੧. ਸਨ੍ਧਿਕਪ੍ਪ

ਪਠਮਕਣ੍ਡ

(ਕ)

ਸੇਟ੍ਠਂ ਤਿਲੋਕਮਹਿਤਂ ਅਭਿਵਨ੍ਦਿਯਗ੍ਗਂ,

ਬੁਦ੍ਧਞ੍ਚ ਧਮ੍ਮਮਮਲਂ ਗਣਮੁਤ੍ਤਮਞ੍ਚ;

ਸਤ੍ਥੁਸ੍ਸ ਤਸ੍ਸ ਵਚਨਤ੍ਥਵਰਂ ਸੁਬੁਦ੍ਧੁਂ,

ਵਕ੍ਖਾਮਿ ਸੁਤ੍ਤਹਿਤਮੇਤ੍ਥ ਸੁਸਨ੍ਧਿਕਪ੍ਪਂ.

(ਖ)

ਸੇਯ੍ਯਂ ਜਿਨੇਰਿਤਨਯੇਨ ਬੁਧਾ ਲਭਨ੍ਤਿ,

ਤਞ੍ਚਾਪਿ ਤਸ੍ਸ ਵਚਨਤ੍ਥਸੁਬੋਧਨੇਨ;

ਅਤ੍ਥਞ੍ਚ ਅਕ੍ਖਰਪਦੇਸੁ ਅਮੋਹਭਾਵਾ,

ਸੇਯ੍ਯਤ੍ਥਿਕੋ ਪਦਮਤੋ ਵਿਵਿਧਂ ਸੁਣੇਯ੍ਯਂ.

੧. , ੧. ਅਤ੍ਥੋ ਅਕ੍ਖਰਸਞ੍ਞਾਤੋ.

ਸਬ੍ਬਵਚਨਾਨਮਤ੍ਥੋ ਅਕ੍ਖਰੇਹੇਵ ਸਞ੍ਞਾਯਤੇ. ਅਕ੍ਖਰਵਿਪਤ੍ਤਿਯਂ ਹਿ ਅਤ੍ਥਸ੍ਸ ਦੁਨ੍ਨਯਥਾ ਹੋਤਿ, ਤਸ੍ਮਾ ਅਕ੍ਖਰਕੋਸਲ੍ਲਂ ਬਹੂਪਕਾਰਂ ਸੁਤ੍ਤਨ੍ਤੇਸੁ.

੨. , ੨. ਅਕ੍ਖਰਾਪਾਦਯੋ ਏਕਚਤ੍ਤਾਲੀਸਂ.

ਤੇ ਚ ਖੋ ਅਕ੍ਖਰਾ ਅਪਿ ਅਕਾਰਾਦਯੋ ਏਕਚਤ੍ਤਾ ਲੀਸ ਸੁਤ੍ਤਨ੍ਤੇਸੁ ਸੋਪਕਾਰਾ.

ਤਂ ਯਥਾ? ਅ ਆ ਇ ਈ ਉ ਊ ਏ ਓ, ਕ ਖ ਗ ਘ ਙ, ਚ ਛ ਜ ਝ ਞ, ਟ ਠ ਡ ਢ ਣ, ਤ ਥ ਦ ਧ ਨ, ਪ ਫ ਬ ਭ ਮ, ਯ ਰ ਲ ਵ ਸ ਹ ਲ਼ ਅਂ, ਇਤਿ ਅਕ੍ਖਰਾ ਨਾਮ.

ਤੇਨ ਕ੍ਵਤ੍ਥੋ? ਅਤ੍ਥੋ ਅਕ੍ਖਰਸਞ੍ਞਾਤੋ.

੩. , ੩. ਤਤ੍ਥੋਦਨ੍ਤਾ ਸਰਾ ਅਟ੍ਠ.

ਤਤ੍ਥ ਅਕ੍ਖਰੇਸੁ ਅਕਾਰਾਦੀਸੁ ਓਦਨ੍ਤਾ ਅਟ੍ਠ ਅਕ੍ਖਰਾ ਸਰਾ ਨਾਮ ਹੋਨ੍ਤਿ.

ਤਂ ਯਥਾ? ਅ ਆ ਇ ਈ ਉ ਊ ਏ ਓ, ਇਤਿ ਸਰਾ ਨਾਮ.

