੨. ਸਂਕਿਣ੍ਣਵਗ੍ਗਵਣ੍ਣਨਾ

੭੫੮. ਪੁਬ੍ਬਸ੍ਮਿਂ ਕਣ੍ਡਦ੍ਵਯੇ ਬੁਦ੍ਧਾਦੀਨਿ ਨਾਮਾਨਿ ਸਮਾਨਤ੍ਥਾਨਿ ਪਕਰਣੇਨ ਨਿਬਦ੍ਧਾਨਿ, ਅਸ੍ਮਿਮ੍ਪਿ ਕਣ੍ਡੇ ਸੋਭਨਾਦੀਨਿ ਵਿਸੇਸਨਨਾਮਾਨਿ, ਸਮਯਾਦੀਨ੍ਯਨੇਕਤ੍ਥਾਨਿ, ਚਿਰਸ੍ਸਮਾਦੀਨਿ ਚ ਅਬ੍ਯਯਾਨਿ ਪਕਰਣੇਨੇਵ ਨਿਬਦ੍ਧਾਨਿ, ਇਦਾਨਿ ਪਨ ਪੁਬ੍ਬਵਗ੍ਗੇਸੁ ਵਿਤ੍ਥਾਰਭਯਾ ਯੇ ਨ ਨਿਬਦ੍ਧਾ, ਤਂਸਙ੍ਗਹਤ੍ਥਂ, ਤਂਸਮਯਾਨੁਪਾਲਨਤ੍ਥਞ੍ਚ ਸਂਕਿਣ੍ਣਮਾਰਭਤੇ ‘‘ਞੇ ਯ੍ਯ’’ਮਿਚ੍ਚਾਦਿਨਾ. ਤਸ੍ਸਤ੍ਥੋ – ਇਹਾਪਿ ਸਂਕਿਣ੍ਣਵਗ੍ਗੇਪਿ ਕ੍ਵਾਪਿ ਕਤ੍ਥਚਿ ਕ੍ਰਿਯਾਦੀਸੁ ਪਚ੍ਚਯਤ੍ਥਵਸੇਨ ਆਪਚ੍ਚਯਾਦੀਨਂ ਇਤ੍ਥਿਲਿਙ੍ਗਾਦਿਭਾਵਜੋਤਕਸ੍ਸ ਸਭਾਵਸ੍ਸ ਵਸੇਨ ਲਿਙ੍ਗਂ ਇਤ੍ਥਿਲਿਙ੍ਗਾਦਿਕਂ ਞੇਯ੍ਯਨ੍ਤਿ. ਚਕਾਰੇਨ ਭਿਯ੍ਯੋ ਰੂਪਨ੍ਤਰਾਦਿਪਰਿਗ੍ਗਹੋਪਿ. ਇਹਾਤਿ ਚ ਉਪਲਕ੍ਖਣਂ, ਵਗ੍ਗਨ੍ਤਰੇਸੁਪਿ ਪਚ੍ਚਯਤ੍ਥਵਸੇਨ ਲਿਙ੍ਗਾਦਿਨਿਚ੍ਛਯਸਮ੍ਭਵਤੋ.

ਕਤ੍ਤਬ੍ਬਤੋ ਕ੍ਰਿਯਾ, ਕਰ ਕਰਣੇ, ਣ੍ਯੋ, ਇਕਾਰਾਗਮੋ, ਅਸ੍ਸਿ, ਵਣ੍ਣਵਿਪਰਿਯਯੇ ਕ੍ਰਿਯਾ, ਕ੍ਰਿਯਮ੍ਪਿ, ਰਿਰਿਯਪਚ੍ਚਯੇ ਕਿਰਿਯਂ, ਕਿਰਿਯਾਪਿ. ਰਮ੍ਮਪਚ੍ਚਯੇ ਕਮ੍ਮਂ.

ਤਿਕਂ ਚਿਤ੍ਤੋਪਸਮੇ. ਸਮੁ ਉਪਸਮੇ,ਤਿ, ਸਨ੍ਤਿ. ਥਮ੍ਹਿ ਸਮਥੋ.ਅਮ੍ਹਿ ਸਮੋ.

ਤਿਕਂ ਕਾਯੋਪਸਮੇ. ਦਮੁ ਉਪਸਮੇ. ਥਮ੍ਹਿ ਦਮਥੋ. ਤਿਮ੍ਹਿ ਦਨ੍ਤਿ. ਚਿਤ੍ਤੋਪਸਮੇਪ੍ਯੇਤੇ.

ਸੁਦ੍ਧਕਮ੍ਮਨਿ ਵਤ੍ਤਂ ਭਵਤਿ. ਵਤ੍ਤ ਵਤ੍ਤਨੇ, ਵਤ੍ਤ ਸਮਾਦਾਨੇ ਵਾ ਵਤ੍ਤਂ, ਅਸੀਤਿਮਹਾਵਤ੍ਤਾਦਿ.

