੨. ਸੀਹਨਾਦਵਗ੍ਗੋ

੧. ਸੀਹਨਾਦਸੁਤ੍ਤਂ

੧੧. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ – ‘‘ਵੁਤ੍ਥੋ ਮੇ, ਭਨ੍ਤੇ, ਸਾਵਤ੍ਥਿਯਂ ਵਸ੍ਸਾਵਾਸੋ. ਇਚ੍ਛਾਮਹਂ, ਭਨ੍ਤੇ, ਜਨਪਦਚਾਰਿਕਂ ਪਕ੍ਕਮਿਤੁ’’ਨ੍ਤਿ. ‘‘ਯਸ੍ਸਦਾਨਿ ਤ੍ਵਂ, ਸਾਰਿਪੁਤ੍ਤ, ਕਾਲਂ ਮਞ੍ਞਸੀ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਉਟ੍ਠਾਯਾਸਨਾ ਭਗਵਨ੍ਤਂ ਅਭਿਵਾਦੇਤ੍ਵਾ ਪਦਕ੍ਖਿਣਂ ਕਤ੍ਵਾ ਪਕ੍ਕਾਮਿ. ਅਥ ਖੋ ਅਞ੍ਞਤਰੋ ਭਿਕ੍ਖੁ ਅਚਿਰਪਕ੍ਕਨ੍ਤੇ ਆਯਸ੍ਮਨ੍ਤੇ ਸਾਰਿਪੁਤ੍ਤੇ ਭਗਵਨ੍ਤਂ ਏਤਦਵੋਚ – ‘‘ਆਯਸ੍ਮਾ ਮਂ, ਭਨ੍ਤੇ, ਸਾਰਿਪੁਤ੍ਤੋ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਨ੍ਤੋ’’ਤਿ. ਅਥ ਖੋ ਭਗਵਾ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸਿ – ‘‘ਏਹਿ ਤ੍ਵਂ, ਭਿਕ੍ਖੁ, ਮਮ ਵਚਨੇਨ ਸਾਰਿਪੁਤ੍ਤਂ ਆਮਨ੍ਤੇਹਿ – ‘ਸਤ੍ਥਾ ਤਂ, ਆਵੁਸੋ ਸਾਰਿਪੁਤ੍ਤ, ਆਮਨ੍ਤੇਤੀ’’’ਤਿ. ‘‘ਏਵਂ, ਭਨ੍ਤੇ’’ਤਿ ਖੋ ਸੋ ਭਿਕ੍ਖੁ ਭਗਵਤੋ ਪਟਿਸ੍ਸੁਤ੍ਵਾ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਸਤ੍ਥਾ ਤਂ, ਆਵੁਸੋ ਸਾਰਿਪੁਤ੍ਤ, ਆਮਨ੍ਤੇਤੀ’’ਤਿ. ‘‘ਏਵਮਾਵੁਸੋ’’ਤਿ ਖੋ ਆਯਸ੍ਮਾ ਸਾਰਿਪੁਤ੍ਤੋ ਤਸ੍ਸ ਭਿਕ੍ਖੁਨੋ ਪਚ੍ਚਸ੍ਸੋਸਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ [ਮਹਾਮੋਗ੍ਗਲਾਨੋ (ਕ.)] ਆਯਸ੍ਮਾ ਚ ਆਨਨ੍ਦੋ ਅਵਾਪੁਰਣਂ [ਅਪਾਪੁਰਣਂ (ਸ੍ਯਾ. ਕ.)] ਆਦਾਯ ਵਿਹਾਰੇ ਆਹਿਣ੍ਡਨ੍ਤਿ [ਵਿਹਾਰੇਨ ਵਿਹਾਰਂ ਅਨ੍ਵਾਹਿਣ੍ਡਨ੍ਤਿ (ਸੀ. ਪੀ.), ਵਿਹਾਰਂ ਆਹਿਣ੍ਡਨ੍ਤਿ (ਸ੍ਯਾ.)] – ‘‘ਅਭਿਕ੍ਕਮਥਾਯਸ੍ਮਨ੍ਤੋ, ਅਭਿਕ੍ਕਮਥਾਯਸ੍ਮਨ੍ਤੋ! ਇਦਾਨਾਯਸ੍ਮਾ ਸਾਰਿਪੁਤ੍ਤੋ ਭਗਵਤੋ ਸਮ੍ਮੁਖਾ ਸੀਹਨਾਦਂ ਨਦਿਸ੍ਸਤੀ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਭਗਵਾ ਏਤਦਵੋਚ – ‘‘ਇਧ ਤੇ, ਸਾਰਿਪੁਤ੍ਤ, ਅਞ੍ਞਤਰੋ ਸਬ੍ਰਹ੍ਮਚਾਰੀ ਖੀਯਨਧਮ੍ਮਂ ਆਪਨ੍ਨੋ – ‘ਆਯਸ੍ਮਾ ਮਂ, ਭਨ੍ਤੇ, ਸਾਰਿਪੁਤ੍ਤੋ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜਚਾਰਿਕਂ ਪਕ੍ਕਨ੍ਤੋ’’’ਤਿ.

‘‘ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਪਥਵਿਯਂ ਸੁਚਿਮ੍ਪਿ ਨਿਕ੍ਖਿਪਨ੍ਤਿ ਅਸੁਚਿਮ੍ਪਿ ਨਿਕ੍ਖਿਪਨ੍ਤਿ ਗੂਥਗਤਮ੍ਪਿ ਨਿਕ੍ਖਿਪਨ੍ਤਿ ਮੁਤ੍ਤਗਤਮ੍ਪਿ ਨਿਕ੍ਖਿਪਨ੍ਤਿ ਖੇਲ਼ਗਤਮ੍ਪਿ ਨਿਕ੍ਖਿਪਨ੍ਤਿ ਪੁਬ੍ਬਗਤਮ੍ਪਿ ਨਿਕ੍ਖਿਪਨ੍ਤਿ ਲੋਹਿਤਗਤਮ੍ਪਿ ਨਿਕ੍ਖਿਪਨ੍ਤਿ, ਨ ਚ ਤੇਨ ਪਥਵੀ ਅਟ੍ਟੀਯਤਿ ਵਾ ਹਰਾਯਤਿ ਵਾ ਜਿਗੁਚ੍ਛਤਿ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਪਥਵੀਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਆਪਸ੍ਮਿਂ ਸੁਚਿਮ੍ਪਿ ਧੋਵਨ੍ਤਿ ਅਸੁਚਿਮ੍ਪਿ ਧੋਵਨ੍ਤਿ ਗੂਥਗਤਮ੍ਪਿ… ਮੁਤ੍ਤਗਤਮ੍ਪਿ… ਖੇਲ਼ਗਤਮ੍ਪਿ… ਪੁਬ੍ਬਗਤਮ੍ਪਿ… ਲੋਹਿਤਗਤਮ੍ਪਿ ਧੋਵਨ੍ਤਿ, ਨ ਚ ਤੇਨ ਆਪੋ ਅਟ੍ਟੀਯਤਿ ਵਾ ਹਰਾਯਤਿ ਵਾ ਜਿਗੁਚ੍ਛਤਿ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਆਪੋਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਤੇਜੋ ਸੁਚਿਮ੍ਪਿ ਡਹਤਿ ਅਸੁਚਿਮ੍ਪਿ ਡਹਤਿ ਗੂਥਗਤਮ੍ਪਿ… ਮੁਤ੍ਤਗਤਮ੍ਪਿ… ਖੇਲ਼ਗਤਮ੍ਪਿ… ਪੁਬ੍ਬਗਤਮ੍ਪਿ… ਲੋਹਿਤਗਤਮ੍ਪਿ ਡਹਤਿ, ਨ ਚ ਤੇਨ ਤੇਜੋ ਅਟ੍ਟੀਯਤਿ ਵਾ ਹਰਾਯਤਿ ਵਾ ਜਿਗੁਚ੍ਛਤਿ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਤੇਜੋਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਵਾਯੋ ਸੁਚਿਮ੍ਪਿ ਉਪਵਾਯਤਿ ਅਸੁਚਿਮ੍ਪਿ ਉਪਵਾਯਤਿ ਗੂਥਗਤਮ੍ਪਿ… ਮੁਤ੍ਤਗਤਮ੍ਪਿ… ਖੇਲ਼ਗਤਮ੍ਪਿ… ਪੁਬ੍ਬਗਤਮ੍ਪਿ… ਲੋਹਿਤਗਤਮ੍ਪਿ ਉਪਵਾਯਤਿ, ਨ ਚ ਤੇਨ ਵਾਯੋ ਅਟ੍ਟੀਯਤਿ ਵਾ ਹਰਾਯਤਿ ਵਾ ਜਿਗੁਚ੍ਛਤਿ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਵਾਯੋਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਰਜੋਹਰਣਂ ਸੁਚਿਮ੍ਪਿ ਪੁਞ੍ਛਤਿ ਅਸੁਚਿਮ੍ਪਿ ਪੁਞ੍ਛਤਿ ਗੂਥਗਤਮ੍ਪਿ… ਮੁਤ੍ਤਗਤਮ੍ਪਿ… ਖੇਲ਼ਗਤਮ੍ਪਿ… ਪੁਬ੍ਬਗਤਮ੍ਪਿ… ਲੋਹਿਤਗਤਮ੍ਪਿ ਪੁਞ੍ਛਤਿ, ਨ ਚ ਤੇਨ ਰਜੋਹਰਣਂ ਅਟ੍ਟੀਯਤਿ ਵਾ ਹਰਾਯਤਿ ਵਾ ਜਿਗੁਚ੍ਛਤਿ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਰਜੋਹਰਣਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਚਣ੍ਡਾਲਕੁਮਾਰਕੋ ਵਾ ਚਣ੍ਡਾਲਕੁਮਾਰਿਕਾ ਵਾ ਕਲ਼ੋਪਿਹਤ੍ਥੋ ਨਨ੍ਤਕਵਾਸੀ ਗਾਮਂ ਵਾ ਨਿਗਮਂ ਵਾ ਪਵਿਸਨ੍ਤੋ ਨੀਚਚਿਤ੍ਤਂਯੇਵ ਉਪਟ੍ਠਪੇਤ੍ਵਾ ਪਵਿਸਤਿ; ਏਵਮੇਵਂ ਖੋ ਅਹਂ, ਭਨ੍ਤੇ, ਚਣ੍ਡਾਲਕੁਮਾਰਕਚਣ੍ਡਾਲਕੁਮਾਰਿਕਾਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਉਸਭੋ ਛਿਨ੍ਨਵਿਸਾਣੋ ਸੂਰਤੋ ਸੁਦਨ੍ਤੋ ਸੁਵਿਨੀਤੋ ਰਥਿਯਾਯ ਰਥਿਯਂ ਸਿਙ੍ਘਾਟਕੇਨ ਸਿਙ੍ਘਾਟਕਂ ਅਨ੍ਵਾਹਿਣ੍ਡਨ੍ਤੋ ਨ ਕਿਞ੍ਚਿ ਹਿਂਸਤਿ ਪਾਦੇਨ ਵਾ ਵਿਸਾਣੇਨ ਵਾ; ਏਵਮੇਵਂ ਖੋ ਅਹਂ, ਭਨ੍ਤੇ, ਉਸਭਛਿਨ੍ਨਵਿਸਾਣਸਮੇਨ ਚੇਤਸਾ ਵਿਹਰਾਮਿ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਇਤ੍ਥੀ ਵਾ ਪੁਰਿਸੋ ਵਾ ਦਹਰੋ ਯੁਵਾ ਮਣ੍ਡਨਕਜਾਤਿਕੋ ਸੀਸਂਨ੍ਹਾਤੋ ਅਹਿਕੁਣਪੇਨ ਵਾ ਕੁਕ੍ਕੁਰਕੁਣਪੇਨ ਵਾ ਮਨੁਸ੍ਸਕੁਣਪੇਨ ਵਾ ਕਣ੍ਠੇ ਆਸਤ੍ਤੇਨ ਅਟ੍ਟੀਯੇਯ੍ਯ ਹਰਾਯੇਯ੍ਯ ਜਿਗੁਚ੍ਛੇਯ੍ਯ; ਏਵਮੇਵਂ ਖੋ ਅਹਂ, ਭਨ੍ਤੇ, ਇਮਿਨਾ ਪੂਤਿਕਾਯੇਨ ਅਟ੍ਟੀਯਾਮਿ ਹਰਾਯਾਮਿ ਜਿਗੁਚ੍ਛਾਮਿ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯ.

