੧. ਬ੍ਰਾਹ੍ਮਣਪਚ੍ਚੋਰੋਹਣੀਸੁਤ੍ਤਂ

੧੬੭. ਤੇਨ ਖੋ ਪਨ ਸਮਯੇਨ ਜਾਣੁਸ੍ਸੋਣਿ ਬ੍ਰਾਹ੍ਮਣੋ ਤਦਹੁਪੋਸਥੇ ਸੀਸਂਨ੍ਹਾਤੋ ਨਵਂ ਖੋਮਯੁਗਂ ਨਿਵਤ੍ਥੋ ਅਲ੍ਲਕੁਸਮੁਟ੍ਠਿਂ ਆਦਾਯ ਭਗਵਤੋ ਅਵਿਦੂਰੇ ਏਕਮਨ੍ਤਂ ਠਿਤੋ ਹੋਤਿ.

ਅਦ੍ਦਸਾ ਖੋ ਭਗਵਾ ਜਾਣੁਸ੍ਸੋਣਿਂ ਬ੍ਰਾਹ੍ਮਣਂ ਤਦਹੁਪੋਸਥੇ ਸੀਸਂਨ੍ਹਾਤਂ ਨਵਂ ਖੋਮਯੁਗਂ ਨਿਵਤ੍ਥਂ ਅਲ੍ਲਕੁਸਮੁਟ੍ਠਿਂ ਆਦਾਯ ਏਕਮਨ੍ਤਂ ਠਿਤਂ. ਦਿਸ੍ਵਾਨ ਜਾਣੁਸ੍ਸੋਣਿਂ ਬ੍ਰਾਹ੍ਮਣਂ ਏਤਦਵੋਚ – ‘‘ਕਿਂ ਨੁ ਤ੍ਵਂ, ਬ੍ਰਾਹ੍ਮਣ, ਤਦਹੁਪੋਸਥੇ ਸੀਸਂਨ੍ਹਾਤੋ ਨਵਂ ਖੋਮਯੁਗਂ ਨਿਵਤ੍ਥੋ ਅਲ੍ਲਕੁਸਮੁਟ੍ਠਿਂ ਆਦਾਯ ਏਕਮਨ੍ਤਂ ਠਿਤੋ? ਕਿਂ ਨ੍ਵਜ੍ਜ ਬ੍ਰਾਹ੍ਮਣਕੁਲਸ੍ਸਾ’’ਤਿ? ‘‘ਪਚ੍ਚੋਰੋਹਣੀ, ਭੋ ਗੋਤਮ, ਅਜ੍ਜ ਬ੍ਰਾਹ੍ਮਣਕੁਲਸ੍ਸਾ’’ਤਿ.

‘‘ਯਥਾ ਕਥਂ ਪਨ, ਬ੍ਰਾਹ੍ਮਣ, ਬ੍ਰਾਹ੍ਮਣਾਨਂ ਪਚ੍ਚੋਰੋਹਣੀ ਹੋਤੀ’’ਤਿ? ‘‘ਇਧ, ਭੋ ਗੋਤਮ, ਬ੍ਰਾਹ੍ਮਣਾ ਤਦਹੁਪੋਸਥੇ ਸੀਸਂਨ੍ਹਾਤਾ ਨਵਂ ਖੋਮਯੁਗਂ ਨਿਵਤ੍ਥਾ ਅਲ੍ਲੇਨ ਗੋਮਯੇਨ ਪਥਵਿਂ ਓਪੁਞ੍ਜਿਤ੍ਵਾ ਹਰਿਤੇਹਿ ਕੁਸੇਹਿ ਪਤ੍ਥਰਿਤ੍ਵਾ ਅਨ੍ਤਰਾ ਚ ਵੇਲਂ ਅਨ੍ਤਰਾ ਚ ਅਗ੍ਯਾਗਾਰਂ ਸੇਯ੍ਯਂ ਕਪ੍ਪੇਨ੍ਤਿ. ਤੇ ਤਂ ਰਤ੍ਤਿਂ ਤਿਕ੍ਖਤ੍ਤੁਂ ਪਚ੍ਚੁਟ੍ਠਾਯ ਪਞ੍ਜਲਿਕਾ ਅਗ੍ਗਿਂ ਨਮਸ੍ਸਨ੍ਤਿ – ‘ਪਚ੍ਚੋਰੋਹਾਮ ਭਵਨ੍ਤਂ, ਪਚ੍ਚੋਰੋਹਾਮ ਭਵਨ੍ਤ’ਨ੍ਤਿ. ਬਹੁਕੇਨ ਚ ਸਪ੍ਪਿਤੇਲਨਵਨੀਤੇਨ ਅਗ੍ਗਿਂ ਸਨ੍ਤਪ੍ਪੇਨ੍ਤਿ. ਤਸ੍ਸਾ ਚ ਰਤ੍ਤਿਯਾ ਅਚ੍ਚਯੇਨ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਬ੍ਰਾਹ੍ਮਣੇ ਸਨ੍ਤਪ੍ਪੇਨ੍ਤਿ. ਏਵਂ, ਭੋ ਗੋਤਮ, ਬ੍ਰਾਹ੍ਮਣਾਨਂ ਪਚ੍ਚੋਰੋਹਣੀ ਹੋਤੀ’’ਤਿ.

