੪. ਵੀਥਿਸਙ੍ਗਹਅਨੁਦੀਪਨਾ

੧੩੬. ਵੀਥਿਸਙ੍ਗਹੇ. ‘‘ਤੇਸਞ੍ਞੇ ਵਾ’’ਤਿ ਚਿਤ੍ਤ ਚੇਤਸਿਕਾਨਂ ਏਵ. ‘‘ਵੁਤ੍ਤਪ੍ਪਕਾਰੇਨਾ’’ਤਿ ‘ਤਤ੍ਥ ਚਿਤ੍ਤਂ ਤਾਵ ਚਤੁਬ੍ਬਿਧਂ ਹੋਤਿ ਕਾਮਾਵਚਰਂ ਰੂਪਾਵਚਰਂ, ਤਿਆਦਿਨਾ ਇਚ੍ਚੇਵਂ ਵੁਤ੍ਤਪ੍ਪਕਾਰੇਨ. ‘‘ਪੁਬ੍ਬਾ ਪਰਨਿਯਾਮਿਤਂ’’ਤਿ ਵਾ ਦ੍ਵਤ੍ਤਿਂਸ ਸੁਖ ਪੁਞ੍ਞਮ੍ਹਾਤਿਆਦਿਨਾ ਨਯੇਨ ਪੁਬ੍ਬਾ ਪਰਨਿਯਾਮਿਤਂ. ‘‘ਆਰਬ੍ਭਗਾਥਾਯਾ’’ਤਿ.

ਵੀਥਿ ਚਿਤ੍ਤਵਸੇਨੇਵਂ, ਪਵਤ੍ਤਿਯ ਮੁਦੀਰਿਤੋ;

ਪਵਤ੍ਤਿ ਸਙ੍ਗਹੋ ਨਾਮ, ਸਨ੍ਧਿਯਂ ਦਾਨਿ ਵੁਚ੍ਚਤੀ.ਤਿ

ਏਵਂ ਪਵਤ੍ਤਿਕਾਲੇ ਪਵਤ੍ਤਿ ਸਙ੍ਗਹੋ, ਪਟਿਸਨ੍ਧਿਕਾਲੇ ਪਵਤ੍ਤਿ ਸਙ੍ਗਹੋਤਿ ਸਿਦ੍ਧੋ ਹੋਤਿ. ਕੇਚਿ ਵਾਦੇ ‘‘ਪਟਿਸਨ੍ਧਿ ਪਵਤ੍ਤਿਯਂ’’ਤਿ ਨਿਦ੍ਧਾਰਣੇ ਗਹਿਤੇ ਦ੍ਵੀਸੁ ਪਟਿਸਨ੍ਧਿ ਸਙ੍ਗਹ ਪਵਤ੍ਤਿ ਸਙ੍ਗਹੇਸੁ ਇਦਾਨਿ ਪਵਤ੍ਤਿ ਸਙ੍ਗਹਂ ਪਵਕ੍ਖਾਮਿ, ਪਚ੍ਛਾ ਪਟਿਸਨ੍ਧਿ ਸਙ੍ਗਹਂ ਪਵਕ੍ਖਾਮੀਤਿ ਅਤ੍ਥੋ ਹੋਤਿ. ਤਤ੍ਥ ‘‘ਪਟਿਸਨ੍ਧਿ ਸਙ੍ਗਹੋ’’ਤਿ ਪਟਿਸਨ੍ਧਿਕਾਲੇ ਸਙ੍ਗਹੋ. ‘‘ਪਵਤ੍ਤਿ ਸਙ੍ਗਹੋ’’ਤਿ ਪਵਤ੍ਤਿਕਾਲੇ ਸਙ੍ਗਹੋ. ਸੋ ਚ ਉਪਰਿਗਾਥਾਯ ਨ ਸਮੇਤੀਤਿ ਦਸ੍ਸੇਤੁਂ ‘‘ਏਵਂ ਸਤੀ’’ਤਿਆਦਿਮਾਹ. ‘‘ਤਾਨਿ ਤੀਣਿ ਛਕ੍ਕਾਨਿ ਨਿਕ੍ਖਿਤ੍ਤਾਨੀ’’ਤਿ ਛਕ੍ਕਮਤ੍ਤਾਨਿ ਨਿਕ੍ਖਿਤ੍ਤਾਨਿ, ਨ ਸਕਲਂ. ਵਤ੍ਥੁ ਦ੍ਵਾਰਾ ਲਮ੍ਬਣ ਸਙ੍ਗਹੋਤਿ ਅਧਿਪ੍ਪਾਯੋ. ‘‘ਸਾ ਪਨਾ’’ਤਿ ਸਾਵਿਸਯਪ੍ਪਵਤ੍ਤਿ ਪਨ. ‘‘ਕਾਚਿ ਸੀਘਤਮਾ’’ਤਿ ਕਾਚਿ ਅਤਿਰੇਕਤਰਂ ਸੀਘਾ. ‘‘ਦਨ੍ਧਾ’’ਤਿ ਸਣਿਕਾ, ਚਿਰਾਯਿਕਾ. ‘‘ਅਨੁਪਪਨ੍ਨਾ’’ਤਿ ਅਸਮ੍ਪਨ੍ਨਾ. ਅਸਮ੍ਪਨ੍ਨ ਦੋਸੋ ਆਗਚ੍ਛਤੀਤਿ ਵੁਤ੍ਤਂ ਹੋਤਿ. ‘‘ਧਾਤੁਭੇਦਂ’’ਤਿ ਸਤ੍ਤ ਵਿਞ੍ਞਾਣ ਧਾਤੂਨਂ ਵਿਭਾਗਂ. ‘‘ਧਾਤੁਨਾਨਤ੍ਤਂ’’ਤਿ ਧਾਰਣ ਕਿਚ੍ਚਨਾਨਤ੍ਤਂ. ਇਤਿ ਤਸ੍ਮਾ ਮਨੋਧਾਤੁ ਵਿਸੁਂ ਵੁਤ੍ਤਾਤਿ ਸਮ੍ਬਨ੍ਧੋ. ‘‘ਮਨਨਂ’’ਤਿ ਵਿਜਾਨਨਭਾਵਂ ਅਪਤ੍ਤਂ. ਆਵਜ੍ਜਨਮਤ੍ਤ ਸਮ੍ਪਟਿਚ੍ਛਨਮਤ੍ਤ ਸਙ੍ਖਾਤਂ ਜਾਨਨਮਤ੍ਤਂ. ‘‘ਯਂ ਕਿਞ੍ਚਿ ਮਨਨਂ’’ਤਿ ਅਨ੍ਤਮਸੋ ਆਵਜ੍ਜਨਮਤ੍ਤ ਸਮ੍ਪਟਿਚ੍ਛਨਮਤ੍ਤਂ ਪੀਤਿ ਅਧਿਪ੍ਪਾਯੋ. ‘‘ਸੁਦ੍ਧੋ ਪਨ ਮਨੋਵਿਞ੍ਞਾਣਪ੍ਪਬਨ੍ਧੋ’’ਤਿ ਮਨੋਦ੍ਵਾਰ ਵਿਕਾਰਂ ਪਟਿਚ੍ਚ ਪਵਤ੍ਤੋ ਮਨੋਵਿਞ੍ਞਾਣਪ੍ਪਬਨ੍ਧੋ. ਨ ਭਵਙ੍ਗ ਮਨੋਵਿਞ੍ਞਾਣਪ੍ਪਬਨ੍ਧੋ. ਸੋ ਹਿ ਵੀਥਿਮੁਤ੍ਤਤ੍ਤਾ ਇਧ ਅਪ੍ਪਸਙ੍ਗੋਤਿ. ਮਨੋਦ੍ਵਾਰੇ ਪਨ ਦ੍ਵਿਧਾਤਿ ਸਮ੍ਬਨ੍ਧੋ. ਬੁਦ੍ਧਸ੍ਸ ਭਗਵਤੋ ਪਥਮਾਭਿਨੀਹਾਰਕਾਲੋ ਨਾਮ ਸੁਮੇਧਤਾਪਸਕਾਲੇ ਬੁਦ੍ਧ ਭਾਵਾਯ ਕਾਯ ਚਿਤ੍ਤਾਨਂ ਅਭਿਨੀਹਾਰਕਾਲੋ. ਆਦਿਸਦ੍ਦੇਨ ਪਚ੍ਛਿਮ ਭਵੇ ਪਟਿਸਨ੍ਧਿਗ੍ਗਹਣਾਦਿਂ ਸਙ੍ਗਣ੍ਹਾਤਿ. ‘‘ਜਾਤਿ ਫਲਿਕਕ੍ਖਨ੍ਧਾ ਵਿਯ ਸਮ੍ਪਜ੍ਜਨ੍ਤੀ’’ਤਿ ਤੇਨ ਓਭਾਸੇਨ ਅਜ੍ਝੋਤ੍ਥਟਤ੍ਤਾ ਜਾਤਿਫਲਿਕਕ੍ਖਨ੍ਧ ਸਦਿਸਾ ਹੋਨ੍ਤੀਤਿ ਅਧਿਪ੍ਪਾਯੋ. ‘‘ਉਪਪਤ੍ਤਿ ਦੇਵ ਬ੍ਰਹ੍ਮਾਨਂ ਪਨਾ’’ਤਿ ਉਪਪਤ੍ਤਿਪ੍ਪਟਿਸਨ੍ਧਿਕਾਨਂ ਓਪਪਾਤਿਕ ਦੇਵ ਬ੍ਰਹ੍ਮਾਨਂ ਪਨ. ‘‘ਪਸਾਦ ਨਿਸ੍ਸਯ ਭੂਤਾਨਂ’’ਤਿ ਚਕ੍ਖਾਦੀਨਂ ਪਸਾਦ ਵਤ੍ਥੂਨਂ ਨਿਸ੍ਸਯ ਮਹਾਭੂਤਾਨਂ.

‘‘ਯਾਨਿ ਪਨਾ’’ਤਿਆਦੀਸੁ. ਦ੍ਵਤ੍ਤਿ ਚਿਤ੍ਤਕ੍ਖਣਾਨਿ ਅਤਿਕ੍ਕਮ੍ਮ ਆਪਾਤਂ ਆਗਚ੍ਛਨ੍ਤੀਤਿ ਯੋਜਨਾ. ਏਵਂ ਪਰਤ੍ਥਪਿ. ਵਿਭੂਤਸ੍ਸਾਤਿ ਚ ਅਵਿਭੂਤਸ੍ਸਾਤਿ ਚ ਇਦਂ ਆਦਿਮ੍ਹਿ ਮਨੋਦ੍ਵਾਰੇ ਪਨ ਵਿਭੂਤਸ੍ਸਾਤਿ ਚ ਅਵਿਭੂਤਸ੍ਸਾਤਿ ਚ ਪਦਾਨਂ ਉਦ੍ਧਰਣਂ. ‘‘ਰੂਪਾ ਰੂਪਾਨਂ’’ਤਿ ਰੂਪ ਧਮ੍ਮਾਨਞ੍ਚ ਅਰੂਪ ਧਮ੍ਮਾਨਞ੍ਚ. ‘‘ਤਾਵਾ’’ਤਿ ਵੀਥਿ ਚਿਤ੍ਤਪ੍ਪਵਤ੍ਤਿ ਦਸ੍ਸਨਤੋ ਪਥਮਤਰਂ ਏਵਾਤਿ ਅਤ੍ਥੋ. ‘‘ਅਦ੍ਧਾਨ ਪਰਿਚ੍ਛੇਦਂ’’ਤਿ ਖਣਕਾਲ ਪਰਿਚ੍ਛੇਦਂ. ਵਿਭਾਵਨਿਪਾਠੇ ‘‘ਅਤਿਮਹਨ੍ਤਾ ਦਿਵਸੇਨ ਵਿਸਯ ਵਵਤ੍ਥਾਨਂ ਹੋਤੀ’’ਤਿ ਵਚਨੇਨ ਆਦਿਮ੍ਹਿ ‘ਛਵਤ੍ਥੂਨਿ, ਛ ਦ੍ਵਾਰਾਨਿ, ਛ ਆਰਮ੍ਮਣਾਨਿ, ਛ ਵਿਞ੍ਞਾਣਾਨਿ, ਛ ਵੀਥਿਯੋ, ਛ ਧਾਵਿਸਯਪ੍ਪਵਤ੍ਤੀ,ਤਿ ਏਵਂ ਵੁਤ੍ਤੇਸੁ ਛਸੁ ਛਕ੍ਕੇਸੁ ਛਧਾਵਿਸਯਪ੍ਪਵਤ੍ਤੀਤਿ ਪਦਮਤ੍ਤਂ ਸਙ੍ਗਣ੍ਹਾਤਿ. ਤਂ ਅਨੁਪਪਨ੍ਨਂ ਹੋਤਿ. ਤੇਨਾਹ ‘‘ਏਵਞ੍ਹਿ ਸਤੀ’’ਤਿਆਦਿਂ. ‘‘ਵਿਸਯ ਵਵਤ੍ਥਾਨਤ੍ਥ ਮੇਵਾ’’ਤਿ ਅਤਿਮਹਨ੍ਤਾਦਿ ਵਿਸਯ ਵਵਤ੍ਥਾਨਤ੍ਥਮੇਵ ਵੁਤ੍ਤਨ੍ਤਿ ਨ ਚ ਸਕ੍ਕਾ ਵਤ੍ਤੁਂ. ਰੂਪਾ ਰੂਪ ਧਮ੍ਮਾਨਂ ਅਦ੍ਧਾਨ ਪਰਿਚ੍ਛੇਦੋ ਨਾਮ ਅਭਿਧਮ੍ਮੇ ਸਬ੍ਬਤ੍ਥ ਇਚ੍ਛਿਤਬ੍ਬੋ. ਤਸ੍ਮਾ ਤਸ੍ਸ ਦਸ੍ਸਨਤ੍ਥਮ੍ਪਿ ਤਂ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਸਭਾਵਪ੍ਪਟਿਲਾਭੋ’’ਤਿ ਚਿਨ੍ਤਨ ਫੁਸਨਾਦੀਨਂ ਪਾਤੁਭਾਵੋ ਵੁਚ੍ਚਤਿ. ‘‘ਅਨਿਵਤ੍ਤੀ’’ਤਿ ਅਨਨ੍ਤਰਧਾਨਂ ਵੁਚ੍ਚਤਿ. ‘‘ਪਰਿਹਾਯਿਤ੍ਵਾ’’ਤਿ ਜਰਾ ਕਿਚ੍ਚਂ ਆਹ. ‘‘ਅਚ੍ਛਰਾਸਙ੍ਘਾਟਕ੍ਖਣਸ੍ਸਾ’’ਤਿ ਅਙ੍ਗੁਲੀਨਂ ਸਙ੍ਘਟ੍ਟਨਕ੍ਖਣਸ੍ਸ. ਆਚਰਿਯਾਨਨ੍ਦਤ੍ਥੇਰੋ ਨਾਮ ਅਭਿਧਮ੍ਮ ਟੀਕਾਕਾਰੋ ਵੁਚ੍ਚਤਿ. ‘‘ਅਸ੍ਸਾ ਵਿਜ੍ਜੁਯਾਠਿਤਿ ਨਾਮ ਵਿਸੁਂ ਨ ਪਞ੍ਞਾਯਤੀ’’ਤਿ ਵਿਜ੍ਜੁਪ੍ਪਾਦਂ ਪਸ੍ਸਨ੍ਤਾਨਂ ਨ ਪਞ੍ਞਾਯਤਿ. ਤਥਾ ਚਿਤ੍ਤਮ੍ਪਿ ਵਡ੍ਢਨਾਨਨ੍ਤਰਮੇਵ ਭਿਜ੍ਜਤੀਤਿ ਯੋਜਨਾ. ਤੇਨਾਹ ‘‘ਤਂ ਪੀ’’ਤਿਆਦਿਂ. ਉਦਯਭਾਗੋ ਨਾਮ ਵਡ੍ਢਨਭਾਗੋ, ਵਯਭਾਗੋ ਨਾਮ ਅਨ੍ਤਰਧਾਨਭਾਗੋ. ‘‘ਏਵਞ੍ਚ ਕਤ੍ਵਾ’’ਤਿ ਲਦ੍ਧਗੁਣ ਵਚਨਂ. ‘‘ਏਕਂਚਿਤ੍ਤਂ ਦਿਵਸਂ ਤਿਟ੍ਠਤੀ’’ਤਿ ਪੁਚ੍ਛਾ ਵਚਨਂ. ‘‘ਆਮਨ੍ਤਾ’’ਤਿ ਪਟਿਞ੍ਞਾ ਵਚਨਂ. ‘‘ਵਯਕ੍ਖਣੋ’’ਤਿ ਪੁਚ੍ਛਾ. ‘‘ਨ ਹੇਵਂ ਵਤ੍ਤਬ੍ਬੇ’’ਤਿ ਪਟਿਕ੍ਖੇਪੋ. ਪਚ੍ਚਤ੍ਤ ਵਚਨਸ੍ਸ ਏਕਾਰਤ੍ਤਂ. ਏਵਂ ਨਵਤ੍ਤਬ੍ਬਨ੍ਤਿ ਅਤ੍ਥੋ. ‘‘ਮਹਾਥੇਰੇਨਾ’’ਤਿ ਮੋਗ੍ਗਲਿ ਪੁਤ੍ਤਤਿਸ੍ਸ ਮਹਾਥੇਰੇਨ. ਨਨੁ ਸੁਤ੍ਤਨ੍ਤੇਸੁ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਨਾ’’ਤਿ ਨ ਉਪਲਬ੍ਭਤਿ. ‘‘ਇਮਸ੍ਸ ਵੁਤ੍ਤਤ੍ਤਾ’’ਤਿ ਇਮਸ੍ਸ ਵਚਨਸ੍ਸ ਵੁਤ੍ਤਤ੍ਤਾ. ਸਙ੍ਖਤ ਲਕ੍ਖਣਂ ਵਿਸਯੋ ਯੇਸਂ ਤਾਨਿ ਸਙ੍ਖਤ ਵਿਸਯ ਲਕ੍ਖਣਾਨਿ. ਸਙ੍ਖਤ ਧਮ੍ਮਮੇਵ ਆਹਚ੍ਚ ਤਿਟ੍ਠਤਿ. ਅਯਂ ਅਭਿਧਮ੍ਮੇ ਧਮ੍ਮਤਾਤਿ ਅਧਿਪ੍ਪਾਯੋ. ‘‘ਸਙ੍ਗਹ ਕਾਰੇਨਾ’’ਤਿ ਆਚਰਿਯ ਬੁਦ੍ਧਘੋਸਤ੍ਥੇਰਂ ਵਦਤਿ. ‘‘ਅਤ੍ਥਿਕ੍ਖਣਂ’’ਤਿ ਖਣਦ੍ਵਯਮੇਵ ਵੁਚ੍ਚਤਿ. ਇਤਿ ਵਤ੍ਵਾ ਤਮਤ੍ਥਂ ਸਾਧੇਨ੍ਤੀਤਿ ਸਮ੍ਬਨ੍ਧੋ. ਗਾਥਾਯਂ. ‘‘ਤਸ੍ਸੇਵਾ’’ਤਿ ਤਸ੍ਸਾ ਠਿਤਿਯਾ ਏਵ ਭੇਦੋ. ਸਬ੍ਬਦਾ ਸਬ੍ਬਪਾਣਿਨਂ ਮਰਣਂ ਨਾਮ ਵੁਚ੍ਚਤੀਤਿ ਯੋਜਨਾ. ‘‘ਤਮਤ੍ਥਂ’’ਤਿ ਤਾਨਿ ਅਤ੍ਥਿਕ੍ਖਣਂ ਉਪਾਦਾਯ ਲਬ੍ਭਨ੍ਤੀਤਿ ਅਤ੍ਥਂ. ‘‘ਅਥਵਾ’’ਤਿ ਏਕੋ ਥੇਰਵਾਦੋ. ‘‘ਸਨ੍ਤਤਿ ਵਸੇਨ ਠਾਨਂ’’ਤਿ ਠਿਤਾਯ ਅਞ੍ਞਥਤ੍ਤਂ ਪਞ੍ਞਾਯਤੀਤਿ ਏਤ੍ਥ ਠਿਤਭਾਵਸਙ੍ਖਾਤਂ ਠਾਨਂ ਸਨ੍ਤਤਿ ਠਿਤਿਵਸੇਨ ਵੇਦਿਤਬ੍ਬਨ੍ਤਿ ਵਦਨ੍ਤਿ. ‘‘ਇਮਸ੍ਮਿਂ ਪਨ ਸੁਤ੍ਤੇ’’ਤਿ ਵੇਦਨਾਯ ਉਪ੍ਪਾਦੋ ਪਞ੍ਞਾਯਤਿ, ਵਯੋ ਪਞ੍ਞਾਯਤਿ, ਠਿਤਾਯ ਅਞ੍ਞਥਤ੍ਤਂ ਪਞ੍ਞਾਯਤੀਤਿ ਇਦਂ ਸੁਤ੍ਤਂ ਵਦਤਿ. ‘‘ਅਪ੍ਪਟਿਬਾਹੇਤ੍ਵਾ’’ਤਿ ਅਨੀਵਾਰੇਤ੍ਵਾ. ਯਾਵਡ੍ਢਨਸ੍ਸ ਨਿਵਤ੍ਤਿ ਨਾਮ ਅਤ੍ਥਿ. ਉਦਯ ਪਰਿਯਨ੍ਤ ਮਤ੍ਤਭੂਤਾ ਸਾ ਏਵ ਨਿਵਤ੍ਤਿ. ‘‘ਦ੍ਵੀਹਿ ਖਨ੍ਧੇਹੀ’’ਤਿ ਰੂਪ ਜਰਾ ਰੂਪਕ੍ਖਨ੍ਧੇਨ ਸਙ੍ਗਹਿਤਾ. ਅਰੂਪ ਜਰਾ ਸਙ੍ਖਾਰਕ੍ਖਨ੍ਧੇਨਾਤਿ ਏਵਂ ਦ੍ਵੀਹਿ ਖਨ੍ਧੇਹਿ. ਯਞ੍ਚ ਤਤ੍ਥ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਰੂਪਸ੍ਸ ਉਪ੍ਪਾਦੋ ਦ੍ਵਿਧਾਭਿਨ੍ਦਿਤ੍ਵਾ ਦੇਸਿਤੋ. ਕਥਂ, ਉਪਚਯੋ ਸਨ੍ਤਤੀ ਤਿਯੋਜਨਾ. ‘‘ਵਿਭਾਗਾ ਰਹਸ੍ਸਾ’’ਤਿ ਉਪ੍ਪਾਦੋ ਉਪ੍ਪਜ੍ਜ ਨਟ੍ਠੇਨ ਏਕੋ ਸਮਾਨੋ ਰੂਪਾਨਂ ਵਡ੍ਢਨ ਸਮਯੇ ਉਪ੍ਪਾਦੋ. ਉਪਰਿ ਵਡ੍ਢਨਟ੍ਠੇਨ ਉਪਚਯੋਤਿ ਵੁਤ੍ਤੋ. ਅਵਡ੍ਢਿਤ੍ਵਾ ਠਿਤ ਸਮਯੇ ਉਪ੍ਪਾਦੋ ਯਥਾ ਠਿਤ ਨੀਹਾਰੇਨ ਚਿਰਕਾਲਂ ਪਵਤ੍ਤਿ ਅਤ੍ਥੇਨ ਸਨ੍ਤਤੀਤਿ ਵੁਤ੍ਤੋ. ਏਵਂ ਵਿਭਾਗਾ ਰਹਸ੍ਸ. ‘‘ਯਥਾਨੁਲੋਮ ਸਾਸਨਂ’’ਤਿ ਵਿਨੇਤਬ੍ਬ ਪੁਗ੍ਗਲਾਨਂ ਅਜ੍ਝਾਸਯਾਨੁਲੋਮ ਸਾਸਨਂ.