‘‘ਸੇਯ੍ਯਥਾਪਿ, ਭਨ੍ਤੇ, ਪੁਰਿਸੋ ਮੇਦਕਥਾਲਿਕਂ ਪਰਿਹਰੇਯ੍ਯ ਛਿਦ੍ਦਾਵਛਿਦ੍ਦਂ ਉਗ੍ਘਰਨ੍ਤਂ ਪਗ੍ਘਰਨ੍ਤਂ; ਏਵਮੇਵਂ ਖੋ ਅਹਂ, ਭਨ੍ਤੇ, ਇਮਂ ਕਾਯਂ ਪਰਿਹਰਾਮਿ ਛਿਦ੍ਦਾਵਛਿਦ੍ਦਂ ਉਗ੍ਘਰਨ੍ਤਂ ਪਗ੍ਘਰਨ੍ਤਂ. ਯਸ੍ਸ ਨੂਨ, ਭਨ੍ਤੇ, ਕਾਯੇ ਕਾਯਗਤਾਸਤਿ ਅਨੁਪਟ੍ਠਿਤਾ ਅਸ੍ਸ, ਸੋ ਇਧ ਅਞ੍ਞਤਰਂ ਸਬ੍ਰਹ੍ਮਚਾਰਿਂ ਆਸਜ੍ਜ ਅਪ੍ਪਟਿਨਿਸ੍ਸਜ੍ਜ ਚਾਰਿਕਂ ਪਕ੍ਕਮੇਯ੍ਯਾ’’ਤਿ.

ਅਥ ਖੋ ਸੋ ਭਿਕ੍ਖੁ ਉਟ੍ਠਾਯਾਸਨਾ ਏਕਂਸਂ ਉਤ੍ਤਰਾਸਙ੍ਗਂ ਕਰਿਤ੍ਵਾ ਭਗਵਤੋ ਪਾਦੇਸੁ ਸਿਰਸਾ ਨਿਪਤਿਤ੍ਵਾ ਭਗਵਨ੍ਤਂ ਏਤਦਵੋਚ – ‘‘ਅਚ੍ਚਯੋ ਮਂ, ਭਨ੍ਤੇ, ਅਚ੍ਚਗਮਾ ਯਥਾਬਾਲਂ ਯਥਾਮੂਲ਼੍ਹਂ ਯਥਾਅਕੁਸਲਂ, ਯੋ ਅਹਂ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਅਸਤਾ ਤੁਚ੍ਛਾ ਮੁਸਾ ਅਭੂਤੇਨ ਅਬ੍ਭਾਚਿਕ੍ਖਿਂ. ਤਸ੍ਸ ਮੇ, ਭਨ੍ਤੇ, ਭਗਵਾ ਅਚ੍ਚਯਂ ਅਚ੍ਚਯਤੋ ਪਟਿਗ੍ਗਣ੍ਹਤੁ ਆਯਤਿਂ ਸਂਵਰਾਯਾ’’ਤਿ. ‘‘ਤਗ੍ਘ ਤਂ [ਤ੍ਵਂ (ਸੀ. ਪੀ.)], ਭਿਕ੍ਖੁ, ਅਚ੍ਚਯੋ ਅਚ੍ਚਗਮਾ ਯਥਾਬਾਲਂ ਯਥਾਮੂਲ਼੍ਹਂ ਯਥਾਅਕੁਸਲਂ, ਯੋ ਤ੍ਵਂ ਸਾਰਿਪੁਤ੍ਤਂ ਅਸਤਾ ਤੁਚ੍ਛਾ ਮੁਸਾ ਅਭੂਤੇਨ ਅਬ੍ਭਾਚਿਕ੍ਖਿ. ਯਤੋ ਚ ਖੋ ਤ੍ਵਂ, ਭਿਕ੍ਖੁ, ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਸਿ, ਤਂ ਤੇ ਮਯਂ ਪਟਿਗ੍ਗਣ੍ਹਾਮ. ਵੁਡ੍ਢਿਹੇਸਾ, ਭਿਕ੍ਖੁ, ਅਰਿਯਸ੍ਸ ਵਿਨਯੇ ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ ਆਯਤਿਂ ਸਂਵਰਂ ਆਪਜ੍ਜਤੀ’’ਤਿ.

ਅਥ ਖੋ ਭਗਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਆਮਨ੍ਤੇਸਿ – ‘‘ਖਮ, ਸਾਰਿਪੁਤ੍ਤ, ਇਮਸ੍ਸ ਮੋਘਪੁਰਿਸਸ੍ਸ, ਪੁਰਾ ਤਸ੍ਸ ਤਤ੍ਥੇਵ ਸਤ੍ਤਧਾ ਮੁਦ੍ਧਾ ਫਲਤੀ’’ਤਿ [ਫਲਿਸ੍ਸਤੀਤਿ (ਕ. ਸੀ. ਸ੍ਯਾ. ਪੀ. ਕ.) ਅਟ੍ਠਕਥਾਸੁ ਪਨ ‘‘ਫਲਤੀਤਿ’’ ਇਤ੍ਵੇਵ ਦਿਸ੍ਸਤਿ]. ‘‘ਖਮਾਮਹਂ, ਭਨ੍ਤੇ, ਤਸ੍ਸ ਆਯਸ੍ਮਤੋ ਸਚੇ ਮਂ ਸੋ ਆਯਸ੍ਮਾ ਏਵਮਾਹ – ‘ਖਮਤੁ ਚ ਮੇ ਸੋ ਆਯਸ੍ਮਾ’’’ਤਿ. ਪਠਮਂ.

੨. ਸਉਪਾਦਿਸੇਸਸੁਤ੍ਤਂ

੧੨. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਪਿਣ੍ਡਾਯ ਪਾਵਿਸਿ. ਅਥ ਖੋ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਏਤਦਹੋਸਿ – ‘‘ਅਤਿਪ੍ਪਗੋ ਖੋ ਤਾਵ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤੁਂ, ਯਂਨੂਨਾਹਂ ਯੇਨ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਆਰਾਮੋ ਤੇਨੁਪਸਙ੍ਕਮੇਯ੍ਯ’’ਨ੍ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਯੇਨ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਆਰਾਮੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਤੇਹਿ ਅਞ੍ਞਤਿਤ੍ਥਿਯੇਹਿ ਪਰਿਬ੍ਬਾਜਕੇਹਿ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ.

ਤੇਨ ਖੋ ਪਨ ਸਮਯੇਨ ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘‘ਯੋ ਹਿ ਕੋਚਿ, ਆਵੁਸੋ, ਸਉਪਾਦਿਸੇਸੋ ਕਾਲਂ ਕਰੋਤਿ, ਸਬ੍ਬੋ ਸੋ ਅਪਰਿਮੁਤ੍ਤੋ ਨਿਰਯਾ ਅਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ ਅਪਰਿਮੁਤ੍ਤੋ ਪੇਤ੍ਤਿਵਿਸਯਾ ਅਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਭਾਸਿਤਂ ਨੇਵ ਅਭਿਨਨ੍ਦਿ ਨਪ੍ਪਟਿਕ੍ਕੋਸਿ. ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਾਮਿ – ‘‘ਭਗਵਤੋ ਸਨ੍ਤਿਕੇ ਏਤਸ੍ਸ ਭਾਸਿਤਸ੍ਸ ਅਤ੍ਥਂ ਆਜਾਨਿਸ੍ਸਾਮੀ’’ਤਿ. ਅਥ ਖੋ ਆਯਸ੍ਮਾ ਸਾਰਿਪੁਤ੍ਤੋ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਾਰਿਪੁਤ੍ਤੋ ਭਗਵਨ੍ਤਂ ਏਤਦਵੋਚ –

‘‘ਇਧਾਹਂ, ਭਨ੍ਤੇ, ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਪਿਣ੍ਡਾਯ ਪਾਵਿਸਿਂ. ਤਸ੍ਸ ਮਯ੍ਹਂ, ਭਨ੍ਤੇ, ਏਤਦਹੋਸਿ – ‘ਅਤਿਪ੍ਪਗੋ ਖੋ ਤਾਵ ਸਾਵਤ੍ਥਿਯਂ ਪਿਣ੍ਡਾਯ ਚਰਿਤੁਂ; ਯਂਨੂਨਾਹਂ ਯੇਨ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਆਰਾਮੋ ਤੇਨੁਪਸਙ੍ਕਮੇਯ੍ਯ’ਨ੍ਤਿ. ਅਥ ਖੋ ਅਹਂ, ਭਨ੍ਤੇ, ਯੇਨ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਆਰਾਮੋ ਤੇਨੁਪਸਙ੍ਕਮਿਂ; ਉਪਸਙ੍ਕਮਿਤ੍ਵਾ ਤੇਹਿ ਅਞ੍ਞਤਿਤ੍ਥਿਯੇਹਿ ਪਰਿਬ੍ਬਾਜਕੇਹਿ ਸਦ੍ਧਿਂ ਸਮ੍ਮੋਦਿਂ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿਂ. ਤੇਨ ਖੋ ਪਨ ਸਮਯੇਨ ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਾਕਥਾ ਉਦਪਾਦਿ – ‘ਯੋ ਹਿ ਕੋਚਿ, ਆਵੁਸੋ, ਸਉਪਾਦਿਸੇਸੋ ਕਾਲਂ ਕਰੋਤਿ, ਸਬ੍ਬੋ ਸੋ ਅਪਰਿਮੁਤ੍ਤੋ ਨਿਰਯਾ ਅਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ ਅਪਰਿਮੁਤ੍ਤੋ ਪੇਤ੍ਤਿਵਿਸਯਾ ਅਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ’ਤਿ. ਅਥ ਖੋ ਅਹਂ, ਭਨ੍ਤੇ, ਤੇਸਂ ਅਞ੍ਞਤਿਤ੍ਥਿਯਾਨਂ ਪਰਿਬ੍ਬਾਜਕਾਨਂ ਭਾਸਿਤਂ ਨੇਵ ਅਭਿਨਨ੍ਦਿਂ ਨਪ੍ਪਟਿਕ੍ਕੋਸਿਂ. ਅਨਭਿਨਨ੍ਦਿਤ੍ਵਾ ਅਪ੍ਪਟਿਕ੍ਕੋਸਿਤ੍ਵਾ ਉਟ੍ਠਾਯਾਸਨਾ ਪਕ੍ਕਮਿਂ – ‘ਭਗਵਤੋ ਸਨ੍ਤਿਕੇ ਏਤਸ੍ਸ ਭਾਸਿਤਸ੍ਸ ਅਤ੍ਥਂ ਆਜਾਨਿਸ੍ਸਾਮੀ’’’ਤਿ.

‘‘ਕੇ ਚ [ਕੇਚਿ (ਸ੍ਯਾ. ਪੀ.), ਤੇ ਚ (ਕ.)], ਸਾਰਿਪੁਤ੍ਤ, ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਬਾਲਾ ਅਬ੍ਯਤ੍ਤਾ, ਕੇ ਚ [ਕੇਚਿ (ਸ੍ਯਾ. ਪੀ. ਕ.) ਅ. ਨਿ. ੬.੪੪ ਪਾਲ਼ਿਯਾ ਸਂਸਨ੍ਦੇਤਬ੍ਬਂ] ਸਉਪਾਦਿਸੇਸਂ ਵਾ ‘ਸਉਪਾਦਿਸੇਸੋ’ਤਿ ਜਾਨਿਸ੍ਸਨ੍ਤਿ, ਅਨੁਪਾਦਿਸੇਸਂ ਵਾ ‘ਅਨੁਪਾਦਿਸੇਸੋ’ਤਿ ਜਾਨਿਸ੍ਸਨ੍ਤਿ’’!