ਤੇਨ ਕ੍ਵਤ੍ਥੋ? ਸਰਾ ਸਰੇ ਲੋਪਂ.

੪. , ੪. ਲਹੁਮਤ੍ਤਾ ਤਯੋ ਰਸ੍ਸਾ.

ਤਤ੍ਥ ਅਟ੍ਠਸੁ ਸਰੇਸੁ ਲਹੁਮਤ੍ਤਾ ਤਯੋ ਸਰਾ ਰਸ੍ਸਾ ਨਾਮ ਹੋਨ੍ਤਿ.

ਤਂ ਯਥਾ? ਅ ਇ ਉ, ਇਤਿ ਰਸ੍ਸਾ ਨਾਮ.

ਤੇਨ ਕ੍ਵਤ੍ਥੋ? ਰਸ੍ਸਂ.

੫. , ੫. ਅਞ੍ਞੇ ਦੀਘਾ.

ਤਤ੍ਥ ਅਟ੍ਠਸੁ ਸਰੇਸੁ ਰਸ੍ਸੇਹਿ ਅਞ੍ਞੇ ਪਞ੍ਚ ਸਰਾ ਦੀਘਾ ਨਾਮ ਹੋਨ੍ਤਿ.

ਤਂ ਯਥਾ? ਆ ਈ ਊ ਏ ਓ, ਇਤਿ ਦੀਘਾ ਨਾਮ.

ਤੇਨ ਕ੍ਵਤ੍ਥੋ? ਦੀਘਂ.

੬. , ੮. ਸੇਸਾ ਬ੍ਯਞ੍ਜਨਾ.

ਠਪੇਤ੍ਵਾ ਅਟ੍ਠ ਸਰੇ ਸੇਸਾ ਅਕ੍ਖਰਾ ਕਕਾਰਾਦਯੋ ਨਿਗ੍ਗਹਿਤਨ੍ਤਾ ਬ੍ਯਞ੍ਜਨਾ ਨਾਮ ਹੋਨ੍ਤਿ.

ਤਂ ਯਥਾ? ਕ ਖ ਗ ਘ ਙ, ਚ ਛ ਜ ਝ ਞ, ਟ ਠ ਡ ਢ ਣ, ਤ ਥ ਦ ਧ ਨ, ਪ ਫ ਬ ਭ ਮ, ਯ ਰ ਲ ਵ ਸ ਹ ਲ਼ ਅਂ, ਇਤਿ ਬ੍ਯਞ੍ਜਨਾ ਨਾਮ.

ਤੇਨ ਕ੍ਵਤ੍ਥੋ? ਸਰਾ ਪਕਤਿ ਬ੍ਯਞ੍ਜਨੇ.

੭. , ੯. ਵਗ੍ਗਾ ਪਞ੍ਚਪਞ੍ਚਸੋ ਮਨ੍ਤਾ.

ਤੇਸਂ ਖੋ ਬ੍ਯਞ੍ਜਨਾਨਂ ਕਕਾਰਾਦਯੋ ਮਕਾਰਨ੍ਤਾ ਪਞ੍ਚਪਞ੍ਚਸੋ ਅਕ੍ਖਰਵਨ੍ਤੋ ਵਗ੍ਗਾ ਨਾਮ ਹੋਨ੍ਤਿ.

ਤਂ ਯਥਾ? ਕ ਖ ਗ ਘ ਙ, ਚ ਛ ਜ ਝ ਞ, ਟ ਠ ਡ ਢ ਣ, ਤ ਥ ਦ ਧ ਨ, ਪ ਫ ਬ ਭ ਮ, ਇਤਿ ਵਗ੍ਗਾ ਨਾਮ.

ਤੇਨ ਕ੍ਵਤ੍ਥੋ? ਵਗ੍ਗਨ੍ਤਂ ਵਾ ਵਗ੍ਗੇ.

੮. , ੧੦. ਅਂ ਇਤਿ ਨਿਗ੍ਗਹਿਤਂ.

ਅਂ ਇਤਿ ਨਿਗ੍ਗਹਿਤਂ ਨਾਮ ਹੋਤਿ.

ਤੇਨ ਕ੍ਵਤ੍ਥੋ? ਅਂ ਬ੍ਯਞ੍ਜਨੇ ਨਿਗ੍ਗਹਿਤਂ.

