੧. ਸਗ੍ਗਕਣ੍ਡਵਣ੍ਣਨਾ
੧. ਇਦਾਨਿ ਯਸ੍ਮਾ ਅਭਿਧੇਯ੍ਯਤ੍ਥੋ ਨਾਮ ਪਞ੍ਞਤ੍ਤਿਪਰਮਤ੍ਥਤ੍ਥਵਸੇਨ ਦੁਵਿਧੋ, ਤੇਸੁ ਯੇਭੁਯ੍ਯੇਨ ਪਞ੍ਞਤ੍ਤਤ੍ਥਤੋ ਪਰਮਤ੍ਥਤ੍ਥੋਵ ਸੇਟ੍ਠੋ, ਤੇਸੁਪਿ ਓਧਿਸੋ ਕਿਲੇਸਾਨਂ ਸਮੁਚ੍ਛੇਦਪਟਿਪ੍ਪਸ੍ਸਦ੍ਧਿਕਰਤ੍ਤਾ ਯਥਾਕ੍ਕਮਂ ਅਟ੍ਠ ਧਮ੍ਮਾ ਸੇਟ੍ਠਾ, ਤਤੋਪਿ ਨਿਬ੍ਬਾਨਮੇਵ ਸੇਟ੍ਠਂ, ਤੇਸਂ ਸਬ੍ਬੇਸਮ੍ਪਿ ਧਮ੍ਮਾਨਂ ਸਮ੍ਮਾਸਮ੍ਬੁਦ੍ਧੋਵ ਸੇਟ੍ਠੋ. ਵੁਤ੍ਤਞ੍ਹਿ ਭਗਵਤਾ ‘‘ਵਿਰਾਗੋ ਸੇਟ੍ਠੋ ਧਮ੍ਮਾਨਂ, ਦ੍ਵਿਪਦਾਨਞ੍ਚ ਚਕ੍ਖੁਮਾ’’ਤਿ [ਧ. ਪ. ੨੭੩; ਨੇਤ੍ਤਿ. ੧੨੫]. ਏਤ੍ਥ ਹਿ ‘‘ਯਾਵਤਾ, ਭਿਕ੍ਖਵੇ, ਧਮ੍ਮਾ ਸਙ੍ਖਤਾ ਵਾ ਅਸਙ੍ਖਤਾ ਵਾ, ਵਿਰਾਗੋ ਤੇਸਂ ਧਮ੍ਮਾਨਂ ਅਗ੍ਗਮਕ੍ਖਾਯਤੀ’’ਤਿ [ਅ. ਨਿ. ੪.੩੪; ੫.੩੨; ਇਤਿਵੁ. ੯੦] ਵਚਨਤੋ ਸਬ੍ਬੇਸਮ੍ਪਿ ਸਙ੍ਖਤਾਸਙ੍ਖਤਧਮ੍ਮਾਨਂ ਵਿਰਾਗਸਙ੍ਖਾਤੋ ਨਿਬ੍ਬਾਨਮੇਵ ਸੇਟ੍ਠੋ, ਚਕ੍ਖੁਮਾ ਪਨ ਸਮ੍ਮਾਸਮ੍ਬੁਦ੍ਧੋ ਤੇਸਂ ਸਬ੍ਬੇਸਮ੍ਪਿ ਧਮ੍ਮਾਨਂ, ਦੇਵਮਨੁਸ੍ਸਾਦਿਭੇਦਾਨਂ ਦ੍ਵਿਪਦਾਨਞ੍ਚ ਪਞ੍ਞਤ੍ਤਤ੍ਥਾਨਂ ਸੇਟ੍ਠੋਤਿ ਅਯਮਤ੍ਥੋ ਵੁਤ੍ਤੋ ਭਗਵਤਾ, ਤਸ੍ਮਾ ਸਬ੍ਬਤ੍ਥਸੇਟ੍ਠਤ੍ਥਾਭਿਧਾਯਕਾਭਿਧਾਨਭੂਤਂ ਬੁਦ੍ਧਾਤਿਧਾਨਮੇਵ ਪਠਮਂ ਸਗ੍ਗਕਣ੍ਡਸ੍ਸ ਆਦਿਮ੍ਹਿ ਪਤ੍ਥਿਯਵਸੇਨ [ਸਤ੍ਥਿਯਵਸੇਨ (ਕ.)] ਦਸ੍ਸੇਤੁਮਾਹ ‘‘ਬੁਦ੍ਧੋ’’ਚ੍ਚਾਦਿ. ਤਤ੍ਥ ਜਿਨਸਦ੍ਦਨ੍ਤਂ ਸਬ੍ਬਬੁਦ੍ਧਸ੍ਸ ਨਾਮਂ. ਸਬ੍ਬਂ ਬੁਦ੍ਧਵਾਤਿ ਬੁਦ੍ਧੋ, ਸਕਮ੍ਮਕਾ ਕਤ੍ਤਰਿ ਤਪਚ੍ਚਯੋ. ਵਿਸਿਟ੍ਠਾ ਬੁਦ੍ਧਿ ਅਸ੍ਸਤ੍ਥੀਤਿ ਬੁਦ੍ਧੋ, ਪਸਂਸਾਯਂ ਯਦਾਦਿਨਾ ਣਪਚ੍ਚਯੋ. ਦਾਨਸੀਲਕ੍ਖਨ੍ਧਾਦਯੋ ਠਾਨਾਟ੍ਠਾਨਞਾਣਾਦਯੋ ਵਾ ਦਸ ਬਲਾਨਿ ਯਸ੍ਸੇਤਿ ਦਸਬਲੋ. ਸਾਸਤਿ ਵਿਨਯਤਿ ਸਤ੍ਤੇਤਿ ਸਤ੍ਥਾ. ਸਬ੍ਬਧਮ੍ਮਜਾਨਨਸੀਲਤਾਯ ਸਬ੍ਬਞ੍ਞੂ. ਦ੍ਵਿਪਦਾਨਂ, ਦ੍ਵਿਪਦੇਸੁ ਵਾ ਉਤ੍ਤਮੋ ਦ੍ਵਿਪਦੁਤ੍ਤਮੋ, ਬੁਦ੍ਧਵਂਸਵਣ੍ਣਨਾਯਂ [ਬੁ. ਵਂ. ਅਟ੍ਠ. ੩੭ ਨਿਦਾਨਕਥਾ] ਨਿਦ੍ਧਾਰਣਲਕ੍ਖਣਾਯ ਛਟ੍ਠਿਯਾ ਸਮਾਸਸ੍ਸ ਪਟਿਸਿਦ੍ਧਤ੍ਤਾ ਨੇਦਿਸੀ ਨਿਦ੍ਧਾਰਣਲਕ੍ਖਣਾ ਛਟ੍ਠੀ ਗਮ੍ਯਤੇ. ਕਸ੍ਮਾ ਪਨ ਸੋ ਤਤ੍ਥ ਪਟਿਸਿਦ੍ਧੋਤਿ? ਸਮਾਸੇ ਯੇਭੁਯ੍ਯੇਨ ਨਿਦ੍ਧਾਰਣਲਕ੍ਖਣਤ੍ਤਯਸ੍ਸ ਵਿਕਲਾਭਾਵਤੋ. ਕਿਞ੍ਚਾਪਿ ਹਿ ਤਤ੍ਥ ਛਟ੍ਠਿਯਾਯੇਵ ਪਟਿਸਿਦ੍ਧੋ, ਸਤ੍ਤਮਿਯਾ ਪਨ ਨਿਦ੍ਧਾਰਣਲਕ੍ਖਣਾਯ ਵਿਜ੍ਜਮਾਨਤ੍ਤਾ ਤਸ੍ਸਾਪਿ ਸੋ ਪਟਿਸੇਧਨੀਯੋਯੇਵ. ਮੁਨੀਨਂ ਇਨ੍ਦੋ ਰਾਜਾ ਮੁਨਿਨ੍ਦੋ. ਪੁਞ੍ਞਞਾਣਭਾਗ੍ਯਾਦਯੋ ਭਗਂ ਨਾਮ, ਤਂਯੋਗਾ ਭਗਵਾ. ਨਾਥਤਿ ਸਤ੍ਤਾਨਂ ਹਿਤਂ ਯਾਚਤਿ, ਕਿਲੇਸੇ ਵਾ ਉਪਤਾਪੇਤਿ, ਸਤ੍ਤੇਸੁ ਵਾ ਇਸ੍ਸਰਿਯਂ ਕਰੋਤਿ, ਤੇਸਂ ਵਾ ਹਿਤਂ ਆਸੀਸਤੀਤਿ ਨਾਥੋ. ਬੁਦ੍ਧਧਮ੍ਮਸਮਨ੍ਤਞਾਣਦਿਬ੍ਬਚਕ੍ਖੁਸਙ੍ਖਾਤੇਹਿ ਪਞ੍ਚਹਿ ਚਕ੍ਖੂਹਿ ਸਮਨ੍ਨਾਗਤਤ੍ਤਾ ਚਕ੍ਖੁਮਾ. ਸਬ੍ਬਦਾ ਬ੍ਯਾਮਪ੍ਪਭਾਯ ਕਾਯਤੋ ਨਿਚ੍ਛਰਣਵਸੇਨ ਅਙ੍ਗੀਰਸੋ. ਸਬ੍ਬਾਕਾਰੇਨ ਸਬ੍ਬਧਮ੍ਮਾਨਂ ਮੁਨਨਤੋ ਮੁਨਿ, ਧਮ੍ਮਵਾਦੇਸੁ ਵਾ ਮੋਨਕਰਣਤੋ ਮੁਨਿ.
੨. ਲੋਕਾਨਂ, ਲੋਕੇਸੁ ਵਾ ਨਾਥੋ ਲੋਕਨਾਥੋ. ਅਤ੍ਤਨੋ ਅਧਿਕਸ੍ਸ ਕਸ੍ਸਚਿਪਿ ਉਤ੍ਤਮਪੁਗ੍ਗਲਸ੍ਸ ਅਭਾਵਤੋ ਅਨਧਿਵਰੋ, ਸਬ੍ਬਪਰਿਯਨ੍ਤਗਤਤ੍ਤਭਾਵਤ੍ਤਾ ਵਾ ਨਤ੍ਥਿ ਏਤਸ੍ਸ ਇਤੋ ਅਞ੍ਞੋ ਅਧਿਕੋ ਪਤ੍ਥੇਤਬ੍ਬੋ ਅਤ੍ਤਭਾਵੋਤਿ ਅਨਧਿਵਰੋ. ਮਹਨ੍ਤਾਨਂ ਸੀਲਕ੍ਖਨ੍ਧਾਦੀਨਂ ਏਸਨਤੋ ਗਵੇਸਨਤੋ ਮਹੇਸਿ, ਮਹਨ੍ਤੋ ਵਾ ਈਸੋ ਵਿਭੂਤਿ ਏਤਸ੍ਸਾਤਿ ਮਹੇਸਿ. ਹਿਤਂ ਵਿਨਯਤਿ ਅਨੁਸਾਸਤੀਤਿ ਵਿਨਾਯਕੋ, ਵਿਸਿਟ੍ਠਂ ਵਾ ਨਿਬ੍ਬਾਨਂ ਸਤ੍ਤੇ ਨੇਤੀਤਿ ਵਿਨਾਯਕੋ. ਸਬ੍ਬਧਮ੍ਮਦਸ੍ਸਨਸੀਲਤਾਯ ‘‘ਸਮਨ੍ਤਚਕ੍ਖੂ’ਤਿ ਲਦ੍ਧਨਾਮੇਨ ਸਬ੍ਬਞ੍ਞੁਤਞ੍ਞਾਣੇਨ ਸਮਨ੍ਨਾਗਤਤ੍ਤਾ ਸਮਨ੍ਤਚਕ੍ਖੁ. ਸੋਭਨਂ ਗਤਂ ਞਾਣਮਸ੍ਸ, ਸਂਸਾਰਾ ਵਾ ਸੁਟ੍ਠੁ ਅਪੁਨਰਾਵਤ੍ਤਿਯਾ ਗਤਵਾਤਿ ਸੁਗਤੋ, ਸਪਰਸੁਖਸਿਦ੍ਧਤ੍ਥਂ ਵਾ ਸਮ੍ਮਾ ਗਤਵਾਤਿ ਸੁਗਤੋ. ਭੂਰਿ ਬਹੁਕਾ ਪਞ੍ਞਾ ਯਸ੍ਸ, ਅਨਨ੍ਤਤ੍ਤਾ ਵਾ ਭੂਰਿਸਮਾ ਪਞ੍ਞਾ ਏਤਸ੍ਸਾਤਿ ਭੂਰਿਪਞ੍ਞੋ, ਅਨਨ੍ਤਾਯ ਮਹਾਪਥਵਿਯਾ ਸਦਿਸਪਞ੍ਞੋਤ੍ਯਤ੍ਥੋ. ਕਿਲੇਸਾਦਿਪਞ੍ਚਵਿਧਂ ਮਾਰਂ ਜਿਤਵਾਤਿ ਮਾਰਜਿ.
੩. ਨਰਾਨਂ ਸੀਹੋ ਸੇਟ੍ਠੋ, ਪਰਪ੍ਪਵਾਦਮਦ੍ਦਨਸਹਨਤੋ ਵਾ ਨਰੋ ਚ ਸੋ ਸੀਹੋ ਚਾਤਿ ਨਰਸੀਹੋ, ਸਹਤੀਤਿ ਸੀਹੋ, ਨਿਰੁਤ੍ਤਿਨਯੇਨ ਪੁਬ੍ਬਵਣ੍ਣਾਕਾਰਸ੍ਸੀਕਾਰੋ, ਸੀਹਸਦਿਸਤ੍ਤਾ ਵਾ ਨਰੋ ਚ ਸੋ ਸੀਹੋ ਚਾਤਿ ਨਰਸੀਹੋ. ਯਥਾ ਹਿ ਸੀਹੋ ਮਿਗਰਾਜਾ ਚਤੂਹਿ ਦਾਠਾਹਿ ਸਬ੍ਬਸਤ੍ਤੇ ਹਿਂਸਤਿ ਅਭਿਭਵਤਿ, ਤਥਾ ਭਗਵਾਪਿ ਸੀਲਪਞ੍ਞਾਪੁਞ੍ਞਿਦ੍ਧਿਸਙ੍ਖਾਤੇਹਿ ਚਤੂਹਿ ਧਮ੍ਮੇਹਿ ਸਬ੍ਬਂ ਲੋਕਂ ਹਿਂਸਤਿ ਅਭਿਭਵਤੀਤਿ ਓਪਮ੍ਮਸਂਸਨ੍ਦਨਂ. ਸਬ੍ਬਪੁਰਿਸਾਨਂ ਸੇਟ੍ਠਤ੍ਤਾ ਨਰਵਰੋ, ਨਰਾਨਂ ਵਾ ਦੇਵਮਨੁਸ੍ਸਾਨਂ ਸੇਟ੍ਠਤ੍ਤਾ ਨਰਵਰੋ, ‘‘ਸੀਲੇ ਪਤਿਟ੍ਠਾਯ ਨਰੋ ਸਪਞ੍ਞੋ’’ਤਿ [ਸਂ. ਨਿ. ੧.੨੩] ਏਤ੍ਥ ਵਿਯ ਨਰਸਦ੍ਦੇਨ ਸਬ੍ਬੇ ਦੇਵਮਨੁਸ੍ਸਾ ਸਙ੍ਗਹਿਤਾ. ਧਮ੍ਮਸ੍ਸ ਰਾਜਪਵਤ੍ਤਕਤ੍ਤਾ ਧਮ੍ਮਰਾਜਾ, ਧਮ੍ਮਤੋ ਵਾ ਸਦੇਵਕਸ੍ਸ ਲੋਕਸ੍ਸ ਰਾਜਾ ਜਾਤੋ, ਨਾਧਮ੍ਮਤੋਤਿ ਧਮ੍ਮਰਾਜਾ, ਧਮ੍ਮੇਨ ਰਾਜਤੀਤਿ ਵਾ ਧਮ੍ਮਰਾਜਾ, ਧਮ੍ਮਪਾਲਕੋ ਵਾ ਰਾਜਾ ਧਮ੍ਮਰਾਜਾ. ਮੁਨੀਨਂ ਸੇਟ੍ਠਤ੍ਤਾ ਮਹਾਮੁਨਿ. ਦੇਵਾਨਂ ਅਤਿਦੇਵੋਤਿ ਦੇਵਦੇਵੋ, ਦੇਵਾਨਂ ਅਧਿਕੋ ਵਾ ਦੇਵੋ ਦੇਵਦੇਵੋ. ਲੋਕਾਨਂ ਗਰੁ ਆਚਰਿਯੋ ਲੋਕਗਰੁ, ਲੋਕਾਨਂ ਗਰੁਭਾਜਨਤ੍ਤਾ ਵਾ ਲੋਕਗਰੁ. ਧਮ੍ਮਸ੍ਸ ਸਾਮਿ ਯਥਾਵੁਤ੍ਤਨਯੇਨ ਧਮ੍ਮਸ੍ਸਾਮੀ. ਯਥਾ ਪੁਰਿਮਕਾ ਸਮ੍ਮਾਸਮ੍ਬੁਦ੍ਧਾ ਸਬ੍ਬਞ੍ਞੁਭਾਵਂ ਗਤਾ, ਤਥਾ ਅਯਮ੍ਪਿ ਗਤੋਤਿ ਤਥਾਗਤੋ, ਤਥਾ ਵਾ ਸਮ੍ਮਾ ਗਤਂ ਞਾਣਮਸ੍ਸਾਤਿ ਤਥਾਗਤੋਤ੍ਯਾਦਿਨਾ ਤਥਾਗਤਸਦ੍ਦਸ੍ਸ ਅਤ੍ਥਪਪਞ੍ਚੋ ਤਤ੍ਥ ਤਤ੍ਥ [ਦੀ. ਨਿ. ਅਟ੍ਠ. ੧.੭; ਮ. ਨਿ. ਅਟ੍ਠ. ੧.੧੨; ਸਂ. ਨਿ. ਅਟ੍ਠ. ੨.੩.੭੮; ਅ. ਨਿ. ਅਟ੍ਠ. ੧.੧.੭੦; ਉਦਾ. ਅਟ੍ਠ. ੧੮; ਇਤਿਵੁ. ਅਟ੍ਠ. ੩੮; ਥੇਰਗਾ. ਅਟ੍ਠ. ੧.੩; ਬੁ. ਵਂ. ਅਟ੍ਠ. ੨ ਨਿਦਾਨ ਕਥਾ; ਮਹਾਨਿ. ਅਟ੍ਠ. ੧੪; ਪਟਿ. ਸ. ਅਟ੍ਠ. ੧.੧.੩੭; ਦੀ. ਨਿ. ਟੀ. ੧.੭; ਦੀ. ਨਿ. ਅਭਿ. ਟੀ. ੧.੭; ਮ. ਨਿ. ਟੀ. ੧.੧੨; ਅ. ਨਿ. ਟੀ. ੧.੧.੧੭੦] ਵੁਤ੍ਤਨਯੇਨ ਵੇਦਿਤਬ੍ਬੋ.
੪. ਸਯਮੇਵ ਸਮ੍ਮਾਸਮ੍ਬੁਦ੍ਧੋ ਭਵਤਿ, ਅਨਞ੍ਞਬੋਧਿਤੋਤਿ ਸਯਮ੍ਭੂ. ਸਮ੍ਮਾ ਅਵਿਪਰੀਤੇਨ ਸ’ਮਤ੍ਤਨਾਯੇਵ ਸਬ੍ਬਧਮ੍ਮੇ ਬੁਜ੍ਝਤਿ ਅਬੁਜ੍ਝਿ ਬੁਜ੍ਝਿਸ੍ਸਤੀਤਿ ਸਮ੍ਮਾਸਮ੍ਬੁਦ੍ਧੋ. ਸੇਟ੍ਠਪਞ੍ਞਾਯ ਸਮਨ੍ਨਾਗਤਤ੍ਤਾ ਵਰਪਞ੍ਞੋ. ਸਤ੍ਤੇ ਸਂਸਾਰਣ੍ਣਵਤੋ ਨਿਬ੍ਬਾਨਪਾਰਂ ਨੇਤੀਤਿ ਨਾਯਕੋ. ਜਿਤਪਞ੍ਚਮਾਰਤ੍ਤਾ ਜਿਨੋ. ਏਤ੍ਥ ਚ ਸਮਨ੍ਤਭਦ੍ਰ, ਲੋਕਜਿ, ਛਲ਼ਭਿਞ੍ਞ, ਅਦ੍ਵਯਵਾਦੀ, ਸਿਰੀਘਨ, ਅਕਨਿਟ੍ਠਗ [ਅਕਨਿਟ੍ਠਕ (ਕ.)], ਧਮ੍ਮਚਕ੍ਕ, ਰਾਗਾਸਨਿ [ਰਾਗਾਰਿ (ਕ.)], ਤਿਸਰਣ, ਖਸਮ [ਖਣਸਮ (ਕ.) ਖੇਨ ਆਕਾਸੇਨ ਸਮਾ ਤੁਲ੍ਯਾ ਗੁਣਾ ਯਸ੍ਸ ਸੋ (ਤਿਕਣ੍ਡਸੇਸਟੀਕਾ ੧.੧.੮)], ਗੁਣਾਕਰ, ਮਹਾਸੁਖ, ਵਜਿਰ, ਮੇਤ੍ਤਾਬਲ, ਅਸਮ, ਜਿਤਾਰਿ, ਮਹਾਬੋਧਿ, ਧਮ੍ਮਧਾਤੁ, ਸੇਤਕੇਤੁ, ਖਜਿ, ਤਿਮੁਤ੍ਤਿ [ਖਜਿਰਵਿਮੁਤ੍ਤਿ (ਕ.) ਖੇਨ ਆਕਾਸਜ੍ਝਾਨੇਨ – ਸੁਞ੍ਞਭਾਵਨਾਯਾਤਿ ਭਾਵੋ – ਜਯਤਿ ਸਂਸਾਰਭਾਵਂ ਯੋ, ਜਿ+ ਕ੍ਵਿਪ ਸੁਞ੍ਞਵਾਦੀਨਂ ਬੋਦ੍ਧਾਨਂ ‘‘ਸੁਞ੍ਞਂ ਸਬ੍ਬਮੇਵ’’ ਇਤ੍ਯਾਕਾਰਭਾਵਨਾਯ ਸਂਸਾਰਭਾਵਜਯਨਤੋ ਤਥਾਭਾਵੋ (ਸਦ੍ਦਕਪ੍ਪਦ੍ਦੁਮ)], ਦਸਭੂਮਿਸ੍ਸਰ, ਪਞ੍ਚਞਾਣ, ਬਹੁਕ੍ਖਮ, ਸਮ੍ਬੁਦ੍ਧ, ਸਬ੍ਬਦਸ੍ਸੀ, ਮਹਾਬਲ, ਸਬ੍ਬਬੋਧ [ਸਮ੍ਬੋਧਧਮ੍ਮ (ਕ.)], ਧਮ੍ਮਕਾਯ, ਸਂਗੁਤ੍ਤ, ਅਰਹ, ਦ੍ਵਾਦਸਕ੍ਖ, ਵੀਤਰਾਗਾਦੀਨਿਪਿ ਅਨੇਕਾਨਿ ਬੁਦ੍ਧਸ੍ਸ ਨਾਮਾਨਿ [ਇਮਾਨਿ ਪਰਿਯਾਯਵਚਨਾਨਿ ਪਾਯਸੋ ਅਮਰਕੋਸਤੋ, ਤਿਕਣ੍ਡਸੇਸਾਭਿਧਾਨਤੋ ਚ ਗਹਿਤਾਨਿ]. ਸਮਨ੍ਤਤੋ ਪੁਞ੍ਞਸਮ੍ਭਾਰਤੋ ਚ ਞਾਣਸਮ੍ਭਾਰਤੋ ਚ ਭਦ੍ਰੋ ਸੇਟ੍ਠੋਤਿ ਸਮਨ੍ਤਭਦ੍ਰੋਤ੍ਯਾਦੀਨਿ ਚ ਨਿਬ੍ਬਚਨਾਨਿ ਵੇਦਿਤਬ੍ਬਾਨਿ. ਵੁਤ੍ਤਞ੍ਚ –
‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;
ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮਸਹਸ੍ਸਤੋ’’ਤਿ [ਧ. ਸ. ਅਟ੍ਠ. ੧੩੧੩; ਉਦਾ. ਅਟ੍ਠ. ੫੩; ਪਟਿ. ਮ. ਅਟ੍ਠ. ੧.੧.੭੬; ਨੇਤ੍ਤਿ. ਅਟ੍ਠ. ੩੮].
ਤਤ੍ਥ ਉਦ੍ਧੇਯ੍ਯਨ੍ਤਿ ਉਦ੍ਧਰਿਤਬ੍ਬਂ. ਅਪਿ ਨਾਮਸਹਸ੍ਸਤੋਤਿ ਅਨੇਕੇਹਿ ਨਾਮਸਹਸ੍ਸੇਹੀਤ੍ਯਤ੍ਥੋ. ਸਬ੍ਬਬੁਦ੍ਧਨਾਮਕਥਾ.
ਸਕ੍ਕਾਦਿਸਤ੍ਤਕਂ ਅਮ੍ਹਾਕਂ ਬੁਦ੍ਧਸ੍ਸ ਨਾਮਂ. ਪਞ੍ਚਮਾਰੇ ਜੇਤੁਂ ਸਕ੍ਕੋਤੀਤਿ ਸਕ੍ਕੋ, ਭਗਿਨੀਹਿ ਸਦ੍ਧਿਂ ਸਂਵਾਸਕਰਣਤੋ ਵਾ ਲੋਕਮਰਿਯਾਦਂ ਛਿਨ੍ਦਿਤੁਂ ਸਕ੍ਕੁਣਨ੍ਤੀਤਿ ਸਕ੍ਕਾ, ਸਾਕਿਯਰਾਜੂਨਂ ਪੁਬ੍ਬਰਾਜਾਨੋ, ਤੇਸਂ ਵਂਸਭੂਤਤ੍ਤਾ ਭਗਵਾ ‘‘ਸਕ੍ਕੋ’’ਤਿ ਵੁਚ੍ਚਤਿ. ਅਸ੍ਸ ਚ ਜਾਤਿਸਮਨਨ੍ਤਰਂ ਨਿਧਯੋ ਰਤਨਾਨਿ ਚ ਉਪ੍ਪਨ੍ਨਾਨੀਤਿ ਸਿਦ੍ਧਤ੍ਥੋਤਿ ਨਾਮਂ ਕਤਂ, ਸਬ੍ਬੇਸਂ ਵਾ ਲੋਕਾਨਂ ਸਿਦ੍ਧਾ ਅਤ੍ਥਾ ਏਤੇਨ ਹੇਤੁਭੂਤੇਨਾਤਿ ਸਿਦ੍ਧਤ੍ਥੋ. ਸੁਦ੍ਧਂ ਓਦਨਂ ਅਸ੍ਸਾਤਿ ਸੁਦ੍ਧੋਦਨੋ, ਤਸ੍ਸ ਅਪਚ੍ਚਂ ਸੁਦ੍ਧੋਦਨਿ. ਗੋਤਮਵਂਸਸ੍ਸ ਕਪਿਲਸ੍ਸ ਮੁਨਿਨੋ ਸਿਸ੍ਸਤਾਯ ਸਕ੍ਯਾ ਗੋਤਮਾ, ਭਗਵਾ ਪਨ ਗੋਤਮਵਂਸੇ ਉਪ੍ਪਨ੍ਨਤ੍ਤਾ ਗੋਤਮਸ੍ਸ ਮੁਨਿਨੋ ਅਪਚ੍ਚਂ ਗੋਤਮੋ.
੫. ਸਕ੍ਯਵਂਸਾਵਤਿਣ੍ਣੋ [ਸਕ੍ਯਵਂਸਾ ਪਿਤ੍ਥਿਣ੍ਣੋ (ਕ.)] ਸਕ੍ਯਮੁਨਿ ਯੋ ਬੁਦ੍ਧੋ ਸੋ ਸਕ੍ਯਸੀਹੋ, ਸਕ੍ਯਾਨਂ ਵਾ ਸੇਟ੍ਠਤ੍ਤਾ ਸਕ੍ਯਸੀਹੋ. ਸਕ੍ਯਕੁਲਤੋ ਜਾਤੋ ਮੁਨਿ ਸਕ੍ਯਮੁਨਿ. ਸੂਰਿਯਦੇਵਪੁਤ੍ਤਸ੍ਸ ਸੋਤਾਪਨ੍ਨਤ੍ਤਾ ਭਗਵਾ ਆਦਿਚ੍ਚਬਨ੍ਧੂਤਿ ਵੁਚ੍ਚਤਿ, ਆਦਿਚ੍ਚਸ੍ਸ ਬਨ੍ਧੁ ਞਾਤੀਤਿ ਨਿਬ੍ਬਚਨਂ ਕਤ੍ਵਾ. ਏਤ੍ਥਪਿ ਮਾਯਾਦੇਵੀਸੁਤ, ਮਹਾਸਮਣ, ਕਲਿਸਾਸਨਾਦੀਨਿ [ਕੁਲਿਸਾਸਨਾਦੀਨਿ (ਕ.) ਕਲਿਮ੍ਹਿ ਯੁਗੇ ਸਾਸਨਂ ਅਨੁਸਾਸਨਂ ਯਸ੍ਸ ਸੋ, ਅਥਵਾ ਕਲਿਮ੍ਹਿ ਪਾਪੇ ਵਿਵਾਦੇ ਵਾ ਸਾਸਨਂ ਹਿਤਸਾਧਨਂ ਯਸ੍ਸ ਸੋ (ਤਿਕਣ੍ਡਸੇਸਟੀਕਾ ੧.੧.੧੧)] ਗੋਤਮਪਰਿਯਾਯਾਨਿ ਵੇਦਿਤਬ੍ਬਾਨਿ.
੬. ਮੋਕ੍ਖਾਦੀਨਿ ਨਿਬ੍ਬੁਤਿਪਰਿਯਨ੍ਤਾਨਿ ਛਚਤ੍ਤਾਲੀਸ ਨਾਮਾਨਿ ਨਿਬ੍ਬਾਨਸ੍ਸ ਨਾਮਾਨਿ. ਮੁਚ੍ਚਨ੍ਤਿ ਏਤ੍ਥ, ਏਤੇਨ ਵਾ ਰਾਗਾਦੀਹੀਤਿ ਮੋਕ੍ਖੋ. ਨਿਰੁਜ੍ਝਨ੍ਤਿ ਏਤ੍ਥ ਰਾਗਾਦਯੋਤਿ ਨਿਰੋਧੋ, ਰੁਨ੍ਧਤਿ ਵਾ ਨਿਬ੍ਬਾਨਨ੍ਤਿ ਰੋਧੋ, ਕਿਲੇਸੋ, ਸੋ ਏਤ੍ਥ ਨਤ੍ਥੀਤਿ ਨਿਰੋਧੋ. ਵਾਨਸਙ੍ਖਾਤਾਯ ਤਣ੍ਹਾਯ ਨਿਕ੍ਖਨ੍ਤਤ੍ਤਾ, ਨਿਬ੍ਬਾਤਿ ਵਾ ਏਤੇਨ ਰਾਗਗ੍ਗਿਆਦਿਕੋਤਿ ਨਿਬ੍ਬਾਨਂ. ਯਥਾ ਪਕਤਿਦੀਪੋ ਨਦੀਸੋਤੇਨ ਵੁਯ੍ਹਮਾਨਾਨਂ ਪਤਿਟ੍ਠਾ ਹੋਤਿ, ਏਵਮਿਦਮ੍ਪਿ ਨਿਬ੍ਬਾਨਂ ਸਂਸਾਰਮਹੋਘੇਨ ਵੁਯ੍ਹਮਾਨਾਨਂ ਪਤਿਟ੍ਠਾਤਿ ਦੀਪੋ ਵਿਯਾਤਿ ਦੀਪੋ, ਨਿਕ੍ਕਿਲੇਸਾਨਂ ਵਾ ਪਦੀਪਸਦਿਸਭਾਵਕਰਣਤੋ ਦੀਪੋ ਵਿਯਾਤਿ ਦੀਪੋ, ‘‘ਨਿਬ੍ਬਨ੍ਤਿ ਧੀਰਾ ਯਥਯਂ ਪਦੀਪੋ’’ਤਿ ਹਿ ਵੁਤ੍ਤਂ, ਦਿਪ੍ਪਤਿ ਵਾ ਅਰਿਯਾਨਂ ਞਾਣਚਕ੍ਖੁਸ੍ਸੇਵ ਪਕਾਸਤੀਤਿ ਦੀਪੋ. ਤਣ੍ਹਾਨਂ ਖਯਹੇਤੁਤ੍ਤਾ ਤਣ੍ਹਕ੍ਖਯੋ. ਰਾਗਾਦੀਨਂ ਪਟਿਪਕ੍ਖਤ੍ਤਾ, ਉਤ੍ਤਮਟ੍ਠੇਨ ਵਾ ਪਰਂ. ਤਾਯਤਿ ਰਕ੍ਖਤਿ ਅਪਾਯਾਦਿਤੋਤਿ ਤਾਣਂ. ਨਿਲੀਯਨ੍ਤਿ ਏਤ੍ਥ ਸਂਸਾਰਭਯਭੀਰੁਕਾਤਿ ਲੇਣਂ. ਨਤ੍ਥਿ ਦੀਘਰਸ੍ਸਾਦਿਕਂ ਰੂਪਂ ਸਣ੍ਠਾਨਮੇਤਸ੍ਸਾਤਿ ਅਰੂਪਂ, ਅਪ੍ਪਚ੍ਚਯਤ੍ਤਾ ਵਾ ਅਰੂਪਂ. ਰਾਗਾਦੀਨਂ ਸਨ੍ਤਕਰਣਤ੍ਤਾ ਸਨ੍ਤਂ. ਰਾਗਕ੍ਖਯਹੇਤੁਭਾਵੇਨ ਅਵਿਪਰੀਤਤ੍ਤਾ, ਚਤੁਸਚ੍ਚਪਰਿਯਾਪਨ੍ਨਤ੍ਤਾ ਵਾ ਸਚ੍ਚਂ. ਨਤ੍ਥਿ ਆਲਯੋ ਤਣ੍ਹਾ ਏਤ੍ਥਾਤਿ ਅਨਾਲਯਂ.
