੨. ਨਾਮਕਣ੍ਡ

ਪੁਲ੍ਲਿਙ੍ਗ

੪੭. ‘‘ਜਿਨਵਚਨਯੁਤ੍ਤਂ ਹੀ’’ਤਿ ਸਬ੍ਬਤ੍ਥਾਧਿਕਾਰੋ.

ਲਿਙ੍ਗਞ੍ਚ ਨਿਪਚ੍ਚਤੇ.

ਧਾਤੁਪ੍ਪਚ੍ਚਯਵਿਭਤ੍ਤਿਵਜ੍ਜਿਤਮਤ੍ਥਯੁਤ੍ਤਂ ਸਦ੍ਦਰੂਪਂ ਲਿਙ੍ਗਂ ਨਾਮ, ਜਿਨਵਚਨਯੋਗ੍ਗਂ ਲਿਙ੍ਗਂ ਇਧ ਠਪੀਯਤਿ ਨਿਪ੍ਫਾਦੀਯਤਿ ਚ.

੪੮. ਬੁਦ੍ਧਇਤਿ ਠਿਤੇ –

ਤਤੋ ਚ ਵਿਭਤ੍ਤਿਯੋ.

ਤਸ੍ਮਾ ਲਿਙ੍ਗਾ ਪਰਾ ਵਿਭਤ੍ਤਿਯੋ ਹੋਨ੍ਤਿ. ਚਕਾਰੇਨ ਤਾਸਂ ਏਕਵਚਨਾਦਿਪਠਮਾਦਿਸਞ੍ਞਾ ਚ.

‘‘ਸਿ ਯੋ ਅਂ ਯੋ ਨਾ ਹਿ ਸ ਨਂ ਸ੍ਮਾ ਹਿ ਸ ਨਂ ਸ੍ਮਿਂ ਸੂ’’ ਤਿ ਵਿਭਤ੍ਤਿਯੋ. ਸਿ ਯੋ ਇਤਿ ਪਠਮਾ, ਅਂ ਯੋ ਇਤਿ ਦੁਤਿਯਾ, ਨਾ ਹਿ ਇਤਿ ਤਤਿਯਾ, ਸ ਨਂ ਇਤਿ ਚਤੁਤ੍ਥੀ, ਸ੍ਮਾ ਹਿ ਇਤਿ ਪਞ੍ਚਮੀ, ਸ ਨਂ ਇਤਿ ਛਟ੍ਠੀ, ਸ੍ਮਿਂ ਸੁ ਇਤਿ ਸਤ੍ਤਮੀ.

ਲਿਙ੍ਗਤ੍ਥੇ ਪਠਮਾ.

ਯੋ ਕਮ੍ਮਕਤ੍ਤਾਦਿਵਤ੍ਤਨ੍ਤਰਮਪ੍ਪਤ੍ਤੋ ਸਸ੍ਸਰੂਪਟ੍ਠੋ ਸੁਦ੍ਧੋ, ਸੋ ਲਿਙ੍ਗਤ੍ਥੋ ਨਾਮ, ਤਸ੍ਸਾਭਿਧਾਨਮਤ੍ਤੇ ਪਠਮਾਵਿਭਤ੍ਤਿ ਹੋਤਿ. ਤਸ੍ਸਾਪਨਿਯਮੇ ਏਕਮ੍ਹਿ ਵਤ੍ਤਬ੍ਬੇ ਏਕਵਚਨਂ ਸਿ, ਵੁਚ੍ਚਤੇ ਨੇਨੇਤਿਵਚਨਂ, ਏਕਸ੍ਸਤ੍ਥਸ੍ਸ ਵਚਨਂ ਏਕਵਚਨਂ. ਏਵਂ ਬਹੁਵਚਨਂ.

ਅਤੋਤ੍ਵੇਵ.

ਸੋ.

ਅਕਾਰਨ੍ਤਾ ਪਰਸ੍ਸ ਸਿਸ੍ਸ ਓ ਹੋਤਿ.

ਸਰਲੋਪੋ ਮਾਦੇਸਪ੍ਪਚ੍ਚਯਾਦਿਮ੍ਹਿ ਸਰਲੋਪੇ ਤੁ ਪਕਤਿ.

