੪. ਅਬ੍ਯਯਵਗ੍ਗਵਣ੍ਣਨਾ
੧੧੩੬-੧੧੩੭. ਚਿਰਸ੍ਸਾਦਯੋ ਚਤ੍ਤਾਰੋ ਚਿਰਤ੍ਥਕਾ. ਚਿਰਾਯ, ਚਿਰਾ ਚਾਤ੍ਰ. ਸਹਾਦਯੋਪਿ ਚਤ੍ਤਾਰੋ ਸਹਤ੍ਥਾ. ਪੁਨਪ੍ਪੁਨਮਾਦਯੋ ਪਞ੍ਚ ਪੁਨਪ੍ਪੁਨਤ੍ਥਾ. ਵਿਨਾਦਯੋ ਪਞ੍ਚ ਵਜ੍ਜਨਤ੍ਥਾ.
੧੧੩੮. ਬਲਵਂ ਸੁਟ੍ਠੁ ਅਤੀਵ ਕਿਮੁਤ ਸੁ ਅਤਿ ਏਤੇ ਛ ਅਤਿਸਯਤ੍ਥੇ. ਪਸਂਸਾਯਞ੍ਚ ਸੁਟ੍ਠੁ. ਪਞ੍ਹੇਪਿ ਕਿਮੁਤ. ਆਹੋ ਕਿਂ ਕਿਮੁ ਉਦਾਹੁ ਕਿਮੁਤ ਉਦ ਏਤੇ ਛ ਵਿਕਪ੍ਪੇ ਵਿਤਕ੍ਕੇ. ਤਤ੍ਰ ਆਹੋਸਦ੍ਦੋ ਦੀਘਾਦਿ. ‘‘ਦਿਟ੍ਠੋ ਆਹੋ ਉਦਾਹੁ ਚ, ਵਿਕਪ੍ਪਤ੍ਥੇ ਵਿਭਾਵਨੇ’’ਤਿ ਹਿ ਭਾਗੁਰਿ. ਖਾਣੁਰਯਮਾਹੋ ਪੁਰਿਸੋ. ਰੁਦ੍ਦੋ ਤੁ ਰਸ੍ਸਾਦਿਮਾਹ ‘‘ਇਸ੍ਸਰੇਪ੍ਯਧਿਕੇਪਿ ਚ, ਵਿਕਪ੍ਪੇਵਿਮ੍ਹਯੇਪ੍ਯਹੋ’’ਤਿ. ਕਿਮੁਸਦ੍ਦੋ ਰਸ੍ਸਨ੍ਤੋ. ਕਿਮਾਯਂ ਖਾਣੁ, ਕਿਮੁ ਪੁਰਿਸੋ. ਉਦਸਦ੍ਦੋ ਰਸ੍ਸਾਦਿ. ਧੂਮੋਯਮੋਦ ਕਾਪੋਤਂ, ਸਮੂਹਤ੍ਥੇ ਣੋ. ਕਿਞ੍ਚਸਦ੍ਦੋਪਿ ਵਿਕਪ੍ਪੇ. ਕਿਮੁਤਸਦ੍ਦੋ ਅਤਿਸਯੇਤਿ ਵੁਤ੍ਤੋ.
੧੧੩੯. ਭੋ ਅਰੇ ਅਮ੍ਭੋ ਹਮ੍ਭੋ ਰੇ ਜੇ ਅਙ੍ਗ ਆਵੁਸੋ ਹੇ ਹਰੇ ਏਤੇ ਦਸ ਅਵ੍ਹਾਨੇ. ਹਂ ਹੋਸਦ੍ਦਾਪ੍ਯਤ੍ਰ. ਕਥਂ ਕਿਂਸੁ ਨਨੁ ਕਚ੍ਚਿ ਨੁ ਕਿਂ ਏਤੇ ਛ ਸਮਾ ਸਮਾਨਤ੍ਥਾ.
੧੧੪੦. ਅਧੁਨਾ, ਏਤਰਹਿ, ਇਦਾਨਿ, ਸਮ੍ਪਤਿ ਚਾਤਿ ਚਤ੍ਤਾਰੋ ਇਦਾਨੀਤ੍ਯਤ੍ਥੇ. ਅਞ੍ਞਦਤ੍ਥੁ ਤਗ੍ਘ ਸਸਕ੍ਕਂ ਅਦ੍ਧਾ ਕਾਮਂ ਜਾਤੁ ਵੇ ਹਵੇ ਏਤੇ ਅਟ੍ਠ ਏਕਂਸੇ ਏਕਂਸਤ੍ਥੇ.
੧੧੪੧. ਯਾਵਤਾਦਯੋ ਸਤ੍ਤ ਪਰਿਚ੍ਛੇਦਵਾਚਕਾ. ਤਤ੍ਰ ਯਾਵਤਾ, ਯਾਵਾਤਿ ਦ੍ਵੇ ਅਨਿਯਮਪਰਿਚ੍ਛੇਦਤ੍ਥਵਾਚਕਾ. ਤਾਵਤਾ, ਤਾਵ, ਏਤ੍ਤਾਵਤਾਤਿ ਨਿਯਮਪਰਿਚ੍ਛੇਦਤ੍ਥਵਾਚਕਾ. ਕਿਤ੍ਤਾਵਤਾ, ਕੀਵੇਤਿ ਪਰਿਚ੍ਛੇਦਪੁਚ੍ਛਨਤ੍ਥਵਾਚਕਾ.
੧੧੪੨-੧੧੪੩. ਯਥਾ ਤਥਾ ਯਥੇਵ ਏਵਂ ਯਥਾਨਾਮ ਯਥਾਹਿ ਸੇਯ੍ਯਥਾਪਿ ਏਵਮੇਵਂ ਵਾ ਤਥੇਵ ਯਥਾਪਿ ਏਵਮ੍ਪਿ ਸੇਯ੍ਯਥਾਪਿ ਨਾਮ ਯਥਰਿਵ ਯਥਾ ਚ ਵਿਯ ਤਥਰਿਵ ਇਚ੍ਚੇਤੇ ਸਤ੍ਤਰਸ ਪਟਿਭਾਗਤ੍ਥੇ ਸਦਿਸਤ੍ਥੇ ਭਵਨ੍ਤਿ.
੧੧੪੪. ਸਂ, ਸਾਮਂ, ਸਯਞ੍ਚੇਤਿ ਤਯੋ ਸਯਮਿਚ੍ਚਤ੍ਥੇ. ਆਮ ਸਾਹੁ ਲਹੁ ਓਪਾਯਿਕਂ ਪਤਿਰੂਪਂ ਸਾਧੁ ਏਵਂ ਏਤੇ ਸਤ੍ਤ ਸਮ੍ਪਟਿਚ੍ਛਨਤ੍ਥੇ. ਆਮਨ੍ਤਾਪ੍ਯਤ੍ਰ.
੧੧੪੫. ਯਮਾਦਯੋ ਛ ਕਾਰਣਤ੍ਥੇਸਿਯੁਂ. ਚਨਸਦ੍ਦੋ, ਚਿਸਦ੍ਦੋ ਚਾਤਿ ਦ੍ਵੇ ਅਸਾਕਲ੍ਯੇ ਅਸਕਲਤ੍ਥੇ. ਕਦਾਚਨਂ, ਕਦਾਚੀਤ੍ਯਾਦਿ ਪਯੋਗੋ. ਮੁਧਾਸਦ੍ਦੋ ਨਿਪ੍ਫਲੇ ਫਲਰਹਿਤੇ, ਨਿਪ੍ਪਯੋਜਨੇਤ੍ਯਤ੍ਥੋ. ਅਮੂਲੇਪਿ ਚ ਮੁਧਾ.
੧੧੪੬. ਜਾਤੁਸਦ੍ਦੋ ਏਕਂਸੇਪਿ. ਸਬ੍ਬਤੋ, ਸਮਨ੍ਤਤੋ, ਪਰਿਤੋ, ਸਮਨ੍ਤਾ ਚਾਤਿ ਚਤ੍ਤਾਰੋ ਤੁਲ੍ਯਤ੍ਥਾ.
੧੧੪੭. ਨ ਅ ਨੋ ਮਾ ਅਲਂ ਨਹਿ ਇਚ੍ਚੇਤੇ ਛ ਨਿਸੇਧੇ. ਚੇ, ਸਚੇ, ਯਦੀਤਿ ਤਯੋ ਯਦ੍ਯਤ੍ਥੇ. ਸਦ੍ਧਂਸਦ੍ਦੋ ਅਨੁਕੂਲਤ੍ਥੇ. ਨਤ੍ਤਂ ਦੋਸੋ ਚ ਰਜਨੀਯਮਿਚ੍ਚਤ੍ਥੇ. ਦਿਵਾਸਦ੍ਦੋ ਅਹੇ ਅਹਨੀਤ੍ਯਤ੍ਥੇ.
