(੨੩) ੩. ਦੀਘਚਾਰਿਕਵਗ੍ਗੋ

੧. ਪਠਮਦੀਘਚਾਰਿਕਸੁਤ੍ਤਂ

੨੨੧. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਦੀਘਚਾਰਿਕਂ ਅਨਵਤ੍ਥਚਾਰਿਕਂ ਅਨੁਯੁਤ੍ਤਸ੍ਸ ਵਿਹਰਤੋ. ਕਤਮੇ ਪਞ੍ਚ? ਅਸ੍ਸੁਤਂ ਨ ਸੁਣਾਤਿ, ਸੁਤਂ ਨ ਪਰਿਯੋਦਾਪੇਤਿ, ਸੁਤੇਨੇਕਚ੍ਚੇਨ ਅਵਿਸਾਰਦੋ ਹੋਤਿ, ਗਾਲ਼੍ਹਂ [ਬਾਲ਼੍ਹਂ (ਸ੍ਯਾ.)] ਰੋਗਾਤਙ੍ਕਂ ਫੁਸਤਿ, ਨ ਚ ਮਿਤ੍ਤਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਦੀਘਚਾਰਿਕਂ ਅਨਵਤ੍ਥਚਾਰਿਕਂ ਅਨੁਯੁਤ੍ਤਸ੍ਸ ਵਿਹਰਤੋ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸਮਵਤ੍ਥਚਾਰੇ. ਕਤਮੇ ਪਞ੍ਚ? ਅਸ੍ਸੁਤਂ ਸੁਣਾਤਿ, ਸੁਤਂ ਪਰਿਯੋਦਾਪੇਤਿ, ਸੁਤੇਨੇਕਚ੍ਚੇਨ ਵਿਸਾਰਦੋ ਹੋਤਿ, ਨ ਗਾਲ਼੍ਹਂ ਰੋਗਾਤਙ੍ਕਂ ਫੁਸਤਿ, ਮਿਤ੍ਤਵਾ ਚ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸਮਵਤ੍ਥਚਾਰੇ’’ਤਿ. ਪਠਮਂ.

੨. ਦੁਤਿਯਦੀਘਚਾਰਿਕਸੁਤ੍ਤਂ

੨੨੨. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਦੀਘਚਾਰਿਕਂ ਅਨਵਤ੍ਥਚਾਰਿਕਂ ਅਨੁਯੁਤ੍ਤਸ੍ਸ ਵਿਹਰਤੋ. ਕਤਮੇ ਪਞ੍ਚ? ਅਨਧਿਗਤਂ ਨਾਧਿਗਚ੍ਛਤਿ, ਅਧਿਗਤਾ ਪਰਿਹਾਯਤਿ, ਅਧਿਗਤੇਨੇਕਚ੍ਚੇਨ ਅਵਿਸਾਰਦੋ ਹੋਤਿ, ਗਾਲ਼੍ਹਂ ਰੋਗਾਤਙ੍ਕਂ ਫੁਸਤਿ, ਨ ਚ ਮਿਤ੍ਤਵਾ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਦੀਘਚਾਰਿਕਂ ਅਨਵਤ੍ਥਚਾਰਿਕਂ ਅਨੁਯੁਤ੍ਤਸ੍ਸ ਵਿਹਰਤੋ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸਮਵਤ੍ਥਚਾਰੇ. ਕਤਮੇ ਪਞ੍ਚ? ਅਨਧਿਗਤਂ ਅਧਿਗਚ੍ਛਤਿ, ਅਧਿਗਤਾ ਨ ਪਰਿਹਾਯਤਿ, ਅਧਿਗਤੇਨੇਕਚ੍ਚੇਨ ਵਿਸਾਰਦੋ ਹੋਤਿ, ਨ ਗਾਲ਼੍ਹਂ ਰੋਗਾਤਙ੍ਕਂ ਫੁਸਤਿ, ਮਿਤ੍ਤਵਾ ਚ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸਮਵਤ੍ਥਚਾਰੇ’’ਤਿ. ਦੁਤਿਯਂ.

