੧. ਸਨ੍ਧਿ ਕਣ੍ਡ

ਸਞ੍ਞਾ

੨. ਅਕ੍ਖਰਾਪਾਦਯੋ ਏਕਚਤ੍ਤਾਲੀਸਂ.

ਅਕ੍ਖਰਾਪਿ ਅਕਾਰਾਦਯੋ ਏਕਚਤ੍ਤਾਲੀਸਂ ਸੁਤ੍ਤਨ੍ਤੋਪਕਾਰਾ. ਤਂ ਯਥਾ-ਅ ਆ-ਇ ਈ-ਉ ਊ-ਏ ਓ, ਕ ਖ ਗ ਘ ਙ, ਚ ਛ ਜ ਝ ਞ, ਟ ਠ ਡ ਢ ਣ, ਤ ਥ ਦ ਧ ਨ, ਪ ਫ ਬ ਭ ਮ, ਯ ਰ ਲ ਵ ਸ ਹ ਲ਼ ਅਂ-ਇਤਿ.

੩. ਤਤ੍ਥੋਦਨ੍ਤਾਸਰਾ ਅਟ੍ਠ.

ਤਤ੍ਥ ਅਕ੍ਖਰੇਸੁ ਓਕਾਰਨ੍ਤਾ ਅਟ੍ਠ ਸਰਾ ਨਾਮ. ਤਤ੍ਥੇਤਿ ਵਤ੍ਤਤੇ.

੪. ਲਹੁਮਤ੍ਤਾ ਤਯੋ ਰਸ੍ਸਾ.

ਤਤ੍ਥ ਸਰੇਸੁ ਲਹੁਮਤ੍ਤਾ ਅ, ਇ, ਉ ਇਤਿ ਤਯੋ ਰਸ੍ਸਾ.

੫. ਅਞ੍ਞੇ ਦੀਘਾ.

ਤਤ੍ਥ ਸਰੇਸੁ ਰਸ੍ਸੇਹਞ੍ਞੇ ਦੀਘਾ.

ਸਂਯੋਗਤੋ ਪੁਬ੍ਬੇ ਏਓ ਰਸ੍ਸਾ ਇਵੋਚ੍ਚਨ੍ਤੇ, ਅਨਨ੍ਤਰਾ ਬ੍ਯਞ੍ਜਨਾ ਸਂਯੋਗੋ. ਏਤ੍ਥ, ਸੇਯ੍ਯੋ, ਓਟ੍ਠੋ, ਸੋਤ੍ਥਿ.

੬. ਸੇਸਾ ਬ੍ਯਞ੍ਜਨਾ.

ਸਰੇ ਠਪੇਤ੍ਵਾ ਸੇਸਾ ਕਾਦਯੋ ਨਿਗ੍ਗਹੀਤਨ੍ਤਾ ਬ੍ਯਞ੍ਜਨਾ.

੭. ਵਗ੍ਗਾ ਪਞ੍ਚਪਞ੍ਚਸੋ ਮਨ੍ਤਾ.

ਬ੍ਯਞ੍ਜਨਾਨਂ ਕਾਦਯੋ ਮਕਾਰਨ੍ਤਾ ਪਞ੍ਚਪਞ੍ਚਸੋ ਅਕ੍ਖਰਵਨ੍ਤੋ ਵਗ੍ਗਾ.

੮. ਵਗ੍ਗਾਨਂ ਪਠਮਦੁਤਿਯਾ ਸੋ ਚਾਘੋਸੋ. ਲ਼ਨ੍ਤਾਞ੍ਞੇ ਘੋਸਾ. ਘੋਸਾਘੋਸਸਞ੍ਞਾ ਚ ‘‘ਪਰਸਮਞ੍ਞਾ ਪਯੋਗੇ’’ਤਿ ਸਙ੍ਗਹੀਤਾ. ਏਵਂ ਲਿਙ੍ਗ, ਸਬ੍ਬਨਾਮ, ਪਦ, ਉਪਸਗ੍ਗ, ਨਿਪਾਤ, ਤਦ੍ਧਿਤ, ਆਖ੍ਯਾਤ, ਕਮ੍ਮਪ੍ਪਵਚਨੀਯਾਦਿਸਞ੍ਞਾ ਚ.