‘‘ਅਰੂਪ’’ਨ੍ਤਿਆਦੀਸੁ. ‘‘ਅਰੂਪਂ’’ਤਿ ਸਬ੍ਬਸੋ ਰੂਪਸਣ੍ਠਾਨ ਰਹਿਤਤ੍ਤਾ ਚਿਤ੍ਤ ਚੇਤਸਿਕਂ ਨਾਮਂ ਵੁਚ੍ਚਤਿ. ‘‘ਅਰੂਪਿ ਸਭਾਵਤ੍ਤਾ’’ਤਿ ਅਰੂਪ ਧਮ੍ਮ ਸਭਾਵਤ੍ਤਾ ਇਚ੍ਚੇਵਤ੍ਥੋ. ਤਤ੍ਥ ਅਰੂਪ ਧਮ੍ਮ ਸਭਾਵੋ ਨਾਮ ਰੂਪ ਧਮ੍ਮਤੋ ਸਤਗੁਣੇਨਵਾਸਹਸ੍ਸਗੁਣੇਨਵਾਸਣ੍ਹਸੁਖੁਮਸਭਾਵੋ. ਵਿਭਾਵ ਨਿਪਾਠੇ. ‘‘ਗਾਹਕ ਗਹੇਤਬ੍ਬ ਭਾਵਸ੍ਸ ਤਂ ਤਂ ਖਣਵਸੇਨ ਨਿਪ੍ਫਜ੍ਜਨਤੋ’’ਤਿ ਏਤ੍ਥ ਪਞ੍ਚਦ੍ਵਾਰ ਵੀਥੀਸੁ ਵੀਥਿ ਚਿਤ੍ਤਾਨਞ੍ਚ ਆਰਮ੍ਮਣਾਨਞ੍ਚ ਵਿਸਯੀ ਵਿਸਯਭਾਵੋ ਗਾਹਕ ਗਹੇਤਬ੍ਬ ਭਾਵੋ ਨਾਮ. ‘‘ਤਂ ਤਂ ਖਣਵਸੇਨ ਨਿਪ੍ਫਜ੍ਜਨਤੋ’’ਤਿ ਵੀਥਿ ਚਿਤ੍ਤਾਨਿ ਚ ਏਕਸ੍ਮਿਂ ਆਰਮ੍ਮਣੇਪਿ ਆਵਜ੍ਜਨਾਦੀਹਿ ਨਾਨਾ ਕਿਚ੍ਚੇਹਿ ਗਣ੍ਹਨ੍ਤਾ ਏਵ ਗਹਣ ਕਿਚ੍ਚਂ ਸਮ੍ਪਾਦੇਨ੍ਤਿ. ਨਾਨਾ ਕਿਚ੍ਚਾਨਿ ਚ ਨਾਨਾ ਚਿਤ੍ਤਾਨਂ ਵਸੇਨ ਸਮ੍ਪਜ੍ਜਨ੍ਤਿ. ਆਰਮ੍ਮਣਾਨਿ ਚ ਪੁਰੇਜਾਤਾਨਿ ਹੁਤ੍ਵਾ ਯਾਵ ਤਾਨਿ ਕਿਚ੍ਚਾਨਿ ਸਮ੍ਪਜ੍ਜਨ੍ਤਿ, ਤਾਵ ਪਚ੍ਚੁਪ੍ਪਨ੍ਨਭਾਵੇਨ ਧਰਮਾਨਾਨਿ ਏਵ ਗਹਣਂ ਸਮ੍ਪਾਦੇਨ੍ਤਿ. ਏਵਂ ਸਤਿ, ਗਾਹਕਾਨਂ ਵੀਥਿ ਚਿਤ੍ਤਾਨਞ੍ਚ ਖਣਤ੍ਤਯਾਯੁਕਤ੍ਤਾ ਏਵ ਗਾਹਕ ਕਿਚ੍ਚਂ ਨਿਪ੍ਫਜ੍ਜਤਿ, ਸਿਜ੍ਝਤਿ. ਗਹੇਤਬ੍ਬਾਨਂ ਆਰਮ੍ਮਣਾਨਞ੍ਚ ਸਤ੍ਤਰਸ ਚਿਤ੍ਤਕ੍ਖਣਾਯੁਕਤ੍ਤਾ ਏਵ ਗਹੇਤਬ੍ਬ ਕਿਚ੍ਚਂ ਨਿਪ੍ਫਜ੍ਜਤਿ, ਸਿਜ੍ਝਤਿ. ਏਵਂ ਤਂ ਤਂ ਖਣ ਵਸੇਨ ਨਿਪ੍ਫਜ੍ਜਨਤੋ. ਵਿਞ੍ਞਤ੍ਤਿ ਦ੍ਵਯਂ ਏਕ ਚਿਤ੍ਤਕ੍ਖਣਿਕਂ. ਕਸ੍ਮਾ, ਚਿਤ੍ਤਾਨੁ ਪਰਿਵਤ੍ਤਿ ਧਮ੍ਮਤ੍ਤਾ. ‘‘ਉਪ੍ਪਾਦਮਤ੍ਤਾ’’ਤਿ ਨਿਪ੍ਫਨ੍ਨ ਰੂਪਾਨਂ ਉਪ੍ਪਾਦਮਤ੍ਤਾ. ‘‘ਭਙ੍ਗਮਤ੍ਤਾ’’ਤਿ ਤੇਸਮੇਵ ਭਙ੍ਗਮਤ੍ਤਾ. ‘‘ਰੂਪ ਧਮ੍ਮਾਨਂ’’ਤਿ ਨਿਪ੍ਫਨ੍ਨ ਰੂਪ ਧਮ੍ਮਾਨਂ. ‘‘ਉਪ੍ਪਾਦਨਿਰੋਧ ਵਿਧਾਨਸ੍ਸਾ’’ਤਿ ਉਪ੍ਪਾਦ ਨਿਰੋਧ ਵਿਧਾਨਭੂਤਸ੍ਸ ਮਹਾਅਟ੍ਠਕਥਾਵਾਦਸ੍ਸ ਪਟਿਸਿਦ੍ਧਤ੍ਤਾਤਿ ਸਮ੍ਬਨ੍ਧੋ. ‘‘ਤਂ’’ਤਿ ਤਂ ਮਹਾਅਟ੍ਠਕਥਾ ਵਚਨਂ. ‘‘ਤਸ੍ਮਿਂ ਵਾਦੇ’’ਤਿ ਤਸ੍ਮਿਂ ਮਹਾਅਟ੍ਠਕਥਾਵਾਦੇ. ‘‘ਤਤ੍ਥ ਆਗਤਾ’’ਤਿ ਤਸ੍ਮਿਂ ਵਾਦੇ ਆਗਤਾ. ਯਂ ਪਨ ਵਿਭਾਵਨਿਯਂ ਕਾਰਣਂ ਵੁਤ੍ਤਨ੍ਤਿ ਸਮ੍ਬਨ੍ਧੋ. ‘‘ਤਂ ਟੀਕਾਨਯਂ’’ਤਿ ਤਂ ਸੋਲ਼ਸ ਚਿਤ੍ਤਕ੍ਖਣਾਯੁਕ ਦੀਪਕਂ ਮੂਲਟੀਕਾਨਯਂ. ਤਦਤ੍ਥਂ ਸਾਧੇਨ੍ਤੇਨ ਵਿਭਾਵਨਿ ਟੀਕਾਚਰਿਯੇਨ ਵੁਤ੍ਤਨ੍ਤਿ ਸਮ੍ਬਨ੍ਧੋ. ਸਙ੍ਗਹਕਾਰਸ੍ਸ ਅਟ੍ਠਕਥਾ ਚਰਿਯਸ੍ਸ. ‘‘ਉਪਚਰੀਯਤੀ’’ਤਿ ਉਪਚਾਰ ਵਸੇਨ ਵੋਹਰੀਯਤਿ. ਵਿਭਾਵਨਿਪਾਠੇ. ‘‘ਏਤਾਨੀ’’ਤਿ ਆਰਮ੍ਮਣਾਨਿ. ‘‘ਤਂ’’ਤਿ ਤਂ ਏਕ ਚਿਤ੍ਤਕ੍ਖਣਂ. ‘‘ਤੇ ਚਾ’’ਤਿ ਰੂਪ ਧਮ੍ਮਾ ਚ. ‘‘ਪਰਿਪੁਣ੍ਣ ਪਚ੍ਚਯੂਪਲਦ੍ਧਾ’’ਤਿ ਪਰਿਪੁਣ੍ਣਂ ਪਚ੍ਚਯਂ ਉਪਲਦ੍ਧਾ. ‘‘ਸੋ’’ਤਿ ਟੀਕਾਕਾਰੋ. ‘‘ਇਤਰਾਨੀ’’ਤਿ ਗਨ੍ਧਰਸ ਫੋਟ੍ਠਬ੍ਬਾਨਿ. ‘‘ਗੋਚਰਭਾਵਂ’’ਤਿ ਪਞ੍ਚਦ੍ਵਾਰਿਕ ਚਿਤ੍ਤਾਨਂ ਗੋਚਰਭਾਵਂ. ‘‘ਪੁਰਿਮਾਨਿ ਦ੍ਵੇ’’ਤਿ ਰੂਪਸਦ੍ਦਾ ਰਮ੍ਮਣਾਨਿ. ‘‘ਨਿਮਿਤ੍ਤ ਵਸੇਨ ਘਟ੍ਟੇਨ੍ਤੀ’’ਤਿ ਆਦਾਸਂ ਪਸ੍ਸਨ੍ਤਸ੍ਸ ਮੁਖਸਦਿਸਂ ਮੁਖਨਿਮਿਤ੍ਤਂ ਮੁਖਪ੍ਪਟਿਬਿਮ੍ਬਂ ਆਦਾਸੇ ਉਪਟ੍ਠਾਤਿ. ਏਵਂ ਰੂਪਾਰਮ੍ਮਣਂ ਚਕ੍ਖੁਪਸਾਦੇ ਸਦ੍ਦਾਰਮ੍ਮਣਞ੍ਚ ਸੋਤਪਸਾਦੇ ਤਂ ਸਦਿਸ ਨਿਮਿਤ੍ਤ ਵਸੇਨ ਘਟ੍ਟੇਨ੍ਤਿ. ਨਵਤ੍ਥੁ ਵਸੇਨ ਘਟ੍ਟੇਨ੍ਤਿ. ਸਯਂ ਗਨ੍ਤ੍ਵਾ ਨ ਘਟ੍ਟੇਨ੍ਤੀਤਿ ਅਧਿਪ੍ਪਾਯੋ. ਅਸਮ੍ਪਤ੍ਤਾਨਞ੍ਞੇਵ ਆਰਮ੍ਮਣਾਨਂ. ‘‘ਨਿਮਿਤ੍ਤੁ ਪਟ੍ਠਾਨ ਵਸੇਨਾ’’ਤਿ ਨਿਮਿਤ੍ਤਸ੍ਸ ਉਪਟ੍ਠਾਨਵਸੇਨ. ‘‘ਨਿਮਿਤ੍ਤ ਅਪ੍ਪਨਾਵਸੇਨਾ’’ਤਿ ਨਿਮਿਤ੍ਤਸ੍ਸ ਪਵੇਸਨ ਵਸੇਨ. ਮਨੋਦ੍ਵਾਰੇ ਪਨ ਅਸਮ੍ਪਤ੍ਤਾਨਿਯੇਵ ਹੁਤ੍ਵਾਤਿ ਪਾਠਸੇਸੋ. ‘‘ਆਪਾਤਾ ਗਮਨਞ੍ਚੇਤ੍ਥਾ’’ਤਿਆਦੀਸੁ. ‘‘ਲਞ੍ਛਕਾਨਂ’’ਤਿ ਲਞ੍ਛਨਕਾਰਾਨਂ. ‘‘ਲਞ੍ਛਨਕ੍ਖਨ੍ਧਂ’’ਤਿ ਅਯੋਮਯਂ ਲਞ੍ਛਨਕ੍ਖਨ੍ਧਂ. ਸੋ ਚ ਲਞ੍ਛਨਕ੍ਖਨ੍ਧੋ ਤਾਲਪਣ੍ਣੇ ਆਪਾਤੇਤ੍ਵਾ ਅਕ੍ਖਰਂ ਉਪਟ੍ਠਾਪੇਤਿ. ਤਤ੍ਥ ‘‘ਆਪਾਤੇਤ੍ਵਾ’’ਤਿ ਅਜ੍ਝੋਤ੍ਥਰਿਤ੍ਵਾ. ‘‘ਚਕ੍ਖਾਦਿਪ੍ਪਥੇ’’ਤਿ ਚਕ੍ਖਾਦੀਨਂ ਵਿਸਯਕ੍ਖੇਤ੍ਤੇ. ਨ ਕੇਵਲਂ ਅਤ੍ਤਨੋ ਦ੍ਵਾਰੇਸੁ ਏਵ ਆਪਾਤ ਮਾਗਚ੍ਛਨ੍ਤਿ. ਅਥ ਖੋ ਮਨੋਦ੍ਵਾਰੇਪਿ ਆਪਾਤ ਮਾਗਚ੍ਛਨ੍ਤਿ. ਨ ਕੇਵਲਂ ਭਵਙ੍ਗ ਮਨੋਦ੍ਵਾਰੇ ਏਵ ਆਪਾਤ ਮਾਗਚ੍ਛਨ੍ਤੀਤਿ ਯੋਜਨਾ. ‘‘ਤੇਸੁ ਪਨਾ’’ਤਿ ਤੇਸੁ ਆਰਮ੍ਮਣੇਸੁ ਪਨ. ਤਾਨਿ ਆਰਮ੍ਮਣਾਨਿ ਯੇਸਂ ਤਾਨਿ ਤਦਾ ਰਮ੍ਮਣਾਨਿ. ਨ ਏਕਕ੍ਖਣੇ ਪਞ੍ਚਸੁ ਆਰਮ੍ਮਣੇਸੁ ਵੀਥਿ ਚਿਤ੍ਤਾਨਿ ਪਵਤ੍ਤਨ੍ਤਿ, ਏਕੇਕਸ੍ਮਿਂ ਆਰਮ੍ਮਣੇ ਏਵਾਤਿ ਵੁਤ੍ਤਤ੍ਤਾ ਨ ਦ੍ਵੀਸੁ, ਨ ਤੀਸੁ, ਨ ਚਤੂਸੂਤਿਪਿ ਵਤ੍ਤਬ੍ਬਂ. ਬਹੁਚਿਤ੍ਤਕ੍ਖਣਾਤੀਤਾਨਿ ਪਞ੍ਚਾਰਮ੍ਮਣਾਨਿ ਬਹੁਚਿਤ੍ਤਕ੍ਖਣਾਤੀਤੇ ਪਞ੍ਚਦ੍ਵਾਰੇਤਿ ਯੋਜਨਾ. ਪਞ੍ਚਦ੍ਵਾਰੇਤਿ ਚ ਪਞ੍ਚਦ੍ਵਾਰੇਸੂਤਿ ਅਤ੍ਥੋ. ‘‘ਏਵਂ ਸਤੀ’’ਤਿ ਤੇਸਂ ਪਸਾਦਾਨਂ ਆਵਜ੍ਜਨੇਨ ਸਦ੍ਧਿਂ ਉਪ੍ਪਤ੍ਤਿਯਾ ਸਤਿ. ‘‘ਆਦਿਲਕ੍ਖਣਂ’’ਤਿ ਪਞ੍ਚਾਰਮ੍ਮਣਾਨਂ ਪਞ੍ਚਦ੍ਵਾਰੇਸੁ ਆਪਾਤਾ ਗਮਨ ਸਙ੍ਖਾਤਂ ਵਿਸਯਪ੍ਪਵਤ੍ਤਿਯਾ ਆਦਿਲਕ੍ਖਣਂ. ਚਲਨਞ੍ਚ ਦਟ੍ਠਬ੍ਬਨ੍ਤਿ ਸਮ੍ਬਨ੍ਧੋ. ‘‘ਯਥਾ ਗਹਿਤਂ’’ਤਿ ਪਟਿਸਨ੍ਧਿਤੋ ਪਟ੍ਠਾਯ ਗਹਿਤਪ੍ਪਕਾਰਂ. ਵਿਭਾਵਨਿਪਾਠੇ ‘‘ਯੋਗ੍ਯ ਦੇਸਾਵਟ੍ਠਾਨ ਵਸੇਨਾ’’ਤਿ ਆਪਾਤਂ ਆਗਨ੍ਤੁਂ ਯੁਤ੍ਤਟ੍ਠਾਨੇ ਅਵੇਚ੍ਚਟ੍ਠਾਨ ਵਸੇਨ. ਯੁਜ੍ਜਨਞ੍ਚ, ਮਨ੍ਥਨਞ੍ਚ, ਖੋਭਕਰਣਞ੍ਚ, ਘਟ੍ਟਨਨ੍ਤਿ ਚ ਆਪਾਤਾ ਗਮਨਨ੍ਤਿ ਚ ਵੁਚ੍ਚਤੀਤਿ ਯੋਜਨਾ. ਹੇਟ੍ਠਾ ਵੁਤ੍ਤੋਯੇਵ ਆਪਾਤਾ ਗਮਨਞ੍ਚੇਤ੍ਥਾਤਿਆਦਿਨਾ. ‘‘ਨਾਨਾ ਠਾਨਿਯੇਸੂ’’ਤਿ ਨਾਨਾ ਠਾਨੇਸੁ ਠਿਤੇਸੁ. ‘‘ਏਕੋ ਧਮ੍ਮਨਿਯਾਮੋ ਨਾਮਾ’’ਤਿ ਯਥਾ ਬੋਧਿਸਤ੍ਤੇ ਮਾਤੁਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਨ੍ਤੇ ਧਮ੍ਮਨਿਯਾਮ ਵਸੇਨ ਸਕਲੇ ਜਾਤਿਕ੍ਖੇਤ੍ਤੇ ਪਥਵਿਕਮ੍ਪਨਂ ਅਹੋਸਿ. ਤਥਾ ਇਧਪਿ ਪਞ੍ਚਦ੍ਵਾਰੇਸੁ ਏਕੇਕਸ੍ਮਿਂ ਦ੍ਵਾਰੇ ਆਰਮ੍ਮਣੇ ਘਟ੍ਟੇਨ੍ਤੇ ਧਮ੍ਮਨਿਯਾਮ ਵਸੇਨ ਭਵਙ੍ਗ ਚਲਨਂ ਹੋਤਿ. ਅਯਂ ਧਮ੍ਮਨਿਯਾਮੋ ਨਾਮ. ‘‘ਸਹੇਵਾ’’ਤਿ ਏਕਤੋਯੇਵ. ਕਥਂ ਹਦਯ ਵਤ੍ਥੁ ਨਿਸ੍ਸਿਤਸ੍ਸ ਭਵਙ੍ਗਸ੍ਸ ਚਲਨਂ ਸਿਯਾਤਿ ਯੋਜਨਾ. ਏਤ੍ਥ ਚ ਪਞ੍ਚਵਿਞ੍ਞਾਣਸ੍ਸ ਚਲਨਂ ਸਿਯਾਤਿ ਇਦਂ ਨ ਵਤ੍ਤਬ੍ਬਂ. ਕਸ੍ਮਾ, ਤਦਾ ਪਞ੍ਚਵਿਞ੍ਞਾਣਸ੍ਸ ਅਵਿਜ੍ਜਮਾਨਤ੍ਤਾ. ਯਦਾ ਚ ਤਂ ਵਿਜ੍ਜਤਿ, ਤਦਾ ਤਂ ਨ ਚਲਤੀਤਿ ਨ ਵਤ੍ਤਬ੍ਬਂ. ਸਬ੍ਬਮ੍ਪਿ ਹਿ ਵੀਥਿਚਿਤ੍ਤਂ ਨਾਮ ਚਲਤਿ ਯੇਵਾਤਿ. ਸਨ੍ਤਤਿ ਨਾਮ ਪੁਬ੍ਬਾ ਪਰਪ੍ਪਬਨ੍ਧੋ. ਸਣ੍ਠਾਨਂ ਨਾਮ ਸਹਪ੍ਪਵਤ੍ਤਾਨਂ ਏਕਤੋ ਠਿਤਿ. ਇਧ ਸਣ੍ਠਾਨਂ ਅਧਿਪ੍ਪੇਤਂ. ਪਞ੍ਚਨਿਸ੍ਸਯ ਮਹਾਭੂਤੇਹਿ ਸਦ੍ਧਿਂ ਹਦਯ ਵਤ੍ਥੁ ਨਿਸ੍ਸਯਭੂਤਾਨਂ ਏਕ ਸਣ੍ਠਾਨ ਭਾਵੇਨ ਏਕਾਬਦ੍ਧਤ੍ਤਾਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਸਣ੍ਠਾਨ ਵਸੇਨਾਤਿ ਪਨ ਵਤ੍ਤਬ੍ਬਂ’’ਤਿ. ‘‘ਤਾਦਿਸਸ੍ਸ ਅਨੁਕ੍ਕਮ ਚਲਨਸ੍ਸਾ’’ਤਿ ਵਿਭਾਵਨਿਯਂ ਭੇਰਿਸਕ੍ਖਰੋਪਮਾਯ ਸਦ੍ਧਿਂ ਰੂਪਾਦਿਨਾ ਪਸਾਦੇ ਘਟ੍ਟਿਤੇ ਤਨ੍ਨਿਸ੍ਸ ਯੇਸੁ ਮਹਾਭੂਤੇਸੁ ਚਲਿਤੇਸੁ ਅਨੁਕ੍ਕਮੇਨ ਤਂ ਸਮ੍ਬਨ੍ਧਾਨਂ ਸੇਸਰੂਪਾਨਮ੍ਪਿ ਚਲਨੇਨ ਹਦਯ ਵਤ੍ਥੁਮ੍ਹਿ ਚਲਿਤੇ ਤਨ੍ਨਿਸ੍ਸਿਤਸ੍ਸ ਭਵਙ੍ਗਸ੍ਸ ਚਲਨਾ ਕਾਰੇਨ ਪਵਤ੍ਤਿਤੋਤੀਤਿ ਏਵਂ ਵੁਤ੍ਤਸ੍ਸ ਅਨੁਕ੍ਕਮ ਚਲਨਸ੍ਸ. ‘‘ਭਵਙ੍ਗਪ੍ਪਵਾਹਂ’’ਤਿ ਭਵਙ੍ਗ ਸਨ੍ਤਤਿਂ. ‘‘ਕੁਰੁਮਾਨਂ’’ਤਿ ਕਰੋਨ੍ਤਂ. ਸਲ੍ਲਕ੍ਖੇਨ੍ਤਂ’’ਤਿ ਇਦਮੇਵਾਤਿ ਸਨ੍ਨਿਟ੍ਠਾਪੇਨ੍ਤਂ. ‘‘ਯੋਨਿ ਸੋਮਨਸਿਕਾਰਾਦਿਵਸੇਨਾ’’ਤਿ ਯੋਨਿ ਸੋਮਨਸਿਕਾਰੋ ਕੁਸਲ ਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਅਯੋਨਿ ਸੋਮਨਸਿਕਾਰੋ ਅਕੁਸਲ ਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਨਿਰਨੁਸਯ ਸਨ੍ਤਾਨਤਾ ਕ੍ਰਿਯਜਵਨੁਪ੍ਪਤ੍ਤਿਯਾ ਪਚ੍ਚਯੋ. ਤੇਸੁ ਚ ਸੋਮਨਸ੍ਸ ਜਵਨਾਦੀਨਂ ਉਪ੍ਪਤ੍ਤਿ ਪਚ੍ਚਯੋਪਿ ਹੇਟ੍ਠਾ ਚਿਤ੍ਤ ਸਙ੍ਗਹੇ ਵੁਤ੍ਤਨਯੇਨ ਵੇਦਿਤਬ੍ਬੋ.

