੩. ਅਨੇਕਤ੍ਥਵਗ੍ਗਵਣ੍ਣਨਾ

੭੭੭. ਇਦਾਨਿ ਸਂਕਿਣ੍ਣਵਗ੍ਗਤੋ ਅਨਨ੍ਤਰਂ ਗਾਥਾਤੋ, ਗਾਥਾਯ ਅਦ੍ਧਤੋ, ਪਾਦਤੋ ਚਾਤਿ ਇਮੇਹਿ ਤੀਹਿ ਪਕਾਰੇਹਿ ਅਨੇਕਤ੍ਥੇ ਨਾਨਤ੍ਥੇ ਸਮਯਾਦਿਕੇ ਸਦ੍ਦੇ ਕਮਾ ਕਮਤੋ ਪਵਕ੍ਖਾਮਿ. ਏਤ੍ਥ ਅਨੇਕਤ੍ਥਵਗ੍ਗੇ ਏਕਸ੍ਸ ਭੂਤਸਦ੍ਦਾਦਿਕਸ੍ਸ ਯਾ ਪੁਨਰੁਤ੍ਤਤਾ, ਸਾ ਥੀਪੁਨ੍ਨਪੁਂਸਕਸਙ੍ਖਾਤਲਿਙ੍ਗਵਿਸੇਸਤ੍ਥਂ ਕਤਾ.

੭੭੮. ਸਮਵਾਯਤ੍ਥਾਦਿਵਾਚਕੇ ਬਹਵੋ ਸਮਯਸਦ੍ਦੇ ਜਾਤਿਯਾ ਸਙ੍ਗਯ੍ਹ ‘‘ਸਮਯੋ’’ਤਿ ਏਕਵਚਨਨਿਦ੍ਦੇਸੋ ਕਤੋ. ਤਤ੍ਰ ‘‘ਕਾਲਞ੍ਚ ਸਮਯਞ੍ਚ ਉਪਾਦਾਯਾ’’ਤ੍ਯਾਦੀਸੁ [ਦੀ. ਨਿ. ੧.੪੪੭] ਸਮਵਾਯੇ ਪਚ੍ਚਯਸਾਮਗ੍ਗਿਯਂ. ‘‘ਮਹਾਸਮਯੋ ਪਵਨਸ੍ਮਿਂ, ਦੇਵਕਾਯਾ ਸਮਾਗਤਾ’’ਤ੍ਯਾਦੀਸੁ ਸਮੂਹੇ. ‘‘ਸਮਯੋਪਿ ਖੋ ਤੇ ਭਦ੍ਦਾਲਿ ਅਪ੍ਪਟਿਵਿਦ੍ਧੋ’’ਤ੍ਯਾਦੀਸੁ [ਮ. ਨਿ. ੨.੧੩੫] ਕਾਰਣੇ. ‘‘ਏਕੋਯੇਵ ਚ ਖੋ ਖਣੋ ਚ ਸਮਯੋ ਚਾ’’ਤ੍ਯਾਦੀਸੁ [ਅ. ਨਿ. ੮.੨੯] ਖਣੇ ਓਕਾਸੇ. ‘‘ਅਭਿਸਮਯਤ੍ਥੋ’’ਤ੍ਯਾਦੀਸੁ ਪਟਿਵੇਧੇ. ‘‘ਏਕਂ ਸਮਯਂ ਭਗਵਾ’’ਤ੍ਯਾਦੀਸੁ [ਦੀ. ਨਿ. ੧.੧] ਕਾਲੇ. ‘‘ਸਮ੍ਮਾ ਮਾਨਾਭਿਸਮਯਾ’’ਤ੍ਯਾਦੀਸੁ [ਮ. ਨਿ. ੧.੨੮] ਪਹਾਨੇ. ‘‘ਅਤ੍ਥਾਭਿਸਮਯਾ ਧੀਰੋ’’ਤ੍ਯਾਦੀਸੁ ਲਾਭੇ [ਸਂ. ਨਿ. ੧.੧੨੯]. ‘‘ਸਮਯਪ੍ਪਵਾਦਕੇ ਤਿਨ੍ਦੁਕਾਚਿਰੇ’’ਤ੍ਯਾਦੀਸੁ [ਮ. ਨਿ. ੨.੨੦੮] ਦਿਟ੍ਠਿਯਂ.

ਤਤ੍ਥ ਸਹਕਾਰੀਕਾਰਣਤਾਯ ਸਨ੍ਨਿਜ੍ਝਂ ਸਮੇਤਿ ਸਮਵੇਤੀਤਿ ਸਮਯੋ, ਸਮਵਾਯੋ. ਸਮਂ, ਸਹ ਵਾ ਅਵਯਵਾਨਂ ਅਯਨਂ ਪਵਤ੍ਤਿ ਅਵਟ੍ਠਾਨਨ੍ਤਿ ਸਮਯੋ, ਸਮੂਹੋ, ਯਥਾ – ਸਮੁਦਾਯੋਤਿ ਅਵਯਵਸਹਾਵਤ੍ਥਾਨਮੇਵ ਹਿ ਸਮੂਹੋਤਿ. ਅਵਸੇਸਪਚ੍ਚਯਾਨਂ ਸਮਾਗਮੇ ਏਤਿ ਫਲਂ ਏਤਸ੍ਮਾ ਉਪ੍ਪਜ੍ਜਤਿ ਪਵਤ੍ਤਤਿ ਚਾਤਿ ਸਮਯੋ, ਕਾਰਣਂ, ਯਥਾ ‘‘ਸਮੁਦਾਯੋ’’ਤਿ. ਸਮੇਤਿਸਮਾਗਚ੍ਛਤਿ ਏਤ੍ਥ ਮਗ੍ਗਬ੍ਰਹ੍ਮਚਰਿਯਂ ਤਦਾਧਾਰਪੁਗ੍ਗਲੇਹੀਤਿ ਸਮਯੋ, ਖਣੋ. ਅਭਿਮੁਖਂ ਞਾਣੇਨ ਸਮ੍ਮਾ ਏਤਬ੍ਬੋ ਅਵਗਨ੍ਤਬ੍ਬੋਤਿ ਅਭਿਸਮਯੋ, ਧਮ੍ਮਾਨਂ ਅਵਿਪਰੀਤੋ ਸਭਾਵੋ. ਅਭਿਮੁਖਭਾਵੇਨ ਸਮ੍ਮਾ ਏਤਿ ਗਚ੍ਛਤਿ ਬੁਜ੍ਝਤੀਤਿ ਅਭਿਸਮਯੋ, ਧਮ੍ਮਾਨਂ ਅਵਿਪਰੀਤਸਭਾਵਾਵਬੋਧੋ. ਸਮੇਤਿ ਏਤ੍ਥ, ਏਤੇਨ ਵਾ ਸਙ੍ਗਚ੍ਛਤਿ ਸਤ੍ਤੋ, ਸਭਾਵਧਮ੍ਮੋ ਵਾ ਸਹਜਾਤਾਦੀਹਿ, ਉਪ੍ਪਾਦਾਦੀਹਿ ਵਾਤਿ ਸਮਯੋ, ਕਾਲੋ, ਧਮ੍ਮਪ੍ਪਵਤ੍ਤਿਮਤ੍ਤਤਾਯ ਅਤ੍ਥਤੋ ਅਭੂਤੋਪਿ ਹਿ ਕਾਲੋ ਧਮ੍ਮਪ੍ਪਵਤ੍ਤਿਯਾ ਅਧਿਕਰਣਂ ਵਿਯ, ਕਰਣਂ ਵਿਯ ਚ ਪਰਿਕਪ੍ਪਨਾਮਤ੍ਤਸਿਦ੍ਧੇਨ ਰੂਪੇਨ ਵੋਹਰੀਯਤੀਤਿ. ਸਮਸ੍ਸ ਨਿਰੋਧਸ੍ਸ ਯਾਨਂ, ਸਮ੍ਮਾ ਵਾ ਯਾਨਂ ਅਪਗਮੋਤਿ ਸਮਯੋ, ਪਹਾਨਂ. ਸਮਿਤਿ ਸਙ੍ਗਤਿ ਸਮੋਧਾਨਨ੍ਤਿ ਸਮਯੋ, ਪਟਿਲਾਭੋ, ਸਮੇਤਿ ਸਮ੍ਬਨ੍ਧੋ ਏਤਿ ਅਤ੍ਤਨੋ ਵਿਸਯੇ ਪਵਤ੍ਤਤਿ, ਦਲ਼੍ਹਗ੍ਗਹਣਭਾਵਤੋ ਵਾ ਸਮ੍ਪਯੁਤ੍ਤਾ ਅਯਨ੍ਤਿ ਪਵਤ੍ਤਨ੍ਤਿ ਸਤ੍ਤਾ ਯਥਾਭਿਨਿਵੇਸਂ ਏਤੇਨਾਤਿ ਸਮਯੋ, ਦਿਟ੍ਠਿ. ਦਿਟ੍ਠਿਸਂਯੋਜਨੇਨ ਹਿ ਸਤ੍ਤਾ ਅਤਿਵਿਯ ਬਜ੍ਝਨ੍ਤੀਤਿ, ਏਵਂ ਤਸ੍ਮਿਂ ਤਸ੍ਮਿਂ ਅਤ੍ਥੇ ਸਮਯਸਦ੍ਦਸ੍ਸ ਪਵਤ੍ਤਿ ਵੇਦਿਤਬ੍ਬਾ. ਸਮਯਸਦ੍ਦਸ੍ਸ ਅਤ੍ਥੁਦ੍ਧਾਰੇ ਅਭਿਸਮਯਸਦ੍ਦਸ੍ਸ ਉਦਾਹਰਣਂ ਸੋਪਸਗ੍ਗੋ, ਅਨੁਪਸਗ੍ਗੋ ਚ ਸਮਯਸਦ੍ਦੋ ਸਮਵਾਯਾਦ੍ਯਤ੍ਥਵਾਚਕੋ ਹੋਤੀਤਿ ਦਸ੍ਸਨਤ੍ਥਂ. ਏਵਂ ਸਬ੍ਬਤ੍ਰ ਉਦਾਹਰਣਂ ਤਂਤਦਤ੍ਥਾਨੁਰੂਪਨਿਬ੍ਬਚਨਾਦਯੋ ਦਟ੍ਠਬ੍ਬਾ.