੧੧੪੮. ਈਸਂ, ਕਿਞ੍ਚਿ, ਮਨਂ ਇਚ੍ਚੇਤੇ ਅਪ੍ਪਤ੍ਥੇ. ਅਤਕ੍ਕਿਤੇ ਅਵਿਤਕ੍ਕਿਤੇ. ਬਲਕ੍ਕਾਰੇ ਤੁ ਸਾਹਸਂ. ਅਗ੍ਗਤੋ, ਪੁਰਤੋ ਚ ਪੁਰੇਇਚ੍ਚਤ੍ਥੇ. ਪੇਚ੍ਚ ਅਮੁਤ੍ਰਸਦ੍ਦਾ ਭਵਨ੍ਤਰੇ.
੧੧੪੯. ਅਹੋ ਚ ਹਿ ਚਾਤਿ ਏਤੇ ਵਿਮ੍ਹਯੇ. ਵਿਕਪ੍ਪੇਪਿ ਅਹੋ. ਸਮ੍ਮੋਦੇਪਿ ਹਿ. ਤੁਣ੍ਹੀਸਦ੍ਦੋ ਮੋਨੇ ਅਭਾਸਨੇ. ਆਵਿ, ਪਾਤੁ ਚ ਪਾਕਟਤ੍ਥੇ. ਸਜ੍ਜੁ ਸਪਦਿਸਦ੍ਦਾ ਤਙ੍ਖਣੇਤ੍ਯਤ੍ਥੇ.
੧੧੫੦. ਸੁਦਂ ਖੋ ਅਸ੍ਸੁ ਯਗ੍ਘੇ ਵੇ ਹਾਦਯੋ ਹਕਾਰਾਦਯੋ ਚ ਪਦਪੂਰਣੇ ਸਿਯੁਂ. ਅਨ੍ਤਰੇਨ, ਅਨ੍ਤਰਾ, ਅਨ੍ਤੋ ਚਾਤਿ ਏਤੇ ਅਬ੍ਭਨ੍ਤਰੇਇਚ੍ਚਤ੍ਥੇ. ਅਵਸ੍ਸਂ, ਨੂਨ ਚ ਨਿਚ੍ਛਯਤ੍ਥੇ.
੧੧੫੧. ਸਂਸਦ੍ਦੋ ਦਿਟ੍ਠਾਸਦ੍ਦੋ ਆਨਨ੍ਦਤ੍ਥੇ. ਸਮੁਪਜੋ, ਸਂਪ੍ਯਤ੍ਰ. ਕਾਮਪ੍ਪਵੇਦਨੇ ਇਚ੍ਛਾਯ ਅਕ੍ਖਾਨੇ ਕਚ੍ਚਿ ਜੀਵਤਿ ਤੇ ਮਾਤਾ, ਮਮੇਦਮਭਿਮਤਮਿਚ੍ਚਤ੍ਥੇ. ਉਸੂਯੋਪਗਮੇ ਉਸੂਯਾਪੁਬ੍ਬਕੇ ਉਪਗਮੇ.
‘‘ਕਾਮਾਨੁਮਤਿਯਂ ਕਾਮੋ,
ਉਸੂਯੋਪਗਮੇਪਿ ਚਾ’’ਤਿ ਰੁਦ੍ਦੋ.
ਉਸੂਯੋਪਗਮਾਨੁਞ੍ਞਾਣੇਪਿਚਾਯਂ ਅਤ੍ਥੋ ਦਿਸ੍ਸਤੇ.
੧੧੫੨-੧੧੫੩. ਯਥਾਤ੍ਤਨ੍ਤਿ ਸਚ੍ਚਂ. ਤਥਸ੍ਸ ਅਨਤਿਕ੍ਕਮੋ ਯਥਾਤਥਂ, ਯਥਾਤ੍ਥੇ ਅਬ੍ਯਯੀਭਾਵੋ. ਤਥਸਦ੍ਦੋਯਂ ਭੂਤਪਰਿਯਾਯੋ. ਸਦਾਸਦ੍ਦੋ, ਸਨਂਸਦ੍ਦੋ ਚਾਤਿ ਨਿਚ੍ਚੇ. ਸਨਸਦ੍ਦੋਪ੍ਯਤ੍ਰ. ਪਾਯੋ, ਬਾਹੁਲ੍ਯਞ੍ਚ ਸਮਾ. ਪਞ੍ਚਕਂ ਬਾਹ੍ਯੇ. ਸਣਿਕਂਸਦ੍ਦੋ ਅਸੀਘੇ.
੧੧੫੪. ਸਮ੍ਮਾ, ਸੁਟ੍ਠੂਤਿ ਦ੍ਵੇ ਅਭਿਧਾਨਾਨਿ.
੧੧੫੫. ਸਾਯਂ ਸਾਯੇ ਸਾਯਨ੍ਹੇ. ਅਤ੍ਰਾਹੇਤਿ ਇਮਸ੍ਮਿਂ ਅਹਨਿ ਅਜ੍ਜਸਦ੍ਦੋ.
੧੧੫੬. ਯਤ੍ਥਾਦਯੋ ਤਯੋ ਅਨਿਯਮਟ੍ਠਾਨਾਦਿਵਾਚਕਾ. ਤਤ੍ਥਾਦਯੋ ਨਿਯਮਟ੍ਠਾਨਾਦਿਵਾਚਕਾ.
੧੧੫੭. ਸਮ੍ਮੁਖਾ, ਆਵਿ, ਪਾਤੁ ਚ ਸਮਾਨਤ੍ਥਾ.
੧੧੫੮. ਅਪ੍ਪੇਵਾਦਯੋ ਤਯੋ ਸਂਸਯਤ੍ਥਮ੍ਹਿ. ਇਤਿ ਇਤ੍ਥਂ ਏਵਂਸਦ੍ਦਾ ਨਿਦਸ੍ਸਨੇ ਵਤ੍ਤਨ੍ਤਿ. ਕਥਞ੍ਚਿਸਦ੍ਦੋ ਕਿਚ੍ਛਤ੍ਥੇ.
੧੧੫੯. ਖੇਦੋ ਖਿਨ੍ਨਤਾ. ਪਚ੍ਚਕ੍ਖੇ ਸਚ੍ਛਿਸਦ੍ਦੋ. ਥਿਰੇ, ਅਵਧਾਰਣੇ ਚ ਧੁਵਂ. ਤਿਰੋ ਤਿਰਿਯਂਸਦ੍ਦਾ ਸਮਾ. ਦੁਟ੍ਠੁਕੁਸਦ੍ਦਾ ਕੁਚ੍ਛਾਯਂ.
੧੧੬੦. ਆਸਿਟ੍ਠਤ੍ਥਮ੍ਹਿ ਸੁਵਤ੍ਥਿ. ਧਿਸਦ੍ਦੋ ਨਿਨ੍ਦਾਯਂ. ਕੁਹਿਞ੍ਚਨਾਦਯੋ ਸਤ੍ਤ ਠਾਨਾਦਿਪੁਚ੍ਛਨਤ੍ਥਾ.
੧੧੬੧. ਇਹ ਇਧ ਅਤ੍ਰ ਏਤ੍ਥ ਅਤ੍ਥ ਏਤੇ ਓਕਾਸਤ੍ਥਾਦਿਵਾਚਕਾ. ਸਬ੍ਬਸ੍ਮਿਂ ਕਾਲਾਦਿਕੇ ਸਬ੍ਬਤ੍ਰਾਦਿਦ੍ਵਯਂ. ਕਿਸ੍ਮਿਂ ਕਾਲੇ ਕਦਾ. ਕਸ੍ਮਿਂ ਕਾਲੇ ਕੁਦਾਚਨਂ.
