੭. ਨਪ੍ਪਿਯਸੁਤ੍ਤਂ

੮੭. ਤਤ੍ਰ ਖੋ ਭਗਵਾ ਕਾਲਙ੍ਕਤਂ ਭਿਕ੍ਖੁਂ [ਕਲਨ੍ਦਕਂ ਭਿਕ੍ਖੁਂ (ਸੀ.), ਕਾਲ਼ਕਭਿਕ੍ਖੁਂ (ਸ੍ਯਾ.)] ਆਰਬ੍ਭ ਭਿਕ੍ਖੂ ਆਮਨ੍ਤੇਸਿ – ‘‘ਭਿਕ੍ਖਵੋ’’ਤਿ. ‘‘ਭਦਨ੍ਤੇ’’ਤਿ ਤੇ ਭਿਕ੍ਖੂ ਭਗਵਤੋ ਪਚ੍ਚਸ੍ਸੋਸੁਂ. ਭਗਵਾ ਏਤਦਵੋਚ –

‘‘ਇਧ, ਭਿਕ੍ਖਵੇ, ਭਿਕ੍ਖੁ ਅਧਿਕਰਣਿਕੋ ਹੋਤਿ, ਅਧਿਕਰਣਸਮਥਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਧਿਕਰਣਿਕੋ ਹੋਤਿ ਅਧਿਕਰਣਸਮਥਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਨ ਸਿਕ੍ਖਾਕਾਮੋ ਹੋਤਿ, ਸਿਕ੍ਖਾਸਮਾਦਾਨਸ੍ਸ [ਸਿਕ੍ਖਾਕਾਮਸ੍ਸ (ਕ.)] ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਨ ਸਿਕ੍ਖਾਕਾਮੋ ਹੋਤਿ ਸਿਕ੍ਖਾਸਮਾਦਾਨਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਪਾਪਿਚ੍ਛੋ ਹੋਤਿ, ਇਚ੍ਛਾਵਿਨਯਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਪਾਪਿਚ੍ਛੋ ਹੋਤਿ ਇਚ੍ਛਾਵਿਨਯਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਕੋਧਨੋ ਹੋਤਿ, ਕੋਧਵਿਨਯਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਕੋਧਨੋ ਹੋਤਿ ਕੋਧਵਿਨਯਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਮਕ੍ਖੀ ਹੋਤਿ, ਮਕ੍ਖਵਿਨਯਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਮਕ੍ਖੀ ਹੋਤਿ ਮਕ੍ਖਵਿਨਯਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਸਠੋ ਹੋਤਿ, ਸਾਠੇਯ੍ਯਵਿਨਯਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਸਠੋ ਹੋਤਿ ਸਾਠੇਯ੍ਯਵਿਨਯਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਮਾਯਾਵੀ ਹੋਤਿ, ਮਾਯਾਵਿਨਯਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਮਾਯਾਵੀ ਹੋਤਿ ਮਾਯਾਵਿਨਯਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਧਮ੍ਮਾਨਂ ਨ ਨਿਸਾਮਕਜਾਤਿਕੋ ਹੋਤਿ, ਧਮ੍ਮਨਿਸਨ੍ਤਿਯਾ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਧਮ੍ਮਾਨਂ ਨ ਨਿਸਾਮਕਜਾਤਿਕੋ ਹੋਤਿ ਧਮ੍ਮਨਿਸਨ੍ਤਿਯਾ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਨ ਪਟਿਸਲ੍ਲੀਨੋ ਹੋਤਿ, ਪਟਿਸਲ੍ਲਾਨਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਨ ਪਟਿਸਲ੍ਲੀਨੋ ਹੋਤਿ ਪਟਿਸਲ੍ਲਾਨਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਸਬ੍ਰਹ੍ਮਚਾਰੀਨਂ ਨ ਪਟਿਸਨ੍ਥਾਰਕੋ [ਪਟਿਸਨ੍ਧਾਰਕੋ (ਕ.)] ਹੋਤਿ, ਪਟਿਸਨ੍ਥਾਰਕਸ੍ਸ ਨ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਸਬ੍ਰਹ੍ਮਚਾਰੀਨਂ ਨ ਪਟਿਸਨ੍ਥਾਰਕੋ ਹੋਤਿ ਪਟਿਸਨ੍ਥਾਰਕਸ੍ਸ ਨ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਨ ਪਿਯਤਾਯ ਨ ਗਰੁਤਾਯ ਨ ਭਾਵਨਾਯ ਨ ਸਾਮਞ੍ਞਾਯ ਨ ਏਕੀਭਾਵਾਯ ਸਂਵਤ੍ਤਤਿ.