ਆਸਙ੍ਗਵਚਨਂ ਆਸਤ੍ਤਵਚਨਂ ਸਦ੍ਦਸਰੂਪਂ ਪਰਾਯਣਂ ਨਾਮ ਵੁਤ੍ਤਂ, ਤਞ੍ਚ ਤੀਸੁ. ਪਰਂ ਆਯਨਂ ਆਯਤ੍ਤੋ ਤਾਣਂ ਪਰਾਯਣਂ, ਕਮ੍ਮਾਸਤ੍ਤੋ ਇਚ੍ਚਤ੍ਥੋ, ਸਾਕਲ੍ਯਵਚਨੇ ਤੁ ਪਾਰਾਯਣਂ, ਪਾਰਂ ਪਰਿਯਨ੍ਤਂ ਅਯਨ੍ਤਿ ਗਚ੍ਛਨ੍ਤਿ ਕਸ੍ਸਚਿ ਅਨੇਨਾਤਿ ਪਾਰਾਯਣਂ, ਯੁ, ਣਤ੍ਤਂ, ਯਥਾ – ਨਾਮਪਾਰਾਯਣਂ, ਧਾਤੁਪਾਰਾਯਣਂ.

੭੫੯. ਤਿਕਂ ਦ੍ਵਿਧਾਭਾਵੇ. ਭਿਦਿ ਦ੍ਵਿਧਾਕਰਣੇ, ਣੋ. ਦਰ ਵਿਦਾਰਣੇ. ਫੁਟ ਵਿਕਸਨੇ, ਫੁਟ ਭੇਦਨੇ ਵਾ, ਯੁ.

ਦ੍ਵਯਂ ਤਪ੍ਪਨੇ. ਤਪ ਪੀਣਨੇ, ਯੁ. ਪੀ ਤਪ੍ਪਨੇ, ਯੁ, ਕਿਯਾਦਿ, ਨਸ੍ਸ ਣਤ੍ਤਂ. ਅਵਨਮ੍ਪਿ, ਅਵ ਪਾਲਨੇ, ਦਿਤ੍ਤਿਯਞ੍ਚ ਅਨੇਕਤ੍ਥਤ੍ਤਾ.

ਦ੍ਵਯਂ ਸਾਪੇ. ਕੁਸ ਅਵ੍ਹਾਨੇ, ਭੇਦਨੇ ਚ, ਯੁ. ਸਨ੍ਜ ਸਙ੍ਗੇ, ਅਭਿਸਙ੍ਗੋ.

ਤਿਕਂ ਯਾਚਨਾਯਂ. ਭਿਕ੍ਖ ਯਾਚਨੇ, ਯੁ. ਯਾਚ ਯਾਚਨੇ. ਅਤ੍ਥ ਯਾਚਨੇ. ਅਦ੍ਦਨੋਪ੍ਯਤ੍ਰ, ਅਦ੍ਦ ਗਤਿਮ੍ਹਿ, ਯਾਚਨੇ ਚ.

੭੬੦. ਨਿਮਿਤ੍ਤਰਹਿਤਂ ਯਦਿਚ੍ਛਾ ਨਾਮ, ਯਾ ਯਾ ਇਚ੍ਛਾ ਅਧਿਪ੍ਪਾਯੋ ਯਦਿਚ੍ਛਾ ਨਾਮ. ਸੇਰਿਤਾਪਿ.

ਤਿਕਂ ਆਪੁਚ੍ਛਨੇ, ਆਪੁਚ੍ਛਨਞ੍ਚ ਗਮਨਾਗਮਨਾਦਿਸਮਯੇ ਸੁਹਜ੍ਜ ਬਨ੍ਧਵਾਦੀਨਮਾਲਿਙ੍ਗਨ ਚੁਮ੍ਬਨਸ੍ਵਾਗਤਪਿਯਵਚਨਾਰੋਗ੍ਯਪੁਚ੍ਛਨਗਮਨਾਨੁਞ੍ਞਾਦਿਨਾ ਆਨਨ੍ਦਨਂ. ਪੁਚ੍ਛ ਪੁਚ੍ਛਨੇ, ਆਪੁਚ੍ਛਨਂ. ਨਨ੍ਦ ਸਮਿਦ੍ਧਿਯਂ, ਆਨਨ੍ਦਨਂ. ਸਭਾਜ ਪੀਤਿਦਸ੍ਸਨੇਸੁ, ਸਭਾਜ ਪੀਤਿਵਚਨੇਸੁ ਵਾ, ਚੁਰਾਦਿ, ਯੁ, ਸਭਾਜਨਂ.

ਦ੍ਵਯਂ ਨਯੇ. ਞਾਯਨ੍ਤਿ ਯੇਨਾਤਿ ਞਾਯੋ, ਆਕਾਰਨ੍ਤਾਨਮਾਯੋ. ਨ੍ਯਾਯੋਪਿ, ਨਿਸ੍ਸੇਸਤੋ ਅਯਤਿ ਯੇਨ ਨ੍ਯਾਯੋ. ਨੀ ਨਯੇ, ਅਯਾਦੇਸੋ, ਨਯੋ.