ਅਂਆਦੀਸੁ ਪਰੇਸੁ ਸਰਸ੍ਸ ਲੋਪੋ ਹੋਤਿ, ਤਸ੍ਮਿਂ ਕਤੇ ਤੁ ਕ੍ਵਚਾਦਿਨਾ ਅਸਵਣ੍ਣੇ ਪਤ੍ਤੇ ਪਕਤਿ ਹੋਤਿ.

ਨਯੇ ਪਰਂ ਯੁਤ੍ਤੇ. ਏਵਮੁਪਰਿ ਸਰਲੋਪਾਦਿ. ਬੁਦ੍ਧੋ.

ਬਹੁਮ੍ਹਿ ਵਤ੍ਤਬ੍ਬੇ ਬਹੁਵਚਨਂ ਯੋ.

ਅਤੋ ਵਾਤ੍ਵੇਵ.

ਸਬ੍ਬਯੋਨੀਨਮਾਏ.

ਅਕਾਰਨ੍ਤਾ ਪਰੇਸਂ ਪਠਮਦੁਤਿਯਾਯੋਨੀਨਂ ਯਥਾਸਙ੍ਖ੍ਯਂ ਆਏ ਵਾ ਹੋਨ੍ਤਿ. ਬੁਦ੍ਧਾ.

ਵਾਤਿ ਕਿਂ. ਅਗ੍ਗਯੋ.

੪੯. ਲਿਙ੍ਗਤ੍ਥੇ ਪਠਮਾਤ੍ਵੇਵ.

ਆਲਪਨੇ ਚ.

ਅਭਿਮੁਖੀਕਰਣਮਾਲਪਨਂ, ਤਦਧਿਕੇ ਲਿਙ੍ਗਤ੍ਥੇ ਪਠਮਾ ਹੋਤਿ.

‘‘ਆਲਪਨੇ ਸਿ ਗਸਞ੍ਞੋ’’ਤਿ ਸਿਸ੍ਸ ਗਸਞ੍ਞਾ. ਗੇਇਤ੍ਵੇਵ.

ਅਕਾਰਾ ਪਿਤਾਦ੍ਯਨ੍ਤਾਨਮਾ.

ਗੇ ਪਰੇ ਅਕਾਰੋ ਪਿਤੁਸਤ੍ਥੁਅਤ੍ਤਰਾਜਾਦੀਨਮਨ੍ਤੋ ਚ ਆਤ੍ਤਂ ਯਾਤਿ.

‘‘ਆਕਾਰੋ ਵਾ’’ਤਿ ਗੇ ਪਰੇ ਆਕਾਰਸ੍ਸ ਰਸ੍ਸੋ ਵਾ.

ਸੇਸਤੋ ਲੋਪਂ ਗਸੀਪਿ.

ਸੋ ਸਿਂ ਸ੍ਯਾ ਚ ਸਖਾਤੋ ਗਸ੍ਸੇਵਾਤ੍ਯਾਦਿਨਿਦ੍ਦਿਟ੍ਠੇਹਞ੍ਞੇ ਅਵਣ੍ਣਿਵਣ੍ਣੁਵਣ੍ਣੋਕਾਰਨ੍ਤਾ ਸੇਸਾ, ਤੇਹਿ ਪਰੇ ਗਸੀ ਲੁਪ੍ਯਨ੍ਤੇ. ਹੇ - ਬੁਦ੍ਧ, ਬੁਦ੍ਧਾ. ਯੋ - ਬੁਦ੍ਧਾ.

੫੦. ਕਮ੍ਮਤ੍ਥੇ ਦੁਤਿਯਾ.

ਯਂ ਕਰੋਤਿ, ਤਂ ਕਮ੍ਮਂ ਨਾਮ. ਤਤ੍ਥ ਦੁਤਿਯਾ ਹੋਤਿ. ਅਂਬੁਦ੍ਧਂ. ਯੋਸ੍ਸ ਏ-ਬੁਦ੍ਧੇ.

੫੧. ਤਤਿਯਾਤ੍ਵੇਵ.

ਕਤ੍ਤਰਿ ਚ.

ਯੋ ਕਰੋਤਿ, ਸ ਕਤ੍ਤਾ ਨਾਮ. ਤਤ੍ਥ ਤਤਿਯਾ ਹੋਤਿ. ਨਾ.

