੨. ਨਾਮਕਪ੍ਪ

ਪਠਮਕਣ੍ਡ

੫੨. , ੬੦. ਜਿਨਵਚਨਯੁਤ੍ਤਂ ਹਿ.

‘‘ਜਿਨਵਚਨਯੁਤ੍ਤਂ ਹਿ’’ ਇਚ੍ਚੇਤਂ ਅਧਿਕਾਰਤ੍ਥਂ ਵੇਦਿਤਬ੍ਬਂ.

੫੩. , ੬੧. ਲਿਙ੍ਗਞ੍ਚ ਨਿਪ੍ਪਜ੍ਜਤੇ.

ਯਥਾ ਯਥਾ ਜਿਨਵਚਨਯੁਤ੍ਤਂ ਹਿ ਲਿਙ੍ਗਂ, ਤਥਾ ਤਥਾ ਇਧ ਲਿਙ੍ਗਞ੍ਚ ਨਿਪ੍ਪਜ੍ਜਤੇ.

ਤਂ ਯਥਾ? ਏਸੋ ਨੋ ਸਤ੍ਥਾ, ਬ੍ਰਹ੍ਮਾ ਅਤ੍ਤਾ, ਸਖਾ, ਰਾਜਾ.

੫੪. , ੬੨. ਤਤੋ ਚ ਵਿਭਤ੍ਤਿਯੋ.

ਤਤੋ ਜਿਨਵਚਨਯੁਤ੍ਤੇਹਿ ਲਿਙ੍ਗੇਹਿ ਵਿਭਤ੍ਤਿਯੋ ਪਰਾ ਹੋਨ੍ਤਿ.

੫੫. , ੬੩. ਸਿ ਯੋ, ਅਂ ਯੋ, ਨਾ ਹਿ, ਸ ਨਂ, ਸ੍ਮਾ ਹਿ, ਸ ਨਂ, ਸ੍ਮਿਂ ਸੁ.

ਕਾ ਚ ਪਨ ਤਾਯੋ ਵਿਭਤ੍ਤਿਯੋ? ਸਿ, ਯੋ ਇਤਿ ਪਠਮਾ, ਅਂ, ਯੋਇਤਿ ਦੁਤਿਯਾ, ਨਾ ਹਿ ਇਤਿ ਤਤਿਯਾ, ਸ, ਨਂਇਤਿ ਚਤੁਤ੍ਥੀ, ਸ੍ਮਾ, ਹਿ ਇਤਿ ਪਞ੍ਚਮੀ, ਸ, ਨਂ ਇਤਿ ਛਟ੍ਠੀ, ਸ੍ਮਿਂ, ਸੁ ਇਤਿ ਸਤ੍ਤਮੀ.

ਵਿਭਤ੍ਤਿਇਚ੍ਚਨੇਨ ਕ੍ਵਤ੍ਥੋ? ਅਮ੍ਹਸ੍ਸ ਮਮਂ ਸਵਿਭਤ੍ਤਿਸ੍ਸ ਸੇ.

੫੬. , ੬੪. ਤਦਨੁਪਰੋਧੇਨ.

ਯਥਾ ਯਥਾ ਤੇਸਂ ਜਿਨਵਚਨਾਨਂ ਅਨੁਪਰੋਧੋ. ਤਥਾ ਤਥਾ ਇਧ ਲਿਙ੍ਗਞ੍ਚ ਨਿਪ੍ਪਜ੍ਜਤੇ.

੫੭. , ੭੧. ਆਲਪਨੇ ਸਿ ਗ ਸਞ੍ਞੋ.

ਆਲਪਨਤ੍ਥੇ ਸਿ ਗਸਞ੍ਞੋ ਹੋਤਿ.

ਭੋਤਿ ਅਯ੍ਯੇ, ਭੋਤਿ ਕਞ੍ਞੇ, ਭੋਤਿ ਖਰਾਦਿਯੇ.

ਆਲਪਨੇਤਿ ਕਿਮਤ੍ਥਂ? ਸਾ ਅਯ੍ਯਾ.

ਸੀਤਿ ਕਿਮਤ੍ਥਂ? ਭੋਤਿਯੋ ਅਯ੍ਯਾਯੋ.

ਗਇਚ੍ਚਨੇਨ ਕ੍ਵਤ੍ਥੋ? ਘਤੇ ਚ.