‘‘ਭਵਙ੍ਗਪਾਤੋ’’ਤਿਆਦੀਸੁ. ‘‘ਆਵਜ੍ਜਨਤੋ ਪਟ੍ਠਾਯ ਉਟ੍ਠਿਤਂ’’ਤਿ ਕਮ੍ਮ ਵਿਪਾਕਸਨ੍ਤਾਨਤੋ ਚ ਤਦਾਰਮ੍ਮਣਤੋ ਚ ਮੁਞ੍ਚਿਤ੍ਵਾ ਵਿਸੁਂ ਕ੍ਰਿਯਾਮਯ ਬ੍ਯਾਪਾਰੇਨ ਆਰਮ੍ਮਣਨ੍ਤਰਂ ਗਹੇਤ੍ਵਾ ਉਟ੍ਠਿਤਂ ਸਮੁਟ੍ਠਿਤਂ. ਭਵਙ੍ਗ ਚਲਨਮ੍ਪਿ ਉਟ੍ਠਾਨਸ੍ਸ ਆਦਿ ਹੋਤਿ. ਤਸ੍ਮਾ ਤਮ੍ਪਿ ਉਟ੍ਠਿਤੇ ਚਿਤ੍ਤ ਸਨ੍ਤਾਨੇ ਸਙ੍ਗਣ੍ਹਨ੍ਤੋ ਪਥਮ ਭਵਙ੍ਗ ਚਲਨਤੋਯੇਵ ਵਾਤਿ ਵੁਤ੍ਤਂ. ‘‘ਇਮਸ੍ਮਿਂ ਠਾਨੇ’’ਤਿ ਵੀਥਿ ਚਿਤ੍ਤਾਨਂ ਅਨੁਕ੍ਕਮੇਨ ਅਤ੍ਤਨੋ ਕਿਚ੍ਚੇਹਿ ਆਰਮ੍ਮਣਪ੍ਪਵਤ੍ਤਿਟ੍ਠਾਨੇ. ‘‘ਦੋਵਾਰਿਕੋਪਮਾ’’ਤਿ ਬਧਿਰਦੋਵਾਰਿਕੋਪਮਾ. ‘‘ਗਾਮਿਲ੍ਲੋਪਮਾ’’ਤਿ ਗਾਮਦਾਰਕੋਪਮਾ. ‘‘ਅਮ੍ਬੋਪਮਾ’’ਤਿ ਅਮ੍ਬਪ੍ਫਲੋਪਮਾ. ਅਞ੍ਞਾਪਿ ਉਪਮਾ ਅਤ੍ਥਿ. ਮਕ੍ਕਟਸੁਤ੍ਤੋਪਮਾ, ਉਚ੍ਛੁਯਨ੍ਤੋਪਮਾ, ਜਚ੍ਚਨ੍ਧੋਪਮਾ. ਤਾਸਬ੍ਬਾਪਿ ਅਟ੍ਠਸਾਲਿਨਿਯਂ ਵਿਪਾਕੁਦ੍ਧਾਰ ਕਥਾਤੋ ਗਹੇਤਬ੍ਬਾ. ‘‘ਯਤ੍ਥਹੀ’’ਤਿਆਦੀਸੁ. ‘‘ਕਥਂ ਛ ਛਕ੍ਕ ਯੋਜਨਾ ਹੋਤੀ’’ਤਿ. ਚਕ੍ਖੁ ਵਤ੍ਥੁ ਵਚਨਞ੍ਚ, ਚਕ੍ਖੁਦ੍ਵਾਰ ਵਚਨਞ੍ਚ, ਰੂਪਾ ਰਮ੍ਮਣ ਵਚਨਞ੍ਚ, ਚਕ੍ਖੁ ਵਿਞ੍ਞਾਣ ਵਚਨਞ੍ਚ, ਚਕ੍ਖੁਦ੍ਵਾਰ ਵੀਥਿ ਚਕ੍ਖੁ ਵਿਞ੍ਞਾਣ ਵੀਥਿ ਵਚਨਞ੍ਚ, ਅਤਿਮਹਨ੍ਤਾ ਰਮ੍ਮਣ ਵਚਨਞ੍ਚਾ,ਤਿ ਏਤਾਨਿ ਛਵਚਨਾਨਿ. ਤੇਹਿ ਛਛਕ੍ਕੇਹਿ ਆਹਰਿਤ੍ਵਾ ਇਮਿਸ੍ਸਂ ਵੀਥਿਯਂ ਦਸ੍ਸਿਤਾਨਿ. ਸੇਸਵੀਥੀਸੁਪਿ ਯਥਾਲਾਭਂ ਦਸ੍ਸਿਤਬ੍ਬਾਨਿ. ਏਵਂ ਛਛਕ੍ਕਯੋਜਨਾ ਹੋਤਿ. ‘‘ਏਤ੍ਥ ਚ ਯਤ੍ਤਕਾਨੀ’’ਤਿਆਦੀਸੁ. ‘‘ਏਕੂਨ ਪਞ੍ਞਾਸ ਪਰਿਮਾਣੇਸੂ’’ਤਿ ਏਕਸ੍ਸਨਿਪ੍ਫਨ੍ਨ ਰੂਪਧਮ੍ਮਸ੍ਸ ਏਕਪਞ੍ਞਾਸ ਮਤ੍ਤੇਸੁ ਖੁਦ੍ਦਕਕ੍ਖਣੇਸੁ ਉਪ੍ਪਾਦਕ੍ਖਣਞ੍ਚ ਭਙ੍ਗਕ੍ਖਣਞ੍ਚ ਠਪੇਤ੍ਵਾ ਮਜ੍ਝੇ ਏਕੂਨ ਪਞ੍ਞਾਸ ਮਤ੍ਤਾਨਿ ਠਿਤਿਕ੍ਖਣਾਨਿ ਸਨ੍ਤਿ. ਤੇਸੁ ਖਣੇਸੁ ਅਨੁਕ੍ਕਮੇਨ ਉਪ੍ਪਨ੍ਨਾ ਏਕੂਨ ਪਞ੍ਞਾਸ ਚਕ੍ਖੁ ਪਸਾਦਾ ਚ ਸਨ੍ਤਿ. ‘‘ਕਿਸ੍ਮਿਞ੍ਚੀ’’ਤਿ ਤੇਸੁ ਕਤਰਸ੍ਮਿਂ ਨਾਮ ਚਕ੍ਖੁ ਪਸਾਦੇ ਨ ਘਟ੍ਟੇਨ੍ਤੀਤਿ ਨ ਵਤ੍ਤਬ੍ਬਾਨਿ. ‘‘ਤੇਸੁ ਪਨਾ’’ਤਿ ਨਿਦ੍ਧਾਰਣੇ ਭੁਮ੍ਮਵਚਨਂ. ‘‘ਯਦੇਵ ਏਕਂ ਚਕ੍ਖੂ’’ਤਿ ਨਿਦ੍ਧਾਰਣੀਯਂ. ਤਂ ਪਨ ਕਤਮਨ੍ਤਿ. ਅਤੀਤ ਭਵਙ੍ਗੇਨ ਸਦ੍ਧਿਂ ਉਪ੍ਪਜ੍ਜਿਤ੍ਵਾ ਤਂ ਅਤਿਕ੍ਕਮ੍ਮ ਭਵਙ੍ਗ ਚਲਨਕ੍ਖਣੇ ਲਦ੍ਧਘਟਨਂ ਏਕਂ ਚਕ੍ਖੁ. ਤਂ ਪਨ ਚਕ੍ਖੁ ਵਿਞ੍ਞਾਣਸ੍ਸ ਵਤ੍ਥੁ ਭਾਵਞ੍ਚ ਦ੍ਵਾਰਭਾਵਞ੍ਚ ਸਾਧੇਤਿ. ਸੇਸਵਿਞ੍ਞਾਣਾਨਂ ਦ੍ਵਾਰਭਾਵਂ ਸਾਧੇਤੀਤਿ. ਤੇਨਾਹ ‘‘ਯਥਾਰਹਂ’’ਤਿ. ਏਤਦੇਵ ਏਤਂ ਏਵ ਚਕ੍ਖੁ ਕਿਚ੍ਚ ਸਾਧਨਂ ਨਾਮ ਹੋਤਿ ਵੀਥਿ ਚਿਤ੍ਤੁਪ੍ਪਤ੍ਤਿਯਾ ਵਤ੍ਥੁ ਕਿਚ੍ਚਦ੍ਵਾਰ ਕਿਚ੍ਚਾਨਂ ਸਾਧਨਤੋ. ‘‘ਯਂ ਮਜ੍ਝਿਮਾਯੁਕਂ’’ਤਿ ਮਨ੍ਦਾਯੁਕ ਅਮਨ੍ਦਾਯੁਕਾਨਂ ਮਜ੍ਝੇ ਪਵਤ੍ਤਤ੍ਤਾ ਯਂ ਮਜ੍ਝਿਮਾਯੁਕਨ੍ਤਿ ਵਦਨ੍ਤਿ. ਤਂ ਕਿਚ੍ਚ ਸਾਧਨਂ ਨਾਮਾਤਿ ਯੋਜਨਾ. ‘‘ਇਤਰਾਨਿ ਪਨਾ’’ਤਿ ਏਕੂਨ ਪਞ੍ਞਾਸ ਪਰਿਮਾਣੇਸੁ ਚਕ੍ਖੁ ਪਸਾਦੇਸੂਤਿ ਵੁਤ੍ਤਾਨਿ, ਤੇਸੁ ਏਕਂ ਕਿਚ੍ਚ ਸਾਧਨਂ ਠਪੇਤ੍ਵਾ ਸੇਸਾਨਿ ਇਤਰਾਨਿ ਅਟ੍ਠ ਚਤ੍ਤਾਲੀਸ ਚਕ੍ਖੂਨਿ ਮੋਘਵਤ੍ਥੂਨਿ ਨਾਮ ਹੋਨ੍ਤਿ. ਰੂਪਾ ਰਮ੍ਮਣੇਹਿ ਸਦ੍ਧਿਂ ਲਦ੍ਧ ਘਟ੍ਟਨਾਨਮ੍ਪਿ ਸਤਂ ਵੀਥਿ ਚਿਤ੍ਤੁਪ੍ਪਤ੍ਤਿਯਾ ਵਤ੍ਥੁ ਕਿਚ੍ਚਦ੍ਵਾਰ ਕਿਚ੍ਚਰਹਿਤਤ੍ਤਾ. ਤੇਸੁ ਕਤਮਾਨਿ ਮਨ੍ਦਾਯੁਕਾਨਿ ਨਾਮਾਤਿ ਆਹ ‘‘ਤਾਨਿ ਪਨਾ’’ਤਿਆਦਿਂ. ਕਿਚ੍ਚ ਸਾਧਨਤੋ ਪੁਰਿਮਾਨਿ ਨਾਮ ਅਤੀਤ ਭਵਙ੍ਗਤੋ ਪੁਰੇ ਤੇਰਸਸੁ ਭਵਙ੍ਗੇਸੁ ਆਦਿ ਭਵਙ੍ਗਸ੍ਸ ਭਙ੍ਗਕ੍ਖਣਤੋ ਪਟ੍ਠਾਯ ਖਣੇ ਖਣੇ ਉਪ੍ਪਨ੍ਨਾ ਸਤ੍ਤਤਿਂਸ ਚਕ੍ਖੁ ਪਸਾਦਾ. ਤਾਨਿ ਮਨ੍ਦਾਯੁਕਾਨੀਤਿ ਵਦਨ੍ਤਿ. ਕਸ੍ਮਾ, ਕਿਚ੍ਚ ਸਾਧਨਤੋ ਅਪ੍ਪਤਰਾਯੁਕਤ੍ਤਾ. ਕਿਚ੍ਚ ਸਾਧਨਤੋ ਪਚ੍ਛਿਮਾਨਿ ਨਾਮ ਅਤੀਤ ਭਵਙ੍ਗਸ੍ਸ ਠਿਤਿਕ੍ਖਣਤੋ ਪਟ੍ਠਾਯ ਖਣੇ ਖਣੇ ਉਪ੍ਪਨ੍ਨਾ ਏਕਾਦਸ ਚਕ੍ਖੁ ਪਸਾਦਾ, ਤਾਨਿ ਅਮਨ੍ਦਾਯੁਕਾਨੀਤਿ ਵਦਨ੍ਤਿ. ਕਸ੍ਮਾ, ਕਿਚ੍ਚ ਸਾਧਨਤੋ ਬਹੁਤਰਾਯੁਕਤ੍ਤਾ. ਤਦੁਭਯਾਨਿਪਿ ਅਟ੍ਠ ਚਤ੍ਤਾਲੀਸ ਮਤ੍ਤਾਨਿ ਵੇਦਿਤਬ੍ਬਾਨੀਤਿ ਸਮ੍ਬਨ੍ਧੋ. ‘‘ਤਤੋ’’ਤਿ ਤੇਹਿ ਅਟ੍ਠਚਤ੍ਤਾਲੀਸ ਮਤ੍ਤੇਹਿ. ‘‘ਪੁਰਿਮਤਰਾਨੀ’’ਤਿ ਸਤ੍ਤਤਿਂਸ ਮਨ੍ਦਾਯੁਕੇਹਿ ਪੁਰਿਮਤਰਾਨਿ. ਤਾਨਿ ਹਿ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨਿ. ‘‘ਪਚ੍ਛਿਮਤਰਾਨੀ’’ਤਿ ਏਕਾਦਸ ਅਮਨ੍ਦਾਯੁਕੇਹਿ ਪਚ੍ਛਿਮਤਰਾਨਿ. ਤਾਨਿ ਚ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਉਪ੍ਪਨ੍ਨਾਨਿਪਿ ਤਸ੍ਮਿਂ ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨਿ. ਕਸ੍ਮਾ ਪਨ ਚਕ੍ਖੁਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਾਨਿ ਤਦੁਭਯਾਨਿ ਇਧ ਨ ਗਹਿਤਾਨੀਤਿ. ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਧਰਮਾਨਾਨਂ ਅਟ੍ਠਚਤ੍ਤਾਲੀਸ ਮਤ੍ਤਾਨਂ ਚਕ੍ਖੂਨਂ ਮਜ੍ਝੇ ਏਵ ਕਤਮਂ ਚਕ੍ਖੁ ਚਕ੍ਖੁ ਵਿਞ੍ਞਾਣਸ੍ਸ ਵਤ੍ਥੁ ਕਿਚ੍ਚ ਦ੍ਵਾਰ ਕਿਚ੍ਚਂ ਸਾਧੇਤੀਤਿ ਆਸਙ੍ਕਿਤਬ੍ਬਂ ਹੋਤਿ. ਏਤ੍ਥ ਚ ਪਞ੍ਚ ਵਤ੍ਥੂਨਿ ਨਾਮ ਅਤ੍ਤਨੋ ਠਿਤਿਕ੍ਖਣੇ ਏਵ ਪਞ੍ਚਵਿਞ੍ਞਾਣਾਨਂ ਵਤ੍ਥੁਦ੍ਵਾਰ ਕਿਚ੍ਚ ਸਾਧਕਤ੍ਤਾ ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਅਨੁਪਲਦ੍ਧਤ੍ਤਾ ਇਧ ਨ ਗਹਿਤਾਨੀਤਿ ਚ, ਚਕ੍ਖੁ ਵਿਞ੍ਞਾਣਸ੍ਸ ਉਪ੍ਪਾਦਕ੍ਖਣੇ ਠਿਤਿ ਭਾਵੇਨ ਧਰਮਾਨਾਨਨ੍ਤਿ ਚ, ਵੁਤ੍ਤਨ੍ਤਿ ਦਟ੍ਠਬ੍ਬਂ.

‘‘ਏਤ੍ਥ ਸਿਯਾ’’ਤਿਆਦੀਸੁ. ‘‘ਇਮਾਯ ਵੀਥਿਯਾ’’ਤਿ ਇਮਾਯ ਅਤਿਮਹਨ੍ਤਾ ਰਮ੍ਮਣ ਵੀਥਿਯਾ. ‘‘ਸਮੁਦਾਯਗ੍ਗਾਹਿਕਾ’’ਤਿ ਰੂਪਾ ਰਮ੍ਮਣਾਨਂ ਸਮੂਹਗ੍ਗਾਹਿਕਾ. ‘‘ਵਣ੍ਣਸਲ੍ਲਕ੍ਖਣਾ’’ਤਿ ਵਣ੍ਣਵਵਤ੍ਥਾਨਿਕਾ. ‘‘ਵਤ੍ਥੁਗ੍ਗਾਹਿਕਾ’’ਤਿ ਦਬ੍ਬ ਸਣ੍ਠਾਨਗ੍ਗਾਹਿਕਾ. ‘‘ਨਾਮਗ੍ਗਾਹਿਕਾ’’ਤਿ ਨਾਮ ਪਞ੍ਞਤ੍ਤਿਗ੍ਗਾਹਿਕਾ. ‘‘ਅਲਾਤਚਕ੍ਕਸ੍ਸ ਗਾਹਿਕਾ ਵਿਯਾ’’ਤਿ ਰਤ੍ਤਨ੍ਧਕਾਰੇ ਏਕੋ ਅਲਾਤਂ ਗਹੇਤ੍ਵਾ ਪਰਿਬ੍ਭਮਤਿ. ਅਞ੍ਞੋ ਤਂ ਪਸ੍ਸਨ੍ਤੋ ਚਕ੍ਕਂ ਵਿਯ ਮਞ੍ਞਤਿ. ਤਤ੍ਥ ਅਲਾਤਸ੍ਸ ਗਤਗਤਟ੍ਠਾਨੇ ਪਚ੍ਚੁਪ੍ਪਨ੍ਨਂ ਰੂਪਂ ਆਰਬ੍ਭ ਚਕ੍ਖੁਦ੍ਵਾਰ ਵੀਥਿਯੋ ਉਪ੍ਪਜ੍ਜਨ੍ਤਿ. ਮਨੋਦ੍ਵਾਰ ਵੀਥਿਯੋ ਪਨ ਪੁਰਿਮ ਪੁਰਿਮਾਹਿ ਚਕ੍ਖੁਦ੍ਵਾਰ ਵੀਥੀਹਿ ਗਹਿਤਾਨਿ ਅਤੀਤ ਰੂਪਾਨਿ ਅਮੁਞ੍ਚਿਤ੍ਵਾ ਏਕਤੋ ਸਣ੍ਠਾਨਞ੍ਚ ਸਨ੍ਤਤਿਞ੍ਚ ਕਤ੍ਵਾ ਗਣ੍ਹਨ੍ਤਿ. ਤਦਾ ਪਸ੍ਸਨ੍ਤਸ੍ਸ ਚਕ੍ਕਂ ਵਿਯ ਉਪਟ੍ਠਾਤਿ. ਏਵਂ ਅਯਂ ਸਮੁਦਾਯਗ੍ਗਾਹਿਕਾ ਦਟ੍ਠਬ੍ਬਾ. ‘‘ਨਤ੍ਥਿ ਤਦਾਰਮ੍ਮਣੁਪ੍ਪਾਦੋ’’ਤਿਆਦੀਸੁ. ‘‘ਯਸ੍ਸਾ’’ਤਿ ਯਸ੍ਸ ਆਰਮ੍ਮਣਸ੍ਸ. ਚਿਤ੍ਤਾਨੀਤਿ ਚ ਨਾਨਾਰਮ੍ਮਣਾਨੀਤਿ ਚ ਕਮ੍ਮਪਦਾਨਿ. ਅਵਸੇਸੇ ਤਸ੍ਮਿਂ ਆਰਮ੍ਮਣੇ. ‘‘ਸਙ੍ਗਹ ਕਾਰੇਨਾ’’ਤਿ ਪੋਰਾਣ ਅਟ੍ਠਕਥਾਯੋ ਏਕਤੋ ਸਙ੍ਗਹੇਤ੍ਵਾ ਕਤਤ੍ਤਾ ਬੁਦ੍ਧਘੋਸਤ੍ਥੇਰੇਨ ਕਤਾ ਸਬ੍ਬਾ ਅਟ੍ਠਕਥਾਯੋ ਸਙ੍ਗਹਟ੍ਠਕਥਾ ਨਾਮ. ਸੋ ਚ ਸਙ੍ਗਹ ਕਾਰੋਤਿ ਵੁਚ੍ਚਤਿ. ‘‘ਇਧ ਪੀ’’ਤਿ ਇਮਸ੍ਮਿਂ ਅਭਿਧਮ੍ਮਤ੍ਥ ਸਙ੍ਗਹੇਪਿ. ‘‘ਥੇਰੇਨਾ’’ਤਿ ਅਨੁਰੁਦ੍ਧਤ੍ਥੇਰੇਨ. ‘‘ਏਕਮ੍ਪਿ ਇਚ੍ਛਤਿ ਯੇਵਾ’’ਤਿ. ‘‘ਯਸ੍ਸ ਹਿ ਚਤ੍ਤਾਰੀ’’ਤਿਆਦੀਸੁ ਯਸ੍ਸ ਆਰਮ੍ਮਣਸ੍ਸ ਚਤ੍ਤਾਰਿ ਵਾ ਪਞ੍ਚਵਾ ਛਵਾਤਿਆਦਿਨਾ ਯੋਜੇਤਬ੍ਬਂ. ‘‘ਜਵਨਮ੍ਪਿ ਅਨੁਪ੍ਪਜ੍ਜਿਤ੍ਵਾ’’ਤਿਆਦੀਸੁ. ‘‘ਅਤ੍ਤਨੋ ਪਧਾਨ ਕ੍ਰਿਯਾਯਾ’’ਤਿ ਅਨੁਪ੍ਪਜ੍ਜਿਤ੍ਵਾਤਿ ਪਦਸ੍ਸ ਪਰਤੋ ‘ਯਂ ਪਵਤ੍ਤਤੀ’ਤਿ ਅਤ੍ਤਨੋ ਪਧਾਨ ਕ੍ਰਿਯਾਪਦਂ ਅਤ੍ਥਿ. ਤੇਨ ਅਤ੍ਤਨੋ ਕ੍ਰਿਯਾਪਦੇਨ ਸਦ੍ਧਿਨ੍ਤਿ ਅਤ੍ਥੋ. ‘‘ਕਤ੍ਥਚਿ ਵੁਤ੍ਤਾ’’ਤਿ ਕਤ੍ਥਚਿ ਸਦ੍ਦਗਨ੍ਥੇਸੁ ਵੁਤ੍ਤਾ. ਅਪਿ ਚ, ਹੇਤੁਮ੍ਹਿ ਤ੍ਵਾਪਚ੍ਚਯੋ ਲਕ੍ਖਣੇ ਹੇਤੁਮ੍ਹਿ ਚ ਮਾਨਨ੍ਤ ਪਚ੍ਚਯਾ ਜੋਤਨੀਯਟ੍ਠੇਨ ਵੁਤ੍ਤਾ, ਨ ਵਚਨੀਯਟ੍ਠੇਨਾਤਿ ਦਟ੍ਠਬ੍ਬਾ. ‘‘ਪਕਤਿ ਨਿਯਾਮੇਨਾ’’ਤਿ ਏਤੇਨ ਪਚ੍ਚਯ ਵਿਸੇਸੇਸਤਿ, ਚਤ੍ਤਾਰਿ ਵਾ ਪਞ੍ਚਵਾ ਛਵਾ ਜਵਨਾਨਿ ਉਪ੍ਪਜ੍ਜਨ੍ਤੀਤਿ ਦੀਪੇਤਿ. ਤੇਨਾਹ ‘‘ਏਤ੍ਥਪਨਾ’’ਤਿਆਦਿਂ. ‘‘ਦ੍ਵਤ੍ਤਿਕ੍ਖਤ੍ਤੁਂ’’ਤਿ ਵਾਸਦ੍ਦਤ੍ਥੇ ਅਞ੍ਞਪਦਤ੍ਥ ਸਮਾਸਪਦਨ੍ਤਿ ਵੁਤ੍ਤਂ ‘‘ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ’’ਤਿ. ‘‘ਵੋਟ੍ਠਬ੍ਬਨਸ੍ਸ ਆਸੇਵਨਤਾ’’ਤਿ ਆਸੇਵਨ ਪਚ੍ਚਯਤਾਵਾ ਪਚ੍ਚਯੁਪ੍ਪਨ੍ਨਤਾਵਾ. ‘‘ਆਵਜ੍ਜਨਾਯਾ’’ਤਿ ਏਤ੍ਥ ਵੋਟ੍ਠਬ੍ਬਨ ਕਿਚ੍ਚਂ ਆਵਜ੍ਜਨਮ੍ਪਿ ਸਙ੍ਗਣ੍ਹਾਤਿ. ਇਧਪਿ ਆਰਮ੍ਮਣ ਦੁਬ੍ਬਲਤਾਯ ਚਤੁਪ੍ਪਞ੍ਚ ਜਵਨੁਪ੍ਪਤ੍ਤਿ ਇਚ੍ਛਿ ਤਬ੍ਬਾਤਿ ਯੋਜਨਾ. ਤਤ੍ਥ ‘‘ਇਧ ਪੀ’’ਤਿ ਇਮਸ੍ਮਿਂ ਪਰਿਤ੍ਤਾ ਰਮ੍ਮਣ ਵਾਰੇਪਿ. ਤਿਵੋਟ੍ਠਬ੍ਬਨਿਕਾ ਪਞ੍ਚ ਪਰਿਤ੍ਤਾ ਰਮ੍ਮਣ ਵੀਥਿਯੋਤਿ ਯੋਜਨਾ. ‘‘ਇਤਰਾਨੀ’’ਤਿ ਪਰਿਤ੍ਤ ਮਹਨ੍ਤਾਤਿ ਮਹਨ੍ਤਾ ਰਮ੍ਮਣਾਨਿ. ‘‘ਉਭਯਥਾਪੀ’’ਤਿ ਆਪਾਤਾ ਗਮਨ ਵਸੇਨਪਿ ਆਰਮ੍ਮਣ ਕਰਣ ਵਸੇਨਪਿ. ਇਮਸ੍ਸ ਪਦਸ੍ਸ.