੭. ਪਚ੍ਚਯੇਹਿ ਨ ਸਙ੍ਕਰੀਯਤੇਤਿ ਅਸਙ੍ਖਤਂ. ਸਿਵਂ ਖੇਮਭਾਵਂ ਕਰੋਤੀਤਿ ਸਿਵਂ, ਸਂਸਾਰਭੀਰੁਕੇਹਿ ਸੇਵਿਤਬ੍ਬਤ੍ਤਾ ਵਾ ਸਿਵਂ, ਯਦਾਦਿਨਾ ਵਪਚ੍ਚਯੋ. ਨਤ੍ਥਿ ਏਤ੍ਥ ਮਤਂ ਮਰਣਂ, ਏਤਸ੍ਮਿਂ ਵਾ ਅਧਿਗਤੇ ਪੁਗ੍ਗਲਸ੍ਸ ਮਤਨ੍ਤਿ ਅਮਤਂ. ਪਸ੍ਸਿਤੁਂ ਸੁਦੁਕ੍ਕਰਤਾਯ ਸੁਦੁਦ੍ਦਸਂ. ਪਰੇਹਿ ਉਤ੍ਤਮੇਹਿ ਅਰਿਯਪੁਗ੍ਗਲੇਹਿ ਅਯਿਤਬ੍ਬਂ ਗਨ੍ਤਬ੍ਬਨ੍ਤਿ ਪਰਾਯਣਂ, ਪਰਤੋ ਵਾ ਅਯਿਤਬ੍ਬਂ ਗਨ੍ਤਬ੍ਬਨ੍ਤਿ ਪਰਾਯਣਂ, ਸਂਸਾਰਸਭਾਵਤੋ ਅਞ੍ਞਸਭਾਵਵਸੇਨ ਬੁਜ੍ਝਿਤਬ੍ਬਨ੍ਤ੍ਯਤ੍ਥੋ, ਪਰੇਸਂ ਵਾ ਅਰਿਯਪੁਗ੍ਗਲਾਨਂ ਪਤਿਟ੍ਠਾਨਤ੍ਤਾ ਪਰਾਯਣਂ. ਯੇਨ ਚਤ੍ਤਾਰੋ ਮਗ੍ਗਾ ਓਧਿਸੋ ਕਿਲੇਸੇ ਸਰਨ੍ਤਿ ਹਿਂਸਨ੍ਤਿ ਤਂ ਧਮ੍ਮਂ ਸਰਣਂ, ਅਰਿਯਾਨਂ ਵਸਿਤਗੇਹਤ੍ਤਾ ਵਾ ਸਰਣਂ. ਈਤਿ ਉਪਦ੍ਦਵੋ ਪਵਾਸੋ ਚ ਤੇ ਯਤ੍ਥ ਨ ਸਨ੍ਤਿ, ਤਂ ਅਨੀਤਿਕਂ, ਸਤ੍ਤੇ ਸਂਸਾਰਂ ਨੇਤੀਤਿ ‘‘ਨੀਤੀ’’ਤਿ ਲਦ੍ਧਨਾਮਾਯ ਤਣ੍ਹਾਯ ਅਭਾਵਤੋ ਵਾ ਅਨੀਤਿਕਂ. ਆਸਵਾਨਂ ਅਨਾਰਮ੍ਮਣਤਾਯ ਅਨਾਸਵਂ. ਨਿਚ੍ਚਟ੍ਠੇਨ ਧੁਵਂ, ਧਵਤਿ ਵਾ ਮਗ੍ਗਾਨਮਾਰਮ੍ਮਣਭਾਵਂ ਗਚ੍ਛਤੀਤਿ ਧੁਵਂ, ‘‘ਧੁ ਗਤਿਥੇਰਿਯੇਸੂ’’ਤਿ ਹਿ ਕਾਤਨ੍ਤਧਾਤੁ. ਦਟ੍ਠਬ੍ਬਸਭਾਵਸ੍ਸ ਨਤ੍ਥਿਤਾਯ ਅਨਿਦਸ੍ਸਨਂ. ਪਚ੍ਚਯੇਹਿ ਅਕਤਤ੍ਤਾ ਅਕਤਂ. ਸਦਾ ਵਿਜ੍ਜਮਾਨਤ੍ਤਾ ਅਪਲੁਜ੍ਜਨਸਭਾਵਂ ਗਚ੍ਛਤਿ, ਤੇਨ ਵਾ ਵਿਞ੍ਞਾਯਤੀਤਿ ਅਪਲੋਕਿਤਂ. ‘‘ਇਤਂ ਗਤੇ ਚ ਵਿਞ੍ਞਾਤੇ’’ਤਿ ਹਿ ਨਾਨਤ੍ਥਸਙ੍ਗਹੇ ਵੁਤ੍ਤਂ. ਲੋਕਸਭਾਵੇਨ ਵਾ ਵਿਞ੍ਞਾਯਤੀਤਿ ਲੋਕਿਤਂ, ਤਬ੍ਭਾਵਾਪਗਮਨਤੋ ਅਪਲੋਕਿਤਂ. ਸਣ੍ਹਟ੍ਠੇਨ ਨਿਪੁਣਂ, ਯੇਨ ਵਾ ਚਤ੍ਤਾਰੋ ਮਗ੍ਗਾ ਓਧਿਸੋ ਕਿਲੇਸੇ ਨਿਸ੍ਸੇਸਤੋ ਪੁਨਨ੍ਤਿ ਸੋਧੇਨ੍ਤਿ, ਤਂ ਨਿਪੁਣਂ. ਨ ਕਦਾਚਿਪਿ ਯਸ੍ਸ ਅਨ੍ਤੋ ਵਿਨਾਸੋ ਅਤ੍ਥਿ, ਤਂ ਅਨਨ੍ਤਂ. ਖਰਨ੍ਤਿ ਵਿਨਸ੍ਸਨ੍ਤੀਤਿ ਖਰਾ, ਸਙ੍ਖਤਾ, ਤੇ ਯਤ੍ਥ ਨ ਸਨ੍ਤਿ, ਤਂ ਅਕ੍ਖਰਂ, ਖਰਸਙ੍ਖਾਤਾਨਂ ਵਾ ਸਙ੍ਖਤਾਨਂ ਪਟਿਪਕ੍ਖਤ੍ਤਾ ਅਕ੍ਖਰਂ. ਏਤ੍ਥ ਚ ਅਸਙ੍ਖਤਨ੍ਤ੍ਯਾਦਿਕਾ ਗਾਥਾ ਰੁਚਿਰਾ ਨਾਮ.
੮. ਸਬ੍ਬਦੁਕ੍ਖਾਨਂ ਖਯਕਾਰਣਤ੍ਤਾ ਦੁਕ੍ਖਕ੍ਖਯੋ. ਬ੍ਯਾਬਾਧਤੀਤਿ ਬ੍ਯਾਬਾਧੋ, ਸੋ ਏਵ ਬ੍ਯਾਬਾਦੋ, ਦੁਕ੍ਖਸਚ੍ਚਂ, ਤਸ੍ਸ ਭਾਵੋ ਬ੍ਯਾਬਜ੍ਜਂ, ਦੁਕ੍ਖਸ੍ਸ ਪੀਲ਼ਨਾਦ੍ਯਤ੍ਥੋ, ਤਂ ਯਤ੍ਥ ਨਤ੍ਥਿ, ਤਂ ਅਬ੍ਯਾਬਜ੍ਜਂ, ਅਬ੍ਯਾਪਜ੍ਝਨ੍ਤਿਪਿ ਪਾਠੋ, ਤਤ੍ਥ ਬ੍ਯਾਪਜ੍ਜਨ੍ਤਿ ਵਿਨਸ੍ਸਨ੍ਤੀਤਿ ਬ੍ਯਾਪਾਦਾ, ਸਙ੍ਖਤਾ, ਤੇਸਂ ਭਾਵੋ ਬ੍ਯਾਪਜ੍ਝਂ, ਸਙ੍ਖਤਾਨਂ ਵਿਨਸ੍ਸਨਭਾਵੋ, ਤਂ ਯਤ੍ਥ ਨਤ੍ਥਿ, ਤਂ ਅਬ੍ਯਾਪਜ੍ਝਨ੍ਤਿ ਏਵਮਤ੍ਥੋ ਵੇਦਿਤਬ੍ਬੋ, ਨਿਰੁਤ੍ਤਿਨਯੇਨ ਚ ਦ੍ਯਸ੍ਸ ਜ੍ਝਕਾਰੋ. ਕਿਲੇਸਕਮ੍ਮਵਿਪਾਕਵਟ੍ਟਾਨਮਭਾਵਤੋ ਵਿਵਟ੍ਟਂ. ਨਿਬ੍ਭਯਟ੍ਠੇਨ ਖੇਮਂ, ਖਯਨ੍ਤਿ ਵਾ ਏਤੇਨ ਰਾਗਗ੍ਗਿਆਦਯੋਤਿ ਖੇਮਂ. ਸਙ੍ਖਾਰੇਹਿ ਅਸਮ੍ਮਿਸ੍ਸਤਾਯ, ਵਿਸਂਯੋਗਤਾਯ ਚ ਕੇਵਲਂ. ਅਪਵਜ੍ਜਨ੍ਤਿ ਸਙ੍ਖਾਰਾ ਏਤਸ੍ਮਾਤਿ ਅਪਵਗ੍ਗੋ. ਯਸ੍ਮਾ ਰਾਗੋ ਵਿਗਤੋ, ਸੋ ਵਿਰਾਗੋ. ਪਧਾਨਭਾਵਂ ਨੀਤਂ ਪਣੀਤਂ. ਨਤ੍ਥਿ ਏਤਸ੍ਮਿਂ ਅਧਿਗਤੇ ਅਰਿਯਾਨਂ ਚੁਤਂ ਚਵਨਨ੍ਤਿ ਅਚ੍ਚੁਤਂ. ਅਰਿਯੇਹਿ ਪਜ੍ਜਿਤਬ੍ਬਤ੍ਤਾ ਗਨ੍ਤਬ੍ਬਤ੍ਤਾ ਪਦਂ.
੯. ਚਤ੍ਤਾਰੋ ਯੋਗਾ ਖਯਨ੍ਤਿ ਏਤੇਨਾਤਿ ਯੋਗਕ੍ਖੇਮੋ. ਪਾਰੇਤਿ ਸਕ੍ਕੋਤਿ ਸਂਸਾਰਦੁਕ੍ਖਸਨ੍ਤਾਪਂ ਸਮੇਤੁਨ੍ਤਿ ਪਾਰਂ, ‘‘ਸਂਸਾਰਦੁਕ੍ਖਸਨ੍ਤਾਪਤਤ੍ਤਸ੍ਸਾ’ਲਂ ਸਮੇਤਵੇ’’ਤਿ ਹਿ ਵੁਤ੍ਤਂ. ਪਗਤਾ ਸਂਸਾਰਚਕ੍ਕਸ੍ਸ ਅਰਾ ਏਤਸ੍ਮਾਤਿ ਵਾ ਪਾਰਂ. ਕਿਲੇਸੇਹਿ ਮੁਚ੍ਚਨਤੋ ਮੁਤ੍ਤਿ, ਨਿਕਾਯਨ੍ਤਰਿਯਾ ਪਨ ‘‘ਸਰੀਰੇਨ੍ਦ੍ਰਿਯੇਹਿ ਅਤ੍ਤਨੋ ਮੁਤ੍ਤਤ੍ਤਾ ਮੁਤ੍ਤੀ’’ਤਿ ਵਦਨ੍ਤਿ. ਕਿਲੇਸਸਮਨਤੋ ਸਨ੍ਤਿ. ਵਿਸੁਜ੍ਝਨ੍ਤਿ ਸਤ੍ਤਾ ਏਤਾਯ ਰਾਗਾਦਿਮਲੇਹੀਤਿ ਵਿਸੁਦ੍ਧਿ. ਸਬ੍ਬਸਙ੍ਖਾਰਾ ਵਿਮੁਚ੍ਚਨਤੋ ਵਿਮੁਤ੍ਤਿ. ਅਸਙ੍ਖਤਮੇਵ ਨਿਸ੍ਸਤ੍ਤਨਿਜ੍ਜੀਵਟ੍ਠੇਨ, ਸਨ੍ਤਿਲਕ੍ਖਣਧਾਰਣਤੋ ਵਾ ਧਾਤੂਤਿ ਅਸਙ੍ਖਤਧਾਤੁ. ਸੁਜ੍ਝਨ੍ਤਿ ਸਤ੍ਤਾ ਏਤਾਯ ਰਾਗਾਦਿਮਲੇਹੀਤਿ ਸੁਦ੍ਧਿ. ਆਵੁਣੋਤਿ ਸਂਸਾਰਤੋ ਨਿਕ੍ਖਨ੍ਤੁਮਪ੍ਪਦਾਨਵਸੇਨਾਤਿ ਵੁਤਿ, ਤਣ੍ਹਾ, ਤਤੋ ਨਿਕ੍ਖਨ੍ਤਤ੍ਤਾ ਨਿਬ੍ਬੁਤਿ.
੧੦. ਖੀਣਾਸਵਾਦਿਚਤੁਕ੍ਕਂ ਅਰਹਨ੍ਤੇ. ਖੀਣਾ ਆਸਵਾ ਯਸ੍ਸ ਸੋ ਖੀਣਾਸਵੋ. ਤਤੋ ਉਤ੍ਤਰਿ ਕਰਣੀਯਾਭਾਵਤੋ ਨਤ੍ਥਿ ਸਿਕ੍ਖਾ ਏਤਸ੍ਸਾਤਿ ਅਸੇਕ੍ਖੋ. ਵਿਗਤੋ ਰਾਗੋ ਯਸ੍ਮਾਤਿ ਵੀਤਰਾਗੋ. ਸਂਸਾਰਚਕ੍ਕਸ੍ਸ ਅਰੇ ਹਤਵਾਤਿ ਅਰਹਾ, ‘‘ਅਰਹ’’ਨ੍ਤਿਪਿ ਪਾਠੋ.
ਦੇਵਲੋਕਾਦਿਪਞ੍ਚਕਂ ਸਗ੍ਗਸ੍ਸ ਨਾਮਂ. ਦੇਵਾਨਂ ਲੋਕੋ ਭਵਨਂ ਦੇਵਲੋਕੋ. ਦਿਬ੍ਬਨ੍ਤ੍ਯਤ੍ਰ ਦਿਵੋ. ਅਜ ਗਤਿਯਂ, ਅਨੇਕਤ੍ਥਤ੍ਤਾ ਠਿਤਿਯਂ, ਚਿਰਂ ਠਿਯਤੇ ਅਸ੍ਮਿਨ੍ਤਿ ਅਗ੍ਗੋ, ਠਾਨਂ, ਸੋਭਨੋ ਅਗ੍ਗੋ ਸਗ੍ਗੋ, ਪੁਞ੍ਞੇਨ ਵਾ ਸੁਟ੍ਠੁ ਅਜੀਯਤੇਤਿ ਸਗ੍ਗੋ. ਤਯੋ ਦੇਵਾ ਦਿਬ੍ਬਨ੍ਤ੍ਯਤ੍ਰੇਤਿ ਤਿਦਿਵੋ. ਪਧਾਨਤੋ ਹਿ ਤੀਹਿ ਹਰਿਹਰਬ੍ਰਹ੍ਮੇਹਿ ਬ੍ਯਪਦੇਸੋ. ਤਿਦਸਾਨਂ ਦੇਵਾਨਂ ਆਲਯੋ ਠਾਨਨ੍ਤਿ ਤਿਦਸਾਲਯੋ. ਕੇਚਿ ਪਨ ‘‘ਦੇਵਲੋਕਾਦਿਤ੍ਤਯਂ ਸਗ੍ਗਸਾਮਞ੍ਞਸ੍ਸ ਨਾਮਂ, ਤਿਦਿਵਾਦਿਦ੍ਵਯਂ ਤਾਵਤਿਂਸਸ੍ਸਾ’’ਤਿ ਵਦਨ੍ਤਿ, ਤਂ ਅਮਰਕੋਸਾਦੀਸੁ ਸਾਮਞ੍ਞਸ੍ਮਿਂਯੇਵ ਦ੍ਵਿਨ੍ਨਮ੍ਪਿ ਗਹਣਤੋ ਨ ਸਾਰਤੋ ਪਚ੍ਚੇਤਬ੍ਬਂ. ਏਤ੍ਥਾਪਿ ਨਾਕ, ਸੁਰਲੋਕ, ਤਿਪਿਟ੍ਠਪ [ਵਿਸਨ੍ਤਿ ਸੁਕਤਿਨੋ ਅਸ੍ਮਿਂ ਇਤਿ ਪਿਟ੍ਠਪਂ ਪਿਸੋਦਰਾਦਿ ਤਿਦਸਾਨਂ ਪਿਟ੍ਠਪਧਿਤਿ ਦਸਸਦ੍ਦਲੋਪੋ (ਚਿਨ੍ਤਾਮਣਿਟੀਕਾ)], ਅਵਰੋਹ, ਫਲੋਦਯ [ਫਲਸ੍ਸ ਕਮ੍ਮਫਲਸ੍ਸ ਉਦਯੋ ਦਿਟ੍ਠਿਯੋਗ੍ਯਟ੍ਠਾਨਂ (ਤਿਕਣ੍ਡਟੀਕਾ)], ਮਨ੍ਦਰ, ਸੇਰਿਕ, ਸਕ੍ਕਭਵਨ, ਖਂ, ਨਭਾਦੀਨਿ ਦੇਵਲੋਕਸਾਮਞ੍ਞਾਨਿ ਇਧਾਨਾਗਤਾਨਿਪਿ ਗਹੇਤਬ੍ਬਾਨਿ.
੧੧-੧੨. ਤਿਦਸਾਦਿਚਤੁਦ੍ਦਸਕਂ ਦੇਵਤਾਸਾਮਞ੍ਞਸ੍ਸ ਨਾਮਂ. ਜਾਤੀਸੁ [ਜਾਤਿਜਾਤੀਸੁ (ਕ.)] ਵੁਤ੍ਤਾਸੁ ਬ੍ਯਤ੍ਤਿਪਿ ਵੁਚ੍ਚਤੀਤਿ ਬ੍ਯਤ੍ਤੀਨਂ ਬਹੁਤ੍ਤਾ ਬਹੁਵਚਨਨਿਦ੍ਦੇਸੋ. ਜਾਤਿਸਤ੍ਤਾਵਿਨਾਸਸਙ੍ਖਾਤਾ ਤਿਸ੍ਸੋ ਦਸਾ ਪਰਿਮਾਣਾ ਏਤੇਸਨ੍ਤਿ ਤਿਦਸਾ. ਏਤੇ ਹਿ ਮਨੁਸ੍ਸਾਦਯੋ ਵਿਯ ਬੁਦ੍ਧਿਵਿਪਰਿਣਾਮਖਯੇਹਿ ਨ ਯੁਜ੍ਜਨ੍ਤਿ, ਪਞ੍ਚਵੀਸਤਿਵਸ੍ਸੁਦ੍ਦੇਸਿਯਾ ਏਵ ਉਪ੍ਪਜ੍ਜਨ੍ਤਿ ਸਨ੍ਤਿ ਵਿਨਸ੍ਸਨ੍ਤਿ ਚ. ਮਰਣਂ ਮਰੋ, ਸੋ ਯੇਸਂ ਨਤ੍ਥਿ, ਤੇ ਅਮਰਾ. ਦਿਬ੍ਬਨ੍ਤਿ ਪਞ੍ਚਕਾਮਗੁਣਾਦੀਹਿ ਕੀਲ਼ਨ੍ਤੀਤਿ ਦੇਵਾ. ਵਿਬੁਜ੍ਝਨ੍ਤਿ ਨ ਸੁਪਨ੍ਤੀਤਿ ਵਿਬੁਧਾ, ਅਤੀਤਾਨਾਗਤਜਾਤਿਂ ਵਿਬੁਜ੍ਝਨ੍ਤੀਤਿ ਵਾ ਵਿਬੁਧਾ. ਸੁਧਾਭੋਜਨਭੁਞ੍ਜਨਸੀਲਤਾਯ ਸੁਧਾਸਿਨੋ. ਸਮੁਦ੍ਦੁਟ੍ਠਾ [ਅਮਤਮਥਨੋਟ੍ਠਾ (ਚਿਨ੍ਤਾਮਣਿਟੀਕਾ)] ਸੁਰਾ ਅਤ੍ਥਿ ਯੇਸਂ, ਤੇ ਸੁਰਾ, ਸੁਰਨ੍ਤਿ ਵਾ ਕੀਲ਼ਨ੍ਤੀਤਿ ਸੁਰਾ, ਸੁਖੇਨ ਰਮਨ੍ਤੀਤਿ ਵਾ ਸੁਰਾ. ਦੀਘਾਯੁਕਾਪਿ ਸਮਾਨਾ ਯਥਾਪਰਿਚ੍ਛੇਦਂ ਸਮ੍ਪਤ੍ਤਕਾਲੇ ਮਰਨ੍ਤਿ ਸੀਲੇਨਾਤਿ ਮਰੂ. ਦਿਵੋ ਦੇਵਲੋਕੋ ਓਕੋ ਆਸਯੋ ਯੇਸਂ ਤੇ ਦਿਵੋਕਾ. ਸੁਧਾਹਾਰਸ੍ਸ ਪਾਤਬ੍ਬਸ੍ਸਪਿ ਸਮ੍ਭਵਤੋ ਅਮਤਂ ਪਿਵਨ੍ਤੀਤਿ ਅਮਤਪਾ, ਅਮਤੋਸਧਂ ਵਾ ਪਿਵਨ੍ਤੀਤਿ ਅਮਤਪਾ. ਸਗ੍ਗੇ ਵਸਨਸੀਲਤ੍ਤਾ ਸਗ੍ਗਵਾਸਿਨੋ. ਸਦਾ ਪਞ੍ਚਵੀਸਤਿਵਸ੍ਸੁਦ੍ਦੇਸਿਯਤ੍ਤਾ ਨਿਰਾਕਤਾ ਜਰਾ ਏਤੇਸਨ੍ਤਿ ਨਿਜ੍ਜਰਾ. ਨ ਨਿਮਿਸਨ੍ਤੀਤਿ ਅਨਿਮਿਸਾ, ਭਮੁਕਾ ਨਿਚ੍ਚਲਂ ਕਰੋਨ੍ਤੀਤ੍ਯਤ੍ਥੋ. ਦਿਵੇ ਵਸਨ੍ਤੀਤਿ ਦਿਬ੍ਬਾ. ਦੇਵਾ ਏਵ ਦੇਵਤਾ, ਸਕਤ੍ਥੇ ਦੇਵਸਦ੍ਦਤੋ ਤਾਪਚ੍ਚਯੋ, ਦੇਵਤਾ ਏਵ ਦੇਵਤਾਨਿ, ਸਕਤ੍ਥੇ ਨਿਪਚ੍ਚਯੋ. ‘‘ਅਪੁਮੇ’’ਤਿ ਏਤ੍ਥ ਪਠਮਸਕਤ੍ਥਿਕਵਸੇਨ ਇਤ੍ਥਿਲਿਙ੍ਗਤ੍ਤਂ, ਦੁਤਿਯਸਕਤ੍ਥਿਕਵਸੇਨ ਨਪੁਂਸਕਲਿਙ੍ਗਤ੍ਤਂ ਵੇਦਿਤਬ੍ਬਂ, ਦੁਤਿਯਸਕਤ੍ਥਿਕਵਸੇਨੇਵ ਵਾ ਦ੍ਵਿਲਿਙ੍ਗਤ੍ਤਂ, ਤਤ੍ਥ ਇਤ੍ਥਿਲਿਙ੍ਗਪਕ੍ਖੇ ਯਦਾਦਿਨਾ ਨਿਕਾਰਾਦੇਸੋ. ਅਮਰਕੋਸੇ ਪਨ ‘‘ਦੇਵਤਾਨਿ ਪੁਮੇ ਵਾ’’ਤਿ [ਅਮਰ ੧.੯] ਵੁਤ੍ਤਂ. ਤਸ੍ਸਤ੍ਥੋ – ਦੇਵਤਾਨਿਸਦ੍ਦੋ ਵਿਕਪ੍ਪੇਨ ਪੁਲ੍ਲਿਙ੍ਗੇ, ਨਿਚ੍ਚਂ ਨਪੁਂਸਕੇਤਿ. ਟੀਕਾਯਞ੍ਚ ‘‘ਸਕਤ੍ਥਿਕਾ ਪਕਤਿਤੋ ਲਿਙ੍ਗਵਚਨਾਨਿ ਅਤਿਵਤ੍ਤਨ੍ਤੀਤਿ ਪੁਨ੍ਨਪੁਂਸਕਤ੍ਤ’’ਨ੍ਤਿ [ਦੇਵੋ ਏਵ ਦੇਵਤਾ, ਸਕਤ੍ਥੇ ਤਾ, ਸਕਤ੍ਥਿਕਾ ਅਪਿ ਪਚ੍ਚਯਾ ਪਕਤਿਤੋ ਲਿਙ੍ਗਵਚਨਾਦ੍ਯਤਿਵਤ੍ਤਨ੍ਤੇ, ਅਪੀਤਿ ਇਤ੍ਥਿਤ੍ਤਂ ਦੇਵਤਾ ਏਵ ਦੇਵਤਂ ਪਞ੍ਞਾਦਿਤ੍ਤਾ ਅਣ (ਚਿਨ੍ਤਾਮਣਿਟੀਕਾ)] ਵੁਤ੍ਤਂ. ਤਤ੍ਥ ਸਕਤ੍ਥਿਕਾਤਿ ਦੁਤਿਯਸਕਤ੍ਥਿਕਂ ਵੁਤ੍ਤਂ, ਪਕਤਿਤੋਤਿ ਪਠਮਸਕਤ੍ਥਿਕਂ. ਤੇਨ ਵੁਤ੍ਤਂ ‘‘ਪੁਨ੍ਨਪੁਂਸਕਤ੍ਤ’’ਨ੍ਤਿ, ਇਤਰਥਾ ਤਾਪਚ੍ਚਯਨ੍ਤਸ੍ਸ ਨਿਚ੍ਚਂ ਇਤ੍ਥਿਲਿਙ੍ਗਤਾਯ ਇਤ੍ਥਿਲਿਙ੍ਗਤ੍ਤਮੇਵ ਵਦੇਯ੍ਯ. ਸੁਪਬ੍ਬਾ, ਸੁਮਨਾ, ਤਿਦਿਵੇਸਾ, ਆਦਿਤੇਯ੍ਯਾ, ਦਿਵਿਸਦਾ, ਲੇਖਾ, ਅਦਿਤਿਨਨ੍ਦਨਾ, ਆਦਿਚ੍ਚਾ, ਰਿਭਵੋ [ਵਿਭਵਾ (ਕ.), ਰਿਕਾਰੋ ਦੇਵਮਾਤਾ ਸਿਯਾ ਇਤਿ ਤਿਕਣ੍ਡੇ, ਤਤੋ ਭਵਨ੍ਤੀਤਿ (ਚਿਨ੍ਤਾਮਣਿਟੀਕਾ)] ਅਸੋਪ੍ਪਾ, ਅਮਚ੍ਚਾ [ਮਰਣਂ ਮਤਿ ਇਤਿ ਤਿ, ਮਤਿਯਂ ਭਵਾ ਮਚ੍ਚਾ… ਨ ਮਚ੍ਚਾ ਅਮਚ੍ਚਾ (ਚਿਨ੍ਤਾਮਣਿਟੀਕਾ)], ਅਮਤਾਸਨਾ, ਅਗ੍ਗਿਮੁਖਾ, ਹਵਿਭੋਜਨਾ, ਗਿਰਬ੍ਬਾਣਾ, ਦਾਨਵਾਰਯੋ, ਬਿਨ੍ਦਾਰਕਾ, ਪੂਜਿਯਾ, ਚਿਰਾਯੁਕਾ, ਸਗ੍ਗਿਨੋ, ਨਭੋਸਦਾਇਚ੍ਚਾਦੀਨਿਪਿ ਦੇਵਤਾਨਂ ਸਾਮਞ੍ਞਨਾਮਾਨੇਵ.
੧੩. ਸਿਦ੍ਧਾਦਯੋ ਇਮੇ ਦੇਵਯੋਨਿਯੋ ਦੇਵਪ੍ਪਭਵਾ ਦੇਵਵਂਸਾ ਏਤੇਸਮੁਪ੍ਪਤ੍ਤਿਯਂ ਦੇਵਾਨਮੇਵ ਆਦਿਕਾਰਣਤ੍ਤਾ. ਅਣਿਮਾਦਿਗੁਣੋਪੇਤਤ੍ਤਾ ਸਿਜ੍ਝਨ੍ਤਿ ਏਤਸ੍ਸ ਯਥਿਚ੍ਛਿਤਾ ਅਤ੍ਥਾਤਿ ਸਿਦ੍ਧੋ. ਯਸ੍ਸ ਭਾਸਾਯ ਬ੍ਰੂਹਤਿ ਕਥਾ, ਸੋ ਭੂਤੋ, ਪਿਸਾਚਪ੍ਪਭੇਦੋ ਅਧੋਮੁਖਾਦਿ. ਵਚਨਤ੍ਥੋ ਪਨ ਭਵਨ੍ਤਿ ਬ੍ਰੂਹਨ੍ਤਿ ਕਥਾ ਏਤਸ੍ਮਾਤਿ ਭੂਤੋਤਿ. ਗਨ੍ਧਂ ਅਬ੍ਬਤਿ ਪਰਿਭੁਞ੍ਜਤੀਤਿ ਗਨ੍ਧਬ੍ਬੋ, ਦੇਵਗਾਯਨਾ ‘‘ਹਾਹਾ ਹੂਹੂ’’ ਪਭੁਤਯੋ [ਅਮਰ ੧.੫੫]. ਨਿਧਯੋ ਗੁਯ੍ਹਤੀਤਿ ਗੁਯ੍ਹਕੋ, ਸਞ੍ਞਾਯਂ ਕੋ, ਮਣਿਭਦ੍ਰਾਦਿਕੋ ਕੁਵੇਰਾਨੁਚਰੋ. ਯਕ੍ਖ ਪੂਜਾਯਂ, ਯਕ੍ਖੀਯਤੇ ਪੂਜੀਯਤੇਤਿ ਯਕ੍ਖੋ, ਕੁਵੇਰਾਦਿਕੋ. ਰਕ੍ਖਨ੍ਤਿ ਅਤ੍ਤਾਨਂ ਏਤਸ੍ਮਾਤਿ ਰਕ੍ਖਸੋ, ਵਿਭੀਸਣਾਦਿ. ਕੁਮ੍ਭਪ੍ਪਮਾਣਣ੍ਡਤਾਯ ਕੁਮ੍ਭਣ੍ਡੋ. ਪਿਸਿਤਂ ਮਂਸਂ ਅਸਤਿ ਭਕ੍ਖਤੀਤਿ ਪਿਸਾਚੋ, ਸਕੁਨਿ ਸਕੁਨ੍ਤਿਆਦਿਕੋ ਕੁਵੇਰਾਨੁਚਰੋ, ਯਦਾਦਿਨਾ ਪਿਸਿਤਸ੍ਸ ਪਿਭਾਵੋ, ਅਸਸ੍ਸ ਚ ਸਾਚਾਦੇਸਭਾਵੋ [ਪਾਣਿਨਿ ੬.੩.੧੦੯; ਮੋਗ੍ਗਲ੍ਲਾਨਪਞ੍ਚਿਕਾ ੧.੪੭]. ਆਦਿਸਦ੍ਦੇਨ ਵਿਜ੍ਜਾਧਰ, ਅਪਸਰ, ਕਿਨ੍ਨਰੇ ਚ ਸਙ੍ਗਣ੍ਹਾਤਿ. ਵਿਜ੍ਜਂ ਗੁਲ਼ਿਕਾਞ੍ਜਨਮਨ੍ਤਾਦਿਕਂ ਧਰਤੀਤਿ ਵਿਜ੍ਜਾਧਰੋ. ਅਪਸਾਰਯਨ੍ਤਿ ਖਲਯਨ੍ਤੀਤਿ ਅਪਸਰਾ, ਉਬ੍ਬਸ੍ਯਾਦਿਕਾ ਸੁਰਵੇਸਿਯੋ [ਅਮਰ ੧.੫੫], ਅਪਸਰਸਦ੍ਦਸ੍ਸ ਜਾਤਿਯਂ ਸਯਂ ਬਹੁਤ੍ਤਂ, ਬ੍ਯਤ੍ਤਿਯਨ੍ਤੁ ਤਦਵਯਵਂ ਵਾ ਸਯਂ, ਤਥਾ ਚ ਬਹੁਤ੍ਤਂਵ. ਵਨਾਦਿਸਦ੍ਦੋ ਕਦਾਚਿ ਜਾਤਿਯਂ ਪਯੁਜ੍ਜਤੇ, ਕਦਾਚਿ ਬ੍ਯਤ੍ਤਿਯਂ. ਤਤ੍ਰ ਯਦਾ ਜਾਤਿਯਂ, ਤਦਾ ਬ੍ਯਤ੍ਤਿਗਤਂ ਸਙ੍ਖ੍ਯਮਾਦਾਯ ਪਵਤ੍ਤਤਿ. ਯਦਾ ਬ੍ਯਤ੍ਤਿਯਂ ਪਯੁਜ੍ਜਤੇ, ਤਦਾ ਤਂਬ੍ਯਤ੍ਤਾਵਯਵਾਨਂ ਪਾਣਿਪਾਦਾਦੀਨਂ ਬਹੁਤ੍ਤਸਙ੍ਖ੍ਯਮਾਦਾਯ ਪਵਤ੍ਤਤਿ. ਵਨਸਦ੍ਦੋ ਤੁ ਜਾਤਿਗਤੇਕਸਙ੍ਖ੍ਯਾਵਿਸਿਟ੍ਠਦਬ੍ਬਾਭਿਧਾਨਤੋ ਧਵਾਦਿਬ੍ਯਤ੍ਤਿਗਤਜਾਤ੍ਯਾਭਿਧਾਨਤੋ ਵਾ ਏਕਵਚਨਨ੍ਤਿ ਅਪਸਰਸਦ੍ਦੋ ਵਾਮਨਾਦਿਮਤੇਨ ਇਤ੍ਥਿਯਂ ਬਹੁਵਚਨੇ ਚ, ਤਦਞ੍ਞੇਸਂ ਪਨ ਮਤੇਨ ਪੁਮਿਤ੍ਥਿਯਂ ਵਚਨਦ੍ਵਯੇ ਚ ਦਟ੍ਠਬ੍ਬੋ. ਅਸ੍ਸਮੁਖਨਰਸਰੀਰਤ੍ਤਾ ਕੁਚ੍ਛਿਤੋ ਨਰੋ, ਕਿਞ੍ਚਿ ਵਾ ਨਰੋ, ਨਰਸਦਿਸਤ੍ਤਾ ਵਾ ਕਿਨ੍ਨਰੋ. ਏਤਾ ਦੇਵਯੋਨਿਯੋ. ਗਣਦੇਵਤਾ ਪਨ –
‘‘ਆਦਿਚ੍ਚਾ ਵਿਸੁ ਵਸਵੋ, ਤੁਸਿਤਾ’ਭਸ੍ਸਰਾ’ਨਿਲਾ;
ਮਹਾਰਾਜਿਕਾ ਸਾਧ੍ਯਾ ਚ, ਰੁਦ੍ਦਾ ਚ ਗਣਦੇਵਤਾ’’ਤਿ [ਅਮਰ ੧.੧੦].