ਦ੍ਵਯਂ ਵੁਦ੍ਧਿਮ੍ਹਿ. ਫਾ ਵੁਦ੍ਧਿਮ੍ਹਿ, ਫਾਯ ਵੁਦ੍ਧਿਯਂ ਵਾ, ਯਲੋਪੋ,ਤਿ, ਫਾਤਿ, ਨਾਰਿਯਂ. ਵਦ੍ਧ ਵਦ੍ਧਨੇ,ਤਿ, ਦਲੋਪੋ, ਧਢਭਹੇਹਿ ਧਢਾ ਚ, ਅਸ੍ਸੁ, ਵੁਦ੍ਧਿ, ਵੁਡ੍ਢਿਪਿ.

੭੬੧. ਕਿਲਮ ਹਾਸਕ੍ਖਯੇ, ਥੋ, ਕਿਲਮਥੋ. ਯੁਮ੍ਹਿ ਕਿਲਮਨਂ. ਸੂ ਪਾਣਿਪਸਵੇ, ਪਸਵਨਂ ਪਸਵੋ, ਤਿਮ੍ਹਿ ਪਸੂਤਿ.

ਕਸ ਗਤਿਯਂ ਹਿਂਸਾਯਞ੍ਚ, ਨਿਗ੍ਗਹੀਤਾਗਮੋ, ਉਕ੍ਕਂਸੋ, ਕਸ ਵਿਲੇਖਨੇ ਵਾ. ਅਤਿਸਯੋ ਵੁਤ੍ਤੋ. ਭੁਸਾਦਯੋ ਪਮਾਣਾਤਿਸਯਵਸੇਨ ਵੁਤ੍ਤਾ, ਉਕ੍ਕਂਸੋ ਗੁਣਾਤਿਸਯਵਸੇਨ ਵੁਤ੍ਤੋ, ਅਤਿਸਯੋ ਪਨ ਉਭਯਵਸੇਨਾਤਿ ਉਭਯਤ੍ਰ ਨਿਦ੍ਦਿਟ੍ਠਾਨਂ ਭੇਦੋ. ਤਿਕਂ ਜਯਨੇ. ਜਯਨਂ ਜਯੋ, ਯੁ, ਜਯਨਂ. ਤਿਮ੍ਹਿ ਜਿਤਿ, ਨਾਰੀ.

੭੬੨. ਬਨ੍ਧਨਨ੍ਤਾਨਿ ਦ੍ਵੇ ਦ੍ਵੇ ਨਾਮਾਨਿ. ਵਸ ਕਨ੍ਤਿਯਂ. ਕਮੁ ਕਨ੍ਤਿਯਂ,ਤਿ. ਵਿਧ ਵੇਧਨੇ, ਬ੍ਯਥਨੇ ਚ ਅਨੇਕਤ੍ਥਤ੍ਤਾ, ਅ, ਇਕਾਰਸ੍ਸ ਯਾਦੇਸੋ, ਬ੍ਯਧੋ, ਵੇਧੋ. ਗਹ ਉਪਾਦਾਨੇ ਨਿਬਨ੍ਧਨੇ ਚ, ਗਹੋ, ਗਾਹੋ ਚ. ਵਰ ਆਵਰਣੇ, ਵਰੋ. ਵੁ ਸਂਵਰਣੇ,ਤਿ, ਵੁਤਿ. ਪਚ ਪਾਕੇ, ਇਤ੍ਥਿਯਮਤਿਯਵੋ ਵਾ, ਅ. ਪਚਨਂ ਪਾਕੋ, ਣੋ.

ਦ੍ਵਯਂ ਆਹ੍ਵਾਨੇ. ਹੁ ਦਾਨਾਦਨਹਬ੍ਯਪ੍ਪਦਾਨੇਸੁ, ਣੋ, ਹਵੋ. ਤਿਮ੍ਹਿ ਹੁਤਿ. ਦ੍ਵਯਂ ਅਨੁਭਵਨੇ. ਵਿਦ ਞਾਣੇ, ਣੋ, ਵੇਦੋ. ਵਿਦ ਵੇਦਨਾਖ੍ਯਾਨਨਿਵਾਸੇਸੁ, ਚੁਰਾਦਿ, ਯੁ, ਵੇਦਨਂ, ਵਾਕਾਰੋ ਵੇਦਨਾਸਦ੍ਦਸ੍ਸ ਨਪੁਂਸਕਤ੍ਤਾਪੇਕ੍ਖੋ.

੭੬੩. ਦ੍ਵਯਂ ਧਨਾਦਿਜਾਨਿਯਂ. ਜਰ ਵਯੋਹਾਨਿਮ੍ਹਿ, ਯੁ, ਜੀਰਣਂ, ਅਸ੍ਸੀ. ਹਾ ਚਾਗੇ, ਯੁ, ਨਦਾਦਿ, ਰਸ੍ਸੋ, ਹਸ੍ਸ ਜੋ, ਜਾਨਿ. ਤਾ ਪਾਲਨੇ, ਯੁ, ਣਤ੍ਤਂ. ਦ੍ਵਯਂ ਪਮਾਣੇ. ਮਾ ਮਾਨੇ,ਤਿ, ਪਮਿਤਿ. ਅਮ੍ਹਿ ਪਮਾ.