੯. ਅਂਇਤਿ ਨਿਗ੍ਗਹੀਤਂ.

ਅਂਇਤਿ ਅਕਾਰਤੋ ਪਰਂ ਯੋ ਬਿਨ੍ਦੁ ਸੂਯਤੇ, ਤਂ ਨਿਗ੍ਗਹੀਤਂ ਨਾਮ.

ਬਿਨ੍ਦੁ ਚੂਲ਼ਾਮਣਾਕਾਰੋ, ਨਿਗ੍ਗਹੀਤਨ੍ਤਿ ਵੁਚ੍ਚਤੇ.

ਕੇਵਲਸ੍ਸਾ ਪ੍ਪਯੋਗਤ੍ਤਾ, ਅਕਾਰੋ ਸਨ੍ਨਿਧੀਯਤੇ.

੧੦. ਅ, ਕਵਗ੍ਗ, ਹਾ ਕਣ੍ਡਜਾ, ਇ, ਚਵਗ੍ਗ, ਯਾ ਤਾਲੁਜਾ, ਉ, ਪਵਗ੍ਗਾ ਓਟ੍ਠਜਾ, ਟਵਗ੍ਗ, ਰ, ਲ਼ਾ ਮੁਦ੍ਧਜਾ, ਤਵਗ੍ਗ, ਲ, ਸਾ ਦਨ੍ਤਜਾ, ਏ ਕਣ੍ਠਤਾਲੁਜੋ, ਓ ਕਣ੍ਠੋਟ੍ਠਜੋ, ਵੋ ਦਨ੍ਤੋਟ੍ਠਜੋ.

ਸਞ੍ਞਾ

ਸਰਸਨ੍ਧਿ

੧੧. ਲੋਕ ਅਗ੍ਗੋਇਤ੍ਯਸ੍ਮਿਂ – ‘‘ਪੁਬ੍ਬਮਧੋਠਿਤ ਮਸ੍ਸਰਂ ਸਰੇਨ ਵਿਯੋਜਯੇ’’ਤਿ ਪੁਬ੍ਬਬ੍ਯਞ੍ਜਨਂ ਸਰਤੋ ਪੁਥਕ੍ਕਾਤਬ੍ਬਂ.

ਸਰਾ ਸਰੇ ਲੋਪਂ.

ਅਨਨ੍ਤਰੇ ਸਰੇ ਪਰੇ ਸਰਾ ਲੋਪਂ ਪਪ੍ਪੋਨ੍ਤਿ.

‘‘ਨਰੇ ਪਰਂ ਯੁਤ੍ਤੇ’’ਤਿ ਅਸ੍ਸਰੋ ਬ੍ਯਞ੍ਜਨੋ ਪਰਕ੍ਖਰਂ ਨੇਤਬ੍ਬੋ ਲੋਕਗ੍ਗੋ.

ਸਰੇਤ੍ਯਸ੍ਮਿਂ ਓਪਸਿਲੇਸਿਕੋ ਕਾਸਸਤ੍ਤਮੀ, ਤਤੋ ਵਣ੍ਣਕਾਲਬ੍ਯਵਧਾਨੇ ਕਾਰਿਯਂ ਨ ਹੋਤਿ. ਯਥਾ-ਮਂ ਅਹਾ ਸੀਤਿ, ‘‘ਪਮਾਦਮਨੁਯੁਞ੍ਜਨ੍ਤੀ’’ਤ੍ਯਾਦਿਗਾਥਾਯਂ ‘ਜਨਾ ਅਪ੍ਪਮਾਦ’ਨ੍ਤਿ ਚ. ਏਵਂ ਸਬ੍ਬਸਨ੍ਧੀਸੁ.

ਅਨਨ੍ਤਰਂ ਪਰਸ੍ਸ ਸਰਸ੍ਸ ਲੋਪਂ ਵਕ੍ਖਤਿ, ਤਸ੍ਮਾਨੇਨ ਪੁਬ੍ਬਸ੍ਸ ਲੋਪੋ ਞਾਯਤਿ, ਤੇਨੇਵ ਸਤ੍ਤਮੀਨਿਦ੍ਦਿਟ੍ਠਸ੍ਸ ਪਰਤਾਪਿ ਗਮ੍ਯਤੇ.