ਅਮਰਕੋਸੇ ਕਥਿਤਾ.
ਤਤ੍ਰਾਦਿਚ੍ਚਾ ਦ੍ਵਾਦਸਕਾ, ਵਿਸੁਦੇਵਾ ਦਸ ਠਿਤਾ;
ਵਸਵੋ ਅਟ੍ਠਸਙ੍ਖ੍ਯਾਤਾ, ਛਤ੍ਤਿਂਸ ਤੁਸਿਤਾ ਮਤਾ.
ਆਭਸ੍ਸਰਾ ਚਤੁਸਟ੍ਠਿ, ਵਾਤਾ ਪਣ੍ਣਾਸੇਕੂਨਕਾ;
ਮਹਾਰਾਜਿਕਨਾਮਾਯੋ, ਦ੍ਵਿਸਤਂ ਵੀਸਤਾਧਿਕਾ.
ਸਾਧ੍ਯਾ ਦ੍ਵਾਦਸ ਵਿਖ੍ਯਾਤਾ, ਰੁਦ੍ਦਾ ਚੇਕਾਦਸ ਠਿਤਾ;
ਸਮਯਨ੍ਤਰਤੋ ਏਤਾ, ਵਿਞ੍ਞੇਯ੍ਯਾ ਗਣਦੇਵਤਾ.
੧੪. ਪੁਬ੍ਬਦੇਵਾਦਿਚਤੁਕ੍ਕਂ ਅਸੁਰੇ. ਪੁਬ੍ਬਂ ਦੇਵਾ ਪੁਬ੍ਬਦੇਵਾ, ਦੁਤਿਯਾਸਮਾਸੋ, ਪੁਬ੍ਬੇ ਵਾ ਦੇਵਾ ਪੁਬ੍ਬਦੇਵਾ, ਪੁਬ੍ਬੇ ਹ੍ਯੇਤੇ ਦੇਵਪੁਰੇ ਠਿਤਾ, ਅਨਨ੍ਤਰਂ ਸਕ੍ਕਾਦੀਹਿ ਤਤੋ ਚਾਲਿਤਾ. ਸੁਰਾਨਂ ਰਿਪੂ ਸਤ੍ਤਵੋ ਸੁਰਰਿਪੂ. ਸੁਰਾਨਂ ਪਟਿਪਕ੍ਖਭਾਵਤੋ ਅਸੁਰਾ, ਦੇਵਾ ਵਿਯ ਨ ਸੁਰਨ੍ਤਿ ਨ ਕੀਲ਼ਨ੍ਤੀਤਿ ਵਾ ਅਸੁਰਾ, ਸਮੁਦ੍ਦੁਟ੍ਠਾ ਵਾ ਸੁਰਾ ਦੇਵੇਹਿ ਅਭ੍ਯੁਪਗਤਾ, ਨਾਸੁਰੇਹੀਤਿ ਨਤ੍ਥਿ ਸੁਰਾ ਏਤੇਸਨ੍ਤਿ ਅਸੁਰਾਤਿ ਨਿਕਾਯਨ੍ਤਰਿਯਾ. ਦਨੁਨਾਮਾਯ ਮਾਤੁਯਾ ਅਪਚ੍ਚਂ ਦਾਨਵਾ. ਦਨੁ ਨਾਮ ਤੇਰਸਸੁ ਰਕ੍ਖਸਦੁਹਿਤੀਸੁ ਏਕਿਸ੍ਸਾ ਦੁਹਿਤੁ ਨਾਮਂ. ਏਤੇ ਪੁਬ੍ਬਦੇਵਾਦਯੋ ਸਦਾ ਪੁਮੇ ਪੁਲ੍ਲਿਙ੍ਗੇ ਵਤ੍ਤਨ੍ਤਿ. ਦੇਚ੍ਚਾ, ਦੇਤੇਯ੍ਯਾ, ਦਨੁਜਾ, ਇਨ੍ਦਾਰੀ, ਸੁਰਦਿਸਾ, ਸੁਕ੍ਕਸਿਸ੍ਸਾ, ਦਿਤਿਸੁਤਾ, ਪੁਬ੍ਬਜਾਇਚ੍ਚਾਦੀਨਿਪਿ ਅਸੁਰਸ੍ਸ ਸਾਮਞ੍ਞਨਾਮਾਨਿ.
ਤਬ੍ਬਿਸੇਸਾ ਅਸੁਰਪ੍ਪਭੇਦਾ. ਸੁਰੇਹਿ ਸਦ੍ਧਿਂ ਸਙ੍ਗਾਮਤ੍ਥਂ ਅਤ੍ਤਨੋ ਬਲਕਾਯਾਨਂ ਪਹਾਰਂ ਆਯੁਧਂ ਦਦਾਤੀਤਿ ਪਹਾਰਦੋ, ਸੋ ਏਵ ਪਹਾਰਾਦੋ. ਸਂ ਪਸਤ੍ਥੋ ਵਰੋ ਜਾਮਾਤਾ ਯਸ੍ਸ ਸੋ ਸਮ੍ਬਰੋ, ਤਸ੍ਸ ਹਿ ਸਕ੍ਕੋ ਜਾਮਾਤਾ [ਸਂ. ਨਿ. ਅਟ੍ਠ. ੧.੧.੨੫੬], ਪੁਞ੍ਞਾਹਰੀਸੁ ਵਾ ਇਨ੍ਦ੍ਰਿਯਾਨਿ ਸਂਵੁਣੋਤੀਤਿ ਸਮ੍ਬਰੋ. ਬਲਮੇਤਸ੍ਸਤ੍ਥੀਤਿ ਬਲੀ, ਅਤਿਸਯਬਲਕਾਯਤ੍ਤਾ ਵਾ ਬਲੀ, ਸੋ ਏਵ ਬਲਿ, ‘‘ਬਲਿਆਦਯੋ’’ਤਿ ਇਮਿਨਾ ਸਮਾਸੇਪਿ ਸਨ੍ਧਿ ਨਤ੍ਥੀਤਿ ਦੀਪੇਤਿ. ਆਦਿਨਾ ਮਚ੍ਛਸਕੁਣਾਦਿਕੇਪਿ ਕੁਞ੍ਚਾਦਿਕੇਪਿ ਅਸੁਰਭੇਦੇ ਸਙ੍ਗਣ੍ਹਾਤਿ.
੧੫. ਪਿਤਾਮਹਾਦ੍ਯਟ੍ਠਕਂ ਬ੍ਰਹ੍ਮਨਿ. ਪਿਤੂਨਂ ਪਜਾਪਤੀਨਂ ਲੋਕਪਿਤੂਨਮ੍ਪਿ ਪਿਤਾ ਪਿਤਾਮਹੋ, ਆਮਹਪਚ੍ਚਯੋ [ਮੋਗ੍ਗਲ੍ਲਾਨ ੪.੩੮]. ਸਬ੍ਬਲੋਕਾਨਂ ਪਿਤੁਟ੍ਠਾਨਿਯਤ੍ਤਾ ਪਿਤਾ, ਸਬ੍ਬਲੋਕਂ ਵਾ ਪਾਤਿ ਰਕ੍ਖਤੀਤਿ ਪਿਤਾ, ਰਿਤੁਪਚ੍ਚਯੋ. ਮਹਨ੍ਤਸਰੀਰਤਾਯ ਬ੍ਰਹ੍ਮਾ, ਬ੍ਰਹ ਵੁਡ੍ਢਿਯਂ ਮਪਚ੍ਚਯੋ. ਲੋਕਾਨਂ ਈਸੋ ਇਨ੍ਦੋ ਲੋਕੇਸੋ. ਕਮਲਸਮ੍ਭਵਤ੍ਤਾ ਕਮਲਂ, ਪਦ੍ਮਂ. ਤਂ ਆਸਨਮੁਪ੍ਪਤ੍ਤਿਟ੍ਠਾਨਮਸ੍ਸ ਕਮਲਾਸਨੋ. ਹਿਰਞ੍ਞਂ ਸੁਵਣ੍ਣਮਯਂ ਅਣ੍ਡਂ ਹਿਰਞ੍ਞਂ, ਤਸ੍ਸ ਗਬ੍ਭੋ ਭੂਣੋ [ਗੁਣੋ (ਕ.)] ਹਿਰਞ੍ਞਗਬ੍ਭੋ. ਝਾਨਾਦਿਗੁਣੇਹਿ ਸੁਰਾਨਂ ਜੇਟ੍ਠਤ੍ਤਾ ਸੁਰਜੇਟ੍ਠੋ. ਪਜਾਨਂ ਸਤ੍ਤਾਨਂ ਪਤਿ ਸਾਮਿਭੂਤੋ ਪਜਾਪਤਿ, ਪਜਂ ਪਾਲੇਤੀਤਿ ਵਾ ਪਜਾਪਤਿ. ਅਤ੍ਤਭੂ, ਪਰਮੇਟ੍ਠਿ, ਸਯਮ੍ਭੂ, ਚਤੁਰਾਨਨੋ, ਧਾਤਾ, ਕਮਲਯੋਨਿ, ਦੁਹਿਣੋ, ਵਿਰਿਞ੍ਚਿ, ਸਜਿਤਾ, ਵੇਧਾ, ਵਿਧਾਤਾ, ਵਿਧਿ, ਹਂਸਰਥੋ, ਵਿਰਿਞ੍ਚੋ, ਪਪਿਤਾਮਹੋ ਇਚ੍ਚਾਦਯੋਪਿ ਬ੍ਰਹ੍ਮਨਾਮਾਨਿ.
੧੬-੧੭. ਵਾਸੁਦੇਵਾਦਿਪਞ੍ਚਕਂ ਕਣ੍ਹੇ. ਵਸੁਦੇਵਸ੍ਸ ਅਪਚ੍ਚਂ ਵਾਸੁਦੇਵੋ. ਮਚ੍ਚਾਨਂ ਜੀਵਿਤਂ ਹਰਤਿ ਸੀਲੇਨਾਤਿ ਹਰਿ. ਕਣ੍ਹਗੁਣਯੋਗਤੋ ਕਣ੍ਹੋ. ਕੇਸਿਂ ਨਾਮ ਅਸੁਰਂ ਹਤਵਾਤਿ ਕੇਸਵੋ, ਈਕਾਰਸ੍ਸ ਅਕਾਰੋ, ਹਨਸ੍ਸ ਚ ਵੋ. ਵੁਤ੍ਤਞ੍ਚ –
‘‘ਯਸ੍ਮਾ ਤਯਾ ਹਤੋ ਕੇਸੀ,
ਤਸ੍ਮਾ ਮੇ ਸਾਸਨਂ ਸੁਣ;
ਕੇਸਵੋ ਨਾਮ ਨਾਮੇਨ,
ਸੇਯ੍ਯੋ ਲੋਕੇ ਭਵਿਸ੍ਸਸੀ’’ਤਿ [ਚਿਨ੍ਤਾਮਣਿਟੀਕਾਯਮ੍ਪਿ].
ਚਕ੍ਕਂ ਪਾਣਿਮ੍ਹਿ ਅਸ੍ਸ ਚਕ੍ਕਪਾਣਿ. ਵਿਸਣੁ [ਪਿਣ੍ਹੁ (ਕ.)], ਨਾਰਾਯਨੋ, ਵੇਕੁਣ੍ਠੋ, ਦਾਮੋਦਰੋ, ਮਾਧਵੋ, ਸਮ੍ਭੂ, ਦੇਚ੍ਚਾਰਿ, ਪੁਣ੍ਡਰੀਕਕ੍ਖੋ, ਗੋਵਿਨ੍ਦੋ, ਗਰੁਲ਼ਦ੍ਧਜੋ, ਪੀਤਮ੍ਬਰੋ, ਅਚ੍ਚੁਤੋ, ਮਙ੍ਗਲੋ, ਸਿਙ੍ਗੀ, ਜਨਾਦ੍ਦਨੋ, ਉਪੇਨ੍ਦੋ, ਇਨ੍ਦਾਵਰਜੋ, ਚਤੁਭੁਜੋ, ਪਦ੍ਮਨਾਭੋ, ਮਧੁਰਿਪੁ, ਤਿਵਿਕ੍ਕਮੋ, ਦੇਵਕੀਨਨ੍ਦਨੋ, ਸੋਰੀ, ਸਿਰੀਪਤਿ, ਪੁਰਿਸੋਤ੍ਤਮੋ, ਵਨਮਾਲੀ, ਬਲਿਧਂਸੀ, ਕਂਸਾਰਾਤਿ, ਅਧੋਕ੍ਖਜੋ, ਸਬ੍ਬਮ੍ਭਰੋ, ਕੇਟਭਜਿ [ਕੇਟਭਂ ਜਿਤਵਾ (ਚਿਨ੍ਤਾਮਣਿਟੀਕਾ)], ਵਿਧੁ, ਸਸਬਿਨ੍ਦੁ, ਸਿਰੀਕਰੋ, ਸਿਰੀਵਰਾਹੋ, ਅਜਿਤੋ, ਪਰਪੁਰਿਸੋ, ਸਿਰੀਗਬ੍ਭੋ, ਛਬਿਨ੍ਦੁ, ਅਨਨ੍ਤੋ, ਨਰਕਜਿ, ਕੇਸਰੋ, ਜਾਤਿਕੀਲੋ, ਨਰਸੀਹੋ, ਪੁਰਾਣਪੁਰਿਸੋ, ਨਲਿਨੇਸਯੋ, ਵਾਸੁ, ਨਰਾਯਨੋ, ਪੁਨਬ੍ਬਸੁ, ਸਬ੍ਬਰੂਪੋ, ਧਰਣੀਧਰੋ, ਵਾਮਨੋ, ਏਕਸਿਙ੍ਗੋ, ਸੋਮਗਬ੍ਭੋ, ਆਦਿਦੇਵੋ, ਆਦਿਵਰਾਹੋ, ਸੁਵਣ੍ਣਬਿਨ੍ਦੁ, ਸਦਾਯੋਗੀ, ਸਨਾਤਨੋ, ਰਾਹੁਮੁਦ੍ਧਭਿਦੋ, ਕਾਲ਼ਨੇਮਿ, ਪਣ੍ਡਵੋ, ਵਡ੍ਢਮਾਨੋ, ਸਤਾਨਨ੍ਦੋ, ਪਜਾਨਾਥੋ, ਸੁਯਾਮੁਨੋਇਚ੍ਚਾਦੀਨਿ ਵਿਸਣੁਨਾਮਾਨਿ. ਅਸ੍ਸ ਪਨ ਪਿਤੁ ਨਾਮਾਨਿ ਵਸੁਦੇਵੋ, ਆਨਕਦੁਨ੍ਦੁਭਿ [ਅਮਰ ੧.੨੩] ਇਚ੍ਚਾਦੀਨਿ. ਰਥਵਾਹੋ ਪਨਸ੍ਸ ਦਾਰੁਕੋ ਨਾਮ [ਤਿਕਣ੍ਡਸੇਸ ੧.੧.੩੪]. ਮਨ੍ਤੀ ਪਨ ਪਵਨਬ੍ਯਾਧਿ ਨਾਮ [ਮਨ੍ਤੀ ਪਵਨਬ੍ਯਾਮਿ ਉਦ੍ਧਵੋ (ਤਿਤਣ੍ਡਸੇਸ ੧.੧.੩੫) ਪਵਨਬ੍ਯਾਧਿ… ਉਦ੍ਧਵੋ ਇਤਿ ਦ੍ਵੇ ਪਿਣ੍ਹੁਸ੍ਸ ਮਨ੍ਤਿਨੋ (ਕਟ੍ਟੀਕਾ)].
ਮਹਿਸ੍ਸਰਾਦਿਛਕ੍ਕਂ ਹਰੇ. ਮਹਨ੍ਤੋ ਇਸ੍ਸਰੋ ਵਿਭੂਤਿ ਏਤਸ੍ਸਾਤਿ ਮਹਿਸ੍ਸਰੋ. ਗੁਣਾਵਤ੍ਥਾਰਹਿਤੋ ਸਮ੍ਪਤਿ ਪਰਮਾਨਨ੍ਦਰੂਪਤ੍ਤਾ ਨਿਬ੍ਬਿਕਾਰੋ ਸਮਤਿ ਭਵਤੀਤਿ ਸਿਵੋ, ਨਿਰੁਤ੍ਤਿਨਯੇਨ ਅਕਾਰਸ੍ਸ ਇਤ੍ਤਂ, ਮਸ੍ਸ ਵੋ ਚ. ਏਵਂ ਸਬ੍ਬਤ੍ਥ ਯਦਾਦਿਨਾ ਵਾ ਨਿਰੁਤ੍ਤਿਨਯੇਨ ਵਾ ਸਦ੍ਦਸਿਦ੍ਧਿ ਵੇਦਿਤਬ੍ਬਾਤਿ. ਸੂਲਪਾਣਿਤ੍ਤਾ ਸੂਲੀ. ਇਟ੍ਠੇ ਪਭਵਤੀਤਿ ਇਸ੍ਸਰੋ, ਇਸ੍ਸਤਿ ਅਭਿਭਵਤੀਤਿ ਵਾ ਇਸ੍ਸਰੋ. ਪਸੂਨਂ ਪਮਥਾਨਂ ਪਤਿ ਪਸੁਪਤਿ. ‘‘ਪਸੁ ਮਿਗਾਦੋ ਛਗਲੇ, ਪਮਥੇਪਿ ਪਸੁ ਪੁਮੇ’’ਤਿ ਰੁਦ੍ਦੋ [ਰਭਸੋ (ਕ.)]. ( ) [(ਗੁਣੇ) (ਕ.)] ਵਿਸਿਟ੍ਠਤਮੋਗੁਣਤ੍ਤਾ ਸਬ੍ਬਂ ਹਰਤੀਤਿ ਹਰੋ. ਵੁਤ੍ਤੋਤਿ ਕ੍ਰਿਯਾਪਦਂ. ਸਮ੍ਭੁ, ਈਸੋ, ਸਬ੍ਬੋ, ਈਸਾਨੋ, ਸਙ੍ਕਰੋ, ਚਨ੍ਦਸੇਖਰੋ, ਭੂਤੇਸੋ, ਖਣ੍ਡਪਰਸੁ, ਗਿਰੀਸੋ, ਮਚ੍ਚੁਞ੍ਜਯੋ, ਪਿਨਾਕੀ, ਪਮਥਾਧਿਪੋ, ਉਗ੍ਗੋ, ਕਪਦ੍ਦਿ, ਸਿਰੀਕਣ੍ਠੋ, ਕਾਲ਼ਕਣ੍ਠੋ, ਕਪਾਲਭਰੋ, ਵਾਮਦੇਵੋ, ਮਹਾਦੇਵੋ, ਵਿਰੂਪਕ੍ਖੋ, ਤਿਲੋਚਨੋ, ਸਬ੍ਬਞ੍ਞੂ, ਨੀਲਲੋਹਿਤੋ, ਮਾਰਹਰੋ, ਭਗ੍ਗੋ, ਤ੍ਯਮ੍ਬਕੋ, ਤਿਪੁਰਨ੍ਤਕੋ, ਗਙ੍ਗਾਧਰੋ, ਅਨ੍ਧਕਰਿਪੁ, ਬ੍ਯੋਮਕੇਸੋ, ਭਵੋ, ਭੀਮੋ, ਰੁਦ੍ਦੋ, ਉਮਾਪਤਿ, ਭਗਾਲੀ, ਕਪਿਸਞ੍ਜਨੋ, ਹੀਰੋ, ਪਞ੍ਚਾਨਨੋ, ਖਕੁਨ੍ਤਲੋ, ਗੋਪਾਲਕੋ, ਪਿਙ੍ਗਕ੍ਖੋ [ਵਿਭਙ੍ਗੋ (ਕ.)], ਕੂਟਕਰੋ, ਚਨ੍ਦਾਪੀਲ਼ੋ, ਮਹਾਨਟੋ, ਸਮੀਰੋ, ਹੋ, ਨਨ੍ਦਿਵਡ੍ਢਨੋ, ਗੁਲ਼ਾਕੇਸੋ [ਮਿਗੂਹੋ (ਕ.)], ਮਿਹਿਰਾਣੋ, ਮੇਘਵਾਹਨੋ, ਸੁਪ੍ਪਤਾਪੋ [ਸੁਪ੍ਪਸਾਦੋ (ਕ.)], ਉ, ਥਾਣੁ [ਉਪਾਣ੍ਡੋ (ਕ.)], ਸਿਪਿਵਿਟ੍ਠੋ, ਕੀਲੋ, ਧਮ੍ਮਵਾਹਨੋਇਚ੍ਚਾਦੀਨਿਪਿ ਹਰਨਾਮਾਨਿ.
ਕੁਮਾਰਾਦਿਤ੍ਤਯਂ ਹਰਸ੍ਸ ਪੁਤ੍ਤੇ. ਕੁਮਾਰ ਕੀਲ਼ਾਯਂ, ਕੁਮਾਰੇਤਿ ਕੀਲ਼ਤੀਤਿ ਕੁਮਾਰੋ, ਸੋਲ਼ਸਵਸ੍ਸਿਕੋ, ਅਯਞ੍ਚ ਸੋਲ਼ਸਵਸ੍ਸਿਕੋ. ‘‘ਬਾਲੋ ਚ ਸੋਲ਼ਸ ਭਵੇ’’ਤਿ ਹਿ ਵੁਤ੍ਤਂ. ਖਣ੍ਡਤਿ ਦਾਨਵਬਲਨ੍ਤਿ ਖਨ੍ਦੋ, ਣ੍ਡਸ੍ਸ ਨ੍ਦੋ. ਸਤ੍ਤਿਂਪਹਰਣਵਿਸੇਸਂ ਧਰਤੀਤਿ ਸਤ੍ਤਿਧਰੋ, ਪਭਾਵੁਸ੍ਸਾਹਮਨ੍ਤਸਙ੍ਖਾਤਂ ਵਾ ਸਤ੍ਤਿਤ੍ਤਯਂ ਧਰਤੀਤਿ ਸਤ੍ਤਿਧਰੋ. ਅਮਰਕੋਸੇ ਪਨ –
‘‘ਕਤ੍ਤਿਕੇਯ੍ਯੋ ਮਹਾਸੇਨੋ,
ਸਰਜਾਤੋ ਛਲ਼ਾਨਨੋ;
ਪਬ੍ਬਤੀਨਨ੍ਦਨੋ ਖਨ੍ਦੋ,
ਸੇਨਾਨੀ ਅਗ੍ਗਿਭੂ ਗੁਹੋ.
ਬਾਹੁਲੇਯ੍ਯੋ ਤਾਰਕਜਿ,
ਵਿਸਾਖੋ ਸਿਖਿਵਾਹਨੋ;
ਛਮਾਤੁਰੋ ਸਤ੍ਤਿਧਰੋ,
ਕੁਮਾਰੋ ਕੋਞ੍ਚਦਾਰਣੋ’’ਤਿ [ਅਮਰ ੧.੪੧-੨] ਵੁਤ੍ਤਂ.
੧੮-੨੧. ਸਕ੍ਕਾਦੀਨਿ ਵੀਸਤਿ ਸਕ੍ਕਸ੍ਸ ਨਾਮਾਨਿ. ਅਸੁਰੇ ਜੇਤੁਂ ਸਕ੍ਕੁਣਾਤੀਤਿ ਸਕ੍ਕੋ. ਪੁਰੇ, ਪੁਰਂ ਵਾ ਦਦਾਤੀਤਿ ਪੁਰਿਨ੍ਦਦੋ. ਦੇਵਾਨਂ ਰਾਜਾ ਦੇਵਰਾਜਾ. ਵਜਿਰਂ ਪਾਣਿਮ੍ਹਿ ਅਸ੍ਸ ਵਜਿਰਪਾਣਿ. ਸੁਜਾਯ ਅਸੁਰਕਞ੍ਞਾਯ ਪਤਿ ਸੁਜਮ੍ਪਤਿ. ਬਹੂਨਂ ਦੇਵਮਨੁਸ੍ਸਾਨਂ ਚਿਨ੍ਤਿਤਤ੍ਥਸ੍ਸ ਦਸ੍ਸਨਸਮਤ੍ਥਤਾਯ ਸਹਸ੍ਸਕ੍ਖੋ. ਮਹਤਂ ਦੇਵਾਨਂ ਇਨ੍ਦੋ ਰਾਜਾ ਮਹਿਨ੍ਦੋ, ਦੇਵੇਹਿ ਮਹਿਤਬ੍ਬੋ ਵਾ ਇਨ੍ਦੋ ਰਾਜਾ ਮਹਿਨ੍ਦੋ, ਮਹਨ੍ਤੋ ਚ ਸੋ ਇਨ੍ਦੋ ਚਾਤਿ ਵਾ ਮਹਿਨ੍ਦੋ. ਵਜਿਰਂ ਆਵੁਧਂ ਯਸ੍ਸ ਵਜਿਰਾਵੁਧੋ, ‘‘ਵਜਿਰਾਯੁਧੋ’’ਤਿਪਿ ਪਾਠੋ. ਵਸੂਨਿ ਰਤਨਾਨਿ ਸਨ੍ਤ੍ਯਸ੍ਸੇਤਿ ਵਾਸਵੋ. ਦਸਸਤਾਨਿ ਨਯਨਾਨਿ ਯਸ੍ਸ ਸੋ ਦਸਸਤਨਯਨੋ. ਦ੍ਵਿਨ੍ਨਂ ਦੇਵਲੋਕਾਨਂ ਅਧਿਪਤਿਭੂਤਤ੍ਤਾ ਤਿਦਿਵਾਧਿਭੂ. ਸੁਰਾਨਂ ਨਾਥੋ ਸੁਰਨਾਥੋ. ਵਜਿਰਂ ਹਤ੍ਥੇ ਯਸ੍ਸ ਸੋ ਵਜਿਰਹਤ੍ਥੋ. ਭੂਤਾਨਂ ਸਤ੍ਤਾਨਂ ਪਤਿ ਭੂਤਪਤਿ. ਮਹਿਤਬ੍ਬਤ੍ਤਾ ਮਘਵਾ. ਮਹ ਪੂਜਾਯਂ, ਹਸ੍ਸ ਘਵੋ. ਕੋਸਸਙ੍ਖਾਤਾਨਿ ਧਨਾਨਿ ਸਨ੍ਤਿ ਯਸ੍ਸ, ਸੋ ਕੋਸਿਯੋ, ‘‘ਕੋਸਿਯਗੋਤ੍ਤਤਾਯ ਕੋਸਿਯੋ’’ਤਿ ਚ ਵਦਨ੍ਤਿ. ਇਨ੍ਦਤਿ ਪਰਮਿਸ੍ਸਰਿਯੇਨ ਯੁਜ੍ਜਤੇਤਿ ਇਨ੍ਦੋ. ਵਤ੍ਰਂ ਨਾਮ ਅਸੁਰਂ ਅਭਿਭਵਤੀਤਿ ਵਤ੍ਰਭੂ. ਪਾਕੋ ਨਾਮਵਤ੍ਰਾਸੁਰਸ੍ਸ ਭਾਤਾ, ਤਸ੍ਸ ਸਾਸਨਤੋ ਨਿਗ੍ਗਹਤੋ ਪਾਕਸਾਸਨੋ. ਵਿਡਂ ਬ੍ਯਾਪਕਂ ਓਜੋ ਏਤਸ੍ਸ ਵਿਡੋਜੋ. ਸੁਨਾਸੀਰੋ, ਪੁਰਨ੍ਦਰੋ, ਲੇਖਾਸਭੋ [ਲੇਖਨਂ ਦੇਵਾਨਂ ਉਸਤੋ ਉਤ੍ਤਮੋ (ਚਿਨ੍ਤਾਮਣਿਟੀਕਾ)], ਦਿਵਪਤਿ, ਸੁਰਪਤਿ, ਬਲਾਰਾਤਿ, ਸਚੀਪਤਿ, ਜਮ੍ਭਭੇਦੀ, ਹਰਿਹਯੋ, ਨਮੁਚਿਸੂਦਨੋ, ਸਂਕਨ੍ਦਨੋ, ਮੇਘਵਾਹਨੋ, ਆਖਣ੍ਡਲੋ [ਆਖਣ੍ਡਯਤਿ ਪਰਬਲਂ ਉਸਾਦਿਤ੍ਤਾ ਕਲਚ (ਚਿਨ੍ਤਾਮਣਿਟੀਕਾ)], ਕੋਸਿਕੋ, ਸੁਰਗਾਮਣੀ, ਨਾਕਨਾਥੋ, ਹਰੀ ਇਚ੍ਚਾਦੀਨਿਪਿ ਸਕ੍ਕਸ੍ਸ ਨਾਮਾਨਿ.
ਅਸ੍ਸ ਸਕ੍ਕਸ੍ਸ ਭਰਿਯਾ ਸੁਜਾਤਾ ਨਾਮ. ਸੁਖੇਨ ਜਾਤਾ, ਸੁਨ੍ਦਰਾ ਵਾ ਜਾਤਿ ਯਸ੍ਸਾ ਸਾ ਸੁਜਾਤਾ. ਪੁਲੋਮਜਾ, ਸਚੀ, ਇਨ੍ਦਾਨੀ ਇਚ੍ਚਾਦੀਨਿਪਿ ਸਕ੍ਕਭਰਿਯਾਯ ਨਾਮਾਨਿ.
ਅਸ੍ਸ ਸਕ੍ਕਸ੍ਸ ਪੁਰਂ ਮਸਕ੍ਕਸਾਰਾਦਯੋ ਤਯੋ ਭਵੇ. ਮੋ ਚ ਸਕ੍ਕੋ ਚ ਮਸਕ੍ਕਾ, ਤੇ ਸਰਨ੍ਤਿ ਗਚ੍ਛਨ੍ਤਿ ਏਤ੍ਥ ਕੀਲ਼ਾਵਸੇਨਾਤਿ ਮਸਕ੍ਕਸਾਰਾ, ਮਹਿਸ੍ਸਰਾਦੀਨਂ ਪਰਿਸਾਨਂ, ਸਕ੍ਕਸ੍ਸ ਚ ਕੀਲ਼ਾਨੁਭਵਨਟ੍ਠਾਨਨ੍ਤ੍ਯਤ੍ਥੋਤਿ ਚਿਨ੍ਤਾਮਣਿਥੁਤਿਟੀਕਾਯਂ ਵੁਤ੍ਤਂ. ਸਙ੍ਗਹਟੀਕਾਯਂ ਪਨ ‘‘ਮਸਕ੍ਕਨ੍ਤਿ ਵਾ ਵਸੋਕਨ੍ਤਿ ਵਾ ਅਸੁਰਪੁਰਸ੍ਸ ਨਾਮਂ, ਇਦਂ ਪਨ ਤੇਸਂ ਉਤ੍ਤਮਤ੍ਤਾ ਮਸਕ੍ਕਸਾਰੋ, ਵਸੋਕਸਾਰੋਤਿ ਚ ਵੁਤ੍ਤ’’ਨ੍ਤਿ ਵੁਤ੍ਤਂ. ਅਮਰਾ ਏਤਿਸ੍ਸਂ ਸਨ੍ਤਿ ਅਮਰਵਤੀ, ਸਾ ਏਵ ਅਮਰਾਵਤੀ, ਰਸ੍ਸਸ੍ਸ ਦੀਘਤਾ [ਪਾਣਿਨੀ ੬.੩.੧੧੯].
ਅਸ੍ਸ ਸਕ੍ਕਸ੍ਸ ਪਾਸਾਦੋ ਵੇਜਯਨ੍ਤੋ ਨਾਮ. ਵੇਜਯਨ੍ਤੀ ਪਟਾਕਾ ਪਸਤ੍ਥਾ, ਭੂਤਾ ਵਾ ਅਸ੍ਸ ਅਤ੍ਥੀਤਿ ਵੇਜਯਨ੍ਤੋ.