ਦ੍ਵਯਂ ਸਂਯੋਗੇ. ਸਿਲਿਸ ਆਲਿਙ੍ਗਨੇ. ਸਂਪੁਬ੍ਬੋ ਧਾ ਧਾਰਣੇ, ਇ, ਸਨ੍ਧਨਂ ਸਨ੍ਧਿ. ਦ੍ਵਯਂ ਖਯੇ. ਖਿ ਖਯੇ, ਣੋ, ਇਸ੍ਸੇ, ਏ ਅਯ, ਖਯੋ. ਚਿ ਚਯੇ, ਅਪਪੁਬ੍ਬੋ ਖਯੇ. ਦ੍ਵਯਂ ਸਦ੍ਦੇ. ਰੁ ਸਦ੍ਦੇ, ਣੋ, ਵੁਦ੍ਧ੍ਯਾਦੇਸੋ. ਰਣ ਸਦ੍ਦੇ. ਅ, ਰਣੋ.

੭੬੪. ਗਦ ਬ੍ਯਤ੍ਤਿਯਂ ਵਾਚਾਯਂ, ਣੋ, ਅ ਚ, ਨਿਗਾਦੋ, ਨਿਗਦੋ ਚ. ਦ੍ਵਯਂ ਮਦੇ. ਮਦ ਉਮ੍ਮਾਦੇ, ਮਾਦੋ, ਮਦੋ ਚ. ਸਿ ਬਨ੍ਧਨੇ,ਤਿ, ਸਿਤਿ.

ਤਿਕਂ ਆਕਾਰੇ. ਆਕਰਣਂ ਆਕਾਰੋ, ਅਨੇਕਤ੍ਥਤ੍ਤਾ ਮੁਖਵਙ੍ਕਾਦ੍ਯਙ੍ਗਵਿਕਾਰੋ ਵਾ, ਇਙ੍ਗਤਿ ਜਾਨਾਤੀਤਿ ਵਾ ਯੇਨ ਆਕਾਰੋ. ਇਙ੍ਗ ਗਮਨਤ੍ਥੋ, ਤੋ, ਅ ਚ, ਇਙ੍ਗਿਤਂ, ਇਙ੍ਗੋ ਚ. ਅਤ੍ਥਸ੍ਸ ਧਨਸ੍ਸ ਅਪਗਮੋ ਵਿਨਾਸੋ ਬ੍ਯਯੋ ਨਾਮ. ਬ੍ਯਯ ਚਿਤ੍ਤਸਮੁਸ੍ਸਗ੍ਗੇ.

੭੬੫. ਦ੍ਵਯਂ ਅਨ੍ਤਰਾਯੇ. ਚੁਤਿਪਟਿਸਨ੍ਧੀਨਮਨ੍ਤਰੇ ਅਯਤੀਤਿ ਅਨ੍ਤਰਾਯੋ. ਪਟਿਪਕ੍ਖਵਸੇਨ ਊਹਤਿ ਪਵਤ੍ਤਤੀਤਿ ਪਚ੍ਚੂਹੋ, ਅਥ ਵਾ ਕਾਰਿਯਸਿਦ੍ਧਿ ਅਨ੍ਤਰਂ ਬ੍ਯਵਧਾਨਂ ਅਯਤਿ ਗਮਯਤੀਤਿ ਅਨ੍ਤਰਾਯੋ. ਪਚ੍ਚੂਹਨ੍ਤਿ ਵਿਨਿਹਨ੍ਤੀਤਿ ਪਚ੍ਚੂਹੋ.

ਵਿਕਰਣਂ ਅਞ੍ਞਥਾ ਭਵਨਨ੍ਤਿ ਵਿਕਾਰੋ, ਵਿਕਤਿ ਚ, ਕਰ ਕਰਣੇ, ਣੋ,ਤਿ ਚ.

ਦ੍ਵਯਂ ਸਭਾਵਵਿਗਮੇ. ਸਿਲਿਸ ਆਲਿਙ੍ਗਨੇ, ਪਵਿਪੁਬ੍ਬੋ ਤਂਸਭਾਵਵਿਗਮੇ, ਵਿਗਤੋ ਧੁਰੋ ਸਦਿਸਭਾਵੋ ਯਸ੍ਮਾਤਿ ਵਿਧੁਰੋ, ‘‘ਵਿਧੁਰਂ ਪਵਿਸਿਲੇਸੇ, ਕ੍ਲਿਵਞ੍ਚ ਵਿਕਲੇ ਤਿਸੂ’’ਤਿ [ਚਿਨ੍ਤਾਮਣਿਟੀਕਾ ੨੨.੨੦] ਰਭਸੋ. ਵਿਧ ਵਿਧਾਨੇ ਵਾ, ਉਰੋ. ਦ੍ਵਯਂ ਆਸਨੇ. ਵਿਸ ਪਵੇਸਨੇ, ਉਪਵੇਸਨਂ. ਆਸ ਉਪਵੇਸਨੇ, ਆਸਨਂ.