੫੮. , ੨੯. ਇਵਣ੍ਣੁਵਣ੍ਣਾ ਝਲਾ.

ਇਵਣ੍ਣੁਵਣ੍ਣਾਇਚ੍ਚੇਤੇ ਝਲਸਞ੍ਞਾ ਹੋਨ੍ਤਿ ਯਥਾਸਙ੍ਖ੍ਯਂ.

ਇਸਿਨੋ, ਅਗ੍ਗਿਨੋ, ਗਹਪਤਿਨੋ, ਦਣ੍ਡਿਨੋ. ਸੇਤੁਨੋ, ਕੇਤੁਨੋ, ਭਿਕ੍ਖੁਨੋ. ਸਯਮ੍ਭੁਨੋ, ਅਭਿਭੁਨੋ.

ਝਲਇਚ੍ਚਨੇਨ ਕ੍ਵਤ੍ਥੋ? ਝਲਤੋ ਸਸ੍ਸ ਨੋ ਵਾ.

੫੯. , ੧੮੨. ਤੇ ਇਤ੍ਥਿਖ੍ਯਾ ਪੋ.

ਤੇ ਇਵਣ੍ਣੁਵਣ੍ਣਾ ਯਦਾ ਇਤ੍ਥਿਖ੍ਯਾ, ਤਦਾ ਪਸਞ੍ਞਾ ਹੋਨ੍ਤਿ.

ਰਤ੍ਤਿਯਾ, ਇਤ੍ਥਿਯਾ, ਧੇਨੁਯਾ, ਵਧੁਯਾ.

ਇਤ੍ਥਿਖ੍ਯਾਤਿ ਕਿਮਤ੍ਥਂ? ਇਸਿਨਾ, ਭਿਕ੍ਖੁਨਾ.

ਸਇਚ੍ਚਨੇਨ ਕ੍ਵਤ੍ਥੋ? ਪਤੋ ਯਾ.

੬੦. , ੧੭੭. ਆ ਘੋ.

ਆਕਾਰੋ ਯਦਾ ਇਤ੍ਥਿਖ੍ਯੋ, ਤਦਾ ਘਸਞ੍ਞੋ ਹੋਤਿ.

ਸਦ੍ਧਾਯ, ਕਞ੍ਞਾਯ, ਵੀਣਾਯ, ਗਙ੍ਗਾਯ, ਦਿਸਾਯ ਸਾਲਾਯ, ਮਾਲਾਯ, ਤੁਲਾਯ, ਦੋਲਾਯ, ਪਭਾਯ, ਸੋਭਾਯ, ਪਞ੍ਞਾਯ, ਕਰੁਣਾਯ ਨਾਵਾਯ, ਕਪਾਲਿਕਾਯ.

ਆਤਿ ਕਿਮਤ੍ਥਂ? ਰਤ੍ਤਿਯਾ, ਇਤ੍ਥਿਯਾ.

ਇਤ੍ਥਿਖ੍ਯੋਤਿ ਕਿਮਤ੍ਥਂ? ਸਤ੍ਥਾਰਾ ਦੇਸਿਤੋ ਅਯਂ ਧਮ੍ਮੋ.

ਘਇਚ੍ਚਨੇਨ ਕ੍ਵਤ੍ਥੋ? ਘਤੋ ਨਾਦੀਨਂ.

੬੧. , ੮੬. ਸਾਗਮੋ ਸੇ.

ਸਕਾਰਾਗਮੋ ਹੋਤਿ ਸੇ ਵਿਭਤ੍ਤਿਮ੍ਹਿ.

ਪੁਰਿਸਸ੍ਸ, ਅਗ੍ਗਿਸ੍ਸ, ਇਸਿਸ੍ਸ, ਦਣ੍ਡਿਸ੍ਸ, ਭਿਕ੍ਖੁਸ੍ਸ, ਸਯਮ੍ਭੁਸ੍ਸ, ਅਭਿਭੁਸ੍ਸ.

ਸੇਤਿ ਕਿਮਤ੍ਤਂ? ਪੁਰਿਸਸ੍ਮਿਂ.

੬੨. , ੨੦੬. ਸਂਸਾਸ੍ਵੇਕਵਚਨੇਸੁ ਚ.

ਸਂਸਾਸੁ ਏਕਵਚਨੇਸੁ ਵਿਭਤ੍ਤਾਦੇਸੇਸੁ ਸਕਾਰਾਗਮੋ ਹੋਤਿ.