ਅਸ੍ਸ ਸਕ੍ਕਸ੍ਸ ਸਭਾ ਸੁਧਮ੍ਮਾ ਮਤਾ. ਸੋਭਨੋ ਧਮ੍ਮੋ ਅਸ੍ਸਾਤਿ ਸੁਧਮ੍ਮਾ, ਦੇਵਮਣ੍ਡਪੋ.
੨੨. ਤਸ੍ਸ ਸਕ੍ਕਸ੍ਸ ਰਥੋ ਵੇਜਯਨ੍ਤੋ ਨਾਮ. ਵੇਜਯਨ੍ਤੀਨਾਮਾਯ ਪਟਾਕਾਯ ਯੋਗਤੋ ਵੇਜਯਨ੍ਤੋ. ਤਸ੍ਸ ਸਕ੍ਕਸ੍ਸ ਸਾਰਥਿ ਸੂਤੋ ਮਾਤਲਿਨਾਮ. ਮਤਲਸ੍ਸ [ਮਾਤਲਾਯ (ਕ.)] ਅਪਚ੍ਚਂ ਮਾਤਲਿ, ਤਸ੍ਸ ਸਕ੍ਕਸ੍ਸ ਗਜੋ ਏਰਾਵਣੋ ਨਾਮ, ਇਰਾਵਣੋ ਸਮੁਦ੍ਦੋ, ਤਤ੍ਰਜਾਤੋ ਏਰਾਵਣੋ [ਇਰਾਵਤਿ ਸਮੁਦ੍ਦੇ ਜਾਤੋ (ਏਰਾਵਤੋ), ਸੇਸੇ ਅਣ… ਪਿਸੋਦਰਾਦਿਤ੍ਤਾ ਣਤ੍ਤੇ ਏਰਾਵਣੋ (ਚਿਨ੍ਤਾਮਣਿਟੀਕਾ)]. ਤਸ੍ਸ ਸਕ੍ਕਸ੍ਸ ਸਿਲਾਸਨਂ ਪਣ੍ਡੁਕਮ੍ਬਲੋ ਨਾਮ. ਪਣ੍ਡੁਵਣ੍ਣਕਮ੍ਬਲਸਦਿਸਤ੍ਤਾ ਪਣ੍ਡੁਕਮ੍ਬਲੋ. ਸਿਲਾ ਪਾਸਾਣੋ ਏਵ ਆਸਨਂ ਸਿਲਾਸਨਂ.
੨੩. ਤਸ੍ਸ ਸਕ੍ਕਸ੍ਸ ਪੁਤ੍ਤਾ ਸੁਵੀਰ, ਜਯਨ੍ਤਇਚ੍ਚਾਦਯੋ. ਅਤਿਸਯੇਨ ਸੂਰਤ੍ਤਾ ਸੁਵੀਰੋ. ਅਸੁਰੇ ਜਯਤੀਤਿ ਜਯਨ੍ਤੋ. ਤਸ੍ਸ ਸਕ੍ਕਸ੍ਸ ਪੋਕ੍ਖਰਣੀ ਨਨ੍ਦਾ ਨਾਮ ਭਵੇ. ਨਨ੍ਦੀਯਤੀਤਿ ਨਨ੍ਦਾ. ਪੋਕ੍ਖਰਂ ਵੁਚ੍ਚਤਿ ਪਦੁਮਂ, ਸਲਿਲਞ੍ਚ, ਤੇਹਿ ਸਤ੍ਤਾਨਂ ਮਨਂ ਅਤ੍ਤਾਨਂ ਨਯਤੀਤਿ ਪੋਕ੍ਖਰਣੀ, ਪੋਕ੍ਖਰੇਨ ਵਾ ਸੁਨ੍ਦਰੇਨ ਅਣ੍ਣੇਨ ਜਲੇਨ ਸਹਿਤਤ੍ਤਾ ਪੋਕ੍ਖਰਣ੍ਣੀ, ਸਾ ਏਵ ਪੋਕ੍ਖਰਣੀ. ਤਸ੍ਸ ਸਕ੍ਕਸ੍ਸ ਵਨਾਨਿ ਉਯ੍ਯਾਨਾਨਿ ਨਨ੍ਦਨਾਦੀਨਿ ਚਤ੍ਤਾਰਿ. ਨਨ੍ਦਯਤੀਤਿ ਨਨ੍ਦਨਂ. ਨਾਨਾਦਿਬ੍ਬਰੁਕ੍ਖੇਹਿ ਮਿਸ੍ਸਕਤ੍ਤਾ ਮਿਸ੍ਸਕਂ. ਨਾਨਾਲਤਾਹਿ ਵਲ੍ਲੀਹਿ ਚਿਤ੍ਤਤ੍ਤਾ ਚਿਤ੍ਤਲਤਾ, ਨਾਨਾਵਿਰਾਗਵਣ੍ਣਵਿਚਿਤ੍ਤਾਯ ਵਾ ਲਤਾਯ ਸਮਨ੍ਨਾਗਤਤ੍ਤਾ ਚਿਤ੍ਤਲਤਾ, ਦੇਵਤਾਨਂ ਵਾ ਚਿਤ੍ਤਾਸਾ ਏਤ੍ਥ ਅਤ੍ਥੀਤਿ ਚਿਤ੍ਤਾ, ਆਸਾਵਤੀ ਨਾਮ ਲਤਾ, ਸਾ ਯਸ੍ਸ ਅਤ੍ਥਿ, ਤਂ ਚਿਤ੍ਤਲਤਾ. ਦੇਵਤਾਨਂ ਵਾ ਚਿਤ੍ਤਂ ਲਨ੍ਤਿ ਗਣ੍ਹਨ੍ਤੀਤਿ ਚਿਤ੍ਤਲਾ, ਦਿਬ੍ਬਰੁਕ੍ਖਾ, ਤੇਸਂ ਸਮੂਹੋ ਚਿਤ੍ਤਲਤਾ, ਇਤ੍ਥਿਲਿਙ੍ਗੇਨ ਤਸ੍ਸ ਵਨਸ੍ਸ ਨਾਮਂ, ਯਥਾ ‘‘ਖੁਦ੍ਦਸਿਕ੍ਖਾ’’ਤਿ. ਫਾਰੁਸਕਾਨਿ ਯਤ੍ਥ ਸਨ੍ਤਿ, ਤਂ ਫਾਰੁਸਕਂ.
੨੪. ਅਸਨ੍ਯਾਦਿਤ੍ਤਯਂ ਤਸ੍ਸ ਸਕ੍ਕਸ੍ਸ ਆਯੁਧਂ. ਅਸ੍ਸਤੇ ਭੁਜ੍ਜਤੇ ਲੋਕਧਾਤੁਕਮਨੇਨਾਯੁਧੇਨਾਤਿ ਅਸਨਿ, ਅਯਂ ਅਸਨਿਸਦ੍ਦੋ ਦ੍ਵੀਸੁ ਪੁਮਿਤ੍ਥਿਲਿਙ੍ਗੇਸੁ ਵਤ੍ਤਤਿ. ਕੁਲਿਮ੍ਹਿ ਸਕ੍ਕਸ੍ਸ ਹਤ੍ਥੇ ਸੇਤਿ ਤਿਟ੍ਠਤੀਤਿ ਕੁਲਿਸਂ, ਕੁਲਿ ਹਤ੍ਥੋ ਭੁਜਾਦਲੋਤਿ ਹਿ ਤਿਕਣ੍ਡਸੇਸੋ [ਤਿਕਣ੍ਡਸੇਸ ੨.੬.੨੬]. ਕੁਯਂ ਵਾ ਪਥਵਿਯਂ ਲਿਸਤਿ ਤਨੁ ਭਵਤੀਤਿ ਕੁਲਿਸਂ. ਵਜ ਗਤਿਯਂ, ਵਜਤੇਵ ਨ ਪਟਿਹਞ੍ਞਤੇ ਯਸ੍ਸ ਗਮਨਂ ਕੇਨਚੀਤਿ ਵਜਿਰਂ, ਇਰਪਚ੍ਚਯੋ. ਵਜਿਰਸਹਚਰਣਤੋ ਕੁਲਿਸਸਦ੍ਦੋਪਿ ਪੁਨ੍ਨਪੁਂਸਕੇ. ਭਿਦੁਰਂ, ਪਵਿ, ਸਤਕੋਟਿ, ਸੁਰੁ, ਸਮ੍ਬੋ, ਦਮ੍ਭੋਲਿਇਚ੍ਚਾਦੀਨਿਪਿ ਵਜਿਰਸ੍ਸ ਨਾਮਾਨਿ. ਤਤ੍ਰ ਭਿਦੁਰਂ ਪੁਨ੍ਨਪੁਂਸਕੇ, ਪਵਿਆਦਯੋ ਪੁਮੇ.
ਰਮ੍ਭਾ ਚ ਅਲਮ੍ਬੁਸਾ ਚ ਇਚ੍ਚਾਦਿਕਾ ਦੇਵਿਤ੍ਥਿਯੋ ਅਚ੍ਛਰਾਯੋ ਨਾਮਾਤਿ ਵੁਤ੍ਤਾ. ਅਚ੍ਛਰਾਵਿਸੇਸਾ ਹਿ ਏਤਾ. ਅਚ੍ਛੋ ਨਿਮ੍ਮਲਵਣ੍ਣੋ ਏਤਾਸਮਤ੍ਥੀਤਿ ਅਚ੍ਛਰਾਯੋ. ‘‘ਅਪਸਰਾ’’ਤਿਪਿ ਏਤਾਸਮੇਵ ਸਾਮਞ੍ਞਸਞ੍ਞਾ. ਦੇਵਪੁਤ੍ਤਾਨਂ ਰਤਿਂ ਭਾਵੇਨ੍ਤਿ ਵਡ੍ਢੇਨ੍ਤੀਤਿ ਰਮ੍ਭਾ, ਰਂ ਕਾਮਗ੍ਗਿਂ ਭਨ੍ਤਿ ਦੀਪਯਨ੍ਤਿ ਜਾਲੇਨ੍ਤੀਤਿ ਵਾ ਰਮ੍ਭਾ, ਨਿਗ੍ਗਹੀਤਾਗਮੋ. ਕਾਮਰਤਿਵਸੇਨ ਦੇਵਪੁਤ੍ਤੇ ਅਤ੍ਤਨਿ ਵਸਾਪੇਤੁਂ ਅਲਂ ਸਮਤ੍ਥਾਤਿ ਅਲਮ੍ਬੁਸਾ, ਅਸ੍ਸੁਕਾਰੋ. ਦੇਵਾਨਂ ਦੇਵਪੁਤ੍ਤਾਨਂ, ਦੇਵੀਭੂਤਾ ਵਾ ਇਤ੍ਥਿਯੋ ਦੇਵਿਤ੍ਥਿਯੋ.
‘‘ਪਞ੍ਚਸਿਖੋ, ਹਾਹਾ, ਹੂਹੂ’’ਇਚ੍ਚਾਦਯੋ ਗਨ੍ਧਬ੍ਬਾ ਨਾਮ. ਪਞ੍ਚ ਸਿਖਾ ਚੂਲ਼ਾ ਯਸ੍ਸ ਸੋ ਪਞ੍ਚਸਿਖੋ. ‘‘ਹਾ’’ਤਿ ਅਨਨ੍ਦਿਤਂ ਧਨਿਂ [ਨਿਨ੍ਦਿਭਦ੍ਧਨਿਂ (ਚਿਨ੍ਤਾਮਣਿਟੀਕਾ)] ਜਹਤੀਤਿ ਹਾਹਾ. ‘‘ਹੂ’’ਤਿ ਗੀਤਵਿਸੇਸਸਦ੍ਦਂ ਹੂਯਤੇਤਿ ਹੂਹੂ. ਗਨ੍ਧਂ ਅਬ੍ਬਨ੍ਤਿ ਭੁਞ੍ਜਨ੍ਤੀਤਿ ਗਨ੍ਧਬ੍ਬਾ, ਗਾਯਨਂ ਵਾ ਧਮ੍ਮੋ ਏਤੇਸਂ ਗਨ੍ਧਬ੍ਬਾ, ਮ੍ਮਸ੍ਸ ਬ੍ਬੋ.
੨੫. ਵਿਮਾਨਾਦਿਦ੍ਵਯਂ ਵਿਮਾਨੇ. ਦੇਵਾਨਮਾਕਾਸੇ ਗਮਨਂ ਯੇਨ ਤਂ ਵਿਮਾਨਂ, ਵਿਗਤਂ [ਵਿਨਾ (ਕ.)] ਮਾਨਂ ਉਪਮਾਨਮਸ੍ਸ ਵਿਮਾਨਂ. ਵਿਹੇ ਆਕਾਸੇ ਗਚ੍ਛਤੀਤਿ ਬ੍ਯਮ੍ਹਂ, ਹਕਾਰਤੋ ਪੁਬ੍ਬੇ ਅਮਪਚ੍ਚਯੋ. ਏਤ੍ਥ ਚ ਵਿਮਾਨਬ੍ਯਮ੍ਹਸਦ੍ਦਾ ਦ੍ਵੇਪਿ ਅਨਿਤ੍ਥਿਯਂ ਪੁਨ੍ਨਪੁਂਸਕੇ ਵਤ੍ਤਨ੍ਤਿ.
ਪੀਯੁਸਾਦਿਤ੍ਤਯਂ ਅਮਤੇ. ਪੀਯਤੇਤਿ ਪੀਯੁਸਂ, ‘‘ਅਮਤਪਾ’’ਤਿ ਹਿ ਵੁਤ੍ਤਂ, ਉਸਪਚ੍ਚਯੋ [ਉਣਾਦਿ ੪.੭੬ ਣ੍ਵਾਦਿ ੨੧੫ ਸੁਤ੍ਤੇਸੁ ਪਨ ‘‘ਪੀਯੂਸ’’ਮਿਤਿ ਦਿਸ੍ਸਤਿ]. ‘‘ਪੇਯੁਸੋ’’ਤਿਪਿ ਨਾਮਮਸ੍ਸ. ਨ ਮਤਂ ਮਰਣਮਨੇਨ ਅਮਤਂ. ਸੁਖੇਨ ਧਯਨ੍ਤਿ ਪਿਵਨ੍ਤਿ ਤਂ ਇਤਿ ਸੁਧਾ. ਏਤ੍ਥ ਚ ਅਮਤਸਦ੍ਦੋ ਯਞ੍ਞਸੇਸਪੀਯੁਸਸਲਿਲਘਤਾਦੀਸੁ ਨਪੁਂਸਕੇ, ਧਨ੍ਵਨ੍ਤਰਿਦੇਵਾਦੀਸੁ ਪੁਲ੍ਲਿਙ੍ਗੇ, ਗਲ਼ੋਝਾਭਯਾਮਲਕ੍ਯਾਦੀਸੁ ਇਤ੍ਥਿਲਿਙ੍ਗੇਤਿ ਤੀਸੁ ਵਤ੍ਤਤਿ [ਅਮਤਂ ਯਞ੍ਞਸੇਸੇ ਚ, ਪੀਯੂਸੇ ਸਲਿਲੇ ਘਤੇ ਅਯਾਚਿਤੇ ਚ ਮੋਕ੍ਖੇ ਚ, ਨਾ ਧਨ੍ਵਨ੍ਤਰਿਦੇਵਸੁ ਅਮਤਾ ਮਾਗਧੀਪਥ੍ਯਾ ਗੁਲ਼ੁਚ੍ਯਾਮਲਕੀਸੁ ਚ (ਮੇਦਿਨੀਕੋਸ ੧੬ ੭੭-੮)], ਤਂਸਹਚਰਣਤੋ ਪੀਯੁਸਸਦ੍ਦੋਪਿ ਤੀਸੁ ਲਿਙ੍ਗੇਸੁ. ਸੁਧਾਸਦ੍ਦੋ ਪਨ ਅਮਤਨੁਹੀਲੇਪਾਦੀਸੁਪਿ ਨਿਚ੍ਚਮਿਤ੍ਥਿਲਿਙ੍ਗੋਵ [ਸੁਧਾ ਲੇਪੋ’ਮਤਂ ਨੁਹੀ (ਅਮਰ ੨੩.੧੦੧)].
ਸਿਨੇਰੁਆਦਿਪਞ੍ਚਕਂ ਪਬ੍ਬਤਰਾਜੇ. ਸਿਨਾ ਸੋਚੇਯ੍ਯੇ, ਸਿਨਾਤਿ ਸੋਚੇਤਿ ਦੇਵੇਤਿ ਸਿਨੇਰੁ, ਏਰੁਪਚ੍ਚਯੋ. ਮੀ ਹਿਂਸਾਯਂ, ਮਿਨਾਤਿ ਹਿਂਸਤਿ ਸਬ੍ਬੇ ਪਬ੍ਬਤੇ ਅਤ੍ਤਨੋ ਉਚ੍ਚਤਰਟ੍ਠੇਨਾਤਿ ਮੇਰੁ, ਰੁਪਚ੍ਚਯੋ. ਤਿਦਿਵਾਨਂ ਦ੍ਵਿਨ੍ਨਂ ਦੇਵਲੋਕਾਨਂ ਆਧਾਰੋ ਪਤਿਟ੍ਠਾਤਿ ਤਿਦਿਵਾਧਾਰੋ. ਦੇਵੇ ਨਯਤੀਤਿ ਨੇਰੁ. ਸੁਮੇਰੂਤਿ ਉਪਸਗ੍ਗੇਨ ਨਾਮਂ ਵਡ੍ਢਿਤਂ. ਹੇਮਦ੍ਦਿ, ਰਤਨਸਾਨੁ, ਸੁਰਾਲਯਾਦੀਨਿਪਿ ਪਬ੍ਬਤਰਾਜਸ੍ਸ ਨਾਮਾਨਿ.
੨੬. ਯੁਗਨ੍ਧਰਾਦੀਨਿ ਸਿਨੇਰੁਸ੍ਸ ਪਰਿਵਾਰਭੂਤਾਨਂ ਸਤ੍ਤਨ੍ਨਂ ਪਰਿਭਣ੍ਡਪਬ੍ਬਤਾਨਂ ਨਾਮਾਨਿ. ਚਨ੍ਦਸੂਰਿਯਸਙ੍ਖਾਤਂ ਯੁਗਂ ਧਾਰੇਤਿ ਤਦੁਬ੍ਬੇਧਮਗ੍ਗਚਾਰਿਤ੍ਤਾਤਿ ਯੁਗਨ੍ਧਰੋ. ਈਸਂ ਮਹਿਸ੍ਸਰਂ ਧਾਰੇਤਿ ਤਸ੍ਸ ਨਿਵਾਸਟ੍ਠਾਨਤ੍ਤਾਤਿ ਈਸਧਰੋ. ਕਰਵੀਰਾ ਅਸ੍ਸਮਾਰਕਾ ਬਹਵੋ ਏਤ੍ਥ ਸਨ੍ਤੀਤਿ ਕਰਵੀਰੋ, ਕੇ ਵਾ ਮਯੂਰਾ ਰਵਨ੍ਤਿ ਏਤ੍ਥਾਤਿ ਕਰਵੀਰੋ, ‘‘ਕਰਵੀਕੋ’’ਤਿਪਿ ਪਾਠੋ, ਇਧਾਪਿ ਪਚ੍ਛਿਮੋਯੇਵਤ੍ਥੋ, ਕਰਵੀਕਸਕੁਣਾ ਵਾ ਬਹਵੋ ਏਤ੍ਥ ਸਨ੍ਤੀਤਿ ਕਰਵੀਕੋ. ਸੁਦਸ੍ਸਨਾ ਓਸਧਿਵਿਸੇਸਾ ਬਹੁਕਾ ਏਤ੍ਥ ਸਨ੍ਤੀਤਿ ਸੁਦਸ੍ਸਨੋ, ਸੁਖੇਨ ਪਸ੍ਸਿਤਬ੍ਬਤ੍ਤਾ ਵਾ ਸੁਦਸ੍ਸਨੋ, ਸੁਨ੍ਦਰਂ ਵਾ ਦਸ੍ਸਨਂ ਏਤ੍ਥਾਤਿ ਸੁਦਸ੍ਸਨੋ. ਪਞ੍ਚਨ੍ਨਂ ਪਬ੍ਬਤਚਕ੍ਕਾਨਂ ਨੇਮਿਸਦਿਸਂ ਕਤ੍ਵਾ ਅਤ੍ਤਾਨਂ ਧਾਰੇਤੀਤਿ ਨੇਮਿਨ੍ਧਰੋ, ਨੇਮਿਭਾਵੇਨ ਵਾ ਧਾਰੇਤਬ੍ਬੋ ਉਪਲਕ੍ਖੇਤਬ੍ਬੋਤਿ ਨੇਮਿਨ੍ਧਰੋ, ਨੇਮਿਂਵਾ ਰਥਦ੍ਦੁਮਂ ਧਾਰੇਤਿ ਯੇਭੁਯ੍ਯੇਨਾਤਿ ਨੇਮਿਨ੍ਧਰੋ. ਵਿਨਤਾ ਨਾਮ ਸੁਪਣ੍ਣਮਾਤਾ, ਤਸ੍ਸਾ ਨਿਵਾਸਟ੍ਠਾਨਤ੍ਤਾ ਵਿਨਤਕੋਤਿ ਚਿਨ੍ਤਾਮਣਿਟੀਕਾ. ਵਿਤ੍ਥਿਣ੍ਣਾ ਵਾ ਨਤਾ ਨਦਿਯੋ ਏਤ੍ਥਾਤਿ ਵਿਨਤਕੋ. ਅਸ੍ਸਕਣ੍ਣਾ ਸਜ੍ਜਦੁਮਾ ਬਹਵੋ ਏਤ੍ਥ ਸਨ੍ਤੀਤਿ ਅਸ੍ਸਕਣ੍ਣੋ, ਅਸ੍ਸਕਣ੍ਣਸਦਿਸਕੂਟਤ੍ਤਾ ਵਾ ਅਸ੍ਸਕਣ੍ਣੋ. ਕੁਲਾਚਲਾਤਿ ਏਤੇ ਸਿਨੇਰੁਆਦਯੋ ਅਟ੍ਠ ਪਬ੍ਬਤਾ ਅਚਲਸਙ੍ਖਾਤਾਨਂ ਪਬ੍ਬਤਾਨਂ ਕੁਲਾਨਿ ਯੋਨਿਯੋ ਪਭਵਾ, ਏਤੇ ਚ ਸਿਨੇਰੁਆਦਯੋ ਅਨੁਪੁਬ੍ਬਸਮੁਗ੍ਗਤਾ, ਸਬ੍ਬਬਾਹਿਰੋ ਚੇਤ੍ਥ ਅਸ੍ਸਕਣ੍ਣੋ. ਨਿਮਿਜਾਤਕੇ ਪਨ –
‘‘ਸੁਦਸ੍ਸਨੋ ਕਰਵੀਕੋ, ਈਸਧਰੋ ਯੁਗਨ੍ਧਰੋ;
ਨੇਮਿਨ੍ਧਰੋ ਵਿਨਤਕੋ, ਅਸ੍ਸਕਣ੍ਣੋ ਗਿਰਿ ਬ੍ਰਹਾ’’ਤਿ [ਜਾ. ੨.੨੨.੫੬੮].
ਵਤ੍ਵਾ ਸਿਨੇਰੁਂ ਪਰਿਕ੍ਖਿਪਿਤ੍ਵਾ ਅਸ੍ਸਕਣ੍ਣੋ ਨਾਮ ਪਬ੍ਬਤੋ ਪਤਿਟ੍ਠਿਤੋ, ਤਂ ਪਰਿਕ੍ਖਿਪਿਤ੍ਵਾ ਵਿਨਤਕੋ ਨਾਮ ਪਬ੍ਬਤੋਤਿ ਏਵਮਞ੍ਞੋਯੇਵਾਨੁਕ੍ਕਮੋ ਕਥਿਤੋ. ਕਿਞ੍ਚਾਪਿ ਕਥਿਤੋ, ਨਾਮਭੇਦਮਤ੍ਤਕਤੋਯੇਵ ਪਨੇਤ੍ਥ ਭੇਦੋ, ਨਾਤ੍ਥਭੇਦਕਤੋਤਿ ਦਟ੍ਠਬ੍ਬਂ.
੨੭. ਆਕਾਸਵਾਹੀਗਙ੍ਗਾਯਂ ਮੇਰੁਸਿਙ੍ਗੋਬ੍ਭਵਾਯਂ ਮਨ੍ਦਾਕਿਨ੍ਯਾਦਿਨਾਮਤ੍ਤਯਂ. ਮਨ੍ਦਂ ਅਕਿਤੁਂ ਸੀਲਮਸ੍ਸਾਤਿ ਮਨ੍ਦਾਕਿਨੀ. ਆਕਾਸੇ ਸਨ੍ਦਮਾਨਾ ਗਙ੍ਗਾ ਆਕਾਸਗਙ੍ਗਾ. ਸੁਰਾਨਂ ਦੇਵਾਨਂ ਨਦੀ ਸੁਰਨਦੀ. ਸੁਰਦੀਘਿਕਾਤਿਪਿ ਏਤਿਸ੍ਸਾ ਨਾਮਂ.
੨੮. ਕੋਵਿਲ਼ਾਰਾਦਿਤ੍ਤਯਂ ‘‘ਫਲਹਰੋ’’ਤਿਖ੍ਯਾਤੇ ਪਾਰਿਚ੍ਛਤ੍ਤਕੇ. ਕੁਂ ਪਥਵਿਂ ਵਿਦਾਰਯਤਿ ਮੂਲੇਨਾਤਿ ਕੋਵਿਲ਼ਾਰੋ,ਦਸ੍ਸ ਲ਼ੋ. ਪਰਿ ਸਮਨ੍ਤਤੋ ਛਤ੍ਤਂ ਵਿਯ ਤਿਟ੍ਠਤੀਤਿ ਪਾਰਿਚ੍ਛਤ੍ਤਕੋ. ਪਾਰਿਨੋ ਸਮੁਦ੍ਦਸ੍ਸ ਜਾਤੋ ਅਪਚ੍ਚਂ ਪਾਰਿਜਾਤਕੋ, ਸਕਤ੍ਥੇ ਕੋ. ਪਾਰਿਭਦ੍ਦੋ, ਨਿਮ੍ਬਤਰੁ, ਮਨ੍ਦਾਰੋਇਚ੍ਚਾਦੀਨਿਪਿ ਪਾਰਿਚ੍ਛਤ੍ਤਕਸ੍ਸ ਨਾਮਾਨਿ.
ਕਪ੍ਪਰੁਕ੍ਖੋ ਚ ਸਨ੍ਤਾਨੋ ਚ ਆਦਿਨਾ ਮਨ੍ਦਾਰੋ ਪਾਰਿਜਾਤਕੋ ਚ ਹਰਿਚਨ੍ਦਨਞ੍ਚ ਏਤੇ ਪਞ੍ਚ ਦੇਵਦ੍ਦੁਮਾ [ਅਮਰ ੧.੫੩] ਦੇਵਤਰਵੋ ਦੇਵਭੂਮੀਸ੍ਵੇਵ ਸਮ੍ਭਵਤੋ. ਕਪ੍ਪੋ ਸਙ੍ਕਪ੍ਪਿਤੋ ਅਤ੍ਥੋ, ਤਸ੍ਸ ਰੁਕ੍ਖੋ ਜਞ੍ਞਜਨਕਭਾਵੇਨ ਸਮ੍ਬਨ੍ਧੋ, ਕਪ੍ਪਂ ਵਾ ਠਿਤੋ ਰੁਕ੍ਖੋ ਕਪ੍ਪਰੁਕ੍ਖੋ. ਤਨਨਂ ਤਾਨੋ, ਭਾਵੇ ਣੋ. ਗਨ੍ਧਸ੍ਸ ਸਮ੍ਮਾ ਤਾਨੋ ਅਸ੍ਸੇਤਿ ਸਨ੍ਤਾਨੋ, ਸਿਰੀਸਰੁਕ੍ਖੋ. ਮਨ੍ਦਨ੍ਤੇ ਮੋਦਨ੍ਤੇ ਦੇਵਾ ਅਨੇਨਾਤਿ ਮਨ੍ਦਾਰੋ, ਆਰਪਚ੍ਚਯੋ. ਹਰਿਮਿਨ੍ਦਂ ਚਦਯਤਿ ਸੁਖਯਤੀਤਿ ਹਰਿਚਨ੍ਦਨਂ. ਏਤੇ ਪਞ੍ਚ ਦੇਵਤਰਵੋ ਅਮਰਕੋਸਨਯੇਨ ਵੁਤ੍ਤਾ, ਸੋਗਤਨਯੇਨ ਪਨ ਸਤ੍ਤ ਦੇਵਤਰਵੋ. ਵੁਤ੍ਤਞ੍ਚ –
‘‘ਪਾਟਲੀ ਸਿਮ੍ਬਲੀ ਜਮ੍ਬੂ, ਦੇਵਾਨਂ ਪਾਰਿਛਤ੍ਤਕੋ;
ਕਦਮ੍ਬੋ ਕਪ੍ਪਰੁਕ੍ਖੋ ਚ, ਸਿਰੀਸੇਨ ਭਵਤਿ ਸਤ੍ਤਮ’’ਨ੍ਤਿ [ਧ. ਸ. ਅਟ੍ਠ. ੫੮੪; ਸਾਰਤ੍ਥ. ਟੀ. ੧.੧ਵੇਰਞ੍ਜਕਣ੍ਡਵਣ੍ਣਨਾ].
ਤਤ੍ਥ ਪਾਟਲੀਤਿ ਚਿਤ੍ਰਪਾਟਲੀ, ਸਾ ਅਸੁਰਲੋਕੇ ਤਿਟ੍ਠਤਿ. ਤਥਾ ਸਿਮ੍ਬਲੀ ਗਰੁਲ਼ੇਸੁ, ਜਮ੍ਬੂ ਜਮ੍ਬੁਦੀਪੇ, ਪਾਰਿਚ੍ਛਤ੍ਤਕੋ ਤਾਵਤਿਂਸੇ, ਕਦਮ੍ਬੋ ਅਪਰਗੋਯਾਨੇ. ਕਪ੍ਪਰੁਕ੍ਖੋ ਉਤ੍ਤਰਕੁਰੂਸੁ, ਸਿਰੀਸੋ ਪੁਬ੍ਬਵਿਦੇਹੇਤਿ. ਏਤੇ ਸਤ੍ਤ ਦੇਵਾਨਮੇਵ ਪਤਿਟ੍ਠਾਨਭੂਮੀਸੁ ਸਮ੍ਭਵਤੋ ਦੇਵਤਰਵੋਤ੍ਵੇਵ ਵੁਚ੍ਚਨ੍ਤਿ.
ਸਗ੍ਗਵਣ੍ਣਨਾ ਸਮਤ੍ਤਾ.
੨੯. ਪੁਬ੍ਬਪਚ੍ਛਿਮਉਤ੍ਤਰਾ ਦਿਸਾ ਯਥਾਕ੍ਕਮਂ ਪਾਚੀ ਪਤੀਚੀ ਉਦੀਚੀ ਨਾਮ ਭਵਨ੍ਤਿ. ਪਠਮਂ ਪਾਤੋ ਅਨ੍ਚਤਿ ਰਵਿ ਯਸ੍ਸਂ ਸਾ ਪਾਚੀ, ਨਕਾਰਲੋਪੋ. ਪਚ੍ਛਾ ਦਿਵਾਵਸਾਨੇ ਅਨ੍ਚਤਿ ਰਵਿ ਯਸ੍ਸਂ ਸਾ ਪਤੀਚੀ. ਉਦ੍ਧਂ ਅਨ੍ਚਤਿ ਰਵਿ ਯਸ੍ਸਂ ਸਾ ਉਦੀਚੀ, ਯਸ੍ਸਂ ਵਾ ਸੀਤਵਿਯੋਗਂ ਦਤ੍ਵਾ ਅਨ੍ਚਤਿ ਸਾ ਉਦੀਚੀ, ਵਿਯੋਗਤ੍ਥਵਾਚਕੋ ਹੇਤ੍ਥ ਉਕਾਰੋ, ਦਸਦ੍ਦੋ ਦਾਨਤ੍ਥੋ. ਅਥ ਵਾ ਪਨ੍ਚਤਿ ਪੁਬ੍ਬਭਾਵਮਾਪਜ੍ਜਤੇਤਿ ਪਾਚੀ. ਪਤਿਨ੍ਚਤਿ ਪਚ੍ਛਾਭਾਵਮਾਪਜ੍ਜਤੇਤਿ ਪਤੀਚੀ. ਉਦਞ੍ਚਤਿ ਸੀਤਵਿਯੋਗਦਾਨਤ੍ਤਮਾਪਜ੍ਜਤੇਤਿ ਉਦੀਚੀ. ਏਤ੍ਥ ਚ ਉਦੀਚੀਸਹਚਰਣਤੋ ਪਤੀਚੀ ਇਤ੍ਥਿਯਂ, ਪਤੀਚੀਸਹਚਰਣਤੋ ਪਾਚੀ ਇਤ੍ਥਿਯਂ ਵਤ੍ਤਤੀਤਿ ਦਟ੍ਠਬ੍ਬਂ. ਏਵਂ ਤਂਤਂਸਹਚਰਣਭਾਵੇਨ ਤਸ੍ਸ ਤਸ੍ਸ ਤਂਤਂਲਿਙ੍ਗਤ੍ਤਮੁਪਨੇਯ੍ਯੁਂ. ਪੁਬ੍ਬਪਚ੍ਛਿਮਉਤ੍ਤਰਾਤਿ ਸਬ੍ਬਨਾਮਸ੍ਸ ਵੁਤ੍ਤਮਤ੍ਤੇ ਪੁਮ੍ਭਾਵੋ.