ਅਤੋ ਨੇਨ.

ਅਕਾਰਾ ਪਰੋ ਨਾ ਏਨਂ ਯਾਤਿ. ਬੁਦ੍ਧੇਨ.

ਹਿ.

ਸੁਹਿਸ੍ਵਕਾਰੋ ਏ.

ਸੁਹਿਸੁ ਪਰੇਸ੍ਵਕਾਰਸ੍ਸ ਏ ਹੋਤਿ.

ਸ੍ਮਾਹਿਸ੍ਮਿਨ੍ਨਂ ਮ੍ਹਾਭਿਮ੍ਹਿ ਵਾ.

ਸਬ੍ਬਸਦ੍ਦੇਹਿ ਪਰੇਸਂ ਸ੍ਮਾਹਿਸ੍ਮਿਨ੍ਨਂ ਯਥਾਸਙ੍ਖ੍ਯਂ ਮ੍ਹਾਭਿਮ੍ਹਿਇਚ੍ਚੇਤੇ ਵਾ ਹੋਨ੍ਤਿ. ਬੁਦ੍ਧੇਭਿ, ਬੁਦ੍ਧੇਹਿ.

੫੨. ਕਰਣੇ ਤਤਿਯਾ.

ਯੇਨ ਵਾ ਕਯਿਰਤੇ, ਤਂ ਕਰਣਂ ਨਾਮ. ਤਤ੍ਥ ਤਤਿਯਾ ਹੋਤਿ. ਸਬ੍ਬਂ ਕਤ੍ਤੁਸਮਂ.

੫੩. ਸਮ੍ਪਦਾਨੇ ਚਤੁਤ੍ਥੀ.

ਯਸ੍ਸ ਦਾਤੁਕਾਮੋ ਰੋਚਤੇ, ਧਾਰਯਤੇ ਵਾ, ਤਂ ਸਮ੍ਪਦਾਨਂ ਨਾਮ. ਤਤ੍ਥ ਚਤੁਤ੍ਥੀ ਹੋਤਿ. ਸ.

ਅਤੋ ਵਾਤ੍ਵੇਵ.

ਆਯ ਚਤੁਤ੍ਥੇਕਵਚਨਸ੍ਸ ਤੁ.

ਅਕਾਰਾ ਪਰਸ੍ਸ ਚਤੁਤ੍ਥੇਕਵਚਨਸ੍ਸ ਆਯੋ ਵਾ ਹੋਤਿ. ਬੁਦ੍ਧਾਯ.

‘‘ਸਾਗਮੋ ਸੇ’’ਤਿ ਸੇ ਸਕਾਰਾਗਮੋ. ਬੁਦ੍ਧਸ੍ਸ. ਨਂ.

ਦੀਘਨ੍ਤ੍ਵੇਵ.

ਸੁਨਂਹਿਸੁ ਚ.

ਸੁਨਂਹਿਸੁ ਪਰੇਸੁ ਸਰਾਦੀਨਂ ਦੀਘੋ ਹੋਤਿ. ਚਸਦ੍ਦੇਨ ਕ੍ਵਚਿ ਨ. ਬੁਦ੍ਧਾਨਂ.

੫੪. ਅਪਾਦਾਨੇ ਪਞ੍ਚਮੀ.

ਯਸ੍ਮਾਦਪੇਤਿ, ਭਯਮਾਦਤ੍ਤੇ ਵਾ, ਤਦਪਾਦਾਨਂ ਨਾਮ, ਤਤ੍ਥ ਪਞ੍ਚਮੀ ਹੋਤਿ. ਸ੍ਮਾ.

ਅਤੋ ਆਏਤ੍ਵੇਵ.

੫੫. ਸ੍ਮਾਸ੍ਮਿਨ੍ਨਂ ਵਾ.

ਅਕਾਰਾ ਪਰੇਸਂ ਸ੍ਮਾਸ੍ਮਿਨ੍ਨਂ ਆਏ ਵਾ ਹੋਨ੍ਤਿ. ਬੁਦ੍ਧਾ, ਬੁਦ੍ਧਮ੍ਹਾ, ਬੁਦ੍ਧਸ੍ਮਾ. ਬੁਦ੍ਧੇਭਿ, ਬੁਦ੍ਧੇਹਿ.