‘‘ਏਵਰੂਪਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਕਿਞ੍ਚਾਪਿ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਸਬ੍ਰਹ੍ਮਚਾਰੀ ਸਕ੍ਕਰੇਯ੍ਯੁਂ ਗਰੁਂ ਕਰੇਯ੍ਯੁਂ [ਗਰੁਕਰੇਯ੍ਯੁਂ (ਸੀ. ਸ੍ਯਾ.)] ਮਾਨੇਯ੍ਯੁਂ ਪੂਜੇਯ੍ਯੁ’ਨ੍ਤਿ, ਅਥ ਖੋ ਨਂ ਸਬ੍ਰਹ੍ਮਚਾਰੀ ਨ ਚੇਵ ਸਕ੍ਕਰੋਨ੍ਤਿ ਨ ਗਰੁਂ ਕਰੋਨ੍ਤਿ [ਗਰੁਕਰੋਨ੍ਤਿ (ਸੀ. ਸ੍ਯਾ.)] ਨ ਮਾਨੇਨ੍ਤਿ ਨ ਪੂਜੇਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਸਬ੍ਰਹ੍ਮਚਾਰੀ ਤੇ ਪਾਪਕੇ ਅਕੁਸਲੇ ਧਮ੍ਮੇ ਅਪ੍ਪਹੀਨੇ ਸਮਨੁਪਸ੍ਸਨ੍ਤਿ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਅਸ੍ਸਖਲ਼ੁਙ੍ਕਸ੍ਸ ਕਿਞ੍ਚਾਪਿ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਮਨੁਸ੍ਸਾ ਆਜਾਨੀਯਟ੍ਠਾਨੇ ਠਪੇਯ੍ਯੁਂ, ਆਜਾਨੀਯਭੋਜਨਞ੍ਚ ਭੋਜੇਯ੍ਯੁਂ, ਆਜਾਨੀਯਪਰਿਮਜ੍ਜਨਞ੍ਚ ਪਰਿਮਜ੍ਜੇਯ੍ਯੁ’ਨ੍ਤਿ, ਅਥ ਖੋ ਨਂ ਮਨੁਸ੍ਸਾ ਨ ਚੇਵ ਆਜਾਨੀਯਟ੍ਠਾਨੇ ਠਪੇਨ੍ਤਿ ਨ ਚ ਆਜਾਨੀਯਭੋਜਨਂ ਭੋਜੇਨ੍ਤਿ ਨ ਚ ਆਜਾਨੀਯਪਰਿਮਜ੍ਜਨਂ ਪਰਿਮਜ੍ਜਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਮਨੁਸ੍ਸਾ ਤਾਨਿ ਸਾਠੇਯ੍ਯਾਨਿ ਕੂਟੇਯ੍ਯਾਨਿ ਜਿਮ੍ਹੇਯ੍ਯਾਨਿ ਵਙ੍ਕੇਯ੍ਯਾਨਿ ਅਪ੍ਪਹੀਨਾਨਿ ਸਮਨੁਪਸ੍ਸਨ੍ਤਿ. ਏਵਮੇਵਂ ਖੋ, ਭਿਕ੍ਖਵੇ, ਏਵਰੂਪਸ੍ਸ ਭਿਕ੍ਖੁਨੋ ਕਿਞ੍ਚਾਪਿ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਸਬ੍ਰਹ੍ਮਚਾਰੀ ਸਕ੍ਕਰੇਯ੍ਯੁਂ ਗਰੁਂ ਕਰੇਯ੍ਯੁਂ ਮਾਨੇਯ੍ਯੁਂ ਪੂਜੇਯ੍ਯੁ’ਨ੍ਤਿ, ਅਥ ਖੋ ਨਂ ਸਬ੍ਰਹ੍ਮਚਾਰੀ ਨ ਚੇਵ ਸਕ੍ਕਰੋਨ੍ਤਿ ਨ ਗਰੁਂ ਕਰੋਨ੍ਤਿ ਨ ਮਾਨੇਨ੍ਤਿ ਨ ਪੂਜੇਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਸਬ੍ਰਹ੍ਮਚਾਰੀ ਤੇ ਪਾਪਕੇ ਅਕੁਸਲੇ ਧਮ੍ਮੇ ਅਪ੍ਪਹੀਨੇ ਸਮਨੁਪਸ੍ਸਨ੍ਤਿ.