੩. ਅਤਿਨਿਵਾਸਸੁਤ੍ਤਂ

੨੨੩. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਅਤਿਨਿਵਾਸੇ. ਕਤਮੇ ਪਞ੍ਚ? ਬਹੁਭਣ੍ਡੋ ਹੋਤਿ ਬਹੁਭਣ੍ਡਸਨ੍ਨਿਚਯੋ, ਬਹੁਭੇਸਜ੍ਜੋ ਹੋਤਿ ਬਹੁਭੇਸਜ੍ਜਸਨ੍ਨਿਚਯੋ, ਬਹੁਕਿਚ੍ਚੋ ਹੋਤਿ ਬਹੁਕਰਣੀਯੋ ਬ੍ਯਤ੍ਤੋ ਕਿਂਕਰਣੀਯੇਸੁ, ਸਂਸਟ੍ਠੋ ਵਿਹਰਤਿ ਗਹਟ੍ਠਪਬ੍ਬਜਿਤੇਹਿ ਅਨਨੁਲੋਮਿਕੇਨ ਗਿਹਿਸਂਸਗ੍ਗੇਨ, ਤਮ੍ਹਾ ਚ ਆਵਾਸਾ ਪਕ੍ਕਮਨ੍ਤੋ ਸਾਪੇਕ੍ਖੋ ਪਕ੍ਕਮਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਅਤਿਨਿਵਾਸੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸਮਵਤ੍ਥਵਾਸੇ. ਕਤਮੇ ਪਞ੍ਚ? ਨ ਬਹੁਭਣ੍ਡੋ ਹੋਤਿ ਨ ਬਹੁਭਣ੍ਡਸਨ੍ਨਿਚਯੋ, ਨ ਬਹੁਭੇਸਜ੍ਜੋ ਹੋਤਿ ਨ ਬਹੁਭੇਸਜ੍ਜਸਨ੍ਨਿਚਯੋ, ਨ ਬਹੁਕਿਚ੍ਚੋ ਹੋਤਿ ਨ ਬਹੁਕਰਣੀਯੋ ਨ ਬ੍ਯਤ੍ਤੋ ਕਿਂਕਰਣੀਯੇਸੁ, ਅਸਂਸਟ੍ਠੋ ਵਿਹਰਤਿ ਗਹਟ੍ਠਪਬ੍ਬਜਿਤੇਹਿ ਅਨਨੁਲੋਮਿਕੇਨ ਗਿਹਿਸਂਸਗ੍ਗੇਨ, ਤਮ੍ਹਾ ਚ ਆਵਾਸਾ ਪਕ੍ਕਮਨ੍ਤੋ ਅਨਪੇਕ੍ਖੋ ਪਕ੍ਕਮਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸਮਵਤ੍ਥਵਾਸੇ’’ਤਿ. ਤਤਿਯਂ.

੪. ਮਚ੍ਛਰੀਸੁਤ੍ਤਂ

੨੨੪. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਅਤਿਨਿਵਾਸੇ. ਕਤਮੇ ਪਞ੍ਚ? ਆਵਾਸਮਚ੍ਛਰੀ ਹੋਤਿ, ਕੁਲਮਚ੍ਛਰੀ ਹੋਤਿ, ਲਾਭਮਚ੍ਛਰੀ ਹੋਤਿ, ਵਣ੍ਣਮਚ੍ਛਰੀ ਹੋਤਿ, ਧਮ੍ਮਮਚ੍ਛਰੀ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਅਤਿਨਿਵਾਸੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸਮਵਤ੍ਥਵਾਸੇ. ਕਤਮੇ ਪਞ੍ਚ? ਨ ਆਵਾਸਮਚ੍ਛਰੀ ਹੋਤਿ, ਨ ਕੁਲਮਚ੍ਛਰੀ ਹੋਤਿ, ਨ ਲਾਭਮਚ੍ਛਰੀ ਹੋਤਿ, ਨ ਵਣ੍ਣਮਚ੍ਛਰੀ ਹੋਤਿ, ਨ ਧਮ੍ਮਮਚ੍ਛਰੀ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸਮਵਤ੍ਥਵਾਸੇ’’ਤਿ. ਚਤੁਤ੍ਥਂ.