੭੬੬. ਤਿਪਾਦਂ ਅਧਿਪ੍ਪਾਯੇ. ਚਿਤ੍ਤਮਧ੍ਯਾਗਨ੍ਤ੍ਵਾ ਸਯਤੀਤਿ ਅਜ੍ਝਾਸਯੋ. ਅਨਮਿਪੁਬ੍ਬੇ ਆਸਯੋ. ਅਧਿਪਯਤਿ ਚਿਤ੍ਤੇਤਿ ਅਧਿਪ੍ਪਾਯੋ, ਣੋ, ਪਯ ਗਮਨੇ. ਚਿਤ੍ਤੇ ਅਭਿਸਨ੍ਧਾਯਤੀਤਿ ਅਭਿਸਨ੍ਧਿ, ਦ੍ਵੀਸੁ. ਭਵਤਿ ਚਿਤ੍ਤੇਤਿ ਭਾਵੋ, ਣੋ. ਅਧਿਮੁਚ੍ਚਨਂ ਚਿਤ੍ਤੇ ਅਧਿਟ੍ਠਾਨਂ ਅਧਿਮੁਤ੍ਤਿ, ਨਾਰੀ. ਛਨ੍ਦੋ ਤਣ੍ਹਾਯਮ੍ਪਿ ਵੁਤ੍ਤੋ.

ਦ੍ਵਯਂ ਆਦੀਨਵੇ. ਦੋਸੋ ਪਟਿਘੇ ਵੁਤ੍ਤੋ. ਆ ਭੁਸੋ ਦੀਨਂ ਵਾਯਤਿ ਗਮਯਤੀਤਿ ਆਦੀਨਵੋ, ਦੀਨ ਦੁਗ੍ਗਤਭਾਵੇ, ਵੋ, ਵੀ ਗਮਨੇ ਚ.

੭੬੭. ਦ੍ਵਯਂ ਆਨਿਸਂਸੇ. ਸਂਸ ਹਿਂਸਾਥੁਤੀਸੁ, ਆਨਿਸਂਸੋ ਅਮੁਖ੍ਯਫਲੇ, ਮੁਖ੍ਯਫਲੇ ਚ, ਤਥਾ ਗੁਣੋ. ਗੁਣ ਪਕਾਸਨੇ, ਪਕਾਸੇਤਿ ਕਾਰਣਨ੍ਤਿ ਗੁਣੋ, ਗਣ ਸਙ੍ਖ੍ਯਾਨੇ ਵਾ, ਅਸ੍ਸੁ, ਗੁਣੋ. ਦ੍ਵਯਂ ਮਜ੍ਝੇ. ਮਜ ਸੁਦ੍ਧਿਯਂ, ਝੋ. ਵਿਪੁਬ੍ਬੇ ਵੇਮਜ੍ਝਂ.

ਦ੍ਵਯਂ ਤਰੁਣਸੂਰਿਯਟ੍ਠਾਨੇ. ਅਹਸ੍ਸ ਮਜ੍ਝੋ ਮਜ੍ਝਹੋ, ਸੋ ਏਵ ਮਜ੍ਝਨ੍ਹਿਕੋ, ਹਸ੍ਸ ਨ੍ਹੋ [ਮੋਗ੍ਗਲ੍ਲਾਨ ੩.੧੧੦ ਸੁਤ੍ਤਂ ਪਸ੍ਸਿਤਬ੍ਬਂ]. ਅਹਸ੍ਸ ਮਜ੍ਝੋ ਮਜ੍ਝਨ੍ਹੋ, ਮਜ੍ਝਨ੍ਤੋਪਿ. ਦ੍ਵਯਂ ਨਾਨਤ੍ਤਾਯਂ. ਵਿਗਤਾ ਮਤ੍ਤਾ ਸਦਿਸਪ੍ਪਮਾਣਂ ਏਤੇਨ ਹੇਤੁਭੂਤੇਨ ਵੇਮਤ੍ਤਂ. ਨਾਨਮੇਵ ਨਾਨਤਾ, ਨਾਨਸਦ੍ਦੋ ਪੁਨ੍ਨਪੁਂਸਕੇ, ਅਬ੍ਯਯੇ ਤੁ ਨਾਨਾ.

੭੬੮. ਦ੍ਵਯਂ ਨਿਦ੍ਦਾਪਟਿਕ੍ਖੇਪੇ. ਜਾਗਰ ਨਿਦ੍ਦਕ੍ਖਯੇ, ਜਾਗਰਮੇਵ ਜਾਗਰਿਯੋ. ਦ੍ਵਯਂ ਜਲਾਦੀਨਮਵਿਚ੍ਛਨ੍ਨਾਯਂ ਸਨ੍ਤਤਿਯਂ. ਵਹਤਿਸ੍ਮਾ ਣੋ, ਪਵਾਹੋ. ਵਤੁ ਆਵਤ੍ਤਨੇ,ਤਿ, ਪਵਤ੍ਤਿ.

ਤਿਕਂ ਵਿਤ੍ਥਾਰੇ. ਅਸੁ ਖੇਪਨੇ, ਣੋ, ਬ੍ਯਾਸੋ. ਪਪੁਬ੍ਬੋ ਪਞ੍ਚ ਵਿਤ੍ਥਾਰੇ. ਥਰ ਸਨ੍ਥਰਣੇ, ਪਾਦਿਪੁਬ੍ਬੋ ਚ ਵਿਤ੍ਥਾਰੇ. ਤਿਕਂ ਸਂਯਮੇ. ਯਮੁ ਉਪਰਮੇ, ਣੋ, ਯਾਮੋ. ਇਤਰੇਸੁ ਅ.