੧੧੬੨-੧੧੬੩. ਵਿਭਤ੍ਯਨ੍ਤਨਾਮਸਰਾਖ੍ਯਾਤਪਤਿਰੂਪਕੇ ਅਬ੍ਯਯੇ ਦਸ੍ਸੇਤ੍ਵਾ ਤਦਞ੍ਞਭਾਵੇ ਅਬ੍ਯਯੇ ਦਸ੍ਸੇਤੁਮਾਹ ‘‘ਆਦਿਕਮ੍ਮੇ’’ਇਚ੍ਚਾਦਿ. ਤਤ੍ਰ ਵਿਭਤ੍ਯਨ੍ਤਪਤਿਰੂਪਕਂ ਯਥਾ – ‘‘ਚਿਰਸ੍ਸਂ, ਚਿਰਂ, ਚਿਰੇਨਿ’’ਚ੍ਚਾਦਿ. ਨਾਮਪਤਿਰੂਪਕਂ ਯਥਾ – ‘‘ਆਮ, ਸਾਹੁ, ਲਹੁ, ਓਪਾਯਿਕ’’ਮਿਚ੍ਚਾਦਿ. ਸਰਪਤਿਰੂਪਕਂ ਯਥਾ – ‘‘ਅ’’-ਇਚ੍ਚਾਦਿ. ਆਖ੍ਯਾਤਪਤਿਰੂਪਕਂ ਯਥਾ – ‘‘ਅਤ੍ਥਿ’’ਇਚ੍ਚਾਦਿ.
ਸਮ੍ਭਵੋ ਪਭਵੋ. ਉਦਿਣ੍ਣੇ ਪਵੁਦ੍ਧੇ ਵਡ੍ਢਨੇ. ਤਿਸ ਪੀਣਨੇ,ਤਿ, ਤਿਤ੍ਤਿ. ਨਿਯੋਗੇ ਨਿਯੋਜਨੇ. ਅਗ੍ਗੇ ਉਤ੍ਤਮੇ. ਤਪ੍ਪਰੇ ਤਪ੍ਪਧਾਨੇ. ਸਙ੍ਗੇ ਲਗ੍ਗਨੇ. ਪਕਾਰੇ ਸਦਿਸੇ, ਭੇਦੇ ਵਾ. ਅਨ੍ਤੋਭਾਵੇ ਪਕ੍ਖਿਤ੍ਤੇ. ਵਿਯੋਗੇ ਪਵਾਸੇ. ਅਵਯਵੇ ਪਦੇਸੇ. ਧਿਤਿਯਂ ਵੀਰਿਯੇ ਪਧਾਨੇ. ਏਤੇ ਚਤ੍ਥਾ ਧਾਤੁਸਂਯੋਗਤ੍ਥਾ ਵਾ ਨਾਮਸਂਯੋਗਤ੍ਥਾ ਵਾ ਭਵਨ੍ਤਿ. ਅਸਂਯੋਗਸ੍ਸ ਪਨ ਨਾਮਪਦਸ੍ਸ ਅਤ੍ਥੋ ‘‘ਪੋ ਸਿਯਾ ਪਰਮਤ੍ਥਸ੍ਮਿਂ, ਪਾਤੁ ਵਾਤੇਸੁ ਪਾ ਭਵੇ’’ਤਿ ਏਕਕ੍ਖਰਕੋਸੇ [ਏਕਕ੍ਖਰਕੋਸ ੭੩ ਗਾਥਾ] ਵੁਤ੍ਤੋ.
੧੧੬੪. ਵਿਕ੍ਕਮੋ ਪਧਾਨਂ.
੧੧੬੫-੧੧੬੭. ਸਨ੍ਯਾਸੇ ਨਿਕ੍ਖਿਤ੍ਤੇ. ਮੋਕ੍ਖੋ ਨਿਬ੍ਬਾਨਂ. ਰਾਸਿ ਨਿਕਰੋ. ਗੇਹੇ ਨਿਲਯੇ. ਆਦੇਸੋ ਆਚਿਕ੍ਖਨਂ. ਉਪਮਾਯ ਸਨ੍ਨਿਭੇ. ਅਚ੍ਚਯੋ ਅਤਿਕ੍ਕਮੋ. ਸਾਮੀਪ੍ਯੇ ਸਮੀਪਭਾਵੇ. ਉਪਰਤਿ ਉਪਸਮੋ. ਨੀਹਰਣਂ ਅਪਨਯਨਂ. ਆਵਰਣਂ ਨੀਵਰਣਂ [ਆਹਰਣਂ ਗਹਣਂ (ਕ.)].
੧੧੬੮. ਉਦ੍ਧਕਮ੍ਮੇ ਉਯ੍ਯਾਨੇ. ਵਿਯੋਗੇ ਉਪ੍ਪਾਸਿਤੇ. ਅਤ੍ਥਲਾਭੋ ਉਪ੍ਪਤ੍ਤਿ. ਪਬਲਤ੍ਤੇ ਮਹਾਬਹਲਤ੍ਤੇ. ਦਕ੍ਖਗ੍ਗਤਾਸੂਤਿ ਦਕ੍ਖਭਾਵੇ, ਅਗ੍ਗਭਾਵੇ ਚ. ਸਤ੍ਤਿਯਂ, ਮੋਕ੍ਖੇ ਨਿਬ੍ਬਾਨੇ ਚ.
੧੧੬੯. ਦੁ ਚ ਅਭਾਵੇ ਦੁਸ੍ਸੀਲੋ, ਦੁਪ੍ਪਞ੍ਞੋ. ਅਸਮਿਦ੍ਧਿਯਂ ਦੁਬ੍ਭਿਕ੍ਖਂ. ਅਨਨ੍ਦਨਂ ਅਮੋਦਨਂ.
੧੧੭੦. ਸਮਨ੍ਤਤ੍ਤਸਮਿਦ੍ਧੀਸੂਤਿ ਸਮਨ੍ਤਭਾਵੇ, ਸਮਿਦ੍ਧਿਯਞ੍ਚ. ਸਙ੍ਗਤੇ ਸਹਿਤੇ. ਵਿਧਾਨੇ ਕਰਣੇ. ਪਭਵੋ ਸਮ੍ਭਵੋ. ਪੁਨਪ੍ਪੁਨਕ੍ਰਿਯਾ ਪੁਨਪ੍ਪੁਨਕਰਣਂ.
੧੧੭੧-੧੧੭੨. ਅਤਿਸਯੋ ਅਤ੍ਰ ਅਧਿਮਤ੍ਤਂ. ਭੁਸਤ੍ਥੋ ਸਮਨ੍ਤਤ੍ਥੋ, ਤੇਨ ਸਮਨ੍ਤ ਪਰਿਯਾਯੋਪਿ ਭੁਸਸਦ੍ਦੋ ਅਤ੍ਥੀਤਿ ਵੇਦਿਤਬ੍ਬੋ. ਇਸ੍ਸਰਿਯੋ ਪਭੂਤਿ. ਅਚ੍ਚਯੇ ਅਤਿਕ੍ਕਮੇ. ਕਲਹੇ ਵਿਗ੍ਗਹੇ. ਭਾਸੇ ਕਥਨੇ, ‘‘ਭਾਸਾਯਾ’’ਤਿਪਿ ਪਾਠੋ. ਕੁਚ੍ਛਨੇ ਕੁਚ੍ਛਾਯਂ. ਅਨਭਿਮੁਖਤ੍ਥੇ ਵਿਮੁਖੋ. ਮੋਹੋ ਵਿਮਤਿ. ਪਧਾਨੇ ਵਿਸਿਟ੍ਠੇ. ਦਕ੍ਖਤਾ ਛੇਕਤਾ. ਖੇਦੇ ਪਰਿਸ੍ਸਮੇ.
੧੧੭੩. ਜਾਨਨੇ ਅਵਗਤੇ. ਅਧੋਭਾਗੇ ਅਵਂਸਿਰੇ. ਅਨਿਚ੍ਛਯੇ ਅਨਿਣ੍ਣਯੇ. ਪਰਿਭਵੇ ਅਵਞ੍ਞਾਤੇ. ਦੇਸੋ ਚ ਬ੍ਯਾਪਨਞ੍ਚ ਹਾਨਿ ਚਾਤਿ ਦ੍ਵਨ੍ਦੋ. ਵਚੋਕ੍ਰਿਯਾਯ ਵਚਨਕ੍ਰਿਯਾਯਂ. ਥੇਯ੍ਯੇ ਚੋਰਿਯੇ. ਅਞ੍ਞਾਣੇ ਚ ਪਤ੍ਤਿਆਦਿਕੇ ਚ.