੫. ਪਠਮਕੁਲੂਪਕਸੁਤ੍ਤਂ

੨੨੫. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕੁਲੂਪਕੇ [ਕੁਲੁਪਕੇ (ਸ੍ਯਾ. ਪੀ.), ਕੁਲੂਪਗੇ (ਸੀ.)]. ਕਤਮੇ ਪਞ੍ਚ? ਅਨਾਮਨ੍ਤਚਾਰੇ ਆਪਜ੍ਜਤਿ, ਰਹੋ ਨਿਸਜ੍ਜਾਯ ਆਪਜ੍ਜਤਿ, ਪਟਿਚ੍ਛਨ੍ਨੇ ਆਸਨੇ ਆਪਜ੍ਜਤਿ, ਮਾਤੁਗਾਮਸ੍ਸ ਉਤ੍ਤਰਿ ਛਪ੍ਪਞ੍ਚਵਾਚਾਹਿ ਧਮ੍ਮਂ ਦੇਸੇਨ੍ਤੋ ਆਪਜ੍ਜਤਿ, ਕਾਮਸਙ੍ਕਪ੍ਪਬਹੁਲੋ ਵਿਹਰਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਕੁਲੂਪਕੇ’’ਤਿ. ਪਞ੍ਚਮਂ.

੬. ਦੁਤਿਯਕੁਲੂਪਕਸੁਤ੍ਤਂ

੨੨੬. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕੁਲੂਪਕਸ੍ਸ ਭਿਕ੍ਖੁਨੋ ਅਤਿਵੇਲਂ ਕੁਲੇਸੁ ਸਂਸਟ੍ਠਸ੍ਸ ਵਿਹਰਤੋ. ਕਤਮੇ ਪਞ੍ਚ? ਮਾਤੁਗਾਮਸ੍ਸ ਅਭਿਣ੍ਹਦਸ੍ਸਨਂ, ਦਸ੍ਸਨੇ ਸਤਿ ਸਂਸਗ੍ਗੋ, ਸਂਸਗ੍ਗੇ ਸਤਿ ਵਿਸ੍ਸਾਸੋ, ਵਿਸ੍ਸਾਸੇ ਸਤਿ ਓਤਾਰੋ, ਓਤਿਣ੍ਣਚਿਤ੍ਤਸ੍ਸੇਤਂ ਪਾਟਿਕਙ੍ਖਂ – ‘ਅਨਭਿਰਤੋ ਵਾ ਬ੍ਰਹ੍ਮਚਰਿਯਂ ਚਰਿਸ੍ਸਤਿ ਅਞ੍ਞਤਰਂ ਵਾ ਸਂਕਿਲਿਟ੍ਠਂ ਆਪਤ੍ਤਿਂ ਆਪਜ੍ਜਿਸ੍ਸਤਿ ਸਿਕ੍ਖਂ ਵਾ ਪਚ੍ਚਕ੍ਖਾਯ ਹੀਨਾਯਾਵਤ੍ਤਿਸ੍ਸਤਿ’. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਕੁਲੂਪਕਸ੍ਸ ਭਿਕ੍ਖੁਨੋ ਅਤਿਵੇਲਂ ਕੁਲੇਸੁ ਸਂਸਟ੍ਠਸ੍ਸ ਵਿਹਰਤੋ’’ਤਿ. ਛਟ੍ਠਂ.