੧੨. ਸਰੇਤ੍ਯਧਿਕਾਰੋ. ਪਨ ਇਮੇ ਪਨ ਇਮੇਤੀਹ-ਸਰਾ ਲੋਪਂ ਇਤ੍ਵੇਵ.

ਵਾ ਪਰੋ ਅਸਰੂਪੋ.

ਅਸਮਾਨਰੂਪਾਸਰਮ੍ਹਾ ਪਰੋ ਸਰੋ ਵਾ ਲੁਪ੍ਯਤੇ, ਪਨਮੇ, ਪਨਿਮੇ.

੧੩. ਬਨ੍ਧੁਸ੍ਸ ਇਵ, ਨ ਉਪੇਤੀਤੀਧ –

ਕ੍ਵਚਾਸਵਣ੍ਣਂ ਲੁਤ੍ਤੇ.

ਸਰੇ ਲੁਤ੍ਤੇ ਪਰਸਰਸ੍ਸ ਕ੍ਵਚਿ ਅਸਵਣ੍ਣੋ ਹੋਤੀਤਿ ਇ ਉ ਇਚ੍ਚੇਤੇਸਂ ਠਾਨਾਸਨ੍ਨਾ ਏ ਓ. ਬਨ੍ਧੁਸ੍ਸੇਵ. ਨੋਪੇਤਿ.

੧੪. ਤਤ੍ਰ ਅਯਂ, ਯਾਨਿ ਇਧ, ਬਹੁ ਉਪਕਾਰਂ, ਸਦ੍ਧਾ ਇਧ, ਤਥਾ ਉਪਮਨ੍ਤ੍ਯੇਤਸ੍ਮਿਂ –

ਦੀਘਂ.

ਸਰੇ ਲੁਤ੍ਤੇ ਪਰੋ ਸਰੋ ਕ੍ਵਚਿ ਠਾਨਾਸਨ੍ਨਂ ਦੀਘਂ ਯਾਤਿ. ਤਤ੍ਰਾਯਂ, ਯਾਨੀਧ, ਬਹੂਪਕਾਰਂ, ਸਦ੍ਧੀਧ, ਤਥੂਪਮਂ.

੧੫. ਕਿਂਸੁ ਇਧੇਤ੍ਯਤ੍ਰ –

ਪੁਬ੍ਬੋ ਚ.

ਸਰੇ ਲੁਤ੍ਤੇ ਪੁਬ੍ਬੋ ਚ ਕ੍ਵਚਿ ਦੀਘਂ ਯਾਤਿ. ਕਿਂ ਸੂਧ.

੧੬. ਤੇ ਅਜ੍ਜ, ਤੇ ਅਹਂਤੇਤ੍ਥ –

ਯਮੇਦਨ੍ਤਸ੍ਸਾਦੇਸੋ.

ਸਰੇ ਪਰੇ ਅਨ੍ਤਸ੍ਸ ਏਕਾਰਸ੍ਸ ਕ੍ਵਚਿ ਯੋ ਆਦੇਸੋ ਹੋਤਿ, ਤ੍ਯਜ੍ਜ, ‘‘ਦੀਘ’’ਨ੍ਤਿ ਬ੍ਯਞ੍ਜਨੇ ਪਰੇ ਕ੍ਵਚਿ ਦੀਘੋ, ਤ੍ਯਾਹਂ.

ਕ੍ਵਚੀਤਿ ਕਿਂ. ਨੇਤ੍ਥ.

੧੭. ਸੋ ਅਸ੍ਸ, ਅਨੁ ਏਤਿਤ੍ਯੇਤ੍ਥ –

ਵਮੋਦੁਦਨ੍ਤਾਨਂ.

ਸਰੇ ਪਰੇ ਅਨ੍ਤੋ ਕਾਰੁਕਾਰਾਨਂ ਕ੍ਵਚਿ ਵੋ ਆਦੇਸੋ ਹੋਤਿ. ਸ੍ਵਸ੍ਸ, ਅਨ੍ਵੇਤਿ.

ਕ੍ਵਚੀਤਿ ਕਿਂ. ਤਯਸ੍ਸੁ, ਸਮੇਤਾਯਸ੍ਮਾ.

੧੮. ਇਧ ਅਹਂ ਤੀਧ –

ਦੋ ਧਸ੍ਸ ਚ.

