੪. ਬਹੁਭਾਣਿਸੁਤ੍ਤਂ

੨੧੪. ‘‘ਪਞ੍ਚਿਮੇ, ਭਿਕ੍ਖਵੇ, ਆਦੀਨਵਾ ਬਹੁਭਾਣਿਸ੍ਮਿਂ ਪੁਗ੍ਗਲੇ. ਕਤਮੇ ਪਞ੍ਚ? ਮੁਸਾ ਭਣਤਿ, ਪਿਸੁਣਂ ਭਣਤਿ, ਫਰੁਸਂ ਭਣਤਿ, ਸਮ੍ਫਪ੍ਪਲਾਪਂ ਭਣਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਅਪਾਯਂ ਦੁਗ੍ਗਤਿਂ ਵਿਨਿਪਾਤਂ ਨਿਰਯਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਦੀਨਵਾ ਬਹੁਭਾਣਿਸ੍ਮਿਂ ਪੁਗ੍ਗਲੇ.

‘‘ਪਞ੍ਚਿਮੇ, ਭਿਕ੍ਖਵੇ, ਆਨਿਸਂਸਾ ਮਨ੍ਤਭਾਣਿਸ੍ਮਿਂ ਪੁਗ੍ਗਲੇ. ਕਤਮੇ ਪਞ੍ਚ? ਨ ਮੁਸਾ ਭਣਤਿ, ਨ ਪਿਸੁਣਂ ਭਣਤਿ, ਨ ਫਰੁਸਂ ਭਣਤਿ, ਨ ਸਮ੍ਫਪ੍ਪਲਾਪਂ ਭਣਤਿ, ਕਾਯਸ੍ਸ ਭੇਦਾ ਪਰਂ ਮਰਣਾ ਸੁਗਤਿਂ ਸਗ੍ਗਂ ਲੋਕਂ ਉਪਪਜ੍ਜਤਿ. ਇਮੇ ਖੋ, ਭਿਕ੍ਖਵੇ, ਪਞ੍ਚ ਆਨਿਸਂਸਾ ਮਨ੍ਤਭਾਣਿਸ੍ਮਿਂ ਪੁਗ੍ਗਲੇ’’ਤਿ. ਚਤੁਤ੍ਥਂ.