੫. ਗਣ੍ਡਸੁਤ੍ਤਂ

੧੫. ‘‘ਸੇਯ੍ਯਥਾਪਿ, ਭਿਕ੍ਖਵੇ, ਗਣ੍ਡੋ ਅਨੇਕਵਸ੍ਸਗਣਿਕੋ. ਤਸ੍ਸਸ੍ਸੁ ਗਣ੍ਡਸ੍ਸ ਨਵ ਵਣਮੁਖਾਨਿ ਨਵ ਅਭੇਦਨਮੁਖਾਨਿ. ਤਤੋ ਯਂ ਕਿਞ੍ਚਿ ਪਗ੍ਘਰੇਯ੍ਯ – ਅਸੁਚਿਯੇਵ ਪਗ੍ਘਰੇਯ੍ਯ, ਦੁਗ੍ਗਨ੍ਧਂਯੇਵ ਪਗ੍ਘਰੇਯ੍ਯ, ਜੇਗੁਚ੍ਛਿਯਂਯੇਵ [ਜੇਗੁਚ੍ਛਿਯੇਵ (ਕ.)] ਪਗ੍ਘਰੇਯ੍ਯ; ਯਂ ਕਿਞ੍ਚਿ ਪਸਵੇਯ੍ਯ – ਅਸੁਚਿਯੇਵ ਪਸਵੇਯ੍ਯ, ਦੁਗ੍ਗਨ੍ਧਂਯੇਵ ਪਸਵੇਯ੍ਯ, ਜੇਗੁਚ੍ਛਿਯਂਯੇਵ ਪਸਵੇਯ੍ਯ.

‘‘ਗਣ੍ਡੋਤਿ ਖੋ, ਭਿਕ੍ਖਵੇ, ਇਮਸ੍ਸੇਤਂ ਚਾਤੁਮਹਾਭੂਤਿਕਸ੍ਸ [ਚਾਤੁਮ੍ਮਹਾਭੂਤਿਕਸ੍ਸ (ਸੀ. ਸ੍ਯਾ. ਪੀ.)] ਕਾਯਸ੍ਸ ਅਧਿਵਚਨਂ ਮਾਤਾਪੇਤ੍ਤਿਕਸਮ੍ਭਵਸ੍ਸ ਓਦਨਕੁਮ੍ਮਾਸੂਪਚਯਸ੍ਸ ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮਸ੍ਸ. ਤਸ੍ਸਸ੍ਸੁ ਗਣ੍ਡਸ੍ਸ ਨਵ ਵਣਮੁਖਾਨਿ ਨਵ ਅਭੇਦਨਮੁਖਾਨਿ. ਤਤੋ ਯਂ ਕਿਞ੍ਚਿ ਪਗ੍ਘਰਤਿ – ਅਸੁਚਿਯੇਵ ਪਗ੍ਘਰਤਿ, ਦੁਗ੍ਗਨ੍ਧਂਯੇਵ ਪਗ੍ਘਰਤਿ, ਜੇਗੁਚ੍ਛਿਯਂਯੇਵ ਪਗ੍ਘਰਤਿ; ਯਂ ਕਿਞ੍ਚਿ ਪਸਵਤਿ – ਅਸੁਚਿਯੇਵ ਪਸਵਤਿ, ਦੁਗ੍ਗਨ੍ਧਂਯੇਵ ਪਸਵਤਿ, ਜੇਗੁਚ੍ਛਿਯਂਯੇਵ ਪਸਵਤਿ. ਤਸ੍ਮਾਤਿਹ, ਭਿਕ੍ਖਵੇ, ਇਮਸ੍ਮਿਂ ਕਾਯੇ ਨਿਬ੍ਬਿਨ੍ਦਥਾ’’ਤਿ. ਪਞ੍ਚਮਂ.