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਨ ਅਧਿਕਰਣਿਕੋ ਹੋਤਿ, ਅਧਿਕਰਣਸਮਥਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਨ ਅਧਿਕਰਣਿਕੋ ਹੋਤਿ ਅਧਿਕਰਣਸਮਥਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਪਿਯਤਾਯ ਗਰੁਤਾਯ ਭਾਵਨਾਯ ਸਾਮਞ੍ਞਾਯ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਸਿਕ੍ਖਾਕਾਮੋ ਹੋਤਿ, ਸਿਕ੍ਖਾਸਮਾਦਾਨਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਸਿਕ੍ਖਾਕਾਮੋ ਹੋਤਿ ਸਿਕ੍ਖਾਸਮਾਦਾਨਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਪਿਯਤਾਯ ਗਰੁਤਾਯ ਭਾਵਨਾਯ ਸਾਮਞ੍ਞਾਯ ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਅਪ੍ਪਿਚ੍ਛੋ ਹੋਤਿ, ਇਚ੍ਛਾਵਿਨਯਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਪ੍ਪਿਚ੍ਛੋ ਹੋਤਿ ਇਚ੍ਛਾਵਿਨਯਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਅਕ੍ਕੋਧਨੋ ਹੋਤਿ, ਕੋਧਵਿਨਯਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਕ੍ਕੋਧਨੋ ਹੋਤਿ ਕੋਧਵਿਨਯਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਅਮਕ੍ਖੀ ਹੋਤਿ, ਮਕ੍ਖਵਿਨਯਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਮਕ੍ਖੀ ਹੋਤਿ ਮਕ੍ਖਵਿਨਯਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਅਸਠੋ ਹੋਤਿ, ਸਾਠੇਯ੍ਯਵਿਨਯਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਸਠੋ ਹੋਤਿ ਸਾਠੇਯ੍ਯਵਿਨਯਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਅਮਾਯਾਵੀ ਹੋਤਿ, ਮਾਯਾਵਿਨਯਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਅਮਾਯਾਵੀ ਹੋਤਿ ਮਾਯਾਵਿਨਯਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਧਮ੍ਮਾਨਂ ਨਿਸਾਮਕਜਾਤਿਕੋ ਹੋਤਿ, ਧਮ੍ਮਨਿਸਨ੍ਤਿਯਾ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਧਮ੍ਮਾਨਂ ਨਿਸਾਮਕਜਾਤਿਕੋ ਹੋਤਿ ਧਮ੍ਮਨਿਸਨ੍ਤਿਯਾ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਪਟਿਸਲ੍ਲੀਨੋ ਹੋਤਿ, ਪਟਿਸਲ੍ਲਾਨਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਪਟਿਸਲ੍ਲੀਨੋ ਹੋਤਿ ਪਟਿਸਲ੍ਲਾਨਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ…ਪੇ… ਏਕੀਭਾਵਾਯ ਸਂਵਤ੍ਤਤਿ.

‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਸਬ੍ਰਹ੍ਮਚਾਰੀਨਂ ਪਟਿਸਨ੍ਥਾਰਕੋ ਹੋਤਿ, ਪਟਿਸਨ੍ਥਾਰਕਸ੍ਸ ਵਣ੍ਣਵਾਦੀ. ਯਮ੍ਪਿ, ਭਿਕ੍ਖਵੇ, ਭਿਕ੍ਖੁ ਸਬ੍ਰਹ੍ਮਚਾਰੀਨਂ ਪਟਿਸਨ੍ਥਾਰਕੋ ਹੋਤਿ ਪਟਿਸਨ੍ਥਾਰਕਸ੍ਸ ਵਣ੍ਣਵਾਦੀ, ਅਯਮ੍ਪਿ ਧਮ੍ਮੋ ਪਿਯਤਾਯ ਗਰੁਤਾਯ ਭਾਵਨਾਯ ਸਾਮਞ੍ਞਾਯ ਏਕੀਭਾਵਾਯ ਸਂਵਤ੍ਤਤਿ.