ਦਕ੍ਖਿਣਾਦਿਦ੍ਵਯਂ ਦਕ੍ਖਿਣਦਿਸਾਯਂ. ਮਜ੍ਝੇ ਅਪਾਯਂ ਅਞ੍ਚਤਿ ਯਸ੍ਸਂ ਰਵਿ, ਸਾ ਅਪਾਚੀ. ਮਜ੍ਝਤ੍ਥੋਯਂ ਅਪਸਦ੍ਦੋ, ਯਥਾ ‘‘ਅਪਦਿਸ’’ਨ੍ਤਿ, ‘‘ਅਵਾਚੀ’’ਤਿਪਿ ਪਾਠੋ, ਅਵਪੁਬ੍ਬੋ ਅਞ੍ਚ ਅਧੋਮੁਖੀਭਾਵੇ. ਅਵਞ੍ਚਤਿ ਅਧੋਮੁਖੀ ਭਵਤਿ ਯਸ੍ਸਂ ਰਵਿ, ਸਾ ਅਵਾਚੀ. ਉਣ੍ਹਾਦਿਕੇ ਵਾ ਤਬ੍ਬਿਯੋਗੇ ਕਰੋਨ੍ਤੋ ਯਸ੍ਸਂ ਰਵਿ ਅਞ੍ਚਤਿ, ਸਾ ਅਵਾਚੀ. ਵਿਦਿਸਾਦਿਦ੍ਵਯਂ ਦਿਸਾਮਜ੍ਝੇ. ਦਿਸਾਹਿ ਵਿਨਿਗ੍ਗਤਾ ਵਿਦਿਸਾ. ਦਿਸਾਨਮਨੁਰੂਪਾ, ਅਨੁਵਤ੍ਤਕਾ ਵਾ ਦਿਸਾ ਅਨੁਦਿਸਾ. ਅਪਦਿਸਨ੍ਤਿਪਿ ਵਿਦਿਸਾਯ ਨਾਮਂ [ਨਪੁਂਸਕਾਬ੍ਯਯਂ ਤ੍ਵ’ਪਦਿਸਂ (ਅਮਰ ੩.੬)].
੩੦. ਏਰਾਵਤਾਦਯੋ ਅਟ੍ਠ ਗਜਾ ਪੁਬ੍ਬਾਦੀਨਂ ਦਿਸਾਨਂ ਰਕ੍ਖਣਤੋ ਦਿਸਾਗਜਾ ਨਾਮ, ਪੁਣ੍ਡਰੀਕਂ ਨਾਮ ਸਿਤਮ੍ਬੋਜਂ, ਤਂਸਦਿਸਵਣ੍ਣਤਾਯ ਪੁਣ੍ਡਰੀਕੋ. ਰਸ੍ਸਸਰੀਰਤਾਯ ਵਾਮਨੋ. ਕੁਯਂ ਪਥਵਿਯਂ ਮੋਦਤੇ ਕੁਮੁਦੋ. ਅਞ੍ਜਨਵਣ੍ਣਤਾਯ ਅਞ੍ਜਨੋ. ਪੁਪ੍ਫਾ ਪਕਾਸਮਾਨਾ ਦਨ੍ਤਾ ਅਸ੍ਸ ਪੁਪ੍ਫਦਨ੍ਤੋ. ਸਬ੍ਬਭੂਮਿਯਂ ਚਰਤੀਤਿ ਸਬ੍ਬਭੁਮ੍ਮੋ, ਸਬ੍ਬਭੁਮ੍ਮੋ ਵਾ ਚਕ੍ਕਵਤ੍ਤੀ ਤਸ੍ਸਾਨੁਰੂਪਤ੍ਤਾ ਸਬ੍ਬਭੁਮ੍ਮੋ. ਸੋਭਨਦਨ੍ਤਾਵਯਵਤ੍ਤਾ ਸੁਪ੍ਪਤੀਕੋ [ਸੋਭਨਾ ਪਤੀਕਾ ਅਵਯਵਾ’ਸ੍ਸ ਸੁਪ੍ਪਤੀਕੋ (ਕ.)]. ‘‘ਸੁਪ੍ਪਤੀਕੋ ਸੋਭਨਙ੍ਗੇ, ਭਵੇ ਈਸਾਨਦਿਸਾਗਜੇ’’ਤਿ ਹਿ ਨਾਨਤ੍ਥਸਙ੍ਗਹੇ ਵੁਤ੍ਤਂ. ਏਰਾਵਤਾਦੀਨਂ ਦਿਸਾਨਂ ਸਮ੍ਬਨ੍ਧਕਥਨਂ ਪਾਚੀਵਾਰਣਾਦਿਨਾਮਸੂਚਨਤ੍ਥਂ, ਏਸਂ ਕਰੇਣੁਯੋ ਪਨ –
ਅਬ੍ਭਮੁ ਕਪਿਲਾ ਚੇਵ, ਪਿਙ੍ਗਲਾ ਨੁਪਮਾ ਮਤਾ;
ਤਮ੍ਬਕਣ੍ਣੀ ਸੁਭਦਨ੍ਤੀ, ਅਙ੍ਗਨਾ ਅਞ੍ਜਨਾਵਤੀ [ਅਮਰ ੩.੫].
੩੧. ਧਤਰਟ੍ਠਾਦਿਦ੍ਵਯਂ ਪੁਬ੍ਬਦਿਸਾਧਿਪਤਿਦੇਵੇ. ਧਾਰਿਤਂ ਰਟ੍ਠਮਨੇਨਾਤਿ ਧਤਰਟ੍ਠੋ, ਰਸ੍ਸ ਤੋ. ਪਞ੍ਚਸਿਖਾਦੀਨਂ ਗਨ੍ਧਬ੍ਬਾਨਂ ਅਧਿਪੋ ਨਾਯਕੋ ਗਨ੍ਧਬ੍ਬਾਧਿਪੋ. ਕੁਮ੍ਭਣ੍ਡਸਾਮ੍ਯਾਦਿਦ੍ਵਯਂ ਦਕ੍ਖਿਣਦਿਸਾਧਿਪਤਿਦੇਵੇ. ਕੁਮ੍ਭਣ੍ਡਾਨਂ ਸਾਮਿ ਨਾਯਕੋ ਕੁਮ੍ਭਣ੍ਡਸਾਮਿ. ਵਿਰੁਹਨ੍ਤਿ ਵੁਡ੍ਢਿਂ ਵਿਰੂਲ਼੍ਹਿਮਾਪਜ੍ਜਨ੍ਤਿ ਏਤਸ੍ਮਿਂ ਕੁਮ੍ਭਣ੍ਡਾਤਿ ਵਿਰੂਲ਼੍ਹਕੋ. ਵਿਰੂਲ਼੍ਹਂ ਵੁਡ੍ਢਿਪ੍ਪਤ੍ਤਂ ਵਾ ਕਂ ਸੁਖਮੇਤਸ੍ਸਾਤਿ ਵਿਰੂਲ਼੍ਹਕੋ. ਵਿਰੂਪਕ੍ਖਾਦਿਦ੍ਵਯਂ ਪਚ੍ਛਿਮਦਿਸਾਧਿਪਤਿਦੇਵੇ. ਵਿਰੂਪਾਨਿ ਅਕ੍ਖੀਨਿ ਯਸ੍ਸ ਵਿਰੂਪਕ੍ਖੋ, ਵਿਵਿਧਸਣ੍ਠਾਨਾਨਿ ਅਕ੍ਖੀਨਿ ਯਸ੍ਸ ਵਾ ਵਿਰੂਪਕ੍ਖੋ. ਨਾਗਾਨਂ ਅਧਿਪਤਿ ਨਾਗਾਧਿਪਤਿ.
੩੨. ਯਕ੍ਖਾਧਿਪਾਦਿਚਤੁਕ੍ਕਂ ਕੁਵੇਰੇ. ਆਲ਼ਵਕਾਦਿਯਕ੍ਖਾਨਂ ਅਧਿਪੋ ਯਕ੍ਖਾਧਿਪੋ. ਵਿਸ੍ਸਵਣਸ੍ਸ ਅਪਚ੍ਚਂ ਵੇਸ੍ਸਵਣੋ. ਤਿਚਰਣਾਟ੍ਠਦਾਠਾਭਯਾਨਕਮਤ੍ਥਿਤਾਯ ਕੁਚ੍ਛਿਤਂ ਵੇਰੋ ਸਰੀਰਮਸ੍ਸ ਕੁਵੇਰੋ. ਖੁਦ੍ਦੇਨਾਸ੍ਸ ਨਰਯੁਤ੍ਤਾ ਸਿਵਿਕਾਰਥੇਤਿ ਨਰੋ ਵਾਹਨਮਸ੍ਸ ਨਰਵਾਹਨੋ. ਤ੍ਯਮ੍ਬਕਸਖੋ, ਯਕ੍ਖਰਾਜੋ, ਗੁਯ੍ਹਕੇਸਰੋ, ਮਨੁਸ੍ਸਧਮ੍ਮਾ, ਧਨਦੋ, ਰਾਜਰਾਜੋ, ਧਨਾਧਿਪੋ, ਕਿਨ੍ਨਰੇਸੋ, ਯਕ੍ਖੋ, ਏਕਪਿਙ੍ਗਲੋ, ਸਿਰਿਦੋ, ਪੁਞ੍ਞਜਨੇਸ੍ਸਰੋਇਚ੍ਚਾਦੀਨਿਪਿ ਕੁਵੇਰਸ੍ਸ ਨਾਮਾਨਿ.
ਅਸ੍ਸ ਕੁਵੇਰਸ੍ਸ ਪੁਰੀ ‘‘ਅਲ਼ਕਾ, ਅਲ਼ਕਮਨ੍ਦਾ’’ਤਿ ਚ ਵੁਚ੍ਚਤਿ. ਅਲਂ ਵਿਭੂਸਨੇ, ਅਲਂ ਵਿਭੂਸਨਂ ਕਰੋਤੀਤਿ ਅਲਕਾ, ਸਾ ਏਵ ਅਲ਼ਕਾ. ਅਲ਼ਕਾ ਏਵ ਮੋਦਕਰਣਤੋ ਅਲ਼ਕਮਨ੍ਦਾ, ਉਕਾਰਸ੍ਸ ਅਕਾਰੋ, ਨਾਗਮੋ ਚ. ਕੇਲਾਸੋਤਿਪਿ ਤਸ੍ਸ ਨਾਮਂ, ਕੇਲਿ ਪਯੋਜਨਂ ਅਸ੍ਸ ਕੇਲੋ, ਆਸਤੇ ਅਸ੍ਮਿਨ੍ਤਿ ਆਸੋ, ਕੇਲੋ ਚ ਸੋ ਆਸੋ ਚੇਤਿ ਕੇਲਾਸੋ, ਕਣ੍ਹਸਪ੍ਪਾਦਿ ਵਿਯ ਨਿਚ੍ਚਂ ਕਮ੍ਮਧਾਰਯੋ. ਅਸ੍ਸ ਕੁਵੇਰਸ੍ਸ ਪਹਰਣਂ ਆਯੁਧਂ ਗਦਾ, ਗਂ ਵੁਚ੍ਚਤਿ ਵਜਿਰਂ, ਤਂ ਵਿਯ ਦੁਕ੍ਖਂ ਦਦਾਤੀਤਿ ਗਦਾ. ਇਮੇ ਚਤ੍ਤਾਰੋ ਯਥਾਵੁਤ੍ਤਾ ਧਤਰਟ੍ਠਾਦਯੋ ਦੇਵਾ ਕਮਤੋ ਪੁਬ੍ਬਾਦੀਨਂ ਚਤੁਦ੍ਦਿਸਾਨਂ ਅਧਿਪਾ ਅਧਿਪਤਯੋ ਨਾਮ. ਅਮਰਕੋਸੇ ਪਨ –
‘‘ਇਨ੍ਦੋ ਅਗ੍ਗਿ ਪਿਤੁਪਤਿ, ਨੇਰਿਤੋ ਵਰੁਣੋ’ਨਿਲੋ;
ਕੁਵੇਰੋ ਈਸੋ ਪਤਯੋ, ਪੁਬ੍ਬਾਦੀਨਂ ਇਮੇ ਕਮਾ.
ਰਵਿ ਸੁਕ੍ਕੋ ਮਹੀਸੂਨੁ, ਤਮੋ ਚ ਭਾਨੁਜੋ ਵਿਧੁ;
ਬੁਧੋ ਸੁਰਗੁਰੁ ਚੇਤਿ, ਦਿਸਾਧਿਪਾ ਤਥਾ ਗਹਾ’’ਤਿ [ਅਮਰ ੩.੩-੪].
ਅਞ੍ਞੇਯੇਵ ਦਿਸਾਧਿਪਤਯੋ ਕਥਿਤਾ, ਇਨ੍ਦਰਵਿਮਾਦੀਨਞ੍ਚ ਦਿਸਾਧਿਪਚ੍ਚਕਥਨਂ ਪਾਝਾਦੀਨਂ ਇਨ੍ਦਦਿਸਾਰਵਿਦਿਸਾਦਿਨਾਮਸੂਚਨਫਲਂ.
੩੩-੩੪. ਜਾਤਵੇਦਾਦ੍ਯਟ੍ਠਾਰਸਕਂ ਅਗ੍ਗਿਮ੍ਹਿ. ਜਾਤੇ ਉਪ੍ਪਨ੍ਨੇ ਵਿਨ੍ਦਤਿ ਘਾਤਯਤੀਤਿ ਜਾਤਵੇਦੋ. ਅਨ੍ਧਕਾਰੇ ਜਾਤਂ ਵਿਜ੍ਜਮਾਨਂ ਵਿਨ੍ਦਤਿ ਲਭਤਿ, ਵਿਦਤਿ ਜਾਨਾਤਿ ਏਤੇਨਾਤਿ ਵਾ ਜਾਤਵੇਦੋ, ਜਨਨਂ ਜਾਤਂ ਵੇਦੋ ਪਾਕਟੋ ਯਸ੍ਸ ਵਾ ਸੋ ਜਾਤਵੇਦੋ. ਸਿਖਾ ਵੁਚ੍ਚਤਿ ਜਾਲਾ, ਤਾਯ ਯੋਗਤੋ ਸਿਖੀ. ਜੋਤਤਿ ਦਿਪ੍ਪਤੀਤਿ ਜੋਤਿ. ਪੁਨਾਤੀਤਿ ਪਾਵਕੋ, ਣ੍ਵੁ. ਦਹਤੀਤਿ ਦਹਨੋ. ਅਨਨ੍ਤਿ ਪਾਲੇਨ੍ਤ੍ਯਨੇਨੇਤਿ ਅਨਲੋ, ਅਲਪਚ੍ਚਯੋ. ਵੇਦੇ ਹੁਤਂ ਵਹਤਿ ਪਾਪਯਤਿ, ਸਯਂ ਵਾ ਲਭਤੇਤਿ ਹੁਤਾਵਹੋ. ਅਚ੍ਚਿ ਵੁਚ੍ਚਤਿ ਜਾਲਾ, ਤਾਯ ਯੋਗਤੋ ਅਚ੍ਚਿਮਾ. ਧੂਮੋ ਕੇਤੁ ਧਜੋ ਯਸ੍ਸਾਤਿ ਧੂਮਕੇਤੁ. ਅਜਤਿ ਜਲਮਾਨੋ ਕੁਟਿਲਂ ਗਚ੍ਛਤੀਤਿ ਅਗ੍ਗਿ, ਇ. ਗੋ ਰਂਸਿ ਏਤਸ੍ਸਤ੍ਥੀਤਿ ਗਿਨਿ, ਅਸ੍ਸਤ੍ਥ੍ਯਤ੍ਥੇ ਇਨਿ, ਅਗ੍ਗਿਨੀਤਿਪਿ ਪਾਠੋ, ਸੋ ਅਗ੍ਗਿਸਦਿਸੋ. ਭਾਨੁ ਪਭਾ ਯਸ੍ਸਤ੍ਥਿ, ਸੋ ਭਾਨੁਮਾ. ਤੇਜੇਤਿ ਸੇਸਭੂਤੋਪਾਦਾਰੂਪਾਨੀਤਿ ਤੇਜੋ. ਧੂਮੋ ਸਿਖਾ ਚੂਲ਼ਾ ਯਸ੍ਸ ਧੂਮਸਿਖੋ. ਵਾਯੁ ਸਖਾ ਅਸ੍ਸ ਵਾਯੁਸਖੋ. ਦਹਿਤ੍ਵਾ [ਦਹਤੋ (ਕ.)] ਗਚ੍ਛਤੋ ਕਣ੍ਹਾ ਵਤ੍ਤਨੀ ਮਗ੍ਗੋ ਯਸ੍ਸ ਕਣ੍ਹਵਤ੍ਤਨੀ. ਵਿਸ੍ਸਾਨਰਸ੍ਸ ਇਸਿਨੋ ਅਪਚ੍ਚਂ ਵੇਸ੍ਸਾਨਰੋ. ਹੁਤਂ ਹਵਿਂ ਅਸਤਿ ਭੁਞ੍ਜਤੀਤਿ ਹੁਤਾਸੋ. ਧਨਞ੍ਜਯੋ, ਜਲਨੋ, ਆਸਯਾਸੋ, ਰੋਹਿਤਸ੍ਸੋ, ਸਤ੍ਤਾਚ੍ਚਿ, ਸੁਕ੍ਕੋ, ਚਿਤ੍ਰਭਾਨੁ, ਵਿਭਾਵਸੁ, ਸੁਚਿਇਚ੍ਚਾਦੀਨਿਪਿ ਅਗ੍ਗਿਸ੍ਸ ਨਾਮਾਨਿ.
ਸਿਖਾਦਿਤ੍ਤਯਂ ਅਗ੍ਗਿਜਾਲਾਯਂ. ਸਿਨੋਤਿ ਨਿਸਾਨੀ ਭਵਤੀਤਿ ਸਿਖਾ, ‘‘ਸਿ ਨਿਸਾਨੇ’’ਤਿ ਕਾਤਨ੍ਤ ਧਾਤੁ, ਖਪਚ੍ਚਯੋ. ਜਲਤੀਤਿ ਜਾਲਾ. ਅਚ੍ਚਤੇ ਪੁਜ੍ਜਤੇ ਅਨੇਨੇਤਿ ਅਚ੍ਚਿ. ਸਿਖਾ ਜਾਲਾ ਭਿਯ੍ਯੋ ਰੂਪਨ੍ਤਰਾ ਇਤ੍ਥਿਯਂ, ਅਚ੍ਚਿ ਪਨ ਅਪੁਮੇ.
੩੫. ਦ੍ਵਯਂ ਅਗ੍ਗਿਕਣੇ [ਤੀਸੁ ਫੁਲਿਙ੍ਗੋ’ਗ੍ਗਿਕਣੋ (ਅਮਰ ੧.੬੦) ਫੁਲਿਙ੍ਗਾਨੀਤਿ ਅਗ੍ਗਿਕਣਾਨਿ (ਮ. ਨਿ. ਟੀ. ੩.੬੫)]. ਵਿਵਿਧਾਸੁ ਦਿਸਾਸੁ ਫੁਲ੍ਲਂ ਗਚ੍ਛਤੀਤਿ ਵਿਪ੍ਫੁਲਿਙ੍ਗਂ. ਤਥਾ ਫੁਲਿਙ੍ਗਂ. ਸਬ੍ਬਧਰਕਤੇ ਪਨ ‘‘ਫੁਲਿਂ ਗਚ੍ਛਤੀਤਿ ਫੁਲਿਙ੍ਗੋ’’ਤਿ ਵੁਤ੍ਤਂ. ਤਿਕਂ ਛਾਰਿਕਾਯਂ. ਮਲੀਨਕਂਸਵਤ੍ਥਾਦੀਨਂ ਤਂ ਦਿਤ੍ਤਿਂ ਸੇਤਿ ਪਵਤ੍ਤੇਤੀਤਿ ਭਸ੍ਮਂ, ਮਪਚ੍ਚਯੋ, ਭਸਤਿ ਵਾ ਅਧੋ ਪਤਤਿ ਵਤ੍ਥਾਦੀਨਂ ਮਲਮੇਤੇਨਾਤਿ ਭਸ੍ਮਂ. ਕਂਸਾਦੀਨਂ ਸੁਕ੍ਕਭਾਵਤ੍ਥਂ ਇਚ੍ਛਿਤਬ੍ਬਤ੍ਤਾ ਇਟ੍ਠਿ ਅਭਿਲਾਸੋ ਸੋਭਨਂ ਏਤਸ੍ਸਾ ਅਤ੍ਥੀਤਿ ਸੇਟ੍ਠਿ, ‘‘ਸਪਕ੍ਖਕੋ ਸਲੋਮਕੋ’’ਤ੍ਯਾਦੀਸੁ ਵਿਯ ਸਸਦ੍ਦਸ੍ਸ ਵਿਜ੍ਜਮਾਨਤ੍ਥਤ੍ਤਾ. ਮਲਸ੍ਸ ਸਰਣਂ ਕਰੋਤੀਤਿ ਸਾਰਿਕਾ, ਸਾ ਏਵ ਛਾਰਿਕਾ, ਯਥਾ ‘‘ਸਲ਼ਾਯਤਨ’’ਨ੍ਤ੍ਯਾਦੀਸੁ.
੩੬. ਦ੍ਵਯਂ ਉਣ੍ਹਛਾਰਿਕਾਯਂ. ਉਣ੍ਹਤ੍ਤਾ ਕੁਕ੍ਕੁਂ ਕੁਚ੍ਛਿਤਂ ਲਾਤੀਤਿ ਕੁਕ੍ਕੁਲੋ, ‘‘ਕੁਕ੍ਕੁ ਵਿਦਤ੍ਥਿਯਂ ਹਤ੍ਥੇ, ਪਕੋਟ੍ਠੇ ਕੁਚ੍ਛਿਤੇਪਿ ਚੇ’’ਤਿ ਹਿ ਨਾਨਤ੍ਥਸਙ੍ਗਹੇ ਵੁਤ੍ਤਂ. ਕੁਕ੍ਕੁਂ ਵਾ ਹਤ੍ਥਂ ਲੁਨਾਤਿ ਛਿਨ੍ਦਤਿ ਦਹਤੀਤਿ ਕੁਕ੍ਕੁਲੋ, ਸੋ ਏਵ ਕੁਕ੍ਕੁਲ਼ੋ. ਉਣ੍ਹਮੇਵ ਭਸ੍ਮਂ ਉਣ੍ਹਭਸ੍ਮਂ, ਤਸ੍ਮਿਂ. ਤਿਕਂ ਦਿਤ੍ਤਕਟ੍ਠਾਦਿਨ੍ਧਨੇ. ਅਙ੍ਗਤਿ ਹਾਨਿਂ ਗਚ੍ਛਤੀਤਿ ਅਙ੍ਗਾਰੋ, ਆਰਪਚ੍ਚਯੋ, ਪੁਨ੍ਨਪੁਂਸਕੋਯਂ. ‘‘ਅਲਾਤੇ’ਨਿਤ੍ਥਿ ਕੁਜੇ’ਙ੍ਗਾਰੋ’’ਤਿ ਹਿ ਤਿਕਣ੍ਡਸੇਸੇ [ਤਿਕਣ੍ਡਸੇਸ ੩.੩੨੯] ਵੁਤ੍ਤਂ. ਹਾਨਿਮੇਵ ਲਾਤਿ, ਨ ਠਿਤਿਂ ਵਿਸੇਸਞ੍ਚਾਤਿ ਅਲਾਤਂ. ਉਦ੍ਧਂ ਧੂਮਂ ਮੁਞ੍ਚਤੀਤਿ ਉਮ੍ਮੁਤਂ, ਤਦੇਵ ਉਮ੍ਮੁਕਂ. ਪਞ੍ਚਕਂ ਕਟ੍ਠਾਦਿਨ੍ਧਨੇ. ਸਨ੍ਤਮਗ੍ਗਿਂ ਏਧਯਤਿ ਵਡ੍ਢਯਤੀਤਿ ਸਮਿਧਾ. ਏਧਯਤੀਤਿ ਇਧੁਮਂ, ਉਮੋ. ਏਧਯਤੀਤਿ ਇਧੋ. ਉਪਾਦਿਯਤੇ ਅਗ੍ਗਿਨੇਤਿ ਉਪਾਦਾਨਂ. ਏਧਯਤੀਤਿ ਇਨ੍ਧਨਂ.
੩੭. ਪਞ੍ਚਕਂ ਆਲੋਕੇ. ਓਭਾਸਤਿ ਦਿਪ੍ਪਤੀਤਿ ਓਭਾਸੋ. ਪਕਾਸਤਿ ਦਿਪ੍ਪਤੀਤਿ ਪਕਾਸੋ. ਆਲੋਚਯਤਿ ਪਸ੍ਸਤਿ ਏਤੇਨਾਤਿ ਆਲੋਕੋ, ਆਲੋਕੇਤਿ ਵਾ ਏਤੇਨਾਤਿ ਆਲੋਕੋ, ‘‘ਲੋਕ, ਲੋਚ ਦਸ੍ਸਨੇ’’ਤਿ ਧਾਤੁਦ੍ਵਯਪਾਠਤੋ. ਉਜ੍ਜੋਤਤੀਤਿ ਉਜ੍ਜੋਤੋ, ਅਨ੍ਧਕਾਰਂ ਵਿਦ੍ਧਂਸੇਨ੍ਤੋ ਜੋਤਤੀਤਿ ਵਾ ਉਜ੍ਜੋਤੋ. ਆ ਸਮਨ੍ਤਤੋ ਤਪਤਿ ਦਿਪ੍ਪਤੀਤਿ ਆਤਪੋ. ਸਮਾਤਿ ਏਤੇ ਪਞ੍ਚ ਤੁਲ੍ਯਤ੍ਥਾਤਿ ਭਾਵੋ.
ਦਸਕਂ ਵਾਤੇ. ਆਹਾਰੋ ਵਿਯ ਪਾਣਭੂਤੋਪਿ ਕਦਾਚਿ ਸਤ੍ਤੇ ਮਾਰੇਤੀਤਿ ਮਾਰੁਤੋ, ਸੋਵ ਮਾਲੁਤੋ. ਪੁਨਾਤਿ ਸਙ੍ਕਾਰਾਦਿਕਨ੍ਤਿ ਪਵਨੋ. ਵਾਯਤਿ ਗਚ੍ਛਤੀਤਿ ਵਾਯੁ, ਵਾਯਤਿ ਵਾ ਪੁਪ੍ਫਾਦੀਨਂ ਗਨ੍ਧੋ ਯੇਨ ਸੋ ਵਾਯੁ. ਤਥਾ ਵਾਤੋ. ਅਨਨ੍ਤਿ ਪਾਣਨ੍ਤ੍ਯਨੇਨੇਤਿ ਅਨਿਲੋ, ਇਲੋ. ਸਨ੍ਤਂ ਨਿਚ੍ਚਲਂ ਈਰਯਤਿ ਕਮ੍ਪੇਤੀਤਿ ਸਮੀਰਣੋ, ਸਮੀਰਿਤੁਂ ਕਮ੍ਪਿਤੁਂ ਸੀਲਮਸ੍ਸਾਤਿ ਵਾ ਸਮੀਰਣੋ. ਗਨ੍ਧਂ ਵਹਤੀਤਿ ਗਨ੍ਧਵਾਹੋ, ਣੋ. ਵਾਯੋ ਵਾਯੁਸਦਿਸੋ, ਉਭਯਤ੍ਰਾਪਿ ਯਾਗਮੋ. ਸਮਨ੍ਤਤੋ ਈਰਤਿ ਖਿਪਤਿ ਰੁਕ੍ਖਾਦਯੋਤਿ ਸਮੀਰੋ. ਸਦਾ ਸਬ੍ਬਦਾ ਗਤਿ ਯਸ੍ਸ ਸਦਾਗਤਿ. ਸਸਨੋ, ਗਨ੍ਧਵਹੋ, ਆਸੁਗੋ, ਮਰੁਤੋ, ਜਗਤਿਪਾਣੋ, ਪਵਮਾਨੋ, ਪਭਞ੍ਜਨੋ ਇਚ੍ਚਾਦੀਨਿਪਿ ਵਾਤਨਾਮਾਨਿ.
੩੮. ਇਮੇ ਛ ਵਕ੍ਖਮਾਨਾ ਵਾਯੁਭੇਦਾ ਵਾਯੁਵਿਸੇਸਾ, ਉਦ੍ਧਂ ਗਚ੍ਛਤੀਤਿ ਉਦ੍ਧਙ੍ਗਮੋ, ਉਚ੍ਚਾਰਪਸ੍ਸਾਵਾਦੀਨਂ ਨੀਹਰਣਵਸੇਨ ਅਧੋਭਾਗਂ ਗਚ੍ਛਤੀਤਿ ਅਧੋਗਮੋ. ਕੁਚ੍ਛਿਮ੍ਹਿ ਉਦਰੇ ਤਿਟ੍ਠਤੀਤਿ ਕੁਚ੍ਛਿਟ੍ਠੋ. ਕੋਟ੍ਠੇ ਅਨ੍ਤੇ ਸੇਤਿ ਤਿਟ੍ਠਤੀਤਿ ਕੋਟ੍ਠਾਸਯੋ. ਪੁਨਪ੍ਪੁਨਂ ਸਸਨ੍ਤਿ ਯੇਨ ਅਸ੍ਸਾਸੋ, ਬਹਿਨਿਕ੍ਖਨ੍ਤਵਾਤੋ. ਪਸ੍ਸਾਸੋਤਿ ਅਨ੍ਤੋਪਵਿਸਨਕਵਾਤੋਪਿ ‘‘ਅਸ੍ਸਾਸੋ’’ਤਿ ਏਤੇਨ ਸਙ੍ਗਯ੍ਹਤੇ ਸਹਚਾਰਿਤਤ੍ਤਾ. ਸਬ੍ਬਙ੍ਗੇਸੁ ਅਨੁਸਰਤਿ ਸੀਲੇਨ ਸੇਦਲੋਹਿਤਾਦਿਸਮ੍ਪਾਦਨਤੋਤਿ ਅਙ੍ਗਾਨੁਸਾਰੀ. ਅਮਰਕੋਸੇ ਪਨਾਯਂ ਵਾਤੋ ਠਾਨਬ੍ਯਾਪਾਰਭੇਦੇਨ ਪਞ੍ਚਧਾ ਕਥਿਤੋ [ਪਾਣੋ’ਪਾਨੋ ਸਮਾਨੋਚੋਦਾਨਬ੍ਯਾਨਾ ਚ ਵਾਯਵੋ ਸਰੀਰਟ੍ਠਾ ਇਮੇ (ਅਮਰ ੧.੬੭)], ਟੀਕਾਯਞ੍ਚਸ੍ਸ –
‘‘ਹਦਯੇ ਪਾਣੋ ਗੁਦੇ’ਪਾਨੋ, ਸਮਾਨੋ ਨਾਭਿਮਜ੍ਝਟ੍ਠੋ;
ਉਦਾਨੋ ਕਣ੍ਠਦੇਸੇ ਤੁ, ਬ੍ਯਾਨੋ ਸਬ੍ਬਙ੍ਗਸਨ੍ਧਿਸੁ [ਹਦਯੇ ਪਾਣੋ ਗੁਦੇ’ਪਾਨੋ, ਸਮਾਨੋ ਨਾਭਿਸਣ੍ਠਿਤੋ; ਉਦਾਨੋ ਕਣ੍ਠਦੇਸਟ੍ਠੋ, ਬ੍ਯਾਨੋ ਸਬ੍ਬਸਰੀਰਗੋ ਇਤਿ ਠਾਨਨਿਣ੍ਣਯੋ (ਚਿਨ੍ਤਾਮਣਿਟੀਕਾ)].
ਤਤ੍ਰਪਾਣੋਅਨ੍ਨਪ੍ਪਵੇਸਾਦਿਕਰੋ. ਅਪਾਨੋ ਮੁਤ੍ਤਕਰੀਸਸੁਕ੍ਕਵਿਸਟ੍ਠਿਕਰੋ. ਸਮਾਨੋ ਮਜ੍ਝੇ ਅਨ੍ਨਪਚਨਾਦਿਕਰੋ. ਉਦਾਨੋ ਭਾਸਿਤਗੀਤਾਦਿਕਰੋ. ਬ੍ਯਾਨੋ ਸੇਦਰਤ੍ਤਸਵਨੁਮ੍ਮੇਸਨਿਮੇਸਗਤ੍ਯਾਦਿਕਰੋ [ਖੇਦਚੇਟ੍ਠਾਉਮ੍ਮੇਸਨਿਮ੍ਮੇਸਗਤ੍ਯਾਦਿਕਰੋ (ਕ.)]. ਪਕਟ੍ਠੇਨ ਅਨਨ੍ਤ੍ਯਨੇਨ ਭਤ੍ਤਾਦਿਪ੍ਪਵੇਸਨਤੋਤਿ ਪਾਣੋ. ਮੁਤ੍ਤਾਦਿਕਂ ਅਪਨੇਤ੍ਵਾ ਅਨਨ੍ਤ੍ਯਨੇਨਾਤਿ ਅਪਾਨੋ. ਸਮ੍ਮਾ ਅਨਨ੍ਤਿ ਅਨੇਨ ਭੁਤ੍ਤਪਰਿਪਾਚਨਤੋਤਿ ਸਮਾਨੋ. ਉਦ੍ਧਮਨਨ੍ਤ੍ਯਨੇਨ ਭਾਸਿਤਾਦੋ ਸਾਮਤ੍ਥਿਯਜਨਨਤੋਤਿ ਉਦਾਨੋ. ਵਿਸੇਸੇਨ ਅਨਨ੍ਤ੍ਯਨੇਨ ਸੇਦਰਤ੍ਤਸੇਮ੍ਹਾਦਿ [ਖੇਦਚੇਟ੍ਠਾਦਿ (ਚਿਨ੍ਤਾਮਣਿਟੀਕਾ)] ਸਮ੍ਪਾਦਨਤੋਤਿ ਬ੍ਯਾਨੋ’’ਤਿ [ਤਂਬ੍ਯਾਪਾਰਾ ਚ ਯਥਾ – ਅਨ੍ਨਪ੍ਪਵੇਸਨਂ ਮੁਤ੍ਤਾ-ਦ੍ਯੁਸ੍ਸਗ੍ਗੋ’ਨ੍ਨਵਿਪਾਚਨਂ ਭਾਸਣਾਦਿ ਨਿਮੇਸਾਦਿ, ਤਂਬ੍ਯਾਪਾਰਾ ਕਮਾ ਇਮੇ (ਚਿਨ੍ਤਾਮਣਿਟੀਕਾ)] ਵੁਤ੍ਤਂ.