‘‘ਅਞ੍ਞਥਾ ਖੋ, ਬ੍ਰਾਹ੍ਮਣ, ਬ੍ਰਾਹ੍ਮਣਾਨਂ ਪਚ੍ਚੋਰੋਹਣੀ ਹੋਤਿ, ਅਞ੍ਞਥਾ ਚ ਪਨ ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣੀ ਹੋਤੀ’’ਤਿ. ‘‘ਯਥਾ ਕਥਂ ਪਨ, ਭੋ ਗੋਤਮ, ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣੀ ਹੋਤਿ? ਸਾਧੁ ਮੇ ਭਵਂ ਗੋਤਮੋ ਤਥਾ ਧਮ੍ਮਂ ਦੇਸੇਤੁ ਯਥਾ ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣੀ ਹੋਤੀ’’ਤਿ.

‘‘ਤੇਨ ਹਿ, ਬ੍ਰਾਹ੍ਮਣ, ਸੁਣਾਹਿ, ਸਾਧੁਕਂ ਮਨਸਿ ਕਰੋਹਿ; ਭਾਸਿਸ੍ਸਾਮੀ’’ਤਿ. ‘‘ਏਵਂ, ਭੋ’’ਤਿ ਖੋ ਜਾਣੁਸ੍ਸੋਣਿ ਬ੍ਰਾਹ੍ਮਣੋ ਭਗਵਤੋ ਪਚ੍ਚਸ੍ਸੋਸਿ. ਭਗਵਾ ਏਤਦਵੋਚ –

‘‘ਇਧ, ਬ੍ਰਾਹ੍ਮਣ, ਅਰਿਯਸਾਵਕੋ ਇਤਿ ਪਟਿਸਞ੍ਚਿਕ੍ਖਤਿ – ‘ਪਾਣਾਤਿਪਾਤਸ੍ਸ ਖੋ ਪਾਪਕੋ ਵਿਪਾਕੋ ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾ’ ਤਿ. ਸੋ ਇਤਿ ਪਟਿਸਙ੍ਖਾਯ ਪਾਣਾਤਿਪਾਤਂ ਪਜਹਤਿ; ਪਾਣਾਤਿਪਾਤਾ ਪਚ੍ਚੋਰੋਹਤਿ.

…ਅਦਿਨ੍ਨਾਦਾਨਸ੍ਸ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਅਦਿਨ੍ਨਾਦਾਨਂ ਪਜਹਤਿ; ਅਦਿਨ੍ਨਾਦਾਨਾ ਪਚ੍ਚੋਰੋਹਤਿ.

…ਕਾਮੇਸੁਮਿਚ੍ਛਾਚਾਰਸ੍ਸ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਕਾਮੇਸੁਮਿਚ੍ਛਾਚਾਰਂ ਪਜਹਤਿ; ਕਾਮੇਸੁਮਿਚ੍ਛਾਚਾਰਾ ਪਚ੍ਚੋਰੋਹਤਿ.