੯. , ੧੧. ਪਰਸਮਞ੍ਞਾ ਪਯੋਗੇ.

ਯਾ ਚ ਪਨ ਪਰੇਸੁ ਸਕ੍ਕਤਗਨ੍ਥੇਸੁ ਸਮਞ੍ਞਾ ਘੋਸਾਤਿ ਵਾ ਅਘੋਸਾਤਿ ਵਾ, ਤਾ ਪਯੋਗੇ ਸਤਿ ਏਤ੍ਥਾਪਿ ਯੁਜ੍ਜਨ੍ਤੇ.

ਤਤ੍ਥ ਘੋਸਾ ਨਾਮ-ਗ ਘ ਙ, ਜ ਝ ਞ, ਡ ਢ ਣ, ਦ ਧ ਨ, ਬ ਭ ਮ, ਯ ਰ ਲ ਵ ਹ ਲ਼, ਇਤਿ ਘੋਸਾ ਨਾਮ. ਅਘੋਸਾ ਨਾਮ-ਕ ਖ, ਚ ਛ, ਟ ਠ, ਤ ਥ, ਪ ਫ, ਸ, ਇਤਿ ਅਘੋਸਾ ਨਾਮ.

ਤੇਨ ਕ੍ਵਤ੍ਥੋ? ਵਗ੍ਗੇ ਘੋਸਾਘੋਸਾਨਂ ਤਤਿਯਪਠਮਾ.

੧੦. , ੧੨. ਪੁਬ੍ਬਮਧੋਠਿਤ ਮਸ੍ਸਰਂ ਸਰੇਨ ਵਿਯੋਜਯੇ.

ਤਤ੍ਥ ਸਨ੍ਧਿਂ ਕਤ੍ਤੁਕਾਮੋ ਪੁਬ੍ਬਬ੍ਯਞ੍ਜਨਂ ਅਧੋਠਿਤਂ ਅਸ੍ਸਰਂ ਕਤ੍ਵਾ ਸਰਞ੍ਚ ਉਪਰਿ ਕਤ੍ਵਾ ਸਰੇਨ ਵਿਯੋਜਯੇ.

ਤਤ੍ਰਾਯਮਾਦਿ.

੧੧. , ੧੪. ਨਯੇ ਪਰਂ ਯੁਤ੍ਤੇ.

ਅਸ੍ਸਰਂ ਖੋ ਬ੍ਯਞ੍ਜਨਂ ਅਧੋਠਤਂ ਪਰਕ੍ਖਰਂ ਨਯੇ ਯੁਤ੍ਤੇ. ਤਤ੍ਰਾਭਿਰਤਿਮਿਚ੍ਛੇਯ੍ਯ.

ਯੁਤ੍ਤੇਤਿਕਸ੍ਮਾ? ਅਕ੍ਕੋਚ੍ਛਿ ਮਂ ਅਵਧਿ ਮਂ, ਅਜਿਨਿ ਮਂ ਅਹਾਸਿ ਮੇ. ਏਤ੍ਥ ਪਨ ਯੁਤ੍ਤਂ ਨ ਹੋਤਿ.

ਇਤਿ ਸਨ੍ਧਿਕਪ੍ਪੇ ਪਠਮੋ ਕਣ੍ਡੋ.

ਦੁਤਿਯਕਣ੍ਡ

੧੨. , ੧੩. ਸਰਾ ਸਰੇ ਲੋਪਂ.

ਸਰਾ ਖੋ ਸਰੇ ਪਰੇ ਲੋਪਂ ਪਪ੍ਪੋਨ੍ਤਿ.

ਯਸ੍ਸਿਨ੍ਦ੍ਰਿਯਾਨਿ ਸਮਥਙ੍ਗਤਾਨਿ. ਨੋ ਹੇਤਂ ਭਨ੍ਤੇ ਸਮੇਤਾਯਸ੍ਮਾ ਸਙ੍ਘੇਨ.

੧੩. , ੧੫. ਵਾ ਪਰੋ ਅਸਰੂਪਾ.

ਸਰਮ੍ਹਾ ਅਸਰੂਪਾ ਪਰੋ ਸਰੋ ਲੋਪਂ ਪਪ੍ਪੋਤਿ ਵਾ.