੭੭੯. ਸਣ੍ਠਾਨਂ ਦੀਘਰਸ੍ਸਾਦਿ. ਰੂਪਂ ਰੂਪਾਯਤਨਂ, ਜਾਤਿ ਖਤ੍ਤਿਯਾਦਿਕੁਲਂ. ਛਵਿ ਬਹਿਚਮ੍ਮਂ, ਪਮਾਣਂ ਮਰਿਯਾਦੋ. ਅਕ੍ਖਰਂ ਅਕਾਰਾਦਿ, ਯਸੋ ਪਰਿਵਾਰੋ, ਕਿਤ੍ਤਿ ਚ. ਗੁਣੋ ਸੀਲਾਦਿ, ਤਪਨਿਯੇਪਿ ਵਣ੍ਣੋ.

੭੮੦. ਪਾਤਿਮੋਕ੍ਖਸ੍ਸ ਭਿਕ੍ਖੁਭਿਕ੍ਖੁਨੀਨਂ ਵਸੇਨ ਦੁਵਿਧਸ੍ਸ ਪਾਤਿਮੋਕ੍ਖਸ੍ਸ ਉਦ੍ਦੇਸੇ ‘‘ਸਙ੍ਘੋ ਉਪੋਸਥਂ ਕਰੇਯ੍ਯਾ’’ਤਿ [ਮਹਾਵ. ੧੩੪]. ਪਣ੍ਣਤ੍ਤਿਯਂ ‘‘ਉਪੋਸਥੋ ਨਾਮ ਨਾਗਰਾਜਾ’’ਤਿ [ਦੀ. ਨਿ. ੨.੨੪੬]. ਉਪਵਾਸੋ ਵੁਤ੍ਤੋ. ਅਟ੍ਠਙ੍ਗੋ ‘‘ਪਾਣਾਤਿਪਾਤਾ ਵੇਰਮਣਿ’’ਆਦਿ. ਉਪੋਸਥਦਿਨਂ ‘‘ਅਜ੍ਜੁਪੋਸਥੋ ਪਨ੍ਨਰਸੋ’’ਤ੍ਯਾਦੀਸੁ [ਮਹਾਵ. ੧੬੮].

੭੮੧-੭੮੨. ਰਥਙ੍ਗਂ ਚਕ੍ਕਦ੍ਵਯਂ. ਲਕ੍ਖਣਂ ਚਕ੍ਕਲਕ੍ਖਣਂ. ‘‘ਮਯਾ ਪਵਤ੍ਤਿਤਂ ਚਕ੍ਕ’’ਨ੍ਤ੍ਯਾਦੀਸੁ [ਸੁ. ਨਿ. ੫੬੨] ਧਮ੍ਮਚਕ੍ਕੇ. ਉਰਚਕ੍ਕਂ ਨਾਮ ਖੁਰਚਕ੍ਕਂ ‘‘ਚਕ੍ਕਂ ਭਮਤਿ ਮਤ੍ਥਕੇ’’ਤਿ [ਜਾ. ੧.੧.੧੦੪; ੧.੫.੧੦੦]. ‘‘ਚਤੁਚਕ੍ਕਂ ਨਵਦ੍ਵਾਰ’’ਨ੍ਤ੍ਯਾਦੀਸੁ [ਸਂ. ਨਿ. ੧.੨੯] ਇਰਿਯਾਪਥਚਕ੍ਕੇ. ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਚਕ੍ਕਾਨਿ, ਯੇਹਿ ਸਮਨ੍ਨਾਗਤਾਨਂ ਦੇਵਮਨੁਸ੍ਸਾਨਂ ਚਤੁਚਕ੍ਕਂ ਵਤ੍ਤਤੀ’’ਤ੍ਯਾਦੀਸੁ [ਅ. ਨਿ. ੪.੧੩੧] ਸਮ੍ਪਤ੍ਤਿਚਕ੍ਕੇ. ‘‘ਪਿਤਰਾ ਪਵਤ੍ਤਿਤਂ ਚਕ੍ਕਂ ਅਨੁਵਤ੍ਤੇਤੀ’’ਤ੍ਯਾਦੀਸੁ [ਅ. ਨਿ. ੫.੧੩੨] ਚਕ੍ਕਰਤਨੇ. ਮਣ੍ਡਲਂ ‘‘ਅਲਾਤਚਕ੍ਕ’’ਨ੍ਤ੍ਯਾਦੀਸੁ ‘‘ਅਸਨਿਵਿਚਕ੍ਕ’’ਨ੍ਤਿ [ਦੀ. ਨਿ. ੩.੬੧; ਸਂ. ਨਿ. ੨.੧੬੨] ਚ. ਬਲਂ ਥਾਮੋ. ਕੁਲਾਲੋ ਕੁਮ੍ਭਕਾਰੋ, ਤਸ੍ਸ ਭਣ੍ਡੇ ਕੁਲਾਲਚਕ੍ਕਨ੍ਤਿ. ਆਣਾਯਂ ‘‘ਚਕ੍ਕਂ ਵਤ੍ਤਯਤਿ ਪਾਣੀਨ’’ਨ੍ਤਿ [ਜਾ. ੧.੭.੧੪੯]. ਆਯੁਧੇ ਚਕ੍ਕਾਕਾਰੇ ਆਯੁਧੇ. ਦਾਨਂ ਦੇਯ੍ਯਧਮ੍ਮੋ. ਰਾਸਿ ਖਨ੍ਧੋ. ਸਦ੍ਧਗਾਥਾਪਿ ਗਾਥਾਯੇਵ.

‘‘ਦਣ੍ਡਕਾ ਚਣ੍ਡਵੁਟ੍ਠ੍ਯਾਦਿ, ਪਾਦੇਹਿ ਛਹਿ ਤੀਹਿ ਤੁ;

ਗਾਥਾਤਿ ਚ ਪਰਤ੍ਥੇਵਂ, ਛਨ੍ਦੋਸਞ੍ਞਾ ਪਕਾਸਿਤਾ.

ਅਨਨ੍ਤਰੋਦਿਤਂ ਚਞ੍ਞ-ਮੇਤਂ ਸਾਮਞ੍ਞਨਾਮਤੋ;

ਗਾਥਾਇਚ੍ਚੇਵ ਨਿਦ੍ਦਿਟ੍ਠਂ, ਮੁਨਿਨ੍ਦਵਚਨੇ ਪਨਾ’’ਤਿ [ਵੁਤ੍ਤੋਦਯ ੧੪-੧੫ ਗਾਥਾ] ਹਿ ਵੁਤ੍ਤਂ.

੭੮੩. ‘‘ਕਿਂ ਤੇ ਵਤਂ ਕਿਂ ਪਨ ਬ੍ਰਹ੍ਮਚਰਿਯਂ,

ਕਿਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧਿਜੁਤਿਬਲਵਿਰਿਯੂਪਪਤ੍ਤਿ,

ਇਦਞ੍ਚ ਤੇ ਨਾਗ ਮਹਾਵਿਮਾਨਂ.

ਅਹਞ੍ਚ ਭਰਿਯਾ ਚ ਮਨੁਸ੍ਸਲੋਕੇ,

ਸਦ੍ਧਾ ਉਭੋ ਦਾਨਪਤੀ ਅਹੁਮ੍ਹ;

ਓਪਾਨਭੂਤਂ ਮੇ ਘਰਂ ਤਦਾਸਿ,

ਸਨ੍ਤਪ੍ਪਿਤਾ ਸਮਣਬ੍ਰਾਹ੍ਮਣਾ ਚ.

ਤਂ ਮੇ ਵਤਂ ਤਂ ਪਨ ਬ੍ਰਹ੍ਮਚਰਿਯਂ,

ਤਸ੍ਸ ਸੁਚਿਣ੍ਣਸ੍ਸ ਅਯਂ ਵਿਪਾਕੋ;

ਇਦ੍ਧਿਜੁਤਿਬਲਵਿਰਿਯੂਪਪਤ੍ਤਿ,

ਇਦਞ੍ਚ ਮੇ ਧੀਰ ਮਹਾਵਿਮਾਨ’’ਨ੍ਤਿ [ਜਾ. ੨.੨੨.੧੫੯੨, ੧੫੯੩, ੧੫੯੫]

ਇਮਸ੍ਮਿਂ ਵਿਧੁਰਪਣ੍ਡਿਤਜਾਤਕੇ ਦਾਨਸ੍ਮਿਂ ਆਗਤੋ.