ਏਤਿਸ੍ਸਂ, ਏਤਿਸ੍ਸਾ ਇਮਿਸ੍ਸਂ, ਇਮਿਸ੍ਸਾ, ਤਿਸ੍ਸਂ, ਤਿਸ੍ਸਾ,

ਤਸ੍ਸਂ ਤਸ੍ਸਾ, ਯਸ੍ਸਂ, ਯਸ੍ਸਾ, ਅਮੁਸ੍ਸਂ, ਅਮੁਸ੍ਸਾ.

ਸਂਸਾਸ੍ਵੀਤਿ ਕਿਮਤ੍ਥਂ? ਅਗ੍ਗਿਨਾ, ਪਾਣਿਨਾ.

ਏਕਵਚਨੇਸ੍ਵੀਤਿ ਕਿਮਤ੍ਥਂ? ਤਾਸਂ, ਸਬ੍ਬਾਸਂ.

ਵਿਭਤ੍ਤਾਦੇਸੇਸ੍ਵੀਤਿ ਕਿਮਤ੍ਥਂ? ਮਨਸਾ, ਵਚਸਾ, ਥਾਮਸਾ.

੬੩. , ੨੧੭. ਏਤਿਮਾਸਮਿ.

ਏਤਾਇਮਾਇਚ੍ਚੇਤੇਸਮਨ੍ਤੋ ਸਰੋ ਇਕਾਰੋ ਹੋਤਿ ਸਂਸਾਸੁ ਏਕਵਚਨੇਸੁ ਵਿਭਤ੍ਤਾਦੇਸੇਸੁ.

ਏਤਿਸ੍ਸਂ, ਏਤਿਸ੍ਸਾ, ਇਮਿਸ੍ਸਂ, ਇਮਿਸ੍ਸਾ.

ਸਂਸਾਸ੍ਵੀਤਿ ਕਿਮਤ੍ਥਂ? ਏਤਾਯ, ਇਮਾਯ.

ਏਕਵਚਨੇਸ੍ਵੀਤਿ ਕਿਮਤ੍ਥਂ? ਏਤਾਸਂ, ਇਮਾਸਂ.

੬੪. , ੨੧੬. ਤਸ੍ਸਾ ਵਾ.

ਤਸ੍ਸਾ ਇਤ੍ਥਿਯਂ ਵਤ੍ਤਮਾਨਸ੍ਸ ਅਨ੍ਤਸ੍ਸ ਆਕਾਰਸ੍ਸ ਇਕਾਰੋ ਹੋਤਿ ਵਾ ਸਂਸਾਸੁ ਏਕਵਚਨੇਸੁ ਵਿਭਤ੍ਤਾਦੇਸੇਸੁ.

ਤਿਸ੍ਸਂ, ਤਿਸ੍ਸਾ, ਤਸ੍ਸਂ, ਤਸ੍ਸਾ.

੬੫. , ੨੧੫. ਤਤੋ ਸਸ੍ਸ ਸ੍ਸਾਯ.

ਤਤੋ ਤਾ ਏਤਾ ਇਮਾਤੋ ਸਸ੍ਸ ਵਿਭਤ੍ਤਿਸ੍ਸ ਸ੍ਸਾਯਾਦੇਸੋ ਹੋਤਿ ਵਾ.

ਤਿਸ੍ਸਾਯ, ਏਤਿਸ੍ਸਾਯ, ਇਮਿਸ੍ਸਾਯ.

ਵਾਤਿ ਕਿਮਤ੍ਥਂ? ਤਿਸ੍ਸਾ, ਏਤਿਸ੍ਸਾ, ਇਮਿਸ੍ਸਾ.

੬੬. , ੨੦੫. ਘੋ ਰਸ੍ਸਂ.

ਘੋ ਰਸ੍ਸਮਾਪਜ੍ਜਤੇ ਸਂਸਾਸੁ ਏਕਵਚਨੇਸੁ ਵਿਭਤ੍ਤਾਦੇਸੇਸੁ.

ਤਸ੍ਸਂ, ਤਸ੍ਸਾ, ਯਸ੍ਸਂ, ਯਸ੍ਸਾ, ਸਬ੍ਬਸ੍ਸਂ, ਸਬ੍ਬਸ੍ਸਾ.

