੭. ਚਤੁਮਹਾਰਾਜਸੁਤ੍ਤਂ

੩੭. ‘‘ਅਟ੍ਠਮਿਯਂ, ਭਿਕ੍ਖਵੇ, ਪਕ੍ਖਸ੍ਸ ਚਤੁਨ੍ਨਂ ਮਹਾਰਾਜਾਨਂ ਅਮਚ੍ਚਾ ਪਾਰਿਸਜ੍ਜਾ ਇਮਂ ਲੋਕਂ ਅਨੁਵਿਚਰਨ੍ਤਿ – ‘ਕਚ੍ਚਿ ਬਹੂ ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤੀ’ਤਿ. ਚਾਤੁਦ੍ਦਸਿਂ, ਭਿਕ੍ਖਵੇ, ਪਕ੍ਖਸ੍ਸ ਚਤੁਨ੍ਨਂ ਮਹਾਰਾਜਾਨਂ ਪੁਤ੍ਤਾ ਇਮਂ ਲੋਕਂ ਅਨੁਵਿਚਰਨ੍ਤਿ – ‘ਕਚ੍ਚਿ ਬਹੂ ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤੀ’ਤਿ. ਤਦਹੁ, ਭਿਕ੍ਖਵੇ, ਉਪੋਸਥੇ ਪਨ੍ਨਰਸੇ ਚਤ੍ਤਾਰੋ ਮਹਾਰਾਜਾਨੋ ਸਾਮਞ੍ਞੇਵ ਇਮਂ ਲੋਕਂ ਅਨੁਵਿਚਰਨ੍ਤਿ – ‘ਕਚ੍ਚਿ ਬਹੂ ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤੀ’’’ਤਿ.

‘‘ਸਚੇ, ਭਿਕ੍ਖਵੇ, ਅਪ੍ਪਕਾ ਹੋਨ੍ਤਿ ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤਿ. ਤਮੇਨਂ, ਭਿਕ੍ਖਵੇ, ਚਤ੍ਤਾਰੋ ਮਹਾਰਾਜਾਨੋ ਦੇਵਾਨਂ ਤਾਵਤਿਂਸਾਨਂ ਸੁਧਮ੍ਮਾਯ ਸਭਾਯ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਆਰੋਚੇਨ੍ਤਿ – ‘ਅਪ੍ਪਕਾ ਖੋ, ਮਾਰਿਸਾ, ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤੀ’ਤਿ. ਤੇਨ ਖੋ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਅਨਤ੍ਤਮਨਾ ਹੋਨ੍ਤਿ – ‘ਦਿਬ੍ਬਾ ਵਤ, ਭੋ, ਕਾਯਾ ਪਰਿਹਾਯਿਸ੍ਸਨ੍ਤਿ, ਪਰਿਪੂਰਿਸ੍ਸਨ੍ਤਿ ਅਸੁਰਕਾਯਾ’’’ਤਿ.

‘‘ਸਚੇ ਪਨ, ਭਿਕ੍ਖਵੇ, ਬਹੂ ਹੋਨ੍ਤਿ ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤਿ. ਤਮੇਨਂ, ਭਿਕ੍ਖਵੇ, ਚਤ੍ਤਾਰੋ ਮਹਾਰਾਜਾਨੋ ਦੇਵਾਨਂ ਤਾਵਤਿਂਸਾਨਂ ਸੁਧਮ੍ਮਾਯ ਸਭਾਯ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਆਰੋਚੇਨ੍ਤਿ – ‘ਬਹੂ ਖੋ, ਮਾਰਿਸਾ, ਮਨੁਸ੍ਸਾ ਮਨੁਸ੍ਸੇਸੁ ਮਤ੍ਤੇਯ੍ਯਾ ਪੇਤ੍ਤੇਯ੍ਯਾ ਸਾਮਞ੍ਞਾ ਬ੍ਰਹ੍ਮਞ੍ਞਾ ਕੁਲੇ ਜੇਟ੍ਠਾਪਚਾਯਿਨੋ ਉਪੋਸਥਂ ਉਪਵਸਨ੍ਤਿ ਪਟਿਜਾਗਰੋਨ੍ਤਿ ਪੁਞ੍ਞਾਨਿ ਕਰੋਨ੍ਤੀ’ਤਿ. ਤੇਨ, ਭਿਕ੍ਖਵੇ, ਦੇਵਾ ਤਾਵਤਿਂਸਾ ਅਤ੍ਤਮਨਾ ਹੋਨ੍ਤਿ – ‘ਦਿਬ੍ਬਾ ਵਤ, ਭੋ, ਕਾਯਾ ਪਰਿਪੂਰਿਸ੍ਸਨ੍ਤਿ, ਪਰਿਹਾਯਿਸ੍ਸਨ੍ਤਿ ਅਸੁਰਕਾਯਾ’’’ਤਿ.