੫੬. ਸਾਮਿਸ੍ਮਿਂ ਛਟ੍ਠੀ.

ਯਸ੍ਸ ਵਾ ਪਰਿਗ੍ਗਹੋ, ਤਂ ਸਾਮੀ ਨਾਮ. ਤਤ੍ਥ ਛਟ੍ਠੀ ਹੋਤਿ. ਬੁਦ੍ਧਸ੍ਸ. ਬੁਦ੍ਧਾਨਂ.

੫੭. ਓਕਾਸੇ ਸਤ੍ਤਮੀ.

ਯੋਧਾਰੋ, ਤਮੋਕਾਸਂ ਨਾਮ. ਤਤ੍ਥ ਸਤ੍ਤਮੀ ਹੋਤਿ. ਸ੍ਮਿਂ-ਬੁਦ੍ਧੇ, ਬੁਦ੍ਧਮ੍ਹਿ, ਬੁਦ੍ਧਸ੍ਮਿਂ. ਸੁ-ਬੁਦ੍ਧੇਸੁ.

੫੮. ਬੁਦ੍ਧੋ ਬੁਦ੍ਧ ਸੁਖਂ ਦਦਾਤਿ ਸਰਤੋ ਬੁਦ੍ਧਂ ਤਤੋ ਦੁਕ੍ਕਰਂ,

ਕਿਂ ਬੁਦ੍ਧੇਨ ਮਹਿਦ੍ਧਯੋਪਿ ਮੁਨਯੋ ਬੁਦ੍ਧੇਨ ਜਾਤਾਸੁਖੀ;

ਬੁਦ੍ਧਸ੍ਸੇਵ ਮਨਂ ਦਦੇ ਪਦਮਹਂ ਬੁਦ੍ਧਾ ਲਭੇਯ੍ਯਾਚ੍ਚੁਤਂ,

ਬੁਦ੍ਧਸ੍ਸਿਦ੍ਧਿ ਨ ਕਿਂ ਕਰੇ ਭਵਭਵੇ ਭਤ੍ਤ੍ਯਤ੍ਥੁ ਬੁਦ੍ਧੇ ਮਮ.

੫੯. ਇਤੋ ਪਰਂ ਤਤਿਯਾਪਞ੍ਚਮੀਨਞ੍ਚ ਚਤੁਤ੍ਥੀਛਟ੍ਠੀਨਞ੍ਚ ਸਰੂਪਤ੍ਤਾ ਪਞ੍ਚਮੀਛਟ੍ਠਿਯੋ ਭੀਯੋ ਉਪੇਕ੍ਖਨ੍ਤੇ.

੬੦. ਅਤ੍ਤ, ਸਿ.

ਬ੍ਰਹ੍ਮਤ੍ਤਸਖਰਾਜਾਦਿਤੋ ਤ੍ਵੇਵ.

ਸ੍ਯਾ ਚ.

ਬ੍ਰਹ੍ਮਾਦਿਤੋ ਸਿਸ੍ਸ ਆ ਹੋਤਿ. ਅਤ੍ਤਾ.

‘‘ਯੋਨਮਾਨੋ’’ਤਿ ਬ੍ਰਹ੍ਮਾਦਿਤੋ ਯੋਨਂ ਆਨੋਤ੍ਤਂ. ਅਤ੍ਤਾਨੋ.

੬੧. ਹੇ - ਅਤ੍ਤ, ਅਤ੍ਤਾ. ਯੋ, ਅਤ੍ਤਾਨੋ.

੬੨. ‘‘ਬ੍ਰਹ੍ਮਤ੍ਤਸਖਰਾਜਾਦਿਤੋ ਅਮਾਨ’’ਨ੍ਤਿ ਬ੍ਰਹ੍ਮਾਦਿਤੋ ਅਂਵਚਨਸ੍ਸ ਆਨਂ ਵਾ ਹੋਤਿ. ਅਤ੍ਤਾਨਂ, ਅਤ੍ਤਂ. ਅਤ੍ਤਾਨੋ.

੬੩. ਅਤ੍ਤੇਨ, ਅਤ੍ਤਨਾ. ਪਕ੍ਖੇ-ਜਿਨਵਚਨਾਨੁਰੋਧੇਨ ਏਨਾਭਾਵੋ.

