੨. ਆਨਣ੍ਯਸੁਤ੍ਤਂ

੬੨. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਅਨਾਥਪਿਣ੍ਡਿਕਂ ਗਹਪਤਿਂ ਭਗਵਾ ਏਤਦਵੋਚ –

‘‘ਚਤ੍ਤਾਰਿਮਾਨਿ, ਗਹਪਤਿ, ਸੁਖਾਨਿ ਅਧਿਗਮਨੀਯਾਨਿ ਗਿਹਿਨਾ ਕਾਮਭੋਗਿਨਾ ਕਾਲੇਨ ਕਾਲਂ ਸਮਯੇਨ ਸਮਯਂ ਉਪਾਦਾਯ. ਕਤਮਾਨਿ ਚਤ੍ਤਾਰਿ? ਅਤ੍ਥਿਸੁਖਂ, ਭੋਗਸੁਖਂ, ਆਨਣ੍ਯਸੁਖਂ [ਅਣਣਸੁਖਂ (ਸੀ. ਸ੍ਯਾ. ਕਂ. ਪੀ.)], ਅਨਵਜ੍ਜਸੁਖਂ.

‘‘ਕਤਮਞ੍ਚ, ਗਹਪਤਿ, ਅਤ੍ਥਿਸੁਖਂ? ਇਧ, ਗਹਪਤਿ, ਕੁਲਪੁਤ੍ਤਸ੍ਸ ਭੋਗਾ ਹੋਨ੍ਤਿ ਉਟ੍ਠਾਨਵੀਰਿਯਾਧਿਗਤਾ ਬਾਹਾਬਲਪਰਿਚਿਤਾ ਸੇਦਾਵਕ੍ਖਿਤ੍ਤਾ ਧਮ੍ਮਿਕਾ ਧਮ੍ਮਲਦ੍ਧਾ. ਸੋ ‘ਭੋਗਾ ਮੇ ਅਤ੍ਥਿ ਉਟ੍ਠਾਨਵੀਰਿਯਾਧਿਗਤਾ ਬਾਹਾਬਲਪਰਿਚਿਤਾ ਸੇਦਾਵਕ੍ਖਿਤ੍ਤਾ ਧਮ੍ਮਿਕਾ ਧਮ੍ਮਲਦ੍ਧਾ’ਤਿ ਅਧਿਗਚ੍ਛਤਿ ਸੁਖਂ, ਅਧਿਗਚ੍ਛਤਿ ਸੋਮਨਸ੍ਸਂ. ਇਦਂ ਵੁਚ੍ਚਤਿ, ਗਹਪਤਿ, ਅਤ੍ਥਿਸੁਖਂ.

‘‘ਕਤਮਞ੍ਚ, ਗਹਪਤਿ, ਭੋਗਸੁਖਂ? ਇਧ, ਗਹਪਤਿ, ਕੁਲਪੁਤ੍ਤੋ ਉਟ੍ਠਾਨਵੀਰਿਯਾਧਿਗਤੇਹਿ ਭੋਗੇਹਿ ਬਾਹਾਬਲਪਰਿਚਿਤੇਹਿ ਸੇਦਾਵਕ੍ਖਿਤ੍ਤੇਹਿ ਧਮ੍ਮਿਕੇਹਿ ਧਮ੍ਮਲਦ੍ਧੇਹਿ ਪਰਿਭੁਞ੍ਜਤਿ ਪੁਞ੍ਞਾਨਿ ਚ ਕਰੋਤਿ. ਸੋ ‘ਉਟ੍ਠਾਨਵੀਰਿਯਾਧਿਗਤੇਹਿ ਭੋਗੇਹਿ ਬਾਹਾਬਲਪਰਿਚਿਤੇਹਿ ਸੇਦਾਵਕ੍ਖਿਤ੍ਤੇਹਿ ਧਮ੍ਮਿਕੇਹਿ ਧਮ੍ਮਲਦ੍ਧੇਹਿ ਪਰਿਭੁਞ੍ਜਾਮਿ ਪੁਞ੍ਞਾਨਿ ਚ ਕਰੋਮੀ’ਤਿ ਅਧਿਗਚ੍ਛਤਿ ਸੁਖਂ, ਅਧਿਗਚ੍ਛਤਿ ਸੋਮਨਸ੍ਸਂ. ਇਦਂ ਵੁਚ੍ਚਤਿ, ਗਹਪਤਿ, ਭੋਗਸੁਖਂ.