‘‘ਤਂ ਖੋ ਪਨ ਪਞ੍ਚਸਿਖ ਬ੍ਰਹ੍ਮਚਰਿਯਂ ਨੇਵ ਨਿਬ੍ਬਿਦਾਯ ਨ ਵਿਰਾਗਾਯ ਯਾਵਦੇਵ ਬ੍ਰਹ੍ਮਲੋਕੂਪਪਤ੍ਤਿਯਾ’’ਤਿ [ਦੀ. ਨਿ. ੨.੩੨੯] ਇਮਸ੍ਮਿਂ ਮਹਾਗੋਵਿਨ੍ਦਸੁਤ੍ਤੇ ਅਪ੍ਪਮਞ੍ਞਾਸੁ. ‘‘ਤਯਿਦਂ ਬ੍ਰਹ੍ਮਚਰਿਯਂ ਇਦ੍ਧਞ੍ਚੇਵ ਫੀਤਞ੍ਚ ਵਿਤ੍ਥਾਰਿਕਂ ਬਾਹੁਜਞ੍ਞਂ ਪੁਥੁਭੂਤਂ ਯਾਵਦੇਵ ਮਨੁਸ੍ਸੇਸੁ ਸੁਪ੍ਪਕਾਸਿਤ’’ਨ੍ਤਿ [ਦੀ. ਨਿ. ੩.੧੭੪] ਪਾਸਾਦਿਕਸੁਤ੍ਤੇ ਸਿਕ੍ਖਤ੍ਤਯਸਙ੍ਗਹੇ ਸਕਲਸ੍ਮਿਂ ਸਾਸਨੇ. ‘‘ਪਰੇ ਅਬ੍ਰਹ੍ਮਚਾਰੀ ਭਵਿਸ੍ਸਨ੍ਤਿ, ਮਯਮੇਤ੍ਥ ਬ੍ਰਹ੍ਮਚਾਰਿਨੋ ਭਵਿਸ੍ਸਾਮਾ’’ਤਿ [ਮ. ਨਿ. ੧.੮੩] ਇਮਸ੍ਮਿਂ ਸਲ੍ਲੇਖਸੁਤ੍ਤੇ ਮੇਥੁਨਾ ਵਿਰਤਿਯਂ.

‘‘ਕੇਨ ਪਾਣਿ ਕਾਮਦਦੋ, ਕੇਨ ਪਾਣਿ ਮਧੁਸ੍ਸਵੋ;

ਕੇਨ ਤੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤਿ.

ਤੇਨ ਪਾਣਿ ਕਾਮਦਦੋ, ਤੇਨ ਪਾਣਿ ਮਧੁਸ੍ਸਵੋ;

ਤੇਨ ਮੇ ਬ੍ਰਹ੍ਮਚਰਿਯੇਨ, ਪੁਞ੍ਞਂ ਪਾਣਿਮ੍ਹਿ ਇਜ੍ਝਤੀ’’ਤਿ [ਪੇ. ਵ. ੨੭੫]. –

ਇਮਸ੍ਮਿਂ ਅਙ੍ਕੁਰਪੇਤਵਤ੍ਥੁਮ੍ਹਿ ਵੇਯ੍ਯਾਵਚ੍ਚੇ.

‘‘ਮਯਞ੍ਚ ਭਰਿਯਾ ਨਾਤਿਕ੍ਕਮਾਮ,

ਅਮ੍ਹੇ ਚ ਭਰਿਯਾ ਨਾਤਿਕ੍ਕਮਨ੍ਤਿ;

ਅਞ੍ਞਤ੍ਰ ਤਾ ਬ੍ਰਹ੍ਮਚਰਿਯਂ ਚਰਾਮ,

ਤਸ੍ਮਾ ਹਿ ਅਮ੍ਹਂ ਦਹਰਾ ਨ ਮਿਯ੍ਯਰੇ’’ਤਿ [ਜਾ. ੧.੧੦.੯੭]. –

ਮਹਾਧਮ੍ਮਪਾਲਜਾਤਕੇ ਸਦਾਰਤੁਟ੍ਠਿਯਂ.

‘‘ਏਵਂ ਖੋ ਤਂ, ਭਿਕ੍ਖਵੇ, ਤਿਤ੍ਤਿਰਿਯਂ ਨਾਮ ਬ੍ਰਹ੍ਮਚਰਿਯਂ ਅਹੋਸੀ’’ਤਿ [ਚੂਲ਼ਵ. ੩੧੧] ਇਮਸ੍ਮਿਂ ਤਿਤ੍ਤਿਰਜਾਤਕੇ ਪਞ੍ਚਸੀਲੇ.

‘‘ਇਦਂ ਖੋ ਪਨ ਪਞ੍ਚਸਿਖ ਬ੍ਰਹ੍ਮਚਰਿਯਂ ਏਕਨ੍ਤਨਿਬ੍ਬਿਦਾਯ ਵਿਰਾਗਾਯ…ਪੇ… ਅਯਮੇਵ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ’’ਤਿ [ਦੀ. ਨਿ. ੨.੩੨੯] ਮਹਾਗੋਵਿਨ੍ਦਸੁਤ੍ਤੇਯੇਵ ਅਰਿਯਮਗ੍ਗੇ.

‘‘ਹੀਨੇਨ ਬ੍ਰਹ੍ਮਚਰਿਯੇਨ, ਖਤ੍ਤਿਯੇ ਉਪਪਜ੍ਜਤਿ;

ਮਜ੍ਝਿਮੇਨ ਚ ਦੇਵਤ੍ਤਂ, ਉਤ੍ਤਮੇਨ ਵਿਸੁਜ੍ਝਤੀ’’ਤਿ [ਜਾ. ੧.੮.੭੫]. –

ਨਿਮਿਜਾਤਕੇ ਅਤ੍ਤਦਮਨਵਸੇਨ ਕਤੇ ਅਟ੍ਠਙ੍ਗੁਪੋਸਥੇ.

‘‘ਅਭਿਜਾਨਾਮਿ ਖੋ ਪਨਾਹਂ, ਸਾਰਿਪੁਤ੍ਤ, ਚਤੁਰਙ੍ਗਸਮਨ੍ਨਾਗਤਂ ਬ੍ਰਹ੍ਮਚਰਿਯਂ ਚਰਿਤ੍ਵਾ ਤਪਸ੍ਸਿ ਸੁਦਂ ਹੋਮੀ’’ਤਿ [ਮ. ਨਿ. ੧.੧੫੫] ਲੋਮਹਂਸਸੁਤ੍ਤੇ ਧਿਤਿਸਙ੍ਖਾਤੇ ਵੀਰਿਯੇ.

੭੮੪. ਸਭਾਵੋ ਅਵਿਪਰੀਤਤ੍ਥੋ. ਪਰਿਯਤ੍ਤਿ ਪਰਿਯਾਪੁਣਿਤਬ੍ਬਾ ਵਿਨਯਾਭਿਧਮ੍ਮਸੁਤ੍ਤਨ੍ਤਾ. ਞਾਯੋ ਯੁਤ੍ਤਿ, ਸਪ੍ਪਟਿਪਦਾ ਵਾ ਮਗ੍ਗਾਦਯੋ. ਞੇਯ੍ਯੇ ਸਙ੍ਖਾਰਵਿਕਾਰਲਕ੍ਖਣਨਿਬ੍ਬਾਨਪਞ੍ਞਤ੍ਤਿਵਸੇਨ ਪਞ੍ਚਵਿਧੇ ਞੇਯ੍ਯੇ. ਨਿਸ੍ਸਤ੍ਤਤਾ ਸਤ੍ਤਸਭਾਵਸ੍ਸ ਅਭਾਵਤਾ. ਆਪਤ੍ਤਿਯਂ ‘‘ਪਾਰਾਜਿਕਂ ਧਮ੍ਮ’’ਨ੍ਤਿ. ‘‘ਸਹ ਧਮ੍ਮੇਨ ਨਿਗ੍ਗਯ੍ਹਾ’’ਤ੍ਯਾਦੀਸੁ ਕਾਰਣੇ. ਆਦਿਨਾ ਸਮਯਞ੍ਞੂਪਮਾਹਿਂਸਾਦੀਸੁਪਿ ਧਮ੍ਮੋ.

੭੮੫. ਪਯੋਜਨਂ ਫਲਂ. ਸਦ੍ਦਾਭਿਧੇਯ੍ਯੇ ਸਦ੍ਦਤ੍ਥੇ. ਵੁਡ੍ਢਿਯਂ ਵਡ੍ਢਨੇ. ਵਤ੍ਥੁਮ੍ਹਿ ਦਬ੍ਬੇ. ਨਾਸੇ ਵਿਨਾਸੇ. ਪਚ੍ਛਿਮਪਬ੍ਬਤੇ ਅਤ੍ਥਗਿਰਿਮ੍ਹਿ. ਨਿਵਤ੍ਤਿਵਿਸਯੁਪ੍ਪਤ੍ਤਿਸਭਾਵਾਦੀਸੁਪਿ.

੭੮੬. ਯੇਭੁਯ੍ਯਤਾ ਬਾਹੁਲ੍ਯਤਾ. ਅਬ੍ਯਾਮਿਸ੍ਸਂ ਅਸਮ੍ਮਿਸ੍ਸਂ. ਵਿਸਂਯੋਗੇ ਵਿਪ੍ਪਯੋਗੇ. ਦਲ਼੍ਹਤ੍ਥੇ ਦਲ਼੍ਹਸਦ੍ਦਸ੍ਸ ਅਤ੍ਥੇ. ਅਨਤਿਰੇਕੇ ਅਤਿਰੇਕਾਭਾਵੇ. ਅਨਵਸੇਸਮ੍ਹਿ ਸਬ੍ਬਸ੍ਮਿਂ, ਤਂ ਕੇਵਲਵਚਨਂ ਤੀਸੁ ਲਿਙ੍ਗੇਸੁ.