‘‘ਅਤ੍ਤਾਨ੍ਤੋ ਹਿਸ੍ਮਿਮਨਤ੍ਤਂ’’ਤਿ ਹਿਮ੍ਹਿ ਅਤ੍ਤਨ੍ਤਸ੍ਸ ਅਨੋ. ਅਤ੍ਤਨੇਹਿ. ਏਵਂ ਕਰਣੇ.

੬੪. ‘‘ਸਸ੍ਸ ਨੋ’’ਤਿ ਨੋਕਾਰੋ. ਅਤ੍ਤਨੋ. ਅਤ੍ਤਾਨਂ.

੬੫. ਅਮ੍ਹਤੁਮ੍ਹਨ੍ਤੁ ਰਾਜਬ੍ਰਹ੍ਮਤ੍ਤਸਖ ਸਤ੍ਥੁਪਿਤਾਦੀਹਿ ਸ੍ਮਾ ਨਾਵ.

ਅਮ੍ਹਾਦਿਤੋ ਸ੍ਮਾ ਨਾ ਇਵ ਹੋਤਿ. ਅਤ੍ਤਨਾ.

੬੬. ‘‘ਤਤੋ ਸ੍ਮਿਨ੍ਨੀ’’ਤਿ ਸ੍ਮਿਨੋ ਨਿ. ਅਤ੍ਤਨਿ. ‘‘ਅਨਤ੍ਤ’’ਨ੍ਤਿ ਭਾਵਨਿਦ੍ਦੇਸੇਨ ਸੁਮ੍ਹਿ ਚ ਅਨੋ. ਅਤ੍ਤਨੇਸੁ.

੬੭. ਰਾਜਾ ਅਤ੍ਤਾਵ. ਨਾ.

ਸਵਿਭਤ੍ਤਿਸ੍ਸ ਰਾਜਸ੍ਸੇਤ੍ਵੇਵ.

ਨਾਮ੍ਹਿ ਰਞ੍ਞਾ ਵਾ.

ਨਾਮ੍ਹਿ ਸਵਿਭਤ੍ਤਿਸ੍ਸ ਰਾਜਸਦ੍ਦਸ੍ਸ ਰਞ੍ਞਾ ਵਾ ਹੋਤਿ. ਰਞ੍ਞਾ, ਰਾਜੇਨ.

ਰਾਜਸ੍ਸ ਰਾਜੁ ਸੁਨਂਹਿਸੁ ਚ.

ਸੁਨਂ ਹਿਸੁ ਪਰੇਸੁ ਰਾਜਸ੍ਸ ਰਾਜੁ ਹੋਤਿ, ਚਕਾਰੇਨ ਕ੍ਵਚਿ ਨ.

‘‘ਸੁਨਂਹਿਸੁ ਚੇਤਿ’’ ਦੀਘੇ - ਰਾਜੂਭਿ, ਰਾਜੂਹਿ, ਰਾਜੇਭਿ, ਰਾਜੇਹਿ.

੬੮. ਸਵਿਭਤ੍ਤਿਸ੍ਸੇਤ੍ਯਧਿਕਾਰੋ.

‘‘ਰਾਜਸ੍ਸ ਰਞ੍ਞੋ ਰਾਜਿਨੋ ਸੇ’’ਤਿ ਸੇ ਰਞ੍ਞੋ ਰਾਜਿਨੋ ਹੋਨ੍ਤਿ. ਰਞ੍ਞੋ, ਰਾਜਿਨੋ.

‘‘ਰਞ੍ਞਂ ਨਮ੍ਹਿ ਵਾ’’ਤਿ ਨਮ੍ਹਿ ਰਞ੍ਞਂ ਵਾ. ਰਞ੍ਞਂ, ਰਾਜੂਨਂ, ਰਾਜਾਨਂ.

੬੯. ਸ੍ਮਾਸ੍ਸਨਾਤੁਲ੍ਯਤ੍ਤਾ-ਨਾਮ੍ਹਿ ਰਞ੍ਞਾ ਵਾ. ਰਞ੍ਞਾ, ਰਾਜਮ੍ਹਾ, ਰਾਜਸ੍ਮਾ.