੧੧੭੪. ਪਚ੍ਛਾਤ੍ਥੇ ਅਨੁਚਰੋ. ਭੁਸਤ੍ਥੇ ਅਨੁਗ੍ਗਤੋ. ਸਦਿਸੇ ਅਨੁਰੂਪੋ. ਅਨੁਵਤ੍ਤਿਯਂ ਅਨ੍ਵੇਤਿ. ਹੀਨੇ ਅਨੁ ਸਾਰਿਪੁਤ੍ਤਂ ਪਞ੍ਞਵਨ੍ਤੋ. ਤਤਿਯਤ੍ਥੇ ਨਦਿਮਨ੍ਵਵਸਿਤਾ ਬਾਰਾਣਸੀ. ਦੇਸੇ, ਲਕ੍ਖਣੇ, ਵਿਚ੍ਛਾਯਂ, ਇਤ੍ਥਮ੍ਭੂਤੇ, ਭਾਗਾਦਿਕੇ ਚ ਅਨੁ. ਲਕ੍ਖਣੇ ਰੁਕ੍ਖ’ਮਨੁ ਵਿਜ੍ਜੋਤਤੇ ਚਨ੍ਦੋ. ਵਿਚ੍ਛਾਯਂ ਰੁਕ੍ਖਂ ਰੁਕ੍ਖਮਨੁ ਤਿਟ੍ਠਤਿ. ਇਤ੍ਥਮ੍ਭੂਤੇ ਸਾਧੁ ਦੇਵਦਤ੍ਤੋ ਮਾਤਰ’ਮਨੁ. ਭਾਗੇ ਯਦੇਤ੍ਥ ਮਂ ਅਨੁ ਸਿਯਾ.
੧੧੭੫. ਆਲਿਙ੍ਗਨੇ ਪਰਿਸ੍ਸਜਤਿ. ਦੋਸਕ੍ਖਾਨੇ ਪਰਿਭਾਸੇਤ੍ਵਾ. ਨਿਵਾਸਨੇ ਵਤ੍ਥਂ ਪਰਿਦਹਿਤ੍ਵਾ. ਅਵਞ੍ਞੋ ਪਰਿਭਵੋ. ਆਧਾਰੇ ਭੋਜਨੇ ਸੋਕੇ ਬ੍ਯਾਪਨੇ. ਤਤ੍ਵੇ ਸਭਾਵੇ. ਲਕ੍ਖਣਾਦੋ ਲਕ੍ਖਣਵਿਚ੍ਛਾਇਤ੍ਥਮ੍ਭੂਤਭਾਗੇ.
੧੧੭੬. ਵਿਸਿਟ੍ਠੇ ਅਭਿਧਮ੍ਮੋ. ਉਦ੍ਧਕਮ੍ਮੇ ਸਾਰੁਪ੍ਪੇ ਵੁਦ੍ਧਿਯਂ ਪੂਜਾਯਂ ਅਧਿਕੇ. ਕੁਲੇ ਅਭਿਜਨੋ. ਅਸਚ੍ਚੇ ਲਕ੍ਖਣਾਦਿਮ੍ਹਿ ਚਤੁਬ੍ਬਿਧੇ [‘ਅਭਿਰਭਾਗੇ (ਪਾ.੧.੪.੯੧)’ ਤਿ ਅਭਿਸ੍ਸ ਭਾਗਵਜ੍ਜਿਤੇਸੁ ਲਕ੍ਖਣਾਦੀਸੁ ਕਮ੍ਮਪ੍ਪਵਚਨੀਯਸਞ੍ਞਾ ਵੁਤ੍ਤਾ (ਰੂਪਸਿਦ੍ਧਿ-ਕਾਰਕਤਣ੍ਡੇ)].
੧੧੭੭. ਅਧਿਕੇ ਇਸ੍ਸਰੇ ਪਾਠੇ ਉਚ੍ਚਾਰਣੇ, ਅਧਿਟ੍ਠਾਨੇ ਪਾਪੁਣਨੇ ਨਿਚ੍ਛਯੇ ਉਪਰਿਭਾਗਾਦਿਕੇ ਭਟਨੇ ਭਤ੍ਤਿਯਂ ਵਿਸੇਸਨੇ ਚ ਅਧਿ.
੧੧੭੮-੧੧੭੯. ਵਾਮਾਦਾਨੇ ਇਤਿ ਪਾਠੇ ਵਾਮੇ ਪਟਿਲੋਮੇ, ਆਦਾਨੇ ਗਹਣੇ. ਵਾਚਾਦਾਨੇ ਪਚ੍ਚਸ੍ਸੋਸਿ. ਪਟਿਨਿਧਿਮ੍ਹਿ ਮੁਖ੍ਯਸਦਿਸੇ ਬੁਦ੍ਧਸ੍ਮਾ ਪਤਿ. ਪਟਿਬਾਧੇ ਨਿਵਤ੍ਤਨੇ. ਪਟਿਚ੍ਚਤ੍ਥੇ ‘‘ਪਟਿਚ੍ਚਾ’’ਤਿ ਪਦਸ੍ਸ ਅਤ੍ਥੇ. ਲਕ੍ਖਣਾਦਿਕੇ ਚਤੁਬ੍ਬਿਧੇ.
੧੧੮੦-੧੧੮੧. ਸਮੀਪੇ ਆਦਿਕਮ੍ਮਨਿ ਮਰਿਯਾਦੇ ਉਦ੍ਧਕਮ੍ਮਨਿ ਇਚ੍ਛਾਯਂ ਬਨ੍ਧਨੇ ਅਭਿਵਿਧਿਮ੍ਹਿ ਚ ਆ. ਕਿਚ੍ਛੇ ਈਸਤ੍ਥੇ ਨਿਵਤ੍ਤਿਯਞ੍ਚ ਅਪ੍ਪਸਾਦੇ ਆਸੀਸਨੇ ਸਰਣੇ ਵਾਕ੍ਯਸਰਣੇ ਆ ਏਵਂ ਅਨੁਸ੍ਸਰਂ. ਪਤਿਟ੍ਠਾਯਂ, ਵਿਮ੍ਹਯਾਦੀਸੁ ਚ ਆ.
੧੧੮੨. ਭੂਤਭਾਵੇ ਅਤੀਤੋ.
੧੧੮੩. ਸਮ੍ਭਾਵਨੇ ਅਪਿ ਦਿਬ੍ਬੇਸੁ ਕਾਮੇਸੁ, ਰਤਿਂ ਸੋ ਨਾਧਿਗਚ੍ਛਤਿ [ਧ. ਪ. ੧੮੭]. ਸਮ੍ਭਾਵਨਮਧਿਕਤ੍ਥਵਚਨੇਨ ਅਞ੍ਞਤ੍ਰ ਸਤ੍ਤਿਯਾ ਅਵਿਘਾਤੋ. ਸਂਵਰਣੇ ਅਪਿਧਾਨਂ.
੧੧੮੪-੧੧੮੫. ਅਪਗਤੋ ਅਪੇਤੋ. ਉਪਪਤ੍ਤਿਯਂ ਯੁਤ੍ਤਿਯਂ ਉਪੇਕ੍ਖਾ. ਆਧਿਕ੍ਯੇ ਉਪਖਾਰਿਯਂ ਦੋਣੋ. ਪੁਬ੍ਬਕਮ੍ਮਨਿ ਬੁਦ੍ਧੋਪਕ੍ਕਮਂ ਕਿਲੇਸਚ੍ਛੇਦੋ. ਗਯ੍ਹਾਕਾਰੇ ਪਚ੍ਚੁਪਟ੍ਠਾਨਂ. ਉਪਰਿਤ੍ਤੇ ਉਪਰਿਭਾਵੇ ਉਪਪਨ੍ਨੋ. ਅਨਸਨੇ ਉਪਵਾਸੋ.
੧੧੮੬. ਉਪਦੇਸੇ ਏਵਂ ਤੇ ਅਭਿਕ੍ਕਮਿਤਬ੍ਬਂ, ਏਵਂ ਤੇ ਪਟਿਕ੍ਕਮਿਤਬ੍ਬਂ. ਵਚਨਪਟਿਗ੍ਗਾਹੇ ਏਵਂ ਹੋਤੁ. ਇਦਮਤ੍ਥੇ ਇਦਂਸਦ੍ਦਸ੍ਸ ਅਤ੍ਥੇ.
੧੧੮੭. ਸਮੁਚ੍ਚਯੇ ਕੇਵਲਸਮੁਚ੍ਚਯੇ –
ਚੀਵਰਂ ਪਿਣ੍ਡਪਾਤਞ੍ਚ, ਪਚ੍ਚਯਂ ਸਯਨਾਸਨਂ;
ਅਦਾਸਿ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ [ਜਾ. ੨.੨੨.੫੫੧].