ਚਤ੍ਤਾਰੋ’ਮੇ ਭਿਕ੍ਖਵੇ ਧਮ੍ਮਾ, ਕਿਨ੍ਨੁ’ ਮਾਵਸਮਣਿਯੋ. ਵਾਤਿ ਕਸ੍ਮਾ? ਪਞ੍ਚਿਨ੍ਦ੍ਰਿਯਾਨਿ, ਤਯਸ੍ਸੁ ਧਮ੍ਮਾ ਜਹਿਤਾ ਭਵਨ੍ਤਿ.

੧੪. , ੧੬. ਕ੍ਵਚਾਸਚਣ੍ਣਂ ਲੁਤ੍ਤੇ.

ਸਰੋ ਖੋ ਪਰੋ ਪੁਬ੍ਬਸਰੇ ਲੁਤ੍ਤੇ ਕ੍ਵਚਿ ਅਸਵਣ੍ਣਂ ਪਪ੍ਪੋਤਿ.

ਸਙ੍ਖ੍ਯਂ ਨੋਪੇਤਿ ਵੇਦਗੂ, ਬਨ੍ਧੁਸ੍ਸੇਵ ਸਮਾਗਮੋ.

ਕ੍ਵਚੀਤਿ ਕਸ੍ਮਾ? ਯਸ੍ਸਿਨ੍ਦ੍ਰਿਯਾਨਿ, ਤਥੂਪਮਂ ਧਮ੍ਮਵਰਂ ਅਦੇਸਯਿ.

੧੫. , ੧੭. ਦੀਘਂ.

ਸਰੋ ਖੋ ਪਰੋ ਪੁਬ੍ਬਸਰੇ ਲੁਤ੍ਤੇ ਕ੍ਵਚਿ ਦੀਘਂ ਪਪ੍ਪੋਤਿ. ਸਦ੍ਧੀਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ, ਅਨਾਗਾਰੇਹਿ ਚੂਭਯਂ.

ਕ੍ਵਚੀਤਿ ਕਸ੍ਮਾ? ਪਞ੍ਚਹੁਪਾਲਿ ਅਙ੍ਗੇਹਿ ਸਮਨ੍ਨਾਗਤੋ. ਨਤ੍ਥਞ੍ਞਂ ਕਿਞ੍ਚਿ.

੧੬. , ੧੮. ਪੁਬ੍ਬੋ ਚ.

ਪੁਬ੍ਬੋ ਚ ਸਰੋ ਪਰਸਰਲੋਪੇ ਕਤੇ ਕ੍ਵਚਿ ਦੀਘਂ ਪਪ੍ਪੋਤਿ.

ਕਿਂਸੂਧ ਵਿਤ੍ਤਂ ਪੁਰਿਸਸ੍ਸ ਸੇਟ੍ਠਂ, ਸਾਧੂਤਿ ਪਟਿਸ੍ਸੁਣਿਤ੍ਵਾ, ਕ੍ਵਚੀਤਿ ਕਸ੍ਮਾ? ਇਤਿਸ੍ਸ ਮੁਹੁਤ੍ਤਮ੍ਪਿ.

੧੭. , ੧੯. ਯਮੇਦਨ੍ਤਸ੍ਸਾਦੇਸੋ.

ਏਕਾਰਸ੍ਸ ਅਨ੍ਤਭੂਤਸ੍ਸ ਸਰੇ ਪਰੇ ਕ੍ਵਚਿ ਯਕਾਰਾਦੇਸੋ ਹੋਤਿ.

ਅਧਿਗਤੋ ਖੋ ਮ੍ਯਾਯਂ ਧਮ੍ਮੋ, ਤ੍ਯਾਹਂ ਏਵਂ ਵਦੇਯ੍ਯਂ, ਤ੍ਯਾਸ੍ਸ ਪਹੀਨਾ ਹੋਨ੍ਤਿ.

ਕ੍ਵਚੀਤਿ ਕਸ੍ਮਾ? ਨੇ’ਨਾਗਤਾ, ਇਤਿ ਨੇਤ੍ਥ.

੧੮. , ੨੦. ਵਮੋਦੁਦਨ੍ਤਾਨਂ.

ਓਕਾਰੁਕਾਰਾਨਂ ਅਨ੍ਤਭੂਤਾਨਂ ਸਰੇ ਪਰੇ ਕ੍ਵਚਿ ਵਕਾਰਾਦੇਸੋ ਹੋਤਿ.