੭੮੭. ਪਟਲਂ ‘‘ਦਿਗੁਣਂ ਸਙ੍ਘਾਟਿਂ ਪਾਰੁਪਿਤ੍ਵਾ’’ਤ੍ਯਾਦੀਸੁ [ਮਹਾਵ. ੩੪੮]. ‘‘ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤੀ’’ਤਿ [ਸਂ. ਨਿ. ੧.੪] ਰਾਸਿਮ੍ਹਿ. ‘‘ਸਤਗੁਣਾ ਦਕ੍ਖਿਣਾ ਪਾਟਿਕਙ੍ਖਿਤਬ੍ਬਾ’’ਤਿ [ਮ. ਨਿ. ੩.੩੭੯] ਆਨਿਸਂਸੇ. ਬਨ੍ਧਨਂ ਕਾਮਗੁਣਂ. ਅਪ੍ਪਧਾਨੇ ਵਿਸੇਸਨੇ. ਜਿਯਾਯ ਧਨੁਨੋ.

੭੮੮-੭੮੯. ਰੁਕ੍ਖਾਦੋ ਦੁਮਾਦਿਮ੍ਹਿ. ਵਿਜ੍ਜਮਾਨੇ ਭੂਤਗੁਣੇ. ਅਰਹਨ੍ਤੇ ‘‘ਯੋ ਚ ਕਾਲਘਸੋ ਭੂਤੋ, ਸਭੂਤਪਚਿਨਿਂ ਪਚੀ’’ਤਿ [ਜਾ. ੧.੨.੧੯੦]. ਖਨ੍ਧਪਞ੍ਚਕੇ ‘‘ਭੂਤਮਿਦਂ, ਸਾਰਿਪੁਤ੍ਤ, ਸਮਨੁਪਸ੍ਸਥਾ’’ਤਿ [ਮ. ਨਿ. ੧.੪੦੧]. ਸਤ੍ਤੇ ਪਾਣਿਮ੍ਹਿ. ਮਹਾਭੂਤੇ ਪਥਵਾਦਿਕੇ. ਅਮਨੁਸ੍ਸੋ ਦੇਵਰਕ੍ਖਸਾਦਿ. ਵਿਜ੍ਜਮਾਨਤ੍ਥਵਜ੍ਜਿਤੇ ਰੁਕ੍ਖਾਦੋ ਨਾਰਿਯਂ ਨ ਭਵਤਿ, ਵਿਜ੍ਜਮਾਨਤ੍ਥੇ, ਪਨ ਅਤੀਤਾਦੀਸੁ ਚ ਵਾਚ੍ਚਲਿਙ੍ਗੋ. ਪਤ੍ਤੇ ਸਮ੍ਪਤ੍ਤੇ. ਸਮੇ ਤੁਲ੍ਯਤ੍ਥੇ.

੭੯੦. ਸਜ੍ਜਨੇ ਸਪ੍ਪੁਰਿਸੇ.

੭੯੧. ਪਦਪੂਰਣੇ ‘‘ਸੁਤ੍ਤਨ੍ਤ ਵਨਨ੍ਤਾ’’ਤ੍ਯਾਦੀਸੁ. ਦੇਹਾਵਯਵੇ ‘‘ਅਨ੍ਤਂ ਅਨ੍ਤਗੁਣ’’ਨ੍ਤ੍ਯਾਦੀਸੁ [ਖੁ. ਪਾ. ੩.ਦ੍ਵਤ੍ਤਿਂਸਾਕਾਰ]. ਦੇਹੋ ਚ ਅਵਯਵੋ ਚਾਤਿ ਏਕੇ. ਕੋਟ੍ਠਾਸੇ ‘‘ਅਯਮੇਕੋ ਅਨ੍ਤੋ’’ਤ੍ਯਾਦੀਸੁ [ਅ. ਨਿ. ੬.੬੧]. ਲਾਮਕਂ ਨਿਹੀਨਕਂ.

੭੯੨. ਨਿਕਾਯੋ ਸਧਮ੍ਮੀਨਂ ਗਣੋ. ਸਨ੍ਧਿ ਪਟਿਸਨ੍ਧਿ. ਸਾਮਞ੍ਞੇ ਵਿਸੇਸਾਧਾਰੇ. ਪਸੂਤਿ ਮਾਤੁਕੁਚ੍ਛਿਤੋ ਨਿਕ੍ਖਮਨਂ, ਕੁਲਂ ਖਤ੍ਤਿਯਾਦਿਕੁਲਂ. ਭਵੋ ਭਵਨਕ੍ਰਿਯਾ. ਵਿਸੇਸ੍ਯੋ ਉਪਾਧਿ, ਯਸ੍ਸ ਵਸੇਨ ਭਿਨ੍ਨੇਸੁ ਸਬਲਾਦੀਸੁ ਅਭਿਨ੍ਨਾ ਧੀਸਦ੍ਦਾ ਵਤ੍ਤਨ੍ਤੇ. ਸੁਮਨਾਯਂ ਮਾਲਤਿਯਂ. ਸਙ੍ਖਤਲਕ੍ਖਣੇ ਸਙ੍ਖਤਧਮ੍ਮਾਨਂ ਲਕ੍ਖਣੇ.

੭੯੩. ਭਵਭੇਦੋ ਕਾਮਭਵਾਦਿ. ਪਤਿਟ੍ਠਾਯਂ ਨਿਸ੍ਸਯੇ. ਨਿਟ੍ਠਾ ਨਿਪ੍ਫਤ੍ਤਿ. ਅਜ੍ਝਾਸਯੋ ਅਧਿਪ੍ਪਾਯੋ. ਬੁਦ੍ਧਿ ਞਾਣਂ. ਵਾਸਟ੍ਠਾਨਂ ਵਸਨਟ੍ਠਾਨਂ. ਵਿਸਰਤ੍ਤਂ ਵਿਸਰਣਭਾਵੋ. ‘‘ਵਿਸਦਤ੍ਥੇ’’ਤਿਪਿ ਪਾਠੋ, ਤਦਾ ਸਦਧਾਤੁਸ੍ਸ ਵਿਸਰਣਤ੍ਥਤਾ ਦਟ੍ਠਬ੍ਬਾ.

੭੯੪. ਫਲੇ ਸੋਤਾਪਤ੍ਤਾਦਿਕੇ. ਅਨਿਚ੍ਚਾਦਿਅਨੁਪਸ੍ਸਨਾ ਵਿਪਸ੍ਸਨਾ ਨਾਮ. ਮਗ੍ਗੇ ਸੋਤਾਪਤ੍ਤਿਮਗ੍ਗਾਦਿਕੇ.

੭੯੫. ਕਮ੍ਮਾਰੁਦ੍ਧਨਂ ਕਮ੍ਮਾਰਾਨਂ ਉਦ੍ਧਨਂ, ਕਮ੍ਮਾਰਾਨਂ ਯਥਾ ਉਕ੍ਕਾਤਿ. ਅਙ੍ਗਾਰਕਪਲ੍ਲਂ ਅਙ੍ਗਾਰਾਨਂ ਭਾਜਨਂ. ਦੀਪਿਕਾ ਨਾਮ ਮਧੁਚ੍ਛਿਟ੍ਠਾਦਿਮਯਾ ਪਦੀਪਕਿਚ੍ਚਕਾਰਿਕਾ. ਸੁਵਣ੍ਣਕਾਰਮੂਸਾ ਮਤ੍ਤਿਕਮਯਾ ਏਕਾ ਭਾਜਨਵਿਕਤਿ. ਵਾਯੁਨੋ ਵੇਗੇ ਚ ਉਕ੍ਕਾਸਦ੍ਦੋ, ਯੋ ‘‘ਦੇਵਦੁਦ੍ਰਭੀ’’ਤਿ ਵੁਤ੍ਤੋ.

੭੯੬. ਕੇਸੋਹਾਰਣਂ ਕੇਸਾਨਂ ਲਵਨਂ. ਜੀਵਿਤਵੁਤ੍ਤਿ ਜੀਵਿਤਸ੍ਸ ਵਤ੍ਤਨਂ. ਵਪਨਂ ਬੀਜਸ੍ਸ ਵਪਨਂ. ਵਾਪਸਮਕਰਣਂ ਵਪਿਤਸ੍ਸ ਬੀਜਸ੍ਸ ਸਮਕਰਣਂ. ਪਵੁਤ੍ਤਭਾਵੋ ਬਨ੍ਧਨਾ ਮੁਤ੍ਤਿ.

੭੯੭-੭੯੮. ਸੁਤੋ ਵਿਸ੍ਸੁਤੇ ਪਾਕਟੇ. ਅਵਧਾਰਿਤੇ ਉਪਲਕ੍ਖਿਤੇ. ਉਪਚਿਤੇ ਰਾਸੀਕਤੇ. ਅਨੁਯੋਗੋ ਪੁਚ੍ਛਾ. ਕਿਲਿਨ੍ਨੇ ਤਿਨ੍ਤੇ. ਸੋਤਵਿਞ੍ਞੇਯ੍ਯਂ ਸਦ੍ਦਾਯਤਨਂ. ਸਤ੍ਥਂ ਸਦ੍ਦਸਤ੍ਥਾਦਿ, ਸੁਤਨਾਮਕੋ ਵਾ ਏਕੋ ਸਤ੍ਥਵਿਸੇਸੋ. ਏਤੇਸੁ ਦ੍ਵੀਸੁ ਅਤ੍ਥੇਸੁ ਸੁਤਂ ਨਪੁਂਸਕਂ. ਪੁਤ੍ਤੇ ਸੁਤੋ ਪੁਲ੍ਲਿਙ੍ਗੋ, ਰਾਜਿਨਿਪਿ ਸੁਤੋ.