੧੩੭. ‘‘ਮਨੋਦ੍ਵਾਰੇ ਪਨਾ’’ਤਿਆਦੀਸੁ. ‘‘ਪਰਿਤ੍ਤਕ੍ਖਣਾ ਪੀ’’ਤਿ ਚਿਤ੍ਤ ਫਸ੍ਸਾਦਯੋ ਅਪ੍ਪਤਰਕ੍ਖਣਾਪਿ. ‘‘ਅਤੀਤਾਨਾਗਤਾ ਪੀ’’ਤਿ ਅਤੀਤਾਨਾਗਤ ਧਮ੍ਮਾਪਿ. ‘‘ਘਟ੍ਟਨੇਨਾ’’ਤਿ ਰੂਪਾਦੀਨਂ ਘਟ੍ਟਨੇਨ. ‘‘ਯਤ੍ਥਾ’’ਤਿ ਯਸ੍ਮਿਂ ਭਵਙ੍ਗੇ. ‘‘ਪਞ੍ਚਦ੍ਵਾਰਾਨੁ ਬਨ੍ਧਕਂ’’ਤਿ ਪਞ੍ਚਦ੍ਵਾਰ ਵੀਥਿ ਅਨੁਗਤਂ. ਅਤੀਤਂ ਆਲਮ੍ਬਣਂ ਪਵਤ੍ਤੇਤਿ ਯੇਵਾਤਿ ਸਮ੍ਬਨ੍ਧੋ. ‘‘ਯਥਾਪਾਤਾ ਗਤਮੇਵਾ’’ਤਿ ਪਕਤਿਯਾ ਆਪਾਤਾ ਗਤਪ੍ਪਕਾਰਮੇਵ. ‘‘ਤਥਾ ਤਥਾ’’ਤਿ ਦਿਟ੍ਠ ਸਮ੍ਬਨ੍ਧਾਦਿਨਾ ਤੇਨ ਤੇਨ ਪਕਾਰੇਨ. ‘‘ਕਿਞ੍ਚੀ’’ਤਿ ਕਿਞ੍ਚਿ ਆਰਮ੍ਮਣਂ. ‘‘ਦਿਸ੍ਵਾ’’ਤਿ ਪਚ੍ਚਕ੍ਖਂ ਕਤ੍ਵਾ. ਪਞ੍ਚਦ੍ਵਾਰਗ੍ਗਹਿਤਞ੍ਹਿ ਆਰਮ੍ਮਣਂ ਪਚ੍ਚਕ੍ਖਕਤਟ੍ਠੇਨ ਦਿਟ੍ਠਨ੍ਤਿ ਵੁਚ੍ਚਤਿ. ਯਂ ਕਿਞ੍ਚਿ ਆਰਮ੍ਮਣਂ. ‘‘ਅਨੁਮਾਨੇਨ੍ਤਸ੍ਸਾ’’ਤਿ ਏਵਮੇਵ ਭਵਿਤ੍ਥ, ਭਵਿਸ੍ਸਤਿ, ਭਵਤੀਤਿ ਅਨੁਮਾਨਞ੍ਞਾਣੇਨ ਚਿਨ੍ਤੇਨ੍ਤਸ੍ਸ. ਤਂ ਸਦਿਸਂ ਆਰਮ੍ਮਣਂ. ‘‘ਪਰਸ੍ਸ ਸਦ੍ਦਹਨਾ’’ਤਿ ਪਰਵਚਨਂ ਸੁਤ੍ਵਾ ਯਥਾ ਅਯਂ ਵਦਤਿ, ਤਥੇ ਵੇਤਨ੍ਤਿ ਸਦ੍ਦਹਨਾ. ‘‘ਦਿਟ੍ਠਿ’’ ਵੁਚ੍ਚਤਿ ਞਾਣਂ ਵਾ ਲਦ੍ਧਿ ਵਾ. ‘‘ਨਿਜ੍ਝਾਨਂ’’ਤਿ ਸੁਟ੍ਠੁ ਓਲੋਕਨਂ. ‘‘ਖਨ੍ਤੀ’’ਤਿ ਖਮਨਂ ਸਹਨਂ. ਅਞ੍ਞਥਤ੍ਤਂ ਅਗਮਨਂ. ਦਿਟ੍ਠਿਯਾ ਨਿਜ੍ਝਾਨਂ ਦਿਟ੍ਠਿਨਿਜ੍ਝਾਨਂ. ਦਿਟ੍ਠਿਨਿਜ੍ਝਾਨਸ੍ਸ ਖਨ੍ਤਿ ਦਿਟ੍ਠਿਨਿਜ੍ਝਾਨਕ੍ਖਨ੍ਤਿ. ‘‘ਸੇਸਂ’’ਤਿ ਨਾਨਾਕਮ੍ਮ ਬਲੇਨਾਤਿਆਦਿਕਂ. ‘‘ਦੇਵਤੋ ਪਸਂਹਾਰਵਸੇਨਾ’’ਤਿ ਦੇਵਤਾ ਕਦਾਚਿ ਕੇਸਞ੍ਚਿ ਸੁਪਿਨਨ੍ਤੇ ਨਾਨਾਰਮ੍ਮਣਾਨਿ ਉਪਸਂਹਰਿਤ੍ਵਾ ਦਸ੍ਸੇਨ੍ਤਿ. ਏਵਂ ਦੇਵਤੋ ਪਸਂਹਾਰ ਵਸੇਨਾਪਿ. ਅਨੁਬੋਧੋ ਨਾਮ ਲੋਕਿਯਞ੍ਞਾਣ ਵਸੇਨ ਚਤੁਸ੍ਸਚ੍ਚ ਧਮ੍ਮਾਨਂ ਅਨੁਬੁਜ੍ਝਨਂ. ਪਟਿਵੇਧੋ ਨਾਮ ਲੋਕੁਤ੍ਤਰਞ੍ਞਾਣ ਕਿਚ੍ਚਂ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਗ੍ਗਹਣੇਨ ਪਕਤੂ ਪਨਿਸ੍ਸਯ ਪਚ੍ਚਯਮ੍ਪਿ ਉਪਲਕ੍ਖੇਤਿ. ਚਿਤ੍ਤ ਸਨ੍ਤਾਨਸ੍ਸ ਅਨਨ੍ਤਰੂਪਨਿਸ੍ਸਯ ਪਚ੍ਚਯਭਾਵੋ ਨਾਮਾਤਿ ਸਮ੍ਬਨ੍ਧੋ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਸਤ੍ਤਿ ਨਾਮ ਅਨਨ੍ਤਰ ਪਰਮ੍ਪਰ ਵਿਪ੍ਫਰਣਵਸੇਨ ਮਹਾਗਤਿਕਾ ਹੋਤੀਤਿ ਵੁਤ੍ਤਂ ਹੋਤਿ. ਅਨਨ੍ਤ ਰੂਪ ਨਿਸ੍ਸਯ ਪਚ੍ਚਯਾਨੁ ਭਾਵੋਤਿਪਿ ਯੁਜ੍ਜਤਿ. ਕਥਂ ਮਹਾਵਿਪ੍ਫਾਰੋਤਿ ਆਹ ‘‘ਸਕਿਂ ਪੀ’’ਤਿਆਦਿਂ. ‘‘ਸੁਟ੍ਠੁ ਆਸੇਵਿਤ੍ਵਾ’’ਤਿ ਏਤ੍ਥ ਪਚ੍ਛਾ ਅਪ੍ਪਮੁਸ੍ਸਮਾਨਂ ਕਤ੍ਵਾ ਪੁਨਪ੍ਪੁਨਂ ਸੇਵਨਂ ਸੁਟ੍ਠੁ ਆਸੇਵਨਂ ਨਾਮ. ਨ ਕੇਵਲਂ ਪੁਰਿਮ ਚਿਤ੍ਤ ਸਨ੍ਤਾਨਸ੍ਸ ਸੋ ਉਪਨਿਸ੍ਸਯ ਪਚ੍ਚਯਾਨੁਭਾਵੋ ਏਵ ਮਹਾਵਿਪ੍ਫਾਰੋ ਹੋਤਿ. ਪਕਤਿਯਾ ਚਿਤ੍ਤਸ੍ਸ ਵਿਚਿਤ੍ਤ ਭਾਵ ਸਙ੍ਖਾਤਂ ਚਿਨ੍ਤਨਾ ਕਿਚ੍ਚਮ੍ਪਿ ਮਹਾਵਿਪ੍ਫਾਰਂ ਹੋਤੀਤਿ ਦਸ੍ਸੇਤੁਂ ‘‘ਚਿਤ੍ਤਞ੍ਚ ਨਾਮਾ’’ਤਿਆਦਿਵੁਤ੍ਤਂ. ਕਥਂ ਮਹਾਵਿਪ੍ਫਾਰਂ ਹੋਤੀਤਿ ਆਹ ‘‘ਕਿਞ੍ਚਿ ਨਿਮਿਤ੍ਤਂ’’ਤਿਆਦਿਂ. ‘‘ਕਿਞ੍ਚਿ ਨਿਮਿਤ੍ਤਂ’’ਤਿ ਦਿਟ੍ਠਾਦੀਸੁ ਨਾਨਾ ਰਮ੍ਮਣੇਸੁ ਕਿਞ੍ਚਿ ਅਪ੍ਪਮਤ੍ਤਕਂ ਦਿਟ੍ਠਾਦਿਕਂ ਆਰਮ੍ਮਣ ਨਿਮਿਤ੍ਤਂ. ‘‘ਤੇਹਿ ਚਕਾਰਣੇਹੀ’’ਤਿ ਤੇਹਿ ਕਤ੍ਤੁਭੂਤੇਹਿ ਦਿਟ੍ਠਾਦੀਹਿ ਕਾਰਣੇਹਿ. ‘‘ਚੋਦੀਯਮਾਨਂ’’ਤਿ ਪਯੋਜੀਯਮਾਨਂ. ‘‘ਅਜ੍ਝਾਸਯ ਯੁਤ੍ਤਂ’’ਤਿ ਅਜ੍ਝਾਸਯੇਨ ਸਂਯੁਤ੍ਤਂ. ਭਵਙ੍ਗ ਚਿਤ੍ਤਸ੍ਸ ਆਰਮ੍ਮਣਂ ਨਾਮ ਅਵਿਭੂਤਂ ਹੋਤਿ. ਭਵਙ੍ਗਂ ਚਾਲੇਤ੍ਵਾ ਆਵਜ੍ਜਨਂ ਨਿਯੋਜੇਤੀਤਿ ਸਮ੍ਬਨ੍ਧੋ. ‘‘ਲਦ੍ਧ ਪਚ੍ਚਯੇਸੂ’’ਤਿ ਆਲੋਕਾਦਿਵਸੇਨ ਵਾ ਦਿਟ੍ਠਾਦਿਵਸੇਨ ਵਾ ਲਦ੍ਧ ਪਚ੍ਚਯਵਨ੍ਤੇਸੁ. ਤਦਭਿਨਿਨ੍ਨਾਕਾਰੋ ਨਾਮ ਨਿਚ੍ਚਕਾਲਮ੍ਪਿ ਤੇਸੁ ਆਰਮ੍ਮਣੇਸੁ ਅਭਿਮੁਖਂ ਨਿਨ੍ਨਾਕਾਰੋ. ਤੇਨ ਆਕਾਰੇਨ ਪਵਤ੍ਤੋ ਮਨਸਿਕਾਰੋ. ਤੇਨ ਸਮ੍ਪਯੁਤ੍ਤਸ੍ਸ. ਏਤੇਹਿ ਵਚਨੇਹਿ ਸੁਦ੍ਧਮਨੋਦ੍ਵਾਰੇ ਆਰਮ੍ਮਣਾਨਂ ਅਪਾਤਾਗਮਨਞ੍ਚ ਭਵਙ੍ਗ ਚਲਨਞ੍ਚ ਨ ਕੇਵਲਂ ਲਦ੍ਧ ਪਚ੍ਚਯਾਨਂ ਆਰਮ੍ਮਣਾਨਂ ਵਸੇਨੇਵ ਹੋਤਿ. ਤਾਦਿਸੇਨ ਪਨ ਮਨਸਿਕਾਰੇਨ ਯੁਤ੍ਤਸ੍ਸ ਸਯਞ੍ਚ ਵੀਥਿ ਚਿਤ੍ਤ ਚਿਨ੍ਤਨਾ ਕਿਚ੍ਚਸ੍ਸ ਚਿਤ੍ਤਸ੍ਸ ਵਸੇਨਾਪਿ ਹੋਤੀਤਿ ਸਿਦ੍ਧਂ ਹੋਤਿ. ਨ ਹਿ ਆਰਮ੍ਮਣਨ੍ਤਰੇ ਅਭਿਨਿਨ੍ਨਾਕਾਰੋ ਨਾਮ ਨਤ੍ਥੀਤਿ ਸਕ੍ਕਾ ਵਤ੍ਤੁਂ. ਕਸ੍ਮਾ, ਅਭਾਵਿਤ ਚਿਤ੍ਤਾਨਂ ਪਮਾਦ ਬਹੁਲਾਨਂ ਜਨਾਨਂ ਕਦਾਚਿ ਕਰਹਚਿ ਭਾਵਨਾ ਮਨਸਿਕਾਰੇ ਕਰੀਯਮਾਨੇਪਿ ਵੀਥਿ ਚਿਤ੍ਤ ਸਨ੍ਤਾਨਸ੍ਸ ਬਹਿਦ੍ਧਾ ਨਾਨਾਰਮ੍ਮਣੇਸੁ ਅਭਿਨਿਨ੍ਨਾਕਾਰਸ੍ਸ ਸਨ੍ਦਿਸ੍ਸਨਤੋਤਿ. ‘‘ਯਥਾ ਚੇਤ੍ਥਾ’’ਤਿ ਯਥਾ ਏਤ੍ਥ ਮਨੋਦ੍ਵਾਰੇ ਰੂਪਾਰੂਪ ਸਤ੍ਤਾਨਂ ਵਿਭੂਤਾ ਰਮ੍ਮਣੇਪਿ ਤਦਾ ਰਮ੍ਮਣੁਪ੍ਪਾਦੋ ਨਤ੍ਥਿ, ਏਵਨ੍ਤਿ ਯੋਜਨਾ. ਞਾਣਵਿਭਙ੍ਗਟ੍ਠਕਥਾਯਂ ਪਨ ਵੋਟ੍ਠਬ੍ਬਨਵਾਰੋਪਿ ਆਗਤੋ. ਯਥਾਹ ਸੁਪਿਨੇਨੇਵ ਦਿਟ੍ਠਂ ਵਿਯ ਮੇ, ਸੁਤਂ ਵਿਯ ਮੇਤਿ ਕਥਨਕਾਲੇਪਿ ਅਬ੍ਯਾਕਤੋ ਯੇਵਾਤਿ. ਤਤ੍ਥ ਹਿ ‘‘ਅਬ੍ਯਾਕਤੋ ਯੇਵਾ’’ਤਿ ਸੁਪਿਨਨ੍ਤੇ ਮਨੋਦ੍ਵਾਰੇ ਦ੍ਵਤ੍ਤਿਕ੍ਖਤ੍ਤੁਂ ਉਪ੍ਪਨ੍ਨਸ੍ਸ ਆਵਜ੍ਜਨਸ੍ਸ ਵਸੇਨ ਅਬ੍ਯਾਕਤੋਯੇਵ. ਤਤੋ ਪਰਂ ਭਵਙ੍ਗਪਾਤੋ. ਅਟ੍ਠਸਾਲਿਨਿਯਮ੍ਪਿ ਵੁਤ੍ਤਂ ਅਯਂ ਪਨ ਵਾਰੋ ਦਿਟ੍ਠਂ ਵਿਯ ਮੇ, ਸੁਤਂ ਵਿਯ ਮੇ ਤਿਆਦੀਨਿ ਵਦਨਕਾਲੇ ਲਬ੍ਭਤੀਤਿ. ਤਂ ਪਨ ਪਞ੍ਚ ਦ੍ਵਾਰੇ ਪਰਿਤ੍ਤਾਰਮ੍ਮਣੇ ਦ੍ਵਤ੍ਤਿਕ੍ਖਤ੍ਤੁਂ ਉਪ੍ਪਨ੍ਨਸ੍ਸ ਵੋਟ੍ਠਬ੍ਬਨਸ੍ਸ ਵਸੇਨ ਵੁਤ੍ਤਂ. ‘‘ਸੋਪਿ ਇਧ ਲਦ੍ਧੁਂ ਵਟ੍ਟਤਿ ਯੇਵਾ’’ਤਿ ਸੋਪਿ ਵਾਰੋ ਇਮਸ੍ਮਿਂ ਮਨੋਦ੍ਵਾਰੇ ਲਦ੍ਧੁਂ ਵਟ੍ਟਤਿਯੇਵ. ‘‘ਭਵਙ੍ਗੇ ਚਲਿਤੇ ਨਿਵਤ੍ਤਨਕਵਾਰਾਨਂ’’ਤਿ ਦ੍ਵਿਕ੍ਖਤ੍ਤੁਂ ਭਵਙ੍ਗ ਚਲਨਮਤ੍ਤੇ ਠਤ੍ਵਾ ਵੀਥਿ ਚਿਤ੍ਤਾਨਿ ਅਨੁਪ੍ਪਜ੍ਜਿਤ੍ਵਾ ਭਵਙ੍ਗਪਾਤਵਸੇਨ ਨਿਵਤ੍ਤਨਕਾਨਂ ਮੋਘਵਾਰਾਨਂ ਮਨੋਦ੍ਵਾਰੇਪਿ ਪਮਾਣਂ ਨ ਭਵਿਸ੍ਸਤਿਯੇਵ. ਅਥ ਇਮਸ੍ਮਿਂਵਾਰੇ ਵੀਥਿ ਚਿਤ੍ਤਪ੍ਪਵਤ੍ਤਿ ਨਤ੍ਥਿ. ਏਵਂ ਸਤਿ, ਇਮਸ੍ਮਿਂ ਵੀਥਿ ਸਙ੍ਗਹੇ ਸੋ ਵਾਰੋ ਨ ਵਤ੍ਤਬ੍ਬੋਤਿ ਚੇ. ਵਤ੍ਤਬ੍ਬੋਯੇਵ. ਕਸ੍ਮਾ, ਛਧਾ ਵਿਸਯਪ੍ਪਵਤ੍ਤੀਤਿ ਇਮਸ੍ਮਿਂ ਛਕ੍ਕੇ ਸਙ੍ਗਹਿਤਤ੍ਤਾਤਿ ਦਸ੍ਸੇਤੁਂ ‘‘ਵਿਸਯੇ ਚ ਆਪਾਤਾਗਤੇ’’ਤਿਆਦਿ ਵੁਤ੍ਤਂ. ਆਰਮ੍ਮਣਭੂਤਾ ਵਿਸਯਪ੍ਪਵਤ੍ਤਿ. ਏਕੇਕਸ੍ਮਿਂ ਅਨੁਬਨ੍ਧਕਵਾਰੇ. ‘‘ਤਦਾਰਮ੍ਮਣ ਵਾਰਾਦਯੋ’’ਤਿ ਤਦਾਰਮ੍ਮਣ ਵਾਰੋ ਜਵਨਵਾਰੋ ਵੋਟ੍ਠਬ੍ਬਨ ਵਾਰੋ ਮੋਘਵਾਰੋ. ਤੇਸੁ ਪਨ ਤਦਾ ਰਮ੍ਮਣਵਾਰੋ ਵਤ੍ਥੁਗ੍ਗਹਣੇ ਚ ਨਾਮਗ੍ਗਹਣੇ ਚ ਨ ਲਬ੍ਭਤਿ. ‘‘ਵਤ੍ਥੂ’’ਤਿ ਹਿ ਸਣ੍ਠਾਨ ਪਞ੍ਞਤ੍ਤਿ. ‘‘ਨਾਮਂ’’ਤਿ ਨਾਮ ਪਞ੍ਞਤ੍ਤਿ. ਨ ਚ ਤਦਾ ਰਮ੍ਮਣਂ ਪਞ੍ਞਤ੍ਤਾ ਰਮ੍ਮਣਂ ਹੋਤੀਤਿ. ਤੇਨ ਵੁਤ੍ਤਂ ‘‘ਯਥਾਰਹਂ’’ਤਿ. ‘‘ਤਤ੍ਥਾ’’ਤਿ ਤੇਸੁ ਦਿਟ੍ਠਵਾਰਾਦੀਸੁ ਛਸੁ ਵਾਰੇਸੁ. ਏਤਰਹਿ ਪਨ ਕੇਚਿ ਆਚਰਿਯਾਤਿ ਪਾਠਸੇਸੋ. ‘‘ਅਤੀਤ ਭਵਙ੍ਗ ਵਸੇਨਾ’’ਤਿ ਏਕਂ ਭਵਙ੍ਗਂ ਅਤਿਕ੍ਕਮ੍ਮ ਆਪਾਤਾ ਗਤੇ ਆਰਮ੍ਮਣੇ ਏਕੋ ਵਾਰੋ, ਦ੍ਵੇ ਭਵਙ੍ਗਾਨਿ ਅਤਿਕ੍ਕਮ੍ਮ ਆਪਾਤਾ ਗਤੇ ਏਕੋਤਿਆਦਿਨਾ ਅਤੀਤ ਭਵਙ੍ਗ ਭੇਦਵਸੇਨ. ‘‘ਤਦਾ ਰਮ੍ਮਣ ਵਸੇਨਾ’’ਤਿ ਤਦਾ ਰਮ੍ਮਣਸ੍ਸ ਉਪ੍ਪਨ੍ਨਵਾਰੋ ਅਨੁਪ੍ਪਨ੍ਨ ਵਾਰੋਤਿ ਏਵਂ ਤਦਾ ਰਮ੍ਮਣ ਵਸੇਨ. ਕਪ੍ਪੇਨ੍ਤਿ ਚਿਨ੍ਤੇਨ੍ਤਿ, ਵਿਦਹਨ੍ਤਿ ਵਾ. ‘‘ਖਣ ਵਸੇਨ ਬਲਵਦੁਬ੍ਬਲਤਾ ਸਮ੍ਭਵੋ’’ਤਿ ਯਥਾ ਪਞ੍ਚਦ੍ਵਾਰੇ ਅਤਿਮਹਨ੍ਤਾ ਰਮ੍ਮਣੇਸੁਪਿ ਆਰਮ੍ਮਣ ਧਮ੍ਮਾ ਉਪ੍ਪਾਦਂ ਪਤ੍ਵਾ ਆਦਿਤੋ ਏਕਚਿਤ੍ਤਕ੍ਖਣਮਤ੍ਤੇ ਦੁਬ੍ਬਲਾ ਹੋਨ੍ਤਿ. ਅਤ੍ਤਨੋ ਦ੍ਵਾਰੇਸੁ ਆਪਾਤਂ ਆਗਨ੍ਤੁਂ ਨ ਸਕ੍ਕੋਨ੍ਤਿ. ਏਕ ਚਿਤ੍ਤਕ੍ਖਣਂ ਪਨ ਅਤਿਕ੍ਕਮ੍ਮ ਬਲਵਨ੍ਤਾ ਹੋਨ੍ਤਿ. ਅਤ੍ਤਨੋ ਦ੍ਵਾਰੇਸੁ ਆਪਾਤਂ ਗਨ੍ਤੁਂ ਸਕ੍ਕੋਨ੍ਤਿ. ਮਹਨ੍ਤਾ ਰਮ੍ਮਣਾਦੀਸੁ ਪਨ ਦ੍ਵਿ ਚਿਤ੍ਤਕ੍ਖਣਿਕਮਤ੍ਤੇ ਦੁਬ੍ਬਲਾ ਹੋਨ੍ਤੀਤਿਆਦਿਨਾ ਵਤ੍ਤਬ੍ਬਾ. ਨ ਤਥਾ ਮਨੋਦ੍ਵਾਰੇ ਆਰਮ੍ਮਣਾਨਂ ਖਣ ਵਸੇਨ ਬਲਵਦੁਬ੍ਬਲਤਾ ਸਮ੍ਭਵੋ ਅਤ੍ਥਿ. ਕਸ੍ਮਾ ਨਤ੍ਥੀਤਿ ਆਹ ‘‘ਤਦਾ’’ਤਿਆਦਿਂ. ਤਤ੍ਥ ‘‘ਤਦਾ’’ਤਿ ਤਸ੍ਮਿਂ ਵੀਥਿ ਚਿਤ੍ਤਪ੍ਪਵਤ੍ਤਿਕਾਲੇ. ‘‘ਤਤ੍ਥਾ’’ਤਿ ਮਨੋਦ੍ਵਾਰੇ.