ਸਰੇ ਪਰੇ ਧਸ੍ਸ ਕ੍ਵਚਿ ਦੋ ਹੋਤਿ. ਦੀਘੇ – ਇਦਾਹਂ. ਕ੍ਵਚੀਤਿ ਕਿਂ. ਇਧੇਵ. ਚਕਾਰੇਨ ਬ੍ਯਞ੍ਜਨੇਪਿ, ਇਧ ਭਿਕ੍ਖਵੇ.

੧੯. ਪਤਿ ਅਨ੍ਤੁਂ, ਵੁਤ੍ਤਿ ਅਸ੍ਸੇਤੀਹ –

ਇਵਣ੍ਣੋ ਯਨ੍ਨਵਾ.

ਸਰੇ ਪਰੇ ਇਵਣ੍ਣਸ੍ਸ ਯੋ ਨਵਾ ਹੋਤਿ. ਕਤ ਯਕਾਰਸ੍ਸ ਤਿਸ੍ਸ ‘‘ਸਬ੍ਬੋ ਚਨ੍ਤੀ’’ਤਿ ਕ੍ਵਚਿ ਚਾਦੇਸੇ ‘‘ਪਰਦ੍ਵੇਭਾਵੋ ਠਾਨੇ’’ਤਿ ਸਰਤੋ ਪਰਬ੍ਯਞ੍ਜਨਸ੍ਸ ਠਾਨਾਸਨ੍ਨਵਸਾ ਦ੍ਵਿਤ੍ਤਂ. ਪਚ੍ਚਨ੍ਤਂ, ਵੁਤ੍ਯਸ੍ਸ.

ਨਵਾਤਿ ਕਿਂ. ਪਟਗ੍ਗਿ,

ਏਤ੍ਥ ‘‘ਕ੍ਵਚਿ ਪਟਿ ਪਤਿਸ੍ਸੇ’’ਤਿ ਪਤਿਸ੍ਸ ਪਟਿ, ਵਣ੍ਣਗ੍ਗਹਣਂ ਸਬ੍ਬਤ੍ਥ ਰਸ੍ਸਦੀਘ ਸਙ੍ਗਹਣਤ੍ਥਂ.

੨੦. ਯਥਾ ਏਵੇਤੀਹ –

ਏਵਾਦਿਸ੍ਸ ਰਿ ਪੁਬ੍ਬੋ ਚ ਰਸ੍ਸੋ.

ਸਰਤੋ ਪਰਸ੍ਸ ਏਵਸ੍ਸਾਦਿਏਕਾਰੋ ਰਿਤ੍ਤਂ ਨਵਾ ਯਾਤਿ. ਪੁਬ੍ਬੋ ਚ ਠਾਨਾਸਨ੍ਨਂ ਰਸ੍ਸਂ. ਯਥਰਿਵ. ਯਥੇਵ.

੨੧. ਨ ਇਮਸ੍ਸ, ਤਿ ਅਙ੍ਗਿਕਂ, ਲਹੁ ਏਸ੍ਸਤਿ, ਅਤ੍ਥ ਅਤ੍ਥਂ, ਇਤੋ ਆਯਤਿ, ਤਸ੍ਮਾ ਇਹ, ਸਬ੍ਭਿ ਏਵ, ਛ ਅਭਿਞ੍ਞਾ, ਪੁਥ ਏਵ, ਪਾ ਏਵਤੀਹ ਵਾ ਤ੍ਵੇਵ –

ਯ ਵ ਮ ਦ ਨ ਤ ਰ ਲ਼ਾ ਚਾਗਮਾ.

ਸਰੇ ਪਰੇ ਯਾਦਯੋ ਆਗਮਾ ਵਾ ਹੋਨ੍ਤਿ, ਚਕਾਰੇਨ ਗੋ ਚ. ਨਯਿਮਸ੍ਸ, ਤਿਵਙ੍ਗਿਕਂ, ਲਹੁਮੇਸ੍ਸਤਿ, ਅਤ੍ਤਦਤ੍ਥਂ, ਇਤੋਨਾਯਤਿ, ਤਸ੍ਮਾਤਿਹ, ਸਬ੍ਭਿਰੇਵ, ਛਲ਼ਭਿਞਾ, ਪੁਥਗੇਵ, ‘‘ਰਸ੍ਸ’’ਨ੍ਤਿ ਬ੍ਯਞ੍ਜਨੇ ਪਰੇ ਕ੍ਵਚਿ ਰਸ੍ਸੋ. ਪਗੇਵ.