੭੦. ‘‘ਸ੍ਮਿਮ੍ਹਿ ਰਞ੍ਞੇ ਰਾਜਿਨੀ’’ਤਿ ਸ੍ਮਿਮ੍ਹਿ ਰਞ੍ਞੇ ਰਾਜਿਨਿ ਹੋਨ੍ਤਿ. ਰਞ੍ਞੇ, ਰਾਜਿਨਿ. ਰਾਜੂਸੁ, ਰਾਜੇਸੁ.

੭੧. ਗੁਣਵਨ੍ਤੁ, ਸਿ.

ਸਵਿਭਤ੍ਤਿਸ੍ਸ ਨ੍ਤੁਸ੍ਸੇਤ੍ਵੇਵ.

‘‘ਆ ਸਿਮ੍ਹੀ’’ਤਿ ਸਿਮ੍ਹਿ ਸਵਿਭਤ੍ਤਿਸ੍ਸ ਨ੍ਤੁਸ੍ਸ ਆ. ਗੁਣਵਾ.

ਯੋਮ੍ਹਿ ਪਠਮੇਤ੍ਵੇਵ.

ਨ੍ਤੁਸ੍ਸ ਨ੍ਤੋ.

ਪਠਮੇ ਯੋਮ੍ਹਿ ਸਵਿਭਤ੍ਤਿਸ੍ਸ ਨ੍ਤੁਸ੍ਸ ਨ੍ਤੋਕਾਰੋ ਹੋਤਿ. ਗੁਣਵਨ੍ਤੋ.

ਸੁਨਂਹਿਸੁ ਅਤ੍ਤਂਤ੍ਵੇਵ.

ਨ੍ਤੁਸ੍ਸਨ੍ਤੋ ਯੋਸੁ ਚ.

ਸੁਨਂਹਿਸੁ, ਯੋਸੁ, ਚਕਾਰੇਨ ਅਞ੍ਞੇਸੁਪਿ ਪਰੇਸੁ ਨ੍ਤੁਸ੍ਸਨ੍ਤੋ ਅਤ੍ਤਂ ਯਾਤਿ. ਗੁਣਵਨ੍ਤਾ.

੭੨. ਸਵਿਭਤ੍ਤਿਸ੍ਸੇਤ੍ਯਧਿਕਾਰੋ. ਅਂਇਤ੍ਵੇਵ.

ਅਵਣ੍ਣੋ ਚ ਗੇ.

ਗੇ ਪਰੇ ਸਵਿਭਤ੍ਤਿਸ੍ਸ ਨ੍ਤੁਸ੍ਸ ਅਂਅਆ ਹੋਨ੍ਤਿ. ਹੇਗੁਣਵਂ,ਗੁਣਵ, ਗੁਣਵਾ. ਯੋ - ਗੁਣਵਨ੍ਤੋ, ਗੁਣਵਨ੍ਤਾ.

੭੩. ਅਤ੍ਤਂ – ਗੁਣਵਨ੍ਤਂ. ਗੁਣਵਨ੍ਤੇ.

੭੪. ‘‘ਤੋਤਿਤਾ ਸਸ੍ਮਿਂ ਨਾਸ੍ਵੀ’’ਤਿ ਸਵਿਭਤ੍ਤਿਸ੍ਸ ਨ੍ਤੁਸ੍ਸ ਨਾਮ੍ਹਿ ਤਾ, ਸੇ ਤੋਕਾਰੋ, ਸ੍ਮਿਮ੍ਹਿ ਤਿ ਚ ਵਾ. ਗੁਣਵਤਾ, ਗੁਣਵਨ੍ਤੇਨ. ਗੁਣਵਨ੍ਤੇਭਿ, ਗੁਣਵਨ੍ਤੇਹਿ.

੭੫. ਗੁਣਵਤੋ, ਗੁਣਵਨ੍ਤਸ੍ਸ.

‘‘ਨਮ੍ਹਿ ਤਂ ਵਾ’’ਤਿ ਨਮ੍ਹਿ ਨ੍ਤੁਸ੍ਸ ਤਂ ਵਾ. ਗੁਣਵਤਂ, ਗੁਣਵਨ੍ਤਾਨਂ. ਸ੍ਮਾ ਨਾਵ.