‘‘ਨਵਯਿਮੇ, ਸਾਰਿਪੁਤ੍ਤ, ਪੁਗ੍ਗਲਾ ਸਉਪਾਦਿਸੇਸਾ ਕਾਲਂ ਕੁਰੁਮਾਨਾ ਪਰਿਮੁਤ੍ਤਾ ਨਿਰਯਾ ਪਰਿਮੁਤ੍ਤਾ ਤਿਰਚ੍ਛਾਨਯੋਨਿਯਾ ਪਰਿਮੁਤ੍ਤਾ ਪੇਤ੍ਤਿਵਿਸਯਾ ਪਰਿਮੁਤ੍ਤਾ ਅਪਾਯਦੁਗ੍ਗਤਿਵਿਨਿਪਾਤਾ. ਕਤਮੇ ਨਵ? ਇਧ, ਸਾਰਿਪੁਤ੍ਤ, ਏਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਪਰਿਪੂਰਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਅਨ੍ਤਰਾਪਰਿਨਿਬ੍ਬਾਯੀ ਹੋਤਿ. ਅਯਂ, ਸਾਰਿਪੁਤ੍ਤ, ਪਠਮੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ ਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ ਪਰਿਮੁਤ੍ਤੋ ਪੇਤ੍ਤਿਵਿਸਯਾ ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਪੁਨ ਚਪਰਂ, ਸਾਰਿਪੁਤ੍ਤ, ਇਧੇਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਪਰਿਪੂਰਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਪਞ੍ਚਨ੍ਨਂ ਓਰਮ੍ਭਾਗਿਯਾਨਂ ਸਂਯੋਜਨਾਨਂ ਪਰਿਕ੍ਖਯਾ ਉਪਹਚ੍ਚਪਰਿਨਿਬ੍ਬਾਯੀ ਹੋਤਿ…ਪੇ… ਅਸਙ੍ਖਾਰਪਰਿਨਿਬ੍ਬਾਯੀ ਹੋਤਿ…ਪੇ… ਸਸਙ੍ਖਾਰਪਰਿਨਿਬ੍ਬਾਯੀ ਹੋਤਿ…ਪੇ… ਉਦ੍ਧਂਸੋਤੋ ਹੋਤਿ ਅਕਨਿਟ੍ਠਗਾਮੀ. ਅਯਂ, ਸਾਰਿਪੁਤ੍ਤ, ਪਞ੍ਚਮੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ ਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ ਪਰਿਮੁਤ੍ਤੋ ਪੇਤ੍ਤਿਵਿਸਯਾ ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਪੁਨ ਚਪਰਂ, ਸਾਰਿਪੁਤ੍ਤ, ਇਧੇਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਮਤ੍ਤਸੋ ਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਰਾਗਦੋਸਮੋਹਾਨਂ ਤਨੁਤ੍ਤਾ ਸਕਦਾਗਾਮੀ ਹੋਤਿ, ਸਕਿਦੇਵ ਇਮਂ ਲੋਕਂ ਆਗਨ੍ਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ, ਸਾਰਿਪੁਤ੍ਤ, ਛਟ੍ਠੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ…ਪੇ… ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਪੁਨ ਚਪਰਂ, ਸਾਰਿਪੁਤ੍ਤ, ਇਧੇਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਮਤ੍ਤਸੋ ਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਏਕਬੀਜੀ ਹੋਤਿ, ਏਕਂਯੇਵ ਮਾਨੁਸਕਂ ਭਵਂ ਨਿਬ੍ਬਤ੍ਤੇਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ, ਸਾਰਿਪੁਤ੍ਤ, ਸਤ੍ਤਮੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ…ਪੇ… ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਪੁਨ ਚਪਰਂ, ਸਾਰਿਪੁਤ੍ਤ, ਇਧੇਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਮਤ੍ਤਸੋ ਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਕੋਲਂਕੋਲੋ ਹੋਤਿ, ਦ੍ਵੇ ਵਾ ਤੀਣਿ ਵਾ ਕੁਲਾਨਿ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ, ਸਾਰਿਪੁਤ੍ਤ, ਅਟ੍ਠਮੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ…ਪੇ… ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਪੁਨ ਚਪਰਂ, ਸਾਰਿਪੁਤ੍ਤ, ਇਧੇਕਚ੍ਚੋ ਪੁਗ੍ਗਲੋ ਸੀਲੇਸੁ ਪਰਿਪੂਰਕਾਰੀ ਹੋਤਿ, ਸਮਾਧਿਸ੍ਮਿਂ ਮਤ੍ਤਸੋ ਕਾਰੀ, ਪਞ੍ਞਾਯ ਮਤ੍ਤਸੋ ਕਾਰੀ. ਸੋ ਤਿਣ੍ਣਂ ਸਂਯੋਜਨਾਨਂ ਪਰਿਕ੍ਖਯਾ ਸਤ੍ਤਕ੍ਖਤ੍ਤੁਪਰਮੋ ਹੋਤਿ, ਸਤ੍ਤਕ੍ਖਤ੍ਤੁਪਰਮਂ ਦੇਵੇ ਚ ਮਨੁਸ੍ਸੇ ਚ ਸਨ੍ਧਾਵਿਤ੍ਵਾ ਸਂਸਰਿਤ੍ਵਾ ਦੁਕ੍ਖਸ੍ਸਨ੍ਤਂ ਕਰੋਤਿ. ਅਯਂ, ਸਾਰਿਪੁਤ੍ਤ, ਨਵਮੋ ਪੁਗ੍ਗਲੋ ਸਉਪਾਦਿਸੇਸੋ ਕਾਲਂ ਕੁਰੁਮਾਨੋ ਪਰਿਮੁਤ੍ਤੋ ਨਿਰਯਾ ਪਰਿਮੁਤ੍ਤੋ ਤਿਰਚ੍ਛਾਨਯੋਨਿਯਾ ਪਰਿਮੁਤ੍ਤੋ ਪੇਤ੍ਤਿਵਿਸਯਾ ਪਰਿਮੁਤ੍ਤੋ ਅਪਾਯਦੁਗ੍ਗਤਿਵਿਨਿਪਾਤਾ.

‘‘ਕੇ ਚ, ਸਾਰਿਪੁਤ੍ਤ, ਅਞ੍ਞਤਿਤ੍ਥਿਯਾ ਪਰਿਬ੍ਬਾਜਕਾ ਬਾਲਾ ਅਬ੍ਯਤ੍ਤਾ, ਕੇ ਚ ਸਉਪਾਦਿਸੇਸਂ ਵਾ ‘ਸਉਪਾਦਿਸੇਸੋ’ਤਿ ਜਾਨਿਸ੍ਸਨ੍ਤਿ, ਅਨੁਪਾਦਿਸੇਸਂ ਵਾ ‘ਅਨੁਪਾਦਿਸੇਸੋ’ਤਿ ਜਾਨਿਸ੍ਸਨ੍ਤਿ! ਇਮੇ ਖੋ, ਸਾਰਿਪੁਤ੍ਤ, ਨਵ ਪੁਗ੍ਗਲਾ ਸਉਪਾਦਿਸੇਸਾ ਕਾਲਂ ਕੁਰੁਮਾਨਾ ਪਰਿਮੁਤ੍ਤਾ ਨਿਰਯਾ ਪਰਿਮੁਤ੍ਤਾ ਤਿਰਚ੍ਛਾਨਯੋਨਿਯਾ ਪਰਿਮੁਤ੍ਤਾ ਪੇਤ੍ਤਿਵਿਸਯਾ ਪਰਿਮੁਤ੍ਤਾ ਅਪਾਯਦੁਗ੍ਗਤਿਵਿਨਿਪਾਤਾ. ਨ ਤਾਵਾਯਂ, ਸਾਰਿਪੁਤ੍ਤ, ਧਮ੍ਮਪਰਿਯਾਯੋ ਪਟਿਭਾਸਿ ਭਿਕ੍ਖੂਨਂ ਭਿਕ੍ਖੁਨੀਨਂ ਉਪਾਸਕਾਨਂ ਉਪਾਸਿਕਾਨਂ. ਤਂ ਕਿਸ੍ਸ ਹੇਤੁ? ਮਾਯਿਮਂ ਧਮ੍ਮਪਰਿਯਾਯਂ ਸੁਤ੍ਵਾ ਪਮਾਦਂ ਆਹਰਿਂਸੂਤਿ [ਆਹਰਿਂਸੁ (ਸੀ. ਪੀ.)]. ਅਪਿ ਚ ਮਯਾ [ਅਪਿ ਚਾਯਂ (?)], ਸਾਰਿਪੁਤ੍ਤ, ਧਮ੍ਮਪਰਿਯਾਯੋ ਪਞ੍ਹਾਧਿਪ੍ਪਾਯੇਨ ਭਾਸਿਤੋ’’ਤਿ. ਦੁਤਿਯਂ.

੩. ਕੋਟ੍ਠਿਕਸੁਤ੍ਤਂ

੧੩. ਅਥ ਖੋ ਆਯਸ੍ਮਾ ਮਹਾਕੋਟ੍ਠਿਕੋ [ਮਹਾਕੋਟ੍ਠਿਤੋ (ਸੀ. ਸ੍ਯਾ. ਪੀ.)] ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਤਾ ਸਾਰਿਪੁਤ੍ਤੇਨ ਸਦ੍ਧਿਂ ਸਮ੍ਮੋਦਿ. ਸਮ੍ਮੋਦਨੀਯਂ ਕਥਂ ਸਾਰਣੀਯਂ ਵੀਤਿਸਾਰੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਮਹਾਕੋਟ੍ਠਿਕੋ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਏਤਦਵੋਚ – ‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ, ਤਂ ਮੇ ਕਮ੍ਮਂ ਸਮ੍ਪਰਾਯਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਸੁਖਵੇਦਨੀਯਂ [ਸੁਖਵੇਦਨਿਯਂ (ਕ.) ਮ. ਨਿ. ੩.੮ ਪਸ੍ਸਿਤਬ੍ਬਂ], ਤਂ ਮੇ ਕਮ੍ਮਂ ਦੁਕ੍ਖਵੇਦਨੀਯਂ [ਦੁਕ੍ਖਵੇਦਨਿਯਂ (ਕ.)] ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ, ਸਾਰਿਪੁਤ੍ਤ, ‘ਯਂ ਕਮ੍ਮਂ ਦੁਕ੍ਖਵੇਦਨੀਯਂ, ਤਂ ਮੇ ਕਮ੍ਮਂ ਸੁਖਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਪਰਿਪਕ੍ਕਵੇਦਨੀਯਂ, ਤਂ ਮੇ ਕਮ੍ਮਂ ਅਪਰਿਪਕ੍ਕਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਅਪਰਿਪਕ੍ਕਵੇਦਨੀਯਂ, ਤਂ ਮੇ ਕਮ੍ਮਂ ਪਰਿਪਕ੍ਕਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਬਹੁਵੇਦਨੀਯਂ, ਤਂ ਮੇ ਕਮ੍ਮਂ ਅਪ੍ਪਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਅਪ੍ਪਵੇਦਨੀਯਂ, ਤਂ ਮੇ ਕਮ੍ਮਂ ਬਹੁਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਵੇਦਨੀਯਂ, ਤਂ ਮੇ ਕਮ੍ਮਂ ਅਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ‘ਯਂ ਕਮ੍ਮਂ ਅਵੇਦਨੀਯਂ, ਤਂ ਮੇ ਕਮ੍ਮਂ ਵੇਦਨੀਯਂ ਹੋਤੂ’ਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ? ‘‘ਨੋ ਹਿਦਂ, ਆਵੁਸੋ’’.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਤਂ ਮੇ ਕਮ੍ਮਂ ਸਮ੍ਪਰਾਯਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਸਮ੍ਪਰਾਯਵੇਦਨੀਯਂ ਤਂ ਮੇ ਕਮ੍ਮਂ ਦਿਟ੍ਠਧਮ੍ਮਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਸੁਖਵੇਦਨੀਯਂ ਤਂ ਮੇ ਕਮ੍ਮਂ ਦੁਕ੍ਖਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਦੁਕ੍ਖਵੇਦਨੀਯਂ ਤਂ ਮੇ ਕਮ੍ਮਂ ਸੁਖਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਪਰਿਪਕ੍ਕਵੇਦਨੀਯਂ ਤਂ ਮੇ ਕਮ੍ਮਂ ਅਪਰਿਪਕ੍ਕਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਅਪਰਿਪਕ੍ਕਵੇਦਨੀਯਂ ਤਂ ਮੇ ਕਮ੍ਮਂ ਪਰਿਪਕ੍ਕਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਬਹੁਵੇਦਨੀਯਂ ਤਂ ਮੇ ਕਮ੍ਮਂ ਅਪ੍ਪਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਅਪ੍ਪਵੇਦਨੀਯਂ ਤਂ ਮੇ ਕਮ੍ਮਂ ਬਹੁਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਨੁ ਖੋ, ਆਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਵੇਦਨੀਯਂ ਤਂ ਮੇ ਕਮ੍ਮਂ ਅਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ.