‘‘ਏਤ੍ਥ ਸਿਯਾ’’ਤਿਆਦੀਸੁ. ‘‘ਸਿਯਾ’’ਤਿ ਕੇਸਞ੍ਚਿ ਵਿਚਾਰਣਾ ਸਿਯਾ. ਏਕਂ ਆਵਜ੍ਜਨਂ ਅਸ੍ਸਾਤਿ ਏਕਾਵਜ੍ਜਨਾ. ‘‘ਵੀਥੀ’’ਤਿ ਵੀਥਿਚਿਤ੍ਤਪ੍ਪਬਨ੍ਧੋ. ਏਕਾਵਜ੍ਜਨਾ ਚ ਸਾ ਵੀਥਿ ਚਾਤਿ ਵਿਗ੍ਗਹੋ. ‘‘ਆਵਜ੍ਜਨਂ’’ਤਿ ਆਵਜ੍ਜਨ ਚਿਤ੍ਤਂ. ਤਂ ਵਾ ਆਵਜ੍ਜਤੀਤਿ ਸਮ੍ਬਨ੍ਧੋ. ‘‘ਤਂ ਤਂ ਜਵਨੇਨਾ’’ਤਿ ਤੇਨ ਤੇਨ ਜਵਨੇਨ ਸਹੁਪ੍ਪਨ੍ਨਂ ਵਾ ਪਰਸ੍ਸ ਚਿਤ੍ਤਂ ਆਵਜ੍ਜਤਿ ਕਿਨ੍ਤਿ ਯੋਜਨਾ. ‘‘ਕਿਞ੍ਚੇਤ੍ਥਾ’’ਤਿ ਏਤ੍ਥ ਵਚਨੇ ਕਿਞ੍ਚਿ ਵਤ੍ਤਬ੍ਬਂ ਅਤ੍ਥੀਤਿ ਅਤ੍ਥੋ. ਯਦਿ ਤਾਵ ਆਵਜ੍ਜਨਞ੍ਚ ਜਵਨਾਨਿ ਚਾਤਿ ਅਧਿਕਾਰੋ. ‘‘ਤਞ੍ਹਿ ਚਿਤ੍ਤਂ’’ਤਿ ਪਰਸ੍ਸ ਚਿਤ੍ਤਂ. ‘‘ਏਵਮ੍ਪਿ ਭਿਨ੍ਨਮੇਵਾ’’ਤਿ ਜਵਨਾਨਂ ਧਮ੍ਮਤੋ ਭਿਨ੍ਨਮੇਵ. ਏਤ੍ਥ ਅਟ੍ਠਕਥਾਯਂ ਵਿਨਿਚ੍ਛਿਤਨ੍ਤਿ ਸਮ੍ਬਨ੍ਧੋ. ਤਂ ਚਿਤ੍ਤਂ ਨਿਰੁਦ੍ਧਮ੍ਪਿ ਜਵਨਾਨਮ੍ਪਿ ਪਚ੍ਚੁਪ੍ਪਨ੍ਨਮੇਵ ਹੋਤੀਤਿ ਯੋਜਨਾ. ‘‘ਅਦ੍ਧਾਵਸੇਨ ਗਹਿਤਂ’’ਤਿ ਅਦ੍ਧਾ ਪਚ੍ਚੁਪ੍ਪਨ੍ਨ ਵਸੇਨ ਗਹਿਤਂ. ‘‘ਸਨ੍ਤਤਿਵਸੇਨ ਗਹਿਤਂ’’ਤਿ ਸਨ੍ਤਤਿ ਪਚ੍ਚੁਪ੍ਪਨ੍ਨਵਸੇਨ ਗਹਿਤਂ. ਆਚਰਿਯਾਨਨ੍ਦਮਤੇ. ਸਬ੍ਬੇਸਮ੍ਪਿ ਆਵਜ੍ਜਨ ਜਵਨਾਨਂ. ਚਿਤ੍ਤਮੇਵ ਹੋਤਿ, ਤਸ੍ਮਾ ਧਮ੍ਮਤੋ ਅਭਿਨ੍ਨਂ. ਪਚ੍ਚੁਪ੍ਪਨ੍ਨਞ੍ਚ ਹੋਤਿ, ਤਸ੍ਮਾ ਕਾਲਤੋ ਅਭਿਨ੍ਨਨ੍ਤਿ ਵੁਤ੍ਤਂ ਹੋਤਿ. ਅਨਨ੍ਤਰਪਚ੍ਚਯੇ ਅਤੀਤੋ ਚ ਪਚ੍ਚੁਪ੍ਪਨ੍ਨੋ ਚ ਖਣ ਵਸੇਨ ਯੁਜ੍ਜਤਿ. ਯਦਿ ਅਦ੍ਧਾਸਨ੍ਤਤਿ ਵਸੇਨ ਯੁਜ੍ਜੇਯ੍ਯ, ਪਚ੍ਚੁਪ੍ਪਨ੍ਨੋ ਧਮ੍ਮੋ ਪਚ੍ਚੁਪ੍ਪਨ੍ਨਸ੍ਸ ਧਮ੍ਮਸ੍ਸ ਅਨਨ੍ਤਰ ਪਚ੍ਚਯੇਨ ਪਚ੍ਚਯੋਤਿ ਵੁਤ੍ਤੋ ਭਵੇਯ੍ਯ. ਕਸ੍ਮਾ, ਏਕਾਵਜ੍ਜਨ ਵੀਥਿਯਞ੍ਹਿ ਸਬ੍ਬਾਨਿ ਚਿਤ੍ਤਾਨਿ ਅਦ੍ਧਾਸਨ੍ਤਤਿ ਵਸੇਨ ਪਚ੍ਚੁਪ੍ਪਨ੍ਨਾਨਿ ਏਵ ਹੋਨ੍ਤੀਤਿ.

੧੩੮. ਅਪ੍ਪਨਾਵਾਰੇ. ‘‘ਅਪ੍ਪਨਾ ਜਵਨਂ’’ਤਿ ਕਮ੍ਮਪਦਂ. ‘‘ਤਦਾ ਰਮ੍ਮਣਂ’’ਤਿ ਕਤ੍ਤੁਪਦਂ. ‘‘ਇਨ੍ਦ੍ਰਿਯ ਸਮਤਾਦੀਹੀ’’ਤਿ ਸਦ੍ਧਾਦੀਨਂ ਪਞ੍ਚਨ੍ਨਂ ਇਨ੍ਦ੍ਰਿਯਾਨਂ ਅਞ੍ਞਮਞ੍ਞਂ ਅਨਤਿ ਵਤ੍ਤਨਵਸੇਨ ਸਮਤਾਦੀਹਿ. ‘‘ਪਰਿਤੋ’’ਤਿ ਸਮਨ੍ਤਤੋ. ‘‘ਉਪੇਚ੍ਚਾ’’ਤਿ ਉਪਗਨ੍ਤ੍ਵਾ. ਅਪ੍ਪਨਂ ਵਹਿਤੁਂ ਜਨੇਤੁਂ ਸਮਤ੍ਥ ਭਾਵੋ ਅਪ੍ਪਨਾਵਹਸਮਤ੍ਥਭਾਵੋ. ‘‘ਯਸ੍ਸ ਪਵਤ੍ਤਿਯਾ’’ਤਿ ਯਸ੍ਸ ਉਪਚਾਰ ਜਵਨਸ੍ਸ ਪਵਤ੍ਤਿਤੋ. ‘‘ਅਚਿਰਂ ਕਾਲਂ’’ਤਿ ਅਚਿਰੇਕਾਲੇ. ਪਰਿਤ੍ਤ ਜਾਤਿਕਾ ਨਾਮ ਕਾਮਾਵਚਰਜਾਤਿ. ‘‘ਗੋਤ੍ਤਂ’’ਤਿ ਕਮ੍ਮਕਤ੍ਤੁ ਪਦਂ. ‘‘ਅਭਿਭੁਯ੍ਯਤੀ’’ਤਿ ਭਾਵਨਾ ਬਲੇਨ ਅਭਿਭੁਯ੍ਯਮਾਨਂ ਹੋਤਿ. ਅਭਿਮਦ੍ਦੀਯਮਾਨਂ ਹੋਤੀਤਿ ਅਤ੍ਥੋ. ‘‘ਛਿਜ੍ਜਤੀ’’ਤਿ ਇਦਂ ਪਨ ਅਭਿਭਵਨਸ੍ਸ ਸਿਖਾਪਤ੍ਤ ਦਸ੍ਸਨਂ. ਯਾਵ ਤਂ ਗੋਤ੍ਤਂ ਛੇਦਂ ਪਾਪੁਣਾਤਿ, ਤਾਵ ਅਭਿਭੁਯ੍ਯਤਿ, ਮਦ੍ਦੀਯਤੀਤਿ ਵੁਤ੍ਤਂ ਹੋਤਿ. ਗੋਤ੍ਤਂ ਅਭਿਭਵਤੀਤਿ ਗੋਤ੍ਰਭੂਤਿਪਿ ਯੁਜ੍ਜਤਿ. ‘‘ਪਞ੍ਚਮਂ’’ਤਿ ਪਞ੍ਚਮੇ ਚਿਤ੍ਤਵਾਰੇ. ‘‘ਤਦਾਹਿ ਜਵਨਂ ਪਤਿਤਂ ਨਾਮ ਹੋਤੀ’’ਤਿ ਪਕਤਿਯਾ ਜਵਨਪ੍ਪਵਤ੍ਤਿਨਾਮ ਸਤ੍ਤਕ੍ਖਤ੍ਤੁ ਪਰਮੋ ਹੋਤਿ. ਚਤੁਤ੍ਥਞ੍ਚ ਮੁਦ੍ਧਪਤ੍ਤਂ. ਪਞ੍ਚਮਤੋ ਪਟ੍ਠਾਯ ਪਤਿਤਂ. ਤਸ੍ਮਾ ਤਸ੍ਮਿਂ ਪਞ੍ਚਮਵਾਰੇ ਜਵਨਂ ਪਤਿਤਂ ਨਾਮ ਹੋਤਿ. ‘‘ਦੁਤੀਯੇਨਾ’’ਤਿ ਦੁਤੀਯੇਨ ਏਵ ਸਦ੍ਦੇਨ. ‘‘ਦੁਤੀਯਂ’’ਤਿ ਦੁਤੀਯੇ ਚਿਤ੍ਤਵਾਰੇ. ਤਦਾ ਅਨੁਲੋਮਂ ਪਥਮਜਵਨਂ ਹੋਤੀਤਿ ਵੁਤ੍ਤਂ ‘‘ਅਲਦ੍ਧਾ ਸੇਵਨਂ ਅਨੁਲੋਮ’’ਨ੍ਤਿ. ‘‘ਏਤੇਨੇਵਾ’’ਤਿ ਏਤੇਨ ਏਵ ਸਦ੍ਦ ਦ੍ਵਯੇ ਨੇਵ. ਅਟ੍ਠਸਾਲਿਨਿਯਂ ਪਨ ਅਨੁਞ੍ਞਾਤਾ ਵਿਯ ਦਿਸ੍ਸਤਿ. ਵੁਤ੍ਤਞ੍ਹਿ ਤਤ੍ਥ. ਮਨ੍ਦਪਞ੍ਞਸ੍ਸ ਚਤ੍ਤਾਰਿ ਅਨੁਲੋਮਾਨਿ ਹੋਨ੍ਤਿ, ਪਞ੍ਚਮਂ ਗੋਤ੍ਰਭੁ, ਛਟ੍ਠਂ ਮਗ੍ਗਚਿਤ੍ਤਂ, ਸਤ੍ਤਮਂ ਫਲਨ੍ਤਿ. ‘‘ਇਤਰਟ੍ਠਕਥਾਸੂ’’ਤਿ ਵਿਨਯਟ੍ਠ ਕਥਾਦੀਸੁ. ‘‘ਪਟਿਸਿਦ੍ਧਤ੍ਤਾ’’ਤਿ ਪਞ੍ਚਮਂ ਗੋਤ੍ਰ ਭੁਪ੍ਪਵਤ੍ਤਿਯਾ ਪਟਿਸਿਦ੍ਧਤ੍ਤਾ ਆਦਿਮ੍ਹਿ ਅਟ੍ਠਨ੍ਨਂ ਅਞ੍ਞਤ੍ਰਸ੍ਮਿਂਤਿ ਵੁਤ੍ਤਤ੍ਤਾ ਇਧ ਨਿਰੁਦ੍ਧੇਤਿ ਪਦਂ ਅਵਸ੍ਸਂ ਇਚ੍ਛਿਤਬ੍ਬਮੇਵਾਤਿ ਵੁਤ੍ਤਂ ‘‘ਨਿਰੁਦ੍ਧੇ ਅਨਨ੍ਤਰਮੇਵਾਤਿ ਪਦਚ੍ਛੇਦੋ’’ਤਿ. ਅਨਨ੍ਤਰ ਸਦ੍ਦਸ੍ਸ ਚ ਨਿਚ੍ਚਂ ਸਮ੍ਬਨ੍ਧਾਪੇਕ੍ਖਤ੍ਤਾ ਤਮੇਵਪਦਂ ਵਿਭਤ੍ਤਿ ਪਰਿਣਾਮੇਨ ਅਧਿਕਤਨ੍ਤਿ ਆਹ ‘‘ਨਿਰੁਦ੍ਧਸ੍ਸਾਤਿ ਅਤ੍ਥਤੋ ਲਦ੍ਧਮੇਵਾ’’ਤਿ. ‘‘ਵਸਿਭੂਤਾਪੀ’’ਤਿ ਵਸਿਭੂਤਾਪਿ ਸਮਾਨਾ. ‘‘ਏਕਵਾਰਂ ਜਵਿਤ੍ਵਾ’’ਤਿ ਇਦਂ ਲੋਕਿਯਪ੍ਪਨਾਵਸੇਨ ਵੁਤ੍ਤਂ. ਲੋਕੁਤ੍ਤਰ ਅਪ੍ਪਨਾਪਨ ਸਤ੍ਤਮਮ੍ਪਿ ਉਪ੍ਪਜ੍ਜਤਿਯੇਵ. ਮੂਲਟੀਕਾ ਪਾਠੇ ‘‘ਭੂਮਨ੍ਤਰਪਤ੍ਤਿਯਾ’’ਤਿ ਗੋਤ੍ਰਭੁ ਚਿਤ੍ਤਂ ਕਾਮਭੂਮਿ ਹੋਤਿ. ਅਪ੍ਪਨਾਪਨ ਮਹਗ੍ਗਤਭੂਮਿ ਵਾ ਲੋਕੁਤ੍ਤਰਭੂਮਿ ਵਾ ਹੋਤਿ. ਏਵਂ ਭੂਮਨ੍ਤਰਪਤ੍ਤਿਯਾ. ‘‘ਆਰਮ੍ਮਣਨ੍ਤਰ ਲਦ੍ਧਿਯਾ’’ਤਿ ਫਲਸਮਾਪਤ੍ਤਿ ਵੀਥਿਯਂ ਫਲਜਵਨਂ ਸਨ੍ਧਾਯ ਵੁਤ੍ਤਂ. ਤਤ੍ਥਹਿ ਪੁਰਿਮਾਨਿ ਅਨੁਲੋਮ ਜਵਨਾਨਿ ਸਙ੍ਖਾਰਾ ਰਮ੍ਮਣਾਨਿ ਹੋਨ੍ਤਿ. ਫਲਜਵਨਂ ਨਿਬ੍ਬਾਨਾਰਮ੍ਮਣਂ. ਇਦਞ੍ਚ ਕਾਰਣਮਤ੍ਤਮੇਵ. ਯਥਾਵੁਤ੍ਤ ਲੇਡ੍ਡੁਪਮਾ ਏਵ ਇਧ ਯੁਤ੍ਤਰੂਪਾਤਿ ਦਟ੍ਠਬ੍ਬਂ. ‘‘ਨ ਖੋ ਪਨੇਤਂ ਏਵਂ ਦਟ੍ਠਬ੍ਬ’’ਨ੍ਤਿ ਏਤਂ ਅਤ੍ਥਜਾਤਂ ਨ ਖੋ ਏਵਂ ਦਟ੍ਠਬ੍ਬਂ. ‘‘ਅਨਦ੍ਧਨੀਯਾ’’ਤਿ ਅਦ੍ਧਾਨਂ ਦੀਘਕਾਲਂ ਨਖ ਮਨ੍ਤੀਤਿ ਅਨਦ੍ਧਨੀਯਾ. ਅਸਾਰਾ. ਅਸਾਰਤ੍ਤਾ ਏਵ ਸੀਘਤਰਂ ਰੁਹਨ੍ਤਿ. ਸੀਘਤਰਂ ਵੁਦ੍ਧਿਂ ਵਿਰੁਲ਼੍ਹਿਂ ਆਪਜ੍ਜਨ੍ਤਿ. ਸਾਰਵਨ੍ਤਾ ਪਨ ਸਾਰੇਨ ਸਹ ਵਡ੍ਢਮਾਨਤ੍ਤਾ ਸੀਘਤਰਂ ਨਰੁਹਨ੍ਤਿ. ਸੀਘਤਰਂ ਵੁਦ੍ਧਿਂ ਵਿਰੁਲ਼੍ਹਿਂ ਨਾ ਪਜ੍ਜਨ੍ਤਿ. ਤੇਨਾਹ ‘‘ਏਕਵਸ੍ਸਜੀਵਿਨੋ’’ਤਿਆਦਿਂ. ‘‘ਏਵਮੇਵਾ’’ਤਿਆਦੀਸੁ ‘‘ਪਤਿਤਜਵਨੇਸੂ’’ਤਿ ਪਞ੍ਚਮ ਛਟ੍ਠ ਸਤ੍ਤਮ ਜਵਨੇਸੁ. ‘‘ਏਤ੍ਥ ਚਾ’’ਤਿਆਦੀਸੁ. ‘‘ਸੁਪਕ੍ਕਸਾਲਿਭਤ੍ਤ ਸਦਿਸਾਨੀ’’ਤਿ ਯਥਾ ਸਾਲਿਭਤ੍ਤਾਨਿ ਸੁਪਕ੍ਕਤ੍ਤਾ ਏਵ ਮੁਦੁਤਰਾਨਿ ਹੁਤ੍ਵਾ ਦੁਬ੍ਬਲਾਨਿ ਅਚਿਰਟ੍ਠਿਤਿਕਾਨਿ. ਤਸ੍ਮਿਂ ਦਿਵਸੇਪਿ ਪੂਤਿਭਾਵਂ ਗਚ੍ਛਨ੍ਤਿ. ਏਵਂ ਅਪ੍ਪਨਾ ਜਵਨਾਨਿ. ‘‘ਯਸ੍ਮਾ ਚਾ’’ਤਿਆਦੀਸੁ. ‘‘ਦੁਵਿਧਸ੍ਸ ਨਿਯਮਸ੍ਸਾ’’ਤਿ ਜਵਨਨਿਯਮਸ੍ਸ ਚ ਕਾਲਨਿਯਮਸ੍ਸ ਚ. ‘‘ਪਟਿਸਨ੍ਧਿਯਾ ਅਨਨ੍ਤਰ ਪਚ੍ਚਯ ਭਾਵਿਨੋ’’ਤਿ ਸਤ੍ਤਮ ਜਵਨ ਚੇਤਨਾ ਅਨਨ੍ਤਰ ਪਚ੍ਚਯੋ, ਤਦਨਨ੍ਤਰੇ ਪਵਤ੍ਤਂ ਵਿਪਾਕ ਸਨ੍ਤਾਨਂ ਪਚ੍ਚਯੁਪ੍ਪਨ੍ਨੋ, ਤਮੇਵ ਚ ਅਵਸਾਨੇ ਚੁਤਿ ਚਿਤ੍ਤਂ ਹੁਤ੍ਵਾ ਭਵਨ੍ਤਰੇ ਪਟਿਸਨ੍ਧਿ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯੋ. ਏਵਂ ਪਟਿਸਨ੍ਧਿ ਚਿਤ੍ਤਸ੍ਸ ਅਨਨ੍ਤਰ ਪਚ੍ਚਯ ਭਾਵੇਨ ਅਵਸ੍ਸਂ ਭਵਿਸ੍ਸਮਾਨਸ੍ਸਾਤਿ ਅਤ੍ਥੋ. ਇਦਞ੍ਚ ਕਾਰਣ ਮਤ੍ਤਮੇਵ. ਮਹਾਟੀਕਾਵਚਨਂ ਪਨ ਕਿਞ੍ਚਿ ਵਤ੍ਤਬ੍ਬ ਰੂਪਨ੍ਤਿ ਨ ਪਟਿਕ੍ਖਿਤ੍ਤਂ. ‘‘ਨਿਰਨ੍ਤਰਪ੍ਪਵਤ੍ਤਾਨਂ’’ਤਿ ਆਦੀਸੁ. ਭਿਨ੍ਨਾ ਅਸਦਿਸਾ ਵੇਦਨਾ ਯੇਸਂ ਤਾਨਿ ਭਿਨ੍ਨਵੇਦਨਾਨਿ. ‘‘ਆਸੇਵਨ ਪਚ੍ਚਨੀਕਾਨਂ’’ਤਿ ਆਸੇਵਨ ਪਚ੍ਚਯਪ੍ਪਟਿ ਪਕ੍ਖਾਨਂ. ਅਭਿਨ੍ਨਾ ਵੇਦਨਾ ਯੇਸਨ੍ਤਿ ਵਿਗ੍ਗਹੋ. ਕ੍ਰਿਯਜਵਨਾਨਨ੍ਤਰਂ ਅਰਹਤ੍ਤਫਲਂ ਫਲਸਮਾਪਤ੍ਤਿ ਵੀਥਿਯਂ ਦਟ੍ਠਬ੍ਬਂ. ਸੇਸਮੇਤ੍ਥਸੁਵਿਞ੍ਞੇਯ੍ਯਂ.