ਵਾਤਿ ਕਿਂ. ਛ ਅਭਿਞ੍ਞਾ, ਪੁਥ ਏਵ, ਪਾ ਏਵ.

ਏਤ੍ਥ ‘‘ਸਰੇ ਕ੍ਵਚੀ’’ਤਿ ਸਰਾਨਂ ਪਕਤਿ ਹੋਤਿ, ਸਸ੍ਸਰੂਪਮੇਵ, ਨ ਵਿਕਾਰੋਤ੍ਯਤ੍ਥੋ.

੨੨. ਅਭਿ ਉਗ੍ਗਤੋਤ੍ਯਤ੍ਰ –

‘‘ਅਬ੍ਭੋ ਅਭੀ’’ਤਿ ਅਭਿਸ੍ਸ ਅਬ੍ਭੋ. ਅਬ੍ਭੁਗ੍ਗਤੋ.

ਸਰਸਨ੍ਧਿ

ਬ੍ਯਞ੍ਜਨਸਨ੍ਧਿ

੨੩. ਬ੍ਯਞ੍ਜਨੇਤ੍ਯਧਿਕਾਰੋ. ਕ੍ਵਚੀਤ੍ਵੇਵ. ਸੋ ਭਿਕ੍ਖੁ, ਕਚ੍ਚਿ ਨੁ ਤ੍ਵਂ, ਜਾਨੇਮ ਤਨ੍ਤੀਹ –

ਲੋਪਞ੍ਚ ਤਤ੍ਰਾਕਾਰੋ.

ਬ੍ਯਞ੍ਜਨੇ ਪਰੇ ਸਰਾਨਂ ਕ੍ਵਚਿ ਲੋਪੋਹੋਤਿ, ਤਤ੍ਰ ਲੁਤ੍ਤੇ ਠਾਨੇ ਅਕਾਰਾਗਮੋ, ਚਕਾਰੇਨ ਓਕਾਰੁਕਾਰਾਪਿ. ਸਭਿਕ੍ਖੁ ਕਚ੍ਚਿਨੋ ਤ੍ਵਂ, ਜਾਨੇਮੁ ਤਂ.

ਕ੍ਵਚੀਤਿ ਕਿਂ, ਸੋਮੁਨਿ.

੨੪. ਉਘੋਸੋ, ਆਖਾਤਨ੍ਤੀਹ – ਦ੍ਵੇਭਾਵੇ ਠਾਨੇ ਇਤ੍ਵੇਵ.

ਵਗ੍ਗੇ ਘੋਸਾਘੋਸਾਨਂ ਤਤਿਯਪਠਮਾ.

ਵਗ੍ਗੇ ਘੋਸਾਘੋਸਾਨਂ ਚਤੁਤ੍ਥਦੁਤਿਯਾਨਂ ਤਬ੍ਬਗ੍ਗੇ ਤਤਿਯਪਠਮਾ ਹੋਨ੍ਤਿ ਯਥਾਸਙ੍ਖ੍ਯਂ ਯੁਤ੍ਤੇ ਠਾਨੇ, ਉਗ੍ਘੋਸੋ, ਰਸ੍ਸੇ ਅਕ੍ਖਾਤਂ.

੨੫. ਪਰ ਸਹਸ੍ਸਂ, ਅਤਿਪ੍ਪਖੋਤੀਹ – ‘‘ਕ੍ਵਚਿ ਓ ਬ੍ਯਞ੍ਜਨੇ’’ਤਿ ਓਕਾਰਾਗਮੋ. ਪਰੋਸਹਸ੍ਸਂ. ਗਾਗਮੇ ਚ, ਅਤਿਪ੍ਪਗੋਖੋ.

੨੬. ਅਵ ਨਦ੍ਧਾਤ੍ਯਤ੍ਰ – ‘‘ਓ ਅਵਸ੍ਸੇ’’ਤਿ ਕ੍ਵਚਿ ਅਵਸ੍ਸ ਓ. ਓਨਦ੍ਧਾ.