੭੯੯. ਯੁਗੇ ਕਤਾਦਿਚਤੁਕ੍ਕੇ. ਲੇਸੋ ਅਨੁਮਾਨਞਾਣਵਿਸਯੋ. ਪਞ੍ਞਤ੍ਤਿਯਂ ‘‘ਕਪ੍ਪਤ੍ਥੇਰੋ’’ਤਿ. ਪਰਮਾਯੁਮ੍ਹਿ ‘‘ਕਪ੍ਪਂ ਸਗ੍ਗਮ੍ਹਿ ਮੋਦਤੀ’’ਤਿ. ਅਞ੍ਞਤ੍ਰ ਕਪ੍ਪਾਦੀਸੁ ਪੁਲ੍ਲਿਙ੍ਗੇ. ਸਦਿਸੇ ਪਨ ਤੀਸੁ ਲਿਙ੍ਗੇਸੁ. ਸਮਣਵੋਹਾਰੋ ਵਿਨਯਾਗਤੋ ਸਮਣਾਨਂ ਵੋਹਾਰੋ. ਕਪ੍ਪਬਿਨ੍ਦੁ ਚੀਵਰੇ ਕਤਬਿਨ੍ਦੁ. ਸਮਨ੍ਤਤ੍ਤੇ ਸਮਨ੍ਤਭਾਵੇ. ਅਨ੍ਤਰਕਪ੍ਪੋ ਮਹਾਕਪ੍ਪਸ੍ਸ ਅਸੀਤਿਮੋ ਭਾਗੋ. ਆਦਿਸਦ੍ਦੇਨ ਅਸਙ੍ਖ੍ਯੇਯ੍ਯਮਹਾਕਪ੍ਪੇ ਸਙ੍ਗਣ੍ਹਾਤਿ. ਤਕ੍ਕੇ ਵਿਤਕ੍ਕੇ. ਵਿਧਿ ਵਿਧਾਨਂ.

੮੦੦. ਵਿਰਤਿ ਵਿਰਤਿਤ੍ਤਯਂ. ਸਪਥੋ ਅਕ੍ਕੋਸੋ. ਤਚ੍ਛੇ ਤਥਭਾਵੇ. ਅਰਿਯਸਚ੍ਚਮ੍ਹਿ ਦੁਕ੍ਖਸਚ੍ਚਾਦਿਕੇ. ਦਿਟ੍ਠਿ ਮਿਚ੍ਛਾਦਿਟ੍ਠਿ.

੮੦੧. ਸਞ੍ਜਾਤਿਦੇਸੋ ‘‘ਕਮ੍ਬੋਜੋ ਅਸ੍ਸਾਯਤਨ’’ਨ੍ਤਿ. ਵਾਸਟ੍ਠਾਨਂ ਨਿਵਾਸਟ੍ਠਾਨਂ ‘‘ਦੇਵਾਨਂ ਦੇਵਾਯਤਨ’’ਨ੍ਤਿ. ਆਕਰੋਤਿ ਯਤ੍ਥ ਸੁਵਣ੍ਣਰਜਤਾਦਯੋ ਉਪ੍ਪਜ੍ਜਨ੍ਤਿ. ਸਮੋਸਰਣਟ੍ਠਾਨਂ ਬਹੂਨਂ ਸਨ੍ਨਿਪਾਤਟ੍ਠਾਨਂ. ਪਦਪੂਰਣੇ ‘‘ਕਮ੍ਮਾਯਤਨਂ, ਸਿਪ੍ਪਾਯਤਨ’’ਨ੍ਤਿ.

੮੦੨. ਵਤ੍ਥਂ ਅਮ੍ਬਰਂ. ਅਞ੍ਞੋ ਯੋ ਸਕੋ ਨ ਹੋਤਿ. ਓਧਿ ਮਰਿਯਾਦੋ. ਭੇਦੋ ਵਿਸੇਸੋ. ਮਨਸਿਪਿ ਚਿਤ੍ਤੇਪਿ.

੮੦੩. ਵਿਪਾਕੇ ਇਟ੍ਠਵਿਪਾਕੇ ਕੁਸਲੋ. ਅਨਵਜ੍ਜਾਦੀਸੁ ਵਾਚ੍ਚਲਿਙ੍ਗਿਕੋ.

੮੦੪. ਦ੍ਰਵੋ ਮਧ੍ਵਾਦਿ. ਮਧੁਰਾਦੀਸੁ ਛਸੁ ਰਸੇਸੁ. ਪਾਰਦੋ ਸੂਤੋ. ਸਿਙ੍ਗਾਰਾਦੋ ਨਵ ਨਾਟ੍ਯਰਸੇ. ਰਸਰਤ੍ਤਮਂਸਮੇਦਟ੍ਠਿਸੁਕ੍ਕਟ੍ਠਿਮਿਞ੍ਜਵਸੇਨ ਸਤ੍ਤ ਧਾਤਵੋ, ਤਬ੍ਭੇਦੇ. ਕਿਚ੍ਚੇ ਫਸ੍ਸਾਦਿਧਮ੍ਮਾਨਂ ਸਙ੍ਘਟ੍ਟਨਾਦਿਕਿਚ੍ਚੇ. ਸਮ੍ਪਤ੍ਤਿ ਤੇਸਂਯੇਵ.

੮੦੫. ਬੋਧਿਸਦ੍ਦੋ ਞਾਣਦ੍ਵਯੇ ਨਾਰਿਯਂ, ਬੋਧਿਰਾਜਕੁਮਾਰਾਦਿਪਞ੍ਞਤ੍ਤਿਯਂ ਪੁਮੇ. ਅਸ੍ਸਤ੍ਥਰੁਕ੍ਖੇ ਪੁਮਿਤ੍ਥਿਯਂ.

੮੦੬. ਯੇਨ ਕਤ੍ਤੁਭੂਤੇਨ ਯੋ ਕਮ੍ਮਭੂਤੋ ਨਿਚ੍ਚਸੇਵਿਤੋ, ਤਤ੍ਥਾਪਿ ਕਮ੍ਮਭੂਤੇ. ਵਿਸਯੋ ਅਨਞ੍ਞਥਾਭਾਵੋ. ਜਨਪਦੇ ਕੁਰੁਆਦਿਕੇ. ਗੋਚਰੇ ਤਬ੍ਬਹੁਲਾਚਾਰੇ.

੮੦੭. ਸਤ੍ਤਾਯਂ ਵਿਜ੍ਜਮਾਨਤਾਯਂ.

੮੦੮. ਬਨ੍ਧਵੇ ਸੋ ਪੁਮੇ. ਅਤ੍ਤਨਿ ਸਂ ਨਪੁਂਸਕੇ. ਧਨਸ੍ਮਿਂ ਸੋ ਸਂ ਅਨਿਤ੍ਥਿਯਂ. ਸੁਨਖੇ ਸਾ ਪੁਮੇ ਵੁਤ੍ਤੋ. ਅਤ੍ਤਨਿਯੇ ਸੋ ਤਿਲਿਙ੍ਗਿਕੋ.

੮੦੯. ਛਵਿਸਮ੍ਪਤ੍ਤਿਯਂ ਛਵਿਯਾ ਸਮ੍ਪਤ੍ਤਿਯਂ.

੮੧੦. ਜਾਮਾਤਾ ਧੀਤੁਸਾਮਿਕੋ. ਮਨ੍ਦਪ੍ਪਿਯੇ ਅਪ੍ਪਪਿਯੇ ਵਰਂ ਅਬ੍ਯਯਂ.

੮੧੧. ਮਕੁਲੇ ਅਵਿਕਾਸਸਮ੍ਪਤ੍ਤੇ. ਨੇਤ੍ਤਿਂਸਾਦਿਪਿਧਾਨੇ ਖਗ੍ਗਾਦੀਨਂ ਗੇਹੇ.

੮੧੨. ਪਿਤਾਮਹੋ ਬ੍ਰਹ੍ਮਾ. ਪਿਤੂਸੁ ਮਾਤਾਪਿਤੂਸੁ. ਤਥਾ ਪਕ੍ਖਨ੍ਤਰੇ. ਤਪਸਿ ਸੀਲੇ.

੮੧੩-੮੧੪. ਮਜ੍ਝਬਨ੍ਧੇ ਉਰੋਬਨ੍ਧਨੇ. ਪਕੋਟ੍ਠੋ ਕਪ੍ਪਰਸ੍ਸਾਧੋਭਾਗੋ. ਕਚ੍ਛਬਨ੍ਧਨਂ ਅਧੋਮ੍ਬਰਸ੍ਸ ਦਲ਼੍ਹਬਨ੍ਧਨਂ. ਮੇਖਲਾਯਞ੍ਚਾਤਿ ਕਚ੍ਛਾ ਚਤੂਸ੍ਵਤ੍ਥੇਸੁ. ਕਚ੍ਛੋ ਲਤਾਦੀਸੁ. ਕਚ੍ਛੋ ਬਾਹੁਮੂਲਮ੍ਹਿ ਪਰੂਲ਼੍ਹਕਚ੍ਛਨਖਲੋਮੇ, ‘‘ਕਚ੍ਛੇਹਿ ਸੇਦਾ ਮੁਞ੍ਚਨ੍ਤੀ’’ਤਿ. ਅਨੂਪੋ ਬਹੂਦਕਦੇਸੋ.

੮੧੫. ਮਾਨਂ ਤੁਲਾਪਤ੍ਥਙ੍ਗੁਲੀਹਿ. ਪਮਾਤਰਿ ਪਮਾਣਸ੍ਸ ਕਤ੍ਤਰਿ.

੮੧੬. ਦਬ੍ਬਂ ਧਨਂ. ਅਤ੍ਤਭਾਵੋ ਪਞ੍ਚਕ੍ਖਨ੍ਧਸਮੂਹੋ. ਪਾਣੋ ਜੀਵਿਤਿਨ੍ਦ੍ਰਿਯਂ. ਦਬ੍ਬਾਦੀਸੁ ਚਤੂਸੁ ਸਤ੍ਤਂ. ਸਤ੍ਤਾਯਂ ਵਿਜ੍ਜਮਾਨਤਾਯਂ ਸਤ੍ਤਾ. ਜਨੇ ਸਤ੍ਤੋ. ਸੋ ਸਤ੍ਤਸਦ੍ਦੋ, ਆਸਤ੍ਤੇ ਲਗ੍ਗਿਤੇ ਤਿਲਿਙ੍ਗਿਕੋ.