ਸਂਸਾਸ੍ਵੀਤਿ ਕਿਮਤ੍ਥਂ? ਤਾਯ, ਸਬ੍ਬਾਯ.

ਏਕਵਚਨੇਸ੍ਵੀਤਿ ਕਿਮਤ੍ਥਂ? ਤਾਸਂ, ਸਬ੍ਬਾਸਂ.

੬੭. , ੨੨੯. ਨੋ ਚ ਦ੍ਵਾਦਿਤੋ ਨਂਮ੍ਹਿ.

ਦ੍ਵਿਇਚ੍ਚੇਵਮਾਦਿਤੋ ਸਙ੍ਖ੍ਯਾਤੋ ਨਕਾਰਾਗਮੋ ਹੋਤਿ ਨਂਮ੍ਹਿ ਵਿਭਤ੍ਤਿਮ੍ਹਿ.

ਦ੍ਵਿਨ੍ਨਂ, ਤਿਨ੍ਨਂ, ਚਤੁਨ੍ਨਂ, ਪਞ੍ਚਨ੍ਨਂ, ਛਨ੍ਨਂ, ਸਤ੍ਤਨ੍ਨਂ, ਅਟ੍ਠਨ੍ਨਂ, ਨਵਨ੍ਨਂ, ਦਸਨ੍ਨਂ.

ਦ੍ਵਾਦਿਤੋਤਿ ਕਿਮਤ੍ਥਂ? ਸਹਸ੍ਸਾਨਂ.

ਨਂਮ੍ਹੀਤਿ ਕਿਮਤ੍ਥਂ? ਦ੍ਵੀਸੁ, ਤੀਸੁ.

ਚਗ੍ਗਹਣੇਨਸ੍ਸਞ੍ਚਾਗਮੋ ਹੋਤਿ. ਚਤਸ੍ਸਨ੍ਨਂ ਇਤ੍ਥੀਨਂ ਤਿਸ੍ਸਨ੍ਨਂ ਵੇਦਨਾਨਂ.

੬੮. , ੧੮੪. ਅਮਾ ਪਤੋ ਸ੍ਮਿਂਸ੍ਮਾਨਂ ਵਾ.

ਪਇਚ੍ਚੇਤਸ੍ਮਾ ਸ੍ਮਿਂਸ੍ਮਾਇਚ੍ਚੇਤੇਸਂ ਅਂਆਆਦੇਸਾ ਹੋਨ੍ਤਿ ਵਾ ਯਥਾਸਙ੍ਖ੍ਯਂ.

ਮਤ੍ਯਂ, ਮਤਿਯਂ, ਮਤ੍ਯਾ, ਮਤਿਯਾ, ਨਿਕਤ੍ਯਂ. ਨਿਕਤਿਯਂ, ਨਿਕਤ੍ਯਾ, ਨਿਕਤਿਯਾ, ਵਿਕਤ੍ਯਂ, ਵਿਕਤਿਯਂ, ਵਿਕਤ੍ਯਾ, ਵਿਕਤਿਯਾ, ਵਿਰਤ੍ਯਂ, ਵਿਰਤਿਯਂ, ਵਿਰਤ੍ਯਾ, ਵਿਰਤਿਯਾ, ਰਤ੍ਯਂ, ਰਤਿਯਂ, ਰਤ੍ਯਾ, ਰਤਿਯਾ, ਪੁਥਬ੍ਯਂ, ਪੁਥਵਿਯਂ, ਪੁਥਬ੍ਯਾ, ਪੁਥਵਿਯਾ, ਪਵਤ੍ਯਂ, ਪਵਤ੍ਯਾ, ਪਵਤ੍ਤਿਯਂ, ਪਵਤ੍ਤਿਯਾ.

੬੯. , ੧੮੬. ਆਦਿਤੋ ਓ ਚ.

ਆਦਿਇਚ੍ਚੇਤਸ੍ਮਾ ਸ੍ਮਿਂਵਚਨਸ੍ਸ ਅਂਓਆਦੇਸਾ ਹੋਨ੍ਤਿ ਵਾ.

ਆਦੀਂ, ਆਦੋ.