੭੬. ਗੁਣਵਤਿ, ਗੁਣਵਨ੍ਤੇ, ਗੁਣਵਨ੍ਤਮ੍ਹਿ, ਗੁਣਵਨ੍ਤਸ੍ਮਿਂ, ਗੁਣਵਨ੍ਤੇਸੁ.

੭੭. ਗਚ੍ਛਨ੍ਤ, ਸਿ.

‘‘ਸਿਮ੍ਹਿ ਗਚ੍ਛਨ੍ਤਾਦੀਨਂ ਨ੍ਤਸਦ੍ਦੋ ਅ’’ਨ੍ਤਿ ਨ੍ਤਸਦ੍ਦਸ੍ਸ ਅਂਵਾ, ਸਿਲੋਪੋ. ਗਚ੍ਛਂ, ਸਿਸ੍ਸ ਓ – ਗਚ੍ਛਨ੍ਤੋ.

ਗਚ੍ਛਨ੍ਤਾਦੀਨਂ ਨ੍ਤਸਦ੍ਦੋਤ੍ਵੇਵ.

ਸੇਸੇਸੁਨ੍ਤੁਵ.

ਵੁਤ੍ਤਂ ਹਿਤ੍ਵਾ ਸੇਸੇਸੁ ਗਚ੍ਛਨ੍ਤਾਦੀਨਂ ਨ੍ਤਸਦ੍ਦੋ ਨ੍ਤੁ ਇਵ ਦਟ੍ਠਬ੍ਬੋ. ਗਚ੍ਛਨ੍ਤੋ, ਗਚ੍ਛਨ੍ਤਾਇਚ੍ਚਾਦਿ.

ਸੇਸਂ ਗੁਣਵਨ੍ਤੁਸਮਂ.

੭੮. ਗਚ੍ਛਨ੍ਤਾਦਯੋ ਨਾਮ ਅਨ੍ਤਪ੍ਪਚ੍ਚਯਨ੍ਤਾ.

੭੯. ਅਗ੍ਗਿ, ਸਿਲੋਪੋ.

‘‘ਇਵਣ੍ਣੁਵਣ੍ਣਾ ਝਲਾ’’ਤਿ ਇਵਣ੍ਣੁਵਣ੍ਣਾਨਂ ਯਥਾਸਙ੍ਖ੍ਯਂ ਝਲਸਞ੍ਞਾ.

ਝਲਤੋ ਵਾਤ੍ਵੇਵ.

ਘਪਤੋ ਚ ਯੋਨਂ ਲੋਪੋ.

ਘਪਝਲਤੋ ਯੋਨਂ ਲੋਪੋ ਵਾ ਹੋਤਿ.

ਯੋਸੁ ਕਤਨਿਕਾਰਲੋਪੇਸੁ ਦੀਘਂ.

ਕਤੋ ਨਿਕਾਰੋ ਲੋਪੋ ਚ ਯੇਸਂ ਤੇਸੁ ਯੋਸੁ ਸਰਾਨਂ ਦੀਘੋ ਹੋਤਿ. ਅਗ੍ਗੀ. ਪਕ੍ਖੇ-ਅਤ੍ਤਨ੍ਤ੍ਵੇਵ.

ਯੋ ਸ੍ਵਕਤਰਸ੍ਸੋ ਝੋ.

ਯੋਸੁ ਅਕਤਰਸ੍ਸੋ ਝੋ ਅਤ੍ਤਂ ਯਾਤਿ. ਅਗ੍ਗਯੋ. ਤਥਾਲਪਨੇ.

੮੦. ਅਂ ਮੋ ਨਿਗ੍ਗਹੀਤਂ ਝਲਪੇਹਿ.

ਝਲਪਤੋ ਅਂ ਮੋ ਚ ਬਿਨ੍ਦੁਂ ਯਨ੍ਤਿ. ਅਗ੍ਗਿਂ. ਅਗ੍ਗੀ, ਅਗ੍ਗਯੋ.

੮੧. ਅਗ੍ਗਿਨਾ. ਦੀਘੇ-ਅਗ੍ਗੀਭਿ, ਅਗ੍ਗੀਹਿ.

੮੨. ‘‘ਝਲਤੋ ਸਸ੍ਸ ਨੋ ਵਾ’’ਤਿ ਸਸ੍ਸ ਨੋਤ੍ਤਂ ਵਾ. ਅਗ੍ਗਿਨੋ, ਅਗ੍ਗਿਸ੍ਸ. ਅਗ੍ਗੀਨਂ.