੮੧੭. ਸੇਮ੍ਹਾਦੋ ਤਿਦੋਸੇ. ਰਸਰਤ੍ਤਾਦਿ ਪੁਬ੍ਬੇਵੁਤ੍ਤੋ. ਪਭਾਦਿਕੇ ਰੂਪਧਾਤੁਮ੍ਹਿ. ਚਕ੍ਖਾਦਿਕੇ ਵਿਸਯਧਾਤੁਮ੍ਹਿ.

੮੧੮. ਅਮਚ੍ਚਾਦਿਕਾ ਸਤ੍ਤ ਪਕਤਿਯੋ ਵੁਤ੍ਤਾ. ਸਤ੍ਤਾਦਿਸਾਮ੍ਯਵਤ੍ਥਾ ਸਤ੍ਤਰਜਤਮਭੂਤਾਨਂ ਤਿਣ੍ਣਂ ਗੁਣਾਨਂ ਸਾਮ੍ਯਵਤ੍ਥਾ. ਪਚ੍ਚਯਾ ਣਪਚ੍ਚਯਾਦਿਤੋ ਪਠਮੇ ਪਠਮਸਣ੍ਠਿਤੇ ਕਰੋਤ੍ਯਾਦਿਧਾਤੁਮ੍ਹਿ.

੮੧੯. ਪਰਿਤ੍ਤਾਣਂ ਰਕ੍ਖਣਂ. ਵਤ੍ਥੁਮ੍ਹਿ ਓਕਾਸੇ. ਤਲ੍ਲਞ੍ਛਨਂ ਪਾਦਸ੍ਸ ਠਾਨਂ.

੮੨੦. ਲੋਹਮੁਗ੍ਗਰੇ ਲੋਹਮਯੇ ਮੁਗ੍ਗਰੇ. ਤਾਲ਼ਾਦਿਕੇ ਸਮ੍ਮਤਾਲ਼ਕਂਸਤਾਲ਼ਾਦਿਕੇ. ਕਠਿਨੇ ਕਕ੍ਖਲ਼ੇ.

੮੨੧. ਮਕ੍ਖਿਕਾ ਨੀਲਮਕ੍ਖਿਕਾਦਿਕਾ. ਤਾਸਂ ਭੇਦਾ ਸਵਿਸਾ ਮਧੁਕਤਾ ਪਿਙ੍ਗਲਮਕ੍ਖਿਕਾ. ਮਧੁਮ੍ਹਿ ਖੁਦ੍ਦਂ ਅਪ੍ਪਕਾਦੀਸੁ ਚਤੂਸ੍ਵਤ੍ਥੇਸੁ ਵਤ੍ਤਮਾਨਂ ਤੀਸੁ ਲਿਙ੍ਗੇਸੁ. ਅਧਮੋ ਨਿਹੀਨੋ. ਕਪਣੋ ਏਕਚਾਰੀ.

੮੨੨. ਤਕ੍ਕੇ ਗੋਰਸਵਿਸੇਸੇ. ਮਰਣਲਿਙ੍ਗੇ ਮਰਣਞਾਪਕਲਕ੍ਖਣੇ. ਅਸੁਭੇ, ਸੁਭੇ ਚਾਤਿ ਚਤੂਸ੍ਵਤ੍ਥੇਸੁ ਅਰਿਟ੍ਠਂ. ਆਸਵੋ ਮਜ੍ਜਵਿਸੇਸੋ. ਫੇਣਿਲਦ੍ਦੁਮੋ ‘‘ਬਡੀ-ਯ੍ौ-ਖੋ’’.

੮੨੩. ਗੇਹਾਨਂ ਦਾਰੁਬਨ੍ਧਪ੍ਪਯੋਜਨਂ ਪੀਠਿਕਾ ਨਾਮ. ਪਕ੍ਖਨ੍ਦਦ੍ਵਯਸ੍ਸ, ਕਣ੍ਣਿਕਾਦੀਨਞ੍ਚ ਨਿਸ੍ਸਯਭੂਤਾ ਪੀਠਿਕਾ.

੮੨੪. ਮਿਤ੍ਤਾਕਾਰੇ ਅਮਿਤ੍ਤਸ੍ਸਾਪਿ ਮਿਤ੍ਤਸਣ੍ਠਾਨੇ. ਬਲੇ, ਰਾਸਿਮ੍ਹਿ, ਵਿਪਤ੍ਤਿਯਞ੍ਚ, ‘‘ਬਲਸ੍ਸ ਰਾਸੀ’’ਤਿਪਿ ਏਕੇ.

੮੨੫. ਖਨ੍ਧੇ ਰੂਪਕ੍ਖਨ੍ਧੇ. ਭਵੇ ਰੂਪਭਵੇ. ਨਿਮਿਤ੍ਤਮ੍ਹਿ ਕਾਰਣੇ. ਵਪੁ ਸਰੀਰਂ.

੮੨੬. ਵਤ੍ਥੁਕਿਲੇਸਕਾਮੇਸੂਤਿ ਵਤ੍ਥੁਕਾਮਕਿਲੇਸਕਾਮੇਸੁ. ਮਦਨੇ ਮਾਰਦੇਵਪੁਤ੍ਤੇ. ਰਤੇ ਮੇਥੁਨੇ. ਨਿਕਾਮੇ ਇਚ੍ਛਾਰਹਿਤੇ ਕਾਮਂ ਨਪੁਂਸਕੇ. ਅਨੁਞ੍ਞਾਯਂ ਕਾਮਮਬ੍ਯਯਂ ਭਵੇ.

੮੨੭. ਵਜ੍ਜਭਣ੍ਡਮੁਖੇ ਵੀਣਾਦੋਣਿਮੁਖੇ. ਮਾਤਙ੍ਗਸ੍ਸ ਹਤ੍ਥਿਨੋ ਕਰਕੋਟਿ ਹਤ੍ਥਗ੍ਗਂ.

੮੨੮. ਰਮ੍ਭੋ ਸਠ੍ਯਂ, ਕੇਤਵਨ੍ਤ੍ਯਤ੍ਥੋ. ਅਸਚ੍ਚਂ ਮੁਸਾ. ਅਯੋਘਨਂ ਯੇਨ ਪਹਰਤਿ. ਗਿਰਿਸਿਙ੍ਗਮ੍ਹਿ ਗਿਰਗ੍ਗੇ. ਸੀਰਙ੍ਗੇ ਫਾਲਙ੍ਗੇ. ਯਨ੍ਤੇ ਕੂਟਯਨ੍ਤੇ.

੮੩੦. ਪਟਿਵਾਕ੍ਯੇ ਪਟਿਵਚਨੇ. ਉਤ੍ਤਰਾਸਙ੍ਗੇ ਉਪਰਿਵਤ੍ਥੇ. ਸੇਟ੍ਠਾਦੀਸੁ ਉਤ੍ਤਰੋ ਤੀਸੁ, ਪਰਸ੍ਮਿਂ ਉਪਰਿਸ੍ਮਿਞ੍ਚ ਈਰਿਤੋ.

੮੩੧. ਵਿਮੁਤ੍ਤਿ ਅਰਹਤ੍ਤਫਲਂ ਮਗ੍ਗਨਿਬ੍ਬਾਨਾਨਿਪਿ.

੮੩੨. ਸਙ੍ਖਤੇ ਪਚ੍ਚਯਾਭਿਸਙ੍ਖਤੇ ਧਮ੍ਮੇ. ਪੁਞ੍ਞਾਭਿਸਙ੍ਖਾਰੋ, ਅਪੁਞ੍ਞਾਭਿਸਙ੍ਖਾਰੋ, ਆਨੇਞ੍ਜਾਭਿਸਙ੍ਖਾਰੋਤਿ ਪੁਞ੍ਞਾਭਿਸਙ੍ਖਾਰਾਦਿ. ਪਯੋਗੋ ਉਸ੍ਸਾਹੋ. ਕਾਯਸਙ੍ਖਾਰੋ, ਵਚੀਸਙ੍ਖਾਰੋ, ਚਿਤ੍ਤਸਙ੍ਖਾਰੋਤਿ ਕਾਯਸਙ੍ਖਾਰਾਦਿ. ਅਭਿਸਙ੍ਖਰਣਂ ਅਭਿਸਙ੍ਖਰਣਕ੍ਰਿਯਾ.

੮੩੩. ਤਬ੍ਭਾਵੇ ਦਿਟ੍ਠਿਸਹਗਤਂ.

੮੩੪. ਪਤਿਰੂਪੇ ਯੁਤ੍ਤੇ. ਛਾਦਿਤੇ ਤਿਣਾਦੀਹਿ. ਰਹੋ ਸੁਞ੍ਞਟ੍ਠਾਨਂ. ਪਞ੍ਞਤ੍ਤਿਯਂ ਛਨ੍ਨੋ ਭਿਕ੍ਖੁ, ਪਞ੍ਞਤ੍ਤਿਯਂਯੇਵ ਪੁਮੇ.

੮੩੫. ਬੁਦ੍ਧਚਕ੍ਖੁ ਬੁਦ੍ਧਾਨਂ ਚਕ੍ਖੁ. ਸਮਨ੍ਤਚਕ੍ਖੁ ਸਬ੍ਬਞ੍ਞੁਤਞਾਣਂ. ਧਮ੍ਮਚਕ੍ਖੁ ਹੇਟ੍ਠਾਮਗ੍ਗਤ੍ਤਯੇ ਞਾਣਂ.