ਵਾਤਿ ਕਿਮਤ੍ਥਂ? ਆਦਿਸ੍ਮਿਂ, ਆਦਿਮ੍ਹਿ ਨਾਥਂ ਨਮਸ੍ਸਿਤ੍ਵਾਨ,

ਚਗ੍ਗਹਣੇਨ ਅਞ੍ਞਸ੍ਮਾਪਿ ਸ੍ਮਿਂ ਵਚਨਸ੍ਸ ਆ ਓ ਅਂਆਦੇਸਾ ਹੋਨ੍ਤਿ. ਦਿਵਾ ਚ ਰਤ੍ਤੋ ਚ ਹਰਨ੍ਤਿ ਯੇ ਬਲਿ. ਬਾਰਾਣਸਿਂ ਅਹੁ ਰਾਜਾ.

੭੦. , ੩੦. ਝਲਾਨਮਿਯੁਵਾ ਸਰੇ ਵਾ.

ਝਲਇਚ੍ਚੇਤੇਸਂ ਇਯ ਉਵਇਚ੍ਚੇਤੇ ਆਦੇਸਾ ਹੋਨ੍ਤਿ ਵਾ ਸਰੇ ਪਰੇ ਯਥਾਸਙ੍ਖ੍ਯਂ.

ਤਿਯਨ੍ਤਂ ਪਚ੍ਛਿਯਾਗਾਰੇ, ਅਗ੍ਗਿਯਾਗਾਰੇ, ਭਿਕ੍ਖੁਵਾਸਨੇ ਨਿਸੀਦਤਿ, ਵੁਥੁਵਾਸਨੇ ਨਿਸੀਦਤਿ.

ਸਰੇਤਿ ਕਿਮਤ੍ਥਂ? ਤਿਮਲਂ, ਤਿਫਲਂ, ਤਿਚਤੁਕ੍ਕਂ, ਤਿਦਣ੍ਡਂ, ਤਿਲੋਕਂ, ਤਿਨਯਨਂ, ਤਿਪਾਸਂ, ਤਿਹਂਸਂ, ਤਿਭਵਂ, ਤਿਖਨ੍ਧਂ, ਤਿਪਿਟਕਂ, ਤਿਵੇਦਨਂ, ਚਤੁਦ੍ਦਿਸਂ, ਪੁਥੁਭੂਤਂ.

ਵਾਤਿ ਕਿਮਤ੍ਥਂ? ਪਞ੍ਚਹਙ੍ਗੇਹਿ ਤੀਹਾਕਾਰੇਹਿ. ਚਕ੍ਖਾਯਤਨਂ.

ਵਾਤਿ ਵਿਕਪ੍ਪਨਤ੍ਥਂ, ਇਕਾਰਸ੍ਸ ਅਯਾਦੇਸੋ ਹੋਤਿ, ਵਤ੍ਥੁਤ੍ਤਯਂ.

੭੧. , ੫੦੫. ਯਵਕਾਰਾ ਚ.

ਝਲਾਨਂ ਯਕਾਰ ਵਕਾਰਾਦੇਸਾ ਹੋਨ੍ਤਿ ਸਰੇ ਪਰੇ ਯਥਾਸਙ੍ਖ੍ਯਂ.

ਅਗ੍ਯਾਗਾਰਂ, ਪਕ੍ਖਾਯਤਨਂ, ਸ੍ਵਾਗਤਂ, ਤੇ ਮਹਾਵੀਰ.

ਚਗ੍ਗਹਣਂ ਸਮ੍ਪਿਣ੍ਡਨਤ੍ਥਂ.

੭੨. , ੧੮੫. ਪਸਞ੍ਞਸ੍ਸ ਚ.

ਪਸਞ੍ਞਸ੍ਸ ਚ ਇਵਣ੍ਣਸ੍ਸ ਵਿਭਤ੍ਤਾਦੇਸੇ ਸਰੇ ਪਰੇ ਯਕਾਰਾਦੇਸੋ ਹੋਤਿ.

ਪੁਥਬ੍ਯਾ, ਰਤ੍ਯਾ, ਮਤ੍ਯਾ.

ਸਰੇਤਿ ਕਿਮਤ੍ਥਂ? ਪੁਥਵਿਯਂ.

੭੩. , ੧੭੪. ਗਾਵ ਸੇ.

ਗੋਇਚ੍ਚੇਤਸ੍ਸ ਓਕਾਰਸ੍ਸ ਆਵਾਦੇਸੋ ਹੋਤਿ ਸੇ ਵਿਭਤ੍ਤਿਮ੍ਹਿ.

ਗਾਵਸ੍ਸ.