੮੩. ‘‘ਝਲਤੋ ਚੇ’’ਤਿ ਸ੍ਮਾਸ੍ਸ ਨਾ. ਅਗ੍ਗਿਨਾ.

੮੪. ਅਗ੍ਗਿਮ੍ਹਿ, ਅਗ੍ਗਿਸ੍ਮਿਂ. ਅਗ੍ਗੀਸੁ.

੮੫. ਆਦਿ ਅਗ੍ਗੀਵ. ਸ੍ਮਿਂਨੋ ਪਨ ‘‘ਆਦਿਤੋ ਓ ਚੇ’’ਤਿ ਅਂ, ਓ ਚ ਵਾ. ਆਦਿ, ਆਦੋ, ਆਦਿਮ੍ਹਿ, ਆਦਿਸ੍ਮਿਂ. ਆਦੀਸੁ.

੮੬. ਦਣ੍ਡੀ, ਸਿ.

‘‘ਅਘੋ ਰਸ੍ਸ’’ਮਾਦਿਨਾ ਰਸ੍ਸੇ ਸਮ੍ਪਤ੍ਤੇ ‘‘ਨ ਸਿਸ੍ਮਿਮਨਪੁਂਸਕਾਨੀ’’ਤਿ ਸਿਮ੍ਹਿ ਅਨਪੁਂਸਕਾਨਂ ਨ ਰਸ੍ਸੋ. ਸਿਲੋਪੋ, ਦਣ੍ਡੀ, ਯੋਲੋਪੇ – ਦਣ੍ਡੀ. ਪਕ੍ਖੇ –

ਅਘੋ ਰਸ੍ਸਮੇਕਵਚਨਯੋਸ੍ਵਪਿ ਚ.

ਏਕਵਚਨਯੋਸੁ ਝਲਪਾ ਰਸ੍ਸਂ ਯਨ੍ਤਿ.

ਝਤੋ ਕਤਰਸ੍ਸਾਤ੍ਵੇਵ.

ਯੋਨਂ ਨੋ.

ਕਤਸ੍ਸਾ ਝਤੋ ਯੋਨਂ ਨੋਤ੍ਤਂ ਹੋਤਿ. ਦਣ੍ਡਿਨੋ.

੮੭. ‘‘ਝਲਪਾ ਰਸ੍ਸ’’ਨ੍ਤਿ ਗੇ ਪਰੇ ਝਲਪਾਨਂ ਰਸ੍ਸੋ. ਹੇਦਣ੍ਡਿ. ਦਣ੍ਡੀ, ਦਣ੍ਡਿਨੋ.

੮੮. ਵਾ ਅਂਇਤ੍ਵੇਵ.

‘‘ਨਂ ਝਤੋ ਕਤਰਸ੍ਸਾ’’ਤਿ ਅਂਇਚ੍ਚਸ੍ਸ ਨਂ ਵਾ. ਦਣ੍ਡਿਨਂ, ਦਣ੍ਡਿਂ. ਦਣ੍ਡੀ, ਦਣ੍ਡਿਨੋ.

੮੯. ਦਣ੍ਡਿਨਾ. ਦਣ੍ਡੀਭਿ, ਦਣ੍ਡੀਹਿ.

੯੦. ਦਣ੍ਡਿਨੋ, ਦਣ੍ਡਿਸ੍ਸ. ਦਣ੍ਡੀਨਂ.

੯੧. ਝਤੋ ਕਤਰਸ੍ਸਾਤ੍ਵੇਵ.

‘‘ਸ੍ਮਿਨ੍ਨੀ’’ਤਿ ਸ੍ਮਿਨੋ ਨਿ. ਦਣ੍ਡਿਨਿ. ਦਣ੍ਡੀਸੁ.

੯੨. ਭਿਕ੍ਖੁ, ਸਿਲੋਪੋ.

ਵਾ ਯੋਨਂਤ੍ਵੇਵ.

‘‘ਲਤੋ ਵੋ ਕਾਰੋ ਚੇ’’ਤਿ ਲਤੋ ਯੋਨਂ ਵੋਤ੍ਤਂ ਵਾ.