਮਹਾਪੁਞ੍ਞੋ.
ਬਹੁਵਚਨਗ੍ਗਹਣੇਨ ਕ੍ਵਚਿ ਮਹਨ੍ਤ ਸਦ੍ਦਸ੍ਸ ਮਹਾਦੇਸੋ ਹੋਤਿ. ਮਹਨ੍ਤਞ੍ਚ ਤਂ ਫਲਞ੍ਚਾਤਿ ਮਹਪ੍ਫਲਂ, ਮਹਬ੍ਬਲਂ, ਏਵਂ ਮਹਦ੍ਧਨਂ, ਮਹਬ੍ਭਯਂ.
੩੩੧. , ੩੫੩. ਇਤ੍ਥਿਯਂ ਭਾਸਿਤਪੁਮਿਤ੍ਥੀ ਪੁਮਾਵ ਚੇ.
ਇਤ੍ਥਿਯਂ ਤੁਲ੍ਯਾਧਿਕਰਣੇ ਪਦੇ ਚੇ ਭਾਸਿਤਪੁਮਿਤ੍ਥੀ ਪੁਮਾਵ ਦਟ੍ਠਬ੍ਬਾ.
ਦੀਘਾ ਜਙ੍ਘਾ ਯਸ੍ਸ ਸੋਯਂ ਦੀਘਜਙ੍ਘੋ, ਕਲ੍ਯਾਣਭਰਿਯੋ, ਪਹੂਤਪਞ੍ਞੋ.
ਭਾਸਿਤਪੁਪੇਤਿ ਕਿਮਤ੍ਥਂ? ਬ੍ਰਾਹ੍ਮਣਬਨ੍ਧੁ ਚ ਸਾ ਭਰਿਯਾ ਚਾਤਿਬ੍ਰਾਹ੍ਮਣਬਨ੍ਧੁਭਰਿਯਾ.
੩੩੨. , ੩੪੩. ਕਮ੍ਮਧਾਰਯਸਞ੍ਞੇ ਚ.
ਕਮ੍ਮਧਾਰਯਸਞ੍ਞੇ ਚ ਸਮਾਸੇ ਇਤ੍ਥਿਯਂ ਤੁਲ੍ਯਾਧਿਕਰਣੇ ਪਦੇ ਪੁਬ੍ਬੇ ਭਾਸਿਤਪੁਮਿਤ੍ਥੀ ਚੇ, ਪੁਮਾਵ ਦਟ੍ਠਬ੍ਬਾ. ਬ੍ਰਾਹ੍ਮਣਦਾਰਿਕਾ, ਖਤ੍ਤਿਯਕਞ੍ਞਾ, ਖਤ੍ਤਿਯਕੁਮਾਰਿਕਾ.
ਭਾਸਿਤਪੁਮੇਤਿ ਕਿਮਤ੍ਥਂ? ਖਤ੍ਤਿਯਬਨ੍ਧੁਦਾਰਿਕਾ, ਬ੍ਰਾਹ੍ਮਣਬਨ੍ਧੁਦਾਰਿਕਾ.
੩੩੩. , ੩੪੪. ਅਤ੍ਤਂ ਨਸ੍ਸ ਤਪ੍ਪੁਰਿਸੇ.
ਨਸ੍ਸ ਪਦਸ੍ਸ ਤਪ੍ਪੁਰਿਸੇ ਉਤ੍ਤਰਪਦੇ ਅਤ੍ਤਂ ਹੋਤਿ.
ਨਬ੍ਰਾਹ੍ਮਣੋ ਅਬ੍ਰਾਹ੍ਮਣੋ, ਅਵਸਲੋ, ਅਭਿਕ੍ਖੁ, ਅਪਞ੍ਚਵਸ੍ਸਂ, ਅਪਞ੍ਚਗਵਂ.
੩੩੪. , ੩੪੫. ਸਰੇ ਅਨ.
ਨਸ੍ਸ ਪਦਸ੍ਸ ਤਪ੍ਪੁਰਿਸੇ ਅਨ ਆਦੇਸੋ ਹੋਤਿ ਸਰੇ ਪਰੇ.
ਨ ਅਸ੍ਸੋ ਅਨਸ੍ਸੋ, ਅਨਿਸ੍ਸਰੋ, ਅਨਰਿਯੋ.
੩੩੫. , ੩੪੬. ਕਦ ਕੁਸ੍ਸ.
ਕੁਇਚ੍ਚੇਤਸ੍ਸ ਕਦ ਹੋਤਿ ਸਰੇ ਪਰੇ.
ਕੁਚ੍ਛਿਤਂ ਅਨ੍ਨਂ ਕਦਨ੍ਨਂ, ਕੁਚ੍ਛਿਤਂ ਅਸਨਂ ਕਦਸ੍ਸਨਂ.