੩੯. ਦ੍ਵਯਂ ਅਨ੍ਤੋਪਵਿਸਨਕਵਾਤੇ. ਆਨਂ ਵੁਚ੍ਚਤਿ ਬਹਿਨਿਕ੍ਖਮਨਵਾਤੋ, ਤਤੋ ਅਪਗਤਂ ਅਪਾਨਂ. ਅਸ੍ਸਾਸਤੋ ਅਪਗਤੋ ਪਸ੍ਸਾਸੋ. ਦ੍ਵਯਂ ਬਹਿਨਿਕ੍ਖਮਨਵਾਤੇ. ਆਦਿਮ੍ਹਿ ਪਵਤ੍ਤੋ ਸਾਸੋ ਅਸ੍ਸਾਸੋ. ਅਨਨ੍ਤਿ ਪਾਣਨ੍ਤ੍ਯਨੇਨੇਤਿ ਆਨਂ, ਆਦਿਮ੍ਹਿ ਪਵਤ੍ਤਂ ਆਨਂ ਆਨਂ, ਏਕਸ੍ਸਾਕਾਰਸ੍ਸ ਲੋਪੋ.
੪੦. ਵੇਗਖਿਪ੍ਪਾਦਯੋ ਵਾਤਧਮ੍ਮਤ੍ਤੇਨ ਨਿਚ੍ਚਪ੍ਪਵਤ੍ਤਿਕਾ ਇਤਿ ਤਪ੍ਪਕ੍ਕਮੇ [ਤਪ੍ਪਕ੍ਕਮੇਨ ਤਕ੍ਕਮੇਨ (ਕ.)] ਉਚ੍ਚਨ੍ਤੇ. ਤਤ੍ਰ ਰਯਨ੍ਤਂ ਵੇਗੇ. ਸਬ੍ਬਤ੍ਰ ਕਰਣਸਾਧਨਂ. ਇਚ੍ਛਿਤਟ੍ਠਾਨਂ ਵਜਨ੍ਤਿ ਪਾਪੁਣਨ੍ਤਿ ਏਤੇਨਾਤਿ ਵੇਗੋ.
‘‘ਕ੍ਰਿਯਾਵਾਚਿਤ੍ਤਮਾਖ੍ਯਾਤੁਂ, ਏਕੇਕਤ੍ਥੋ ਨਿਦਸ੍ਸਿਤੋ;
ਪਯੋਗਤੋਨੁਗਨ੍ਤਬ੍ਬਾ, ਅਨੇਕਤ੍ਥਾ ਹਿ ਧਾਤਵੋ’’ਤਿ [ਚਨ੍ਦ੍ਰਧਾਤੁਪਾਠੇ].
ਵੁਤ੍ਤਤ੍ਤਾ ਵਜਧਾਤੁ ਪਾਪੁਣਨੇਪਿ ਪਵਤ੍ਤਤਿ, ਏਵਂ ਸਬ੍ਬਤ੍ਰ, ਅਕਾਰਸ੍ਸ ਏ. ਜਵਨ੍ਤਿ ਏਤੇਨਾਤਿ ਜਵੋ, ਰਯਨ੍ਤਿ ਗਚ੍ਛਨ੍ਤਿ ਏਤੇਨਾਤਿ ਰਯੋ.
ਖਿਪ੍ਪਾਦਿਨਵਕਂ ਸੀਘੇ. ਅਥ ਜਵਸੀਘਾਨਂ ਕੋ ਭੇਦੋ? ਸਵੇਗਗਤਿਵਚਨਾ ਜਵਾਦਯੋ, ਸੀਘਾਦਯੋ ਤੁ ਧਮ੍ਮਵਚਨਾ, ਤਥਾ ਚ ‘‘ਸੀਘਂ ਪਚਤਿ [ਪਸ੍ਸਤਿ (ਕ.)], ਸੀਘਂ ਗਚ੍ਛਤੀ’’ਤਿ ਪਯੋਗੋ, ਨ ਤੁ ‘‘ਜਵਂ ਪਚਤਿ, ਜਵਂਗਚ੍ਛਤੀ’’ਤਿ ਪਨ ਪਯੋਗੋ. ‘‘ਵੇਗੇਨ ਗਚ੍ਛਤਿ, ਜਵੇਨ ਗਚ੍ਛਤੀ’’ਤ੍ਯਾਦੀਸੁ ਕਥਂ? ਤਤ੍ਰ ਭੇਦਸ੍ਸ ਵਤ੍ਤੁਮਿਚ੍ਛਿਤਤ੍ਤਾ ਨ ਦੋਸੋ. ਖਿਪ੍ਪਤਿ ਪੇਰਤੀਤਿ ਖਿਪ੍ਪਂ, ਖਿਪ ਪੇਰਣੇ. ਸਯਤੀਤਿ ਸੀਘਂ, ਸੀ ਸਯੇ, ਘਪਚ੍ਚਯੋ. ਬ੍ਯੁਪ੍ਪਤ੍ਤਿ ਹਿ ਯਥਾ ਕਥਞ੍ਚਿਪਿ ਭਵਤਿ, ਸਞ੍ਞਾ ਤੁ ਲੋਕਤੋਵਾਵਗਨ੍ਤਬ੍ਬਾ, ਸਬ੍ਬਤ੍ਰੇਵਂ. ਤਰਤੀਤਿ ਤੁਰਿਤਂ. ਲਙ੍ਘਤੀਤਿ ਲਹੁ, ਲਙ੍ਘ ਗਤਿਸੋਸਨੇਸੁ, ਘਸ੍ਸ ਹੋ, ਨਿਗ੍ਗਹੀਤਲੋਪੋ, ਉਪਚ੍ਚਯੋ ਚ, ਲਹੁਪਰਿਯਾਯੋ ਲਘੁਸਦ੍ਦੋਪ੍ਯਤ੍ਥਿ. ਅਸਤਿ ਖੇਪਤੀਤਿ ਆਸੁ, ਉ. ਤਰਤੀਤਿ ਤੁਣ੍ਣਂ, ਰਸ੍ਸ ਣੋ. ਅਰਤਿ ਗਚ੍ਛਤੀਤਿ ਅਰਂ. ਨ ਵਿਲਮ੍ਬੀਯਤਿ ਨ ਓਹੀਯਤੀਤਿ ਅਵਿਲਮ੍ਬਿਤਂ, ਲਬਿ ਅਵਸਂਸਨੇ. ਤੁਵਟ੍ਟਤਿ ਸਯਤੀਤਿ ਤੁਵਟ੍ਟਂ, ਤੁਰਿਤਭਾਵੇਨ ਵਤ੍ਤਤੀਤਿ ਵਾ ਤੁਵਟ੍ਟਂ, ਰਿਤਲੋਪੋ.
੪੧. ਅਰਿਯਾਸਾਮਞ੍ਞਸ੍ਸ ਪੁਬ੍ਬਡ੍ਢਂ ਸਨ੍ਤਤੇ. ਏਤ੍ਥ ਚ ਅਟ੍ਠਸੁ ਗਣੇਸੁ ਛਟ੍ਠੋ ਸਬ੍ਬਲਹੁਕੋ, ਤਤੋਪਰੇ ਛਗ੍ਗਣਾ ਸ, ਭ, ਸ, ਭ, ਭ, ਭਾ, ਅਟ੍ਠਮੋ ਗੋ. ਸਮਨ੍ਤਤੋ ਤਨੋਤੀਤਿ ਸਤਤਂ. ਨਾਸਭਾਵੇਨ ਨ ਇਚ੍ਚਂ ਨ ਗਨ੍ਤਬ੍ਬਂ ਨਿਚ੍ਚਂ, ਨਾਸਂ ਵਾ ਨ ਗਚ੍ਛਤੀਤਿ ਨਿਚ੍ਚਂ. ‘‘ਨਾਗੋ’’ਤ੍ਯਾਦੀਸੁ ਵਿਯਾਤਿ ਏਤ੍ਥਾਪਿ ਨ ਦੋਸੋ, ਤਸ੍ਸ ਚੋ. ਨ ਵਿਰਮਤੀਤਿ ਅਵਿਰਤਂ. ਨ ਆਰਮਤੀਤਿ ਅਨਾਰਤਂ. ਸਮਨ੍ਤਤੋ, ਪੁਨਪ੍ਪੁਨਂ ਵਾ ਤਨੋਤੀਤਿ ਸਨ੍ਤਤਂ. ਨ ਅਵਰਮਤੀਤਿ ਅਨਵਰਤਂ. ਸਦਾ ਧਵਤਿ ਗਚ੍ਛਤੀਤਿ ਧੁਵਂ. ‘‘ਧੁ ਗਤਿਥੇਰਿਯੇਸੂ’’ਤਿ ਕਾਤਨ੍ਤਧਾਤੁ.
ਵਿਪੁਲਾਡ੍ਢਂ ਅਤਿਸਯੇ. ਏਤ੍ਥ ਹਿ ਅਯੁਗਪਾਦੇ ਦ੍ਵਾਦਸਮਤ੍ਤਾ, ਯੁਗੇ ਅਟ੍ਠਾਰਸਮਤ੍ਤਾ, ਸਬ੍ਬਾਸੁ ਅਰਿਯਾਸੁ ਪਠਮੇ ਪਾਦੇ ਦ੍ਵਾਦਸਮਤ੍ਤਾ, ਦੁਤਿਯੇ ਅਟ੍ਠਾਰਸ, ਤਤਿਯੇ ਦ੍ਵਾਦਸ, ਚਤੁਤ੍ਥੇ ਪਞ੍ਚਦਸ. ਯਦਾ ਪਨ ਪਠਮਤਤਿਯੇਸੁ ਪਰਿਹਾਯਨ੍ਤਿ, ਤਦਾ ਯੁਗੇ ਅਧਿਕਾ ਹੋਨ੍ਤਿ, ਇਦਂ ਵਿਪੁਲਾਲਕ੍ਖਣਂ. ਅਥ ਸਤਤਾਤਿਸਯਾਨਂ ਕੋ ਭੇਦੋ? ਸਤਤਂ ਸਨ੍ਤਤਿ ਅਵਿਚ੍ਛੇਦੋਕ੍ਰਿਯਨ੍ਤਰੇਹਿ ਅਬ੍ਯਵਧਾਨਂ, ਅਤਿਸਯੋ ਤੁ ਪੋਨੋਪੁਞ੍ਞਂ, ਪਕਟ੍ਠੋ ਚ. ਤੇਸੁ ਪੋਨੋਪੁਞ੍ਞਂ ਕ੍ਰਿਯਾਬ੍ਯਾਵੁਤ੍ਤਿ, ਪਕਟ੍ਠੋ ਤੁ ਕ੍ਰਿਯਾਵਯਵਾਨਂ ਉਕ੍ਕਂਸਤਾ. ਭਾਸਤਿ ਸਬ੍ਬੇਸਨ੍ਤਿ ਭੁਸਂ, ਆਸ੍ਸ ਉ. ਭਸ੍ਸਤਿ ਅਧੋ ਪਤਤੀਤਿ ਵਾ ਭੁਸਂ. ਭਸ ਅਧੋਪਤਨੇ, ਅਸ੍ਸ ਉ. ਅਤਿਸਯਨਂ ਅਤਿਸਯੋ, ਅਤਿਕ੍ਕਮਿਤ੍ਵਾ ਵਾਸਯਨਂ ਪਵਤ੍ਤਨਂ ਅਤਿਸਯੋ. ਦਹਤਿ ਸਬ੍ਬਨ੍ਤਿ ਦਲ਼੍ਹਂ, ਹਤੋ ਪੁਬ੍ਬੇ ਲ਼ੋ, ਦਲਤਿ ਵਿਦਾਰਯਤੀਤਿ ਵਾ ਦਲ਼੍ਹਂ, ਹਪਚ੍ਚਯੋ, ਦਹਨ੍ਤੋ ਲਾਤੀਤਿ ਵਾ ਦਲ਼੍ਹਂ, ਵਣ੍ਣਵਿਪਰਿਯਯੋ, ਅਭਿਸਯੋ ਚ ਦਲ਼੍ਹਞ੍ਚ ਅਤਿਸਯਦਲ਼੍ਹਾ. ਤਰਤਿ ਅਤਿਕ੍ਕਮਤੀਤਿ ਤਿਬ੍ਬਂ, ਰਸ੍ਸ ਵੋ, ਅਸ੍ਸ ਇ. ਏਤਿ ਗਚ੍ਛਤੀਤਿ ਏਕੋ, ਸੋ ਏਵ ਏਕਨ੍ਤਂ, ਏਕਂ ਤਰਤਿ ਅਤਿਕ੍ਕਮਤੀਤਿ ਵਾ ਏਕਨ੍ਤਂ. ਮਤ੍ਤਤੋ ਅਤਿਕ੍ਕਨ੍ਤਂ ਅਤਿਮਤ੍ਤਂ. ਬਹੁਂ ਲਾਤੀਤਿ ਬਾਲ਼੍ਹਂ, ਉਲੋਪੋ, ਵਣ੍ਣਵਿਪਰਿਯਯੋ ਚ ਹਸਦ੍ਦੋ. ਅਤਿਵੇਲਂ, ਅਚ੍ਚਤ੍ਥਂ, ਨਿਬ੍ਭਰਂ, ਨਿਤਨ੍ਤਂ, ਗਾਲ਼੍ਹਂਇਚ੍ਚਾਦੀਨਿਪਿ ਅਤਿਸਯੇ.
ਦਬ੍ਬਂ ਸਤ੍ਵਂ, ਤਂਵਿਪਰੀਤੇ ਧਮ੍ਮਮਤ੍ਤੇ ਵਤ੍ਤਮਾਨਾ ਬਾਲ਼੍ਹਪਰਿਯਨ੍ਤਾ ਖਿਪ੍ਪਾਦਯੋ ਅਤਿਸਯਂ ਵਿਨਾ ਪਣ੍ਡਕੇ ਨਪੁਂਸਕੇ ਵਤ੍ਤਨ੍ਤਿ. ਖਿਪ੍ਪਂ ਭਵਤਿ [‘‘ਖਿਪ੍ਪ ਭਵਭੀ’’ਤਿ ਪਦਦ੍ਵਯਂ ਅਧਿਕਂ ਵਿਯ ਦਿਸ੍ਸਤਿ], ਅਤਿਸਯੋ ਪੁਲ੍ਲਿਙ੍ਗੋ, ਅਸ੍ਸ ਗੁਣਸ੍ਸਾਤਿਸਯੋ, ਅਸ੍ਸ ਦਬ੍ਬਸ੍ਸਾਤਿਸਯੋ ਇਤਿ. ‘‘ਖਿਪ੍ਪਂ ਭੁਞ੍ਜਤਿ, ਸਤਤਂ ਜੁਹੋਤਿ, ਸਤਤਂ ਰਮਣੀਯੋ’’ਇਚ੍ਚਤ੍ਰ ਤੁ ਕ੍ਰਿਯਾਵਿਸੇਸਨਤ੍ਤਾਯੇਵ ਪਣ੍ਡਕਤ੍ਤਂ. ਤੇਸੁ ਖਿਪ੍ਪਾਦੀਸੁ ਯੇ ਦਬ੍ਬਗਾ ਦਬ੍ਬਾਭਿਧਾਯਿਨੋ, ਤੇ ਤੀਸੁ ਲਿਙ੍ਗੇਸੁ. ‘‘ਦਬ੍ਬਧਮ੍ਮੋ ਲਿਙ੍ਗ’’ਨ੍ਤਿ ਦਸ੍ਸਨਨ੍ਤਰਂ. ਯਥਾ ਖਿਪ੍ਪਾ ਜਰਾ, ਖਿਪ੍ਪੋ ਮਚ੍ਚੁ, ਖਿਪ੍ਪਂ ਗਮਨਂ. ਸਨ੍ਤਤਾ ਤਣ੍ਹਾ, ਸਨ੍ਤਤਂ ਦੁਕ੍ਖਂ, ਸਨ੍ਤਤੋ ਆਕਾਸੋ. ਅਤਿਮਤ੍ਤਾ ਕ੍ਰਿਯਾ, ਅਤਿਮਤ੍ਤੋ ਨਰੋ, ਅਤਿਮਤ੍ਤਂ ਪਦਂ ਇਚ੍ਚਾਦਿ.
੪੨-੪੩. ਦ੍ਵਾਦਸਕਂ ਮਾਰੇ. ਹਰਨਯਨਗ੍ਗਿਦਡ੍ਢਤ੍ਤਾ [ਤਿਨਯਨਗ੍ਗਿਦਡ੍ਢਤ੍ਤਾ (ਕ.)] ਨਤ੍ਥਿ ਵਿਗ੍ਗਹੋ ਸਰੀਰਮੇਤਸ੍ਸ ਅਵਿਗ੍ਗਹੋ. ਕਾਮਯਤਿ ਰਤਿਚ੍ਛਂ ਉਪ੍ਪਾਦਯਤੀਤਿ ਕਾਮੋ, ਕਾਰਿਤਨ੍ਤਾ ਅਪਚ੍ਚਯੋ. ਸਿਙ੍ਗਾਰਰੂਪੇਨ ਪਾਣੀਨਂ ਮਨਸਿ ਭਵਤੀਤਿ ਮਨੋਭੂ. ਪਞ੍ਚਕਾਮਗੁਣੇਸੁ ਮਦਯਤੀਤਿ ਮਦਨੋ. ਲੋਕਾਨਂ ਅਨ੍ਤਂ ਵਿਨਾਸਂ ਕਰੋਤੀਤਿ ਅਨ੍ਤਕੋ. ਵਸੇ ਵਤ੍ਤੇਤਿ ਸੀਲੇਨਾਤਿ ਵਸਵਤ੍ਤੀ. ਪਾਪਂ ਇਚ੍ਛਤਿ ਕਰੋਤਿ, ਤੇਨ ਯੁਤ੍ਤੋਤਿ ਵਾ ਪਾਪਿਮਾ. ਪਰਤੋ ਜਾਯਤੀਤਿ ਪਜਾ, ਅਚ੍ਛਨ੍ਦਿਕਾ, ਤਾਸਂ ਪਤਿ ਪਜਾਪਤਿ. ਯੇ ਕੁਸਲਧਮ੍ਮੇਸੁ ਪਮਤ੍ਤਾ, ਤੇਸਮੇਵ ਬਨ੍ਧੁ ਪਮਤ੍ਤਬਨ੍ਧੁ. ਕਣ੍ਹਧਮ੍ਮਯੁਤ੍ਤਤਾਯ ਕਣ੍ਹੋ. ਕੁਸਲਧਮ੍ਮੇ ਮਾਰੇਤੀਤਿ ਮਾਰੋ. ਅਕੁਸਲਧਮ੍ਮੇ ਨ ਮੁਞ੍ਚਤੀਤਿ ਨਮੁਚਿ. ਮੀਨਕੇਤਨੋ, ਕਨ੍ਦਪ੍ਪੋ, ਦਪ੍ਪਕੋ, ਅਨਙ੍ਗੋ, ਪਞ੍ਚਸਰੋ, ਸਮ੍ਬਰਾਰਿ, ਮਨਸਿਜੋ, ਕੁਸੁਮੇਸੁ, ਅਨਞ੍ਞਜੋ, ਪੁਪ੍ਫਧਨ੍ਵਾ, ਰਤਿਪਤਿ, ਮਕਰਦ੍ਧਜੋਇਚ੍ਚਾਦੀਨਿਪਿ ਵਿਣ੍ਹੁਸੁਤਸ੍ਸ ਕਾਮਸ੍ਸ ਨਾਮਾਨਿ.
ਤਣ੍ਹਾ ਅਰਤੀ ਰਗਾ ਚੇਤਿ ਏਤਾ ਤਿਸ੍ਸੋ ਤਸ੍ਸ ਮਾਰਸ੍ਸ ਧੀਤਰੋ. ਯੋ ਤਂ ਪਸ੍ਸਤਿ, ਤਂ ਤਸਿਤਂ ਕਰੋਤੀਤਿ ਤਣ੍ਹਾ, ਸਲੋਪੋ, ਣ੍ਹਾ ਚ. ਪਰੇਸਂ ਕੁਸਲਧਮ੍ਮੇਸੁ ਅਰਤਿਂ ਕਰੋਤੀਤਿ ਅਰਤੀ. ਰਜ੍ਜਨ੍ਤਿ ਏਤ੍ਥਾਤਿ ਰਗਾ. ਤਸ੍ਸ ਮਾਰਸ੍ਸ ਹਤ੍ਥੀ ਗਿਰਿਮੇਖਲੋ ਨਾਮ. ਸਰੀਰਮਹਨ੍ਤਭਾਵੇਨ ਗਿਰਿਸਦਿਸਤ੍ਤਾ ਗਿਰਿ ਵਿਯਾਤਿ ਗਿਰਿ. ਮਾਰੇਨ ਮਮਾਯਨਵਸੇਨ ‘‘ਅਯਂ ਮੇ ਹਤ੍ਥੀ ਮੇਖਲੋ ਨਾਮ ਹੋਤੂ’’ਤਿ ਕਤਨਾਮਤ੍ਤਾ ਮੇਖਲਾ ਵਿਯਾਤਿ ਮੇਖਲੋਤਿ ਸਮੁਦਿਤਨਾਮਦ੍ਵਯੇਨ ਏਕਮੇਵ ਹਤ੍ਥਿਂ ਵਦਤਿ, ਯਥਾ ‘‘ਵਜਿਰਾਸਨਿ, ਸੀਤੁਣ੍ਹ’’ਨ੍ਤਿ.
੪੪. ਤਿਕਂ ਯਮੇ. ਪਜਾਸਂਯਮਨਤੋ ਯਮਾ, ਮਚ੍ਚੁਪ੍ਪਭੁਤਯੋ ਅਸ੍ਸ ਕਿਙ੍ਕਾਰਾ, ਤੇਸੁ ਰਾਜਤੇਤਿ ਯਮਰਾਜਾ. ਤੇਧਾਤੁਕੇਸੁਪਿ ਆਣਾਪਵਤ੍ਤਕਤ੍ਤਾ ਮਹਨ੍ਤੋ ਵਿਸਯੋ ਏਤਸ੍ਸ ਵਿਸਯੀ, ਣੀ, ਸੋ ਏਵ ਵੇਸਾਯੀ. ਯਤ੍ਥ ਲਕ੍ਖਣੇਨ ਨ ਸਿਜ੍ਝਤਿ, ਤਤ੍ਥ ਸਬ੍ਬਤ੍ਰ ‘‘ਯਦਾਦਿਨਾ ਵਾ ਨਿਰੁਤ੍ਤਿਨਯੇਨ ਵਾ ਸਦ੍ਦਸਿਦ੍ਧਿ ਵੇਦਿਤਬ੍ਬਾ’’ਤਿ ਹਿ ਪੁਬ੍ਬੇ ਵੁਤ੍ਤਂ, ਦੁਕ੍ਖਜਨਕਤ੍ਤਾ ਵਾ ਵਿਸਦਿਸਟ੍ਠਾਨਂ ਗਚ੍ਛਨ੍ਤੀਤਿ ਵੇਸਾ, ਨੇਰਯਿਕਾ, ਤੇਸਂ ਅਧਿਪਤਿਭਾਵੇਨ ਅਯਤਿ ਪਵਤ੍ਤਤੀਤਿ ਵੇਸਾਯੀ, ਈ. ਯਮਾਨਂ ਰਾਜਾ ਯਮੋ. ਧਮ੍ਮਰਾਜੋ, ਕਤਨ੍ਤੋ, ਸਮਵਤ੍ਤੀ, ਕਾਲੋ, ਦਣ੍ਡਧਰੋ, ਅਨ੍ਤਕੋਇਚ੍ਚਾਦੀਨਿਪਿ ਯਮਸ੍ਸ ਨਾਮਾਨਿ. ਅਸ੍ਸ ਯਮਸ੍ਸ ਆਵੁਧਂ ਨਯਨਮੇਵ. ਤੇਨ ਕਿਰ ਕੋਧਚਿਤ੍ਤੇਨ ਓਲੋਕਿਤਮਤ੍ਤੇਨ ਸਤ੍ਤਾਨਂ ਸਰੀਰਾਨਿ ਆਤਪੇ ਖਿਤ੍ਤਘਤਪਿਣ੍ਡਾਨਿ ਵਿਯ ਵਿਲੀਯਨ੍ਤੀਤਿ.
ਦ੍ਵਯਂ ਅਸੁਰਭੇਦੇ. ਏਤੇਸਞ੍ਹਿ ਸਤਿਪਿ ਦੇਵਭਾਵੇ ਹੇਟ੍ਠਾ ਨਿਵਾਸਿਤਭਾਵਸਾਮਞ੍ਞਤੋ ਏਤ੍ਥ ਵਚਨਂ, ਮਾਰਸ੍ਸ ਪਨ ਸਤ੍ਤਾਨਮਨਤ੍ਥਕਾਰਕਤਾਸਾਮਞ੍ਞੇਨ ਯਮੇਨ ਸਦ੍ਧਿਂ ਵਚਨਂ ਤਕ੍ਕਰਤ੍ਤਾ. ਯੁਦ੍ਧਾਦੀਸੁ ਵੇਪਿਤਂ ਕਮ੍ਪਿਤਂ ਚਿਤ੍ਤਮੇਤਸ੍ਸ ਵੇਪਚਿਤ੍ਤਿ [ਸਂ. ਨਿ. ਅਟ੍ਠ. ੧.੧.੨੫੬]. ਪੁਣ੍ਣਂ ਲੋਮਂ ਯਸ੍ਸ ਸੋ ਪੁਲੋਮੋ, ਪੁਲਾਮਹਤੀ ਉਮਾ ਕਿਤ੍ਤਿ, ਕਨ੍ਤਿ ਵਾ ਯਸ੍ਸਾਤਿ ਪੁਲੋਮੋ. ‘‘ਉਮਾਤਸੀਹੇਮਵਤਿ-ਹਲਿਦ੍ਦਾਕਿਤ੍ਤਿਕਨ੍ਤਿਸੂ’’ਤਿ ਹਿ ਨਾਨਤ੍ਥਸਙ੍ਗਹੇ ਵੁਤ੍ਤਂ. ਅਯਂ ਪਨ ਸਕ੍ਕਸ੍ਸ ਭਰਿਯਾਯ ਸੁਜਾਤਾਯ ਪਿਤਾ. ਦ੍ਵਯਂ ਕਿਨ੍ਨਰੇ. ਅਸ੍ਸਮੁਖਨਰਸਰੀਰਤਾਯ ਕੁਚ੍ਛਿਤੋ ਪੁਰਿਸੋ, ਕਿਞ੍ਚਿ ਵਾ ਪੁਰਿਸੋ, ਪੁਰਿਸਸਦਿਸੋਤਿ ਵਾ ਕਿਮ੍ਪੁਰਿਸੋ. ਏਵਂ ਕਿਨ੍ਨਰੋ. ਤੁਰਙ੍ਗਵਦਨ, ਅਸ੍ਸਮੁਖਾਦੀਨਿਪਿ ਕਿਨ੍ਨਰਸ੍ਸ ਨਾਮਾਨਿ.
੪੫-੪੬. ਅਦ੍ਧਪਜ੍ਜੇਨ ਆਕਾਸਸ੍ਸ ਨਾਮਾਨਿ. ਤੇਸਂ ਤੇਸਂ ਵਤ੍ਥੂਨਂ ਅਨ੍ਤਰਂ ਨਾਨਤ੍ਤਂ ਇਕ੍ਖਤੇ ਲੋਕੋ ਏਤ੍ਥ, ਅਨੇਨਾਤਿ ਵਾ ਅਨ੍ਤਲਿਕ੍ਖਂ, ਰਸ੍ਸ ਲੋ. ਇਕ੍ਖਨਂ ਵਾ ਦਸ੍ਸਨਂ ਇਕ੍ਖਾ, ਤਸ੍ਸ ਅਨ੍ਤਰਂ ਕਾਰਣਂ ਅਨ੍ਤਲਿਕ੍ਖਂ. ਖਨਤਿ ਬ੍ਯਵਧਾਨਨ੍ਤਿ ਖਂ, ਕ੍ਵਿ. ਸਬ੍ਬਗਹਗਾਮਣਿਨੋ ਆਦਿਚ੍ਚਸ੍ਸ ਪਥੋ ਮਗ੍ਗੋ ਆਦਿਚ੍ਚਪਥੋ. ਨ ਭਵਤੀਤਿ ਅਬ੍ਭਂ. ਗਚ੍ਛਨ੍ਤ੍ਯਨੇਨ ਦੇਵਾਤਿ ਗਗਨਂ, ਯੁ, ਮਸ੍ਸ ਗੋ. ਅਮ੍ਬਤੇ ਸਦ੍ਦਾਯਤੇ ਅਤ੍ਰਾਤਿ ਅਮ੍ਬਰਂ, ਰੋ. ਹਯ ਗਤਿਮ੍ਹਿ, ਵਿਸੇਸੇਨ ਹਯਤਿ ਗਚ੍ਛਤਿ ਸਬ੍ਬਤ੍ਰਾਤਿ ਵੇਹਾਸੋ, ਯਸ੍ਸ ਸੋ, ਵਿਗਤੋ ਵਾ ਹਾਸੋ ਚਿਤ੍ਤਸ੍ਸ ਏਤ੍ਥਾਰਮ੍ਮਣਾਲਾਭਤੋਤਿ ਵੇਹਾਸੋ. ਅਨਿਲਸ੍ਸ ਵਾਤਸ੍ਸ ਪਥੋ ਅਨਿਲਪਥੋ. ਭੁਸਂ ਕਾਸਨ੍ਤੇ ਦਿਪ੍ਪਨ੍ਤੇ ਪਦਤ੍ਥਾ ਏਤੇਨਾਤਿ ਆਕਾਸੋ, ਨ ਕਸ੍ਸਤਿ ਨ ਵਿਲੇਖੀਯਤੀਤਿ ਵਾ ਆਕਾਸੋ. ਨ ਭਵਤਿ ਏਤ੍ਥ ਕਿਞ੍ਚਿਪਿ ਵਤ੍ਥੂਤਿ ਨਭਂ, ਨਤ੍ਥਿ ਭੂਮਿ ਏਤ੍ਥਾਤਿ ਵਾ ਨਭਂ, ਨ ਭਾਯਨ੍ਤਿ ਪਕ੍ਖਿਨੋ ਅਨੇਨ, ਏਤ੍ਥਾਤਿ ਵਾ ਨਭਂ. ਵਿਨੋ ਪਕ੍ਖਿਨੋ ਹਯਨ੍ਤਿ ਗਚ੍ਛਨ੍ਤਿ ਏਤ੍ਥਾਤਿ ਵੇਹਾਯਸਂ, ਅਸੋ. ਤਾਰਾ ਵੁਚ੍ਚਨ੍ਤਿ ਨਕ੍ਖਤ੍ਤਾਦਯੋ, ਤੇਸਂ ਪਥੋ ਤਾਰਾਪਥੋ. ਸੁਰਾਨਂ ਦੇਵਾਨਂ ਪਥੋ ਸੁਰਪਥੋ. ਨ ਹਞ੍ਞਤੇਤਿ ਅਘਂ, ਹਨਸ੍ਸ ਘੋ. ਅਨਨ੍ਤਂ, ਵਿਸਣੁਪਦਂਇਚ੍ਚਾਦੀਨਿਪਿ ਆਕਾਸਸ੍ਸ ਨਾਮਾਨਿ.
੪੭-੪੮. ਮੇਘਾਦ੍ਯੇਕਾਦਸਕਂ ਮੇਘੇ. ਮੇਹਤਿ ਘਰਤਿ ਸੇਚਤੀਤਿ ਮੇਘੋ. ਵਾਰਿਂ ਵਹਤੀਤਿ ਵਲਾਹਕੋ, ਵਾਰਿਸਦ੍ਦਸ੍ਸ ਵੋ, ਵਸ੍ਸ ਲੋ [ਪਾਣਿਨਿ ੬.੩.੧੦੯; ਮੋਗ੍ਗਲ੍ਲਾਨਪਞ੍ਚਿਕਾ ੧.੪੭; ਨੀਤਿ-ਸੁਤ੍ਤ ੧੩੪੦, ੧੩੪੩]. ਦਿਬ੍ਬਨ੍ਤਿ ਵੁਡ੍ਢਿਂ ਵਿਰੂਲ਼੍ਹਿਂ ਗਚ੍ਛਨ੍ਤਿ ਲੋਕਾ ਅਨੇਨਾਤਿ ਦੇਵੋ. ਪਜਾਨਂ ਲੋਕਾਨਂ ਅਨ੍ਨਂ ਭੋਜਨਂ ਭਵਤਿ ਏਤੇਨਾਤਿ ਪਜ੍ਜੁਨ੍ਨੋ, ਅਕਾਰਸ੍ਸੁਕਾਰੋ. ਅਮ੍ਬੁਂ ਉਦਕਂ ਧਾਰੇਤੀਤਿ ਅਮ੍ਬੁਧਰੋ. ਲੋਕਾਨਂ ਸਨ੍ਤਾਪਂ ਹਨ੍ਤੀਤਿ ਘਨੋ, ਹਸ੍ਸ ਘੋ. ਜਲਧਾਰਂ ਧਾਰੇਤੀਤਿ ਧਾਰਾਧਰੋ. ਜੀਵਨਂ ਜਲਂ ਮੂਤਂ ਬਨ੍ਧਮਨੇਨੇਤਿ ਜੀਮੂਤੋ, ਵਨਸਦ੍ਦਲੋਪੋ, ਲੋਕਾਨਂ ਵਾ ਜੀਵਿਤਂ ਮੁਨਾਤਿ ਬਨ੍ਧਤੀਤਿ ਜੀਮੂਤੋ, ਵਿਤਲੋਪੋ, ਜੀਵਿਤਸ੍ਸ ਜੀ ਆਦੇਸੋ ਵਾ [ਪਾਣਿਨਿ ੬.੩.੧੦੯; ਮੋਗ੍ਗਲ੍ਲਾਨਪਞ੍ਚਿਕਾ ੧.੪੭; ਨੀਤਿ-ਸੁਤ੍ਤ ੧੩੪੦, ੧੩੪੩]. ਏਵਂ ਅਞ੍ਞਤ੍ਰ. ਵਾਰਿਂ ਵਹਤੀਤਿ ਵਾਰਿਵਾਹੋ. ਅਮ੍ਬੁਂ ਦਦਾਤੀਤਿ ਅਮ੍ਬੁਦੋ. ਆਪਂ ਭਰਤੀਤਿ ਅਬ੍ਭਂ, ਕ੍ਵਿ, ਪਸ੍ਸ ਬੋ.