‘‘ਏਵਰੂਪਸ੍ਸ, ਭਿਕ੍ਖਵੇ, ਭਿਕ੍ਖੁਨੋ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਸਬ੍ਰਹ੍ਮਚਾਰੀ ਸਕ੍ਕਰੇਯ੍ਯੁਂ ਗਰੁਂ ਕਰੇਯ੍ਯੁਂ ਮਾਨੇਯ੍ਯੁਂ ਪੂਜੇਯ੍ਯੁ’ਨ੍ਤਿ, ਅਥ ਖੋ ਨਂ ਸਬ੍ਰਹ੍ਮਚਾਰੀ ਸਕ੍ਕਰੋਨ੍ਤਿ ਗਰੁਂ ਕਰੋਨ੍ਤਿ ਮਾਨੇਨ੍ਤਿ ਪੂਜੇਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਸਬ੍ਰਹ੍ਮਚਾਰੀ ਤੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇ ਸਮਨੁਪਸ੍ਸਨ੍ਤਿ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਭਦ੍ਦਸ੍ਸ ਅਸ੍ਸਾਜਾਨੀਯਸ੍ਸ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਮਨੁਸ੍ਸਾ ਆਜਾਨੀਯਟ੍ਠਾਨੇ ਠਪੇਯ੍ਯੁਂ, ਆਜਾਨੀਯਭੋਜਨਞ੍ਚ ਭੋਜੇਯ੍ਯੁਂ, ਆਜਾਨੀਯਪਰਿਮਜ੍ਜਨਞ੍ਚ ਪਰਿਮਜ੍ਜੇਯ੍ਯੁ’ਨ੍ਤਿ, ਅਥ ਖੋ ਨਂ ਮਨੁਸ੍ਸਾ ਆਜਾਨੀਯਟ੍ਠਾਨੇ ਚ ਠਪੇਨ੍ਤਿ ਆਜਾਨੀਯਭੋਜਨਞ੍ਚ ਭੋਜੇਨ੍ਤਿ ਆਜਾਨੀਯਪਰਿਮਜ੍ਜਨਞ੍ਚ ਪਰਿਮਜ੍ਜਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਮਨੁਸ੍ਸਾ ਤਾਨਿ ਸਾਠੇਯ੍ਯਾਨਿ ਕੂਟੇਯ੍ਯਾਨਿ ਜਿਮ੍ਹੇਯ੍ਯਾਨਿ ਵਙ੍ਕੇਯ੍ਯਾਨਿ ਪਹੀਨਾਨਿ ਸਮਨੁਪਸ੍ਸਨ੍ਤਿ.

‘‘ਏਵਮੇਵਂ ਖੋ, ਭਿਕ੍ਖਵੇ, ਏਵਰੂਪਸ੍ਸ ਭਿਕ੍ਖੁਨੋ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ – ‘ਅਹੋ ਵਤ ਮਂ ਸਬ੍ਰਹ੍ਮਚਾਰੀ ਸਕ੍ਕਰੇਯ੍ਯੁਂ ਗਰੁਂ ਕਰੇਯ੍ਯੁਂ ਮਾਨੇਯ੍ਯੁਂ ਪੂਜੇਯ੍ਯੁ’ਨ੍ਤਿ, ਅਥ ਖੋ ਨਂ ਸਬ੍ਰਹ੍ਮਚਾਰੀ ਸਕ੍ਕਰੋਨ੍ਤਿ ਗਰੁਂ ਕਰੋਨ੍ਤਿ ਮਾਨੇਨ੍ਤਿ ਪੂਜੇਨ੍ਤਿ. ਤਂ ਕਿਸ੍ਸ ਹੇਤੁ? ਤਥਾਹਿਸ੍ਸ, ਭਿਕ੍ਖਵੇ, ਵਿਞ੍ਞੂ ਸਬ੍ਰਹ੍ਮਚਾਰੀ ਤੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇ ਸਮਨੁਪਸ੍ਸਨ੍ਤੀ’’ਤਿ. ਸਤ੍ਤਮਂ.