ਕ੍ਵਚੀਤਿ ਕਿਂ. ਅਵਸੁਸ੍ਸਤੁ.

ਬ੍ਯਞ੍ਜਨਸਨ੍ਧਿ.

ਨਿਗ੍ਗਹੀਤਸਨ੍ਧਿ

੨੭. ਨਿਗ੍ਗਹੀਤਨ੍ਤ੍ਯਧਿਕਾਰੋ. ਕਿਂ ਕਤੋ, ਸਂ ਜਾਤੋ, ਸਂ ਠਿਤੋ, ਤਂ ਧਨਂ, ਤਂ ਮਿਤ੍ਤਨ੍ਤਿਹ –

ਵਗ੍ਗਨ੍ਤਂ ਵਾ ਵਗ੍ਗੇ.

ਵਗ੍ਗਬ੍ਯਞ੍ਜਨੇ ਪਰੇ ਬਿਨ੍ਦੁਸ੍ਸ ਤਬ੍ਬਗ੍ਗਨ੍ਤੋ ਵਾ ਹੋਤਿ. ਕਿਙ੍ਕਤੋ, ਸਞ੍ਜਾਤੋ, ਸਣ੍ਠਿਤੋ, ਤਨ੍ਧਨਂ, ਤਮ੍ਮਿਤ੍ਤਂ.

ਵਾਤਿ ਕਿਂ. ਨ ਤਂ ਕਮ੍ਮਂ.

ਵਾਕਾਰੇਨੇਵ ਲੇ ਲੋ ਚ. ਪੁਲ੍ਲਿਙ੍ਗਂ.

੨੮. ਵਾਤ੍ਯਧਿਕਾਰੋ. ਏਵਂ ਅਸ੍ਸ, ਏਤਂ ਅਵੋਚੇਤੀਹ –

ਮਦਾ ਸਰੇ.

ਸਰੇ ਪਰੇ ਬਿਨ੍ਦੁਨੋ ਮ ਦਾ ਵਾ ਹੋਨ੍ਤਿ. ਏਵਮਸ੍ਸ, ਏਤਦਵੋਚ.

ਵਾਤਿ ਕਿਂ. ਮਂ ਅਜਿਨਿ.

੨੯. ਤਂ ਏਵ, ਤਂ ਹੀਤੀਹ –

ਏਹੇਞਂ.

ਏਕਾਰੇ, ਹੇ ਚ ਪਰੇ ਬਿਨ੍ਦੁਨੋ ਞੋ ਵਾ ਹੋਤਿ. ਦ੍ਵਿਤ੍ਤੇ – ਤਞ੍ਞੇਵ, ਤਮੇਵ. ਤਞ੍ਹਿ, ਤਂ ਹਿ.

੩੦. ਸਂਯੋਗੋਤੀਹ –

ਸਯੇ ਚ.

ਯਕਾਰੇ ਪਰੇ ਤੇਨ ਸਹ ਬਿਨ੍ਦੁਨੋ ਞੋ ਵਾ ਹੋਤਿ. ਦ੍ਵਿਤ੍ਤੇ – ਸਞ੍ਞੋਗੋ, ਸਂਯੋਗੋ.

੩੧. ਚਕ੍ਖੁ ਅਨਿਚ੍ਚਂ, ਅਵ ਸਿਰੋਤੀਹ - ਆਗਮੋ, ਕ੍ਵਚਿਤ੍ਵੇਵ.

ਨਿਗ੍ਗਹੀਤਞ੍ਚ.

ਸਰੇ, ਬ੍ਯਞ੍ਜਨੇ ਵਾ ਪਰੇ ਕ੍ਵਚਿ ਬਿਨ੍ਦ੍ਵਾਗਮੋ ਹੋਤਿ. ਚਕ੍ਖੁਂਅਨਿਚ੍ਚਂ, ਅਵਂਸਿਰੋ.

੩੨. ਵਿਦੂਨਂ ਅਗ੍ਗਂ, ਤਾਸਂ ਅਹਂਤੀਹ –

‘‘ਕ੍ਵਚਿ ਲੋਪਂ’’ਤਿ ਸਰੇ ਬਿਨ੍ਦੁਲੋਪੋ, ਵਿਦੂਨਗ੍ਗਂ. ਦੀਘੇਤਾਸਾਹਂ.