ਤਿਕਂ ਵੁਟ੍ਠਿਯਂ. ਵਸ੍ਸਤਿ ਸਿਞ੍ਚਤੀਤਿ ਵਸ੍ਸਂ, ਵਸ੍ਸ ਸੇਚਨੇ. ਏਵਂ ਵਸ੍ਸਨਵੁਟ੍ਠਿਯੋ.
ਪਞ੍ਚਕਂ ਵਿਜ੍ਜੁਯਂ. ਸਤਤਂ ਈਰਤਿ ਕਮ੍ਪਤੀਤਿ ਸਤੇਰੋ, ਤਲੋਪੋ, ਸੋ ਏਵ ਸਤੇਰਿਤਾ. ਖਣਮਤ੍ਤਮ੍ਪਿ ਨ ਤਿਟ੍ਠਤੀਤਿ ਅਕ੍ਖਣਾ. ਕੁਟਿਲਂ ਅਚਿਰਟ੍ਠਾਯਿਤਤ੍ਤਾ ਵਿਰੂਪਂ ਹੁਤ੍ਵਾ ਜਵਤੀਤਿ ਵਿਜ੍ਜੁ. ਵਿਜ੍ਜੋਤਤੀਤਿ ਵਿਜ੍ਜੁਤਾ. ਅਚਿਰਂ ਪਭਾ ਯਸ੍ਸ ਅਚਿਰਪ੍ਪਭਾ.
੪੯. ਚਤੁਕ੍ਕਂ ਮੇਘਨਾਦੇ. ਮੇਘਾਨਂ ਨਾਦੋ ਮੇਘਨਾਦੋ. ਧਨੀਯਤੇ ਧਨਿਤਂ[ਥਨਿਤਂ (ਸੀ.)], ਧਨ ਸਦ੍ਦੇ. ਗਜ੍ਜਨਂ ਗਜ੍ਜਿਤਂ, ਗਜ੍ਜ ਸਦ੍ਦੇ. ਰਸੀਯਤੇ ਰਸਿਤਂ. ਆਦਿਨਾ ਹਰਾਦਾਦਿ [ਸਬ੍ਬਤ੍ਰ ਨਪੁਂਸਕੇਭਾਵੇ ਤੋ, ਆਦਿਨਾ ਸ੍ਵਨਿਤਧਨਿਤਾਦਯੋ (ਚਿਨ੍ਤਾਮਣਿਟੀਕਾ), ਆਦਿਨਾ ਧਨਿਤਹਰਾਦਰਾਸਾਦਯੋ (ਬ੍ਯਾਖ੍ਯਾਸੁਧਾਟੀਕਾ)]. ਦ੍ਵਯਂ ਸਕ੍ਕਧਨੁਮ੍ਹਿ. ਇਨ੍ਦਸ੍ਸ ਆਵੁਧਂ ਧਨੁ ਚ ਇਨ੍ਦਾਵੁਧਂ, ਇਨ੍ਦਧਨੁ ਚ. ਵਾਤੇਨ ਖਿਤ੍ਤਮਮ੍ਬੁ ਵਾਤਕ੍ਖਿਤ੍ਤਮ੍ਬੁ, ਬਿਨ੍ਦੁ. ਸੀਤਂ ਕਰੋਤੀਤਿ ਸੀਕਰੋ, ਸਿਞ੍ਚਤੀਤਿ ਵਾ ਸੀਕਰੋ, ਚਸ੍ਸ ਕੋ, ਅਰੋ ਚ, ਵਾਤਵਸੇਨ ਵਾ ਤਤੋ ਤਤੋ ਸਰਤੀਤਿ ਸੀਕਰੋ, ਅਸ੍ਸ ਈ, ਮਜ੍ਝੇ ਕਾਗਮੋ ਚ.
੫੦. ਤਿਕਂ ਜਲਧਾਰਾਯਂ. ਵੇਗਤੋ ਜਲਧਾਰਾਨਂ ਸਂ ਭੁਸਂ ਪਤਨਂ ਆਸਾਰੋ, ਪੁਨਪ੍ਪੁਨਂ ਸਰਤੀਤਿ ਆਸਾਰੋ. ਵੇਗਂ ਧਾਰੇਤੀਤਿ ਧਾਰਾ. ਅਧੋ ਪਤਤੀਤਿ ਸਮ੍ਪਾਤੋ, ਸਂਸਦ੍ਦੋ ਅਧੋਭਾਗੇ [ਵੇਗਤੋ ਜਲਧਾਰਾਨਂ ਸਮ੍ਭੂਯ ਪਤਨਂ ਧਾਰਾਸਮ੍ਪਾਤੋ, ਸਰ ਗਤਿਯਂ ਘਉ ਇਤਿ ਆਸਾਰੋ (ਚਿਨ੍ਤਾਮਣਿਟੀਕਾ)]. ਦ੍ਵਯਂ ਵਸ੍ਸੋਪਲੇ. ਕਰੇਨ ਹਤ੍ਥੇਨ ਗਯ੍ਹੁਪਗਤ੍ਤਾ ਕਰਕਾ, ਜਲਂ ਪਿਣ੍ਡਂ ਕਰੋਤੀਤਿ ਵਾ ਕਰਕਾ, ‘‘ਵਸ੍ਸੋਪਲੇ ਤੁ ਕਰਕਾ, ਕਰਕੋਪਿ ਚ ਦਿਸ੍ਸਤੇ’’ਤਿ ਰੁਦ੍ਦੋ, ਕਰਸਦ੍ਦੋਤ੍ਰ. ‘‘ਕਰੋ ਵਸ੍ਸੋਪਲੇ ਪਾਣਿ-ਸੋਣ੍ਡਾਪਚ੍ਚਾਯਰਂਸਿਸੂ’’ਤਿ ਨਾਨਤ੍ਥਸਙ੍ਗਹੇ ਵੁਤ੍ਤਂ. ਘਨਤੋ, ਘਨਕਾਲੇ ਵਾ ਸਞ੍ਜਾਤਂ ਉਪਲਂ ਸਿਲਾ ਘਨੋਪਲਂ. ਦੁਟ੍ਠੁ ਦਿਨਂ ਦੁਦ੍ਦਿਨਂ, ਅਯਂ ਦੁਦ੍ਦਿਨਸਦ੍ਦੋ ਮੇਘਚ੍ਛਨ੍ਨਾਹੇ ਵਤ੍ਤਤਿ, ਅਸੋਭਨਤ੍ਥੋਪ੍ਯਤ੍ਥਿ ਦੁਦ੍ਦਿਨਸਦ੍ਦੋ, ਅਗੁਣਵਚਨਤਾਯਂ ਵਾਚ੍ਚਲਿਙ੍ਗੋ.
੫੧-੫੨. ਛਕ੍ਕਂ ਤਿਰੋਧਾਨੇ. ਧਰ ਆਵਰਣੇ, ਅਪਾਦਿਪੁਬ੍ਬੋ. ਅਪਿਧਰਤਿ ਆਵੁਣੋਤੀਤਿ ਪਿਧਾਨਂ, ਅਲੋਪੋ. ਅਪਧਰਤੀਤਿ ਅਪਧਾਰਣਂ. ਤਿਰੋ ਧਰਤਿ ਪਿਦਹਤੀਤਿ ਤਿਰੋਧਾਨਂ. ਅਨ੍ਤਰਂ ਧਰਤੀਤਿ ਅਨ੍ਤਰਧਾਨਂ, ਨਿਗ੍ਗਹੀਤਲੋਪੋ. ਅਪਿਧਰਤੀਤਿ ਅਪਿਧਾਨਂ. ਏਤ੍ਥ ਚ ਅਪਾਦਿਉਪਸਗ੍ਗਾ ਧਾਤੁਨੋ ਆਵਰਣਤ੍ਥਜੋਤਕਾ. ਛਾਦਯਤੀਤਿ ਛਾਦਨਂ. ਬ੍ਯਵਧਾ, ਅਨ੍ਤਰਧਿਇਚ੍ਚਾਦਯੋਪਿ ਤਿਰੋਧਾਨੇ.
ਸਾਦ੍ਧਪਜ੍ਜੇਨ ਚਨ੍ਦਸ੍ਸ ਨਾਮਾਨਿ. ਇਨ੍ਦਤਿ ਨਕ੍ਖਤ੍ਤਾਨਂ ਪਰਮਿਸ੍ਸਰਿਯਂ ਕਰੋਤੀਤਿ ਇਨ੍ਦੁ. ਚਨ੍ਦਤਿ ਹਿਲਾਦਯਤਿ ਸੁਖਯਤਿ ਪਜਨ੍ਤਿ ਚਨ੍ਦੋ. ਨਕ੍ਖਤ੍ਤਾਨਂ ਰਾਜਾ ਨਕ੍ਖਤ੍ਤਰਾਜਾ. ਉਮਾ ਕਨ੍ਤਿ, ਤਾਯ ਸਹ ਵਿਜ੍ਜਤੀਤਿ ਸੋਮੋ, ਸੁਖਂ ਅਭਿਸ੍ਸਵਤੀਤਿ ਵਾ ਸੋਮੋ, ਮਪਚ੍ਚਯੋ. ਨਿਸਂ ਰਤ੍ਤਿਂ ਕਰੋਤਿ, ਤਤ੍ਥ ਵਾ ਕਰੋ ਰਂਸਿ ਏਤਸ੍ਸ ਨਿਸਾਕਰੋ. ਅਨ੍ਧਕਾਰਂ ਉਸੇਨ੍ਤਿ ਦਹਨ੍ਤਿ ਵਿਨਾਸੇਨ੍ਤੀਤਿ ਓਸਾ, ਰਂਸਯੋ, ਤੇ ਏਤ੍ਥ ਧਿਯਨ੍ਤਿ ਪਤਿਟ੍ਠਹਨ੍ਤੀਤਿ ਓਸਧਿ, ਤਾਰਾਵਿਸੇਸੋ, ਤਸ੍ਸ ਈਸੋ ਪਤਿ ਓਸਧੀਸੋ. ਹਿਮੋ ਸੀਤਲੋ ਰਂਸਿ ਯਸ੍ਸ ਹਿਮਰਂਸਿ. ਸਸੋ ਅਙ੍ਕੋ ਲਕ੍ਖਣਂ ਯਸ੍ਸ ਸਸਙ੍ਕੋ. ਚਨ੍ਦਂ ਕਪ੍ਪੂਰਂ ਮਾਤਿ ਸਦਿਸਂ ਨਯਤੀਤਿ ਚਨ੍ਦਿਮਾ. ਇਕਾਰਾਦੇਸੋ. ਸਸਲਕ੍ਖਣਮੇਤ੍ਥ ਅਤ੍ਥਿ ਸਸੀ. ਸਸਤਿ ਵਾ ਹਿਂਸਤਿ ਉਣ੍ਹਗੁਣਨ੍ਤਿ ਸਸੀ, ਈਪਚ੍ਚਯੋ ਤਦੁਪਲਕ੍ਖਿਤੇ ਤਦੁਪਚਾਰਂ. ਸੀਤਾ ਰਂਸਯੋ ਯਸ੍ਸਤ੍ਥੀਤਿ ਸੀਤਰਂਸਿ. ਨਿਸਾਯ ਰਤ੍ਤਿਯਾ ਨਾਥੋ ਤਦਾਲਙ੍ਕਾਰਭਾਵਤੋਤਿ ਨਿਸਾਨਾਥੋ. ਉਲ਼ੂਨਂ ਤਾਰਾਨਂ ਰਾਜਾ ਉਲ਼ੁਰਾਜਾ. ਮਾਤਿ ਅਤ੍ਤਾਨਂ ਕਪ੍ਪੂਰੇਨ ਸਦਿਸਂ ਕਰੋਤੀਤਿ ਮਾ, ਮਾਸਦ੍ਦੋਯਂ ਪੁਮੇ, ਤਂਸਹਚਰਣਤੋ ਉਲ਼ੁਰਾਜਾਦਯੋਪਿ. ਹਿਮਂਸੁ, ਕੁਮੁਦਬਨ੍ਧੁ, ਵਿਧੁ, ਸੁਧਂਸੁ, ਸੁਬ੍ਭਂਸੁ, ਨਿਸਾਪਤਿ, ਮਿਗਙ੍ਕੋ, ਕਲਾਨਿਧਿ, ਦ੍ਵਿਜਰਾਜੋ, ਸਸਧਰੋ, ਨਕ੍ਖਤ੍ਤੇਸੋਇਚ੍ਚਾਦੀਨਿਪਿ ਚਨ੍ਦਸ੍ਸ ਨਾਮਾਨਿ.
੫੩-੫੪. ਸੋਲ਼ਸਨ੍ਨਂ ਭਾਗਾਨਂ ਪੂਰਣੋ ਸੋਲ਼ਸਮੋ ਭਾਗੋ ਚਨ੍ਦਸ੍ਸ ਕਲਾ, ਕਲ ਸਙ੍ਖ੍ਯਾਨੇ, ਕਲੀਯਤੇ ਏਕਾਦਿਨਾ ਸਙ੍ਖ੍ਯਾਯਤੇਤਿ ਕਲਾ. ਦ੍ਵਯਂ ਚਨ੍ਦਸ੍ਸ ਸਰੀਰੇ. ਮਞ੍ਞਤੇ ਞਾਯਤੇ ਅਨੇਨੇਤਿ ਬਿਮ੍ਬਂ. ਮਨਤੋ ਵਪਚ੍ਚਯੋ, ਨਿਪਾਤਨਾ ਮਸ੍ਸ ਬੋ, ਅਸ੍ਸਿ, ਨਸ੍ਸ ਮੋ, ਵਸ੍ਸ ਬੋ, ਬਿਮ੍ਬਸਦ੍ਦੋ ਅਨਿਤ੍ਥਿਯਂ. ਮਣ੍ਡਯਤੇਤਿ ਮਣ੍ਡਲਂ, ਅਲੋ, ਇਤ੍ਥਿਯਂ ਮਣ੍ਡਲੀ, ਅਯਂ ਤੀਸ੍ਵਪਿ [ਬਿਮ੍ਬੋ ਅਨਿਤ੍ਥੀ, ਮਣ੍ਡਲਂ ਤੀਸੁ (ਅਮਰ ੩.੧੫)].
ਪਾਦਹੀਨਪਜ੍ਜੇਨ ਅਦ੍ਧਭਾਗੋ. ਅਸਤਿ ਖੇਪੇਤਿ ਸਮੁਦਾਯਨ੍ਤਿ ਅਡ੍ਢੋ, ਤੋ. ਤਥਾ ਅਦ੍ਧੋ. ਉਪਡ੍ਢੋਤਿ ਉਪਸਗ੍ਗੇਨ ਪਦਂ ਵਡ੍ਢਿਤਂ, ਏਤੇ ਤਯੋ ਪੁਮੇ. ਖਣ੍ਡਯਤਿ ਸਮੁਦਾਯਨ੍ਤਿ ਖਣ੍ਡਂ. ਸਕ੍ਯਤੇ ਉਬ੍ਬਾਹਨਾਦੀਸੁ ਥੋਕਤ੍ਤਾਤਿ ਸਕਲਂ, ਅਲੋ, ਖਣ੍ਡਸਕਲਾ ਵਾ ਪੁਮੇ, ਸਤ੍ਥੇ ਰੂਪਭੇਦਤੋ ਨਪੁਂਸਕੇ. ਏਤੇ ਚ ਅਡ੍ਢਾਦਯੋ ਤਯੋ ਅਸਮੇ ਭਾਗੇ ਪੁਮੇ, ਸਮੇ ਤੁ ਨਪੁਂਸਕੇਤਿ ਰੂਪਭੇਦੇਨਾਹ ‘‘ਅਦ੍ਧਂ ਵੁਤ੍ਤਂ ਸਮੇ ਭਾਗੇ’’ਤਿ. ਖਣ੍ਡਾਦਿਦ੍ਵਯਂ ਪਨ ਅਸਮੇਪਿ ਵਤ੍ਤਮਾਨਂ ਪੁਨ੍ਨਪੁਂਸਕੇ ਵਤ੍ਤਤਿ, ਤਸ੍ਮਾ ‘‘ਅਦ੍ਧਂ ਵੁਤ੍ਤਂ ਸਮੇ ਭਾਗੇ’’ਤਿ ਏਤ੍ਥ ‘‘ਅਡ੍ਢਂ, ਉਪਡ੍ਢ’’ਨ੍ਤਿ ਇਦਂ ਦ੍ਵਯਮ੍ਪਿ ਸਙ੍ਗਹਿਤਂ [ਅਸਮਭਾਗੇ ਪੁਮਾਨਿ, ਸਮੇ ਅਂਸੇ ਨਪੁਂਸਕਤ੍ਤਂ ਰੂਪਭੇਦਤੋ, ਉਪਚਾਰਤੋ ਤਬ੍ਭਾਗਵਤਿ ਵਾਚ੍ਚਲਿਙ੍ਗੋ – ਅਦ੍ਧਾ ਸਾਟੀ, ਅਦ੍ਧਂ ਵਤ੍ਥਂ ਅਦ੍ਧੋ ਕਮ੍ਬਲੋ (ਚਿਨ੍ਤਾਮਣਿਟੀਕਾ)].
ਪਸਾਦਾਦਯੋ ਚਨ੍ਦੇ ਅਵਸ੍ਸਮ੍ਭਾਵਿਨੋ, ਅਞ੍ਞਤ੍ਰ ਤੁ ਪਾਸਙ੍ਗਿਕਾ ਇਤਿ ਚਨ੍ਦਪਕ੍ਕਮੇ ਉਚ੍ਚਨ੍ਤੇ. ਵਿਸੇਸੇਨ ਸਾਦਯਤਿ ਪਸਾਦਯਤੀਤਿ ਪਸਾਦੋ. ਏਵਂ ਪਸਨ੍ਨੋ, ਸੋ ਏਵ ਪਸਨ੍ਨਤਾ.
ਤਿਕਂ ਚਨ੍ਦਪ੍ਪਭਾਯਂ. ਕੁਮੁਦਸ੍ਸਾਯਂ ਵਿਕਾਸੋ [ਵਿਕਾਰੋ (ਕ.)] ਕੋਮੁਦੀ. ਚਨ੍ਦਂ ਆਚਿਕ੍ਖਤਿ ਪਟਿਪਾਦਯਤੀਤਿ ਚਨ੍ਦਿਕਾ. ਜੁਤਿ ਅਸ੍ਸਾਤ੍ਥੀਤਿ ਜੁਣ੍ਹਾ. ਤਸ੍ਸ ਣੋ, ਹਪਚ੍ਚਯੋ ਚ, ਚਨ੍ਦਸ੍ਸ ਵਾ ਜੁਤਿਂ ਸੋਭਂ ਨਯ੍ਹਤਿ ਬਨ੍ਧਤੀਤਿ ਜੁਣ੍ਹਾ.
ਚਤੁਕ੍ਕਂ ਸੋਭਨਮਤ੍ਤੇ. ਕਨਤਿ ਦਿਪ੍ਪਤੀਤਿ ਕਨ੍ਤਿ, ਕਨ ਦਿਤ੍ਤਿਯਂ, ਕਾਮੀਯਤੀਤਿ ਵਾ ਕਨ੍ਤਿ. ਸੁਨ੍ਦਰਂ ਭਾਤਿ ਦਿਪ੍ਪਤੀਤਿ ਸੋਭਾ. ਜੋਤਯਤੀਤਿ ਜੁਤਿ. ਛਾਦਯਤੀਤਿ ਛਵਿ. ਛਦ ਸਂਵਰਣੇ, ਵਿਪਚ੍ਚਯੋ, ਦਲੋਪੋ.
੫੫. ਸਤ੍ਤਕਂ ਲਕ੍ਖਣੇ. ਕਂ ਅਤ੍ਤਾਨਂ ਲਙ੍ਕਯਤਿ ਹੀਨਂ ਕਰੋਤੀਤਿ ਕਲਙ੍ਕੋ. ਲਞ੍ਛਤੇ ਲਕ੍ਖਤੇ ਅਨੇਨੇਤਿ ਲਞ੍ਛਨਂ. ਲਕ੍ਖ੍ਯਤੇ ਅਨੇਨੇਤਿ ਲਕ੍ਖਂ. ਤਥਾ ਲਕ੍ਖਣਂ. ਅਙ੍ਕੀਯਤੇ ਲਕ੍ਖ੍ਯਤੇ ਅਨੇਨੇਤਿ ਅਙ੍ਕੋ. ਅਭਿ ਵਿਸੇਸਂ ਜਾਨਾਤਿ ਏਤੇਨਾਤਿ ਅਭਿਞ੍ਞਾਣਂ. ਚਿਹੀਯਤਿ ਲਕ੍ਖੀਯਤਿ ਅਨੇਨੇਤਿ ਚਿਹਨਂ. ਚਿਹ ਲਕ੍ਖਣੇ.
ਸਬ੍ਬਾਸਂ ਸੋਭਾਨਂ ਮਜ੍ਝੇ ਪਰਮਾ ਸੋਭਾ ਸੁਸਮਾ ਨਾਮ, ਸੋਭਨਂ ਸਮਂ ਸਬ੍ਬਂ ਅਸ੍ਸਂ ਸੁਸਮਾ, ਸੇਟ੍ਠਾ ਸੋਭਾ.
੫੬. ਗੁਣੇ ਫੋਟ੍ਠਬ੍ਬਵਿਸੇਸੇ ਸੀਤਨ੍ਤਿ ਨਪੁਂਸਕਂ ਭਵਤਿ. ਦੇਵਦਤ੍ਤਸ੍ਸ ਸੀਤਂ ਵਤ੍ਤਤਿ. ਸੀਤਾਦਯੋ ਤਯੋ ਗੁਣੀਲਿਙ੍ਗਾ ਗੁਣਿਨੋ ਲਿਙ੍ਗਂ ਗਣ੍ਹਨ੍ਤਿ, ਤਂ ਯਥਾ – ਸੀਤਲਾ ਭੂਮਿ, ਸੀਤਲਂ ਜਲਂ, ਸੀਤਲੋ ਵਾਤੋ. ਉਣ੍ਹਾਭਿਤਤ੍ਤੇਹਿ ਸੇਵੀਯਤੀਤਿ ਸੀਤਂ, ਤੇਨ ਯੁਤ੍ਤੋ ਸੀਤੋ. ਸਸ ਗਤਿਯਂ, ਇਰੋ, ਇਤ੍ਤਞ੍ਚ, ਸੀਤਤ੍ਥਿਕੇਨ ਸਰੀਯਤੀਤਿ ਵਾ ਸਿਸਿਰਂ. ਸੀਤਂ ਗੁਣਂ ਲਾਤੀਤਿ ਸੀਤਲੋ.
ਮਹਿਕਾਨ੍ਤਂ ਹਿਮੇ. ਹਿਂਸਤੀਤਿ ਹਿਮਂ, ਸਸ੍ਸ ਮੋ,ਨਿਗ੍ਗਹੀਤਲੋਪੋ ਚ. ਤੁਹ ਅਦਨੇ, ਤੋਹਤਿ ਹਿਂਸਤੀਤਿ ਤੁਹਿਨਂ, ਇਨੋ. ਉਪਰਿਤੋ ਸਵਤੀਤਿ ਉਸ੍ਸਾਵੋ. ਨੀਹਰਨ੍ਤਿ ਨਿਸ੍ਸਸਨ੍ਤ੍ਯਨੇਨੇਤਿ ਨੀਹਾਰੋ, ਨਤ੍ਥਿ ਈਹਾ ਵਾ ਏਤਸ੍ਮਾ ਹੇਤੁਭੂਤਾਤਿ ਨੀਹਾਰੋ, ਆਰੋ. ਮਹੀਯਤੇ ਰਾਗੀਹੀਤਿ [ਵਾਚਾਭਿ (ਚਿਨ੍ਤਾਮਣਿਟੀਕਾ)] ਮਹਿਕਾ, ਣ੍ਵੁ.
੫੭. ਛਕ੍ਕਂ ਨਕ੍ਖਤ੍ਤੇ. ਪੁਨਪ੍ਪੁਨਂ ਉਦਯਤ੍ਤਾ ਨ ਖੀਯਤੇ ਨਕ੍ਖਤ੍ਤਂ, ਅਤ੍ਤਨੋ ਗਮਨਟ੍ਠਾਨਂ ਨ ਖਰਤਿ ਨ ਵਿਨਾਸੇਤੀਤਿ ਵਾ ਨਕ੍ਖਤ੍ਤਂ, ਅਥ ਵਾ ਨਕ੍ਖ ਗਤਿਯਂ, ਨਕ੍ਖਤੀਤਿ ਨਕ੍ਖਤ੍ਤਂ. ਜੋਤਤਿ ਸੁਭਾਸੁਭਨਿਮਿਤ੍ਤਂ ਪਕਾਸੇਤੀਤਿ ਜੋਤਿ, ਨਕ੍ਖਤ੍ਤ ਭਂਸਦ੍ਦੇਹਿ ਸਹਚਰਣਤੋ ਨਪੁਂਸਕੇ. ਯਥਾਵੁਤ੍ਤਂ ਨਿਮਿਤ੍ਤਂ ਭਾਤਿ ਪਕਾਸੇਤੀਤਿ ਭਂ. ਕਤ੍ਤਬ੍ਬਂ ਤਰਨ੍ਤਿ ਲੋਕਾ ਏਤਾਯਾਤਿ ਤਾਰਾ, ਅਤ੍ਤਨੋ ਵੀਥਿਂ ਤਾਯਤਿ ਅਰਤਿ ਗਚ੍ਛਤੀਤਿ ਵਾ ਤਾਰਾ, ਤਾਰੇਤਿ ਵਾ ਲੋਕੇ ਅਹਿਤਤੋਤਿ ਤਾਰਾ, ਅਯਞ੍ਚ ਤਾਰਕਾ, ਉਲ਼ੁ ਚ ਏਤੇ ਤਯੋ ਅਪੁਮੇ. ਤਰਾ ਏਵ ਣ੍ਵੁ, ਤਾਰਕਾ [ਤਾਰਾ ਏਵ ਤਾਰਕਾ ਣ੍ਵੁ (ਕ.)]. ਉਚ੍ਚਂ ਲਵਤਿ [ਉਲਯਤਿ (ਕ.)] ਗਚ੍ਛਤੀਤਿ ਉਲੁ. ਸੋ ਏਵ ਉਲ਼ੁ. ਨ ਕੇਵਲਂ ਤਾਰਕਾ ਏਵ ਅਪੁਮੇ, ਅਥ ਖੋ ਉਲ਼ੁ ਚਾਤਿ ਚਸਦ੍ਦਤ੍ਥੋ. ਉਲ਼ੁਸਹਚਰਿਯਤੋ ਪਕ੍ਖੇ ਨਪੁਂਸਕੇ ਚ.
੫੮-੬੦. ਅਸ੍ਸਯੁਜਾਦਯੋ ਰੇਵਤ੍ਯਨ੍ਤਾ ਸਤ੍ਤਾਧਿਕਵੀਸਤਾਰਕਾ ਨਕ੍ਖਤ੍ਤਾ ਨਾਮ ਹੋਨ੍ਤਿ. ਤਾਨਿ ਚ ਨਕ੍ਖਤ੍ਤਾਨਿ ਆਕਾਸੇ ਯਥਾਠਿਤਾਨਿ ਕਮਤੋਯੇਵ ਏਤ੍ਥ ਕਥਿਤਾਨਿ, ਨ ਉਪ੍ਪਟਿਪਾਟਿਯਾ. ਵਕ੍ਖਤਿ ਚ ‘‘ਕਮਤੋ ਸਤ੍ਤਾਧਿਕਵੀਸਤਿ ਨਕ੍ਖਤ੍ਤਾ’’ਤਿ. ਅਸ੍ਸਰੂਪਯੋਗਤੋ ਅਸ੍ਸਯੁਜੋ. ਯਮਸਦਿਸਤ੍ਤਾਸਬ੍ਬਤ੍ਰ ਭਰਤੀਤਿ ਭਰਣੀ. ਯੁ, ਈ. ਅਗ੍ਗਿਸਦਿਸਤ੍ਤਾ ਕਨ੍ਤਤਿ ਛਿਨ੍ਦਤੀਤਿ ਕਤ੍ਤਿਕਾ, ਕਰੋਤਿ ਤਸ੍ਮਾ ਵਾ ਕਤ੍ਥਿਕਾ, ਕਤ੍ਤਿਕਾਯ ਸਹਿਤਾ ਸਕਤ੍ਤਿਕਾ. ਭਰਣੀ, ਰੋਹਿਣੀ ਵਾ. ਕਮਲਸਮ੍ਭਵਤ੍ਤਾ ਕਮਲੇ ਰੁਹਤਿ ਵਡ੍ਢਤੀਤਿ ਰੋਹਿਣੀ. ਮਿਗਸੀਸਣ੍ਠਾਨਤ੍ਤਾ ਤਾਰਾਪੁਞ੍ਜੋ ਮਿਗਸਿਰਂ, ਛਟ੍ਠੀਸਮਾਸੋ ਉਤ੍ਤਰਪ੍ਪਧਾਨਤ੍ਤਾ ਨਪੁਂਸਕਤ੍ਤਂ. ਰੁਦ੍ਦਰਸਾਵਟ੍ਠਿਤਕੋਧਰੁਦ੍ਦਸਦਿਸਤ੍ਤਾ ਕਦਾਚਿ ਅਦਤਿ ਘਸਤੀਤਿ ਅਦ੍ਦਾ. ਪੁਨਪ੍ਪੁਨਂ ਸਤ੍ਤੇਸੁ ਹਿਤਂ ਵਸ੍ਸਤੀਤਿ ਪੁਨਬ੍ਬਸੁ, ਵਸ੍ਸ ਸੇਚਨੇ. ਪੋਸੇਤਿ ਕ੍ਰਿਯਾਨਿ, ਪੋਸੇਨ੍ਤ੍ਯਸ੍ਮਿਨ੍ਤਿ ਵਾ ਪੁਸ੍ਸੋ. ਭੁਜਗਸਦਿਸਤ੍ਤਾ ਨ ਸਿਲਿਸ੍ਯਤੇ ਨਾਲਿਙ੍ਗ੍ਯਤੇਤਿ ਅਸਿਲੇਸੋ.
ਮਹੀਯਤੇ ਕਾਰਿਯਤ੍ਥਿਕੇਹੀਤਿ ਮਘਾ [ਮਾਘਾ (ਕ.)], ਹਸ੍ਸ ਘੋ. ਫਲਂ ਗਣ੍ਹਾਪੇਤੀਤਿ ਫਗ੍ਗੁਨੀ, ਯੁ, ਈ. ਦ੍ਵੇਤਿ ਪੁਬ੍ਬਫਗ੍ਗੁਨੀ, ਉਤ੍ਤਰਫਗ੍ਗੁਨੀ ਚੇਤਿ ਦ੍ਵੇ. ਹਤ੍ਥਸਣ੍ਠਾਨਤਾਯ ਹਤ੍ਥੋ. ਤਚ੍ਛਕਸਦਿਸਤ੍ਤਾ ਵਿਚਿਤ੍ਤਂ ਫਲਂ ਦਦਾਤੀਤਿ ਚਿਤ੍ਤਾ. ਸੋਭਨਾ ਆਤਿ, ਸਾਤਿ ਵਾ ਤਨੁਂ ਕਰੋਤਿ ਸੁਭਾਸੁਭਨ੍ਤਿ ਸਾਤਿ [ਸ੍ਵਾਤਿ (ਕ.)], ਸੁਭਾਸੁਭਫਲਦਾਨਤੋ ਵਾ ਸਾਤਿ, ‘‘ਸਾਤਿ ਦਾਨਾਵਸਾਨੇਸੂ’’ਤਿ ਹਿ ਨਾਨਤ੍ਥਸਙ੍ਗਹੇ ਵੁਤ੍ਤਂ, ਅਯਂ ਦ੍ਵੀਸੁ. ਵਿਸਦਿਸਂ ਫਲਂ ਖਣਤੀਤਿ ਵਿਸਾਖਾ, ਵਿਵਿਧਾ ਵਾ ਸਖਾ ਮਿਤ੍ਤਾ ਯਸ੍ਸਾ ਸਾ ਵਿਸਾਖਾ. ਅਨੁਰਾਧਯਤਿ ਸਂਸਿਜ੍ਝਤਿ ਸੁਭਾਸੁਭਫਲਮੇਤਾਯਾਤਿ ਅਨੁਰਾਧਾ. ਗੁਣੇਹਿ ਸਬ੍ਬਾਸਂ ਵੁਡ੍ਢਤ੍ਤਾ ਜੇਟ੍ਠਾ. ਮੂਲਤਿ ਪਤਿਟ੍ਠਾਤਿ ਸੁਭਾਸੁਭਫਲਮੇਤ੍ਥਾਤਿ ਮੂਲਂ. ਆਸਾਲ਼੍ਹੋ ਨਾਮ ਭਤੀਨਂ ਦਣ੍ਡੋ, ਤਂਸਣ੍ਠਾਨਤ੍ਤਾ ਆਸਾਲ਼੍ਹਾ ਨਾਮ ਦ੍ਵੇ ਨਕ੍ਖਤ੍ਤਾ ਪੁਬ੍ਬਾਸਾਲ਼੍ਹਉਤ੍ਤਰਾਸਾਲ਼੍ਹਵਸੇਨ.