ਸਰੇਤਿ ਕਿਮਤ੍ਥਂ? ਕੁਚ੍ਛਿਤਾ ਦਾਰਾ ਯੇਸਂ (ਅਪੁਞ੍ਞਕਾਰਾਨਂ) ਤੇ ਹੋਨ੍ਤੀਤਿ ਕੁਦਾਰਾ, ਕੁਜਨਾ. ਏਵਂ ਕੁਪੁਤ੍ਤਾ, ਕੁਗੇਹਾ, ਕੁਵਤ੍ਥਾ, ਕੁਦਾਸਾ.
੩੩੬. , ੩੪੭. ਕਾ’ਪ੍ਪਤ੍ਥੇਸੁ ਚ.
ਕੁਇਚ੍ਚੇਤਸ੍ਸ ਕਾ ਹੋਤਿ ਅਪ੍ਪਤ੍ਥੇਸੁ ਚ.
ਕਾਲਵਣਂ, ਕਾਪੁਪ੍ਫਂ.
ਬਹੁਵਚਨਗ੍ਗਹਣਂ ਕਿਮਤ੍ਥਂ? ਕੁਇਚ੍ਚੇਤਸ੍ਸ ਅਨਪ੍ਪਤਤ੍ਥੇਸੁਪਿ ਕ੍ਵਚਿ ਕਾ ਹੋਤਿ, ਕਾਪੁਰਿਸਾ.
੩੩੭. , ੩੫੦. ਕ੍ਵਚਿ ਸਮਾਸਨ੍ਤਗਤਾਨਮਕਾਰਨ੍ਤੋ.
ਸਮਾਸਨ੍ਤਗਤਾਨਂ ਨਾਮਾਨਮਨ੍ਤੋ ਸਰੋ ਕ੍ਵਚਿ ਅਕਾਰੋ ਹੋਤਿ.
ਦੇਵਾਨਂ ਰਾਜਾ ਦੇਵਰਾਜੋ, ਦੇਵਰਾਜਾ, ਦੇਵਾਨਂ ਸਖਾ ਦੇਵਸਖੋ, ਦੇਵਸਖਾ, ਪਞ੍ਚ ਅਹਾਨਿ ਪਞ੍ਚਾਹਂ, ਸਤ੍ਤਾਹਂ, ਪਞ੍ਚਗਵਂ, ਛਤ੍ਤੁਪਾਹਨਂ, ਉਪਸਰਦਂ, ਵਿਸਾਲਕ੍ਖੋ, ਵਿਮੁਖੋ.
ਕਾਰਗ੍ਗਹਣਂ ਕਿਮਤ੍ਥਂ? ਆਕਾਰਨ੍ਤ ਇਕਾਰਨ੍ਤਾ ਚ ਹੋਨ੍ਤਿ, ਪਚ੍ਚਕ੍ਖਾ ਧਮ੍ਮਾ ਯਸ੍ਸ ਸੋਯਨ੍ਤਿ ਪਚ੍ਚਕ੍ਖਧਮ੍ਮਾ, ਸੁਰਭਿਨੋ ਗਨ੍ਧੋ ਸੁਰਭਿਗਨ੍ਧਿ, ਸੁਨ੍ਦਰੋ ਗਨ੍ਧੋ ਸੁਗਨ੍ਧਿ, ਪੂਤਿਨੋ ਗਨ੍ਧੋ ਪੂਤਿਗਨ੍ਧਿ, ਕੁਚ੍ਛਿਤੋ ਗਨ੍ਧੋ ਕੁਗਨ੍ਧਿ, ਦੁਟ੍ਠੁ ਗਨ੍ਧੋ ਯਸ੍ਸ ਸੋਯਨ੍ਤਿ ਦੁਗਨ੍ਧਿ, ਪੂਤਿ ਏਵ ਗਨ੍ਧੋ ਪੂਤਿਗਨ੍ਧਿ.
ਨਦੀਅਨ੍ਤਾ ਚ ਕਤ੍ਤੁਅਨ੍ਤਾ ਚ ਕਪਚ੍ਚਯੋ ਹੋਤਿ ਸਮਾਸਨ੍ਤੇ.
ਬਹੂ ਨਦਿਯੋ ਯਸ੍ਮਿਂ ਸੋਯਂ ਬਹੁਨਦਿਕੋ, ਜਨਪਦੋ. ਬਹਵੋ ਕਤ੍ਤਾਰੋ ਯਸ੍ਸ ਸੋਯਂ ਬਹੁਕਤ੍ਤੁਕੋ, ਪੁਰਿਸੋ.
੩੩੮. , ੩੫੬. ਨਦਿਮ੍ਹਾ ਚ.