੧੩੯. ‘‘ਸਬ੍ਬਥਾ ਪੀ’’ਤਿਆਦੀਸੁ. ਲੋਕੇ ਮਜ੍ਝਿਮਕੇ ਹਿ ਮਹਾਜਨੇਹਿ ਇਚ੍ਛਿਤਮ੍ਪਿ ਕਿਞ੍ਚਿ ਆਰਮ੍ਮਣਂ ਅਤਿਉਕ੍ਕਟ੍ਠੇਹਿ ਮਨ੍ਧਾਤੁ ਰਾਜਾਦੀਹਿ ਇਚ੍ਛਿਤਂ ਨ ਹੋਤਿ. ਤਥਾ ਤੇਹਿ ਮਹਾਜਨੇਹਿ ਅਨਿਚ੍ਛਿਤਮ੍ਪਿ ਕਿਞ੍ਚਿ ਆਰਮ੍ਮਣਂ ਅਤਿਦੁਗ੍ਗਤੇਹਿ ਪਚ੍ਚਨ੍ਤ ਵਾਸੀਹਿ ਇਚ੍ਛਿਤਂ ਹੋਤਿ. ਤਸ੍ਮਾ ਆਰਮ੍ਮਣਾਨਂ ਇਟ੍ਠਾਨਿਟ੍ਠ ਵਵਤ੍ਥਾਨਂ ਪਤ੍ਵਾ ਅਤਿਉਕ੍ਕਟ੍ਠੇਹਿ ਚ ਅਤਿਦੁਗ੍ਗਤੇਹਿ ਚ ਵਵਤ੍ਥਾਨਂ ਨ ਗਚ੍ਛਤਿ, ਮਜ੍ਝਿਮਕੇਹਿ ਏਵ ਵਵਤ੍ਥਾਨਂ ਗਚ੍ਛਤਿ. ਤੇਨਾਹ ‘‘ਤਤ੍ਥ ਚਾ’’ਤਿਆਦਿਂ. ‘‘ਆਰਮ੍ਮਣਂ’’ਤਿ ਕਤ੍ਤੁਪਦਂ. ‘‘ਵਿਪਾਕਚਿਤ੍ਤਂ’’ਤਿ ਕਮ੍ਮਪਦਂ. ‘‘ਕਿਞ੍ਚੀ’’ਤਿ ਕਿਞ੍ਚਿ ਰੂਪਂ. ‘‘ਕਿਸ੍ਮਿਞ੍ਚੀ’’ਤਿ ਕਸ੍ਮਿਂਚਿ ਏਕਸ੍ਮਿਂ ਪੁਪ੍ਫੇ. ‘‘ਤੇਨ ਵਾ’’ਤਿ ਤੇਨ ਵਾ ਸੁਖਸਮ੍ਫਸ੍ਸੇਨ ਵਤ੍ਥੇਨ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

‘‘ਵੇਦਨਾਨਿਯਮੋਪਨਾ’’ਤਿਆਦੀਸੁ. ‘‘ਆਦਾਸੇ ਮੁਖਨਿਮਿਤ੍ਤਸ੍ਸ ਵਿਯਾ’’ਤਿ ਯਥਾ ਆਦਾਸੇ ਮੁਖ ਨਿਮਿਤ੍ਤਸ੍ਸ ਚਲਨ ਚਵਨਾਦਿਯੋਗੋ ਨਾਨਾਵਣ੍ਣਯੋਗੋ ਚ ਯਥਾਮੁਖਮੇਵ ਸਿਦ੍ਧੋ. ਤਥਾ ਵਿਪਾਕਾਨਂ. ਵੇਦਨਾ ਯੋਗੋ ਪਨ ਯਥਾਰਮ੍ਮਣਮੇਵ ਸਿਦ੍ਧੋਤਿ ਯੋਜਨਾ. ਤਤ੍ਥ ‘‘ਵੇਦਨਾਯੋਗੋ’’ਤਿ ਨਾਨਾਵੇਦਨਾਯੋਗੋ. ‘‘ਕਪ੍ਪੇਤ੍ਵਾ’’ਤਿ ਚਿਨ੍ਤੇਤ੍ਵਾ. ‘‘ਪਕਪ੍ਪੇਤ੍ਵਾ’’ਤਿ ਨਾਨਪ੍ਪਕਾਰਤੋ ਚਿਨ੍ਤੇਤ੍ਵਾ. ਨ ਕੇਵਲਞ੍ਚ ਵਿਪਾਕਾਨਂ ਏਵ ਯਥਾਰਮ੍ਮਣਂ ਵੇਦਨਾ ਯੋਗੋ ਹੋਤੀਤਿ ਯੋਜਨਾ.

‘‘ਅਯਞ੍ਚਾ’’ਤਿਆਦੀਸੁ. ‘‘ਅਟ੍ਠਕਥਾਯਂ ਪੀ’’ਤਿ ਪਟ੍ਠਾਨ ਅਟ੍ਠਕਥਾਯਮ੍ਪਿ. ‘‘ਤਦਾਰਮ੍ਮਣ ਵਸੇਨਾ’’ਤਿ ਤਦਾਰਮ੍ਮਣਵਸੇਨ ਪਵਤ੍ਤਾਨਨ੍ਤਿ ਪਾਠਸੇਸੋ. ‘‘ਪਞ੍ਚਨ੍ਨਂ’’ਤਿ ਸੋਮਨਸ੍ਸ ਸਨ੍ਤੀਰਣੇਨ ਸਦ੍ਧਿਂ ਚਤ੍ਤਾਰਿ ਮਹਾਵਿਪਾਕ ਸੋਮਨਸ੍ਸਾਨਿ ਸਨ੍ਧਾਯ ਵੁਤ੍ਤਂ. ‘‘ਪਕਤਿ ਨੀਹਾਰੇਨਾ’’ਤਿ ਪਕਤਿਯਾ ਨਿਚ੍ਚਕਾਲਂ ਪਵਤ੍ਤਪ੍ਪਕਾਰੇਨ. ਪਾਲ਼ਿਪਾਠੇ. ਭਾਵਿਤਾਨਿ ਇਨ੍ਦ੍ਰਿਯਾਨਿ ਯੇਨਾਤਿ ਭਾਵਿਤਿਨ੍ਦ੍ਰਿਯੋ. ‘‘ਮਨਾਪਂ’’ਤਿ ਮਨੋਰਮ੍ਮਂ. ‘‘ਅਮਨਾਪਂ’’ਤਿ ਅਮਨੋਰਮ੍ਮਂ. ਵਿਹਰੇਯ੍ਯਨ੍ਤਿ ਸਚੇ ਕਙ੍ਖਤੀਤਿ ਸਮ੍ਬਨ੍ਧੋ. ‘‘ਪਟਿਕੂਲੇ’’ਤਿ ਅਮਨਾਪੇ. ‘‘ਅਪ੍ਪਟਿਕੂਲ ਸਞ੍ਞੀ’’ਤਿ ਮਨਾਪਸਞ੍ਞੀ. ਏਵਂ ਸੇਸੇਸੁ. ‘‘ਤੇਸਂ’’ਤਿ ਖੀਣਾਸਵਾਨਂ. ਪਾਲ਼ਿਪਾਠੇ. ‘‘ਸੁਮਨੋ’’ਤਿ ਸੋਮਨਸ੍ਸਿਤੋ. ‘‘ਦੁਮ੍ਮਨੋ’’ਤਿ ਦੋਮਨਸ੍ਸਿਤੋ. ਪਾਲ਼ਿਪਾਠੇ. ‘‘ਮੇਤ੍ਤਾਯਵਾ ਫਰਤੀ’’ਤਿ ਅਯਂ ਸਤ੍ਤੋ ਅਵੇਰੋਹੋਤੂਤਿਆਦਿਨਾ ਮੇਤ੍ਤਾਚਿਤ੍ਤੇਨ ਵਾ ਫਰਤਿ. ‘‘ਧਾਤੁਸੋ ਉਪਸਂਹਰਤੀ’’ਤਿ ਯਥਾ ਮ ਮ ਕਾਯੋਪਿ ਚਤੁਧਾਤੁ ਸਮੁਸ੍ਸਯੋ ਹੋਤਿ. ਤਤ੍ਥ ਏਕਾਪਿ ਧਾਤੁ ਨਾਮ ਪਟਿਕੂਲਾ ਵਾ ਅਪ੍ਪਟਿਕੂਲਾ ਵਾ ਨ ਹੋਤਿ. ਕੇਵਲਂ ਤੁਚ੍ਛ ਸੁਞ੍ਞ ਸਭਾਵਮਤ੍ਤਾ ਹੋਤਿ. ਏਵਮੇਵ ਇਮਸ੍ਸ ਸਤ੍ਤਸ੍ਸ ਕਾਯੋਪੀਤਿਆਦਿਨਾ ਧਾਤੁ ਸੋ ਉਪਸਂਹਰਤਿ. ‘‘ਅਸੁਭਾਯ ਵਾ’’ਤਿ ਅਸੁਭ ਭਾਵਨਾਯ ਵਾ. ਅਸੁਭ ਭਾਵਨਾ ਚਿਤ੍ਤੇਨ ਵਾਤਿ ਵੁਤ੍ਤਂ ਹੋਤਿ. ‘‘ਅਸੁਭਾਯਾ’’ਤਿ ਵਾ ਤਸ੍ਸ ਅਸੁਭਭਾਵਤ੍ਥਾਯ. ਦੇਵਨਾਟਕਾ ਦੇਵਚ੍ਛਰਾ ਨਾਮ. ਕੁਥਿਤਾਨਿ ਕੁਟ੍ਠਾਨਿ ਯੇਸਂ ਤਾਨਿ ਕੁਥਿਤ ਕੁਟ੍ਠਾਨਿ. ‘‘ਸਰੀਰਾਨੀ’’ਤਿ ਕਾਯਙ੍ਗਾਨਿ. ਕੁਥਿਤ ਕੁਟ੍ਠਾਨਿ ਸਰੀਰਾਨਿ ਯਸ੍ਸ ਸੋ ਕੁਥਿਤਕੁਟ੍ਠਸਰੀਰੋ. ‘‘ਕੁਥਿਤਾਨੀ’’ਤਿ ਅਬ੍ਭੁਕ੍ਕਿਰਣਾਨਿ. ਵੇਦਨਾ ਯੁਤ੍ਤਾਨਿ ਹੋਨ੍ਤਿ ਇਤਿ ਅਪਰੇ ਵਦਨ੍ਤੀਤਿ ਯੋਜਨਾ. ਤਸ੍ਮਾ ਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਕਥਂ ਪਚ੍ਚਯੋ ਹੋਤੀਤਿ ਆਹ ‘‘ਯਥਾ ਆਨਿਸਂਸ ਦਸ੍ਸਨੇਨਾ’’ਤਿਆਦਿਂ. ਤਤ੍ਥ ‘‘ਅਟ੍ਠਕਥਾਯਂ’’ਤਿ ਵਿਸੁਦ੍ਧਿ ਮਗ੍ਗਟ੍ਠਕਥਾਯਂ. ‘‘ਬੁਦ੍ਧਸੁਬੁਦ੍ਧਤਾ ਦਸ੍ਸਨੇਨਾ’’ਤਿ ਅਤ੍ਤਨੋ ਸਤ੍ਥੁਭੂਤਸ੍ਸ ਬੁਦ੍ਧਸ੍ਸ ਸੁਬੁਦ੍ਧਤਾ ਦਸ੍ਸਨੇਨ. ‘‘ਅਤ੍ਤਸਮ੍ਪਤ੍ਤਿ ਦਸ੍ਸਨੇਨਾ’’ਤਿ ਮਯਂ ਪਨ ਏਵਰੂਪਾ ਦੁਕ੍ਖਾ ਮੁਤ੍ਤਾਮ੍ਹਾਤਿ ਏਵਂ ਅਤ੍ਤਨੋ ਸਮ੍ਪਤ੍ਤਿ ਦਸ੍ਸਨੇਨ. ‘‘ਅਟ੍ਠਿਕਙ੍ਕਲਿਕਪੇਤਰੂਪੇ’’ਤਿ ਨਿਮ੍ਮਂ ਸਲੋਹਿਤੇ ਅਟ੍ਠਿਪੁਞ੍ਜਪੇਤਸਰੀਰੇ. ‘‘ਕੁਟ੍ਠਿਨੋ’’ਤਿ ਕੁਟ੍ਠਸਰੀਰਸ੍ਸ. ‘‘ਅਟ੍ਠਕਥਾਯਂ’’ਤਿ ਧਮ੍ਮਪਦ ਅਟ੍ਠਕਥਾਯਂ. ਅਤਿ ਇਟ੍ਠੇ ਦੇਵਚ੍ਛਰ ਵਣ੍ਣਾਦਿਕੇ. ਅਤਿ ਅਨਿਟ੍ਠੇ ਕੁਥਿਤਕੁਟ੍ਠਸਰੀਰਾਦਿਕੇ. ‘‘ਵਤ੍ਥੁ ਭੂਤੋ’’ਤਿ ਉਪ੍ਪਤ੍ਤਿਟ੍ਠਾਨ ਭੂਤੋ. ‘‘ਤੇਸਂ ਤੇਸਂ ਸਤ੍ਤਾਨਂ’’ਤਿ ਕਤ੍ਤੁ ਅਤ੍ਥੇਸਾਮਿਵਚਨਂ. ‘‘ਤਦੁਭਯਂ ਪੀ’’ਤਿ ਉਭਯਂ ਤਂ ਗਹਣਂਪਿ. ‘‘ਤੇਸਂ’’ਤਿ ਤੇਸਂ ਲੋਕਿਯ ਮਹਾਜਨਾਨਂ. ‘‘ਵਿਪਲ੍ਲਾਸਵਸੇਨੇਵ ਹੋਤੀ’’ਤਿ ਦੇਵਚ੍ਛਰਵਣ੍ਣਾਦੀਸੁ ਅਤਿਇਟ੍ਠੇਸੁ ਅਤਿਇਟ੍ਠਾਕਾਰਤੋ ਗਹਣਮ੍ਪਿ ਵਿਪਲ੍ਲਾਸ ਵਸੇਨੇਵ ਹੋਤਿ. ਕਸ੍ਮਾ, ਦੇਵਚ੍ਛਰ ਵਣ੍ਣਾਦੀਸੁ ਅਤਿ ਇਟ੍ਠ ਸਞ੍ਞਾਯ ਵਿਪਲ੍ਲਾਸ ਸਞ੍ਞਾਭਾਵਤੋ.