ਅਥ ਖ੍ਵਸ੍ਸ, ਸ੍ਵਸ੍ਸ ਹੋਤਿ, ਬਹ੍ਵਾਬਾਧੋ, ਵਤ੍ਥ੍ਵੇਤ੍ਥ ਵਿਹਿਤਂ ਨਿਚ੍ਚਂ ਚਕ੍ਖਾਪਾਥਮਾਗਚ੍ਛਤਿ.

ਕ੍ਵਚੀਤਿਕਸ੍ਮਾ? ਚਤ੍ਤਾਰੋ’ਮੇ ਭਿਕ੍ਖਵੇ ਧਮ੍ਮਾ, ਕਿਨ੍ਨੁਮਾਵ ਸਮਣਿਯੋ.

੧੯. , ੨੨. ਸਬ੍ਬੋ ਚਂਤਿ.

ਸਬ੍ਬੋ ਇਚ੍ਚੇਸੋ ਤਿਸਦ੍ਦੋ ਬ੍ਯਞ੍ਜਨੋ ਸਰੇ ਪਰੇ ਕ੍ਵਚਿ ਚਕਾਰਂ ਪਪ੍ਪੋਤਿ.

ਇਚ੍ਚੇਤਂ ਕੁਸਲਂ, ਇਚ੍ਚਸ੍ਸ ਵਚਨੀਯਂ, ਪਚ੍ਚੁਤ੍ਤਰਿਤ੍ਵਾ, ਪਚ੍ਚਾਹਰਤਿ.

ਕ੍ਵਚੀਤਿ ਕਸ੍ਮਾ? ਇਤਿਸ੍ਸ ਮੁਹੁਤ੍ਤਮ੍ਪਿ.

੨੦. , ੨੭. ਦੋ ਧਸ੍ਸ ਚ.

ਧਇਚ੍ਚੇਤਸ੍ਸ ਸਰੇ ਪਰੇ ਕ੍ਵਚਿ ਦਕਾਰਾਦੇਸੋ ਹੋਤਿ.

ਏਕਮਿਦਾਹਂ ਭਿਕ੍ਖਵੇ ਸਮਯਂ.

ਕ੍ਵਚੀਤਿ ਕਸ੍ਮਾ? ਇਧੇਵ ਮਰਣਂ ਭਵਿਸ੍ਸਤਿ.

ਵਗ੍ਗਹਣੇਨ ਧਕਾਰਸ੍ਸ ਹਕਾਰਾਦੇਸੋ ਹੋਤਿ ਸਾਹੁ ਦਸ੍ਸਨ ਮਰਿਯਾਨਂ.

ਸੁਤ੍ਤਵਿਭਾਗੇਨ ਬਹੁਧਾ ਸਿਯਾ-

ਤੋ ਦਸ੍ਸ, ਯਥਾ? ਸੁਗਤੋ.

ਟੋ ਤਸ੍ਸ, ਯਥਾ? ਦੁਕ੍ਕਟਂ.

ਧੋ ਤਸ੍ਸ, ਯਥਾ? ਗਨ੍ਧਬ੍ਬੋ.

ਤ੍ਰੋ ਤ੍ਤਸ੍ਸ, ਯਥਾ? ਅਤ੍ਰਜੋ.

ਕੋ ਗਸ੍ਸ, ਯਥਾ? ਕੁਲੂਪਕੋ.

ਲੋ ਰਸ੍ਸ, ਯਥਾ? ਮਹਾਸਾਲੋ.

ਜੋ ਯਸ੍ਸ, ਯਥਾ? ਗਵਜੋ.

ਬ੍ਬੋ ਵਸ੍ਸ, ਯਥਾ? ਕੁਬ੍ਬਤੋ.

ਕੋ ਯਸ੍ਸ, ਯਥਾ? ਸਕੇ.

ਯੋ ਜਸ੍ਸ, ਯਥਾ? ਨਿਯਂਪੁਤ੍ਤਂ.

ਕੋ ਤਸ੍ਸ, ਯਥਾ? ਨਿਯਕੋ.

ਚ੍ਚੋ ਤ੍ਤਸ੍ਸ, ਯਥਾ ਭਚ੍ਚੋ.