ਸਮਾਹਾਰੇ ਚਕ੍ਖੁ ਚ ਸੋਤਞ੍ਚ ਚਕ੍ਖੁਸੋਤਂ. ਅਨ੍ਵਾਚਯੋ ਏਕਂ ਪਧਾਨਭਾਵੇਨ ਵਤ੍ਵਾ ਇਤਰਸ੍ਸ ਅਪ੍ਪਧਾਨਭਾਵੇਨ ਵਚਨਂ, ਤਸ੍ਮਿਂ. ਸੀਲਂ ਰਕ੍ਖਾਹਿ, ਦਾਨਞ੍ਚ ਦੇਹਿ. ਇਤਰੀਤਰੇ ਸਮਣੋ ਚ ਬ੍ਰਾਹ੍ਮਣੋ ਚ ਸਮਣਬ੍ਰਾਹ੍ਮਣਾ. ਤਤ੍ਰ ਕੇਵਲਸਮੁਚ੍ਚਯੋ ਚ ਅਨ੍ਵਾਚਯੋ ਚ ਸਮਾਸੇ ਨਤ੍ਥਿ, ਇਤਰਦ੍ਵਯਂ ਸਮਾਸੇਯੇਵ.
੧੧੮੮. ਪਕਾਰੋ ਤੁਲ੍ਯੋ, ਭੇਦੋ ਚ. ਪਦਤ੍ਥਸ੍ਸ ਵਿਪਲ੍ਲਾਸੇ ਗੋਤਿ ਅਯਮਾਹੇਤਿ. ਸਮਾਪਨੇ ਇਚ੍ਛਿਤਸ੍ਸ ਪਦਸ੍ਸ ਪਰਿਨਿਟ੍ਠਾਪਨੇ.
੧੧੮੯. ਪਜ੍ਜਂ ਵਾਸਦ੍ਦਸ੍ਸਤ੍ਥੇ. ਵਵਤ੍ਥਿਤਵਿਭਾਸਾਯਂ ਵਾ ਪਰੋ ਅਸਰੂਪਾ. ਵਿਅਵਪੁਬ੍ਬੋ ਠਾ ਗਤਿਨਿਵਤ੍ਤਿਯਂ, ਤੋ, ਠਾਤਿਸ੍ਸ ਥੋ, ਅਸਰੂਪਦ੍ਵਿਤ੍ਤਞ੍ਚ. ਵਵਤ੍ਥਿਤਾ ਨਿਯਮਿਤਾ ਵਿਭਾਸਾ ਵਵਤ੍ਥਿਤਵਿਭਾਸਾ. ਅਵਸ੍ਸਗ੍ਗੇਤਿ ਅਵਪੁਬ੍ਬੋ ਸਜ ਵਿਸ੍ਸਜ੍ਜਨਾਲਿਙ੍ਗਨਨਿਮ੍ਮਾਨੇਸੁ.
੧੧੯੦. ਭੂਸਨੇ ਅਲਙ੍ਕਾਰੇ. ਵਾਰਣੇ ਨਿਵਾਰਣੇ. ਪਰਿਯਤ੍ਤਿ ਪਰਿਯਾਪੁਣਨਤਾ, ਯੁਤ੍ਤਤ੍ਥੇਪਿ ਅਲਂ. ਅਥੋ ਅਥਸਦ੍ਦਾ ਅਨਨ੍ਤਰਾਦੀਸੁ ਚਤੂਸੁ ਅਤ੍ਥੇਸੁ ਸਿਯੁਂ.
੧੧੯੧. ਪਸਂਸਾਦੀਸੁ ਤੀਸੁ. ਸ੍ਵੀਕਾਰੇ ਪਟਿਞ੍ਞਾਣੇ. ਆਦਿਨਾ ਪਕਾਸਤ੍ਥਸਮ੍ਭਾਬ੍ਯਾਕੋਧਾਦਿਕੇ ਚਤ੍ਥੇ ਨਾਮਸਦ੍ਦੋ. ਅਵਧਾਰਣਮੇਵਤ੍ਥੋ.
੧੧੯੨. ਅਨੁਞ੍ਞਾ ਅਨੁਮਤਿ. ਸਨ੍ਤਾਨਂ ਅਨੁਨਯੋ. ਆਲਪਨਂ ਸਮ੍ਬੋਧਨਂ. ਵਤਸਦ੍ਦੋ ਏਕਂਸੇ ਦਯਾਯਂ ਕਰੁਣਾਯਂ ਹਾਸੇ ਪਹਾਸੇ ਖੇਦੇ ਪਰਿਸ੍ਸਮੇ ਆਲਪਨੇ ਵਿਮ੍ਹਯੇ ਅਚ੍ਛਰਿਯੇ ਚ ਸਿਯਾ.
੧੧੯੩. ਵਾਕ੍ਯਾਰਮ੍ਭੇ ‘‘ਹਨ੍ਦ ਵਦਾਮਿ ਤੇ’’ਤਿ. ਵਿਸਾਦੇ ਖੇਦੇ. ਯਾਵ ਤਾਵ ਤੂਤਿ ਯਾਵਤਾਵਸਦ੍ਦਾ ਸਾਕਲ੍ਯੇ ਨਿਰਵਸੇਸੇ. ਯਾਵਦਤ੍ਥਂ ਤਾਵ ਗਹਿਤਂ. ਮਾਨੇ ਪਮਾਣੇ. ‘‘ਯਾਵ ਪਮਾਣਮਰਿਯਾਦਾ-ਵਧਾਰਣਤ੍ਥਕਂ ਮਤ’’ਮਿਤਿ ਭਾਗੁਰਿ. ਅਵਧਿਮ੍ਹਿ ਪਰਿਚ੍ਛਿਨ੍ਨੇ.
੧੧੯੪. ਪੁਰਤ੍ਥਾਸਦ੍ਦੋ ਪਾਚਿਯਂ ਦਿਸਾਯਂ ਇਚ੍ਚਤ੍ਥੇ, ਪੁਰਤ੍ਥੇ ਵਕ੍ਖਮਾਨੇ, ਅਗ੍ਗਤੋ ਸਮੁਦ੍ਧੇ ਇਚ੍ਚਤ੍ਥੇ ਚ ਪਠਮੇਪਿ ਆਦਿਮ੍ਹਿ ਵਤ੍ਤਤਿ. ਪਬਨ੍ਧੇ ਵਾਕ੍ਯਰਚਨਾਯਂ ਵਾਕ੍ਯਪਬਨ੍ਧੇ ਪੁਰਾਣਾਦਿਕੇ. ਚਿਰਨ੍ਤਰੇ ਅਤੀਤਭੂਤੇ. ਨਿਕਟੇ ਸਨ੍ਨਿਹਿਤੇ. ਆਗਾਮਿਕੇ ਅਨਾਗਤੇ.
੧੧੯੫. ਖਲੁਸਦ੍ਦੋ ਨਿਸੇਧੇ ਵਾਕ੍ਯਾਲਙ੍ਕਾਰੇ ਵਾਕ੍ਯਭੂਸਾਯਂ ਅਵਧਾਰਣੇ ਏਵਤ੍ਥੇ, ਪਸਿਦ੍ਧਿਯਞ੍ਚ ਵਤ੍ਤਤਿ. ਅਭਿਤੋਸਦ੍ਦੋ ਆਸਨ੍ਨੇ ਅਭਿਮੁਖੇ ਉਭਯਤੋ ਇਚ੍ਚਤ੍ਥੇ, ਆਦਿਨਾ ਸੀਘੇ, ਸਾਕਲ੍ਯੇ ਚ ਅਤ੍ਥੇ ਵਤ੍ਤਤਿ. ਆਸਨ੍ਨੇ ਅਭਿਤੋਯਂ ਨਦੀ. ਅਭਿਮੁਖੇ ਅਭਿਤੋਵ ਤਾਤਾ. ਉਭਯਤੋਇਚ੍ਚਤ੍ਥੇ ਅਭਿਤੋ ਮਗ੍ਗਸ੍ਸ. ਸੀਘੇ ਅਭਿਤੋ ਅਧੀਯਿਤ੍ਵਾ. ਸਾਕਲ੍ਯੇ ਅਭਿਤੋ ਵਨਂ ਦਡ੍ਢਂ.
੧੧੯੬. ਯਦ੍ਯਪਿਸਦ੍ਦਤ੍ਥੇ ਅਨੁਗ੍ਗਹਣਗਰਹਤ੍ਥੇ. ਏਕਂਸਤ੍ਥੇ ਅਵਿਤਥਤ੍ਥੇ. ਅਥੋ ਪਨਸਦ੍ਦੋ ਵਿਸੇਸਸ੍ਮਿਂ ਅਤ੍ਥੇ, ਪਦਪੂਰਣਤ੍ਥੇ ਚ ਸਿਯਾ.