ਵਿਭਾਵਨਿਪਾਠੇ. ‘‘ਪਵਤ੍ਤਿਯਾ’’ਤਿ ਪਵਤ੍ਤਨਤੋ. ਅਟ੍ਠਕਥਾਧਿਪ੍ਪਾਯੇ ਠਤ੍ਵਾ ਵੁਤ੍ਤਤ੍ਤਾ ਅਟ੍ਠਕਥਾਗਾਰਵੇਨ’’ਤਂ ਵਿਚਾਰੇਤਬ੍ਬ ਮੇਵਾ’’ਤਿ ਵੁਤ੍ਤਂ. ਅਤ੍ਥਤੋ ਪਨ ਅਯੁਤ੍ਤਮੇਵਾਤਿ ਵੁਤ੍ਤਂ ਹੋਤਿ. ਏਸਨਯੋ ਅਞ੍ਞਤ੍ਥਪਿ. ‘‘ਧਮ੍ਮ ਚਕ੍ਖੁਰਹਿਤਾ’’ਤਿ ਧਮ੍ਮ ਵਵਤ੍ਥਾਨਞ੍ਞਾਣ ਚਕ੍ਖੁ ਰਹਿਤਾ. ‘‘ਕੁਸਲਾਕੁਸਲਾਨਿ ਯੇਵਾ’’ਤਿ ਤੇਸਂ ਧਮ੍ਮ ਚਕ੍ਖੁ ਰਹਿਤਾਨਂ ਉਪ੍ਪਨ੍ਨਾਨਿ ਕੁਸਲਾਕੁਸਲਾਨਿਯੇਵ. ਗਾਥਾਯਂ. ‘‘ਰੂਪਾ’’ਤਿ ਰੂਪਤੋ ਨਪ੍ਪਵੇਧਨ੍ਤੀਤਿ ਸਮ੍ਬਨ੍ਧੋ. ‘‘ਸਦ੍ਦਾ’’ਤਿਆਦੀਸੁਪਿ ਏਸੇਵਨਯੋ. ਨਪ੍ਪਵੇਧਨ੍ਤੀਤਿ ਚ ਨ ਚਲਨ੍ਤਿ, ਨ ਕਮ੍ਪਨ੍ਤਿ, ਚਿਤ੍ਤਞ੍ਞਥਤ੍ਤਂ ਨ ਗਚ੍ਛਨ੍ਤਿ. ਤਥਾ ਉਪੇਕ੍ਖਾ ਕ੍ਰਿਯਜਵਨਾਨਨ੍ਤਰਮ੍ਪਿ ਤਦਾਰਮ੍ਮਣਾਨਿ ਸੋਮਨਸ੍ਸੁ ਪੇਕ੍ਖਾਵੇਦਨਾ ਯੁਤ੍ਤਾਨਿ ਏਵ ਸਿਯੁਨ੍ਤਿ ਯੋਜਨਾ. ਮੂਲਟੀਕਾਪਾਠੇ. ‘‘ਤਦਾਰਮ੍ਮਣਤਾ’’ਤਿ ਤਦਾਰਮ੍ਮਣਤਾਯ ਤਦਾਰਮ੍ਮਣਭਾਵੇਨ. ‘‘ਕਤ੍ਥਚੀ’’ਤਿ ਕਤ੍ਥਚਿ ਅਭਿਧਮ੍ਮ ਪਾਲ਼ਿਯਂ. ‘‘ਵਿਜ੍ਜਮਾਨੇ ਚ ਤਸ੍ਮਿਂ’’ਤਿ ਤਸ੍ਮਿਂ ਕ੍ਰਿਯਜਵਨਾਨੁ ਬਨ੍ਧਕੇ ਤਦਾ ਰਮ੍ਮਣੇ ਵਿਜ੍ਜਮਾਨੇ ਸਤਿ. ਏਤਂ ਭਵਙ੍ਗਞ੍ਚ ਨਾਮ ਅਨੁਬਨ੍ਧਤੀਤਿ ਸਮ੍ਬਨ੍ਧੋ. ਨਦੀਸੋਤੋ ਪਟਿਸੋਤਗਾਮਿਨਾਵਂ ਅਨੁਬਨ੍ਧਤਿ ਵਿਯਾਤਿ ਯੋਜਨਾ. ‘‘ਸਵਿਪ੍ਫਾਰਿਕਂ ਏਵਜਵਨਂ’’ਤਿ ਕਿਲੇਸ ਧਮ੍ਮਾਨਂ ਵਿਪਲ੍ਲਾਸ ਧਮ੍ਮਾਨਞ੍ਚ ਵਸੇਨ ਖਣਮਤ੍ਤੇਪਿ ਅਨੇਕਸਤੇਸੁ ਆਰਮ੍ਮਣੇਸੁ ਵਿਵਿਧਾਕਾਰੇਨ ਫਰਣਵੇਗਸਹਿਤਂ ਕੁਸਲਾਕੁਸਲ ਜਵਨਮੇਵ ਅਨੁਬਨ੍ਧਤੀਤਿ ਯੁਤ੍ਤਂ. ਨ ਪਨ ਕ੍ਰਿਯਜਵਨਂ ਅਨੁਬਨ੍ਧਤੀਤਿ ਯੁਤ੍ਤਨ੍ਤਿ ਯੋਜਨਾ. ‘‘ਛਲ਼ਙ੍ਗੁ ਪੇਕ੍ਖਾਵਤੋ’’ਤਿ ਚਕ੍ਖੁਨਾ ਰੂਪਂ ਦਿਸ੍ਵਾ ਨੇਵ ਸੁਮਨੋ ਹੋਤਿ, ਨ ਦੁਮ੍ਮਨੋ, ਉਪੇਕ੍ਖਕੋ ਵਿਹਰਤੀ-ਤਿਆਦਿਨਾ ਵੁਤ੍ਤਾਯ ਛ ਦ੍ਵਾਰਿਕਵਸੇਨ ਛਲ਼ਙ੍ਗ ਸਮਨ੍ਨਾਗਤਾਯ ਉਪੇਕ੍ਖਾਯ ਸਮ੍ਪਨ੍ਨਸ੍ਸ. ਵਤ੍ਤਨਂ ਵੁਤ੍ਤਿ. ਸਨ੍ਤਾ ਵੁਤ੍ਤਿ ਅਸ੍ਸਾਤਿ ਸਨ੍ਤ ਵੁਤ੍ਤਿ. ਤਂ ਵਿਚਾਰੇਨ੍ਤੋ ‘‘ਪਟ੍ਠਾਨੇ ਪਨਾ’’ਤਿਆਦਿਮਾਹ. ‘‘ਯਦਿ ਚੇਤਂ ਵੁਚ੍ਚੇਯ੍ਯਾ’’ਤਿ ਏਤ੍ਥ ‘‘ਏਤਂ’’ਤਿ ਕ੍ਰਿਯਾ ਬ੍ਯਾਕਤੇਤਿਆਦਿਕਂ ਏਤਂ ਵਚਨਂ. ‘‘ਤਸ੍ਮਿਂ’’ਤਿ ਤਸ੍ਮਿਂ ਵਚਨੇ. ‘‘ਏਵਮਾਦਿਨਾ’’ਤਿ ਏਵਮਾਦਿਨਾ ਨਯੇਨ. ਵਿਭਾਵਨਿਪਾਠੇ. ‘‘ਉਤ੍ਤਰਂ’’ਤਿ ਪਰਿਹਾਰਂ. ‘‘ਵਿਪਸ੍ਸਨਾਚਾਰ ਵਸੇਨਾ’’ਤਿ ਵਿਪਸ੍ਸਨਾ ਪਵਤ੍ਤਿ ਵਸੇਨ. ‘‘ਤੇਸਂ’’ਤਿ ਸੋਮਨਸ੍ਸ ਦੋਮਨਸ੍ਸਾਨਂ. ‘‘ਇਤਰੀਤਰਾਨਨ੍ਤਰ ਪਚ੍ਚਯਤਾ’’ਤਿ ਅਞ੍ਞਮਞ੍ਞਾਨਨ੍ਤਰ ਪਚ੍ਚਯਤਾਤਿ ਅਤ੍ਥੋ. ‘‘ਥੇਰੇਨਾ’’ਤਿ ਅਨੁਰੁਦ੍ਧਤ੍ਥੇਰੇਨ. ਸਬ੍ਬਾਨਿ ਤਦਾ ਰਮ੍ਮਣਾਨਿ, ਸਬ੍ਬਾਨਿ ਭਵਙ੍ਗਾਨਿ ਚ. ‘‘ਸਮੁਦਾ ਚਰਨ੍ਤੀ’’ਤਿ ਚਿਰਕਾਲਂ ਸਞ੍ਚਰਨ੍ਤਿ. ‘‘ਏਤਾਨਿਹੀ’’ਤਿਆਦਿਨਾ ਤੇਸਂ ਅਟ੍ਠਾਰਸਨ੍ਨਂ ਜਵਨਾਨਂ ਅਨਨ੍ਤਰਂ ਤਦਾਰਮ੍ਮਣਾਨਂ ਅਨਿਯਮਤੋ ਪਵਤ੍ਤਿਯਾ ਕਾਰਣਯੁਤ੍ਤਿਂ ਦਸ੍ਸੇਤਿ. ਸਮ੍ਭਵਤਿ ਉਪ੍ਪਜ੍ਜਤਿ ਏਤੇਨਾਤਿ ਸਮ੍ਭਵੋ. ਤਦਾ ਰਮ੍ਮਣਸ੍ਸ ਸਮ੍ਭਵੋ ਤਦਾ ਰਮ੍ਮਣ ਸਮ੍ਭਵੋ. ਅਥਵਾ, ਸਮ੍ਭਵਨਂ ਉਪ੍ਪਜ੍ਜਨਂ ਸਮ੍ਭਵੋਤਿ ਇਮੇ ਦ੍ਵੇ ਅਤ੍ਥੇ ਦਸ੍ਸੇਤੁਂ ‘‘ਤਦਾ ਰਮ੍ਮਣ ਸਮ੍ਭਵੋ’’ਤਿਆਦਿ ਵੁਤ੍ਤਂ. ‘‘ਯੇਸਂ ਪਨਾ’’ਤਿਆਦੀਸੁ. ‘‘ਯੇਸਂ’’ਤਿ ਯੇਸਂ ਪੁਗ੍ਗਲਾਨਂ. ‘‘ਇਤਰਾਨੀ’’ਤਿ ਉਪੇਕ੍ਖਾ ਸਨ੍ਤੀਰਣ ਦ੍ਵਯਤੋ ਅਞ੍ਞਾਨਿ. ‘‘ਨ ਹੋਨ੍ਤੀਤਿ ਨ ਵਤ੍ਤਬ੍ਬਾਨੀ’’ਤਿ ਵੁਤ੍ਤਂ. ਏਵਂਸਤਿ, ਕਸ੍ਮਾ ਥੇਰੇਨ ਇਧ ਨ ਵੁਤ੍ਤਾਨੀਤਿ. ਅਟ੍ਠਸਾਲਿਨਿਯਂ ਅਵੁਤ੍ਤਤ੍ਤਾ ਇਧ ਨ ਵੁਤ੍ਤਾਨੀਤਿ. ਅਟ੍ਠਸਾਲਿਨਿਯਂ ਪਨ ਕਸ੍ਮਾ ਨ ਵੁਤ੍ਤਾਨਿ. ਯੇਭੂਯ੍ਯ ਨਿਯਮਸੋਤੇ ਪਤਿਤਤ੍ਤਾ ਨ ਵੁਤ੍ਤਾਨਿ. ਨ ਪਨ ਅਲਬ੍ਭਮਾਨਤ੍ਤਾ ਨ ਵੁਤ੍ਤਾਨੀਤਿ ਇਮਮਤ੍ਥਂ ਦਸ੍ਸੇਨ੍ਤੋ ‘‘ਅਟ੍ਠਕਥਾਯਂ ਪਨਾ’’ਤਿਆਦਿਮਾਹ. ‘‘ਉਪੇਕ੍ਖਾਸਹਗਤ ਸਨ੍ਤੀਰਣ ਦ੍ਵਯਮੇਵ ਵੁਤ੍ਤਂ’’ਤਿ ਆਗਨ੍ਤੁਕ ਭਵਙ੍ਗਭਾਵੇਨ ਵੁਤ੍ਤਂ. ਯਥਾਹ ਅਥਸ੍ਸ ਯਦਾ ਸੋਮਨਸ੍ਸ ਸਹਗਤਪ੍ਪਟਿਸਨ੍ਧਿਕਸ੍ਸ ਪਵਤ੍ਤੇ ਝਾਨਂ ਨਿਬ੍ਬਤ੍ਤੇਤ੍ਵਾ ਪਮਾਦੇਨ ਪਰਿਹੀਨਜ੍ਝਾਨਸ੍ਸ ਪਣੀਤ ਧਮ੍ਮੋ ਮੇ ਨਟ੍ਠੋਤਿ ਪਚ੍ਚਵੇਕ੍ਖਤੋ ਵਿਪ੍ਪਟਿਸਾਰਿ ਵਸੇਨ ਦੋਮਨਸ੍ਸਂ ਉਪ੍ਪਜ੍ਜਤਿ, ਤਦਾ ਕਿਂ ਉਪ੍ਪਜ੍ਜਤਿ. ਸੋਮਨਸ੍ਸਾਨਨ੍ਤਰਞ੍ਹਿ ਦੋਮਨਸ੍ਸਂ, ਦੋਮਨਸ੍ਸਾਨਨ੍ਤਰਞ੍ਚ ਸੋਮਨਸ੍ਸਂ ਪਟ੍ਠਾਨੇ ਪਟਿਸਿਦ੍ਧਂ. ਮਹਗ੍ਗਤ ਧਮ੍ਮਂ ਆਰਬ੍ਭ ਜਵਨੇ ਜਵਿਤੇ ਤਦਾ ਰਮ੍ਮਣਮ੍ਪਿ ਤਤ੍ਥੇਵ ਪਟਿਸਿਦ੍ਧਨ੍ਤਿ. ਕੁਸਲ ਵਿਪਾਕਾਵਾ ਅਕੁਸਲਵਿਪਾਕਾਵਾ ਉਪੇਕ੍ਖਾ ਸਹਗਤਾ ਹੇਤੁਕਮਨੋਵਿਞ੍ਞਾਣ ਧਾਤੁ ਉਪ੍ਪਜ੍ਜਤਿ. ਕਿਮਸ੍ਸਾ ਰਮ੍ਮਣਨ੍ਤਿ. ਰੂਪਾਦੀਸੁ ਪਰਿਤ੍ਤ ਧਮ੍ਮੇਸੁ ਅਞ੍ਞਤਰਂ. ਏਤੇਸੁ ਹਿ ਯਦੇਵ ਤਸ੍ਮਿਂ ਸਮਯੇ ਆਪਾਤਮਾਗਤਂ ਹੋਤਿ. ਤਂ ਆਰਬ੍ਭ ਏਤਂ ਚਿਤ੍ਤਂ ਉਪ੍ਪਜ੍ਜਤੀਤਿ ਵੇਦਿਤਬ੍ਬਂ-ਤਿ. ਏਵਂ ਦੋਮਨਸ੍ਸਸਹਗਤ ਜਵਨਾਨੁਰੂਪਂ ਉਪੇਕ੍ਖਾਸਹਗਤ ਸਨ੍ਤੀਰਣ ਦ੍ਵਯਮੇਵ ਆਗਨ੍ਤੁਕ ਭਵਙ੍ਗਭਾਵੇਨ ਅਟ੍ਠਕਥਾਯਂ ਵੁਤ੍ਤਨ੍ਤਿ. ‘‘ਏਤਮ੍ਪਿ ਯੁਜ੍ਜਤਿ ਯੇਵਾ’’ਤਿ ਅਕੁਸਲ ਜਵਨਾਵਸਾਨੇ ਏਤਂ ਸਹੇਤੁਕਂ ਆਗਨ੍ਤੁਕ ਭਵਙ੍ਗਂਪਿ ਯੁਜ੍ਜਤਿਯੇਵ. ‘‘ਦੋਮਨਸ੍ਸ ਜਵਨਾਨਨ੍ਤਰਂ ਭਵਙ੍ਗ ਪਾਤੋਵ ਹੋਤੀ’’ਤਿ ਉਪੇਕ੍ਖਾ ਸਹਗਤ ਮੂਲਭਵਙ੍ਗ ਪਾਤੋਵ ਹੋਤਿ. ਆਗਨ੍ਤੁਕ ਭਵਙ੍ਗੇਨ ਕਿਚ੍ਚਂ ਨਤ੍ਥਿ. ਕਸ੍ਮਾ, ਉਪੇਕ੍ਖਾ ਪਟਿਸਨ੍ਧਿਕਤ੍ਤਾ. ਨੇਵਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਕਸ੍ਮਾ, ਤੇਸੁ ਆਰਮ੍ਮਣੇਸੁ ਤਦਾਰਮ੍ਮਣਵਾਰਸ੍ਸ ਅਸਮ੍ਭਵਤੋ. ਨ ਹਿ ਮਹਨ੍ਤਾਰਮ੍ਮਣੇਸੁ ਚ ਅਵਿਭੂਤਾਰਮ੍ਮਣੇਸੁ ਚ ਤਦਾਰਮ੍ਮਣਵਾਰੋ ਸਮ੍ਭਵਤਿ. ਨ ਚ ਮੂਲਭਵਙ੍ਗ ਸਮ੍ਭਵੋ ਅਤ੍ਥਿ. ਕਸ੍ਮਾ, ਮੂਲਭਵਙ੍ਗਭੂ ਤਸ੍ਸ ਸੋਮਨਸ੍ਸ ਭਵਙ੍ਗਸ੍ਸ ਦੋਮਨਸ੍ਸ ਜਵਨੇਨ ਸਹ ਵਿਰੁਦ੍ਧਤ੍ਤਾ. ‘‘ਇਤਿ ਕਤ੍ਵਾ’’ਤਿ ਇਮਿਨਾ ਕਾਰਣੇਨ. ‘‘ਏਕਂ’’ਤਿ ਏਕਂ ਉਪੇਕ੍ਖਾਸਹਗਤ ਵਿਪਾਕਂ. ਤਥਾ ਤਸ੍ਸੇਵ ਦੋਮਨਸ੍ਸਂ ਉਪ੍ਪਾਦੇਨ੍ਤਸ੍ਸ ਨੇਵ ਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਨ ਚ ਮੂਲਭਵਙ੍ਗ ਸਮ੍ਭਵੋਤਿ ਕਤ੍ਵਾ ਦੋਮਨਸ੍ਸਾਨਨ੍ਤਰਂ ਛਸੁ…ਪੇ… ਪਵਤ੍ਤਤੀਤਿ ਯੋਜਨਾ. ਤਤ੍ਥ ‘‘ਤਸ੍ਸੇਵਾ’’ਤਿ ਸੋਮਨਸ੍ਸਪ੍ਪਟਿਸਨ੍ਧਿਕਸ੍ਸੇਵ. ਨੇਵਤਦਾਰਮ੍ਮਣ ਸਮ੍ਭਵੋ ਅਤ੍ਥਿ. ਕਸ੍ਮਾ, ਆਰਮ੍ਮਣਾਨਂ ਅਤਿਮਹਨ੍ਤਤ੍ਤੇਪਿ ਅਤਿਵਿਭੂਤਤ੍ਤੇਪਿ ਸਤਿ ਸੋਮਨਸ੍ਸ ਤਦਾਰਮ੍ਮਣਸ੍ਸ ਜਵਨੇਨ ਸਹ ਵਿਰੁਦ੍ਧਤ੍ਤਾ. ਉਪੇਕ੍ਖਾ ਤਦਾ ਰਮ੍ਮਣਸ੍ਸ ਚ ਆਰਮ੍ਮਣੇਨ ਸਹ ਵਿਰੁਦ੍ਧਤ੍ਤਾ. ਨ ਹਿ ਅਤਿ ਇਟ੍ਠਾਰਮ੍ਮਣੇ ਉਪੇਕ੍ਖਾ ਤਦਾਰਮ੍ਮਣਂ ਪਵਤ੍ਤਤਿ. ਮਹਗ੍ਗਤ ਪਞ੍ਞਤ੍ਤਾ ਰਮ੍ਮਣੇਸੁ ਪਨ ਉਭਯਮ੍ਪਿ ਤਦਾਰਮ੍ਮਣਂ ਨੁਪ੍ਪਜ੍ਜਤਿਯੇਵ. ਨ ਚ ਮੂਲਭਵਙ੍ਗ ਸਮ੍ਭਵੋ ਅਤ੍ਥਿ. ਕਸ੍ਮਾ, ਜਵਨੇਨ ਸਹ ਵਿਰੁਦ੍ਧਤ੍ਤਾਤਿ.

‘‘ਏਤ੍ਥ ਚਾ’’ਤਿਆਦੀਸੁ. ‘‘ਸਬ੍ਬ ਧਮ੍ਮੇਸੂ’’ਤਿ ਸਬ੍ਬੇਸੁ ਆਰਮ੍ਮਣ ਧਮ੍ਮੇਸੁ. ‘‘ਪਥਮ ਸਮਨ੍ਨਾਹਾਰੋ’’ਤਿ ਆਵਜ੍ਜਨ ਕਿਚ੍ਚਂ ਆਹ. ਸੁਤ੍ਤਨ੍ਤ ਪਾਠੇ. ‘‘ਤਜ੍ਜੋ’’ਤਿ ਤੇਨ ਆਰਮ੍ਮਣਾਨਂ ਆਪਾਤਾ ਗਮਨੇਨ ਜਾਤੋ. ‘‘ਤਜ੍ਜੋ’’ਤਿ ਵਾ ਤਦਨੁਰੂਪੋਤਿਪਿ ਵਦਨ੍ਤਿ. ‘‘ਵਿਞ੍ਞਾਣਭਾਗਸ੍ਸਾ’’ਤਿ ਚਕ੍ਖੁ ਦ੍ਵਾਰਿਕ ਵਿਞ੍ਞਾਣ ਕੋਟ੍ਠਾਸਸ੍ਸ. ‘‘ਯਤੋ’’ਤਿ ਯਸ੍ਮਿਂ ਕਾਲੇ. ਕਥਂ ਆਵਜ੍ਜਨੇਨ ਵਿਨਾ ਨੁਪ੍ਪਜ੍ਜਤੀਤਿ ਆਹ ‘‘ਸਚੇ ਆਵਜ੍ਜਨੇਨਾ’’ਤਿਆਦਿਂ. ‘‘ਏਤ੍ਥ ਸਿਯਾ’’ਤਿਆਦੀਸੁ. ਯਥਾ ਪਨ ਨਿਰਾਵਜ੍ਜਨਂ ਹੋਤਿ ਭਿਨ੍ਨਾ ਰਮ੍ਮਣਞ੍ਚ, ਏਵਂ ਤਥਾਤਿ ਯੋਜਨਾ. ‘‘ਏਕਸ੍ਸਪੀ’’ਤਿ ਏਕਸ੍ਸ ਆਗਨ੍ਤੁਕ ਭਵਙ੍ਗਸ੍ਸਪਿ ਨਤ੍ਥਿ ਦੋਸੋ. ਮਹਾਅਟ੍ਠਕਥਾਯਞ੍ਚ ਨਤ੍ਥਿ. ਅਟ੍ਠਸਾਲਿਨਿਯਂ ਪਨ ਅਤ੍ਥਿਯੇਵ. ‘‘ਸਵਿਪ੍ਫਨ੍ਦਨਤ੍ਤਾ’’ਤਿ ਏਤ੍ਥ ਅਤ੍ਥੋ ਸਵਿਪ੍ਫਾਰਿਕਨ੍ਤਿ ਪਦੇ ਵੁਤ੍ਤਨਯੇਨ ਵੇਦਿਤਬ੍ਬੋ. ‘‘ਇਤਰੇ ਸਞ੍ਚਾ’’ਤਿ ਮਹਗ੍ਗਤਲੋਕੁਤ੍ਤਰ ਜਵਨਾਨਞ੍ਚ. ਕਾਨਿ ਚਿ ਪਰਿਤ੍ਤਾਰਮ੍ਮਣਾਨਿਪਿ ਸਮਾਨਾਨਿ. ਯਦਿ ਤਦਾਰਮ੍ਮਣੂ ਪਨਿਸ੍ਸ ਯਸ੍ਸ ਕਾਮਭਵਙ੍ਗਸ੍ਸ ਅਭਾਵਤੋ ਤਦਾਰਮ੍ਮਣਾਨਿ ਰੂਪਾਰੂਪ ਬ੍ਰਹ੍ਮਾਨਂ ਨੁਪ੍ਪਜ੍ਜਨ੍ਤਿ. ਏਵਂ ਸਤਿ, ਚਕ੍ਖੁਸੋਤ ਦ੍ਵਾਰਿਕ ਚਿਤ੍ਤਾਨਿਪਿ ਰੂਪ ਬ੍ਰਹ੍ਮਾਨਂ ਨੁਪ੍ਪਜ੍ਜੇਯ੍ਯੁਨ੍ਤਿ ਆਹ ‘‘ਚਕ੍ਖੁ ਸੋਤਵਿਞ੍ਞਾਣਾਨਿ ਪਨਾ’’ਤਿਆਦਿਂ. ‘‘ਇਨ੍ਦ੍ਰਿਯਪ੍ਪਵਤ੍ਤਿ ਆਨੁਭਾਵਤੋ’’ਤਿ ਚਕ੍ਖੁ ਵਤ੍ਥੁ ਸੋਤਵਤ੍ਥੁ ਸਙ੍ਖਾਤਾਨਂ ਇਨ੍ਦ੍ਰਿਯ ਵਤ੍ਥੂਨਂ ਰੂਪ ਬ੍ਰਹ੍ਮ ਸਨ੍ਤਾਨੇ ਪਵਤ੍ਤਤ੍ਤਾ ਤੇਸਂ ਪਵਤ੍ਤਿ ਆਨੁਭਾਵਤੋ ਚਕ੍ਖੁ ਸੋਤਵਿਞ੍ਞਾਣਾਨਿ ਰੂਪਬ੍ਰਹ੍ਮਾਨਂ ਪਵਤ੍ਤਨ੍ਤਿਯੇ ਵਾਤਿ ਦਸ੍ਸੇਤੁਂ ‘‘ਸਮ੍ਪਟਿਚ੍ਛਨ ਸਨ੍ਤੀਰਣਾਨੀ’’ਤਿਆਦਿ ਵੁਤ੍ਤਂ. ‘‘ਵਿਕਪ੍ਪਬਲੇਵਾ’’ਤਿ ਕਾਮਕੁਸਲਾ ਕੁਸਲਾਨਂ ਵਿਯ ਵਿਵਿਧੇਨ ਆਕਾਰੇਨ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ਆਰਮ੍ਮਣਗ੍ਗਹਸਾਮਤ੍ਥਿਯੇਵਾਸਤਿ. ‘‘ਅਪ੍ਪਨਾਪਤ੍ਤ ਭਾਵਨਾ ਕਮ੍ਮਵਿਸੇਸੇ ਵਾ’’ਤਿ ਏਤ੍ਥ ਅਭਿਞ੍ਞਾ ਜਵਨਾਨਿ ਵਿਯ ਮਹਗ੍ਗਤ ਵਿਪਾਕ ਲੋਕੁਤ੍ਤਰ ਵਿਪਾਕਾਨਿ ਵਿਯ ਚਾਤਿ ਵਤ੍ਤਬ੍ਬਂ. ‘‘ਅਟ੍ਠਕਥਾਯਂ’’ਤਿ ਪਟਿਚ੍ਚ ਸਮੁਪ੍ਪਾਦ ਵਿਭਙ੍ਗਟ੍ਠਕਥਾਯਂ. ‘‘ਵਿਭਾਵਨਿਯਂ ਵੁਤ੍ਤ ਕਾਰਣਾਨੀ’’ਤਿ ਅਟ੍ਠਕਥਾਤੋ ਆਹਰਿਤ੍ਵਾ ਵਿਭਾਵਨਿਯਂ ਵੁਤ੍ਤਾਨਿ ‘ਅਜਨਕਤ੍ਤਾ ਜਨਕ ਸਮਾਨਤ੍ਤਾ ਭਾਵਤੋ’ਤਿਆਦੀਨਿ ਕਾਰਣਾਨਿ.

੧੪੦. ਜਵਨ ਨਿਯਮੇ. ਅਟ੍ਠਕਥਾਯਮ੍ਪਿ ਛਕ੍ਖਤ੍ਤੁਂ ਪਵਤ੍ਤਿ ਵੁਤ੍ਤਾ. ਯਥਾਹ ਸਚੇ ਪਨ ਬਲਵਾ ਰਮ੍ਮਣਂ ਆਪਾਤਾਗਤਂ ਹੋਤਿ. ਕ੍ਰਿਯਮਨੋਧਾਤੁਯਾ ਭਵਙ੍ਗੇ ਆਵਟ੍ਟਿਤੇ ਚਕ੍ਖੁਵਿਞ੍ਞਾਣਾਦੀਨਿ ਉਪ੍ਪਜ੍ਜਨ੍ਤਿ. ਜਵਨਟ੍ਠਾਨੇ ਪਨ ਪਥਮਕਾਮਾਵਚਰ ਕੁਸਲ ਚਿਤ੍ਤਂ ਜਵਨਂ ਹੁਤ੍ਵਾ ਛਸਤ੍ਤਵਾਰੇ ਜਵਿਤ੍ਵਾ ਤਦਾਰਮ੍ਮਣਸ੍ਸ ਵਾਰਂ ਦੇਤੀਤਿ. ‘‘ਮੁਦੁਤਰ ਭਾਵੇਨਾ’’ਤਿ ਮਾਤੁਕੁਚ੍ਛਿਮ੍ਹਿ ਠਿਤਕਾਲੇਵਾ ਸਮ੍ਪਤਿ ਜਾਤਕਾਲੇ ਵਾ ਵਤ੍ਥੁਸ੍ਸ ਅਤਿਮੁਦੁਭਾਵੇਨ. ‘‘ਕੇਨਚਿਉਪਦ੍ਦੁਤ ਭਾਵੇਨਾ’’ਤਿ ਬਾਲ਼੍ਹਗੇਲਞ੍ਞਜਾਤਕਾਲੇ ਕੇਨਚਿ ਵਾਤਪਿਤ੍ਤਸੇਮ੍ਹਾਦਿਨਾ ਉਪਦ੍ਦੁਤ ਭਾਵੇਨ. ‘‘ਅਜ੍ਝੋਤ੍ਥਟ ਭਾਵੇਨਾ’’ਤਿ ਤਸ੍ਸ ਵੇਵਚਨਮਤ੍ਤਂ. ਮਨ੍ਦੀਭੂਤੋ ਵੇਗੋ ਯੇਸਂ ਤਾਨਿ ਮਨ੍ਦੀਭੂਤ ਵੇਗਾਨਿ. ‘‘ਅਸਯ੍ਹ ਰੂਪੇਹੀ’’ਤਿ ਦੁਕ੍ਖਮਸਭਾਵੇਹਿ. ਅਭਿਭੂਤਾਨਂ ਸਤ੍ਤਾਨਂ. ਤਞ੍ਚ ਖੋ ਵਚਨਂ ਪਾਕਤਿਕ ਸਤ੍ਤਾਨਂ ਵਸੇਨੇਵ ਵੁਤ੍ਤਂ. ਨ ਸਤ੍ਤਵਿਸੇਸਾਨਂ ਵਸੇਨ. ਏਵਂ ਸਤਿ, ਸਤ੍ਤਵਿਸੇਸਾਨਂ ਵਸੇਨ ਕਥਂ ਦਟ੍ਠਬ੍ਬਨ੍ਤਿ ਆਹ ‘‘ਯੇ ਪਨਾ’’ਤਿਆਦਿਂ. ‘‘ਉਪਰੀ’’ਤਿ ਮਰਣੁਪ੍ਪਤ੍ਤਿਟ੍ਠਾਨੇ. ‘‘ਵੁਤ੍ਤਞ੍ਹੀ’’ਤਿ ਵਿਸੁਦ੍ਧਿ ਮਗ੍ਗੇ ਵੁਤ੍ਤਮੇਵ. ‘‘ਯਮਕਪ੍ਪਾਟਿਹਾਰਿਯਂ’’ਤਿ ਯੁਗਲ਼ਵਤ੍ਥੂਨਂ ਏਕਤੋ ਪਵਤ੍ਤ ਅਚ੍ਛਰਿਯ ਕਮ੍ਮਂ. ‘‘ਦ੍ਵੇ ਝਾਨਙ੍ਗਾਨੀ’’ਤਿ ਉਪੇਕ੍ਖੇਕਗ੍ਗਤਾ ਝਾਨਙ੍ਗਾਨਿ.