੭. ਭੋਗਸੁਤ੍ਤਂ

੨੨੭. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਭੋਗੇਸੁ. ਕਤਮੇ ਪਞ੍ਚ? ਅਗ੍ਗਿਸਾਧਾਰਣਾ ਭੋਗਾ, ਉਦਕਸਾਧਾਰਣਾ ਭੋਗਾ, ਰਾਜਸਾਧਾਰਣਾ ਭੋਗਾ, ਚੋਰਸਾਧਾਰਣਾ ਭੋਗਾ, ਅਪ੍ਪਿਯੇਹਿ ਦਾਯਾਦੇਹਿ ਸਾਧਾਰਣਾ ਭੋਗਾ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਭੋਗੇਸੁ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਭੋਗੇਸੁ. ਕਤਮੇ ਪਞ੍ਚ? ਭੋਗੇ ਨਿਸ੍ਸਾਯ ਅਤ੍ਤਾਨਂ ਸੁਖੇਤਿ ਪੀਣੇਤਿ ਸਮ੍ਮਾ ਸੁਖਂ ਪਰਿਹਰਤਿ, ਮਾਤਾਪਿਤਰੋ ਸੁਖੇਤਿ ਪੀਣੇਤਿ ਸਮ੍ਮਾ ਸੁਖਂ ਪਰਿਹਰਤਿ, ਪੁਤ੍ਤਦਾਰਦਾਸਕਮ੍ਮਕਰਪੋਰਿਸੇ ਸੁਖੇਤਿ ਪੀਣੇਤਿ ਸਮ੍ਮਾ ਸੁਖਂ ਪਰਿਹਰਤਿ, ਮਿਤ੍ਤਾਮਚ੍ਚੇ ਸੁਖੇਤਿ ਪੀਣੇਤਿ ਸਮ੍ਮਾ ਸੁਖਂ ਪਰਿਹਰਤਿ, ਸਮਣਬ੍ਰਾਹ੍ਮਣੇਸੁ ਉਦ੍ਧਗ੍ਗਿਕਂ ਦਕ੍ਖਿਣਂ ਪਤਿਟ੍ਠਾਪੇਤਿ ਸੋਵਗ੍ਗਿਕਂ ਸੁਖਵਿਪਾਕਂ ਸਗ੍ਗਸਂਵਤ੍ਤਨਿਕਂ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਭੋਗੇਸੂ’’ਤਿ. ਸਤ੍ਤਮਂ.

੮. ਉਸ੍ਸੂਰਭਤ੍ਤਸੁਤ੍ਤਂ

੨੨੮. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਉਸ੍ਸੂਰਭਤ੍ਤੇ ਕੁਲੇ. ਕਤਮੇ ਪਞ੍ਚ? ਯੇ ਤੇ ਅਤਿਥੀ ਪਾਹੁਨਾ, ਤੇ ਨ ਕਾਲੇਨ ਪਟਿਪੂਜੇਨ੍ਤਿ; ਯਾ ਤਾ ਬਲਿਪਟਿਗ੍ਗਾਹਿਕਾ ਦੇਵਤਾ, ਤਾ ਨ ਕਾਲੇਨ ਪਟਿਪੂਜੇਨ੍ਤਿ; ਯੇ ਤੇ ਸਮਣਬ੍ਰਾਹ੍ਮਣਾ ਏਕਭਤ੍ਤਿਕਾ ਰਤ੍ਤੂਪਰਤਾ ਵਿਰਤਾ ਵਿਕਾਲਭੋਜਨਾ, ਤੇ ਨ ਕਾਲੇਨ ਪਟਿਪੂਜੇਨ੍ਤਿ; ਦਾਸਕਮ੍ਮਕਰਪੋਰਿਸਾ ਵਿਮੁਖਾ ਕਮ੍ਮਂ ਕਰੋਨ੍ਤਿ; ਤਾਵਤਕਂਯੇਵ ਅਸਮਯੇਨ ਭੁਤ੍ਤਂ ਅਨੋਜਵਨ੍ਤਂ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਉਸ੍ਸੂਰਭਤ੍ਤੇ ਕੁਲੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਸਮਯਭਤ੍ਤੇ ਕੁਲੇ. ਕਤਮੇ ਪਞ੍ਚ? ਯੇ ਤੇ ਅਤਿਥੀ ਪਾਹੁਨਾ, ਤੇ ਕਾਲੇਨ ਪਟਿਪੂਜੇਨ੍ਤਿ; ਯਾ ਤਾ ਬਲਿਪਟਿਗ੍ਗਾਹਿਕਾ ਦੇਵਤਾ, ਤਾ ਕਾਲੇਨ ਪਟਿਪੂਜੇਨ੍ਤਿ; ਯੇ ਤੇ ਸਮਣਬ੍ਰਾਹ੍ਮਣਾ ਏਕਭਤ੍ਤਿਕਾ ਰਤ੍ਤੂਪਰਤਾ ਵਿਰਤਾ ਵਿਕਾਲਭੋਜਨਾ, ਤੇ ਕਾਲੇਨ ਪਟਿਪੂਜੇਨ੍ਤਿ; ਦਾਸਕਮ੍ਮਕਰਪੋਰਿਸਾ ਅਵਿਮੁਖਾ ਕਮ੍ਮਂ ਕਰੋਨ੍ਤਿ; ਤਾਵਤਕਂਯੇਵ ਸਮਯੇਨ ਭੁਤ੍ਤਂ ਓਜਵਨ੍ਤਂ ਹੋਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਸਮਯਭਤ੍ਤੇ ਕੁਲੇ’’ਤਿ. ਅਟ੍ਠਮਂ.