‘‘‘ਕਿਂ ਪਨਾਵੁਸੋ ਸਾਰਿਪੁਤ੍ਤ, ਯਂ ਕਮ੍ਮਂ ਅਵੇਦਨੀਯਂ ਤਂ ਮੇ ਕਮ੍ਮਂ ਵੇਦਨੀਯਂ ਹੋਤੂਤਿ, ਏਤਸ੍ਸ ਅਤ੍ਥਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨੋ ਹਿਦਂ, ਆਵੁਸੋ’ਤਿ ਵਦੇਸਿ. ਅਥ ਕਿਮਤ੍ਥਂ ਚਰਹਾਵੁਸੋ, ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ?

‘‘ਯਂ ਖ੍ਵਸ੍ਸ [ਯਂ ਖੋ (ਕ.)], ਆਵੁਸੋ, ਅਞ੍ਞਾਤਂ ਅਦਿਟ੍ਠਂ ਅਪ੍ਪਤ੍ਤਂ ਅਸਚ੍ਛਿਕਤਂ ਅਨਭਿਸਮੇਤਂ, ਤਸ੍ਸ ਞਾਣਾਯ ਦਸ੍ਸਨਾਯ ਪਤ੍ਤਿਯਾ ਸਚ੍ਛਿਕਿਰਿਯਾਯ ਅਭਿਸਮਯਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ [ਵੁਸ੍ਸਤਿ (ਸ੍ਯਾ.)]. (‘‘ਕਿਂ ਪਨਸ੍ਸਾਵੁਸੋ, ਅਞ੍ਞਾਤਂ ਅਦਿਟ੍ਠਂ ਅਪ੍ਪਤ੍ਤਂ ਅਸਚ੍ਛਿਕਤਂ ਅਨਭਿਸਮੇਤਂ, ਯਸ੍ਸ ਞਾਣਾਯ ਦਸ੍ਸਨਾਯ ਪਤ੍ਤਿਯਾ ਸਚ੍ਛਿਕਿਰਿਯਾਯ ਅਭਿਸਮਯਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ?) [( ) ਸ੍ਯਾ. ਕ. ਪੋਤ੍ਥਕੇਸੁ ਨਤ੍ਥਿ] ‘‘‘ਇਦਂ ਦੁਕ੍ਖ’ਨ੍ਤਿ ਖ੍ਵਸ੍ਸ [ਖੋ ਯਂ (ਕ.)], ਆਵੁਸੋ, ਅਞ੍ਞਾਤਂ ਅਦਿਟ੍ਠਂ ਅਪ੍ਪਤ੍ਤਂ ਅਸਚ੍ਛਿਕਤਂ ਅਨਭਿਸਮੇਤਂ. ਤਸ੍ਸ ਞਾਣਾਯ ਦਸ੍ਸਨਾਯ ਪਤ੍ਤਿਯਾ ਸਚ੍ਛਿਕਿਰਿਯਾਯ ਅਭਿਸਮਯਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤਿ. ਅਯਂ ‘ਦੁਕ੍ਖਸਮੁਦਯੋ’ਤਿ ਖ੍ਵਸ੍ਸ, ਆਵੁਸੋ…ਪੇ… ‘ਅਯਂ ਦੁਕ੍ਖਨਿਰੋਧੋ’ਤਿ ਖ੍ਵਸ੍ਸ, ਆਵੁਸੋ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਖ੍ਵਸ੍ਸ, ਆਵੁਸੋ, ਅਞ੍ਞਾਤਂ ਅਦਿਟ੍ਠਂ ਅਪ੍ਪਤ੍ਤਂ ਅਸਚ੍ਛਿਕਤਂ ਅਨਭਿਸਮੇਤਂ. ਤਸ੍ਸ ਞਾਣਾਯ ਦਸ੍ਸਨਾਯ ਪਤ੍ਤਿਯਾ ਸਚ੍ਛਿਕਿਰਿਯਾਯ ਅਭਿਸਮਯਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤਿ. ਇਦਂ ਖ੍ਵਸ੍ਸ [ਇਤਿ ਖੋ ਯਂ (ਕ.)], ਆਵੁਸੋ, ਅਞ੍ਞਾਤਂ ਅਦਿਟ੍ਠਂ ਅਪ੍ਪਤ੍ਤਂ ਅਸਚ੍ਛਿਕਤਂ ਅਨਭਿਸਮੇਤਂ. ਤਸ੍ਸ [ਯਸ੍ਸ (?)] ਞਾਣਾਯ ਦਸ੍ਸਨਾਯ ਪਤ੍ਤਿਯਾ ਸਚ੍ਛਿਕਿਰਿਯਾਯ ਅਭਿਸਮਯਾਯ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ. ਤਤਿਯਂ.

੪. ਸਮਿਦ੍ਧਿਸੁਤ੍ਤਂ

੧੪. ਅਥ ਖੋ ਆਯਸ੍ਮਾ ਸਮਿਦ੍ਧਿ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਾਰਿਪੁਤ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਆਯਸ੍ਮਨ੍ਤਂ ਸਮਿਦ੍ਧਿਂ ਆਯਸ੍ਮਾ ਸਾਰਿਪੁਤ੍ਤੋ ਏਤਦਵੋਚ – ‘‘ਕਿਮਾਰਮ੍ਮਣਾ, ਸਮਿਦ੍ਧਿ, ਪੁਰਿਸਸ੍ਸ ਸਙ੍ਕਪ੍ਪਵਿਤਕ੍ਕਾ ਉਪ੍ਪਜ੍ਜਨ੍ਤੀ’’ਤਿ? ‘‘ਨਾਮਰੂਪਾਰਮ੍ਮਣਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕ੍ਵ ਨਾਨਤ੍ਤਂ ਗਚ੍ਛਨ੍ਤੀ’’ਤਿ? ‘‘ਧਾਤੂਸੁ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਸਮੁਦਯਾ’’ਤਿ? ‘‘ਫਸ੍ਸਸਮੁਦਯਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਸਮੋਸਰਣਾ’’ਤਿ? ‘‘ਵੇਦਨਾਸਮੋਸਰਣਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਪਮੁਖਾ’’ਤਿ? ‘‘ਸਮਾਧਿਪ੍ਪਮੁਖਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਅਧਿਪਤੇਯ੍ਯਾ’’ਤਿ? ‘‘ਸਤਾਧਿਪਤੇਯ੍ਯਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਉਤ੍ਤਰਾ’’ਤਿ? ‘‘ਪਞ੍ਞੁਤ੍ਤਰਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਸਾਰਾ’’ਤਿ? ‘‘ਵਿਮੁਤ੍ਤਿਸਾਰਾ, ਭਨ੍ਤੇ’’ਤਿ. ‘‘ਤੇ ਪਨ, ਸਮਿਦ੍ਧਿ, ਕਿਂਓਗਧਾ’’ਤਿ? ‘‘ਅਮਤੋਗਧਾ, ਭਨ੍ਤੇ’’ਤਿ.

‘‘‘ਕਿਮਾਰਮ੍ਮਣਾ, ਸਮਿਦ੍ਧਿ, ਪੁਰਿਸਸ੍ਸ ਸਙ੍ਕਪ੍ਪਵਿਤਕ੍ਕਾ ਉਪ੍ਪਜ੍ਜਨ੍ਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਨਾਮਰੂਪਾਰਮ੍ਮਣਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕ੍ਵ ਨਾਨਤ੍ਤਂ ਗਚ੍ਛਨ੍ਤੀ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਧਾਤੂਸੁ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਸਮੁਦਯਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਫਸ੍ਸਸਮੁਦਯਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਸਮੋਸਰਣਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਵੇਦਨਾਸਮੋਸਰਣਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਪਮੁਖਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਸਮਾਧਿਪ੍ਪਮੁਖਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਅਧਿਪਤੇਯ੍ਯਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਸਤਾਧਿਪਤੇਯ੍ਯਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਉਤ੍ਤਰਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਪਞ੍ਞੁਤ੍ਤਰਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਸਾਰਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਵਿਮੁਤ੍ਤਿਸਾਰਾ, ਭਨ੍ਤੇ’ਤਿ ਵਦੇਸਿ. ‘ਤੇ ਪਨ, ਸਮਿਦ੍ਧਿ, ਕਿਂਓਗਧਾ’ਤਿ, ਇਤਿ ਪੁਟ੍ਠੋ ਸਮਾਨੋ ‘ਅਮਤੋਗਧਾ, ਭਨ੍ਤੇ’ਤਿ ਵਦੇਸਿ. ਸਾਧੁ ਸਾਧੁ, ਸਮਿਦ੍ਧਿ! ਸਾਧੁ ਖੋ ਤ੍ਵਂ, ਸਮਿਦ੍ਧਿ, ਪੁਟ੍ਠੋ [ਪਞ੍ਹਂ (ਸੀ. ਸ੍ਯਾ. ਪੀ.)] ਪੁਟ੍ਠੋ ਵਿਸ੍ਸਜ੍ਜੇਸਿ, ਤੇਨ ਚ ਮਾ ਮਞ੍ਞੀ’’ਤਿ. ਚਤੁਤ੍ਥਂ.

੫. ਗਣ੍ਡਸੁਤ੍ਤਂ

੧੫. ‘‘ਸੇਯ੍ਯਥਾਪਿ, ਭਿਕ੍ਖਵੇ, ਗਣ੍ਡੋ ਅਨੇਕਵਸ੍ਸਗਣਿਕੋ. ਤਸ੍ਸਸ੍ਸੁ ਗਣ੍ਡਸ੍ਸ ਨਵ ਵਣਮੁਖਾਨਿ ਨਵ ਅਭੇਦਨਮੁਖਾਨਿ. ਤਤੋ ਯਂ ਕਿਞ੍ਚਿ ਪਗ੍ਘਰੇਯ੍ਯ – ਅਸੁਚਿਯੇਵ ਪਗ੍ਘਰੇਯ੍ਯ, ਦੁਗ੍ਗਨ੍ਧਂਯੇਵ ਪਗ੍ਘਰੇਯ੍ਯ, ਜੇਗੁਚ੍ਛਿਯਂਯੇਵ [ਜੇਗੁਚ੍ਛਿਯੇਵ (ਕ.)] ਪਗ੍ਘਰੇਯ੍ਯ; ਯਂ ਕਿਞ੍ਚਿ ਪਸਵੇਯ੍ਯ – ਅਸੁਚਿਯੇਵ ਪਸਵੇਯ੍ਯ, ਦੁਗ੍ਗਨ੍ਧਂਯੇਵ ਪਸਵੇਯ੍ਯ, ਜੇਗੁਚ੍ਛਿਯਂਯੇਵ ਪਸਵੇਯ੍ਯ.

