અપરગાથાસઙ્ગણિકં

૧. ચોદનાદિપુચ્છાવિસ્સજ્જના

૩૫૯. ચોદના કિમત્થાય, સારણા કિસ્સ કારણા;

સઙ્ઘો કિમત્થાય, મતિકમ્મં પન કિસ્સ કારણા.

ચોદના સારણત્થાય, નિગ્ગહત્થાય સારણા;

સઙ્ઘો પરિગ્ગહત્થાય, મતિકમ્મં પન પાટિયેક્કં.

મા ખો તુરિતો અભણિ, મા ખો ચણ્ડિકતો ભણિ;

મા ખો પટિઘં જનયિ, સચે અનુવિજ્જકો તુવં.

મા ખો સહસા અભણિ, કથં વિગ્ગાહિકં અનત્થસંહિતં;

સુત્તે વિનયે અનુલોમે, પઞ્ઞત્તે અનુલોમિકે.

અનુયોગવત્તં નિસામય, કુસલેન બુદ્ધિમતા કતં;

સુવુત્તં સિક્ખાપદાનુલોમિકં, ગતિં ન નાસેન્તો સમ્પરાયિકં;

હિતેસી અનુયુઞ્જસ્સુ, કાલેનત્થૂપસંહિતં.

ચુદિતસ્સ ચ ચોદકસ્સ ચ;

સહસા વોહારં મા પધારેસિ;

ચોદકો આહ આપન્નોતિ;

ચુદિતકો આહ અનાપન્નોતિ.

ઉભો અનુક્ખિપન્તો, પટિઞ્ઞાનુસન્ધિતેન કારયે;

પટિઞ્ઞા લજ્જીસુ કતા, અલજ્જીસુ એવં ન વિજ્જતિ;

બહુમ્પિ અલજ્જી ભાસેય્ય, વત્તાનુસન્ધિતેન [વુત્તાનુસન્ધિતેન (સી. સ્યા. ક.)] કારયે.

અલજ્જી કીદિસો હોતિ, પટિઞ્ઞા યસ્સ ન રૂહતિ;

એતઞ્ચ [એવઞ્ચ (ક.)] તાહં પુચ્છામિ, કીદિસો વુચ્ચતિ અલજ્જી પુગ્ગલો.

સઞ્ચિચ્ચ આપત્તિં આપજ્જતિ, આપત્તિં પરિગૂહતિ;

અગતિગમનઞ્ચ ગચ્છતિ, એદિસો વુચ્ચતિ અલજ્જીપુગ્ગલો.

સચ્ચં અહમ્પિ જાનામિ, એદિસો વુચ્ચતિ અલજ્જીપુગ્ગલો;

અઞ્ઞઞ્ચ તાહં પુચ્છામિ, કીદિસો વુચ્ચતિ લજ્જીપુગ્ગલો.

સઞ્ચિચ્ચ આપત્તિં નાપજ્જતિ, આપત્તિં ન પરિગૂહતિ;

અગતિગમનં ન ગચ્છતિ, એદિસો વુચ્ચતિ લજ્જીપુગ્ગલો.

સચ્ચં અહમ્પિ જાનામિ, એદિસો વુચ્ચતિ લજ્જીપુગ્ગલો;

અઞ્ઞઞ્ચ તાહં પુચ્છામિ, કીદિસો વુચ્ચતિ અધમ્મચોદકો.

અકાલે ચોદેતિ અભૂતેન;

ફરુસેન અનત્થસંહિતેન;

દોસન્તરો ચોદેતિ નો મેત્તાચિત્તો;

એદિસો વુચ્ચતિ અધમ્મચોદકો.

સચ્ચં અહમ્પિ જાનામિ, એદિસો વુચ્ચતિ અધમ્મચોદકો;

અઞ્ઞઞ્ચ તાહં પુચ્છામિ, કીદિસો વુચ્ચતિ ધમ્મચોદકો.

કાલેન ચોદેતિ ભૂતેન, સણ્હેન અત્થસંહિતેન;

મેત્તાચિત્તો ચોદેતિ નો દોસન્તરો;

એદિસો વુચ્ચતિ ધમ્મચોદકો.

સચ્ચં અહમ્પિ જાનામિ, એદિસો વુચ્ચતિ ધમ્મચોદકો;

અઞ્ઞઞ્ચ તાહં પુચ્છામિ, કીદિસો વુચ્ચતિ બાલચોદકો.

પુબ્બાપરં ન જાનાતિ, પુબ્બાપરસ્સ અકોવિદો;

અનુસન્ધિવચનપથં ન જાનાતિ;

અનુસન્ધિવચનપથસ્સ અકોવિદો;

એદિસો વુચ્ચતિ બાલચોદકો.

સચ્ચં અહમ્પિ જાનામિ, એદિસો વુચ્ચતિ બાલચોદકો;

અઞ્ઞઞ્ચ તાહં પુચ્છામિ, કીદિસો વુચ્ચતિ પણ્ડિતચોદકો.

પુબ્બાપરમ્પિ જાનાતિ, પુબ્બાપરસ્સ કોવિદો;

અનુસન્ધિવચનપથં જાનાતિ, અનુસન્ધિવચનપથસ્સ કોવિદો;

એદિસો વુચ્ચતિ પણ્ડિતચોદકો.

સચ્ચં અહમ્પિ જાનામિ, એદિસો વુચ્ચતિ પણ્ડિતચોદકો;

અઞ્ઞઞ્ચ તાહં પુચ્છામિ, ચોદના કિન્તિ વુચ્ચતિ.

સીલવિપત્તિયા ચોદેતિ, અથો આચારદિટ્ઠિયા;

આજીવેનપિ ચોદેતિ, ચોદના તેન વુચ્ચતીતિ.

અપરં ગાથાસઙ્ગણિકં નિટ્ઠિતં.