ਫੋ ਪਸ੍ਸ, ਯਥਾ? ਨਿਪ੍ਫਤ੍ਤਿ.

ਖੋ ਕਸ੍ਸ, ਯਥਾ? ਨਿਕ੍ਖਮਤਿ. ਇਚ੍ਚੇਵਮਾਦੀ ਯੋਜੇਤਬ੍ਬਾ.

੨੧. , ੨੧. ਇਵਣ੍ਣੋ ਯਂ ਨਵਾ.

ਪੁਬ੍ਬੋ ਇਵਣ੍ਣੋ ਸਰੇ ਪਰੇ ਯਕਾਰਂ ਪਪ੍ਪੋਤਿ ਨਵਾ. ਪਟਿਸੁਨ੍ਥਾਰਵੁਤ੍ਯਸ੍ਸ, ਸਬ੍ਬਾ ਵਿਤ੍ਯਾਨੁਭੂਯਤੇ.

ਨਵਾਤਿ ਕਸ੍ਮਾ? ਪਞ੍ਚਹਙ੍ਗੇਹਿ ਸਮਨ੍ਨਾਗਤੋ, ਮੁਤ੍ਤਚਾਗੀ ਅਨੁਦ੍ਧਤੋ.

੨੨. , ੨੮. ਏਵਾਦਿਸ੍ਸ ਰਿ ਪੁਬ੍ਬੋ ਚ ਰਸ੍ਸੋ.

ਸਰਮ੍ਹਾ ਪਰਸ੍ਸ ਏਵਸ੍ਸ ਏਕਾਰਸ੍ਸ ਆਦਿਸ੍ਸ ਰਿਕਾਰੋ ਹੋਤਿ, ਪੁਬ੍ਬੋ ਚ ਸਰੋ ਰਸ੍ਸੋ ਹੋਤਿ ਨਵਾ.

ਯਥਰਿਵ ਵਸੁਧਾਤਲਞ੍ਚ ਸਬ੍ਬਂ, ਤਥਰਿਵ ਗੁਣਵਾ ਸੁਪੂਜਨਿਯੋ.

ਨਵਾਤਿ ਕਸ੍ਮਾ? ਯਥਾ ਏਵ, ਤਥਾ ਏਵ.

ਇਤਿ ਸਨ੍ਧਿਕਪ੍ਪੇ ਦੁਤਿਯੋ ਕਣ੍ਡੋ.

ਤਤਿਯਕਣ੍ਡ

੨੩. , ੨੬. ਸਰਾ ਪਕਤਿ ਬ੍ਯਞ੍ਜਨੇ.

ਸਰਾ ਖੋ ਬ੍ਯਞ੍ਜਨੇ ਪਰੇ ਪਕਤਿਰੂਪਾਨਿ ਹੋਨ੍ਤਿ.

ਮਨੋਪੁਬ੍ਬਙ੍ਗਮਾ ਧਮ੍ਮਾ, ਪਮਾਦੋ ਮਚ੍ਚੁਨੋ ਪਦਂ, ਤਿਣ੍ਣੋ ਪਾਰਙ੍ਗਤੋ ਅਹੁ.

੨੪. , ੩੫. ਸਰੇ ਕ੍ਵਚਿ.

ਸਰਾ ਖੋ ਸਰੇ ਪਰੇ ਕ੍ਵਚਿ ਪਕਤਿਰੂਪਾਨਿ ਹੋਨ੍ਤਿ.

ਕੋ ਇਮਂ ਪਥਵਿਂ ਵਿਚੇਸ੍ਸਤਿ.

ਕ੍ਵਚੀਤਿ ਕਸ੍ਮਾ? ਅਪ੍ਪਸ੍ਸੁਤਾਯਂ ਪੁਰਿਸੋ.

੨੫. , ੩੭. ਦੀਘਂ.

ਸਰਾ ਖੋ ਬ੍ਯਞ੍ਜਨੇ ਪਰੇ ਕ੍ਵਚਿ ਦੀਘਂ ਪਪ੍ਪੋਨ੍ਤਿ.

ਸਮ੍ਮਾ ਧਮ੍ਮਂ ਵਿਪਸ੍ਸਤੋ, ਏਵਂ ਗਾਮੇ ਮੁਨੀ ਚਰੇ, ਖਨ੍ਤੀ ਪਰਮਂ ਤਪੋ ਤਿਤਿਕ੍ਖਾ.