੧੧੯੭. ਹਿਸਦ੍ਦੋ ਕਾਰਣਾਦੀਸੁ ਚਤੂਸੁ ਅਤ੍ਥੇਸੁ ਵਤ੍ਤਤਿ. ਤੁਸਦ੍ਦੋ ਪਨ ਤਤ੍ਥ ਚਤੂਸੁ ਅਤ੍ਥੇਸੁ ਮਜ੍ਝੇ ਹੇਤੁਵਜ੍ਜੇ ਤਿਕੇ ਅਤ੍ਥੇ ਵਤ੍ਤਤਿ. ਕੁਸਦ੍ਦੋ ਪਾਪੇ ਈਸਤ੍ਥੇ ਕੁਚ੍ਛਨੇ ਜਿਗੁਚ੍ਛਾਯਞ੍ਚ.
੧੧੯੮. ਨੁਕਾਰੋ ਸਂਸਯੇ, ਪਞ੍ਹੇ ਚ. ਨਾਨਾਸਦ੍ਦੋ ਅਨੇਕਤ੍ਥੇ, ਵਜ੍ਜਨੇ ਚ. ਕਿਂਸਦ੍ਦੋ ਪੁਚ੍ਛਾਯਂ, ਜਿਗੁਚ੍ਛਾਯਞ੍ਚ, ਅਬ੍ਯਯੋ. ਤਿਲਿਙ੍ਗੋ ਚ, ਨਿਯਮੇ ਤੁ ਤਿਲਿਙ੍ਗੋਵ. ਵਾਰਿਮ੍ਹਿ ਉਦਕੇ. ਮੁਦ੍ਧਨਿ ਸੀਸੇ ਚ, ਕਂ ਸੁਖੇਪਿ, ਵੁਤ੍ਤਞ੍ਚ ਨਾਨਤ੍ਥਸਙ੍ਗਹੇ –
‘‘ਕੋ ਬ੍ਰਹ੍ਮਤ੍ਤਾਨੀਲਕ੍ਕੇਸੁ, ਸਮਾਨੇ ਸਬ੍ਬਨਾਮਿਕੇ;
ਪਾਵਕੇ ਚ ਮਯੂਰੇ ਚ, ਸੁਖਸੀਸਜਲੇਸੁ ਕ’’ਨ੍ਤਿ.
੧੧੯੯. ਅਮਾਸਦ੍ਦੋ ਸਹਤ੍ਥੇ, ਸਮੀਪਤ੍ਥੇ ਚ, ਅਮਾਵਾਸੀ, ਅਮਾਗਤੋ ਚ. ਪੁਨਸਦ੍ਦੋ ਭੇਦੇ ਵਿਸੇਸੇ. ਅਪਠਮੇ ਪੁਨ ਦਦਾਤਿ. ਕਿਰਸਦ੍ਦੋ ਅਨੁਸ੍ਸਵੇ ਅਨੁਕ੍ਕਮੇਨ ਸਵਨੇ, ਅਰੁਚਿਯਞ੍ਚ. ਉਦਸਦ੍ਦੋ ਅਪ੍ਯਤ੍ਥੇ ਪਞ੍ਹੇ. ਵਿਕਪ੍ਪਨੇ ਅਤ੍ਥਨ੍ਤਰਸ੍ਸ ਵਿਕਪ੍ਪਨੇ ਚ.
੧੨੦੦. ਪਚ੍ਛਾਸਦ੍ਦੋ ਪਤੀਚਿਯਂ ਦਿਸਾਯਂ. ਚਰਿਮੇ ਅਨਾਗਤੇ ਕਾਲੇ. ਸਾਮਿਸਦ੍ਦੋ ਤੁ ਅਦ੍ਧੇ ਭਾਗੇ, ਜਿਗੁਚ੍ਛਨੇ ਨਿਨ੍ਦਾਯਞ੍ਚ. ਅਦ੍ਧੇ ਭਾਗੇ ਸਾਮਿ ਵੁਤ੍ਤਂ, ਜਿਗੁਚ੍ਛਨੇਪਿ ਤਦੇਵ. ਪਾਤੁ ਪਕਾਸੇ ਪਕਾਸਨੀਯੇ, ਸਮ੍ਭਵੇ ਉਪ੍ਪਤ੍ਤਿਯਞ੍ਚ. ਮਿਥੋਸਦ੍ਦੋ ਅਞ੍ਞੋਞ੍ਞੇਇਚ੍ਚਤ੍ਥੇ, ਰਹੋਇਚ੍ਚਤ੍ਥੇ ਚ.
੧੨੦੧. ਹਾਸਦ੍ਦੋ ਖੇਦੇ, ਸੋਕੇ, ਦੁਕ੍ਖੇ ਚ. ਅਹਹਸਦ੍ਦੋ ਖੇਦੇ, ਵਿਮ੍ਹਯੇ ਅਬ੍ਭੁਤੇ ਚ. ਧਿਸਦ੍ਦੋ ਹਿਂਸਾਪਨੇ, ਨਿਨ੍ਦਾਯਞ੍ਚ. ਤਿਰਿਯਂ ਤਿਰੋਸਦ੍ਦਾ ਪਿਧਾਨੇ ਵਤ੍ਤਨ੍ਤਿ. ਤਿਰਿਯਂ ਕਤ੍ਵਾ ਕਣ੍ਡਙ੍ਗਤੋ, ਤਿਰੋਕਤ੍ਵਾ ਵਾ.
੧੨੦੨-੧੨੦੩. ਸਙ੍ਖ੍ਯਾਤਾਸਙ੍ਖ੍ਯਾਤਤ੍ਥਾਨਂ ਉਪਸਗ੍ਗਨਿਪਾਤਸਙ੍ਖ੍ਯਾਤਾਨਂ ਅਬ੍ਯਯਾਨਂ ਪਸਿਦ੍ਧੇ ਪਚੁਰਪ੍ਪਯੋਗੇ ਏਕਚ੍ਚੇ ਵਾ ਦਸ੍ਸੇਤ੍ਵਾ ਤਦਞ੍ਞੇਪਿ ਸਙ੍ਖੇਪਨਯੇਨ ਦਸ੍ਸੇਤੁਮਾਹ ‘‘ਤੁਨਿ’’ਚ੍ਚਾਦਿ. ਏਤ੍ਥ ਚ ਤੁਨਾਦਿਸਦ੍ਦੇਹਿ ਜ੍ਜੁਪਰਿਯਨ੍ਤੇਹਿ ਤਦਨ੍ਤਾਵ ਗਹਿਤਾ, ਨ ਹਿ ਕੇਵਲਾਨਂ ਏਤੇਸਂ ਅਬ੍ਯਯਭਾਵੋ ਸਮ੍ਭਵਤਿ. ਤਸ੍ਸਤ੍ਥੋ – ਤੁਨਪਚ੍ਚਯਨ੍ਤੋ ਚ ਤਥਾ ਤ੍ਵਾਨ ਤਵੇ ਤ੍ਵਾ ਤੁਂ ਧਾ ਸੋ ਥਾ ਕ੍ਖਤ੍ਤੁਂ ਤੋ ਥ ਤ੍ਰ ਹਿਞ੍ਚਨਂ ਹਿਂ ਹਂ ਧਿ ਹ ਯਕਾਰਤੋ ਹਿਂਧ ਧੁਨਾ ਰਹਿ ਦਾਨਿ, ਕਿਂਸ੍ਮਾ ਵੋ ਦਾਚਨਂ ਦਾਜ੍ਜਥਂ ਥਤ੍ਤਂ ਜ੍ਝਜ੍ਜੁਪਚ੍ਚਯਨ੍ਤੋ ਚ ਅਬ੍ਯਯੀਭਾਵਸਮਾਸੋ ਚ ਤੁਨਾਦੀਨਂ ਯਾਦੇਸਨ੍ਤੋ ਚ ਅਬ੍ਯਯਂ ਨਾਮ ਭਵੇਤਿ. ਪਯੋਗੋ ਯਥਾ – ‘‘ਕਾਤੁਨ, ਕਤ੍ਵਾਨ, ਕਾਤਵੇ, ਕਤ੍ਵਾ, ਕਾਤੁਂ, ਸਬ੍ਬਧਾ, ਸਬ੍ਬਸੋ, ਸਬ੍ਬਥਾ, ਚਤੁਕ੍ਖਤ੍ਤੁਂ, ਸਬ੍ਬਤੋ, ਸਬ੍ਬਤ੍ਥ, ਸਬ੍ਬਤ੍ਰ, ਕੁਹਿਞ੍ਚਨਂ, ਕੁਹਿਂ, ਕੁਹਂ, ਸਬ੍ਬਧਿ, ਇਹ, ਯਹਿਂ, ਇਧ, ਅਧੁਨਾ, ਏਤਰਹਿ, ਇਦਾਨਿ, ਕ੍ਵ, ਕੁਦਾਚਨਂ, ਕਦਾ, ਅਜ੍ਜ, ਕਥਂ, ਅਞ੍ਞਥਤ੍ਤਂ, ਏਕਜ੍ਝਂ, ਸਜ੍ਜੁ, ਉਪਨਗਰਂ, ਅਨ੍ਤੋਪਾਸਾਦਂ, ਅਭਿਵਨ੍ਦਿਯ’’ਇਚ੍ਚਾਦਿ. ਇਦਂ ਪਨ ਸਬ੍ਬੇਸਮ੍ਪਿ ਅਬ੍ਯਯਾਨਂ ਸਙ੍ਖੇਪਲਕ੍ਖਣਂ.