‘‘ਕਤਮਞ੍ਚ, ਗਹਪਤਿ, ਆਨਣ੍ਯਸੁਖਂ? ਇਧ, ਗਹਪਤਿ, ਕੁਲਪੁਤ੍ਤੋ ਨ ਕਸ੍ਸਚਿ ਕਿਞ੍ਚਿ ਧਾਰੇਤਿ ਅਪ੍ਪਂ ਵਾ ਬਹੁਂ ਵਾ. ਸੋ ‘ਨ ਕਸ੍ਸਚਿ ਕਿਞ੍ਚਿ ਧਾਰੇਮਿ [ਕਿਞ੍ਚਿ ਵਾ ਦੇਤਿ (ਕ.)] ਅਪ੍ਪਂ ਵਾ ਬਹੁਂ ਵਾ’ਤਿ ਅਧਿਗਚ੍ਛਤਿ ਸੁਖਂ, ਅਧਿਗਚ੍ਛਤਿ ਸੋਮਨਸ੍ਸਂ. ਇਦਂ ਵੁਚ੍ਚਤਿ, ਗਹਪਤਿ, ਆਨਣ੍ਯਸੁਖਂ.

‘‘ਕਤਮਞ੍ਚ, ਗਹਪਤਿ, ਅਨਵਜ੍ਜਸੁਖਂ? ਇਧ, ਗਹਪਤਿ, ਅਰਿਯਸਾਵਕੋ ਅਨਵਜ੍ਜੇਨ ਕਾਯਕਮ੍ਮੇਨ ਸਮਨ੍ਨਾਗਤੋ ਹੋਤਿ, ਅਨਵਜ੍ਜੇਨ ਵਚੀਕਮ੍ਮੇਨ ਸਮਨ੍ਨਾਗਤੋ ਹੋਤਿ, ਅਨਵਜ੍ਜੇਨ ਮਨੋਕਮ੍ਮੇਨ ਸਮਨ੍ਨਾਗਤੋ ਹੋਤਿ. ਸੋ ‘ਅਨਵਜ੍ਜੇਨਮ੍ਹਿ ਕਾਯਕਮ੍ਮੇਨ ਸਮਨ੍ਨਾਗਤੋ, ਅਨਵਜ੍ਜੇਨ ਵਚੀਕਮ੍ਮੇਨ ਸਮਨ੍ਨਾਗਤੋ, ਅਨਵਜ੍ਜੇਨ ਮਨੋਕਮ੍ਮੇਨ ਸਮਨ੍ਨਾਗਤੋ’ਤਿ ਅਧਿਗਚ੍ਛਤਿ ਸੁਖਂ, ਅਧਿਗਚ੍ਛਤਿ ਸੋਮਨਸ੍ਸਂ. ਇਦਂ ਵੁਚ੍ਚਤਿ, ਗਹਪਤਿ, ਅਨਵਜ੍ਜਸੁਖਂ. ਇਮਾਨਿ ਖੋ, ਗਹਪਤਿ, ਚਤ੍ਤਾਰਿ ਸੁਖਾਨਿ ਅਧਿਗਮਨੀਯਾਨਿ ਗਿਹਿਨਾ ਕਾਮਭੋਗਿਨਾ ਕਾਲੇਨ ਕਾਲਂ ਸਮਯੇਨ ਸਮਯਂ ਉਪਾਦਾਯਾ’’ਤਿ.

‘‘ਆਨਣ੍ਯਸੁਖਂ ਞਤ੍ਵਾਨ, ਅਥੋ ਅਤ੍ਥਿਸੁਖਂ ਪਰਂ;

ਭੁਞ੍ਜਂ ਭੋਗਸੁਖਂ ਮਚ੍ਚੋ, ਤਤੋ ਪਞ੍ਞਾ ਵਿਪਸ੍ਸਤਿ.

‘‘ਵਿਪਸ੍ਸਮਾਨੋ ਜਾਨਾਤਿ, ਉਭੋ ਭੋਗੇ ਸੁਮੇਧਸੋ;

ਅਨਵਜ੍ਜਸੁਖਸ੍ਸੇਤਂ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ. ਦੁਤਿਯਂ;