੮੩੬. ਅਭਿਕ੍ਕਮੋ ਅਭਿਕ੍ਕਮਨੀਯੋ.

੮੩੭. ਵੇਵਚਨਂ ਅਭਿਨ੍ਨਤ੍ਥੋ ਸਦ੍ਦੋ. ਪਕਾਰਸ੍ਮਿਂ ਭੇਦੇ. ਅਵਸਰੋ ਅਵਕਾਸੋ.

੮੩੮. ਚਿਤ੍ਤਕਮ੍ਮਂ ਚਿਤ੍ਤਕਾਰਾਨਂ ਕਮ੍ਮਂ. ਵਿਚਿਤ੍ਤੇ ਨਾਨਾਵਿਧੇ. ਪਞ੍ਞਤ੍ਤਿਯਂ ਚਿਤ੍ਤੋ ਧਨੁਧਰੋਯੇਵ. ਚਿਤ੍ਤਮਾਸੋ ਪੁਣ੍ਣੇਨ੍ਦੁਯੁਤ੍ਤੇਨ ਚਿਤ੍ਤੇਨ ਨਕ੍ਖਤ੍ਤੇਨ ਲਕ੍ਖਿਤੋ ਮਾਸੋ. ਤਾਰਨ੍ਤਰੇ ਚਿਤ੍ਤਨਕ੍ਖਤ੍ਤੇ. ਥਿਯਂ ਨਾਰਿਯਂ.

੮੩੯. ਸਾਮਲੇ ਨੀਲੇ. ਸਯਮਤ੍ਥੇ ਸਯਂਸਦ੍ਦਸ੍ਸ ਅਤ੍ਥੇ. ਸਾਰਿਵਾ ਉਪਾਸਕਾ.

੮੪੦. ‘‘ਪੁਮੇ’’ਤ੍ਯਾਦਿਨਾ ਪੁਬ੍ਬਦ੍ਧੇਨ ਗੁਰੁਸਦ੍ਦਸ੍ਸ ਅਤ੍ਥਾ ਵੁਤ੍ਤਾ, ਅਪਰਦ੍ਧੇਨ ਗਰੁਸਦ੍ਦਸ੍ਸ, ‘‘ਏਕਦੇਸੇਕਤ੍ਤਮਨਞ੍ਞਂਵੇ’’ਤਿ ਨ੍ਯਾਯੇਨ ਦ੍ਵਿਨ੍ਨਮ੍ਪਿ ਏਕਤ੍ਤਮਞ੍ਞਮਾਨੇਨ ਗਾਥਾਨੇਕਤ੍ਥਵਗ੍ਗੇ ਕਥਿਤਾ. ਮਹਨ੍ਤੇ ਬਹੁਤ੍ਤੇ. ਦੁਜ੍ਜਰੇ ਜੀਰਾਪੇਤੁਮਸਕ੍ਕੁਣੇਯ੍ਯੇ, ਦੁਕ੍ਕਰੇ ਵਾ.

੮੪੧. ਅਚ੍ਚਿਤੇ ਪੂਜਿਤੇ. ਖਿਨ੍ਨੇ ਕਿਲਮਥਪ੍ਪਤ੍ਤੇ. ਸਮਿਤੇ ਉਪਸਮਿਤੇ.

ਗਾਥਾਨੇਕਤ੍ਥਵਗ੍ਗਵਣ੍ਣਨਾ ਨਿਟ੍ਠਿਤਾ.

੮੪੨. ਵਿਸੁਦ੍ਧਿਦੇਵੋ, ਸਮ੍ਮੁਤਿਦੇਵੋ, ਉਪਪਤ੍ਤਿਦੇਵੋ ਚਾਤਿ ਵਿਸੁਦ੍ਧਿਦੇਵਾਦਿ. ਨਭਂ ਆਕਾਸੋ.

ਤਰੁਣਾਦੀਸੁ ਤੀਸ੍ਵਤ੍ਥੇਸੁ ਮਾਣਵੋ.

੮੪੩. ਆਦ੍ਯਤ੍ਥਾਦੀਸੁ ਅਗ੍ਗਂ. ਵਰੇ ਸੇਟ੍ਠੇ ਤੀਸੁ.

ਪਚ੍ਚਨੀਕੋ ਸਤ੍ਤੁ. ਅਞ੍ਞੇ ਅਞ੍ਞਤ੍ਥੇ. ਪਚ੍ਛਾਭਾਗੇ ‘‘ਧਾਤੁਲਿਙ੍ਗੇਹਿ ਪਰਾ ਪਚ੍ਚਯਾ’’ਤਿ.

੮੪੪. ਯੋਨਿ ਇਤ੍ਥੀਨਂ ਯੋਨਿਮਗ੍ਗੋ. ਕਾਮੋ ਇਚ੍ਛਾ. ਸਿਰੀ ਪਞ੍ਞਾ, ਪੁਞ੍ਞੋ ਚ. ਇਸ੍ਸਰਂ ਪਭੁਤਾ. ਧਮ੍ਮੋ ਸੀਲਾਦਿ. ਉਯ੍ਯਾਮੋ ਵੀਰਿਯਂ. ਯਸੋ ਪਰਿਵਾਰੋ, ਕਿਤ੍ਤਿ ਚ.

੮੪੫. ਸਮਙ੍ਗਿਨਿ ਸਮਨ੍ਨਾਗਤੇ.

੮੪੬. ਠਿਤਿ ਠਾਨਕ੍ਰਿਯਾ.

੮੪੮. ਖਨ੍ਧਕੋਟ੍ਠਾਸੋ ਅਣ੍ਡਜਾਦਿਚਤੁਕ੍ਕਂ. ਪਸ੍ਸਾਵਮਗ੍ਗੋ ਇਤ੍ਥੀਨਂ ਯੋਨਿ. ਸੋ ਪੁਲ੍ਲਿਙ੍ਗੋ. ਕੂਲੇ ਤੀਰੇ.

੮੪੯. ਨਾਗੋਤੁਨਾਗਸਦ੍ਦੋ ਤੁ. ਉਰਗੇ ਸਪ੍ਪੇ, ਹਤ੍ਥਿਨਿ ਚ.

੮੫੦. ਸਙ੍ਖ੍ਯਾ ਗਣਨਾ. ‘‘ਅਞ੍ਞਤ੍ਥੇ’’ਤ੍ਯੇਕੇ ਵਦਨ੍ਤਿ.

੮੫੧. ਭੇ ਨਕ੍ਖਤ੍ਤਵਿਸੇਸੇ. ਸਨ੍ਤਿਕੇ ਸਮੀਪੇ. ਮੂਲਮੂਲੇ ਲੋਭਾਦਿਕੇ. ਪਾਭਤੇ ਮੂਲਧਨੇ. ਅਂਸੋ ਸਰੀਰਾਵਯਵੋ. ਪਕਣ੍ਡੇ ਰੁਕ੍ਖਾਦੀਨਂ ਸਰੀਰੇ.

੮੫੨. ਕਮ੍ਮੇ ਕ੍ਰਿਯਾਯਂ. ਵਿਕੋਪਨਂ ਵਿਦ੍ਧਂਸਨਂ.

੮੫੩. ਪਚ੍ਛਾਤਾਪੋ ਵਿਪ੍ਪਟਿਸਾਰੋ. ਅਨੁਬਨ੍ਧੋ ਪੁਨਪ੍ਪੁਨਂ ਪਵਤ੍ਤਨਂ. ਰਾਗਾਦੋ ਸਤ੍ਤਕੇ. ਮਾਤਙ੍ਗਸ੍ਸ ਮੁਦ੍ਧਨਿ ਪਿਣ੍ਡਦ੍ਵਯੇ ਕੁਮ੍ਭੋ.

੮੫੪. ਖਗ੍ਗਕੋਸੇ ਖਗ੍ਗਪਿਧਾਨੇ. ਪਟਿਚ੍ਛਦੇ ਸਮਨ੍ਤਤੋ ਛਾਦਨੇ. ਸਾਰਮ੍ਭੇ ਕੋਲਾਹਲੇ.

੮੫੫. ਕਾਲਵਿਸੇਸੋ ਦਸਚ੍ਛਰਕਾਲੋ. ਨਿਬ੍ਯਾਪਾਰਟ੍ਠਿਤਿ ਅਚਿਰਟ੍ਠਿਤਿ, ਅਚਿਰਟ੍ਠਿਤੀਤਿ ਦਸਚ੍ਛਰਤੋਪਿ ਊਨਟ੍ਠਿਤਿ.

ਉਪ੍ਪਤ੍ਤਿਭੂਮਿ ਜਾਤਿਭੂਮਿ.

੮੫੬. ਕਬਲ਼ੀਕਾਰਾਹਾਰਾਦੀਸੁ ਚਤੂਸੁ.

੮੫੭. ਸਦ੍ਧਾਯ ਅਪਰਪ੍ਪਚ੍ਚਯੇ. ਚੀਵਰਾਦੀਸੁ ਚਤੂਸੁ. ਆਧਾਰੋ ਨਿਸ੍ਸਯੋ.

ਦਿਬ੍ਬਵਿਹਾਰੋ, ਅਰਿਯਵਿਹਾਰੋ, ਬ੍ਰਹ੍ਮਵਿਹਾਰੋ ਚਾਤਿ ਦਿਬ੍ਬਵਿਹਾਰਾਦਿ. ਸੁਗਤਾਲਯੇ ਭਿਕ੍ਖੂਨਮਾਵਾਸੇ.

੮੫੮. ਸਮਤ੍ਤਨੇ ਨਿਟ੍ਠਾਯਂ. ਚਕਾਰੇਨ ਨਿਯਮਾਦਿਕੇ ਸਙ੍ਗਣ੍ਹਾਤਿ.

