੯. ਸਚ੍ਛਿਕਰਣੀਯਸੁਤ੍ਤਂ

੧੮੯. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਸਚ੍ਛਿਕਰਣੀਯਾ ਧਮ੍ਮਾ. ਕਤਮੇ ਚਤ੍ਤਾਰੋ? ਅਤ੍ਥਿ, ਭਿਕ੍ਖਵੇ, ਧਮ੍ਮਾ ਕਾਯੇਨ ਸਚ੍ਛਿਕਰਣੀਯਾ; ਅਤ੍ਥਿ, ਭਿਕ੍ਖਵੇ, ਧਮ੍ਮਾ ਸਤਿਯਾ ਸਚ੍ਛਿਕਰਣੀਯਾ; ਅਤ੍ਥਿ, ਭਿਕ੍ਖਵੇ, ਧਮ੍ਮਾ ਚਕ੍ਖੁਨਾ ਸਚ੍ਛਿਕਰਣੀਯਾ; ਅਤ੍ਥਿ, ਭਿਕ੍ਖਵੇ, ਧਮ੍ਮਾ ਪਞ੍ਞਾਯ ਸਚ੍ਛਿਕਰਣੀਯਾ. ਕਤਮੇ ਚ, ਭਿਕ੍ਖਵੇ, ਧਮ੍ਮਾ ਕਾਯੇਨ ਸਚ੍ਛਿਕਰਣੀਯਾ? ਅਟ੍ਠ ਵਿਮੋਕ੍ਖਾ, ਭਿਕ੍ਖਵੇ, ਕਾਯੇਨ ਸਚ੍ਛਿਕਰਣੀਯਾ.

‘‘ਕਤਮੇ ਚ, ਭਿਕ੍ਖਵੇ, ਧਮ੍ਮਾ ਸਤਿਯਾ ਸਚ੍ਛਿਕਰਣੀਯਾ? ਪੁਬ੍ਬੇਨਿਵਾਸੋ, ਭਿਕ੍ਖਵੇ, ਸਤਿਯਾ ਸਚ੍ਛਿਕਰਣੀਯੋ.

‘‘ਕਤਮੇ ਚ, ਭਿਕ੍ਖਵੇ, ਧਮ੍ਮਾ ਚਕ੍ਖੁਨਾ ਸਚ੍ਛਿਕਰਣੀਯਾ? ਸਤ੍ਤਾਨਂ ਚੁਤੂਪਪਾਤੋ, ਭਿਕ੍ਖਵੇ, ਚਕ੍ਖੁਨਾ ਸਚ੍ਛਿਕਰਣੀਯੋ.

‘‘ਕਤਮੇ ਚ, ਭਿਕ੍ਖਵੇ, ਧਮ੍ਮਾ ਪਞ੍ਞਾਯ ਸਚ੍ਛਿਕਰਣੀਯਾ? ਆਸਵਾਨਂ ਖਯੋ, ਭਿਕ੍ਖਵੇ, ਪਞ੍ਞਾਯ ਸਚ੍ਛਿਕਰਣੀਯੋ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਸਚ੍ਛਿਕਰਣੀਯਾ ਧਮ੍ਮਾ’’ਤਿ. ਨਵਮਂ.