੭੪. , ੧੬੯. ਯੋਸੁ ਚ.

ਗੋਇਚ੍ਚੇਤਸ੍ਸ ਓਕਾਰਸ੍ਸ ਆਵਾਦੇਸੋ ਹੋਤਿ ਯੋਇਚ੍ਚੇਤੇਸੁ ਪਰੇਸੁ.

ਗਾਵੋ ਗਚ੍ਛਨ੍ਤਿ, ਗਾਵੋ ਪਸ੍ਸਨ੍ਤਿ, ਗਾਵੀ ਗਚ੍ਛਨ੍ਤਿ, ਗਾਵੀ ਪਸ੍ਸਨ੍ਤਿ.

ਚਗ੍ਗਹਣਂ ਕਿਮਤ੍ਥਂ? ਨਾਸ੍ਮਾਸ੍ਮਿਂਸੁ ਵਚਨੇਸੁ ਆਵਾ ਦੇਸੋ ਹੋਤਿ.

ਗਾਵੇਨ, ਗਾਵਾ, ਗਾਵੇ, ਗਾਵੇਸੁ.

੭੫. , ੧੭੦. ਅਵਮ੍ਹਿ ਚ.

ਗੋਇਚ੍ਚੇਤਸ੍ਸ ਓਕਾਰਸ੍ਸ ਆਵਅਵਇਚ੍ਚੇਤੇ ਆਦੇਸਾ ਹੋਨ੍ਤਿ ਅਂਮ੍ਹਿ ਵਿਭਤ੍ਤਿਮ੍ਹਿ.

ਗਾਵਂ, ਗਵਂ.

ਚਗ੍ਗਹਣੇਨ ਸਾਦਿਸੇਸੇਸੁ ਪੁਬ੍ਬੁਤ੍ਤਵਚਨੇਸੁ ਗੋਇਚ੍ਚੇਤਸ੍ਸ ਓਕਾਰਸ੍ਸ ਅਵਾਦੇਸੋ ਹੋਤਿ.

ਗਵਸ੍ਸ, ਗਵੋ, ਗਵੇਨ, ਗਵਾ, ਗਵੇ, ਗਵੇਸੁ.

੭੬. , ੧੭੧. ਆਵਸ੍ਸੁ ਵਾ.

ਆਵਇਚ੍ਚੇਤਸ੍ਸ ਗਾਵਾਦੇਸਸ੍ਸ ਅਨ੍ਤ ਸਰਸ੍ਸ ਉਕਾਰਾਦੇਸੋ ਹੋਤਿ ਵਾ ਅਂਮ੍ਹਿ ਵਿਭਤ੍ਤਿਮ੍ਹਿ.

ਗਾਵੁਂ, ਗਾਵਂ.

ਆਵਸ੍ਸੇਤਿ ਕਿਮਤ੍ਥਂ? ਗਾਵੋ ਤਿਟ੍ਠਨ੍ਤਿ.

੭੭. , ੧੭੫. ਤਤੋ ਨਮਂ ਪਤਿਮ੍ਹਾ ਲੁਤ੍ਤੇ ਚ ਸਮਾਸੇ.

ਤਤੋ ਗੋਸਦ੍ਦਤੋ ਨਂਵਚਨਸ੍ਸ ਅਂਆਦੇਸੋ ਹੋਤਿ, ਗੋਇਚ੍ਚੇਤਸ੍ਸ ਓਕਾਰਸ੍ਸ ਅਵਾਦੇਸੋ ਹੋਤਿ ਪਤਿਮ੍ਹਿ ਪਰੇ ਅਲੁਤ੍ਤੇ ਚ ਸਮਾਸੇ.

ਗਵਪਤਿ.

ਅਲੁਤ੍ਤੇਤਿ ਕਿਮਤ੍ਥਂ? ਗੋਪਤਿ.

ਚਗ੍ਗਹਣੇਨ ਅਸਮਾਸੇਪਿ ਨਂਵਚਨਸ੍ਸ ਅਂਆਦੇਸੋ ਹੋਤਿ, ਗੋਇਚ੍ਚੇਤਸ੍ਸ ਓਕਾਰਸ੍ਸ ਅਵਾਦੇਸੋ ਹੋਤਿ.

ਗਵਂ.

੭੮. , ੩. ਓਸਰੇ ਚ.