ਸਙ੍ਗੇ ਲਗ੍ਗੇ. ਕਾਮਾਦੋ ਚਤੁਕ੍ਕੇ.

੮੫੯. ਸਪ੍ਪਫਣਙ੍ਗੇਸੂਤਿ ਸਪ੍ਪਸ੍ਸ ਫਣੇ, ਅਙ੍ਗੇ ਚ ਸਰੀਰੇ. ਕੋਟਿਲ੍ਲੇ ਕੁਟਿਲਤਾਯ. ਭੁਞ੍ਜਨਂ ਭੋਜਨਕ੍ਰਿਯਾ.

ਭੂਮਿਭਾਗੇ ਰਾਜਙ੍ਗਣਾਦਿਮ੍ਹਿ. ਕਿਲੇਸੇ ਸਂਕਿਲੇਸੇ. ਮਲੇ ਰਾਗਾਦਿਕੇ.

੮੬੦. ਧਨਾਦਿਦਪ੍ਪੇਤਿ ਧਨਾਦਿਕੇ ਪਟਿਚ੍ਚ ਉਪ੍ਪਨ੍ਨੇ ਦਪ੍ਪੇ.

ਨਿਮਿਤ੍ਤੇ ਕਾਰਣੇ. ਛਲੇ ਸਠ੍ਯੇ.

੮੬੧. ਸੋ ਪੁਲ੍ਲਿਙ੍ਗੋ. ਪਰਮਤ੍ਤਨਿ ਦਿਟ੍ਠੀਨਂ ਗਾਹਲਦ੍ਧੇ ਅਤ੍ਤਨਿ. ਥਮ੍ਭਸ੍ਮਿਂ ਗੇਹਾਦੀਨਂ ਥਮ੍ਭੇ. ਬਲਸਜ੍ਜਨਂ ਯੁਦ੍ਧਕਾਲੇ ਬਲਸ੍ਸ ਸਜ੍ਜਨਂ.

੮੬੨. ਕੁਸੂਲੋ ਧਞ੍ਞਾਦੀਨਂ ਗੇਹਂ.

ਸੋਪਾਨਙ੍ਗਮ੍ਹਿ ਸੋਪਾਨਸੀਸੇ.

੮੬੩. ਨਿਯ੍ਯਾਸੇ ਸਿਲੇਸੇ. ਸੇਖਰੇ ਸੀਸੇ. ਨਾਗਦਨ੍ਤਕੇ ਭਿਤ੍ਤਿਆਦੀਸੁ ਪਵੇਸਿਤੇ ਨਾਗਦਨ੍ਤਾਕਾਰੇ ਦਣ੍ਡੇ.

ਸਿਖਣ੍ਡੋ ਪਿਞ੍ਛਂ. ਤੂਣੀਰੇ ਉਸੁਨਿਧਿਮ੍ਹਿ. ਨਿਕਰੇ ਸਮੂਹੇ.

੮੬੪. ਸਂਯਤਕੇਸੇਸੁ ਬਨ੍ਧਿਤਕੇਸੇਸੁ.

ਕਮ੍ਬੁ ਜਲਜਨ੍ਤੁਵਿਸੇਸੋ. ਨਲਾਟਟ੍ਠਿ ਨਲਾਟੇ ਜਾਤਟ੍ਠਿ. ਗੋਪ੍ਫਕੇ ਪਾਦਗਣ੍ਠਿਮ੍ਹਿ.

੮੬੫. ਕਾਲੇ ਪਞ੍ਚਦਸੀਦਿਵਸਪਰਿਮਾਣੇ. ਸਾਧ੍ਯੇ ਪਤ੍ਤਸਾਧਨੀਯੇ. ਸਖੀ ਸਹਾਯੋ. ਵਾਜੋ ਪਤ੍ਤਂ. ਪਙ੍ਗੁਲ਼ੋ ਪੀਠਸਮ੍ਪੀ.

ਦੇਸੇ ਦੇਸਵਿਸੇਸੇ. ਅਣ੍ਣਵੇ ਸਮੁਦ੍ਦੇ, ਏਤੇ ਪੁਮੇ. ਸੋ ਸਿਨ੍ਧੁਸਦ੍ਦੋ ਸਰਿਤਾਯਂ ਨਦਿਯਂ ਭਵੇ.

੮੬੬. ਕਰੇਣੁਸਦ੍ਦੋ ਗਜੇ ਹਤ੍ਥਿਮ੍ਹਿ, ਪੁਰਿਸੇ ਪੁਲ੍ਲਿਙ੍ਗੇ ਵਤ੍ਤਤਿ. ਹਤ੍ਥਿਨਿਯਂ ਤੁ ਇਤ੍ਥਿਯਂ.

ਰਤਨੇ ਰਤਨਵਿਸੇਸੇ. ਮਣਿਵੇਧੋ ਨਾਮ ਯਂ ਲੋਕੇ ‘‘ਚਿਨ’’ ਇਤਿ ਵੁਚ੍ਚਤਿ. ਇਨ੍ਦਹੇਤਿ ਇਨ੍ਦਾਵੁਧੋ.

੮੬੭. ਕੋਟਿਯਂ ਅਨ੍ਤੇ. ਵਾਦਿਤ੍ਤਵਾਦਨੇ ਵੀਣਾਦਿਵਾਦਿਤ੍ਤਵਾਦਨੋਪਾਯੇ.

‘‘ਕੋਣੋ ਵਜ੍ਜਪ੍ਪਭੇਦੇ ਚ,

ਕੋਣੋ ਸੇਲਗੁਲ਼ੇ ਇਜੇ;

ਵੀਣਾਦਿਵਾਦਨੋਪਾਯੇ,

ਏਕਦੇਸੇ ਗਤਸ੍ਸ ਚੇ’’ਤਿ. –

ਤਿਕਣ੍ਡਸੇਸੋ [ਤਿਕਣ੍ਡਸੇਸ ੩.੩.੧੨੫].

੮੬੮. ਵਣਿਪ੍ਪਥੇ ਵਾਣਿਜਾਨਂ ਵੋਹਾਰਕਮ੍ਮਪਥੇ. ਵੇਦੇ ਵੇਦਵਿਸੇਸੇ, ਵਾਣਿਜੇਪਿ ਨਿਗਮੋ.

ਵਿਵਾਦਾਦੋ ‘‘ਵਿਵਾਦਾਧਿਕਰਣ’’ [ਪਾਚਿ. ੩੯੪] ਨ੍ਤ੍ਯਾਦੀਸੁ. ਆਧਾਰੋ ਕਾਰਕਵਿਸੇਸੋ, ਨਿਸ੍ਸਯੋ ਚ. ਕਾਰਣੇ ‘‘ਯਤ੍ਵਾਧਿਕਰਣਮੇਨ’’ਨ੍ਤਿ [ਧ. ਸ. ੧੩੫੪].

੮੬੯. ਪਸੁਮ੍ਹਿ ਗੋਣੇ. ਵਸੁਧਾ ਪਥਵੀ. ਵਾਚਾ ਵਚਨਂ. ਆਦਿਨਾ ਸਗ੍ਗਰਂਸਿਵਜਿਰਚਨ੍ਦਜਲਾਦਯੋ ਗਹਿਤਾ.

ਹਰਿਤੇ ਸੁਕਪਤ੍ਤਸਦਿਸੇ ਵਣ੍ਣਵਿਸੇਸੇ. ਵਾਸੁਦੇਵੇ ਕਣ੍ਹੇ.

੮੭੦. ਆਯਤ੍ਤੇ ਨਿਸ੍ਸਯੇ.

ਕਣ੍ਣਪੂਰੋ ਕਣ੍ਣਾਲਙ੍ਕਾਰੋ. ਸੇਖਰੇ ਅਗ੍ਗੇ. ਏਤੇ ਦ੍ਵਿਨ੍ਨਮ੍ਪਿ ਅਤ੍ਥਾ.

੮੭੧. ਵਿਜ੍ਜੁਯਂ ਚਞ੍ਚਲਾਯਂ. ਇਤ੍ਥਿਪੁਰਿਸੇ ਪੁਰਿਸਿਤ੍ਥਿਯਂ.

ਕੋਣੇ ਅਸ੍ਸੇ. ਸਙ੍ਖ੍ਯਾਵਿਸੇਸੋ ‘‘ਕੋਟਿਪਕੋਟੀ’’ਤ੍ਯਾਦੀਸੁ. ਉਕ੍ਕਂਸੇ ਪਰਿਯੋਸਾਨੇ.

੮੭੨. ਜਾਲਾ ਅਗ੍ਗਿਜਾਲਾ. ਅਗ੍ਗਂ ਕੋਟਿ.

ਨਾਰੀ ਆਸੀਸਦ੍ਦੋ ਸਪ੍ਪਦਾਠਾਯਂ. ਇਟ੍ਠਸ੍ਸ ਵਤ੍ਥੁਨੋ ਆਸੀਸਨਾਯਂ ਪਤ੍ਥਨਾਯਮ੍ਪਿ ਇਤ੍ਥੀ ਏਵ.

੮੭੩. ਵਿਲੀਨਤੇਲੇ ਵਿਸਰਣਤੇਲੇ. ਵਸਗਾ ਵਸਂ ਗਚ੍ਛਨ੍ਤੀ ਨਾਰੀ. ਵਞ੍ਚ੍ਯਗਾਵੀ ਅਨਵਚ੍ਛਾ ਸੋਰਭੇਯੀ.

ਅਭਿਲਾਸੇ ਇਚ੍ਛਾਯਂ. ਕਿਰਣੇ ਰਂਸਿਮ੍ਹਿ. ਅਭਿਸਙ੍ਗੇ ਲਗ੍ਗਨੇ.