ਨਦਿਮ੍ਹਾ ਚ ਕਪਚ੍ਚਯੋ ਹੋਤਿ ਸਮਾਸਨ੍ਤੇ.
ਬਹੂ ਨਦਿਯੋ ਯਸ੍ਮਿਂ ਸੋਯਨ੍ਤਿ ਬਹੁਨਦਿਕੋ. ਬਹੂ ਕਨ੍ਤਿਯੋ ਯਸ੍ਸ ਸੋਯਨ੍ਤਿ ਬਹੁਕਨ੍ਤਿਕੋ. ਬਹੁਨਾਰਿਕੋ.
੩੩੯. , ੩੫੮. ਜਾਯਾਯ ਤੁਦਂ ਜਾਨਿ ਪਤਿਮ੍ਹਿ.
ਜਾਯਾਇਚ੍ਚੇਤਾਯ ਤੁਦਂ ਜਾਨਿਇਚ੍ਚੇਤੇ ਆਦੇਸਾ ਹੋਨ੍ਤਿ ਪਤਿਮ੍ਹਿ ਪਰੇ.
ਤੁਦਂਪਤੀ, ਜਾਨਿਪਤੀ.
੩੪੦. , ੩੫੫. ਧਨੁਮ੍ਹਾ ਚ.
ਧਨੁਮ੍ਹਾ ਚ ਆਪਚ੍ਚਯੋ ਹੋਤਿ ਸਮਾਸਨ੍ਤੇ.
ਗਾਣ੍ਡੀਵੋ ਧਨੁ ਯਸ੍ਸ ਸੋਯਂ ਗਾਣ੍ਡੀਵਧਨ੍ਵਾ.
੩੪੧. , ੩੩੬. ਅਂ ਵਿਭਤ੍ਤੀਨਮਕਾਰਨ੍ਤਾ ਅਬ੍ਯਯੀਭਾਵਾ.
ਤਸ੍ਮਾ ਅਕਾਰਨ੍ਤਾ ਅਬ੍ਯਯੀਭਾਵਸਮਾਸਾ ਪਰਾਸਂ ਵਿਭਤ੍ਤੀਨਂ ਕ੍ਵਚਿ ਅਂ ਹੋਤਿ.
ਅਧਿਚਿਤ੍ਤਂ, ਯਥਾਵੁਡ੍ਢਂ, ਉਪਕੁਮ੍ਭਂ, ਯਾਵਜੀਵਂ, ਤਿਰੋਪਬ੍ਬਤਂ, ਤਿਰੋਪਾਕਾਰਂ, ਤਿਰੋਕੁਟ੍ਟਂ, ਅਨ੍ਤੋਪਾਸਾਦਂ.
ਕ੍ਵਚੀਤਿ ਕਿਮਤ੍ਥਂ? ਅਧਿਚਿਤ੍ਤਸ੍ਸ ਭਿਕ੍ਖੁਨੋ.
੩੪੨. , ੩੩੭. ਸਰੋ ਰਸ੍ਸੋ ਨਪੁਂਸਕੇ.
ਨਪੁਂਸਕੇ ਵਤ੍ਤਮਾਨਸ੍ਸ ਅਬ੍ਯਯੀਭਾਵਸਮਾਸਸ੍ਸ ਲਿਙ੍ਗਸ੍ਸ ਸਰੋ ਰਸ੍ਸੋ ਹੋਤਿ.
ਕੁਮਾਰੀਸੁ ਅਧਿਕਿਚ੍ਚ ਪਵਤ੍ਤਤਿ ਕਥਾ ਇਤਿ ਅਧਿਕੁਮਾਰਿ. ਉਪਵਧੁ, ਉਪਗਙ੍ਗਂ, ਉਪਮਣਿਕਂ.
੩੪੩. , ੩੩੮. ਅਞ੍ਞਸ੍ਮਾ ਲੋਪੋ ਚ.
ਅਞ੍ਞਸ੍ਮਾ ਅਬ੍ਯਯੀਭਾਵਸਮਾਸਾ ਅਨਕਾਰਨ੍ਤਾ ਪਰਾਸਂ ਵਿਭਤ੍ਤੀਨਂ ਲੋਪੋ ਚ ਹੋਤਿ.
ਅਧਿਤ੍ਥਿ, ਅਧਿਕੁਮਾਰਿ, ਉਪਵਧੁ.
ਇਤਿ ਨਾਮਕਪ੍ਪੇ ਸਮਾਸਕਪ੍ਪੋ ਸਤ੍ਤਮੋ ਕਣ੍ਡੋ.
ਸਮਾਸਕਪ੍ਪੋ ਨਿਟ੍ਠਿਤੋ.