‘‘ਭੂਤਪੁਬ੍ਬਂ, ਭਿਕ੍ਖਵੇ, ਸਕ੍ਕੋ ਦੇਵਾਨਮਿਨ੍ਦੋ ਦੇਵੇ ਤਾਵਤਿਂਸੇ ਅਨੁਨਯਮਾਨੋ ਤਾਯਂ ਵੇਲਾਯਂ ਇਮਂ ਗਾਥਂ ਅਭਾਸਿ –

‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ;

ਉਪੋਸਥਂ ਉਪਵਸੇਯ੍ਯ, ਯੋਪਿਸ੍ਸ [ਯੋਪਸ੍ਸ (ਸੀ. ਸ੍ਯਾ. ਕਂ. ਪੀ.)] ਮਾਦਿਸੋ ਨਰੋ’’ਤਿ.

‘‘ਸਾ ਖੋ ਪਨੇਸਾ, ਭਿਕ੍ਖਵੇ, ਸਕ੍ਕੇਨ ਦੇਵਾਨਮਿਨ੍ਦੇਨ ਗਾਥਾ ਦੁਗ੍ਗੀਤਾ ਨ ਸੁਗੀਤਾ ਦੁਬ੍ਭਾਸਿਤਾ ਨ ਸੁਭਾਸਿਤਾ. ਤਂ ਕਿਸ੍ਸ ਹੇਤੁ? ਸਕ੍ਕੋ ਹਿ, ਭਿਕ੍ਖਵੇ, ਦੇਵਾਨਮਿਨ੍ਦੋ ਅਵੀਤਰਾਗੋ ਅਵੀਤਦੋਸੋ ਅਵੀਤਮੋਹੋ.

‘‘ਯੋ ਚ ਖੋ ਸੋ, ਭਿਕ੍ਖਵੇ, ਭਿਕ੍ਖੁ ਅਰਹਂ ਖੀਣਾਸਵੋ ਵੁਸਿਤਵਾ ਬ੍ਰਹ੍ਮਚਰਿਯੋ ਕਤਕਰਣੀਯੋ ਓਹਿਤਭਾਰੋ ਅਨੁਪ੍ਪਤ੍ਤਸਦਤ੍ਥੋ ਪਰਿਕ੍ਖੀਣਭਵਸਂਯੋਜਨੋ ਸਮ੍ਮਦਞ੍ਞਾ ਵਿਮੁਤ੍ਤੋ, ਤਸ੍ਸ ਖੋ ਏਤਂ, ਭਿਕ੍ਖਵੇ, ਭਿਕ੍ਖੁਨੋ [ਤਸ੍ਸ ਖੋ ਏਤਂ ਭਿਕ੍ਖੁਨੋ (ਸੀ. ਸ੍ਯਾ.), ਤਸ੍ਸ ਖੋ ਏਵਂ ਭਿਕ੍ਖਵੇ ਭਿਕ੍ਖੁਨੋ (ਕ.)] ਕਲ੍ਲਂ ਵਚਨਾਯ –

‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ;

ਉਪੋਸਥਂ ਉਪਵਸੇਯ੍ਯ, ਯੋਪਿਸ੍ਸ ਮਾਦਿਸੋ ਨਰੋ’’ਤਿ.

‘‘ਤਂ ਕਿਸ੍ਸ ਹੇਤੁ? ਸੋ ਹਿ, ਭਿਕ੍ਖਵੇ, ਭਿਕ੍ਖੁ ਵੀਤਰਾਗੋ ਵੀਤਦੋਸੋ ਵੀਤਮੋਹੋ’’ਤਿ. ਸਤ੍ਤਮਂ.