‘‘ਯੋਗਕਮ੍ਮਸਿਦ੍ਧਿਯਾ’’ਤਿ ਭਾਵਨਾਨੁ ਯੋਗਕਮ੍ਮਸਿਦ੍ਧਸ੍ਸ. ਇਦ੍ਧਿ ਵਿਕੁਬ੍ਬਨਂ ਨਾਮ ਇਦ੍ਧਿਯਾ ਨਾਨਾਕਮ੍ਮਕਰਣਂ. ‘‘ਸਿਦ੍ਧਿਯਾ ਏਵਾ’’ਤਿ ਸਿਜ੍ਝ ਨਤ੍ਥਾਯ ਏਵ. ਅਤ੍ਤਨੋ ਅਨਨ੍ਤਰੇ ਏਵ ਉਪ੍ਪਨ੍ਨਂ ਫਲਂ ਏਤਿਸ੍ਸਾਤਿ ਆਨਨ੍ਤਰਿਕਪ੍ਫਲਾ. ਮਗ੍ਗਚੇਤਨਾ. ‘‘ਇਤੀ’’ਤਿ ਤਸ੍ਮਾ. ‘‘ਮਨ੍ਦਸ੍ਸਾ’’ਤਿ ਮਨ੍ਦ ਪੁਗ੍ਗਲਸ੍ਸ. ‘‘ਤਿਕ੍ਖਸ੍ਸਾ’’ਤਿ ਤਿਕ੍ਖ ਪੁਗ੍ਗਲਸ੍ਸ. ਤੀਣਿ ਫਲਚਿਤ੍ਤਾਨਿ. ‘‘ਪਯੋਗਾਭਿਸਙ੍ਖਾਰਸ੍ਸਾ’’ਤਿ ਪਥਮਜ੍ਝਾਨਤੋ ਪਟ੍ਠਾਯ ਸਮਥ ਵਿਪਸ੍ਸਨਾਯੁਗਨਨ੍ਧਪ੍ਪਵਤ੍ਤਿ ਸਙ੍ਖਾਤਸ੍ਸ ਪੁਬ੍ਬਪ੍ਪਯੋਗਾਭਿਸਙ੍ਖਾਰਸ੍ਸ. ‘‘ਅਕਤਾਧਿਕਾਰਸ੍ਸਾ’’ਤਿ ਆਸਨ੍ਨੇ ਪੁਰਿਮਭਵੇ ਅਕਤ ਝਾਨਪਰਿਕਮ੍ਮਸ੍ਸ ਪੁਗ੍ਗਲਸ੍ਸ. ਸਬ੍ਬੇਸਮ੍ਪਿ ਫਲਟ੍ਠਾਨਂ ਚਿਣ੍ਣਵਸਿਭਾਵਾਨੇਵ ਹੋਨ੍ਤੀਤਿ ਯੋਜਨਾ.

ਜਵਨਨਿਯਮੋਨਿਟ੍ਠਿਤੋ.

੧੪੧. ਦੁਹੇਤੁਕਾਦੀਸੁ. ਜਾਤਿ ਦ੍ਵਿਹੇਤੁਕਾਦਯੋ ਏਵ ਅਧਿਪ੍ਪੇਤਾਤਿ ਵੁਤ੍ਤਂ ‘‘ਪਟਿਸਨ੍ਧਿਵਿਞ੍ਞਾਣ ਸਹਗਤਾ’’ਤਿਆਦਿਂ. ‘‘ਤੇਸਂ ਦ੍ਵਿਨ੍ਨਂ ਪੀ’’ਤਿ ਦ੍ਵਿਹੇਤੁਕਾਨਮ੍ਪਿ ਅਹੇਤੁਕਾਨਮ੍ਪਿ. ਭੁਸੋਝਾਨ ਮਗ੍ਗਫਲਾਨਿ ਵਾਰੇਨ੍ਤਿ ਨੀਵਾਰੇਨ੍ਤੀਤਿ ਆਵਰਣਾਨਿ. ਵਿਪਾਕਾਨਿ ਚ ਤਾਨਿ ਆਵਰਣਾਨਿ ਚਾਤਿ ਵਿਗ੍ਗਹੋ. ‘‘ਵਿਪਾਕਾਨੀ’’ਤਿ ਅਹੇਤੁਕ ਦ੍ਵਿਹੇਤੁਕ ਵਿਪਾਕਾਨਿ. ਤੇਹਿ ਗਹਿਤਪ੍ਪਟਿਸਨ੍ਧਿਕਾਨਂ ਇਮਸ੍ਮਿਂ ਭਵੇਝਾਨ ਮਗ੍ਗਫਲਪ੍ਪਟਿਲਾਭੋ ਨਾਮ ਨਤ੍ਥਿ. ਤੇਨਾਹ ‘‘ਵਿਪਾਕਾਵਰਣ ਸਬ੍ਭਾਵਤੋ’’ਤਿਆਦਿਂ. ‘‘ਤੇਸਂ’’ਤਿ ਦੁਗ੍ਗਤਿ ਅਹੇਤੁਕ ਪੁਗ੍ਗਲਾਨਂ. ਪੁਗ੍ਗਲਾਨਨ੍ਤਿ ਵੁਤ੍ਤਂ ਹੋਤਿ. ਨ ਲਬ੍ਭਨ੍ਤੀਤਿ ਸਮ੍ਬਨ੍ਧੋ. ‘‘ਇਤਰੇਸਂ’’ਤਿ ਤਤੋ ਅਞ੍ਞੇਸਂ ਸੁਗਤਿ ਅਹੇਤੁਕ ਪੁਗ੍ਗਲਾਨਂ.

‘‘ਏਤ੍ਥ ਸਿਯਾ’’ਤਿਆਦੀਸੁ. ਦੁਗ੍ਗਤਿ ਪਰਿਯਾਪਨ੍ਨਾਨਞ੍ਚ ਅਹੇਤੁਕਾਨਂ. ‘‘ਮੂਲਭਵਙ੍ਗੇ’’ਤਿਆਦਿਮ੍ਹਿ ਪਟਿਸਨ੍ਧਿ ਚਿਤ੍ਤਂ ਹੁਤ੍ਵਾ ਆਗਤੇ ਮੂਲਭਵਙ੍ਗੇ. ‘‘ਯਂ ਕਿਞ੍ਚੀ’’ਤਿ ਯਂ ਕਿਞ੍ਚਿ ਭਵਙ੍ਗਂ. ‘‘ਵੁਚ੍ਚਤੇ’’ਤਿ ਵਿਸਜ੍ਜਨਾ ਵੁਚ੍ਚਤੇ. ‘‘ਸਬ੍ਬ ਅਟ੍ਠਕਥਾਸੁ ਪਟਿਕ੍ਖਿਤ੍ਤੋ’’ਤਿ ਅਟ੍ਠਸਾਲਿਨਿਯਂ ਤਾਵ ਵਿਪਾਕੁਦ੍ਧਾਰਕਥਾਯਂ ਸੋਲ਼ਸਸੁ ਕਾਮਾਵਚਰ ਕੁਸਲ ਵਿਪਾਕੇਸੁ ਅਟ੍ਠਨ੍ਨਂ ਅਹੇਤੁਕ ਵਿਪਾਕਾਨਂ ਏਵ ਆਪਾਯਿਕੇਸੁ ਸਤ੍ਤੇਸੁ ਉਪ੍ਪਤ੍ਤਿਂ ਦਸ੍ਸੇਤਿ. ਨ ਅਟ੍ਠਨ੍ਨਂ ਸਹੇਤੁਕ ਵਿਪਾਕਾਨਂ. ਤਥਾ ਪਟਿਚ੍ਚ ਸਮੁਪ੍ਪਾਦਟ੍ਠ ਕਥਾਸੁ ਚ ਵਿਞ੍ਞਾਣ ਪਦਵਣ੍ਣਨਾਸੁ ਅਞ੍ਞਾਸੁ ਚ ਅਭਿਧਮ੍ਮਾਵਤਾਰਾਦੀਸੂਤਿ ਏਵਂ ਸਬ੍ਬਟ੍ਠਕਥਾਸੁ ਪਟਿਕ੍ਖਿਤ੍ਤਾ ਨਾਮ ਹੋਤਿ. ‘‘ਯੋਗਸਾ ਧਨੀਯਤ੍ਤਾ’’ਤਿ ਪਯੋਗੇਨ ਸਾਧੇਤਬ੍ਬਤ੍ਤਾ. ਕੁਸਲਾਕੁਸਲਾਨਿ ਹਿ ਵਡ੍ਢੇਤੁਂ ਵਾ ਹਾਪੇਤੁਂ ਵਾ ਪਯੋਗੇ ਕਤੇ ਵਡ੍ਢਨ੍ਤਿ ਚੇਵ ਹਾਯਨ੍ਤਿ ਚ. ਞਾਣਵਿਪ੍ਪਯੁਤ੍ਤਭੂਤਂ ਗਹੇਤੁਂ ਯੁਤ੍ਤਂ. ਕਸ੍ਮਾ, ਅਹੇਤੁਕਸ੍ਸ ਭਵਙ੍ਗਸ੍ਸਾਤਿ ਵੁਤ੍ਤਸ੍ਸ ਮੂਲਭਵਙ੍ਗਸ੍ਸ ਅਹੇਤੁਕਤ੍ਤਾ. ‘‘ਦ੍ਵਿਨ੍ਨਮ੍ਪਿ ਅਹੇਤੁਕਾਨਂ’’ਤਿ ਦੁਗ੍ਗਤਿ ਅਹੇਤੁਕਾਨਞ੍ਚ ਸੁਗਤਿ ਅਹੇਤੁਕਾਨਞ੍ਚ. ‘‘ਅਪਰੇਪਨਾ’’ਤਿਆਦਿ ਵਿਭਾਵਨਿਯਂ ਆਗਤੋ ਅਪਰੇ ਵਾਦੋ. ਵੁਤ੍ਤਞ੍ਹਿ ਤਤ੍ਥ ‘ਅਪਰੇਪਨ ਯਥਾ ਅਹੇਤੁਕਾਨਂ ਸਹੇਤੁਕ ਤਦਾਰਮ੍ਮਣਂ ਹੋਤਿ, ਏਵਂ ਦ੍ਵਿਹੇਤੁਕਾਨਂ ਤਿਹੇਤੁਕ ਤਦਾਰਮ੍ਮਣਂਪੀ’ਤਿ ਵਣ੍ਣੇਨ੍ਤਿ. ਤੇਸਂਮਤਾਨੁਰੋਧੇਨ ਚ ਇਧਪਿ ਞਾਣਸਮ੍ਪਯੁਤ੍ਤ ਵਿਪਾਕਪ੍ਪਟਿਕ੍ਖੇਪੋ ਅਹੇਤੁਕੇਯੇਵ ਸਨ੍ਧਾਯਾਤਿ ਵਦਨ੍ਤੀਤਿ. ਤਂ ਪਨ ਵਿਪਾਕੁਦ੍ਧਾਰਕਥਾਯਂ ‘ਏਤ੍ਥੇਵ ਦ੍ਵਾਦਸ ਕਮਗ੍ਗੋਪੀ’ਤਿ ਚ, ਏਤ੍ਥੇਵ ਦਸਕਮਗ੍ਗੋਪੀ’ਤਿ ਚ ਆਗਤੇਹਿ ਨ ਸਮੇਤਿ. ਤਤ੍ਥ ਹਿ ਸੋਲ਼ਸਸੁਕੁਸਲਵਿਪਾਕੇਸੁ ਦ੍ਵਿਹੇਤੁਕ ਕਮ੍ਮਨਿਬ੍ਬਤ੍ਤਾਨਂ ਦ੍ਵਿਨ੍ਨਂ ਦ੍ਵਿਹੇਤੁਕਾਹੇਤੁਕ ਪੁਗ੍ਗਲਾਨਂ ਚਤ੍ਤਾਰਿ ਞਾਣਸਮ੍ਪਯੁਤ੍ਤ ਵਿਪਾਕਾਨਿ ਵਜ੍ਜੇਤ੍ਵਾ ਦ੍ਵਾਦਸ ਕਮਗ੍ਗੋ ਨਾਮ ਹੋਤਿ. ਪੁਨ ਸੇਸੇਸੁ ਦ੍ਵਾਦਸ ਵਿਪਾਕੇਸੁਪਿ ਅਸਙ੍ਖਾਰਿਕ ਕਮ੍ਮਨਿਬ੍ਬਤ੍ਤਾਨਂ ਦ੍ਵੇ ਞਾਣਵਿਪ੍ਪਯੁਤ੍ਤ ਸਸਙ੍ਖਾਰਿਕ ਵਿਪਾਕਾਨਿ, ਸਸਙ੍ਖਾਰਿਕ ਕਮ੍ਮਨਿਬ੍ਬਤ੍ਤਾਨਞ੍ਚ ਦ੍ਵੇ ਞਾਣਵਿਪ੍ਪਯੁਤ੍ਤ ਅਸਙ੍ਖਾਰਿਕ ਵਿਪਾਕਾਨਿ ਵਜ੍ਜੇਤ੍ਵਾ ਦੁਤਿਯਤ੍ਥੇਰ ਵਾਦੇ ਦਸਕਮਗ੍ਗੋ ਨਾਮ ਹੋਤੀਤਿ. ਏਤ੍ਥ ਪਨ ਦ੍ਵਿ ਹੇਤੁਕੋਪਿ ਪੁਗ੍ਗਲੋ ਅਧਿਕੇਨ ਛਨ੍ਦੇਨ ਵਾ ਵੀਰਿਯੇਨ ਵਾ ਚਿਤ੍ਤੇਨ ਵਾ ਯੁਤ੍ਤੋ ਪਰਿਯਤ੍ਤਿ ਧਮ੍ਮਂ ਵਾ ਨਾਨਾਵਿਜ੍ਜਾਸਿਪ੍ਪਾਨਿ ਵਾ ਬਹੁਂ ਗਣ੍ਹੇਯ੍ਯ, ਸੁਣੇਯ੍ਯ, ਧਾਰੇਯ੍ਯ, ਵਾਚੇਯ੍ਯ, ਚਿਨ੍ਤੇਯ੍ਯ. ਅਥਸ੍ਸ ਞਾਣਸਮ੍ਪਯੁਤ੍ਤ ਜਵਨਂ ਬਹੁਲਂ ਸਮੁਦਾ ਚਰੇਯ੍ਯ. ਤਦਾ ਤਸ੍ਸ ਨਾਨਾਕਮ੍ਮੇਨ ਜਵਨਾਨੁ ਰੂਪਂ ਞਾਣਸਮ੍ਪਯੁਤ੍ਤ ਤਦਾਰਮ੍ਮਣਂ ਨ ਨ ਸਮ੍ਭਵਤੀਤਿ ਵੁਤ੍ਤਂ. ਤਂ ਯੁਤ੍ਤਂ ਵਿਯ ਦਿਸ੍ਸਤੀਤਿ. ‘‘ਅਟ੍ਠਕਥਾਯਂ ਪਿਹਿ. ਲ. ਵੁਤ੍ਤਾ’’ਤਿ ਕਥਂ ਵੁਤ੍ਤਾ. ਏਤਾਨਿ ਹਿ ਮਨੁਸ੍ਸੇਸੁ ਚ ਕਾਮਾਵਚਰ ਦੇਵੇਸੁ ਚ ਪੁਞ੍ਞਵਨ੍ਤਾਨਂ ਦ੍ਵਿਹੇਤੁਕਤਿ ਹੇਤੁਕਾਨਂ ਪਟਿਸਨ੍ਧਿਕਾਲੇ ਪਟਿਸਨ੍ਧਿ ਹੁਤ੍ਵਾ ਵਿਪਚ੍ਚਨ੍ਤੀਤਿਆਦਿਨਾ ਵੁਤ੍ਤਾਤਿ. ਤੇ ਪਨ ਤਿਵਿਧਾ, ਨਵਵਿਧਾਤਿ ਸਮ੍ਬਨ੍ਧੋ. ‘‘ਤੇਸਂ ਤਬ੍ਭਾਵੋ’’ਤਿ ਕੁਸਲਾਨਂ ਕੁਸਲਭਾਵੋ, ਅਕੁਸਲਾਨਂ ਅਕੁਸਲਭਾਵੋ. ‘‘ਸਿਕ੍ਖਨ ਧਮ੍ਮਯੁਤ੍ਤਾ’’ਤਿ ਤੀਹਿ ਸਿਕ੍ਖਾਹਿ ਪਹਾਤਬ੍ਬਾਨਂ ਕਿਲੇਸਾਨਂ ਅਤ੍ਥਿਤਾਯ ਸਿਕ੍ਖਿਤਬ੍ਬਤਾ ਪਕਤਿਯਂ ਠਿਤਾਤਿ ਅਧਿਪ੍ਪਾਯੋ.‘‘ਹੇਟ੍ਠਿਮਾਨਞ੍ਚਾ’’ਤਿ ਹੇਟ੍ਠਿਮ ਫਲਾਨਞ੍ਚ. ਯਾਨਿਯਾਨਿਸਕਾਨਿ ਯਥਾਸਕਂ. ‘‘ਉਪਰਿਮਾਨਂ’’ਤਿ ਉਪਰਿਮਾਨਂ ਪੁਗ੍ਗਲਾਨਂ. ‘‘ਪਰਿਨਿਟ੍ਠਿਤ ਸਿਕ੍ਖਾ ਕਿਚ੍ਚਤ੍ਤਾ’’ਤਿ ਸਿਕ੍ਖਾ ਕਿਚ੍ਚਂ ਨਾਮ ਕਿਲੇਸ ਧਮ੍ਮਾਨਂ ਪਹਾਨਤ੍ਥਾਯ ਏਵ ਹੋਤੀਤਿ ਤੇਸੁ ਸਬ੍ਬਸੋ ਪਹੀਨੇਸੁ ਸਿਕ੍ਖਾ ਕਿਚ੍ਚਂ ਪਰਿਨਿਟ੍ਠਿਤਂ ਹੋਤਿ. ਏਵਂ ਪਰਿਨਿਟ੍ਠਿਤ ਸਿਕ੍ਖਾ ਕਿਚ੍ਚਤ੍ਤਾ. ਸੁਟ੍ਠੁ ਭਬ੍ਬੋਤਿ ਸਮ੍ਭਵੋ. ਸਮ੍ਭਵੋਤਿ ਵਿਸੇਸਨ ਪਦਮੇਤਨ੍ਤਿ ਆਹ ‘‘ਯਥਾ ਸਮ੍ਭਵਂ’’ਤਿ.

੧੪੨. ‘‘ਏਤ੍ਥੇਵਾ’’ਤਿ ਏਤਸ੍ਮਿਂ ਕਾਮਲੋਕੇ ਏਵ. ‘‘ਤਂ ਤਂ ਪਸਾਦਰਹਿਤਾਨਂ’’ਤਿ ਤੇਨਤੇਨ ਪਸਾਦੇਨ ਰਹਿਤਾਨਂ. ਤਸ੍ਮਿਂ ਤਸ੍ਮਿਂ ਦ੍ਵਾਰੇ ਉਪ੍ਪਨ੍ਨਾਨਿ ਤਂ ਤਂ ਦ੍ਵਾਰਿਕਾਨਿ. ਚਤੁਸਟ੍ਠਿਵੀਥਿ ਚਿਤ੍ਤਾਨਿ. ਦ੍ਵੇ ਚਤ੍ਤਾਲੀਸ ਵੀਥਿ ਚਿਤ੍ਤਾਨਿ. ‘‘ਬ੍ਰਹ੍ਮਲੋਕੇ ਵਾ’’ਤਿਆਦੀਸੁ. ਇਦਂ ਅਟ੍ਠਕਥਾ ਵਚਨਂ. ਯਥਾਹ ਰੂਪਭਵੇ ਚਤੁਨ੍ਨਂ ਵਿਞ੍ਞਾਣਾਨਂ, ਤਥੇਵ ਪਚ੍ਚਯੋ. ਪਵਤ੍ਤੇ, ਨੋਪਟਿਸਨ੍ਧਿਯਂ. ਸੋਚ ਖੋ ਕਾਮਾਵਚਰੇ ਅਨਿਟ੍ਠ ਰੂਪਦਸ੍ਸਨ ਸਦ੍ਦਸਵਨਵਸੇਨ, ਬ੍ਰਹ੍ਮਲੋਕੇ ਪਨ ਅਨਿਟ੍ਠਾ ਰੂਪਾਦਯੋ ਨਾਮ ਨਤ੍ਥਿ. ਤਥਾ ਕਾਮਾਵਚਰ ਦੇਵਲੋਕੇ ਪੀਤਿ. ਤਾਨਿ ਚਤ੍ਤਾਰਿ ਚਿਤ੍ਤਾਨਿ. ‘‘ਤਤ੍ਥਾ’’ਤਿ ਤਸ੍ਮਿਂ ਰੂਪਲੋਕੇ. ਵਿਭਾਵਨਿਪਾਠੇ. ‘‘ਇਧਾ’’ਤਿ ਇਮਸ੍ਮਿਂ ਵਚਨੇ. ‘‘ਤਂ ਤਂ ਭੂਮਿ ਪਰਿਯਾਪਨ੍ਨੇ’’ਤਿ ਤਿਸ੍ਸਂ ਤਿਸ੍ਸਂ ਭੂਮਿਯਂ ਪਰਿਯਾਪਨ੍ਨੇ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਂ.

ਵੀਥਿਸਙ੍ਗਹਦੀਪਨਿਯਾਅਨੁਦੀਪਨਾ ਨਿਟ੍ਠਿਤਾ.