੩੩. ਬੁਦ੍ਧਾਨਂ ਸਾਸਨਂ, ਸਂ ਰਾਗੋਤੀਹ –

‘‘ਬ੍ਯਞ੍ਜਨੇ ਚੇ’’ਤਿ ਬਿਨ੍ਦੁਲੋਪੋ, ਬੁਦ੍ਧਾਨਸਾਸਨਂ. ਦੀਘੇਸਾਰਾਗੋ.

੩੪. ਬੀਜਂ ਇਵੇਤੀਹ –

ਪਰੋ ਵਾ ਸਰੋ.

ਬਿਨ੍ਦੁਤੋ ਪਰੋ ਸਰੋ ਵਾ ਲੁਪ੍ਯਤੇ, ਬੀਜਂਵ.

੩੫. ਏਵਂ ਅਸ੍ਸੇਤੀਹ –

ਬ੍ਯਞ੍ਜਨੋ ਚ ਵਿਸਞ੍ਞੋਗੋ.

ਬਿਨ੍ਦੁਤੋ ਪਰੇ ਸਰੇ ਲੁਤ੍ਤੇ ਸਂਯੋਗੋ ਬ੍ਯਞ੍ਜਨੋ ਵਿਨਟ੍ਠਸਂਯੋਗੋ ਹੋਤੀਤਿ ਪੁਬ੍ਬਸਲੋਪੋ. ਏਵਂਸ.

ਨਿਗ੍ਗਹੀਤਸਨ੍ਧਿ.

ਵੋਮਿਸ੍ਸਕ ਸਨ੍ਧੀ

੩੬. ਅਨੁਪਦਿਟ੍ਠਾਨਂ ਵੁਤ੍ਤਯੋਗਤੋ.

ਇਧਾਨਿਦ੍ਦਿਟ੍ਠਾ ਸਨ੍ਧਯੋ ਵੁਤ੍ਤਾਨੁਸਾਰੇਨ ਞੇ ਯ੍ਯਾ, ਯਥਾ – ਯਦਿ ਏਵਂ, ਬੋਧਿ ਅਙ੍ਗਾਤੀਹ – ਯਾਦੇਸੇ ਇਮਿਨਾ ਸੁਤ੍ਤੇਨ ਦਯਕਾਰਸਂਯੋਗਸ੍ਸ ਜੋ, ਧਯਕਾਰਸਂਯੋਗਸ੍ਸ ਝੋ, ਦ੍ਵਿਤ੍ਤੇ – ਯਜ੍ਜੇਵਂ, ਬੋਜ੍ਝਙ੍ਗਾ.

੩੭. ਅਸਦਿਸਸਂਯੋਗੇ ਏਕਸਰੂਪਤਾ ਚ.

ਪਰਿ ਏਸਨਾਤੀਹ – ਯਾਦੇਸੇ ਰਕਾਰਸ੍ਸ ਯੋ, ਪਯ੍ਯੇਸ ਨਾ.

੩੮. ਵਣ੍ਣਾਨਂ ਬਹੁਤ੍ਤਂ, ਵਿਪਰੀਤਤਾ ਚ.

ਸਰਤਿ, ਇਤਿ ਏਵ, ਸਾ ਇਤ੍ਥੀ, ਬੁਸਂ ਏਵ, ਬਹੁ ਆਬਾਧੋ, ਅਧਿ ਅਭਵਿ, ਸੁਖਂ, ਦੁਕ੍ਖਂ, ਜੀਵੋਤੀਹ –

ਮਾਗਮੋ ਸਕਾਰੇ ਅਕਾਰਸ੍ਸ ਉ ਚ, ਸੁਮਰਤਿ.

ਇਸ੍ਸ ਵੋ, ਇਤ੍ਵੇਵ.

ਪਰਲੋਪੇ ਆਕਾਰਸ੍ਸ ਓ, ਸੋਤ੍ਥੀ.

ਮਾਦੇਸੇ, ਪੁਬ੍ਬਦੀਘੇ ਚ ਏਕਾਰਸ੍ਸ ਇ. ਬੁਸਾਮਿਵ.

ਵਾਦੇਸੇ ਹਵਕਾਰਵਿਪਰਿਯਯੋ. ਬਹ੍ਵਾਬਾਧੋ.