੭੬੯. ਦ੍ਵਯਂ ਗਤ੍ਤਾਨਂ ਮਦ੍ਦਨੇ. ‘‘ਸਮ੍ਬਾਹਨੋ’ਙ੍ਗਮਦ੍ਦਕੋ’’ਤਿ ਵੋਪਾਲਿਤੋ, ਸਂਪੁਬ੍ਬੋ ਵਾਹ ਪਯਤਨੇ, ਮਦ੍ਦਨੇ ਵਾ, ਯੁ. ਮਦ੍ਦ ਮਦ੍ਦਨੇ. ਦ੍ਵਯਂ ਨਾਨਾਰਮ੍ਮਣਾਦੀਸੁ ਵਿਸਪ੍ਪਨੇ. ਸਰ ਗਮਨੇ, ਣ. ਸਪ੍ਪ ਗਮਨੇ, ਯੁ, ਵਿਸਪ੍ਪਨਂ.

ਦ੍ਵਯਂ ਪਰਿਚਯੇ. ਥੁ ਅਭਿਤ੍ਥਵੇ. ਚਿ ਚਯੇ. ਤਿਕਂ ਸਙ੍ਗਮੇ. ਮਿਲ ਸਿਲੇਸਨੇ, ਣੋ, ਸਕਤ੍ਥੇ ਕੋ, ਮੇਲਕੋ. ਸਨ੍ਜ ਸਙ੍ਗੇ, ਣੋ. ਸਂਪੁਬ੍ਬਾ ਗਮਿਤੋ ਅ.

੭੭੦. ਸਨ੍ਨਿਕਟ੍ਠਮ੍ਹਿ ਸਮੀਪੇ ਸਨ੍ਨਿਧਿਸਦ੍ਦੋ, ਸਨ੍ਨਿਧਾਨਂ ਸਨ੍ਨਿਧਿ, ਪੁਮੇ, ਠਪਨੇਪ੍ਯਯਂ. ਨਸ ਅਦਸ੍ਸਨੇ, ਣੋ. ਦਿਸ ਪੇਕ੍ਖਨੇ, ਯੁ, ਦਿਸ੍ਸਾਦੇਸੋ, ਇਸ੍ਸਤ੍ਤਂ.

ਤਿਕਂ ਧਞ੍ਞਾਦੀਨਂ ਲਵਨੇ. ਲੂ ਛੇਦਨੇ, ਅ. ਣਮ੍ਹਿ ਅਭਿਲਾਵੋ. ਯੁਮ੍ਹਿ ਲਵਨਂ. ਦ੍ਵਯਂ ਖਣਪ੍ਪਤ੍ਤਿਯਂ. ਪਪੁਬ੍ਬੋ ਥੁ ਅਭਿਤ੍ਥਵੇ. ਸਰ ਗਮਨੇ, ਅਵਸਰੋ. ਸਮਾਤਿ ਦ੍ਵੇ ਤੁਲ੍ਯਤ੍ਥਾ.

੭੭੧. ਚਤੁਕ੍ਕਂ ਪਰਿਯੋਸਾਨੇ. ਸਾ ਤਨੁਕਰਣੇ, ਯੁ, ਓਸਾਨਂ. ਪਰਿਪੁਬ੍ਬੋ ਪਰਿਯੋਸਾਨਂ. ਉਕ੍ਕਂਸਾਤਿਸਯਾ ਪਕਟ੍ਠੇਪ੍ਯੁਤ੍ਤਾ.

ਦ੍ਵਯਂ ਸਣ੍ਠਾਨੇ. ਵਿਸ ਪਵੇਸਨੇ, ਸਨ੍ਨਿਵੇਸੋ. ਠਾ ਗਤਿਨਿਵਤ੍ਤਿਯਂ, ਯੁ, ਸਣ੍ਠਾਨਂ. ਦ੍ਵਯਂ ਅਬ੍ਭਨ੍ਤਰਵਾਚਕਂ ਪਾਟਿਪਦਿਕਂ. ਅਥ ਵਾ ਅਭਿ ਬਨ੍ਧਨੇ, ਅਰੋ, ਧਾਤ੍ਵਤ੍ਥਾਨੁਵਤ੍ਤਕੋ ਅਭਿ, ਅਬ੍ਭਨ੍ਤਰਂ. ਅਬ੍ਭਾਭਾਵੇ ਅਨ੍ਤਰਂ.