ਕ੍ਵਚੀਤਿ ਕਸ੍ਮਾ? ਇਧ ਮੋਦਤਿ ਪੇਚ੍ਚ ਮੋਦਤਿ, ਪਤਿਲੀਯਤਿ, ਪਟਿਹਞ੍ਞਤਿ.

੨੬. , ੩੮. ਰਸ੍ਸਂ.

ਸਰਾ ਖੋ ਬ੍ਯਞ੍ਜਨੇ ਪਰੇ ਕ੍ਵਚਿ ਰਸ੍ਸਂ ਪਪ੍ਪੋਨ੍ਤਿ.

ਭੋਵਾਦਿਨਾਮ ਸੋ ਹੋਤਿ, ਯਥਾਭਾਵਿ ਗੁਣੇਨ ਸੋ.

ਕ੍ਵਚੀਤਿ ਕਸ੍ਮਾ? ਸਮ੍ਮਾਸਮਾਧਿ, ਸਾਵਿਤ੍ਤੀ ਛਨ੍ਦਸੋ ਮੁਖਂ, ਉਪਨੀਯਤਿ ਜੀਵਿਤਮਪ੍ਪਮਾਯੁ.

੨੭. , ੩੯. ਲੋਪਞ੍ਚ ਤਤ੍ਰਾਕਾਰੋ.

ਸਰਾ ਖੋ ਬ੍ਯਞ੍ਜਨੇ ਪਰੇ ਕ੍ਵਚਿ ਲੋਪਂ ਪਪ੍ਪੋਨ੍ਤਿ. ਤਤ੍ਰ ਚ ਲੋਪੇ ਕਤੇ ਅਕਾਰਾਗਮੋ ਹੋਤਿ.

ਸ ਸੀਲਵਾ. ਸ ਪਞ੍ਞਵਾ ਏਸ ਧਮ੍ਮੋ ਸਨਨ੍ਤਨੋ, ਸ ਵੇ ਕਸਾਵਮਰਹਤਿ, ਸ ਮਾਨਕਾਮੋਪਿ ਭਵੇਯ੍ਯ, ਸ ਵੇ ਮੁਨਿ ਜਾਤਿਭਯਂ ਅਦਸ੍ਸਿ.

ਕ੍ਵਚੀਤਿ ਕਸ੍ਮਾ? ਸੋ ਮੁਨਿ, ਏਸੋ ਧਮ੍ਮੋ ਪਦਿਸ੍ਸਤਿ, ਨ ਸੋ ਕਾਸਾਵਮਰਹਤਿ.

੨੮. , ੪੦. ਪਰ ਦ੍ਵੇਭਾਵੋ ਠਾਨੇ.

ਸਰਮ੍ਹਾ ਪਰਸ੍ਸ ਬ੍ਯਞ੍ਜਨਸ੍ਸ ਦ੍ਵੇਭਾਵੋ ਹੋਤਿ ਠਾਨੇ.

ਇਧਪ੍ਪਮਾਦੋ, ਪੁਰਿਸਸ੍ਸ ਜਨ੍ਤੁਨੋ, ਪਬ੍ਬਜ੍ਜਂ ਕਿਤ੍ਤਯਿਸ੍ਸਾਮਿ, ਚਾਤੁਦ੍ਦਸਿ, ਪਞ੍ਚਦ੍ਦਸਿ, ਅਭਿਕ੍ਕਨ੍ਤਤਰੋ ਚਨ੍ਦੋ.

ਠਾਨੇਤਿ ਕਸ੍ਮਾ? ਇਧ ਮੋਦਤਿ ਪੇਚ੍ਚ ਮੋਦਤਿ.

੨੯. , ੪੨. ਵਗ੍ਗੇ ਘੋਸਾਘੋਸਾਨਂ ਤਤਿਯਪਠਮਾ.

ਵਗ੍ਗੇ ਖੋ ਪੁਬ੍ਬੇਸਂ ਬ੍ਯਞ੍ਜਨਾਨਂ ਘੋਸਾਘੋਸਭੂਤਾਨਂ ਸਰਮ੍ਹਾ ਯਥਾਸਙ੍ਖ੍ਯਂ ਤਤਿਯਪਠਮਕ੍ਖਰਾ ਦ੍ਵੇਭਾਵਂ ਗਚ੍ਛਨ੍ਤਿ ਠਾਨੇ.