ਅਧਿਸ੍ਸ ਕ੍ਵਚਿ ਅਦ੍ਧੋ, ਦੀਘੇ-ਅਦ੍ਧਾਭਵਿ.

ਬਿਨ੍ਦੁਨੋ, ਓਕਾਰਸ੍ਸ ਚ ਏ. ਸੁਖੇ, ਦੁਕ੍ਖੇ, ਜੀਵੇ.

੩੯. ਰਦਾਨਂ ਲ਼ੋ, ਪਟਿਬੋਧੋ, ਪਰਿਲ਼ਾਹੋ.

੪੦. ਸਰੇ, ਬ੍ਯਞ੍ਜਨੇ ਵਾ ਪਰੇ ਬਿਨ੍ਦੁਨੋ ਕ੍ਵਚਿ ਮੋ. ਮਮ ਅਭਾਸਿ, ਬੁਦ੍ਧਮ ਸਰਣਂ, ਪੁਬ੍ਬੇ ਮੋ ਪਰਂ ਨ ਨੇਤਬ੍ਬੋ ਅਯੁਤ੍ਤਤ੍ਤਾ.

੪੧. ਬਿਨ੍ਦੁਤੋ ਪਰਸਰਾਨ ਮਞ੍ਞਸ੍ਸਰਤਾਪਿ.

ਤਂ ਇਮਿਨਾ, ਏਵਂ ਇਮਂ, ਕਿਂ ਅਹਂ ਤੀਹ-ਇਸ੍ਸ ਅ. ਤਦਮਿਨਾ.

ਇਸ੍ਸ ਉ, ਅਕਾਰਸ੍ਸ ਚ ਏ, ਬਿਨ੍ਦੁਲੋਪਾਦੋ. ਏਵੁਮਂ, ਕੇਹਂ.

੪੨. ਵਾਕ੍ਯਸੁਖੁਚ੍ਚਾਰਣਤ੍ਥਂ, ਛਨ੍ਦਹਾਨਿਤ੍ਥਞ੍ਚ ਵਣ੍ਣਲੋਪੋਪਿ.

ਪਟਿਸਙ੍ਖਾਯ ਯੋਨਿਸੋਤੀਹ – ਪੁਬ੍ਬਯਲੋਪੋ, ਪਟਿਸਙ੍ਖਾਯੋਨਿਸੋ.

੪੩. ਅਲਾਬੂਨਿਤ੍ਯਾਦੋ ਅਕਾਰਲੋਪੋ. ਲਾਬੂਨਿ ਸੀਦਨ੍ਤਿ, ਸਿਲਾ ਪ੍ਲਵਨ੍ਤਿ.

੪੪. ਵੁਤ੍ਯਭੇਦਾਯ ਵਿਕਾਰੋਪਿ.

ਅਕਰਮ੍ਹਸੇ ਤੇਤ੍ਯਾਦੋ ਸਕਾਰੇ ਗਰੁਨੋ ਏਕਾਰਸ੍ਸ ਇਮਿਨਾ ਲਹੁਅਕਾਰੋ, ਅਕਰਮ੍ਹਸ ਤੇ ਕਿਚ੍ਚਂ.

੪੫. ਅਕ੍ਖਰਨਿਯਮੋ ਛਨ੍ਦਂ, ਗਰੁਲਹੁਨਿਯਮੋ ਭਵੇ ਵੁਤ੍ਤਿ,

ਦੀਘੋ, ਸਂਯੋਗਾਦਿਪੁਬ੍ਬੋ ਰਸ੍ਸੋ ਚ ਗਰੁ, ਲਹੁ ਤੁ ਰਸ੍ਸੋ. ਯਥਾ- ਆ, ਅਸ੍ਸ, ਅਂ, ਅ.

੪੬. ਏਵਮਞ੍ਞਾਪਿ ਵਿਞ੍ਞੇਯ੍ਯਾ, ਸਂਹਿਤਾ ਤਨ੍ਤਿਯਾ ਹਿਤਾ;

ਸਂਹਿਤਾਤਿ ਚ ਵਣ੍ਣਾਨਂ, ਸਨ੍ਨਿਧਬ੍ਯਵਧਾਨਤੋ.

ਵੋਮਿਸ੍ਸਕਸਨ੍ਧਿ.