੭੭੨. ਤਿਕਂ ਪਾਟਿਹਾਰਿਯੇ. ਹਿ ਗਤਿਮ੍ਹਿ, ਪਟਿਤੋ ਹਿਸ੍ਸ ਹੇਰਣ ਹੀਰਣ, ਪਾਟਿਹੇਰਂ, ਪਾਟਿਹੀਰਂ. ਯਦਾਦਿਨਾ ਹਾਰਿਯਞ੍ਚ, ਪਾਟਿਹਾਰਿਯਂ, ਅਥ ਵਾ ਪਟਿਪਕ੍ਖੇ ਹਰਤੀਤਿ ਪਾਟਿਹੀਰਂ, ਣੋ, ਅਸ੍ਸੀ. ਏਕਾਰਾਦੇਸੇ ਪਾਟਿਹੇਰਂ. ਣ੍ਯਮ੍ਹਿ ਪਾਟਿਹਾਰਿਯਂ, ਵਿਹਤੁਪਕ੍ਕਿਲੇਸੇਨ ਪਚ੍ਚਾਹਰਿਤਬ੍ਬਂ ਪਵਤ੍ਤੇਤਬ੍ਬਨ੍ਤਿ ਪਾਟਿਹੀਰਨ੍ਤਿਆਦਿਪਿ ਕਾਤਬ੍ਬਂ.

ਦ੍ਵਯਂ ਕਤ੍ਤਬ੍ਬਮਤ੍ਤੇ. ਕਰਮ੍ਹਾ ਰਿਚ੍ਚ, ਕਿਚ੍ਚਂ, ਅਵਸ੍ਸਂ ਕਾਤਬ੍ਬੇਪਿ. ਅਨੀਯਪਚ੍ਚਯੇ ਕਰਣੀਯਂ.

ਦ੍ਵਯਂ ਪੁਪ੍ਫਾਦਿਨਾ ਉਦਕਾਦੀਨਂ ਪਰਿਭਾਵਨੇ. ਸੁਨ੍ਦਰਂ ਕਰੀਯਤੇ ਯੇਨਾਤਿ ਸਙ੍ਖਾਰੋ, ਣੋ, ਖਰਾਦੇਸੋ. ਵਸ ਨਿਵਾਸੇ, ਯੁ, ਵਾਸਨਾ, ਕਿਲੇਸਾਦੀਨਂ ਸਤ੍ਤਿਵਿਸੇਸੇਪਿ. ਸਾ ਹਿ ਕੁਸਲਾਪਿ ਅਤ੍ਥਿ ਅਕੁਸਲਾਪਿ ਅਬ੍ਯਾਕਤਾਪਿ, ਤਥਾ ਪਹਾਤਬ੍ਬਾਪਿ ਅਤ੍ਥਿ ਅਪ੍ਪਹਾਤਬ੍ਬਾਪਿ. ਤਤ੍ਥ ਯਾ ਕੁਸਲਾਬ੍ਯਾਕਤਾ, ਨ ਸਾ ਪਹਾਤਬ੍ਬਾ. ਯਾ ਪਨ ਅਕੁਸਲਾ, ਸਾ ਸੁਖੁਮਤਰਤਾਯ ਭਗਵਤੋਯੇਵ ਅਰਿਯਮਗ੍ਗੇਨ ਪਹਾਤਬ੍ਬਾ, ਨਾਞ੍ਞੇਸਂ. ਏਵਂ ਸਨ੍ਤੇ ਅਰਿਯਾਨਮ੍ਪਿ ਅਪਾਯੂਪਪਤ੍ਤਿ ਸਿਯਾਤਿ? ਨ ਸਿਯਾ, ਸਬ੍ਬੇਸਮੇਵ ਅਰਿਯਾਨਂ ਅਪਾਯੂਪਪਤ੍ਤਿਹੇਤੁਕਾਯ ਵਾਸਨਾਯ ਪਹੀਨਤ੍ਤਾ. ਦੁਵਿਧਾ ਹਿ ਅਕੁਸਲਾ ਵਾਸਨਾ ਕਾਯਵਚੀਪਯੋਗਹੇਤੁਭੂਤਾ ਚ ਅਪਾਯੂਪਪਤ੍ਤਿਹੇਤੁਭੂਤਾ ਚ. ਤਤ੍ਥ ਪੁਰਿਮਾ ਭਗਵਤੋਯੇਵ ਅਰਿਯਮਗ੍ਗੇਨ ਪਹਾਤਬ੍ਬਾ, ਇਤਰਾ ਸਬ੍ਬੇਸਮ੍ਪਿ ਅਰਿਯਮਗ੍ਗੇਨਾਤਿ, ਤਸ੍ਮਾ ਯਂ ਵੁਤ੍ਤਂ ‘‘ਬੁਦ੍ਧਾਵ ਸਵਾਸਨੇ ਕਿਲੇਸੇ ਪਜਹਿਤੁਂ ਸਕ੍ਕੋਨ੍ਤਿ, ਨਾਞ੍ਞੇ’’ਤਿ, ਤਂ ਕਾਯਵਚੀਪਯੋਗਹੇਤੁਭੂਤਂ ਵਾਸਨਂ ਸਨ੍ਧਾਯ ਵੁਤ੍ਤਂ, ਨੇਤਰਨ੍ਤਿ ਨਿਟ੍ਠਮੇਤ੍ਥਾਵਗਨ੍ਤਬ੍ਬਂ.