ਏਸੇਵ ਚਜ੍ਝਾਨਪ੍ਫਲੋ, ਯਤ੍ਰਟ੍ਠਿਤਂ ਨਪ੍ਪਸਹੇਯ੍ਯ ਮਚ੍ਚੁ, ਸੇਲੇ ਯਥਾ ਪਬ੍ਬਤਮੁਦ੍ਧਨਿਟ੍ਠਿਤੋ, ਚਤ੍ਤਾਰਿਟ੍ਠਾਨਾਨਿ ਨਰੋ ਪਮਤ੍ਤੋ.

ਠਾਨੇਤਿ ਕਸ੍ਮਾ? ਇਧ ਚੇਤਸੋ ਦਲ਼੍ਹਂ ਗਣ੍ਹਾਤਿ ਥਾਮਸਾ.

ਇਤਿ ਸਨ੍ਧਿਕਪ੍ਪੇ ਤਤਿਯੋ ਕਣ੍ਡੋ.

ਚਤੁਤ੍ਥਕਣ੍ਡ

੩੦. , ੫੮. ਅਂ ਬ੍ਯਞ੍ਜਨੇ ਨਿਗ੍ਗਹਿਤਂ.

ਨਿਗ੍ਗਹਿਤਂ ਖੋ ਬ੍ਯਞ੍ਜਨੇ ਪਰੇ ਅਂ ਇਤਿ ਹੋਤਿ.

ਏਵਂ ਵੁਤ੍ਤੇ, ਤਂ ਸਾਧੂਤਿ ਪਟਿਸ੍ਸੁਣਿਤ੍ਵਾ.

੩੧. , ੪੯. ਵਗ੍ਗਨ੍ਤਂ ਵਾ ਵਗ੍ਗੇ.

ਵਗ੍ਗਭੂਤੇ ਬ੍ਯਞ੍ਜਨੇ ਪਰੇ ਨਿਗ੍ਗਹਿਤਂ ਖੋ ਵਗ੍ਗਨ੍ਤਂ ਵਾ ਪਪ੍ਪੋਤਿ.

ਤਨ੍ਨਿਚ੍ਚੁਤਂ, ਧਮ੍ਮਞ੍ਚਰੇ ਸੁਚਰਿਤਂ, ਚਿਰਪ੍ਪਵਾਸਿਂ ਪੁਰਿਸਂ. ਸਨ੍ਤਨ੍ਤਸ੍ਸ ਮਨਂ ਹੋਤਿ, ਤਙ੍ਕਾਰੁਣਿਕਂ, ਏਵਙ੍ਖੋ ਭਿਕ੍ਖਵੇ ਸਿਕ੍ਖਿਤਬ੍ਬਂ.

ਵਾਗ੍ਗਹਣੇਨਨਿਗ੍ਗਹਿਤਂ ਖੋ ਲਕਾਰਾਦੇਸੋ ਹੋਤਿ. ਪੁਗ੍ਗਲਂ.

ਵਾਤਿ ਕਸ੍ਮਾ? ਨ ਤਂ ਕਮ੍ਮਂ ਕਤਂ ਸਾਧੁ.

੩੨. , ੫੦. ਏਹੇ ਉਂ.

ਏਕਾਰਹਕਾਰੇ ਪਰੇ ਨਿਗ੍ਗਹਿਤਂ ਖੋ ਞਕਾਰਂ ਪਪ੍ਪੋਤਿ ਵਾ.

ਪਚ੍ਚਤ੍ਤਞ੍ਞੇਵ ਪਰਿਨਿਬ੍ਬਾਯਿਸ੍ਸਾਮਿ, ਤਞ੍ਞੇਵੇਤ੍ਥ ਪਟਿਪੁਚ੍ਛਿਸ੍ਸਾਮਿ, ਏਵਞ੍ਹਿ ਵੋ ਭਿਕ੍ਖਵੇ ਸਿਕ੍ਖਿਤਬ੍ਬਂ. ਤਞ੍ਹਿ ਤਸ੍ਸ ਮੁਸਾ ਹੋਤਿ.