ਗੋਇਚ੍ਚੇਤਸ੍ਸ ਓਕਾਰਸ੍ਸ ਅਵਾਦੇਸੋ ਹੋਤਿ ਸਮਾਸੇ ਚ ਸਰੇ ਪਰੇ.

ਗਵਸ੍ਸਕਂ, ਗਵੇਲ਼ਕਂ, ਗਵਾਜਿਨਂ.

ਚਗ੍ਗਹਣੇਨ ਉਵਣ੍ਣਇਚ੍ਚੇਵਮਨ੍ਤਾਨਂ ਲਿਙ੍ਗਾਨਂ ਉਵਅਵਉਰਾਦੇਸਾ ਹੋਨ੍ਤਿ ਸ੍ਮਿਂਯੋਇਚ੍ਚੇਤੇਸੁ ਕ੍ਵਚਿ.

ਭੁਵਿ, ਪਸਵੋ, ਗੁਰਵੋ, ਚਤੁਰੋ.

ਸਰੇਤਿ ਕਿਮਤ੍ਥਂ? ਗੋਧਨੋ, ਗੋਵਿਨ੍ਦੋ.

੭੯. , ੪੬. ਤਬ੍ਬਿਪਰੀਤੂਪਪਦੇ ਬ੍ਯਞ੍ਜਨੇ ਚ.

ਤਸ੍ਸ ਅਵਸਦ੍ਦਸ੍ਸ ਯਦਾ ਉਪਪਦੇ ਤਿਟ੍ਠਮਾਨਸ੍ਸ ਤਸ੍ਸ ਓਕਾਰਸ੍ਸ ਵਿਪਰੀਤੋ ਹੋਤਿ ਬ੍ਯਞ੍ਜਨੇ ਪਰੇ.

ਉਗ੍ਗਤੇ ਸੂਰਿਯੇ, ਉਗ੍ਗਚ੍ਛਤਿ, ਉਗ੍ਗਹੇਤ੍ਵਾ.

ਚਗ੍ਗਹਣਮਵਧਾਰਣਤ੍ਥਂ. ਅਵਸਾਨੇ, ਅਵਕਿਰਣੇ, ਅਵਕਿਰਤਿ.

੮੦. , ੧੭੩. ਗੋਣ ਨਂਮ੍ਹਿ ਵਾ.

ਸਬ੍ਬਸ੍ਸੇਵ ਗੋਸਦ੍ਦਸ੍ਸ ਗੋਣਾਦੇਸੋ ਹੋਤਿ ਵਾ ਨਂਮ੍ਹਿ ਵਿਭਤ੍ਤਿਮ੍ਹਿ.

ਗੋਣਾਨਂ ਸਤ੍ਤਨ੍ਨਂ.

ਵਾਤਿ ਕਿਮਤ੍ਥਂ?

ਗੋਨਞ੍ਚੇ ਤਰਮਾਨਾਨਂ, ਉਜੁਂ ਗਚ੍ਛਤਿ ਪੁਙ੍ਗਵੋ.

ਸਬ੍ਬਾ ਗਾਵੀ ਉਜੁਂ ਯਨ੍ਤਿ, ਨੇਤ੍ਤੇ ਉਜੁਂ ਗਤੇ ਸਤਿ.

ਯੋਗਵਿਭਾਗੇਨ ਅਞ੍ਞਤ੍ਰਾਪਿ ਗੋਣਾਦੇਸੋ ਹੋਤਿ. ਗੋਣਭੂਤਾਨਂ.

੮੧. , ੧੭੨. ਸੁਹਿਨਾਸੁ ਚ.

ਸੁਹਿਨਾਇਚ੍ਚੇਤੇਸੁ ਸਬ੍ਬਸ੍ਸ ਗੋਸਦ੍ਦਸ੍ਸ ਗੋਣਾਦੇਸੋ ਹੋਤਿ ਵਾ.

ਗੋਣੇਸੁ, ਗੋਣੇਹਿ, ਗੋਣੇਭਿ, ਗੋਣੇਨ.

ਵਾਤਿ ਕਿਮਤ੍ਥਂ? ਗੋਸੁ, ਗੋਹਿ, ਗੋਭਿ, ਗਵੇਨ.