‘‘ਸਦਿਸਂ ਤੀਸੁ ਲਿਙ੍ਗੇਸੁ, ਸਬ੍ਬਾਸੁ ਚ ਵਿਭਤ੍ਤਿਸੁ;
ਵਚਨੇਸੁ ਚ ਸਬ੍ਬੇਸੁ, ਯਂ ਨ ਬ੍ਯੇਤਿ ਤਦਬ੍ਯਯ’’ਨ੍ਤਿ.
ਅਬ੍ਯਯਵਗ੍ਗਵਣ੍ਣਨਾ ਨਿਟ੍ਠਿਤਾ.
ਇਤਿ ਸਕਲਬ੍ਯਾਕਰਣਮਹਾਵਨਾਸਙ੍ਗਞਾਣਚਾਰਿਨਾ ਕਵਿਕੁਞ੍ਜਰਕੇਸਰਿਨਾ ਧੀਮਤਾ ਸਿਰਿਮਹਾਚਤੁਰਙ੍ਗਬਲੇਨ ਮਹਾਮਚ੍ਚੇਨ ਵਿਰਚਿਤਾਯਂ ਅਭਿਧਾਨਪ੍ਪਦੀਪਿਕਾਵਣ੍ਣਨਾਯਂ ਸਾਮਞ੍ਞਕਣ੍ਡਵਣ੍ਣਨਾ ਸਮਤ੍ਤਾ.
ਨਿਗਮਨਵਣ੍ਣਨਾ
੧. ‘‘ਸਗ੍ਗਕਣ੍ਡੋ ਚਾ’’ਤ੍ਯਾਦਿਨਾ ਅਭਿਧਾਨਪ੍ਪਦੀਪਿਕਾਯਂ ਕਪਾਲਤੇਲਵਟ੍ਟਿਸਦਿਸੇਨ ਕਣ੍ਡਤ੍ਤਯੇਨ ਸਮਙ੍ਗਿਤਾ ਦੀਪਿਤਾ.
੨. ‘‘ਤਿਦਿਵੇ’’ਤ੍ਯਾਦਿਨਾ ਤੋਟਕੇਨ ਤਸ੍ਸਾ ਪਯੋਜਨਂ ਕਥਿਤਂ. ਤਸ੍ਸਤ੍ਥੋ – ਯੋ ਨਰੋ ਕਤ੍ਤੁਭੂਤੋ ਤਿਦਿਵੇ ਦੇਵਲੋਕੇ, ਬ੍ਰਹ੍ਮਲੋਕੇ ਚ ਮਹਿਯਂ ਮਨੁਸ੍ਸਲੋਕੇ, ਭੁਜਗਾਵਸਥੇ ਨਾਗਲੋਕੇ ਚਾਤਿ ਏਤੇਸੁ ਤੀਸੁ ਠਾਨੇਸੁ ਸਨ੍ਨਿਹਿਤਾਨਂ ਸਕਲਤ੍ਥਾਨਂ ਸਬ੍ਬੇਸਂ ਅਭਿਧੇਯ੍ਯਾਨਂ ਸਮਵ੍ਹਯਸ੍ਸ ਅਭਿਧਾਨਸ੍ਸ ਦੀਪਨਿਯਂ ਪਕਾਸਨਿਯਂ ਇਹ ਅਭਿਧਾਨਪ੍ਪਦੀਪਿਕਾਯਂ ਸਵਨਧਾਰਣਾਦਿਨਾ ਕੁਸਲੋ ਛੇਕੋ ਹੋਤਿ, ਸ ਨਰੋ ਮਹਾਮੁਨਿਨੋ ਸਮ੍ਮਾਸਮ੍ਬੁਦ੍ਧਸ੍ਸ ਵਚਨੇ ਸੁਤ੍ਤਾਭਿਧਮ੍ਮਵਿਨਯਸਙ੍ਖਾਤੇ ਵਚਨੇ ਪਟੁ ਛੇਕੋ ਹੋਤਿ, ਪਟੁਤ੍ਤਾਯੇਵ ਮਤਿਮਾ ਨਾਮ ਹੋਤੀਤਿ.
੩-੯. ਇਦਾਨਿ ਯਸ੍ਸ ਰਞ੍ਞੋ ਵਿਹਾਰੇ ਵਸਿਤ੍ਵਾ ਅਯਂ ਗਨ੍ਥੋ ਵਿਰਚਿਤੋ, ਤਸ੍ਸ ਨਾਮਗੁਣਨਿਵਾਸਕਰਣਪ੍ਪਕਾਰਵਿਹਾਰਗੁਣਨਾਮਾਦੀਨਿ ਦਸ੍ਸੇਤ੍ਵਾ ਅਤ੍ਤਨੋ ਚ ਨਾਮਗੁਣੇ ਦਸ੍ਸੇਤੁਂ ਸਤ੍ਤ ਗਾਥਾ ਵੁਤ੍ਤਾ.
ਤਤ੍ਰ ਦੁਤਿਯਾ ਭੁਜਙ੍ਗਪ੍ਪਯਾਤਂ ਨਾਮ. ਤਾਸਂ ਅਯਂ ਸਮ੍ਬਨ੍ਧਾਧਿਪ੍ਪਾਯਾ ਅਤ੍ਥਵਣ੍ਣਨਾ – ਯੋ ਪਰਕ੍ਕਮਭੁਜੋ ਨਾਮ ਭੂਪਾਲੋ ਰਾਜਾ ਕਾਰੇਸਿ, ਰਕ੍ਖੇਸੀਤਿ ਚ ਇਮਿਨਾ ਸਮ੍ਬਨ੍ਧੋ. ਕਿਂਗੁਣੋ ਸੋ ਰਾਜਾ? ਗੁਣਭੂਸਨੋ ਸਦ੍ਧਾਦਿਗੁਣਾਲਙ੍ਕਾਰਧਰੋ. ਤੇਜਸ੍ਸੀ ਤੇਜੋਯੁਤ੍ਤੋ. ਜਯੀ ਅਰਿਜਯੇਨ ਯੁਤ੍ਤੋ. ਕੇਸਰਿਵਿਕ੍ਕਮੋ ਕੇਸਰਸੀਹੋ ਵਿਯ ਸੂਰਗੁਣਯੁਤ੍ਤੋ, ਵੀਰਿਯਵਾ ਚ. ਸ ਕਤ੍ਥ ਨਿਵਾਸੀ? ਸੋ ਰਾਜਾ ਲਙ੍ਕਾਯਮਾਸਿ ਲਙ੍ਕਾਨਾਮਕੇ ਦੀਪੇ ਨਿਵਾਸਨਸੀਲੋ. ਚਿਰਂ ਚਿਰਕਾਲਂ ਵਿਭਿਨ੍ਨਂ ਤਿਧਾ ਵਿਭਿਨ੍ਨਂ ਨਿਕਾਯਤ੍ਤਯਸ੍ਮਿਂ ਨਿਕਾਯਤ੍ਤਯਂ ਭਿਕ੍ਖੁਸਙ੍ਘਂ ਸਮ੍ਮਾ ਨਯੇਨ ਹੇਤੁਨਾ ਸਮਗ੍ਗੇ ਸਮਗ੍ਗਂ ਕਾਰੇਸਿ, ਕਾਰਿਤਨ੍ਤੋਯਂ ਕਰੋਤੀਤਿ ਕਮ੍ਮਿਕੋ, ਤਥਾ ਸਦੇਹਂਵ ਅਤ੍ਤਨੋ ਕਾਯਂ ਇਵ ਨਿਚ੍ਚਾਦਰੋ ਹੁਤ੍ਵਾ ਦੀਘਕਾਲਂ ਮਹਗ੍ਘੇਹਿ ਚ ਪਚ੍ਚਯੇਹਿ ਤਂ ਨਿਕਾਯਤ੍ਤਯਂ ਰਕ੍ਖੇਸਿ.