੯. ਪਠਮਕਣ੍ਹਸਪ੍ਪਸੁਤ੍ਤਂ

੨੨੯. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕਣ੍ਹਸਪ੍ਪੇ. ਕਤਮੇ ਪਞ੍ਚ? ਅਸੁਚਿ, ਦੁਗ੍ਗਨ੍ਧੋ, ਸਭੀਰੁ, ਸਪ੍ਪਟਿਭਯੋ, ਮਿਤ੍ਤਦੁਬ੍ਭੀ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਕਣ੍ਹਸਪ੍ਪੇ. ਏਵਮੇਵਂ ਖੋ, ਭਿਕ੍ਖਵੇ, ਪਞ੍ਚਿਮੇ ਆਦੀਨਵਾ ਮਾਤੁਗਾਮੇ. ਕਤਮੇ ਪਞ੍ਚ? ਅਸੁਚਿ, ਦੁਗ੍ਗਨ੍ਧੋ, ਸਭੀਰੁ, ਸਪ੍ਪਟਿਭਯੋ, ਮਿਤ੍ਤਦੁਬ੍ਭੀ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਮਾਤੁਗਾਮੇ’’ਤਿ. ਨਵਮਂ.

੧੦. ਦੁਤਿਯਕਣ੍ਹਸਪ੍ਪਸੁਤ੍ਤਂ

੨੩੦. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਕਣ੍ਹਸਪ੍ਪੇ. ਕਤਮੇ ਪਞ੍ਚ? ਕੋਧਨੋ, ਉਪਨਾਹੀ, ਘੋਰਵਿਸੋ, ਦੁਜ੍ਜਿਵ੍ਹੋ, ਮਿਤ੍ਤਦੁਬ੍ਭੀ – ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਕਣ੍ਹਸਪ੍ਪੇ.

‘‘ਏਵਮੇਵਂ ਖੋ, ਭਿਕ੍ਖਵੇ, ਪਞ੍ਚਿਮੇ ਆਦੀਨਵਾ ਮਾਤੁਗਾਮੇ. ਕਤਮੇ ਪਞ੍ਚ? ਕੋਧਨੋ, ਉਪਨਾਹੀ, ਘੋਰਵਿਸੋ, ਦੁਜ੍ਜਿਵ੍ਹੋ, ਮਿਤ੍ਤਦੁਬ੍ਭੀ. ਤਤ੍ਰਿਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਘੋਰਵਿਸਤਾ – ਯੇਭੁਯ੍ਯੇਨ, ਭਿਕ੍ਖਵੇ, ਮਾਤੁਗਾਮੋ ਤਿਬ੍ਬਰਾਗੋ. ਤਤ੍ਰਿਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਦੁਜ੍ਜਿਵ੍ਹਤਾ – ਯੇਭੁਯ੍ਯੇਨ, ਭਿਕ੍ਖਵੇ, ਮਾਤੁਗਾਮੋ ਪਿਸੁਣਵਾਚੋ. ਤਤ੍ਰਿਦਂ, ਭਿਕ੍ਖਵੇ, ਮਾਤੁਗਾਮਸ੍ਸ ਮਿਤ੍ਤਦੁਬ੍ਭਿਤਾ – ਯੇਭੁਯ੍ਯੇਨ, ਭਿਕ੍ਖਵੇ, ਮਾਤੁਗਾਮੋ ਅਤਿਚਾਰਿਨੀ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਮਾਤੁਗਾਮੇ’’ਤਿ. ਦਸਮਂ.

ਦੀਘਚਾਰਿਕਵਗ੍ਗੋ ਤਤਿਯੋ.