੧੦. ਗਿਹਿਸਾਮੀਚਿਸੁਤ੍ਤਂ

੬੦. ਅਥ ਖੋ ਅਨਾਥਪਿਣ੍ਡਿਕੋ ਗਹਪਤਿ ਯੇਨ ਭਗਵਾ ਤੇਨੁਪਸਙ੍ਕਮਿ; ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨਂ ਖੋ ਅਨਾਥਪਿਣ੍ਡਿਕਂ ਗਹਪਤਿਂ ਭਗਵਾ ਏਤਦਵੋਚ –

‘‘ਚਤੂਹਿ ਖੋ, ਗਹਪਤਿ, ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾਵਕੋ ਗਿਹਿਸਾਮੀਚਿਪਟਿਪਦਂ ਪਟਿਪਨ੍ਨੋ ਹੋਤਿ ਯਸੋਪਟਿਲਾਭਿਨਿਂ ਸਗ੍ਗਸਂਵਤ੍ਤਨਿਕਂ. ਕਤਮੇਹਿ ਚਤੂਹਿ? ਇਧ, ਗਹਪਤਿ, ਅਰਿਯਸਾਵਕੋ ਭਿਕ੍ਖੁਸਙ੍ਘਂ ਪਚ੍ਚੁਪਟ੍ਠਿਤੋ ਹੋਤਿ ਚੀਵਰੇਨ, ਭਿਕ੍ਖੁਸਙ੍ਘਂ ਪਚ੍ਚੁਪਟ੍ਠਿਤੋ ਹੋਤਿ ਪਿਣ੍ਡਪਾਤੇਨ, ਭਿਕ੍ਖੁਸਙ੍ਘਂ ਪਚ੍ਚੁਪਟ੍ਠਿਤੋ ਹੋਤਿ ਸੇਨਾਸਨੇਨ, ਭਿਕ੍ਖੁਸਙ੍ਘਂ ਪਚ੍ਚੁਪਟ੍ਠਿਤੋ ਹੋਤਿ ਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰੇਨ. ਇਮੇਹਿ ਖੋ, ਗਹਪਤਿ, ਚਤੂਹਿ ਧਮ੍ਮੇਹਿ ਸਮਨ੍ਨਾਗਤੋ ਅਰਿਯਸਾਵਕੋ ਗਿਹਿਸਾਮੀਚਿਪਟਿਪਦਂ ਪਟਿਪਨ੍ਨੋ ਹੋਤਿ ਯਸੋਪਟਿਲਾਭਿਨਿਂ ਸਗ੍ਗਸਂਵਤ੍ਤਨਿਕ’’ਨ੍ਤਿ.

‘‘ਗਿਹਿਸਾਮੀਚਿਪਟਿਪਦਂ, ਪਟਿਪਜ੍ਜਨ੍ਤਿ ਪਣ੍ਡਿਤਾ;

ਸਮ੍ਮਗ੍ਗਤੇ ਸੀਲਵਨ੍ਤੇ, ਚੀਵਰੇਨ ਉਪਟ੍ਠਿਤਾ.

ਪਿਣ੍ਡਪਾਤਸਯਨੇਨ, ਗਿਲਾਨਪ੍ਪਚ੍ਚਯੇਨ ਚ;

ਤੇਸਂ ਦਿਵਾ ਚ ਰਤ੍ਤੋ ਚ, ਸਦਾ ਪੁਞ੍ਞਂ ਪਵਡ੍ਢਤਿ;

ਸਗ੍ਗਞ੍ਚ ਕਮਤਿਟ੍ਠਾਨਂ [ਸਗ੍ਗਞ੍ਚ ਸਪ੍ਪਤਿਟ੍ਠਾਨਂ (ਕ.)], ਕਮ੍ਮਂ ਕਤ੍ਵਾਨ ਭਦ੍ਦਕ’’ਨ੍ਤਿ. ਦਸਮਂ;

ਪੁਞ੍ਞਾਭਿਸਨ੍ਦਵਗ੍ਗੋ ਪਠਮੋ.