ਚਗ੍ਗਹਣੇਨ ਸ੍ਯਾਦਿਸੇਸੇਸੁ ਪੁਬ੍ਬੁਤ੍ਤਰਵਚਨੇਸੁਪਿ ਗੋਣ ਗੁ ਗਵਯਾਦੇਸਾ ਹੋਨ੍ਤਿ. ਗੋਣੋ, ਗੋਣਾ, ਗੋਣਂ, ਗੋਣੇ, ਗੋਣਸ੍ਸ, ਗੋਣਮ੍ਹਾ. ਗੋਣਮ੍ਹਿ, ਗੁਨ੍ਨਂ, ਗਵਯੇਹਿ, ਗਵਯੇਭਿ.

੮੨. , ੧੪੯. ਅਂਮੋ ਨਿਗ੍ਗਹਿਤਂ ਝਲਪੇਹਿ.

ਅਂਵਚਨਸ੍ਸ ਮਕਾਰਸ੍ਸ ਚ ਝਲਪਇਚ੍ਚੇਤੇਹਿ ਨਿਗ੍ਗਹਿਤਂ ਹੋਤਿ

ਅਗ੍ਗਿਂ, ਇਸਿਂ, ਗਹਪਤਿਂ, ਦਣ੍ਡਿਂ, ਮਹੇਸਿਂ, ਭਿਕ੍ਖੁਂ, ਪਟੁਂ, ਸਯਮ੍ਭੁਂ, ਅਭਿਭੁਂ, ਰਤ੍ਤਿਂ, ਇਤ੍ਥਿਂ, ਵਧੁਂ, ਪੁਲ੍ਲਿਙ੍ਗਂ, ਪੁਮ੍ਭਾਵੋ, ਪੁਙ੍ਕੋਕਿਲੋ.

ਅਂਮੋਤਿ ਕਿਮਤ੍ਥਂ? ਅਗ੍ਗਿਨਾ, ਪਾਣਿਨਾ, ਭਿਕ੍ਖੁਨਾ, ਰਤ੍ਤਿਯਾ, ਇਤ੍ਥਿਯਾ, ਵਧੁਯਾ.

ਝਲਪੇਹੀਤਿ ਕਿਮਤ੍ਥਂ? ਸੁਖਂ, ਦੁਕ੍ਖਂ.

ਪੁਨਾਰਮ੍ਭ ਹਣਂ ਵਿਭਾਸਾਨਿਵਤ੍ਤਨਤ੍ਥਂ. ਅਗ੍ਗਿਂ, ਪਟੁਂ, ਬੁਦ੍ਧਿਂ, ਵਧੁਂ.

੮੩. , ੬੭. ਸਰਲੋਪੋ’ ਮਾਦੇਸ ਪਚ੍ਚਯਾਦਿਮ੍ਹਿ ਸਰਲੋਪੇ ਤੁ ਪਕਤਿ.

ਸਰਲੋਪੋ ਹੋਤਿ ਅਮਾਦੇਸਪਚ੍ਚਯਾਦਿਮ੍ਹਿ ਸਰ ਲੋਪੇ ਤੁ ਪਕਤਿ ਹੋਤਿ.

ਪੁਰਿਸਂ, ਪੁਰਿਸੇ, ਪਾਪਂ, ਪਾਪੇ, ਪਾਪਿਯੋ, ਪਾਪਿਟ੍ਠੋ.

ਅਮਾਦੇਸਪਚ੍ਚਯਾਦਿਮ੍ਹੀਤਿ ਕਿ ਤ੍ਥਂ? ਅਪ੍ਪਮਾਦੋ ਅਮਤਂ ਪਦਂ.

ਸਰਲੋਪੇਤਿ ਕਿਮਤ੍ਥਂ? ਪੁਰਿਸਸ੍ਸ, ਦਣ੍ਡਿਨਂ.

ਤੁਗ੍ਗਹਣਮਵਧਾਰਣਤ੍ਥਂ. ਭਿਕ੍ਖੁਨੀ, ਗਹਪਤਾਨੀ.

ਪਕਤਿਗ੍ਗਹਣਸਾਮਤ੍ਥੇਨ ਪੁਨ ਸਨ੍ਧਿਭਾਵੋ ਚ ਹੋਤਿ. ਸੇਯ੍ਯੋ, ਸੇਟ੍ਠੋ, ਜੇਯ੍ਯੋ, ਜੇਟ੍ਠੋ.

੮੪. , ੧੪੪. ਅਘੋਰਸ੍ਸਮੇਕਵਚਨਯੋਸ੍ਵਪਿ ਚ.