੪. ਉਪਸਮ੍ਪਦਾਸੁਤ੍ਤਂ

੩੪. ‘‘ਕਤਿਹਿ ਨੁ ਖੋ, ਭਨ੍ਤੇ, ਧਮ੍ਮੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬ’’ਨ੍ਤਿ? ‘‘ਦਸਹਿ ਖੋ, ਉਪਾਲਿ, ਧਮ੍ਮੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬਂ. ਕਤਮੇਹਿ ਦਸਹਿ? ਇਧੁਪਾਲਿ, ਭਿਕ੍ਖੁ ਸੀਲਵਾ ਹੋਤਿ, ਪਾਤਿਮੋਕ੍ਖਸਂਵਰਸਂਵੁਤੋ ਵਿਹਰਤਿ ਆਚਾਰਗੋਚਰਸਮ੍ਪਨ੍ਨੋ ਅਣੁਮਤ੍ਤੇਸੁ ਵਜ੍ਜੇਸੁ ਭਯਦਸ੍ਸਾਵੀ, ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੁ; ਬਹੁਸ੍ਸੁਤੋ ਹੋਤਿ ਸੁਤਧਰੋ ਸੁਤਸਨ੍ਨਿਚਯੋ, ਯੇ ਤੇ ਧਮ੍ਮਾ ਆਦਿਕਲ੍ਯਾਣਾ ਮਜ੍ਝੇਕਲ੍ਯਾਣਾ ਪਰਿਯੋਸਾਨਕਲ੍ਯਾਣਾ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਅਭਿਵਦਨ੍ਤਿ, ਤਥਾਰੂਪਾਸ੍ਸ ਧਮ੍ਮਾ ਬਹੁਸ੍ਸੁਤਾ ਹੋਨ੍ਤਿ ਧਾਤਾ ਵਚਸਾ ਪਰਿਚਿਤਾ ਮਨਸਾਨੁਪੇਕ੍ਖਿਤਾ ਦਿਟ੍ਠਿਯਾ ਸੁਪ੍ਪਟਿਵਿਦ੍ਧਾ; ਪਾਤਿਮੋਕ੍ਖਂ ਖੋ ਪਨਸ੍ਸ ਵਿਤ੍ਥਾਰੇਨ ਸ੍ਵਾਗਤਂ ਹੋਤਿ ਸੁਵਿਭਤ੍ਤਂ ਸੁਪ੍ਪਵਤ੍ਤਂ ਸੁਵਿਨਿਚ੍ਛਿਤਂ ਸੁਤ੍ਤਸੋ ਅਨੁਬ੍ਯਞ੍ਜਨਸੋ; ਪਟਿਬਲੋ ਹੋਤਿ ਗਿਲਾਨਂ ਉਪਟ੍ਠਾਤੁਂ ਵਾ ਉਪਟ੍ਠਾਪੇਤੁਂ ਵਾ; ਪਟਿਬਲੋ ਹੋਤਿ ਅਨਭਿਰਤਿਂ ਵੂਪਕਾਸੇਤੁਂ ਵਾ ਵੂਪਕਾਸਾਪੇਤੁਂ ਵਾ; ਪਟਿਬਲੋ ਹੋਤਿ ਉਪ੍ਪਨ੍ਨਂ ਕੁਕ੍ਕੁਚ੍ਚਂ ਧਮ੍ਮਤੋ ਵਿਨੋਦੇਤੁਂ; ਪਟਿਬਲੋ ਹੋਤਿ ਉਪ੍ਪਨ੍ਨਂ ਦਿਟ੍ਠਿਗਤਂ ਧਮ੍ਮਤੋ ਵਿਵੇਚੇਤੁਂ; ਪਟਿਬਲੋ ਹੋਤਿ ਅਧਿਸੀਲੇ ਸਮਾਦਪੇਤੁਂ; ਪਟਿਬਲੋ ਹੋਤਿ ਅਧਿਚਿਤ੍ਤੇ ਸਮਾਦਪੇਤੁਂ; ਪਟਿਬਲੋ ਹੋਤਿ ਅਧਿਪਞ੍ਞਾਯ ਸਮਾਦਪੇਤੁਂ. ਇਮੇਹਿ ਖੋ, ਉਪਾਲਿ, ਦਸਹਿ ਧਮ੍ਮੇਹਿ ਸਮਨ੍ਨਾਗਤੇਨ ਭਿਕ੍ਖੁਨਾ ਉਪਸਮ੍ਪਾਦੇਤਬ੍ਬ’’ਨ੍ਤਿ. ਚਤੁਤ੍ਥਂ.