੩. ਮਿਤ੍ਤਸੁਤ੍ਤਂ

੬੭. ‘‘‘ਸੋ ਵਤ, ਭਿਕ੍ਖਵੇ, ਭਿਕ੍ਖੁ ਪਾਪਮਿਤ੍ਤੋ ਪਾਪਸਹਾਯੋ ਪਾਪਸਮ੍ਪਵਙ੍ਕੋ, ਪਾਪਮਿਤ੍ਤੇ [ਪਾਪਕੇ ਮਿਤ੍ਤੇ (ਕ.)] ਸੇਵਮਾਨੋ ਭਜਮਾਨੋ ਪਯਿਰੁਪਾਸਮਾਨੋ, ਤੇਸਞ੍ਚ ਦਿਟ੍ਠਾਨੁਗਤਿਂ ਆਪਜ੍ਜਮਾਨੋ ਆਭਿਸਮਾਚਾਰਿਕਂ ਧਮ੍ਮਂ ਪਰਿਪੂਰੇਸ੍ਸਤੀ’ਤਿ ਨੇਤਂ ਠਾਨਂ ਵਿਜ੍ਜਤਿ. ‘ਆਭਿਸਮਾਚਾਰਿਕਂ ਧਮ੍ਮਂ ਅਪਰਿਪੂਰੇਤ੍ਵਾ ਸੇਖਂ ਧਮ੍ਮਂ ਪਰਿਪੂਰੇਸ੍ਸਤੀ’ਤਿ ਨੇਤਂ ਠਾਨਂ ਵਿਜ੍ਜਤਿ. ‘ਸੇਖਂ ਧਮ੍ਮਂ ਅਪਰਿਪੂਰੇਤ੍ਵਾ ਸੀਲਾਨਿ ਪਰਿਪੂਰੇਸ੍ਸਤੀ’ਤਿ ਨੇਤਂ ਠਾਨਂ ਵਿਜ੍ਜਤਿ. ‘ਸੀਲਾਨਿ ਅਪਰਿਪੂਰੇਤ੍ਵਾ ਕਾਮਰਾਗਂ ਵਾ ਰੂਪਰਾਗਂ ਵਾ ਅਰੂਪਰਾਗਂ ਵਾ ਪਜਹਿਸ੍ਸਤੀ’ਤਿ ਨੇਤਂ ਠਾਨਂ ਵਿਜ੍ਜਤਿ.

‘‘‘ਸੋ ਵਤ, ਭਿਕ੍ਖਵੇ, ਭਿਕ੍ਖੁ ਕਲ੍ਯਾਣਮਿਤ੍ਤੋ ਕਲ੍ਯਾਣਸਹਾਯੋ ਕਲ੍ਯਾਣਸਮ੍ਪਵਙ੍ਕੋ, ਕਲ੍ਯਾਣਮਿਤ੍ਤੇ ਸੇਵਮਾਨੋ ਭਜਮਾਨੋ ਪਯਿਰੁਪਾਸਮਾਨੋ, ਤੇਸਞ੍ਚ ਦਿਟ੍ਠਾਨੁਗਤਿਂ ਆਪਜ੍ਜਮਾਨੋ ਆਭਿਸਮਾਚਾਰਿਕਂ ਧਮ੍ਮਂ ਪਰਿਪੂਰੇਸ੍ਸਤੀ’ਤਿ ਠਾਨਮੇਤਂ ਵਿਜ੍ਜਤਿ. ‘ਆਭਿਸਮਾਚਾਰਿਕਂ ਧਮ੍ਮਂ ਪਰਿਪੂਰੇਤ੍ਵਾ ਸੇਖਂ ਧਮ੍ਮਂ ਪਰਿਪੂਰੇਸ੍ਸਤੀ’ਤਿ ਠਾਨਮੇਤਂ ਵਿਜ੍ਜਤਿ. ‘ਸੇਖਂ ਧਮ੍ਮਂ ਪਰਿਪੂਰੇਤ੍ਵਾ ਸੀਲਾਨਿ ਪਰਿਪੂਰੇਸ੍ਸਤੀ’ਤਿ ਠਾਨਮੇਤਂ ਵਿਜ੍ਜਤਿ. ‘ਸੀਲਾਨਿ ਪਰਿਪੂਰੇਤ੍ਵਾ ਕਾਮਰਾਗਂ ਵਾ ਰੂਪਰਾਗਂ ਵਾ ਅਰੂਪਰਾਗਂ ਵਾ ਪਜਹਿਸ੍ਸਤੀ’ਤਿ ਠਾਨਮੇਤਂ ਵਿਜ੍ਜਤੀ’’ਤਿ. ਤਤਿਯਂ.