…ਮੁਸਾਵਾਦਸ੍ਸ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਮੁਸਾਵਾਦਂ ਪਜਹਤਿ; ਮੁਸਾਵਾਦਾ ਪਚ੍ਚੋਰੋਹਤਿ.

…ਪਿਸੁਣਾਯ ਵਾਚਾਯ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਪਿਸੁਣਂ ਵਾਚਂ ਪਜਹਤਿ; ਪਿਸੁਣਾਯ ਵਾਚਾਯ ਪਚ੍ਚੋਰੋਹਤਿ.

…ਫਰੁਸਾਯ ਵਾਚਾਯ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਫਰੁਸਂ ਵਾਚਂ ਪਜਹਤਿ; ਫਰੁਸਾਯ ਵਾਚਾਯ ਪਚ੍ਚੋਰੋਹਤਿ.

…ਸਮ੍ਫਪ੍ਪਲਾਪਸ੍ਸ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਸਮ੍ਫਪ੍ਪਲਾਪਂ ਪਜਹਤਿ; ਸਮ੍ਫਪ੍ਪਲਾਪਾ ਪਚ੍ਚੋਰੋਹਤਿ.

…ਅਭਿਜ੍ਝਾਯ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਅਭਿਜ੍ਝਂ ਪਜਹਤਿ; ਅਭਿਜ੍ਝਾਯ ਪਚ੍ਚੋਰੋਹਤਿ.

…ਬ੍ਯਾਪਾਦਸ੍ਸ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾਤਿ. ਸੋ ਇਤਿ ਪਟਿਸਙ੍ਖਾਯ ਬ੍ਯਾਪਾਦਂ ਪਜਹਤਿ; ਬ੍ਯਾਪਾਦਾ ਪਚ੍ਚੋਰੋਹਤਿ.

…ਮਿਚ੍ਛਾਦਿਟ੍ਠਿਯਾ ਖੋ ਪਾਪਕੋ ਵਿਪਾਕੋ – ਦਿਟ੍ਠੇ ਚੇਵ ਧਮ੍ਮੇ ਅਭਿਸਮ੍ਪਰਾਯਞ੍ਚਾ’ਤਿ. ਸੋ ਇਤਿ ਪਟਿਸਙ੍ਖਾਯ ਮਿਚ੍ਛਾਦਿਟ੍ਠਿਂ ਪਜਹਤਿ; ਮਿਚ੍ਛਾਦਿਟ੍ਠਿਯਾ ਪਚ੍ਚੋਰੋਹਤਿ. ਏਵਂ ਖੋ, ਬ੍ਰਾਹ੍ਮਣ, ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣੀ ਹੋਤੀ’’ਤਿ.

‘‘ਅਞ੍ਞਥਾ ਖੋ, ਭੋ ਗੋਤਮ, ਬ੍ਰਾਹ੍ਮਣਾਨਂ ਪਚ੍ਚੋਰੋਹਣੀ ਹੋਤਿ, ਅਞ੍ਞਥਾ ਚ ਪਨ ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣੀ ਹੋਤਿ. ਇਮਿਸ੍ਸਾ, ਭੋ ਗੋਤਮ, ਅਰਿਯਸ੍ਸ ਵਿਨਯੇ ਪਚ੍ਚੋਰੋਹਣਿਯਾ ਬ੍ਰਾਹ੍ਮਣਾਨਂ ਪਚ੍ਚੋਰੋਹਣੀ ਕਲਂ ਨਾਗ੍ਘਤਿ ਸੋਲ਼ਸਿਂ. ਅਭਿਕ੍ਕਨ੍ਤਂ, ਭੋ ਗੋਤਮ…ਪੇ… ਉਪਾਸਕਂ ਮਂ ਭਵਂ ਗੋਤਮੋ ਧਾਰੇਤੁ ਅਜ੍ਜਤਗ੍ਗੇ ਪਾਣੁਪੇਤਂ ਸਰਣਂ ਗਤ’’ਨ੍ਤਿ. ਪਠਮਂ.