‘‘ਗਣ੍ਡੋਤਿ ਖੋ, ਭਿਕ੍ਖਵੇ, ਇਮਸ੍ਸੇਤਂ ਚਾਤੁਮਹਾਭੂਤਿਕਸ੍ਸ [ਚਾਤੁਮ੍ਮਹਾਭੂਤਿਕਸ੍ਸ (ਸੀ. ਸ੍ਯਾ. ਪੀ.)] ਕਾਯਸ੍ਸ ਅਧਿਵਚਨਂ ਮਾਤਾਪੇਤ੍ਤਿਕਸਮ੍ਭਵਸ੍ਸ ਓਦਨਕੁਮ੍ਮਾਸੂਪਚਯਸ੍ਸ ਅਨਿਚ੍ਚੁਚ੍ਛਾਦਨਪਰਿਮਦ੍ਦਨਭੇਦਨਵਿਦ੍ਧਂਸਨਧਮ੍ਮਸ੍ਸ. ਤਸ੍ਸਸ੍ਸੁ ਗਣ੍ਡਸ੍ਸ ਨਵ ਵਣਮੁਖਾਨਿ ਨਵ ਅਭੇਦਨਮੁਖਾਨਿ. ਤਤੋ ਯਂ ਕਿਞ੍ਚਿ ਪਗ੍ਘਰਤਿ – ਅਸੁਚਿਯੇਵ ਪਗ੍ਘਰਤਿ, ਦੁਗ੍ਗਨ੍ਧਂਯੇਵ ਪਗ੍ਘਰਤਿ, ਜੇਗੁਚ੍ਛਿਯਂਯੇਵ ਪਗ੍ਘਰਤਿ; ਯਂ ਕਿਞ੍ਚਿ ਪਸਵਤਿ – ਅਸੁਚਿਯੇਵ ਪਸਵਤਿ, ਦੁਗ੍ਗਨ੍ਧਂਯੇਵ ਪਸਵਤਿ, ਜੇਗੁਚ੍ਛਿਯਂਯੇਵ ਪਸਵਤਿ. ਤਸ੍ਮਾਤਿਹ, ਭਿਕ੍ਖਵੇ, ਇਮਸ੍ਮਿਂ ਕਾਯੇ ਨਿਬ੍ਬਿਨ੍ਦਥਾ’’ਤਿ. ਪਞ੍ਚਮਂ.

੬. ਸਞ੍ਞਾਸੁਤ੍ਤਂ

੧੬. ‘‘ਨਵਯਿਮਾ, ਭਿਕ੍ਖਵੇ, ਸਞ੍ਞਾ ਭਾਵਿਤਾ ਬਹੁਲੀਕਤਾ ਮਹਪ੍ਫਲਾ ਹੋਨ੍ਤਿ ਮਹਾਨਿਸਂਸਾ ਅਮਤੋਗਧਾ ਅਮਤਪਰਿਯੋਸਾਨਾ. ਕਤਮਾ ਨਵ? ਅਸੁਭਸਞ੍ਞਾ, ਮਰਣਸਞ੍ਞਾ, ਆਹਾਰੇ ਪਟਿਕੂਲਸਞ੍ਞਾ [ਪਟਿਕ੍ਕੂਲਸਞ੍ਞਾ (ਸੀ. ਸ੍ਯਾ. ਪੀ.)], ਸਬ੍ਬਲੋਕੇ ਅਨਭਿਰਤਸਞ੍ਞਾ [ਅਨਭਿਰਤਿਸਞ੍ਞਾ (ਕ.) ਅ. ਨਿ. ੫.੧੨੧-੧੨੨], ਅਨਿਚ੍ਚਸਞ੍ਞਾ, ਅਨਿਚ੍ਚੇ ਦੁਕ੍ਖਸਞ੍ਞਾ, ਦੁਕ੍ਖੇ ਅਨਤ੍ਤਸਞ੍ਞਾ, ਪਹਾਨਸਞ੍ਞਾ, ਵਿਰਾਗਸਞ੍ਞਾ – ਇਮਾ ਖੋ, ਭਿਕ੍ਖਵੇ, ਨਵ ਸਞ੍ਞਾ, ਭਾਵਿਤਾ ਬਹੁਲੀਕਤਾ ਮਹਪ੍ਫਲਾ ਹੋਨ੍ਤਿ ਮਹਾਨਿਸਂਸਾ ਅਮਤੋਗਧਾ ਅਮਤਪਰਿਯੋਸਾਨਾ’’ਤਿ. ਛਟ੍ਠਂ.

੭. ਕੁਲਸੁਤ੍ਤਂ

੧੭. ‘‘ਨਵਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਨਾਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਨਾਲਂ ਨਿਸੀਦਿਤੁਂ. ਕਤਮੇਹਿ ਨਵਹਿ? ਨ ਮਨਾਪੇਨ ਪਚ੍ਚੁਟ੍ਠੇਨ੍ਤਿ, ਨ ਮਨਾਪੇਨ ਅਭਿਵਾਦੇਨ੍ਤਿ, ਨ ਮਨਾਪੇਨ ਆਸਨਂ ਦੇਨ੍ਤਿ, ਸਨ੍ਤਮਸ੍ਸ ਪਰਿਗੁਹਨ੍ਤਿ, ਬਹੁਕਮ੍ਪਿ ਥੋਕਂ ਦੇਨ੍ਤਿ, ਪਣੀਤਮ੍ਪਿ ਲੂਖਂ ਦੇਨ੍ਤਿ, ਅਸਕ੍ਕਚ੍ਚਂ ਦੇਨ੍ਤਿ ਨੋ ਸਕ੍ਕਚ੍ਚਂ, ਨ ਉਪਨਿਸੀਦਨ੍ਤਿ ਧਮ੍ਮਸ੍ਸਵਨਾਯ, ਭਾਸਿਤਮਸ੍ਸ ਨ ਸੁਸ੍ਸੂਸਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਨਾਲਂ ਉਪਗਨ੍ਤੁਂ ਉਪਗਨ੍ਤ੍ਵਾ ਵਾ ਨਾਲਂ ਨਿਸੀਦਿਤੁਂ.

‘‘ਨਵਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਅਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਅਲਂ ਨਿਸੀਦਿਤੁਂ. ਕਤਮੇਹਿ ਨਵਹਿ? ਮਨਾਪੇਨ ਪਚ੍ਚੁਟ੍ਠੇਨ੍ਤਿ, ਮਨਾਪੇਨ ਅਭਿਵਾਦੇਨ੍ਤਿ, ਮਨਾਪੇਨ ਆਸਨਂ ਦੇਨ੍ਤਿ, ਸਨ੍ਤਮਸ੍ਸ ਨ ਪਰਿਗੁਹਨ੍ਤਿ, ਬਹੁਕਮ੍ਪਿ ਬਹੁਕਂ ਦੇਨ੍ਤਿ, ਪਣੀਤਮ੍ਪਿ ਪਣੀਤਂ ਦੇਨ੍ਤਿ, ਸਕ੍ਕਚ੍ਚਂ ਦੇਨ੍ਤਿ ਨੋ ਅਸਕ੍ਕਚ੍ਚਂ, ਉਪਨਿਸੀਦਨ੍ਤਿ ਧਮ੍ਮਸ੍ਸਵਨਾਯ, ਭਾਸਿਤਮਸ੍ਸ ਸੁਸ੍ਸੂਸਨ੍ਤਿ. ਇਮੇਹਿ ਖੋ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤਂ ਕੁਲਂ ਅਨੁਪਗਨ੍ਤ੍ਵਾ ਵਾ ਅਲਂ ਉਪਗਨ੍ਤੁਂ, ਉਪਗਨ੍ਤ੍ਵਾ ਵਾ ਅਲਂ ਨਿਸੀਦਿਤੁ’’ਨ੍ਤਿ. ਸਤ੍ਤਮਂ.

੮. ਨਵਙ੍ਗੁਪੋਸਥਸੁਤ੍ਤਂ

੧੮. ‘‘ਨਵਹਿ, ਭਿਕ੍ਖਵੇ, ਅਙ੍ਗੇਹਿ ਸਮਨ੍ਨਾਗਤੋ ਉਪੋਸਥੋ ਉਪਵੁਤ੍ਥੋ ਮਹਪ੍ਫਲੋ ਹੋਤਿ ਮਹਾਨਿਸਂਸੋ ਮਹਾਜੁਤਿਕੋ ਮਹਾਵਿਪ੍ਫਾਰੋ. ਕਥਂ ਉਪਵੁਤ੍ਥੋ ਚ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤੋ ਉਪੋਸਥੋ ਮਹਪ੍ਫਲੋ ਹੋਤਿ ਮਹਾਨਿਸਂਸੋ ਮਹਾਜੁਤਿਕੋ ਮਹਾਵਿਪ੍ਫਾਰੋ? ਇਧ, ਭਿਕ੍ਖਵੇ, ਅਰਿਯਸਾਵਕੋ ਇਤਿ ਪਟਿਸਞ੍ਚਿਕ੍ਖਤਿ – ‘ਯਾਵਜੀਵਂ ਅਰਹਨ੍ਤੋ ਪਾਣਾਤਿਪਾਤਂ ਪਹਾਯ ਪਾਣਾਤਿਪਾਤਾ ਪਟਿਵਿਰਤਾ ਨਿਹਿਤਦਣ੍ਡਾ ਨਿਹਿਤਸਤ੍ਥਾ ਲਜ੍ਜੀ ਦਯਾਪਨ੍ਨਾ ਸਬ੍ਬਪਾਣਭੂਤਹਿਤਾਨੁਕਮ੍ਪਿਨੋ ਵਿਹਰਨ੍ਤਿ; ਅਹਮ੍ਪਜ੍ਜ ਇਮਞ੍ਚ ਰਤ੍ਤਿਂ ਇਮਞ੍ਚ ਦਿਵਸਂ ਪਾਣਾਤਿਪਾਤਂ ਪਹਾਯ ਪਾਣਾਤਿਪਾਤਾ ਪਟਿਵਿਰਤੋ ਨਿਹਿਤਦਣ੍ਡੋ ਨਿਹਿਤਸਤ੍ਥੋ ਲਜ੍ਜੀ ਦਯਾਪਨ੍ਨੋ ਸਬ੍ਬਪਾਣਭੂਤਹਿਤਾਨੁਕਮ੍ਪੀ ਵਿਹਰਾਮਿ. ਇਮਿਨਾਪਙ੍ਗੇਨ [ਇਮਿਨਾਪਿ ਅਙ੍ਗੇਨ (ਕ. ਸੀ.)] ਅਰਹਤਂ ਅਨੁਕਰੋਮਿ; ਉਪੋਸਥੋ ਚ ਮੇ ਉਪਵੁਤ੍ਥੋ ਭਵਿਸ੍ਸਤੀ’ਤਿ. ਇਮਿਨਾ ਪਠਮੇਨ ਅਙ੍ਗੇਨ ਸਮਨ੍ਨਾਗਤੋ ਹੋਤਿ…ਪੇ. ….