ਸਵਤਿ ਸੁਭਾਸੁਭਫਲਮੇਤੇਨਾਤਿ ਸਵਣੋ, ਸਵਣਂ ਵਾ. ਧਨਮੇਸਨ੍ਤਿ ਏਤ੍ਥਾਤਿ ਧਨਿਟ੍ਠਾ, ਧਨਤਿ ਵਾ ਵਿਭੂਤਿ ਨਿਧਾਨਂ ਧਨਿਟ੍ਠਾ. ਸਤਂ ਭਿਸਜਾ ਏਤ੍ਥ, ਸਤਭਿਸਜਾਨਂ ਵਾ ਅਧਿਪਤਿ ਸਤਭਿਸਜੋ. ਭਦ੍ਦੋ ਗੋ, ਤਸ੍ਸੇਵ ਪਦਾਨਿ ਪਾਦਾ ਅਸ੍ਸਂ ਭਦ੍ਦਪਦਾ, ਪੁਬ੍ਬਭਦ੍ਦਪਦਾ ਦ੍ਵੇ, ਉਤ੍ਤਰਭਦ੍ਦਪਦਾ ਦ੍ਵੇ, ਸਮੂਹੋ ਚੇਸਂ ਚਤੁਸਙ੍ਖ੍ਯਾਤਿ ਬਹੁਵਚਨਂ. ਰਾ ਵੁਚ੍ਚਤਿ ਧਨਂ, ਤਬ੍ਬਨ੍ਤਤਾਯ ਰੇਵਤੀ, ਆਕਾਰਸ੍ਸੇ, ਰੇਵਤੋ ਵਾ ਇਸਿਭੇਦੋ, ਤਸ੍ਸ ਅਪਚ੍ਚਂ ਰੇਵਤੀ.
੬੧. ਦ੍ਵਯਂ ਰਾਹੁਗ੍ਗਹੇ. ਸੋ ਵੁਚ੍ਚਤਿ ਸਗ੍ਗੋ, ਤਤ੍ਥ ਭਾਤੀਤਿ ਸੋਬ੍ਭਾਨੁ. ਰਹਤਿ ਚਨ੍ਦਾਦੀਨਂ ਸੋਭਂ ਜਹਾਪੇਤੀਤਿ ਰਾਹੁ. ਤਮੋ, ਵਿਧੁਨ੍ਤੁਦੋ, ਚਨ੍ਦਾਦੋ, ਸੇਹਿਕੇਯੋਤਿਪਿ ਰਾਹੁਸ੍ਸ ਨਾਮਾਨਿ.
ਸੂਰ, ਚਨ੍ਦ, ਅਙ੍ਗਾਰਕ, ਬੁਧ, ਜੀਵ, ਸੁਕ੍ਕ, ਅਸਿਤ, ਰਾਹੁ, ਕੇਤੂਤਿ ਏਤੇ ਸੂਰਾਦਯੋ ਨਵਗ੍ਗਹਾ ਨਾਮ.
ਮੇਸਾਦਿਕੋ ਦ੍ਵਾਦਸਕੋਟ੍ਠਾਸੋ ਰਾਸਿ ਨਾਮ. ਆਦਿਨਾ ਉਸਭ, ਮੇਥੁਨ, ਕਕ੍ਕਟ, ਸੀਹ, ਕਞ੍ਞਾ, ਤੁਲਾ, ਵਿਚ੍ਛਿਕ, ਧਨੁ, ਮਕਰ, ਕੁਮ੍ਭ, ਮੀਨੇ ਸਙ੍ਗਣ੍ਹਾਤਿ.
ਦ੍ਵਯਂ ਭਦ੍ਦਪਦਨਕ੍ਖਤ੍ਤਾਨਂ ਨਾਮਂ. ਪੋਟ੍ਠੋ ਗੋ [ਪਾਠੋ ਭਦ੍ਦੋ ਗੋ (ਕ.)], ਤਸ੍ਸੇਵ ਪਦਾਨਿ ਪਾਦਾ ਅਸ੍ਸਂ ਪੋਟ੍ਠਪਦਾ.
੬੨-੬੩. ਪਜ੍ਜਦ੍ਵਯੇਨ ਸੂਰਿਯਸ੍ਸ ਨਾਮਾਨਿ. ਆ ਭੁਸੋ ਦਿਪ੍ਪਤੀਤਿ ਆਦਿਚ੍ਚੋ, ਪ੍ਪਸ੍ਸ ਚ੍ਚੋ. ਲੋਕਾਨਂ ਸੂਰਭਾਵਂ ਜਨੇਤੀਤਿ ਸੂਰਿਯੋ. ਤਥਾ ਸੂਰੋ. ਸਤਂ ਬਹਵੋ ਰਂਸਯੋ ਯਸ੍ਸ ਸਤਰਂਸਿ. ਦਿਵਾ ਦਿਵਸਂ ਕਰੋਤੀਤਿ ਦਿਵਾਕਰੋ, ਦਿਵਸੇ ਵਾ ਕਰੋ ਆਭਾ ਯਸ੍ਸ ਦਿਵਾਕਰੋ, ਦਿਵਾਸਦ੍ਦੋਯਂ ਸਬ੍ਬਕਾਰਕਵਚਨੋ, ਨ ਤੁ ਆਧਾਰਵਚਨੋ ਏਵ. ਵਿਸੇਸੇਨ ਰੋਚਤੇ ਦਿਪ੍ਪਤੇਤਿ ਵੇਰੋਚਨੋ. ਦਿਨਂ ਕਰੋਤਿ, ਕੁਮੁਦਾਨਂ ਵਾ ਦਿਨਂ ਮਾਕੁਲ੍ਯਂ ਕਰੋਤੀਤਿ ਦਿਨਕਰੋ, ਉਣ੍ਹੋ ਰਂਸਿ ਯਸ੍ਸ ਉਣ੍ਹਰਂਸਿ. ਪਭਂ ਕਰੋਤੀਤਿ ਪਭਙ੍ਕਰੋ.
ਅਂਸੁਨੋ ਮਾਲਾ, ਸਾ ਯਤ੍ਥ ਅਤ੍ਥਿ ਅਂਸੁਮਾਲੀ. ਦਿਨਾਨਂ ਪਤਿ ਦਿਨਪਤਿ. ਤਪਤੀਤਿ ਤਪਨੋ. ਰਵਨ੍ਤਿ ਏਤੇਨ ਸਤ੍ਤਾ ਪਭਾਵਿਤ੍ਤਾਤਿ ਰਵਿ. ਭਾਨੁ ਯਸ੍ਸ ਅਤ੍ਥੀਤਿ ਭਾਨੁਮਾ. ਰਂਸਿ ਯਸ੍ਸ ਅਤ੍ਥੀਤਿ ਰਂਸਿਮਾ. ਭਂ ਆਭਂ ਕਰੋਤਿ, ਤਾਸਂ ਵਾ ਆਕਰੋ ਉਪ੍ਪਤ੍ਤਿਟ੍ਠਾਨਂ ਭਾਕਰੋ. ਭਾਤਿ ਦਿਪ੍ਪਤੀਤਿ ਭਾਨੁ. ਦੇਵੇਹਿਪਿ ਅਚ੍ਚਤੇ ਪੂਜੀਯਤੇਤਿ ਅਕ੍ਕੋ. ਸਹਸ੍ਸਂ ਬਹਵੋ ਰਂਸਯੋ ਯਸ੍ਸ ਸਹਸ੍ਸਰਂਸਿ. ਦ੍ਵਾਦਸਤ੍ਤਾ, ਪਭਾਕਰੋ, ਵਿਭਾਕਰੋ, ਵਿਕਤ੍ਤਨੋ [ਵਿਸ੍ਸਕਮ੍ਮੁਨਾ ਵਿਕਤ੍ਤਿਤੋ, ਕਮ੍ਮਨਿ ਯੁ (ਚਿਨ੍ਤਾਮਣਿਟੀਕਾ)], ਮਤ੍ਤਣ੍ਡੋ, ਦਿਵਮਣਿ, ਤਰਣਿ, ਮਿਤ੍ਤੋ, ਚਿਤ੍ਰਭਾਨੁ, ਵਿਭਾਵਸੁ, ਗਹਪ੍ਪਤਿ, ਹਂਸੋ, ਸਵਿਤਾਇਚ੍ਚਾਦੀਨਿਪਿ ਸੂਰਿਯਸ੍ਸ ਨਾਮਾਨਿ.
੬੪. ਪਜ੍ਜੇਨ ਸੂਰਿਯਾਦੀਨਂ ਰਂਸਿਪ੍ਪਭਾਨਂ ਨਾਮਾਨਿ. ਰਸਨ੍ਤਿ ਤਂ ਸਤ੍ਤਾਤਿ ਰਂਸਿ. ਆ ਭੁਸੋ ਭਾਤੀਤਿ ਆਭਾ. ਪਕਾਰੇਨ ਭਾਤੀਤਿ ਪਭਾ. ਦਿਪ੍ਪਤੀਤਿ ਦਿਤ੍ਤਿ. ਰੋਚਤੇ ਦਿਪ੍ਪਤੇਤਿ ਰੁਚਿ. ਦੀਧ੍ਯਤਿ ਦਿਪ੍ਪਤੀਤਿ ਦੀਧਿਤਿ. ਦਿਪ੍ਪਤੀਤਿ ਵਾ ਦੀਧਿਤਿ, ਪਸ੍ਸ ਧੋ, ਇਕਾਰਾਗਮੋ. ਮਿਯ੍ਯਨ੍ਤੇ ਖੁਦ੍ਦਜਨ੍ਤਵੋ ਅਨੇਨੇਤਿ ਮਰੀਚਿ, ਈਚਿ. ਅਸਤਿ ਗਚ੍ਛਤਿ ਦਿਸਨ੍ਤਨ੍ਤਿ ਅਂਸੁ, ਉਸ੍ਸਾਗਮੋ. ਮਰੀਚਿਸਹਚਰਣਤੋ ਦੀਧਿਤ੍ਯਾਦਯੋ [ਖਲਿਤਪਾਠੋ (?), ਸਵਰਸਾਮੀ ਤੁ ਅਙ੍ਗੁਲਿ ਕਾਕਲਿਸਾਰਿ ਸਰਾਰਿ ਤੁਮ੍ਬਿਅਰਿ ਸੁਸਿ ਦੀਮਿਤ੍ਯਤ੍ਤਯੋ ਥੀਪੁਮੇਸੁ ਇਚ੍ਚਾਹ (ਚਿਨ੍ਤਾਮਣਿਟੀਕਾ)] ਭਾਨੁ ਅਂਸੁ ਚ ਦ੍ਵੀਸੁ. ਮਯ ਗਮਨਤ੍ਥੋ ਦਣ੍ਡਕੋ ਧਾਤੁ [ਦਣ੍ਡਕਪ੍ਪਕਰਣੇ ਆਗਤਧਾਤੂਤਿ ਅਤ੍ਥੋ, ਨਿਰੁਤ੍ਤਿਸਾਰਮਞ੍ਜੁਸਾਟੀਕਾਯਂ ੨੫੩.੪੧੩ ਪਿਟ੍ਠੇਸੁ ਪਸ੍ਸਿਤਬ੍ਬਂ], ਖਪਚ੍ਚਯੋ ਊਕਾਰਾਗਮੋ, ਅਥ ਵਾ ਮਾ ਮਾਨੇ, ਉਖ ਗਤ੍ਯਤ੍ਥੋ ਦਣ੍ਡਕੋ ਧਾਤੁ [ਦਣ੍ਡਕਪ੍ਪਕਰਣੇ ਆਗਤਧਾਤੂਤਿ ਅਤ੍ਥੋ, ਨਿਰੁਤ੍ਤਿਸਾਰਮਞ੍ਜੁਸਾਟੀਕਾਯਂ ੨੫੩.੪੧੩ ਪਿਟ੍ਠੇਸੁ ਪਸ੍ਸਿਤਬ੍ਬਂ], ਮਾਯ ਮਾਨਾਯ ਉਖਤੀਤਿ ਮਯੂਖੋ [ਮਾਪਸਂ ਗਗਨਂ ਪਮਾਣਯਂ ਉਖਤਿ ਗਚ੍ਛਤੀਤਿ ਪਿਸੋਦਰਾਦਿ (ਚਿਨ੍ਤਾਮਣਿਟੀਕਾ)]. ਕਿਰਤਿ ਤਿਮਿਰਂ ਕਿਰਣੋ. ਕਿਰਤਿ ਤਿਮਿਰਂ ਕਰੋ.
੬੫. ਦ੍ਵਯਂ ਆਦਿਚ੍ਚਮਣ੍ਡਲੋਤਿਖ੍ਯਾਤੇ ਉਪ੍ਪਾਤਾਦਿਜਾਤੇ ਰਂਸਿਮਣ੍ਡਲੇ. ਸੂਰਿਯਸ੍ਸ ਪਰਿ ਸਮਨ੍ਤਤੋ ਧੀਯਤੇ ਪਰਿਧੀ, ਪਰਿ ਸਮਨ੍ਤਤੋ ਵਿਸਤੀਤਿ ਪਰਿਵੇਸੋ, ਸੂਰਿਯਂ ਵਾ ਪਰਿਵੇਠਯਤੀਤਿ ਪਰਿਵੇਸੋ. ਠਸ੍ਸ ਸੋ. ਉਪਸੂਰਿਯਕਂ, ਮਣ੍ਡਲਨ੍ਤਿ ਦ੍ਵੇਪਿ ਪਰਿਧਿਨੋ ਨਾਮਾਨਿ.
ਦ੍ਵਯਂ ਮਰੀਚਿਕਾਯਂ. ਮਰੀਚਿਸਦਿਸਤਾਯ ਮਰੀਚਿ. ਮਿਗਾਨਂ ਤਣ੍ਹਾ ਪਿਪਾਸਾ ਯਸ੍ਸਂ ਜਲਾਭਾਸਤ੍ਤਾ ਸਾ ਮਿਗਤਣ੍ਹਿਕਾ.
ਸੂਰਿਯਸ੍ਸ ਉਦਯਤੋ ਪੁਬ੍ਬੇ ਉਟ੍ਠਿਤਰਂਸਿ ਉਗ੍ਗਤਰਂਸਿ ਅਰੁਣੋ ਨਾਮ ਸਿਯਾ. ਅਰੁਣਵਣ੍ਣਤਾਯ ਅਰਤਿ ਗਚ੍ਛਤੀਤਿ ਅਰੁਣੋ. ਸੂਰਸੂਤੋ, ਅਨੂਰੁ, ਕਸ੍ਸਪੇਯ੍ਯੋ, ਕਸ੍ਸਪਿ, ਗਰੁਡਾਗ੍ਗਜੋਤਿਪਿ ਅਰੁਣਸ੍ਸ ਨਾਮਾਨੀਤਿ. ਆਕਾਸਵਣ੍ਣਨਾ.
੬੬-੬੭. ਚਤੁਕ੍ਕਂ ਕਾਲੇ. ਕਲ੍ਯਨ੍ਤੇ ਸਙ੍ਖ੍ਯਾਯਨ੍ਤੇ ਆਯੁਪ੍ਪਮਾਣਾਦਯੋ ਅਨੇਨਾਤਿ ਕਾਲੋ, ਕਰਣਂ ਵਾ ਕਾਰੋ, ਭਾਵੇ ਣੋ, ਸੋ ਏਵ ਕਾਲੋ, ਨ ਹਿ ਕ੍ਰਿਯਾਵਿਨਿਮੁਤ੍ਤੋ ਕਾਲੋ ਨਾਮ ਕੋਚਿ ਅਤ੍ਥਿ, ਮਹਾਕਾਲਸ੍ਸ ਪਨ ਸਸ੍ਸਤਭਾਵਤੋ ਅਤੀਤਾਦਿਵੋਹਾਰੋ ਨਤ੍ਥੇਵਾਤਿ ਅਵਯਵਕਾਲਾਨਂ ਸਮੂਹਭਾਵਤੋ ਸੋਪਿ ‘‘ਕਾਲੋ’’ਤਿ ਵੁਤ੍ਤੋ. ਸਤ੍ਤਾਨਂ ਜੀਵਿਤਂ ਅਸਤਿ ਖੇਪੇਤੀਤਿ ਅਦ੍ਧਾ, ਤਸ੍ਸ ਧੋ, ਆਕਾਰਨ੍ਤੋਯਂ ਅਦ੍ਧਾਸਦ੍ਦੋ ਪੁਮੇ. ਪੁਨਪ੍ਪੁਨਂ ਏਤੀਤਿ ਸਮਯੋ. ਵਿਨਾਸਂ ਲਾਤੀਤਿ ਵੇਲਾ, ਵਣ੍ਣਲੋਪੋ. ਦਿਟ੍ਠੋ, ਅਨੇਹੋਤਿਪਿ ਕਾਲਸ੍ਸੇਵਨਾਮਾਨਿ.
ਖਣਾਦਯੋ ਪਨ ਤਬ੍ਬਿਸੇਸਾ ਤਸ੍ਸ ਕਾਲਸ੍ਸ ਵਿਸੇਸਾ ਭੇਦਾ. ਕੇ ਤੇ, ਕਿਤ੍ਤਕਪ੍ਪਮਾਣਾ ਚੇਤ੍ਯਾਹ ‘‘ਖਣੋ’’ਇਚ੍ਚਾਦਿ. ਦਸਹਿ ਅਚ੍ਛਰਾਹਿ ਅਙ੍ਗੁਲਿਫੋਟਨੇਹਿ ਲਕ੍ਖਿਤੋ ਕਾਲੋ ਖਣੋ ਨਾਮ, ਖਣੁ ਹਿਂਸਾਯਂ, ਖਣੋਤੀਤਿ ਖਣੋ, ਅ. ਦਸ ਖਣਾ ਲਯੋ ਨਾਮ ਭਵੇ ਭਵਨ੍ਤਿ, ਏਤੇਨ ਵਾ ਵਚਨੇਨ ਵਿਕਭਿਸਙ੍ਖ੍ਯਾਪੇਕ੍ਖਿਨੋਪਿ ਵਾਚਕਾ ਸਨ੍ਤੀਤਿ ਗਮ੍ਯਤੇ. ਲਯਤਿ ਗਚ੍ਛਤਿ, ਸਤ੍ਤਾਨਂ ਜੀਵਿਤਂ ਲੁਨਨ੍ਤੋ ਵਾ ਅਯਤਿ ਗਚ੍ਛਤੀਤਿ ਲਯੋ. ਦਸ ਲਯਾ ਖਣਲਯੋ ਨਾਮ, ਖਣਲਯਾਨਂ ਸਮੂਹਭਾਵਤੋ. ਤੇ ਦਸ ਖਣਲਯਾ ਮੁਹੁਤ੍ਤੋ ਨਾਮ ਸਿਯਾ ਸਿਯੁਂ ਵਾ, ਅਯਮਨਿਤ੍ਥੀ. ਹੁਚ੍ਛ ਕੋਟਿਲ੍ਯੇ, ਕੁਟਿਲਯਤਿ ਰਤ੍ਤਿਦਿਵਸੇ ਸੁਭਾਸੁਭਦਸ੍ਸਨਤੋਤਿ ਮੁਹੁਤ੍ਤੋ, ਤੋ, ਧਾਤੁਯਾਦਿਮ੍ਹਿ ਮੁਕਾਰਾਗਮੋ, ਚ੍ਛਲੋਪੋ ਚ. ਤੇ ਦਸ ਮੁਹੁਤ੍ਤਾ ਖਣਮੁਹੁਤ੍ਤੋ ਨਾਮ.
ਤਿਕਂ ਦਿਨੇ. ਦਿਬ੍ਬਨ੍ਤਿ ਕੀਲ਼ਨ੍ਤ੍ਯਸ੍ਮਿਂ ਦਿਵਸੋ, ਸੋ. ਨ ਜਹਾਤਿ ਪਚ੍ਚਾਗਮਨਂ ਅਹਂ. ਆਦਦਾਤਿ ਨਿਬ੍ਯਾਪਾਰਨ੍ਤਿ ਦਿਨਂ, ਇਨੋ, ਆਲੋਪੋ ਚ, ਦਿਬ੍ਬਤਿ ਵਾ ਏਤ੍ਥਾਤਿ ਦਿਨਂ, ਵਸ੍ਸ ਨੋ. ਘਸਰੋ [ਘਸਤਿ ਅਨ੍ਧਕਾਰਂ ਰੋ (ਚਿਨ੍ਤਾਮਣਿਟੀਕਾ)], ਵਾਸਰੋਤਿਪਿ ਦਿਨਸ੍ਸ ਨਾਮਾਨਿ.
੬੮. ਕਲ੍ਲਨ੍ਤਂ ਪਚ੍ਚੂਸੇ. ਪਭਾਤ੍ਯਸ੍ਮਿਂ ਲੋਕੋਤਿ ਪਭਾਤਂ. ਤਥਾ ਵਿਭਾਤਂ. ਉਸ ਰੁਜਾਯਂ, ਪਚ੍ਚੂਸਤਿ ਵਿਨਾਸੇਤਿ ਤਿਮਿਰਨ੍ਤਿ ਪਚ੍ਚੂਸੋ. ਕਲ੍ਯਨ੍ਤੇ ਸਙ੍ਖ੍ਯਾਯਨ੍ਤੇ ਅਨੇਨ ਸਙ੍ਖ੍ਯਾਦਯੋਤਿ ਕਲ੍ਲਂ. ਅਹੋਮੁਖਂ, ਊਸੋਤਿਪਿ ਪਚ੍ਚੂਸਸ੍ਸ ਨਾਮਾਨਿ.
ਦ੍ਵਯਂ ਪਦੋਸੇ. ਦੋਸਾਯ ਰਤ੍ਤਿਯਾ ਆਰਮ੍ਭੋ ਅਭਿਦੋਸੋ. ਦੋਸਾਯ ਰਤ੍ਤਿਯਾ ਪਾਰਮ੍ਭੋ ਪਦੋਸੋ. ਅਭਿਧਾਨਤੋ ਪਾਸਦ੍ਦਸ੍ਸ ਪੁਬ੍ਬਨਿਪਾਤੋ, ਅਪ੍ਪਧਾਨਰਸ੍ਸੋ ਚ, ਅਥ ਵਾ ਅਭਿਦੁਸ੍ਸਨ੍ਤਿ ਪਦੁਸ੍ਸਨ੍ਤਿ ਚ ਯਤ੍ਥ ਸਬ੍ਬਕਮ੍ਮਾਨਿ ਅਭਿਦੋਸੋ ਪਦੋਸੋ ਚ.
ਤਿਕਂ ਸਾਯਨ੍ਹੇ. ਸਾਯਤਿ ਦਿਨਂ ਅਵਸਾਯਤੀਤਿ ਸਾਯੋ, ਸਾਯਨ੍ਤੋ ਵਾ ਦਿਨਨ੍ਤਂ ਕਰੋਨ੍ਤੋ ਅਯਤੀਤਿ ਸਾਯੋ, ਪੁਨ੍ਨਪੁਂਸਕੇ. ਸਮ੍ਮਾਝਾਯਨ੍ਤਿ ਤਂ ਸਞ੍ਝਾ, (‘‘ਬ੍ਰਹ੍ਮੁਨੋ ਤਨੁ ਪਿਤਾ ਲੋਕਸ੍ਸ ਜਨੇਤ੍ਤੀ’’ਤਿ ਹਿ ਆਗਮੋ ਨਿਕਾਯਨ੍ਤਰਿਕਾਨਂ.) [( ) ਏਤ੍ਥਨ੍ਤਰੇ ਪਾਠੋ ਅਧਿਕੋ ਵਿਯ ਦਿਸ੍ਸਤਿ] ਦਿਨਾਨਂ ਅਚ੍ਚਯੋ ਅਤਿਕ੍ਕਮੋ, ਅਵਸਾਨਂ ਵਾ ਦਿਨਚ੍ਚਯੋ. ਦਿਨਨ੍ਤੋਤਿਪਿ ਤਸ੍ਸੇਵ ਨਾਮਂ.
ਪੁਬ੍ਬਣ੍ਹਾਪਰਣ੍ਹਮਜ੍ਝਨ੍ਹਵਸੇਨ ਤਿਵਿਧਾ ਸਞ੍ਝਾ [ਅਮਰ ੪.੩]. ਪੁਬ੍ਬਞ੍ਚ ਤਂ ਅਹਞ੍ਚਾਤਿ ਪੁਬ੍ਬਣ੍ਹਂ. ਅਪਰਞ੍ਚ ਤਂ ਮਜ੍ਝਞ੍ਚ ਤਂ ਅਹਞ੍ਚੇਤਿ ਅਪਰਣ੍ਹਂ ਮਜ੍ਝਨ੍ਹਂ. ਸਬ੍ਬਤ੍ਰਾਵਯਵੇ ਸਮੁਦਾਯੋਪਚਾਰਤੋ ਅਹਸ੍ਸੇਕਦੇਸੇ ਅਹਸਦ੍ਦੋਤਿ ਕਮ੍ਮਧਾਰਯੋ, ਤਾਸਂ ਤਿਸ੍ਸਨ੍ਨਂ ਸਞ੍ਝਾਨਂ ਸਮਾਹਾਰੋਤਿ ਸਞ੍ਝਮਿਤ੍ਯੁਚ੍ਚਤੇ. ਸਮਾਹਰਣਂ ਸਮਾਹਾਰੋ, ਏਕੀਭਾਵੋ, ਸੋ ਚ ਭਿਨ੍ਨਕਾਲਾਨਂ ਨ ਭਵਤੀਤਿ ਬੁਦ੍ਧਿਯਾ ਸਮਕਾਲਗ੍ਗਹਣਤੋ ਏਕਕਾਲਤ੍ਤਾ ਤਸ੍ਮਿਂ ਅਭਿਧੇਯ੍ਯੇ ਦਿਗੁਸਮਾਸੋ, ਤਥਾ ਹਿ ਸਮਾਹਾਰੋ ਸਮੂਹੋ ਤਂਸਮ੍ਬਨ੍ਧੇ ਛਟ੍ਠਿਯਾਯੇਵ ਭਵਿਤਬ੍ਬਨ੍ਤਿ ਚਿਨ੍ਤੇਨ੍ਤੋ ਆਚਰਿਯੋ ਨ ਅਞ੍ਞਪਦਤ੍ਥਸਮਾਸੋ ਅਯਨ੍ਤਿ ਆਕਾਰਸ੍ਸਾਪ੍ਪਧਾਨੇ ਰਸ੍ਸਤ੍ਤਨ੍ਤਿ ਸਞ੍ਝਂ. ਸਮਾਹਾਰੋ ਭਾਵੋ ਤਸ੍ਸੇਕਤ੍ਤਾ ਏਕਵਚਨਂ, ਕਮ੍ਮਵਚਨੇ ਤੁ ਸਮਾਹਾਰੇ ਤਿਸ੍ਸੋ ਸਞ੍ਝਾ ਸਮਾਹਟਾਤਿ ਪਠਮਨ੍ਤਾਨਂ ਸਮਾਸੇ ਸਪਦਤ੍ਥਪਾਧਾਨ੍ਯਾ ਬਹੁਵਚਨਂ, ਰਸ੍ਸਾਭਾਵੋ ਚ.
੬੯. ਪਞ੍ਚਕਂ ਰਤ੍ਤਿਯਂ. ਨਿਸਤਿ ਤਨੁਂ ਕਰੋਤਿ ਸਬ੍ਬਬ੍ਯਾਪਾਰਂ ਨਿਸਾ. ਰਜ੍ਜਨ੍ਤਿ ਰਾਗਿਨੋ ਅਤ੍ਰ ਰਜਨੀ, ਯੁ, ਈ. ਰਾਤਿ ਗਣ੍ਹਾਤਿ ਅਬ੍ਯਾਪਾਰਨ੍ਤਿ ਰਤ੍ਤਿ,ਤਿ, ਰਜ੍ਜਨ੍ਤਿ ਵਾ ਏਤ੍ਥ ਰਤ੍ਤਿ. ਪਠਮਮਜ੍ਝਿਮਪਚ੍ਛਿਮਯਾਮਵਸੇਨ ਤਯੋ ਯਾਮਾ ਪਹਾਰਾ ਯਸ੍ਸਾ ਤਿਯਾਮਾ. ਸਂਵੁਣੋਤਿ ਦਿਨਂ ਸਂਵਰੀ. ਨਿਸੀਥਿਨੀ, ਖਣਦਾ, ਖਪਾ, ਵਿਭਾਵਰੀ, ਤਮਸ੍ਸਿਨੀ, ਯਾਮਿਨੀ, ਤਮੀਇਚ੍ਚਾਦੀਨਿਪਿ ਰਤ੍ਤਿਯਾ ਨਾਮਾਨਿ.
ਚਨ੍ਦਿਕਾਯੁਤ੍ਤਾ ਚਨ੍ਦਪ੍ਪਭਾਯ ਯੁਤ੍ਤਾ ਰਤ੍ਤਿ ਜੁਣ੍ਹਾ ਨਾਮ, ਜੁਣ੍ਹਾਯੋਗਤੋ ਜੁਣ੍ਹਾ. ਤਮੋ ਉਸ੍ਸਨ੍ਨੋ ਯਸ੍ਸਂ ਸਾ ਤਮੁਸ੍ਸਨ੍ਨਾ ਰਤ੍ਤਿ ਤਿਮਿਸਿਕਾ ਨਾਮ, ਤਿਮਿਸਂ ਉਸ੍ਸਨ੍ਨਂ ਏਤ੍ਥਾਤਿ ਤਿਮਿਸਿਕਾ, ਉਪਧਾਯ ਇਤ੍ਤਞ੍ਚ.
੭੦. ਤਿਕਂ ਅਡ੍ਢਰਤ੍ਤਿਯਂ. ਮਜ੍ਝਿਮਾਰਤ੍ਤਿ ਕਮ੍ਮਭੂਤਾ ‘‘ਨਿਸੀਥੋ, ਅਡ੍ਢਰਤ੍ਤੋ, ਮਹਾਨਿਸਾ’’ਤਿ ਚ ਵੁਚ੍ਚਤਿ. ਨਿਸ੍ਸਤੇ ਸਯਤੇ ਅਸ੍ਮਿਂ ਨਿਸੀਥੋ. ਅਡ੍ਢਞ੍ਚ ਤਂ ਰਤ੍ਤਿ ਚਾਤਿ ਅਡ੍ਢਰਤ੍ਤੋ, ਰਤ੍ਤੇਕਦੇਸੇ ਰਤ੍ਤਿਸਦ੍ਦੋ, ਰਤ੍ਤਿਯਾ ਅਡ੍ਢਨ੍ਤਿ ਵਾ ਅਡ੍ਢਰਤ੍ਤੋ. ਮਹਤੀ ਚ ਸਾ ਨਿਸਾ ਚਾਤਿ ਮਹਾਨਿਸਾ.
ਚਤੁਕ੍ਕਂ ਅਨ੍ਧਕਾਰੇ. ਅਨ੍ਧਂ ਹਤਂ ਦਿਟ੍ਠਸਤ੍ਤਿਕਂ ਲੋਕਂ ਕਰੋਤੀਤਿ ਅਨ੍ਧਕਾਰੋ. ਤਮਤੀਤਿ ਤਮੋ, ਅਥ ਵਾ ਤਮਨ੍ਤਿ ਆਕਙ੍ਖਨ੍ਤਿ ਰਤਿਂ ਲੋਕਾ ਏਤ੍ਥ ਤਮੋ, ਤਮੁ ਆਕਙ੍ਖਾਯਂ, ਤਮਸਦ੍ਦੋ ਅਨਿਤ੍ਥੀ, ਤਂਸਹਚਰਣਤੋ ਅਨ੍ਧਕਾਰੋਪਿ. ਤਿਮਿਸਂ ਇਸੋ, ਅਥ ਵਾ ਤਿਮੁ ਤੇਮਨੇ, ਤਿਮਨ੍ਤਿ ਏਤ੍ਥ ਰਾਗੇਨਾਤਿ ਤਿਮਿਸਂ. ਤਿਮਿਰਂ, ਪੁਬ੍ਬੇਵ ਇਰਪਚ੍ਚਯੋ.
੭੧. ਚਤੁਦ੍ਦਸਨ੍ਨਂ ਰਤ੍ਤੀਨਂ ਪੂਰਣੀ ਚਤੁਦ੍ਦਸੀਸਙ੍ਖਾਤੋ ਕਾਲ਼ਪਕ੍ਖੋ ਚ ਏਕਗ੍ਘਨੋ ਵਨਸਣ੍ਡੋ ਚ ਮੇਘਪਟਲਞ੍ਚ ਅਡ੍ਢਰਤ੍ਤਿ ਚ ਏਤੇਹਿ ਚਤੂਹਿ ਸਮਨ੍ਨਾਗਤੋ ਤਮੋ ਚਤੁਰਙ੍ਗਤਮਂ ਨਾਮ.
੭੨. ਅਨ੍ਧਞ੍ਚ ਤਂ ਤਮਞ੍ਚਾਤਿ ਅਨ੍ਧਤਮਂ, ਯਂ ਲੋਕਂ ਅਨ੍ਧਕਾਰਂ ਕਰੋਤਿ. ਅਯਂ ਅਨ੍ਧਤਮਸਦ੍ਦੋ ਘਨਤਮੇ ਬਾਲ਼੍ਹਤਮੇ ਵਤ੍ਤਤਿ.