੭੭੩. ਤਿਕਂ ਧਞ੍ਞਾਦੀਨਂ ਪੂਤਕਰਣੇ. ਪੂ ਪਵਨੇ, ਯੁ. ਅਪਚ੍ਚਯੇ ਪਵੋ. ਣਮ੍ਹਿ ਨਿਪ੍ਪਾਵੋ. ਦ੍ਵਯਂ ਤਸਰੇ. ਤਸ ਉਬ੍ਬੇਗੇ, ਅਰੋ. ਸੁਤ੍ਤੇਨ ਵੇਠਨਂ ਸੁਤ੍ਤਵੇਠਨਂ.

ਦ੍ਵਯਂ ਦੁਗ੍ਗਸਞ੍ਚਾਰੇ. ਸਙ੍ਕਮ੍ਯਤੇ ਯੇਨਾਤਿ ਸਙ੍ਕਮੋ. ਸਞ੍ਚਰਨ੍ਤਿ ਅਨੇਨਾਤਿ ਸਞ੍ਚਾਰੋ, ਦੁਗ੍ਗਸ੍ਸ ਸਞ੍ਚਾਰੋ ਦੁਗ੍ਗਸਞ੍ਚਾਰੋ. ਦ੍ਵਯਂ ਪਠਮਾਰਮ੍ਭੇ. ਪਠਮਂ ਕਮੋ ਪਕ੍ਕਮੋ, ਉਪਕ੍ਕਮੋ ਚ.

੭੭੪. ਤਿਕਂ ਪਾਠੇ. ਪਠ ਵਿਯਤ੍ਤਿਯਂ ਵਾਚਾਯਂ, ਣੋ, ਪਾਠੋ. ਨਿਪੁਬ੍ਬੇ ਨਿਪਾਠੋ, ਅਮ੍ਹਿ ਨਿਪਠੋ. ਦ੍ਵਯਂ ਅਪਹਰਿਤਾਦਿਨੋ ਵਤ੍ਥੁਨੋ ਅਨ੍ਵੇਸਨੇ. ਚਿ ਚਯੇ, ਚਯਨਮਤ੍ਰ ਅਨ੍ਵੇਸਨਂ. ਮਗ੍ਗ ਅਨ੍ਵੇਸਨੇ, ਚੁਰਾਦਿ, ਯੁ, ਏਤੇ ਦ੍ਵੇ ਅਪੁਮੇ, ਸਂਵਿਕ੍ਖਨਂਪ੍ਯਤ੍ਰ.

ਚਤੁਕ੍ਕਂ ਆਲਿਙ੍ਗਨੇ. ਲਿਙ੍ਗ ਗਤ੍ਯਤ੍ਥੋ. ਸਨ੍ਜ ਸਙ੍ਗੇ. ਸਿਲਿਸ ਆਲਿਙ੍ਗਨੇ. ਗੁਹ ਸਂਵਰਣੇ, ਯੁ, ਪਰਿਰਮ੍ਭੋਪ੍ਯਤ੍ਰ. ਰਮ੍ਭ ਸਦ੍ਦੇ.

੭੭੫. ਚਤੁਕ੍ਕਂ ਆਲੋਕਨੇ. ਲੋਕ ਦਸ੍ਸਨੇ. ਝੇ ਚਿਨ੍ਤਾਯਂ. ਇਕ੍ਖ ਦਸ੍ਸਨਙ੍ਕੇਸੁ. ਦਿਸ ਪੇਕ੍ਖਨੇ, ਸਬ੍ਬਤ੍ਰ ਭਾਵੇ ਯੁ.

ਚਤੁਕ੍ਕਂ ਨਿਰਾਕਰਣੇ. ਦਿਸ ਪੇਕ੍ਖਨੇ. ਅਸੁ ਖੇਪਨੇ, ਨਿਰਸਨਂ. ਪਤਿ ਆਪੁਬ੍ਬੋ ਖਾਕਥਨੇ. ਕਰ ਕਰਣੇ, ਇਤ੍ਥਿਯਮਤਿਯਵੋ ਵਾ,ਤਿ.

੭੭੬. ਪਞ੍ਚਕਂ ਵਿਪਰਿਯਯੇ. ਵਿਪਰਿਪੁਬ੍ਬੋ ਅਸੁ ਖੇਪਨੇ, ਣੋ, ਵਿਪਲ੍ਲਾਸੋ. ਅਞ੍ਞੇਨ ਪਕਾਰੇਨ ਭਵਨਂ ਅਞ੍ਞਥਾਭਾਵੋ. ਵਿਪਰਿਪੁਬ੍ਬੋ ਅਯ ਗਮਨੇ, ਵਿਪਰਿਯਯੋ. ਅਸੁ ਖੇਪਨੇ, ਵਿਪਰਿਯਾਸੋ.

ਤਿਕਂ ਅਤਿਕ੍ਕਮੇ. ਅਤਿਕ੍ਕਮਨਂ ਅਤਿਕ੍ਕਮੋ. ਅਤਿਕ੍ਕਮ੍ਮ ਪਤਨਂ ਅਤਿਪਾਤੋ. ਅਯ ਗਮਨੇ, ਉਪਚ੍ਚਯੋ.

ਸਂਕਿਣ੍ਣਵਗ੍ਗਵਣ੍ਣਨਾ ਨਿਟ੍ਠਿਤਾ.