‘‘‘ਯਾਵਜੀਵਂ ਅਰਹਨ੍ਤੋ ਉਚ੍ਚਾਸਯਨਮਹਾਸਯਨਂ ਪਹਾਯ ਉਚ੍ਚਾਸਯਨਮਹਾਸਯਨਾ ਪਟਿਵਿਰਤਾ ਨੀਚਸੇਯ੍ਯਂ ਕਪ੍ਪੇਨ੍ਤਿ – ਮਞ੍ਚਕੇ ਵਾ ਤਿਣਸਨ੍ਥਾਰਕੇ ਵਾ; ਅਹਮ੍ਪਜ੍ਜ ਇਮਞ੍ਚ ਰਤ੍ਤਿਂ ਇਮਞ੍ਚ ਦਿਵਸਂ ਉਚ੍ਚਾਸਯਨਮਹਾਸਯਨਂ ਪਹਾਯ ਉਚ੍ਚਾਸਯਨਮਹਾਸਯਨਾ ਪਟਿਵਿਰਤੋ ਨੀਚਸੇਯ੍ਯਂ ਕਪ੍ਪੇਮਿ – ਮਞ੍ਚਕੇ ਵਾ ਤਿਣਸਨ੍ਥਾਰਕੇ ਵਾ. ਇਮਿਨਾਪਙ੍ਗੇਨ ਅਰਹਤਂ ਅਨੁਕਰੋਮਿ; ਉਪੋਸਥੋ ਚ ਮੇ ਉਪਵੁਤ੍ਥੋ ਭਵਿਸ੍ਸਤੀ’ਤਿ. ਇਮਿਨਾ ਅਟ੍ਠਮੇਨ ਅਙ੍ਗੇਨ ਸਮਨ੍ਨਾਗਤੋ ਹੋਤਿ.

‘‘ਮੇਤ੍ਤਾਸਹਗਤੇਨ ਚੇਤਸਾ ਏਕਂ ਦਿਸਂ ਫਰਿਤ੍ਵਾ ਵਿਹਰਤਿ, ਤਥਾ ਦੁਤਿਯਂ ਤਥਾ ਤਤਿਯਂ ਤਥਾ ਚਤੁਤ੍ਥਂ. ਇਤਿ ਉਦ੍ਧਮਧੋ ਤਿਰਿਯਂ ਸਬ੍ਬਧਿ ਸਬ੍ਬਤ੍ਤਤਾਯ ਸਬ੍ਬਾਵਨ੍ਤਂ ਲੋਕਂ ਮੇਤ੍ਤਾਸਹਗਤੇਨ ਚੇਤਸਾ ਵਿਪੁਲੇਨ ਮਹਗ੍ਗਤੇਨ ਅਪ੍ਪਮਾਣੇਨ ਅਵੇਰੇਨ ਅਬ੍ਯਾਪਜ੍ਜੇਨ [ਅਬ੍ਯਾਪਜ੍ਝੇਨ (ਕ.), ਅਬ੍ਯਾਬਜ੍ਝੇਨ (?)] ਫਰਿਤ੍ਵਾ ਵਿਹਰਤਿ. ਇਮਿਨਾ ਨਵਮੇਨ ਅਙ੍ਗੇਨ ਸਮਨ੍ਨਾਗਤੋ ਹੋਤਿ. ਏਵਂ ਉਪਵੁਤ੍ਥੋ ਖੋ, ਭਿਕ੍ਖਵੇ, ਨਵਹਙ੍ਗੇਹਿ ਸਮਨ੍ਨਾਗਤੋ ਉਪੋਸਥੋ ਮਹਪ੍ਫਲੋ ਹੋਤਿ ਮਹਾਨਿਸਂਸੋ ਮਹਾਜੁਤਿਕੋ ਮਹਾਵਿਪ੍ਫਾਰੋ’’ਤਿ. ਅਟ੍ਠਮਂ.

੯. ਦੇਵਤਾਸੁਤ੍ਤਂ

੧੯. ‘‘ਇਮਞ੍ਚ, ਭਿਕ੍ਖਵੇ, ਰਤ੍ਤਿਂ ਸਮ੍ਬਹੁਲਾ ਦੇਵਤਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਅਭਿਕ੍ਕਨ੍ਤਵਣ੍ਣਾ ਕੇਵਲਕਪ੍ਪਂ ਜੇਤਵਨਂ ਓਭਾਸੇਤ੍ਵਾ ਯੇਨਾਹਂ ਤੇਨੁਪਸਙ੍ਕਮਿਂਸੁ; ਉਪਸਙ੍ਕਮਿਤ੍ਵਾ ਮਂ ਅਭਿਵਾਦੇਤ੍ਵਾ ਏਕਮਨ੍ਤਂ ਅਟ੍ਠਂਸੁ. ਏਕਮਨ੍ਤਂ ਠਿਤਾ ਖੋ, ਭਿਕ੍ਖਵੇ, ਤਾ ਦੇਵਤਾ ਮਂ ਏਤਦਵੋਚੁਂ – ‘ਉਪਸਙ੍ਕਮਿਂਸੁ ਨੋ, ਭਨ੍ਤੇ, ਪੁਬ੍ਬੇ ਮਨੁਸ੍ਸਭੂਤਾਨਂ ਪਬ੍ਬਜਿਤਾ ਅਗਾਰਾਨਿ. ਤੇ ਮਯਂ, ਭਨ੍ਤੇ, ਪਚ੍ਚੁਟ੍ਠਿਮ੍ਹ, ਨੋ ਚ ਖੋ ਅਭਿਵਾਦਿਮ੍ਹ. ਤਾ ਮਯਂ, ਭਨ੍ਤੇ, ਅਪਰਿਪੁਣ੍ਣਕਮ੍ਮਨ੍ਤਾ ਵਿਪ੍ਪਟਿਸਾਰਿਨਿਯੋ ਪਚ੍ਚਾਨੁਤਾਪਿਨਿਯੋ ਹੀਨਂ ਕਾਯਂ ਉਪਪਨ੍ਨਾ’’’ਤਿ.

‘‘ਅਪਰਾਪਿ ਮਂ, ਭਿਕ੍ਖਵੇ, ਸਮ੍ਬਹੁਲਾ ਦੇਵਤਾ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘ਉਪਸਙ੍ਕਮਿਂਸੁ ਨੋ, ਭਨ੍ਤੇ, ਪੁਬ੍ਬੇ ਮਨੁਸ੍ਸਭੂਤਾਨਂ ਪਬ੍ਬਜਿਤਾ ਅਗਾਰਾਨਿ. ਤੇ ਮਯਂ, ਭਨ੍ਤੇ, ਪਚ੍ਚੁਟ੍ਠਿਮ੍ਹ ਅਭਿਵਾਦਿਮ੍ਹ [ਪਚ੍ਚੁਟ੍ਠਿਮ੍ਹ ਚ ਅਭਿਵਾਦਿਮ੍ਹ ਚ (ਸ੍ਯਾ.)], ਨੋ ਚ ਤੇਸਂ ਆਸਨਂ ਅਦਮ੍ਹ. ਤਾ ਮਯਂ, ਭਨ੍ਤੇ, ਅਪਰਿਪੁਣ੍ਣਕਮ੍ਮਨ੍ਤਾ ਵਿਪ੍ਪਟਿਸਾਰਿਨਿਯੋ ਪਚ੍ਚਾਨੁਤਾਪਿਨਿਯੋ ਹੀਨਂ ਕਾਯਂ ਉਪਪਨ੍ਨਾ’’’ਤਿ.

‘‘ਅਪਰਾਪਿ ਮਂ, ਭਿਕ੍ਖਵੇ, ਸਮ੍ਬਹੁਲਾ ਦੇਵਤਾ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘ਉਪਸਙ੍ਕਮਿਂਸੁ ਨੋ, ਭਨ੍ਤੇ, ਪੁਬ੍ਬੇ ਮਨੁਸ੍ਸਭੂਤਾਨਂ ਪਬ੍ਬਜਿਤਾ ਅਗਾਰਾਨਿ. ਤੇ ਮਯਂ, ਭਨ੍ਤੇ, ਪਚ੍ਚੁਟ੍ਠਿਮ੍ਹ ਅਭਿਵਾਦਿਮ੍ਹ [ਪਚ੍ਚੁਟ੍ਠਿਮ੍ਹ ਚ ਅਭਿਵਾਦਿਮ੍ਹ ਚ (ਸ੍ਯਾ.)] ਆਸਨਂ [ਆਸਨਞ੍ਚ (ਸੀ. ਸ੍ਯਾ.)] ਅਦਮ੍ਹ, ਨੋ ਚ ਖੋ ਯਥਾਸਤ੍ਤਿ ਯਥਾਬਲਂ ਸਂਵਿਭਜਿਮ੍ਹ…ਪੇ… ਯਥਾਸਤ੍ਤਿ ਯਥਾਬਲਂ [ਯਥਾਬਲਂ ਚ (?)] ਸਂਵਿਭਜਿਮ੍ਹ, ਨੋ ਚ ਖੋ ਉਪਨਿਸੀਦਿਮ੍ਹ ਧਮ੍ਮਸ੍ਸਵਨਾਯ…ਪੇ… ਉਪਨਿਸੀਦਿਮ੍ਹ [ਉਪਨਿਸੀਦਿਮ੍ਹ ਚ (ਸ੍ਯਾ.)] ਧਮ੍ਮਸ੍ਸਵਨਾਯ, ਨੋ ਚ ਖੋ ਓਹਿਤਸੋਤਾ ਧਮ੍ਮਂ ਸੁਣਿਮ੍ਹ…ਪੇ… ਓਹਿਤਸੋਤਾ ਚ ਧਮ੍ਮਂ ਸੁਣਿਮ੍ਹ, ਨੋ ਚ ਖੋ ਸੁਤ੍ਵਾ ਧਮ੍ਮਂ ਧਾਰਯਿਮ੍ਹ…ਪੇ… ਸੁਤ੍ਵਾ ਚ ਧਮ੍ਮਂ ਧਾਰਯਿਮ੍ਹ, ਨੋ ਚ ਖੋ ਧਾਤਾਨਂ ਧਮ੍ਮਾਨਂ ਅਤ੍ਥਂ ਉਪਪਰਿਕ੍ਖਿਮ੍ਹ…ਪੇ… ਧਾਤਾਨਞ੍ਚ ਧਮ੍ਮਾਨਂ ਅਤ੍ਥਂ ਉਪਪਰਿਕ੍ਖਿਮ੍ਹ, ਨੋ ਚ ਖੋ ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯ ਧਮ੍ਮਾਨੁਧਮ੍ਮਂ ਪਟਿਪਜ੍ਜਿਮ੍ਹ. ਤਾ ਮਯਂ, ਭਨ੍ਤੇ, ਅਪਰਿਪੁਣ੍ਣਕਮ੍ਮਨ੍ਤਾ ਵਿਪ੍ਪਟਿਸਾਰਿਨਿਯੋ ਪਚ੍ਚਾਨੁਤਾਪਿਨਿਯੋ ਹੀਨਂ ਕਾਯਂ ਉਪਪਨ੍ਨਾ’’’ਤਿ.