ਤਥਾ ਯੇਨ ਰਞ੍ਞਾ ਯਥਾ ਕਿਤ੍ਤਿਯਾ ਅਤ੍ਤਨੋ ਸਦ੍ਧਾਦਿਕਿਤ੍ਤਿਯਾ ਕਰਣਭੂਤਾਯ ਲਙ੍ਕਾ ਅਤ੍ਤਨੋ ਨਿਵਾਸਨਟ੍ਠਾਨਭੂਤਾ ਕਮ੍ਮਭੂਤਾ ਸਮ੍ਬਾਧੀਕਤਾ ਸਙ੍ਕਟੀਕਤਾ ਅਨੋਕਾਸੀਕਤਾ, ਤਥਾ ਵਿਹਾਰੇਹਿ ਗਾਮੇਹਿ ਆਰਾਮੇਹਿ ਖੇਤ੍ਤੇਹਿ ਵਾਪੀਹਿ ਚ ਲਙ੍ਕਾ ਸਮ੍ਬਾਧੀਕਤਾ.
ਤਥਾ ਯਸ੍ਸ ਰਞ੍ਞੋ ਸਬ੍ਬਕਾਮਦਦਂ ਅਞ੍ਞੇਹਿ ਅਸਾਧਾਰਣਂ ਅਨੁਗ੍ਗਹਂ ਪਤ੍ਵਾ ਪਾਪੁਣਨਹੇਤੁ ਅਹਂ ਵਿਬੁਧਗੋਚਰਂ ਪਣ੍ਡਿਤਵਿਸਯਂ ਗਨ੍ਥਕਾਰਤ੍ਤਂ ਪਤ੍ਤੋ, ਤੇਨ ਰਞ੍ਞਾ ਕਾਰਿਤੇ ਪਾਸਾਦਗੋਪੁਰਾਦਿਵਿਭੂਸਿਤੇ, ਸਗ੍ਗਕਣ੍ਡੇ ਦੇਵਲੋਕਸ੍ਸ ਕਣ੍ਡਸਦਿਸੇ, ਸਤੋਯਾਸਯਸ੍ਮਿਂ ਸਾਦੁਸਲਿਲਾਸਯਸਮਨ੍ਨਾਗਤੇ, ਪਟਿਬਿਮ੍ਬਿਤੇ ਭਗਵਤੋ ਨਿਵਾਸਨਟ੍ਠਾਨਜੇਤਵਨਮਹਾਵਿਹਾਰਸ੍ਸ ਪਟਿਬਿਮ੍ਬਭੂਤੇ, ਸਾਧੁਸਮ੍ਮਤੇ ਸਾਧੁਵਿਹਾਰੋਤਿ ਸਮ੍ਮਤੇ, ਸਾਧੂਹਿ ਵਾ ਸਮ੍ਮਤੇ ਸਰੋਗਾਮਸਮੂਹਮ੍ਹਿ ਸਲਿਲਾਸਯਭਿਕ੍ਖਾਚਾਰਯੁਤ੍ਤਗਾਮਸਮੂਹਸਮਨ੍ਨਾਗਤੇ ਮਹਾਜੇਤਵਨਾਖ੍ਯਮ੍ਹਿ ਵਿਹਾਰੇ ਵਸਤਾ ਨਿਵਾਸਂ ਕੁਬ੍ਬਤਾ ਸਨ੍ਤਵੁਤ੍ਤਿਨਾ ਸਨ੍ਤਚਾਰਿਨਾ ਸਦ੍ਧਮ੍ਮਟ੍ਠਿਤਿਕਾਮੇਨ ਧੀਮਤਾ ਅਤਿਸਯਞਾਣਯੁਤ੍ਤੇਨ ਮੋਗ੍ਗਲ੍ਲਾਨੇਨ ਸਮ੍ਮਾਸਮ੍ਬੁਦ੍ਧਸ੍ਸ ਦੁਤਿਯਅਗ੍ਗਸਾਵਕਭੂਤਸ੍ਸ ਆਯਸ੍ਮਤੋ ਇਦ੍ਧਿਮਤੋ ਮਹਾਮੋਗ੍ਗਲ੍ਲਾਨਸ੍ਸ ਨਾਮਧੇਯ੍ਯੇਨ ਥੇਰੇਨ ਏਸਾ ਅਭਿਧਾਨਪ੍ਪਦੀਪਿਕਾ ਰਚਿਤਾਤਿ.
ਨਿਗਮਨਕਥਾ
ਯਦ੍ਯਤ੍ਰ ਦੋਸੋਣੁਪਮਾਣਸਮ੍ਭਵੋ,
ਗੁਣੀਸੁ ਵੀਧਿਮ੍ਪਿ ਤਥਾ ਵਿਗਾਹਤੇ;
ਯਥਾ ਜਲਂ ਭੋਜਨਮ੍ਪਿ ਜਨ੍ਤੁਵਾ,
ਚਤੁਪ੍ਪਦੋ ਵਾਪ੍ਯਚਰੋ ਕਣਣ੍ਯਪਿ.
ਅਸਮ੍ਪਵੇਦਿਦਸ੍ਸਨਾਯ ਭਾਸਿਤੇ,
ਗੁਣੋ ਚ ਦੋਸੋ ਚ ਸਦਾ ਵਿਵਿਜ੍ਜਰੇ;
ਤਤੋ ਬੁਧਾ ਮੇ ਨਵਧਾਨਤਾ ਭਵਂ,
ਖਮਨ੍ਤੁ ਦੋਸਂ ਗੁਣਤਂ ਨਯਨ੍ਤੁ ਵਾ.
ਯੋ ਸੀਹਸੂਰੋ ਸਿਤਕੁਞ੍ਜਰਿਨ੍ਦੋ,
ਰਾਜਾਧਿਰਾਜਾ ਅਹੁ ਤਮ੍ਬਦੀਪੇ;
ਦੁਬ੍ਬਾਰਨਾਗਾਦਿਜਿਤੋ ਨਰਿਨ੍ਦੋ,
ਸੁਕਨ੍ਤਭੀਮਾਦਿਗੁਣੋਪਪਨ੍ਨੋ.
ਤਨ੍ਨਾਮਧੇਯ੍ਯੋ ਤਦਨੁਬ੍ਬਾਦਜਾਤੋ,
ਸਦ੍ਧਾਦਿਯੁਤ੍ਤੋ ਚਤੁਸੇਤਿਭਿਨ੍ਦੋ;
ਨਾਗਾਦਿਥਾਮੋ ਅਤਿਦੁਪ੍ਪਸਯ੍ਹੋ,
ਉਲ਼ਾਰਪਞ੍ਞੋ ਧਿਤਿਮਾ ਯਸਸ੍ਸੀ.
ਤੇਨਾਹਮਚ੍ਚਨ੍ਤਮਨੁਗ੍ਗਹੀਤੋ,
ਅਨਞ੍ਞਸਾਧਾਰਣਸਙ੍ਗਹੇਨ;
ਸਙ੍ਖੇਪਤੋਕਾਸਿਮਿਮਂ ਵਿਸੁਦ੍ਧਿ-
ਸਂਵਣ੍ਣਨਂ ਸੋਤੁਹਿਤਂ ਸੁਬੋਧਂ.
ਰਾਜਾ ਪਜਂ ਰਕ੍ਖਤੁ ਸਪ੍ਪਜਂਵ,
ਧਮ੍ਮਞ੍ਚ ਲੋਕਾਪਿ ਸਮਾਚਰਨ੍ਤੁ;
ਪੂਰੇਨ੍ਤੁ ਅਤ੍ਥਾ ਸੁਪਕਪ੍ਪਿਤਾ ਚ,
ਕਾਲੇਨ ਦੇਵੋਪਿ ਪਵਸ੍ਸਤੂਤਿ.
ਅਭਿਧਾਨਪ੍ਪਦੀਪਿਕਾਟੀਕਾ ਨਿਟ੍ਠਿਤਾ.