‘‘ਅਪਰਾਪਿ ਮਂ, ਭਿਕ੍ਖਵੇ, ਸਮ੍ਬਹੁਲਾ ਦੇਵਤਾ ਉਪਸਙ੍ਕਮਿਤ੍ਵਾ ਏਤਦਵੋਚੁਂ – ‘ਉਪਸਙ੍ਕਮਿਂਸੁ ਨੋ, ਭਨ੍ਤੇ, ਪੁਬ੍ਬੇ ਮਨੁਸ੍ਸਭੂਤਾਨਂ ਪਬ੍ਬਜਿਤਾ ਅਗਾਰਾਨਿ. ਤੇ ਮਯਂ, ਭਨ੍ਤੇ, ਪਚ੍ਚੁਟ੍ਠਿਮ੍ਹ ਅਭਿਵਾਦਿਮ੍ਹ [ਪਚ੍ਚੁਟ੍ਠਿਮ੍ਹ ਚ ਅਭਿਵਾਦਿਮ੍ਹ ਚ (ਸ੍ਯਾ.)], ਆਸਨਂ [ਆਸਨਞ੍ਚ (ਸੀ. ਸ੍ਯਾ.)] ਅਦਮ੍ਹ, ਯਥਾਸਤ੍ਤਿ ਯਥਾਬਲਂ [ਯਥਾਬਲਂ ਚ (?)] ਸਂਵਿਭਜਿਮ੍ਹ, ਉਪਨਿਸੀਦਿਮ੍ਹ [ਉਪਨਿਸੀਦਿਮ੍ਹ ਚ (ਸ੍ਯਾ.)] ਧਮ੍ਮਸ੍ਸਵਨਾਯ, ਓਹਿਤਸੋਤਾ ਚ ਧਮ੍ਮਂ ਸੁਣਿਮ੍ਹ, ਸੁਤ੍ਵਾ ਚ ਧਮ੍ਮਂ ਧਾਰਯਿਮ੍ਹ, ਧਾਤਾਨਞ੍ਚ ਧਮ੍ਮਾਨਂ ਅਤ੍ਥਂ ਉਪਪਰਿਕ੍ਖਿਮ੍ਹ, ਅਤ੍ਥਮਞ੍ਞਾਯ ਧਮ੍ਮਮਞ੍ਞਾਯ ਧਮ੍ਮਾਨੁਧਮ੍ਮਂ [ਧਮ੍ਮਾਨੁਧਮ੍ਮਞ੍ਚ (?)] ਪਟਿਪਜ੍ਜਿਮ੍ਹ. ਤਾ ਮਯਂ, ਭਨ੍ਤੇ, ਪਰਿਪੁਣ੍ਣਕਮ੍ਮਨ੍ਤਾ ਅਵਿਪ੍ਪਟਿਸਾਰਿਨਿਯੋ ਅਪਚ੍ਚਾਨੁਤਾਪਿਨਿਯੋ ਪਣੀਤਂ ਕਾਯਂ ਉਪਪਨ੍ਨਾ’ਤਿ. ਏਤਾਨਿ, ਭਿਕ੍ਖਵੇ, ਰੁਕ੍ਖਮੂਲਾਨਿ ਏਤਾਨਿ ਸੁਞ੍ਞਾਗਾਰਾਨਿ. ਝਾਯਥ, ਭਿਕ੍ਖਵੇ, ਮਾ ਪਮਾਦਤ੍ਥ, ਮਾ ਪਚ੍ਛਾ ਵਿਪ੍ਪਟਿਸਾਰਿਨੋ ਅਹੁਵਤ੍ਥ ਸੇਯ੍ਯਥਾਪਿ ਤਾ ਪੁਰਿਮਿਕਾ ਦੇਵਤਾ’’ਤਿ. ਨਵਮਂ.

੧੦. ਵੇਲਾਮਸੁਤ੍ਤਂ

੨੦. ਏਕਂ ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਅਨਾਥਪਿਣ੍ਡਿਕਂ ਗਹਪਤਿਂ ਭਗਵਾ ਏਤਦਵੋਚ –

‘‘ਅਪਿ ਨੁ ਤੇ, ਗਹਪਤਿ, ਕੁਲੇ ਦਾਨਂ ਦੀਯਤੀ’’ਤਿ? ‘‘ਦੀਯਤਿ ਮੇ, ਭਨ੍ਤੇ, ਕੁਲੇ ਦਾਨਂ; ਤਞ੍ਚ ਖੋ ਲੂਖਂ ਕਣਾਜਕਂ ਬਿਲ਼ਙ੍ਗਦੁਤਿਯ’’ਨ੍ਤਿ. ‘‘ਲੂਖਞ੍ਚੇਪਿ [ਲੂਖਂ ਵਾਪਿ (ਸ੍ਯਾ.), ਲੂਖਞ੍ਚਾਪਿ (ਕ.)], ਗਹਪਤਿ, ਦਾਨਂ ਦੇਤਿ ਪਣੀਤਂ ਵਾ; ਤਞ੍ਚ ਅਸਕ੍ਕਚ੍ਚਂ ਦੇਤਿ, ਅਚਿਤ੍ਤੀਕਤ੍ਵਾ [ਅਚਿਤ੍ਤਿਂ ਕਤ੍ਵਾ (ਕ.), ਅਪਚਿਤ੍ਤਿਂ ਕਤ੍ਵਾ (ਸ੍ਯਾ.), ਅਚਿਤ੍ਤਿਕਤ੍ਵਾ (ਪੀ.)] ਦੇਤਿ, ਅਸਹਤ੍ਥਾ ਦੇਤਿ, ਅਪਵਿਦ੍ਧਂ [ਅਪਵਿਟ੍ਠਂ (ਸ੍ਯਾ.)] ਦੇਤਿ, ਅਨਾਗਮਨਦਿਟ੍ਠਿਕੋ ਦੇਤਿ. ਯਤ੍ਥ ਯਤ੍ਥ ਤਸ੍ਸ ਤਸ੍ਸ ਦਾਨਸ੍ਸ ਵਿਪਾਕੋ ਨਿਬ੍ਬਤ੍ਤਤਿ, ਨ ਉਲ਼ਾਰਾਯ ਭਤ੍ਤਭੋਗਾਯ ਚਿਤ੍ਤਂ ਨਮਤਿ, ਨ ਉਲ਼ਾਰਾਯ ਵਤ੍ਥਭੋਗਾਯ ਚਿਤ੍ਤਂ ਨਮਤਿ, ਨ ਉਲ਼ਾਰਾਯ ਯਾਨਭੋਗਾਯ ਚਿਤ੍ਤਂ ਨਮਤਿ, ਨ ਉਲ਼ਾਰੇਸੁ ਪਞ੍ਚਸੁ ਕਾਮਗੁਣੇਸੁ ਭੋਗਾਯ ਚਿਤ੍ਤਂ ਨਮਤਿ. ਯੇਪਿਸ੍ਸ ਤੇ ਹੋਨ੍ਤਿ ਪੁਤ੍ਤਾਤਿ ਵਾ ਦਾਰਾਤਿ ਵਾ ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ, ਤੇਪਿ ਨ ਸੁਸ੍ਸੂਸਨ੍ਤਿ ਨ ਸੋਤਂ ਓਦਹਨ੍ਤਿ ਨ ਅਞ੍ਞਾ ਚਿਤ੍ਤਂ ਉਪਟ੍ਠਪੇਨ੍ਤਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ [ਏਵਞ੍ਚੇਤਂ (ਸ੍ਯਾ. ਕ.)], ਗਹਪਤਿ, ਹੋਤਿ ਅਸਕ੍ਕਚ੍ਚਂ ਕਤਾਨਂ ਕਮ੍ਮਾਨਂ ਵਿਪਾਕੋ’’.

‘‘ਲੂਖਞ੍ਚੇਪਿ, ਗਹਪਤਿ, ਦਾਨਂ ਦੇਤਿ ਪਣੀਤਂ ਵਾ; ਤਞ੍ਚ ਸਕ੍ਕਚ੍ਚਂ ਦੇਤਿ, ਚਿਤ੍ਤੀਕਤ੍ਵਾ ਦੇਤਿ, ਸਹਤ੍ਥਾ ਦੇਤਿ, ਅਨਪਵਿਦ੍ਧਂ ਦੇਤਿ, ਆਗਮਨਦਿਟ੍ਠਿਕੋ ਦੇਤਿ. ਯਤ੍ਥ ਯਤ੍ਥ ਤਸ੍ਸ ਤਸ੍ਸ ਦਾਨਸ੍ਸ ਵਿਪਾਕੋ ਨਿਬ੍ਬਤ੍ਤਤਿ, ਉਲ਼ਾਰਾਯ ਭਤ੍ਤਭੋਗਾਯ ਚਿਤ੍ਤਂ ਨਮਤਿ, ਉਲ਼ਾਰਾਯ ਵਤ੍ਥਭੋਗਾਯ ਚਿਤ੍ਤਂ ਨਮਤਿ, ਉਲ਼ਾਰਾਯ ਯਾਨਭੋਗਾਯ ਚਿਤ੍ਤਂ ਨਮਤਿ, ਉਲ਼ਾਰੇਸੁ ਪਞ੍ਚਸੁ ਕਾਮਗੁਣੇਸੁ ਭੋਗਾਯ ਚਿਤ੍ਤਂ ਨਮਤਿ. ਯੇਪਿਸ੍ਸ ਤੇ ਹੋਨ੍ਤਿ ਪੁਤ੍ਤਾਤਿ ਵਾ ਦਾਰਾਤਿ ਵਾ ਦਾਸਾਤਿ ਵਾ ਪੇਸ੍ਸਾਤਿ ਵਾ ਕਮ੍ਮਕਰਾਤਿ ਵਾ, ਤੇਪਿ ਸੁਸ੍ਸੂਸਨ੍ਤਿ ਸੋਤਂ ਓਦਹਨ੍ਤਿ ਅਞ੍ਞਾ ਚਿਤ੍ਤਂ ਉਪਟ੍ਠਪੇਨ੍ਤਿ. ਤਂ ਕਿਸ੍ਸ ਹੇਤੁ? ਏਵਞ੍ਹੇਤਂ, ਗਹਪਤਿ, ਹੋਤਿ ਸਕ੍ਕਚ੍ਚਂ ਕਤਾਨਂ ਕਮ੍ਮਾਨਂ ਵਿਪਾਕੋ.

‘‘ਭੂਤਪੁਬ੍ਬਂ, ਗਹਪਤਿ, ਵੇਲਾਮੋ ਨਾਮ ਬ੍ਰਾਹ੍ਮਣੋ ਅਹੋਸਿ. ਸੋ ਏਵਰੂਪਂ ਦਾਨਂ ਅਦਾਸਿ ਮਹਾਦਾਨਂ. ਚਤੁਰਾਸੀਤਿ ਸੁਵਣ੍ਣਪਾਤਿਸਹਸ੍ਸਾਨਿ ਅਦਾਸਿ ਰੂਪਿਯਪੂਰਾਨਿ, ਚਤੁਰਾਸੀਤਿ ਰੂਪਿਯਪਾਤਿਸਹਸ੍ਸਾਨਿ ਅਦਾਸਿ ਸੁਵਣ੍ਣਪੂਰਾਨਿ, ਚਤੁਰਾਸੀਤਿ ਕਂਸਪਾਤਿਸਹਸ੍ਸਾਨਿ ਅਦਾਸਿ ਹਿਰਞ੍ਞਪੂਰਾਨਿ, ਚਤੁਰਾਸੀਤਿ ਹਤ੍ਥਿਸਹਸ੍ਸਾਨਿ ਅਦਾਸਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪ੍ਪਟਿਚ੍ਛਨ੍ਨਾਨਿ [ਹੇਮਜਾਲਸਞ੍ਛਨ੍ਨਾਨਿ (ਸੀ. ਪੀ.)], ਚਤੁਰਾਸੀਤਿ ਰਥਸਹਸ੍ਸਾਨਿ ਅਦਾਸਿ ਸੀਹਚਮ੍ਮਪਰਿਵਾਰਾਨਿ ਬ੍ਯਗ੍ਘਚਮ੍ਮਪਰਿਵਾਰਾਨਿ ਦੀਪਿਚਮ੍ਮਪਰਿਵਾਰਾਨਿ ਪਣ੍ਡੁਕਮ੍ਬਲਪਰਿਵਾਰਾਨਿ ਸੋਵਣ੍ਣਾਲਙ੍ਕਾਰਾਨਿ ਸੋਵਣ੍ਣਧਜਾਨਿ ਹੇਮਜਾਲਪ੍ਪਟਿਚ੍ਛਨ੍ਨਾਨਿ, ਚਤੁਰਾਸੀਤਿ ਧੇਨੁਸਹਸ੍ਸਾਨਿ ਅਦਾਸਿ ਦੁਕੂਲਸਨ੍ਧਨਾਨਿ [ਦੁਕੂਲਸਨ੍ਦਸ੍ਸਨਾਨਿ (ਸੀ.), ਦੁਕੂਲਸਣ੍ਠਨਾਨਿ (ਸ੍ਯਾ.), ਦੁਕੂਲਸਨ੍ਥਨਾਨਿ (ਪੀ.), ਦੁਹਸਨ੍ਦਨਾਨਿ (ਦੀ. ਨਿ. ੨.੨੬੩), ਦੁਕੂਲਸਨ੍ਦਨਾਨਿ (ਤਤ੍ਥ ਪਾਠਨ੍ਤਰਂ)] ਕਂਸੂਪਧਾਰਣਾਨਿ, ਚਤੁਰਾਸੀਤਿ ਕਞ੍ਞਾਸਹਸ੍ਸਾਨਿ ਅਦਾਸਿ ਆਮੁਤ੍ਤਮਣਿਕੁਣ੍ਡਲਾਯੋ [ਆਮੁਕ੍ਕਮਣਿਕੁਣ੍ਡਲਾਯੋ (?)], ਚਤੁਰਾਸੀਤਿ ਪਲ੍ਲਙ੍ਕਸਹਸ੍ਸਾਨਿ ਅਦਾਸਿ ਗੋਨਕਤ੍ਥਤਾਨਿ ਪਟਿਕਤ੍ਥਤਾਨਿ ਪਟਲਿਕਤ੍ਥਤਾਨਿ ਕਦਲਿਮਿਗਪਵਰਪਚ੍ਚਤ੍ਥਰਣਾਨਿ ਸਉਤ੍ਤਰਚ੍ਛਦਾਨਿ ਉਭਤੋਲੋਹਿਤਕੂਪਧਾਨਾਨਿ, ਚਤੁਰਾਸੀਤਿ ਵਤ੍ਥਕੋਟਿਸਹਸ੍ਸਾਨਿ ਅਦਾਸਿ ਖੋਮਸੁਖੁਮਾਨਂ ਕੋਸੇਯ੍ਯਸੁਖੁਮਾਨਂ ਕਮ੍ਬਲਸੁਖੁਮਾਨਂ ਕਪ੍ਪਾਸਿਕਸੁਖੁਮਾਨਂ, ਕੋ ਪਨ ਵਾਦੋ ਅਨ੍ਨਸ੍ਸ ਪਾਨਸ੍ਸ ਖਜ੍ਜਸ੍ਸ ਭੋਜ੍ਜਸ੍ਸ ਲੇਯ੍ਯਸ੍ਸ ਪੇਯ੍ਯਸ੍ਸ, ਨਜ੍ਜੋ ਮਞ੍ਞੇ ਵਿਸ੍ਸਨ੍ਦਨ੍ਤਿ [ਵਿਸ੍ਸਨ੍ਦਤਿ (ਸੀ. ਪੀ.)].

‘‘ਸਿਯਾ ਖੋ ਪਨ ਤੇ, ਗਹਪਤਿ, ਏਵਮਸ੍ਸ – ‘ਅਞ੍ਞੋ ਨੂਨ ਤੇਨ ਸਮਯੇਨ ਵੇਲਾਮੋ ਬ੍ਰਾਹ੍ਮਣੋ ਅਹੋਸਿ, ਸੋ [ਯੋ (?)] ਤਂ ਦਾਨਂ ਅਦਾਸਿ ਮਹਾਦਾਨ’ਨ੍ਤਿ. ਨ ਖੋ ਪਨੇਤਂ, ਗਹਪਤਿ, ਏਵਂ ਦਟ੍ਠਬ੍ਬਂ. ਅਹਂ ਤੇਨ ਸਮਯੇਨ ਵੇਲਾਮੋ ਬ੍ਰਾਹ੍ਮਣੋ ਅਹੋਸਿਂ. ਅਹਂ ਤਂ ਦਾਨਂ ਅਦਾਸਿਂ ਮਹਾਦਾਨਂ. ਤਸ੍ਮਿਂ ਖੋ ਪਨ, ਗਹਪਤਿ, ਦਾਨੇ ਨ ਕੋਚਿ ਦਕ੍ਖਿਣੇਯ੍ਯੋ ਅਹੋਸਿ, ਨ ਤਂ ਕੋਚਿ ਦਕ੍ਖਿਣਂ ਵਿਸੋਧੇਤਿ.

‘‘ਯਂ, ਗਹਪਤਿ, ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ, ਯੋ ਚੇਕਂ ਦਿਟ੍ਠਿਸਮ੍ਪਨ੍ਨਂ ਭੋਜੇਯ੍ਯ, ਇਦਂ ਤਤੋ ਮਹਪ੍ਫਲਤਰਂ.

( ) [(ਯਞ੍ਚ ਗਹਪਤਿ ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ) (ਸੀ. ਪੀ.)] ‘‘ਯੋ ਚ ਸਤਂ ਦਿਟ੍ਠਿਸਮ੍ਪਨ੍ਨਾਨਂ ਭੋਜੇਯ੍ਯ, ਯੋ ਚੇਕਂ ਸਕਦਾਗਾਮਿਂ ਭੋਜੇਯ੍ਯ, ਇਦਂ ਤਤੋ ਮਹਪ੍ਫਲਤਰਂ.

( ) [(ਯਞ੍ਚ ਗਹਪਤਿ ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ) (ਸੀ. ਪੀ.)] ‘‘ਯੋ ਚ ਸਤਂ ਸਕਦਾਗਾਮੀਨਂ ਭੋਜੇਯ੍ਯ, ਯੋ ਚੇਕਂ ਅਨਾਗਾਮਿਂ ਭੋਜੇਯ੍ਯ…ਪੇ… ਯੋ ਚ ਸਤਂ ਅਨਾਗਾਮੀਨਂ ਭੋਜੇਯ੍ਯ, ਯੋ ਚੇਕਂ ਅਰਹਨ੍ਤਂ ਭੋਜੇਯ੍ਯ… ਯੋ ਚ ਸਤਂ ਅਰਹਨ੍ਤਾਨਂ ਭੋਜੇਯ੍ਯ, ਯੋ ਚੇਕਂ ਪਚ੍ਚੇਕਬੁਦ੍ਧਂ ਭੋਜੇਯ੍ਯ … ਯੋ ਚ ਸਤਂ ਪਚ੍ਚੇਕਬੁਦ੍ਧਾਨਂ ਭੋਜੇਯ੍ਯ, ਯੋ ਚ ਤਥਾਗਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਭੋਜੇਯ੍ਯ… ਯੋ ਚ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਭੋਜੇਯ੍ਯ… ਯੋ ਚ ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਵਿਹਾਰਂ ਕਾਰਾਪੇਯ੍ਯ… ਯੋ ਚ ਪਸਨ੍ਨਚਿਤ੍ਤੋ ਬੁਦ੍ਧਞ੍ਚ ਧਮ੍ਮਞ੍ਚ ਸਙ੍ਘਞ੍ਚ ਸਰਣਂ ਗਚ੍ਛੇਯ੍ਯ… ਯੋ ਚ ਪਸਨ੍ਨਚਿਤ੍ਤੋ ਸਿਕ੍ਖਾਪਦਾਨਿ ਸਮਾਦਿਯੇਯ੍ਯ – ਪਾਣਾਤਿਪਾਤਾ ਵੇਰਮਣਿਂ, ਅਦਿਨ੍ਨਾਦਾਨਾ ਵੇਰਮਣਿਂ, ਕਾਮੇਸੁਮਿਚ੍ਛਾਚਾਰਾ ਵੇਰਮਣਿਂ, ਮੁਸਾਵਾਦਾ ਵੇਰਮਣਿਂ, ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣਿਂ, ਯੋ ਚ ਅਨ੍ਤਮਸੋ ਗਨ੍ਧੋਹਨਮਤ੍ਤਮ੍ਪਿ [ਗਨ੍ਧੂਹਨਮਤ੍ਤਮ੍ਪਿ (ਸੀ.), ਗਦ੍ਦੂਹਨਮਤ੍ਤਮ੍ਪਿ (ਸ੍ਯਾ. ਪੀ.) ਮ. ਨਿ. ੩.੨੧੧] ਮੇਤ੍ਤਚਿਤ੍ਤਂ ਭਾਵੇਯ੍ਯ, ( ) [(ਯੋ ਚ ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਅਨਿਚ੍ਚਸਞ੍ਞਂ ਭਾਵੇਯ੍ਯ) (ਕ.)] ਇਦਂ ਤਤੋ ਮਹਪ੍ਫਲਤਰਂ.

‘‘ਯਞ੍ਚ, ਗਹਪਤਿ, ਵੇਲਾਮੋ ਬ੍ਰਾਹ੍ਮਣੋ ਦਾਨਂ ਅਦਾਸਿ ਮਹਾਦਾਨਂ, ਯੋ ਚੇਕਂ ਦਿਟ੍ਠਿਸਮ੍ਪਨ੍ਨਂ ਭੋਜੇਯ੍ਯ… ਯੋ ਚ ਸਤਂ ਦਿਟ੍ਠਿਸਮ੍ਪਨ੍ਨਾਨਂ ਭੋਜੇਯ੍ਯ, ਯੋ ਚੇਕਂ ਸਕਦਾਗਾਮਿਂ ਭੋਜੇਯ੍ਯ… ਯੋ ਚ ਸਤਂ ਸਕਦਾਗਾਮੀਨਂ ਭੋਜੇਯ੍ਯ, ਯੋ ਚੇਕਂ ਅਨਾਗਾਮਿਂ ਭੋਜੇਯ੍ਯ… ਯੋ ਚ ਸਤਂ ਅਨਾਗਾਮੀਨਂ ਭੋਜੇਯ੍ਯ, ਯੋ ਚੇਕਂ ਅਰਹਨ੍ਤਂ ਭੋਜੇਯ੍ਯ… ਯੋ ਚ ਸਤਂ ਅਰਹਨ੍ਤਾਨਂ ਭੋਜੇਯ੍ਯ, ਯੋ ਚੇਕਂ ਪਚ੍ਚੇਕਬੁਦ੍ਧਂ ਭੋਜੇਯ੍ਯ… ਯੋ ਚ ਸਤਂ ਪਚ੍ਚੇਕਬੁਦ੍ਧਾਨਂ ਭੋਜੇਯ੍ਯ, ਯੋ ਚ ਤਥਾਗਤਂ ਅਰਹਨ੍ਤਂ ਸਮ੍ਮਾਸਮ੍ਬੁਦ੍ਧਂ ਭੋਜੇਯ੍ਯ… ਯੋ ਚ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਭੋਜੇਯ੍ਯ, ਯੋ ਚ ਚਾਤੁਦ੍ਦਿਸਂ ਸਙ੍ਘਂ ਉਦ੍ਦਿਸ੍ਸ ਵਿਹਾਰਂ ਕਾਰਾਪੇਯ੍ਯ… ਯੋ ਚ ਪਸਨ੍ਨਚਿਤ੍ਤੋ ਬੁਦ੍ਧਞ੍ਚ ਧਮ੍ਮਞ੍ਚ ਸਙ੍ਘਞ੍ਚ ਸਰਣਂ ਗਚ੍ਛੇਯ੍ਯ, ਯੋ ਚ ਪਸਨ੍ਨਚਿਤ੍ਤੋ ਸਿਕ੍ਖਾਪਦਾਨਿ ਸਮਾਦਿਯੇਯ੍ਯ – ਪਾਣਾਤਿਪਾਤਾ ਵੇਰਮਣਿਂ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵੇਰਮਣਿਂ, ਯੋ ਚ ਅਨ੍ਤਮਸੋ ਗਨ੍ਧੋਹਨਮਤ੍ਤਮ੍ਪਿ ਮੇਤ੍ਤਚਿਤ੍ਤਂ ਭਾਵੇਯ੍ਯ, ਯੋ ਚ ਅਚ੍ਛਰਾਸਙ੍ਘਾਤਮਤ੍ਤਮ੍ਪਿ ਅਨਿਚ੍ਚਸਞ੍ਞਂ ਭਾਵੇਯ੍ਯ, ਇਦਂ ਤਤੋ ਮਹਪ੍ਫਲਤਰ’’ਨ੍ਤਿ. ਦਸਮਂ.

ਸੀਹਨਾਦਵਗ੍ਗੋ ਦੁਤਿਯੋ.